İsrail ordusu HƏMAS-la toqquşmalarda daha 16 hərbçisinin həlak olduğunu açıqlayıb. Sozcu.az xəbər verir ki, bu barədə TRT məlumat yayıb. Məlumata görə, HƏMAS-ın ötən gün başlayan və bu gün də davam edən hücumlarında həlak olan İsrail əsgərinin sayı 73-ə yüksəlib. Qeyd edək ki, 7 oktyabrda HƏMAS və “İslami-Cihad”ın hücumu ilə İsraildə müharibə başlayıb.

Fələstinin HƏMAS radikal təşkilatının yaraqlılarının İsrailə hücumu İsrail kəşfiyyatının uğursuzluğu idi. Sozcu.az xəbər verir ki, bu barədə “Vaşinqton Post”un xarici siyasət üzrə köşə yazarı Devid İqnates öz köşə yazısında bildirib. O, yaraqlıların hücumunu 2001-ci il sentyabrın 11-də ABŞ-da baş verən silsilə terror hücumları ilə müqayisə edib: “Əsl kəşfiyyat uğursuzluqları sadəcə məlumat çatışmazlığından deyil, onu dərk edə bilməməkdən irəli gəlir. İsrailli mütəxəssislər rəqiblərinin fərasət və məharətini başa düşmədilər. İsrailli analitiklər HƏMAS yaraqlılarının Qəzza zolağından paraplanlarla düşə biləcəyini nəzərə almayıblar”. İqnates qeyd edib ki, İsrail hakimiyyəti düşmənlərinin eyni vaxtda havada, dənizdə və quruda fəaliyyət göstərmək qabiliyyətini qiymətləndirə bilməyib: “İsrail kəşfiyyatı da həmçinin hücumla bağlı HƏMAS və müttəfiqlərinin sirr saxlaya biləcəyini nəzərə almayıb. Kəşfiyyat uğursuzluqları həddən artıq özünə inamla başlayır. HƏMAS-ın hücumu İsrailin illər ərazində bərpa etməyə çalışacağı bir kəşfiyyat uğursuzluğudur”. Müəllif onu da vurğulayıb ki, hücumdan aylar əvvəl Netanyahunun məhkəmə islahatına görə “İsrail sanki parçalanır” kimi təəssürat yaranırdı.

BMT missiyası növbəti dəfə Qarabağa səfər edib. Sozcu.az xəbər verir ki, missiya üzvləri bu gün Ağdamdan Əsgəran-Xankəndi istiqamətində hərəkət edib. Qeyd edək ki, BMT missiyası bundan öncə oktyabrın 1-də Qarabağda olub. Missiyanın məqsədi vəziyyətlə yerində tanış olmaq və sakinlərin humanitar ehtiyaclarını müəyyən etməkdir.

BMT Təhlükəsizlik Şurası Qəzza zolağı ətrafındakı vəziyyəti müzakirə edib, lakin indiki mərhələdə heç bir ümumi sənəd qəbul etməyib. Sozcu.az xəbər verir ki, bu barədə iclasın iştirakçıları iclas başa çatdıqdan sonra məlumat veriblər. "Biz ümumi bəyanatı müzakirə etmədik, çünki heç kim hər hansı mətn təklifini irəli sürmədi", - Maltanın BMT-dəki daimi nümayəndəsi Vanessa Frezyer jurnalistlərə açıqlamasında deyib. O əlavə edib ki, müzakirə tərəflərin hazırkı vəziyyətdə mülki insanları qorumaq və zorakılığı dayandırmaq üçün nə edə biləcəyi ilə bağlı olub. ABŞ-ın BMT-dəki nümayəndəsinin müavini Robert Vud qeyd edib ki, “Təhlükəsizlik Şurasının üzvləri bu hücumların baş verməməli olduğu barədə razılığa gəliblər”. "Ümid edək ki, vəziyyət daha da pisləşməyəcək. Gərginliyin yayılmasının qarşısını almaq üçün əlimizdən gələni edəcəyik", - Vud əlavə edib.

Qəzzada HƏMAS dəniz qüvvələrinin cənub diviziyasının komandir müavini Məhəmməd Əbu Qalini girov götürülüb. Sozcu.az xəbər verir ki, bu barədə “CaucasianLive” Teleqram kanalı məlumat yayıb. Məlumata görə, Məhəmməd Əbu Qalini İsrail Hərbi Dəniz Qüvvələrinin "Şayetet 13" bölməsi tərəfindən əsir götürülüb.

Qəzza zolağında münaqişə səbəbindən ən azı 73 min insan evini tərk etmək məcburiyyətində qalıb. Sozcu.az xəbər verir ki, bu barədə BMT-nin Yaxın Şərqdəki Fələstinlilərə Yardım işləri üzrə Agentliyinin məlumatında bildirilib. Məlumatda ötən gündən bəri 73 min insanın BMT-nin bölgədəki məktəblərinə yerləşdirildiyi bildirilib.

Səmimi dostluq jestinə görə Azərbaycan xalqına təşəkkür edirəm. Sozcu.az xəbər verir ki, bu barədə İsrailin Azərbaycandakı səfiri Corc Dik X sosial şəbəkəsindəki hesabında yazıb. “Sevgi paylaşımları seli, səfirliyimizin qapısındakı güllər, sosial şəbəkələrdəki yazılar - bunlar tariximizin bu qaranlıq vaxtında bizə güc verir. Təşəkkür edirəm. Biz qalib gələcəyik”, - səfir qeyd edib. Qeyd edək ki, HƏMAS və "İslami-Cihad" 7 oktyabrda "Əqsa tufanı" əməliyyatı başladıb və İsrailə hücum edib. Hücum nəticəsində indiyə qədər 700 israillinin öldüyü, 2,2 min nəfərin yaralandığı bildirilir.

HƏMAS-ın İsrailə hücumundan ən çox zərər çəkən Fələstin xalqı olacaq. Çünki İsrailin indiyə qədər qınanılan Qəzzaya hücumları baş verənlərdən sonra legitimləşdi. Sozcu.az xəbər verir ki, bu sözləri politoloq Asif Nərimanlı HƏMAS və “İslami-Cihad”ın 7 oktyabrda “Əqsa tufanı” əməliyyatı başlatması və İsrailə hücumu haqda qeyd edib. “İsrail Baş naziri Benyamin Netanyahu Qəzzanın boşaldılması çağırışını və dağıdıcı hücumun olacağını bildirib. İsrailin 1973-cü il sonra ilk dəfə rəsmi şəkildə müharibə vəziyyəti elan etməsi isə o deməkdir ki, döyüşün iki tərəfdən birinin tam məğlubiyyətinə qədər davam edəcəyi ehtimalı böyükdür”.

İsrailin Ben Qurion hava limanında insanlar ölkəni tərk etməyə çalışarkən böyük növbələr yaranıb. Sozcu.az xəbər verir ki, İsraildə insanlar yenidən Təl-Əvivdə yerləşən Ben Qurion hava limanında saatlarla növbəyə düzülüblər. Onlar Qəzza zolağı ilə bağlı artan münaqişə fonunda ölkəni tərk etməyə çalışırlar, lakin bir çox uçuşlar ləğv edilir. Qeyd edək ki, 7 oktyabrda HƏMAS “İslami-Cihad”la birgə “Əqsa tufanı” əməliyyatı başladığını elan edib və İsrailə hücum həyata keçirib. Genişmiqyaslı hücum nəticəsində 600-dən çox sakin ölüb, 2 mindən çox insan yaralanıb. İsrail ordusu cavab tədbirləri görür.

Aralıq dənizinin şərqinə gedən “Ford” aviadaşıyıcısının zərbə qrupuna HƏMAS qruplaşmasının hücumundan sonra İsrailə kömək etməyə hazır olmaq əmri verib. Sozcu.az xəbər verir ki, bu sözləri ABŞ-ın müdafiə naziri Lloyd Ostin deyib. Qeyd edilib ki, “USS Gerald Ford” və onun təxminən 5 min dənizçisi və daşıdığı döyüş təyyarələrini kreyserlər və esmineslər müşayiət edəcək. Onların hədəfi HƏMAS-a silahın çatmasının qarşısını almaqdan və müşahidə aparmaqdan ibarətdir. “Ford”la yanaşı, ABŞ “USS Normandy” kreyserini, “USS Thomas Hudner”, “USS Ramage”, “USS Carney” və “USS Ruzvelt” esmineslərini, həmçinin ABŞ Hərbi Hava Qüvvələrinin F-35, F-15, F-16 və A eskadrilyalarını göndərir. “Bundan əlavə, Bayden Administrasiyası dərhal İsrail ordusunu əlavə avadanlıq və resurs, o cümlədən döyüş sursatları ilə təmin edəcək. İlk hərbi yardım bu gün hərəkətə başlayacaq və yaxın günlərdə çatdırılacaq”, - Ostin bildirib. Qeyd edək ki, daşıyıcı qrup onsuz da Aralıq dənizində idi. Keçən həftə İon dənizində İtaliya ilə dəniz təlimlər keçirib.

Türkiyə ordusu Suriyanın şimalında terror təşkilatına aid hədəflərə qarşı hava əməliyyatları keçirib. Sozcu.az xəbər verir ki, bu barədə Türkiyə Milli Müdafiə Nazirliyi məlumat yayıb. Məlumata görə, həyata keçirilən hava əməliyyatı ilə terror təşkilatının istifadə etdiyi neft obyektləri, bunkerlər və sığınacaqlar da daxil olmaqla, 6 hədəf məhv edilib.

İsraildəki vəziyyətlə əlaqədar "USS Gerald R. Ford" təyyarədaşıyan gəmisi Aralıq dənizinin şərqinə yerləşdirilir. Sozcu.az xəbər verir ki, bu barədə ABŞ müdafiə naziri Lloyd Ostin göstəriş verib.

İsrail ordusu öz hərəkətlərini tam şəkildə ABŞ Silahlı Qüvvələri ilə koordinasiyalı şəkildə həyata keçirir. Sozcu.az xəbər verir ki, bu barədə İsrail ordusu açıqlama yayıb.

Xəbər verdiyimiz kimi, İsrail ərazisi Qəzza zolağından raket atəşinə tutulub. Qəzza zolağına nəzarət edən HƏMAS hərəkatı İsrailə qarşı genişmiqyaslı hərbi əməliyyata başladığını və İsrailə 5000 raket atıldığını bildirib. Tel-Əvivə konsertə gedən "Avroviziya" təmsilçilərimizdən olan Samirə Əfəndi ailəsi ilə birlikdə orada qalıb. Sozcu.az xəbər verir ki, Samirə canlı yayım açaraq orada yaşadıqlarını danışıb. Kövrələn müğənni bu gün Bakıya qayıtmaq üçün bilet aldıqlarını deyib: “Videolara baxırıq, dəhşətdir. Bir də təsəvvür edin burada nələr olur. İnsanlar qışqırır, qaçır, ağlayır… Bu gün üçün bilet almışıq, deyirlər uçuş təxirə salınmayıb. Tək istəyim Bakıya qayıtmaqdır”.

Azərbaycan ərazisində müvəqqəti yerləşdirilmiş Rusiya sülhməramlıları daha iki daimi müşahidə məntəqəsini bağlayıb. Sozcu.az xəbər verir ki, bu barədə Rusiyanın Müdafiə Nazirliyi məlumat yayıb. Qeyd edilir ki, gün ərzində iki müşahidə məntəqəsi bağlanıb. Xatırladaq ki, Rusiya sülhməramlıları oktyabrın 6-da 3, 7-də daha bir müşahidə məntəqəsini bağlayıblar. 2020-ci il noyabrın 10-da Qarabağda hərbi əməliyyatların bitməsi və atəşkəs barədə Azərbaycan, Ermənistan və Rusiya liderlərinin birgə bəyanatına əsasən, Rusiya Federasiyasının sülhməramlı kontingenti erməni silahlı qüvvələrinin çıxarılması ilə paralel şəkildə yerləşdirilməli idi. Rusiya Federasiyasının sülhməramlı kontingentinin qalma müddəti 5 ildir və müddətin bitməsinə 6 ay qalmış hazırkı müddəanın tətbiqinə xitam verilməsi niyyəti ilə bağlı tərəflərdən hər hansı biri çıxış etməsə, müddət avtomatik olaraq növbəti 5 ilə uzadılır.

Bu gün Misli Premyer Liqasında 9-cu tura və birinci dövrəyə yekun vurulur. Sozcu.az xəbər verir ki, turun son və mərkəzi qarşılaşmasında "Neftçi" son çempion "Qarabağ"ı qəbul edir. Qeyd edək ki, turun digər matçları 6 və 7 oktyabr tarixlərində keçirilib. *** Juninyo qarşılaşmanın 46-cı dəqiqəsində "Qarabağ"ı hesabda önə çıxarıb: 0-1. *** Cica matçın 88-ci dəqiqəsində "Qarabağ"ın ikinci qoluna imza atdı. Matç 2-0 hesabı ilə də qonaq komandanın xeyrinə başa çatdı.

Fələstinin HƏMAS (Hərəkət əl-Müqavəmə əl-İslamiyyə) yaraqlılarının hücumu nəticəsində İsraildə ölənlərin sayı artıq 700 nəfəri ötüb. Sozcu.az xəbər verir ki, bu barədə “Kan” dövlət teleradio şirkəti məlumat yayıb. Qeyd edək ki, bundan əvvəl HƏMAS-ın hücumundan sonra İsraildə 600-ə yaxın ölü, 2 048 yaralı olduğu bildirilirdi. Xatırladaq ki, oktyabrın 7-də səhər Qəzza zolağından İsrailə raket hücumları başlayıb və yaraqlı qruplar ölkə ərazisinə daxil olub. İsrail cavab olaraq “Dəmir Qılınclar” əməliyyatına başladığını açıqlayıb.

İsrailin müdafiə naziri Yoav Qallant Livanla sərhəddə əhalinin məskunlaşdığı ərazilərin boşaldılması barədə əmr verib. Sozcu.az xəbər verir ki, bu barədə İsrailin “Haaretz” nəşri məlumat yayıb. Livanla sərhəddə yaşayan sakinlərin əksəriyyəti təhlükəsizlik tövsiyələrinə fəal reaksiya verib və könüllü olaraq cənub bölgələrinə təxliyə edilib. Məlumata görə, ərazidə tank və digər zirehli texnikaların sayı artıb.

“Ermənilər əllərinin Qarabağdan tamamilə üzüldüyünü dərk etdiklərindən indi də “8 anklav kənd uğrunda” öz aləmlərində mübarizəyə başlayıblar...” Yaxın Şərqdəki hadisələr, daha doğrusu, Baş nazir Netanyahunun vurğuladığı kimi, İsrail-“HAMAS” savaşı bütün dünyanın diqqət mərkəzindədir, hətta erməni mediası da Qarabağdan çox, bu savaş barədə informasiyalar yayır. Amma fürsət tapan kimi yenə düşmən mövqelərindən əl çəkmir, bizi beynəlxalq ictimaiyyətin qınaq hədəfinə çevirməyə cəhdlər edirlər. Əllərinin Qarabağdan tamamilə üzüldüyünü dərk etdiklərindən indi də “8 anklav kənd uğrunda” öz aləmlərində mübarizəyə başlayıblar. Azərbaycan Prezidenti İlham Əliyevin Şarl Mişellə son telefon danışığında işğalda qalan səkkiz kəndin azad edilməsini  Avropa İttifaqının rəsmisinə xatırlatmasını sanki yenilik kimi qəbul edib təəccüblərini ifadə edirlər.  O dərəcədə ki, Azərbaycan dövlət başçısının Gürcüstan səfəri haqqında informasiya yayan erməni mediası, son cümlədə oxuculara səkkiz kəndin azad edilməsi barədə Şarl Mişelə deyilənləri xatırlatmağı unutmur. Bir-birilə əlaqəsi olmayan xəbərlərdəki xatırlatma sübut edir ki, ermənilər indi də 123, 9 kv.km ərazisi olan bu kəndlər uğrunda siyasət aparmağa, daha doğrusu, hay-küy salmağa başlayıblar...  Rusiya “sülhməramlı” qüvvələri müşahidə məntəqələrini sürətlə ləğv edir və hiss olunur ki, tezliklə gəldikləri məkana- Ermənistana dönəcəklər. RF müdafiə nazirliyinin nümayəndələri iki gün əvvəl İrəvana gəlib və erməni internet kanallarının verdiyi məlumata görə, geri dönmə prosesi Ermənistan hakimiyyəti ilə müzakirə edilir. Hadisələrin sürətli inkişafı nəticəsində yaranmış vəziyyət Rusiya hərbi kontingentinin Azərbaycandan getməsini sürətləndirir. Paşinyan hakimiyyətinin devrilməsi üçün Qarabağdan köç edənlərin İrəvanda qarışıqlıq yaradıb, iğtişaş törədəciyinə son ümid kimi baxan Kreml, hesablamalarında yanıldığını dəqiqləşdirəndən sonra “sülhməramlı”ların bölgəni tərk etməsinin zəruri həddə çatdığını qəbul edib. Bu həm də o deməkdir ki, 2020-ci ilin dekabrında olduğu kimi, Ermənistana qaçanların kütləvi şəkildə geri qayıtması real deyil. Ümumiyyətlə, üç günə köç edən Qarabağ erməniləri geri qayıtmağa cəhd edəcəklərmi? Azərbaycan dövlətinin Qarabağın erməni əhalisinə verdiyi təhlükəsizlik və hüquq təminatı buna imkan versə də, hesab edirəm ki, azsaylı bir hissənin geri dönməsini proqnozlaşdırmaq olar. Geri dönən ermənilərin az bir hissəsi əmlakları üzərində qərar vermək məqsədilə bir müddət yaşamağı, bir hissəsi də satıb ölkəni tərk etməyi seçəcəklər...  Növbəti mərhələ Ermənistan Respublikası ilə sülh müqaviləsinin imzalanması istiqamətində aparılan danışıqlar prosesi olacaq. Oktyabrın sonuna gözlənilən Brüssel görüşündən əvvəl Bişkekdə oktyabrın 13-də MDB toplantısına Paşinyanın video - konfrans şəklində qatılacağı barədə yayılan xəbərlər onu göstərir ki, Paşinyan müqavilənin Qərbin vasitəçiliyi ilə baş tutmasına çalışır və bununla da, Rusiyanın perspektivdə Ermənistanı tərk etməsinin təməlini qoymuş olduğunu bildirmək niyyətindədir. Bu gündən baxanda gələcək Rusiya -Ermənistan münasibətlərinin gərginliklə davam edəcəyi çox ehtimal olunur və təbii ki, Qərbin burada aparıcı rol oynayacağı şübhəsizdir...  İki ölkə arasında sülh müqaviləsinin imzalanmasından öncə sərhəddə delimitasiya və demarkasiya işlərinin başlanmasına start veriləcək, yoxsa bu işlər müqavilədən sonrakı mərhələyə keçəcək? Nəzərə alsaq ki, səkkiz kəndin azad edilməsi də delimitasiya işlərinin tərkib hissəsidir, o zaman Paşinyan hakimiyyətinin ölkə daxilində baş verən siyasi prosesləri nəzərə alıb qərar verəcəyi ehtimal olunur...  Zəngəzur dəhliz-yolun açılması isə hiss olunur ki, ən son verilən qərarlardan olacaq. İran ərazisindən keçməklə Naxçıvanla magistral və dəmir yolu vasitəsilə əlaqənin yaradılması barədə Azərbaycanla İran arasında bu günlərdə imzalanan niyyət protokolu da göstərir ki, Zəngəzur məsələsi tezliklə gündəmə gəlməyə bilər. Amma, nəzərə alsaq ki, Rusiya üçün bu yol həm hərəkət, həm də yola nəzarətlə bölgədə təsirini saxlamaq baxımından əhəmiyyətlidir.., proseslərin necə inkişaf edəcəyini proqnozlaşdırmaq çətindir...  Əsas odur ki, Rusiya “sülhməramlı”ları, deyilən kimi, noyabrın 1-dək Qarabağı tamamilə tərk etdiyi halda Azərbaycan tarixinə qızıl hərflərlə yazılacaq bir günün, Xankəndində Azərbaycan bayrağının qaldırılmasının, Azərbaycanın Böyük Qələbə günü kimi təntənəli şəkildə qeyd edilməsinin şahidi olacağıq... moderator) İlham İsmayıl

“Bölgəmizdəki problemlərin kökündə Fələstin məsələsi dayanır. Bu məsələ ədalətli həll edilmədikcə, bölgəmiz sülhə can atmağa davam edəcək. Paytaxtı Qüds olan Fələstin dövləti indi mütləqdir”. Sozcu.az xəbər verir ki, bunu Türkiyə Prezidenti Rəcəb Tayyib Ərdoğan Mor Efrem Süryani Qədim Ortodoks Kilsəsinin Açılış Mərasimində deyib. Onun sözlərinə görə, Balkanlarda qardaşlarımıza qarşı ayrı-seçkilik davam edir. Prezident qeyd edib ki, bu günə qədər 113-ü Asur icmasına aid olmaqla cəmi 1084 mülk icma fondları adına rəsmiləşdirilib. Biz müxtəlif inanc qruplarına qarşı ayrıseçkiliyə yol vermirik. “Bölgəmizdəki problemlərin kökündə Fələstin məsələsi dayanır. Bu məsələ ədalətli həll olunmasa, bölgəmiz sülhə can atacaq. Yaxın Şərqə davamlı sülh ancaq Fələstin-İsrail probleminin yekun həlli ilə gələ bilər. Paytaxtı Qüds olan Fələstin dövlətinin mövcudluğu indi mütləqdir. Yanğına benzin tökmək heç kimə xeyir gətirmir” -deyə Ərdoğan bildirib.

Oktyabrın 7-də HƏMAS-ın hücumundan sonra həlak olan israillilərin sayı 600-ü keçib. Sozcu.az xəbər verir ki, bu barədə “Kan” radiosu məlumat yayıb. Bildirilib ki, hücum nəticəsində 2000-dən çox yaralı var. “İsrail rəsmiləri bu rəqəmlərin son olmadığını və ölən və yaralananların sayının artmağa davam edəcəyini vurğulayırlar”, - məlumatda qeyd olunub. Qeyd edək ki, İsrail ordusu hərbi əməliyyatlar başlayandan bəri Müdafiə Qüvvələrinin 26 hərbçisinin həlak olduğunu açıqlamışdı.

HƏMAS-ın hücumunda məqsəd İsraillə Səudiyyə Ərəbistanı arasında münasibətlərin normallaşmasını pozmaqdır. Sozcu.az xəbər verir ki, bunu ABŞ Dövlət katibi Entoni Blinken deyib. Blinken vurğulayıb ki, HƏMAS, Hizbullah və İran Səudiyyə Ərəbistanı ilə İsrail arasında münasibətlərin normallaşmasına qarşıdır. Xatırladaq ki, HƏMAS “İslami-Cihad”la birgə ötən gün səhər saatlarından İsrailin cənub zonasına hücum edərək xeyli dinc sakini qətlə yetirib və girov götürüb. İsrailə 5 min, o cümlədən paytaxt Təl-Əvivə 150 raket atılıb.

Prezident İlham Əliyev Avropa İttifaqı Şurasının prezidenti Şarl Mişellə telefon danışığında bildirdi ki, “Fransanın Ermənistana silah verməsi sülhə deyil, yeni qarşıdurmaya xidmət edən yanaşmadır və əgər regionda hər hansı yeni qarşıdurma baş verərsə, bunun səbəbkarı məhz Fransa olacaq”. Bununla Azərbaycan lideri Aİ rəhbərliyinə Fransanın Cənubi Qafqazda nəyə xidmət etdiyini çatdırdı və bu, həm də bölgədəki hadisələrin sabitliyin pozulması istiqamətində inkişaf edəcəyi təqdirdə əsas səbəbkarın da Fransa olduğu haqda öncədən xəbərdarlığın edilməsidir. Fransanın Ermənistanın maraqlarını açıq şəkildə müdafiə etdiyi sirr deyil. Bu, Azərbaycan torpaqları işğalda olduğu müddətdə də belə idi, 44 günlük müharibədə də, ondan sonra da. Vətən müharibəsində Makronun özünü “Baqramyan 33”-ün mətbuat xidmətinin rəhbəri kimi aparmasını təkcə biz yox, bütün dünya gördü. Müharibədən sonra aparılan sülh danışıqlarında Fransa prezidenti nəinki ermənipərəst kimi çıxış edir, hətta bir çox hallarda Paşinyanın demədiklərini də səsləndirir, onun etmədiklərini edirdi. Qarabağda artıq məhv edilmiş erməni separatizminin əsas dəstəkçilərindən biri də məhz Fransa idi. Bunun nəticəsi olaraq, Azərbaycan Fransanın vasitəçiliyindən imtina etdi. Lakin Qarabağda istədiyinə nail ola bilməyən Makron Cənubi Qafqazı eskalasiya ocağına çevirməkdə israrlı görünür. Və hələ ötən ilin sentyabrından başlayaraq, hərbi müstəvidə Ermənistanla əməkdaşlığın genişləndirilməsinin yekun hədəfi də məlumdur: - Ermənistan-Azərbaycan sülh müqaviləsinin imzalanmasının qarşısını almaq; - Ermənistan üzərindən bölgədə yeni hərbi toqquşmalar yaratmaq; Bu hədəfə çatmaq üçün bütün imkanlarından istifadə edən Fransanın birdən çox siyasi məqsədi var. Birincisi, Ermənistanı Rusiyanın orbitindən uzaqlaşdırmaq; İkincisi, Rusiyanın Ermənistanın təhlükəsizliyində boşalan yerini tutmaq; Üçüncüsü, Avrasiyanın nəqliyyat şəbəkələrində əsas hablardan birinə çevrilən Cənubi Qafqazı hərbi eskalasiyaya sürükləməklə bu layihələri pozmaq; Fransa Ermənistanı bölgədə özünün plasdarmı kimi görür. Burada Fransadakı erməni diasporunun qisasçılıq siyasəti də təsirsiz deyil və aydındır ki, terrorizmi dəstəkləyən Papazyan kimi daşnaklara hesabat verəcək qədər zəif olan Makronun ermənilər qarşısında öhdəlikləri də var. Bunu onun özü də gizlətmir. Digər tərəfdən, Ermənistan Fransaya Afrikadakı məğlubiyyətin kompensiyası üçün lazımdır. Makron hakimiyyəti fransızlara ölkənin təsir imkanlarını uzaq coğrafiyalara qədər yaydığını isbatlmaq istəyir. Və “paket” olaraq əldə etmək istədiyi bu məqsədlər üçün Afrikadakı zəngin təcrübəsindən istifadə edərək, Cənubi Qafqazı “qan çanağına” çevirməyə hazırlaşır. Ermənistana səfər edən Fransanın xarici işlər naziri Katrin Kolonna bunu açıq şəkildə bəyan etdi. O bildirib ki, “Fransa Ermənistanın özünü müdafiə edə bilməsi üçün hərbi texnikanın tədarükü ilə bağlı müqavilələr imzalayacaq”. Sual yaranır, kimə qarşı? Azərbaycana, Türkiyəyə, yoxsa Rusiyaya qarşı? Torpaqlarını erməni işğalından azad edən Azərbaycan Ermənistan ərazisinə iddiasının olmadığını ən yüksək səviyyədə bəyan edib və bundan sonra əsas prioriteti bölgədə sülhə nail olmaqdır. Bu məqsədlə Ermənistanla sülh müqaviləsini imzalamaq niyyətindədir. Lakin rəsmi İrəvan müxtəlif iddialar və bəhanələrlə sülh sazişindən yayınır və aydındır ki, onu buna sövq edən əsas qüvvə məhz Fransadır. Cənubi Qafqazda Ermənistan üzərindən “yuva qurmaq” istəyən Makron hakimiyyətinin tətbiq edəcəyi ssenari də aydın görünür: - Ermənistan sərhəddə Azərbaycana hücum edəcək və yeni eskalasiya yaranacaq; - Beynəlxalq müstəvidə “Azərbaycan Ermənistana hücum edir” kampaniyası başlanacaq və rəsmi Bakıya təzyiq cəhdləri ediləcək; - İrəvan KTMT-nin “Azərbaycana qarşı çıxmadığını” əsas gətirərək, təşkilatdan ayrılmağı gündəmə gətirəcək; - Rusiyanın erməniləri müdafiə etmədiyini əsas götürərək, Ermənistanın təhlükəsizliyini Fransaya həvalə edəcək, hətta Gümrüdəki 102-ci bazanın ölkədən çıxarılması tələbini irəli sürəcəkləri də gözləniləndir; - Türkiyəyə qarşı ərazi iddialarının yenidən aktuallaşması da istisna deyil: Fransa xarici işlər nazirinin Ermənistana səfəri zamanı Ağrı dağının fotosunu “biz qayıtdıq” qeydi ilə paylaşması da bu kontekstdə təsadüfi deyil; Fransanın “müdafiə olunmaq” adı altında Ermənistanı silahlandırması, İrəvana hərbi attaşşe təyin etmək və Zəngzurda, məhz Azərbaycanla sərhəddə konsulluq açmaq istəyi də tətbiq ediləcəyi gözlənilən bu ssenarinin tərkib hissəsidir. Fransa artıq Ermənistanda hərbi missiya açıb. Bu ölkənin müdafiə naziri Sebastyan Lekornyu bildirib ki, “missiya bizə gündəlik olaraq Ermənistan ordusu və hakimiyyəti ilə əlaqədə olmaq, onarın müdafiə sahəsində tələbatlarını öyrənməyə imkan verəcək”. Eyni zamanda, o bəyan edib ki, “Fransa Ermənistanın müdafiə sahəsində tələbatlarını araşdırır. Prezidert (Makron – red) şəxsən prosesləri izləyir, çünki bu məsələ Fransa üçün çox vacibdir. O, (Makron – red) bildirib ki, bizim üçün əsas məqsəd Ermənistanın ərazi bütövlüyü, suverenliyi və ölkə əhalisinin müdafiəsidir”. Göründüyü kimi, Fransa Ermənistanı “müdafiə olunmaq” məqsədilə silahlandırır və Azərbaycana qarşı hücuma hazırlaşdırır. Bunun nəticəsi Ermənistan üçün ağır olacaq, çünki Azərbaycan istənilən təxribata “dəmir yumruq”la cavab verəcək. 44 günlük müharibə və ondan sonra baş verənlər Ermənistanın Azərbaycanla bacarmasının mümkünsüz olduğunu təsdiq edir. Bunu Parisdə də anlayırlar, lakin Makronun məqsədi Ermənistanı qorumaq, yaxud gücləndirməkdən daha çox, ondan Cənubi Qafqazı qan çanağına çevirmək üçün istifadə etməkdir. Afrikada da maraqlarını təmin etmək üçün məhz bu ssenridən - bir ölkəni digər ölkəyə qarşı hücuma təhrik etmək - yararlanıb. İndi Cənubi Qafqazda Afrika ssenarisini tətbiq etməyə hazırlaşır. (Publika.az)

“Fələstinin silahlı HƏMAS qruplaşmasının onlarla israillinin ölümü, yüzlərlə yaralı və ya əsir götürülməsi ilə nəticələnən misli görünməmiş hərbi hücumu İsrail ordusu və kəşfiyyat xidmətlərindəki “qarışıqlıq” səbəbindən baş verib”. Sozcu.az xarici agentliklərə istinadən xəbər verir ki, bu fikrin müəllifi İsrailin keçmiş milli təhlükəsizlik müşaviri Çak Freylixdir. “Qəzzaya cavabdeh olan bölmənin qərargahı işğal olunub, orada xaos hökm sürür və buna görə də bütün cavab tədbirləri təxirə salınıb”, - deyə ekspert qeyd edib. 2000-ci illərin əvvəllərində milli təhlükəsizlik müşaviri vəzifəsində çalışan və hazırda Təl-Əviv Universitetinin Milli Təhlükəsizlik Araşdırmaları İnstitutunun professoru olan Freylix HƏMAS-ın ələ keçirdiyi kəndlərin hamısının geri qaytarılacağına inandığını ifadə edib. “Bunun ardınca HƏMAS-a qarşı çox genişmiqyaslı hücumlar olacaq. Lakin əsas məqsədin Qəzzanın tamamilə tutulması, HƏMAS-ın devrilməsi, yoxsa onlara çox sərt zərbələr endirilməsi olacağını zaman göstərəcək”, - deyə Çak Freylix bildirib. Təhlükəsizlik analitiki və “Le Beck International” adlı risklərin idarə edilməsi firmasının kəşfiyyat rəhbəri Maykl Horovitzin sözlərinə görə, çoxlu girov götürmə insidentləri hələ də davam edir və bir sıra ərazilər HƏMAS-ın nəzarəti altındadır. “Bu o deməkdir ki, biz hələ hücumun miqyasını, ölənlərin və girovların sayını bilmirik”, - deyə Horovitz vurğulayıb.musavat)