Ötən gecə Ukrayna pilotsuz təyyarələrinin Soçiyə hücumu təsadüfi deyil. Rusiya Prezidenti Vladimir Putinin Soçidə olduğu ehtimal edilir. Sozcu.az xəbər verir ki, bu barədə Teleqram kanallarında məlumat yayılıb. Bildirilib ki, dünən Putin Soçidə BRİKS-in fövqəladə toplantısında iştirak edib və prezidentin İl-96 təyyarəsi hələ də hava limanındadır. Qeyd edək ki, Krasnodar qubernatoru Venyamin Kondratevin yaydığı məlumata görtə, Soçiyə hücum edən PUA vurulub, parçaları isə avtomobilin və evlərin üzərinə düşüb. Avtomobilin sürücüsü ölüb, evlərə ziyan dəyib. Gecə ərzində üç dəfə həyəcan siqnalı verilib, Soçi hava limanı bir müddət bağlı qalıb.

İsrail rəsmiləri ABŞ Prezidenti Donald Trampın administrasiyasını əvvəlcədən xəbərdar edib və Vaşinqton əməliyyata “yaşıl işıq” yandırıb. Sozcu.az xəbər verir ki, bu barədə "Jerusalem Post" nəşri yazıb. Məqsəd Qətərin paytaxtı Dohada “HƏMAS” rəhbərliyinə qarşı zərbə endirmək olub. Partlayışlardan sonra ABŞ səfirliyi Dohadakı vətəndaşlarını təhlükəsizlik məqsədilə sığınacaqlarda qalmağa çağırıb. "Əl-Hədət" kanalının məlumatına görə, hücum ABŞ-ın atəşkəs təklifini müzakirə edən “HƏMAS” rəhbərlərinə qarşı həyata keçirilib. Binada təşkilatın yüksək rütbəli şəxsləri olub: Qəzza zolağındakı lider və danışıqlar qrupunun rəhbəri Xalil əl-Heyya, Hərəkatın xaricdəki ofisinin başçısı Xalid Məşəl, İordan çayının Qərb sahilindəki qruplaşmanın komandiri Zahir Cəbarin, Siyasi büro üzvləri Nizar Audalla və Qazi Həmmad. Əlavə olaraq, hadisə vaxtı təşkilatın digər yüksək səviyyəli təmsilçilərinin də görüşdə olduğu bildirilir. "Əl-Cəzirə" telekanalı bildirib ki, partlayışdan sonra “HƏMAS” liderləri sağ qalıb.

İsrail Müdafiə Qüvvələrinin Baş Təhlükəsizlik Xidməti (Şin Bet) ilə birlikdə HƏMAS-ın yüksək rütbəli rəsmilərinə zərbələr endirib. Sozcu.az xəbər verir ki, İsrail ordusu Qətərin paytaxtı Dohayta zərbələrdən əvvəl dinc əhaliyə dəyən zərərin azaldılması üçün tədbirlər görüldüyünü bildirib. Hücumdan sonra Dohada silsilə partlayış səsləri eşidilib. İsrail Müdafiə Qüvvələri hücum zamanı HƏMAS-ın yüksək səviyyəli liderlərinin vurulduğunu qeyd edib. Qətər Xarici İşlər Nazirliyi İsrailin Dohada HƏMAS üzvlərinə hücum etdiyini təsdiqləyib. Öz növbəsində, İsrailin dövlət televiziyası “Kan” İsrail hakimiyyətinin Qətərə zərbə endirmək planları barədə ABŞ-ni əvvəlcədən xəbərdar etdiyini bildirib. Qeyd edilib ki, kampaniya Fələstin hərəkatı rəhbərliyinin nümayəndələrini sıradan çıxarmaq məqsədi daşıyıb. HƏMAS-ın Qəzza zolağındakı lideri və danışıqlar qrupunun rəhbəri Xəlil əl-Xeya, hərəkatın xaricdəki ofisinin rəhbəri Xalid Məşəl və İordan çayının qərb sahilindəki qrupun komandiri Zahir Cabarin İsrailin hücumu nəticəsində həlak olub. Mənbələr HƏMAS Siyasi Bürosunun üzvü Nizar Abudallahın ölümünü təsdiqləyib. Kampaniya zamanı hərəkat rəhbərliyinin digər üzvü Qazi Həməd binada olub, amma onun taleyi ilə bağlı hələlik məlumat yoxdur.

Maliyyə Nazirliyinin Dövlət Maliyyə Nəzarəti Xidməti İcbari Tibbi Sığorta Agentliyində və Tibbi Ərazi Bölmələrini İdarəetmə Birliyində (TƏBİB) də yoxlamalara başlayıb. Sozcu.az Unikal.az-a istinadən xəbər verir ki, maliyyə yoxlamaları hazırda davam etdirilir. Maliyyə Nazirliyinin İctimaiyyətlə əlaqələr və vətəndaş müraciətləri ilə iş şöbəsinin müdiri Mayis Piriyev məlumatı təsdiqləyib və bildirib ki, Maliyyə Nazirliyinin Dövlət Maliyyə Nəzarəti Xidməti tərəfindən İcbari Tibbi Sığorta Agentliyində və Tibbi Ərazi Bölmələrini İdarəetmə Birliyində (TƏBİB) qanunamüvafiq qaydada nəzarət tədbirləri həyata keçirilir. pizza hut O qeyd edib ki, Dövlət Maliyyə Nəzarəti Xidməti tərəfindən aparılan nəzarət tədbirlərinin nəticələri mütəmadi olaraq Nazirliyin rəsmi internet səhifəsində dərc olunur və ictimaiyyətə açıqlanır. Bakupost.az -ın əldə etdiyi məlumata görə, yoxlamalara avqustdan başlanılıb. Bu səbəbdən adı çəkilən qurumlarda çalışan bəzi vəzifəli şəxslər məzunuyyətdən geri çağırılıb. Bu yoxlamalarla bağlı ayrıca yazı təqdim edəcəyik. Xatırladaq ki, İcbari Tibbi Sığorta üzrə Dövlət Agentliyinin sədri Zaur Əliyev, TƏBİB-in icraçı direktoru isə Vüqar Qurbanovdur.

Sentyabrın 10-u günün ikinci yarısı şimal və qərb rayonlarından başlayaraq bölgələrdə fasilələrlə leysan xarakterli yağış yağacağı, şimşək çaxacağı gözlənilir.   Sozcu.az xəbər verir ki, bu barədə Milli Hidrometeorologiya Xidməti məlumat yayıb.   Ayrı-ayrı yerlərdə yağıntıların intensiv və güclü olacağı, dolu düşəcəyi, yüksək dağlıq ərazilərdə isə sulu qara keçəcəyi ehtimal olunur.  Ölkə ərazisində sentyabrın 15-dək havanın temperaturunun ötən günlərlə müqayisədə tədricən 5-10 dərəcə enəcəyi, şimal-qərb küləyinin arabir güclənəcəyi gözlənilir. Çaylarda sululuğun artacağı, bəzi dağ çaylarından qısamüddətli sel keçəcəyi ehtimalı var.

Milli Hidrometeorologiya Xidmətinin məlumatına əsasən Bakıda və Abşeron yarımadasında hava şəraitnini dəyişkən buludlu olacağı, gündüz havanın arabir tutulacağı, əsasən yağmursuz keçəcəyi gözlənilir. Mülayim şimal-qərb küləyi əsəcək. Sozcu.az xəbər verir ki, havanın temperaturu gecə 20-24° isti, gündüz 27-30° isti olacaq. Atmosfer təzyiqi 758 mm civə sütunu olacaq. Nisbi rütubət gecə 70-80 %, gündüz 50-55 % olacaq. Azərbaycanın rayonlarında hava şəraiti əsasən yağmursuz olacaq. Lakin gündüzdən bəzi dağlıq və dağətəyi rayonlarda arabir yağış yağacağı, şimşək çaxacağı gözlənilir. Ayrı-ayrı yerlərdə qısamüddətli leysan xarakterli olacağı, dolu düşəcəyi ehtimalı var. Gecə və səhər bəzi yerlərdə duman. Mülayim qərb küləyi bəzi yerlərdə arabir güclənəcək. Havanın temperaturu gecə 18-23° isti, gündüz 30-34° isti, dağlarda gecə 12-17° isti, gündüz 21-26° isti olacaq.

Xəbər verdiyimiz kimi, sentyabrın 7-də Bakı-Qazax magistralının Ağdaş rayonu ərazisindən keçən hissəsində “Kia” markalı avtomobilin aşması nəticəsində sürücü, 29 yaşlı Əhliman Mehdiyev ölüb. Sozcu.az unikal.az-a istinadən xəbər verir ki, qəzada həyatını itirən Əhliman Mehdiyev Vətən müharibəsi iştirakçısıdır. Mərhum Xüsusi Təyinatlı Qüvvələrin tərkibində döyüşlərdə iştirak edib.

Rusiyanın Belqorod vilayətində yerləşən Proxorovka qəsəbəsinə PUA hücumu nəticəsində neft bazasında yanğın olub. Sozcu.az xəbər verir ki, bu barədə vilayətin qubernatoru Vyaçeslav Qladkov məlumat yayıb. Onun sözlərinə görə, hücum nəticəsində neft çənlərinə ziyan dəyib. Yanğın tam söndürülüb və xəsarət alan yoxdur.

Sumqayıtda məktəbli vəfat edib. Sozcu.az xəbər verir ki, bu barədə “Azərbaycan Universitetləri” səhifəsi məlumat yayıb. Qeyd olunub ki, Sumqayıt şəhər Təbiət Elmləri Təmayüllü Gimnaziyanın 8-ci sinif şagirdi Əli Mehdizadə dünyasını dəyişib. Onun uzunsürən ağır xəstəlikdən sonra vəfat etdiyi bildirilib.

"Azərbaycanda dana ətinin qiymətlərində müşahidə olunan artım sadəcə bazar oyunlarının nəticəsi deyil. Əsas problem torpaq sahəsi, onun idarəçiliyi və əhali amillərində gizlənir". Sozcu.az xəbər verir ki, bu sözləri iqtisadçı Eldəniz Əmirov sosial media hesabında paylaşıb. O qeyd edib ki, qiymətlərin yüksəlməsinin əsas səbəbi torpaq resurslarının idarəçiliyi, əhali artımı və yem bazasının zəifləməsi ilə bağlıdır.   “Rəsmi statistika göstərir ki, kənd təsərrüfatına yararlı torpaq sahəsi 20 il əvvəl 4 milyon 758 min hektar idi, bu gün isə cəmi 4 milyon 774 min hektardır. Yəni ümumi rəqəm demək olar dəyişməyib. Amma eyni dövrdə əhalimiz 8,5 milyondan artaraq 10,2 milyonu keçib. Nəticədə adam başına düşən yararlı torpaq 0,56 hektardan 0,47 hektara enib. Bu isə çox ciddi fərqdir. Əhali artır, yararlı torpaq sahəsi isə artmır. Əvəzində bu 20 ildə əkin yerləri 237 min hektar artıb. Dincə qoyulmuş torpaqlar 14 min hektar artıb. Çoxillik əkmələr 53 min hektar artıb. Hətta meşə örtüyü də 5 min hektar artıb”.  "Amma məsələ ondadır ki, problem hələ də qalır", - deyən E.Əmirov söyləyib ki, problemin həlli üçün daha ciddi addımlar atmaq lazımdır:   “Torpaq idarəçiliyi islahatına ehtiyac var. Torpaq bölgüsü və istifadəsində şəffaflıq artırılmalı, istifadəsiz qalan torpaqlar mütləq kənd təsərrüfatına cəlb olunmalıdır. Ən vacib məsələlərdən biri isə böyük həcmli süni yem istehsalına keçiddir. Dünyanın aparıcı ölkələrində intensiv heyvandarlığın əsası süni yem istehsalıdır. Eyni zamanda kiçik fərdi təsərrüfatlar resurs çatışmazlığı yaşayır. Kooperasiya və iri təsərrüfatlar həm yem istehsalını, həm də heyvandarlığı daha səmərəli edə bilər. Su resurslarından ədalətli istifadə isə problemin digər ağrılı tərəfidir. Nə qədər ki su resurslarının bölgüsündə bu problem qalacaq, o qədər kənd təsərrüfatının əksər sahələri əziyyət çəkəcəkdir”. E.Əmirov bildirib ki, ət qiymətini 17 manata qaldıran “17” səbəbdən sadəcə bir neçəsinə toxundu. O qeyd edib ki, qısa müddətdə 20 faizədək artan ət qiymətləri bir gün 30 manata da çata bilər: "Çünki, səbəblər təkcə iqtisadi qanunlarla bağlı olmadığından “ətin gələcək taleyini” proqnoz etmək mümkün deyil. Əslində, qlobal inflyasiya, artan əhali sayı və məhdud torpaq resursları bu artımı şərtləndirən obyektiv səbəblərdir. Lakin bunun da üzərinə subyektiv səbəbləri gəldikdə risklər böyüyür. Buna görə də bu prosesin qarşısını almaq mümkün deyil. Onsuz da obyektiv səbəblər qiymətin qalxmasını məcburi hala gətirəcək. Sadəcə ciddi tədbirlərlə subyektiv faktorları aradan qaldırmaqla bu artımın sürətini azaltmaq mümkündür”.

İspaniya hökuməti İsrailə silah tədarükünü qadağan edib. Sozcu.az "Reuters"ə istinadən xəbər verir ki, bu barədə İspaniyanın Baş naziri Pedro Sançes məlumat verib. Bundan əlavə, İsrail silahlı qüvvələri üçün yanacaq daşıyan bütün gəmilərin İspaniya limanlarından tranzitlə keçməsi, İsrail üçün hərbi material daşıyan bütün təyyarələrin İspaniyanın hava məkanına girişi qadağan ediləcək. İspaniya rəsmisi bildirib ki, Madrid münaqişəni dayandırmaq üçün bütün imkanlarını səfərbər edib.

"Əgər Brüssel hələ də Rusiya neftini və qazını almağa davam edirsə, ABŞ-dan əlavə sanksiyalar gözləməsin..." Avropa İttifaqı Rusiyaya qarşı artıq 19-cu sanksiya paketini hazırlayır. Əvvəlki məhdudiyyətlər daha çox maliyyə sektorunu və müəyyən şəxsləri əhatə edirdisə, bu dəfə dairə daha da genişlənib. Sozcu.az xəbər verir ki, bu barədə "Bloomberg" nəşri yazıb. Avropanın 19-cu sanksiya paketi - təzyiqin sərtləşdirilməsi Brüssel böyük banklarla yanaşı "Rosneft" kimi enerji nəhənglərini, həmçinin Rusiyanın kölgə donanmasını və üçüncü ölkələrdə fəaliyyət göstərən neft treyderlərini hədəfə almağı planlaşdırır. Məqsəd aydındır - Moskvanın enerji ixracından əldə etdiyi milyardlarla gəliri kəsmək və bu yolla Putinin müharibə maşınının maliyyə damarlarını quruda bilmək. "Bloomberg"-in məlumatına görə, yeni paketin ən diqqətçəkən tərəfi Qazaxıstan məsələsidir. Avropa ilk dəfə "sanksiyalardan yayınmaya qarşı mexanizm"i tətbiq etməyi düşünür. Söhbət Qazaxıstan üzərindən Rusiyaya daşınan maşın və texnologiyalardan gedir. Bu mallar sonradan hərbi sənaye üçün istifadə olunur və Brüssel bu kanalı bağlamağa çalışır. Paralel olaraq, kriptobirjalar, süni intellekt texnologiyaları, hətta sığorta şirkətləri də sanksiya siyahısına düşə bilər. "Rusiya qazından tam imtina edin" Vaşinqton Avropaya birbaşa mesaj verir: əgər Brüssel hələ də Rusiya neftini və qazını almağa davam edirsə, ABŞ-dan əlavə sanksiyalar gözləməsin. Energetika naziri Kris Raytın sözləri sərtdir: "Rusiyanın enerji ixracatı onun müharibə büdcəsidir. Avropa bu asılılığı qırmasa, Moskvanın maliyyə imkanlarını tam dayandırmaq mümkün olmayacaq". ABŞ bunun əvəzində Avropaya öz maye təbii qazını (LNG), benzinini və digər enerji məhsullarını təklif edir. Raytın arqumenti ikiqatdır: bir tərəfdən bu, Avropanın enerji təhlükəsizliyi üçün alternativdir, digər tərəfdən ABŞ-Avropa ittifaqının siyasi gücünü göstərən addım ola bilər. Amma bu yanaşma Avropa daxilində parçalanmaya səbəb olur. Macarıstan və Slovakiya hələ də daha ucuz Rusiya qazına üstünlük verir, buna görə də sanksiyaların sərtləşdirilməsinə qarşı çıxırlar. Brüsselin 2028-ci ilə qədər mərhələli şəkildə Rusiyanın enerji asılılığından xilas olmaq planı kağız üzərində cazibədar görünsə də, siyasi reallıqda bu, çox çətin prosesə çevrilib. Hətta statistika da bunu göstərir: 2024-cü ildə Rusiya qazı Avropanın ümumi çıxarılan yanacaq idxalının 14 faizini təşkil edib. Bu, 2022-ci illə müqayisədə azalsa da, 2023-cü illə müqayisədə, əsasən də Rusiyanın mayeləşdirilmiş qazının daha çox alınması hesabına artım var. İqtisadiyyat, yoxsa siyasi mövqe? Avropanın qarşısında indi bir seçim dayanır: ya ucuz enerji resurslarından imtina edib Moskvanı zəiflətmək, ya da öz iqtisadi rahatlığını qoruyub Putinə dolayısı ilə nəfəs imkanı vermək. Hər iki variantın bədəli yüksəkdir. Sanksiyaların sərtləşdirilməsi şübhəsiz ki, Rusiya iqtisadiyyatına zərbə vuracaq, lakin eyni zamanda Avropanın bazarlarında enerji qiymətlərini daha da artıracaq, istehsal xərclərini yüksəldəcək və sosial gərginlik yaradacaq. Bu isə siyasi baxımdan Avropa hökumətlərinə ağır yükdür.  Digər tərəfdən, sanksiyaların yumşaq saxlanılması Rusiyanın hərbi maşınını daha uzun müddət maliyyələşdirməsinə imkan verir və müharibəni uzadır. Vaşinqtonla Brüssel arasında koordinasiya güclənir, amma sual açıq qalır: Avropa öz iqtisadi asılılığını qurban verməyə nə qədər hazırdır? Çünki indi qarşıda təkcə enerji balansı deyil, həm də strateji mövqe dayanır. Avropa öz maraqlarını qısamüddətli iqtisadi faydada, yoxsa uzunmüddətli siyasi sabitlikdə görəcək?..

2025-2026-cı tədris ilinin başlama tarixinin (15 sentyabr) dəyişdirilməsinə dair yayılmış məlumatlar həqiqəti əks etdirmir. Bu barədə Teleqraf-ın sorğusuna cavab olaraq Elm və Təhsil Nazirliyindən məlumat verilib. Bildirilib ki, aidiyyəti məsələ ilə bağlı yalnız rəsmi mənbələrə istinad edilməsi xahiş olunur.

Kürdəmirdə 36 yaşlı kişini cərəyan vuraraq öldürüb. Sozcu.az xəbər verir ki, hadisə rayonun Sığırlı kəndində qeydə alınıb. Belə ki, rayonun Xırdapay kənd sakini, 1989-cu il təvəllüdlü Bağırov Məhəbbət Ağamurad oğlu elektrik xəttində iş görərkən onu cərəyan vurub.  Ağır bədən xəsarəti alan sakin elə hadisə yerində dünyasını dəyişib. Onun meyiti aidiyyatı üzrə təhvil verilib. Faktla bağlı araşdırma aparılır.report)

Sentyabrın 7-də saat 16:30-da Bakı-Qazax avtomobil yolunun 312-ci kilometrində, Goranboy rayonu ərazisində yol-nəqliyyat hadisəsi qeydə alınıb. Sozcu.az "Teleqraf"a istinadən xəbər verir ki, ilkin araşdırmalara əsasən, "Mercedes-Benz" markalı yük avtomobilini idarə edən 2002-ci il təvəllüdlü Türkiyə vətəndaşı Taha Ali Şimşek idarəetməni itirərək əvvəlcə yolun ortasında yerləşən maneələrə çırpılıb, daha sonra isə qeyri-yaşayış obyektinə girib. Qəza nəticəsində sürücü yüngül xəsarət alıb. Həmin maşınla toqquşmadan son anda xilas olan digər nəqliyyat vasitəsində məşhur pediatr Günay Rəsulova olub.  O, vəziyyətinin yaxşı olduğunu bildirib: "Hadisə zamanı sükan arxasında idim. Bacım da yanımda idi. Yaxşı ki, təhlükəsizlik kəmərləri hər ikimizdə bağlı idi. O an düşündüm ki, digər maşınlarla toqquşmadan çıxmalıyam. TIR-ın arxa hissəsinə çırpılmaqdan yayınmaq üçün sağa döndüm, ani əyləcə basdım. Maşının sistemi də kömək etdi. Xoşbəxtlikdən nə maşında, nə bizdə xəsarət oldu. Arxa yolun boş olması da bir şans idi".

Futbol üzrə Azərbaycan milli komandasının baş məşqçisi Fernandu Santuş istefaya göndərilib. Santuşun AFFA ilə 2027-ci ilə qədər müqaviləsi var idi. Sozcu.az-ın məlumatına görə, onun AFFA-dan təzminat tələb etdiyi bildirilir. Təzminatın məbləği ilə bağlı müxtəlif müzakirələr aparılır.  "Sportinfo" bildirir ki, təcrübəli mütəxəssis AFFA rəmsilərindən 4.5 milyon avro təzminat tələb edib. Vaxtilə ölkəsinin millisində işləmiş məşqçi təzminatın məbləğində güzəştə getmək fikrindən uzaqdır və bunu federasiya rəsmilərinə açıqca söyləyib.

Çexiyanın xarici işlər naziri Yan Lipavski Rusiyanın Ukraynaya son kütləvi hava zərbələri ilə bağlı şərhində kifayət qədər sərt olub. Sozcu.az xəbər verir ki,  Yan Lipavski X platformasında yazıb ki, Rusiya prezidenti Vladimir Putin sadəcə sülh istəyirmiş kimi davranır. "Putin guya müharibəni dayandırmaq istəyir, reallıqda isə o, mümkün qədər çox ukraynalı öldürməyə çalışır. Dünən gecə Ukraynaya 800-dən çox pilotsuz təyyarə və raket buraxılıb, nəticədə ana və onun iki aylıq körpəsi həlak olub. O, qadınlara və uşaqlara hücum edən qorxaqdır", - Lipavski vurğulayıb. Nazir onu da qeyd edib ki, Ukraynaya yardımın dayandırılmasını müzakirə etmək təcavüzkarın tərəfini tutmaq deməkdir.

Əmək və Əhalinin Sosial Müdafiəsi Nazirliyinin tabeliyində Dövlət Sosial Müdafiə Fondu (DSMF) sentyabrın 10-da Bakı və Sumqayıt şəhərləri, eləcə də Abşeron rayonu üzrə bu ayın pensiyalarının ödənilməsi nəzərdə tutub. Sozcu.az xəbər verir ki, bu barədə DSMF-dən bildirilib. Qeyd edək ki, güzəştli şərtlərlə pensiya hüququna malik şəxslərin pensiyaları bu ay da qrafik üzrə ödəniləcək.

Son dövrlərdə Avropada məktəblərdə dərs saatlarının səhər 8-dən 10-a qaldırılması ciddi müzakirə olunur. Buna səbəb kimi bildirilir ki, böyüməkdə olan uşaqların bioloji ritmi onları səhərlər erkən oyanmağa imkan vermir, bu isə diqqət dağınıqlığına, yorğunluğa və tədris nəticələrinin zəifləməsinə səbəb olur. Hər səhər anasının əlindən tutub yuxulu-yuxulu ayaqlarını sürüyən, başını partaya qoyub yatan uşaqları dəfələrlə müşahidə etmişik. Ölkələr ayrı olsa da, problem eyni olduğundan bənzər dəyişiklik Azərbaycanda da ola bilərmi?   Sozcu.az ”ın xəbərinə görə, psixoloq Elşad Məmmədov Bizim.Media-ya açıqlamasında təsdiqlədi ki, uşaq orqanizmi yuxuya meyillidir, çünki böyüməkdə olan vücud yuxuya ehtiyac duyur: “Həm də uşaqlar hiperaktiv olduqları üçün daha tez yorulurlar. Nəticədə səhər erkən dərsə başlamaq onların stress səviyyəsini artırır və öyrənmə qabiliyyətini zəiflədir. Uşaqların yuxu rejimini nəzərə alan tədris qrafiki onların həm psixoloji, həm də fiziki sağlamlığı üçün vacibdir.” Təhsil eksperti Günay Əliyeva isə bildirdi ki, Azərbaycanda dərs saatlarının 10-da başlaması praktik olaraq çətin görünür. “Valideynlərin iş qrafikini nəzərə aldıqda, dərs başlanğıcını belə gecikdirmək mümkün deyil. Avropada özəl məktəblərlə yanaşı dövlət məktəblərinin də xüsusi avtobusları olur. Ana uşağı hazırlayıb qapının önündən yola salır. Bizdə isə analar yollarda qalıb, işləyən qadınlar üçün dərslərin gec başlaması əlavə problemdir. Bəlkə də yarım saat fərqlə gec başlamaq olar, amma bu qədər gec saatlarında dərsə başlamaq, növbəli dərs sistemi üçün də ağlabatan deyil”. Ekspert əlavə etdi ki, bunun ən yaxşı yolu uşaqların yuxu rejiminin tənzimlənməsi ilə bağlı maarifləndirmə kampaniyaları, valideyn və müəllimlərin məlumatlandırılması vacibdir. Belə yanaşma həm tədris keyfiyyətini, həm də uşaqların sağlamlığını qorumağa xidmət edə bilər.

"Qala-Pirallahı yolunda baş verən yol-nəqliyyat hadisəsi səbəbilə bu gün saat 06:30 radələrindən etibarən 19 nəfər (18 qadın cinsli, 1 kişi cinsli) Sabunçu Tibb Mərkəzinin Təcili tibbi yardım şöbəsinə hospitalizasiya olunub" Sozcu.az xəbər verir ki, bu barədə TƏBİB-in məlumatında bildirilib. Qeyd olunub ki, onların hər birinə zəruri tibbi xidmətlər göstərilib: "Vəziyyətləri qənaətbəxş qiymətləndirilən 12 nəfər ambulator müalicə üçün evə buraxılıb. Hazırda tibb müəssisəsində 7 nəfərin müayinə və müalicəsi davam etdirilir. Vəziyyətləri orta ağır qiymətləndirilir". 

Futbol üzrə Azərbaycan milli komandasının baş məşqçisi Fernandu Santuş istefaya göndərilib. Sozcu.az xəbər verir ki, bu barədə jurnalistlərə açıqlamasında AFFA-nın baş katibi Cahangir Fərəcullayev açıqlama verib. O, yığmanın DÇ-2026-nın seçmə mərhələsinin II turunda evdə Ukraynaya qarşı keçiriləcək oyundan öncə mətbuat konfransında portuqaliyalı mütəxəsislə yolların ayrıldığını bildirib.  Qeyd edək ki, Fernandu Santuşun AFFA ilə 2027-ci ilə qədər müqaviləsi var idi.

Ukrayna hüquq-mühafizə orqanları ölkədə fəaliyyəti qadağan olunmuş “Müxalifət Platforması - Həyat Naminə” Partiyasından olan deputatı saxlayıb. Sozcu.az xəbər verir ki, bu barədə Ukrayna Milli Təhlükəsizlik Xidməti (UTX) məlumat yayıb. Deputatın “vətənə xəyanət” ittihamı ilə saxlanıldığını bildirib. Məlumata görə, saxlanılan şəxs Rusiya Federal Təhlükəsizlik Xidməti (FTX) tərəfindən müharibənin başlamasından xeyli əvvəl işə götürülüb və Rusiya xüsusi xidmət orqanları üçün tapşırıqları aktiv şəkildə yerinə yetirib. Bundan başqa, deputata qarşı Ukrayna Cinayət Məcəlləsinin bir neçə maddəsi ilə ittiham irəli sürülüb. Məhkəmə artıq onun barəsində həbs-qətimkan tədbiri seçib. Faktla bağlı ibtidai istintaq davam edir.

11:24 Bu gün saat 09:40 radələrində Binəqədi rayonu, Biləcəri qəsəbəsi ərazisində yol-nəqliyyat hadisəsinin baş verməsi səbəbilə Respublika Təcili və Təxirəsalınmaz Tibbi Yardım Mərkəzinə çağırış daxil olub. Bu barədə Sozcu.az-a TƏBİB-dən məlumat verilib. Bildirilib ki, çağırış əsasında ilkin olaraq 5 təcili tibbi yardım briqadası ünvana cəlb olunub. Son məlumata görə, 3 nəfər (1 kişi, 2 qadın) tibb müəssisəsinə hospitalizasiya olunub. Bir kişinin hadisə yerində həkiməqədər ölüm faktı qeydə alınıb. *** Sentyabrın 6-da saat 09:40 radələrində Binəqədi rayonu, Biləcəri qəsəbəsi ərazisində yol-nəqliyyat hadisəsinin baş verməsi səbəbilə Respublika Təcili və Təxirəsalınmaz Tibbi Yardım Mərkəzinə çağırış daxil olub. Çağırış əsasında ilkin olaraq 5 təcili tibbi yardım briqadası ünvana cəlb olunub. Bu barədə TƏBİB-dən məlumat verilib. "Son məlumata görə, 3 nəfər (1 kişi, 2 qadın cinsli) Kliniki Tibbi Mərkəzə hospitalizasiya olunub. Hazırda onların müayinə və müalicələri davam etdirilir. 2 nəfərin (kişi cinsli) hadisə yerində həkiməqədər ölüm faktı qeydə alınıb", məlumatda deyilir. *** Bakıda baş verən ağır yol qəzası nəticəsində ölənlərin sayı 3-ə çatıb. Bu barədə TƏBİB-dən bildirilib. Qeyd olunub ki, hadisə nəticəsində təcili tibbi yardım briqadası 3 nəfəri (1 kişi, 2 qadın) Kliniki Tibbi Mərkəzə hospitalizasiya edib: "Onlardan 2000 və 2002-ci il təvəllüdlü şəxslərə (qadın) döş qəfəsinin səthi travması və qarın divarının əzilməsi diaqnozu təyin olunub. Zəruri tibbi xidmət göstərildikdən sonra hər iki şəxs ambulator müalicə üçün evə buraxılıb". Bundan başqa, hadisə nəticəsində 1978-ci il təvəllüdlü (kişi) şəxs tibb müəssisəsinə aqonal vəziyyətdə hospitalizasiya olunub. Ona CPR dəstəyi (ürək-ağciyər reanimasiyası) tətbiq olunsa da bioloji ölüm faktı qeydə alınıb. *** Bakının Binəqədi rayonu, Biləcəri qəsəbəsində baş verən dəhşətli qəzada həlak olanların şəxsiyyəti məlum olub. Oxu.az-ın məlumatına görə, hadisə nəticəsində qəzaya səbəb olan "Kamaz" markalı yük avtomobilinin sürücüsü, 1976-cı il təvəllüdlü Vahid Vaqif oğlu Əbdülov, "Çangan" markalı minik avtomobilinin sərnişini, 1982-ci il təvəllüdlü Abdulla Əkrəm oğlu Hacıyev aldıqları xəsarətlərdən hadisə yerində dünyalarını dəyişiblər. Hadisə nəticəsində xəsarət alan "Çangan" markalı minik avtomobilinin sürücüsü, 1978-ci il təvəllüdlü Yusif İbrahim oğlu İbrahimov isə xəstəxanaya yerləşdirilsə də, onun həyatını xilas etmək mümkün olmayıb. Həkimlərin səyinə baxmayaraq, Y.İbrahimov Kliniki Tibbi Mərkəzdə vəfat edib.

Sudanın Berber şəhərinin qərbində qızıl mədəni uçub. Sozcu.az "Əl Ərəbiyə"yə istinadən xəbər verir ki, bu barədə yerli hakimiyyət orqanları məlumat yayıb. Hadisə nəticəsində 6 nəfər həlak olub, 20 nəfərə yaxın insanın isə dağıntılar altında qalması ehtimal olunur. Dağıntılar altında qalanların xilas edilməsi istiqamətində işlər davam etdirilir. Hadisənin səbəbləri bəlli deyil.