1992-ci lidə Azərbaycanın alı məktəblərinə qəbul  imtahanlarında ilk dəfə test üsulu tədbiq edildi.  Test üsulunun tədbiqinə Təhsil Nazirliyi işçiləri, ali məktəblərin professor-müəllim heyətinin bir qismi tərəfindən ciddi müqavimət vardı.  Çünki, bu sahələrdə çalışan minlərlə müəllim və məmurun qazancı qəbul və smestr imtahanlarına bağlı idi.  Əbülfəz Elçibəy bütün bu müqavimətə baxmayaraq test üsulunun tədbiq olunmasına təkid etdi.  Adətən iyun ayında keçirilən qəbul imtahanlarının test üsulunu tədbiqinə hazırlığın tamamlanmaması səbəbindən  payıza qədər uzadılmasına sərəncam verdi.  Təhsil Nazirliyi və test imtahanlarını sobataj etmək ehtimalı olanlara o dərəcədə inanmırdı ki, test suallarının hazırlanması üçün Zaqulbada prezidentin rezidensiyası olan öz evini ayırmışdı.  Hətta bir çox yüksək vəzifəli dövlət məmurları bu prosesdən xəbərsiz idi.  Sistem elə qurulmuşdu ki, heç kəsin, hətta prezidentin özünün də imtahanların nəticələrinə müdaxilə imkanları olmasın.  Və bu sistem Prezident Elçibəyin iradəsi və göstərişi əsasında qurulmuşdu.  İlk test imtahanlarının baş tutmasında Prezident Aparatı əməkdaşlarının, o zaman Dövlət Katibi olan Pənah Hüseynin, Ərazi Hakimiyyət və İdarəetmə Orqanları ilə iş  üzrə Dövlət Müşaviri olan mənim, Dövlət Müşaviri Rafiq İsmayılın, test sistemini pozmağa çalışanlar istisna olmaqla Təhsil Nazirliyi və ali məktəblərin professor-müəllim heyətinin, TQDK və onun rəhbəri Vurğun Əyyubun, Bakı Şəhər İcra Hakimiyyəti başçısı Rauf Gülməmmədovun, Bakı şəhər rayonları icra hakimiyyəti başçılarının rolu böyükdür.  Test imtahanları günü bütün təşkilati-texniki məsələlərə Ərazi İdarəetmə Orqanıarı ilə iş üzrə Dövlət Müşaviri olaraq şəxsən rəhbərlik etmişəm. Amma bu test sisteminin tədbiqində müstəsna rolumun olması anlamına gəlmir.  Yersiz və mənasız davranışları  ilə etimadı itirərək aylarla prezidentin qəbuluna düşməyə həsrət qalıb bu gün test sisteminin tədbiqinin müəllifliyindən danışanların iddiaları isə xüsusilə gülüncdür.  Azərbaycanda test sistemi prezidentElçibəyin ideyası, təşəbbüsü və siyasi iradəsi nəticəsində tədbiq olunub. Arif Hacılı, Müsavat Partiyasının başqanı

Ərinin qətlini sifariş verməkdə ittiham olunan Əzizə Seyidova, qətlin icraçıları kimi təqsirləndirilən Mehdi Məmmədov, Bəxtiyar Fərzəliyev və Elnur Əliyevin cinayət işi üzrə məhkəmə prosesi keçirilib. APA xəbər verir ki, bu gün Bakı Ağır Cinayətlər Məhkəməsində hakim Siyavuş Hacıyevin sədrliyi ilə keçirilən prosesdə şahidlər ifadə verib. Öldürülən Əli Seyidlinin anası Pəricahan Seyidova, qardaşı Ayaz Seyidov və təqsirləndirilən Əzizə Seyidovanın nənəsi Həqiqət Əliyeva məhkəmədə dindirilib. Pəricahan Seyidovanın sözlərinə görə, hadisə gününə qədər gəlini ilə oğlu arasında heç bir dava olmayıb: “Oğlum zəng edib dedi ki, hazırlaşın, gəlirəm sizi götürüm, şəhərə gedək. Əzizəyə deyəndə o, getmək istəmədiyini bildirdi. Dedi ki, uşaq yatmalıdır. Mən Əliyə bir də zəng edib dedim ki, uşaq yatmalıdır, maşından düş gəl evə. Elə bu an qışqırıq səsi eşitdim. Çölə çıxanda Əlini həyətdə qanın içində gördüm. Qucaqladım, kimin etdiyini soruşanda Əli görmədiyini dedi. Elə bir az sonra da qucağımda öldü”. Mərhumun anası bildirib ki, hadisədən qabaq oğlunun paltarları arasında “siçan dərmanı” tapıb: “Oğlum hamamda idi, paltar istədi. Gedib götürəndə siçan dərmanını orda tapdım. Heç ağlımdan belə bir hadisənin olacağını, Əzizənin ərini öldürmək istədiyini keçirməzdim”. Təqsirləndirilən Əzizə Seyidova isə ona “Uşaq olan evə necə siçan dərmanı gətirə bilərəm? O dərmanın evə necə gəldiyindən xəbərsizəm”, deyə cavab verib. Daha sonra, hadisənin digər şahidi, qətlə yetirilən şəxsin qardaşı Ayaz Seyidov ifadə verib: “Qardaşım Əzizəgili restorana aparacaqdı. Mən də evdə idim. Həyətdə işləyirdim. Küçədən səs-küy gəldi. Qışqırıq eşitdim, “məni vurdular”, dedi. Sonra qardaşım qapını açıb içəri girdi. Üstü-başı qan içində idi. Dedi ki, üç nəfər məni vurdu. Küçəyə qaçdım. O tərəf, bu tərəfə baxdım. Heç kimi görmədim. Əzizə tutulandan sonra anam mənə dedi ki, evdə siçan zəhəri tapıb". Proses fevralın 14-də davam etdiriləcək. Qeyd edək ki, ittihama görə, hadisə bu il martın 16-da Sabunçu rayonunda baş verib. Həmin gün 00:05 radələrində 1993-cü il təvəllüdlü Əli Seyidlinin yaşadığı fərdi yaşayış evinin qarşısında öldürülməsi ilə bağlı rayon prokurorluğuna məlumat daxil olub. Keçirilmiş istintaq-əməliyyat tədbirləri nəticəsində cinayət əməlinin zərərçəkmişin arvadı - 2000-ci il təvəllüdlü Əzizə Seyidovanın təşkilatçılığı ilə 1981-ci il təvəllüdlü Mehdi Məmmədov, 1988-ci il təvəllüdlü Elvin Əliyev və 1995-ci il təvəllüdlü Bəxtiyar Fərzəliyev tərəfindən törədilməsinə əsaslı şübhələr müəyyən edilib. Əzizə Seyidovaya Cinayət Məcəlləsinin 32.3, 32.4, 120.2.1, 120.2.4, 120.2.5-ci (qabaqcadan əlbir olan bir qrup şəxs halında, xüsusi amansızlıqla, tamah məqsədilə və sifarişlə qəsdən adam öldürməyə təhrik etmə və cinayəti təşkil etmə), Mehdi Məmmədov, Bəxtiyar Fərzəliyev və Elvin Əliyevə isə həmin Məcəllənin 120.2.1, 120.2.4, 120.2.5-ci (qabaqcadan əlbir olan bir qrup şəxs halında, xüsusi amansızlıqla, tamah məqsədilə və sifarişlə qəsdən adam öldürmə) maddələri ilə yekun ittiham elan edilərək cinayət işi baxılması üçün aidiyyəti üzrə Bakı Ağır Cinayətlər Məhkəməsinə göndərilib.

Dağlıq rayonlarda 1 dərəcəyədək şaxta olub. Bu barədə Sozcu.az-a Ekologiya və Təbii Sərvətlər Nazirliyinin Milli Hidrometeorologiya Xidmətindən bildirilib. Qeyd olunub ki, Naxçıvan, Şərur, Şahbuz, Culfa, Ordubad, Gədəbəy, Naftalan, Gəncə, Şəmkir, Ceyrançöl, Tovuz, Ağdam, Balakən, Oğuz, Qəbələ, Zaqatala, Şəki, Şamaxı, Qobustan, Altıağac, Quba, Xaltan, Şabran, Tərtər, Bərdə, Mingəçevir, Yevlax, Göyçay, Zərdab, Beyləqan, İmişli, Kürdəmir, Sabirabad, Cəfərxan, Hacıqabul, Neftçala, Biləsuvar, Yardımlı, Lənkəran, Astrada, Bakıda və Abşeron yarımadasında arabir yağış, Daşkəsən, Gədəbəy, Göygöl, Qax, Şahdağda isə qar yağıb. Naxçıvan, Şahbuz, Ordubad, Daşkəsən, Göygöl, Balakən, Zaqatala, Şəki, Qax, Şamaxı, Qusar, Xaltan, Qrız, Lerikdə duman müşahidə olunub. Havanın temperaturu Bakıda və Abşeron yarımadasında 6 dərəcəyədək isti, Naxçıvan MR-da 9 dərəcəyədək isti, Aran rayonlarında 9 dərəcəyədək isti, dağlıq rayonlarda isə 1 dərəcəyədək şaxta olub.

Son zamanlar Gürcüstan-Rusiya sərhədində yerləşən “Yuxarı Lars” gömrük-sərhəd buraxılış məntəqəsində hava şəraiti ilə əlaqədar olaraq yük nəqliyyat vasitələrinin hərəkətində fasilələrin yaranması müşahidə edilir. Həmin nəqliyyat vasitələrinin alternativ variant kimi ölkəmizin Gürcüstanla sərhədindəki “Qırmızı körpü” gömrük postuna istiqamətlənməsi nəticəsində yük nəqliyyat vasitələrinin keçidində sıxlıq yaranıb. Sozcu.az xəbər verir ki, bir neçə gündür Azərbaycan-Gürcüstan sərhədində, “Qırmızı körpü” gömrük postunda sıxlıq müşahidə edilir. Hazırda 1100-dən çox yük avtomobili günlərdir buradakı parkda gözləyir. Beynəlxalq yükdaşıma ilə məşğul olan TIR sürücüləri gecəni nəqliyyat vasitələrində, TIR parklarında keçirmək məcburiyyətində qalırlar. TIR sürücüsü olan türkiyəli Mehmet Usta deyib: “Rusiyadan, Moskva şəhərindən gəlmişəm. Azərbaycan ərazisindən getməklə Türkiyəyə keçid edəcəyəm. Samurdan gələndə sıxıntı olmadı, rahat keçdik. Burada isə sıxlığa görə dörd gündür ki, gözləyirik”. Təkcə Türkiyə və İrandan gələn deyil, digər ölkələrdən olan sürücülər də növbə gözləyirlər. Onlar deyirlər ki, burada qaldıqca, xərcləri də çox çıxır. Ona görə də bir an öncə yola düşmələrini istəyirlər. “Qırmızı körpü” gömrük postundan verilən məlumata görə, ilin sonuna doğru yük nəqliyyat vasitələrinin dövriyyəsindəki xarakterik artım növbələrin yaranmasına öz təsirini göstərməkdədir. “Vəziyyətlə bağlı bildiririk ki, son zamanlar Gürcüstan-Rusiya sərhədində yerləşən “Yuxarı Lars” gömrük-sərhəd buraxılış məntəqəsində hava şəraiti ilə əlaqədar yük nəqliyyat vasitələrinin hərəkətində fasilələr yaranıb. Ləngimələrlə əlaqədar olaraq, həmin nəqliyyat vasitələrinin sürücüləri alternativ yol kimi ölkəmizin “Qırmızı körpü” gömrük postuna yönləndirilmişdir. Nəticə etibarilə həmin nəqliyyat vasitələrinin ölkəmizin ərazisinə daxil olması sıxlığın artması ilə nəticələnib. Bununla əlaqədar bildirmək istəyirəm ki, gömrük-sərhəd buraxılış məntəqəsinin buraxılış imkanlarının artırılması məqsədilə qarşı tərəflə danışıqlar aparılır”, – deyə “Qırmızı körpü” gömrük postunun böyük inspektoru Rüfət Səfərov əlavə edib. Qeyd edək ki, hazırda avtomobillərin tıxac uzunluğu kilometrlərlə davam edir. Gün ərzində isə qarşı tərəfə 350-400-dən çox avtomobil keçir.

"Navalnı, sadəcə, siyasi məhbus deyil, həm də Saxarov mükafatı laureatıdır, biz onu və onun işini qorumalıyıq..." "Rusiyalı müxalifətçiyə qarşı ekstremizmlə bağlı açılan yeni cinayət işi üzrə istintaq hərəkətləri aparılır..." Rusiyanın əsas müxalifətçisi indi haradadır?.. Rusiyalı müxalifətçi Aleksey Navalnı Vladimir vilayətinin Melexovodakı 6 saylı islah koloniyasından yeni cinayət işi üzrə istintaq hərəkətlərinin həyata keçirilməsi üçün Moskvaya çatdırılıb. Sozcu.az xəbər verir ki, bu barədə "Baza" "Teleqram-kanal"ı öz mənbələrinə istinadən məlumat verib. Məlumatı "dw.com" nəşri yayıb. Məlumatda deyilir ki, söhbət vandalizm işi ilə bağlı istintaq hərəkətlərindən gedir. Dekabrın 1-də Navalnı onun barəsində RF CM-in vandalizmlə bağlı 214-cü maddəsinin 2-ci hissəsi üzrə yeni cinayət işinin açıldığı barədə məlumat verib. Digər mənbələr güman edir ki, Navalnı Moskvadan sonra başqa yerə etap edilə bilər. "Qanunla Navalnı xüsusi rejimli koloniyaya etap edilə bilərdi, məhz bu tipli müəssisədə o, 2023-cü ilin avqustunda məhkəmənin "ekstremizm"lə bağlı iş üzrə 19 il azadlıqdan məhrumetmə cəzasını çəkməlidir", - məlumatda deyilir. Bundan öncə Navalnının mətbuat katibi Kira Yarmış bəyan edib ki, müxalifətçi koloniyadan çıxarılıb və onun harada olduğu məlum deyil. Bu arada dünyada, o cümlədən Avropada Navalnının taleyi ilə bağlı narahatlıq artır və onun müdafiəsi üçün hərəkat genişlənir. Belə ki, avropalı deputat, Belçikanın sabiq baş naziri, hazırda AŞPA-da Liberal və Demokratlar Fraksiyasının sədri Qi Verxofstadt Avropa İttifaqı Xarici işlər və Təhlükəsizlik məsələləri üzrə Ali Komissarı Jozep Borrelə "Rusiyadan dərhal izahat istənilməsinə" çağırış edib. "Navalnı, sadəcə, siyasi məhbus deyil, həm də Saxarov mükafatı laureatıdır. Bizim borcumuz onu və onun işini qoruyub saxlamaqdır" - deputat "X" sosial şəbəkəsində yazıb. "Amnesty İnternational" beynəlxalq hüquq-müdafiə təşkilatı Navalnı ilə bağlı bəyanat yayıb. "İndi Navalnını zorən yoxa çıxmasının qurbanı hesab etmək olar. Kreml öz tənqidçiləri boğmaq qətiyyətində heç nə qarşısında dayanmayacaq", - bunu təşkilatın Şərqi Avropa və Mərkəzi Asiya üzrə direktor müavini Denis Krivoşeyev bəyan edib. "Belə ehtimal var ki, o, başqa yerə etap edilməsi prosesində həbsdədir. Rusiyada belə etap edilmə həftələrlə davam edə bilər, bu zaman qohumlarının taleyi barədə heç bir məlumat əldə edilmir, demək olar ki, həmişə məhbusların sağlamlığı və rifahını təhlükə altına atır, çünki onlar bunun gedişində qəddar davranışa məruz qalır", - Krivoşeyev əlavə edib. "Aleksey Navalnının təqib edilməsi siyasi motivlidir və o, siyasi fəallığına görə cəzalandırılıb. O, vicdan məhbusudur və dərhal və qeyd-şətsiz azad edilməlidir. Rusiya hakimiyyəti onun taleyi və harada olması barədə açıqlama verməlidir", - Krivoşeyev vurğulayıb.

“Avropa İttifaqı Şurası Azərbaycan və Ermənistan liderləri arasında görüş təşkil etmək istiqamətində cəhdləri davam etdirir”. Bunu Şuranın sədri Şarl Mişel Ermənistanın “Azatutyun” portalına müsahibəsində bildirib. O deyib ki, Ermənistan və Azərbaycan arasında münasibətlərin tənzimlənməsini təşkil etmək üçün sülh sazişi lazımdır: “Bu sülh sazişi demarkasiya prosesinə əsaslanmalıdır. Eyni zamanda bizim regionda əməkdaşlığımız üçün bir vasitə kimi istifadə edə biləcəyimiz müsbət əsas ola bilər”. Ş.Mişel qeyd edib ki, bu da Cənubi Qafqaz regionunun digər ölkələri, o cümlədən Gürcüstan iqtisadiyyatının inkişafı üçün yaxşı haldır. “Danışıqların əsas istiqaməti Ermənistanla Azərbaycan arasında münasibətlərin nizamlanmasıdır”, - o vurğulayıb.

Dünyadakı bəzi beynəlxalq təşkilatlar və institutar açıq-aşkar ermənilərin maraqlarını müdafiə edir. Erməni sevgilərini gizlədə bilməyən həmin təşkilatlar ermənilərin müdafiəçiləri kimi çıxış edir və onların erməni diaporunun təsiri altında fəaliyyət göstərməsi hiss olunur. Sozcu.az xəbər verir ki, belə təşkilatlardan biri də Lemkin adına Soyqırımın Qarşısının Alınması İnstitutudur. Bu təşkilat oxuculara yaxşı tanışıdır. Azərbaycana qarşı aparılan kampaniyada fəal iştirak edən Lemkin İnstitutu ölkəmizi müharibə cinayətlərində ittiham edir. Ermənilərin maraqlarına xidmət edən Lemkin İnstitutu indi də Şərqi Qüdsdəki erməni məhəlləsinin dərdini çəkir. Hər gün Qəzzada həlak olan minlərlə günahsız insanı unudan faşist ideologiyasının təbliğatçıları indi də Qüdsdə erməni məhəlləsinin dağılmasından “dərin narahatdır”. Ermənilərin müadafiəçisi qismində çıxış edən Lemkin institutu beynəlxalq təşkilatları İsraildəki erməni icmasının hüquqlarını müdafiəsinə çağırıb: “Biz ABŞ-ı və İsrailin digər yaxın müttəfiqlərini bu torpaq mübahisəsində erməni icmasına lazımi hüquqi proseduru təmin etmək üçün məsuliyyət götürməyə çağırırıq. Bu ilin payızında erməni icması Qarabağı itirməklə ağır böhran vəziyyəti keçirir. Qüdsün erməni məhəlləsinin mədəni irsi, guya Fələstin ərazilərində yəhudi etnik dövləti yaratmaq məqsədi ilə buna icazə verən inşaatçılar və silahlı köçkünlərdən qorunmalıdır. Biz dinc nümayişlərlə bu torpağın işğalına qarşı müqavimət göstərməkdə davam edən və ərazini tərk etməkdən imtina edən erməni icmasını dəstəkləyirik”. Yaxın Şərqdə erməni maraqlarını müdafiə edən beynəlxalq təşkilatlar Qüdsün qədim erməni şəhəri olması haqqında iddia da irəli sürürlər. Faşist erməni ideologiyasına görə müqəddəs şəhərin təməlini ermənilər qoyub və İsa Məsih də ermənidir. Bütün dünyanı özlərinə güldürən erməni millətçiləri çox güman ki, Qüdsü də “Böyük Ermənistan”ın paytaxtı hesab edirlər.

Azərbaycan Prezidentinin Administrasiyası və Ermənistan Baş nazirinin Aparatı tərəfindən dekabrın 7-də verilən birgə açıqlamada Bakı ilə İərvan arasında bir sıra razılığın əldə edildiyi bildirilib. Razılaşmaya əsasən, Azərbaycan 32 erməni hərbçini, Ermənistan öz növbəsində 2 azərbaycanlı əsgəri (İrəvanda saxlanılan azərbaycanlı hərbçilər Aqşin Bəbirov və Hüseyn Axundov-red.) azad edəcək. Hər iki ölkənin ictimaiyyəti neçə gündür hərbçilərin dəyişdiriləcəyi anı gözləyir. Proses hələ ki baş verməyib. Sozcu.az-ın məlumatına görə, nə Azərbaycan rəsmiləri, nə də Ermənistan hakimiyyətinin nümayəndələri saxlanılan hərbçilərin azad ediləcəyi günü və yeri, eləcə də prosesin kimin vasitəçilə gerçəkləşəcəyini açıqlamayıblar. Ermənistan mediasının məlumatına görə, mübadilə prosesi bu gün və ya sabah baş tuta bilər. Ermənistan parlamentinin Xarici Əlaqələr Komissiyasının rəhbəri Sarkis Xandanyan KİV-ə açıqlamasında hərbçilərin dəyişdirilmə prosesinin Ermənistan-Azərbaycan sərhədində baş tutacağını istisna etməyib. Amma kimin vasitəsilə, bunu açıqlamayıb. Ermənistan KİV-ləri prosesə Beynəlxalq Qızıl Xaç Komitəsinin vasitəçi olacağını ehtimal edir. Beynəlxalq Komitənin Ermənistan nümayəndəliyindən Zara Amatuni bildirib ki, “Qırmızı Xaç” tərəfləri neytral vasitəçi olmağa hazır olduqları barədə məlumatlandırıb. “Hazırda deyə biləcəyimiz yeganə şey odur ki, tərəflər bizə müraciət etsələr, prosesdə rol oynaya bilərik. Hazırda bizdə başqa məlumat yoxdur”, - Amatuni bildirib.modern)

Bakıda körpü çöküb. Bu barədə  Nəqliyyatı İntellektual İdarəetmə Mərkəzindən (NİİM) məlumat verilib. Bildirilib ki, Əbdülvahab Salamzadə küçəsi, körpünün üzərində yolun sağ zolağında yaranan çökmə səbəbindən küçənin hər iki istiqamətindəvə “Qələbə” dairəsində sıxlıq yaranıb. Sürücülərdən nəzərə almaları xahiş edilir. Qeyd edək ki, Milli Hodrometeorologiya Xidməti tərəfindən əvvəlcədən məlumat verildiyi kimi, bir neçə gündür paytaxtda intensiv yağış yağır. Bu isə bəzi yollarda hərəkəti çətinləşdirməklə bərabər, sıxlıq, subasma və çökmə halları ilə müşahidə edilir.

“Mən də arzulayardım ki, Azərbaycanla Ermənistan arasında sülh müqaviləsi ən yaxın zamanda və ən qısa müddətdə imzalansın və bununla da münaqişə bitsin...” "Son vaxtlar Azərbaycanla Ermənistan arasında sülh müqaviləsindən söz düşəndə bəzi siyasi şərhçilər iddia edir ki, həmin saziş Azərbaycandakı növbədənkənar prezident seçkilərinədək  imzalana bilər. Görəsən, bu nə dərəcədə reallığa uyğun proqnozdur..." Təhlükəsizlik məsələləri üzrə ekspert Ərəstun Oruclu Moderator.az-a açıqlamasında mövzu ilə bağlı fikirlərini belə ifadə edib: “Azərbaycanla Ermənistan arasında sülh müqaviləsinin növbədənkənar prezident seçkilərinədək imzalanacağı fikrinə mən bir az skeptik yanaşıram. Ona görə ki, sülh müqaviləsi yetərincə ciddi sənəddir və onun hazırlanması üçün kifayət qədər işlər görülməlidir. Sülh sazişinin bir sənəd olaraq bütün müddəaları hər iki tərəfdən razılaşdırılmalıdır. Və bu sənəd bütövlükdə onun icraatının bütün təminat mexanizmləri yaradılmadan belə, qəbul edilə bilməz. Yəni qısa müddətdə hansısa çərçivə sazişi və ya niyyət protokolu imzalana bilər ki, bu da sülh müqaviləsi demək deyil. Sülh müqaviləsi odur ki, Azərbaycanla Ermənistan arasında olmuş münaqişə, mübahisəli məsələlər, bir-birinin ərazi bütövlüyünün tanınması, təhlükəsizlik təminatı və digər bir çox məsələlər öz əksini tapan ciddi bir yekun sənəd ortalığa qoyulmalıdır... Onu da diqqətə çatdırım ki, sülh sazişini ehtiva edən sənəd yalnız dövlət başçılarının imzalamasıyla deyil, ölkələrin parlamentlər tərəfindən də ratifikasiya olunduqdan sonra əsil mənada “sülh müqaviləsi” adlandırıla bilər. Həmin prosedurun isə bütövlükdə Azərbaycanda növbəti il fevralın 7-ə nəzərdə tutulan prezident seçkilərinədək həyata keçirilməsi mümkün deyil. Ən azı, ona görə mümkün deyil ki, bu, dediyim kimi, genişmiqyaslı prosedurun qarşıda olan müddətdə fiziki baxımdan yekunlaşdırılması qeyri-mümkündür. Ona görə də sülh sazişi haqda deyilən proqnoza bir qədər skeptik yanaşıram. Baxmayaraq ki, mən də arzulayardım ki, Azərbaycanla Ermənistan arasında sülh müqaviləsi ən yaxın zamanda və ən qısa müddətdə imzalansın və bununla da münaqişə bitsin...”

Müxtəlif xəstəliklərdə, o cümlədən, virusa yoluxma zamanı ilk ağla gələn dərman preparatlarından biri antibiotiklərdir. İnsanlar bəzən həkimə getmədən belə dərmanlardan istifadə edirlər. Bu, əksər hallarda xəstələrin həyatı üçün təhlükə yaradır. Mövzu barədə tibb elmləri doktoru, professor Adil Qeybulla “Yeni Sabah”a açıqlamasında antibiotik qəbulunu yalnız həkimin müəyyən etdiyini bildirib. Onun sölərinə görə, istənilən dərman preparatından insan şoka düşə, allergik funksiyalara məruz qala bilər: “Bunun daha ağır forması anafilaktik şokdur. Antibiotiklər müxtəlif təsirlərə malikdir. Bu dərman vasitələrinə qarşı mikrobların davamlılığı günü-gündən artdıqca antibiotiklərin də daha güclü təsirə malik olan növləri istehsal olunur. Təbii ki, onların hər biri müxtəlif yan təsirlərə malikdir. Bir qrup antibiotiklər allergik reaksiya verə bilir, digər bir qrupu qanın göstəricilərini dəyişir, bəzi növləri başqa fəsadlar törədir. Sadəcə olaraq, burada diqqət edilməli məqam var. Antibiotik qəbulunun həddi həkim tərəfindən təyin olunur. Bu, beynəlxalq protokol və meyarlara əsasən həyata keçirilir. Məsələn, C reaktiv zülalın qanda təyini, müxtəlif iltihab göstəriciləri, mediatorların miqdarının müəyyən edilməsi ilə antibiotikin təyin olunma miqdarı öyrənilir”. A.Qeybulla yalnız ciddi bir səbəb olduqda antibiotikdən istifadəyə ehtiyac yarandığını vurğulayıb: “Antibiotikin xəstəyə təyin olunması üçün ciddi əsaslar lazımdır. Həmçinin, onların təyin olunma müddəti konkret meyarlarla ölçülməlidir. Təəssüf ki, adi virus xəstəlikləri zamanı belə insanlarımız özbaşına antibiotiklərdən istifadə edir. Bu həm sözügedən preparata qarşı həssaslığı azaldır, həm də digər fəsadlara səbəb ola bilir. Həkim təyin etmədən evdə antibiotik qəbulundan şoka düşən və dünyasını dəyişən insanların sayı yetəri qədər çoxdur. Bunların hamısı xəstələrin heç bir həkim məsləhəti olmadan özbaşına hərəkət etdiyini göstərir. Xəstəxanalarda da bəzən həmin məsələ ilə bağlı problemlər yaşana bilir”.

“İsrailin baş naziri Benyamin Netanyahu hazırkı hökumətinin tərkibini dəyişdirməlidir. Əks təqdirdə, mövcud durum beynəlxalq ictimaiyyətin Həmas ilə münaqişədə İsraili dəstəkləməsini çətinləşdirir”. Sozcu.az xəbər verir ki, bu barədə “The Times” nəşri məlumat yayıb. “Bu, İsrail tarixindəki ən mühafizəkar hökumətdir. Netanyahu mənim yaxın dostumdur, amma onun getməsi lazımdır”, – deyə Bayden əlavə edib. ABŞ prezidenti həmçinin İsrailin beynəlxalq dəstəyi itirməyə başlamasından narahatlığını ifadə edib.

Bakınln Yasamal rayonunda yol ötürücüsündə çuxur yaranıb. Sozcu.az xəbər verir ki, hadisə Əbdülvahab Salamzadə küçəsindən Ziya Bünyadov prospektinə keçid hissəsində qeydə alınıb. Yol ötürücüsündə uzunmüddətli yağıntılardan sonra çuxur yaranıb. Həmin hissədən yüksək sürətlə keçən avtomobillərin təkərlərinə ciddi ziyan dəyib. Ümumilikdə 4 avtomobilə ciddi ziyan dəydiyindən həmin sürücülər polisə məlumat verib. Digər maşınlara zərər dəyməsin deyə onlar yüksək sürətli şosedə dayanaraq sürücüləri digər zolağa yönləndiriblər. Hazırda sözügedən şosedə sıxlıq yaranıb. Qələbə dairəsindən Koroğlu istiqamətinə hərəkət edən sürücülərin diqqətli olması tövsiyə edilir.apa

"Putinin özü Ukrayna vətəndaşlarına qarşı soyqırıma başçılıq edir, amma riyakarcasına Qəzzada humanitar fəlakətdən dəm vurur..." "İsrail və Ukrayna hazırda azad dünyanın Rusiya və İranın başçılıq etdiyi şər oxuna qarşı mübarizənin ön sırasındadır..." Rusiya və İsrail liderləri arasında baş tutan telefon söhbəti "demokratik ölkə başçısı ilə bütün dünya üçün açıq-aydın və hissediləcək dərəcədə təhlükə törədən ilanın başı ilə söhbətidir". Sozcu.az xəbər verir ki, bu barədə Ukraynanın İsraildəki səfirliyi bəyan edib. Məlumatı "detaly.co.il" nəşri yayıb. Bəyanatda İsrailə Moskvaya qarşı müharibədə Kiyevin müttəfiqi olmağa çağırış edilib "İsrail və Ukrayna hazırda azad dünyanın Rusiya və İranın başçılıq etdiyi şər oxuna qarşı mübarizəsinim ön sırasındadır", - bəyanatda deyilir. Qeyd edilir ki, Putinin Qəzza bölgəsində humanitar fəlakət haqqında sözləri riyalarlıqdır, çünki "Putinin özü Ukrayna vətəndaşlarına qarşı soyqırıma başçılıq edir". Bəyanatda İsrail hökumətinə bu terrorçu ittifaqla birlikdə mübarizə aparmaq üçün Ukrayna ilə daha fəal əməkdaşlığa çağırış edilir. Xəbər verildiyi kimi, bu günlər İsrailin baş naziri Binyamin Netanyahu Rusiya prezidenti Vladimir Putinlə telefonla danışıb. Telefon söhbəti Rusiya tərəfinin təşəbbüsü ilə baş tutub. Netanyahu Rusiya rəsmi şəxslərinin BMT və digər beynəlxalq forumlarda İsrail əleyhinə mövqeləri ilə bağlı narazılığını ifadə edib. Baş nazir həmçinin "Rusiya ilə İran arasında təhlükəli əməkdaşlığı" sərt şəkildə tənqid edib. Söhbət zamanı Netanyahu vurğulayıb ki, oxşar terror hücumuna məruz qalan istənilən ölkə İsraildən də güclü cavab verərdi. Öz növbəsində Vladimir Putin terrorçuluğun bütün təzahürlərinin yolverilməz olduğu və pislənilməsi barədə prinsipial mövqeyini təsdiq edib.  Bununla yanaşı, o, vurğulayıb ki, terror təhlükələrinə müqavimətin mülki əhali üçün bu qədər ağır nəticələrə gətirib çıxarmaması son dərəcə vacibdir. Rusiya tərəfi dinc sakinlərin əzablarının yumşaldılması və münaqişənin deeskalasiyası məqsədilə bütün mümkün dəstəyi göstərməyə hazır olduğunu bəyan edib.

"Pəncə-Kilid" əməliyyatı bölgəsində (İraqda) Türkiyə hərbçisi şəhid olub. Sozcu.az xəbər verir ki, bu barədə ölkənin Milli Müdafiə Nazirliyi məlumat yayıb. Bildirilib ki, PKK terror təşkilatı üzvlərinin həyata keçirdiyi hücumda Türkiyə ordusunun hərbçisi, leytenant Alpərən Əmir şəhid olub.

ABŞ Prezidenti Co Bayden Ukraynaya 200 milyon dollar məbləğində hərbi yardımın ayrılmasını təsdiq edib. Sozcu.az xəbər verir ki, bu barədə Bayden ukraynalı həmkarı Vladimir Zelenski ilə görüşdə bildirib. Bayden qeyd edib ki, ABŞ Konqresi Ukraynaya 60 milyard dollardan çox yardımı təsdiq etməlidir. Qeyd edək ki, Zelenski ABŞ-da səfərdədir.

Ukrayna Müdafiə Nazirliyinin Baş Kəşfiyyat İdarəsinin kiber bölmələri Rusiya ərazisində növbəti uğurlu xüsusi əməliyyat keçiriblər. Sozcu.az UNİAN-a istinadla xəbər verir ki,- bu dəfə onlar təcavüzkar dövlətin vergi sisteminə hücum ediblər. Baş Kəşfiyyat İdarəsinin mətbuat xidmətinin verdiyi məlumata görə, xüsusi əməliyyat zamanı hərbi kəşfiyyatçılar Federal Vergi Xidmətinin yaxşı qorunan əsas mərkəzi serverlərindən birinə, daha sonra isə onun regional bölmələrinin 2300-dən çoxuna nüfuz etməyə nail olublar. Serverlər bütün Rusiyada, eləcə də müvəqqəti işğal olunmuş Krım ərazisindədir. Qeyd olunur ki, kiberhücum nəticəsində bütün serverlər zərərli proqram təminatı alıb. Eyni zamanda, Rusiya Federasiyasının Federal Vergi Xidmətinə xidmət edən “Office.ed-it.ru” İT şirkəti də eyni şəkildə hücuma məruz qalıb. “İki kiberhücum nəticəsində illər boyu Rusiya Federasiyasının geniş vergi sisteminin işləməsini təmin edən konfiqurasiya faylları tamamilə ləğv edildi. Bütün məlumat bazası və onun ehtiyat nüsxələri məhv edildi. Moskvadakı mərkəzi ofis ilə 2300 regional ofis, ərazi idarələri, eləcə də Rusiya Federasiyasının Federal Vergi Xidməti ilə vergi məlumat mərkəzi (məlumat bankı) olan Office.ed-it.ru arasında əlaqə iflic vəziyyətinə düşüb. Söhbət faktiki olaraq, terrorçu Rusiyanın əsas dövlət orqanlarından birinin infrastrukturu və uzun müddət ərzində onu müşayiət edən çoxsaylı vergi məlumatlarının məhvində\n gedir”, - məlumatda deyilir. Xüsusi əməliyyat nəticəsində Rusiyanın bütün ərazisində vergi məlumatlarının internet trafikinin Ukrayna hərbi kəşfiyyatının əlinə keçdiyi vurğulanır.

Yaşıl meydanların iki əfsanəvi futbolçusu, “İnter Mayami”də çıxış edən argentinalı Lionel Messi və “Əl Nəsr”də çıxış edən portuqaliyalı Kriştianu Ronaldonun komandaları fevralın 1-də qarşılaşacaq. Sozcu,az xarici KİV-ə istinadla xəbər verir ki, bu barədə ABŞ-nin “İnter Mayami” klubu məlumat verib. Məlumata görə, komanda mövsüm ərəfəsindəki hazırlıqlar çərçivəsində Səudiyyə Ərəbistanı təmsilçilərindən “Əl Hilal” və “Əl Nəsr” komandaları ilə yoldaşlıq oyunu keçirəcək. Səudiyyə Ərəbistanının paytaxtı Ər-Riyadda keçiriləcək oyunda “İnter Mayami” yanvarın 29-da “Əl Hilal”, fevralın 1-də isə “Əl Nəsr”lə qarşılaşacaq. Qeyd edək ki, Ronaldonun formasını geydiyi “Əl Nəsr” komandası əsas liqada ikinci yerdə qərarlaşıb. Messinin zədə ilə əlaqədar meydana çıxa bilmədiyi “İnter Mayami” komandası isə matçlarda zəif nəticə göstərdiyi üçün liqada pley-off mərhələsinə vəsiqə qazana bilməyib. Qeyd edək ki, yaşıl meydanların iki ulduzu Messi və Ronaldo öz komandaları ilə 38 dəfə qarşılaşıblar. Bu görüşlərin 17-də Messinin komandası, 11-də isə Ronaldonun komandası qalib gəlib.

Rusiyanın İrandakı keçmiş baş konsulu Konstantin Alekseyev Moskvadakı mənzilində ölü tapılıb. Sozcu.az xəbər verir ki, məlumatı Rusiya mediası yayıb. Bildirilib ki, diplomatın meyitini həyat yoldaşı aşkarlayıb. Hazırda ekspertlər keçmiş baş konsulun ölüm səbəbini araşdırırlar. Qeyd edək ki, Konstantin Alekseyev 2015-2019-cu illərdə Rusiyanın İrandakı baş konsulu vəzifəsində çalışıb.

Dünyaca məşhur müğənnilər Selena Qomez və Teylor Svift gəlirləri Qəzzaya göndərilmək üçün təşkil olunan komediya şousunu izləməyə qatılıblar. Sozcu.az xəbər verir ki, humanitar yardım üçün toplanacaq pullar üçün keçirilən şou Bruklində baş tutub. Qomez və Sviftlə yanaşı Kara Delevin, Anna Taylor Coy və Zoe Kravits də izləyicilər arasında olub. Qeyd edək ki, Qəzzada 7 oktyabrdan baş verən hücumlardan bu yana ölənlərin sayı 18 min 205 nəfərə çatıb. Yaralananların sayı isə 49 min 645-ə yüksəlib.

Yenidən Polşa Baş naziri seçilmiş Donald Tusk inaqurasiya nitqində Qərbi Ukrayna dəstəyi artırmağa təhrik edəcəyini deyib. Sozcu.az xəbər verir ki, Tusk bundan sonra Ukraynadakı vəziyyətdən yorulduğunu deyən siyasətçilərə qulaq asmayacağını vurğulayıb. “Biz Qərbin Ukraynaya yardım üçün tam səfərbərliyini tələb edəcəyik. Mən bundan sonra Ukraynadakı vəziyyətdən yorulduğunu bildirən siyasətçilərə qulaq asmayacağam. Ukraynaya hücum bizim hamımıza hücumdur. Biz Ukrayna ilə bağlı vahid mövqedən çıxış etməliyik. Bu bizi birləşdirməlidir… Biz müharibənin nə üçün olduğunu xatırlamalıyıq. Ukraynalılar son dərəcə vacib bir məsələ uğrunda mübarizə aparırlar, onların mübarizəsi Maydanda başladı, onlar Qərb ictimaiyyətinə qoşulmaq uğrunda döyüşürlər”, - Baş nazir deyib. Tusk Polşanın Ukraynaya dəstəyinin vacib olduğunu, bununla belə fermerlərin qorunması kim öz milli maraqları ilə bağlı məsələlərdə mühafizəkar mövqe sərgiləməli olduğunu əlavə edib.apa

Sumqayıt şəhər məhkəməsində vəzifə səlahiyyətlərindən sui-istifadədə təqsirləndirilən Sumqayıt 2 saylı şəhər xəstəxanasının sabiq baş həkimi Ramiz Həmzəyevin cinayət işi üzrə məhkəmə prosesi başa çatıb. Sozcu.az xəbər verir ki, Sumqayıt şəhər məhkəməsinin hakimi Rövşən Xəlilovun sədrliyi ilə keçirilən iclasda təqsirləndirilən şəxsə hökm oxunub. Məhkəmənin hökmü ilə təqsirləndirilən şəxs cinayət məcəlləsinin 308.1-ci maddəsi ilə təqsirli bilinərək qazancından 15 faiz dövlət nəfinə pul tutulmaqla, 2 il müddətə islah işləri cəzasına məhkum edilib. Ramiz Həmzəyev Cinayıt Məcəlləsinin 313-cü maddəsinə əsasən təqsirli bilinsə də, bu maddə üzrə barəsində başlanmış cinayət işinə cinayət məsuliyyətinə cəlb etmə müddəti bitdiyinə görə xitam verilib. İttihama görə, Azərbaycan Respublikası İcbari Tibbi Sığorta üzrə Dövlət Agentliyi TƏBİB Publik Hüquqi şəxsin Sumqayıt 2 nömrəli şəhər xəstəxanasının baş həkimi işləmiş Həmzəyev Ramiz Şahverdi oğlu vəzifəli şəxs qismində xidməti vəzifələrinin icrası ilə əlaqədar özü və üçüncü şəxslər üçün qanunsuz üstünlük əldə etmək məqsədilə dövlətin qanunla qorunan mənafelərinə vahid niyyətlə mühüm zərər vurmaqla səlahiyyətlərindən su istifadə edib, rəsmi sənədlərə bilə-bilə yalan məlumatları daxil edib. Belə ki, o əlillik dərəcəsi almaq üçün müraciət etmiş şəxslərin adına xəstəxanada stasionar müalicə almaları barədə müxtəlif diaqnozlar qeyd edilməklə saxta sənədlər verib. Bununla da Cinayət Məcəlləsinin 308.1-cü maddəsində nəzərdə tutulan cinayət əməllərini törətməkdə təqsirli bilinib.

Fövqəladə Hallar Nazirliyinin “112” qaynar telefon xəttinə paytaxtın Suraxanı rayonu Zığ şosesində yol-nəqliyyat qəzasının baş verməsi və vətəndaşın avtomobildə sıxılı vəziyyətdə qalması barədə məlumat daxil olub. Sozcu.az xəbər verir ki, bu barədə FHN məlumat yayıb. Məlumatla əlaqədar hadisə yerinə dərhal FHN-in Xüsusi Riskli Xilasetmə Xidmətinin xilasediciləri cəlb edilib. Hadisə yerində əməliyyat şəraiti qiymətləndirilərkən müəyyən olunub ki, “Toyota” markalı minik avtomobilinin “Mersedes” markalı evakuatorla toqquşması nəticəsində yol-qəza hadisəsi baş verib və minik avtomobilinin sərnişini deformasiyaya uğramış avtomobildə sıxılı vəziyyətdə qalıb. Xilasedicilər xüsusi vasitələrin köməyi ilə avtomobildə sıxılı vəziyyətdə qalan sərnişin, 2001-ci il təvəllüdlü R.Əlizadəni xilas edərək təcili tibbi yardım briqadasına təhvil veriblər. Hadisə ilə əlaqədar müvafiq qurumlar tərəfindən təhqiqat aparılır.

Rusiya Federasiyasından uranın idxalına qadağa ABŞ Konqresinin Nümayəndələr Palatası tərəfindən təsdiqlənib. Sozcu.az xəbər verir ki, qanun layihəsi 2040-cı il dekabrın 31-dək Rusiyada və ya Rusiya şirkətləri tərəfindən istehsal olunan tükənmiş uranın ABŞ-a idxalını qadağan edir. "The Hill" yazır ki, təşəbbüs həm Respublikaçı, həm də Demokratlar Partiyalarının nümayəndələri tərəfindən bəyənilib. Qanun layihəsi Senat tərəfindən təsdiqlənərsə və ABŞ prezidenti Co Bayden tərəfindən imzalansa, məhdudiyyətlər qüvvəyə minəcək.