15:36 Prezident İlham Əliyev “Azərbaycan Respublikasının Daxili İşlər Nazirliyi ilə Tacikistan Respublikasının Daxili İşlər Nazirliyi arasında əməkdaşlıq haqqında Saziş”in təsdiq edilməsi barədə fərman imzalayıb. Sozcu.az fərmanın mətnini təqdim edir: 1. 2023-cü il aprelin 5-də Düşənbə şəhərində imzalanmış “Azərbaycan Respublikasının Daxili İşlər Nazirliyi ilə Tacikistan Respublikasının Daxili İşlər Nazirliyi arasında əməkdaşlıq haqqında Saziş” təsdiq edilsin. 2. Bu Fərmanın 1-ci hissəsində göstərilən Saziş qüvvəyə mindikdən sonra Azərbaycan Respublikasının Daxili İşlər Nazirliyi onun müddəalarının həyata keçirilməsini təmin etsin. 3. Azərbaycan Respublikasının Xarici İşlər Nazirliyi Sazişin qüvvəyə minməsi üçün zəruri olan dövlətdaxili prosedurların yerinə yetirildiyi barədə Tacikistan Respublikası Hökumətinə bildiriş göndərsin. *** Prezident İlham Əliyev “Azərbaycan Respublikasının Dövlət Gömrük Komitəsi ilə Tacikistan Respublikası Hökuməti yanında Gömrük Xidməti arasında Azərbaycan Respublikası və Tacikistan Respublikası arasında keçirilən mal və nəqliyyat vasitələri barədə ilkin məlumat mübadiləsinin təşkili haqqında Protokol”un təsdiq edilməsi barədə fərman imzalayıb. Fərmanda deyilir: 1. 2023-cü il aprelin 5-də Düşənbə şəhərində imzalanmış “Azərbaycan Respublikasının Dövlət Gömrük Komitəsi ilə Tacikistan Respublikası Hökuməti yanında Gömrük Xidməti arasında Azərbaycan Respublikası və Tacikistan Respublikası arasında keçirilən mal və nəqliyyat vasitələri barədə ilkin məlumat mübadiləsinin təşkili haqqında Protokol” təsdiq edilsin. 2. Bu Fərmanın 1-ci hissəsində göstərilən Protokol qüvvəyə mindikdən sonra Azərbaycan Respublikasının Dövlət Gömrük Komitəsi onun müddəalarının həyata keçirilməsini təmin etsin. 3. Azərbaycan Respublikasının Xarici İşlər Nazirliyi Protokolun qüvvəyə minməsi üçün zəruri olan dövlətdaxili prosedurların yerinə yetirildiyi barədə Tacikistan Respublikası Hökumətinə bildiriş göndərsin. *** Prezident İlham Əliyev “Azərbaycan Respublikası Hökuməti ilə Tacikistan Respublikası Hökuməti arasında yerquruluşu, torpaq münasibətləri, kadastr, geodeziya, kartoqrafiya, Yerin məsafədən zondlanması və coğrafi informasiya sistemləri sahələrində əməkdaşlıq haqqında Saziş”in təsdiq edilməsi barədə fərman imzalayıb. Fərmanda deyilir: 1. 2023-cü il aprelin 5-də Düşənbə şəhərində imzalanmış “Azərbaycan Respublikası Hökuməti ilə Tacikistan Respublikası Hökuməti arasında yerquruluşu, torpaq münasibətləri, kadastr, geodeziya, kartoqrafiya, Yerin məsafədən zondlanması və coğrafi informasiya sistemləri sahələrində əməkdaşlıq haqqında Saziş” təsdiq edilsin. 2. Bu Fərmanın 1-ci hissəsində göstərilən Saziş qüvvəyə mindikdən sonra Azərbaycan Respublikasının İqtisadiyyat Nazirliyi və Azərbaycan Respublikasının Ekologiya və Təbii Sərvətlər Nazirliyi onun müddəalarının həyata keçirilməsini təmin etsin. 3. Azərbaycan Respublikasının Xarici İşlər Nazirliyi Sazişin qüvvəyə minməsi üçün zəruri olan dövlətdaxili prosedurların yerinə yetirildiyi barədə Tacikistan Respublikası Hökumətinə bildiriş göndərsin. *** Prezident İlham Əliyev “Azərbaycan Respublikasının Miqrasiya Məcəlləsində dəyişiklik edilməsi haqqında” Azərbaycan Respublikasının 2023-cü il 4 aprel tarixli 853-VIQD nömrəli Qanununun tətbiqi və “Azərbaycan Respublikasının Miqrasiya Məcəlləsinin təsdiq edilməsi, qüvvəyə minməsi və bununla bağlı hüquqi tənzimləmə haqqında” Azərbaycan Respublikasının 2013-cü il 2 iyul tarixli 713-IVQ nömrəli Qanununun tətbiqi barədə” Azərbaycan Respublikası Prezidentinin 2013-cü il 8 iyul tarixli 938 nömrəli Fərmanında dəyişiklik edilməsi haqqında fərman imzalayıb. Fərmanda deyilir: 1.1. Azərbaycan Respublikası Miqrasiya Məcəlləsinin 45-ci maddəsinin “Qeyd” hissəsinin 3-cü bəndində nəzərdə tutulmuş müvafiq icra hakimiyyəti orqanının səlahiyyətlərini Azərbaycan Respublikasının Prezidenti həyata keçirir; 1.2. həmin Məcəllənin 45.1.6-1-ci maddəsində, 45-ci maddəsinin “Qeyd” hissəsinin 2-ci bəndində, 52.1.10-cu (hər iki halda) və 52.1.11-ci maddələrində nəzərdə tutulmuş müvafiq icra hakimiyyəti orqanının səlahiyyətlərini Azərbaycan Respublikasının İqtisadiyyat Nazirliyi həyata keçirir; 1.3. həmin Məcəllənin 45.3-cü maddəsinin birinci və ikinci cümlələrində, 52-ci maddəsinin “Qeyd” hissəsinin 2-ci və 3-cü bəndlərinin birinci və ikinci cümlələrində nəzərdə tutulmuş müvafiq icra hakimiyyəti orqanının səlahiyyətlərini Azərbaycan Respublikasının Dövlət Miqrasiya Xidməti həyata keçirir. 2. Azərbaycan Respublikasının Nazirlər Kabineti “Azərbaycan Respublikasının Miqrasiya Məcəlləsində dəyişiklik edilməsi haqqında” Azərbaycan Respublikasının 2023-cü il 4 aprel tarixli 853-VIQD nömrəli Qanunundan irəli gələn məsələləri həll etsin. 3. Azərbaycan Respublikasının İqtisadiyyat Nazirliyi üç ay müddətində: 3.1. Azərbaycan Respublikası Miqrasiya Məcəlləsinin 45.1.6-1-ci və 52.1.10-cu maddələrinə uyğun olaraq, Azərbaycan Respublikasının ərazisində müvəqqəti və ya daimi yaşamaq icazəsinin verilməsi (müddətinin uzadılması) üçün həmin maddələrdə nəzərdə tutulan hüquqi şəxsin ödənilməli olan nizamnamə kapitalının miqdarını təsdiq edib Azərbaycan Respublikasının Prezidentinə məlumat versin; 3.2. həmin Məcəllənin 45-ci maddəsinin “Qeyd” hissəsinin 2-ci bəndinə, 52.1.10-cu və 52.1.11-ci maddələrinə uyğun olaraq, Azərbaycan Respublikasının ərazisində müvəqqəti və ya daimi yaşamaq icazəsinin verilməsi (müddətinin uzadılması) üçün həmin maddələrdə nəzərdə tutulan şəxslərin dövriyyə həcmini təsdiq edib Azərbaycan Respublikasının Prezidentinə məlumat versin. 4. “Azərbaycan Respublikasının Miqrasiya Məcəlləsinin təsdiq edilməsi, qüvvəyə minməsi və bununla bağlı hüquqi tənzimləmə haqqında” Azərbaycan Respublikasının 2013-cü il 2 iyul tarixli 713-IVQ nömrəli Qanununun tətbiqi barədə” Azərbaycan Respublikası Prezidentinin 2013-cü il 8 iyul tarixli 938 nömrəli Fərmanında (Azərbaycan Respublikasının Qanunvericilik Toplusu, 2013, № 7, maddə 803; 2014, № 9, maddə 1050, № 11, maddələr 1382, 1413, № 12, maddə 1588; 2015, № 10, maddə 1121; 2016, № 6, maddələr 1020, 1044, № 11, maddə 1827; 2018, № 7 (I kitab), maddə 1476; 2019, № 7, maddə 1240; 2020, № 6, maddə 703; 2021, № 1, maddə 36; 2023, № 2, maddə 237; Azərbaycan Respublikası Prezidentinin 2023-cü il 3 mart tarixli 2056 nömrəli Fərmanı) aşağıdakı dəyişikliklər edilsin: 4.1. 5.1-ci bəndə “44.6-cı” sözlərindən sonra “maddələrində, 45-ci maddəsinin “Qeyd” hissəsinin 3-cü bəndində” sözləri əlavə edilsin; 4.2. 5.4-cü bənddə “45.2-ci maddəsinin” sözləri “45.2-ci və 45.3-cü maddələrinin” sözləri ilə əvəz edilsin və həmin bəndə “52.3-cü” sözlərindən sonra “maddələrində, 52-ci maddəsinin “Qeyd” hissəsinin 2-ci və 3-cü bəndlərinin birinci və ikinci cümlələrində” sözləri əlavə edilsin; 4.3. aşağıdakı məzmunda 5.11-1-ci bənd əlavə edilsin: “5.11-1. həmin Məcəllənin 45.1.6-1-ci maddəsində, 45-ci maddəsinin “Qeyd” hissəsinin 2-ci bəndində, 52.1.10-cu (hər iki halda) və 52.1.11-ci maddələrində nəzərdə tutulmuş müvafiq icra hakimiyyəti orqanının səlahiyyətlərini Azərbaycan Respublikasının İqtisadiyyat Nazirliyi həyata keçirir;”; 4.4. 5.19-cu bəndin sonunda nöqtə işarəsi nöqtəli vergül işarəsi ilə əvəz olunsun və aşağıdakı məzmunda 5.20-ci bənd əlavə edilsin: “5.20. həmin Məcəllənin 45-ci maddəsinin “Qeyd” hissəsinin 3-cü bəndində, “iqtisadi rayonlar” dedikdə, “Azərbaycan Respublikasında iqtisadi rayonların yeni bölgüsü haqqında” Azərbaycan Respublikası Prezidentinin 2021-ci il 7 iyul tarixli 1386 nömrəli Fərmanının 1.6-cı və 1.13-cü bəndlərində göstərilmiş Azərbaycan Respublikasının iqtisadi rayonları nəzərdə tutulur.”. *** Prezident İlham Əliyev “Banklar haqqında” Azərbaycan Respublikasının Qanununda dəyişiklik edilməsi barədə” Azərbaycan Respublikasının 2023-cü il 4 aprel tarixli 854-VIQD nömrəli Qanununun tətbiqi və “Banklar haqqında” Azərbaycan Respublikası Qanununun tətbiq edilməsi barədə” Azərbaycan Respublikası Prezidentinin 2004-cü il 26 mart tarixli 42 nömrəli Fərmanında dəyişiklik edilməsi haqqında fərman imzalayıb. Fərmanda deyilir: 1. Müəyyən edilsin ki, “Banklar haqqında” Azərbaycan Respublikası Qanununun 41.2-ci maddəsinin dördüncü abzasında nəzərdə tutulmuş müvafiq icra hakimiyyəti orqanının səlahiyyətlərini Azərbaycan Respublikasının Dövlət Miqrasiya Xidməti həyata keçirir. 2. “Banklar haqqında” Azərbaycan Respublikası Qanununun tətbiq edilməsi barədə” Azərbaycan Respublikası Prezidentinin 2004-cü il 26 mart tarixli 42 nömrəli Fərmanının (Azərbaycan Respublikasının Qanunvericilik Toplusu, 2004, № 3, maddə 143; 2010, № 2, maddə 80; 2014, № 11, maddə 1392; 2017, № 4, maddə 550; 2021, № 12, maddə 1373; 2022, № 8, maddə 862) 3-cü hissəsində aşağıdakı dəyişikliklər edilsin: 2.1. 3.2-ci bənd aşağıdakı redaksiyada verilsin: “3.2. həmin Qanunun 41.2-ci maddəsinin dördüncü abzasında nəzərdə tutulmuş müvafiq icra hakimiyyəti orqanının səlahiyyətlərini Azərbaycan Respublikasının Dövlət Miqrasiya Xidməti həyata keçirir;”; 2.2. 3.3-cü bənd ləğv edilsin. 3. Azərbaycan Respublikasının Nazirlər Kabineti “Banklar haqqında” Azərbaycan Respublikasının Qanununda dəyişiklik edilməsi barədə” Azərbaycan Respublikasının 2023-cü il 4 aprel tarixli 854-VIQD nömrəli Qanunundan irəli gələn məsələləri həll etsin. *** Prezident İlham Əliyev “Qiymətli kağızlar bazarı haqqında” Azərbaycan Respublikasının Qanununda dəyişiklik edilməsi barədə” Azərbaycan Respublikasının 2023-cü il 4 aprel tarixli 855-VIQD nömrəli Qanununun tətbiqi və “Qiymətli kağızlar bazarı haqqında” Azərbaycan Respublikasının 2015-ci il 15 may tarixli 1284-IVQ nömrəli Qanununun tətbiqi barədə” Azərbaycan Respublikası Prezidentinin 2015-ci il 14 iyul tarixli 566 nömrəli Fərmanında dəyişiklik edilməsi haqqında fərman imzalayıb. Fərmanda deyilir: 1. Müəyyən edilsin ki, “Qiymətli kağızlar bazarı haqqında” Azərbaycan Respublikası Qanununun 28.4-cü maddəsində nəzərdə tutulmuş müvafiq icra hakimiyyəti orqanının səlahiyyətlərini Azərbaycan Respublikasının Dövlət Miqrasiya Xidməti həyata keçirir. 2. “Qiymətli kağızlar bazarı haqqında” Azərbaycan Respublikasının 2015-ci il 15 may tarixli 1284-IVQ nömrəli Qanununun tətbiqi barədə” Azərbaycan Respublikası Prezidentinin 2015-ci il 14 iyul tarixli 566 nömrəli Fərmanına (Azərbaycan Respublikasının Qanunvericilik Toplusu, 2015, № 7, maddə 834; 2016, № 6, maddə 1049; 2017, № 5, maddə 847; 2019, № 7, maddə 1214) aşağıdakı məzmunda 2.5-ci bənd əlavə edilsin: “2.5. həmin Qanunun 28.4-cü maddəsində nəzərdə tutulmuş müvafiq icra hakimiyyəti orqanının səlahiyyətlərini Azərbaycan Respublikasının Dövlət Miqrasiya Xidməti həyata keçirir.”. 3. Azərbaycan Respublikasının Nazirlər Kabineti “Qiymətli kağızlar bazarı haqqında” Azərbaycan Respublikasının Qanununda dəyişiklik edilməsi barədə” Azərbaycan Respublikasının 2023-cü il 4 aprel tarixli 855-VIQD nömrəli Qanunundan irəli gələn məsələləri həll etsin.

Etiraf edək ki, uşaqlar indi daha az məktəbə gedir. Misal olaraq, 10 il hər həftəsonu məktəbə getməklə indiki uşaqlardan 2 il artıq tədris almışam. Sozcu.az xəbər verir ki, bunu elm və təhsil naziri Emin Əmrullayev keçirdiyi brifinqdə deyib. Nazirin sözlərinə görə, tədris ili nə qədər uzun olarsa, bu, uşaqların gələcəyi üçün daha yaxşı olardı: "İnkişaf etmiş ölkələrdə tətillər yayda yox, qışdadır. Bizdə isə üç aylıq tətil müddəti var. Təhsil işçisi olaraq bildirim ki, tədris müddəti nə qədər çox olsa, o qədər yaxşı tədris olar. Fikrimcə, məktəblərdə sentyabrın 1-dən tədrisin başlaması daha uyğun olardı. Bu, sadəcə istəkdir".

Ukrayna Silahlı Qüvvələri son bir neçə gündə Baxmut şəhərinin 20 kvadrat kilometrini Rusiya bölmələrindən azad edib. Sozcu.az xəbər verir ki, bu barədə Ukrayna müdafiə nazirinin müavini Anna Malyar deyib. Onun sözlərinə görə, Rusiya ordusu şəhərin daxilində irəliləməyə davam edir: “Şəhər artilleriya ilə yerlə-yeksan edilir”.

Ukrayna Müdafiə Nazirliyinin Baş Kəşfiyyat İdarəsindəki (GUR) mənbələr bildiriblər ki, Fransa Ermənistanı öldürücü silahlarla təchiz etmək qərarına gəlib. Sozcu.az xəbər verir ki, bu barədə İsrailin "İ24NEWS" nəşri məlumat yayıb. İddiaya görə Fransa yaxın vaxtlarda Ermənistana 50 zirehli transportyor təhvil verəcək. Həmçinin, gələcəkdə Fransa istehsalı olan "Minstrel" hava hücumundan müdafiə raketlərinin İrəvana tədarükü nəzərdən keçirilir. Nəşr qeyd edir ki, Paris Ermənistana silah ixracı üçün sistem qurmağa hazırlaşmağa başlayıb. Fransa-Ermənistan Dostluq Qrupunun rəhbəri Gilbert-Luc Devinaz qarşıdan gələn silah tədarükü barədə açıqlama verib. “Biz Ermənistana imkan verməliyik ki, öz sərhədlərinin təhlükəsizliyini təmin etsin, yəni onun silahlanmasına kömək etməliyik", - o bildirib.

Bu gün saat 07:15 radələrində Goranboy rayonunun Xoylu kəndi ərazisində iki nəfərin ölümü ilə nəticələnən ağır yol-nəqliyyat hadisəsi baş verib. Baş Dövlət Yol Polisi İdarəsindən Sozcu.az-a verilən məlumata görə, Nəbiyev Nicat Rəhim oğlunun idarə etdiyi “Mercedes” markalı  90-GA-314 dövlət qeydiyyat nişanlı nəqliyyat vasitəsilə hərəkətdə olarkən idarəetməni itirib və  yolun hərəkət hissəsinin kənarındakı ağaca çırpılıb. Nəticədə sürücü N.Nəbiyev və sərnişini Elvin Quliyev hadisə yerində dünyasını dəyişib. Hazırda faktla bağlı araşdırma aparılır. Qeyd edək ki, qəza zamanı həlak olanların hərbi qulluqçular olduğu bildirilir.

Ukrayna Silahlı Qüvvələrinin general-polkovniki Aleksandr Sırski yenidən Baxmuta baş çəkib. Sozcu.az "Unian"a istinadən xəbər verir ki, o, şəhərin müdafiəçiləri ilə görüşüb. "Ön cərgədə olan komandirləri və əsgərləri ziyarət etdim. Onların hər biri müharibə tariximizin yeni səhifəsinin müəllifidir. Aktiv müdafiə prinsipindən istifadə edərək, əlimizdən gələni edirik. Baxmut yaxınlığında bəzi istiqamətlərdə əks-hücumla bağlı hərəkətə keçirik. Düşmənin daha çox resursu var, amma biz onun planlarını məhv edirik”, - deyə o qeyd edib. Xatırladaq ki, ötən ilin 24 fevralında Rusiyanın Ukraynaya hücumu nəticəsində başlayan müharibə davam edir. Rusiya Ukraynanın Xerson və Zaporojye vilayətlərini, habelə qondarma "Donetsk XR" və "Luqansk XR" separatçı qurumlarını birtərəfli qaydada ilhaq etdiyini açıqlayıb.

“Nazirlər Kabinetinin 2014-cü il 6 iyun tarixli 182 nömrəli qərarı ilə təsdiq edilən istehlak səbətinin strukturuna baxanda və müqayisəli təhlil aparanda görərik ki, səbətə daxil olan bəzi məhsullar üzrə MDB ölkələrindən öndəyik, bəzi məhsullar üzrə geridə. Məsələn, Rusiyada daha çox kartof, dənli məhsullara üstünlük verilir. Bizdə isə çörəyə üstünlük verilir. Ümumi götürəndə, hazırda Azərbaycanda minimum istehlak səbəti MDB ölkələri ilə bərabər və ya yüksək səviyyədədir. Bəzi Qərbi Avropa ölkələrinə - Bolqarıstan, Yunanıstan, Litvaya baxanda bizdə, hətta müəyyən normativlərdə fərqlər var. Sözsüz ki, Azərbaycanda təsdiq olunan minimum istehlak səbəti günün tələblərinə cavab vermir. Son illər böyük inflyasiya olub, qiymətlər dəyişib. Ərzaqların qiymətlərində də dəyişiklik var. Bu da normativin aşağı düşməsinə səbəb olur”. Bu sözləri Pravda.az-a açıqlamasında iqtisadçı-ekspert Eyyub Kərimli deyib. Ekspert bildirib ki, istehlak səbətinə görə, günə 90 qram ət nəzərdə tutulub: “Lakin ətin qiyməti əvvəllər 12 manat idisə, indi 17 manatdır. Bu da normativi aşağı salır. Hesab edirəm, minimum istehlak səbətinin dəyərinə və ona daxil olan ərzaqlara yenidən baxılmalıdır. Düşünürəm, bu sahədə Səhiyyə Nazirliyinin mütəxəssislərinin də fikirləri mütləq nəzərə alınmalıdır. Çünki bu, iqtisadi məsələdən daha çox sağlamlıq məsələsidir. Həkimlər təsdiq etməlidirlər ki, səbətdə nəzərdə tutulan ərzaq normaları ilə insan yaşaya, acından ölməyə bilər, ya yox? Bəzi ölkələrdə, hətta minimum istehlak səbətinə məcburi daxil edilən vacib məişət texnikaları da var, insanların mədəni istirahəti də. Bizdə isə bunlar daxil edilməyib. Məsələn, həmin ölkələrdə ütü, paltaryuyan maşın, televizor, ayda bir dəfə teatra, kinoteatra getmək səbətdə nəzərdə tutulub. Bütün bunlar, əlbəttə ki, minimum istehlak səbətinin ümumi dəyərinə təsir göstərir. Bir sözlə, Azərbaycanın minimum istehlak səbəti qiymətlər baxımından günün tələblərinə cavab vermir, hətta səbətdə göstərilən ərzaqların indiki alış qiyməti ümumi minimum istehlak və minimum yaşayış həddindən daha baha başa gəlir”.

Bu gündən etibarən Bakı-Tbilisi-Qars dəmir yolu xəttinin Gürcüstan hissəsi qeyri-müəyyən müddətə bağlanıb. Sozcu.az “APA-Economics”ə istinadla xəbər verir ki, dəmir yolunun Gürcüstan hissəsinin bağlanmasının səbəbi - baş podratçı tərəfindən sahənin tikinti tempinin sürətləndirilməsi və layihənin qısa müddətdə başa çatdırılmasıdır. Dəmir yolu xəttinin tikintisinə 2008-ci ildə başlanılıb. Dəmir yolu rəsmən istifadəyə verilməsə də, 2017-ci il oktyabrın 30-dan yükdaşımaları sınaq rejimində həyata keçirilir. Gürcüstan ərazisində işlərin təxminən 86%-i yerinə yetirilib. Vurğulanır ki, ötən ilin dekabrında Gürcüstanın baş naziri İrakli Qaribaşvili bu il layihəyə əlavə olaraq 100 mln. dollar sərmayə qoyulacağını və onun təntənəli açılışının 2024-cü ildə baş tutacağını bildirmişdi.

Müdafiə nazirinin təsdiq etdiyi 2023-cü il üçün hazırlıq planına əsasən, "N" hərbi hissəsində bir qrup hərbi vəzifəlilərin növbəti təlim toplanışı keçirilir. Bu barədə Sozcu.az-a Müdafiə Nazirliyindən məlumat verilib. Toplanış məntəqəsinin qərargahında müvafiq qeydiyyatdan və həkim müayinəsindən keçdikdən sonra hərbi vəzifəlilər hərbi geyim, həmçinin digər təminat növləri ilə təmin edilir. Ehtiyatdan çağırılan hərbi vəzifəlilərin cəlb olunduğu toplanışın əsas məqsədi onların döyüş vərdişlərini, hərbi ixtisas və təcrübələrini təkmilləşdirmək, eyni zamanda ordumuzun arsenalında olan müasir silah və hərbi texnika ilə yaxından tanış etmək və düzgün, effektiv istismar qaydalarını öyrətməkdir.

Şərqi Azərbaycan əyalətinin Sarab mahalının Qaraqaya kəndində yağan güclü qar uçqun ilə nəticələnib. Sozcu.az xəbər verir ki, bu barədə əyalətin Qızıl Aypara Cəmiyyətinin başçısı Həmid Münəccim məlumat verib. Qar uçqunu nəticəsində 19 nəfərin xəsarət aldığını deyən H.Münəccim axtarış-xilasetmə dəstələrinin vaxtında müdaxiləsi nəticəsində onların həyatının xilas edildiyini bildirib. Qeyd edək ki, mayın 14-dən başlayaraq Güney Azərbaycanın bir sıra bölgələrində güclü qar yağıb, bəzi yerlərdə yollar bağlanıb.

Goranboyda iki nəfərin ölümü ilə nəticələnən yol qəzası baş verib. DİN-in Mətbuat Xidmətinin Gəncə regional qrupunun baş inspektoru polis kapitanı Eşqin Qasımov "Qafqazinfo"ya bildirib ki, Goranboy Rayon Polis Şöbəsinə rayonun Xoylu kəndi ərazisində yol-nəqliyyat hadisəsi olması barədə məlumat daxil olub. Dərhal polis əməkdaşları hadisə yerinə gələrək müvafiq araşdırmalar aparıb və nəqliyyatın hərəkətini bərpa ediblər. İlkin araşdırmalar nəticəsində məlum olub ki, 1988-ci il təvəllüdlü Nicat Nəbiyev "Mercedes" markalı avtomobil ilə idarəetməni itirərək yol kənarındakı ağaca çırpılıb. Nəticədə sürücü və sərnişin Elvin Quliyev ölüblər. Faktla bağlı araşdırmalar davam etdirilir. "Qafqazinfo"nun əldə etdiyi məlumata görə, qəzada ölənlərin hər ikisi hərbçidir. Belə ki, Nicat Nəbiyev N saylı hərbi hissədə müddətdən artıq qulluq edən əsgər, Elvin Quliyev isə gizir kimi xidmət aparırmış.

Binəqədi sakini Şamxal Rüstəmov ona aidiyyəti olmadığı halda Dövlət Yol Polisi tərəfindən 1400 manat məbləğində ümumilikdə 25 cərimə yazıldığını iddia edir. “Qafqazinfo”ya müraciət edən vətəndaş bildirib ki, ona aid olmayan və ümumiyyətlə, heç bir əlaqəsinin olmadığı “Çinar Trans” MMC-yə məxsus 99-JP-462 markalı nəqliyyat vasitəsinin inzibati cərimələri onun sürücülük vəsiqəsinə yazılır: “Məsələni ilk dəfə 2022-ci ilin noyabrında elektron hökumət portalındakı şəxsi kabinetimə daxil olarkən gördüm. Bu haqda DYP-yə məktubla müraciət etdim və mənə 12.01.2023 tarixində gələn cavabda “Çinar Trans” MMC tərəfindən 99-JP-462 qeydiyyat nömrəli nəqliyyat vasitəsinə yol vərəqəsi və ya etibarnamənin DYP-yə göndərilməsi səbəbindən cərimələrin mənə gəlməsi bildirildi. “Çinar Trans” MMC-nin əməkdaşı ilə telefonda danışığımız zamanı onlar tərəfindən DYP-yə mənimlə bağlı heç bir etibarnamə və ya yol vərəqəsinin verilmədiyini bildirdi. Üstəlik qeyd edim ki, mənim sürücülük vəsiqəm B kateqoriyadır, yəni yalnız minik avtomobillərini idarə etməyə imkan verir. Amma 99-JP-462 nömrəli nəqliyyat vasitəsi avtobusdur. Yəni mən istəsəm belə, avtobus idarə edə bilmərəm. Həyatım boyu avtobus sürməmişəm, amma hazırda adımda avtobusa görə yazılmış 1400 manatlıq 25 cərimə var”. Məsələ ilə bağlı Baş Dövlət Yol Polisi İdarəsinin İctimai Qurumlarla Əlaqə Şöbəsindən “Qafqazinfo”nun sorğusuna cavab olaraq bildirildi ki, 99-JP-462 dövlət qeydiyyat nişanlı nəqliyyat vasitəsi “Çinar-Trans” MMC-yə məxsus olduğundan avtomobili idarə edən sürücüyə aid məlumatlar, yəni yol vərəqəsi və ya etibarnamə Baş DYPİ-nin Mərkəzi İnformasiya Sistemində yerləşdirilməsi üçün müəssisə tərəfindən göndərilib: "Müəssisənin verdiyi məlumata əsasən qeyd edilmiş nəqliyyat vasitəsini idarəetmə hüququ 06.11.2022-ci il tarixdən 03.04.2023-cü il tarixədək müraciət edən şəxsin adına verilib. Bu səbəbdən də tərtib edilən elektron qərarlar vətəndaşın sürücülük vəsiqəsinə yönləndirilib. Cərimələrin digər şəxsə yönləndirilməsi üçün aidiyyəti üzrə “Çinar-Trans” MMC-yə müraciət etməyini tövsiyə edirik". Məsələ ilə bağlı “Çinar Trans” MMC ilə əlaqə saxladıq. Şirkətin direktoru “Qafqazinfo”ya bildirdi ki, məsələ texniki xəta səbəbindən baş verib və gün ərzində vətəndaşa yazılmış yanlış cərimələr ödəniləcək. Qeyd edək ki, “Çinar Trans” MMC Bakıda bir sıra marşrut xətləri üzrə fəaliyyət göstərən şirkətdir.

“Vaşinqton hesab edir ki, Azərbaycanla Ermənistan arasında uzunmüddətli sülh mümkündür”. “Qafqazinfo” “Sputnik Ermənistan”a istinadən xəbər verir ki, bu barədə ABŞ Dövlət Departamentinin mətbuat katibinin birinci müavini Vedant Patel bildirib. O, Azərbaycan və Ermənistan XİN başçılarının Vaşinqton danışıqlarını belə şərh edib: “ABŞ bu danışıqların tərəfi olmayıb. Amma Arlinqtonda apardığımız danışıqların davamı olaraq, bunların irəliləmək üçün vacib addımlar olduğuna inanırıq və əvvəki kimi hesab edirik ki, bu iki ölkə arasında davamlı sülh mümkündür”. Xatırladaq ki, Azərbaycan və Ermənistan XİN başçıları Ceyhun Bayramov və Ararat Mirzoyanın Vaşinqtondakı görüşü 4 gün (1-4 may) davam edib. Nazirlər iki dəfə ABŞ Dövlət katibi Entoni Blinkenlə görüşüb. Danışıqlardan sonra Blinken bəyan edib ki, Azərbaycan və Ermənistan sülh müqaviləsinin imzalanması yolunda əhəmiyyətli irəliləyiş əldə ediblər. Bundan sonra Azərbaycan Prezidenti İlham Əliyev və Ermənistan Baş naziri Nikol Paşinyanın Avropa Şurası Prezidenti Şarl Mişelin vasitəçiliyi ilə mayın 14-də Brüsseldə görüşü baş tutub.

“Artıq aylardır ki, bizə su 3-4 saat ərzində gəlir. Nə yemək bişirmək olur, nə də təmizlik etmək... Müraciətlərimizə də hər dəfə bir cavab verilir”.  Bu şikayətlə “Qafqazinfo”ya Saray qəsəbəsi, Rəhim Əzimov küçəsinin sakinləri müraciət edib. Vətəndaşların sözlərinə görə, əvvəlki qrafikə əsasən, su axşam saat 22:00-da kəsilib, səhər 06:00-da verilsə də, indi belə deyil: “Su yenə də axşam kəsilir və bir də saat 19:00-da gəlir. Sonra yenə axşam saat 22:00-da kəsilir. Bizə gün ərzində 3-4 saat su gəlir. 5-6 nəfərlik ailə 3-4 saat su ilə nə edə bilər? Uşaqlar məktəbə, biz də işə gecikirik. Evdə qocası var, xəstəsi var, körpəsi var. Eyni vaxtda da kəsilmir. Hər gün fərqli saatda biz bu problemlə üz-üzə qalırıq”. Sakinlər deyir ki, məsələ ilə bağlı dəfələrlə “Azərsu” ASC-yə müraciət ediblər: “Zəng edəndə də hərəsi bir söz deyir. Gah deyirlər elə şey ola bilməz, orada su fasiləsiz gəlməlidir, gah deyirlər rejim var: axşam 10-da kəsilir səhər 6-da gəlir. Hər dəfə ayrı rejim, ayrı söz deyirlər. Operatorlar imkan vermir, dərdimizi izah edək. Ancaq da bir söz əzbərliyiblər ki, bizlik deyil, tabeliyinizdə olan idarəni yığın. Verdikləri nömrəyə də zəng edirik, açmırlar. Məsələni üstlərindən atmaq istəyirlər. O gün də deyirlər ki, suyu açmalı olan adam işə gəlməyib. Gəlsin, sonra su açılacaq. Suyun nə vaxt gələcəyini soruşuruq, deyir saat deyə bilmərik, biz də bilmirik. Tanışlarımızdan digər küçələrdə qalanlar da var. Onlarda heç su kəsilmir. Əgər qənaətdirsə, normal qaydada hamıya olsun. Biz su üzü görmürük”.  Vətəndaşlar qeyd edirlər ki, problemə görə bəzi sakinlər çən də qoyublar. Amma çən qoydurmaq üçün hamının imkanı çatmır. Məsələ ilə bağlı “Azərsu” ASC-nin mətbuat xidməti ilə əlaqə saxladıq. Qurumun mətbuat katibi Anar Cəbrayıllı sorğumuza cavab olaraq bildirdi ki, sözügedən ərazidə suyun fasilələrlə verilməsi su ehtiyatının azalması ilə əlaqədardır: “Bununla bağlı fevral ayında məlumat vermişdik. Bildirmişdik ki, qrafikləri azaldırıq və qənaət rejiminə keçirik. Həmin tədbirlər çərçivəsində bu ərazilərdə də suyun verilişi müddəti azaldılıb. Qrafiklər hələlik bu rejimdə olacaq. Ehtiyat çənlərdən istifadə edə bilərlər. Bunu etsələr, 24 saat suları olar”.

Azərbaycandakı Türkiyə səfirliyi prezident seçkilərinin ikinci turu ilə bağlı vətəndaşlara müraciət edib. Sozcu.az xəbər verir ki, müraciət səfirliyin rəsmi tviter səhifəsində paylaşılıb. "İkinci tur üzrə səsvermə proseduru səfirliyimizdə 20, 21 və 22 may tarixlərində saat 08:00-22:00 arasında gerçəkləşdiriləcək. Bütün vətəndaşlarımıza sayğı ilə elan olunur", - deyə qeyd olunub. Xatırladaq ki, ilk tur prezident seçkiləri və parlament seçkiləri üçün Bakıdakı səvermə 5-7 may tarixlərində baş tutmuşdu.

Xızıda qardaşının arvadını boğub öldürməkdə təqsirləndirilən Taleh Qurbanov məhkəmə qarşısına çıxarılıb. Sozcu.az-ın xəbərinə görə, Xızı Rayon Məhkəməsinə göndərilən təqdimatda təqsirləndirilən şəxs barəsində həbs qətimkan tədbirinin seçilməsi istənilib. Məhkəmə istintaq orqanının təqdimatını təmin edib. Qərara əsasən, Taleh Qurbanov barəsində 4 aylıq həbs qətimkan tədbiri seçilib. Qeyd edək ki, öldürülən Ləman Qurbanova 2022-ci ilin sentyabr ayında Ermənistanın təxribatının qarşısını alarkən şəhid olmuş kapitan Saleh Qurbanovun həyat yoldaşıdır. Ləman Qurbanovanı öldürməkdə təqsirləndirilən Taleh Qurbanov şəhidin qardaşıdır. Hadisə mayın 13-ü saat 18 radələrində Xızı rayonu, Giləzi qəsəbəsində yerləşən fərdi yaşayış evlində qeydə alınıb. Həmin gün 1999-cu il təvəllüdlü Ləman Qurbanovanın ölməsinə dair rayon prokurorluğuna məlumat daxil olub. Aparılmış araşdırmalarla 1984-cü il təvəllüdlü Taleh Qurbanovun qohumu Ləman Qurbanovanı boğaraq qəsdən öldürməsinə əsaslı şübhələr müəyyən edilib. Faktla bağlı Xızı rayon prokurorluğunda Cinayət Məcəlləsinin 120.1-ci (qəsdən adam öldürmə) maddəsi ilə cinayət işi başlanıb. İş üzrə şübhəli şəxs qismində saxlanılan Taleh Qurbanov hadisədən sonra könüllü olaraq istintaqa təslim olub.//APA

Ağstafa rayonunun Poylu qəsəbəsində qohumlar arasında kütləvi dava-dalaş olub. Sozcu.az xəbər verir ki, dava zamanı 1971-ci il təvəllüdlü Elşən Bədirov qardaşı oğlu, 1990-cı il təvəllüdlü Camal Bədirovun baş nahiyəsinə kəsici-deşici alətlə xəsarətlər yetirib. Camalın qardaşı Məhəmməd isə Elşənin oğlu, 1998-ci il təvəllüdlü Elbrusa kəsici-deşici alətlə daxilə nüfuz edən xəsarətlər yetirib. Yaralılar xəstəxanaya yerləşdirilib. E.Bədirov və Məhəmməd Bədirov saxlanılıb. Faktla bağlı Ağstafa RPŞ-də araşdırma aparılır.//Qafqazinfo

Bakıda sürücü sükan arxasında ölüb. Sozcu.az xəbər verir ki, hadisə Ziya Bünyadov prospektində qeydə alınıb. Sürücü avtomobili idarə edərkən ölüb, bu zaman avtomobil səkiyə çırpılıb. Hazırda hüquq-mühafizə orqanları tərəfindən araşdırma aparılır. İlkin məlumata görə, sürücü ürək tutmasından ölüb.//APA

II Qarabağ müharibəsi şəhidi Xudayar Yusifzadənin ailəsinə ağır itki üz verib. Sozcu.az xəbər verir ki, Xudayarın babası Şimşad Şikar oğlu Məmmədov vəfat edib. Bu barədə aparıcı Hacı Nuran Hüseynov məlumat verib: “Xudayarı hər gün yuxuda görürəm”, deyirdi Şimşad baba… Onun yoxluğu ilə barışa bilmirdi. Deyirdi “Elə hey məni çağırır, baba, sənin üçün darıxıram, gəl gedək Şuşaya… Məni tək qoyma…” Bu dəqiqə Xudayar babasına qovuşdu. Nəvəsi üçün çox darıxan Şimşad baba nəvəsinə qovuşdu. İndi onların hər ikisinin ruhu birlikdə Vətən göylərindən boylanır. Yeri behişt olsun, Şimşad babanın”. Xatırladaq ki, Xudayar Yusifzadə Dövlət Sərhəd Xidmətinin Sərhəd Qoşunlarının kiçik giziri olub. O, 2020-ci il 27 sentyabarında Vətən müharibəsi zamanı əvvəl Füzulidə sərhəd məntəqəsində xidmət edib, daha sonra da Cəbrayılın və Zəngilanın azadlığı uğrunda gedən döyüşlərə qatılıb. Xudayar Yusifzadə oktyabrın 22-də Zəngilan döyüşləri zamanı Ağbənd istiqamətində şəhid olub.

Məlum olduğu kimi, mayın 13-də Bakı-Qazax magistralının Hacıqabul rayonunun Pirsaat kəndi ərazisindən keçən hissəsində baş verən yol qəzasında 2007-ci il təvəllüdlü Ayla Osman qızı Əliyeva həyatını itirib. Sozcu.az-ın “Qafqazinfo”ya istinadən məlumatına görə, Ayla Bakı şəhər 263 saylı orta məktəbin 10-cu sinif şagirdi imiş. Hadisə vaxtı Aylanın anası Vəfa Əliyeva sürdüyü “Hyundai Sonata” markalı avtomobilin idarəetməsini itirərək qarşıda gedən TIR-a çırpıb. Nəticədə 16 yaşlı Ayla hadisə yerində həyatını itirib. İlkin ehtimala görə, qəza V.Əliyevanın diqqətinin yayınması səbəbindən baş verib. Qəza anını və həyatını itirən Aylanın fotosunu təqdim edirik:

Qoç - aktiv və nikbin olun. Problemlər yaranarsa, onları dərhal çözməyə çalışın. Enerjiniz və səyləriniz, niyyət və məramınız nə qədər güclü olarsa, bir o qədər yaxşı nəticəyə nail ola bilərsiniz. Kollektitv tədbir, təqdimat, çıxış üçün yaxşı gündür. Fiziki işdə və aktiv çalışmaqda fayda var. Yaşam arealınızı qaydayas alın. Qısa müddətdə çox iş görməyə cəhd göstərin. İnşaat və dizayn sahələrində kreativ həllər tapmaq olar. Maliyyə və pulla bağlı məsələlərdə ehtiyatlı olun. Şəxsi münasibətlər müstəvisində təşəbbüskar olun. Sərt və aqressiv davranmayın. Buğa - məqsədə çatmağa az qalıb. Yeni planların reallaşdırılması üçün məkan hazırlamaq və ya ideyanı gerçəkləşdirmək üçün aktiv çalışın. Fəqət, həddən ziyadə səy göstərməyin. Əks təqdirdə irəliləyiş əvəzinə geriləməyə nail olaraq səhhətinizdə problemlərə rəvac verə bilərsiniz. Diqqətli olun, yaxın ətrafınızdakı insanların dəstəyini almağa çalışın. Sürətli nəticəyə hesablanmış yeni işə başlayın. Maraqlarınızdan birini gerçəkləşdirmək üçün gərəkli material ala bilərsiniz. Olayların məcrası ümumən pis deyil. Kiçik problemlərə fikir verməyin. Axşam saatlarında yetərincə istirahət edin. Əkizlər - çoxsaylı təmaslar, xəbərlər və danışıqlar günüdür. Sabahkı günə əminliyinizin asılı olduğu işləri təxirə salmayın. Diqqətli olun. Gərgin fon münaqişələr üçün əlverişli və münbit zəmin hazırlayır. Rəqiblər və bədxahlar aktivləşiblər. Dava üçün səbəb heç nədən yarana bilər. İnformasiya axınını genişləndirin. Danışmaq, görüşmək, zəng etmək və ya yazışmağın vacib olduğu insanı müəyyənləşdirin. Müzakirələr və ünsiyyət hətta sizin üçün gözlənilməz mövzunun başlanğıcı ola bilər. Xərçəng - şablon və klişelərdən imtina edin, yeni və orijinal variantlar seçin. Başqasının fikirlərindən əvvəlcədə xəbər tutmaq mümkün deyil, belə mənasız arzulardan əl çəkin. Təmkinli, fəndgir, hətta hiyləgər olun. Nə isə gərək olarsa, açıq danışın. Standart olmayan qərarlar qəfil uğur gətirə bilər. İşgüzar həyatda və şəxsi münasibətlərdə təşəbbüskar olun. Ən maraqlı hadisələr olayların ciddiləşdiyi müstəvidə baş verəcək. Dərhal döyüşə atılmayın. Təmkinli olun, marağı cəlb etməyə çalışın, nə istədiyiniz aydın deyil. Belə olarsa, məqsədə aparan yol xeyli qısalar. Şir - ciddi və böyük miqyaslı iş görmək istəyi yarana bilər. Kollektiv də buna sevinəcək, enerjinizi gərəkli məcraya yönəltməyə çalışacaqlar. Təhsil, təkamül, səfər və biliklərin əldə olunmasında xeyir var. Mürəkkəb məsələni həll edin, yük kimi asılmış problemi çözün. Avantüralarla fırıldaqlara uymayın. Güc və ideyalarınız çox olsa da, nəticədə nə əldə etmək istədiyiniz barədə düşünün. Tələsməyin, planları bir neçə günə bölün. Qız - cəsarətli, aktiv, əzmli olun. Situsiyanın təbii axarına düşəcəyi anı gözləməyin. Sizə lazım olan məsələlərə təkan verin, onları sürətləndirin. Danışıqlar, toplantılar, görüşlərə qatılın. Bilik və bacarığınızı nümayiş etdirin. Məşğul olduğunuz yeni iş barədə danışın. Faydalı tanışlıq olacaq. Lakin o, romantik yox, işgüzar ruhdadır. Bəzi mühüm işləri başa vurun ki, yeni layihə və maraqlar üçün məkan olsun. Fiziki işdə xeyir var. Evdə ciddi işlə məşğul olun. Tərəzi - alınan informasiya və bu məlumatlardan istifadənin intensivliyi ilə yanaşı, faydaları barədə düşünün. Əlaqələr, təmaslar və sərfəli tərəfdaşlıq günün aktual mövzularıdır. Yaxınlarınız və ya həmkarlarınızdan birinin həyatındakı olay sizi həyacanlandıra bilər. O adama yardım edin, dəstək verin. Hadisələrin qismən nəzarətiniz altında olduğunu hiss etsəniz, aktiv və təşəbbüskar olun. Tərəfdaşlarınızın davranışınıza olan reaksiyasına fikir verin. Valideynlərlə ünsiyyət üçün vaxt tapın. Əqrəb - maraqlar və qarşınızda duran məqsədlər bu, ya da digər halda tərəfdaşlıqla bağlıdır. Yaxın ətrafınızdakı insanlar sizi maraqlandıran məsələləri anlamağa çalışırlar. Hamı tələsir və insanları yalnız şəxsi məsələləri, problemləri maraqlandırır. Problemlərin həlli daha geniş miqyasda fayda verə bilər. Yeni perspektivlər yaranır. Fərqli situasiyalarda təmasların energetika səviyyəsi yüksəkdir. Səhər saatlarından etibarən aktiv olun. Məhsuldar, maraqlı gündür. Toplantılara qatılsanız, fəal mövqeyinizi nümayiş etdirin. Axşam saatlarında dostlarla görüş maraqlı ola bilər. Oxatan - xəbər və hadisələrin pressinqinə rəğmən, ruhdan düşməyin, bədbin olmayın. Məhsul yığmağın zamanıdır. Başladığınız işdən həzz almağa çalışın. Münasibətlər bərpa olunur, gələcək perspektivlərin formalaşması ilə bağlı müzakirələrdə ilkin razılaşma əldə olunur. Dostlar və iş yoldaşları yeni təəssüratların mənbəyi olacaqlar. Prioritetlərin dəyişməsi, məqsədlərin yenilənməsi istisna deyil. Yaşanacaq hadisələr bundan sonra uzun müddətdə işlərin gedişatı ilə şəxsi maraqları bəlirləyəcək. Yeni orientirlər seçin, anlaşma və müqavilələr imzalayın. Yaxın gələcəkdəki işlərlə bağlı əməkdaşlığa başlamaq olar. Oğlaq - narahat və gərgin gündür. Emosiyalar həddən ziyadədir. Yaxın ətrafınızdakı insanlar probelmlərin tez-tələsik həll yollarını arayırlar. Onlar maraqların toqquşduğu məqamlarda hövsələsiz və səbrsiz olacaqlar. Vaxtınızı və enerjinizi boş söhbətlər, müzakirələr, münasibətlərin aydınlaşdırılmasına sərf etməyin. Yaradıcı olun, problemlərin orijinal həll yollarını arayın. Günün ikinci yarısında perspektivləriniz üçün məhsuldar çalışın. Əldə etdiyiniz müvəffəqiyyəti gerçək uğura döndərin, detalları tələsmədən hazırlayaraq başa vurun. Axşam saatlarında evdə qayda yaradın. Yaxın ətrafınızdakı insanlara yardımlarınız xüsusilə effektiv ola bilər. Ailə üzvlərinizdən birinin qarşısında yeni perspektivlər yaranır. Dolça - uğur sizin tərəfinizdədir. Məqsəd və hədəflərinizi aydınlaşdırın, daha konkret edin. İşdə rəhbərliklə mübahisə etməyin. Belə mübahisənin ciddi fəsadları ola bilər. Valideynləriniz sizinlə daha çox maraqlanmağa başlasalar, diqqətli davranın. Günün ikinci yarısında aktiv, amma soyuqqanlı davranın. Qısa müddətə reallaşdıra biləcəyiniz məqsədləri müəyyənləşdirin. İşə elə indi başlayın və yaxın ətrafınızdakı insanlardan bəzilərini də yeni layihəyə cəlb edin. Amma onlara təzyiq etməyin. İfrat tələbkarlıq, eqoizm, öz fikrinizi ən doğru mövqe saymaq yanlış davranışdır. Fiziki işdə fayda var. Axşam saatlarında yetərincə istirahət edin. Balıqlar - diqqətinizi bütünlüklə işə yönəltsəniz, çox məhsuldar gün ola bilər. Təhsil, tədris və ya digər müstəqil fəaliyyətlə məşğul olun. Qaçaqaç, vurnuxma və intriqalardan kənar olun. Birgə işdə də yaxşı nəticələr əldə etmək olar. Uzun söhbətlərə baş qoşmayın,  bir işlə məşğul olun, bir məqsədə can atın. Axşam saatları səfər, görüş, müzakirələr, qonaq qəbulu üçün əlverişlidir. Son vaxtlar yarımçıq qalan işlərdən bəzilərini başa vurmaq olar. Maliyyə perspektivlərinizi yaxşılaşdırmaq üçün yaranan imkanlardan istifadə edin. Maraqlı ideyalar peyda olarsa, onlardan birini mütləq reallaşdırın. Hədiyyə, mükafat, uğurlu alış-veriş istisna deyil.

Türkiyədəki seçki prosesində maraqlı anlar yaşanıb. Sozcu.az "qafqazinfo"ya istinadən xəbər verir ki, məşhur müğənni İbrahim Tatlısəsin qızı Dilan Çıtak Tatlısəs gözlənilməz paylaşım edib. Belə ki, İ. Tatlısəs Rəcəb Tayyib Ərdoğana səs versə də, ifaçının qızı Kemal Kılıçdaroğluna səs verib.  Hətta Dilan son paylaşımında izləyicilərini Kılıçdaroğlunun əli ilə tutduğu ürək işarəsindən istifadə edərək ikinci turda səs verməyə çağırıb.  Qeyd edək ki, seçkilərin ikinci turu mayın 28-də keçiriləcək. Türkiyədə ikinci turda keçiriləcək prezident seçkiləri zamanı daha 50 min yeni seçici səsvermə hüququna malik olacaq.

"Arsenal" bu yay böyük transferlərə hazırlaşır.  Sozcu.az xəbər verir ki, bu barədə “The Times” məlumat yayıb. Bildirilib ki, London təmsilçisi heyəti gücləndirmək üçün 200 milyon avrodan çox pul ayırıb. "Arsenal"ın əsas hədəfləri Deklan Rays ("Vest Hem") və Moyzes Kaysedodur ("Brayton"). Qeyd edək ki, "Arsenal" İngiltərə Premyer Liqasında 81 xalla 2-ci pillədə qərarlaşıb.

Avrozonada və ABŞ-da iqtisadi göstəricilərin açıqlanması ərəfəsində dünya bazarında neftin qiyməti artıb. “Brent” markalı neftin iyul füçersləri 0,45 % bahalaşaraq 75,56 ABŞ dollarına satılıb. WTI neftinin iyun füçerslərinin qiyməti isə 0,44 % artaraq 1 bareli 71,42 ABŞ dolları təşkil edib. Neft bazarı qiymətlərə təsir edə biləcək bir sıra iqtisadi göstəricilərin açıqlanmasını gözləyir. Belə ki, bu gün “Eurostat” Avrozonada I rüb üzrə ÜDM-in həcmi ilə bağlı proqnozunu dərc edəcək. Bundan başqa, bu gün ABŞ-da aprel ayı üzrə sənaye istehsalı ilə bağlı məlumatlar açıqlanacaq. Analitiklər göstəricinin əvvəlki ayla müqayisədə dəyişməyəcəyini proqnozlaşdırırlar.