Aprelin 6-sı axşam saatlarından aprelin 7-si saat 04:30-dək Ermənistan silahlı qüvvələrinin bölmələri Gorus, Qarakilsə, Basarkeçər, Keşişkənd, Tovuzqala və Çəmbərək rayonları istiqamətlərində yerləşən mövqelərindən Azərbaycan Ordusunun mövqelərini atıcı silahlardan fasilələrlə intensiv atəşə tutub. Bu barədə Sozcu.az-a Müdafiə Nazirliyindən məlumat verilib. Bölmələrimiz tərəfindən qeyd olunan istiqamətlərdə adekvat cavab tədbirləri görülüb.

Dövlət Sərhəd Xidmətinin (DSX) hərbi qulluqçusu Əsgər Nicat oğlu Musazadə ilə Lənkəran rayonunun Göyşaban kəndində keçirilən vida mərasimi başa çatıb. Sozcu.az report-a istinadən xəbər verir ki, Ə.Musazadə Göyşaban kənd qəbiristanlığında dəfn olunub.

“Xarici İşlər Nazirliyinin son məlumatına görə, mina xəritələri ilə bağlı məlumatların cəmi 25 faizi həqiqəti əks etdirir. Yəni 75 faiz məlumat dəqiq və həqiqətə uyğun deyil. Bu o deməkdir ki, hələ uzun illər mina təhlükəsi ilə baş-başa qalacağıq”. Bu sözləri "Yeni Sabah"a ehtiyatda olan polkovnik Üzeyir Cəfərov bildirib. O qeyd edib ki, mina təhlükəsi uzun müddət davam edəcək: “Son günlər mina partlayışlarından faciələr baş verir. Mina bəlası hələ uzun illər davam edəcək. Nə qədər çalışsaq da, istər ANAMA, istərsə də güc strukturları təmsilçiləri bunun qarşısını tam almaqda acizdir. Çünki onlar elə basdırılıb ki, onların harada saxlanmasını hətta ermənilərin özləri də unudublar. Xarici İşlər Nazirliyinin son məlumatına görə, mina xəritələri ilə bağlı məlumatların cəmi 25 faizi həqiqəti əks etdirir. Yəni 75 faiz məlumat dəqiq və həqiqətə uyğun deyil. Bu o deməkdir ki, hələ uzun illər mina təhlükəsi ilə baş-başa qalacağıq.  İşğaldan azad edilmiş ərazilərə köçən insanlar son dərəcə diqqətli olmalıdır. 2023-cü ildəki antiterror əməliyyatından sonra 390 vətəndaşımız minaya düşüb. Onların arasında şəhid olan da var, ağır xəsarət alan da. Əksəriyyəti isə ömürlük şikəstdir. Bu statistika artacaq”.  Hərbi ekspert qeyd edib ki, mina təhlükəsi ilə bağlı mütəmadi məlumatlandırma aparılmalıdır: “Hətta əsrlər keçsə belə, hardasa undulub qalan mina müəyyən dövrdən sonra özünü büruzə verir. Uzun illər sovet dövründə Lənkəran ərazisində, Xəzər dənizi yaxınlığında poliqon olub. Həm Masallının Mahmudavar kəndində, həm də Lənkəran ərazisində təlimlər keçirilib. Həmin ərazilərdəki karoziyaya uğrasa da, hələ də təhlükəlidir. Zaman-zaman sözügedən ərazidə həmin minaların peydə olmasının şahidi oluruq. Azərbaycan teleməkanını bürüyən çal-çağır verilişlərin heç olmasa bu barədə reklamlar, xəbərdarlıqlar getməlidir. İşğaldan azad olunmuş ərazilərdə yaşayan vətəndaşlar üçün mina təhlükəsi ilə bağlı məlumat vərəqələri paylanmalıdır. Minanın aktual təhlükə olması insanların şüuraltına yeridilməlidir. Çox təəssüflər olsun ki, bu məsələyə biganə yanaşırıq”.  Xatırladaq ki, son 2 gündə Cəbralı və Ağdamda 3 mina partlayışı baş verib. Nəticədə, 1 hərbçi, 1 ANAMA əməkdaşı və 3 mülki şəxs xəsarət alıb və ya həlak olub. 

Vətən müharibəsi qazisi intihar edib. Sozcu.az -ın Oxu.Az-a istinadən əldə etdiyi məlumata görə, Füzuli rayonunun İkinci Mahmudlu kənd sakini, 1992-ci il təvəllüdlü Ayxan Hümbət oğlu Bayramov yaşadığı evin həyətində özünü asıb. Hadisə aprelin 6-sı günorta saatlarında baş verib. Baş vermiş hadisə ilə bağlı prokurorluqda araşdırma aparılır. A.Hümbətovun iki azyaşlı övladının olduğu bildirilir. *** 10:10 Füzuli rayonunda qazi vəfat edib. Sozcu.az xəbər verir ki, bu barədə onun yaxınları sosial şəbəkədə məlumat yayıblar. Belə ki, qazi Bayramov Ayxan Hümbət oğlu dünyasını dəyişib. Onun iki övladı var.

Bakıda intihara cəhd olub. Sozcu.az Lent.az-a istinadən xəbər verir ki, hadisə paytaxtın Nərimanov rayonu, H.Əliyev prospektində yerləşən körpüdə qeydə alınıb. Sabirabad rayon sakini, 19 yaşlı Sara Hasil qızı Adışlı intihar məqsədi ilə H.Əliyev prospektində yerləşən körpüyə çıxıb. Ərazidə xidmət aparan polis əməkdaşları intihara cəhdin qarşısını alıb. Araşdırma aparılır.

Dələduzlar orijinala oxşar dizaynla tələ saytları, kredit təşkilatlarının saxta saytlarını yaradırlar. Sozcu.az xəbər verir ki, bu barədə Daxili İşlər Nazirliyinin Mətbuat Xidmətinin rəisi polis polkovnik-leytenantı Elşad Hacıyev bildirib. “Fişinq saytlarını ilk baxışdan orijinaldan ayırmaq çətindir, lakin bu mümkündür. Ünvanın https ilə başladığına əmin olun, domen adında hərflərə və rəqəmlərə diqqət etməlisiniz. Həmin saytların tələb etdiyi qaydaları ilə məbləğindən asılı olmayaraq onlayn ödəniş etsəniz şəxsi məlumatlarınız oğurlanacaqdır. Məsələn, "I" yerinə "1" və ya "o" hərfi yerinə "0" kimi aldatmalarının olub-olmadığını yoxlayın”, - E.Hacıyev qeyd edib.

"Çevriliş təşkilatçıları Türkiyədə, təmasları isə ABŞ-dadır. Əkrəm İmamoğlunun həbsi üçün Trampdan razılıq alınıb".  Sozcu.az xəbər verir ki, bunu Özgür Özel tərəfdarlar qarşısında çıxışı zamanı deyib. "Ərdoğana müraciət edirəm: "Qarşıdan gələn ilk seçkilərdə nə Amerika, nə də Tramp sizi bizdən xilas etməyəcək!", - deyə müxlaif lider bildirib. Unikal)

Gəncədə ana və iki övladı qidadan zəhərlənib. Sozcu.az xəbər verir ki, şəhər sakinləri, 1981-ci il təvəllüdlü L.Nəcəfova və onun övladları, 2010-cu il təvəllüdlü K.Nəcəfov, 2005-ci il təvəllüdlü R.Nəcəfov zəhərlənmə diaqnozu ilə xəstəxanaya yerləşdirilib. Faktla bağlı araşdırma aparılır.

10:53 Azərbaycan Respublikasının Minatəmizləmə Agentliyi (ANAMA) əməkdaşı Cəbrayıl rayonunda minaya düşüb. Sozcu.az xəbər verir ki, bu barədə agentlik sosial şəbəkədə məlumat yayıb. Bildirilib ki, Cəbrayıl rayonunun Mehdili kəndi ərazisində mina hadisəsi baș verib. Agentliyin əməkdaşı 1991-ci il təvəllüdlü Xankişiyev Heydər Əli oğlu xidməti vəzifəsini yerinə yetirərkən piyada əleyhinə mina partlayışı olub. Onun sağ ayağın topuq nahiyyəsinin amputasiyası olunub. Xəsarət alan əməkdaş rayon xəstəxanasına təxliyə edilib. Vəziyyəti qənaətbəxşdir. *** Aprelin 6-da Ağdam rayonunun Qalayçılar kəndi ərazisində də mina hadisəsi baş verib. Azərbaycan Respublikası Daxili İşlər Nazirliyi, Baş Prokurorluğu və ANAMA Mətbuat Xidmətləri məlumat verir ki, işğaldan azad edilmiş Ağdam rayonunun Qalayçılar kəndi ərazisində 2025-ci il 6 aprel tarixində mina hadisəsi baş verib. Məlumata görə, 1983-cü il təvəllüdlü Qalayçılar kənd sakini Məmmədov Səbuhi Elman oğlu minalardan təmizlənməmiş əraziyə daxil olaraq piyada əleyhinə minanın partlayışı nəticəsində ayağından xəsarət alıb. Xəsarət alan şəxs xəstəxanaya təxliyə edilib. Faktla bağlı Ağdam rayon prokurorluğunda araşdırma aparılır. “ANAMA, AR DİN və Baş Prokurorluq bir daha vətəndaşları təhlükəsizlik qaydalarına riayət etməyə, mina təhlükəsi işarələrinin göstəricilərinə diqqətlə yanaşmağa və bələd olmadıqları ərazilərə daxil olmamağa çağırır!”, – məlumatda qeyd olunub.

Donetsk vilayətinin Toretsk şəhəri uğrunda gedən döyüşlərdə rusların itkiləri 15 mini ötüb. Sozcu.az xəbər verir ki, bunu Ukrayna Silahlı Qüvvələrinin 100-cü əlahiddə mexanikləşdirilmiş briqadasının kapitanı Sergey Xominski “Ukrayna radiosu”na açıqlamasında deyib. Onun sözlərinə görə, onun olduğu briqada 2024-cü ilin iyulundan Toretskdə döyüşür: “Şəhər uğrunda döyüş 9 aydır davam edir. Bu müddət ərzində düşmən heç bir mübaliğəsiz canlı qüvvə sarıdan fəlakətli itkilər verdi. Toretskdə düşmənin ölən hərbçilərinin sayı 15000-i keçib. Yaralılar da nəzərə alınmaqla ümumi itkilər 50 mindən çoxdur”.

Demokrat konqresmen El Qrin ABŞ Prezidenti Donald Trampın impiçmentini təklif etmək niyyətində olduğunu açıqlayıb. Sozcu.az xəbər verir ki, bu barədə “Hill” nəşri məlumat yayıb. “Bizə bu dəfə onu günahkar elan edəcək Senat lazımdır. O, Qoliafdır. Orduda generallara, Ədliyyə Nazirliyinə, Respublikaçılar Partiyasına nəzarət edir, amma dostlarım, hər Qoliafı bir Davudu var. Cənab Prezident, bilmənizi istəyirəm ki, Davud yaxın 30 gün ərzində sizə impiçment elan edəcək. Yaxın 30 gün ərzində impiçment tətbiq edəcəyəm”, - Qrin bildirib.

Gürcüstanda 3,6 maqnitudalı zəlzələ olub. Sozcu.az xəbər verir ki, bu barədə Gürcüstan Milli Seysmik Monitorinq Mərkəzi məlumat yayıb. “Saat 08:06-da Tiflisdən 4 km aralıda 3,6 bal gücündə zəlzələ qeydə alınıb. Zəlzələnin ocağı 24 km dərinlikdə yerləşib”, – məlumatda bildirilib. Dağıntı və tələfat barədə məlumat verilməyib.

Raket zərbələrindən müdafiəni təmin etmək üçün əlavə “Patriot” sistemlərinin tapılmasında ABŞ-ın köməyinə ümid edirəm. Sozcu.az xəbər verir ki, bunu Ukrayna Prezidenti Vladimir Zelenski Krivoy Roqa endirilən zərbəni şərh edərkən deyib. “Əlavə "Patriot"ların tapılmasında kömək vəd edən ABŞ prezidenti ilə razılaşmalarımıza ümid edirik", - Zelenski bildirib.

Son günlərdə keçirilən müəllimləri attestasiya imtahanlarının nəticələri ciddi müzakirə mövzusuna çevirilib. Yüzlərlə müəllim attestasiyadan kəsilib, onların əksəriyyəti kollec məzunudur. Bu imtahanlar göstərdi ki, xüsusilə kollecləri bitirib məktəbdə dərs deyən müəllimlərin bilik səviyyəsi ciddi şəkildə sual altındadır. Musiqi müəllimlərinin qiymətləndirilməsi ilə başlayan bu müzakirələr, əslində daha geniş bir problemin – orta ixtisas təhsil müəssisələrinin pedaqoji kadr hazırlığında keyfiyyət məsələsinin diqqət mərkəzinə gəlməsinə səbəb oldu. 2023 və 2024-cü illərdə keçirilən sertifikasiya imtahanlarında da orta ixtisas təhsilli müəllimlərin nəticələri ümumi göstəricilərdən aşağı olub. Məsələn, 2024-cü il nəticələrinə əsasən, universitet məzunlarının 72%-i minimum balı topladığı halda, kollec məzunlarında bu rəqəm cəmi 43% olub. Bu fərq sadəcə fərdi hazırlıqla deyil, sistematik struktur probleminin mövcudluğuyla bağlıdır. Mövzu ilə bağlı təhsil sahələri üzrə eksper Kamran Əsədov Modern.az-a bildirib ki, Azərbaycan Respublikasının “Təhsil haqqında” Qanununun 14.1-ci maddəsində qeyd olunur ki, müəllim hazırlığı ali təhsilin bakalavriat səviyyəsində həyata keçirilir. Bu o deməkdir ki, pedaqoji fəaliyyətin hüquqi bazası ali təhsillə bağlıdır. Kolleclər isə bu tələbi qismən yerinə yetirir və pedaqoji sahəyə hazırlıqda tam hüquqi baza yaratmır.  “Eyni zamanda, “Məktəbəqədər və ümumi təhsil müəssisələrində çalışan müəllimlərin sertifikatlaşdırılması Qaydaları”na görə, müəllimlər yalnız bilik deyil, metodoloji hazırlıq baxımından da qiymətləndirilir. Lakin kolleclərdə metodoloji baza və praktik pedaqoji hazırlıq zəif olduğundan, məzunlar bu mərhələdə ciddi çətinlik yaşayırlar”. K. Əsədov vurğulayıb ki, kolleclərdə müəllimlik ixtisası üzrə təhsil alan tələbələrin bir çoxu qəbul imtahanlarında minimal bal toplayanlardır. Bu da onu göstərir ki, təhsil prosesinə daxil olanların ilkin akademik hazırlıq səviyyəsi aşağıdır. “Universitetlərlə müqayisədə kolleclərin təhsil müddəti daha qısadır (2-3 il), bu müddət ərzində həm fənn biliklərinin, həm də pedaqoji bacarıqların verilməsi mümkün deyil. Digər tərəfdən, kolleclərdə müəllim heyətinin elmi dərəcəsi olanların faizi də çox aşağıdır. Bu, həm dərslərin keyfiyyətinə, həm də tələbələrin formalaşmasına mənfi təsir edir. Problemin daha dərin səbəblərindən biri də praktika mexanizmlərinin zəifliyidir. Universitetlərdə tədris təcrübəsi geniş şəkildə tətbiq olunur, tələbələr məktəblərlə əməkdaşlıq çərçivəsində sinifdə dərs demə bacarığı əldə edir. Kolleclərdə isə bu proses daha formal xarakter daşıyır. Təcrübə müddəti ya çox qısa olur, ya da real məktəb mühiti ilə əlaqəsi zəif qurulur. Nəticədə kolleci bitirən gənc müəllim məktəbə real hazırlıq olmadan daxil olur”. Dünya təcrübəsi haqda da danışan ekspert bildirib ki, inkişaf etmiş ölkələrdə - Finlandiya, Estoniya, hətta Türkiyədə  müəllim hazırlığı yalnız universitetlərdə həyata keçirilir və müəllimlər üçün davamlı təlimlər məcburidir.  “Azərbaycanın bu sahədə öz xüsusiyyətləri olsa da, təcrübə onu göstərir ki, pedaqoji kadr hazırlığında kolleclərin rolu tədricən azaldılmalı və bu funksiyalar tam olaraq universitetlərə yönəldilməlidir. Bununla belə, kolleclər tamamilə müəllim hazırlığından uzaqlaşdırılmamalıdır. Musiqi, təsviri incəsənət, fiziki tərbiyə və texnologiya kimi fənlər üzrə müəllim hazırlığı bu müəssisələrdə davam etdirilə bilər. Çünki bu istiqamətlərdə praktik bacarıqlar ön plandadır və akademik dərinlikdən çox, tətbiqi biliklər tələb olunur”- deyə Kamran Əsədov bildirib.  Onun sözlərinə görə əgər bu istiqamətdə dəyişikliklər edilməzsə, bir neçə ciddi problem davam edəcək. Birincisi, təhsil keyfiyyəti bərabərsizliyi artacaq – rayon məktəblərində çalışan müəllimlərin əksəriyyəti kollec məzunu olduğu üçün bu bölgələrdə təhsil keyfiyyəti daha da zəifləyəcək. İkincisi, müəllim peşəsinin nüfuzu aşağı düşəcək. Cəmiyyət universitet məzunları ilə kollec məzunları arasındakı fərqi açıq şəkildə hiss etdikcə, bu peşəyə ümumi etibar azalacaq. Üçüncüsü isə təhsil sistemində qeyri-peşəkar yanaşmalar artacaq – bu isə ümumilikdə Azərbaycanın insan kapitalı üçün riskdir: “Bununla yanaşı, kolleclərin tamamilə sıradan çıxarılması da doğru olmaz. Onların texniki və peşə hazırlığı üzrə ixtisaslaşması, əmək bazarının tələblərinə uyğun olaraq yenidən formalaşdırılması vacibdir. Əgər müəllim hazırlığı kolleclərdən alınarsa, həmin məzunlara alternativ karyera imkanları yaradılmalıdır. Bu isə planlı şəkildə həyata keçirilməli, illər üzrə keçid dövrü nəzərə alınaraq reallaşdırılmalıdır. Nəticə olaraq, hazırkı vəziyyət onu göstərir ki, kollec məzunu müəllimlərin zəif nəticələri təsadüfi deyil, sistematik və köklü səbəblərə dayanır. Bu problemin aradan qaldırılması üçün pedaqoji kadr hazırlığı sahəsində radikal islahatlara ehtiyac var – hüquqi çərçivənin yenilənməsi, kolleclərin rolu və funksiyasının aydınlaşdırılması, universitet əsaslı modelə keçid və uzunmüddətli insan kapitalı strategiyası formalaşdırılmalıdır. Əks halda, bu gün imtahanda zəif nəticə göstərən müəllim sabah şagirdin gələcəyini zəif formalaşdıracaq”.

Salyanda fəhlə iş zamanı ağır xəsarət alıb. Sozcu.az Lent.az-a istinadən xəbər verir ki, hadisə “Salyan OİL LTD” şirkətində baş verib. Burada fəhlə işləyən Kolanı kənd sakini 31 yaşlı B.Babayevin sağ əli dəmir boru bağlayan aparatın arasında qalıb. Zərərçəkən xəstəxanaya yerləşdirilib və onun 2 barmağı amputasiya edilib. Araşdırma aparılır.

Somali ordusu ölkənin cənub-şərqində həyata keçirilən hərbi əməliyyat zamanı terrorçu "Əş-Şəbab" hərəkatının 20-dən çox üzvünü məhv edib. Sozcu.az xəbər verir ki, bu barədə Somali Ordu Komandanlığının məlumatında bildirilib. Qeyd olunub ki, əl-Kövsər rayonunun ərazisində aparılan əməliyyat zamanı "Əş-Şəbab" qruplaşmasına məxsus xeyli sayda silah və sursat ələ keçirilib.

Rusiya ABŞ-ın yeni rüsumlarından tamamilə yayınan azsaylı ölkələrdən biri oldu. Lakin hətta dolayı təsir belə Rusiya iqtisadiyyatı üçün hiss olunandır. Sozcu.az xəbər verir ki, bunu “Nyusvik” yazıb. Qeyd olunub ki, Tramp dünyaya tarif müharibəsi başladıqdan sonra Rusiya fond birjalarında çökmə baş verib. Belə ki, Moskva Birjası (MOEX) şirkətlərinin kapitallaşması 23,7 milyard dollar azalıb. Rusiya üzrə MOEX indeksi, ölkənin 43 ən iri ictimai şirkətini izləyən göstərici bir həftə ərzində 8% dəyər itirdi. Bu isə 2022-ci ilin sentyabrından bəri – Putinin kütləvi səfərbərlik elan etdiyi dövrdən bu yana ən böyük geriləmədir. “Xüsusilə “Sberbank” (5,2%), “Qazprom” (4,9%), metallurgiya və kömür nəhəngi “Meçel” (7%) və qaz şirkəti “Novatek”in (5,4%) səhmləri ucuzlaşdı. Analitiklərin fikrincə, Trampın tətbiq etdiyi tariflər dünya iqtisadiyyatının soyumasına və neftə tələbatın azalmasına gətirib çıxaracaq. Bu isə neftin qiymətinin aşağı düşməsi deməkdir. Nəticədə bu vəziyyət Rusiyaya mənfi təsir göstərəcək.Trampın qlobal tariflərinin dolayı təsirindən əlavə, Rusiya birjasına OPEK-in may ayında neft hasilatını üç dəfədən çox artırmaq planları da təsir göstərib. OPEK ABŞ-ın tariflərinin mənfi təsirini kompensasiya etmək üçün daha çox neft sataraq eyni gəliri əldə etməyə çalışır. Bu isə neftin qiymətinin daha da aşağı düşməsinə səbəb olacaq”, - deyə nəşrin məqaləsində qeyd olunub.axar)

Aprelin 5-i saat 10:00-a olan məlumata əsasən, ölkə ərazisində hava şəraiti əsasən yağmursuz keçib. Bu barədə Sozcu.az-a Milli Hidrometeorologiya Xidmətindən məlumat verilib. Bildirilib ki, bəzi rayonlarda qərb küləyi əsib, küləyin sürəti arabir Gəncədə 18 m/s, Sabirabadda 16 m/s, Şəki və Zaqatalada 15 m/s, Mingəçevirdə 14 m/s-yə çatıb. Abşeron yarımadasının bəzi yerlərində eyni zamanda, Naftalan, Şamaxı, Sabirabad, Kürdəmir, Cəfərxan, Yevlax, Neftçala, Biləsuvar, Altıağac, Qrız və Lerikdə duman müşahidə olunur, görünüş məsafəsi 500 metrədək məhdudlaşır. Havanın maksimal temperaturu Bakıda və Abşeron yarımadasında 19, Aran rayonlarında o cümlədən, Naxçıvan MR-da 25, dağlıq rayonlarda isə 15 dərəcəyədək isti qeydə alınıb.

Ukrayna müharibənin 1137-ci günü üçün Rusiya ordusunun itkiləri haqda məlumatı yeniləyib. Sozcu.az xəbər verir ki, bu barədə Ukrayna Baş Qərargahı məlumat yayıb. Məlumata əsasən, Rusiya indiyə qədər 922 340 hərbçi, 10 541 ədəd tank, 21 952 ədəd zirehli döyüş maşını, 25 730 ədəd artilleriya sistemi, 1 350 ədəd RYAS (reaktiv yaylım atəş sistemi), 1 124 hava hücumundan müdafiə sistemi, 370 ədəd hərbi təyyarə, 335 ədəd helikopter, 42 954 ədəd avtomobil texnikası, 31 778 ədəd PUA, 3 123 qanadlı raket, 28 gəmi/kater, 1 sualtı qayıq, 3 788 xüsusi avadanlıq itirib.

Sumqayıtda 57 yaşlı kişinin meyiti aşkarlanıb. Sozcu.az xəbər verir ki, hadisə şəhərin 17-ci mikrorayonunda qeydə alınıb. 1968-ci il təvəllüdlü Zahid Rüstəmovun meyiti yaşadığı evdə aşkarlanıb. Faktla bağlı Sumqayıt şəhər Prokurorluğunda araşdırma aparılır.

Rusiya 1 ildə NATO-dan 4 dəfə çox sursat istehsal edir. Sozcu.az xəbər verir ki, bunu NATO-nun baş katibi Mark Rutte "CBS" telekanalına müsahibəsində deyib. “Rusiya NATO-nun ümumi iqtisadiyyatının cəmi 5 faizini təşkil etsə də, sursat istehsalında üstünlük əldə edib. NATO-nun ümumi iqtisadi gücü Rusiyadan 20 dəfə böyükdür, lakin Rusiya bir ildə NATO-dan dörd dəfə çox sursat istehsal edir. Bu, tamamilə ağlasığmaz bir vəziyyətdir”, – Rutte bildirib.

Müdafiə Nazirliyindəki 143 milyon manatlıq mənimsəmə faktı ilə bağlı daha bir təqsirləndirilən “N” saylı hərbi hissənin maliyyə-xidmət rəisi işləmiş kapitan Vahid Novruzlunun məhkəməsi keçirilib. Sozcu.az Teleqraf-a istinadla xəbər verir ki, Bakı Hərbi Məhkəməsində hakim Fikrət Əliyevin sədrliyi ilə keçirilən prosesdə şahid qismində Soltan Soltanlı ifadə verib. O bildirib ki, təqsirləndirilən şəxs onun bacanağıdır: "Mənə dedi ki, qardaşım Almaniyadan pul göndərməlidir. Mən də hərbi qulluqçuyam. istəmirəm ki, kartıma pul gəlsin. Buna görə də mən də bank rekzivitlərimi ona göndərdim. Pulu nağdlaşdırdım və Beyləqana gələndə ona verdim. Həmin məbləğdən mənə pul çatmayıb”. Dövlət ittihamçısının suallarını cavablandıran şahid bildirib ki, onun kartına Vahid Novruzlu üçün pul göndərilib: "Mən də həmin pulu çıxararaq Vahidə vermişəm. Pulun miqdarı təxminən 2-3 min manat arası olardı". Daha sonra şahidin ibtidai istintaq zamanı verdiyi ifadəsi elan olunub. Həmin ifadədən məlum olur ki, kartına göndərilən pul 3 min 155 manat olub. O, ibtidai istintaq zamanı verdiyi ifadəsini təsdiqləyib. Daha sonra ifadə verən şahid Nicat Vəlizadə bildirib ki, Vahid Novruzlu bacısının həyat yoldaşıdır: "Mənim kartına 3 min 917 manat pul gəlib. Mən də həmin pulu çıxararaq Vahidə vermişəm. Pulu kimin göndərdiyini əvvəlcədən bilməmişəm. Dedi ki, kartına pul gələcək, çıxarıb mənə verərsən. Mən pulu verəndə soruşdum ki, bu nə puldur. Dedi ki, qardaşım xaricdən göndərib". Nicat Vəlizadə bildirib ki, Vahid Novruzlu onu hərbi hissədə qazanxanada işə düzəldib. Onun sözlərinə görə, əməkhaqqı müqaviləsi ilə işləyib, 400 manata yaxın əməkhaqqı alıb. Sualları cavablandıran şahid deyib ki, onun Vahid Novruzlunun 340 min manat mənimsəmə işindən xəbəri olmayıb, bu barədə istintaqa çağırılan zaman xəbər tutub. Daha sonra ifadə verən Eşqin Həsənov bildirib ki, hazırda hərbi hissələrdən birində maliyyə xidmət rəisinin köməkçisi işləyir. 2018-ci ildən xidmətə başladığını deyən şahid qeyd edib ki, əvvəl Vahid Novruzlu ilə birgə xidmət edib. Eşqin Həsənov bildirib ki, Vahid Novruzlu ilə ortaq tanışları olan Şaiq Bayramovun bank kartının rekvizitləri onlarda olub: "Həmin karta köçürülən pulu Şaiqdən Beyləqanda görüşən zaman aldım və işə gələndə Vahid Novruzluya verdim. Ondan bu pulun nə pul olduğunu soruşdum. Dedi ki, qardaşım Almaniyadan göndərib. Həmin vaxt pulu saysam da, hazırda məbləği xatırlamıram". Bu səbəbdən Eşqin Həsənovun ibtidai istintaq zamanı verdiyi ifadəsi elan olunub. Həmin ifadədən məlum olub ki, 2633 manat olub. Şahid həmin ifadəsini təsdiqləyib. Digər şahid Füzuli Ələkbərov bildirib ki, Müdafiə Nazirliyinin Mənzil İstismar İdarəsinin mühasibi işləyib: "Vahid Novruzlunu tanışım Elşən Salamovun vasitəsilə tanımışam. Mənim kartına 3 min manat pul gəldi. Mən də həmin pulu çıxararaq Elşənə vermişəm. Münasibətimiz yarandığı üçün mənim kartına dəfələrlə pul gəlib, mən də həmin pulu çıxararaq Elşənin kartına atmışam. Elşəndən həmin pulun nə pul olduğunu soruşmamışam. Vahid Novruzlu ilə tanışlığım əvvəllər olmayıb. Onu Elşən vasitəsilə tanımışam. İki dəfə oturub çay içmişdik". Daha sonra hakim bir neçə şahidin adını çəkib və onların məhkəməyə gəlmək istəmədiklərini deyiblər. Hakim tərəflərdən həmin şahidlərin barəsində hansı tədbirin görülməsini soruşub. Təqsirləndirilən şəxsin vəkili onların gəlməsini istəməyib. Təqsirləndirilən şəxsin özü də vəkili ilə razı olub. Bildirib ki, həmin şahidlərin istintaq verdikləri ifadələrin oxuyub, onların dedikləri ilə razılaşıb. Yerində müşavirə keçirən hakimlər həmin şahidlərin məhkəməyə məcburi qaydada gətirilməsi barədə qərar qəbul ediblər. Hakim Fikrət Əliyev bildirib ki, qərar icra olunması üçün şahidlərin yaşayış yeri üzrə Ağcabədi Rayon Polis Şöbəsinə göndəriləcək. Növbəti proses aprelin 11-də davam edəcək. İttihama görə, təqsirləndirilən şəxs xidməti dövrü ərzində müxtəlif hərbi hissələrdə maliyyə idarəsində baş mühasib vəzifəsində xidmət edib. Əsgərlərin, zabitlərin, fəhlələrin əməkhaqqını ödəmək, vergilərin verilməsi, hesabatların aparılması, görülən işlərin hərbi hissə komandirinə məruzə edilməsi onun vəzifəsi olub. Lakin təqsirləndirilən şəxs tamah məqsədilə Müdafiə Nazirliyinin Maliyyə və Büdcə İdarəsinin vəzifəli şəxsləri ilə əlaqəyə girib, yalan məlumatlar daxil etməklə 848.338 manatı müxtəlif plastik kart hesablarına köçürməklə talayıb. Bununla yanaşı, o, daha sonra 381.755 manatı özü də daxil olmaqla müxtəlif şəxslərin 15 plastik kart hesabına köçürərək, mənimsəyib. Vahid Novruzluya qarşı irəli sürülən digər ittiham isə xidmət etdiyi hərbi hissəni özbaşına tərk etməsi ilə bağlıdır. İttihama görə, o, 2024-cü ildə üzrlü səbəb olmadan xidmət etdiyi hərbi hissəyə qayıtmayıb. Qeyd edək ki, “N” saylı hərbi hissənin maliyyə-xidmət rəisi işləmiş kapitan Vahid Novruzlu Dövlət Təhlükəsizliyi Xidmətinin (DTX) apardığı istintaq çərçivəsində cinayət məsuliyyətinə cəlb olunub. İlkin mərhələdə istintaq orqanı kapitana dövlətə vurulan ziyanı ödəmək şərti ilə azadlıqda qalmaq imkanı versə də, ziyan ödənilmədiyi üçün sonradan barəsində həbs qətimkan tədbiri seçilib. Müdafiə Nazirliyindəki 143 milyon manatlıq mənimsəmə faktı üzrə bir neçə icraatda cinayət işlərinə Bakı Hərbi Məhkəməsində baxılıb. 2022-ci ilin əvvəlində Müdafiə Nazirliyinin 4 zabiti - Maliyyə-Büdcə İdarəsinin sabiq rəisi general-mayor Nizami Məmmədov, Hərbi Hava Qüvvələrinin (HHQ) Maliyyə Xidmətinin sabiq rəisi Cəlal Kazımov, Quru Qoşunların Maliyyə İdarəsinin rəisi Bayram Bayramov və Hərbi Dəniz Qüvvələrinin Maliyyə İdarəsinin keçmiş rəisi Vüsal Əlizadə saxlanılıblar. Bakı Hərbi Məhkəmənin hökmü ilə Nizami Məmmədov və Bayram Bayramovun hər biri 11 il 6 ay, Cəlal Kazımov 11 il, Vüsal Əlizadə 10 il 6 ay müddətinə azadlıqdan mərhum ediliblər. Eyni zamanda təqsirləndirilən şəxslərin üzərinə həbs qoyulmuş əmlaklarının müsadirə edilməsi barədə qərar qəbul olunub. Bundan başqa, Müdafiə Nazirliyinin Satınalmalar və Təchizat İdarəsinin sabiq rəisi polkovnik Mahir Şirvanov, həmçinin nazirliyin Satınalmalar və Təchizat İdarəsinin sabiq rəisi Məlikməmməd Qurbanov, nazirliyin mənzil istismar idarəsinin sabiq rəisi polkovnik Fikrət Mirzəyev və digər şəxslər də DTX-nin vəsatəti əsasında həbs ediliblər. Onların hər biri də Bakı Hərbi Məhkəməsinin hökmü ilə məhkum olunublar.

Rusiya Ukraynanın dinc əhalisinə qarşı qəsdən terror edir. Krivoy Roqda insanların öldürülməsi Vladimir Putinin rejiminin nümayişkaranə terror hərəkətidir. Sozcu.az xəbər verir ki, bunu Ukrayna Prezident Ofisinin rəhbəri Andrey Yermak Teleqram kanalında yazıb. O vurğulayıb ki, Rusiya ballistik raketlə yaşayış məhəlləsinin mərkəzinə zərbə endirib: "Rusiya bunu bilərəkdən edir. Onlar nə ABŞ-ı, nə də dünyada kimisə sayırlar. Onlar ukraynalıları öldürmək, Ukraynanı məhv etmək istəyirlər və sülh istəmirlər. Putin rejimi və bütövlükdə Rusiya nümayişkaranə şəkildə insanları qətlə yetirdi”. Qeyd edək ki, Rusiya bu gün də Krivoy Roqa zərbə endirib.

“Ölkədə müasir suvarma sistemi çox da geniş yayılmayıb. Hazırda suvarılan 400 000 hektar torpağın 10 faizə yaxını müasir sistemlərlə suvarılır. Cəmi 38 000 hektar ərazidə müasir sistem quraşdırılıb. Qalan ərazilərdə isə selləmə-sulama üsulu ilə suvarma aparılır. Nəticədə bu torpaqlar şoranlaşaraq dövriyyədən çıxır. Bunun qarşısını almaq üçün müasir suvarma sistemlərinin geniş yayılmasına çalışımaq lazımdır”. Bunu Bakupost.az -a iqtisadçı ekspert Akif Nəsirli deyib. O bildirib ki, bu gün fermerlərin ən əsas əmək predmeti torpaq və su resurslarıdır. Azərbaycanda su axarlarına yaxın olan bir çox fermerlər bitkinin vetegasiya dövründə onu normadan çox və selləmə metodu ilə suvarır. Tez-tez suvarılan torpaq isə şoranlaşır. Bir tərəfdən torpaq şoranlaşır, digər tərəfdən suyun aşağı axarında fermerlər su qıtlığı yaşayır. O torpaqlar susuzluqdan deqradasiyaya uğrayır, yuxarıdakı torpaqlar isə tez-tez suvarıldığına görə şoranlaşaraq deqradasiyaya uğrayır: “Hökumət aqrotexniki qaydalarla bağlı maarifləndirmə işləri aparmalıdır. Fermerlərə izah olunmalıdır ki, əllərindəki resurslardan aqrotexniki qaydalara uyğun istifadə eləsinlər”.