Azərbaycan ərazisində müvəqqəti yerləşdirilmiş Rusiya sülhməramlıları daha iki daimi müşahidə məntəqəsini bağlayıb. Sozcu.az xəbər verir ki, bu barədə Rusiyanın Müdafiə Nazirliyi məlumat yayıb. Qeyd edilir ki, gün ərzində iki müşahidə məntəqəsi bağlanıb. Xatırladaq ki, Rusiya sülhməramlıları oktyabrın 6-da 3, 7-də daha bir müşahidə məntəqəsini bağlayıblar. 2020-ci il noyabrın 10-da Qarabağda hərbi əməliyyatların bitməsi və atəşkəs barədə Azərbaycan, Ermənistan və Rusiya liderlərinin birgə bəyanatına əsasən, Rusiya Federasiyasının sülhməramlı kontingenti erməni silahlı qüvvələrinin çıxarılması ilə paralel şəkildə yerləşdirilməli idi. Rusiya Federasiyasının sülhməramlı kontingentinin qalma müddəti 5 ildir və müddətin bitməsinə 6 ay qalmış hazırkı müddəanın tətbiqinə xitam verilməsi niyyəti ilə bağlı tərəflərdən hər hansı biri çıxış etməsə, müddət avtomatik olaraq növbəti 5 ilə uzadılır.

Bu gün Misli Premyer Liqasında 9-cu tura və birinci dövrəyə yekun vurulur. Sozcu.az xəbər verir ki, turun son və mərkəzi qarşılaşmasında "Neftçi" son çempion "Qarabağ"ı qəbul edir. Qeyd edək ki, turun digər matçları 6 və 7 oktyabr tarixlərində keçirilib. *** Juninyo qarşılaşmanın 46-cı dəqiqəsində "Qarabağ"ı hesabda önə çıxarıb: 0-1. *** Cica matçın 88-ci dəqiqəsində "Qarabağ"ın ikinci qoluna imza atdı. Matç 2-0 hesabı ilə də qonaq komandanın xeyrinə başa çatdı.

Fələstinin HƏMAS (Hərəkət əl-Müqavəmə əl-İslamiyyə) yaraqlılarının hücumu nəticəsində İsraildə ölənlərin sayı artıq 700 nəfəri ötüb. Sozcu.az xəbər verir ki, bu barədə “Kan” dövlət teleradio şirkəti məlumat yayıb. Qeyd edək ki, bundan əvvəl HƏMAS-ın hücumundan sonra İsraildə 600-ə yaxın ölü, 2 048 yaralı olduğu bildirilirdi. Xatırladaq ki, oktyabrın 7-də səhər Qəzza zolağından İsrailə raket hücumları başlayıb və yaraqlı qruplar ölkə ərazisinə daxil olub. İsrail cavab olaraq “Dəmir Qılınclar” əməliyyatına başladığını açıqlayıb.

İsrailin müdafiə naziri Yoav Qallant Livanla sərhəddə əhalinin məskunlaşdığı ərazilərin boşaldılması barədə əmr verib. Sozcu.az xəbər verir ki, bu barədə İsrailin “Haaretz” nəşri məlumat yayıb. Livanla sərhəddə yaşayan sakinlərin əksəriyyəti təhlükəsizlik tövsiyələrinə fəal reaksiya verib və könüllü olaraq cənub bölgələrinə təxliyə edilib. Məlumata görə, ərazidə tank və digər zirehli texnikaların sayı artıb.

“Ermənilər əllərinin Qarabağdan tamamilə üzüldüyünü dərk etdiklərindən indi də “8 anklav kənd uğrunda” öz aləmlərində mübarizəyə başlayıblar...” Yaxın Şərqdəki hadisələr, daha doğrusu, Baş nazir Netanyahunun vurğuladığı kimi, İsrail-“HAMAS” savaşı bütün dünyanın diqqət mərkəzindədir, hətta erməni mediası da Qarabağdan çox, bu savaş barədə informasiyalar yayır. Amma fürsət tapan kimi yenə düşmən mövqelərindən əl çəkmir, bizi beynəlxalq ictimaiyyətin qınaq hədəfinə çevirməyə cəhdlər edirlər. Əllərinin Qarabağdan tamamilə üzüldüyünü dərk etdiklərindən indi də “8 anklav kənd uğrunda” öz aləmlərində mübarizəyə başlayıblar. Azərbaycan Prezidenti İlham Əliyevin Şarl Mişellə son telefon danışığında işğalda qalan səkkiz kəndin azad edilməsini  Avropa İttifaqının rəsmisinə xatırlatmasını sanki yenilik kimi qəbul edib təəccüblərini ifadə edirlər.  O dərəcədə ki, Azərbaycan dövlət başçısının Gürcüstan səfəri haqqında informasiya yayan erməni mediası, son cümlədə oxuculara səkkiz kəndin azad edilməsi barədə Şarl Mişelə deyilənləri xatırlatmağı unutmur. Bir-birilə əlaqəsi olmayan xəbərlərdəki xatırlatma sübut edir ki, ermənilər indi də 123, 9 kv.km ərazisi olan bu kəndlər uğrunda siyasət aparmağa, daha doğrusu, hay-küy salmağa başlayıblar...  Rusiya “sülhməramlı” qüvvələri müşahidə məntəqələrini sürətlə ləğv edir və hiss olunur ki, tezliklə gəldikləri məkana- Ermənistana dönəcəklər. RF müdafiə nazirliyinin nümayəndələri iki gün əvvəl İrəvana gəlib və erməni internet kanallarının verdiyi məlumata görə, geri dönmə prosesi Ermənistan hakimiyyəti ilə müzakirə edilir. Hadisələrin sürətli inkişafı nəticəsində yaranmış vəziyyət Rusiya hərbi kontingentinin Azərbaycandan getməsini sürətləndirir. Paşinyan hakimiyyətinin devrilməsi üçün Qarabağdan köç edənlərin İrəvanda qarışıqlıq yaradıb, iğtişaş törədəciyinə son ümid kimi baxan Kreml, hesablamalarında yanıldığını dəqiqləşdirəndən sonra “sülhməramlı”ların bölgəni tərk etməsinin zəruri həddə çatdığını qəbul edib. Bu həm də o deməkdir ki, 2020-ci ilin dekabrında olduğu kimi, Ermənistana qaçanların kütləvi şəkildə geri qayıtması real deyil. Ümumiyyətlə, üç günə köç edən Qarabağ erməniləri geri qayıtmağa cəhd edəcəklərmi? Azərbaycan dövlətinin Qarabağın erməni əhalisinə verdiyi təhlükəsizlik və hüquq təminatı buna imkan versə də, hesab edirəm ki, azsaylı bir hissənin geri dönməsini proqnozlaşdırmaq olar. Geri dönən ermənilərin az bir hissəsi əmlakları üzərində qərar vermək məqsədilə bir müddət yaşamağı, bir hissəsi də satıb ölkəni tərk etməyi seçəcəklər...  Növbəti mərhələ Ermənistan Respublikası ilə sülh müqaviləsinin imzalanması istiqamətində aparılan danışıqlar prosesi olacaq. Oktyabrın sonuna gözlənilən Brüssel görüşündən əvvəl Bişkekdə oktyabrın 13-də MDB toplantısına Paşinyanın video - konfrans şəklində qatılacağı barədə yayılan xəbərlər onu göstərir ki, Paşinyan müqavilənin Qərbin vasitəçiliyi ilə baş tutmasına çalışır və bununla da, Rusiyanın perspektivdə Ermənistanı tərk etməsinin təməlini qoymuş olduğunu bildirmək niyyətindədir. Bu gündən baxanda gələcək Rusiya -Ermənistan münasibətlərinin gərginliklə davam edəcəyi çox ehtimal olunur və təbii ki, Qərbin burada aparıcı rol oynayacağı şübhəsizdir...  İki ölkə arasında sülh müqaviləsinin imzalanmasından öncə sərhəddə delimitasiya və demarkasiya işlərinin başlanmasına start veriləcək, yoxsa bu işlər müqavilədən sonrakı mərhələyə keçəcək? Nəzərə alsaq ki, səkkiz kəndin azad edilməsi də delimitasiya işlərinin tərkib hissəsidir, o zaman Paşinyan hakimiyyətinin ölkə daxilində baş verən siyasi prosesləri nəzərə alıb qərar verəcəyi ehtimal olunur...  Zəngəzur dəhliz-yolun açılması isə hiss olunur ki, ən son verilən qərarlardan olacaq. İran ərazisindən keçməklə Naxçıvanla magistral və dəmir yolu vasitəsilə əlaqənin yaradılması barədə Azərbaycanla İran arasında bu günlərdə imzalanan niyyət protokolu da göstərir ki, Zəngəzur məsələsi tezliklə gündəmə gəlməyə bilər. Amma, nəzərə alsaq ki, Rusiya üçün bu yol həm hərəkət, həm də yola nəzarətlə bölgədə təsirini saxlamaq baxımından əhəmiyyətlidir.., proseslərin necə inkişaf edəcəyini proqnozlaşdırmaq çətindir...  Əsas odur ki, Rusiya “sülhməramlı”ları, deyilən kimi, noyabrın 1-dək Qarabağı tamamilə tərk etdiyi halda Azərbaycan tarixinə qızıl hərflərlə yazılacaq bir günün, Xankəndində Azərbaycan bayrağının qaldırılmasının, Azərbaycanın Böyük Qələbə günü kimi təntənəli şəkildə qeyd edilməsinin şahidi olacağıq... moderator) İlham İsmayıl

“Bölgəmizdəki problemlərin kökündə Fələstin məsələsi dayanır. Bu məsələ ədalətli həll edilmədikcə, bölgəmiz sülhə can atmağa davam edəcək. Paytaxtı Qüds olan Fələstin dövləti indi mütləqdir”. Sozcu.az xəbər verir ki, bunu Türkiyə Prezidenti Rəcəb Tayyib Ərdoğan Mor Efrem Süryani Qədim Ortodoks Kilsəsinin Açılış Mərasimində deyib. Onun sözlərinə görə, Balkanlarda qardaşlarımıza qarşı ayrı-seçkilik davam edir. Prezident qeyd edib ki, bu günə qədər 113-ü Asur icmasına aid olmaqla cəmi 1084 mülk icma fondları adına rəsmiləşdirilib. Biz müxtəlif inanc qruplarına qarşı ayrıseçkiliyə yol vermirik. “Bölgəmizdəki problemlərin kökündə Fələstin məsələsi dayanır. Bu məsələ ədalətli həll olunmasa, bölgəmiz sülhə can atacaq. Yaxın Şərqə davamlı sülh ancaq Fələstin-İsrail probleminin yekun həlli ilə gələ bilər. Paytaxtı Qüds olan Fələstin dövlətinin mövcudluğu indi mütləqdir. Yanğına benzin tökmək heç kimə xeyir gətirmir” -deyə Ərdoğan bildirib.

Oktyabrın 7-də HƏMAS-ın hücumundan sonra həlak olan israillilərin sayı 600-ü keçib. Sozcu.az xəbər verir ki, bu barədə “Kan” radiosu məlumat yayıb. Bildirilib ki, hücum nəticəsində 2000-dən çox yaralı var. “İsrail rəsmiləri bu rəqəmlərin son olmadığını və ölən və yaralananların sayının artmağa davam edəcəyini vurğulayırlar”, - məlumatda qeyd olunub. Qeyd edək ki, İsrail ordusu hərbi əməliyyatlar başlayandan bəri Müdafiə Qüvvələrinin 26 hərbçisinin həlak olduğunu açıqlamışdı.

HƏMAS-ın hücumunda məqsəd İsraillə Səudiyyə Ərəbistanı arasında münasibətlərin normallaşmasını pozmaqdır. Sozcu.az xəbər verir ki, bunu ABŞ Dövlət katibi Entoni Blinken deyib. Blinken vurğulayıb ki, HƏMAS, Hizbullah və İran Səudiyyə Ərəbistanı ilə İsrail arasında münasibətlərin normallaşmasına qarşıdır. Xatırladaq ki, HƏMAS “İslami-Cihad”la birgə ötən gün səhər saatlarından İsrailin cənub zonasına hücum edərək xeyli dinc sakini qətlə yetirib və girov götürüb. İsrailə 5 min, o cümlədən paytaxt Təl-Əvivə 150 raket atılıb.

Prezident İlham Əliyev Avropa İttifaqı Şurasının prezidenti Şarl Mişellə telefon danışığında bildirdi ki, “Fransanın Ermənistana silah verməsi sülhə deyil, yeni qarşıdurmaya xidmət edən yanaşmadır və əgər regionda hər hansı yeni qarşıdurma baş verərsə, bunun səbəbkarı məhz Fransa olacaq”. Bununla Azərbaycan lideri Aİ rəhbərliyinə Fransanın Cənubi Qafqazda nəyə xidmət etdiyini çatdırdı və bu, həm də bölgədəki hadisələrin sabitliyin pozulması istiqamətində inkişaf edəcəyi təqdirdə əsas səbəbkarın da Fransa olduğu haqda öncədən xəbərdarlığın edilməsidir. Fransanın Ermənistanın maraqlarını açıq şəkildə müdafiə etdiyi sirr deyil. Bu, Azərbaycan torpaqları işğalda olduğu müddətdə də belə idi, 44 günlük müharibədə də, ondan sonra da. Vətən müharibəsində Makronun özünü “Baqramyan 33”-ün mətbuat xidmətinin rəhbəri kimi aparmasını təkcə biz yox, bütün dünya gördü. Müharibədən sonra aparılan sülh danışıqlarında Fransa prezidenti nəinki ermənipərəst kimi çıxış edir, hətta bir çox hallarda Paşinyanın demədiklərini də səsləndirir, onun etmədiklərini edirdi. Qarabağda artıq məhv edilmiş erməni separatizminin əsas dəstəkçilərindən biri də məhz Fransa idi. Bunun nəticəsi olaraq, Azərbaycan Fransanın vasitəçiliyindən imtina etdi. Lakin Qarabağda istədiyinə nail ola bilməyən Makron Cənubi Qafqazı eskalasiya ocağına çevirməkdə israrlı görünür. Və hələ ötən ilin sentyabrından başlayaraq, hərbi müstəvidə Ermənistanla əməkdaşlığın genişləndirilməsinin yekun hədəfi də məlumdur: - Ermənistan-Azərbaycan sülh müqaviləsinin imzalanmasının qarşısını almaq; - Ermənistan üzərindən bölgədə yeni hərbi toqquşmalar yaratmaq; Bu hədəfə çatmaq üçün bütün imkanlarından istifadə edən Fransanın birdən çox siyasi məqsədi var. Birincisi, Ermənistanı Rusiyanın orbitindən uzaqlaşdırmaq; İkincisi, Rusiyanın Ermənistanın təhlükəsizliyində boşalan yerini tutmaq; Üçüncüsü, Avrasiyanın nəqliyyat şəbəkələrində əsas hablardan birinə çevrilən Cənubi Qafqazı hərbi eskalasiyaya sürükləməklə bu layihələri pozmaq; Fransa Ermənistanı bölgədə özünün plasdarmı kimi görür. Burada Fransadakı erməni diasporunun qisasçılıq siyasəti də təsirsiz deyil və aydındır ki, terrorizmi dəstəkləyən Papazyan kimi daşnaklara hesabat verəcək qədər zəif olan Makronun ermənilər qarşısında öhdəlikləri də var. Bunu onun özü də gizlətmir. Digər tərəfdən, Ermənistan Fransaya Afrikadakı məğlubiyyətin kompensiyası üçün lazımdır. Makron hakimiyyəti fransızlara ölkənin təsir imkanlarını uzaq coğrafiyalara qədər yaydığını isbatlmaq istəyir. Və “paket” olaraq əldə etmək istədiyi bu məqsədlər üçün Afrikadakı zəngin təcrübəsindən istifadə edərək, Cənubi Qafqazı “qan çanağına” çevirməyə hazırlaşır. Ermənistana səfər edən Fransanın xarici işlər naziri Katrin Kolonna bunu açıq şəkildə bəyan etdi. O bildirib ki, “Fransa Ermənistanın özünü müdafiə edə bilməsi üçün hərbi texnikanın tədarükü ilə bağlı müqavilələr imzalayacaq”. Sual yaranır, kimə qarşı? Azərbaycana, Türkiyəyə, yoxsa Rusiyaya qarşı? Torpaqlarını erməni işğalından azad edən Azərbaycan Ermənistan ərazisinə iddiasının olmadığını ən yüksək səviyyədə bəyan edib və bundan sonra əsas prioriteti bölgədə sülhə nail olmaqdır. Bu məqsədlə Ermənistanla sülh müqaviləsini imzalamaq niyyətindədir. Lakin rəsmi İrəvan müxtəlif iddialar və bəhanələrlə sülh sazişindən yayınır və aydındır ki, onu buna sövq edən əsas qüvvə məhz Fransadır. Cənubi Qafqazda Ermənistan üzərindən “yuva qurmaq” istəyən Makron hakimiyyətinin tətbiq edəcəyi ssenari də aydın görünür: - Ermənistan sərhəddə Azərbaycana hücum edəcək və yeni eskalasiya yaranacaq; - Beynəlxalq müstəvidə “Azərbaycan Ermənistana hücum edir” kampaniyası başlanacaq və rəsmi Bakıya təzyiq cəhdləri ediləcək; - İrəvan KTMT-nin “Azərbaycana qarşı çıxmadığını” əsas gətirərək, təşkilatdan ayrılmağı gündəmə gətirəcək; - Rusiyanın erməniləri müdafiə etmədiyini əsas götürərək, Ermənistanın təhlükəsizliyini Fransaya həvalə edəcək, hətta Gümrüdəki 102-ci bazanın ölkədən çıxarılması tələbini irəli sürəcəkləri də gözləniləndir; - Türkiyəyə qarşı ərazi iddialarının yenidən aktuallaşması da istisna deyil: Fransa xarici işlər nazirinin Ermənistana səfəri zamanı Ağrı dağının fotosunu “biz qayıtdıq” qeydi ilə paylaşması da bu kontekstdə təsadüfi deyil; Fransanın “müdafiə olunmaq” adı altında Ermənistanı silahlandırması, İrəvana hərbi attaşşe təyin etmək və Zəngzurda, məhz Azərbaycanla sərhəddə konsulluq açmaq istəyi də tətbiq ediləcəyi gözlənilən bu ssenarinin tərkib hissəsidir. Fransa artıq Ermənistanda hərbi missiya açıb. Bu ölkənin müdafiə naziri Sebastyan Lekornyu bildirib ki, “missiya bizə gündəlik olaraq Ermənistan ordusu və hakimiyyəti ilə əlaqədə olmaq, onarın müdafiə sahəsində tələbatlarını öyrənməyə imkan verəcək”. Eyni zamanda, o bəyan edib ki, “Fransa Ermənistanın müdafiə sahəsində tələbatlarını araşdırır. Prezidert (Makron – red) şəxsən prosesləri izləyir, çünki bu məsələ Fransa üçün çox vacibdir. O, (Makron – red) bildirib ki, bizim üçün əsas məqsəd Ermənistanın ərazi bütövlüyü, suverenliyi və ölkə əhalisinin müdafiəsidir”. Göründüyü kimi, Fransa Ermənistanı “müdafiə olunmaq” məqsədilə silahlandırır və Azərbaycana qarşı hücuma hazırlaşdırır. Bunun nəticəsi Ermənistan üçün ağır olacaq, çünki Azərbaycan istənilən təxribata “dəmir yumruq”la cavab verəcək. 44 günlük müharibə və ondan sonra baş verənlər Ermənistanın Azərbaycanla bacarmasının mümkünsüz olduğunu təsdiq edir. Bunu Parisdə də anlayırlar, lakin Makronun məqsədi Ermənistanı qorumaq, yaxud gücləndirməkdən daha çox, ondan Cənubi Qafqazı qan çanağına çevirmək üçün istifadə etməkdir. Afrikada da maraqlarını təmin etmək üçün məhz bu ssenridən - bir ölkəni digər ölkəyə qarşı hücuma təhrik etmək - yararlanıb. İndi Cənubi Qafqazda Afrika ssenarisini tətbiq etməyə hazırlaşır. (Publika.az)

“Fələstinin silahlı HƏMAS qruplaşmasının onlarla israillinin ölümü, yüzlərlə yaralı və ya əsir götürülməsi ilə nəticələnən misli görünməmiş hərbi hücumu İsrail ordusu və kəşfiyyat xidmətlərindəki “qarışıqlıq” səbəbindən baş verib”. Sozcu.az xarici agentliklərə istinadən xəbər verir ki, bu fikrin müəllifi İsrailin keçmiş milli təhlükəsizlik müşaviri Çak Freylixdir. “Qəzzaya cavabdeh olan bölmənin qərargahı işğal olunub, orada xaos hökm sürür və buna görə də bütün cavab tədbirləri təxirə salınıb”, - deyə ekspert qeyd edib. 2000-ci illərin əvvəllərində milli təhlükəsizlik müşaviri vəzifəsində çalışan və hazırda Təl-Əviv Universitetinin Milli Təhlükəsizlik Araşdırmaları İnstitutunun professoru olan Freylix HƏMAS-ın ələ keçirdiyi kəndlərin hamısının geri qaytarılacağına inandığını ifadə edib. “Bunun ardınca HƏMAS-a qarşı çox genişmiqyaslı hücumlar olacaq. Lakin əsas məqsədin Qəzzanın tamamilə tutulması, HƏMAS-ın devrilməsi, yoxsa onlara çox sərt zərbələr endirilməsi olacağını zaman göstərəcək”, - deyə Çak Freylix bildirib. Təhlükəsizlik analitiki və “Le Beck International” adlı risklərin idarə edilməsi firmasının kəşfiyyat rəhbəri Maykl Horovitzin sözlərinə görə, çoxlu girov götürmə insidentləri hələ də davam edir və bir sıra ərazilər HƏMAS-ın nəzarəti altındadır. “Bu o deməkdir ki, biz hələ hücumun miqyasını, ölənlərin və girovların sayını bilmirik”, - deyə Horovitz vurğulayıb.musavat)

Fələstinin HƏMAS (Hərəkət əl-Müqavəmə əl-İslamiyyə) yaraqlılarının hücumu nəticəsində yaralanan israillilərin sayı 2156 nəfərə çatıb. Sozcu.az xarici KİV-ə istinadən xəbər verir ki, bu barədə ölkənin Səhiyyə Nazirliyi məlumat yayıb. Qeyd olunub ki, 338 nəfər ağır, daha 421 nəfər isə orta dərəcəli xəsarət alıb.

Sutka ərzində Tavriya istiqamətində 240-dan çox rus hərbçisi məhv edilib. Sozcu.az xəbər verir ki, bu barədə “Tavriya” qoşun qruplaşmasının komandanı, briqada generalı Aleksandr Tarnavski məlumat verib. Onun sözlərinə görə, hazırda Ukrayna müdafiə qüvvələri Melitopol istiqamətində hücum əməliyyatını davam etdirir: “Nəticədə 241 rus hərbçisi məhv edilib, daha 2 nəfər təslim olub. Bundan əlavə, Ukrayna Silahlı Qüvvələri düşmənin 21 hərbi texnikasını məhv edib. O cümlədən, 2 tank, 8 zirehli döyüş maşını, 3 artilleriya sistemi, 4 PUA, 4 avtomobil texnikası sıradan çıxarılıb”.

Azərbaycan Respublikasının Prezidenti İlham Əliyev Gürcüstanın Baş naziri İrakli Qaribaşvilinin dəvəti ilə oktyabrın 8-də Gürcüstana işgüzar səfərə gedib. Sozcu.az xəbər verir ki, Azərbaycanın və Gürcüstanın Dövlət bayraqlarının dalğalandığı Tiflis şəhərinin Şota Rustaveli Beynəlxalq Hava Limanında Prezident İlham Əliyevin şərəfinə fəxri qarovul dəstəsi düzülüb. Azərbaycan Prezidentini Gürcüstanın baş nazirinin müavini, iqtisadiyyat və davamlı inkişaf naziri Levan Davitaşvili və digər rəsmi şəxslər qarşılayıblar.

HƏMAS-ı hücuma aparan əl Moskvadadır. Sozcu.az xəbər verir ki, bunu Britaniya ordusunun ehtiyatda olan polkovniki Riçard Kemp deyib. “İsraildəki müharibə təkcə Qəzzadan olan terrorçuların amansız hücumu deyil. NATO-nu birbaşa qarılaşmaq istəməyən Putin əvəzində Azərbaycanla Ermənistan, Serbiya və Kosovo arasında, Qərbi Afrika və indi də İsraildə münaqişəni qızışdırır”, - Kemp bildirib.

“Dəmir Qılınclar” əməliyyatının birinci mərhələsi başa çatıb. Sozcu.az xəbər verir ki, bu barədə məlumatı İsrailin Baş naziri Benyamin Netanyahu açıqlayıb. O bildirib ki, Qəzza zolağından hücuma cavab olaraq həyata keçirilən əməliyyat nəticəsində terrorçuların əksəriyyəti məhv edilib. Netanyahu bəyan edib ki, qarşıya qoyulan məqsədlərə çatana qədər hücumlar davam edəcək.

İsrail ordusu Livan ərazisini atəşə tutub. Sozcu.az xəbər verir ki, bu barədə İsrail Silahlı Qüvvələrinin X səhifəsində məlumat yayılıb. “Artilleriya hazırda Livandan İsrail ərazisinə atəş açılan mövqelərə zərbələr endirir”, - məlumatda qeyd olunub.

Ukrayna müharibənin 592-ci günü üçün Rusiya ordusunun itkiləri haqda məlumatı yeniləyib. Sozcu.az xəbər verir ki, bu barədə Ukrayna Baş Qərargahı məlumat yayıb. Məlumata əsasən, Rusiya indiyə qədər 282 280 hərbçi, 4821 ədəd tank, 9123 ədəd zirehli döyüş maşını, 6705 ədəd artilleriya sistemi, 808 ədəd RYAS (reaktiv yaylım atəş sistemi), 542 hava hücumundan müdafiə sistemi, 316 ədəd hərbi təyyarə, 316 ədəd helikopter, 9111 ədəd avtomobil texnikası, 5190 ədəd PUA, 1530 qanadlı raket, 20 gəmi/kater, 1 sualtı qayıq, 959 xüsusi avadanlıq itirib.

Həmas terrorçularının İsrailə gözlənilməz hücumu 1973-cü il müharibəsindən sonra İsrailin kəşfiyyatının ən böyük uğursuzluqlarından biri ola bilər. Sozcu.az xəbər verir ki, bu barədə “Blumberq” yazıb. “Hücuma quruda və dənizdə onlarla əməliyyat, eləcə də raket hücumları daxildir. Buna görə də, bu hücumun hazırlığı özündə dərin planlaşdırma və koordinasiyanı ehtiva edir ki, bu da İsrailin kəşfiyyat xidmətləri tərəfindən nəzərdən qaçırıla bilməzdi”, - nəşr bildirib. Karneqi Fondunun baş elmi əməkdaşı Aaron Devid Miller isə deyib ki, israillilər HƏMAS-ın belə hücum edəcəyinə inanmırdılar: “Heç kim onların sərhədi keçməyə risk edəcəyinə inanmırdı. Bu regionlarda kifayət qədər İsrail qüvvələrinin olmaması ciddi səhv idi”.

İsrail aviasiyası Qəzza zolağında HƏMAS-ın kəşfiyyat bölməsinin rəhbərinə məxsus binalar kompleksinə zərbələr endirib. Sozcu.az xəbər verir ki, bu barədə İsrail Ordusundan məlumat verilib. “İsrail Müdafiə Qüvvələri hazırda Qəzza zolağında terrorçuların hədəflərinə zərbələr endirməkdə davam edir”, - məlumatda qeyd olunub.

"Terror hər zaman təkcə bir ölkəyə qarşı deyil, insanlığa və bütün dünyamıza qarşı cinayətdir..." Ukrayna prezidenti Vladimir Zelenski HƏMAS-ın yəhudi dövlətinə hücumuna münasibət bildirib. Sozcu.az xəbər verir ki, bu barədə "pravda.com.ua" nəşri məlumat yayıb. "İsraildən dəhşətli xəbərlər gəlməkdədir. Terror hücumu nəticəsində doğmaları və yaxınları həlak olan hər kəsə başsağlığı verirəm. İnanırıq ki, qayda-qanun bərpa ediləcək və terrorçular məhv ediləcək", - Ukrayna lideri bəyan edib. O, vurğulayıb ki, dünyanın heç bir yerində terrora şans vermək olmaz, "çünki terror hər zaman təkcə bir ölkəyə qarşı deyil, insanlığa və bütün dünyamıza qarşı cinayətdir". "Terrordan kimin istifadə etməsindən asılı olmayaraq, bu, dünyaya qarşı terrordur. Terrora kimin sponsorluq etməsindən asılı olmayaraq, bu, dünyaya qarşı terrordur. İsrailin müdafiə hüququ şübhə altına alına bilməz", - Zelenski qeyd edib və dünya ictimaiyyətini həmrəyliyə çağırıb. "Terrorun heç vaxt və heç bir yerdə özünə tabe etdirməməsi və ya insan  həyatına son qoymaması üçün dünya birləşməli və həmrəylik nümayiş etdirməlidir", - o, deyib. "Bu terror aktının bütün təfərrüatları aydınlaşdırılmalıdır ki, dünya hücuma sövq edən və onun təşkilinə kömək edən hər kəsi tanısın və məsuliyyətə cəlb etsin", - Ukrayna prezidenti bəyan edib. Bundan öncə Ukrayna Xarici İşlər Nazirliyi yəhudi dövlətinə terror aktlarını pisləyib və İsrailə dəstəyini ifadə edib.

İsrailin 22 məntəqəsində döyüşlər davam edir. Sozcu.az xəbər verir ki, bu barədə İsrail ordusunun (ÇAXAL) məlumatında deyilir. Əlavə məlumat verilmir. Qeyd edək ki, HƏMAS “İslami-Cihad”la birgə İsrailin cənub zonasına hücum edərək xeyli dinc sakini qətlə yetirib və girov götürüb. İsrail ordusu cavab tədbirləri görür.

İsraili tam dəstəkləyirik, nöqtə! Sozcu.az xəbər verir ki, bu sözləri ABŞ Prezidenti Co Bayden mediaya açıqlamasında deyib. “Heç kim xəta etməsin! ABŞ əsla İsraili tərk etməyəcək. Bu ölkə insanlarının özlərin qoruması üçün hər şeyi edəcəyik!” - deyə Ağ Ev rəhbəri bildirib. Qeyd edək ki, bundan öncə Ağ Ev rəhbəri İsrail Baş naziri Benyamin Netanyahu ilə telefon danışığı aparmışdı. Xatırladaq ki, HƏMAS “İslami-Cihad”la birgə İsrailin cənub zonasına hücum edərək xeyli dinc sakini qətlə yetirib və girov götürüb. İsrail ordusu cavab tədbirləri görür.

Terrorçu və qanunsuz rejimin rəhbərlərindən biri olmuş Vitali Balasanyanın Ermənistan ərazisində olması ilə bağlı erməni mənbələrinin yaydıqları xəbər doğrudur. Sozcu.az musavat.com-a istinadən xəbər verir ki, Balasanyan naməlum şəraitdə və bilinməyən bir zamanda Qarabağ ərazisini tərk edərək Ermənistana keçə bilib. Məlumatı Musavat.com-a verən mötəbər mənbənin rəyinə görə, Qarabağda hərbi cinayətlər törətmiş və əli dinc azərbaycanlıların qanına batmış rejim mənsubu harada olmasından asılı olmayaraq, Azərbaycan dövləti tərəfindən tapılacaq və öz cəzasına çatdırılacaq. Bu baxımdan Vitali Balasanyanın hazırda gizləndiyi Ermənistan o qədər də etibarlı bir yer sayılmır.

Türkiyə ordusu Suriyanın şimalında keçirdiyi əməliyyat zamanı zərərsizləşdirilən PKK terrorçularının sayı 58-ə çatıb. Bu barədə Türkiyə Milli Müdafiə Nazirliyinin “X” sosial şəbəkəsində yaydığı məlumatda deyilir. Nazirlik “Fərat Qalxanı”, “Zeytun budağı” və “Sülh çeşməsi” əməliyyatları bölgələrində PKK-nın daha 14 terrorçusunun məhv edildiyini bildirib. (Report)