İdman

Bu gün Azərbaycanın iki taekvondoçusu Bakıda keçirilən dünya çempionatında mübarizəyə başlayıb. Sozcu.az xəbər verir ki, 54 kq çəki dərəcəsində çıxış edən Səyyad Dadaşov 1/16 finalda Omonjon Otajonova uduzub. Qadınların yarışında 46 kq-dakı Minayə Əkbərova 1/16 finalda Ruka Okamotoya (Yaponiya) məğlub olub. Qeyd edək ki, dünya çempionatı iyunun 4-də başa çatacaq. Daha əvvəl Azərbaycanın 7 taekvondoçusu medal qazana bilməyib.

“Burada olduğumuz üçün şadam. Bu mövsüm keçirdiyimiz çətin dövrdən sonra qalib gəldiyimiz üçün şadam. Biz yaxşı iş görmüşük. Bu, kluba müsbət təsir göstərə bilər. Qol buraxanda düşünürdüm ki, onlara cavab qolunu vurmaq asan olmayacaq. Ancaq fasilədən sonra hesabı tez bərabərləşdirdik və bu, mübarizəni davam etdirməyə kömək etdi". Sozcu.az xəbər verir ki, bu sözləri "Sevilya"nın baş məşqçisi Xose Luis Mendilibar Avropa Liqasının finalında "Roma"ya qalib gəldikləri oyundan   (1:1, penaltilər seriyası - 4:1)  sonra deyib. "Məşqdəki penaltilərlə və 60 min azarkeş qarşısında penaltilər eyni  deyil. Əvvəlki turlarda 11 metrlik cərimə zərbələrində məşq etmirdik. Penaltini yerinə yetirəcək futbolçulara güvənirdik. Montiel beşinci zərbəni vurmalı idi, lakin sonra bu dəyişdirildi. Sıra oyunçular tərəfindən müəyyən edilir. Oyuna pis başladıq, rəqib də rahat idi. İkinci hissədə isə vəziyyəti dəyişdik və bu, asan olmadı. Əlavə vaxtda heç nə dəyişmədi, amma penaltilər seriyasında uğur qazandıq".

“Qarabağ” UEFA Çempionlar Liqasının (ÇL) pley-off mərhələsində səpələnmişlərdə yer ala bilər. Bunun üçün Ağdam klubu ilk növbədə özü həmin raunda qədər irəliləməli və daha yüksək reytinqə malik 2 komandanın büdrəməsinə ümid etməlidir. Turnirə I təsnifat mərhələsindən başlayacaq Azərbaycan çempionu mübarizəni davam etdirəcəyi təqdirdə, ilk üç raundda səpələnmişlərdə qərarlaşacaq. Əgər favoritlərin hamısı sona qədər irəliləsə, o zaman Qurban Qurbanovun kollektivi pley-offun püşkatmasında səpələnməmişlərdə yer alacaq. Belədə Azərbaycan komandasının potensial rəqibləri “Dinamo” (Zaqreb, Xorvatiya), “Kopenhagen” (Danimarka), “Yanq Boyz” (İsveçrə) və “Qalatasaray” (Türkiyə) olacaq. Bu klublardan yalnız “Yanq Boyz” ÇL-ə məhz pley-offdan başlayacaq. “Dinamo”, “Kopenhagen”, “Qalatasaray”, həmçinin, “Qarabağ”dan daha çox reytinq xalına malik olan Macarıstan təmsilçisi “Ferentsvaroş”un uğurlu çıxışı Azərbaycan klubunun işinə yaramayacaq. Adıçəkilən klublardan ikisinin əvvəlki mərhələlərdə büdrəməsi “Qarabağ”ın qrup öncəsi son raundda səpələnmişlərə düşməsi üçün yetərli olacaq. Bu komandalardan “Ferentsvaroş” I, digərləri isə II təsnifat mərhələsindən mübarizəyə qoşulacaqlar. Qeyd edək ki, Çempionlar Liqasında pley-offun püşkatması avqustun 7-də olacaq. Bu mərhələnin oyunları isə avqustun 22-23-də və 29-30-da keçiriləcək.

"Qarabağ" Azərbaycan Premyer Liqasında 2022/2023 mövsümünün qalibi olub. Bu, "köhlən atlar"ın tarixində 10-cu çempionluğudur. Ağdam təmsilçisinin futbolçusu Bəhlul Mustafazadə mükafatlandırma mərasimindən sonra fikirlərini bölüşüb. 26 yaşlı müdafiəçi "Report"a müsahibəsində UEFA Çempionlar Liqasındakı hədəflərindən də bəhs edib. - Növbəti dəfə Premyer Liqada qalib oldunuz. Təəssüratlarınız necədir? - Bu, mənim ikinci çempionluğumdur. Belə qələbələr məsuliyyətimizi daha da artırır. Növbəti ildə ən azı eyni nəticəni təkrarlamağa çalışacağıq. Çox ağır mövsüm keçirdiyimizi düşünürəm. Hər üç cəbhədə mübarizə apardıq. Məncə, avrokuboklarda çox yaxşı təsir bağışladıq. Qarşıdakı mövsümdə bunu davam etdirmək istəyirik. - Qısa müddətdən sonra avrokuboklarda yeni mövsüm başlayacaq. Qarşınıza UEFA Çempionlar Liqasının qrup mərhələsinə düşmək hədəfi qoyulubmu? - Bu turnirdə oynayırıqsa, minimum hədəfimiz qrup mərhələsinə vəsiqə qazanmaq olmalıdır. Amma rəhbərlikdən komandaya bu barədə hər hansı söz deyilməyib. Lakin biz futbolçular olaraq maksimum nəticə qazanmağa çalışacağıq. - Ramil Şeydayev, Filip Ozobiç kimi futbolçular "Qarabağ"ı tərk edir. Sizcə, onların yerini doldurmaq mümkün olacaq? - Hər ikisi uzun müddət burada çıxış ediblər. Sözsüz ki, onların yoxluğu hiss ediləcək. Amma "Qarabağ" elə bir komandadır ki, burada əsas olan sistemdir. Klub tarixində bu kimi hallar dəfələrlə təkrarlanıb. Kimlərsə gedib, digər oyunçular gəliblər və heç də pis təsir bağışlamayıblar. Yeni belə olacağını düşünürəm. - Öz çıxışınız barədə nə deyə bilərsiniz? Artıq sizi "Qarabağ"ın əsas müdafiəçisi hesab etmək olarmı? - Əlbəttə ki, xeyr. Bura elə bir klubdur ki, konkret olaraq nəsə demək çox çətindir. Üzərimə düşən hər oyunda yaxşı performans göstərmək və öz üzərimdə çalışmaqdır. - Son olaraq milli komanda haqqında danışmağınızı istərdik. İyunun 17-də AVRO-2024-ün seçmə mərhələsində Estoniyanı qəbul edəcəksiniz. İlk iki məğlubiyyətdən sonra bu görüşdə nəyə ümid etmək olar? - Rəqibi doğma meydanda məğlub edə bilərik. Yığmanın tərkibində olmadığımız üçün Estoniya seçməsini analiz etməmişik. Məncə, bu qarşılaşmada əsas məqsədimiz qalib gəlmək olacaq.

“Barselona”nın baş məşqçisi Xavi “PSJ” futbol klubunun hücumçusu Lionel Messinin Kataloniya klubuna mümkün qayıdışı ilə bağlı fikirlərini bölüşüb. Bu barədə “Barça Buzz” məlumat yayıb. “Bütün kataloniyalılar Messini sevir, o, tarixin ən yaxşı oyunçusudur, ssenari belədir ki, çox şey onun nə etmək istədiyindən asılıdır, sonra qərar verəcəyik. Messinin mümkün keçidi böyük ölçüdə onun özündən asılıdır”-deyə, o bildirib. Ümumilikdə Messi bu mövsüm Fransa çempionatında 31 matçda 16 qol vurub və 16 məhsuldar ötürmə edib. O, bu yaxınlarda Səudiyyə Ərəbistanına səfər etdiyi üçün komandadan uzaqlaşdırılıb. O, üzr istədikdən sonra məşqlərə buraxılıb.

Bu gün Azərbaycan Premyer Liqasının 36-cı turuna start veriləcək. Sozcu.az xəbər verir ki, mövsümün son turunun ilk oyun günündə 3 görüş baş tutacaq. “Sumqayıt” – “Zirə” və “Qəbələ” – “Kəpəz” matçları eyni saatda start götürəcək. Günün son matçında isə “Səbail” və “Şamaxı” komandaları üz-üzə gələcək. Bu oyunda elitanı tərk edəcək komandanın adına aydınlıq gələcək. Qeyd edək ki, “Neftçi” – “Sabah” və “Qarabağ” – “Turan Tovuz” oyunları isə sabah keçiriləcək.

"Barselona" futbolçusu Usman Dembeleyə yeni müqavilə təklif edib. Sozcu.az "Mundo Deportivo"ya istinadən xəbər verir ki, Kataloniya təmsilçisi fransalı oyunçu ilə müqavilənin müddətini daha 4 il uzatmaq istəyir. Qeyd edək ki, Dembele 2017-ci ildən "Barselona"da çıxış edir. 26 yaşlı yarımmüdafiəçi bu mövsüm 33 oyuna çıxıb, 8 qol vurub və 7 qolun ötürməsini verib. Xatırladaq ki, Dembelenin Kataloniya təmsilçisi ilə hazırkı müqaviləsi 2024-cü ilin iyununda başa çatır.

Əfsanəvi ispaniyalı futbolçu Andres İnyesta Yaponiya klubu “Vissel Kobe”dən ayrılıb. Bu barədə Asiya təmsilçisi rəsmi saytı vasitəsilə məlumat yayıb. 39 yaşlı yarımmüdafiəçi iyulun 1-də komandanın heyətində vida matçına çıxacaq. “Vissel Kobe” həmin gün Yaponiya çempionatının XIX turunda “Hokkaydo”nu qəbul edəcək. Qeyd edək ki, ölkəsinin “Barselona” klubunun yetirməsi olan Andres İnyesta 2018-ci ildən bəri “Vissel Kobe”nin formasını geyinir. O, Yaponiya təmsilçisində 133 oyun keçirib, 26 qol, 25 assistlə yadda qalıb.

“Neftçi”nin UEFA Konfrans Liqasının II təsnifat mərhələsində daha bir potensial rəqibi bəlli olub.  İsrail təmsilçisi “Beytar” 2023/2024 mövsümündə qitənin üçüncü dərəcəli klub turnirində iştirak hüququ qazanıb. Yerusəlim klubu İsrail Kubokunu qazanmaqla buna nail olub. 5,000 reytinq xalı olan “Beytar” püşkatma zamanı səpələnməmişlər sırasında yer alacaq. Bununla “Neftçi”nin mümkün rəqiblərinin sayı 12-yə yüksəlib. Qeyd edək ki, iyunun 20-də I təsnifat mərhələsinin, bir gün sonra isə II raundun püşkü atılacaq. Azərbaycan klubları ilk oyunlarını iyulun 27-də, cavab matçlarını avqustun 3-də keçirəcəklər. UEFA Konfrans Liqası I təsnifat mərhələsi Səpələnmişlər: “Düdelanj” (Lüksemburq) “Riqa” (Latviya) “Maribor” (Sloveniya) “Şkendiya” (Şimali Makedoniya) “Linfild” (Şimali İrlandiya) “Vaduts” (Lixtenşteyn) “Dunayska” (Slovakiya) “Dandolk” (İrlandiya) “Alaşkert” (Ermənistan) “Şkupi” (Şimali Makedoniya) “Riqa” (Latviya) “Tobol” (Qazaxıstan) “B36 Torshavn” (Farer adaları) “Drita” (Kosovo) “Qzira Yunayted” (Malta) “Levadiya” (Estoniya) “Konnas” (Uels) “HB Torshavn” (Farer adaları) “Europa” (Cəbəllütariq) “Domjale” (Sloveniya) “Santa-Koloma” (Andorra) “Proqres” (Lüksemburq) Səpələnməmişlər: “Vikinqur” (Reykyavik, İslandiya) “Sent-Patriks” (İrlandiya) “Vikinqur” (Farer adaları) “Derri Siti” (İrlandiya) “Makedoniya” (Şimali Makedoniya) “Panevezis” (Litva) “Honka” (Finlandiya) “Baltsan” (Malta) “Zimbru” (Moldova) “Haka” (Finlandiya) “Dila” (Gürcüstan) “Birkirkara” (Malta) “Qlentoran” (Şimali İrlandiya) “Heqelmann” (Litva) “İsloç (Belarus) “Akureyri” (İslandiya) “Eqnatia” (Albaniya) “Penibont” (Uels) “Xaverforduest Kaunti” (Uels) “Meqpays” (Cəbəllütariq) “Kosmos” (San-Marino) Qeyri-müəyyənlər: “Dinamo” (Batumi, Gürcüstan) “İnter Eskaldes” (Andorra) “Kruzaders” (Şimali İrlandiya) “Payde” (Estoniya) “Torpedo” (Kutaisi, Gürcüstan) II təsnifat mərhələsi Səpələnmişlər: “Brügge” (Belçika) “Gent” (Belçika) “Makkabi (Təl-Əviv, İsrail) “Viktoriya” (Çexiya) “Budo-Qlimt” (Norveç) “Lex” (Polşa) “Hapoel” (Beer-Şeva, İsrail) “Yurqarden” (İsveç) APOEL (Nikosiya, Kipr) “Beşiktaş” (Türkiyə) “Riyeka” (Xorvatiya) “Styaua” (Rumıniya) “Legiya” (Polşa) “Rusenborq” (Norveç) “Spartak” (Trnava, Slovakiya) “KuPS” (Finlandiya) “Neftçi” (Azərbaycan) “Osiyek” (Xorvatiya) Səpələnməmişlər: “Beytar” (İsrail) “Hammarbü” (İsveç) “Kalmar” (İsveç) “Kauno” (Litva) “Poqon” (Polşa) “Zalaeqerseq” (Macarıstan) “Keçkemet” (Macarıstan) “Boraç” (Bosniya və Herseqovina) “Sabah” (Azərbaycan) “Ordabasi” (Qazaxıstan) “Aktobe” (Qazaxıstan) “Çelye” (Sloveniya) “Auda” (Latviya) Qeyri-müəyyənlər: “Aris” (Saloniki, Yunanıstan) “Voyvodina” (Serbiya)

La Liqanın 35-ci turunun "Valensiya" - "Real" (1:0) matçının VAR hakimi İqlesias Villanueva ömürlük hakimlikdən kənarlaşdırılacaq. Sozcu.az AS-a istinadən xəbər verir ki, İspaniya Kral Futbol Federasiyası "Real"ın hücumçusu Vinisius Juniorun meydandan qovulduğu epizodda səhvə yol verən Vilyanuevanın hərəkətindən narazı qalıb. Hakimlər komissiyası Vinisius və "Valensiya"nın hücumçusu Huqo Duronun iştirakı ilə əlavə vaxtda baş verən epizodda Villanuevanın səhv hərəkət etdiyini, nəticədə "Real"ın futbolçusuna birbaşa qırmızı vərəqə göstərildiyini qəbul edib.

“Brayton” növbəti mövsüm üçün avrokuboklara vəsiqəni təmin edib. Sozcu.az xəbər verir ki, Roberto De Zerbinin komandası Premyer Liqanın 37-ci turunda səfərdə "Sauthempton"a qalib gəlib (3:1). "Brayton" 36 oyundan sonra, sona 1 tur qalmış 61 xalla 6-cı yerdədir. 7-ci sırada "Aston Villa" (37 oyundan sonra 58 xal), 8-ci yerdə "Tottenhem" (37 oyundan sonra 57 xal) qərarlaşıb. Həmçinin, "Brayton"un hələ də 5-ci yerə yüksəlmək şansı var.  "Liverpul" 37 matçdan sonra 66 xalla 5-cidir. Beləliklə, klub mütləq ya Avropa Liqasında, ya da Konfrans Liqasında çıxış edəcək. Bu mövsümə qədər "Brayton" heç vaxt 9-cu yerdən yuxarı qalxmamışdı. Komanda 2017-ci ildən Premyer Liqada çıxış edir.

"Arsenal"ın məşq mərkəzində "Labrador" cinsli bir it görünüb. Sozcu.az xəbər verir ki, bunun baş məşqçi Mikel Artetanın yeni ideyası olduğu üzə çıxıb. Mütəxəssis düşünür ki, it oxşamaq stressi azaldır, ümumi əhval-ruhiyyəni yaxşılaşdırır. Buna görə də o, klubun bazasına belə bir heyvan gətirib. Həmçinin Arteta inanır ki, Vin (Win - qələbə - red.) adlı it onlara Premyer Liqa çempionluğunu qazanmağa kömək edəcək. Qeyd edək ki, "Arsenal" hazırda turnir cədvəlində 81 xalla (36 oyun) 2-cidir. "Topçular" sona 2 tur qalmış "Mançester Siti"dən (35 oyun) 4 xal geridədir.