“Hazırda mövsüm məhsulları alça, çiyələk, xiyar, pomidordur. Yalnız alça, təzə kartof, soğan mövsüm məhsullarıdır. Lakin mövsüm məhsullarında müəyyən qədər ucuzlaşma gedir. Amma kənd təsərrüfatı məhsullarının kütləvi şəkildə yetişməyə başlamasına hələ 1 aydan çox vaxt var”.  Bu sözləri Yenisabah.az-a açıqlamasında iqtisadi ekspert Akif Nəsirli deyib. O, mövsüm məhsulllarındakı ucuzlaşmanın bu il müşahidə olunmamasının səbəblərindən söz açıb: “Məsələn, xiyar çöl şəraitində mayın sonunda yetişə bilər. Yaxud digər meyvələr - ərik, gilas, albalı və s. açıq şəkildə kütləvi şəraitdə yetişir. O zaman ucuzlaşma müşahidə olunacaq. Yəni mövsüm məhsulları kütləvi şəkildə bazara çıxdıqca, onların qiyməti ucuzlaşacaq. Amma bu ucuzlaşma heç də keçənilki formada olmayacaq. Biz bazara diqqət yetirsək, görərik ki, heç nə keçənilki qiymətlər kimi deyil. Yəni qiymətlər hazırda keçən ilə nisbətən 2 dəfə bahadır. Elə məhsullar var ki, 50%, eləsi də var ki, 100% bahalaşıb”.  İqtisadçıya görə, bazardakı məhsul nomenklaturasının qiymətləri ötən ilə nisbətən bahalaşdığına görə, bu il kənd təsərrüfatı məhsulları keçənilki səviyyəyə qədər ucuzlaşmayacaq: “Məsələn, ötən il qarpızın kilosunu 30 qəpiyə alırdıqsa, bu il bu qiymətin olacağına inanmıram, hətta ən azı 50-60 qəpiyə alacağıq. Yəni bütün qiymətlər bahalaşıb deyə, kənd təsərrüfatı məhsullarının ötən ilə nisbətən bahalaşması təbii haldır.  Lakin mövsüm məhsullarının kütləvi yetişməsinə hələ var. Ona görə də hazırda hələ ki ciddi bir ucuzlaşma müşahidə etmirik. İstixanalar da ötən illərə nisbətən indi daha çox inhisarlaşıb. Onun üçün də istixana məhsulları nə qədər bol olsa da, bir əldə cəmləşib deyə qiymət diktə edir”.  “Məsələn, 1 həftə bundan əvvəl bazarda pomidorun qiyməti 5 manata qədər bahalaşmışdı. Həmin vaxt öyrəndim ki, Rusiyanın şəhərlərində Azərbaycan pomidoru 2 manatdır. Yəni biz Azərbaycan pomidorunu Sankt-Peterburqda 2 manata sata biliriksə, Azərbaycanda bunu 80 qəpik-1 manata sata bilərik. Sadəcə daxildəki istixanalar inhisarlaşdığına görə bazara qiymət diktə edir”, - o, yekunlaşdırıb.

Rusların sursat çatışmazlığı yoxdur. Düşmən təkcə Baxmut və Liman-Kupyansk istiqamətində sutka ərzində 25 min mərmi atır. Sozcu.az xəbər verir ki, bunu Ukrayna Silahlı Qüvvələrinin “Şərq” qoşun qrupunun spikeri Sergey Çerevatıy deyib. Onun sözlərinə görə, rus ordusunun 9 ay ərzində Baxmut istiqamətində 20 min hərbçisi öldürülüb: “Söhbət 100 min itkidən gedir, onun da 20 mini ölüdür. Fikrimcə, dəqiq yoxlanılma aparılsa, itkilərin sayı daha da artacaq”.

Ermənistan məhkəməsi əlverişsiz hava şəraitində məhdud görmə səbəbindən yolu azaraq Ermənistan tərəfə keçən və orada əsir saxlanılan Azərbaycan hərbçisi Aqşin Bəbirovu 11,5 il müddətinə azadlıqdan məhrum edib. Sozcu.az xəbər verir ki, məlumatı “Sputnik Armeniya” yayıb. A.Bəbirov “sərhədi qanunsuz keçmək, silah və sursat daşımaqda” ittiham olunub. Məlumata görə, Ermənistanda əsir saxlanılan digər azərbaycanlı əsgər Hüseyn Axundovun “cinayət işi üzrə istintaq” davam edir. Qeyd edək ki, Azərbaycan Ordusunun əsgərləri - 2004-cü il təvəllüdlü Bəbirov Aqşin Qabil oğlu və 2003-cü il təvəllüdlü Axundov Hüseyn Əhliman oğlu aprelin 9-da Naxçıvan Muxtar Respublikasının Şahbuz rayonunun Ermənistanla sərhəd ərazisində əlverişsiz hava şəraitində məhdud görmə səbəbindən itkin düşüblər. Ermənistan Müdafiə Nazirliyi aprelin 13-də Azərbaycan əsgərlərinin Ermənistanda saxlandığını etiraf edib. Sosial şəbəkələrdə və Ermənistan mediasında ermənilərin əsir götürdükləri Azərbaycan hərbçisini döymələri, ona ağır işgəncə vermələri ilə bağlı görüntülər yayılıb. Əsir və itkin düşmüş, girov götürülmüş vətəndaşlarla əlaqədar Dövlət Komissiyası Azərbaycan Ordusunun itkin düşən iki əsgəri ilə bağlı beynəlxalq təşkilatlara müraciət edib

Abşeronda arvadını qətlə yetirməkdə təqsirləndirilən Muhammet Gündüz barəsində həbs qətimkan tədbiri seçilib. Sozcu.az xəbər verir ki, bu barədə Baş Prokurorluğun Mətbuat Xidmətindən bildirilib. Qeyd edilib ki, Türkan Gündüzün öldürülməsinə dair Abşeron Rayon Prokurorluğunda Cinayət Məcəlləsinin 120.1-ci (qəsdən adam öldürmə) maddəsi ilə istintaq edilən cinayət işi üzrə təqsirləndirilən şəxs Muhammet Gündüz barəsində Abşeron Rayon Məhkəməsi tərəfindən 4 ay müddətinə həbs qətimkan tədbiri seçilib. Qeyd edək ki, mayın 7-si saat 00 radələrində 1982-ci il təvəllüdlü Türkan Gündüzün ölməsinə dair Abşeron rayon Prokurorluğuna məlumat daxil olub. Aparılmış araşdırmalarla 1967-ci il təvəllüdlü Türkiyə vətəndaşı Muhammet Gündüzün aralarında yaranmış mübahisə zamanı bıçaqla arvadı Türkan Gündüzə xəsarət yetirərək qəsdən öldürməsinə əsaslı şübhələr müəyyən edilib. Faktla bağlı Abşeron Rayon Prokurorluğunda Cinayət Məcəlləsinin 120.1-ci (qəsdən adam öldürmə) maddəsi ilə cinayət işi başlanıb. Muhammet Gündüz şübhəli şəxs qismində tutularaq istintaqa cəlb edilib. Xatırladaq ki, qətlə yetirilən Türkan Gündüz tanınmış həkim olub, əri isə biznesmendir.

“Bu gün ölkəmizdə dilənçiliyin forması dəyişib, yəni formanın özü bir qədər yaxşılaşıb”. Sozcu.az xəbər verir ki, bunu Milli Məclisin deputatı Elman Nəsirov deyib. O deyib ki, əvvəl dilənçilər insana yaxınlaşıb pul istəyirdilərsə, indi əllərində salfet tutub 10 qəpiyə satırlar. “Həmin məbləğə sənə salfet təqdim edir və qarşılığında pulunu istəyir. Bu, bir qədər dilənçiliyin fərqli yanaşmasıdır. Başqa bir növ isə maşın sürərkən müxtəlif istiqamətlərdən uşaqlar anidən hücuma keçirlər və şüşələri təmizləməyə başlayırlar və s. Bu da təhlükəsizlik baxımından müəyyən problemlər yaradır”. (report.az)

“Rusiyanın yaratdığı administrasiyanın nümayəndələri Krımdan çıxmağa başlayıblar”. Sozcu.az UNİAN-a istinadən xəbər verir ki, bunu Ukrayna Müdafiə Nazirliyinin Baş Kəşfiyyat İdarəsinin rəisi Andrey Yusov müsahibəsində deyib. Yusov bildirib ki, bunu aydın şəkildə müşahidə etmək mümkündür. Onun sözlərinə görə, işğalçı administrasiyanın nümayəndələri xüsusilə ailə üzvlərini yarımadadan çıxarmağa çalışırlar: “Bəxti gətirənlər hətta Rusiyadan, ən azından Moskvadan çıxırlar”. Xatırladaq ki, Ukrayna Prezidenti Volodimir Zelenski bildirmişdi ki, müharibə Krımın azad olunması ilə başa çatacaq.

Mayın 10-da Bakı və Sumqayıt şəhərləri, eləcə də Abşeron rayonu üzrə pensiyaların ödənilməsi nəzərdə tutulub. Bu barədə Sozcu.az-a Dövlət Sosial Müdafiə Fondundan xəbər verilib. Qeyd edək ki, güzəştli şərtlərlə pensiya hüququna malik şəxslərin pensiyaları bu ay da qrafik üzrə ödəniləcək.

Abşeronda tanınmış plastik cərrah qətlə yetirilib. Ötən gecə 41 yaşlı Türkan Gündüzün ölməsinə dair Abşeron Rayon Prokurorluğuna məlumat daxil olub. Aparılan araşdırmalarla 56 yaşlı Türkiyə vətəndaşı Muhammet Gündüzün aralarında yaranmış mübahisə zamanı bıçaqla arvadı Türkan Gündüzə xəsarət yetirərək qəsdən öldürməsinə əsaslı şübhələr müəyyən edilib. Sozcu.az xəbər verir ki, Əməkdar artist Aybəniz Haşımova qətl hadisəsi ilə bağlı açıqlama verib. Sənətçi qətlə yetirilən Türkanənin ailəsini yaxından tanıdığını bildirib: “10-11 il bundan öncə yaşadığımız Bəşir Səfəroğlu küçəsində olan qonşumuzun, hətta ailəvi bir ara get-gəlişimiz olan ailənin qızını, türk vətəndaşı olan əri ürəyinə bıçaq soxub öldürüb. Şok yaşadım eşidəndə və qızın anasının o zaman mənə dediyi söz yadıma düşdü. Ay Aybəniz xanım, mən bu qıza nə dedim, xeyri olmadı, hətta özündən getmə tapmışdı, o oğlana vermirdik deyə dedi. Soruşdum ki, bəs səbəb niyə istəmirdiniz ki, getsin ona? Anası dedi ki, qızımın tayı deyil, qızımdan çox böyükdür. Bəs indi necə yola gedirlər salını verdim, cavabında isə çox qısqancdır dedi. Susdum, heç nə demədim, çünki qısqanclığın sonu yoxdur. Amma nə deyə bilərdim ki? Baxın, bu da son. Xalqın gül kimi qızının həyatını puç etdi vicdansız, xəstə təfəkkürlü insan. O qədər də yaxşı insan idi, heyf, Türkan səndən. Sevda xanımın, Samirənin nə çəkdiyini təsəvvür belə etmək istəmirəm. Allah səbrinizi versin Samirə qızım. Allah Türkana rəhmət etsin, Valideynlərinizi dinləyin, qızlar. Bax, görürsünüz, valideynə qulaq asmayanda necə olur...” /Yenisabah.az

“Əslində, biz Qarabağın muxtariyyətinə can atırıq, lakin Azərbaycan razı deyil, elə danışıqların bütün mahiyyəti budur”. Sozcu.az xəbər verir ki, bu barədə Ermənistan parlamentinin “Şərəfim var” fraksiyasının katibi Tiqran Abramyan Facebook səhifəsində yazıb. “Son günlərdə Nikol Paşinyanın ən diqqətçəkən ifadəsi belə oldu: “İlham Əliyev Qarabağa geniş muxtariyyət verməyə hazır deyil”. “Paşinyan, faktiki bir il əvvəl Qarabağ məsələsində həddi aşağı salmağa məcbur olduğu fikrini ortaya qoydu. O, etiraf etdi ki, onun ifadələri Qarabağın öz müqəddəratını təyinetmə və ya müstəqillik hüququ ideyası kimi deyil, Azərbaycanın tərkibindəki muxtariyyət kimi başa düşülməlidir. Əslində, onlar Qarabağın muxtariyyətinə can atırlar, lakin Azərbaycan bununla razılaşmır. Danışıqların bütün mahiyyəti budur”, – deyə Abramyan bildirib.

Ukraynada 9 May Qələbə Günü əvəzinə Avropa Günü elan edilib. Sozcu.az Ukrayna mediasına istinadla xəbər verir ki, bu barədə prezident Vladimir Zelenski sərəncam imzalayıb. Sərəncamda bildirilir ki, Ukraynada 8 May Faşizm üzərində Qələbə Günü, 9 May isə Avropa Günü kimi qeyd olunacaq. Bu gündən sonra Ukrayna Qələbə günü əvəzinə Avropa gününü bayram edəcək. “Bu, bizə bütün cəbhələrdə: silahla döyüş meydanında, diplomatik cəbhədə qətiyyətlə, raket terroruna və qışın soyuğuna qarşı, iqtisadiyyatda və hüquqi cəbhədə mübarizə aparmağa kömək edən Avropa Günü olacaq. Bu, bizim müttəfiqimiz olan Avropanın günü olacaq”, – deyə Zelenski vurğulayıb.

Tehran şəhərinin İnqilab Məhkəməsinin 26-cı bölməsi jurnalist Məryəm Vəhidiyan barəsində 4 il azadlıqdan məhrum etmə qərarı çıxarıb. Bu barədə İranın "Şərq" qəzeti məlumat paylaşıb. Məryəm Vəhdiyana qarşı "ölkənin milli təhlükəsizliyinə zərbə vurmaq üçün toplaşmaq və əlbir olmaq" ittihamı irəli sürülüb. Sərhədsiz Reportyorlar təşkilatı mayın 3-də Ümumdünya Media Azadlığı Günü ilə eyni vaxtda 2023-cü ildə media azadlığına dair yeni hesabatını yayıb. Hesabatda qeyd edilib ki, İran media azadlığı göstəricilərinə görə, reytinq cədvəlində 180 ölkə arasında Vyetnam, Şimali Koreya və Çindən sonra 177-ci yerdə qərarlaşıb. Qeyd edək ki, son 8 ay ərzində İranda 70 jurnalist həbs edilib və onlarla jurnalist isə təhlükəsizlik və prokurorluq orqanlarına çağırılaraq dindirilib.

Qax sakini qidadan zəhərlənib. Sozcu.az-ın məlumatına görə, rayonunun Dəymədağlı kənd sakini, 1994-cü il təvəllüdlü Səxavət Muradov zəhərlənmə diaqnozu ilə Qax Rayon Mərkəzi Xəstəxanasına daxil olub. İlkin müayinənin nəticəsinə əsasən, onun göbələkdən zəhərləndiyi məlum olub. Faktla bağlı araşdırma aparılır.apa

Alimlər iddia edirlər ki, qan təzyiqinə ciddi nəzarət insult riskini azalda bilər. Sozcu.az lent.az-a istinadən xəbər verir ki, tədqiqatçılar 458 yaş və yuxarı 50 iştirakçının sağlamlığını araşdırıblar. Tədqiqatçıların fikrincə, daim nəzarət edilən qan təzyiqi insult riskini xeyli azaldır. Qan təzyiqini daha sıx idarə edən xəstələrdə qan axını yaxşılaşır. Bu da ümumi beyin sağlamlığının yaxşılaşdığını göstərir. Qan təzyiqinin intensiv müalicəsi beyin damarlarının zədələnməsini ləngidə və yaşlılarda zehni funksiyanın qorunmasına kömək edə bilər.

Abşeronda bank hesabından pul oğurlamaqda şübhəli bilinən qadın saxlanılıb. Bu barədə Sozcu.az-a Daxili İşlər Nazirliyinin (DİN) Mətbuat Xidmətindən məlumat verilib. Bildirilib ki, rayonun Xırdalan şəhər sakini olan bir nəfərin bank hesabından 2300 manatının oğurlaması barədə polisə məlumat daxil olub. Abşeron Rayon Polis İdarəsi əməkdaşlarının keçirdikləri əməliyyat tədbiri nəticəsində oğurluq əməlində şübhəli bilinən Xırdalan şəhər sakini V.Tanrıverdiyeva müəyyən olunaraq saxlanılıb. Araşdırma aparılır.

İtaliyanın "Napoli" klubu baş məşqçisi Luçano Spaletti ilə müqavilənin müddətini uzadıb. 64 yaşlı mütəxəssis "Fiorentina"ya 1:0 hesabı ilə qalib gəldikləri A Seriyasının XXIII tur oyunundan sonra bu barədə açıqlama verib. Spaletti rəhbərliyin sözləşmənin artırılması variantını aktivləşdirdiyini söyləyib. O, yeni müqavilənin 2024-cü ilin yayınadək nəzərdə tutulduğunu vurğulayıb. Qeyd edək ki, "Napoli" 32 ildən sonra İtaliyada çempionluğunu rəsmiləşdirib. Komanda son olaraq 1989/1990 mövsümündə A Seriyasının qalibi olub.

Ötən il müəyyən edilmiş 94 (-1) insan alveri qurbanından (93 qadın, 1 kişi) 93-ü Azərbaycan vətəndaşı, biri əcnəbi olub (Nigeriya Federativ Respublikasının vətəndaşı öz həmyerlisi tərəfindən Azərbaycanda istismar edilib). Bu barədə Azərbaycanda insan alverinə qarşı mübarizəyə dair İnsan Alverinə Qarşı Mübarizə üzrə Milli Koordinatorun 2022-ci il üzrə hesabatında bildirilir. Qeyd edilib ki, onlardan 82-i cinsi istismar məqsədilə Türkiyəyə, 1-i İrana aparılıb, 9-u ölkə daxilində cinsi istismara, 2-i isə məcburi əməyə məruz qalıb. Qurbanlardan 6-ı uşaq (hamısı qadın, cinsi istismar), 16-ı 18-25 və 41-i 25-35 yaş arası, 31-i 35-dən yuxarı yaş həddində olub.

Şəkidə üç nəfər arasında dava olub, xəsarət alanlar var. Hadisə rayonun Cumakənd kəndi ərazisində fəaliyyət göstərən çay evinin qarşısında baş verib. Kənd sakini, 1991-ci il təvəllüdlü Həsən Səfərov, Şorsu kənd sakini, 1985-ci il təvəllüdlü Qoşqar Davudov və Daşüz kənd sakini, 1979-cu il təvəllüdlü Xəyyam Quliyev arasında dava baş verib. Dava zamanı xəsarət alan hər üç şəxs Şəki Rayon Mərkəzi Xəstəxanasına (RMX) müraciət ediblər. Onlar bu gün səhər saatlarına kimi xəstəxanada həkim nəzarətində olublar. Xəsarətləri yüngül olduğu üçün evə buraxılıblar. Daxili İşlər Nazirliyinin Mətbuat xidmətinin Şəki regional qrupunun baş inspektoru, polis kapitanı Mahir Məsimov APA-ya bildirib ki, dava ilə bağlı Şəki Şəhər Rayon Polis Şöbəsinin Təhqiqat bölməsində araşdırma aparılır, xəsarətlərlə bağlı müvafiq ekspertiza təyin olunub. Araşdırmanın nəticəsindən və ekspertizanın rəyindən asılı olaraq əmələ hüquqi qiymət veriləcək.

Bu gün maqnit qasırğası gözlənilir. Bu barədə Bakı Dövlət Universitetinin (BDU) Fizika fakültəsinin Astrofizika kafedrasından məlumat verilib. Bildirilib ki, 4-6 may tarixlərində Günəşin səthində bir sıra oblastlarda davamlı olaraq M-sinif alışmalar baş verib. Bu səbəbdən geomaqnit sahə mayın 8-də G2 (orta) maqnit qasırğa səviyyəsində (gündüz saat 10.00-dək), mayın 9-da G1 (mülayim) və daha zəif, mayın 10-da isə aktiv səviyyədə olacaq. 04-05 may tarixlərində yaranmış tac dəliklərindən yüksək sürətli plazma zərrəcikləri selinin Yerdən keçməsi geomaqnit şəraitin həyəcanlaşmasını bir qədər də gücləndirib. LASCO (Large Angle and Spectrometric Coronagraph - Geniş bucaqlı və spektrometrik koronoqraf) C2 koronoqrafı vasitəsi ilə Yerə yönəlmiş hər hansı tac kütlə atılması (CME -Coronal Mass Ejection) müşahidə olunmayıb. Mayın 8-də Yerdə maqnit qasırğasının loqarıfmik indeksini xarakterizə edən Kp əmsalının orta qiyməti 3-5, mayın 9-10-da 2-4 intervalında dəyişəcək. Bu günlərdə risk qrupuna daxil olan xəstələrin, yaşlı insanların və uşaqların səhhətində müəyyən narahatlıq-diskomfort halı güclənə bilər. Belə hallarda təşvişə düşmədən həkim nəzarəti altında profilaktik tədbirlərin görülməsi, fiziki və psixoloji yüklənməni azaldaraq fəal istirahətə üstünlük verilməsi tövsiyə olunur.

"Cənubi Qafqazda vəziyyət kövrəkdir. Ermənistan səmimi olmadığına görə durum hələ də gərgindir". Bunu Türkiyənin xarici işlər naziri Mövlud Çavuşoğlu Antalyada çıxışı zamanı deyib. O bildirib ki, indi dünyada beynəlxalq sistemsizlik hökm sürür: “Biz əvvəllər beynəlxalq sistemlərdən danışırdıq. İndi isə sistemsizlikləri müzakirə edirik. Avropanın mərkəzində müharibə gedir. Halbuki BMT-nin, Avropa İttifaqının yaradılmasının məqsədi toqquşmaların qarşısını almaq idi”. Nazirin sözlərinə görə, Ukrayna müharibəsində Türkiyə kimi balanslı siyasət yürüdən başqa ölkə yoxdur: “Biz bu siyasəti davam etdirməliyik. Türkiyənin balanslı siyasəti bu ölkə üçün çox faydalıdır”.

Türkiyə müxalifətinin "Millət İttifaqı"nın prezidentliyə vahid namizədi, Cümhuriyyət Xalq Partiyasının (CHP) sədri Kemal Kılıçdaroğlu həyat yoldaşı ilə ittifaqa daxil olan digər siyasi qüvvə olan İYİ Partiyanın sədri Meral Akşenerin evinə qonaq gedib.  Sozcu.az xəbər verir ki, bu barədə Kılıçdaroğlunun xanımı Selvi Kılıçdaroğlu tviter səhifəsində paylaşım edib.  "Qiymətli Akşener ailəsinə qonaqpərvərlikləri üçün təşəkkür edirəm. Bu gün şahid olduqlarımıza rəğmən (Ərzurum hadisələri nəzərdə tutulur - red.) gözəl bir gecə idi. Bu ölkənin hüzura, sevgiyə və qardaşlığa çox ehtiyacı var. Bahar gəlir", - deyə o qeyd edib.  CHP sədri isə xanımının paylaşımını retvit edərək yazıb: "Akşener ailəsinin qonağı olduq. Qonaqpərvərlikləri üçün onlara çox təşəkkür edirəm. Bu görüşləri tez-tez təkrarlamağa qərar verdik bu gecə. Ortalığı qarışdırmağa çalışanlara etibar etməyin. Biz birlikdə ölkəmizə baharı gətirəcəyik".  Qeyd edək ki, bundan əvvəl ittifaqa daxil olan DEVA Partiyasının sədri, sabiq iqtisadiyyat və xarici işlər naziri Ali Babacan həyat yoldaşı ilə Kemal Kılıçdaroğlugilə qonaq getmişdi. 

Dövlət İmtahan Mərkəzi mayın 14-də keçiriləcək imtahanlarda iştirak edəcək abituriyentlərə (şagirdlərə) müraciət edib. Sozcu.az müraciətin mətnini təqdim edir: "İştirakçılar “İmtahana buraxılış vərəqəsi”ni çap edə bilərlər. Məlum olduğu kimi, Dövlət İmtahan Mərkəzi tərəfindən 14 may 2023-cü il tarixində ümumi (9 illik) orta təhsil səviyyəsi üzrə aşağıdakı imtahanların keçirilməsi nəzərdə tutulub. 1. Əvvəlki illərin məzunları üçün orta ixtisas təhsili müəssisələrinə qəbul imtahanı; 2. Müsabiqədə buraxılış imtahanında verdiyi xarici dildən fərqli dil üzrə iştirak etmək istəyən cari ilin məzunları üçün əlavə xarici dil imtahanı; 3. Qəbul imtahanını buraxılış imtahanında verdiyi dildən fərqli dil üzrə vermək istəyən cari ilin məzunları üçün əlavə tədris dili imtahanı; 4. Aprel ayında keçirilmiş buraxılış imtahanlarında müxtəlif səbəblərdən iştirak edə bilməmiş və barəsində Mərkəzə müraciət edilmiş cari ilin IX sinif şagirdləri üçün buraxılış imtahanı; 5. Eksternat qaydasında IX sinif üzrə yekun attestasiyada iştirak etmək istəyən şəxslər üçün buraxılış imtahanı; 6. Buraxılış imtahanlarında müxtəlif səbəblərdən iştirak edə bilməmiş və barəsində Mərkəzə müraciət edilmiş əvvəlki illərin IX sinif məzunları üçün buraxılış imtahanı. 1-3-cü kateqoriyaya aid olan şəxslər buraxılış vərəqəsini çap etmək üçün https://www.e-gov.az/az/services/read/2516/0?tqdk_xdm=74 keçidindən istifadə etməlidirlər. 4-6-cı kateqoriyaya aid olan şəxslər imtahana buraxılış vərəqəsini çap etmək üçün https://www.e-gov.az/az/services/read/2516/0?tqdk_xdm=46 keçidindən istifadə etməlidirlər. İmtahana buraxılış vərəqəsində imtahanın keçiriləcəyi tarix, şəhər (rayon), bina, zal, imtahanın başlanma vaxtı, iştirakçının imtahan binasına gəlmə vaxtı və s. məlumatlar qeyd olunub.

Ötən gecə Ukrayna ordusu ölkəyə hücum edən 35 ədəd “Şahidin” hamısını məhv edib. Sozcu.az xəbər verir ki, bu barədə Ukrayna Silahlı Qüvvələri Baş Qərargahı məlumat yayıb. "Mayın 8-nə keçən gecə düşmən İranın “Şahid” PUA-larından istifadə edərək yenidən Ukrayna ərazisinə hücum edib. Hücum edən 35 İran PUA-sı məhv edilib”, - məlumatda deyilir.

Dünya birjalarında neft qiymətləri bahalaşıb. Sozcu.az xəbər verir ki, hazırda “Brent” markalı neftin bir barreli 75,70 dollara, yüngül neftin bir barreli isə 71,77 dollara təklif edilir.

Xəbər verdiyimiz kimi, Prezident İlham Əliyev əfv sərəncamı imzalayıb. Sozcu.az xəbər verir ki, sərəncama əsasən, həbsdə olan Vətəndaş və İnkişaf Partiyasının (VİP) sədri Əli Əliyev də əfv edilib.