Almaniyanın Daxili Təhlükəsizlik Təşkilatı ölkədə yaşayan iranlı mühacirlərin oğurlanması ilə bağlı xəbərdarlıq edib. Sozcu.az xəbər verir ki, bu barədə təşilatın hazırladığı 380 səhifəlik son hesabatında deyilib. Hesabatda İran hökumətinin dövlət səviyyəsində terrorla məşğul olduğu, Almaniyada yaşayan Tehran müxaliflərinin İran hökumətinə bağlı qüvvələr tərəfindən oğurlanması təhlükəsi barədə xəbərdarlıq edilib.

Azərbaycanda müşahidə olunan faktiki hava açıqlanıb. Bu barədə Sozcu.az-a Milli Hidrometeorologiya Xidmətindən bildirilib. Xidmətin iyunun 21-i saat 10:00-a olan məlumatına əsasən ölkə ərazisində qeyri-sabit hava şəraiti davam edib, bəzi yerlərdə şimşək çaxıb, arabir yağış yağıb, ayrı-ayrı yerlərdə intensiv və güclü olub. İyunun 21-i səhər saatlarında Abşeron yarımadasının bəzi yerlərində qısamüddətli yağış yağıb. Düşən yağıntının miqdarı Qaxda 56, Balakəndə 30, Qusarda 27, Zaqatalada 21, Gədəbəydə 22, Daşkəsəndə 19, Göygöldə 13, Şərurda 11, Astarada 10, Ağdamda 9, Tovuz, Lənkəranda 8, Tərtər, Quba, Xaltan, Lerik, Naftalan, Şahbuz, Ağstafa, Şəki, Şahdağ, Zərdab,Yardımlı, İmişli, Bərdə, Sabirabad, Ordubad, Ceyrançöl, Qrız, Mingəçevir, Yevlax, Naxçıvan, Qəbələ, Göyçay, Beyləqan, Şəmkir, Gəncədə 1-7 mm–dək olub. Yağan leysan yağışlar nəticəsində Balakən rayonu ərazisindən axan Katexçay, Zaqatala rayonu ərazisindən axan Talaçay və Qax rayonu ərazisindən axan Kürmükçaydan qısamüddətli sel keçib.

Azərbaycan Mərkəzi Bankının (AMB) İdarə Heyəti (İH) uçot dərəcəsinin 9 % səviyyəsində saxlanılması barədə qərar qəbul edib. Sozcu.az xəbər verir ki, bu barədə AMB məlumat yayıb. Məlumata görə, faiz dəhlizinin aşağı həddi 7,5 %, yuxarı həddi isə 10 % saxlanılıb.

Gədəbəydəki hadisədə polis nəfərinin yaşlı anaya qarşı tamamilə qeyri-adekvat, gərəksiz, ağıl və məntiqdən uzaq hərəkəti haqlı olaraq hər kəsi qəzəbləndirib.  Lakin həmin epizod nəhəng problemin çox kiçik bir təzahürüdür. Bu hadisə kontekstində Azərbaycanda 2 fundamental problemdən söz açmaq lazımdır:  Birincisi, ölkədə hüquq və azadlıqların təminatı sahəsində onsuz da acınacaqlı olan vəziyyətin daha da ağırlaşması gerçəyi.  Azərbaycan Respublikası dövləti Konstitusiyasının İkinci Bölmə - III Fəslində qeyd olunmuş qırx yeddi maddənin çoxsaylı bəndlərinin mütləq əksəriyyəti tamamilə formalitədən ibarətdir və icra olunmur. Dövlət hakimiyyətini həyata keçirənlər dövləti öz vətəndaşına xidmət edən deyil, öz vətəndaşını əzən mexanizmə çeviriblər. Nəticədə vətəndaş özü də vətəndaş olmaqdan çıxaraq rəiyyətə, təbəəyə çevrilib.  İkinci məsələ Azərbaycanda ekoloji problemlərin getdikcə kəskinləşməsidir.  Çox təəssüf ki, hamımız bu mövzunu tamamilə diqqətdən kənarda qoymuşuq, halbuki söhbət Azərbaycanın təbiətinin, havasının, su hövzələrinin, bir sözlə, insanın yaşaya bilməsi üçün zəruri olan ekoloji sistemin vəziyyətindən gedir. Konkret Gədəbəydəki hadisəyə qayıtsaq, məlumdur ki, qızıl mədənçiliyində istifadə edilən sianid (Türkiyədə siyanür deyilir) ətraf mühitə çox ciddi zərər verir. (Bu sahəni bilənlər və kimyaçılar ətraflı məlumat verə bilər.) Buradan gəlib çıxırıq ekoloji maariflənmənin və ekoloji hərəkatın nə qədər həyati olduğu mövzusuna... İçdiyimiz suyun, udduğumuz havanın, yediyimiz qidanın tərkibinin normalara nə dərəcədə uyğunluğu və ümumən bu ölkəni gələcək nəsillərə hansı vəziyyətdə ötürdüyümüz ekzistensial məsələdir.    Biz müstəqil vətəndaş cəmiyyətinin bir toplum üçün nə qədər vacib olduğunu hələ tam dərk edə bilməmişik. Cəmiyyətdə ekoloji maariflənmənin aparılmasında məhz vətəndaş cəmiyyəti və digər demokratik institutlar (xüsusən azad media) əsas rol oynamalıdır. Onlar fasiləsiz şəkildə bu problemi ölkənin gündəmində saxlamalıdır, dinc etiraz aksiyaları təşkil etməlidir (azad media bu aksiyaları işıqlandırmalı, siyasi partiyalar səslənən tələbləri hökumətin qarşısında qoymalıdır), əhalidə, xüsusən gənc nəsillərdə ekoloji şüurun formalaşmasına çalışmalıdır. Normal ölkələrdə belədir. Lakin bizdə müstəqil vətəndaş cəmiyyəti demək olar ki, ortadan qaldırılıb. Qeyri-müstəqil QHT-lərin məmur biznesinin və ya siyasi iqtidarın maraqlarına aid mövzulara müdaxilə etməyəcəyi, heç məmur biznesi və iqtidar maraqlarının olmadığı məqamlarda da bu məsələlərlə bağlı özünü yormayacağı isə məlumdur.  ... İnsan haqlarından, demokratiyadan danışanda bəzən qıcıqlananlar, cırnayanlar olur. Son vaxtlar (xüsusən Qarabağ müharibəsindən sonra) “demokratiya, insan haqları yox, təhlükəsizlik daha önəmlidir” deyib, bir-birini inkar etməyən, əksinə, tamamlayan bu anlayışları ayıraraq əks qütblərə yerləşdirən adamları (hətta partiya liderlərini) çox görür və eşidirik. Halbuki hüquq və azadlıqların durumu ölkənin, xalqın gələcəyinə bilavasitə, müəyyənləşdirici təsir göstərən məsələdir, bu hüquqların təminatı isə konstitusion tələbdir. Şahin Cəfərli, politoloq

Bu gün Gədəbəydə polislə yerli əhali arasında qarşıdurma yaşanıb. Polis dinc etirazçılara qarşı dəyənəklərdən və göz yaşardıcı qazdan istifadə edib. Sosial şəbəkələrdə polis zorakılığını əks etdirən çoxsaylı videolar yayılıb. “Gədəbəydə dinc etiraz aksiyası keçirən, aksiya yerini polisin tələbi ilə tərk edən qadınlara qarşı bibər qazının tədbiq edilməsi, bu hərəkətin heç bir zərurət olmadığı halda dəfələrlə təkrarlanması əndazəni aşan vəhşilikdir”. Bunu Müsavat Partiyasının başqanı Arif Hacılı özünün feysbuk səhifəsində yazıb. “Bu hadisəni törədənlər dərhal müəyyənləşdirilərək cəzalandırılmalı, bu barədə xalqa ətraflı məlumat verilməlidir” deyə, Arif Hacılı tələb edib. Müsavat mətbuat xidmətinin rəhbəri Mustafa Hacıbəyli Gədəbəydə iyunun 20-də keçirilən aksiyada polisin dinc etirazçılara, o cümlədən yaşlı qadınlara arxadan bibər qazı ilə hücum etməsini hüquq baxımından cinayət, dəyərlər baxımından isə ləyaqətsizlik kimi qiymətləndirib: “Dinc etirazçılara qarşı zorakılıq edənlər məsuliyyətə cəlb edilməlidirlər – Müsavatçı olaraq hakimiyyət və DİN-dən bunu tələb edirik”. “Azərbaycanda polis zorakılığının bu qədər çılpaq şəkildə üzə çıxması fonunda, hakimiyyəti nəhayət, xalqın tərəfini tutmağa çağırırıq. Bu günlərdə Gədəbəydə kütləvi repressiyalara rəvac veriləcəyinə, polis zorakılığını əks etdirən həmin videoları və şəkilləri çəkib paylaşanların qanunsuz təzyiqlərə məruz qalacağına dair narahatlığımızı ifadə edir, onların hüquqlarının müdafiəsi üçün tədbirlərə dəstək verməyə hazır olduğumuzu bəyan edirik” – deyə, Mustafa Hacıbəyli özünün feysbuk səhifəsində yazıb.  “İham Əliyevin qızıl zavodu Gədəbəyin Söyüdlü kəndində sionit gölü (vannasl) inşa etmək istəyir. Əhali buna etiraz edib. Əvvəl polis daha sonra Daxili Qoşunla əraziyə gətirilib. Kənd sakinləri ilə əsgərlər arasında qarşıdurma yaranıb”. Bunu isə mühacirətdəki jurnalist Əfqan Muxtarlı özünün feysbuk səhifəsində yazıb. “Əliyev xalqın sərvətini talamaqla yanaşı, xalqa divan da tutur. Camaat niyə narazıdır? Əliyevin şirkətləri qızılı vəhşi, primitiv yollarla əldə edir. Qlzıl yatağından torpaq götürülür, üyüdülür və sonra sionit məhlulu ilə qızıl torpaqdan ayrılır. İstifadə edilən sionit gölə (vanna) yığılıb yenidən istifadə olunur. Sionit zəhərli maddədir. Xüsüsən heyvanlar və quşların kütləvi məhv olmasına səbəb olur. Biz dəfələrlə Gədəbəy və Daşkəsən rayonlarında mal qaranın, vəhşi heyvanların və quşların kütləvi şəkildə zəhərlənməsinin şahidi olmuşuq. Yerli sakinlərin bildirdiyinə görə Çovdar qızıl yatağı istismara verildikdən sonra quşlar və xırda çöl heyvanlarının hiss ediləcək dərəcədə azalıb. Söyüdlü kəndinin camaatı real təhlükəyə, özlərinin, övladlarının sağlamlığına görə narahatdır. Vəhşi və primitiv üsullarla qızıl istehsalı dayandırılmalıdır!” – deyə, Muxtarlı vurğulayıb. Basta

İcbari Tibbi Sığorta Agentliyi imtiyazlı qrupa daxil olan xəstələrin təminatı üçün dərman vasitələrinin satın alınması ilə bağlı tenderə yekun vurub.  Sozcu.az xəbər verir ki, tenderin qalibi "Zeytun Pharmaceuticals” MMC seçilib. Tərəflər arasında bağlanacaq müqavilənin maliyyə dəyəri 7 852 864,01 AZN təşkil edir.  İqtisadiyyat Nazirliyi yanında Dövlət Vergi Xidmətinin reyestr məlumatlarına görə, "Zeytun Pharmaceuticals” MMC 9 oktyabr 2014-cü ildə qeydiyyata alınıb. Nizamnamə kapitalı 2000 AZN olan şirkətin hüquqi ünvanı Bakı şəhəri Nizami rayonu, Oqtay Vəliyev küçəsi, ev 21C-də yerləşir. MMC-nin qanuni təmsilçisi Şirəliyev Bəhruz Əvəz oğludur.  Bəhruz Şirəliyev vaxtilə "Rəvan” futbol klubunun vitse-prezidenti vəzifəsində çalışıb.  "Zeytun Pharmaceuticals” MMC "Farum Qafur” MMC ilə eyni hüquqi ünvanda qeydiyyatdadır. "Farum Qafur” MMC artı ləğv edilib. Bu şirkətin qanuni təmsilçisi Tağıyev Zamir Elşad oğlu olub.   Mediada geən məlumatlara görə, Zamir Tağıyevin qanuni təmsilçisi olduğu başqa şirkətlər də var. Onlardan biri də "Azmedkom" MMC-dir. Artıq ləğv olunan bu şirkətin təsisçisi isə keçmiş səhiyyə naziri Oqtay Şirəliyevin oğlu Kazım Şirəliyev olub. Bu fakt göstərir ki, "Zeytun Pharmaceuticals” MMC-nin Səhiyyə Nazirliyinə, daha doğrusu, qurumun keçmiş rəhbərliyinə yaxın şirkətdir.  Bundan başqa məlumatlarda qeyd edilir ki, "Zeytun Pharmaceuticals” MMC-nin keçmiş hüquqi ünvanı Səbail rayonu, Niyazi küçəsi ev 5, mənzil 15-də yerləşib. Bu ünvan Səhiyyə Nazirliyinin "Dərmanların Analtik Ekspertizasi Mərkəzi” MMC-nin keçmiş direktoru Əbülfəz Abdullazadənin qeydiyyatda olduğu mənzildir. Müəssisə yaradılanda Əbülfəz Abdullazadə "Dərmanların Analtik Ekspertizasi Mərkəzi”nin direktoru vəzifəsində işləyib. Dərman preparatlarının lisenziyası ilə məşğul olan bir qurumun rəhbərinin ünvanında dərman şirkəti qeydiyyatdan keçib.(qaynarinfo)

Ukrayna Silahlı Qüvvələrinin 150 nəfərlik qrupu Kremennaya şəhərində Rusiya ordusunun müdafiə xəttini yarmağa cəhd edir. Sozcu.az xəbər verir ki, bu barədə Luqansk “xalq milis dəstəsi”nin “polkovnik-leytenantı” Andrey Maroçko deyib. O bildirib ki, şəhərdə vəziyyət olduqca ağırdır və Ukrayna uzun müddətdir ki, hücum əməliyyatları icra edir: “Üstəlik, dəfələrlə kütləvi hücum cəhdləri qeydə alınıb. Yəni kiçik qruplarla deyil, taktiki qruplarından başlayaraq təxminən 150 nəfərədək... Düşmən bizim müdafiə xəttimizi yoxlayır və onu yarmağa çalışır”.

Ukrayna hərbçiləri Tavriya istiqamətində sutka ərzində rusların 5 bölüyünü və 46 zirehli texnikasını məhv edib. Sozcu.az xəbər verir ki, bunu Tavriya operativ-strateji qoşun qruplaşmasının komandanı Aleksandr Tarnavski deyib. “Müdafiə qüvvələri Tavriya istiqamətində irəliləyirlər. Raket və artilleriya qoşunlarının bölmələri sutka ərzində 1487 atəş tapşırığı yerinə yetiriblər”, - Tarnavski bildirib.

“Palmali Holdinq”in prezidenti Mübariz Mənsimov mərhum atasının sabah Bakıda baş tutacaq dəfn mərasimində iştirak edə bilməyəcək. Sozcu.az xəbər verir ki, bu barədə M.Mənsimovun köməkçisi Fidan Quliyeva məlumat yayıb. "Təəssüf hissi ilə bildiririk ki, 2021-ci ildə məhkəmənin şərti cəza müddətində azərbaycanlı iş adamının Türkiyəni tərk etməməyi ilə bağlı qərarı hələ də qüvvədədir", - deyə o bildirib.

Müəllimlərin sertifikatlaşdırılması imtahanında davamiyyət olduqca yüksək idi. Sozcu.az xəbər verir ki, bunu Təhsil İnstitutunun İnsan resursları mərkəzinin direktoru vəzifəsini icra edən Nurlan İsmayılbəyli bildirib.  "Ötən il 15 min müəllim imtahan dəvət edilmişdi. Davamiyyət yüksək idi. Müəllimlərdən əksəriyyəti imtahanı uğurla verdi. İlk cəhddə uğur qazanmayan müəllimlər təlimlərə cəlb edildilər. Bu, onların davamlı inkişafına hesablanmışdı. Bu məqsədlə 57 dəstək mərkəzi yaradıldı. Beləliklə, müəllimlər akademik təlimlərə cəlb olundular. Bu gündən yeni imtahanlara start verildi. 10 şəhərdə 13 imtahan mərkəzində proses gedir. Davamiyyət olduqca yüksəkdir. İmtahan verənlərin 95 faizi artıq imtahan verir. Ötən il 8700-dən çox müəllim maaşlarına əlavə aldılar. Ümid edirik ki, bu il belə müəllimlərin sayı daha çox olacaq", - deyə qurum rəsmisi qeyd edib.

İran Yazıçılar Birliyi Tehranda yaşayan Güney azərbaycanlı ziyalı və ana dili hərəkatının fəalı Əkbər Azadın həbsi və sürgün cəzasına məhkum edilməsi ilə bağlı bəyanat yayıb. Bu barədə Yazıçılar Birliyinin sosial media kanalında məlumat verilib. Bəyanatda Əkbər Azadın iki illik həbs cəzasından sonra iyunun 11-də İlam əyalətinin Dərədivan şəhərinə sürgünə göndərilməsi azad sözə qarşı təzyiqlərin davamı kimi qiymətləndirilib. "İran Yazıçılar Birliyi bu cür qəddar hökmlərin verilməsini öz ana dilində danışmaq, yazmaq və nəşr etmək istəyən hər kəsə qarşı söz azadlığının açıq-aşkar pozulması və təzyiq nümunəsi hesab edir. Buna görə də yazıçının özü və ailəsinə qarşı vurulan ziyanların məsuliyyətinin bu ədalətsiz hökmləri verənlərin üzərinə düşdüyünü bildiririk",- bəyanatda qeyd edilib. Qeyd edək ki, Tehranda yaşayan Güney azərbaycanlı milli fəal və ana dili hərəkatının tanınmış simalarından olan Əkbər Azad iki illik sürgün cəzasını çəkmək üçün iyunun 11-də İlam əyalətinin Dərədivan şəhərinə gedib. 2017-ci il 21 fevralda Baharistan şəhərinin İnqilab Məhkəməsi Əkbər Azad, Əlirza Fərşi, Behnam Şeyxi və Həmid Mənafiyə 10 ildən 15 ilə qədər həbs və 2 il sürgün cəzası verib. Lakin daha sonra fəalların hökmü Apellyasiya Məhkəməsində 2 il həbs və 2 il sürgün cəzası olaraq dəyişdirilib.

Bakıda təmir sexində yanğın baş verib. Sabunçu rayonu ərazisində 1983-cü il təvəllüdlü Kamal Vəliyev müştərisi Bünyamin Şükürova məxsus “Mercedes-Benz” markalı avtomobilin yanacaq çənində təmir aparan zaman yanğın baş verib. Nəticədə Kamal Vəliyev, onun övladı, 2015-ci il təvəllüdlü Mövlüd Vəliyev və Bünyamin Şükürovun 2013-cü il təvəllüdlü oğlu Sərdar Şükürov əl və üz nahiyələrindən yanıq xəsarəti alıblar. Faktla bağlı araşdırma aparılır. /apa/

Bakı Apellyasiya Məhkəməsində idman zalında qətl törətməkdə ittiham olunan Əli Abbasovun barəsindəki hökmdən verilən apellyasiya şikayəti üzrə məhkəmə iclası başlayıb. Hakim Mirzəli Abbasovun sədrliyi ilə keçirilən prosesdə qərar elan olunub. Qərara əsasən, Ə.Abbasovun apellyasiya şikayəti təmin edilməyib. Bakı Ağır Cinayətlər Məhkəməsinin hökmünə əsasən, Ə.Abbasov 15 il müddətinə azadlıqdan məhrum edilmişdi. Qeyd edək ki, hadisə ötən il martın 1-də paytaxtın Xətai rayonu ərazisində qeydə alınıb. İstintaqla müəyyən edilib ki, qeyd edilən tarixdə şəhər sakini Əli Abbasov Bakı şəhəri, Xətai rayonu, N.Tusi küçəsində yerləşən idman zalında məşq edərkən orada idman edən 1999-cu il təvəllüdlü Bəxtiyar Nəsibovla mübahisə edib. Bəxtiyar Nəsibov Əli Abbasova bədən xəsarətləri yetirib. Daha sonra Əli Abbasov qisas almaq niyyəti ilə Bəxtiyar Nəsibova üzərində gəzdirdiyi bıçaqla xəsarətlər yetirərək onu qəsdən öldürüb. Əli Abbasov əvvəlcə Cinayət Məcəlləsinin 120.1-ci (qəsdən adamöldürmə) maddəsi ilə təqsirləndirilib. Dövlət ittihamçısı bu maddənin sanksiya tələbinə uyğun olaraq ona cəza istəyib. Bundan sonra zərərçəkmiş tərəfin vəsatəti əsasında onun əməlində daha ağır cinayətin olması şübhəsi olduğu üçün iş prokurora geri qaytarılıb. Yenidən aparılan araşdırmadan sonra Əli Abbasova Cinayət Məcəlləsinin 120.2.2 (xuliqanlıq niyyəti ilə adamöldürmə) və 120.2.4 (xüsusi amansızlıqla və ya ümumi təhlükəli üsulla adamöldürmə) maddələri ilə ittiham verilib. /Pravda.az/

Xəbər verildiyi kimi, Ukrayna Putinin "sülhməramlı"ların nəzarətində olan Azərbaycan ərazilərinə göndərdiyi milyarder "desant"ı Ruben Vardanyanı axtarışa verib. Ukraynanın sanksiya tətbiq edilən şəxslərin siyahısına daxil etdiyi Ruben Vardanyan “dərhal saxlanılaraq Ukrayna və NATO ölkələrinin hüquq-mühafizə orqanlarına təhvil verilməli” şəxs kimi qeyd edilib. Lakin erməni milyarderin hansı səbəblərdən axtarışa verildiyi bizim üçün qaranlıq qalıb... Avropanın məşhur nəşrlərindən birinin təqdim etdiyi yazıda nəinki bu səbəblər, həm də "strateji müttəfiqimiz" olan Rusiyanın Qarabağda Azərbaycanın dövlət suverenliyi və ərazi bütövlüyünə qarşı gördüyü digər işlər də ifşa olunub. “ABŞ bu yaxınlarda Moldovada dövlət çevrilişinə cəhddə iştirak edən və Rusiya kəşfiyyatı ilə əlaqəsi olan qrupun yeddi aparıcı üzvünə qarşı sanksiyalar tətbiq edib”.  Sozcu.az xəbər verir ki, bunu Avropanın nüfuzlu "EU Reporter" analitik portalı yazır. Məqalə müəllifi Ruben Vardanyan da daxil olmaqla bu siyahını təcili tamamlamağa çağırır. “EUReporter”-in məlumatına görə, Putinin yaxın fiquru sayılan Vardanyan qondarma “Dağlıq Qarabağ respublikası”nın  “dövlət naziri” vəzifəsindən uzaqlaşdırılsa da, hələ də Cənubi Qafqazda qeyri-sabitlik mənbəyi yaratmaqla məşğuldur. Qəzet onu da yazır ki, Ukrayna kəşfiyyatının məlumatına görə, Rusiya qoşunları Qarabağ ordusunu Çin minaatan kimi partlayıcı qurğuları işə salmağa imkan verən bombardman sistemləri ilə təchiz edilmiş yüzlərlə “DJI Mavic 3” kəşfiyyat və hücum pilotsuz təyyarələri ilə təmin edib. Həmin silahların tədarükü ilə bağlı əmrin Rusiya Federasiyası Baş Qərargah rəisinin müavini Aleksey Kim tərəfindən verildiyi iddia olunur. “Onlardan təxribatlar üçün, məsələn, Bakı ilə İrəvan arasında sülh danışıqlarını sabotaj etmək və ya Qərbə qaz nəqlinin qarşısını almaqla regionda yeni müharibəyə başlamaq üçün istifadə oluna bilər. Bu təhlükənin qarşısını almaq vaxtıdır. Vardanyana qarşı nəinki sanksiya tətbiq etməyin, həm də onu İnterpol və digər qərb kəşfiyyat orqanları tərəfindən istintaqa cəlb etməyin vaxtı çatıb”, - deyə məşhur Avropa nəşri vurğulayır.

Sabirabad rayonunda özünü zəhərləyən 17 yaşlı qız vəfat edib. Sozcu.az xəbər verir ki, dünən rayon sakini olan 2006-cı il təvəllüdlü Z.Q. yaşadığı evdə həşəratlara qarşı istifadə edilən zəhərli məhlulu içib. Nəticədə qız vəfat edib. İlkin məlumatda hadisənin ailədaxili münaqişə zəminində baş verdiyi bildirilir. Faktla bağlı araşdırma aparılır.qafqazinfo

Sabirabad rayonunda özünü zəhərləyən 17 yaşlı qız vəfat edib. Sozcu.az xəbər verir ki, dünən rayon sakini olan 2006-cı il təvəllüdlü Z.Q. yaşadığı evdə həşəratlara qarşı istifadə edilən zəhərli məhlulu içib. Nəticədə qız vəfat edib. İlkin məlumatda hadisənin ailədaxili münaqişə zəminində baş verdiyi bildirilir. Faktla bağlı araşdırma aparılır.qafqazinfo

Xəzər rayonunda öldürülüb quyuya atılan 4 yaşlı Məryəm Allahyarovaya əzab verməkdə ittiham olunan atası Taleh Allahyarovun cinayət işi üzrə məhkəmə araşdırması tamamlanıb. Sozcu.az “Qafqazinfo”ya istinadən xəbər verir ki, Xəzər Rayon Məhkəməsində keçirilən sonuncu iclasda hökm oxunub. Hökmə əsasən Taleh Allahyarov 3 il 6 ay azadlıqdan məhrum edilib. Məhkəmə araşdırması zamanı məlum olub ki, T.Allahyarov Məryəmi mütəmadi olaraq döyməklə, ona qarşı sair zorakı hərəkətlər edərək, dəfələrlə çimdikləyib, siqareti bədəninin müxtəlif nahiyələrinə basıb, hətta boynuna uzatma kabeli dolayaraq həmin kabeli də tavana bağlayıb boğucu hərəkətlər edib. O, qeyd olunan işgəncələrlə Məryəmə yüngül dərəcəli bədən xəsarəti yetirməklə ona əzab verib. T.Allahyarov məhkəmədə özünü təqsirli bilib, əməlindən peşman olduğunu deyib. O, həyat yoldaşının ondan ayrılmasına görə bu yola əl atdığını bildirib. Hesab edib ki, həyat yoldaşı övladına əzab verdiyini eşidərsə geri qayıdacaq. Qeyd edək ki, ötən il fevralında 4 yaşlı Məryəmi qonşusu 32 yaşlı Mehman Mansurov qətlə yetirib. O, azyaşlını öldürüb quyuya atdıqdan sonra üzərinə torpaq və daş ataraq izi itirməyə çalışıb. Hadisədən sonra azyaşlının atası da həbs olunub. Ona qarşı Cinayət Məcəlləsinin 133.2.4-cü (əzab vermə) və 133.2.6-cı (işgəncə verməklə törədildikdə)maddələri ilə ittiham irəli sürülüb. Bakı Ağır Cinayətlər Məhkəməsinin hökmü ilə Mehman Mansurov 11 il azadlıqdan məhrum edilib.

"Bakı dəyişib gözəlləşib, amma mənfi tərəfləri var. 1990-cı illər çətin idi, zirzəmiləri açdılar, yollar dar oldu. İndi isə yolla gedirsən görürsən ki, dardır. Niyə görə? Çünki əvvəllər zirzəmilərə giriş həyət tərəfdən idi. İndi isə girişi küçə tərəfdən ediblər. Adını da qoyublar obyekt". Sozcu.az xəbər verir ki, bu sözləri Xalq artisti Sərxan Sərxan "Şənbə axşamı" proqramında deyib. Müğənni Bakı küçələrindən gileylənib. O bildirib ki, piyadalar üçün yol yoxdur: "Bu obyektlərə görə isə məcbursan avtomobillərin yoluna çıxmağa. Avtomobil də səni vura bilər. Piyadalar üçün şərait yaradılsa, yaxşı olar. Mənfi tərəflər budur. Əsas məsələ isə qanundur. Qanunlara hamımız gərək tabe olaq. Qanun məni də, səni də qoruyur". Sərxan paytaxtdakı evindən danışıb: "Bakıda üç ən sevdiyim yerlərdən biri doğulduğum "İçərişəhər" metrosunun ətrafıdır. 34 nömrəli məktəbdə təhsil almışam. İki tin yuxarıda yaşayıram, evi oradan aldım. Hiss edirəm ki, doğma yerdəyəm. Məhləyə çıxıram hamını görürəm. Oradan ləzzət alıram. Bizim gözəl bulvarı, parkları və Xəzər dənizini, həmçinin Bakı ətrafını, Mərdəkan, Bigəh və Nardaranı çox sevirəm".

San-Dieqodakı Kaliforniya Universitetinin tədqiqatçıları qocalmanın hüceyrələrə təsir edərək aşkar oluna biləcəyini müəyyən ediblər. Sozcu.az lent.az-a istinadən bildirir ki, tədqiqatçılar deyirlər ki, onların maya hüceyrələrində kəşfi insan qocalmasını necə yavaşlatacağını anlamaq üçün yol aça bilər. "Bu, daha mürəkkəb orqanizmlərin uzunömürlülüyünü effektiv şəkildə təşviq etmək üçün sintetik gen sxemlərinin inkişafı üçün zəmin yarada bilər", - professor Nan Hao deyib. Yeni bir araşdırmada mütəxəssislər qocalmanı hüceyrə səviyyəsində necə yavaşlatmağı tapıblar. Komanda genləri yenidən başlamaq və ya dayandırmaq üçün yenidən birləşdirilə biləcəyini tapıb. Onlar maya hüceyrələrinin degenerasiyasını ləngidən, iki fərqli vəziyyət arasında keçid etmək üçün sxemləri proqramlaşdırıblar. Bu, hüceyrələrin ömrünü əhəmiyyətli dərəcədə artırmağa imkan verib, genetik və kimyəvi müdaxilələr vasitəsilə ömrün uzadılması üzrə yeni rekorda imza atılıb. Hüceyrələr dəyişdirilməyən nəzarət qrupundan orta hesabla 82 faiz daha uzun yaşayıb. "Bu, ilk dəfədir ki, sintetik biologiya və hesablama ilə idarə olunan mühəndislik prinsipləri qocalmanı yenidən proqramlaşdırmaq üçün istifadə olunur", - professor Hao deyib. Daha sonra komanda nəticələrin insan hüceyrələrinə, o cümlədən kök hüceyrələrə və neyronlara necə tətbiq oluna biləcəyini öyrənəcək.

Tədqiqatçılar hansı qan qrupu insanların digərlərindən daha çox yaşadığını müəyyən ediblər.  Sozcu.az lent.az-a istinadən bildirir ki, tədqiqatın nəticələrinə baxmayaraq, həkimlər insanın həyat tərzindən, vərdişlərindən və yaşayış mühitindən çox şeyin asılı olduğunu da xüsusi qeyd ediblər. Bir sıra tədqiqatlar zamanı alimlər müəyyən ediblər ki, I qan qruplarından birinə sahib olan insanlar çox vaxt daha uzun yaşayır və müxtəlif xəstəliklərə qarşı daha davamlı olurlar. Onlar nəinki daha az xəstələnirlər, həm də hər hansı bir xəstəliyə tutulsalar, daha tez sağalırlar. Xüsusilə, alimlər I(0) qrupunun ən güclü hesab edildiyini müəyyən ediblər. Onun nümayəndələrinin ürək-damar xəstəliklərindən, yaddaş xəstəliklərindən, hətta mədə və mədəaltı vəzi xərçənginin müəyyən növlərindən əziyyət çəkmə ehtimalı azdır. Məhz bu müqavimət 1 qan qrupu olan insanların daha uzun yaşamasına imkan verir. Araşdırmalara görə, I qrupda qan laxtalanmasına səbəb olan daha az molekul var. Alimlərin fikrincə, bu, ürək və beyin üçün faydalıdır. Həmçinin, ürək-damar xəstəlikləri çox vaxt ruhi xəstəliklərə gətirib çıxarır. Buna görə də, birinci qrup olan insanlar onlardan daha az əziyyət çəkirlər. Maraqlıdır ki, ikinci qan qrupu olan insanlar viral xəstəliklərə daha az meyllidirlər.

Kriştiano Ronaldo Səudiyyə Ərəbistanında oynamasının Portuqaliya milli komandasındakı mövqeyinə təsir etmədiyini bildirib. Qol.az "O Jogo"ya istinadən xəbər verir ki, “Əl-Nəsr”in hücumçusu deyib: “Mən Səudiyyə Ərəbistanında oynayıram, amma milli komandada da  çıxış edirəm.  Səudiyyə Ərəbistanına getdikdən sonra millidə üç oyun keçirmişəm. Buna görə də bu, mənim millidəki mövqeyimə təsir etmir. Məşqçiyə sual verə bilərsiniz. Səudiyyə Ərəbistanında liqa yaxşıdır. İndi isə transferlər öz sözünü deyir. Mən xoşbəxtəm və ümid edirəm ki, daha çox qol vuracağam”.

Həkim və tibb mütəxəssislərinin əmək fəaliyyətlərinin qiymətləndirilməsi məqsədilə monitorinq komissiyasının yaradılması nəzərdə tutulub. Sozcu.az xəbər verir ki, bunu TƏBİB İdarə Heyətinin sədri Vüqar Qurbanov Bakıda Dünyadakı Azərbaycanlı Təbiblərin Simpoziumun açılış mərasimində deyib. Qurum rəsmisi qeyd edib ki, komissiya tərəfindən həkim mütəxəssislərə 6 ay ərzində monitorinq keçiriləcək: “Monitorinqdən müvəffəqiyyətlə keçən həkimlərə həvəsləndirici əlavələrin ödənilməsi 2024-cü ilədək uzadılacaq. Monitorinqdən keçə bilməyən həkimlərə əlavələrin ödənilməsi dayandırılacaq”. V.Qurbanov vurğulayıb ki, monitorinqlər zamanı həkimlərin peşəkarlığı və şəxsi keyfiyyətləri əsas götürüləcək.

Şuşa ciddi əhəmiyyət kəsb edirdi və Şuşanın müdafiəsinin möhkəmləndirilməsi, təşkili ilə bağlı idi. Sonda lazım olan hər şeyin görüldüyü bildirildi. Sozcu.az xəbər verir ki, bu sözləri Ermənistan Baş naziri Nikol Paşinyan 44 günlük müharibə ilə bağlı parlamentdə çıxışı zamanı deyib. “Həmin hazırlıq işlərindən qısa müddət sonra xəbər gəldi ki, bir qrup azərbaycanlı hərbçi Zarıslı kəndi ərazisində müdafiəmizi yararaq, Laçın-Xankəndi yolunu kəsib. Yəni faktiki olaraq Şuşa yolu bağlandı. Bu xəbəri mənə Qarabağın “prezidenti” çatdırdı, lakin Silahlı Qüvvələrin Baş Qərargahı bu məlumatı təsdiqləmədi. Yeri gəlmişkən, bu, müharibə illərində təxminən on dəfə təkrarlanan vəziyyət idi, Arutyunyan (Qarabağdakı separatçı-terrorçuların lideri – red.) xəbər verəndə baş katib xəbəri təsdiqləmədi, hətta təkzib etdi və bir müddət sonra etiraf etməli oldu ki, Arutyunyan düz deyirdi. Mahiyyət etibarı ilə Şuşanın tənəzzülü də bu andan başladı”, - o bildirib.

Milli Məclisin keçmiş deputatı Akif Şahbazov vəfat edib. Sozcu.az Report-a istinadən xəbər verir ki, o, 65 yaşında Bakı şəhərində dünyasını dəyişib. Mərhum doğulduğu Biləsuvar rayonunun Yuxarı Cürəli kəndində yerləşən qəbiristanlıqda dəfn edilib. Qeyd edək ki, Akif Rəhim oğlu Şahbazov 15 dekabr 1957-ci ildə anadan olub. O, 1995-2000-ci illərdə Milli Məclisin deputatı olub.