Avqustun 13-də Ukrayna qoşunları cəbhənin ən azı iki sektorunda əks-hücum əməliyyatları keçirib və Zaporojye və Donetsk vilayətləri istiqamətlərində irəliləyiblər. Sozcu.az xəbər verir ki, bu barədə ABŞ-ın Müharibənin Öyrənilməsi İnstitutu məlumat yayıb. İnstitut Ukrayna Baş Qərargahına istinadla məlumat yayıb ki, Ukrayna ordusu berdyansk və Melitopol istiqamətlərində əməliyyatlar keçirib və Robotino da müəyyən uğur qazanıblar.

Azərbaycan Respublikasının Xarici İşlər Nazirliyi bəyanat yayıb. Sozcu.az bəyanatın mətnini təqdim edir: "Bu gün, Azərbaycan və Ermənistan arasında davamlı sülhün bərqərar edilməsi istiqamətində göstərilən səylər Ermənistanın məqsədyönlü gərginlik və revanşizm siyasətinin qurbanına çevrilib və ciddi çağırışlarla üzləşir. 2022-ci ilin dekabrında ilk uğursuzluğuna baxmayaraq, Ermənistan yenidən BMT Təhlükəsizlik Şurasını siyasi, hərbi və informasiya yönümlü manipulyasiya kampaniyası üçün alətə çevirməyə cəhd göstərir. Bununla yanaşı, Ermənistan 30 ilə yaxın müddət ərzində BMT Təhlükəsizlik Şurasının 1993-cü ildə qəbul olunmuş dörd qətnaməsinin və Təhlükəsizlik Şurası sədrinin işğalçı qüvvələrin Azərbaycan ərazisindən tam, dərhal və qeyd-şərtsiz çıxarılmasını tələb edən bir sıra bəyanatlarına məhəl qoymayan bir ölkədir. Ermənistanın bölgədə "humanitar vəziyyətin pisləşməsi" və "davam edən blokada" ilə bağlı əsassız iddialarla əlaqədar BMT Təhlükəsizlik Şurasına müraciəti növbəti dəfə beynəlxalq tərəfdaşlar vasitəsilə balanslı, beynəlxalq hüquqa əsaslanan və məqbul həll yolu tapmağa yönəlmiş səylərə Ermənistanın qəsdən və məqsədyönlü şəkildə mane olduğu bir zamanda baş verir. Məlum olduğu kimi, son üç il ərzində Ermənistanın Laçın yolundan geniş miqyasda sui-istifadə etməsi halları Azərbaycanın öz sərhədində təhlükəsizlik və asayişi təmin etmək məqsədilə sərhəd nəzarət-buraxılış məntəqəsinin təsis olunması üçün legitim və hüquqi tədbirlər görməsini zəruri edib. Ermənistanın bu səyləri "blokada" kimi təqdim etməyə çalışmasına, nəzarət-buraxılış məntəqəsinin aradan qaldırılması barədə qərar qəbul etmək üçün Beynəlxalq Ədalət Məhkəməsinə müraciət etməsinə baxmayaraq, məhkəmə 6 iyul tarixli qərarında bu tələbi yekdilliklə rədd edib. Ermənistan Azərbaycan ərazisindən tam çıxarılmamış silahlı qüvvələrin ehtiyaclarını təmin və təchiz etməkdən, habelə Azərbaycanın təbii sərvətlərini qanunsuz olaraq istismar etməkdən məhrum olması reallığı ilə barışmayıb. Bu səbəbdən, Ermənistan bütün dünyada təbliğat kampaniyasına başlayıb, sərhəd-buraxılış məntəqəsinin normal fəaliyyəti, eləcə də Azərbaycanın Qarabağ bölgəsinə yüklərin çatdırılması üçün “Ağdam-Xankəndi” yolu kimi digər marşrutlardan istifadə edilməsinə qarşı bir sıra hərbi və digər maneələr törədib. Bu yaxınlarda, bir sıra intensiv məsləhətləşmələr və “məkik diplomatiyası” səylərindən sonra nəhayət Qarabağ bölgəsinə humanitar yüklərin müxtəlif marşrutlarla çatdırılması, həmçinin Azərbaycanın xüsusi nümayəndəsi ilə yerli erməni sakinlərinin nümayəndələri arasında görüşün təşkili ilə bağlı razılıq əldə edilmişdi. Birinci məsələ üzrə, yerli sakinlərin ehtiyaclarını ödəmək məqsədilə, Beynəlxalq Qızıl Xaç Komitəsi (BQXK) vasitəsilə humanitar yüklərin çatdırılmasına şərait yaratmaq üçün Ermənistan tərəfindən Ağdam-Xankəndi yolundan istifadənin qarşısının alınması məqsədilə qoyulmuş beton və bütün digər fiziki maneələr aradan qaldırılmalı idi. Bunun ardınca, 24 saat ərzində BQXK-nın Laçın yolundan istifadəsinin intensivləşməsi baş tutmalı idi. Rusiya sülhməramlı kontingenti və BQXK daxil olmaqla bütün tərəflər bu razılaşmanı praktiki olaraq həyata keçirməyə hazır idilər. İkinci məsələ üzrə isə, Yevlaxda Azərbaycanın xüsusi nümayəndəsi və yerli erməni sakinlərinin nümayəndələri arasında görüşün keçirilməsi barədə razılıq əldə olunmuşdu. Lakin, 5 avqust 2023-cü ildə Ermənistan öz qondarma rejimi vasitəsilə siyasi motivli, qeyri-qanuni şərtlər və müxtəlif bəhanələr irəli sürməklə əldə olunmuş hər iki razılıqdan son anda boyun qaçırdı. Başqa sözlə, Ermənistanın bütövlükdə beynəlxalq ictimaiyyət və xüsusilə BMT Təhlükəsizlik Şurasından tələb etdiklərinə, bir neçə gün əvvəl tərəfdaşların, o cümlədən Təhlükəsizlik Şurasının üzvlərinin dəstəyi nəticəsində həqiqətən nail olmaq mümkün idi. Bu, yalnız Ermənistanın özünün imtina etməsi səbəbindən baş vermədi. Əgər Ermənistan və onun tabeliyindəki qondarma “qurum” razılaşmaya əməl etsəydi, məsələ avqustun əvvəlində, Qarabağ bölgəsinin sakinlərinə humanitar yüklərin çatdırılması, habelə insanların, malların və nəqliyyat vasitələrinin keçməsi üçün marşrutların asanlaşdırılması ilə bağlı məqbul çərçivənin təmin edilməsi ilə həll olunardı. Bu səbəbdən, Azərbaycanın Rusiya Federasiyası, ABŞ, Avropa İttifaqı və BQXK ilə bu vəziyyətdən çıxış yolları axtarmaq üçün apardığı intensiv qarşılıqlı fəaliyyətinə baxmayaraq, Ermənistan bu diplomatik səylərə qəsdən mane olması heç bir şübhə doğurmamalıdır. Ermənistanın BMT Təhlükəsizlik Şurasına müraciəti bu kampaniyanın bir hissəsidir və bu baxımdan, iştirak edən tərəflərin, o cümlədən Təhlükəsizlik Şurasının üzvlərinin səylərinə ciddi zərbə vurur. Bu gedişatla yanaşı, son həftələrdə, beynəlxalq hüququn, habelə Ermənistanın Azərbaycan, Rusiya və Ermənistan liderlərinin 10 noyabr 2020-ci il tarixli Üçtərəfli Bəyanatının 4-cü bəndində təsbit olunmuş öhdəliklərinin ciddi pozuntusu olan, Azərbaycan ərazisində qanunsuz yerləşdirilən Ermənistan silahlı qüvvələri hərbi-mühəndislik işlərini və digər hərbi quruculuq fəaliyyətini intensivləşdirib. Azərbaycanın suveren ərazilərində qanunsuz yerləşdirilmiş radioelektron mübarizə vasitələrinin istifadəsi xüsusi narahatlıq doğurur. Son həftələrdə "Azərbaycan Hava Yolları"nın mülki təyyarələri ilə yanaşı, xarici ölkələrin təyyarələri də onların təhlükəsizliyi üçün ciddi təhlükə yaradan radioelektron müdaxilələrə məruz qalıb. Rusiya sülhməramlı kontingentinin müvəqqəti yerləşdiyi Azərbaycanın suveren ərazilərində hərbi quruculuq işləri və fəaliyyətin qeyri-qanuni şəkildə artırılması ilə paralel olaraq, son günlərdə Ermənistan tərəfindən delimitasiya olunmamış dövlət sərhədi boyunca növbəti hərbi avantüra məqsədli irimiqyaslı silah, digər hərbi texnika və şəxsi heyətin toplanması da müşahidə olunub. Yuxarıda qeyd olunanlar, 30 ilə yaxın müddət ərzində, 2020-ci ilin sentyabrınadək Ermənistana xas olan, danışıqların imitasiyası, son dəqiqələrdə əvvəlki öhdəliklərdən yayınmaq və konkret qərarlar qəbul etməkdən boyun qaçırmaq üçün danışıqların hər mərhələsində siyasi, hərbi və digər təxribatlar törətməyi ehtiva edən təcrübəni xatırladır. Eyni zamanda, Ermənistanın bu cür hərəkətləri onu göstərir ki, Ermənistan Azərbaycana qarşı ərazi iddialarına son qoymayıb və onun Azərbaycanın ərazi bütövlüyünü şifahi olaraq tanıması onun yerdəki əməllərindən fərqlənir. 2020-ci ildə baş vermiş müharibədən sonra Azərbaycan Ermənistana iki ölkə tərəfindən bir-birinin suverenliyinin, ərazi bütövlüyünün və sərhədlərinin toxunulmazlığının qarşılıqlı tanınması və hörmət edilməsi əsasında hər iki tərəfin legitim maraqlarına bərabər və qarşılıqlı hörmətə əsaslanan sülh təklif edib. Digər istiqamətdə isə, Azərbaycan Qarabağ bölgəsində yaşayan erməni əsilli sakinlərin Azərbaycan Konstitusiyasında və Azərbaycanın iştirak etdiyi bütün müvafiq beynəlxalq insan hüquqları mexanizmlərində nəzərdə tutulmuş hüquq və azadlıqlarını təmin etməklə bərabərhüquqlu vətəndaşlar kimi reinteqrasiya siyasətini aparır. Eyni zamanda, Azərbaycan bütün bu istiqamətlərə sadiqliyini nümayiş etdirməklə, öz suverenliyini və ərazi bütövlüyünü BMT Nizamnaməsi və beynəlxalq hüququn digər universal sənədləri ilə təmin edilmiş bütün qanuni vasitələrlə müdafiə etmək hüququnu da özündə saxlayır. Bu kritik mərhələdə, Ermənistan və Azərbaycan arasında dövlətlərarası münasibətlərin normallaşması və yerli erməni əsilli sakinlərin Azərbaycanın siyasi, hüquqi və sosial-iqtisadi çərçivəsinə reinteqrasiyası prosesinin qarşısında duran çətinlikləri aradan qaldırmaq üçün mövcud risklərin aydın şəkildə dərk edilməsi və beynəlxalq ictimaiyyətin Ermənistanın təxribatlarına adekvat reaksiyası həmişəkindən daha önəmlidir. Bölgədə davamlı sülhün bərqərar olması üçün yaranmış tarixi imkanın əldən verilməməsini təmin etmək vacibdir".

Rus rublu bu gün dollara nisbətdə rekord həddə ucuzlaşıb. Sozcu.az xəbər verir ki, hazırda Moskva birjasında 1 dollar 100 rublu ötüb. Bu, 2022-ci ilin 23 martından bəri ən yüksək həddir. Avro da 74 qəpik bahalaşaraq 109.52 rubl olub.

Balakəndə usta təmir işləri aparan zaman yıxılaraq ölüb. Sozcu.az xəbər verir ki, hadisə avqustun 13-də Balakən şəhər ərazisində qeydə alınıb. Belə ki, Ağdam rayon sakini, 1980-ci il təvəllüdlü Teymur Quliyev binada təmir işləri aparan zaman ehtiyatsızlıqdan yıxılıb. Usta baş nahiyəsindən aldığı xəsarətlər nəticəsində hadisə yerində ölüb. Faktla bağlı Balakən Rayon Prokurorluğunda araşdırma aparılır.

Ukrayna müharibənin 537-ci günü üçün Rusiya ordusunun itkiləri haqda məlumatı yeniləyib. Sozcu.az xəbər verir ki, bu barədə Ukrayna Baş Qərargahı məlumat yayıb. Məlumata əsasən, Rusiya indiyə qədər 254 380 hərbçi, 4306 ədəd tank, 8354 ədəd zirehli döyüş maşını, 5099 ədəd artilleriya sistemi, 714 ədəd RYAS (reaktiv yaylım atəş sistemi), 479 hava hücumundan müdafiə sistemi, 315 ədəd hərbi təyyarə, 313 ədəd helikopter, 7562 ədəd avtomobil texnikası, 4213 ədəd PUA, 1378 qanadlı raket, 18 gəmi/qayıq, 766 xüsusi avadanlıq itirib.

Tovuzda xəstəxanada 4 günlük körpə ölüb. Sozcu.az Report-a istinadən xəbər verir ki, Ağstafa rayon sakini, 2000-ci il təvəllüdlü Pərvanə Qasımova avqustun 9-da Tovuz Rayon Mərkəzi Xəstəxanasında təbii üsulla uşaq dünyaya gətirib. Lakin yeni doğulmuş körpə avqustun 13-də həmin xəstəxanada dünyasını dəyişib. Onun yaxınları iddia edir ki, körpə həkim səhlənkarlığı nəticəsində ölüb. Faktla bağlı Tovuz Rayon prokurorluğunda araşdırma aparılır.

Hacıqabulda kütləvi zəhərlənmə baş verib. Sozcu.az Report-a istinadən xəbər verir ki, hadisə ötən axşam rayonun istirahət mərkəzlərindən birində qeydə alınıb. Belə ki, rayonda istirahət mərkəzlərinin birindən paytaxta qayıdan zaman Bakı şəhər sakinləri, 2010-cu il təvəllüdlü Soltanəli Rövşən oğlu Məmmədli, 1987-ci il təvəllüdlü Fidan Rauf qızı Adıgözəlova, 1952-ci il təvəllüdlü Sidiqə Məmməd qızı Soltanova, 1994-cü il təvəllüdlü Pikəxanım Hafiz qızı Süleymanova, Nuranə Hüseyn qızı Süleymanova, 1973-cü il təvəllüdlü Afaq Soltanəli qızı Əliyeva, 2017-ci il təvəllüdlü Məhəmməd İlkin oğlu Süleymanovun halı pisləşib. Həmin şəxslər dərhal Şirvan Şəhər Mərkəzi Xəstəxanasına çatdırılıb. Faktla bağlı araşdırma aparılır.

Ukrayna rusların heç bir cinayətini cavabsız qoymayacaq və Krım körpüsündə baş verən “tüstülənmə” bunun sübutlarından biridir. Sozcu.az xəbər verir ki, bu barədə Ukrayna lideri Vladimir Zelenski deyib. "Hər yerdə əsgərlərimiz işğalçıların terroruna cavab verir. Elə bir gün yoxdur ki, rus şəri bizim tam ədalətli cavabımızı almasın”, - deyə Zelenski bildirib. Qeyd edək ki, Krım körpüsündə ardıcıl partlayışlar baş verib.

Ukrayna Rusiya ilə müharibədə qalib gəlir, lakin müharibə Yeni il bayramına qədər bitməyəcək. Sozcu.az xəbər verir ki, bu barədə Britaniyanın “Tayms” qəzeti məlumat yayıb. “Hazırda uzanan əks-hücumda möcüzə olacağına ümid edirdilər. NATO möcüzələr gözləyirdi və ukraynalılar onlara bunu vəd etdilər. Ancaq optimizm əsasında müharibə apara bilməzsiniz. Əks-hücum zamanı üzə çıxan problemlər Ukrayna ilə müttəfiqlər arasında gərginliyə səbəb olub. Qarşılıqlı ittihamlar səsləndirməyə başladılar. Müharibə isə uzanır. İndi Ukraynaya dəstək üçün uzunmüddətli planlar hazırlamaq lazımdır. Bu, bəlkə də nəhayət, hansısa sülhün mümkünlüyünü nəzərdən keçirmək üçün şərait yaradacaq”, - nəşrin analizində bildirilib.

Avqustun 13-də saat 16:20-də Ermənistan silahlı qüvvələrinin bölmələri Basarkeçər rayonunun Yuxarı Şorca yaşayış məntəqəsi istiqamətində yerləşən mövqelərindən Azərbaycan Ordusunun Kəlbəcər rayonunun Mollabayramlı yaşayış məntəqəsi istiqamətində yerləşən mövqelərini atıcı silahlardan atəşə tutub. Bu barədə Sozcu.az-a Azərbaycan Müdafiə Nazirliyindən bildirilib. "Bölmələrimiz tərəfindən qeyd olunan istiqamətlərdə adekvat cavab tədbirləri görülüb", - Nazirlikdən qeyd edilib.

Müstəqil Həmkarlar Birliyinin rəhbərliyi Ağsu rayon təşkilatın təsis iclasında iştrak edib. Toplantıda çıxış edən MHB sədri Fuad Əliyev və sədr müavini Xəzər Teyyublu  Müstəqil  Həmkarlar Birliyinin Nizamnaməsi və fəaliyyət istiqamətləri haqda məlumat veriblər. Toplantıda MHB sədri Fuad Əliyev Ağsu rayon təşkilatının üzvlərinə üzvlük vəsiqələri təqdim edib.

Rusiya işğalçıları arasında panika artır və fərarilərin sayı çoxalır.  Sozcu.az “UNİAN”-a istinadla xəbər verir kiŞ Ukrayna Ordusu Baş Qərargahının səhər xülasəsində bildirildiyinə görə, müvəqqəti işğal altında olan Xerson vilayətinin Qornostayevka kəndində ruslar özləri üçün hərbi patrul xidməti tətbiq ediblər. Patrulçular və komendaturanın hərbi qulluqçuları öz əsgərləri arasında fərarilər tapmaq üçün hər evi gəzirlər. Mütəmadi içib sərxoş olan və narkotik istifadə edən işğalçıların sayında da xeyli artım var. Qeyd olunur ki, komandanlıq belə hərəkətlərə ona görə əl atır ki, Rusiya Federasiyasının qəsəbəyə və onun yaxınlığına yeni gəlmiş hərbi qulluqçuları arasında təkcə fərarilərin deyil, həm də hərbi xidmət zamanı spirtli içkilər və narkotiklərdən istifadə edənlərin sayı da xeyli artıb. İşğalçılar xidmət yerlərindən qaçaraq tərk edilmiş binalarda gizlənməyə çalışırlar”, - deyə idarədən bildirilib. “UNİAN”-ın daha əvvəl xəbər verdiyi kimi, iyunun əvvəlində 90-a yaxın rus əsgəri Luqansk vilayətinin Arapovka rayonundan qaçıb. Bu yaxınlarda isə Zaporojye vilayətində Xəzər flotiliyasından olan 50-yə yaxın etnik dağıstanlı silahları sıradan çıxararaq döyüşməkdən imtina ediblər.

Ukrayna müharibənin 536-cı günü üçün Rusiya ordusunun itkiləri haqda məlumatı yeniləyib. Sozcu.az xəbər verir ki, bu barədə Ukrayna Baş Qərargahı məlumat yayıb. Məlumata əsasən, Rusiya indiyə qədər 253 850 hərbçi, 4298 ədəd tank, 8335 ədəd zirehli döyüş maşını, 5072 ədəd artilleriya sistemi, 713 ədəd RYAS (reaktiv yaylım atəş sistemi), 475 hava hücumundan müdafiə sistemi, 315 ədəd hərbi təyyarə, 313 ədəd helikopter, 7543 ədəd avtomobil texnikası, 4204 ədəd PUA, 1378 qanadlı raket, 18 gəmi/qayıq, 760 xüsusi avadanlıq itirib.

Ukrayna taxıl ixracını təmin etmək üçün dəniz limanlarının inteqrasiyası üzərində fəal işləyir. Bununla belə, Rusiya tərəfindən təcavüz olarsa, Qara dəniz donanması və digər donanmaların müəyyən komponentləri məhv ediləcək. Sozcu.az xəbər verir ki, bunu Ukrayna Prezidenti Ofisi rəhbərinin müşaviri Mixailo Podolyak bildirib. Onun sözlərinə görə, Rusiya Qara dənizdəki gəmiləri taxıl dəhlizinə görə təhdid edərsə, bədəlini Qara dəniz donanması ilə ödəyəcək: "Rusiya başa düşməyə başlayır ki, Qara dəniz akvatoriyası daxili yurisdiksiya dənizi deyil. Və bu çox ağrılı olacaq. Ukrayna prezidenti çox açıq şəkildə dedi: əgər zərbələr endirsəniz, onda donanmanı məhv edəcəyik və müharibənin sonuna qədər Sakit okean, Şimal və Baltik donanmalarının elementləri ilə birgə Qara dəniz donanmanız olmayacaq".

Ukrayna ordusu Tavriya istiqamətində müəyyən əraziləri azad edib. Sozcu.az xəbər verir ki, bu barədə Tavriya əməliyyat-strateji qoşun qruplaşmasının komandiri Aleksandr Tarnavski Teleqramda məlumat yayıb. "Tavriya istiqamətində geri alınmış ərazilər var. Müdafiə qüvvələri işləyir”, - məlumatda qeyd edilib.

Krım körpüsü yaxınlığında baş verən partlayışlar göstərir ki, Rusiya müvəqqəti işğal olunmuş ərazilərə tam nəzarət etmək iqtidarında deyil. Sonda bu iyrənc obyekt tamamilə məhv olacaq. Sozcu.az xəbər verir ki, bu barədə ukraynalı politoloq Nikolay Davidyuk bildirib. O vurğulayıb ki, Rusiyada polis artıq pilotsuz təyyarələrə qarşı silahlarla gəzir. “Bu onu göstərir ki, onların hətta öz torpaqlarında da hərc-mərclik hökm sürür”. Davidyuk qeyd edib ki, gec-tez Krım körpüsü tamamilə dağılacaq. Ukrayna ordusu tədricən bu məqsədə doğru irəliləyir.

Rusiya ordusu işğal altında olan Krım yarımadasına pilotsuz uçuş aparatları (PUA) ilə hücum edildiyini bildirib. Sozcu.az xəbər verir ki, bu barədə Rusiya Müdafiə Nazirliyi məlumat yayıb. Bildirilir ki, Krım yarımadasına hücum edən 20 PUA zərərsizləşdirilib. Rusiya hücuma görə Ukraynanı ittiham edib. Rəsmi Kiyev hücum barədə heç bir açıqlama verməyib. Nazirlik "Telegram" mesajlaşma proqramında yazıb ki, hücum cəhdi nəticəsində heç bir itki və dağıntı yoxdur. Bildirilib ki, 14 dron hava hücumundan müdafiə sistemləri tərəfindən məhv edilib, altısı isə radioelektron mübarizə vasitələri ilə sıradan çıxarılıb. Krımın Rusiya tərəfindən təyin edilən "qubernatorunun müşaviri" Sergey Kryuçkov bir müddət əvvəl hava hücumundan müdafiə sistemlərinin işə düşdüyünü açıqlayıb. Yarımadanı Rusiyanın Krasnodar bölgəsi ilə birləşdirən Krım körpüsündə hərəkət təxminən iki saat dayandırılıb.

Azərbaycanın Qarabağ bölgəsində Rusiya sülhməramlı kontingentinin “çətiri” altında olan erməni quldur dəstələrinin qanunsuz fəaliyyəti davam edir. Sozcu.az xəbər verir ki, bu barədə “Calibr” videogörüntülər yayıb. Videodan avqustun 11-də Xankəndi-Kərkicahan-Xəlfəli yolunda Rusiya sülhməramlılarının zirehli transportyorunun müşayiəti ilə erməni quldur dəstələrinin döyüş postlarına dəstək vasitələrinin ötürüldüyü görünür.

Qabil Hüseynli: “Bu, suverenliyimizin de-fakto təmini baxımından da vacibdir” Ermənistandan Xankəndinə silah-sursat daşnması prosesi davam edir. Digər tərəfdən, ordumuzun Ağdam və Kəlbəcərdəki mövqeləri yenə atəşə tutulub ki, bu da düşmənin öz təxribatlarından əl çəkmək istəmədiyini göstərir. Moderator.az-a açıqlama verən politoloq Qabil Hüseynli separatçılara qarşı yeni bir anti-terror əməliyyatının tətbiqinə ehtiyac olduğunu vurğulayıb: “Xankəndinə silah-sursat daşınması, habelə orumuzun mövqelərinin atəşə tutulması fonunda separatçılara qarşı lokal xarakterli hərbi əməliyaytların keçirilməsi vacib görünür. Bu, suverenliyimizin de-fakto təmini baxımından da vacibdir. Çünki proseslər göstərir ki, separatçılar öz təxribatçı əməlləri ilə bizə “əlcək atır”, öz təxribatalrından əl çəkmək istəmirlər. Bu səbəbdən də məlum problemi birdəfəlik ortadan qaldırmaq, təcribatların qarşısını qəti şəkildə almaq üçün belə bir əməliyyatın həyata keçirilməsinə ehtiyac var. Yəqin ki, bu variant da digər variantlarla birlikdə siyasi rəhbərliyin diqqət mərkəzindədir”.

“Və məhz bu səbəbdən Dövlət Departamenti rəsmisi məhz Rusiyaya da bu mesajı sərt şəkildə verir ki, sizin istəyinizdən asılı olmayaraq biz tərəflərlə işləyirik və buna nail olacağıq...” Məlum olduğu kimi, ABŞ Dövlət Departamentinin sözçüsü Metyu Miller Rusiya Xarici İşlər Nazirliyinin Azərbaycanla Ermənistan arasında tələsik hazırlanmış sülh sazişinin regiona davamlı sülh gətirməyəcəyi və hətta yeni münaqişələr üçün zəmin yarada biləcəyi” barədə son bəyanatını şərh edərkən “Söhbət Azərbaycan və Ermənistan haqqında gedirsə, Rusiyadan danışmaq istəməzdim... Biz inanırıq ki, savaşda tərəf olmayan digər ölkələrin hər hansı şərhindən asılı olmayaraq, razılaşma əldə edilə bilər və biz buna nail olmaq üçün onlarla işləməyə davam edəcəyik” söyləməsi Ağ Evin artıq əvvəlki dövrlərdən fərqli olaraq iki ölkə arasında sülh sazişinin imzalanması və Qarabağ məsələsinin yekun həllinə əsl mənada qətiyyətlə çalışdığını göstərirmi?.. Siyasi təhlükəsizlik məsələləri üzrə ekspert Ərəstun Oruclu Moderator.az-a açıqlamasında mövzu ilə bağlı bunları söyləyib: “Metyu Müllerin bəyanatı, şübhəsiz ki, Rusiya Xarici işlər Nazirliyinin verdiyi açıqlamaya cavab idi. Ona görə ki, bu açıqlama hansısa bir adi şəxsin adından verilmir. Şübhəsiz ki, o, rəsmi şəxsdir MDB üzrə departament rəhbəridir. Və əlbəttə ki, bu, Rusiya Xarici İşlər Nazirliyinin rəsmi mövqeyidir. Və bu barədə  mənim mətbuatda da açıqlamalarım olub, “Facebook” səhifəmdə də yazmışam. Amma şəxsən mən ABŞ tərəfindən belə qəti və birmənalı mövqenin, cavab mövqeyinin ortaya qoyulacağını gözləmirdim. Hər bir halda Millerin bəyanatı göstərdi ki, Birləşmiş Ştatlar bölgədəki mövqelər və proseslərlə bağlı və özünün bölgəyə yönəlik siyasəti ilə bağlı Rusiyanın varlığını nəinki nəzərə almır, hətta onun istəklərini belə, onun prosesə qoşulmaq şansını belə, qəbul etmir”. “ABŞ sülh istəyirmi? Əlbəttə ki, istəyir. Vaşinqton sülhü ona görə istəyir ki, bu onun bölgədəki mövqelərini möhkəmlətmiş olacaq və sülh imzalayan tərəflərin ABŞ-ın tərəfdaşına çevrilməsini təmin edəcək. Və bu həm də Birləşmiş Ştatların Avropa Birliyi ilə iş birliyində olaraq Azərbaycan-Ermənistan sülh müqaviləsinin təmin olunmasına çalışdığının özəl bir göstəricisidir. Düşünürəm ki, Qərb, kollektiv Qərb, konkret halda istər ABŞ olsun, istər Avropa Birliyi Azərbaycan-Ermənistan sülh müqaviləsinin imzalanmasında maraqlıdır. Və məhz bu səbəbdən Dövlət Departamenti rəsmisi məhz Rusiyaya da bu mesajı sərt şəkildə verir ki, sizin istəyinizdən asılı olmayaraq biz tərəflərlə işləyirik və buna nail olacağıq”- deyə analitik vurğulayıb.

Ukrayna müharibənin 535-ci günü üçün Rusiya ordusunun itkiləri haqda məlumatı yeniləyib. Sozcu.az xəbər verir ki, bu barədə Ukrayna Baş Qərargahı məlumat yayıb. Məlumata əsasən, Rusiya indiyə qədər 253 290 hərbçi, 4295 ədəd tank, 8324 ədəd zirehli döyüş maşını, 5053 ədəd artilleriya sistemi, 713 ədəd RYAS (reaktiv yaylım atəş sistemi), 472 hava hücumundan müdafiə sistemi, 315 ədəd hərbi təyyarə, 313 ədəd helikopter, 7523 ədəd avtomobil texnikası, 4201 ədəd PUA, 1378 qanadlı raket, 18 gəmi/qayıq, 759 xüsusi avadanlıq itirib.

Azərbaycanın Milli Qəhrəmanı Şükür Həmidovun atası vəfat edib. Bu barədə mərhumun yaxınları sosial şəbəkədə məlumat paylaşıb. Nəriman Həmidov bu gün 91 yaşında dünyasını dəyişib. Qeyd edək ki, mərhumun yas mərasimi avqustun 15-də Sumqayıtda keçiriləcək.

“Moskva sakinləri dron hücumlarına hələ çox şahidlik edəcəklər. Çünki Rusiya paytaxtının hava hücumundan müdafiəsi sistemləri effektiv işləyə bilmir”. Bunu Ukrayna Müdafiə Nazirliyinin Baş Kəşfiyyat İdarəsinin nümayəndəsi Andrey Yusov “Kiyev Post”a müsahibəsində deyib. O, Moskva əhalisinin artıq təhlükəsiz olmadığını söyləyib: “Bu anlayış onlardan uzaqdır. Bütün dünya Rusiyanın müdafiə sisteminin müasir çağırışlara cavab vermədiyini görür. Halbuki Rusiya silah bazarında lider olduğunu iddia edir”. A.Yusovun sözlərinə görə, bu tendensiya nəticəsində Rusiya əhalisi Kremlin təbliğatına inanmağa davam etməyə bilər. O əlavə edib ki, Rusiya şəhərlərinə gündəlik hücumların sayı arta bilər: “Rusiyanın Ukraynaya qarşı müharibəsi nəticəsində təyyarələr və hava limanlarımız işləmir və ya dağıdılır. Bu gün qarşı tərəf də oxşar hadisələri yaşayır”. Qeyd edək ki, bundan əvvəl Ukrayna Prezident Ofisinin müşaviri Mixaylo Podolyak Rusiyada partlayışların daha tez-tez olacağı barədə xəbərdarlıq edib. Xatırladaq ki, son vaxtlar Rusiyanın müxtəlif şəhərlərində, o cümlədən paytaxt Moskvada yanğın və partlayışlar baş verir.

“Mən şəhərin mərkəzində doğulub böyümüşəm və Bülbül adına məktəbdə oxumuşam. O məktəbdə oxuyanda Bakının köklü “Sovetski”, “Dağlı”, İçərişəhər məhəllərindən olanların heç biri rus dili bilmirdi. Əksinə, orada yaşayan rusların özləri Bakı ləhcəsi ilə tər-təmiz Azərbaycan dilində danışırdılar. Özləri rusca danışanda elə bilirdik ki, azərbaycanlı danışır”. Bu sözləri Yenisabah.az-a açıqlamasında tanınmış şoumen Kamran Həsənli deyib. Müsahibimiz bir sıra məşhurların sosial şəbəkə hesablarında rusdilli paylaşımlar etməsinin sosial şəbəkə istifadəçiləri tərəfindən tənqid atəşinə tutulmasının səbəblərini izah edib. Xatırladaq ki, tanınmış KVN aktyoru, Əməkdar artist Bəhram Bağırzadə rusdilli paylaşım edən sənətçilər sırasında ilk yerdədir. K. Həsənliyə görə isə əsasən, bölgələrdən gələnlər daha çox rus dilinə meylli idilər və bununla şəhərə mənsubiyyətini göstərirdilər: “İndi rusca danışanlar isə başqadır. Doğrudur, dil bilmək, rus dili bilmək yaxşıdır, ingilis dilini bilmək daha gözəldir, eləcə də digər dilləri bilmək əladır. Amma öz dilini qoyub başqa dildə danışmaq mənə görə, sadəcə öz millətini, irqini və valideynlərini aşağılamaq deməkdir. Bu gün rusca danışanların çoxu Ana dilində danışanlara üstdən aşağı baxmağa çalışırlar. Ona görə də elə adamların adını mən “taxtabaş” qoymuşam”. “O ki qaldı məşhurların rusca danışmasına, mən nə Bəhram Bağırzadənin, nə də digərlərinin videolarını izləməmişəm. Bu gün Bakıda əyri bir stereotip var. Hətta mən rusdilli verilişlərdə də olmuşam, çıxışlar etmişəm. Bir şeyin şahidi olmuşam ki, bu tip adamların düşüncəsinə görə, əgər şəhər internasionaldırsa, deməli, orada ünsiyyət dili rus dili olmalıdır. Bunlar başa düşmürlər ki, sən işğalçıya baş əyib nökərlik edirsən” – o, əlavə edib. “Məsələn, London dünyanın ən çoxmillətli şəhərlərindən biridir, amma hər kəs ingiliscə danışır. Yaxud Moskva da eynilə çoxmillətli şəhərdir, amma orada bir özbək, yaxud tacik öz dilində danışa bilməz. Çünki sənə “çerno natsiya” deyə bilərlər, ona görə də rusca danışmalısan. Bakı da Azərbaycanın paytaxtıdır. Şəhərimiz nə qədər beynəlmiləl olsa yaxşıdır, amma nə olursa olsun, Azərbaycan dilində danışmalısan. Bütün millətlər burada dilimizdə danışmağa məcburdurlar, nəinki rusca. Ona görə də mən belə adamlara “taxtabaş” deyirəm”, – K. Həsənli fikirlərini tamamalayıb.