Ukrayna Müdafiə Nazirliyinin Baş Kəşfiyyat İdarəsi Rusiyanın məhv edilməsi planlaşdırılan strateji obyektlərinin siyahısını müəyyən edib. Sozcu.az xəbər verir ki, bunu Ukrayna Müdafiə Nazirliyinin Baş Kəşfiyyat İdarəsinin nümayəndəsi, general-mayor Vadim Skibitski deyib. “Biz Rusiya üçün daha kritik hədəfləri və obyektləri müəyyən edirik. Buraya hərbi obyektlər, raket hazırlanan müdafiə sənayesi kompleksləri, PUA-lar, Rusiya qoşunlarının maddi-texniki təchizatı ilə məşğul obyektlər daxildir. Hədəflərimiz çoxdur. Onların hamısı nömrələnib, iyerarxiyada müəyyən edilib”, - deyə o bildirib.

Türkiyə-Ermənistan matçı öncəsi Türk polisi Azərbaycan bayrağına nümunəvi davranışı ilə diqqət çəkib. Sozcu.az xəbər verir ki, təhlükəsizlik yoxlanışı zamanı Türk polisi Azərbaycan bayrağını öpərək alnına qoyub.

“...Rusiya Ukrayna bataqlığından çıxa bilməyəcək və  bu səbəbdən özünə yeni havadar axtarır...” “Son illərdə Rusiyanın başçılıq etdiyi KTMT kimi hərbi təşkilatdan Ermənistanın çıxma kimi bəyanatları ciddiyə alınmamışdı, hətta Paşinyan “biz deyil, KTMT bizdən çıxır” kimi bəyanlarda bulunmuşdu. Ermənistandakı bəzi siyasi qüvvələr ölkənin Rusiyadan imtina edib NATO blokuna meyillənməsini ölkənin əsas prioriteti hesab etmiş və hakimiyyəti Amerikaya daha çox yaxınlaşdırmaq üçün çalışmışdılar. Amerikanın Rusiya ilə bağlı apardığı siyasətindən ermənilər ustalıqla yararlanmış, ABŞ- NATO genişləndirilməsi proqramına bu şəkildə dəstək vermək istəmişlər.” Bu fikri Moderator.az-a açıqlamasında ermənişünas alim Qafar Çaxmaqlı ifadə edib. “Ermənistanda son illərdə Rusiya əleyhinə aparılan siyasətin nəticəsi kimi Ermənistan -ABŞ ortaq hərbi təlimini göstərmək olar. Bu, onu göstərir ki, Ermənistan hakimiyyəti artıq Rusiyadan qorxmur, çünki hesab edir ki, Rusiya Ukrayna bataqlığından çıxa bilməyəcək və bu səbəbdən özünə yeni havadar axtarır. Rusiyanı çevrələyib ona qarşı bütün gücü ilə cəbhə açan ABŞ üçün Ermənistanın belə ucuz xidməti göydəndüşmədir və əslində NATO üçün yeni bir meydanın açılması deməkdir”,- deyə həmsöhbətimiz davamında bildirib.  “Amerika -Ermənistan əsgəri işbirliyi həm də bölgəmizdə gərginliyə səbəb olacaq. Ermənistanla Azərbaycan və Türkiyə arasında gedən danışıqlara da mənfi təsir edəcəkdir. Ən çox gərginlik isə Rusiya ilə Ermənistan arasında yaşanacaqdır. Rusiya ermənilərdən belə bir xəyanəti gözləyirdimi? Rusiyadan eşidilən reaksiyalardan bəlli olur ki, Kreml bu erməni oyununu öncə incələyəcək və şübhəsiz ki , bunun cəzası olacaqdır. Üstəlik, Ermənistanın Roma Statutu ilə bağlı sənədi ratifikasiya etmək üçün parlamentə göndərməsi bu ölkənin nə dərəcədə kəmfürsət olduğunun göstəricisidir. Putin kinli adamdır və gec tez bu risqə də reaksiya olacaqdır... Bir sözlə, yaşanan siyasi gəlişmələr onu göstərir ki, bölgəmizdə maraqlı proseslər başlaya bilər və bu arada ədalətsizcəsinə qurulmuş erməni dövlətinin sonu yaxınlaşmaqdadır... Qəribədir, bu duruma İran necə baxır. Bəzi politoloqlar belə bir fikri səsləndirirlər ki, guya İran Ermənistan üzərindən ABŞ-la əlaqə qurmaqdadır”,- deyə ermənişünas alim sonda sual edib.

"Azərbaycan Silahlı Qüvvələri payız-qış mövsümünə hazırlıq məqsədilə əvvəldən planlaşdırılmış təlimlər keçirir, Ermənistan isə sərhədə qoşun cəmləşdirir". Sozcu.az xəbər verir ki bunu "Reuters"ə açıqlamasında Azərbaycan Prezidentinin köməkçisi - Prezident Administrasiyasının Xarici siyasət məsələləri şöbəsinin müdiri Hikmət Hacıyev deyib. "Bu, müntəzəm planlaşdırma prosesinin bir hissəsidir", - deyən Hikmət Hacıyev Ermənistanı öz qoşunlarını sərhəddə cəmləşdirməkdə və yeni silah sistemləri almaqda ittiham edib. Onun sözlərinə görə, Qarabağdakı qanunsuz erməni qüvvələri də öz kazarmalarından çıxaraq yüksək döyüş hazırlığı şəraitində cəbhə xəttindəki mövqelərə yerləşdirilib. "Bizim strategiyamız Azərbaycana qarşı hər hansı silahlı və ya qeyri-qanuni hərbi hərəkətlərin və ya təxribatların qarşısını almaq və zərərsizləşdirməkdən ibarətdir”, - Hikmət Hacıyev bildirib.

“Ermənistan tərəfindən törədilmiş təxribatlar normallaşma prosesinə mənfi təsir göstərməsi də vurğulanır. Bu, beynəlxalq aktorların bu istiqamətdə səylərini heçə endirir. Ermənistanın məsuliyyətsiz və destruktiv davranışından irəli gələn risk və təhdidlərin adekvat şəkildə başa düşülməsi və Ermənistanı bu cür hərəkətlərdən çəkindirmək üçün müvafiq tədbirlərin görülməsi zəruridir”. Sozcu.az xəbər verir ki, bu, Xarici İşlər Nazirliyinin diplomatik korpusun nümayəndələri üçün keçirdiyi brifinqdə deyilib. “Azərbaycanın sülh prosesinə sadiqliyi möhkəmdir və bu mövqe 2020-ci ilin noyabr ayından etibarən atdığımız ardıcıl addımlarla sübut edilib. Suverenliyimizi və ərazi bütövlüyümüzü qorumaq əzmimiz eyni dərəcədə möhkəm və qətiyyətlidir”, - əlavə olunub.

İstefa verəcəyimlə bağlı arzunuzu unudun, mən olduğum yerdəyəm, hara lazımdırsa, gedəcəm, bu mənim konstitusiya borcumdur. Sozcu.az xəbər verir ki, bunu Gürcüstan Prezidenti Salome Zurabişvili deyib. “Özümü yalnız məni prezidenti seçmiş Gürcüstan cəmiyyətinin qarşısında cavabdeh hesab edirəm. Gürcüstan əhalisi kimi mən də əminəm ki, Tiflisin problemlərinin həlli yalnız Avropa ilə mümkündür. Məhz buna görə Berlinə, Brüsselə, Parisə gedirəm. Əlaqələrimdən istifadə edirəm, mənə inamın olmasından istifadə edirəm. Əgər siz önə çıxıb bu perspektivin sizin üçün nə qədər vacib olduğunu bütün Avropaya göstərməsəydiniz, bəlkə də mənim bu qədər inamım olmazdı. Mən müxtəlif liderlərlə görüşəndə ​​bilirlər ki, sizin seçdiyiniz adamam və bu perspektivi, bu gələcəyi siz seçirsiniz. Ümid edirəm ki, bu iki ay yarım və ya üç ay ərzində mən Avropanın əsas, bəlkə də bütün paytaxtlarını ziyarət edə biləcəyəm və arzumu, gələcəyinizi qoruya biləcəyəm. Hamı bilir ki, Gürcüstan bunu istəyir, Tiflis heç vaxt Rusiya qarşısında sürünməyəcək, biz bunu birlikdə müdafiə etməliyik”, - o bildirib.

“İndiyədək hansısa bir "tüklü" əl  onu döyüş zonalarında və digər çətin ərazilərdəki xidmətdən qoruyub. İndi isə onun Qarabağdakı Rusiya kontingentinə komandan gətirilməsi böyük ehtimalla bu generalı Ukraynadakı hərbi əməliyyatlardan uzaq tutmaq məqsədi ilə atılan bir addımdır...” “Rusiya “sülhməramlı” kontingentinin yeni komandanı, general-mayor Kiril Kulakovun xidmət yoluna nəzər salsaq, görərik ki, bu general hərbi məktəbi də, xidməti də doğulduğu Kazan şəhərində keçirib. Bu isə onu deməyə əsas verir ki, Kulakovu indiyədək hansısa bir "tüklü" əl  döyüş zonalarında və digər çətin ərazilərdəki xidmətdən qoruyub. İndi isə onun Qarabağdakı Rusiya kontingentinə komandan gətirilməsi böyük ehtimalla bu generalı Ukraynadakı hərbi əməliyyatlardan uzaq tutmaq məqsədi ilə atılan bir addımdır. Və heç bir döyüş təcrübəsi, eyni zamanda sülhməramlı fəaliyyətlərdə iştirakı olmayan Kulakovun hazırkı mürəkkəb vəziyyətdə Qarabağda uğurlu fəaliyyət göstərəcəyinə dair ehtimallarımız sıfır səviyyəsindədir.”  Bu fikirləri Moderator.az-a açıqlamasında hərbi ekspert Ədalət Verdiyev Kremlin bu günlərdə Azərbaycan Respublikası ərazisindəki “sülhməramlı” sayılan Rusiya kontingentinin yeni komandanı təyin etdiyi  general-mayor Kiril Kulakovun hərbi və şəxsi keyfiyyətlərini xarakterizə edərkən ifadə edib. “Bütün hallarda Azərbaycan tərəfinin Rusiya kontingentindən gözləntiləri erməni silahlılarının ərazilərimizdən tam çıxarılmasından, onlara aid silah və texnikaların Azərbaycana təhvil verilməsindən və Qarabağın dağlıq hissəsindən didərgin düşmüş vətəndaşlarımızın doğma yurd-yuvalarına qayıdışının təmin edilməsindən ibarətdir”,- açıqlamasının davamında həmsöhbətimiz nəzərə çatdırıb.  “Ancaq, təəssüf ki, Rusiya “sülhməramlı”ları hazırkı durumda minimal vəzifələrini belə, yerinə yetirə bilmir. Dəfələrlə erməni terrorçu qüvvələri tərəfindən Azərbaycan ordusunun mövqeləri istiqamətində atəşkəs pozuntuları baş verir, rus hərbçilərin gözü qarşısında Azərbaycanın mülki təyyarələrinə radio-maneələr yaradılır və ən əsası, sülhü təmin etməli olan Rusiya hərbi kontingenti erməni separatçı silahlılarının kuryerinə çevrilir. Özləri üçün ən acınacaqlısı isə odur ki, Rusiya kontingentinin hərbçiləri ermənilər tərəfindən fiziki zorakılığa məruz qalır. Odur ki, Rusiya auditoriyasında qadın və içki düşkünü kimi tanınan Kulakovun da Qarabağda ciddi nailiyyətlərə imza atacağını gözləmirəm”- deyə hərbi ekspert vurğulayıb.

“Putin çıxış yolu tapa bilmir…”- “Bəzən 30 dəqiqə tualet və ya hamamdan çıxmır…” "Ukrayna Silahlı Qüvvələrinin cəbhədəki uğurları Kreml diktatorunun vəziyyətinə çox mənfi təsir göstərir…" Vladimir Putin artıq özünü idarə edə bilmir. Düşdüyü vəziyyətə görə panika içində olur. Diktatorun hətta ən böyük fobiyası da var… Sozcu.az xəbər verir ki, bu barədə Ukraynanın “Kanal 24” kanalına rusiyalı hüquq müdafiəçisi və Gulagu.net təşkilatının təsisçisi Vladimir Oseçkin danışıb. Putin nədən qorxur?.. Hüquq müdafiəçisinin fikrincə, Putinin bəzi panik atakları onun fərdi ictimai çıxışlarında müşahidə oluna bilər. Xüsusilə, bunlardan biri "Vaqner"çilərin mərhum lideri Yevgeni Priqojinin üsyanının başlanğıcında nəzərə çarpdı… "Aydındır ki, o, iyunun 23-dən 24-nə keçən gecə Putin inqilab təhlükəsi haqda danışanda özünə nəzarət edə bilməyib. O, həm də özü ilə "vaqner"çilər arasında paralellik aparmağa çalışıb;  guya onlar da eyni qandan olduqları üçün dövlət çevrilişinə ehtiyac yoxdur”, - deyə Oseçkin bildirib. Bütün bunlardan əlavə, Rusiya prezidenti: -tez-tez düşüncələrə qərq olur, bəzən 30 dəqiqə hamamdan və ya tualetdən çıxmır; -müntəzəm panik atakları var və bunu ətrafındakılar da gizlətmir… "Sonda Putin vəziyyətdən necə çıxacağını başa düşmür. Amma onun ən böyük fobiyası həyatının Müəmmər Qəddafi (Liviya diktatoru- red.) kimi bitəcəyidir", - Oseçkin yekunlaşdırıb. Xatırladaq ki, Vladimir Putin müqəddəs, sakral tarixləri sevən biri kimi Ukraynada müharibənin başa çatması üçün özünə yeni bir müddət - qondarma “Böyük Vətən Müharibəsində” qələbənin 80 illiyini təyin edib. Bununla belə, 9 may 2025-ci il, çətin ki, Kreml sahibi üçün bayram gününə çevrilsin...

Qarabağdakı erməni separatçıları Azərbaycan Silahlı Qüvvələrinə məxsus hərbi birləşmələrin son günlərdəki dislokasiyası ilə bağlı xəbərlərdən həyəcanlanıblar. Separatçıları xüsusilə  qorxudan məqam isə Azərbaycan Ordusuna məxsus olduğu iddia edilən hərbi texnikanın üzərində "A" hərfinin tərsinə “∀” kimi qeyd olunmasıdır. Sozcu.az-ın məlumatına görə, sosial şəbəkələrdə üzərinə “∀” simvolu qeyd olunmuş hərbi texnikanın şəklini paylaşan ermənilər bunun xüsusi məna daşıdığını idda ediblər. Bu iddialarda “∀” simvolunun “qələbə”yə (V-Viktoriya) və V-nin ortasındakı xəttin “Zəngəzur dəhlizi”nin açılmasına işarə olduğu bildirilir. Digər iddialarda isə qeyd olunur ki, həmin simvol separatçıların elan etdiyi qondarma “Artsax”ın adındakı baş hərfin tərsinə çevirilmiş formasıdır ki, bu da oyuncaq rejimin darmadağın ediləcəyi anlamı daşıyır. Ordumuza məxsus hərbi texnikaların üzərində isə belə bir görüntünün olduğuna dair heç bir rəsmi açıqlama yoxdur. Ehtiyatda olan polkovnik, hrəbi ekspert Şair Ramaldanov isə deyib ki, əgər hansısa hərbi texnikanın üzrinə “∀” simvolu qeyd olunubsa, bu heç bir məna daşımır. Onun sözlərinə görə, ola bilsin ki, təlimlər zamanı hansısa bölüyü, yaxud texnikaları bir-birindən ayırmaq üçün müvəqqəti işarələrdən istifadə edilib. Şair Ramaldanov hərbi texnikanın üzərinə hansısa hərflərin yazılması və ya işarələrin qoyulması halları əvvəllər də müşahidə edilib. modern)

Ukrayna müharibənin 562-ci günü üçün Rusiya ordusunun itkiləri haqda məlumatı yeniləyib. Sozcu.az xəbər verir ki, bu barədə Ukrayna Baş Qərargahı məlumat yayıb. Məlumata əsasən, Rusiya indiyə qədər 267 540 hərbçi, 4529 ədəd tank, 8726 ədəd zirehli döyüş maşını, 5753 ədəd artilleriya sistemi, 754 ədəd RYAS (reaktiv yaylım atəş sistemi), 507 hava hücumundan müdafiə sistemi, 315 ədəd hərbi təyyarə, 316 ədəd helikopter, 8264 ədəd avtomobil texnikası, 4570 ədəd PUA, 1455 qanadlı raket, 19 gəmi/qayıq, 860 xüsusi avadanlıq itirib.

Araik Arutyunyanın müttəfiqi Artur Arutyunyan Qarabağdakı separatçıların “dövlət naziri” təyin olunacaq. Sozcu.az xəbər verir ki, bu barədə “Hraparak” qəzeti məlumat yayıb. Məlumata görə, yeni “dövlət naziri” iqtisadi layihələrin həyata keçirilməsində tam iştirak edəcək, yəni ona yalnız maliyyə-iqtisadi bloka nəzarət həvalə olunacaq.

Hərbi dairələrdəki mənbələr Ermənistanın Azərbaycanla şərti sərhəddə 1,2,3 və 4 saylı hərbi korpusları fəal şəkildə gücləndirdiyi, son həftələr İran ərazisindən zirehli texnika və artilleriya mərmilərinin çatdırılması barədə məlumatları təsdiqləyirlər. Sozcu.az xəbər verir ki, bu barədə "Caliber"in məlumatında bildirilib. Qeyd olunub ki, təmir və texniki hissələr durmadan işləyir, təmir oluna bilən hər şeyi işə salmağa çalışırlar: "Ermənistan Azərbaycanın Qarabağ bölgəsi ərazisində də silahlı qüvvələrini yüksək döyüş hazırlığı səviyyəsinə çatdırıb. Təkcə son bir həftədə ehtiyatda on minə qədər hərbçi çağırılıb və bunun fonunda erməni hərbi ekspertlərin guya ölkədə səfərbərliyin aparılmaması ilə bağlı açıqlamaları "Azərbaycana dezinformasiya kampaniyasından başqa bir şey deyil" deyə dünya ictimaiyyətini çaşdırırlar. Yaxın vaxtlarda həm öz daxili siyasi hesablamaları, həm də geosiyasi öhdəlikləri olan Nikol Paşinyan rejimi tərəfindən ciddi hərbi təxribat gözləməyə əsas var. Qarabağda resursların məhdud olduğunu nəzərə alsaq, çox güman ki, orada diversiya xarakterli təxribat əməliyyatları aparıla bilər, eyni zamanda əsas döyüş əməliyyatları düşmən tərəfindən bizim Ermənistanla şərti sərhədimizə keçəcək".

Ermənistan Azərbaycana qarşı növbəti hərbi təxribata hazırlaşır. Sozcu.az xəbər verir ki, bununla bağlı videogörüntülər sosial şəbəkələrdə yayılıb. Görüntülərdə Ermənistanın hərbi texnikasının aktiv hərəkəti əks olunur. Hərbi birləşmələrin yerdəyişməsi Ermənistanın Azərbaycana qarşı növbəti hərbi təxribata hazırlaşdığını sübut edir. Qeyd edək ki, artıq neçə gündür Azərbaycanın Müdafiə Nazirliyi Ermənistanla sərhəddə ordumuzun mövqelərinin atəşə tutulduğunu bildirir.report)

Sosial şəbəkədə Şəmkir Rayon Mərkəzi Xəstəxanası ilə bağlı vətəndaşların biri tərəfindən paylaşım edilib. Sözcü.az olaraq paylaşımı olduğu kimi təqdim edirik: Şəmkir Rayon Mərkəzi Xəstəxanasının Terapiya şöbəsindəki özbaşınalıqlara heç kim nəzarət etmir. Dövlətin qurub yaratdığı xəstəxananı xarabazara döndəriblər, bir dənə olsun belə normal ayaqyolusu yox, ayaqyollarında adi işıqlandırma sistemi nədir o belə öz qaydasında deyil. Natəmizlikdən tarakan Xəstəxananı ağzına alıb. Ancaq xəstələrdən pul dilənməklə məşğuldurlar. Sözcü.az

Son günlər sosial şəbəkələrdə, cəmiyyətdə yenidən müharibə və ya hərbi əməliyyatların başlayacağı ilə bağlı məlumatlar dolaşır. Yenidən müharibənin başlayacağı ilə bağlı yaranmış suallara Sözcü.az olaraq cavab axtarmağa çalışdıq. Bununla bağlı Cümhuriyyət Siyasi Düşüncə Mərkəzinin sədri Ceyhun Nəbi ilə əlaqə saxladıq. Ceyhun Nəbi saytımıza bildirdi ki, bu gün Qafqazda gərgin geosiyasi vəziyyət yaranıb. Cəmiyyətdəki narahatlığın əsasında bu dayanır. Belə ki, Ermənistanda dayaqlarının zəifləməsini istəməyən Rusiya regionda vəziyyəti gərginləşdirərək təsir imkanlarını genişləndirməyə çalışır. Mövcud situasiyada gərginləşən münasibətlərin daha da dərinləşməsində birinci maraqlı tərəf Rusiyadır. Ermənistandakı mövcud hökümətin müstəqillik istəklərinin artması onu Rusiyanın çətin planları ilə üz-üzə qoyur. Hər kəsə bəlli həqiqətdir ki, Qarabağ ərazisində baş verə biləcək hadisələr Rusiyanın hazırladığı sissenaridən başqa bir şey deyil. Sülhməramlı adı altında Azərbaycan ərazisinə soxulmuş rus ordusu region üçün ciddi təhlükə mənbəyidir. Azərbaycan ərazisində ərsəyə gətirilməyə çalışılan qondarma rejimin atdığı hər addımın planı Rusiya tərəfindən müəyyənləşdirilir. Öz ölkəsində Rusiyanın təsirlərini azaltmağa çalışan Paşinyan höküməti isə Qondarma rejimlə bir az məsafəli davranır. Bütün bunlarla yanaşı İran, Türkiyə kimi regiona yaxın dövlətlər, həmçinin ABŞ və Fransa kimi bir sıra böyük güclərdə gərginləşən münasibətlərin arxa fonunda görünməkdədirlər. Baş verə biləcək qarşıdurmanın dəstəkçiləri ilkin müşahidədən artıq bəllidir. 11-20 sentyabr tarixləri arasında Ermənistan və ABŞ-ın "EAGLE PARTNER-2023" birgə hərbi təlimlərinin keçiriləcəyi bildirilir. təlimlərin məqsədi ilə bağlı məlumatda qeyd olunur ki, sülhməramlı əməliyyatların tərkib hissəsi kimi beynəlxalq sülhməramlı missiyalarda iştirak edən bölmələr arasında qarşılıqlı fəaliyyət səviyyəsinin artırılması, idarəetmə və taktiki rabitə sahəsində təcrübə mübadiləsi, o cümlədən NATO-nun “Sülh Naminə Tərəfdaşlıq” proqramının “Əməliyyat İmkanları Konsepsiyası”nın planlı qiymətləndirilməsinə erməni hərbçilərinin hazırlığının artırılmasıdır. Amma görünən əsl həqiqət budur ki, bu həmdə bir əzələ nümayişi kimi qiymətləndirilməlidir. Amerika baş vermə ehtimalı olan qarşıdurmada kimin tərəfində dayanacağının ilkin mesajını verir. Bu isə baş verəcək hadisələrin miqyasının nə qədər böyük, dərin və ciddi itkilərlə müşayət olunacağını göstərir.  Azərbaycan tərəfi Rusiyanın Ukrayna ilə müharibəsi bitənə qədər güclü müdafiə tədbirləri alaraq müharibə və qarşıdurmadan maksimum kənarda dayanmağa çalışmalıdır.  Rusiyanın çirkin və qaranlıq planlarını özündə ehtiva edən vəziyyətin yaranması tək Azərbaycan üçün yox, bütün region üçün mənfi nəticələr doğura bilər. Qafqazda yarana biləcək xoşbəxtlik sülhdən, qarşılıqlı razılaşmadan  kənarda mövcud olan bilməz. Müharibə, qarşıdurma nifrət doğurur, bu isə cəmiyyətləri illərlə sarsıdıcı vəziyyətə gətirir. Anar Rəsullu

2023-cü il oktyabrın 1-dən dekabrın 8-dək Ermənistanda ehtiyat olan rütbəlilər hərbi təlim toplanışlarına cəlb ediləcək. Sozcu.az Ermənistan KİV-nə istinadən xəbər verir ki, təlimlərə 2059 nəfərə qədər ehtiyatda olan hərbçi çağırılacaq. Təlimlərdə məqsəd ehtiyatda olanların döyüş qabiliyyətlərini artırmaqdır.

Payız fəsli Azərbaycana sentyabrın 23-ü saat 10:49:56-da daxil olacaq.​ Bakı Dövlət Universitetinin (BDU) Fizika fakültəsinin Astrofizika kafedrasından verilən məlumata görə, bu zaman payız gecə-gündüz bərabərliyi qeydə alınacaq. ​ Günəş ekliptika üzrə hərəkət edib, ekvatoru kəsərək Şimal yarımkürəsindən Cənub yarımkürəsinə keçəcək və həmin andan Şimal yarımkürəsində payız fəsli başlayacaq. ​

Sentyabrın 8-dən müəllimlərin sertifikasiya imtahanlarının müsahibə mərhələsinə start veriləcək. Bu barədə Sozcu.az-a Elm və Təhsil Nazirliyindən bildirilib. Müsahibə mərhələsinə dair Azərbaycan və rus bölmələri üzrə mövzular 18 avqust tarixində müəllimlərin şəxsi kabinetlərinə göndərilib. Müəllimlər miq.edu.az saytı və ya portal.edu.az platforması vasitəsilə hər iki bölmə üzrə müsahibə mövzuları ilə tanış ola bilərlər. Qeyd edək ki, müsahibə mərhələsi ilə bağlı məlumatlar müəllimlərin şəxsi kabinetlərinə hissə-hissə göndərilir.

Bu il Kəlbəcər rayonunda daha 7 yaşayış məntəqəsinin (İstisu qəsəbəsi, Qamışlı, Çaykənd, Nadirxanlı, Qılınclı, Otaqlı və Çıraq kəndləri), gələn ildə isə 4 kəndin (Çəpli, Keşdək, Dalqılınclı və İmanbinəsi kəndləri) layihələndirilməsi işlərinin aparılması planlaşdırılır. Sozcu.az xəbər verir ki, bunu Dövlət Şəhərsalma və Arxitektura Komitəsi sədrinin birinci müavini Namiq Hümmətov Kəlbəcərdə keçirilən Şəhərsalma İşçi Qrupunun iclasında deyib. O bildirib ki, 2026-cı ilədək 1-i şəhər, 1-i qəsəbə, 13-ü kənd olmaqla ümumilikdə 15 yaşayış məntəqəsinin bərpası həyata keçiriləcəkdir. N. Hümmətov vurğulayıb ki, Kəlbəcər rayonunun ərazi-planlama sənədlərinin hazırlanması çərçivəsində əhəmiyyətli işlər görülüb: "Şəhərin Baş Plan konsepsiyası 2022-ci ilin iyunun 26-da Prezidentə təqdim edilmiş və hal-hazırda baş planın aidiyyəti qurumlarla razılaşdırılması yekun mərhələdədir. 2022-2026-cı illərdə bərpa olunan yaşayış məntəqələrindən birinci mərhələ üzrə Zar, Zallar və Yanşaq kəndlərinin şəhərsalma əsaslandırılmasının təsdiq edilməsi istiqamətində müvafiq işlər aparılmaqdadır". Onun sözlərinə görə, həmin kəndlərin sifarişçisi qismində Qaçqınların və Məcburi Köçkünlərin İşləri üzrə Dövlət Komitəsi tərəfindən tikinti layihələri sürətlə işlənilməkdədir.

“Yelo Bank” ASC İqtisadiyyat Nazirliyi yanında Dövlət Vergi Xidməti Milli Gəlirlər Baş İdarəsinə qarşı məhkəmə iddiası qaldırılıb. Sozcu.az xəbər verir ki, məhkəmə iddiası noyabr ayının 1-i tarixində Bakı Apellyasiya Məhkəməsinin hakimi Pərviz Hüseynovun sədrlyi ilə keçiriləcək. Qaldırılan iddia vergi məsələləri üzrə mübahisələrlə bağlıdır. Qeyd edək ki, 378 milyon manat nizamnamə kapitalı olan “Yelo Bank” ASC (VÖEN -9900014901) 1994-cü ildən fəaliyyət göstərir. Əvvəlcə "Ülpər" kommersiya bankı kimi fəaliyyətə başlayıb. Daha sonra 2002-ci ildə rebrending edərək "Nikoil Bank" adlandırılıb. 2019-cu ildən isə “Yelo Bank” adlanır. “Yelo Bank” Rusiyada yaşayan Azərbaycan əsilli milyarder, “Lukoil” şirkətinin sahibi Vahid Ələkbərova məxsusdur./Ekonominfo.az

Azərbaycan Respublikasının Prezidenti İlham Əliyev sentyabrın 7-də Türk Dövlətləri Təşkilatının üzv və müşahidəçi dövlətlərinin təbii fəlakət və fövqəladə halların idarə edilməsi üzrə nazirlərinin ikinci görüşünün və “Bakı-2023“ beynəlxalq təliminin iştirakçıları - Türk Dövlətləri Təşkilatının Baş katibi Kubanıçbek Ömüraliyev, Türkiyənin daxili işlər naziri Əli Yerlikaya, Qazaxıstanın fövqəladə hallar naziri Sırım Şaripxanov, Qırğızıstanın fövqəladə hallar naziri Boobek Ajikeev, Özbəkistanın fövqəladə hallar naziri Abdulla Kuldaşev və Şimali Kiprin daxili işlər naziri Dursun Oğuzu qəbul edib. Sozcu.az xəbər verir ki, bu barədə Prezidentin Mətbuat Xidməti məlumat yayıb.

Rusiya sentyabrın 7-də gecə saatlarında Ukraynanın Sum və Odessa vilayətlərinə PUA hücumu edib. Sozcu.az Ukrayna Silahlı Qüvvələrinin Hərbi Hava Qüvvələri məlumat yayıb. Məlumata görə, 33 PUA-dan 25-i Ukrayna hava hücumundan müdafiə vasitələri tərəfindən məhv edilib.

Hücum əməliyyatları nəticəsində Ukrayna ordusu Baxmutun cənubunda qismən uğur qazanıb. Bu barədə Ukrayna Silahlı Qüvvələrinin (SQ) Baş Qərargahının məlumatında deyilir. “Baxmut istiqamətində müdafiə qüvvələri Donetsk vilayətinin Orexovo-Vasilyevka yaxınlığında düşmən hücumlarının qarşısını alıb. Eyni zamanda, hücum əməliyyatları nəticəsində Müdafiə Qüvvələri Baxmutun cənubunda qismən uğur qazanır, düşməni mövqelərindən sıxışdırıb çıxararaq çatdıqları xətlərdə möhkəmlənirlər”, - məlumatda qeyd edilib. Məlumata görə, Limanski, Avdeyevski istiqamətində də düşmənin hücumlarının qarşısı alınıb. Maryinski istiqamətində isə rusların irəliləməsini dayandırmağa davam edirlər. “RBC-Ukraina”nın verdiyi xəbərə görə, müdafiə qüvvələri Melitopol istiqamətində uğurla keçib. Onlar Liman və Baxmut istiqamətində düşmənin hücumunun qarşısını alırlar.

Dünən gecə saatlarında yağan güclü leysan yağışları nəticəsində İsmayıllının bir neçə kəndində elektrik dirəkləri sıradan çıxıb, böyük fəsadlar yaşanıb. Hadisə nəticəsində İsmayıllı şəhəri, Talıstan, İvanovka, Cülyan və daha bir neçə dağətəyi kəndlərdə çox sayda abunəçinin elektrik xətləri qırılıb, dirəklər aşıb. Hazırda bu istiqamətdə işlər aparılır.