Mən Zelenskiyə Ukraynanın ərazi bütövlüyünə dəstəyimizi çatdırdım, danışıqlar prosesinin davamlı sülhlə başa çatması üçün hər cür dəstəyi verəcəyimizi vurğuladım. Sozcu.az xəbər verir ki, bu sözləri Türkiyə Prezidenti Rəcəb Tayyib Ərdoğan Ukrayna Prezidenti Vladimir Zelenski ilə birgə mətbuat konfransında deyib. "Böyük dağıntılara səbəb olan Rusiya-Ukrayna müharibəsi bitməlidir. Ölkəmiz qarşıdakı dövrdə Rusiya, Ukrayna və ABŞ arasında baş tutması gözlənilən danışıqlar üçün ideal ev sahibi olacaq", - Ərdoğan bildirib.

Piyada keçidləri piyadalar üçün təhlükəsiz yol keçidini təmin etməli olsa da, bəzi sürücülərin məsuliyyətsizliyi səbəbindən bu yerlər bəzən faciə məkanına çevrilir. Sozcu.az xəbər verir ki, bu barədə DİN-in Baş Dövlət Yol Polisi İdarəsinin məlumatında bildirilib. Qeyd olunub ki, ötən gün paytaxtın Mətbuat prospektində piyada zolağına daxil olan ana və iki övladının vurulması ilə nəticələnən hadisə bir daha onu deməyə əsas verir ki, hələ də yol hərəkəti qaydalarına məsuliyyətsiz yanaşan sürücülər var: "Baş Dövlət Yol Polisi İdarəsi bir daha sürücülərə müraciət edərək, onları nümayiş olunan real kadrlardan düzgün nəticə çıxarmağa, piyadalara qarşı son dərəcə diqətli olmağa çağırır. Hər bir sürücü bilməlidir ki, sükan arxasında edilən bir səhv günahsız insanların həyatına son qoya bilər. Daha məsuliyyətli davranmaq, yol hərəkəti qaydalarına ciddi əməl etmək və piyadalara hörmət etmək hər bir sürücünün borcudur! Unutmayaq ki, qaydalara əməl etmək təkcə qanuni öhdəlik deyil, həm də insanlıq borcudur".

Azərbaycanda 2025-ci il üçün kişilərin və qadınların pensiya yaşının artacağı bəlli olub. “Əmək pensiyaları haqqında” qanunun 7-ci maddəsinə əsasən, 2017-ci ildən başlayaraq hər il qadınların pensiya yaşı 6 ay artırılır. Bu proses 2027-ci ilə qədər davam edəcək. Beləliklə, 1 iyul 2024 - 30 iyun 2025-ci il tarixində kişilərin pensiya yaşı dəyişməz qalaraq 65, qadınların pensiya yaşı isə 6 ay artırılaraq 64 olacaq. Bu prosesin 2027-ci ildə yekunlaşacağını və nəticədə həm kişilərin, həm də qadınların pensiya yaşının 65-ə bərabərləşəcəyini bildirilir. İqtisadçı Xalid Kərimli məsələ ilə bağlı News24.az-a açıqlamasında bildirib ki, kişilərlə qadınların pensiya yaşının eyniləşdirilməsi qanunvericiliyə uyğun addımdır və burada hər hansı qanun pozuntusu yoxdur. Lakin pensiya yaşının artırılmasını qeyri-humanist hesab edir: “Kişilərlə qadınların pensiya yaşının eyni olması normaldır. Ancaq bu rəqəm 65 yox, 60-62 yaş olmalıdır. Çünki Azərbaycanda orta ömür müddəti 74-75 ildir. İnsanlar bu şərtlərlə çox qısa müddət pensiya ala bilirlər. Avropada pensiya yaşı 65-dir, amma orada insanların gözlənilən ömür uzunluğu 82-83 ildir. Azərbaycanda isə bu rəqəm xeyli aşağıdır. Əgər pensiya yaşı fərqli təyin ediləcəksə, bu, kişilər üçün daha aşağı olmalıdır, çünki onların orta ömür müddəti qadınlardan azdır.” İqtisadçı həmçinin vurğulayıb ki, əvvəlki pensiya yaşı - 62-63 yaş - daha ideal idi və onun süni şəkildə artırılması vətəndaşların sosial rifahına mənfi təsir göstərəcək. Qeyd edək ki, kişilərin pensiya yaşı artıq 65-ə çatdığı üçün onlarda artım dayanıb. Qadınlar üçün isə hər il 6 aylıq artım 2027-ci ilə qədər davam edəcək və o zaman onların da pensiya yaşı 65-ə çatacaq.

Bakıda hava şəraiti kəskin dəyişəcək. Sozcu.az xəbər verir ki, sinoptiklərin proqnozuna görə, qarşıdakı günlərdə temperatur enəcək və paytaxtda qar yağacağı gözlənilir. Şaxtalı hava və yağıntılar şəhər sakinlərini çətin vəziyyətə sala bilər. Mütəxəssislər vətəndaşlara ehtiyatlı olmağı və hava şəraitinə uyğun hazırlıqlı davranmağı tövsiyə edirlər. Paytaxtda hava şəraitinin dəyişkən olacağı proqnozlaşdırılır. Son məlumatlara əsasən, yaxın günlərdə Bakıda yağıntılı və soyuq hava şəraiti hökm sürəcək. Məşhur "Live Weather" hava proqnozlarını təqdim edən platformanın məlumatında qeyd olunur ki, Bakıda bu günlərdə qar yağacaq: 20 fevral – gün ərzində az yağış və qar qarışıq yağış gözlənilir, temperatur 2°C, gecə isə -2°C, yüngül qar yağacaq. 21 fevral – Küləkli hava və yüngül qar müşahidə ediləcək, gündüz -1°C, gecə -2°C. 22 fevral – Qar yağacaq, temperatur gündüz 0°C, gecə -1°C. 23 fevral – Gün ərzində qar yağacaq, temperatur 0°C, gecə isə buludlu və -2°C. 24 fevral – Yüngül qar yağıntıları davam edəcək, gündüz -1°C, gecə isə -3°C. 25 fevral – Buludlu hava gözlənilir, temperatur 2°C, gecə -1°C. Mütəxəssislər hava şəraitinin dəyişkən olacağını bildirir və sakinlərə isti geyinməyi, açıq havada ehtiyatlı olmağı tövsiyə edirlər.

Abşeron rayonunda azyaşlının ölümü ilə nəticələnən bədbəxt hadisə baş verib. Sozcu.az xəbər verir ki, "Qafqazinfo"nun əldə etdiyi məlumata görə, fevralın 17-si saat 18 radələrində 2017-ci il təvəllüdlü Səyid Zəkəriyəyevin nəfəs borusuna qida düşüb. Hadisə onların yaşadığı Saray qəsəbəsindəki evlərində qeydə alınıb.  Xəstəxanaya çatdırılan uşaq vəfat edib. Faktla bağlı Abşeron Rayon Prokurorluğu tərəfindən araşdırma aparılır.

Gürcüstanın Qardabani rayonunun Muğanlı kəndində iş adamı Alazir Rzayevin avtomobili yandırılıb. Sozcu.az Teleqraf-a istinadla xəbər verir ki, bu barədə Gürcüstanın “TV Pirveli” telekanalı məlumat yayıb. Məlumata əsasən, ötən gecə iş adamının həyətində saxladığı maşının üzərinə benzin tökülərək od vurulub. Avtomobil yanaraq, yararsız hala düşüb. A.Rzayev ona qarşı hücumun təşkilində kriminal avtoritet Elmuraz Məmmədovu ittiham edib. Muğanlı sakinlərinin sözlərinə görə, E.Məmmədov artıq iki ildir kənddə reketçiliklə məşğul olur. Onlar iddia edirlər ki, kriminal avtoritetin göstərişləri əsasında sakinlərə hədə-qorxu gəlinir, pul tələb edilir. Faktla bağlı istintaq tədbirləri həyata keçirilir.

“Yelo Bank” evimi əlimdən almaq istəyir. Bank 2008-ci ildə manatla verdiyi krediti indi dollarla tələb edir”. Sozcu.az xəbər verir ki, bu barədə Birinci Qarabağ müharibəsi qazisi, 3-cü qrup əlil Mustafa Hacıbəyli sosial media hesabında paylaşım edib. Qazi bildiirb ki, bir zamanlar “Nikoyl Bank” kimi fəaliyyət göstərən bu bank öz korlanmış reputasiyasından yaxa qurtarmaq üçün 3 dəfə adını dəyişib, amma əməlləri, müştərilərinə soyğunçu münasibəti dəyişməyib: Bankın sahibi rusiyalı oliqarx Vahid Ələkbərov olub. 2022-ci ildə Rusiyanın bir sıra oliqarxları ilə yanaşı, Vahid Ələkbərova qarşı da sanksiyalar tətbiq edildikdən sonra bankın səhmləri Marina Kulişova adlı bir bank işçisinin adına rəsmiləşib. 2005-ci ildən 2017-ci ilə qədər “Nikoil Bank”ın İdarə Heyətinin sədri olmuş Vasili Xamaza bankdan 20 milyon manatdan çox vəsaiti mənimsəməkdə ittiham olunub və bu səbəbdən Azərbaycan tərəfindən beynəlxalq axtarışa verilib. 2018-ci ilin sentyabr ayında o, Moskva şəhərində həbs edilib. 2008-ci ildə yaxın dostum və tələbə yoldaşım Azər Səlimov çətin problemlərlə üzləşmişdi və bu problemləri həll etmək üçün kredit götürməli oldu. O vaxt məndən xahiş etdi ki, onun evinin kupçası olmadığı üçün mənim evimin girov qoyulmasına razılıq verim. “Nikoyl Bank”ın öz təklifi ilə formal ipoteka rəsmiləşdirildi və mən dostumu vəziyyətdən çıxarmaq üçün evimin girov qoyulmasına razılıq verdim”. Mustafa Hacıbəylinin sözlərinə görə, Azər Səlimov bankdan 33 540 manat kredit götürüb, faizlər də daxil olmaqla, ümumilikdə 58 355 manat qaytarıb, ödənilən məbləğ, götürülən məbləğdən 24 815 AZN artıq olsa da, bank saxta cədvəl tərtib edərək yenə 40 min dollar tələb edir: “İpoteka müqaviləsi manatladır. Bankın tərtib etdiyi ödəniş tapşırığı manatladır. Pul manatla verilib. Pul verilərkən yazılan qəbz də manatladır. Amma bank “40 min dollar” deyir. Halbuki ipoteka müqaviləsindən qabaq dollar ilə kredit müqaviləsi imzalansa da, həmin müqavilə icra olunmayıb. O zaman bank məzənnə hansı tərəfə də dəyişsə, bundan bəhrələnmək üçün iki müqavilə tərtib edib. Amma dollar ilə müqavilənin icrasına dair məhkəməyə heç bir sənəd təqdim edə bilməyib. “Yelo bank” bu tələblə Suraxanı Rayon Məhkəməsinə müraciət edib. Suraxanı Rayon Məhkəməsi iş üzrə üç dəfə məhkəmə-mühasibatlıq ekspertizası təyin edib. Ekspertiza rəyləri borcun manatla olduğunu təsdiqləsə də, bank “dirəniş” göstərərək işin yenidən ekspertizaya qaytarılmasına, sonda iddianın təmin edilməsinə nail olub. Müştərilərinin qanına susamış bankın “dirənişi” o qədər güclü olmuşdu ki, hakim Leyla Talıbova apellyasiya şikayətinin verilməsinə məhəl qoymadan mənzilimin açıq hərraca çıxarılması haqda qətnaməni icraya yönəltmişdi. Böyük bir stress yaşadım və vəkilin ərizələrindən sonra hərrac dayandırıldı. Mən Qarabağ qazisi, 3-cü qrup əliləm. Dövlətdən nə ev, nə maşın almışam. Öz halal pulumla 21 il əvvəl aldığım, təmirini hələ də tam başa çatdıra bilmədiyim evi əlimdən almaq istəyirlər. Ona görə hər kəsdən bu məsələdə ictimai dəstək istəyirəm”.

Ötən gün paytaxtın Nizami rayonunda yerləşən stadionda keçirilən “Neftçi”-“Qarabağ” oyunundan əvvəl hər iki komandanın azarkeşləri arasında ictimai asayişin pozulması halı qeydə alınıb. DİN-in Mətbuat Xidmətindən bildirilib ki, insidentlə bağlı polis lazımi qabaqlayıcı tədbirlər görüb, 4 nəfər saxlanılaraq ərazi üzrə Polis Şöbəsinə gətirilib. (apa.az)

Beyləqanda odlu silahdan atəş açaraq intihar edən şəxs barədə bəzi təfərrüatlar məlum olub. M.Bayramov Bakı şəhərində yaşayırmış. O, Beyləqana qardaşının evinə qonaq gəlibmiş. Ailəli olub, iki övladı var. Qeyd edək ki, rayon sakini, 1988-ci il təvəllüdlü Murad Bayramov odlu silahdan atəş açaraq özünü öldürüb. *** 16:08 Beyləqanda güllələnmə hadisəsi baş verib. Sozcu.az APA-ya istinadən xəbər verir ki, rayon sakini, 1988-ci il təvəllüdlü Murad Bayramov odlu silahdan atəş açaraq özünü öldürüb. İntihar edən şəxsin Kənd Təsərrüfatı Nazirliyində çalışdığı bildirilir. Fakt araşdırılır.

Azərbaycanda daha bir azyaşlı qızdırma və tənəffüs çatışmazlığından ölüb. Hadisə Saatlı rayonu, Dədə Qorqud kəndində qeydə alınıb. Kənd sakini, 2024-cü il təvəllüdlü Raul Röyal oğlu Gülüşov yaşadığı evdə vəfat edib. İlkin məlumata görə, körpə qızdırma və tənəffüs çatışmazlığından dünyasını dəyişib. Faktla bağlı araşdırma aparılır./Lent.az

Ukrayna Prezidenti Volodimir Zelenski sabah Türkiyəyə rəsmi səfərə gələcək. Sozcu.az APA-ya istinadən xəbər verir ki, bu barədə Türkiyə Prezidenti Administrasiyasının Kommunikasiya İdarəsinin rəhbəri Fəxrəddin Altun bildirib. Səfər çərçivəsində onun Türkiyə Prezidenti Rəcəb Tayyib Ərdoğanla görüşü nəzərdə tutulub.

Azərbaycan Respublikası 13 illik fasilədən sonra Suriyanın paytaxtı Dəməşqdəki Səfirliyinin fəaliyyətini bərpa edib. Sozcu.az xəbər verir ki, bu barədə Azərbaycan Xarici İşlər Nazirliyi məlumat yayıb. Bildirilib ki, artıq bu məqsədlə Səfirliyin müvəqqəti işlər vəkili artıq Dəməşq şəhərinə ezam edilib və fəaliyyətə başlayıb. "Azərbaycan Respublikası beynəlxalq hüququn prinsiplərinə əsaslanaraq, Suriyada davamlı sülhün və sabitliyin bərqərar olmasını dəstəkləyir. Azərbaycan və Suriya arasında dostluq və əməkdaşlıq əlaqələrinin keyfiyyətcə yeni mərhələyə qədəm qoyması və siyasi, iqtisadi, mədəni və digər sahələrdə tərəfdaşlığın inkişaf etdirilməsi üçün yeni imkanların yarandığı bu vacib dövrdə Səfirliyimiz Suriyanın keçid dövrü hökuməti ilə yaxından əməkdaşlıq edərək ikitərəfli əlaqələrimizin inkişafına dəstək verəcəkdir", - məlumatda qeyd olunub.

Azər Məhəmməd oğlu Qasımov Azərbaycan Respublikası Prezidentinin Mətbuat katibi vəzifəsindən azad olunub. Sozcu.az xəbər verir ki, bununla bağlı Prezident İlham Əliyev sərəncam imzalayıb.

Böyük Britaniya istənilən sülh sazişinin icrasına nəzarət etmək üçün Ukraynaya qoşun göndərməyə hazırdır. Sozcu.az xəbər verir ki, bunu Böyük Britaniyanın Baş naziri Keyr Starmer deyib. “Bunu düşünməmiş demirəm. Britaniya hərbi personalı üçün potensial təhlükə ilə bağlı çox dərin məsuliyyət hiss edirəm. Ukraynanın təhlükəsizliyinin təmin edilməsində istənilən rol bütün Avropanın təhlükəsizliyini gücləndirməyə kömək edəcək”, - o bildirib. Starmer qeyd edib ki, London Ukraynadakı hərbi münaqişənin həlli prosesində unikal rol oynaya və Avropa ilə ABŞ arasında körpü ola bilər: “Qarşıdakı bu həlledici günlər qitəmizin gələcək təhlükəsizliyini müəyyən edəcək. Sülh güc üzərindən gəlir. Amma bunun əksi də doğrudur. Zəiflik müharibəyə aparır”.

Ötən il Azərbaycanda 58 kişi gender əsaslı zorakılığa məruz qalıb. Sozcu.az report-a istinadla xəbər verir ki, bununla bağlı məlumat Ailə, Qadın və Uşaq Problemləri üzrə Dövlət Komitəsinin 2024-cü il üzrə hesabatında öz əksini tapıb. 2024-cü ilin yanvar-dekabr aylarında 860 Gender əsaslı zorakılıqla bağlı Dəstək Xəttinə 330 müraciət daxil olub. Onlardan 58-i kişi, 272-si isə qadınlar tərəfindən edilib. Onlardan 205 nəfəri Bakıdan, 125-i isə regionlardan müraciət edib: "Bundan başqa, 137 evli, 140 subay, 53 boşanmış şəxsin Dövlət Komitəsinə müraciəti daxil olub. Həmin şəxslərdən 64-ü ali təhsilli, 177-si orta, 89-u isə təhsilsiz insanlardır. 77 nəfər 0-18 yaş aralığında, 145 nəfər 19-35, 80-i 36-55, 28 nəfəri isə 56+ yaş aralığında olan şəxslərdir".

Göyçayda qadın evində ölü tapılıb. Sozcu.az Unikal.az-a istinadən xəbər verir ki, hadisə Göyçay şəhəri, H.Əliyev prospektində qeydə alınıb. Həmin ünvanda yaşayan 1960-cı il təvəllüdlü Göyçay şəhər 3 saylı tam orta məktəbdə müəllim işləyən Məhəbbət Əlihüseyn qızı Rəsulovanın meyiti aşkar edilib. M.Rəsulovanın ailə üzvlərinin verdiyi məlumata görə, o, uzun müddətdir oğlu ilə birlikdə həmin ünvanda yaşayıb. Son zamanlar səhhətində problemlər yaranıb.

Azərbaycanda gənc ana doğuşdan sonra ölüb. Sozcu.az Oxu.az-a istinadla xəbər verir ki, hadisə fevralın 15-i Şəkidə qeydə alınıb. Belə ki, Şəki Regional Perinatal Mərkəzində Zunud kənd sakini 1998-ci il təvəllüdlü Nigar Kərəm qızı Qarayeva doğuşdan sonra ölüb. Faktla bağlı araşdırma aparılır.

Müttəfiqlərindən təhlükəsizlik zəmanəti olaraq, Kiyevin çoxlu sayda raketlərə, güclü orduya, Avropa Birliyinə qoşulmasına və İsrailin əldə etdiyi kimi, müdafiə sazişlərinə ehtiyacı var. Sozcu.az xəbər verir ki, bunu Ukrayna Prezidenti Vladimir Zelenski deyib. “Biz bunun necə işlədiyini həqiqətən bilmirik, lakin İran İsrailə hücum edəndə ABŞ, Fransa, Böyük Britaniya və başqaları İsrail xalqını qorumağa başladılar. İsrail NATO-da deyil. Bu o deməkdir ki, o, ABŞ, Fransa, İngiltərə və digər müttəfiqlərdən xüsusi təhlükəsizlik zəmanətlərinə malikdir. Düşünürəm ki, buna həqiqətən ehtiyacımız var”, - Zelenski bildirib.

08:26 Bakıda iki nəfərin ölümü ilə nəticələnən ağır yol-nəqliyyat hadisəsi baş verib. Sozcu.az xəbər verir ki, qəza paytaxtın Sabunçu qəsəbəsi ərazisində qeydə alınıb. Belə ki, 1988-ci il təvəllüdlü Ramil Saleh oğlu Məmmədov idarə etdiyi “BYD” markalı maşınla hərəkətdə olan zaman “Jeely” markalı nəqliyyat vasitəsi ilə toqquşub. Qəza nəticəsində sürücü R.Məmmədov və onun iki yaşlı qız övladı hadisə yerində ölüb. Həyat yoldaşı isə aqonal vəziyyətdə Sabunçu Tibb Mərkəzinə yerləşdirilib. Hazırda qadının vəziyyəti ağır olaraq qalır. Qəza ilə bağlı araşdırma aparılır. *** Respublika Təcili və Təxirəsalınmaz Tibbi Yardım Mərkəzinə fevralın 16-da saat 23:30 radələrində H.Əliyev prospekti, Bakı Olimpiya İdman kompleksinin yaxınlığından yol-nəqliyyat hadisəsi səbəbilə çağırış daxil olub. Bu barədə TƏBİB-dən bildirilib. Qeyd edilib ki, çağırış ünvanına təcili tibbi yardım briqadası cəlb olunub. Təcil tibbi yardım briqadası tərəfindən 1 nəfərin (qadın cinsli - təxminən 2 yaşında) həkiməqədər ölüm faktı qeydə alınıb. 36 yaşlı şəxs (kişi cinsli) isə Sabunçu Tibb Mərkəzinə təxliyə olunarkən təcili tibbi yardım avtomobilində vəfat edib. Xəsarət alan digər şəxs (qadın cinsli) müştərək travma diaqnozu ilə Sabunçu Tibb Mərkəzinə təxliyə olunub. Açıq kəllə-beyin travması, başın ağır dərəcəli əziyi, başın təpə nahiyəsinin əzilmiş yarası, burun-qulaq qanaxması, sol bazunun sınığı diaqnozu ilə ona zəruri tibbi yardımlar göstərilib. Hazırda müalicəsi Cərrahi profilli reanimasiya şöbəsində davam etdirilir, vəziyyəti ağır qiymətləndirilir.

Rusiya Prezidenti Vladimir Putin NATO-nun bir kvadrat kilometrinə belə hücuma cəsarət edə bilməz, çünki ölkəsi dərhal genişmiqyaslı hücuma məruz qalacaq. Sozcu.az Globalinfo.az-a istinadla xəbər verir ki, bunu NATO Baş katibi Mark Rutte deyib. “Putin hesab edirsə ki, ölkəsi üçün əhəmiyyətsiz risk hesabına NATO-nun bir kvadrat kilometrinə belə hücum edə bilər, yanılır. Bu baş versə, Rusiya NATO-nun güclü zərbəsi ilə üz-üzə qalacaq. Putin bunu bilir”, – Rutte Zelenskinin Rusiyanın NATO üzvlərinə hücumla bağlı kəşfiyyat məlumatları olması barədə açıqlamasını şərh edərkən vurğulayıb. Bununla belə Rutte alyansın 4-5 il ərzində mühüm qərarlar qəbul etməyəcəyi halda ciddi çətinliklərlə üzləşəcəyini bildirib.

Ermənistanın Göyçə mahalında “Zil 131” markalı yük maşını yolun hərəkət hissəsindən çıxaraq qayalara çırpılıb və aşıb. Sozcu.az Globalinfo.az-a istinadən xəbər verir ki, qəza nəticəsində yük maşınının sürücüsü hadisə yerində ölüb, 1 nəfər xəsarət alıb. Əraziyə yaxınlıqdakı hərbi hissənin yüksək rütbəli və vəzifəli hərbçiləri gəlib. Qeyd edək ki, ölən və yaralanan şəxslərin hərbçi olduğu bildirilir.

Mangistau əyalətinin ekologiya departamentinin mütəxəssisləri Xəzər dənizinin qırmızı rəngə boyanması ilə əlaqədar suda kimyəvi maddələrin və neft məhsullarının mövcudluğunu yoxlayıblar. Sozcu.az xəbər verir ki, analizin nəticələrinə əsasən suyu çirkləndirən maddələr aşkar edilməyib. Mangistau əyalətinin ekologiya departamenti şöbəsinin sədri Kaysar Nadirbekin sözlərinə görə, suya qırmızı və tünd qəhvəyi rəng verən yosunlardır. “Qar yağdığından bu hadisə daha aydın görünüb. Yosunlar dayaz sularda, xüsusən də bizim sahilboyu ərazilərdə bitir. Onların toplandığı yerlərdə isə su rəngini dəyişir. Bu təbii hadisə barədə məlumatlı olsaq da, suyun vəziyyətini yoxlamalıyıq”, - Kaysar Nadirbek bildirib. Qeyd edək ki, Xəzər dənizinin al-qırmızı rəngə boyanması Qazaxıstanın Aktau şəhərinin sakinlərinin diqqətini çəkib./Axar.az

Ukrayna ordusu Kursk vilayətində Rusiyanın 155-ci briqadasının zirehli texnika kolonunu darmadağın edib. Sozcu.az xəbər verir ki, bu barədə Ukrayna Teleqram kanalları məlumat yayıb. Məlumata görə, Kursk vilayətinin Nikolski qəsəbəsində keçmiş SSRİ bayraqları ilə bəzədilmiş zirehli texnikalara dronlarla zərbələr endirilib. Rusiya hərbi müxbirləri həmin istiqamətə 10-dan çox tankın göndərildiyini bildiriblər.

Goranboyda qumbara partlayıb. Sozcu.az APA-ya istinadən xəbər verir ki, hadisə rayonun Qarasüleymanlı kəndində qeydə alınıb. Qarasüleymanlı kəndində yaşayan 1957-ci il təvəllüdlü Namazov Zakir Mayıl oğlu gəlini 1986-cı il təvəllüdlü Aslanova Vəfa Şükür qızı ilə ailə münaqişəsi zəminində mübahisə edib və ona doğru əl qumbarasını atıb. Zərərçəkmiş şəxs xəstəxanaya yerləşdirib, vəziyyəti qənaətbəxşdir. Faktla bağlı Goranboy rayon prokurorluğunda araşdırma aparılır. Zakir İsmayılov iş üzrə şübhəli şəxs qismində saxlanılıb.