Zaqatalada dönərdən zəhərlənənlərin sayı artıb. APA-nın Şimal-qərb bürosunun məlumatına görə, axşam saatlarından başlayaraq toyuq dönəridən zəhərlənərək Zaqatala Rayon Mərkəzi Xəstəxanasının təcili yardım şöbəsinə müraciət edənlərin sayı 30-a çatıb. Zəhərlənmə əlamətləri ilə müraciətlər davam edir. Baş verən hadisənin səbəbləri, həmçinin qida zəhərlənməsi olub-olmaması ilə bağlı Azərbaycan Respublikasının Qida Təhlükəsizliyi Agentliyinin mütəxəssisləri ilə müvafiq qurumların əməkdaşları tərəfindən araşdırmalara başlanılıb. Araşdırmaların nəticələri ilə bağlı ictimaiyyətə məlumat veriləcək. *** Saart 21:20 Zaqatalada dönərdən zəhərlənənlərin sayı 15-ə çatıb. APA-nın Şimal-qərb bürosunun məlumatına görə, zəhərlənən şəxslər Zaqatala RMX-a daxil olub. Müraciət edənlərdən labarator müayinələr üçün müvafiq nümunələr götürülüb. Daxil olan 15 nəfərdən 5-i azyaşlıdır. *** Saat 20:35 Zaqatalada dönərdən zəhərlənənlərin sayı 10-u keçib. APA-nın Şimal-qərb bürosunun məlumatına görə, zəhərlənənlərin hamısının toyuq ətindən hazırlanmış dönər yediyi məlum olub. Zəhərlənənlər arasında tələbələrdə var. Qeyd olunub ki, Azərbaycan Müəllimlər İnstitutunun Zaqatala filialınında iki tələbəsinin də toyuq ətindən hazırlanmış dönərdən zəhərlənərək Zaqatala RMX-a müraciət ediblər. Əldə olunan məlumata görə, zəhərlənən şəxslər Zaqatala şəhərinin müxtəlif dönərxanalarında hazırlanmış dönərlərdən istifadə ediblər. Faktla bağlı müvaviq qrumlar tərəfindən araşdırmalara başlanılıb. *** Saat 18:17 Zaqatalada ana və iki övladı dönərdən zəhərlənib. APA-nın Şimal-qərb bürosunun məlumatına görə, axşam saatlarında rayonun Mosul kənd sakini, 1987-ci il təvəllüdlü Aynur Məmmədova və onun iki övladı - 2009-cu il təvəllüdlü Ravil Məmmədov və 2012-ci il təvəllüdlü Ruslan Məmmədov zəhərlənmə əlamətləri ilə Zaqatala Rayon Mərkəzi Xəstəxanasına (RMX) müraciət ediblər. Müayinə və aparılan araşdırma zamanı ana və iki övladının dönər yedikdən sonra səhhətlərində narahatlıq yarandığı məlum olub. Hazırda Zaqatala RMX-da onlara tibbi yardım göstərilir.

Müsavat Partiyasının yeni seçilmiş başqanı İsa Qəmbər Amerikanın Səsinə müsahibəsində bu partiyanın strateji xətti, qarşıdakı seçkilərdə iştirakı və ictimai saziş təklifindən danışıb. Sozcu.az həmin müsahibəni təqdim edir: Amerikanın Səsi: Müsavat Partiyasının XI qurultayı partiyanın qarşısına hansı istiqamətlərdə mübarizəni priroitet kimi qoyub. Yeni sədr kimi əsas strategiyanız nə olacaq və bu əvvəlki dövrlərdəki strategiyadan nə ilə fərqlənəcək? İsa Qəmbər: Müsavat Partiyası Məhəmməd Əmin Rəsulzadənin qurduğu və onun müəyyənləşdirdiyi ideologiya, onun müəyyənləşdirdiyi siyasi xəttə uyğun fəaliyyət göstərən bir siyasi qüvvədir. Yüz ildən artıq bir müddətdir ki, bu yolu biz davam ediririk. Bu yolun 1992-ci ildən başlayan mərhələsinə, Azərbaycanda partiyanın fəaliyyətinin bərqərar edilməsindən başlayan mərhələsinə biz rəhbərlik edəndə də bu dəyərlərə, bu hədəflərə uyğun fəaliyyət göstərmişik. Bu baxımdan Müsavatın hədəfi çox sadədir. Məhəmməd Əmin Rəsulzadə bunu Azərbaycanın istiqlalını yaşatmaq, Azərbaycan vətəndaşının xoşbəxtliyinə nail olmaq kimi müəyyənləşdirib. Bizim də əsas hədəfimiz budur, - istiqlalı yaşatmaq, Azərbaycan vətəndaşının, Azərbaycan xalqının xoşəbxtliyini təmin etmək. Qurultaydakı çıxışımda da qeyd etdim ki, biz ötən əsrin 80-ci illərində Azərbaycanda xalq hərəkatına başlayanda 3 hədəf müəyyənləşdirmişdik. Birincisi Azərbaycanın istiqlalına nail olmaq, ikincisi Azərbaycanın ərazi bütövlüyünü bərqərar etmək, üçüncüsü Azərbaycanda demokratiya, haqq-ədalətin bərqərar olmasına nail olmaq. Bu üç hədəfdən birini, yəni istiqlalı Əbülfəz Elçibəyin liderliyində xalıqımız qazanıb. İkinci hədəf Azərbaycanın ərazi bütövlüyünü bərqərar etmək, Azərbaycanın bütün torpaqlarında dövlətimizin suverenliyini bərqərar etməkdir. Bu hadisə son illərdə baş verdi. İndiki hakimiyyətin zamanında baş verdi. 2020-ci ildəki 44 günlük savaşda və 2023-cü ilin sentyabrında bir günlük antiterror əməliyyatı ilə bu hədəflərə çatıldı. Bu baxımdan bizim indi qarşımızda olan əsas hədəf Azərbaycanda haqqın-ədalətin bərqərar edilməsi, Azərbaycanda demokratiyanın qalib gəlməsi və Azərbaycan xalqının bu dəyərlər əsasında azad, xoşbəxt, firəvan həyatını, yaşayışını təmin etməkdir. Bu baxımdan düşünürəm ki, qarşıdakı dövrdə də Müsavat Partiyasının əsas hədəfi məhz bu olacaq. İsa Qəmbər: Azərbaycan dəyişikliklərə məhkumdur Amerikanın Səsi: Müsavat Partiyasının qurultayı Azərbaycanda insan haqlarının pozulması, partiyanın üzvü Tofiq Yaqublunun, siyasi motivlərlə tutulan bütün fəalların və jurnalistlərin azadlığa buraxılmasını tələb edən bəyanatlar qəbul edib. Qurultayın bu tapşırıqlarını yerinə yetirmək üçün hansı təsiredici addımlar atılacaq? Torpaqlarımızın azad edilməsi ilə ölkəmizdə bu qədər haqsızlıqların olması çox ciddi bir dissonansdır. İsa Qəmbər: Elə qurultayın özündə bu istiqamətdə bəyanatların qəbul edilməsi, bütün siyasi məhbusların azadlığa buraxılması məsələsinin birmənalı şəkildə irəli sürülməsi onu göstərir ki, partiyamız bu istiqamətdə çox ciddi fəaliyyət göstərmək fikrindədir. Diqqət etdinizsə bizim çox dəyərli ağsaqqalımız, qurultayımızım fəxri sədri, hörmətli Cəmil Ünal da öz çıxışında bu məsələyə diqqət ayırdı. O birbaşa dövlət başçısına müraciət edərək bütün siyasi məhbusların azadlığa buraxılması təklifini səsləndirdi. Belə bir vəziyyətin Azərbaycana yaraşmadığını, Azərbaycana ziyan verdiyini aydın şəkildə ortaya qoydu. Qurultaydan sonrakı dövrdə də biz bu məsələyə diqqətimizi artıracağıq. Partiyanın üzvü Tofiq Yaqublunun, digər partiyaların fəallarının, vətəndaş cəmiyyəti nümayəndələrinin, jurnalistlərin həbsdən azad edilməsi məsələsi istiqamətində fəaliyyət göstərəcəyik. Bunun üçün həm partiyamızın bütün resursları prosesə cəlb ediləcək, həm də hesab edirəm ki, cəmiyyətimizin digər qüvvələri ilə birlikdə bu istiqamətdə əməkdaşlıq etmək, bu problemin birdəfəlik və uzunmüddətli həllinə nail olmaq planımızda var. Ciddi şəkildə bu istiqamətdə işləyəcəyik. Amerikanın Səsi: Siz çıxışınızda bildiribsiniz ki, ölkədə vəziyyət kifayət qədər ağırdır. Müsavat Partiyası iqtidarın daxili və xarici siyasərtində hansı addımları qəbul etmir və hansı islahatları zəruri hesab edir? İsa Qəmbər: Yəni siyasi məhbusların azadlığı məsələsini qeyd elədik. Söhbət ondan getmir ki, bu gün kimlərisə buraxsınlar, sabah da başqalarını həbs eləsinlər. Təəssüf ki, indiki hakimiyyət bu yolu davam etdirir. Azərbaycanı siyasi məhbus olmayan bir ölkə halına gətirmək lazımdır. Bir neçə ay əvvəl Azərbaycanın AŞPA-dakı fəaliyyəti dayandırıldı. Oradakı əsas iradlardan biri məhz siyasi məhbuslarla bağlı bir məsələ idi. Avropa Şurasının üzvü olan və onun qarşısında, digər beynəlxalq təşkilatlar qarşısında öhdəliklər götürən ölkəyə, dövlətə yaraşmaz ki, ölkədə bu qədər siyasi məhbus olsun. Əslinə qalsa bir siyasi məhbus da olmamalıdır. Eyni zamanda əsas problemləri sadaladıq. Rüşvətxorluq, korrupsiya, monopoliyalar. Bunlar aradan qaldırılmalıdır. İqtisadi azadlıqlar tətbiq olunmalıdır. Siyasi azadlıqlar verilməlidir. Partiyalar, medialar üçün də, vətəndaş cəmiyyəti üçün də azadlıqlar verilməlidir ki, bu qurumlar qanunauyğun şəkildə, rahat bir şəkildə fəaliyyət göstərə bilsinlər. Məhkəmələrin müstəqilliyinə nail olunmalıdır. Ölkədə qanunun aliliyi təmin edilməlidir. Ölkədə normal demokratik seçkilərin keçirilməsinə nail olunmalıdır. Hədəflərimiz bu olacaq. Hesab edirik ki, bu sahələrdə ciddi dəyişikliklərə, islahatlara ehtiyac var. Hakimiyyət də islahatdan danışmaq mərhələsini bitirib. O istiqamətlərdə konkret addımlar atmalıdır. Çünki bu islahatlar Azərbaycan üçün həddindən artıq önəmlidir. İstər xalqımızın, vətəndaşımızın xoşbəxtliyi baxımından, istərsə də Azərbaycanın çağdaş dünyada öz layiqli yerini tutması baxımından, bu məsələlər öz həllini tapmalıdır. Son illərdə dəfələrlə bu fikri vurğulamışıq ki, torpaqlarımızın azad edilməsi ilə ölkəmizdə bu qədər haqsızlıqların olması çox ciddi bir dissonansdır (uyğunsuzluq-red). Buna son qoyulmalıdır. Ölkədə bütün azadlıqlar bərqərar edilməlidir. Vətəndaşımız rahat, təhlükəsiz, firəvan, ləyaqətli bir həyat sürəməyə layiqdir. Amerikanın Səsi: Siz qurultayda ölkədə dinc demokratik keçid üçün ictimai saziş təklifi ilə çıxış edibsiniz. İctimai saziş təklifinizin əsas komponentləri nədir? Təklifinizin reallaşması üçün hansı yeni fəaliyyətləri gündəliyə gətirəcəksiniz? Ölkədə dinc, demokratik keçidi təmin etmək üçün ən ağlabatan yol hakimiyətlə cəmiyyət arasında ictimai sazişə nail olmaqdır. İsa Qəmbər: Əslinə qalsa haqqında danışdığımız problemlər, müəyyənləşdirdiyimiz hədəflər ictimai sazişin əsas mövzularıdır. Qurultaydakı çıxışımda da qeyd etdim ki, dünya dəyişir, region dəyişir. Azərbaycan da dəyişikliklərə məhkumdur. Bu dəyişkliklər labüddür, zəruridir və dəyişikliklər həyata keçirilməlidir. Nəzəri cəhətdən bunun iki yolu var. Ya hakimiyyət yuxarıdan bu addımları atmağa başlamalıdır. Bunu hakimiyyət etməyəcəksə, prosesin hansısa mərhələsində xalq öz sözünü deyəcək. Xalq meydana girərkən bunun bütün müsbət cəhətləri ilə yanaşı, sosial partlayışlar, qarşıdurmalar, inqilabi dəyişikliklər, - bu da baş verir. İnqilabi dəyişikliklər qulağa xoş gəlsə də hər halda mən və bütövlükdə Müsavat Partiyası dəyişikliklərin təkamül yolu ilə getməsinə tərəfdarıq. Sadəcə, o qədər zaman itirilib ki, bizim qarşımızda belə bir on illiklərlə bu dəyişikliləri həyata keçirmək kimi bir lüksumuz, imkanımız yoxdur. Bu dəyişikliklər bir neçə ilin içində, çox sürətlə həyata keçirilməlidir. Bunun da ən ağlabatan yolu, mənim fikrimcə, ölkədə dinc, demokratik keçidi təmin etmək üçün hakimiyətlə cəmiyyət arasında ictimai sazişə nail olmaqdır. Əslinə qalsa demokratik ictimaiyyət bu istiqamətdə müxtəlif cəhdlər edib. Xatırlayırsınız ki, 2012-ci ildə İctimai Palata bir yol xəritəsi müəyyənləşdirmişdi. Cəmiyyətə də, hakimiyyətə də müəyyən təkliflər irəli sürmüşdü. Yəni, bu tipli cəhdlər cəmiyyətdən, demokratik ictimaiyyətdən olub, addımlar atılıb. İndi yeni mərhələdə biz təklif etmək niyyətindəyik ki, bu istiqamətdə səylərə başlanılsın. Bunun üçün təkcə hakimiyət və cəmiyyət arasında yox, elə demokratik cəmiyyətin də daxilində, bütövlükdə cəmiyyətdə də məsləhətləşmələr, müəyyən bir hədəflərin dəqiqləşdirilməsinə, konsensusa gəlinməsinə ehtiyac var. Cəmiyyət bütöv olaraq bu dəyişikliklərin zəruri olduğunu, belə bir ictimai saziş yolu ilə bu zəruri addımların atılmasının sürətlənməsini və mümkün qədər itkisiz, çətinliklər, qarşıdurmalar olmadan həyata keçməsininin baş verməsini istəyir. Biz təklifimizi etmişik və bu istiqamətdə müəyyən müzakirələrə başlamaq düşüncəsindəyik, müəyyən addımlar atmaq fikrindəyik. Amma, təbii ki, bu tipli təşəbbüslər yalnız bir tərəfin iradəsi ilə həyata keçirilə bilmir. Hakimiyyətin də burada sağlam təhlilinə ehtiyac var. Hakimiyyət tərəfindən vəziyyətin düzgün dəyərləndirilməsinə ehtiyac var. Hakimiyyətin öz səhvlərini, yanlışlarını ehtiraf etmək və dəyişikliyin labüd olmasını dərk etməsinə ehtiyac var. Zaman göstərəcək ki, bu mümkün olacaq, yoxsa yox. Ancaq, biz hər halda öz təklifimizi, öz təşəbbüsümüzü irəli sürmüşük və bu istiqamətdə addımlar atılacaq. Amerikanın Səsi: Müsavat Partiyası qarşıdakı parlament və bələdiyyə seçkilərində iştirak edəcəkmi? Yəni blok halında, yoxsa müstəqil iştirak edəcək? Müsavat Partiyası seçkilərə meyilli bir partiyadır. İsa Qəmbər: Müsavat Partiyası seçkilərə meyilli bir partiyadır. Biz hakimiyyətə gəlməyin seçkidən başqa variantlarını məqbul saymırıq. İstəyirik ki, dəyişikliklər seçki yolu ilə baş versin. Ona görə də, bizdən asılı olsa, biz seçkilərdə iştirak edəcəyik. Amma təbii ki, seçki bir az seçkiyə oxşamalıdır. Heç olmasa müəyyən ilkin şərtlər buna imkan verməlidir. Ən azından seçki komissiyalarında seçkidə iştirak edən qüvvələrin təmsilçiliyi təmin edilməlidir. Seçkidən əvvəl və seçki dövründə seçkidə iştirak edən siyasi qüvvələrin rəqabət şəraiti, bərabər iştirak etmək imkanları olmalıdır ki, o seçkinin də ölkəmizin inkişafı üçün bir anlamı olsun. Cəmiyyətin də buna inanması mümkün olsun. Hər halda görünən odur ki, yaxın aylarda ən azı parlament seçkisi gözlənilir. İlin sonunda da bələdiyyə seçkiləri nəzərdə tutulur. Yenə deyim ki, Müsavat Partiyası seçkidə iştirak etməyə meyillidir. Amma konkret qərar konkret şəraitdə verilir. Ümumiyyətlə partiya qərarlarını bilirsiniz ki, kollegial idarəçiliklə verir. Bu bir adamın idarə etdiyi partiyalardan deyil. Seçkidə necə iştirak edəcəyimiz sualına gəldikdə isə Müsavat Partiyasının yanaşması, bu məsələlərdə demokratik düşərgədəki aparıcı qüvvələrin funksional əməkdaşlığı yanaşmasıdır. Yəni bu ondan ibarətdir ki, hər bir mərhələdə hədəf aydın olanda, o hədəfə doğru gediləcək yolda fikirləri, yanaşmaları eyni olan qüvvələr təbii ki, əməkdaşlıq etməlidirlər. Bu əməkdaşlıq olsa, dəyişikliklər daha rahat, daha sürətlə gedə bilər. Amma bu yenə də Müsavatdan aslı olmayacaq, digər qüvvələrdən də asılı olacaq. Bizim təklif etdiyimiz taktika, üslub digər qüvvələr üçün uyğun olacaqsa, təbii ki nədən əməkdaşlıq olmasın.

Rusiya Qərb qoşunlarının Ukraynaya göndərilməsinə Vaşinqton, Paris və Londona nüvə zərbəsi ilə cavab verəcək. Yenipress.az xəbər verir ki, bunu Rusiya Federasiyası Təhlükəsizlik Şurasının sədr müavini Dmitri Medvedyev deyib. “Qoşunlarınızı Ukraniyaya göndərmək ölkələrinizin birbaşa müharibəyə girməsinə gətirib çıxaracaq, biz buna cavab verməliyik. Və təəssüf ki, bu cavab Ukraynada verilməyəcək.  Bu qlobal fəlakət olacaq. Yeri gəlmişkən, Kennedi və Xruşşov bunu 60 ildən əvvəl başa düşə biliblər. Amma Qərbdə hakimiyyəti ələ keçirmiş indiki axmaq uşaqlar sadəcə başa düşmək istəmirlər”, - o bildirib.

Zaqatala şəhərində yerləşən iaşə obyektlərindən birində 15 nəfər şəxsin qidadan zəhərlənməsi faktı üzrə rayon prokurorluğunda araşdırma aparılır. Bu barədə Baş Prokurorluğun Mətbuat xidmətindən Sozcu.az- a cavab olaraq bildirilib. İlkin ehtimallara əsasən, rayon sakinləri quş əti tərkibli qidadan zəhərlənib. Zəhərlənmənin səbəbinin müəyyənləşdirilməsi məqsədilə iaşə obyektindən qida nümunələri götürülərək müvafiq ekspertizalar təyin edilib və digər zəruri prosessual hərəkətlər yerinə yetirilib.

Sosial xarakterli fövqəladə mühit rejiminin tətbiqi zamanı davranış qaydalarına riayət edilməməsinə görə yeni cərimələr müəyyənləşib. Sozcu.az xəbər verir ki, bununla bağlı Prezident İlham Əliyev İnzibati Xətalar Məcəlləsinə dəyişikliyi təsdiqləyib. Belə ki, sosial xarakterli fövqəladə mühit rejiminin tətbiqi zamanı davranış qaydalarına riayət edilməməsinə görə fiziki şəxslər yüz manatdan iki yüz manatadək, vəzifəli şəxslər üç yüz manatdan altı yüz manatadək məbləğdə cərimə ediləcək. Yaxud işin hallarına görə, xətanı törədənin şəxsiyyəti nəzərə alınmaqla, bir ayadək müddətə inzibati həbs tətbiq olunacaq, hüquqi şəxslər min manatdan min beş yüz manatadək məbləğdə cərimə ediləcək.

Müsavat Partiyası Məclisinin yeni tərkibdə ilk sessiyası mayın 18-də saat 11:00-da keçiriləcək. Müsavat Partiyasından verilən məlumata görə, sessiyada Məclisin sədri, katibi və Divan üzvləri seçiləcək. Namizədlərin irəli sürülməsi prosesi mayın 15-i saat 18:00-dək davam edəcək.

Ukrayna rəsmiləri Rusiya prezidentinin andiçmə mərasimini “düşərgə lotusunun növbəti tacqoyma mərasimi” adlandırıblar. Sozcu.az xarici mediaya istinadən xəbər verir ki, bu bənzətməni Ukrayna prezidenti Vladimir Zelenskinin müşaviri Mixail Podolyak öz “Telegram” kanalında paylaşıb. Vladimir Putini “klassik aztəhsilli diktator” adlandran Podolyak qeyd edib ki, Rusiya azad ölkə deyil və başqalarının qanına susayan, nifrət, paxıllıq kompleksləri olan tam bir diktatura ilə idarə olunur.

Ukrayna Təhlükəsizlik Xidməti Prezident Volodimir Zelenskinin qətlini planlaşdıran Rusiya Federal Təhlükəsizlik Xidməti agentlərini ifşa edib. Onların arasında Rusiya Dövlət Təhlükəsizlik İdarəsinin iki polkovniki də var. Sozcu.az xəbər verir ki, bu barədə Ukrayna Təhlükəsizlik Xidmətindən məlumat verilib. Məlumata görə, Ukrayna əks-kəşfiyyat və Ukrayna Təhlükəsizlik Xidməti müstəntiqləri Rusiya Federal Təhlükəsizlik Xidmətinin Ukrayna Prezidenti Volodimir Zelenskini və dövlətin ali hərbi-siyasi rəhbərliyinin digər nümayəndələrinin qətlləri ilə bağlı planlarının qarşısını alıblar. “Agent şəbəkəsi tərəfindən həyata keçirilməli olan plan Dövlət Təhlükəsizlik İdarəsi və Ukrayna Təhlükəsizlik Xidməti tərəfindən ifşa edilib. Agent şəbəkəsinin tərkibində Rusiya Dövlət Təhlükəsizlik İdarəsinin iki polkovniki də olub ki, Rusiyanın məxfi məlumatlarını “sızdıran” bu polkovniklərin fəaliyyətləri Rusiya Federal Təhlükəsizlik Xidməti tərəfindən Moskvadan idarə olunub”, - deyə məlumatda bildirilib.  Qurumun məlumatına görə, Federal Təhlükəsizlik Xidmətinin kəşfiyyat şəbəkəsinin vəzifələrindən biri Ukrayna prezidentinin təhlükəsizlik əməkdaşlarına yaxın olan hərbçilər arasında Zelenskini girov götürəcək, sonradan da öldürə biləcək icraçıların axtarışı olub. Həmçinin öldürüləcək hədəflər arasında Ukrayna Təhlükəsizlik Xidmətinin sədri Vasili Malyuk, Ukrayna Baş Kəşfiyyat İdarəsinin rəisi Kirill Budanov və digər yüksəkrütbəli məmurlar da olublar. Sui-qəsd üçün Ukrayna rəsmilərinin yerləşdiyi hədəflərə dron hücumları və raket zərbələrinin kombinasiyasından istifadə edilməsi nəzərdə tutulubmuş.

“İrəvan məlum prinsiplər çərçivəsində noyabra qədər Bakı ilə sülh sazişi imzalamağa hazırdır”. Sozcu.az xəbər verir ki, bunu Ermənistanın Baş naziri Nikol Paşinyan mətbuat konfransında bildirib. “Mən noyabra qədər sülh sazişinin imzalanması ideyası ilə razıyam və bunun üçün sazişdə bütün razılaşdırılmış prinsiplər qeyd olunmalıdır”, - Paşinyan deyib.

Gəncə Şəhər Birləşmiş Xəstəxanasının vəzifəli şəxslərinin qanunsuz əməlləri ilə əlaqədar açılmış cinayət işi üzrə xəstəxananın vəzifəli şəxsi həbs olunub. Bu barədə Sozcu.az-a Baş Prokurorluğun Mətbuat xidmətindən məlumat verilib. Bildirilib ki, iş üzrə Məhəbbət Abdullayev və Vidadi Hüseynov təqsirləndirilən şəxs qismində cəlb edilərək onlara Cinayət Məcəlləsinin müvafiq maddələri ilə ittiham elan edilmiş, müstəntiqin vəsatəti və ibtidai araşdırmaya prosessual rəhbərliyi həyata keçirən prokurorun təqdimatına baxan məhkəmənin qərarı ilə hər iki şəxs barəsində ev dustaqlığı növündə qətimkan tədbiri seçilmişdi. Məhəbbət Abdullayev barəsində seçilmiş ev dustaqlığının həbslə əvəz edilməsinə dair ibtidai araşdırmaya prosessual rəhbərliyi həyata keçirən prokuror tərəfindən müvafiq qərardan verilmiş apellyasiya protesti Bakı Apellyasiya Məhkəməsi tərəfindən təmin olunmuş və təqsirləndirilən şəxs barəsində seçilmiş ev dustaqlığı həbs qətimkan tədbiri ilə əvəz edilib.

Ucarda şəxsin iş yerində aldığı xəsarətlərdən ölməsi faktı ilə bağlı cinayət işi başlanıb. Sozcu.az xəbər verir ki, bu barədə Ucar rayon prokurorluğu məlumat yayıb. Qeyd olunub ki, Kəlbəcər rayon sakini 1999-cu il təvəllüdlü Elvin Tağıyevin iş zamanı aldığı xəsarətlərdən mayın 7-də müalicə aldığı xəstəxanada ölməsi barədə rayon prokurorluğuna məlumat daxil olub. Araşdırmalarla Electro-İndustries QSC-nin elektrik quraşdırıcısı vəzifəsində işləmiş Elvin Tağıyevin aprelin 29-da Mingəçevir REŞ MMC-nin Ucar yarımstansiyasında aparılan yenidənqurma işləri zamanı elektrik cərəyanı vurması nəticəsində almış olduğu xəsarətlərdən mayın 7-si müalicə aldığı xəstəxanada ölməsinə əsaslı şübhələr müəyyən edilib. Faktla bağlı Ucar rayon prokurorluğunda Cinayət Məcəlləsinin 162.2-ci (əmək mühafizəsi qaydalarını pozma ehtiyatsızlıqdan insan ölümünə səbəb olduqda) maddəsi ilə cinayət işi başlanıb, ibtidai istintaq davam etdirilir.

Bakıda tixacların aradan qaldırılması üçün Ziya Bünyadov prospektinə paralel olaraq Həsən Əliyev küçəsindən “Koroğlu” metro stansiyasına qədər çəkiləcək yeni yolun məşhur “Keşlə” bazarının ərazisindən keçəcəyi və buna görə də bazarın söküləcəyi haqda məlumat yayılıb. Bu barədə Axar.az-a danışan Azərbaycan Avtomobil Yolları Dövlət Agentliyinin (AAYDA) mətbuat katibi Anar Nəcəfli deyib ki, bu haqda hazırda qəti söz demək çətindir. “Hazırda tikinti ərazisinə düşən yaşayış və qeyri-yaşayış obyektlərinin, həmçinin torpaq sahələrinin ölçüləri hazırlanır. İndiki mərhələdə tikinti altına düşən maneələrin ilkin qiymətləndirilməsi işləri yerinə yetirilir. Bu işlər yekunlaşandan sonra bu barədə dəqiq söz demək mümkün olacaq”, - A.Nəcəfli qeyd edib.

“Trendyol”dan “Kapital Bank” vasitəsilə alış-veriş edən müştərilər hesablarından artıq xərc çıxdığı üçün “Kapital Bank”dan imtina etməklə çox yaxşı ediblər. Qoy cəzalandırılsın. Xüsusən bu cür  kəşbek verən banklar xarici valyuta ilə alışları həddindən artıq pis edirlər. Siz internetdə oturub Mərkəzi Bankın saytı ilə baxıb özünüzdə kalkulyasiya aparırsınız ki, alış nə qədər olacaq. Amma "Kapital Bank” kimi banklar xarici valyutanın kursunu çox pis götürürlər. Bəzən normal kursu 2-3% aşağı götürürlər. Bununla da verdikləri kəşbeki elə müştəridən oradaca tutub geri alırlar. Siz də elə bilirsiniz ki, guya bank sizə kəşbek verir”. Bu sözləri Pravda.az-a açıqlamasında iqtisadçı-ekspert Xalid Kərimli deyib.  Ekspert bildirib ki, bankların hər birinin mobil tətbiqində xarici valyuta kursları haqqında məlumat verilir: “Bu zaman baxmaq lazımdır ki, sizdən lirəni, yaxud rublu, digər valyutanı neçəyə alacaqlar. Buna diqqət etmək lazımdır. Problem də buradan qaynaqlanır. Kəşbek xərcli prosesdir, çünki bankın öz cibindən gedir. Bu səbəbdən bir az yaxşı kəşbek verən banklar çalışırlar ki, hansısa formada onu müştəridən geri alsınlar. Çarpaz satışlar, kredit satışlar və s. ilə valyuta satışını baha etməklə kəşbekləri geri alırlar. Müştərilər “Kapital”dan çıxmaqla düzgün addım atırlar. Bunu müsbət qiymətləndirirəm ki, insanlar artıq rasional xərclərini, gəlirlərini hesablayırlar. Hansı bank sərfəlidirsə, vətəndaşlar onunla işləməlidirlər”. 

Ölkə ərazisində müşahidə olunan yağıntılı hava şəraiti mayın 9-u gündüzədək davam edəcək.  Sozcu.az xəbər verir ki, bu abərədə Milli Hidrometeorologiya Xidmətinin Hidrometeoroloji Proqnozlar Bürosu məlumat yayıb.  “Ayrı-ayrı yerlərdə yağışın leysan xarakterli intensiv olacağı, şimşək çaxacağı, dolu düşəcəyi, yüksək dağlıq ərazilərdə isə qar yağacağı ehtimal olunur. Bakıda və Abşeron yarımadasında mayın 8-i gündüzədək arabir yağış yağacaq. Yarımadanın bəzi yerlərində yağışın intensivləşəcəyi ehtimal olunur. Arabir güclənən şimal-qərb küləyi bu gün gündüz saatlarına qədər tədricən mülayimləşəcək. Bölgələrdə də yağıntıların 9-u gündüz saatlarına qədər tədricən kəsiləcəyi gözlənilir”, - məlumatda qeyd edilib.  Bildirilib ki, Bakıda və Abşeron yarımadasında havanın temperaturu bu gün gündüz saatlarında 13-16, aran rayonlarında 15-20, dağlıq rayonlarında isə 6-11 dərəcə isti olacaq. 

Qusarda 32 yaşlı qadın dəm qazından boğularaq ölüb.  Sozcu.az xəbər verir ki, rayon sakini, 1992-ci il təvəllüdlü Sevda Bədəlova yaşadığı evin hamam otağında dəm qazından zəhərlənərək ölüb.  Araşdırma aparılır. 

Tərtərdə iki məktəbli arasında düşən dava birinin ölməsi ilə nəticlənib. Sozcu.az xəbər verir ki, hadisə Tərtər şəhər 2 saylı məktəbin qarşısında qeydə alınıb.  Belə ki, 9-cu sinif şagirdləri arasında düşən mübahisə zamanı biri digərinə yumuruqla xəsarət yetirib.  Xəsarət alan şəxs dərhal Tərtər Rayon Mərkəzi Xəstəxanasına çatdırılsada, onun həyatını xilas etmək mümkün olmayıb.  Faktla bağlı araşdırma aparılır.(Trend.az) 

Müsavat Partiyasının son qurultayı ətrafında müzakirələr və münasibətlər kifayət qədərdir. Hələ də davam edir. Təbiidir, gözlənilən idi. Müsavat Gənclər Təşkilatında olan seçkilər belə cəmiyyətdə bütün partiyaların sədr seçkilərindən daha ciddi və kütləvi müzakirə olunduğunu bildiyimiz halda, partiya başqanı seçkilərinin hansı səviyyədə müzakirə ediləcəyini hesablamaq elə də çətin deyildi. Ağlı başında olan, nəyin doğru, nəyin səhv olduğunu bilən səmimi insanlar İsa Qəmbərin yenidən Müsavat başqanı seçilməsini bəyənir, alqışlayır, təbrik edir, doğru hesab edirlər. Onların da sayı kifayət qədərdir. Az sayda insan da var, hansılar ki, Müsavat Partiyasına və İsa Qəmbərə qarşı kampaniyalarını hər zaman aparıblar. Onlar bu istiqqmətdə bir növ ixtisaslaşıblar, öz peşələrinə sadiqlik göstərib yersiz böhtan xarakterli kampaniyalarını aparırlar. Bu qara kampaniyanı aparanlar həm də mənim və Fərəc Kərimlinin üzərindən Müsavata, İsa Qəmbərə hücum edirlər deyə, hər birinə ayrı-ayrılıqda cavab verməkdənsə, hamısına bu yazıyla cavab verməyi lazım və doğru hesab etdim. Əslində bu cavabın da onları qane etməyəcəyini bilirəm.  Onların əksəriyyətinin gözünü qərəz və kin o dərəcədə tutub ki, nə cavab versək dayanmayacaq, durmayacaqlar. Yalan deyilirsə, həqiqət də mütləq deyilməlidir. İzləyənlər və obyektiv düşünənlər üçün. Bu yazı əsasən az sayda səmimi tənqidçilər və onlar kimi düşünən oxucular üçündür. Qərəzli olanlar kimlərdir, onları necə müəyyən edə bilərik? 10 ildir Müsavat Partiyasının rəhbərliyində ən yüksək səviyyədə gənclər olaraq təmsil olunuruq. Bu illər ərzində indi “gənclərə yol verilmir”, “irəli çəkilmir” deyənlərdən hər hansı birini göstərə bilərsizmi biz gəncləri dəstəkləyən, təbliğ edən, çıxışlarımızı paylaşan, bizi gənc siyasətçilər olaraq efirlərinə dəvət edən, gördüyümüz işləri qabardan, paylaşan bir fəaliyyətləri olsun? Tam əksinə! Faktlarla da deyə bilərəm ki, həmin şəxslərin önündə gedənlər bizə qarşı ən çirkin kampaniyalar aparıb, haqqımızda olmayanları danışıb, bizi də gözdən salmaqla məşğul olub. Bizə nifrət etdiklərini açıq etiraf edənlər olub. Hətta, “İsa Qəmbəri yalnız ona görə bəyənmirəm ki, Müsavatın rəhbərliyinə mənim xoşum gəlməyən insanların gəlməsinə şərait yaratdı” deyənlər olub. Müsavat Partiyasına hər hansı mövzuda müsahibə üçün, efir üçün müraciət ediləndə partiya başqanı Arif Hacılı səviyyəsində dəfələrlə onlara məni və digər dostlarımıza müraciət etmək məsləhət edilsə də, “gənc siyasətçiləri efirə dəvət edin” deyilsə də hər dəfə müxtəlif bəhanələrlə onlar bu təkliflərdən boyun qaçırıblar. “Ad çək” deyən olmasın deyə qərəzlilərindən və öndə gedənlərindən birinin adını çəkim. Sevinc Osmanqızı. Bir neçə dəfə bu kimi təkliflərdən müxtəlif bəhanələrlə imtina edib. Hətta bir dəfə təxminən belə bir cavab verdiyini xatırlayıram ki, biz yeni siyasətçilərlə deyil, tanınmışlarla müsahibələr edirik. Başqa bir faktı deyim, mitinqlərin birində obyektiv müşahidəçilərin etiraflarına görə ən parlaq çıxış edən biri olaraq mənim çıxışım video yazılardan kəsilərək müxtəlif xaricdə və daxildə fəaliyyət göstərən internet tv-lərin efirlərindən nümayiş edilmişdi. Son parlament seçkilərində ölkə üzrə ən parlaq seçki kampaniyası aparan gənc namizədlərdən biri olsam da  o mövzuda mənimlə bağlı bir cümlə səsləndirməyənlər indi güya məni və Müsavatı çox sevən oldular? Nə dəyişdi? Digərləri də gənclərə təxminən oxşar münasibət göstərib. İndi güya gəncləri düşünən, vacib hesab edən, dəstəkləyən, sevən olublar. Başqa partiyalara qarşı niyə belə münasibət yoxdur, onlarda gənclərə niyə yol verilmir deyib kampaniya aparılmır onu da bilirik. Sədr postuna da deyil, ikinci partiya vəzifəsinə, Ali Məclis sədrliyinə seçkilərdə yaşlı və heç populiyar olmayan yaşlı siyasətçiyə, nisbətən tanınan gənc siyasətçinin uduzdurulduğu partiyada da bəzi üzvlər sən demə Müsavatda gəncləri dəstəkləyirmiş, biz bilməmişik. Həmin zaman o partiyaya qarşı “gənclərə niyə yol vermirsiz?” deyə kiminsə yazdığına da rast gəlmədik. Daha hədsiz kin və nifrətlə bəslənən, həyatlarını intiriqalarla, ona buna söz atmaqla sürənlərə, onlar Müsavat və ya İsa Qəmbər əlehinə 1 gün yazmayanda təəccüblənən gənclər onların adını tağ etməklə bizə söz atıb statuslarda ələ saldıqlarına, ələ salındıqlarını başa belə düşməyənlərə cavab verməyi ümumiyyətlə lazım bilmirəm. Səmimi olaraq gəncləşmə, yenilənmə istəyənlərə tam səmimi olaraq deyirəm bizə partiya başqanı olmaq üçün ən yüksək səviyyədə təkliflər edilib, şəxsən İsa bəy də belə bir təklifi tam ciddi şəkildə şəxsi söhbətlərdə, daxili müzakirələrdə və ictimai qaydada efirlərdən səsləndirib. Bilməyinizi istəyirəm ki, İsa Qəmbərin yenidən Müsavat başqanı olması təklifi ilk dəfə potensial ən gənc namizədlər, bizlər tərəfindən səsləndirilib və dəstəklənib. Eləcə də mümkün namizədlər tərəfindən bu təklif birmənalı dəstəklənib, ən doğru hesab edilib. Müsavat Partiyasının başqanlığına mən niyə namizəd olmadım? Cavabım qısa və konkretdir. Mən düşünmürəm ki, indiki çətin və mürəkkəb dövrdə mən İsa Qəmbər qədər Azərbaycan cəmiyyəti və Müsavat Partiyası üçün faydalı ola bilərdim. Sizi əmin edirəm, əgər mən və ya başqa bir gənc dostumiz Müsavat başqanlığına namizəd olsaydı, seçilsəydi İsa Qəmbərə hücum edənlər daxil olmaqla 10 dəfə çox insan indi bizim əleyhimizə döşəyirdi. Gələk sona, bir partiyanın rəhbərini həmin partiyanın üzvləri, qurultay nümayəndələri seçir. Demokratiya istəyirik deyənlərin tam demokratik seçkinin nəticələrini dartışması məncə səmimi deyil. Müsavat Partiyasının gəncləşməsini, yenilənməsini istəyən səmimi insanlara burdan müraciət edirəm, gəlin qoşulun sıralarımıza, uğurlu bildiyiniz başqa gəncləri, xanımları da dəvət edək sıralarımıza 4 il sonra qurultay nümayəndəsi seçilin, gənclərdən birinin və ya özünüzün namizədliyinizi verin təbliğat aparın dəyişiklik edin. İndi isə bu çətin mərhələdə ən doğru seçim İsa Qəmbər idi, biz də onu seçdik. Hər kəsə sevgi və hörmətlə. Səxavət Soltanlı

Bu gün səhər saatlarından Rusiya sülhməramlılarının növbəti hərbi yük maşınlarından ibarət karvanı Xocalı aeroportundakı ərazini tərk edib. Sozcu.az APA-ya istinadən xəbər verir ki, sülhməramlılar Goran dəmir yolu stansiyasına hərəkət edib. Avtomobillər Rusiyaya göndərilmək üçün Goran dəmir yolu stansiyasında qatarlara yüklənir.

Mayın 6-sı saat 18:00-a olan məlumata əsasən əvvəlcədən xəbər verildiyi kimi, Gədəbəy, Quba, Şəki, Qax, İmişli, Biləsuvar, Neftçala, Sabirabad, Cəfərxan, Astara, Yardımlı, Lerik, Lənkəranda yağış, Şahdağda zəif qar yağıb. Bu barədə Sozcu.az-a Milli Hidrometeorologiya Xidmətindən məlumat verilib. Qeyd olunub ki, şimal-qərb küləyi Bakıda və Abşeron yarımadasında 17 m/s-dək güclənib. Neft Daşları stansiyasının məlumatına əsasən dalğanın hündürlüyü 3.4 metrdir. Havanın temperaturu Bakıda və Abşeron yarımadasında 15, Naxçıvan MR-da 9, Aran rayonlarında 22, dağlıq rayonlarda 13 dərəcəyədək isti olub.

Son vaxtlar sosial şəbəkələrdə bəzi psixoloqların boşanmış və ya boşanmaq istəyən qadınlara tamamilə yanlış yol göstərdiyi ilə bağlı iddialar səslənir. Onlar psixoloqların qadınları səhv addım atmağa sövq etdiyini bildirirlər.  Məsələ ilə bağlı Yenisabah.az-a danışan psixoloq Aytən Ələkbərova bu cür psixoloqların kifayət qədər çox olduğunu bildirib:  “Son dövrlər boşanmaların sayının artması ilə qeyri-peşəkar “psixoloqlar” da artıb, mən onları psixoloq belə adlandıra bilmirəm, onlar sadəcə danışmaqla insanları yanlış yola aparırlar. Bu da ondan irəli gəlir ki, həmin şəxsin özünün əxlaqı keyfiyyətləri formalaşmayıb.  Boşanmaq niyyəti olan xanımın müraciətində öncə onun psixi xüsusiyyətini müəyyən edirik, biz onun psixi xüsusiyyətinə görə, onu narahat edə biləcək problemi tapıb önyarğıya çəkirik”.  A.Ələkbərova bildirib ki, öncə pasiyentin psixi durumuna baxılmalı, daha sonra ona düzgün yol göstərilməlidir. Onun sözlərinə görə, 85 faiz hallarda boşanmaq istəyən pasiyentlərini bu fikirdən döndərə bilir:  “Bu gün 3 uşağı olan qadın boşanmaq qərarına gəlirsə, əvvəlcə bilmək lazımdır ki, problem nədir. Əgər səni yoldaşının kobud rəftarı narahat edirsə, nəzərə almalısan ki, sabah boşansan 3 uşağı damın altında qoyub gedib haradasa çalışmalısan ki, o uşaqlara baxa biləsən. Hansı daha çətindir? Biz gələn insana bu sualı veririk.  Bu sualları verdikdən, qarşımızdakı şəxsin psixoloji temperamentini öyrəndikdən sonra ona yardım edirik. 26 ildir ki, bu peşədəyəm. Yanıma boşanma ilə bağlı gələn pasiyentlərin 85 faizinə ailəni möhkəmləndirməyi məsləhət görmüşəm. Ailədə qalıb bir-birinizi tanıdıqca, bir-birinizin psixi xüsusiyyətlərinə alışdıqca, ortada yaranan konfliktləri dərk edərək qəbul etdikdə boşanma ehtiyacı azalır. Yanıma gələn pasiyentlər bunu anladıqca, boşanmadan vaz keçirlər. 85 faiz hallarda bu, belə olur. Digər 15 faiz isə vaz keçmir, çünki buna ciddi səbəblər olur: ya o şəxsiyyət pozuntusundan əziyyət çəkən birinin yanındadır və ya həyat yoldaşı narsist, narkoman, iqraman, kliptoman biridir. Bu kimi hallarda həmin şəxsin yanında qalıb sabah hansısa faciənin baş verməyini gözləmək lazım deyil. Belə situasiyalarda artıq çıxış yolu yoxdur və boşanma mütləqdir. Amma sıradan səbəblərdən ötrü buna gərək yoxdur.  Bəzən elə qadınlar gəlir ki, deyir sizdən əvvəl başqa psixoloqda oldum, dedi ki, ailəni dağıtma, amma sənin də yaşamağa haqqın var. Baxın, öz əxlaqını formalaşdıra bilməyən biri, sabah övladlarına necə tərbiyə verəcək”. 

Ölkədə ipoteka ilə mənzil almaq, sözün əsl mənasında müşkülə çevirilib. İpoteka ödənişlərinin və faizlərin yüksək olması əksər vətəndaşlar üçün çıxılmaz vəziyyət yaradır. Kredit müddəti uzandıqda isə, ödəniləcək məbləğin dəyəri faizlərlə birlikdə alınan mənzilin ümumi dəyərindən minimum 2 dəfə daha baha olur. 100 min manat civarında olan mənzilin ipoteka ilə qiyməti təxminən 200 manata başa gəlir.  Bəs buna səbəb nədir?  Mövzu ilə bağlı Yenisabah.az-a danışan iqtisadçı-ekspert Rəşad Həsənov bildirib ki, bu digər ölkələrlə müqayisədə Azərbaycanda ipoteka faizlərinin xeyli yüksək olması ilə bağlıdır:  “Bu məsələyə 2 aspektdən baxmaq lazımdır. Birincisi, Azərbaycanda ipoteka faizlərinin yüksək olması məsələsidir. Ölkəmizdə ipoteka faizləri olduqca yüksəkdir. Biz alternativ bazarlarla müqayisə etsək, dünya ortalaması təxminən 2.62 faizdir. Bu Avropa ölkələrində 2, 2.5 faiz, ABŞ-da isə 3 faiz ətrafında olur. Azərbaycanda isə ipoteka faizləri Avropa və ABŞ-dan olduqca yüksəkdir. Bunun səbəbi vəsaitin xərci məsələsidir. Çünki İpoteka Fonduna yalnız güşətli ipotekanın verilməsi məqsədi ilə vəsait ayrılır və bu maksimum 4 faizlə olur. Adi ipoteka üçün isə vəsait bazardan cəlb edilməlidir. Cəlb edilən vəsaitin isə xərci vardır. Bu gün ölkədə uçot faiz dərəcəsi 7.25 faizdir. Hansı ki bəzi ölkələrdə bu rəqəm  0, 0.5 faiz ətrafında dəyişir. Belə olduğu təqdirdə daha aşağı xərclə vəsait cəlb etmək olur. Amma Azərbaycanda mövcud maliyyə mənbələrinin imkanlarını nəzərə alsaq, İpoteka Fondu bu vəsaiti cəlb edəndə daha yüksək faizlərlə cəlb etmiş olur. Burada xərclər onun üzərinə əlavə edilir”.  Ekspert qeyd edib ki, ipoteka kreditinin müddətinin uzanması pulun öz dəyərini itirməsi ilə nəticələnir: “Bildiyiniz kimi, burada prosesi icra edən tərəf banklardır. Banklar uzunmüddətli dövrdə məsuliyyəti tam üzərinə götürür. Çünki bizdəki dövlət ipoteka mexanizminə görə, məsuliyyət və ipotekanın gələcəyi tam olaraq bank sektoruna transformasiya olunur. Bank sektoru risklərə görə məsuliyyət daşıyır. Bu məsuliyyətin qarşılığında təbii ki, bank da 3-4 faizli marjasını ipotekanın üzərinə əlavə edir. Pul uzunmüddətli dövrdə öz dəyərini itirir. Biz mənzil alarkən vətəndaşın 2 dəfə daha artıq pul ödədiyini deyirik, amma 25-30 il ərzində həmin vəsaitlər olduqca dəyərsizləşir. Belə olduqda vətəndaşın 120 min manata aldığı mənzil 30 il sonra 250-300 min manat olur. Bununla bağlı hansısa addımlar atmaq olar. Bu barədə resurslar araşdırılmalıdır. Faizlərin aşağı düşməsi üçün dövlət hesabına olan təminata daha çox üstünlük verilməlidir”. 

Bakıda və Abşeron yarımadasında mayın 7-si səhərədək şimal-qərb küləyinin 15-20 m/s, bəzi yerlərdə arabir 23-25 m/s-dək güclənəcəyi gözlənilir. Bu barədə Sozcu.az-a Milli Hidrometeorologiya Xidmətindən xəbər verilib. Qeyd olunub ki, mayın 6-sı axşamdan 8-i gündüzədək fasilələrlə yağış yağacağı gözlənilir. Yarımadanın bəzi yerlərində qısa müddətə intensivləşəcəyi, şimşək çaxacağı ehtimalı var. 7-si axşam yağıntıda fasilə olacaq.

10:18 Rusiyanın Belqorod vilayətinə növbəti PUA hücumu edilib. Sozcu.az xəbər verir ki, bu barədə Rusiya Teleqram kanalları məlumat yayıb. Məlumata görə, Ukrayna PUA-sı Borisovsk rayonunda “Aqro-Belqorye” şirkətlər qrupuna məxsus maşına çırpılıb. Nəticədə 33 nəfər yaralanıb, 6 nəfər ölüb. *** Belqorod vilayətinin qubernatoru Vyaçşeslav Qladkov yaralıların sayının 35-ə çatdığını bildirib: “Şirkət işçilərini aparan iki “Qazel” və minik avtomobili Ukrayna Silahlı Qüvvələrinin hücumuna məruz qalıb. Hadisə Borisovsk rayonunun Berezovka kəndi yaxınlığında baş verib. Təəssüf ki, partlayış nəticəsində 6 nəfər aldığı xəsarətlərdən yerindəcə ölüb”.

Azərbaycan və Ermənistan xarici işlər nazirləri Ceyhun Bayramov və Ararat Mirzoyanın Qazaxıstanın Almatı şəhərində görüşünün tarixi bəlli olub. Sozcu.az xəbər verir ki bu barədə Azərbaycan XİN-in sözçüsü Ayxan Hacızadə məlumat yayıb. Onun sözlərinə görə görüş mayın 10-da Almatıda baş tutacaq.