Bakıdakı ermənilərin məhkəməsi davam edir

Hərbi cinayətlər törətməkdə təqsirləndirilən erməniəsilli şəxslərin cinayət işi üzrə məhkəmənin baxış iclası keçirilir. Sozcu.az xəbər verir ki, proses Bakı Məhkəmə Kompleksində Bakı Hərbi Məhkəməsinin hakimi Zeynal Ağayevin sədrliyi ilə baş tutur. Xatırladaq ki, ötən prosesdə zərərçəkmiş şəxslər ifadə verib. Qeyd edək ki, onlar Ermənistan dövləti və onun silahlı qüvvələri, o cümlədən Ermənistan tərəfindən Azərbaycanın işğal olunmuş ərazilərində yaradılmış qondarma Dağlıq Qarabağ respublikası və onun qanunsuz silahlı birləşmələri tərəfindən Azərbaycana və xalqına qarşı sülh və insanlıq əleyhinə cinayətlər, müharibə cinayətləri, o cümlədən təcavüzkar müharibə aparma, soyqırımı, əhalini məcburi köçürmə, təqib, işgəncə, hərbi soyğunçuluq və digər qanunsuz əməllərdə təqsirləndirilirlər. Xatırladaq ki, Ermənistan Respublikası və onun silahlı qüvvələri, o cümlədən Ermənistanın yaratdığı qanunsuz “Dağlıq Qarabağ respublikası” və onun qanunsuz silahlı birləşmələr tərəfindən törədilən cinayətlərdə ittiham olunan 15 nəfər - Harutyunyan Arayik Vladimiri, Qukasyan Arkadi Arşaviri, Sahakyan Bako Sahaki, İşxanyan Davit Rubeni, Manukyan David Azatini, Babayan Davit Klimi, Mnatsakanyan Levon Henrikoviç, Beglaryan Vasili İvani, Qazaryan Erik Roberti, Allahverdiyan Davit Nelsoni, Stepanyan Qurgen Homeri, Balayan Levon Romiki, Babayan Madat Arakeloviç, Martirosyan Qarik Qriqori, Paşayan Melikset Vladimiriyə qarşı Azərbaycan Respublikası Cinayət Məcəlləsinin 100 (təcavüzkar müharibəni planlaşdırma, hazırlama, başlama və aparma), 102 (beynəlxalq müdafiədən istifadə edən şəxslərə və ya təşkilatlara hücum etmə), 103 (soyqırımı), 105 (əhalini məhvetmə), 106 (köləlik), 107 (əhalini deportasiya etmə və ya məcburi köçürmə), 109 (təqib), 110 (insanları zorakılıqla yoxa çıxarma), 112 (beynəlxalq hüquq normalarına zidd azadlıqdan məhrumetmə), 113 (işgəncə), 114 (muzdluluq), 115 (müharibə qanunlarını və adətlərini pozma), 116 (silahlı münaqişə zamanı beynəlxalq humanitar hüquq normalarını pozma), 118 (hərbi soyğunçuluq), 120 (qəsdən adam öldürmə), 192 (qanunsuz sahibkarlıq), 214 (terrorçuluq), 214-1 (terrorçuluğu maliyyələşdirmə), 218 (cinayətkar birlik (təşkilat) yaratma), 228 (qanunsuz olaraq silah, onun komplekt hissələrini, döyüş sursatı, partlayıcı maddələr və qurğular əldə etmə, başqasına vermə, satma, saxlama, daşıma və gəzdirmə), 270-1 (aviasiya təhlükəsizliyinə təhdid yaradan əməllər), 277 (dövlət xadiminin və ya ictimai xadimin həyatına sui-qəsd etmə), 278 (hakimiyyəti zorla ələ keçirmə və onu zorla saxlama, dövlətin konstitusiya quruluşunu zorla dəyişdirmə), 279-cu (qanunvericiliklə nəzərdə tutulmayan silahlı birləşmələri və qrupları yaratma) və digər maddələri ilə ittiham olunurlar.

Bərdədə dəhşət - Həyətə gedib geri qayıtmadı...

Bərdə sakinini elektrik cərəyanı vuraraq öldürüb. Sozcu.az xəbər verir ki, 1964-cü il təvəllüdlü Feyruz Salahov öz evinin həyətində elektrik naqili ilə ehtiyatsız davranıb. Nəticədə onu elektrik cərəyanı vuraraq öldürüb. Report )

Novxanıda dənizdə batan iki nəfərin meyiti sudan çıxarılıb

Abşeronda dənizdə batan iki nəfərin meyiti sudan çıxarılıb. Bu barədə Sozcu.az-a Fövqəladə Hallar Nazirliyindən məlumat verilib. Bildirilib ki, nazirliyin "112" qaynar telefon xəttinə Abşeron rayonu, Novxanı kəndində dənizdə nəzarətsiz ərazidə 2 nəfərin batması barədə məlumat daxil olub və dərhal FHN-in Kiçikhəcmli Gəmilərə Nəzarət və Sularda Xilasetmə Dövlət Xidmətinin dalğıc-axtarış qrupları tərəfindən axtarışlara başlanılıb. Dalğıc-xilasedicilər tərəfindən vətəndaşlar - 2003-cü il təvəllüdlü Əliyev Rəvan Şahin oğlunun və 2009-cu il təvəllüdlü Cabbarov Əli Elşən oğlunun meyiti suda tapılıb çıxarılaraq aidiyyəti üzrə təhvil verilib.

Prokurorluq məsciddə öldürülən şəxslə bağlı məlumat yaydı - YENİLƏNİB

İyulun 26-da saat 05 radələrində Suraxanı rayonu, Bülbülə qəsəbəsi ərazisində yerləşən “İmamzadə” məscidində 1990-cı il təvəllüdlü Nadir Səfərovun öldürülməsi barədə rayon prokurorluğuna məlumat daxil olub. Suraxanı rayon prokurorluğundan Sozcu.az-a bildirilib ki, ilkin araşdırmalarla 1996-ci il təvəllüdlü Elvin Məmmədovun bıçaqla xəsarətlər yetirərək Nadir Səfərovu qəsdən öldürməsinə əsaslı şübhələr müəyyən edilib. Faktla bağlı Suraxanı rayon prokurorluğunda Cinayət Məcəlləsinin 120.1-ci (qəsdən adam öldürmə) maddəsi ilə cinayət işi başlanıb, E.Məmmədov iş üzrə şübhəli şəxs qismində tutulub.

Şəmkirdə uşaq əyləncə mərkəzlərini özəlləşdirən kimlərdir?

Şəmkir Şəhər Mərkəzi Parkındakı attraksionlar və uşaq əyləncə alətləri kim tərəfindən özəlləşdirilib ? Şəmkir rayonunda əsas istirahət məkanlarından biri Şəmkir Şəhər Mərkəzi Parkıdır. Vaxtilə bu park öz gözəlliyi və cəlbediciliyi ilə regionda birinci idi. Sonrakı illərdə parkda müəyyən bərpa və abadlıq işləri aparılıb. Mətbuatda getmiş məlumatlara baxsaq 2023-cü ildə mərkəzi parkda aparılmış abadlıq işləri çərçivəsində parkın elektrik və işıqlandırma sistemi yenidən qurulmuş, sıradan çıxmış lampalar yeniləri ilə əvəz olunmuş, işıq dirəkləri, o cümlədən skamyalar, tullantı qabları təmir olunaraq rənglənmişdir. Bununla yanaşı Şəmkir Şəhər Mərkəzi Parkında əvvəllər mövcud olmuş velosiped yolu bərpa edilərək asfalt örtüyü salınmış, müvafiq xətlər çəkilmişdir. İlk dəfə olaraq parkda kiçik yaşlı sakinlərin əyləncəsi üçün uşaq oyun meydançası, eyni zamanda digər yaş qruplarından olanların sağlam həyat tərzinin təmin olunması üçün açıq idman meydançası yaradılıb, idman qurğuları quraşdırılıb. Mətbuatda getmiş məlumatlarda attraksionlar və uşaq əyləncə alətləri haqqında heç bir məlumat yoxdur. Bildiyimiz kimi bir neçə ildir ki, onlar fəaliyyətini dayandırıb. Müəyyən açıqlamalarda oxuyuruq ki, onlar özəlləşdirilib və özəlləşdirən şəxsin qərarı əsasında fəaliyyətini bərpa edə bilər. İndi sual doğurur dövlətin parkının attraksionlarının satılmasına səbəb nə olub ?  Azərbaycanın ən böyük rayonlarından birinin Mərkəzi Parkında uşaqların istirahəti   hansı səbəbdən bir şəxsin keyfinə, istəklərinə həvalə edilib ?   Parkadakı attraksionları, uşaq əyləncə alətlərini alan adı açıqlanmayan x şəxs kimdir? Həmin şəxsin Şəmkir rayonu kimi böyük bir rayonun Mərkəzi Parkını bu vəziyyətə salmasında məqsədi nədir? Ceyhun Nəbi, "Sozcu.az"saytının redaktoru 

Tramp əsəbidir, Putinin addım atmasını gözləməkdən yorulub - Rubio

ABŞ prezidenti Donald Tramp Rusiya hakimiyyətinə qarşı səbrini itirir, çünki Ukrayna müharibəsinin dayandırılması ilə bağlı danışıqların ləngiməsi onu narahat edir. Sozcu.az xəbər verir ki,bu barədə ABŞ-ın dövlət katibi Marko Rubio Fox News telekanalında çıxışı zamanı bildirib. Dövlət katibi qeyd edib ki, Tramp sülh razılaşmasına nail olmaq və nəhayət Rusiyanın Ukraynaya qarşı müharibəsini bitirmək istəyir. Lakin Rubionun sözlərinə görə, hazırda ABŞ prezidenti getdikcə daha da əsəbiləşir, çünki Vladimir Putinlə aparılan müsbət telefon danışıqları real nəticə vermir. “O, səbrini və Rusiya tərəfinin hər hansı addım atmasını gözləmə əzmini itirir”, – deyə Rubio vurğulayıb.

Rusiyanın şok itkiləri

Ukrayna müharibənin 1250-ci günü üçün Rusiya ordusunun itkiləri haqda məlumatı yeniləyib. Sozcu.az xəbər verir ki, bu barədə Ukrayna Baş Qərargahı məlumat yayıb. Məlumata əsasən, Rusiya indiyə qədər 1 049 250 hərbçi, 11 057 ədəd tank, 23 063 ədəd zirehli döyüş maşını, 30 822 ədəd artilleriya sistemi, 1 449 ədəd RYAS (reaktiv yaylım atəş sistemi), 1 201 hava hücumundan müdafiə sistemi, 421 ədəd hərbi təyyarə, 340 ədəd helikopter, 56 493 ədəd avtomobil texnikası, 48 158 ədəd PUA, 3 546 qanadlı raket, 28 gəmi/kater, 1 sualtı qayıq, 3 935 xüsusi avadanlıq itirib.

İranda iki siyasi fəal edam edildi

İranda ölüm cəzasına məhkum edilən siyasi fəallar – Mehdi Həsəni və Bəhruz Ehsani İslamlu edam ediliblər. Sozcu.az xəbər verir ki, bu barədə İran mətbuatı məlumat yayıb. Məlumata görə, onlar bu gün səhər İran Ali Məhkəməsində cinayət işi üzrə tam mühakimə və hökmün təsdiqindən sonra asılıblar.

Britaniyalılar Rusiyanı ən böyük düşmən elan etdilər

Britaniyalıların 65%-i Rusiyanı öz ölkələrinin əsas düşməni hesab edir. Sozcu.az xəbər verir ki, bu barədə “More in Common” analitik mərkəzinin araşdırmasında deyilib. Aşardırmaya görə, britaniyalılar Rusiyadan sonra İranı (51 faiz) və Çini (33 faiz) özlərinə düşmən görürlər.

Azərbaycanda bir gündə ikinci zəlzələ oldu

10:09 Yerli vaxtla saat 5:46-da Xəzər dənizində 3,2 maqnitudalı zəlzələ olub. Sozcu.az xəbər verir ki, bu barədə AMEA nəzdində Respublika Seysmoloji Xidmət Mərkəzinin Zəlzələlərin Tədqiqatı Bürosu məlumat yayıb. Məlumata görə, zəlzələ ocağı 68 kilometr dərinlikdə yerləşib. *** Zaqatala-Qax sərhədində zəlzələ olub. Sozcu.az xəbər verir ki, bu barədə Respublika Seysmoloji Xidmət Mərkəzi məlumat yayıb. Bildirilib ki, zəlzələ yerli vaxtla 04:59-da 3.3 maqnitudalı və 17 km dərinlikdə qeydə alınıb.

Kiməm mən?

Zülmətdən yol soruşduqca, Duman ilə qovuşduqca, Bir çınqıdan alışdıqca- Səda qopdu öz içimdən: – Kiməm mən? Durulmayır, qara qanım, Nə evim var, nə ünvanım. Sıxıldıqca hər an canım- Səda qopdu öz içimdən: – Kiməm mən? Könlüm içində min qapı, Gəlmir ələ açam sapı. Odda yandırdım tamahı – Səda qopdu öz içimdən: – Kiməm mən? Əvvəl harda, son hardadı? Meşə yanır, qar dagdadı. İsmət gedir, ar dardadı – Səda qopdu öz içimdən: – Kiməm mən? Haqq arayan bir bəndəyəm, Dərd, qəm soyan bir rəndəyəm. Bilməm məndə, ya səndəyəm- Səda qopdu öz içimdən: – Kiməm mən? Zakir İsmayil

Yavan çörəklə imtahana çəkilənlər...

Zəngin ölkənin yoxslluqda üzülənləri... Yavan çörəklə imtahana çəkilənlər... Birbaşa mətləbə keçirəm. Şair-jurnalist olaraq düşünürəm ki, illərdir üzləşdiyim bir çox ədalətsizliyə, qarşılaşdığım haqsızlığa görə ana VƏTƏNi tərk etmək zamanı çatıb. Səbr kasası dolub daşır daha...  Azərbaycan adlı məmləkətin nəfiskar məmurları düzələn deyil heç vaxt... Çünki var-dövlət, milyonlar, milyardlar  yığmaqdan ac gözləri doymur... Nə vaxtadək zəngin neft-qaz ölkəsində sürünərək məşəqqət içində yaşamalıyıq? Biz kirayə daxmalarda çərləyib çürüyürük, məmurlar, vəzifəli şəxslər isə bər-bəzəkli villada lüks, komfortlu həyat yaşayırlar.  Vətəndaş kimi, şair-jurnalist kimi, ziyalı xanım kimi Azərbaycanın vəzifəli şəxslərindən, məmurlarından o qədər ədalətsizlik, o qədər haqsızlıq görürəm ki... Bu ədalətsizliyə, bu haqsızlığa etiraz olaraq qəti qərara gəlmişəm ki, ana dediyim, əziz bildiyim, çox sevdiyim doğma VƏTƏNimi tezliklə tərk edib Avropaya köçüm. Məncə çıxış yolu ancaq budur. Çünki korrupsioner, oliqarx məmurlarnan mübarizə aparmaq qətiyən mümkün olmur. Neynəyim axı, çox-çox əlacsız, çıxılmaz bir vəziyyətdəyəm. Məmurlarınsa vecinə deyil. Bir çox məmurlar, vəzifəli şəxslər neçə ildir ki, korrupsiya içində üzür. Kasıb, yoxsul XALQın sosial-iqtisadi durumu isə çox dəhşətli dərəcədə acınacaqlı gündədir. Xalq yoxsulluq girdabında əzab-əziyyət çəkir.  Pul-para, sərvət toplamaqdan gözü heç vaxt doymur bu nəfsiiti, pulpərəst məmurların... Xalq da ac-yalavac, səfalət içində, dilənçi günündə sürünə-sürünə ömür sürür... Zavallı XALQ. Niyə axı bu günlərə düşdün? Ağlamalı gününə ağlaya bilməyən XALQ... Dözülməz həyatını sakitcə seyr edən XALQ. Hüququ pozulanda, haqqı əziləndə susan Xalq.  Acı reallıq... Daha nə deyək ki...  Sözün bitdiyi andı. XATİRƏ ƏZİZ Rəhimli Şair-jurnalist

Bu ağacın dərdi nədir görəsən?

Bu ağacın dərdi nədir görəsən? Gövdəsinə xırda-xırda xal düşür. Əsə-əsə soyuqlara tələsən, yaşıllığı quraqlıqda büzüşür. Bu ağacın dərdi dərə qədərdi. Qabığından soyulubdur budağı. Ömrü solur, üstü başı kədərdi, saplağlndan qopub  düşür yarpağı. Bu ağacın təpəsindən qəm yağır, Torpağında çən bağlayır kökləri. Bu ağacın dərdi payız boydadı, Payızın da yoxdu bundan xəbəri. Bu ağacın xal-xal olan gövdəsi, yara-yara yaraların yarğanı. Ağır-ağır solğunlaşan nəfəsi, tükəndikcə soyuq alır cahanı. Bu ağaca balta çalan ağacın, yox xəbəri, öz-özünü dağlayır. Ömür adlı ötüb keçən sayğacın, əqrəbini dəmir əllə bağlayır. Bu ağacın ömrü-günü tükənir. sola-sola dərd qurudur canını. Bu ağacın dərdi dünya qədərdi, Günü doğmaz, bir də görməz danını. Bu ağacla nəfəs alan nəfəslər, nəfəs -nəfəs nəfəsləri tükətir. Ağaclara odun deyən nakəslər, odun-odun kainatı qətl edir. Bu ağacın dərdi nədir bilirsən? Yerin Göyün qan bürümüş çöhrəsi. Nəfəs verib nəfəsini dilərsən, görərsən ki, ölüm udmuş nəfəsi. Bu ağacı yol eylədim gözümə, Gecə-gündüz dayanmadan yürüdüm. Bu ağacdan yolum döndü özümə, Ah eylədim, öz ömrümə büründüm. Reyhana Aslan

Zelenski azad edilən ərazidən danışdı

Təkcə son 24 saat ərzində 51 şiddətli toqquşma olub. Ukrayna bölmələri öz mövqelərini müdafiə edir və işğalçıların hər bir üzvünün məhvi çox dəyərlidir. Sum vilayətində aktiv fəaliyyətimiz davam edir və mən Rusiya qüvvələrini tədricən sıxışdırıb çıxaran hər bir qüvvəmizə minnətdaram. Sozcu.az xəbər verir ki, bunu Ukrayna Prezidenti Vladimir Zelenski bildirib. Onun sözlərinə görə, Rusiyanın Sum vilayəti ilə bağlı planını pozmaq mümkün olub, lakin bu bölgə ruslar üçün prioritet ərazilərdən biri olaraq qalır: "Bizim qüvvələrimiz ardıcıl olaraq Rusiyanın sərhəd bölgəsindən Suma dərin irəliləyiş cəhdlərinin qarşısını alır. Həmçinin biz Rusiya ərazisində əməliyyatları davam etdiririk". Qeyd edək ki, Ukrayna ordusu Sum vilayətinin Kondratyevka yaşayış məntəqəsini işğaldan azad edib.

Rusiya Ermənistandakı bazasına çox sayda hərbi texnika və sursat daşıyır...-KİV

“Gümrüdəki mənbələrimiz bildirir ki, son həftələr Gümrüdə yerləşən 102-ci Rusiya hərbi bazasına çoxlu sayda hərbi texnika və sursat gətirilib". Sozcu.az xəbər verir ki, bunu "Hraparak” qəzeti yazır. "Hər gün yüklə dolu bir neçə yük təyyarəsi enir. Bu əlavə silah-sursat daşınmasının məqsədinə gəlincə, Gümrüdə  bu haqda yalnız fərziyyələr dolaşır", -deyə davamında bildirən erməni nəşri Rusiya bazası ətrafında baş verənlərlə bağlı bir neçə versiya sadalayır: "Biri odur ki, Rusiya hakimiyyətinin Ermənistanı buraxmaq məsələsi ilə bağlı soyuqqanlı davranışı sadəcə görüntüdür, əslində, reallıqda ruslar müxtəlif hadisələrin baş verməsi ehtimalı qarşısında “sığortalanırlar". Üstəlik, bizə dedilər ki, Ermənistan hakimiyyətinin bundan xəbərsiz olması demək olar ki, mümkün deyil. Sadəcə olaraq, "kosmik" suverenliyə malik Ermənistan Respublikası hökumətinin bu haqda danışmağa cəsarəti çatmır", -deyə Ermənistan qəzeti vurğulayır.

İran sərhədində silahlı qarşıdurma: 1 sərhədçi öldü

Ötən gün İran-İraq sərhədində silahlı qarşıdurma olub. Sarıdaş (Sərdəşt) bölgəsində yerləşən “Ağlan” sərhəd-keçid məntəqəsində SEPAH qüvvələri ilə PJAK (PKK-nın İran qanadı) arasında silahlı toqquşma baş verib. Sozcu.az xəbər verir ki, bu barədə İran Hüquq-Müdafiə Təşkilatı yayıb. Atışma nəticəsində Miandoab (Qoşaçay) Polis Şöbəsinin zabiti Meysəm Kəbiri həlak olub, daha iki sərhədçi isə yaralanıb. Qeyd edək ki, bir neçə gün əvvəl Banə sərhəd bölgəsində də iki silahlı qarşıdurma qeydə alınıb. Nəticədə 3 polis əməkdaşı həyatını itirib , 2 nəfər isə yaralanıb.

Azərbaycanda bu ərazilərdə də yanğın başladı

Ağdərə rayonu Talış, Goranboy rayonu Tapqaraqoyunlu kəndləri istiqamətində yanğınlar başlayıb. Sozcu.az Report-a istinadla xəbər verir ki, səhər saatlarında başlayan yanğınlar küləyin təsiri ilə geniş əraziyə yayılıb. Yanğın əsasən quru ot və kolluq ərazidədir. Hadisə yerinə FHN-nin yanğınsöndürən briqadaları cəlb edilib. Yanğının geniş əraziyə yayılmasının qarşısı almaq məqsədilə tədbirlər görülür.

Bəzi ərazilərə leysan yağır

İyulun 26-sı saat 10:00-a olan məlumata əsasən, bəzi yerlərdə şimşək çaxır, arabir leysan xarakterli yağış yağır. Bu barədə Sozcu.az-a Milli Hidrometeorologiya Xidmətindən məlumat verilib. Düşən yağıntının miqdarı Qaxda 5, Bakıda və Abşeron yarımadası, eyni zamanda Yevlaxda 3, Gədəbəy, Daşkəsən, Naftalan, Şəki, Oğuz, Zaqatala, Tərtər, Bərdə, Qazax, Ağstafa, Şəmkir, Tovuz və Mingəçevirdə 1 mm-dir. İyulun 25-də havanın maksimal temperaturu Bakıda və Abşeron yarımadasında 35, Naxçıvan MR-da və Aran rayonlarında 39, dağlıq rayonlarda isə 29 dərəcəyədək isti qeydə alınıb.

Türkiyədə 2 hərbçi qızdırmadan öldü

Türkiyədə İsgəndərun Dəniz Alay Təlim Komandanlığında ibtidai hərbi hazırlıq keçən 7 hərbçi qızdırma səbəbindən xəstəxanaya yerləşdirilib, onlardan ikisi bu gün vəfat edib. Sozcu.az xəbər verir ki, bu barədə Türkiyə Milli Müdafiə Nazirliyi məlumat yayıb. Qeyd edilib ki, digər 5 nəfərin müalicə davam etdirilir.

HƏMAS razılığa gəlmək istəmir, liderləri də... - Tramp

HƏMAS atəşkəs və girovların azad edilməsi ilə bağlı razılığa gəlmək istəmir. Sozcu.az xəbər verir ki, bu sözləri ABŞ Prezidenti Donald Tramp deyib. O bildirib ki, HƏMAS liderləri təqib edilməlidirlər. Qeyd edək ki, ötən gün həm ABŞ, həm də İsrail Qətərdə HƏMAS-la danışıqlar aparan vasitəçiləri geri çağırıb.

Ruhunuz şad olsun, dövlət quran babalarımız

Bir yaz günü Kəlbəcərə gedirdim. Tərtərdən Ağdərəyə keçəndə, yolun kənarından bir az aralıda, yeni tikilən bir evin həyətində yaşlı bir kişinin böyük bir həvəslə ağac əkdiyini gördüm. Maşını saxlayıb bir müddət onu izlədim. Əlləri torpağa bulaşmışdı, amma üzündə qəribə bir rahatlıq, bir sevinc vardı. Yaxınlaşıb dedim: – İçin avand olsun, əmi. O da gülümsəyərək cavab verdi: – Çox sağ ol, bala. Keç bəri, gedək evə, qonağım ol. Təşəkkür edib, maraqla soruşdum: – Əmi, Allah sizə ömür versin, çox həvəslə ağac əkirsiniz. İnşallah, bəhrəsini görərsiniz. Ağsaqqal dayanıb mənə baxdı. Gözlərində dərin bir fikir vardı. Sakitcə dedi: – Bala, bu yurdu övladım üçün qururam. Bu ağacları da onun və onun övladları üçün əkirəm. Bax o çinarları yurdun kənarına əkirəm ki, bir neçə nəsil onların kölgəsində oturub mənim ruhuma dua etsin. O an hiss etdim ki, bu sadə ağsaqqal dediyi sözlə bir fəlsəfə, bir həyat anlamı söylədi. Onun dediklərini yazı ilə ifadə etmək çətindir. Hər sözündə bir nəsil, dərin bir məna yatırdı. Dövlət də həmin o çinar kimidir. Onu əkənlərin çox zaman ömrü kölgəsində sərinləməyə çatmaz. Amma nəsillər onun bəhrəsini görər. Bəziləri anlayar, bəziləri isə “belə ağac əkərlər? ” deyə, qınayar... Dövlətin nə olduğunu həqiqətən anlayan, onun varlığı üçün canını fəda edən insanlar bilirlər ki, bəzən qurduqları dövlətin nemətini görməyə ömürləri çatmayacaq. Bəlkə də adı onların, dadı başqalarının olacaq. Amma yenə də canla-başla qururlar o dövləti. Həyatlarını, nüfuzlarını, bəzən də ailələrini övladlarını qurban verirlər. Çünki dövlət beş illik, on illik söyüd ağacı deyil. Dövlət yüz illər, min illər üçün qurulan yurddur. Bu kişilər nə qurduqlarını çox gözəl bilirlər.  O, fədakar insanlar bilirlər ki, dövləti risqə atmadıqları üçün  cəmiyyət onları anlamayacaq, hətta bəzən daş-qalaq edəcəklər. Amma onlar yenə də "təki dövlət yaşasın" deyib, sinələrini daşların qabağına verirlər. Əbülfəz Elçibəy kimi... Bu gün anlayanlar da var, hələ düzgün başa düşməyənlər də. Amma əminəm ki, çox tezliklə bu xalq o çinarların kölgəsində oturub “ruhunuz şad olsun, biz sizi anlamamışıq, dövlət quran babalarımız” deyəcəklər. Onu da deyim ki, yol kənarında əkilən çinarları quruduğunu görüb, onların dibinə su tökməyən hər kəs, çinarların qurumasında günahkardır.   Ruhunuz şad olsun, dövlət quran babalarımız. Elşən Əlisoy, "Sozcu.az" saytının rəhbəri

Şamaxıda ana və qızını maşın vurdu

Şamaxıda magistral yolun şəhər ərazisindən keçən hissəsində yol qəzası olub. Sozcu.az xəbər verir ki, maşın yolu keçmək istəyən piyadalar 46 yaşlı Kəmalə Rəfiyeva və onun 18 yaşlı qızı Leyla Rəfizadəni vurub. Müxtəlif dərəcəli ağır xəsarətlər alan piyadalar şəhər mərkəzi xəstəxanasına çatdırılıb.

20 yaşlı oğlan kanalda batdı

Sabirabadda 20 yaşlı oğlan kanalda batıb. Sozcu.az xəbər verir ki, hadisə Qaragüney kəndində qeydə alınıb. Kənd sakini Səfərağa Musayev suvarma kanalında boğulub.  Hazırda onun axtarışları davam edir. 

Sənədi var, amma satıla bilməz – Bu torpaq elanlarına ALDANMAYIN!

“Bəzən torpaq sahələrinin qeydiyyatında və hüquqi sənədləşmələrində ciddi uyğunsuzluqlar müşahidə olunur. Bu uyğunsuzluqlar, əsasən, illər öncə aparılmış natamam və ya qeyri-dəqiq sənədləşmələrin nəticəsində meydana çıxır. Vaxtilə buraxılmış texniki qüsurlar bu gün torpaq sahələrinin yenidən araşdırılmasına və təkrar yoxlanmasına səbəb olur. Məhz bu səbəbdən bir çox vətəndaşın əlində olan torpaq sənədləri, torpağın faktiki mövcudluğu ilə uyğun gəlmir və nəticədə ciddi narazılıqlar yaranır”. Bu fikirləri Yenisabah.az-a açıqlamasında əmlak eksperti Elnur Azadov bildirib. Qeyd edib ki, bəzi hallarda kadastr sənədləri vətəndaşlara verilsə də, həmin sənədlərdə koordinatların yanlış göstərilməsi, ölçülərin qeyri-dəqiq olması və torpağın yerləşdiyi real coğrafi mövqeyin düzgün müəyyənləşdirilməməsi nəticəsində ərazilərdə 200-400 metrə qədər fərq qeydə alınır: “Bu cür uyğunsuzluqlar, əsasən, köhnə sənədlərdə daha çox müşahidə olunur. Nəticədə bir çox ərazidə torpaq sahəsi kiçik olsa da, həmin sahəyə bir neçə vətəndaşın iddiası yaranır, çünki torpağın sərhədləri bir-birinin ərazisinə düşür. Belə vəziyyətlərdə torpaq sahiblərinin hüquqları pozulur, bəzən isə bir şəxsin torpaq sahəsi həm yola, həm də qonşulara aid ərazilərə düşür.  Bu cür hallarla qarşılaşan vətəndaşlar aidiyyəti qurumlara müraciət etdikdə, onlara bildirilsə də ki, məsələ araşdırılır və uyğunsuzluq var, praktiki olaraq bu işlər illərlə uzanır və problem öz həllini tapmır. Ərazilərin yenidən ölçülməsi, kadastr xəritələrinin yenilənməsi və müvafiq hüquqi dəqiqləşdirmələrin aparılması isə kifayət qədər vaxt və resurs tələb edir”. E.Azadov vurğulayıb ki, bəzi hallarda torpaq sahələrinin koordinatları o qədər uyğunsuzluqla göstərilib ki, nəticədə həmin sahələr faktiki olaraq bir neçə kilometr sürüşmə ilə başqa bir əraziyə düşür: “Bu sürüşmə torpaq sahəsinin yolun kənarında, meyilli ərazidə və ya çətin relyefli yerdə yerləşməsinə görə daha da dəyişkən ola bilir. Belə hallarda 4-5-6 sotluq fərdi sahələrin sərhədləri bir-birinin ərazisinə qarışır, bəzən isə tamamilə digər şəxslərə məxsus torpağın üzərinə düşür. Bütün bu səbəblər nəticəsində bir çox vətəndaşlar aldıqları torpaq sahəsində ev tikmək, sənədləşmə işlərini tamamlayaraq hüquqi mülkiyyətlərini rəsmiləşdirməkdə ciddi çətinliklərlə qarşılaşırlar. Bu isə onların illərlə yığdığı vəsaiti risk altına atır, eyni zamanda sosial və hüquqi münaqişələrin yaranmasına səbəb olur”.