Aprelin 6-da İranın Azərbaycandakı fövqəladə və səlahiyyətli səfiri Seyid Abbas Musəvi Xarici İşlər Nazirliyinə çağırılıb. Sozcu.az xəbər verir ki, görüş zamanı İran səfirinə son zamanlar ölkəsi tərəfindən Azərbaycana münasibətdə nümayiş etdirilən təxribat xarakterli fəaliyyətə görə qəti narazılıq bildirilib. İran Səfirliyinin 4 əməkdaşının diplomatik statusa uyğun olmayan və Diplomatik Əlaqələr haqqında 1961-ci il Vyana Konvensiyası ilə ziddiyyət təşkil edən fəaliyyətinə görə Azərbaycan hökuməti tərəfindən “persona-non-grata” (arzuolunmaz şəxs) elan edildiyi İran səfirinin diqqətinə çatdırılıb. Həmin şəxslərin 48 saat ərzində Azərbaycan ərazisini tərk etməsi tələb edilib.

"Bizim azad olmağımız azadlığın Moldovada, Gürcüstanda və Belarusda mütləq bərqərar olacağına zəmanətdir" "Düşmən müstəqilliyimizi dəfn etmək və Rusiya məkanında milli mədəniyyətlərimizi əridib yox etmək istəyir. Amma biz çiyin-çiyinə möhkəm dayanmışıq!.." Ukrayna prezidenti Vladimir Zelenski aprelin 5-də Polşa parlamentinin hər iki palatasının deputatları, Ukrayna və Polşa ictimaiyyəti nümayəndələrinin qarşısında çıxış edib. Öz nitqində o, dünyaya Ukraynaya dəstəyi gücləndirməyə çağırış edib, Polşaya ardıcıl həmrəyliyinə görə minnətdarlığını bildirib və Ukraynanın Rusiya üzərində qələbəsinin labüdlüyünə əminliyini bəyan edib. Sozcu.az xəbər verir ki, bu barədə "QORDON" internet nəşri məlumat yayıb. Zelenskinin nitqini kiçik ixtisarla təqdim edirik. "Böyük Polşa xalqı və böyük Ukrayna xalqı bu gün çiyin-çiyinə azadlıq, möhtəşəm tarix və yaxınlaşdırdığımız qələbə ruhu ilə birləşib! Biz, ukraynalı və polyaklar, bir-birimizi çoxdan tanıyırıq. İndi isə Polşa paytaxtının ürəyində ukraynalı ürəklər polyak ürəklərinin hər birinə müraciət edir. Hər dəfə Ukrayna bayrağı Ukrayna torpağında özünün tamamilə qanuni yerinə dönəndə, rusiyalı işğalçı qaçıb gedəndə, Polşa bayrağı da möhkəmlənir. Mənim üçün burada olmaq böyük şərəfdir. Ukrayna və Polşanın ürəkləri azadlıq uğrunda, dövlətlərimizin müstəqilliyi, ümumi evimiz olan doğma Avropamız uğrunda döyünür və biz qalib gələcəyik! Azad Polşa və azad Ukrayna heç vaxt süqut etməyəcək. Bizim xalqlarımıza nəzarət edən və bizim nə istədiyinizi anlamayan yad hakimiyyət iflasa uğrayıb. Bu gün biz birlikdə dayanmışıq! Ukrayna və Polşa, Avropa və azad dünya bir yerdədir!  Düşmən müstəqilliyimizi dəfn etmək və Rusiya məkanında milli mədəniyyətlərimizi əridib yox etmək istəyir. Biz isə çiyin-çiyinə möhkəm dayanmışıq və bütün bu müsibətlər Rusiya imperializminin özünə qayıdacaq! Polşa, biz səninlə yan-yana Avropada azadlığı həmişəlik bərqərar edəcəyik. Tiraniya Ukraynada məğlub olandan sonra tarixdə məğlub olacaq. Moskva öldürməyəcək, Peterburq bölməyəcək. Bunlar daha heç vaxt olmayacaq! Bu şanlı meydanda və Polşanın Ukraynanın digər meydanlarında, eləcə də Ukraynanın bütün maydanlarında Rusiya bizim qələbəmizdən sonra daha heç vaxt olmayacaq! Bu qələbəyədək çoxmu addımlar qalıb? Yox. Amma bunun üçün dayanmadan həmrəylik lazımdır. Döyüş artilleriya tələb edirsə, onu vermək lazımdır. Qələbə tanklar tələb edirsə, onların gurultusu ön cəbhədən eşidilməlidir. Müstəqillik hava tələb edirsə, Rusiyanın bizim təyyarələrə necə reaksiya verməsinə diqqət yetirmək lazım deyil, "F" hərfinin yanında 16 və ya  hansısa başqa bir rəqəmin təhlükəsiz olduğunu düşünmək lazım deyil. Hərəkət etmək gərəkdir! Sizin tank koalisiyasında liderlik nümunəsi göstərdiyiniz kimi.  İnanıram ki, bu, aviasiya koalisiyasında da özünü büruzə verəcək. Çünki bu, azadlıq uğrunda döyüşdür və bu döyüşü qismən udmaq mümkün deyil! Bu yaxınlarda Varşavada bizim azadlıq mübarizəmiz üzrə güclü müttəfiqimuz ABŞ prezidenti Bayden çıxış edərək deyib: "Azadlıq" sözündən şirin söz yoxdur. Azadlıqdan başqa xeyirxah məqsəd yoxdur. Azadlıqdan başqa yüksək niyyət yoxdur!". Biz azad olacağıqsa, Avropa İttifaqının qonşu ölkələrində də azadlığın möhkəm olacağına zəmanət olacaq. Biz azad olacağıqsa, hamı daha güclü olacaq. Biz azad olacağıqsa, azadlığın Moldovada, Gürcüstanda, Belarusda da mütləq bərqərar olacağına zəmanət demək olacaq. Və tarixi ədalət bərpa ediləcək!"

Türkiyədə müxalif Cümhuriyyət Xalq Partiyasının (CHP) İstanbul vilayət təşkilatının binasına silahlı hücum edilib.  Sozcu.az xəbər verir ki, bu barədə tviter səhifəsində CHP İstanbul təşkilatının sədri Canan Kaftancıoğlu məlumat verib.  O bildirib ki, binaya doğru 6-7 dəfə atəş açılıb. Güllələr tapılmasa da, boş gilizlər aşkarlanıb.  "Prokurorluq hadisə ilə bağlı təhqiqatı davam etdirir. Yeni məlumatlar paylaşılacaq", - deyə CHP təmsilçisi qeyd edib.  Xatırladaq ki, bundan əvvəl İYİ Partiyanın İstanbul təşkilatının binasına silahlı hücum olmuşdu. 

"Vətəndaş və İnkişaf Partiyası (VİP) fəaliyyətini dayandırmayacaq”.  Bunu Qaynarinfo-ya açıqlamasında partiyanın təşkilatı işlər üzrə sədr müavini Zaur Qasımov deyib.  O bildirib ki, "Siyasi partiyalar haqqında” yeni qanun layihəsinin tələblərinə uyğun qeydiyyatdan keçmək üçün bütün sənədlər aidiyyatı qurumlara təqdim olunacaq:  "Vətəndaş və İnkişaf Partiyasının hər hansı partiyaya birləşmək kimi bir fikiri yoxdur. Başqa bir partiyadan da VİP-ə birləşməklə bağlı təklif gəlməyib. Belə bir təklif gələrsə onu müzakirə edərik”.  Qeyd edək ki, Vətəndaş və İnkişaf Partiyası 28 may 2006-cı ildə Əli Əliyevin rəhbərliyi ilə yaradılıb. İlk qurultayda sədr seçilən Əli Əliyev 2021-ci ildə Qaraheybət aviasiya poliqonunda baş verən helikopter qəzasında yaralanan polkovnik-leytenant Emil Cəfərov və kapitan Ramin Ədilov tərəfindən xüsusi ittiham qaydasında məhkəməyə verilib. Cinayət Məcəlləsinin 147.1-ci (Böhtan) maddəsi ilə ittiham olunan partiya sədri 3 il 6 ay müddətə azadlıqdan məhrum edilib.

Rusiya generallarının 2023-cü ildə istefası daha çox olacaq, çünki ordu Kremlin Donbasdakı hədəflərinə çata bilmir. Sozcu.az xəbər verir ki, bu barədə Britaniya Müdafiə Nazirliyinin hesabatında qeyd olunub. “Rusiya sosial şəbəkələri Müdafiə Nazirliyinin böyük ehtimalla general-polkovnik Rüstəm Muradovu Ukraynadakı Şərq Qüvvələr Qrupunun komandanı vəzifəsindən azad etdiyini yazır. Muradovun komandan olduğu qrup son aylarda müstəsna dərəcədə böyük itkilər verib, Uqledar şəhərini ələ keçirməyib. Hazırda o, 2023-cü ildə işdən çıxarılan ən yüksək rütbəli Rusiya hərbçisidir. Çox günan ki, bunlar çoxalacaq. Çünki Rusiya Donbasdakı hədəflərinə çata bilməyib”, - məlumatda qeyd olunub.

Aprelin 6-da Bakı şəhəri 20 nömrəli məktəb-liseyin bufetindən toyuq əti alan uşaqlarda qarın ağrısı əlamətləri müşahidə olunub. Bakı Şəhəri üzrə Təhsil İdarəsindən verilən məlumata  görə, məktəb rəhbərliyi tərəfindən təcili-tibbi yardım çağırılıb, şagirdlər dərhal müvafiq səhiyyə müəssisəsinə çatdırılıb: "Həmçinin məktəb rəhbərliyi tərəfindən aidiyyəti dövlət qurumlarına və şagirdlərin valideynlərinə məlumat verilib. Hazırda uşaqların vəziyyəti qənaətbəxşdir". Qeyd edək ki, məktəb-liseydə iaşə xidmətini təşkil edən “Tais ikf” MMC-dir. İaşə xidməti göstərən qeyd olunan şirkətin fəaliyyətinə aidiyyəti qurumlar tərəfindən müvafiq nəzarət olunur.

Ermənistanda ehtiyatda olan hərbçilər təlim-məşq toplanışına çağırılıb. Sozcu.az xəbər verir ki, bu barədə hökumətin bu gün keçirilən iclasında qərar qəbul olunub. Təlim-məşq toplanışında 2431 sıravi və kiçik rütbəli zabit, 124 rütbəli zabit, 160 çavuş iştirak edəcək. Təlimlər mayın 1-dən iyulun 7-dək keçiriləcək.

Türkiyədə Çanaqqala vilayətinin Biga rayonunda sərnişin avtobusu qəzaya uğrayıb. Sozcu.az xəbər verir ki, bu barədə TRT məlumat yayıb. Məlumata görə, qəza nəticəsində 17 nəfər yaralanıb. Yaralılar Biga Dövlət Xəstəxanasına aparılıb.

Koronavirus pandemiyasına görə artıq 3 ildir, Azərbaycan quru sərhədlərini bağlayıb. Ölkəyə yalnız hava yolu ilə gəlib-getmək mümkündür. Ümumdünya Səhiyyə Təşkilatı rəsmisi pandemiya ilə bağlı vəziyyətin normal olduğunu deyib. Quru sərhədlərinin bağlı olması səbəbindən ticarət, turizm sahəsində durğunluq yaranıb. Bəs, bu vəziyyət Azərbaycan iqtisadiyyatına necə təsir göstərir? Mövzu ilə bağlı "İqtisadi və Sosial Araşdırmalara Yardım” İctimai Birliyinin sədri, iqtisadçı ekspert Əyyub Kərimli Bakupost.az -a aşıqlamasında bildirib ki, quru sərhədləri mütləq açılmalıdır: "Azərbaycanda quru sərhədlərin uzun müddət bağlı olması iqtisadiyyata mənfi təsir göstərir. Bu həm ticarətin, həm də turizm sektorunun inkişafına mane olur. Azərbaycanda pandemiyadan sonra turizm səfərlərinin sayı xeyli azalıb. Bizim turizm sektorunun əsas səyahətçiləri Rusiya, Gürcüstan və Türkiyədən gəlirdi. Quru sərhədlərin bağlı olması ilə yanaşı təyyarələrin qiymətinin baha olması da turistlərin səfərlərinin sayına mənfi təsir göstərir. Turizm sektorunda bu cür problemlərin yaranması sözsüz ki, həm xidmət sektoruna, həm otelçilik, həm nəqliyyat, həm də daxili ictimai iaşə sektoruna öz mənfi təsirini göstərib”. İqtisadçı qeyd edib ki, dünyanın heç bir yerində quru sərhədlərin bağlı qalması məsələsi yoxdur. Azərbaycanda hələ ki mayın 1-nə qədər karantin rejimi uzadılıb: “Quru sərhədlərinin bağlı olması sərhədyanı bölgələrdə yaşayan insanların maddi durumuna da mənfi təsir göstərir. Belə ki, o bölgələrdə yaşayan vətəndaşlarımız əsasən qonşu dövlətlərlə alış-veriş edirdilər. Sərhədlərin bağlı olması onların sahibkarlıq fəaliyyətlərinə və şəxsi büdcələrinə təsirsiz ötüşmür. Bu, bütün sərhəd boyu bölgələrin sakinlərinin qonşu ölkələrlə bazarlıq, ərzaq alış-verişi və digər hər hansı tələbatlarını təmin etməyinin qarşısını alır”.

Martın 30-da Azərbaycan Ordusu yeni Laçın yolunun istifadəyə verilməsi ilə əlaqədar Laçın rayonunun Cağazur və Zabux kəndləri arasında yerləşən bir neçə hakim yüksəkliyi, əsas və yardımçı yolları, eləcə də sərhədboyu geniş sahələri nəzarətə götürüb. Azərbaycan artıq Ermənistanla Qarabağ icması arasında hərbi logistik əlaqələri kəsib və bufer zona yaradıb. Bəs, Ermənistan irəliləyən vəziyyət fonunda prosesə beynəlxalq iştirakçılar cəlb edərək sülh danışıqlarını uzada bilərmi? Mövzu ilə bağlı siyasi ekspert Azər Qasımlı Bakupost.az -a açıqlamasında bildirib ki, hətta Ermənistan bu gün Azərbaycanın ərazi bütövlüyünü tanısa, Qarabağı Azərbaycan ərazisi kimi qəbul etsə rus hərbi kontingenti oradan çıxmayacaq: “Əlverişli hərbi vəziyyət 44 günlük müharibədən sonra necə idisə indi də elə qalıb. Rus hərbi kontingenti yenə də Qarabağdadı, ermənilər və ruslar yenə də Laçın dəhlizindən istifadə edirlər. Bu məsələləri Ermənistanla yox, Rusiya ilə danışmaq lazımdır. Qarabağ mövzusunu kənara qoyub Ermənistanla sülh müqaviləsi imzalamalıyıq. Bunda hər iki tərəf maraqlı olmalıdır. Qarabağ mövzusunu isə birbaşa Rusiya prezidenti Vladimir Putunlə danışmalıyıq. Çünki orda prosesə nəzarət edən Rusiyadır. Qarabağdakı 4-5 erməni rus hərbi kontingenti nə diktə edirsə o cür davranırlar. Kontingent Qarabağdan çıxmalıdır”. Azər Qasımlı qeyd edib ki, sülh müqaviləsinin imzalanması üçün fürsət yaranıb: “Sülh müqaviləsinin imzalanması üçün gözəl bir imkan, yaxşı bir platforma vardı. Avropa Birliyinin moderatorluğu ilə baş tutacaq Brüssel platformasından istifadə eləmək lazım idi. Təəssüflər olsun ki, biz ondan imtina etmişik. Hesab edirəm ki, Azərbaycan rəhbərliyi ilə bu şanslardan istifadə etməlidir. Avropa Birliyinin təklif etdiyi platformadan imtina etmək yox, əksinə onu qəbul edib bu prosesi irəlilətmək lazımdır. Azərbaycan 44 günlük müharibənin qalib tərəfi kimi davranmalıdır. Azərbaycanın rəsmi ritorikası sülhə dəvət edən ritorika olmalıdır. Bununla Ermənistan rəhbərliyini və erməniləri heç də sülhpərvar kimi qələmə vermək istəmirəm. Onlar sadəcə oyundan kənarda qalıblar. Çox ümid edirəm ki, həm Azərbaycan həm Ermənistan rəhbərliyi hansısa formada özlərində güc tapıb Rusiyanın əsrlərdir burda apardığı oyunun, siyasətin qurbanı olmadan ortaq məxrəcə gələcəklər. Ermənistan tərəfi gözəl başa düşür ki, artıq Qarabağ məsələsi nəzarətindən çıxıb. Burda top daha çox Azərbaycanla Rusiyanın sahəsindədir”.

Nərimanov rayon Cümə məscidi (keçmiş Əbu Bəkr məscidi) yaxın zamanda fəaliyyətə başlayacaq. Sozcu.az Trend-ə istinadən xəbər verir ki, bunu jurnalistlərə açıqlamasında Dini Qurumlarla İş üzrə Dövlət Komitəsinin sədri Mübariz Qurbanlı deyib. Onun sözlərinə görə, məsciddə təmir işləri Bakı Şəhər İcra Hakimiyyəti tərəfindən həyata keçirilir və məscidin yaxın zamanlarda açılışının olması gözləniləndir. Qeyd edək ki, ibadət ocağının əsası 1997-ci ildə qoyulub. Məscidin memarı sovet modernizminin görkəmli nümayəndəsi Tələt Xanlarov olub.

Beynəlxalq axtarışa verilmiş şəxs Moldovadan Azərbaycana ekstradisiya edilib. Bu barədə Sozcu.az-a Baş Prokurorluğun Mətbuat xidmətindən bildirilib. Belə ki, Baş Prokurorluğun Beynəlxalq hüquqi əməkdaşlıq idarəsinin vəsatəti əsasında Moldova Respublikasının Baş Prokurorluğu tərəfindən “Mülki, ailə və cinayət işləri üzrə hüquqi yardım və hüquqi münasibətlər haqqında" 22.01.1993-cü il tarixli Konvensiyaya əsasən Türkiyə Respublikasının vətəndaşı Kıvcı Abdulkadirin ekstradisiyası haqqında qərar qəbul edilib. Belə ki, Dövlət Gömrük Komitəsinin Əməliyyat-İstintaq Baş İdarəsində istintaq olunan cinayət işi üzrə Kıvcı Abdulkadirin qabaqcadan əlbir olduğu bir qrup şəxslə qaçaqmalçılıq yolu ilə ölkəyə gətirilən külli miqdarda dərman vasitələrinin qanunsuz dövriyyəsini təşkil etməsinə əsaslı şübhələr müəyyən edildiyindən Cinayət Məcəlləsinin 200-1.2.2, 200-1.2.3 və 206.3.2-ci maddələri ilə təqsirləndirilən şəxs qismində cəlb olunaraq barəsində beynəlxalq axtarış elan edilib. Kıvcı Abdulkadir Moldova Respublikasının ərazisində saxlanılaraq aprelin 5-də Ədliyyə Nazirliyi Penitensiar Xidmətin xüsusi konvoyunun müşayiəti ilə ölkəmizə gətirilib.

“Lotu Quli”nin ən sadiq adamlarından olan “Vəhşi Arman” ləqəbli Arman Cumagəldiyevin həbs müddəti yenidən uzadılıb. Sozcu.az xəbər verir ki, bu barədə Almatı Şəhər Məhkəməsinin mətbuat xidməti məlumat yayıb. Bildirilib ki, Cumagəldiyevin həbs müddəti daha iki ay uzadılıb. “Almatı İxtisaslaşdırılmış Rayonlararası İstintaq Məhkəməsinin 6 aprel 2023-cü il tarixli qərarı ilə ibtidai istintaq orqanının vəsatəti təmin edilib və Cumagəldiyevin həbs müddəti 2023-cü il iyunun 7-dək uzadılıb”, – məlumatda deyilir. Qeyd edək ki, 2022-ci il yanvarın 7-də Qazaxıstan Respublikasının Daxili İşlər Nazirliyi kriminal avtoritet “Vəhşi Arman”ın Almatıda saxlanılması barədə məlumat yayıb. Arman Cumagəldiyevlə birlikdə onun qruplaşmasının üzvü olduğu ehtimal edilən daha 5 nəfər saxlanılıb. Baş Prokurorluğun məlumatına görə, kriminal avtoritet yanvar iğtişaşları zamanı insanları oğurlayıb.

Mərkəzi Nəbatat Bağında aparılan yenidənqurma işləri ilə əlaqədar Botanika İnstitutu köçürüləcək. Sozcu.az xəbər verir ki, bu barədə sosial şəbəkələrdə məlumat yayılıb. Bildirilir ki, yeni lahiyəyə əsasən, Mərkəzi Nəbatat Bağında aparılan yenidənqurma işləri institutun köçürülməsi məsələsini reallaşdıracaq. Məsələ ilə bağlı Botanika İnstitutun icraçı direktoru Şakir Qasımov Qaynarinfo-ya açıqlamasında məlumatı təsdiqləyib: “Belə bir məlumat var, amma hələ dəqiqləşməyib”.

Paşinyan Azərbaycanla sərhəddəki vəziyyətin xeyli yaxşılaşdığını bildirib. Sozcu.az xəbər verir ki, bunu Ermənistanın Baş naziri Nikol Paşinyan aprelin 6-da hökumətin iclasında deyib. “Sərhədin mühafizəsi prosesinin dərhal başlanması zamanı xəritələrdə uyğunsuzluqların olduğu müəyyən edilib. Bu məlumatı Ermənistan Təhlükəsizlik Xidməti verib. Məlumata görə, buna görə problemlər yaranıb. Müəyyən ərazilərdə Azərbaycan tərəfi Ermənistan sərhədlərinin 100-300 metr dərinliyində qoşun yeridib və mühəndis işləri aparıb. Bundan sonra hər iki tərəfin kartoqraflarının vəziyyəti aydınlaşdıracağına dair razılıq əldə olunub. Xüsusən, 12 km-dən 7 km-də mövqelər dəqiqləşdirilib, 5 km-də işlər davam etdirilir. Ümid edirəm ki, dispozisiyaların dəqiqləşdirilməsi işi konstruktiv şəraitdə aparılacaq. Ən azından bizim münasibətimiz belədir”, – Paşinyan deyib.

Meyxanaçı Rəşad Əmirovun (Rəşad Dağlı) cinayət işi üzrə məhkəmənin hazırlıq iclasının vaxtı məlum olub.  Sozcu.az xəbər verir ki, cinayət işi üzrə məhkəmənin hazırlıq iclası aprelin 17-nə təyin edilib.  Cinayət işi baxılması üçün Bakı Ağır Cinayətlər Məhkəməsininə göndərilib. İş araşdırılması üçün hakim Leyla Əsgərova-Məmməfovanın icraatına verilib. İttihama görə, ötən ilin noyabrın 9-da, saat 05 radələrində 1979-cu il təvəllüdlü İskəndər Mehtiyevin öldürülməsi barədə rayon prokurorluğuna məlumat daxil olub. Aparılmış araşdırmalarla zərərçəkmişin tanışı, 1984-cü il təvəllüdlü Rəşad Əmirovun şəxsi münasibətlər zəminində aralarında yaranmış münaqişə zamanı bıçaqla çoxsaylı xəsarətlər yetirərək İskəndər Mehtiyevi qəsdən öldürməsinə əsaslı şübhələr müəyyən edilib. Rəşad Əmirov şübhəli şəxs qismində tutularaq istintaqa cəlb edilib. Rəşad Dağlının qətlə yetirdiyi şəxslə bağlı bəzi məqamlar üzə çıxıb. Meyxanaçının bıçaqladığı 1979-cu il təvəllüdlü İsgəndər Mehdiyev xeyli vaxt həbsxanada olub. Hadisəyə isə İsgəndərin Rəşad Dağlının arxasınca söyüş söyməsi səbəb olub. Rəşad Dağlı İsgəndərlə məsələyə aydınlıq gətirmək üçün onu görüşə çağırıb və noyabrın 9-da, səhər saat 05 radələrində hər iki şəxs Lökbatan qəsəbəsində görüşüblər. Şəxsi münasibətlər zəminində baş vermiş münaqişə zamanı Rəşad Dağlı İsgəndəri bıçaqlayaraq öldürüb. Qeyd edək ki, Rəşad Dağlının qətlə yetirdiyi İsgəndər Mehtiyev Cinayət Məcəlləsinin 234.4.3 (külli miqdarda narkotik vasitələrin qanunsuz dövriyyəsi) maddəsi ilə uzun müddət həbsdə olub. O, təxminən hadisədən 15 gün əvvəl cəzasını başa vuraraq azadlığa buraxılıb. İsgəndər Mehtiyev azadlığa buraxıldıqdan sonra dəfələrlə Rəşad Dağlıya zəng vuraraq onunla mübahisə edib. Rəşad Əmirov Cinayət Məcəlləsinin 120.1-ci (qəsdən adam öldürmə) maddəsi ilə ittiham olunur.

Aprelin 5-dən 6-a keçən gecə Tehranın Şər-i Ziba bölgəsində hökumətə qarşı etiraz aksiyaları keçirilib. Sozcu.az xəbər verir ki, aksiyalar 2022-ci ilin sentyabr ayında hökumət məmurları tərəfindən öldürülən Həmid Rza Ruhi adlı gəncin doğum günü münasibətilə keçirilib. Etirazçılar "Xamenei, bu qiyam sona çatmayacaq" , "Bu il sistemin son ilidir" kimi şüarlar səsləndiriblər.

Azərbaycandan Macarıstana ixrac olunacaq qazın həcmi açıqlanıb. Sozcu.az xəbər verir ki, bu barədə Macarıstanın xarici işlər və ticarət nazir Peter Siyarto Tbilisidə keçirilən Yaşıl Enerji Dəhlizi Forumunda çıxışında deyib. O bildirib ki, Azərbaycanla təbii qazın idxalı ilə bağlı - bu il üçün təxminən yüz milyon kubmetr həcmində qaz - siyasi razılıq əldə olunub. "Lakin sonradan bu, uzunmüddətli perspektivdə müqavilə çərçivəsində bu, hər il iki milyard kubmetrə qədər arta bilər", - nazir əlavə edib.

Dünyaca sevilən “Şrek” (“Shrek”) cizgi filminin 5-ci hissəsi yayımlanacaq.  Sozcu.az xarici mətbuata istinadən xəbər verir ki, komanda artıq cizgi film üzərində işlərə başlayıb.  Bu barədə filmin prodüseri Kristofer Meledandri xəbər verib.  O, yeni film haqda ətraflı açıqlama verməkdən qaçsa da, baş personajları səsləndirən şəxslərlə danışıqların getdiyini bildirib.  

"Mançester Yunayted"in baş məşqçisi Erik ten Haq İngiltərə Premyer Liqasının 25-ci turunda təxirə salınmış və ötən gecə keçirilən "Brentford"la matçda qalib gəlmələri (1:0) barədə danışıb.  Sozcu.az BBC-yə istinadən xəbər verir ki, mütəxəssis komandasının oyunundan razı qaldığını deyib: “Çox yaxşı oynadıq, xüsusən də birinci hissədə. 2-ci hissə daha çox döyüşə bənzəyirdi. "Brentford" kimi güclü komandaya qarşı yaxşı futbol oynamaq asan deyil. Amma ehtiras və arzumuz var idi, ona görə də məqsədimizə çata bildik. Markus Reşford möhtəşəm qola imza atıb. O, yenidən zirvədədir, yaxşı formadadır. Ümid edirəm ki, Markus mövsümün sonuna qədər belə qalacaq. David de Xeanın köməyinə nə vaxt ehtiyacımız olsa , yerində olur. Konsentrasiyanı itirdikdə səhvlər etmək mümkündür. Biz robot kimi oynamaq istəyirik, səhv etmək yox. Biz bir boşluq yaratdıq. Yaxşı ki, rəqib bundan istifadə edə bilmədi. David isə özünü göstərdi. Bu, vacib qələbədir, 16 matçda "Brentford" yalnız bir dəfə məğlub olub. Mən komandamızla fəxr edirəm”. Qeyd edək ki, "Mançester Yunayted"in qələbə qolunu Markus Reşford vurub.

Məşədi Dadaş məscidinə din xadimi təyinatı Hacı Şahin Həsənlinin 40 mərasimindən sonra olacaq. Sozcu.az xəbər verir ki, bunu jurnalistlərə açıqlamasında Dini Qurumlarla İş üzrə Dövlət Komitəsinin sədri Mübariz Qurbanlı deyib. O bildirib ki, Hacı Şahin Həsənlinin vəfatından sonra məsciddə dini ayinləri İlahiyyat İnstitutunun tələbəsi Elmir Vəliyev icra edir. "Biz bunu Məşədi Dadaş məcsidinin icması ilə də müzakirə etmişik. Ənənəvi olaraq 40 mərasimindən sonra məscidə din xadimləri təyin olunacaq. Əminəm ki, Elmir də orada fəaliyyətini davam etdirəcək" - deyə komitə sədri qeyd edib. Qeyd edək ki, Hacı Şahin martın 2-si səhər saatlarında ürək tutmasından vəfat edib.

Goranboyda avtomobil aşıb, 5 hərbçi xəsarət alıb. Sozcu.az xəbər verir ki, hadisə Yeniyol-Xanqərvənd kəndləri istiqamətindən keçən magistral yolda baş verib. VAZ-2105 markalı avtomobilin idarəetmədən çıxaraq aşması nəticəsində 5 hərbçi müxtəlif bədən xəsarətləri alıb. Onlar dərhal xəstəxanaya yerləşdiriliblər. Faktla bağlı araşdırma aparılır.

Dövlət İmtahan Mərkəzi aprelin 9-da ümumi (9 illik) orta təhsil səviyyəsi üzrə buraxılış imtahanı keçirəcək. DİM-dən Sozcu.az-a verilən məlumata görə, imtahan saat 11:00-da başlanır. İmtahanın başlanmasına 15 dəqiqə qalmış – saat 10:45-də buraxılış rejimi başa çatır. Bundan sonra gələn iştirakçılar imtahan binasına buraxılmır. Kütləviliyin və təmas hallarının qarşısının alınması məqsədilə imtahan iştirakçıları üçün imtahan binasına müxtəlif daxilolma vaxtları müəyyən edilib və imtahan iştirakçısının buraxılış vərəqəsində həmin vaxt göstərilib. Ona görə də imtahan binasına buraxılış vərəqəsində qeyd olunan vaxtda gəlmək tövsiyə olunur. Şagirdlər imtahana aşağıdakı sənədləri gətirməlidirlər: - İmtahana buraxılış vərəqəsi; - Şəxsiyyəti təsdiq edən sənədin əsli: a) Azərbaycan Respublikasının vətəndaşları (16 yaşı tamam olmayan iştirakçılar da daxil olmaqla) şəxsiyyət vəsiqəsini; b) əcnəbilər və vətəndaşlığı olmayan şəxslər Dövlət Miqrasiya Xidməti tərəfindən verilmiş icazə vəsiqələrini, qaçqın statusu almış xarici vətəndaşlar və onların ailə üzvləri isə qaçqın vəsiqələrini; -Şəxsiyyət vəsiqəsində şəkli olmayan iştirakçılar digər sənədlərlə yanaşı, təhsil müəssisəsi tərəfindən verilmiş və fotoşəkilləri yapışdırılmış arayışı (arayışa iştirakçının 3x4sm ölçülü şəkli yapışdırılır və şəkil möhürlə təsdiqlənir). Şəxsiyyəti təsdiq edən sənədində şəkli olmayan şagirdlər buraxılış imtahanı üçün təhsil müəssisəsi tərəfindən verilməli olan arayışı DİM-in saytından yükləyə bilərlər. İmtahanda iştirak edəcək şagirdlər “İmtahana buraxılış vərəqəsi”ni internet vasitəsilə DİM-in saytından martın 31-dən etibarən çap edib götürə bilirlər. İmtahan keçirilən şəhər və rayonlarda ümumilikdə 195 imtahan binası, 3575 imtahan zalı ayrılıb. İmtahanların idarə olunmasına 568 imtahan rəhbəri və ümumi rəhbər, 4434 nəzarətçi-müəllim, 643 buraxılışı rejimi əməkdaşı (mühafizə), 195 bina nümayəndəsi ayrılıb. Aprelin 9-da keçiriləcək imtahanda 47 917 şagirdin iştirakı nəzərdə tutulur. İmtahanda 12 nəfər fiziki məhdudiyyətli (I qrup gözdən əlil, eşitmə əngəlli və digər) şagird də iştirak edəcək. Onların rahat şəkildə imtahan verməsi üçün imtahan binalarında ayrıca zallar ayrılıb, gözdən əlillər üçün tapşırıqların oxunması, cavab vərəqinin doldurulması və s. işlər üçün fərdi nəzarətçilər təyin edilib. Həmçinin eşitmə əngəlli şagirdlər üçün onların dinləmə ilə bağlı qüsurları nəzərə alınaraq xüsusi test kitabçaları hazırlanıb. Hərəkət məhdudiyyətli şagirdlərin bina və zala daxil olması və rahat şəkildə hərəkəti üçün də xüsusi şərait yaradılıb. Hazırda imtahanlarda iştirak edəcək nəzarətçilər, imtahan rəhbərləri, mühafizə əməkdaşları ilə onlayn şəkildə təlim-seminarlar keçirilir. Bütün imtahan binalarına baxış keçirilib, imtahan zallarında şagirdlərin rahat şəkildə imtahan verməsi üçün zəruri şərait yaradılıb. İmtahana 1 gün qalmış təhlükəsizliyin təmin edilməsi məqsədilə imtahan mərkəzlərinə təkrar baxış da keçirilir və imtahan zalları, giriş-çıxış qapıları, binalar möhürlənməklə Daxili İşlər Nazirliyi Baş Mühafizə İdarəsinin əməkdaşlarının mühafizəsinə verilir.

ABŞ-ın Müharibə Araşdırmaları İnstitutu Böyük Quruluş Partiyasının sədri, Milli Məclisin deputatı Fazil Mustafaya qarşı terror aktının arxasında İranın dayanması və bu hadisənin Tehranın sifarişi ilə törədilməsi barədə yazı dərc edib. Sozcu.az Report-a istinadən xəbər verir ki, institutun analitikləri bildiriblər ki, F.Mustafaya qarşı sui-qəsd həyata keçirmək istəyən və Azərbaycanın Dövlət Təhlükəsizliyi Xidmətinin həbs etdiyi 4 şəxsdən 3-ü İran təhlükəsizlik qüvvələrinin sifarişi ilə işləyirmiş. Qeyd olunub ki, hadisə Milli Məclisdə müzakirə olunan zaman da azərbaycanlı deputatlar terror aktına görə İranı günahlandırıblar. Yazıda həmçinin İran parlamentinin Azərbaycanın İsraildə səfirlik açmasını pisləyən bəyanatına da toxunulub. “Bəyanat Tehran və Bakı arasında bir neçə gündür artan gərginlikdən sonra verilib. Bundan əvvəl İran Xarici İşlər Nazirliyinin sözçüsü Naser Kənani Azərbaycan xarici işlər naziri Ceyhun Bayramovla israilli həmkarı Eli Koenin müzakirəsini pisləyib”, - Müharibə Araşdırmaları İnstitutundan bildirilib. Qeyd edək ki, martın 28-də F.Mustafaya qarşı yaşadığı evin qarşısında “Kalaşnikov” avtomat silahından atəş açılaraq terror aktı törədilib. Nəticədə F.Mustafa bədənin sağ çiyin qurşağını və sağ budun aşağı üçdə birini dəlib keçən güllə yarası alıb. Ona zəruri tibbi xidmətlər göstərilib. Faktla bağlı Dövlət Təhlükəsizliyi Xidmətinin İstintaq baş idarəsində Cinayət Məcəlləsinin 277-ci (dövlət xadiminin və ya ictimai xadimin xidməti və ya siyasi fəaliyyətinə son qoymaq və ya bu fəaliyyətə görə qisas almaq məqsədilə onun həyatına sui-qəsd etmə) və 228.2.1-ci (qabaqcadan əlbir olan bir qrup şəxs tərəfindən qanunsuz olaraq odlu silah, onun komplekt hissələrini, döyüş sursatı əldə etmə, saxlama, daşıma və gəzdirmə) maddələri ilə cinayət işi başlanılıb. Terror aktını törətmiş şəxsin və cinayət hadisəsi ilə əlaqəsi olan digər şəxslərin müəyyən olunaraq cinayət məsuliyyətinə cəlb olunması istiqamətində kompleks təxirəsalınmaz əməliyyat-istintaq tədbirləri həyata keçirilir. Nəticədə, əvvəlcə terror aktının sifarişçisi, sonra isə icraçılar müəyyən edilib. DİN və DTX-nin şəxsi heyətinin birgə səyləri, polis əməkdaşlarının peşəkarlığı və fədakarlığı sayəsində aprelin 2-dən 3-nə keçən gecə cinayətkar dəstənin üzvləri həbs ediliblər. Hadisədə əli olan 4 nəfər tutulub.