Son illər bir çox məşhurlarımızın oxuduğu mahnıların plagiat olduğu üzə çıxır. Yeni bəstəkarlar hər mahnıdan bir hissə “qoparıb” “yeni” mahnı təqdim edir.  Bəs, bu cür mahnılara yol verməmək üçün nə etmək lazımdır?  Mövzu ilə bağlı müğənni Sevinc Musayeva Bakupost.az -a açıqlamasında deyib ki, musiqi aləmində plagiatlıq ciddi problemə çevrilib: “Yerindən qalxan özünü yazıçı, bəstəkar elan edir. Əvvəllər mənim repertuarımda bir mahnı var idi. Türklərdən oğurlanmışdı. Yaxşı da dinlənib. Amma mən həmin mahnıdan imtina etdim. Çünki o mahnıda əziyyət yox idi. Məsələn, bəstəkar Emin Sabitoğlu, Elza İbrahimovanın mahnılarını böyükdən-kiçiyə hamı sevir. Çünki onların bəstələri beyin məhsulu olub. Zəhmət çəkiblər. Amma indikilər studiyalarda oturub 2 dəqiqəyə mahnı yazırlar. Bir-birindən oğurlayırlar”. S.Musayeva, bu cür mahnıların yazılması və ifa edilməsində dinləyicilərin də rolunun olduğunu qeyd edib. Müğənninin fikrincə, plagiatlığı aradan qaldırmaq üçün monitorinq keçirilməlidir: “Trend olan mahnıların çoxu İran qoxusu gəlir. Mərsiyə tipli, yaxud meyxana formasındadır. Bir mahnı trend olubsa, demək ki, onu dinləyən kütlə var. Bunların aradan qaldırılması üçün monitorinq təşkil edilməsinin tərəfdarıyam. Musiqinin bu kimi sahələrində də yoxlamalar keçirilsə, yaxşı olar”. 

PKK terror təşkilatının "komandan"ı Türkiyə tərəfindən məhv edilib.  Sozcu.az xəbər verir ki, bu barədə ölkənin daxili işlər naziri Süleyman Soylu tviter səhifəsində məlumat verib.  Bildirilib ki, terrorçu gizləndiyi mağarada zərərsizləşdirilib. Nazir qeyd edib ki, Hakkari vilayətinin Aslandüz rayonu terrordan tamamilə təmizlənib.  Qəhrəmanlarımızın əlinə sağlıq", - nazir qeyd edib. 

Bələdiyyənin ərazisində daimi yaşayan və eyni zamanda ən azı beş il müddətində yaşayış yeri üzrə qeydiyyatda olan Azərbaycan Respublikasının vətəndaşları tikinti obyektinin istismara hazırlığı barədə müvafiq icra hakimiyyəti orqanından müsbət rəy aldığı təqdirdə, həmin obyektin yerləşdiyi torpaq sahəsi fiziki və hüquqi şəxslərin mülkiyyətinə satıla və ya icarəsinə verilə biləcək. Sozcu.az xəbər verir ki, bu, Milli Məclisin bu gün keçirilən iclasında müzakirəyə çıxarılan “Bələdiyyə torpaqlarının idarə edilməsi haqqında” qanuna təklif edilən dəyişiklikdə əksini tapıb. Layihəyə əsasən, həmin şəxslər torpaq üzərindəki mülkiyyət və icarə hüquqlarını əldə etmək üçün açıq torpaq hərracları və ya müsabiqələrdə iştirak etmirlər. Mövcud qanunvericiliyin tələblərinə görə hazırda bələdiyyə torpaqları üzərində mülkiyyət və icarə hüquqları, müəyyən istisnalar olmaqla, yalnız açıq torpaq hərracları və ya müsabiqələri vasitəsilə əldə edilə bilər. Qeyd edilib ki, tətbiq ediləcək qayda humanizm prinsipinə əsaslanır, tikinti obyektinin yerləşdiyi torpaq üzərində mülkiyyət və icarə hüquqlarının daha asan formada əldə olunmasına hüquqi əsas verəcək.

Sabunçu Rayon Polis İdarəsinin Narkotiklərlə Mübarizə Bölməsinin əməkdaşları tərəfindən mart ayı ərzində də Bakıxanov, Balaxanı, Ramana, Zabrat, Bilgəh, Pirşağı Kürdəxanı, Maştağa qəsəbələri və digər ərazilərdə narkotiklərin qanunsuz dövriyyəsini həyata keçirən şəxslərə qarşı əməliyyatlar davam etdirilib. Əməliyyatlar zamanı narkotiklərin qanunsuz dövriyyəsi ilə məşğul olan daha 50 nəfər saxlanılıb. Bu barədə Sozcu.az-a Daxili İşlər Nazirliyindən Mətbuat Xidmətindən məlumat verilib. Bildirilib ki, araşdırma zamanı saxlanılanlardan bir neçəsinin narkotikləri sosial şəbəkələr vasitəsi ilə İranda yaşayan narkotik vasitə satıcıları ilə əlaqə yaradaraq əldə etdikləri müəyyən edilib. Həmin şəxslərin üzərindən, yaşadıqları evlərdən 9 kiloqrama yaxın heroin, marixuana və psixotrop maddə olan metamfetamin aşkar edilib. Onların hər biri barəsində İdarənin İstintaq Şöbəsində Cinayət işləri başlanılıb. Sabunçu rayonu ərazisində narkotiklərin qanunsuz dövriyyəsi ilə məşğul olan digər şəxslərin də tutulmaları istiqamətində polis əməkdaşları tərəfindən mübarizə tədbirləri davam etdirilir. Qeyd edək ki, cari ilin əvvəlindən Sabunçu rayonunda polis əməkdaşlarının keçirdikləri əməliyyatlar zamanı ümumilikdə 30 kiloqram müxtəlif xassəli narkotik vasitə qanunsuz dövriyyədən çıxarılıb.

"Türkiyə Azərbaycan və Ermənistan arasında tezliklə sülh müqaviləsinin bağlanmasını zəruri hesab edir". Sozcu.az xəbər verir ki, bu barədə Türkiyənin xarici işlər naziri Mövlud Çavuşoğlu Ankarada rusiyalı həmkarı Sergey Lavrovla danışıqların yekununda bildirib. “Biz bu məsələ ilə bağlı, o cümlədən Rusiya ilə məsləhətləşmələri davam etdirəcəyik”, - deyə Çavuşoğlu əlavə edib.

Aprilin 6-da Güney Azərbaycanın Urmiya və Həmədan şəhərlərində müəllimlər etiraz aksiyaları keçiriblər. Bu barədə İran Təhsil İşçiləri Həmkarlar İttifaqı Təşkilatlarının Koordinasiya Şurası məlumat yayıb. Təhsil İdarələrinin binaları qarşısına toplaşan müəllimlər əmək haqlarının verilməməsinə etiraz edib, aprelin 5-də həbs edilən İran Müəllimlər Birliyinin sözçüsü Məhəmməd Həbininin azad edilməsini tələb ediblər. Qeyd edək ki, eyni gündə Kirmanşah, Kərəc, Məlayer və başqa bir neçə şəhərdə də oxşar aksiyalar baş tutub.Günaz.TV

Azərbaycanın İranda, xüsusən Qum şəhərində təhsil alan dindarların əksəriyyəti artıq kənarlaşdırılır. Lakin belə düşünənlər də var ki, İranda təhsil alan və onların təsiri altına düşməyənlər yerli təhsil alan dindarlarla ortaya birgə iş qoya bilərlər. Mövzu ilə bağlı Pravda.az-a fikirlərini bölüşən İlahiyyat İnstitutunun sabiq rektoru, Milli Məclisin deputatı Ceyhun Məmmədov deyib ki, İlahiyyat İnstitutu yeni qurulub. “Artıq bu il ikinci il olacaq ki, İlahiyya İnstitutunun tələbələri məzun olurlar. Amma hesab edirəm, bu İnsitutu bitirən gənclər də, İlahiyyat İnstitutu da proseslərdə daha fəal olmalı, Azərbaycanın dövlət-din münasibətləri modelinin formalaşmasına, ölkəmizdə kənar təsirlərin, müdaxilələrin qarşısının alınmasına öz töhvələrini verməlidirlər. Daha fəal olmadan, daha çox səy göstərmədən məqsədlərimizə nail ola bilməyəcəyik. Çünki İran bu məsələdə daha təcrübəli, daha geniş imkanlara malikdir və bütün gücünü bu prosesə səfərbər edib”, - deputat bildirib. C.Məmmədovun sözlərinə görə, İranın təhsil sistemi elə bir formada qurulub ki, orada təhsil alan gənclərin İranın zərərli və zəhərli ideologiyasına məruz qalmamaları qeyri-mümkündür: “İran orada təhsil alan şəxslərə konkret istiqamət verir. Onların gələcəkdə fəaliyyətləri də İranın müəyyənləşdirdiyi strategiya üzrə həyata keçir və davam etdirilir. Bu baxımdan, İranda təhsil alan gənclərin mütləq əksəriyyəti İranın təbliğatına məruz qalır. Onlar Azərbaycana gələndən sonra dövlət-din modeli münasibətləri, Azərbaycanda İslam dövlətinin qurulması istiqamətində fəaliyyət qururlar. Bu gün İranda oxuyub, təsirə məruz qalmamaq çox çətindir. Amma hamını da bu formada təqdim etmək düzgün deyil. Ola bilər ki, İranda təhsil alan şəxslər arasında iki-üç nəfər öz milli kimliyini qorusun, Azərbaycan dövlətçiliyi baxımından çıxış etsin. Lakin mütləq əksəriyyət təsirə məruz qalıb. Azərbaycan məscidlərində də bu, özünü göstərir. Məscidlərin İranın təsirindən çıxarılması üçün atılan addımları təqdir edirəm”.

“Suraxanıda 20 il ərzində dərəbəylik hökm sürüb. Açıq danışacam, bu rayonda 5 il icra başçısı işləmiş Hacıbala Abutalıbov və ondan sonra İlqar Abbasov 14 il rayonda nə qədər torpaq varsa satıb, zəbt ediblər”. Bunu Milli Məclisin deputatı Etibar Əliyev bugünkü plenar iclasda çıxışı zamanı deyib. “Bunlara qoşulanlardan biri də 30 il Suraxanı rayonu Mənzil Kommunal İstismar Təsərrüfatı Birliyinin sədri Mais Məmmədov və Hacıbala Abutalıbovun qardaşının kürəkənidir. Bu rayonu 4 nəfər işğal edib. 220 min əhalisi olan rayonun bir peşə məktəbi yoxdur. Lakin onlarla pub, restoran, diskoteka var. Bu adamların əlindən gələcəkdə peşə təhsilinin tutumuna uyğun torpaq sahəsi tapmaq olmur. Qaraçuxur və Yeni Günəşlini bu adamlar hasara alıblar. Milyonlarla manata ev tikənlərə satırlar. Həmin torpaqların necə zəbt olunması araşdırılmalıdır. Belə hallar başqa rayonlar üçün də xarakterikdir. Belə adamların əlindən bələdiyyələr zəlil olub”, - deyə deputat əlavə edib./APA

Saakaşvilinin vəziyyəti kritik həddə çatıb. Sozcu.az xəbər verir ki, bu barədə “Politico” məlumat yayıb. Bildirilir ki, Gürcüstanda həbsdə olan keçmiş prezident Mixail Saakaşvili vəziyyətinin pisləşdiyini açıqlayıb. 54 yaşlı siyasətçinin sözlərinə görə, 2021-ci ilin oktyabrında “8 il sürgündən sonra” respublikaya qayıdıb. Daha sonra Gürcüstan hakimiyyəti Saakaşvilini saxlayıb və nəzarətə götürüb. “Həbsdə olanda səhhətim sürətlə pisləşdi. İndi isə ölürəm… 20-dən çox ciddi xəstəlikdən əziyyət çəkirəm”, – deyə eks-prezident  hüquqşünas vasitəsilə məlumat çatdırıb. Saakaşvili səhhətinə görə məsuliyyəti Rusiya hakimiyyətinin üzərinə qoyub. Siyasətçinin sözlərinə görə, onun ölümü Rusiyada “qələbə” kimi qeyd olunacaq, Gürcüstanda isə “siyasi xaos” yaradacaq. Daha əvvəl Saakaşvilinin anası bildirib ki, eks-prezident sürətlə arıqlayır, zəhərlənmə səbəbindən siyasətçi yemək yeyə bilmir, əl və ayaqları tutulub.

Tikinti işlərinin dayandırılmasına əsas verən hallar dəqiqləşdirilir, pozuntuların aradan qaldırılması üçün verilən müddət 1 ildən 6 aya endirilir. Bu, bu gün Milli Məclisin iclasında müzakirəyə çıxarılan Şəhərsalma və Tikinti Məcəlləsinə təklif olunan dəyişiklikdə əksini tapıb. Qüvvədə olan qanuna görə, . tikintiyə icazənin tələb olunmasına baxmayaraq, tikinti obyekti belə icazə alınmadan tikildikdə, tikinti obyektinin təhlükəsizliyinə və etibarlılığına təhlükə yaradan qüsurlar müəyyən edildikdə və həmin qüsurları digər tikinti işlərini dayandırmadan aradan qaldırmaq mümkün olmadıqda müvafiq icra hakimiyyəti orqanı hər bir pozuntu ayrıca təsvir olunmaqla müvafiq akt tərtib edir və onun əsasında tikinti işlərinin (reklam qurğularının tikintisi istisna olmaqla) dayandırılması barədə qərar qəbul edir. Layihəyə əsasən, tikinti obyekti belə icazə alınmadan, habelə xüsusi nişanın tikinti işlərinin başlanması üçün əsas olduğu hallarda belə nişan alınmadan, barəsində məlumatlandırma icraatı tətbiq edilən tikinti obyekti isə tikinti işlərinin başlanması üçün müəyyən olunmuş əsas olmadan tikildikdə və bitişik və ya qonşu obyektlərin təhlükəsizliyinə və etibarlılığına təhlükə yaradan qüsurlar müəyyən edildikdə və həmin qüsurları digər tikinti işlərini dayandırmadan aradan qaldırmaq mümkün olmadıqda da müvafiq icra hakimiyyəti orqanı hər bir pozuntu ayrıca təsvir olunmaqla müvafiq akt tərtib edir və onun əsasında tikinti işlərinin (reklam qurğularının tikintisi istisna olmaqla) dayandırılması barədə qərar qəbul edəcək. Hazırda müəyyən edilən pozuntularla bağlı təqdim edilmiş ilk yazılı göstərişdə nəzərdə tutulan pozuntular ən geci 1 il müddətində aradan qaldırılmadıqda müvafiq icra hakimiyyəti orqanı tikinti işlərinin (reklam qurğularının tikintisi istisna olmaqla) dayandırılması barədə qərar qəbul edir. Layihəyə əsasən, artıq ən geci 1 il deyil, 6 ay müddətində müəyyən edilən pozuntularla bağlı təqdim edilmiş ilk yazılı göstərişdə nəzərdə tutulan pozuntular aradan qaldırılmadıqda müvafiq icra hakimiyyəti orqanı tikinti işlərinin (reklam qurğularının tikintisi istisna olmaqla) dayandırılması barədə qərar qəbul edəcək. Müzakirələrdən sonra qanun layihəsi səsverməyə çıxarılaraq birinci oxunuşda qəbul edilib.

2 nəfər şəxs PSJ-nin hücumçusu Lionel Messinin Barselonadakı evinə girməyə cəhd edib. Sozcu.az xəbər verir ki, hadisə aprelin 5-də baş verib. Polis artıq Messinin evinə gələndə cinayətkarlar qaçıblar. Onlar evə girə bilməyiblər. Qeyd edək ki, 35 yaşlı hücumçu 2021-ci ilin yayından Fransa təmsilçisində oynayır. Argentinalı ilə parislilər arasında mövcud müqavilə 2022/23 mövsümünün sonuna kimi hesablanıb. Forvardın PSJ ilə sözləşməsi başa çatdıqdan sonra sabiq kluu "Barselona"ya qayıdacağı bildirilir. Messi bu mövsüm PSJ-nin heyətində 33 oyuna çıxıb, 18 qol vurub və 17 qolun ötürməsini verib.

Ukrayna müharibənin 408-ci günü üçün Rusiya ordusunun itkiləri haqda məlumatı yeniləyib. Sozcu.az xəbər verir ki, bu barədə Ukrayna Baş Qərargahı məlumat yayıb. Məlumata əsasən, Rusiya indiyə qədər 177 110 hərbçi, 3633 ədəd tank, 7016 ədəd zirehli döyüş maşını, 2722 ədəd artilleriya sistemi, 533 ədəd RYAS (reaktiv yaylım atəş sistemi), 281 hava hücumundan müdafiə sistemi, 306 ədəd hərbi təyyarə, 292 ədəd helikopter, 5587 ədəd avtomobil texnikası, 2291 ədəd PUA, 911 qanadlı raket, 18 gəmi/qayıq, 304 xüsusi avadanlıq itirib.

ABŞ-ın Arizona ştatından olan 44 yaşlı gözəllik salonu sahibi Kris qızına bənzəyən 28 yaşlı işçisi Savana ilə evlənərək internetdə qınaqla üzləşib. Sozcu.az bildirir ki, bu barədə "The Mirror" məlumat yayıb. Kişi onun salonunda bərbər kimi işə düzələn və özündən iki dəfə kiçik olan bir qızla tanış olub. Kris o vaxt boşanıb və depressiyaya düşüb, lakin o, dərhal Savana ilə maraqlanıb və ona yaxınlaşıb. "Boşandıqdan sonra özümə gələn kimi onunla daha çox danışmağa, daha tez-tez yanında olmağa başladım. Hiss etdim ki, aramızda əvvəllər heç vaxt yaşamadığım xüsusi bir şey var", - o deyib. Tezliklə Savana və Kris münasibətə başlayıblar. Yaş fərqi böyük olduğuna görə cütlük əvvəlcə romantikalarını həmkarlarından və qohumlarından gizlədib. Bundan əlavə, Savana Krisin 21 yaşlı qızı Tizziyə bənzəyib ki, bu da başqaları tərəfindən anlaşılmazlığa səbəb ola bilərdi. Sevgililərin münasibəti məlum olanda tənqidlə üzləşiblər. "Tizzi əvvəlcə çaşqın idi", - Savana deyib. Cütlük daha sonra sosial şəbəkədə romantik anlarını paylaşıb və çoxlu mənfi şərhlər alıb. Hamı əmin idi ki, Kris Tizzi ilə zahiri oxşarlığına görə Savana ilə görüşməyə başlayıb. Lakin ittihamlar və qınaqlar cütlüyün münasibətini pozmayıb. Kris nəhayət Savanaya evlilik təklif edib və onların üç övladı olub. Cütlük sosial şəbəkədə birgə videolar yayımlamağa davam edib və mənfi şərhlərə fikir verməyib. "Biz böyük bir ailəyik. Bizim haqqımızda nə dedikləri önəmli deyil. Biz xoşbəxtik və əsas olan da budur", - Savana deyib.milli.az

Məktəblilər arasında suçiçəyi virusu yayılıb. Virusa görə məktəbə getməyənlərin sayında artım müşahidə olunur. Sozcu.az ARB-yə istinadla xəbər evrir ki, suçiçəyi virusuna daha çox paytaxtın Yasamal və Qaradağ rayonlarında, Abşeronun Masazır qəsəbəsi və Xırdalan şəhərində, eləcə də Sumqayıt şəhərində rast gəlinir. Təhlükəli xəstəlik sayılan suçiçəyinə görə həkimlər valideynləri diqqətli olmağa çağırıblar. Vaxtında müalicə prosesinə başlanılmazsa, bu, uşaqların aylarla xəstəxana şəraitində qalması ilə nəticələnə bilər.

Ölkəmizdə ən çox alınan məhsullardan olan bəzi kolbasa və sosiskaların üzərində qeyd edilən məlumatlarla tərkibi uyğun gəlməyib.  Bu faktlar Qida Təhlükəsizliyi Agentlyinin kolbasa və sosiska məhsullarının monitorinqi zamanı üzə çıxıb.  Monitorinq zamanı “Səhliyalı” firmasının “Servelat” kolbasasında mal əti qeyd edildiyi halda tərkibində toyuq DNT-si aşkarlanıb. “Kəndli” adı ilə satılan kolbasanın isə içərisindən bəyan edilmədiyi halda, donuz əti aşkarlanıb. “Köhnə Dad” adlı kolbasada, ”Sevimli Dad” və “Halal 5+” sosisqalarında isə üzərində mal əti bəyan edilsə də, tərkibində mal DNT-si aşkarlanmayıb.  Sözügedən kolbasa məhsullarının reklamını isə vaxtaşırı sosial məzmunlu verilişlərdə görürük. Bu məhsullar teleməkanın ən reytinqli verilişlərində - Zaur Baxşəliyevanın, Elçin Əlibəylinin, Xoşqədəm Hidayətqızının proqramlarında da tez-tez reklam olunur. Bəs görəsən, nöqsan aşkarlanan markaları efirlərdə reklam edən teleaparıcılar bu məsələdə hər hansı məsuliyyət daşıyırmı?  Mövzu ilə bağlı Yenisabah.az-a danışan media üzrə ekspert, hüquqşünas Ələsgər Məhəmmədoğlu bildirib ki, bu məsələdə media nümayəndələri heç bir hüquqi məsuliyyət daşımır:  “Telekanallarda olan reklam əmtəə məhsulunun reklamıdır, məhsulun keyfiyyətinə yönəlik bir reklam deyil. Dolayısıyla media qurumlarına təqdim olunan, hüquqi şəkildə qeydiyyatdan keçmiş, vergisini ödəyən, legitim olan istənilən qurum reklam verə bilir və o reklamı da istənilən media qurumu yaya bilir. Çünki o reklamdan da vergi ödəyəcək. Burada hər hansı formada reklam olunan məhsulun sonradan keyfiyyətinə yönəlik hər hansı problem çıxıbsa, media bunda cavabdehlik daşımır. Bunu düşünmək belə mənasızdır. Çünki medianın elə bir öhdəliyi yoxdur ki, öncə məhsulu keyfiyyət kontrolu etsin, sonra reklam etsin. Məsələ bu aspektdən düşünülə bilməz”.  Ekspert qeyd edib ki, AQTA-nın apardığı bu monitorinq daha çox bəzi markaları gözdən salmaq alətinə bənzəyir:  “Mən Qida Təhlükəsizliyi Agentliyinin yanaşmasına da şübhəli baxdım. Əgər istənilən halda bir monitorinq aparılırsa, məhsullar laboratoriyaya göndərilirsə, birinci bununla bağlı cəmiyyətə daha detallı və aydın informasiya verilməlidir, datalar çox aydın şəkildə göstərilməlidir. Əgər monitorinq aparılırsa, istisnasız olaraq bütün markalar yoxlanılmalıdır, bundan sonra həmin markalar arasında hansında problem olub, hansında olmadığı göstərilməlidir. Əgər AQTA 5 markanın adını çəkirsə, bu, həmin markaları gözdən salmaq üçün alətə daha çox oxşayır, nəinki sistemli monitorinqə. Cəmi 5-6 markanın adını çəkmək markanı etibarsızlaşdırmaqdır və hesab edirəm ki, dövlət qurumu bu məsələdə Konstitusiyanın 25-ci maddəsi (bərabərlik hüququ) baxımından da problem yaradır”. 

Naxçıvanda 3 yaşlı uşaq mismar udub. Hadisə bu gün Muxtar Respublikanın Kəngərli rayon Böyükdüz kəndində qeydə alınıb. Belə ki, 2019-cu il təvəllüdlü Əlisoy Əli Ceyhun oğlu evdə mismar udub. Vəziyyəti pisləşən uşaq Naxçıvan Diaqnostika Müalicə Mərkəzinə yerləşdirilib. Mərkəzdən bildirilib ki, uşağın mədəsindəki mismar zond vasitəsilə çıxarılıb, vəziyyəti sabitdir./APA

Gürcüstanın Baş naziri İrakli Qaribaşvili aprelin 7-də Azərbaycan Respublikasına işgüzar səfərə gəlib. Hər iki ölkənin Dövlət bayraqlarının dalğalandığı Qəbələ Beynəlxalq Hava Limanında ali qonağın şərəfinə fəxri qarovul dəstəsi düzülüb. Gürcüstanın Baş naziri İrakli Qaribaşvilini Azərbaycanın xarici işlər naziri Ceyhun Bayramov və digər rəsmi şəxslər qarşılayıblar.

Bu gün həkimlər Fazil Mustafanı yenidən əməliyyat edəcəklər. Sozcu.az xəbər verir ki, bu sözləri Oxu.az-a sui-qəsd cəhdinə məruz qalan Milli Məclisin deputatı Fazil Mustafanın həyat yoldaşı Zülfiyyə Mustafayeva deyib. O bildirib ki, güllənin yaratdığı infeksiya səbəbindən yaraları hələ tikilməyib: “Şükür olsun artıq infeksiya təmizlənib. Bu gün həkimlər konsultasiya edəcəklər. Əgər vəziyyət uyğun olarsa, bu gün əməliyyata girəcək. Əməliyyatda iki prosedur həyata keçiriləcək. Həm çiynindəki yara, həm də ayağındakı yaraya tikiş qoyulacaq. Evə buraxılma ilə bağlı hələlik bir qərar yoxdur”. Qeyd edək ki, hadisə martın 28-i saat 21:51 radələrində paytaxtın Sabunçu rayonu, Zabrat-1 qəsəbəsi, Babək küçəsi ev 2 “Z” ünvanında qeydə alınıb. Belə ki, Milli Məclisinin deputatı Mustafa Fazil Qəzənfər oğluna yaşadığı evin qarşısında “Kalaşnikov” avtomat silahından atəş açılaraq terror aktı törədilib. Nəticədə F.Mustafa bədənin sağ çiyin qurşağını və sağ budun aşağı üçdəbirini dəlib keçən güllə yarası alıb. Ona zəruri tibbi xidmətlər göstərilib.

Son 30 ildə Qarabağ ərazisinə UNESKO-nun araşdırıcı missiyanın göndərilməsinə maneələri məhz Ermənistan yaradıb. Sozcu.az xəbər verir ki, bunu UNESKO üzrə Azərbaycan Respublikasının Milli Komissiyası, Beynəlxalq Türk Mədəniyyəti Təşkilatı (TÜRKSOY), ADA Universiteti və Universitetin İnkişaf və Diplomatiya İnstitutunun birgə təşkilatçılığı ilə TÜRKSOY-a üzv ölkələrin UNESKO üzrə Milli Komissiyalarının 9-cu İclasının açılış mərasimində videoçıxışı zamanı xarici işlər naziri Ceyhun Bayramov deyib. Nazirin sözlərinə görə, bu yöndə gələn təklifləri Ermənistan davamlı şəkildə rədd edib.

Göyçayda 64 yaşlı kişi 21 yaşlı qızı parkda bıçaqlayıb. Sozcu.az xəbər verir ki, bu barədə Daxili İşlər Nazirliyinin Mətbuat Xidmətinin Şəki regional qrupundan bildirilib. Qeyd edilib ki, dünən Göyçay şəhər sakini Cəlalə İsmayılovanın bıçaq xəsarətləri alması barədə rayon polis şöbəsinə məlumat daxil olub. Göyçayda 1959-cu il təvəllüdlü Elbrus Əliyev 21 yaşlı Cəlalə İsmayılovanın üz nahiyəsinə bıçaqla xəsarət yetirib. Hadisə şəhər ərazisində yerləşən parkların birində baş verib. Belə ki, onların arasında yaranan mübahisə zamanı C.İsmayılova E.Əliyevin ünvanına nalayiq ifadələr işlədib və sonuncu bundan əsəbiləşərək qadına üzərində daşıdığı bıçaqla xəsarət yetirib. Keçirilən tədbir zamanı ona rayon sakini E.Əliyev tərəfindən bıçaqla xəsarət yetirildiyi müəyyən edilib. Hər iki şəxsin izahatları alınıb və müvafiq ekspertiza təyin olunub. Faktla bağlı araşdırma aparılır.

Milli Məclisin (MM) plenar iclasında İran parlamenti ilə bağlı bəyanatın hazırlanması üçün komissiyanın yaradılması təklif edilib. Sozcu.az xəbər verir ki, təklif spiker Sahibə Qafarova tərəfindən irəli sürülüb. Komissiyanın sədri spikerin müavini Fəzail İbrahimli seçilib. Deputatlar Zahid Oruc, Cavanşir Paşazadə, Rafael Hüseynov, Afət Həsənova, Kamran Bayramov isə komissiyanın üzvləri olublar. Sahibə Qafarova bəyanat mətninin hazırlanması üçün tapşırıq verib. *** Azərbaycan Milli Məclisi İrana qarşı bəyanat qəbul edib. Bəyanatın mətni parlamentin iclasında səsləndirilib.

ABŞ və tərəfdaşları Rusiya tərəfindən işğal olunmuş ərazilərin Ukraynaya geri qaytarılması üçün hər cür köməklik göstərəcək. Sozcu.az xəbər verir ki, bunu ABŞ dövlət katibi Entoni Blinken deyib. “Ukraynanın tərəfdaşlarının iki məqsədi var. Onlardan biri Ukraynaya əraziləri geri almağa davam etmək üçün əlimizdən gələni etməkdir. Bura yaxın həftələrdə başlanacaq əks-hücum da daxildir. İkincisi, Ukraynaya orta və uzunmüddətli hərbi əməliyyatların qurulmasında dəstək verilməlidir. Rusiya kursunu dəyişənə qədər biz sanksiyaların və ixrac nəzarətinin görünməmiş təzyiqinin davam etməsini təmin edəcəyik”, - Blinken bildirib.

Türkiyənin Bingöl vilayətində 4,5 bal gücündə zəlzələ baş verib. Sozcu.az xəbər verir ki, bu barədə AFAD məlumat yayıb. Zəlzələ yerin 7 kilometr dərinliyində meydana gəlib. Dağıntı və tələfatlar haqda məlumat verilməyib.

Prezident İlham Əliyevin Qazaxıstana gözlənilən səfəri qardaş ölkələr arasındakı münasibətlərin yeni mərhələsini açacaq. Sozcu.az xəbər verir ki, bunu Azərbaycan və Qazaxıstan arasında ticarət və iqtisadi əməkdaşlıq üzrə birgə Hökumətlərarası Komissiyanın bu gün Bakıda keçirilən 19-cu iclasında energetika naziri Pərviz Şahbazov bildirib. "Bizi dərin köklərə malik sıx qardaşlıq münasibətləri birləşdirir. Bizim ölkələrimizin prezidentlərinin siyasi iradəsi sayəsində münasibətlərimiz uğurla inkişaf edir. Qazaxıstan prezidentinin ötən ilin avqust ayında Azərbaycana səfəri çərçivəsində ölkələr arasında siyasi əməkdaşlığı gücləndirməklə bağlı saziş imzalanıb", - deyə o qeyd edib. Nazir həmçinin deyib ki, Azərbaycanla Qazaxıstan arasındakı münasibətin mühüm hissəsini ticarət əlaqələri təşkil edir: "Ötən il iki ölkə arasında ticarət dövriyyəsinin dəyəri əvvəlki illə müqayisədə 4 dəfə artaraq 598 milyon ABŞ dolları təşkil edib. Bu gün Azərbaycanla Qazaxıstan bir çox regional və beynəlxalq layihələrin təşəbbüskarı kimi çıxış edir".