İyul ayının 27-də saat 10:50-də Dövlət Sərhəd Xidmətinin (DSX) Sərhəd Qoşunlarının “Göytəpə” sərhəd dəstəsinin Cəlilabad rayonunun Məlikqasımlı kəndi yaxınlığında yerləşən sərhəd zastavasının xidməti ərazisində narkotik vasitələrin qaçaqmalçılıq yolu ilə İran İslam Respublikasından Azərbaycan Respublikasına keçirilməsinin qarşısı alınıb. Bu barədə Sozcu.az-a DSX-dən bildirilib. Keçirilmiş sərhəd axtarışı və əməliyyat tədbirləri nəticəsində dövlət sərhəd xətti istiqamətində kolluq ərazidə gizlədilmiş bir ədəd bağlamada ümumi çəkisi 8 kiloqram 200 qram narkotik vasitə “marixuana”, narkotik tərkibli güclü təsiredici vasitə hesab edilən 1725 ədəd “pregobalin 150” və 12 ədəd “Golden wolf” həbi aşkar olunaraq götürülüb. Fakt üzrə əməliyyаt-istintaq tədbirləri dаvаm еtdirilir.

Polşada ordunun gücünü demək olar ki, iki dəfə artırmaq üçün hərbi hissələr bərpa olunur və yeniləri yaradılır. Sozcu.az xəbər verir ki, bunu Polşa Baş nazirin müavini Yaroslav Kaçinski deyib. O bildirib ki, əvvəllər üç diviziyadan ibarət olan Polşa ordusu indi altı diviziyadan ibarət olacaq: “Və daha sonra əlavə bir bölmə yaradıla bilər. Əsas vəzifələrdən biri, bəlkə də dövlətin əsas vəzifəsi təhlükəsizliyi qorumaqdır. Hakimiyyət Belarusla sərhədi gücləndirir, xüsusən də sərhədi qorumaq üçün hasarlar çəkir və hər cür elektron cihazlar quraşdırır”.

Azərbaycanda Aşura mərasimləri keçirilir. Sozcu.az xəbər verir ki, mərasimlər “Təzə Pir”, Göy məscid, Bibiheybət, İmam Əli və ölkənin digər məscidlərində təşkil olunub. Hazırda onminlərlə insan Kərbəla faciəsini yad etmək, imam Hüseynin şücaəti haqqında moizələri dinləmək üçün məscidlərə toplaşıb. Bundan əlavə, Aşura ilə əlaqədar 8 məscid və ziyarətgahda, habelə 8 səhiyyə müəssisəsində də qanvermə aksiyaları təşkil olunub. Qeyd edək ki, Məhərrəm ayı avqustun 17-də başa çatacaq. Növbəti gün, avqustun 18-i Səfər ayı başlayır və sentyabrın 16-da bitir.

Ukrayna müharibənin 520-ci günü üçün Rusiya ordusunun itkiləri haqda məlumatı yeniləyib. Sozcu.az xəbər verir ki, bu barədə Ukrayna Baş Qərargahı məlumat yayıb. Məlumata əsasən, Rusiya indiyə qədər 244 830 hərbçi, 4190 ədəd tank, 8147 ədəd zirehli döyüş maşını, 4775 ədəd artilleriya sistemi, 698 ədəd RYAS (reaktiv yaylım atəş sistemi), 458 hava hücumundan müdafiə sistemi, 315 ədəd hərbi təyyarə, 311 ədəd helikopter, 7240 ədəd avtomobil texnikası, 4007 ədəd PUA, 1347 qanadlı raket, 18 gəmi/qayıq, 709 xüsusi avadanlıq itirib.

Dünya birjalarında neft bu gün qismən bahalaşıb. Sozcu.az xəbər verir ki, hazırda “Brent” markalı neftin bir barreli 83,76 dollara, yüngül neftin bir barreli isə 79,75 dollara satılır.

Lənkəran Rayon İcra Hakimiyyətinin başçısı Taleh Qaraşovun kiçik qardaşı Azər Qaraşovun qətlə yetirildiyi məlum olub. Sozcu.az xəbər verir ki, bu barədə Report-a hüquq-mühafizə orqanlarından bildirilib. Məlumata görə, A.Qaraşovun oğlu Azay Qaraşov atasını ov tüfəngi ilə qətlə yetirməkdə şübhəli bilinərək saxlanılıb. Hazırda faktla bağlı Kürdəmir Rayon Prokurorluğunda araşdırma aparılır.

Qubada bələdiyyə sədrləri və sahibkar inzibati məsuliyyətə cəlb edilib. DİN-in Mətbuat Xidmətinin Quba regional qrupundan Sozcu.az-a verilən məlumata görə, Quba Rayon Polis Şöbəsinin İctimai Təhlükəsizlik Bölməsinin əməkdaşlarının sanitariya-gigiyena qaydalarının pozulması hallarının qarşısının alınması məqsədilə keçirdikləri tədbirlər zamanı şəhər ərazisində və rayonun Susay, Alpan, Hacıhüseynli kəndləri ərazilərində sənaye və məişət tullantılarının qalaqlanması və yandırılması zamanı ətraf mühitin mühafizəsi tələblərinə əməl edilməməsi faktları aşkar olunub. İnzibati Xətalar Məcəlləsinin müvafiq maddəsinin tələblərini pozduqlarına görə hər üç kəndin bələdiyyə sədrləri barələrində eləcə də şəhər ərazisində obyekt sahibi barəsində inzibati tənbeh tədbiri tətbiq olunub. Bu istiqamətdə tədbirlər davam etdirilir.

Bəzi balıq nümunələrini analiz etmək məqsədilə çalışmalara başladıq. Nümunələri İranın Poldəşt bölgəsi və Araz su anbarı dediyimiz Naxçıvanla üz-üzə olan yerdən götürdük. Bu sözləri Axar.az-a Təbriz Tibb Elmləri Universitetinin molekulyar tibb sahəsi üzrə professoru Möhsün Abbaszadə Araz çayı və ona yaxın ərazilərdə yaranan ekoloji problemlərlə bağlı aparılan müayinələrin nəticəsi haqqında danışarkən deyib. O bildirib ki, çaya axıdılan çirkli sular bölgənin flora və faunasına ciddi şəkildə təsir edib: “Balığın daxili orqanları və nəfəs yollarında histoloji müayinələr həyata keçirdik. Balıq nümunələrinin üst toxmalarında və qaraciyərində fəsadlar aşkar olundu. Bunun səbəbi suda olan ağır metallar və radioaktiv maddələr idi”. Mütəxəssisin sözlərinə görə, balıqlar Ermənistan ərazində mövcud olan Metsamor AES-dən axıdılan kirli suya görə zərər görüb: “Su kirliliyinin qaynağının tək səbəbi Ermənistan torpağında fəaliyyət göstərən Metsamor AES və bir neçə mis mədənidir. Çünki İranda bizim çalışdığımız bölgə Araz çayının başlanğıc nöqtəsi hesab olunur. O bölgədə hər hansı fabrik, mədən yoxdur”. İstismar müddəti çoxdan bitən Metsamor AES-in təcili şəkildə qapadılmalı olduğunu deyən Möhsün Abbaszadə bildirib ki, əks halda insanlar və ətraf aləm bu stansiyanın mövcudluğundan əziyyət çəkməli olacaq: “Biz Fukusima qəzasını unutmamalıyıq. Buradan böyük bir dərs almalıyıq. 1970-ci illərdə qurulan “Metsamor”un istismar müddəti 2016-cı ildə bitməli idi. Lakin AES-in fəaliyyəti 2036-cı ilə qədər uzadıldı. 1988-cı ildə Spitak zəlzələsindən sonra AES-in işi 7 il dayandırılsa da, ciddi zərər görən stansiya 1995-ci ildə yenidən fəaliyyətə başlayıb. İnsanlara və ekologiyaya zərər vuran AES və mis mədənləri barəsində ciddi ölçü götürülməlidir. Millət vəkilləri və İran Səhiyyə Təşkilatı Araz çayının ətrafında olan şəhərlərdə xərçəng xəstəliyinin daha çox yayıldığını qeyd ediblər. Su kirliliyinin aradan qaldırılmasının tək yolu Metsamor AES-in dərhal qapadılmasıdır. Ayrıca, orada fəaliyyət göstərən mis mədənləri də yoxlanmalı, tullantıları nəzarətdə saxlanmalıdır. Araz çayından mütamadi olaraq su analizləri götürülməlidir”.

Goranboy rayonunun Qızılhacılı qəsəbəsinin ilk İkinci Vətən Müharibəsi şəhidi olan müddətdən artıq hərbi qulluqçu Fariz Məhəmməd oğlu Qurbanovun 3 nəfərdən ibarət ailəsi hələ də evlə - mənzillə təmin olunmayıb.  Onu da nəzərə alsaq ki, şəhidin valideynləri yaşlı, hər ikisi də şəkər, təzyiq xəstədir və qəsəbənin ən son-ucqar nöqtəsində, elə də şəraiti olmayan həyət evində yaşayırlar, onların durumu daha da aydınlaşmış olur.  Şəhidin atası Məhəmməd kişinin və anası Lətafət xanım səhhəti xüsusilə, son 3 ilə yaxın müddət ərzində - tək və subay oğullarının şəhidliyindən sonra daha da ağırlaşıb. Hər ikisi də dəfələrlə ölümlərdən dönüb, komaya düşüblər, həkimlərin müdaxiləsi nəticəsində son anda həyata qaytarılıblar.  Şəhidin valideynlərinə, yaşlı və xəstə ata - anaya isə tək və heç bir yerdə işləməyən qızları baxır, qulluq edir və bütün ağırlıq, yük onun zərif, kövrək çiyinlərindədir. Evləri də qəsəbənin ən ucqar nöqtəsində (oradan sonra yaşayış demək olar ki, yoxdur və qəsəbənin mərkəzinə gedib-gəlmək ən azı 20-25 dəqiqəlik yoldur) olduğuna görə çox zaman həkim çağırmaq və yaxud valideynlərini qəsəbə poliklinikasına, rayon Mərkəzi Xəstəxanasına çatdırmaq onun üçün çətin olur.  Şəhidin ailəsi, anası və bacısı Əfsanə Qurbanova ötən 3 ilə yaxın müddət ərzində dövlət qurumlarına - Əmək və Əhalinin Sosial Müdafiəsinə Nazirliyinə, Sosial Xidmətlər Agentliyinə dəfələrlə müraciət etsələr də, dəfələrlə adları çəkilən qurumların rəhbər şəxslərinin qəbullarında olsalar da, hər dəfə vədlər alsalar də, heç bir nəticə yoxdur. Onlar nə Goranboyda, nə Samuxda (şəhid və qazilər üçün salınmış şəhərçikdə), nə Gəncədə, nə də Naftalanda evlə-mənzillə təmin ediliblər.  Şəhidin anası Lətafət xanımın dediklərindən: “Övladım-tək oğlum cavan yaşında Vətən uğrunda canını fəda etdi, şəhid oldu. Oğlumla fəxr edir, qürur duyuram! Ancaq balamdan sonra həyatımız çökdü, alt-üst oldu…Bir oğul, o da həyatda yox…Yoldaşımın da, mənim də səhhətimdə illərdir problemlər var. Şəkərdən, qan təzyiqindən əziyyət çəkirik. İkimizin də yerişimiz çox çətindir. Yeriməkdə, hərəkət etməkdə çox çətinlik çəkirik…Xüsusilə, övladımızın Şəhidliyindən sonra səhhətimiz daha sa pisləşib…Vallah, bizimki yaşamaq deyil! bütün yük cavan qızımın çiyinləriə düşüb. O da heç bir yerdə işləmir. Elə bil hər yerdə iş quruyub. Evimiz də qəsəbənin ən ucqar yerindədir. Dəfələrlə həm mən, həm də yoldaşım komaya düşmüşük, ölümdən dönmüşük. Rayon xəstəxanasına gedib-gəlmək, yaxud, evə həkim çağırmaq isə saatlarla vaxt aparır… Vəziyyətimizlə, durumumuzla bağlı dəfələrlə Sosial Xidmətlər Agentliyinə müraciət etmişik, qurumun rəhbər şəxslərinin qəbullarında olmuşuq. Yazıq qızım yollarda qalıb. Çox dəyərli, hər birimizin sevimlisi olan millət vəkili Qənirə xanım bizi qəbul edib, dinləyib, problemlərimiz aidiyyatı qurumlara çatdırılıb, ona da, bizə də söz verilib. Yanvar ayında Əmək və Əhalinin Sosil Müdafiəsi Nazirliyinin rəsmi şəxslərindən biri söz, vəd verdi ki, Samuxda mənzillə təmin olunacağıq, amma neçə ay gözlədik, səs çıxmadı. Qızım yenidən Sosial Xidmətlər Agentliyinə getdi, yenidən bizi qəbula yazdılar, qurumun rəhbəri ilə görüşdük, yenə söz verildi. Amma iki aya yaxın vaxt keçir, yenə ortada heç nə yoxdur. Dövlət başçımızın diqqət və qayğısı nəticədsində şəhid ailələrinin çoxu evlə-mənzilə təmin olunublar… Allah Prezidentimizi və dövlətimizi qorusun!  Niyə belə ayrı-seçkilik edirlər? Vallah, dünya malında gözümüz yoxdur. Kaş balamız sağ olaydı, yenə kasıb həyatımıza davam edərdik, bizə heç nə lazım olmazdı. Amma balamın nə mənzil, nə də orden haqqı tanınıb…Niyə belə olmalıdır? Biz bu gün-sabah ölüb gedəcəyik, bəs tək qızımızın taleyi necə olacaq? Bilmirəm, şəhidimin dərdini çəkim, yoxsa, tək qızımın… Ona görə Əmək və Əhalinin Sosial Müdafiəsi Nazirliyinə, Sosial Xidmətlər Agentliyinə üz tutaraq müraciət etmək istəyirəm ki, artıq yorulduq, bezdik, bizə söz, vəd lazım deyil, bizə konkret əməl lazımdır. Ya Goranboyda, ya Naftalanda, ya da Samuxda çox istəmirik - heç olmasa, bir otaqlı mənzillə təmin edilək. Bu, şəhidimin də, bizim də haqqımızdır”. A.Zeynalov  Məqalə Jurnalist Araşdırmaları Mərkəzinin Azərbaycan Respublikasının Qeyri-Hökumət Təşkilatlarına Dövlət Dəstəyi Agentliyinin maliyyə yardımı ilə həyata keçirdiyi “Regionlarda yaşayan şəhid ailələri və müharibə əlillərinin sosial problemlərinin həllinə dəstəyin göstərilməsi, tədbirlərin təşkili” layihəsi çərçivəsində hazırlanmışdır. 

Reklam çarxında xarici dildə mətnin səsləndirilməsi ilə bağlı bəzi televiziya yayımçılarına xəbərdarlıq edilib. Bu barədə Sozcu.az-a Audiovizual Şuradan məlumt verilib. Bildirilib ki, iyulun 27-də Audiovizual Şurasının onlayn formatda növbəti iclası keçirilib. İclasda Şuranın monitorinq qrupunun televiziya redaksiyalarının efirində qeydə aldığı qanun pozuntuları müzakirə olunub. Qeyd olunub ki, son günlərdə ARB, ATV, Speys TV, Xəzər TV televiziya redaksiyalarının efirində xarici dildə mətnin səsləndirilməsi ilə müşayiət olunan sərinləşdirici qəhvə içkisinin reklam çarxının nümayişi qeydə alınıb: "Bildiririk ki, həmin reklam çarxında olan bəzi ifadələrin Azərbaycan dilinə tərcüməsinin yazılı şəkildə nümayiş olunmasına baxmayaraq, "Media haqqında" qanunun 14.2-ci maddəsinin, habelə "Reklam haqqında" qanunun 4.7-ci maddəsinin tələblərinə əsasən "Dövlət dili haqqında" qanunun müddəalarına riayət olunmalı, yerüstü yayımçı proqramlarında dövlət dilindən istifadəni təmin etməli və reklamın əsas danışıq mətni də dövlət dilində səsləndirilməlidir. Qeyd olunanları nəzərə alaraq Audiovizual Şurası bütün televiziya redaksiyalarından həmin reklam çarxının dərhal yayımdan çıxarılmasını və yalnız səsli mətnin Azərbaycan dilinə tərcümə olunması və Azərbaycan dilinə adaptasiyası şərtilə həmin reklam çarxının nümayiş olunmasını tələb edir. Qanunvericilik tələblərinə əməl olunmadan proqramların (o cümlədən reklamların) yayımlanması aşkarlanarsa, həmin yayımçıya qarşı Şura tərəfindən müvafiq sanksiylar tətbiq olunacaq".

Çexiya Rusiya Xarici İşlər Nazirliyinin rusofobiya ilə bağlı ittihamlarına cavab olaraq, Moskvanı Ukraynadan “rədd olmağa” çağırıb. Sozcu.az xəbər verir ki, bu barədə Çexiya XİN-in rəsmi Tvitter səhifəsində məlumat yayılıb. “Çexiyanın xroniki problemləri: biz uşaqları qaçırmırıq, xəstəxanaları bombalamırıq və qonşu ölkələri işğal etmirik. Ukraynadan rədd olun!” - məlumatda deyilir. Qeyd edək ki, Rusiya insan haqları ilə bağlı tənqidi hesabat dərc edib. Hesabatın Çexiyaya həsr olunmuş hissəsində Moskva Praqanın ifadə azadlığını məhdudlaşdırmasına, qaraçılara və digər azlıqlara qarşı ayrı-seçkiliyə işarə edib, həmçinin onu rusofobiyanı qızışdırmaqda ittiham edib. Vurğulanıb ki, Çexiyanın xroniki problemlərini həll etmək əvəzinə ölkə hakimiyyəti dağıdıcı xarici siyasət avantüralarına əl atıb.

Azərbaycan Respublikasının Fövqəladə Hallar Nazirliyi üzərinə düşən vəzifələrinin icrası, o cümlədən əhalinin və ərazilərin təbii və texnogen xarakterli fövqəladə hallardan qorunması istiqamətində fəaliyyətini davam etdirir. FHN-dən Sozcu.az-a verilən xəbərə görə, Fövqəladə Hallar Nazirliyinin “112” qaynar telefon xəttinə daxil olmuş zənglər əsasında Nazirliyin aidiyyəti qurumları tərəfindən ötən sutka ərzində 43 yanğına çıxış və 6 halda köməksiz vəziyyətdə qalma faktı üzrə qəza-xilasetmə əməliyyatları həyata keçirilib. Görülmüş təcili və təxirəsalınmaz tədbirlər nəticəsində yanğınların operativ söndürülməsi, insanların həyatının xilas olunması təmin edilib. Ümumilikdə, FHN-in qüvvələri tərəfindən ötən sutka ərzində 7 nəfər xilas edilib. Həmçinin, qəza-xilasetmə əməliyyatları zamanı zamanı 2 nəfərin meyiti aşkar edilərək aidiyyəti üzrə təhvil verilib.

"Bunun açıqlamasını vermişəm. Kişi yaxın dostları haqda danışmaz. Zamiq Hüseynov mənim qohumum, Namiq Qaraçuxurlu, Nadir Qafarzadə yaxın dostumdur. Bu, səs yazısı və ya yazışma varsa qoyulsun ortaya. Onunla bağlı da tədbir görüləcək". Sozcu.az xəbər verir ki, bu sözləri müğənni Manaf Ağayev "Həmin Zaur" verilişində deyib. Sənətçi həmkarları Zamiq Hüseynov, Namiq Qaraçuxurlu, Nadir Qafarzadə haqda qeyri-etik ifadələr işlətməsi iddiasına cavab verib. O bildirib ki, adıçəkilən müğənnilər dostudur, heç vaxt onlar haqqında mənfi danışmayıb:  "Başqa heç nə yoxdur, sadəcə əsəb korlanır. Məni hamı tanıyır. Bilirlər ki, mərdimazar adam deyiləm. Mənim haqqımda deyilənlər şükürlüdür, başqaları haqda nələr deyilir. Səbrim tükənib, əvvəl özüm dava istəyirdim. İndi yaş, müəyyən xəstəlik imkan vermir". 

“Fərid casusluq maddədi ilə həbs olunub. Mənimlə iki dəfə danışıb. Amma Azərbaycanın İrandakı konsulu ilə demək olar ki, hər iki gündən bir danışırlar. Hazırda Fəridin tutulması ilə bağlı işlər gedir”. Bu barədə AzEdu.az-a İrana sevgilisi ilə görüşməyə gedərkən həbs edilən Almaniyada təhsil alan azərbaycanlı tələbə Fərid Səfərlinin anası Dilarə Əsgərova bildirib.  O qeyd edib ki, Fəridin bir neçə dəfə məhkəməsi, olub və bu proses farsca aparılır: “Ancaq mən Fəridə tapşırmışam ki, farsca ifadə verməsin, tərcüməçi tələb etsin. Əvvəlki məhkəmələrdə ingilis tərcüməçi verilmişdi, ancaq sonradan verilmədi”. Qeyd edək ki, Azərbaycan vətəndaşı, Almaniyanın Yyana Universitetinin tələbəsi, 1997-ci il təvəllüdlü Fərid Qabil oğlu Səfərli fevralın 20-də İrana səfərə gedib və həmyerlimiz orada saxlanılıb.

Dünən axşam saatlarında Kürdəmir rayonunun Pirəköcə kəndində intihar edən Lənkəran Şəhər İcra Hakimiyyətinin başçısı Taleh Qaraşovun qardaşı, 48 yaşlı Azər Azay oğlu Qaraşovla bağlı bəzi məqamlar üzə çıxıb. “Qafqazinfo”nun əldə etdiyi məlumata görə, Azər özünü yaşadığı evdə güllələyərkən otaqda tək olub. İlkin araşdırmalar zamanı məlum olub ki, A.Qaraşovun həyat yoldaşı, övladları və anası hadisə vaxtı evdə olsa da, digər otaqlarda olublar. A.Qaraşov bir neçə dəqiqə əvvəl həyat yoldaşına harasa gedəcəyini və geyimlərini hazırlamasını deyib. Bir qədər sonra isə otaqdan atəş səsi eşidilib. A.Qaraşovun olduğu otağa ilk olaraq anası daxil olub və oğlunun özünü qarnından güllələdiyini görüb. Dərhal hüquq-mühafizə orqanlarına və təcili tibbi yardıma müraciət edilib. Lakin bir neçə dəqiqə sonra A.Qaraşov dünyasını dəyişib. Hadisə yerinin araşdırılması zamanı evdən beşatılan növ tüfəng aşkar edilib. A.Qaraşovun qarnından aldığı xəsarətlərdən ölümü müəyyən edilsə də, hadisə vaxtı evin tavanında da güllə izləri müəyyən edilib. Tüfəng və digər maddi sübutlar prokurorluq əməkdaşları tərəfindən götürülüb. Müvafiq ekspertizalar təyin edilib. Qeyd edək ki, A.Qaraşov Kürdəmirdə müxtəlif vəzifələrdə, son olaraq Kürdəmir Rayon Mədəniyyət İdarəsində çalışıb. Xatırladaq ki, Lənkəran Şəhər İcra Hakimiyyəti hadisənin ehtiyatsızlıq səbəbindən baş verməsi barədə məlumat yayıb.

Ukrayna Silahlı Qüvvələri Zaporojye vilayətinin qərbində iri mexanikləşdirilmiş əks-hücum əməliyyatına başlayıb və ehtimal ki, Orexovun cənubunda müəyyən mövqelərdə Rusiyanın müdafiəsini yarıb. Bu qənaətə ABŞ mərkəzli Müharibə Araşdırmaları İnsitutunun analitikləri gəlib. Bildirilib ki, Rusiya Müdafiə Nazirliyindəki mənbələr və bir neçə rusiyalı müharibəmeyilli bloqçular Robotino kəndi istiqamətində (Orexovodan 10 km cənubda) Ukraynanın cəbhədən hücumu barədə məlumat veriblər. Geolokasiya görüntüləri göstərir ki, USQ hücum zamanı Robotinodan 2,5 kilometr şərqdə irəliləyib. Lakin Rusiya qüvvələri çevik müdafiə taktikasından istifadə edərək Ukrayna əsgərlərini qismən geri çəkiblər. İnstitutun materialında qeyd olunub ki, Ukrayna Silahlı Qüvvələri əməliyyat üçün bölgəyə yeni qüvvələr yeridib, Rusiya qoşunları isə, görünür, bu sektorda rotasiya, yardım və ya əhəmiyyətli gücləndirmə olmadan cəbhə xəttində sıxışdırılıb. Bu vəziyyət Ukraynaya yaxın həftələrdə Orexovun cənubunda daha uğurlu irəliləməyə başlamağa imkan verə bilər. Anonim iki Pentaqon rəsmisi Ukraynanın əks-hücumunun “böyük zərbəsinin” ciddi şəkildə başladığını açıqlayıb.

“İyulun 25-də Moskvada keçirilən üçtərəfli görüşdə Rusiya Ermənistanla Azərbaycan arasında tərəflərin müxtəlif mövqelərini dəstəklədiyini bildirsə də, uzunmüddətli, effektiv sülh sazişinin real müzakirəsini təxirə salmağa davam edib”. Bu barədə ABŞ-ın Müharibə Araşdırmaları İnstitutu məlumat yayıb. Qeyd olunub ki, Rusiya Ermənistan və Azərbaycana Moskvanın Cənubi Qafqazda hərbi və diplomatik mövcudluğunun zəruri olduğunu xatırlatmaq üçün yollar axtarmağa davam edir: “Canlı yayım zamanı Rusiya xarici işlər naziri Sergey Lavrovun köməkçisi onun qulağına deyib ki, “keçmiş Dağlıq Qarabağ Muxtar Vilayəti” ifadəsini işlətmək olmaz. Bəzilərinin fikrincə, bu, sadə, lakin effektiv manipulyasiya taktikasıdır və məqsədli şəkildə hazırlanmış ssenaridir”. Amerikalı analitiklərin fikrincə, Ermənistan Azərbaycanla son hərbi gərginliklər zamanı İranın “Shahed” pilotsuz uçuş aparatlarından (PUA) istifadə edib: “Ola bilsin, Moskvada keçirilən üçtərəfli görüşdə bu məsələ də müzakirə edilib. İran Ermənistana hərbi dəstəyini genişləndirə bilər. Ola bilsin, Rusiya Ermənistan üzərində təsirini bərpa etməyə və Tehranın İrəvana təsirini azaltmağa çalışır”. Qeyd edək ki, iyulun 25-də Moskvada Azərbaycan, Rusiya və Ermənistan xarici işlər nazirləri Ceyhun Bayramov, Sergey Lavrov və Ararat Mirzoyan arasında üçtərəfli görüş keçirilib. Danışıqlar S.Lavrovun təşəbbüsü ilə baş tutub.

Bakı və Gəncə şəhərlərində iki yeniyetmə itkin düşüb. Gəncə şəhər sakini 2008-ci il təvəllüdlü Rəfiyeva Brilyant Vüqar qızı iyulun 25-də saat 11 radələrində evdən çıxaraq naməlum istiqamətə gedib və bir daha geri qayıtmayıb. Digər hadisə isə Sabunçuda qeydə alınıb. Belə ki, 2008-ci il təvəllüdlü Mustafayeva Atlas Malik qızı iyulun 26-da saat 17:20 radələrində yaşadığı evdən çıxaraq geri qayıtmayıb. Faktlarla bağlı araşdırma aparılır.

“Ukrayna Silahlı Qüvvələri Krıma gedən quru yolu yararsız hala salmağa çalışır”. Bu barədə ABŞ Müdafiə Nazirliyi (Pentaqon) məlumat yayıb. Bildirilib ki, Ukrayna ordusu hazırda Zaporojye istiqamətində ciddi əks-hücum əməliyyatları keçirmək niyyətindədir. Qeyd edilib ki, əməliyyat uğurlu başlasa, 2-3 həftə davam edə bilər. Bunun da Ukrayna üçün ciddi sınaq olacağı bildirilib. Xatırladaq ki, Rusiya ilə Ukrayna arasında genişmiqyaslı müharibə ötən il fevralın 24-də başlayıb.

Çanaqqala mərkəzinin Sarıbeyli kəndi yaxınlığındakı meşədə yanğın baş verib. Məlumata görə, yanğını küləyin təsiri ilə genişlənir və böyüyür. Bölgədə 35 suçiləyici maşın, 5 buldozer, 3 yanğınsöndürmə briqadası, 8 ilkin müdaxilə maşını, 8 su təchizatı maşını, 4 inşaat maşını, 300 canlı qüvvə 80 jandarm fasiləsiz olaraq iş aparır. Yanğının yaşayış məntəqələrinə də keçmək təhlükəsi var. Hazırda yanğınla mübarizə işləri davam etdirilir.

Amerikalı tədqiqatçılar ömrü təxminən dörddə bir əsr uzada biləcək yaxşı vərdişlərdən danışıblar. Sozcu.az xəbər verir ki, bu barədə CNN məlumat yayıb. Amerika Qidalanma Cəmiyyətinin illik toplantısı olan NUTRITION 2023-də təqdim olunan Million Veteran Proqramının araşdırmasına görə, elm adamları ömrü uzatmaq üçün ən təsirli səkkiz vərdişin adını açıqlayıblar. Tədqiqatda 40-99 yaş arası təxminən 720 min müharibə veteranı iştirak edib. Mütəxəssislər iştirakçıların hər birinin həyat tərzini öyrənib və hansı vərdişlərin ömür uzunluğuna müsbət təsir etdiyini müəyyən ediblər. Onların məlumatına görə, bu səkkiz vərdişin həyata keçirilməsi artıq 40 yaşı olanların ömrünü 24, 50-dən yuxarı olanların ömrünü 21, 60-dan yuxarı olanların isə 18 il uzadacaq. Deməli, ömrü uzatmağın ən təsirli yolu fiziki məşqdir. Tədqiqatın aparıcı müəllifi Xuan Mai Nguyenin sözlərinə görə, müntəzəm və çox idman edən insanlar məşq etməyənlərə nisbətən ömrünü 46 faiz artırır. Gözlənilən ömür uzunluğuna görə siyahıda ikinci yerdə opioidlərdən - həm həkim tərəfindən təyin olunan güclü ağrıkəsicilərdən, həm də qeyri-qanuni dərmanlardan asılılığı olmayan tədqiqat iştirakçıları olub. Bir araşdırmaya görə, müntəzəm opioid istifadəsi ömür müddətini 34 faiz azaldır. Hazırda, sözdə opioid böhranı ABŞ-ın ictimai səhiyyəsində təcili vəziyyətdir. Siqareti tərgitmək də ömrün uzamasına kömək edir. Mütəxəssislər qeyd edirlər ki, siqaret çəkməyənlər siqaret çəkənlərdən orta hesabla 29 faiz daha uzun yaşayırlar. Onlar əlavə ediblər ki, hər yaşda pis vərdişdən əl çəkmək sağlamlıq üçün böyük faydalar gətirir. (publika)

Mütəxəssislər pəhriz saxlamadan arıqlamağın sirrini açııqlayıblar. Sozcu.az lent.az-a istinadən bildirir ki, qidalanma prosesi düzgün təşkil edilsə və zərərli qidalardan imtina olunsa aclıq aksiyaları, pəhrizlər və məhdudiyyətlər olmadan arıqlamaq olduqca mümkündür. Prosesi sürətləndirmək üçün bir neçə fənd bilmək lazımdır. Dietoloqlar sağlamlığınıza zərər vermədən arıqlamağa kömək edəcək bir neçə sadə üsullar açıqlayıblar. Bunlardan birincisi odur ki, səhər yeməyi mütləq yeyilməlidir. Bu sizin gün ərzində harmoniya və rifahınızın açarı olacaq. Tədqiqatçılar yüksək kalorili səhər yeməyi yeyən, lakin nahar və axşam yeməyini yüngül edən insanların günə 300 kalorili səhər yeməyi ilə başlayanlara nisbətən orta hesabla 18 kiloqram daha çox arıqladığını müəyyən ediblər. Çalışın yemək yeyərkən yavaş yeyin. Əksər hallarda bu, həddindən artıq yeməyin qarşısını almaq üçün kifayətdir. Doymaq üçün ən azı 20 dəqiqə lazımdır. Bundan əlavə, bu şəkildə həzm sisteminiz bütün qidaları və mikroelementləri daha tez mənimsəmiş olacaq. Yediyiniz şeyə diqqət yetirmək daha az yeməyə kömək edə bilər. Həm də yeməyinizdən daha çox həzz alacaqsınız. Diqqətinizi televizor, iş, kompüter oyunları, kitab oxumaq və s. Daha tez-tez yeyin, lakin kiçik hissələrlə qidalanın. Bu, maddələr mübadiləsini sürətləndirmək və aclıqdan tamamilə xilas olmaq üçün əla bir yoldur. Pəhriz etmədən belə, gün ərzində aralıqlı yemək yağları daha effektiv şəkildə yandırmağa kömək edəcək. Daha çox sağlam yağlar və daha az yağlı işlənmiş qidalar yeyin. Sağlam yağlar, qəribə də olsa, arıqlamaq prosesində kömək edə bilər. Avokado, zeytun yağı və qoz-fındıqda olan mono doymamış yağlar çox sağlamdır və maddələr mübadiləsini sürətləndirir. Kifayət qədər yatmaq arıqlamağın ən asan yollarından biridir. Yuxunun olmaması iştahı artıran və toxluqdan məsul olan hormon olan leptin səviyyəsini azaldan qrelin istehsalını stimullaşdırır.

Çempionlar Liqasının 2-ci təsnifat mərhələsinin ilk oyunları arasında ən çox azarkeş toplayan matçlar açıqlanıb. Sozcu.az xəbər verir ki, 12 qarşılaşmanı ümumilikdə 73 278 tamaşaçı izləyib. “Qarabağ”ın Polşa “Rakov”una səfərdə 2:3 hesabı ilə uduzduğu görüşü 5451 nəfər stadiondan izləyib. Matç bu nəticə ilə 6-cı olub.  Ən çox azarkeşi isə “Servette” (İsveçrə) - “Genk” (Belçika) oyunu toplayıb - 18026 nəfər. Qeyd edək ki, "Qarabağ"la "Rakov" arasındakı cavab oyunu avqustun 2-də Bakıda keçiriləcək və saat 20:00-da başlayacaq.

Avqustun 9-da saat 11:00-dan 2023-2024-cü tədris ili üzrə məktəbəhazırlıq qruplarına qəbul üçün qeydiyyata start verilir. Qeydiyyat mektebeqebul.edu.az elektron sistemi üzərindən həyata keçiriləcək. Elm və Təhsil Nazirliyindən Sozcu.az-a verilən məlumata görə, Azərbaycan bölməsi üzrə məktəb və müəllim seçimi 11 avqust saat 11:00-da, tədris digər dillərdə aparılan bölmələr üzrə məktəb və müəllim seçimi isə 15 avqust saat 11:00-da aktiv ediləcək. Qeyd edək ki, 2023-2024-cü tədris ilindən özəl ümumi təhsil müəssisələrinin məktəbəhazırlıq qruplarına qəbul da mektebeqebul.edu.az elektron sistemi vasitəsilə aparılacaq.