Məktəblərdə müəllimin borcu oxumayan uşaqlarla işləməkdir. Sozcu.az xəbər verir ki, bunu elm və təhsil naziri Emin Əmrullayev VIII ADA Beynəlxalq Təhsil Konfransında deyib. Onun sözlərinə görə, sertifikasiya imtahanı ona görə tətbiq edilib ki, daha yaxşı müəllimlər seçilə bilsin: "Müəllim olmaq çox çətin peşədir. Bu ixtisası insan özü seçir. Uşaqlarla, valideynlərlə işləmək heç də asan deyil. 30 sualdan 30-a da doğru cavab verən müəllim ilə 10 suala doğru cavab verən şəxsə "müəllim" demək ədalətsizlikdir". E.Əmrullayev bildirib ki, son 3 ildə 8 000-dən çox müəllimin əmək müqaviləsinə xitam verilib. Nazir həmçinin qeyd edib ki, bu gün Azərbaycan təhsil sistemində tədqiqat olduqca azdır: “Bu sahədə geri qalırıq”.

İranda rejim dəyişikliyi istəmirəm. Bu, ölkədə xaos yaradacaq. Sozcu.az xəbər verir ki, bunu ABŞ Prezidenti Donald Tramp bildirib. O, İranın nüvə silahına malik olmayacağını bəyan edib: “Bu, onların ağlında olan son istəkdir”.

Əgər İsrail atəşkəs rejimini pozmasa, İran da ona əməl edəcək. Sozcu.az xəbər verir ki, bunu İran Prezidenti Məsud Pezeşkian Malayziyanın Baş naziri Ənvər İbrahimlə telefon danışığı zamanı deyib. "Biz dialoq aparmağa və İran xalqının qanuni hüquqlarını danışıqlar masasında müdafiə etməyə hazırıq", - deyə o bildirib.

Rusiya Prezidenti Vladimir Putin İran-İsrail münaqişəsinin həlli üçün yardım təklif etmişdi. Sozcu.az xəbər verir ki, bu barədə ABŞ Prezidenti Donald Tramp “Foks Nyus”a açıqlamasında deyib. Trampın sözlərinə görə, Putin özü ona zəng edib və kömək təklif edib. "Bildiyiniz kimi, Vladimir mənə zəng etdi. O soruşdu: "İranla bağlı sizə kömək edə bilərəmmi?" Dedim: "Xeyr, İranla bağlı köməyə ehtiyacım yoxdur. Sizinlə bağlı köməyə ehtiyacım var". Və ümid edirəm ki, Rusiya ilə razılaşacağıq. Çox təəssüf ki, ötən həftə 6 min əsgər həlak olub", - Tramp bildirib.

Rəsmi statistika iyunun 13-dən bu yana sionist rejimin işğalçı müharibəsində 606 iranlının şəhid olduğunu göstərir. Sozcu.az xəbər verir ki, bu sözləri İranın səhiyyə naziri Məhəmməd Rza Zəfərkəndi deyib. O qeyd edib ki, İsrail müharibəsi başlayandan indiyədək İran üzrə ümumilikdə 5332 nəfər yaralanıb. Zəfərkəndi bildirib ki, İsrailin İrana qarşı hücumlarının ən ölümcülü son 24 saatda olub: çərşənbə axşamı səhər atəşkəs qüvvəyə minməzdən əvvəl 107 nəfər şəhid olub, 1342 nəfər yaralanıb. Xatırladaq ki, 13 iyunda İsrailin hücumu ilə başlayan İran-İsrail savaşı bu gün atəşkəslə yekunlaşıb.

Təhsilverənlərin sertifikatlaşdırılması prosesinin test imtahanı mərhələsi bu gün də davam edir. Sozcu.az xəbər verir ki, sertifikatlaşdırılma imtahanlarının dördüncü günündə də 60 bal toplayan müəllim olub. Gəncə şəhər Mir Cəlal Paşayev adına 39 nömrəli tam orta məktəbin biologiya müəllimi Nərgiz Əliyeva sertifikatlaşdırılması prosesinin tedt imtahanı mərhələsində maksimum nəticə göstərərək 60 bal toplayıb! Qeyd edək ki, 24 iyun tarixində keçirilən imtahanda biologiya və kimya fənnini tədris edən müəllimlər iştirak edirlər. Bu gün təşkil olunan test imtahanına ümumilikdə 6142 nəfər müəllim dəvət olunub.

Məhərrəm İncə Türkiyənin Cümhuriyyət Xalq Partiyasına (CHP) qayıdır. Sozcu.az xəbər verir ki, İncə bu gün keçiriləcək TBMM-in CHP fraksiyasının iclasında yenidən CHP-yə qatılacaq. CHP lideri Özgür Özəl Məhərrəm İncəyə döş nişanı təqdim edəcək. Qeyd edək ki, Məhərrəm İncə Türkiyədə 2018-ci ildə keçirilmiş prezident seçkilərində namizəd olub. O, 2021-ci ildə CHP-dən ayrıldıqdan sonra elə həmin ildə Məmləkət Partiyasını təsis edib. Məlumata görə, Məmləkət Partiyası iyul ayında fövqəladə qurultayla özünü buraxacaq.

Məktəbli formalarının dəyişdirilməsi ilə bağlı hər hansı yeni bir qərar yoxdur. Sozcu.az xəbər verir ki, bunu elm və təhsil naziri Emin Əmrullayev jurnalistlərə açıqlamasında deyib. Nazir bildirib ki, məktəbli formalarının mərkəzləşdirilmiş şəkildə dəyişdirilməsi gündəmdə deyil: "Müvafiq qaydalar çərçivəsində müəyyən edilmiş formalar var. Müxtəlif məktəblərin bu formaları öz təşəbbüsləri ilə müəyyən qədər dəyişə bilər. Yəni bu, ölkədə fəaliyyət göstərən bəzi məktəblərdə fərqli şəkildə tətbiq oluna bilər. Amma bu, mərkəzləşdirilmiş şəkildə, yəni bütün məktəblər üzrə formaların rəsmi olaraq dəyişdirilməsi anlamına gəlmir. Hazırda məktəbli formalarında dəyişiklik nəzərdə tutulmur".

Azərbaycanda azyaşlı qızların özlərindən yaşca böyük şəxslərlə ailə qurması halları getdikcə daha çox sosial müzakirə mövzusuna çevrilir. Bəziləri bu halları təkcə fərdi seçim kimi qiymətləndirsə də, problemin kökündə sistemli boşluqlar, ailədaxili ünsiyyət çatışmazlığı və məktəblərin sosiallaşdırıcı funksiyasını itirməsi dayanır. Təhsil sistemi yalnız attestat verməyə yönəlib, müəllimlər özlərini yoxlama imtahanlarına, valideynlər isə smartfonlarına fokuslanıb. Bu cür şəraitdə gənc nəsil istinad nöqtəsini ailədən və məktəbdən deyil, başqa mənbələrdən axtarmağa başlayır. "Günah o qızlarda deyil, günah bu gün qurduğumuz o sistemdədir". Bunu "Yeni Sabah"a psixoloq Gülər Əhmədova deyib.  O əlavə edib: "Tədris yükü o qədər böyükdür ki, məktəbdənkənar və sinifdənkənar işlərin heç biri keçirilmir. Məktəb sadəcə atestat almaq üçün bir vasitədir. Amma əslində, uşaqlar məktəbdə sosiallaşmalı, inkişaf etməlidir.  Bu gün uşaqlar məktəblərdə öz yaşıdları ilə sosiallaşa bilmirlər. Digər tərəfdən, valideynlərin övladları ilə sosiallaşması, ünsiyyət qurması çox bərbad vəziyyətdədir. Evdə hamının əlində telefon var. Atanın da, ananın da, uşaqların da. Adamlar şam birlikdə axşam yeməyi, gün boyu hansısa ortaq məşğuliyyətə vaxt ayırmırlar. Aşağı Güzdək qəsəbəsində qaçırılma ilə bağlı gündəmə gəlmiş Nəzrin Babayevanı qətiyyən günahlandırmıram. Onun verdiyi qərar bəlkə də doğrudur. Birmənalı şəkildə atasının ona qarşı olan münasibətini açıq-aşkar söyləyir. İnanıram ki, ailə həyatı qurduğu insan da mənəviyyatca daha üstündür. Ölkəmizi biabırçı vəziyyətə gətirib çıxarmışıq. Ən ciddi problem isə məktəbin atestat almaq üçün sadə bir yerə çevrilməsidir. Məktəb özünün əsas funksiyasını itirib, halbuki o da tərbiyə yeridir. Məktəbdə yalnız təhsil haqqında danışılır. O təhsilin müəyyən hissəsi repetitorlardadır. Hamının gizlətməyə çalışdığı isə 10-11-ci sinif şagirdlərinin dərsə gəlməməyidir. Görünən dağa bələdçi lazım deyil. Özümüz-özümüzə nə vaxta qədər yalan danışacağıq?! Uşaqlar 9-cu sinifdən etibarən repetitorlara yönəlir, nəticə olaraq nə məktəb ilə, nə də öz məktəb yoldaşları ilə əlaqəsi qalır. Düşünürəm ki, məktəblərə pedaqoqlar gətirilməlidir. Orta məktəblərdə müəllimlərin fikri artıq uşaqlarda yox, özlərindədir. Müəllimlər artıq öz problemlərinə yönəliblər ki, imtahandan keçə biləcəyəm? Maaşım nə qədər olacaq? Buna görə də müəllimlərin artıq uşaqlarla maraqlanmağa vaxtı yoxdur. Fiziki olaraq bu mümkün deyil. Valideyn əlindən telefonu yerə qoymur, uşaqlarla maraqlanmır, müəllimlərin də başı imtahanlarına qarışıb. Buna görə də uşaqlar kriminal ünsürlərə, hansısa ideoloji qruplara yönəlirlər.  Uşaqlar romantika axtarır. Nəzrinin nitqini özüm araşdırdım. Onun nitqində əsas motivativ söz “xoşbəxtlik” idi. Onun üçün bu saat digər ünsürlər maraqlı deyil, o, ailəsindən ala bilmədiyi xoşbəxtliyi yanına qaçdığı bəydən alır. Bəy də ağlı başında, əqidəli bir insana bənzəyir. Ona görə də dövrü nəzərə alsaq, düşünürəm ki, ehtiraslı və enerjili olduğu dövrdə hansısa əllərə düşməsindənsə, xoşbəxt olduğu insanla evlənməsi daha yaxşı olub". 

“Mən tam məsuliyyətimlə deyirəm, Kənd Təsərrüfatı Nazirliyində aqrar təsərrüfatın problemlərini bilən yoxdur. Kənd təsərrüfatı iflasa uğrayır. İlbəil kənd təsərrüfatı məhsullarının qiyməti niyə artır? Bu suala cavab verə bilən bir mütəxəssis tapmaq çətindir. Ona görə də belə bərbad gündəyik”. Bu sözləri Yenisabah.az-a açıqlamasında aqrar məsələlər üzrə ekspert Akif Nəsirli deyib. O, bildirib ki, yerli kərə yağının ixracı olduqca baha başa gəlir: “Bunun üçün kənd təsərrüfatı inkişaf etdirilməlidir. Bizim ölkədə çox maraqlı tendensiya var. Enerji daşıyıcıları ölkəsi olsaq da, enerji daşıyıcılarının qiymətini ilbəil artırırıq. Məsələn, götürək elə kərə yağını. Gəlin hesablayaq. 1 kiloqram kərə yağı istehsal etmək üçün 25 kiloqram həcmində 3.6 faiz yağlılığa malik təzə süd lazımdır. 1 litr südün qiyməti ən aşağısı 1 manat 60 qəpikdir. Lap kənddəki fermadan 1 manata alaq. Bu qiymətdən alsaq belə, 1 kiloqram yağın xammalı 25 manat edir. Üstəgəl bunun emal, istehsal xərcləri də var. Azərbaycanda kərə yağının xammalının maya dəyəri 25 manatdan yuxarıdır. Belə olan halda, Azərbaycan daxilində kərə yağının istehsalı sərfəlidirmi? Əlbəttə sərfəli deyil. İrandan gələn kərə yağının gömrük qiyməti 8 manat 27 qəpikdir. Azərbaycanda kənd təsərrüfatında istifadə olunan dizel yanacağının litri 1 manatdır. İranda isə dizel yanacağının qiyməti 2 qəpikdir. İranda təzə südün 1 litri 25-30 qəpikdir. Bununla hesablayanda bizdə kərə yağının maya dəyəri 25 manat, İranda isə 3 manat 15 qəpikdir. Heyvandarlığın digər məhsulları da bu formadadır”.  Ekspert vurğulayıb ki, ətin qiyməti 2015-ci ildən bəri ilbəil bahalaşır: “Keçək ət məsələsinə. İdxal olunan məhsullar siyahısında ət də xüsusi yer tutur. Biz 2000-ci ildən başalayaraq, örüş yerlərini mədudlaşdırmağa başladıq. Bunun ardınca hökumət pambığı strateji məhsul elan etdi. Həmin pambığın 60-70 faizi dövlət fonduna aid olan örüş ərazilərində əkildi. Ardınca aqroparklar yaradıldı. Ölkədə örüş yerləri sıradan çıxdı. Buna görə də heyvandarlıqla məşğul olan fermerlər başladılar heyvanları qapalı şəraitdə saxlamağa. İribuynuzlu heyvanı da, xırdabuynuzlu hevanı da. Örüş olanda 1000-2000 qoyun saxlayan fermer, qapalı şəraitdə uzaq başı 150-200 qoyun saxlaya bilir. Üstəlik onlara bütün günü yem verməlidir. Həm say məhdudlaşır, həm də maya dəyəri artır. Ona görə də ətin qiyməti 2015-ci ildən bəri ilbəil bahalaşır”.  İqtisadçı diqqətə çatdırıb ki, Azərbaycanda buğda sortları seleksiya edilmir: “Buğdanın birinci problemi su problemidir. Ölkə ərazisində formalaşdırılan suvarma suyu bölüşdürülmədiyindən əkinlə məşğul olanların bir çoxuna çatmır. Su idarə edilmədiyinə görə, su qıtlığı yaşanır. Bakının yaxınlığında, Hacıqabulda 10 min hektarlarla ərazi suvarılmadığına görə ümumiyyətlə becərilmir. Həmin ərazilərdə sovet dövründə taxıl əkilirdi. Digər problem isə Azərbaycanda seleksiya işi ilə məşğul olan qurum yoxdur. Azərbaycana uyğun taxıl sortları yaradılmalıdır. Kanadada 70-80 sentner məhsuldarlıq verən buğdanı Azərbaycana gətirəndə məhsuldarlıq 25-30 sentnerə düşür. Çünki iqlim əlverişli deyil. Haradan gətirilməsindən asılı olmayaraq, həmin buğda seleksiya yolu ilə Azərbaycan şəraitinə uyğunlaşdırılmayıbsa, gözlənilən məhsuldarlığı verməyəcək. Üstəlik bu cür buğdadan alınan unun keyfiyyəti aşağı olur. Bütün bunları Kənd Təsərrüfatı Nazirliyi təşkil etməlidir. Nazirlikdə mütəxəssis yoxdur. Onlar bu sahələrlə bağlı plan qurmalıdır və həmin planı hökumətə təqdim etməlidir. Kənd təsərrüfatına cavabdeh olan nazirlik Tarif Şurası qiyməti qaldıranda etiraz etməlidir ki, bu bizim sahəyə ziyandır. Mən tam məsuliyyətimlə deyirəm, Kənd Təsərrüfatı Nazirliyində aqrar təsərrüfatın problemlərini bilən yoxdur. Kənd təsərrüfatı iflasa uğrayır. İlbəil kənd təsərrüfatı məhsullarının qiyməti niyə artır? Bu suala cavab verə bilən bir mütəxəssis tapmaq çətindir. Ona görə də belə bərbad gündəyik”. 2025-ci ilin ilk 5 ayında Azərbaycanın ümumi mal idxalı ötən ilin eyni dövrü ilə müqayisədə kəskin artaraq 7,3 milyard dollardan 9,96 milyard dollara çatıb. Beləliklə, ümumi idxalda 2,66 milyard dollar və ya 36,5% artım qeydə alınıb. Azərbaycandan xaricə ən çox valyuta çıxaran məhsulların siyahısında buğda, süd-qaymaq, çay və meyvə-tərəvəz yer alır. 

Fəaliyyəti dayandırılan “Azadlıq” partiyasının sədri Əhməd Orucun oğlu vəfat edib. Sozcu.az xəbər verir ki, bu barədə onun dostları məlumat veriblər. Bildirilib ki, siyasətçinin oğlu Günxan Oruc vaxtsız dünyasını dəyişib. Bakıdakı məktəblərdən birində müəllim işləyən Günxanın vəfat səbəbi qeyd edilməyib. Allah rəhmət eləsin

İsrail Tehran sakinlərinə müraciət edib. Sozcu.az xəbər verir ki, bu barədə İsrail Müdafiə Qüvvələri fars dilində müraciət yayıb. Qeyd olunur ki, paytaxtda hədəf kimi müəyyən edilən obyektlərə silah istehsalı mərkəzləri, hərbi bazalar və İran rejimi ilə əlaqəli təhlükəsizlik qurumlarına zərbələr endiriləcək. Sakinlərdən sözügedən ərazilərdən uzaq durmaları tövsiyə edilib.

Tezliklə İran ABŞ-a cavab olaraq bu ölkənin Yaxın Şərqdəki hərbi kontingentinə hücum həyata keçirə bilər. Sozcu.az xəbər verir ki, bu barədə “Röyters”ə adı açıqlanmayan iki ABŞ rəsmisi bildirib. Vurğulanıb ki, İranın hücumları bir-iki gün ərzində ola bilər. Qeyd edək ki, dünən ABŞ Hərbi Hava Qüvvələrinə məxsus bombardmançılar İranın Fordo da daxil olmaqla 3 nüvə obyektinə zərbələr endirmişdi.

“Sadəcə indi Amerika prezidenti ona nəticə lazımdır deyə, deyir ki, biz İranın əlindən nüvə silahını aldıq...” İsrailin, ardınca da ABŞ-ın İrana təcavüzü nəticəsində başlanmış hərbi əməliyyatların ikinci həftəsi də başa çatmaq üzrədir. Bəs görəsən, İranda bundan sonra hərbi müstəvidə hadisələr necə inkişaf edəcək?  Doğrudanmı İranın nüvə proqramı durdurulub? ABŞ və İsrail qısa müddətdə öz məqsədlərinə nail ola biləcəklərmi? Mövzu ilə bağlı Moderator.az-a açıqlamasında hərbi ekspert Üzeyir Cəfərov bunları söyləyib: “Hesab edirəm ki, bundan sonra da İranla İsrailin bir-birinə qarşı raket atışları davam edəcək. Eyni zamanda Amerikanın düşünülməmiş addımından sonra İran üçün Pentaqonun yaxın ərazilərdəki bazaları da hədəfə çevrilə bilər. İranın nüvə proqramına gəldikdə deməzdim ki, həmin proqram artıq tam durdurulub. Çünki bundan ötrü İranda həmin proqramı həyata keçirmək üçün lazım olan bütün obyekt və avadanlıqları məhv etmək lazımdır. Buna isə qısa müddətdə nə İsrailin, nə də Amerikanın gücü, imkanı çata bilər. O səbəbdən ki, nüvə proqramı yalnız bir və ya bir neçə yerdə deyil, tutaq ki, Tehranda və ya Natanzda, Fordoda, yaxud Buşerdə. Proqramla bağlı obyektlər bütün ölkə ərazisinə yayılıb, ona görə də onu durdurmaq çətin məsələdir.  ki qaldı bundan sonra hadisələr baş verə biləcək  Bütün bu və ya digər səbəblərdən ABŞ və İsrail qısa müddətdə öz məqsədlərinə nail ola bilməyəcək. Ona görə ki, bu mümkünsüzdür. Sadəcə indi Amerika prezidenti ona nəticə lazımdır deyə, deyir ki, biz İranın əlindən nüvə silahını aldıq. Yəni blefi xoşlayan işğalçının yanında olan adamın bu fikri, əlbəttə ki, gülüncdür. Axı, İranın əlindən nüvə nüvə proqramını necə ala bilərsən? Əvvəla, hələ İranda nüvə silahının olmasını heç kəs isbatlamayıb. Heç ölkə rəhbərləri də bəyan edir ki, nüvə silahı bizə lazım deyil. Aydın məsələdir, deyirlər ki, nüvə proqramını sülh məqsədi ilə həyata keçiririk. Əslində bundan başqa məqsədlər üçün də istifadə etmələri mümkündür. Bu mənada hesab edirəm ki,  Amerika və İsrail hələ çox çalışmalı olacaq...  Ancaq onu da qeyd edim ki, onların bundan sonra hələ başqa planları da var. Biri budur ki, İranda özlərinə yaxın olan bir marionet rejim qurmaq istəyirlər. Netanyahu ilə Tramp arasında bir razılaşma var. Və bu günlərdə özünün 49 yaşlı qızını 39 yaşlı yəhudi əsilli biznesmenə ərə verən sonunçu şahın oğlu Rza Pəhləvi çalışır ki, İsrail və Amerikanın əli ilə yenidən İrana qayıdıb hakimiyyətə gəlsin və onların buyruğu ilə oturub-dursun. Yəni bu gün İsrailin Amerika ilə bir yerdə heç də məqsədi orada nüvə proqramını durdurmaq deyil, onlar İran üzərindən özləri üçün müəyyən bir divident qazanmağa çalışırlar. Bu gün İsrailin Amerikanın hərbi əməliyyatların məqsədi budur...  Təəssüflə onu da qeyd edim ki, İsrail-İran savaşı nəticəsində xeyli dağıntılar var, xeyli ölən, yaralanan var. Və bu say get-gedə artır. Əlbəttə ki, heç kim nə İsraili yer üzündən silə biləcək, nə də İranın məqsədlərinin qarşısını ala biləcək. Sadəcə bir müddət nüvə proqramını zəiflədəcək, ləngidəcəklər. Yəni fizikləri tapmaq lazımdır, yeni mütəxəssislər gətirmək lazımdır- bu da bir qədər vaxt aparacaq. Bununla belə, ola bilsin, İranda gözlənilən hakimiyyət dəyişikliyi baş verəndən sonra bu ölkə rəhbərliyi nə vaxtsa Amerika və İsraillə bir masa arxasına keçərək bir sıra məsələləri müzakirə edərək onların həllinə çalışacaqlar. Belə davam edə bilməz. Və hadisələrin də inkişafı onu göstərir ki, gec tez bunlar masa arxasında bir sıra məsələləri öz aralarında çözüb başa çatdırmalıdırlar...”

2025-ci ilin sertifikasiya imtahanları bir daha sübut etdi ki, Azərbaycan məktəblərində “müəllim” adını daşıyan, amma bu ada heç bir aidiyyəti olmayan yüzlərlə, bəlkə də minlərlə şəxs var. İmtahanda 30 balı belə toplaya bilməyən birisi nəinki müəllim deyil, ümumiyyətlə, şagird qarşısına çıxacaq səviyyədə deyil. İndi durub bu insanlara görə qaydaları yumşaltmaq, güzəşt axtarmaq, onlara bəraət qazandırmaq — bu gələcəyimizə qarşı edilən ən böyük xəyanətdir. Biz bu gün sinif otaqlarını savadsızlıqdan, məsuliyyətsizlikdən, zehni tənbəllikdən təmizləməyə çalışırıq. Amma sosial şəbəkələrdə “onlar illərlə dərs deyib”, “aç qalsınlar?”, “uşaqları böyüdürlər” arqumentləri ilə çıxış edənlər əslində təhsili deyil, sistemin çöküşünü müdafiə edirlər. Bu qədər məsuliyyətsizlik olmaz! Öz fənnindən 50 sualdan 30-na cavab verə bilməyən bir insana uşağını etibar edən valideyn də, onu məktəbdə saxlayan direktor da, müdafiəsinə qalxan cəmiyyət də eyni günahın ortağıdır. O müəllim ki, 2 dəfə eyni suallarla keçirilən imtahanda uğur qazana bilmir — o artıq bu peşədə yeri olmayan biridir. Sertifikasiya — savadsızlarla bacarıqlı müəllimləri ayırd etmək üçün sonuncu və obyektiv mexanizmdir. İndi bu mexanizmi zəiflətmək, keçid balını endirmək, sualları sadələşdirmək tələb edənlər ya savadsızlığın bayraqdarıdır, ya da təhsilin nə demək olduğunu heç vaxt anlamayıblar. Əgər bir müəllim “mən imtahandan kəsildim çünki suallar çətin idi” deyirsə, o zaman illərlə dərs dediyi yüzlərlə şagirdə cavab versin. Bu illər ərzində nə öyrədib? Öz fənnindən xəbərsiz olan adam sinif otağında nə danışıb? Dərs zamanı şagirdin sualına nə cavab verib? Belələrinin təhsil sistemində qalması — uşağın vaxtını, potensialını və gələcəyini oğurlamaqdır. Ac qalmasınlar deyə gələcəyimizi məhv edə bilmərik. Əgər vicdanınız imkan vermirsə onları çöldə qoymağa, o zaman maaşınızı bölüşün, evinizə aparın. Amma məktəblərdən kənarda saxlayın! Çünki məktəb sosial yardım yeri deyil — cəmiyyətin təməlinin qurulduğu məkandır. O təmələ savadsız, sistemsiz, öz üzərində işləməyən, kitab üzünü açmayan birini buraxmaq — millətin məhvinə razı olmaq deməkdir. Sertifikasiya təhsil sistemində son ümid nöqtəsidir. O ümidin qarşısına keçmək istəyən hər kəs — istər müəllim, istər valideyn, istər ictimai müdafiəçi — bir şeyi anlamalıdır: Bu ölkədə gələcək, ancaq biliklə, bacarıqla, əxlaqlı və peşəkar müəllimlə qurula bilər. Qalanları — ya dəyişəcək, ya da təhsil sistemindən silinəcək! Kamran Əsədov, təhsil ekspeti

İrandan İsrailə raket hücumu başlayıb. Sozcu.az xəbər verir ki, bu barədə İsrail mətbuatı məlumat yayıb. Məlumata görə, ölkənin bir sıra şəhərlərində hava hücumundan müdafiə sistemləri işə salınıb. Qüdsdə hava həyəcanından sonra Knessetin komitə iclasları təxirə salınıb, deputatlar sığınacaqlara yerləşib. İsrail mətbuatı yazıb ki, 4 dalğa ilə 15-20 raket atılıb. Aşdod və Aşkelon şəhərlərinə raket düşüb.

Bakının Suraxanı rayonunda yerləşən 282 nömrəli tam orta məktəbin şagirdi dünyasını dəyişib. "Unikal"ın məlumatına görə, 10-cu sinif şagirdi Vəlizadə Ziya Eyvaz oğlu xəstəlik səbəbindən vəfat edib.

Koronavirus (COVID-19) infeksiyasının ölkə ərazisində yayılmasının, onun törədə biləcəyi fəsadların qarşısının alınması məqsədilə Azərbaycan Respublikasının ərazisində xüsusi karantin rejiminin müddəti 2025-ci il 1 oktyabr saat 06:00-dək uzadılıb. Sozcu.az xəbər verir ki, Nazirlər Kabineti bu barədə qərar verib.

“Qiymətlər keyfiyyətə, xidmət mədəniyyətinə və digər nüanslara görə təyin edilir. Tələb azaldıqca ona uyğun şəkildə qiymətlər nizamlanacaq”. Bu sözləri "Yeni Sabah"a nəqliyyat məsələləri üzrə ekspert Fərhad Eyyubov deyib. O bildirib ki, Azərbaycanda dəmiryolu ilə avtobus nəqliyyatı arasında o qədər də böyük rəqabət meydana gəlmir: “Bəzən olur. Amma həmin rəqabət həm keyfiyyətə, həm də qiymətə görə nəzərdə tutulmalıdır”.  Ekspert vurğulayıb ki, hər bir nəqliyyat vasitəsindən istifadə edən sərnişinin maddi uyğunluğu nəzərə alınmalıdır: “Dəmiryolu nəqliyyatında sürətli qatarların hərəkəti üçün yollarda müəyyən çətinliklər var. Onların düzəlməsi üçün maya dəyəri müəyyən qədər bahadır. Ancaq mən də razıyam ki, hər bir nəqliyyat vasitəsindən istifadə edən sərnişinin maddi uyğunluğu nəzərə alınmalıdır. Məsələn, turist, yaxud hansısa xarici ölkə vətəndaşı nəzərdə tutulan qiymətlə razılaşa bilər. Amma yerli vətəndaş üçün bu qiymət yüksəkdir. Bu nöqteyi-nəzərdən, düşünürəm ki, qiymətlər zamanla nizamlanacaq”.  Xatırladaq ki, Bakı-Qazax qatarına Birinci klass biletin qiyməti 147 manat nəzərdə tutulub. Bu isə alternativ nəqliyyat vasitələri (taksi, avtobus) ilə müqayisədə təxminən 3 dəfə daha bahadır. Yeni istifadəyə verilən reysin qiymətləri vətəndaşlar arasında birmənalı qarşılanmayıb. ADY qiymət tarifini sərnişinlərə təklif olunan xidmətlərlə əsaslandırıb.

Bu il keçirilən 2-ci şans sertifikasiya imtahanının nəticələri bir daha göstərdi ki, hələ də təhsil sistemimizin içində “müəllim” adını daşımağa layiq olmayan kifayət qədər insan var. Təsəvvür edin: 60 sualdan ibarət imtahanın 30-na belə düzgün cavab verə bilməyən birisi illərlə məktəbdə dərs deyib. Özü də Azərbaycan dili, riyaziyyat, ingilis dili kimi əsas fənlərdən… Bəs bu insanlar indiyə qədər nə öyrədiblər? Kimi yetişdiriblər? Sozcu.az xəbər verir ki, bu barədə təhsil eksperti Kamran Əsədov bildirib. Ekspert qeyd edib ki, imtahanda uğursuz nəticə göstərən müəllimlərə güzəşt edilməsi doğru yanaşma deyil: “Güzəşt uşaqların gələcəyinə qarşı cinayətdir. Empatiya adı ilə savadsızlığı qorumaq təhsili sıradan çıxarmaq deməkdir. Sertifikasiya — sadəcə imtahan deyil, təhsildə məsuliyyətin ölçüsüdür. Əgər bir müəllim ixtisasını özü yaza bilmirsə, kurikulumdan xəbərsizdirsə, heç bir yeniliyi izah edə bilmirsə, necə “müəllim” adını daşıya bilər? Əslində problem imtahanın çətinliyində deyil, problem illərlə dərs deyə-deyə öyrənməyə son qoyan, eyni məlumatlarla oturub-duran, tənqidə qapalı, tənbəl, sosial şəbəkədə saatlarla vaxt keçirib, sual düşəndə “çətindi” deyən düşüncədədir. Bəli, məktəblərdə bu gün şagirdlərin özləri belə artıq fərqindədir ki, kim onlara nəsə öyrədir, kim sadəcə yola verir. Sertifikasiya təhsilin gələcəyinə yönəlmiş ən doğru addımlardan biridir. Yalnız bilik və bacarıqla silahlanmış, dəyişən dünyanın tələblərinə cavab verən müəllim təhsilin inkişafına töhfə verə bilər. Qalanı – sadəcə maaş almaq üçün məktəbdə oturan şəxsdir. Unutmayaq: Övladımızın taleyini 30 sualı belə yaza bilməyən birinə etibar etmək – gələcəyimizi qaranlığa buraxmaq deməkdir. Bəli, iki dəfə kəsilən müəllimin bir adı var: SAVADSIZ. O savadsızın yeri məktəb yox, yenidən təlim mərkəzidir. Təhsili ucuz empatiya ilə yox, ciddi məsuliyyət hissi ilə idarə etməliyik!”

İyunun 13-dən İsrail Hərbi Hava Qüvvələrinin İrana endirdiyi zərbələr nəticəsində ümumilikdə 950 nəfər həlak olub, 3450 nəfər isə yaralanıb. Sozcu.az xəbər verir ki, bu haqda Vaşinqtonda yerləşən insan haqları təşkilatı məlumat yayıb. Məlumata görə, öldürülənlərin 317-i hərbçi, 253 nəfəri isə təhlükəsizlik qüvvələrinin əməkdaşı olub. İran rəsmiləri isə hücumlar nəticəsində 400 nəfərin öldüyünü, 3056 nəfərin isə yaralandıını bildiriblər.

İyunun 23-ü saat 11:00-a olan məlumata əsasən, ölkə ərazisinin bəzi rayonlarında yağıntılı və küləkli hava şəraiti davam edir. Bu barədə Sozcu.az-a Milli Hidrometeorologiya Xidmətindən bildirilib. Qeyd olunub ki, düşən yağıntının miqdarı Sarıbaşda (Qax) 30, Zaqatalada 9, Kişçayda (Şəki) 8, Balakəndə 5, Astara, Tovuz və Qusarda 2, Kəlbəcər, Laçın, Qubadlı, Şuşa, Xankəndi, Xocalı, Füzuli, Oğuz, Qəbələ, Quba, Qrız, Şahdağ, Şamaxı, İsmayıllı, Şahbuz, Daşkəsən, Gədəbəy, Lənkəran, Göygöl, Şəmkir, Gəncə, Tərtər, Naftalan, Xaltan və Xınalıqda 1 mm-dir. Hazırda bir sıra ərazilərdə qərb küləyi əsir, küləyin maksimal sürəti Culfada 23, Naftalanda 18 m/s-dək güclənir. Ölkə ərazisində müşahidə olunan qeyri-sabit hava şəraitinin 24-ü axşamadək davam edəcəyi gözlənilir.

ABŞ və İsrailin zərbələrindən sonra İranın nüvə proqramı məhv edilməyib. Sozcu.az xəbər verir ki, bunu İsrail Prezidenti İshaq Hersoq deyib. “Onun məhv olduğunu deyə bilmərəm, amma deyə bilərəm ki, həm İsrailin hücumları, həm də ABŞ-ın hücumu nəticəsində çox ağır zərbə alıb”, - Hersoq bildirib.

İsrail ordusu Fordo nüvə obyektinin hava zərbələri nəticəsində ciddi zərər gördüyünü, lakin tamamilə məhv edilmədiyini bildirib. Sozcu.az xəbər verir ki, bu barədə “Nyu York Tayms” məlumat yayıb. Məlumata görə, İran mümkün hücumları nəzərə alaraq obyektin daxilindəki mühüm avadanlıqları və uranı başqa yerə köçürüb. Qeyd olunur ki, bu addım İranın nüvə proqramını qorumaq və strateji itkiləri minimuma endirmək məqsədi daşıyır.