Təəssüf ki, barmaqla sayılası bu müsbət dəyişikliklər ölkədə televiziyaların imicini dəyişmir. Çəkilən əziyyyətlər, xərclənən pullar sanki boşuna gedir. Çünki vitrində ciddi verilişlər deyil, sosial problemləri şouya çevirən, insan həyatından tamaşa düzəldən proqramlar daha çox gözümüzü deşir. “Biz yüzlərlə işçiyə maaş vermək üçün maarifləndirici deyil, gəlir gətirən şou proqramlara üstünlük verməliyik” kimi absurd bəhanələr isə çıxış yolu deyil. Sadaladığımız və sadalamadığımız nümunələr, qonşu Türkiyə və Rusiya telekanallarının təcrübəsi isə göstərir ki, düşük, bayağı, cəmiyyəti deqradasiyaya sürükləyən, onun dəyərlərini, ailə institunu zədələyən şou proqramları eyni janrda hazırlanan, maraqlı, səviyyəli şou proqramlarla əvəzləmək və reytinq qazanmaq mümkündür.  Bəs, bunun əvəzində bizə - 10 milyonluq auditoriyaya nə təqdim olunur? Bu sual məşhur Amerika kinorejissoru Vudi Allenin sözlərini yada salır: "Los Ancelesdə artıq zibilləri tullamırlar. Onları televiziya şoularında yenidən emal edirlər". Doğrudan da bu gün Xoşqədəm Hidayətqızının, Elgiz Əkbərin, Zaur Bəxşəliyevin, Lalə Azərtaşın, Tolikin və başqalarının hazırladığı dedi-qodular, vulqar söhbətlərlə dolu, bayağı, şit hərəkətlərin, cəmiyyətə açıq hörmətsizlik ifadə edən ikrahdoğurucu davranış tərzinin bəzədiyi verilişləri izləyəndə Vudi Allenin sözlərini təsdiqləməmək olmur: Bu aparıcılar illərdir ki, xalq arasındakı məşhur ifadə ilə desək, "zibildən konfet düzəldib" Azərbaycan tamaşaçısına sırımaqla məşğuldurlar. Ən dəhşətlisi isə odur ki, bu aparıcılar, onların çalışdıqları telekanal rəhbərləri evlərimizə axıtdıqları bu "zibil seli"nə görə utanıb-çəkinmədən bizləri - tamaşaçıları, bütövlükdə cəmiyyəti günahlandırırlar. Guya, cəmiyyət səviyyəsiz və zövqsüzmüş... Xoşqədəm, Zaur və Elgiz isə səviyyəli aparıcılar kimi bu cəmiyyətə onun istədiyini verir!  Əslində, nə baş verir: Adını çəkdiyim aparıcılar on illərdir ki, Azərbaycan cəmiyyətindəki ən neqativ hadisələri, ən pis nümunələri, "meşə çaqqalsız olmaz"dakı çaqqaları, yəni bütövlükdə xalqımız üçün xarakterik olmayan, istisnalıq təşkil edən fərdləri, tipləri, ailələri, onların bütün pis əməllərini, mənfi cəhətlərini efirdən nümayiş etdirirlər. Psixi problemli psixoloqları, hüquqa hayqırı olan hüquqşünasları, ziyasız ziyalıları... ekspert kimi təqdim edirlər, nümunə kimi göstərirlər, onların məsələlərə münasibətini aksioma kimi sırıyırlar. Təsəvvür edin, bu proses həftənin 5-6 günü, illərlə davam edir və ekranın bu üzündə - cəmiyyətdə, ailələrdə, yeniyetmələrdə, uşaqlarda, onların düşüncəsində hansı effekti doğurur?  Bəzən KİV-ləri, televiziyaları silahlarla müqayisə edirlər. Bu analogiyanı əsas götürüb müqayisəni davam etdirsək, deyə bilərik ki, Zaurun, Xoşqədəmin, Elgizin aramsız olaraq cəmiyyəti "atəşə tutduqları" silah zəhərli silahdır! O, dərhal öldürmür, ailələrin, fərdlərin, yeni nəsillərin mənəviyyatını, düşüncəsini zəhərləyir, onları, bütövlükdə cəmiyyəti şikəst edir, əxlaqsızlıqdan tutmuş boşanmalara, məişət zorakılıqlarından başlamış qətillərə qədər yeni-yeni sosial bəlalara, faciələrə gətirib çıxarır... Aydındır ki, tamaşaçı zövqünü və dünyagörüşünü zəhərləyən bu verilişlərə efir verən TV rəhbərlərinin məqsədi yüksək reytinq və pul qazanmaqdır. Amma bu nəyin hesabına başa gəlir? Cəmiyyətin sağlam düşüncə tərzi, mənəvi ovqatı, gənc nəslin psixologiyasının sarıslması, ümumən mənəvi idealların ucuzlaşması, məhv olması hesabına! Bizim televiziyalar, onun ən reytinqli verilişləri insanları nəyə inandırmaq yarışına girişiblər? Elgiz, Zaur və Xoşqədəm gənc ailələrin, yeni nəslin şüuruna hansı informasiyaları ötürür, onları nəyə inandırır? Bu verilişlərin cəmiyyətə təqdim etdiyi "qəhrəmanlar" kimlərdir? Ata-anasını atan övladlar, ailəsini, uşaqlarını tərk edən valideynlər, zorla ərə verilən qızlar, həyat yoldaşına xəyanət edən kişilər və qadınlar, gəlinlərini döyən qayınanalar və s. Gənc bir ailə, hansısa yeniyetmə belə nümunlərin, bu cür efir siyasətinin, təbliğatın, telepressinqin qarşısında necə tab gətirsin, bütün bunların təsirinin altına necə düşməsin?  Media, sosial şəbəkələr, ziyalılar, universitet auditoriyaları və s. cəmiyyətin indikatorlarıdır. Bütün bunların Xoşqədəm, Zaur və Elgizlərə münasibəti, onların cəmiyyətimizə sarsıdıcı zərbə vurduğu haqqında rəy və qənaətləri ortadadır. İllərdir hamı narazıdır. Amma bu rəy və qənaətlərin səsləndirilməsi Don Kixotluqdan başqa bir şey deyil. Çünki adını çəkdiyim aparıcıların "qaydasız döyüşləri" davam edir: tez-tez bu proqramlarda şəxsi həyatın toxunulmazlığı, telejurnalistikanın prinsipləri, peşə etikası qaydaları pozulur, mənəviyyatsızlıq təbliğ edilir.  Amma bu nə qədər davam edəcək? Axı bu "zibil seli" həm də TV rəhbərlərinin, bu sahədə müəyyən parlaq layihələr həyata keçirənlərin əməyinə axır... Bu, axı onların öz imicinə, ən çox önəm verdikləri bizneslərinə də zərbədir. Bu verilişlər əslində televiziyaların içərisinə yerləşdirilən bombadır, qısa müddətdə zərərsizləşdirilməsə, mütləq partlayacaq. İndiyə kimi cəmiyyətə mənəvi zərbələr endirən bu bombaların fiziki zərbəsi ilk növbədə TV-lərə rəhbərlik etmiş şəxslərə dəyəcək. Odur ki, nə qədər gec deyil, vitrininizdən zibilləri yığışdırın. Yığışdırın ki, həyətinizdəki gül-çiçəklər görünsün. Mahiyyətiniz aydınlaşsın, işıqlı, istedadlı adamların sağlam düşüncələri cəmiyyətimizə işıq saçsın.... Zahid Baku Post

“Toplum TV”-nin həmtəsisçisi, media eksperti Ələsgər Əhmədoğlu (Məmmədli) barəsində həbs qətimkan tədbirinin seçilməsi ilə bağlı istintaq orqanının təqdimatına baxılıb. Bu gün Xətai rayon Məhkəməsində hakim Sülhanə Hacıyevanın sədrliyi ilə keçirilən prosesdə qərar qəbul edilib. Qərara əsasən, Ələsgər Məmmədli barəsində 4 ay müddətinə həbs qətimkan tədbiri seçilib. Hazırda III Respublika Platformasının qurucu üzvü Ruslan İzzətlinin barəsində təqdimata baxılır.

Azərbaycanda tanınmış iş adamının oğlu intihar edib. Manset.az-ın əldə etdiyi məlumata görə, tanınmış iş adamı, tikinti maqnatı Əvəz Şükürovun oğlu Rəmzi Şükürov sirkə içərək intihar edib. O, üç gün xəstəxanada qaldıqdan sonra bu gün vəfat edib. Onun hansı səbəbdən intihar etdiyi bəlli deyil. Rəmzi Şükürov Milli Məclisin sabiq əməkdaşı olub. Evlidir, üç uşaq atasıdır. Qeyd edək ki, Rəmzi Şükürovun atası Əvəz Şükürov məşhur iş adamıdır. O, bir çox tikinti şirkətlərinin sahibidir. Rəmzi Şükürovun özü isə bir sıra qalmaqallı hadisələrlə yadda qalıb.

Ukrayna Qərb qoşunlarının ölkəsinə göndərilməsini tələb etməyib. Sozcu.az xəbər verir ki, bunu Fransa xarici işlər naziri Stefan Sejurne deyib. “Yaxın aylarda və ya illərdə Ukraynaya necə kömək edəcəyimizə Rusiya deyil, biz qərar verməliyik”, - nazir qeyd edib. O bildirib ki, yaxın gələcək üçün ordu göndərilməsi mümkün ola bilər.

Paytaxtın Yasamal rayonunda ölümlə nəticələnən bədbəxt hadisə baş verib. Sozcu.az "Qafqazinfo"ya istinadla xəbər verir ki, 1950-ci il təvəllüdlü Məmmədova Şəfiqə Murquz qızı Çingiz Mustafayev küçəsindəki evinin hamam otağında olarkən dəm qazından zəhərlənib. O, hadisə yerində vəfat edib. Faktla bağlı Yasamal Rayon Prokurorluğunda araşdırma aparılır.

Hacıqabul rayonu ərazisində ağır yol qəzası baş verib. Sozcu.az qafqazinfo-ya istinadən xəbər verir ki, Hacıqabul-Muğan-Udulu avtomobil yolunun 19-cu km-də iki avtomobil toqquşub. Belə ki, 1976-cı il təvəllüdlü Qulam Zülfəliyevin idarə etdiyi "VAZ 21703" Hacıqabul şəhəri istiqamətində hərəkətdə olarkən əks tərəfdən gələn Mülkəli Hacalıyevin sürdüyü digər "VAZ"a çırpılıb. Nəticədə hər 2 sürücü və sərnişinlər Kamilova Məshəti Nizam qızı, Hacalıyeva Leyla Mülkəli qızı və Ağayev Sahib Həsən oğlu müxtəlif dərəcəli bədən xəsarətləri alıblar. Faktla bağlı Hacıqabul RPŞ-nin İstintaq bölməsində araşdırma aparılır.

Martın 8-də saat 20:30-da Dövlət Sərhəd Xidmətinin Sərhəd Qoşunlarının hərbi qulluqçusu əsgər Nəsibli Elvin Bəxtiyar oğlu silahla davranış qaydalarını pozması nəticəsində yaralanıb. Sozcu.az xəbər verir ki, bu barədə DSX məlumat yayıb. Hərbi qulluqçunun həyatını xilas etmək üçün təxirəsalınmaz tədbirlər görülərək xəstəxanaya çatdırılıb, ixtisaslaşmış və peşəkar həkimlərin iştirakı ilə əməliyyat olunub. Faktla bağlı cinayət işi açılıb və hərbi prokurorluğun əməkdaşları ilə birgə araşdırma aparılır.

Xəbər verdiyimiz kimi, Saatlıda güllələnmə hadisəsi baş verib.  Sozcu.az bildirir ki, rayonun Məzrəli kənd sakini, 1987-ci il təvəllüdlü Telman Ehtiram oğlu Mehtiyev özünü yaşadığı evin qarşısında güllələyib. Ağır xəsarət alan şəxs Saatlı Rayon Mərkəzi Xəstəxanasına çatdırılsa da, vəfat edib.  Hadisənin səbəbi məlum olub. Bildirilib ki, T.Mehtiyev Bakıda ticarətlə məşğul olurmuş və işləri ilə əlaqədar 1 milyon manata yaxın borcu formalaşıb. Bir neçə gün əvvəl pul sahibləri onun ardınca Saatlı rayonuna gediblər, həmçinin barəsində polisə şikayət edilib.  Araşdırmalar davam etdirilir.("Qafqazinfo") 

Haitidə prezident sarayına hücum olub. Sozcu.az xəbər verir ki, bu barədə xarici KİV məlumat yayıb. Silahlı dəstələr Port-au-Prins şəhərinin mərkəzində və ya onun yaxınlığında çoxsaylı hökumət binalarına hücum ediblər. Döyüşlərdə iştirak edən hüquq-mühafizə orqanlarındakı mənbənin bildirdiyinə görə, hücumlar koordinasiyalı və sürətli olub: “Müxtəlif qruplar eyni vaxtda Prezident sarayı, Daxili İşlər Nazirliyi və polis qərargahlarını hədəf alıblar”. Şiddətli döyüşlərdən sonra dəstə üzvləri geri çəkilib. Toqquşma nəticəsində silahlı dəstələrin 10 üzvü öldürülüb. Polislər arasında yaralı və ya ölənlərin olması barədə məlumat yoxdur.

Rusiya-Ukrayna müharibəsinin ilk aylarında əsir düşən “Azov” briqadasının sonradan azad olunan üzvləri arasında hərbi həkim də var. Sergey Qaruşin 2022-ci ilin mart, aprel və may aylarında Mariupol şəhərinin, “Azovstal” zavodunun müdafiəsi zamanı həkim kimi hərbçilərin yanında olub, sonda isə digər döyüşçülərlə birgə əsir düşüb. Bir ildən sonra əsirlərin mübadiləsi zamanı azad edilən S.Qaruşin yenidən “Azov” briqadasında xidmətə başlayıb. Baku TV-yə açıqlama verən S.Qaruşin əsirlikdə olanda hətta rusiyalı hərbçiləri xilas etdiyini, dəfələrlə onlara tibbi yardımlar göstərdiyini bildirib: “Bir hadisədən bəhs edim. Rusiyanın Çelyabinsk şəhərindən olan hərbçiyə rast gəlmişdik, o, yaralı idi. Onun sözlərinə görə, kiçik övladı xəstə idi və müalicəsi üçün çoxlu pul lazım idi. Qolu qəlpə ilə zədələnmişdi. Yəni qolunu tamamilə itirə bilərdi. Ancaq əməliyyat yolu ilə onun həyatını xilas etdik. Belə yardımlarımız dəfələrlə olub. Bəzən ironiyalı vəziyyətlərlə də üzləşirik. Elə olur ki, NATO-ya, ABŞ-yə düşmən olan Rusiyanın əsgəri əsir düşür və qolunda ABŞ istehsalı olan rezin bantla gətirirlər. ABŞ istehsalı olan həmin rezin bant onu xilas edir. Ən çətini isə hərbçilərin öz dostlarının cansız bədənini paketlərdə gətirmələridir. Onlar birgə çiyin-çiyinə döyüşdüyümüz, əvvəllər birlikdə xidmət etdiyimiz insanlardır. Bu, mənəvi cəhətdən çox ağırdır”. Qeyd edək ki, qeyri-rəsmi statistikaya görə, müharibə müddətində 100-ə yaxın ukraynalı hərbi həkim itkin və ya əsir düşüb. 100-dən çox həkim isə həlak olub. Ətraflı süjetdə:

Çexiya, İsveç və Cənubi Koreya səfirlikləri, habelə Kanada hökuməti Rusiyadakı vətəndaşlarını izdihamlı yerlərdən çəkinməyə çağırıb və ölkədə “təhlükəsizlik vəziyyətinin pisləşdiyini” bildirib. Sozcu.az xəbər verir ki, bu barədə "Kommersant" qəzeti yazıb. Sözügedən dövlətlər Moskvada mümkün terror aktları ilə bağlı ABŞ səfirliyinin açıqlamasına istinad edir. “Rusiyanın iri şəhərlərində ekstremist qrupların mümkün hücumları ilə bağlı son xəbərlərlə əlaqədar Çexiyanın Moskvadakı səfirliyi Rusiyada yerləşən Çexiya vətəndaşlarını xüsusi diqqətli olmağa çağırır. Biz həmçinin insanların çox olduğu yerlərdən uzaq durmağı tövsiyə edirik”, – Çexiya səfirliyinin saytında yerləşdirilən mesajda deyilir. Oxşar xəbərdarlıqlar əvvəllər ABŞ, Böyük Britaniya, Almaniya və Latviya tərəfindən də dərc edilib . Amerika diplomatik missiyasının press-relizində deyilir ki, Moskvada 48 saat ərzində terror aktları baş verə bilər.

ABŞ Maliyyə Nazirliyinin Xarici Aktivlərə Nəzarət İdarəsi  Rusiya (Məhdud Məsuliyyətli Cəmiyyətin Broker Eksperti) və Mərkəzi Afrika Respublikasından (Bois Rouge SARLU) olan şirkətlərə qarşı sanksiyalar tətbiq edib. Sozcu.az xəbər verir ki, bu barədə ABŞ Maliyyə Nazirliyi məlumat yayıb. Şirkətlərə qarşı sanksiyalar “Rusiyanın Mərkəzi Afrika Respublikasındakı bədxah fəaliyyətlərini asanlaşdırmaq səylərinə görə” tətbiq edilib. Sanksiyaya məruz qalan hüquqi şəxslərin "Vaqner" muzdlularının Mərkəzi Afrika Respublikasındakı hərəkətlərinin dəstəklənməsində mühüm rol oynadığı qeyd edilir. Maliyyə Nazirliyi bu şirkətlərin təbii sərvətlərin qeyri-qanuni hasilatından pul gəlirləri əldə etməyə çalışdığını və “Vaqner Qrupu”na maddi və maliyyə dəstəyi göstərdiyini bəyan edib.

Fransa Prezidenti Emmanuel Makronun Qərb qoşunlarının Ukraynada olması ilə bağlı qaldırdığı məsələ Rusiyaya təsir etmək üçün faydalıdır. Sozcu.az xəbər verir ki, bunu Polşanın xarici işlər naziri Radoslav Sikorski deyib. Onun sözlərinə görə, oxşar presedent artıq baş verib - məsələn, 1950-1953-cü illərdə Koreya müharibəsi zamanı BMT Təhlükəsizlik Şurasının qərarı ilə dövlətlərin koalisiyası bu ölkəyə yardıma gedib. O, Fransanın son təşəbbüsünü yüksək qiymətləndirdiyini bildirib.

Ukrayna Prezidenti Vladimir Zelenski İstanbula səfəri zamanı türkiyəli həmkarı Rəcəb Tayyib Ərdoğana Rusiya tərəfindən saxlanılan ukraynalı əsir və məhbusların siyahısını təqdim edib. Onların arasında repressiyaya məruz qalan Krım tatarları da var. Sozcu.az xəbər verir ki, bu barədə Vladimir Zelenski İstanbulda Türkiyə Prezidenti Rəcəb Tayyib Ərdoğanla birgə mətbuat konfransı zamanı açıqlama verib. “Bu gün mən Rusiya tərəfindən repressiyaya məruz qalan və ən ağır şəraitdə həbsxana və düşərgələrdə saxlanılan Ukrayna vətəndaşlarının, xüsusən də Krım tatarlarının siyahısını verdim”, - Zelenski bildirib. Prezident vurğulayıb ki, hər kəsi, istər mülki, istərsə də öz xalqını müdafiə edərkən əsir düşənləri azad etməliyik.

Avrokomissiya Ukraynaya martın sonuna qədər 4,5 milyard və apreldə isə 1,5 milyard avro yardım ayıracaq. Sozcu.az xəbər verir ki, bu barədə Avrokomissiyanın məlumatında deyilir.

Böyük Britaniyanın müdafiə naziri Qrant Şapps Kiyevə gözlənilməz səfər edib. Sozcu.az xəbər verir ki, bu barədə nazir özünün X səhifəsində yazıb. “Mən Kiyevə demokratik dünyanı xəbərdar etmək üçün gəldim, biz əmin olmalıyıq ki, Ukrayna bu müharibədə qalib gələcək. Böyük Britaniya daha çox şey etmək üçün addımlar atıb və Ukraynaya indiyədək ən böyük hərbi dəstək paketini təqdim edəcək”, - nazir yazıb. Onun fikrincə, çoxları bundan nümunə götürməli və azadlığın istibdad üzərində qələbəsini təmin etməlidir.

Ukrayna Prezidenti Vladimir Zelenski və Yunanıstan Baş naziri Kiriakos Miçotakisdən 300-400 metr uzaqlığa ballistik raketlə zərbə endirildi. Sozcu.az xəbər verir ki, bu barədə Ukrayna lideri Vladimir Zelenski Odessada Yunanıstan baş naziri ilə görüşü zamanı yaşanan insident barədə açıqlamasında deyib. “Biz limanda idik və 300-400 metr uzaqlığa ballistik raket atıldı. Raket olduqca tez gəldi, həyəcan siqnalı az səsləndi. Zərbənin Krımdan gəldiyini bilirik, ona görə də komandanlıq cavab tədbirləri görə bilmədi”, - deyə o bildirib.

Avropa Birliyi o qədər qətiyyət nümayiş etdirib ki, düşmənlərini təəccübləndirib. Sozcu.az xəbər verir ki, bu sözləri Yunanıstanın Baş naziri Kiriakos Miçotakis Avropa Xalq Partiyasının Buxarestdə keçirilən konfransında deyib. “Avropa üçün bu qaranlıq vaxtda, müharibə qitəmizə qayıtdıqda, biz Ukraynaya görünməmiş qətiyyətimizi və sarsılmaz dəstəyimizi göstərdik, bəzi düşmənlərimizi təəccübləndirdik və birlik nümayiş etdirdik. AB əvvəllər heç vaxt təhdidlərə bu cür reaksiya verməyib”, - baş nazir bildirib. Miçotakis əlavə edib ki, bizim Kremlə yalnız bir mesajımız olmalıdır: “Siz bizi qorxuda bilməzsiniz, biz lazım olduğu qədər Ukraynanı və onun vətəndaşlarını dəstəkləməyə davam edəcəyik. Və təbii ki, qərarımızda tam yekdil qalacağıq”. Yunanıstanın baş nazirinin Odessa səfərinin ertəsi günü belə bir bəyanatla çıxış etməsi diqqət çəkib.

İran Zəngəzur dəhlizi layihəsinin həyata keçirilməsini neytrallaşdıraraq bu regionda təhlükəsizlik məsələlərində öz rolunu göstərdi və bunu hamı etiraf edir. Sozcu.az xəbər verir ki, belə bir iddianı iranlı politoloq Pouya Hüseyni erməni mediasına açıqlamasında deyib. O bildirib ki, Türkiyə lideri Ərdoğan da müsahibələrinin birində etiraf edib ki, İran olmasaydı, Zəngəzur dəhlizi reallığa çevriləcəkdi. “İran Zəngəzur dəhlizinin həyata keçirilməsi yolunda böyük maneədir. Bu məsələdə İranın hərbi təlimləri və Azərbaycanla sərhəddə qoşunlarını cəmləməsi böyük rol oynadı. Regionumuzda təhlükəsizlik təminatçısı rolunu öz üzərinə götürən və regionun təhlükəsizliyini və sabitliyini təmin edən İrandır”, - iranlı politoloq qeyd edib.

Türkiyə və Ukrayna prezidentləri Rəcəb Tayyib Ərdoğanla Volodimir Zelenski arasında danışıqlar İstanbulda, məşhur Dolmabağça sarayında aparılacaq. İkitərəfli görüşdən sonra birgə mətbuat konfransı planlaşdırılır. Qeyd olunub ki, görüşdə Ukrayna ilə Rusiya arasında davam edən müharibə, taxıl dəhlizi sazişinin müddətinin uzadılması, bölgədə davamlı sülhə səbəb ola biləcək qərarlar ətrafında fikir mübadiləsi aparılacaq.

“Guya separatçıbaşının görüşdüyü bütün xarici ölkə diplomatları şifahi olaraq ermənilərin Qarabağa qayıtmasını “günümüzün bir nömrəli problemi” adlandırıblar. Amma...” “Samvel Şahramanyan son aylarda nəinki müxtəlif erməni qüvvələri və ayrı-ayrı şəxsləri ilə aktiv siyasi görüşlər keçirib, həm də Ermənistanda təmsil olunan müxtəlif ölkələrin diplomatları ilə fəal ünsiyyət saxlayır”. Sozcu.az xəbər  verir ki,  bunu “Hraparak” Azərbaycan ərazisində ləğv olunmuş separatçı-terrorçu rejimin İrəvanda sülənən  tör-töküntüləri arasındakı mənbələrinə istinadla yazır.  Xəbərdə iddia edilir ki, Şahramanyan bu yaxınlarda bir neçə səfirlə, o cümlədən Fransa, ABŞ və Rusiyanın Ermənistandakı səfirləri ilə görüşüb. Və müzakirə gündəmindəki əsas məsələ Qarabağdan köçkün ermənilərin geri - Qarabağa qayıtması olub. Nəşr bildirir ki, guya separatçıbaşının görüşdüyü bütün xarici ölkə diplomatları şifahi olaraq ermənilərin Qarabağa qayıtmasını “günümüzün bir nömrəli problemi” adlandırıblar.  Amma köçkün ermənilərin “öz vətənlərində “təhlükəsizliyini təmin etmək üçün verilməli olan beynəlxalq təminatlara gəldikdə, heç kim belə bir təminat vermir”...

Dünyada bir çox müsəlmanın islamofobiya qurbanı olmağı böyük təəssüf yaradır. İslamofobiyanın dünyanın müxtəlif ölkələrində yayılması müsəlmanlara qarşı nifrət deyil, fobiyadır. Sozcu.az xəbər verir ki, bu fikirlər BMT Baş katibinin müavini, BMT-nin Sivilizasiyalar Alyansının ali nümayəndəsi Migel Anxel Moratinosun “Müxtəlifliyin qorunması: 2024-cü ildə İslamofobiya ilə mübarizə” mövzusunda Bakıda keçirilən beynəlxalq konfrans iştirakçılarına müraciətində yer alıb. Müsəlmanlara qarşı nifrətin insan hüquqlarına zidd olduğunu deyən Migel Anxel Moratinos qeyd edib ki, ədalətli, sülh içində bir dünya yaratmaq üçün bütün insanlar qeyri-tolerantlığa qarşı mübarizə aparmalıdır: “Dünyada bütün dinlər mərhəmət və qarşılıqlı hörmət üstünə qurulub. Bunu qorumaq isə bizim borcumuzdur”.

Kiberdələduzlar tərəfindən ani mesajlaşma tətbiqləri vasitəsilə vətəndaşlara qarşı yeni növ dələduzluq həyata keçirilir. Elektron Təhlükəsizlik Xidmətinin yaydığı məlumata görə, “İnstagram” sosial şəbəkəsində kiberdələduzlar tərəfindən “Kapital Bank”ın adından saxta kampaniyalar həyata keçirilir.  Belə ki, yaradılmış saxta hesablar vasitəsilə “Kapital Bankın” hər kəsə 200 azn dəyərində pul verdiyi bildirilir. Ödənişin alınması üçün istifadəçilərdən saxta “Telegram” kanalına daxil olmaq tələb olunur. Bəs görəsən sosial şəbəkə istifadəçiləri belə kiberdələduzluq hallarına qarşı nələrə diqqət etməlidir?  Mövzu ilə bağlı Yenisabah.az-a danışan İT üzrə mütəxəssis Vahid Qasımov bildirib ki, insanlar mütləq şəkildə bilməlidir ki, heç vaxt havayı pul olmur: “İnsanlar artıq dərk etməlidir ki, istər sosial şəbəkələrdə, istərsə də real həyatda havayı pul olmur. Hər hansı bir iş görmədən, heç nəyin müqabilində kimsə pul təklif edirsə, deməli bu saxtadır. Ona görə də müftə pulun dalınca düşmək lazım deyil. Bu sadəcə acgözlüyün nəticəsidir. Belə kiberdələduzluq halları günümüzdə olduqca geniş yayılıb. Təəssüf ki, ölkəmizdə bu cür dələduzluq hallarına qarşı insanlar yetərincə məlumatlı deyil. Birmənalı şəkildə dərk eləmək lazımdır ki, pulun fiziki dəyəri yoxdur və heç vaxt öz dəyərini itirmir. Ona görə də heç kim heç kəsə havayıdan pul verməz. Dələduzlar öz əməllərinin üstünü örtmək üçün müxtəlif bankların adından istifadə edirlər”.  Vahid Qasımov şəxsi məlumatların heç bir halda paylaşılmamalı olduğunu qeyd edib: “Hər hansı bir adam öz şəxsi məlumatlarını kiminləsə paylaşırsa, bu cür dələduzluq hallarına da hazır olmalıdır. Hazırda nəinki sosial şəbəkələrdə, hətta real həyatda da fəaliyyət göstərən elə şirkətlər var ki, onların açıq-aydın şəkildə insanları müxtəlif yollarla aldadırlar. Bu səbəbdən heç bir şəxsi məlumatı hansısa tanımadığınız şəxsə, sosial şəbəkə istifadəçisinə qətiyyən verməyin”. 

Müğənni İlahə İbadova övladının atası ilə bağlı dedikləri ilə gündəmə gəlib. Sozcu.az azxəbər-ə istinadla xəbər verir ki, o, 14 yaşlı qızının öz doğma atası ilə görüşə bilmədiyini deyib. O bildirib: "2 il ailəli olduq, sonra münasibətlər alınmadı ayrıldıq. Keçmiş ərim ikinci dəfə evləndi. Amma xanımı qızımın öz atası ilə görüşməsinə imkan vermir. Uşaq atasını görmədən böyüyüb. Atası da arayıb axtarmır. Sonuncu dəfə uşağını 2 yaşında görüb. 12 ildə 1 dəfə o adam övladı ilə maraqlanmayıb. Zəng etsək, telefonu da açmaz yəqin ki. Ümumiyyətlə, "əhlikef" adam idi, ona uşaq maraqlı deyil".