Hacı Məmmədovun bandasının üzvü olan, sabit silahlı qruplarda (bandalarda) və ya onların törətdikləri basqınlarda iştirak etməkdə təqsirləndirilən Hüseynağa Zərbəliyevin məhkəməsi başlayır. Sozcu.az "Report"a istinadla xəbər verir ki, cinayət işi Bakı Ağır Cinayətlər Məhkəməsinə göndərilib və hakim Əli Məmmədovun sədrliyi ilə araşdırılacaq. Məhkəmənin hazırlıq iclası martın 18-nə təyin edilib. Zərəçəkmiş şəxs qismində Tofiq Bayramov tanınıb. H.Zərbəliyevə qarşı Cinayət Məcəlləsinin 217.2-ci (Banditizm, Sabit silahlı qruplarda (bandalarda) və ya onların törətdikləri basqınlarda iştirak etmə) maddəsi ilə ittiham irəli sürülüb. İstintaqla müəyyən olunub ki, H.Zərbəliyev qeyriləri ilə sabit silahlı qrupun (banda) törətdiyi basqında iştirak edərək Tofiq Bayramovu həyatı və səhhəti üçün təhlükəli üsulla və ona fiziki iztirab verməklə qanunsuz azadlıqdan məhrum edib. O, 1996-cı ilin iyul ayında Bakı şəhərində əvvəllər tanıdığı Abuzər Abuzərovun paytaxt sakini Tofiq Bayramova basqın edib onu oğurlamaq, azadlıqdan qanunsuz məhrum etmək və hədə-qorxu ilə külli miqdarda əmlakını tələb edib almaq məqsədilə təşkil etdiyi sabit silahlı qrupa - bandaya Səyyad Allahverdiyev, Qabil Ağayev, Afər Kərimov və qeyriləri ilə birlikdə üzv kimi daxil olub. Təqsiləndirilən şəxsin Daxili İşlər Nazirliyinin (DİN) Baş Cinayət Axtarış İdarəsinin keçmiş baş əməliyyat müvəkkili, ağır qətllər və adam oğurluğunda ittiham edilərək ömürlük həbs cəza almış Hacı Məmmədovla (vəfat edib - red.) əlaqəsinin olduğu bildirilir.

Bakıda daha bir ərazidə fərdi evlərin söküntüsünə başlanılacaq. Sozcu.az Bakı.vs-yə istinadən xəbər verir ki, söhbət paytaxtın Nəsimi rayonunda yerləşən "Kubinka" adlanan ərazidən gedir. Bildirilib ki, "Kubinka"nın yeni məhəlləsində söküntü işləri aparılacaq. Belə ki, Cəlil Məmmədquluzadə küçəsində, daha dəqiq desək, keçmiş 2 nömrəli çörək zavodunun ərazisindəki evlər plana düşəcək. Söküləcək fərdi evlərin yerində hündürmərtəbəli binaların tikilməsi nəzərdə tutulub. Artıq tikinti işlərini aparan şirkət rəsmiləri sakinlərlə danışıqlara başlayıb. Uzun illər ikimərtəbəli binalarda yaşayan vətəndaşlara yeni tikiləcək binalardan mənzillər təklif olunur. Yeni inşa olunacaq binalardan mənzil almaq istəyən vətəndaşlar əvvəlki evlərindən 20 kvadratmetr əlavə mənzilə sahib olacaqlar. İnşaat işləri getdiyi müddətdə isə sakinlər kirayə pulları ilə təmin ediləcəklər. Evlərinin kvadratından asılı olaraq sakinlər 400-500 manat arasında kirayə pulu alacaqlar. Qeyd edək ki, tikinti işlərinə ikimərtəbəli binalarda yaşayan sakinlərin hər biri ilə razılaşma əldə olunduqdan sonra başlanılacaq. "Kubinka"da bəzi vətəndaşların həddən artıq kompensasiya tələbi tikinti işlərinin yarıda qalması ilə nəticələnb. Buna görə, pilot layihənn icra edilməsi üçün 100 faiz sakinlərlə razılıq əldə olunması gərəkdir.

Qarabağdakı keçmiş separatçıların qondarma “parlamenti”nin sabiq üzvləri Ermənistan sərhədindən xaricə buraxılmır. Sozcu.az xəbər verir ki, bu barədə “Joqovurd” qəzeti məlumat yayıb. “Zvartnots hava limanında Ermənistan sərhədini keçməsi qadağan edilən Geqam Stepanyan da oxşar vəziyyətlə üzləşib. Bizə çatan məlumata görə, bu qərarın səbəbi konkret cinayət işindədir. Bu yaxınlarda parlament üzvlərinin dəvət olunduğu İstintaq Komitəsi “artsax”da baş verən son hadisələrlə, xüsusən də Araik Arutyunyanı “prezident” postundan istefa verməyə vadar edən səbəblərlə maraqlanır”, - məlumatda deyilir. Qeyd olunur ki, məlumatı Stepanyanın özü ilə dəqiqləşdirməyə çalışsalar da, o, zənglərə cavab verməyib.

Ukrayna yarım milyon insanı səfərbər etməyi planlaşdırır. Sozcu.az xəbər verir ki, bu barədə “Faynənşl Tayms” Ukrayna MN-ə istinadən məlumat yayıb. Məlumatda onlardan 330 min nəfərinin cəbhə xəttindəki hərbçilərin əvəz edilməsinə cəlb olunmasının planlaşdırıldığı qeyd olunub.

Martın 13-də saat 3 radələrində işğaldan azad olunan əraziyə ezam olunan polis əməkdaşları xidməti silahdan ehtiyatsız davranılması nəticəsində həlak olublar. Bu barədə Sozcu.az-a DİN-in mətbuat xidmətindən bildirilib. Polis nəfərinin xidməti silahdan ehtiyatsız davranması nəticəsində açılan 1 atəşdən polis zabiti, 1982-ci il təvəllüdlü Ramiz İsmayılov, polis nəfəri Abid Mustafazadə xəsarət alıblar. Göstərilən tibbi müdaxilələrə baxmayaraq, onlardan biri hadisə yerində, digəri xəstəxanaya aparılarkən həyatını itirib. Araşdırma aparılır.

Rio-de-Janeyroda şəhərin mərkəzindəki avtovağzalda 18 nəfər girov götürülüb. Sozcu.az xəbər verir ki, bu barədə "El Pais" qəzeti məlumat yayıb. HƏmin şəxslər avtobusun içərisində girov saxlanılıb. Şahidlərin sözlərinə görə, avtobus yaxınlıqdakı Minas Jerais əyalətindəki Huiz de Fora şəhərinə gedirmiş. Kişi iki sərnişini vuraraq öldürüb və avtobusda terminal dayanacağında barrikada qurub. Zərərçəkənlərdən biri sinə və qarın nahiyəsindən güllə yarası alıb. Hadisədən saat sonra təcavüzkar polisə təslim olub və bütün girovlar sərbəst buraxılıb.

ABŞ Qəzza zolağında fələstinlilərə humanitar yardım çatdırmaq üçün müvəqqəti limanın yaradılmasını dəstəkləmək məqsədilə Aralıq dənizinə 4 gəmi göndərib. Sozcu.az-ın məlumatına görə, bunu jurnalistlər üçün keçirdiyi növbəti brifinqdə Pentaqonun mətbuat katibi Patrik Rayder deyib. "Bu gün ABŞ-nin Müdafiə Nazirliyi Qəzza zolağında humanitar yardım əməliyyatlarını və müvəqqəti liman qurma missiyasını dəstəkləmək üçün Lenqli-Yustas birləşmiş bazasından Aralıq dənizinin şərqinə Birləşmiş Ştatlar ordusunun dörd gəmisini göndərib", - o deyib. Rayderin sözlərinə görə, gəmilərdə "bu missiyanı dəstəkləmək üçün avadanlıq və material var". Pentaqon nümayəndəsi qeyd edib ki, ABŞ limanın təxminən 60 gün ərzində tam istismara hazır olacağını gözləyir. ABŞ Prezidenti Cozef Bayden martın 7-də bildirib ki, Birləşmiş Ştatlar Fələstin anklavına humanitar yardım çatdırmaq üçün Qəzza zolağında müvəqqəti liman yaradacaq. Amerika Administrasiyasından qeyd olunub ki, onlar Kipr üzərindən dəniz yolu ilə həyata keçiriləcək.

BMT-nin Ümumdünya Ərzaq Proqramı (ÜƏP) maliyyə çatışmazlığı səbəbindən aprel ayından Çaddakı düşərgələrdə olan yüz minlərlə sudanlı qaçqına yardımı dayandıracaq. "Report"un məlumatına görə, bu barədə qurumun xəbərində deyilir. "Sudanda davam edən böhran Çada humanitar yardım üçün kifayət qədər maliyyənin olmaması deməkdir. Ümumdünya Ərzaq Proqramının 1,2 milyon sudanlı qaçqına verdiyi yardım aprel ayında dayandırılacaq", - açıqlamada bildirilir. Proqram üçün 242 milyon dollar məbləğində ianəyə ehtiyacı olduğu qeyd edilir. BMT-nin məlumatına görə, minlərlə sudanlı qaçqın Çad sərhədindən Sudanın Darfur bölgəsinə keçməyə davam edir, yağışlı mövsüm yaxınlaşdıqca şərqi Çad və Darfurdakı düşərgələrə humanitar yardımların çatdırılması çətinləşəcək. Statistikaya görə, Sudanda münaqişə başlanandan bəri Çaddan təxminən 560 min qaçqın və daha 150 min repatriant gəlib. Bundan əlavə, Sudandan qaçqın axını Çadda onsuz da çətin olan ərzaq vəziyyətini çətinləşdirir. Bundan əvvəl Çadın keçid dövrü prezidenti Mahamat İdriss Debi İtno, Kamerun, Liviya, Niger, Nigeriya və Mərkəzi Afrika Respublikasından olan qaçqın düşərgələrinin yerləşdiyi ölkədə ərzaq təhlükəsizliyi ilə bağlı fövqəladə vəziyyət elan edib.

Avropa Komissiyası martın 12-də Ukraynanın Avropa Birliyinə üzvlük üçün danışıqlar çərçivəsini təsdiqləyib. Sozcu.az xəbər verir ki, bu barədə Ukraynanın Baş naziri Denis Şmıqal bəyanatla çıxış edib. "Avropa Komissiyası Ukraynanın Avropa Birliyinə üzv olması ilə bağlı danışıqlar formatını təsdiqləyib. Müvafiq təkliflər AB Şurasına təqdim edilib", - deyə Baş nazir bildirib. Şmıqal qeyd edib ki, Ukrayna danışıqların başlanmasına və Avropa Birliyinin üzvlüyünə bir addım yaxınlaşıb: "Bu addım Ukraynanın nailiyyətlərinin, bizim transformasiyamızın və Ukraynanın mütləq AB-nin üzvü olacağı faktının sübutudur. Hökumətimizin prioriteti bunun mümkün qədər tez baş verməsinə əmin olmaqdır".

Türkiyə Silahlı Qüvvələrinin 2-ci ordu komandanı, general Metin Tokelin rəhbərlik etdiyi nümayəndə heyəti İraq rəsmiləri ilə görüş keçirib. Sozcu.az xəbər verir ki, bu barədə Türkiyə Milli Müdafiə Nazirliyinin məlumatında bildirilib. “Görüş İraqın şimalındakı "Pəncə-Kilid" antiterror əməliyyatı zonasında keçirilib. İraq vətəndaşlarının təhlükəsizliyinin təmin edilməsi ilə bağlı əlavə tədbirlərin görülməsi məsələlərinə xüsusi diqqət yetirilib”, - Milli Müdafiə Nazirliyindən deyilib.

Bir neçə gün əvvəl ATV, XƏZƏR, ARB və SPACE telekanallarının rəhbərləri Prezident Administrasiyasına dəvət olunublar. Onların iştirakı ilə keçirilən iclasda kanallarda yayımlanan bir sıra şou və sosial verilişlərdəki biabırçı vəziyyətlə bağlı ciddi iradlar səsləndirilib. Qeyd edilib ki, ictimai narazılıq və narahatlıq doğuran “Bizimləsən”, “Elgizlə izlə”, “Səni axtarıram”, “Həmin Zaur”, “Gəl danış”, “Yaxşıya doğru”, “Təsir dairəsi” kimi verilişlər son illər teleradio məkanının inkişafı sahəsində əldə olunmuş uğurlara ciddi kölgə salır. Telekanalların reytinq yarışında etik qaydaların pozulduğu, milli-mənəvi dəyərlərimizə xələl gətirildiyi, insanların şəxsi həyatına kobud müdaxilələrin yol verildiyi bəsit və bayağı verilişlərin çəkisinin artması narahatlıq doğurmaya bilməz. Həmin verilişlərdə eybəcər qalmaqalların əvvəlcədən ssenariləşdirilməsi, auditoriyanın pulla cəlb edilməsi, iştirakçılarla əlaqələrdə korrupsiya sxemlərinin həyata keçirilməsinə dair çoxsaylı şikayətlər var. Gündəlik 3-5 saat davam edən bu verilişlərdə insanların şəxsiyyəti alçaldılır, efirdə təhqir və ədəbsiz ifadələr işlədilir, efir mədəniyyəti, nitq qabiliyyəti, bilik səviyyəsi tələblərə cavab verməyən aparıcılar və ekspertlər isə sanki cəmiyyətə meydan oxuyurlar.  Mövzu ilə bağlı tanınmış media eksperti Qulu Məhərrəmli Moderator.az-a danışdı. Bildirdi ki, məsələnin bu dərəcə kəskinləşməsi onu göstərir ki, bu cür bayağı, "düşük" şoulara nə aşağılar dözür, nə də yuxarılar: "Ona görə bu kimi tədbirlərin görülməsi vacibdir. Çünki televiziyanın auditoriyaya geniş təsiri var. Bu cür verilişlərin sayca çoxalması, orada qoyulan problemlərin az qala milli problem səviyyəsinə qalxması, ailə məsələlərinin müzakirəsi xalqın min illər boyu formalaşdırdığı dəyərlərin tapdalanmasını sükutla qarşılamaq olmur. Reaksiya normaldır, amma tədbir görmək çox önəmlidir. Veriliş açmaq, onu bağlamaq məsələnin inzibati həllidir. Bu şouların əksəriyyəti ona görə təşkil edilir ki, reklam bazarından pay götürsünlər, reytinqi artırsınlar və sair. Mənə elə gəlir ki, 10 il geriyə qayıdıb o dövrdə hazırlanan şouların portretini götürməliyik. Verilişlərdə elə məsələləri müzakirə etmək olar ki, bəli, onlar şou üçün aktualdır, ictimai əhəmiyyət daşıyır. Onların heç birində şəxsi, ailə, insan məsələsi, insanların həyatının lağ-lağıya çevrilməsi, onların təhqir olunması heysiyyatının tapdalanması yoxdur. Bunu düşünmək lazımdır. Televiziyada həm xəbər, həm serial, həm ciddi, ictimai müzakirələr olmalıdır. Yəni çox rəngarəng, çoxşaxəli auditoriyaya məzmuna uyğun verilişlər çatdırılmalıdır.  Əsas problem şou proqramlardadır, orada müzakirəyə çıxarılan problemlərdədir. Verilişlər birmənalı şəkildə o xətdən imtina etməlidir. Ucuz şou, sensasiya, insan taleyi, şəxsiyyətin alçalması, təhqir edilməsi, düşük, mənasız ssenariləşdirilmiş oyun epizodları yığışdırılmalıdır. Şou olanda nə olar ki, orada da ciddi problemlər qoyula və cəmiyyətə müəyyən mesajlar ötürmək olar. Sadəcə, normal mövzular seçmək və peşəkar yanaşmaq, yaxşı rejissoralı verilişlər etməklə vəziyyətdən çıxmaq olar. İllik olaraq televiziyalara müəyyən dərəcə maliyyə yardımı verilsin ki, düşük şouları yerinə yaxşı verilişlər hazırlansın".

Azərbaycan Tibb Universitetinin Tədris Terapevtik Klinikasının Şüa Diaqnostikası şöbəsinin müdiri, həkim-radioloq Aydın Əliyev “İstanbul” Klinikasındakı işindən uzaqlaşdırılıb. Sozcu.az xəbər verir ki, bu barədə o, sosial şəbəkədəki hesabında məlumat yayıb. “Əziz dostlar! Təhdiddənmi, qorxudanmı? Bilmirəm. “İstanbul” Klinikasının rəhbərliyi məni bu gün işdən çıxardı. Sabahdan işə gəlmə, dedilər. Hanı bəs hüquqi dövlət? İnsanı işdən çıxarmaq bu qədər asanmı? Hanı həmkarlar? Hanı bəs işçi haqları? Hanı bəs əmək müqaviləsi?”, - radioloq bildirib. Xatırladaq ki, bir müddət əvvəl o, feysbuk hesabında paylaşım edərək, həbs olunma ehtimalından yazıb. Qeyd edək ki, bir-neçə gün əvvəl Toplum TV-nin təsisçisi Ələsgər Məmmədli “İstanbul” Klinikasının önündə saxlanılıb. Onun saxlanılma görüntülərini Aydın Əliyev öz sosial şəbəkə hesabından yayıb.yeniavaz)

Bakı şəhər sakini təcili tibbi yardım briqadasından narazıdır.  Bu barədə Oxu.Az-a Ülvi Quliyev şikayət ünvanlayıb. Xətai rayonu, Zığ yolu 29 ünvanında yaşayan Ü.Quliyev deyir ki, martın 9-da qəfil halı pisləşib və 16:30-da təcili yardım briqadası çağırıb: “Həkim saat 17:30-da gəldi. Gələn həkim məndən şəxsiyyət vəsiqəsini tələb etdi və bildirdim ki, üstümdə deyil. O əsəbiləşərək, “vəsiqəni üstündə saxla” dedi. Daha sonra təzyiqimi ölçdü və maqnezium vurmağa çalışdı. Ona bildirdim ki, həmin iynə mənə pis təsir edir və imtina edirəm. Həkim mənim istəyimə heç bir məhəl qoymaq istəmədi, səsimi kəsib sakit oturmağımı bildirərək məni təhqir etdi. Mənim şərəf və ləyaqətimi təhqir etdiyi üçün imtina etdim. İcbari Tibbi Sığorta üzrə Dövlət Agentliyinə və Tibbi Ərazi Bölmələrini İdarəetmə Birliyinə (TƏBİB) şikayət ünvanlasam da, mənə heç bir cavab verilmədi”. Ü.Quliyev deyir ki, səhhəti pisləşdiyi üçün axşam saatlarında yenidən təcili yardım çağırıb: “Bu dəfə isə təcili yardım briqadası çağırışa 2 saat 20 dəqiqəyə gəlib”. Oxu.Az tərəfindən məsələ barədə TƏBİB-ə sorğu ünvanlanıb.

“Ər-arvadın ümumi əmlakının bölünməsi ilə bağlı mübahisələrdə qanunvericiliyin tətbiqi təcrübəsi haqqında” Plenum qərar layihəsi müzakirəyə çıxarılaraq müvafiq qərar qəbul edilib. Bu barədə Sozcu.az-a Ali Məhkəmədən məlumat verilib. Bildirilib ki, Plenumun iclasında mülki və ailə qanunvericiliyinin tətbiqi üzrə hüquqi yanaşmanın sabitliyinin təmin olunması və vahid məhkəmə təcrübəsinin formalaşdırılması məqsədi ilə aparılmış ümumiləşdirmənin nəticələri, habelə beynəlxlaq təcrübə nəzərə alınmaqla Ali Məhkəmənin Mülki kollegiyası tərəfindən hazırlanmış “Ər-arvadın ümumi əmlakının bölünməsi ilə bağlı mübahisələrdə qanunvericiliyin tətbiqi təcrübəsi haqqında” Plenum qərar layihəsi müzakirəyə çıxarılaraq, müvafiq qərar qəbul edilib.

Şabranda doğuş zamanı ana və körpəsi ölüb. Sozcu.az-ın Report-a istinadən məlumatına görə, hadisə Şabran Rayon Mərkəzi Xəstəxanasında qeydə alınıb. Belə ki, rayon sakini, 1987-ci il təvəllüdlü Qasımova Nailə Əlihüseyn qızı körpəsi ilə birgə doğuş zamanı dünyasını dəyişib. Faktla bağlı araşdırma aparılır.

"Rusiya tarixdə ilk dəfə olaraq silah ixracında ikinci yeri Fransaya verib..." "2019-2023-cü illərdə Avropaya silah tədarükü iki dəfə artıb..." Son beş ildə Rusiyanın silah satışı 53 faiz aşağı düşüb. Sozcu.az xəbər verir ki, bu barədə Stoqholm Beynəlxalq müharibə problemlərinin araşdırılması İnstitutunun məruzəsində deyilir. Qeyd edək ki, söhbət müdafiə ixracından deyil, konkret olaraq silah ixracından gedir. Burada təyyarələr, gəmilər, tanklar və digər zirehli texnika, zenit sistemləri və artilleriya (digər ölkələrdən modellərin modernləşdirilməsi üzrə sifarişlər daxil olmaqla) nəzərə alınır. Rusiya tarixdə ilk dəfə olaraq dünya silah ixracında ikinci yeri Fransaya verib, bu ölkə "Rafal" qırıcılarının ixracı hesabına reytinqdə irəliyə gedib. Onlar Amerika qırıcıları kimi o qədər də nüfuzlu hesab edilmir, lakin ərəb dünyası və Asiyada onları hindlilər, səudiyyəlilər, Əmirliklər, Misir və s. əldə edir.  Avropada "Rafal" qırıcılarını yanız xorvatlar və yunanlar alır, Avropa İttifaqının digər ölkələri "F-16s" və "F-35bs"-ə üstünlük verir. Silah ixracı həcminə görə dördüncü yerdə Çin, daha sonra Almaniya, İtaliya, Britaniya, İspaniya, İsrail və Cənubi Koreya qərarlaşıb. Rusiya 2019-cu ildə 31 ölkəyə silah ixrac edib, 2023-cü ildə belə ölkələrin sayı 12 rəqəm azalıb. Məruzəyə görə, Rusiya hesabat dövründə 78 döyüş təyyarəsi, 5 böyük döyüş gəmisi, 16 "yer-hava" sinfindən olan raket sistemləri, 464 tank və 8 vahid digər texnika ixrac edib. Rusiya silahının ən iri idxalçıları son beşillikdə Hindistan olub, bu ölkənin payına bu ixracın 34 faizi düşüb, daha sonra Çin (21 %) və Misir (7, 5 %) gəlir. Bütün bunlar Avropanın silahlandırılması fonunda baş verir. Bu qitəyə silah tədarükü 2019-2023-cü ilkərdə təxminən iki dəfə, 94 faiz artıb. Avropanın payına dünya silah ixracının təxminən üçdə bir hissəsi düşür. Bu regiona əsas silah tərarükçüsü ABŞ-dır, bu ölkə Avropa ölkələri tərəfindən alınan "müdafiə" silahlarının 55 faizini tədarük edir. Təəccüblü deyil ki, ABŞ-da silah ixracı 17 faiz, ümudünya silah bazarında onun payı 34 faizdən 42 faizə yüksəlib. 2019-2023-cü illərdə ABŞ  107 ölkəyə müharibənin aparılma vasitələrini tədarük edib. Bu, Amerika Hərbi-Sənaye Kompleksi üçün rekord rəqəmdir. Fransa silah ixracını 47 faiz artırıb. Parisin ən böyük alıcıları Hindistandır, bu ölkənin payına Fransa silah ixracının 30 faizi düşür. Fransa döyüş təyyarələrinin Qətər və Misirə tədarükü əhəmiyyətli tövhəsini verir. İsrail dünyanın 10 ən böyük silah ixracatçılarına daxildir, hərçənd, 2019-2023-cü illərdə müdafiə satışı aşağı düşüb. İsrail 18 döyüş təyyarəsi, 30 "yer-torpaq" sinfindən olan raket sistemləri, 19 tank, 45 vahid digər zirehli texnika, 95 artilleriya sistemi ixrac edib. İsraildən əsas silah sistemlərinin alıcıları Filippin, Mərakeş və Britaniyadır. Bu dövrdə Ukrayna Avropada ən böyük, dünyada dördüncü silah idxal edən ölkəyə çevrilib.  Bu silahların əhəmiyyətli hissəsi Kiyevı 2022-ci il fevralında Rusiyanın Ukraynaya qarşı hərbi müdaxiləsi başlanandan sonra Kiyevə göndərilib. Son beş ildə müharibənin aparılma vasitələrinin dünyada ən böyük alıcısı Hindistan olub.

"Rusiyaya azadlıq" legionu, Rus Könüllülər Korpusu və Sibir taboru Rusiya ərazisinə daxil olub..." Rusiya ərazisi PUA-ların kütləvi hücumuna məruz qalıb Martın 12-nə keçən gecə Rusiyada silsilə partlayışlar baş verib. Hava hücumundan müdafiənin uğurlu işi barədə bəyanatlara rəğmən, dronlar Oryol və Nijeqorod vilayətlərində neft bazalarına düşüb. Moderator.az xəbər verir ki, bu barədə "rtvi.com" nəşri məlumat yayıb. Belə ki, Nijeqorod vilayətinin qubernatoru Qleb Nikitin məlumat verib ki, Kstov sənaye zonasında yanacaq-energetika kompleksinə dronlarla hücum edilib, neft emalı üzrə qurğuların birində yanğın baş verib. "Hazırda hadisə yerində xüsusi xidmətlər işləyir, neft emalı üzrə qurğuların  birində yanğının lokallaşdırılması üçün bütün zəruri qüvvə və vasitələr işə salınıb", - o, deyib. İlkin məlumatlara görə, zərərçəkən olmayıb, operativ qərargah yaradılıb. Yanğının söndürülməsinə yanğın qatarı cəlb edilib. Orlov vilayətinin qubernatoru Andrey Klıçkov PUA-nın neft bazasına düşməsi barədə məlumat verib, neft məhsulları olan çən alışaraq yanıb. "Dostlar, Oryola PUA hücumu baş verib. Yanacaq-energetika kompleksi hücuma məruz qalıb. Hadisə yerində yanğının lokallaşdırılması üçün xüsusi xidmətlər işləyir. Zərərçəkən olmayıb", - o, "Teleqram-kanal"ında yazıb. Şəhər meri Yiri Paraxin əlavə edib ki, neft bazası ilə iki qonşu çoxmərtəbəli yaşayış binasından 17 nəfər təxliyə edilib.  PUA-nın düşməsi nəticəsində neft saxlanılan çənlərin birində yanğın baş verib, 60-dan çox yanğınsöndürən, "dörd hündür mexanizm" və yanğın qatarı yanğının söndürülməsinə cəlb olunub, region hökumətinin mətbuat xidməti məlumat verib. Səhər tezdən Ukrayna ilə həmsərhəd olan Belqorod vilayətində sakinlər yük avtomobilləri və tanklarda bir neçə silahlı qruplar müşahidə edib, atəş səsləri eşidilib. Bu arada isə "Rusiyaya azadlıq" Legionu rusiyalılara müraciət dərc edib: "Biz öldürmək, yer üzündən silmək, məhv etmək və cəzalandırmaq üçün gəlmirik. Biz sizi yoxsulluqdan, kasıbçılıqdan və qorxudan azad etmək üçün gəlirik. Biz sizi hakimiyyəti zəbt etmiş terror təşkilatının diktaturasından xilas etmək üçün gəlirik". Ukrayna Baş Kəşfiyyat İdarəsinin nümayəndəsi Andrey Yusov "Rusiyaya azadlıq" legionu, Rus Könüllülər Korpusu və Sibir taborunun Rusiya ərazisinə daxil olmasını şərh edib. "Rusiyaya azadlıq" legionu, Rus Könüllülər Korpusu və Sibir taboru Rusiya ərazisində müstəqil bölmələr kimi fəaliyyər göstərir, çünki Rusiya vətəndaşlarından ibarətdir. Onlar nəticə etibarilə öz evlərindədir", - Yusov qeyd edib. O, təsdiq edib ki, ehtimal ki, hazırda bu bölmələrin Rusiya ərazisində birgə əməliyyatları həyata keçirilir. "Rusiyaya azadlıq" legionunun xüsusi əməliyyatı və Rusiyada Rus Könüllülər Korpusu Bu gün səhər bəlli olub ki, "Rusiyaya azadlıq" legionu, Rus Könüllülər Korpusu və Sibir taboru birgə əməliyyat çərçivəsində Rusiyanın Kursk və Belqorod vilayətlərinə daxil olub. Məlumat verilir ki, onlar Belqorod vilayətinin  Lozovaya Rudka sərhəd yaşayış məntəqəsini nəzarərə götürüb, Kursk vilayətinin Tetkino məntəqəsində döyüşlər davam edir. "Rusiyaya azadlıq" legionu bəyan edib ki, onlar "seçkilərə gedir", Sibir taboru isə rusiyalıları "seçkiləri görməzdən gəlməyə" çağırış edib.

“Qohum evliliklərinə qadağa qoyulması qanunsuz nikahların, dini kəbinlərin sayının artmasına gətirib çıxaracaq”. Sozcu.az xəbər verir ki, bu barədə Xəzər Universitetinin müəllimi, hüquqşünas Akif Əlizadə qohum evlilikləri ilə bağlı təşkil edilən ictimai müzakirədə deyib. “Tibbi müayinədən keçən cütlüklərdə mövcud olan və genetik ötürülə biləcək xəstəliklər haqqında risklər ciddi dəyərləndirilmədir. Əgər tibbi müayinədə gələcək övladların sağlamlığı üçün təhlükəli məqamlar aşkarlanarsa, həmin şəxslərin nikahına qadağa qoyula bilər. Birbaşa qohum evliliklərinə ümumi qadağa qoyulsa, problemlərə, narazılıqlara səbəb ola bilər”.

Sosial şəbəkələrin xarici seqmentində Bakı şəhərindəki bəzi məktəblərə silahlı hücum planlaşdırıldığı ilə bağlı insanlarda həyəcan və süni ajiotaj yaratmağa yönələn məlumatlar yayımlanmış və vətəndaşlarımız arasında narahatlığa səbəb olub. Sozcu.az xəbər verir ki, bu barədə Dölət Təhlükəsizlik Xidmətinin (DTX) bəyanatında deyilir. Sənəddə qeyd olunur: Reallıqdan uzaq olan analoji aksiyaların daha əvvəl saxta adlardan istifadə edilməklə sosial şəbəkələr vasitəsilə bəzi xarici ölkələrdəki təhsil müəssisələri ilə əlaqədar həyata keçirildiyi məlumdur. Əməliyyat-texniki tədbirlər zamanı sözügedən sosial şəbəkə səhifəsinin xaricdən idarə olunduğu öz təsdiqini tapıb, xarici tərəfdaşlarla həyata keçirilmiş birgə təxirəsalınmaz tədbirlərlə məlum sosial şəbəkə kanalını yaratmış ölkə ərazisində hər hansı təhdid doğurmaq imkanında olmayan şəxslər və onların Azərbaycan Respublikası ilə heç bir əlaqəsinin olmadığı müəyyən edilib. Bu istiqamətdə zəruri tədbirlər həyata keçirilir. Həmçinin eyniadlı “Telegram” səhifəsində yerləşdirilmiş, Bakı şəhəri Nizami rayonu 229 saylı tam orta məktəbə aid fotoşəkli həmin məktəbin azyaşlı şagirdinin 12.03.2024-cü il tarixində çəkdiyi və özü tərəfindən eyni adda və məzmunda yaradılan kanala yerləşdirildiyi müəyyən edilib, həmin şəxs qanuna müvafiq qaydada istintaqa cəlb edilib. Hazırda dünyada çoxsaylı sosial şəbəkələrin fəaliyyət göstərdiyi, onların texniki imkanlarından hər cür dezinformasiya məqsədləri üçün istifadə mümkünlüyünün məlum olduğu bir vaxtda ölkə ictimaiyyətini əhali arasında narahatlıq yaradılması məqsədilə paylaşılan bu kimi qeyri-ciddi məlumatlara inanmamağa, belə aşkar əsassız məlumatları geniş auditoriyaya yayaraq təşviş yaradanları qınamağa çağırır, bu qəbildən olan informasiyaların aidiyyəti orqanlar ilə birgə daim ətraflı yoxlanıldığını bildiririk.

NATO 300 min əsgəri Polşaya göndərilmək üçün yüksək səviyyədə hazırdır. Sozcu.az xəbər verir ki, bunu Polşa Baş Qərargah rəisinin müavini Karol Dımanovski deyib. “Əvvəllər NATO-nun qalxanı olmaq üçün 40 min əsgər hazırlaşdırılırdısa, hazırda 300 min əsgər yüksək hazırlıq vəziyyətindədir. Bu əsgərlər ölkəyə müharibə başlayandan sonra deyil, ondan əvvəl gələcəklər”, - Dımanovski bildirib.

Müsavat Partiyası Azərbaycanda repressiyaların növbəti dalğası ilə bağlı bəyanat qəbul edib. Sənəddə deyilir: Azərbaycan hakimiyyəti ölkədə repressiyaların növbəti dalğasına rəvac verib.  Martın 6-dan başlayaraq Toplum TV-nin və bir neçə ictimai təşkilatın ofislərində, əməkdaşların evlərində axtarışlar aparıb. Axtarış zamanı ofisdə olan iyirmidən çox jurnalist və fəal polis tərəfindən saxlanılıb. Saxlanılanların bir hissəsi sərbəst buraxılsa da, Tolpum TV-nin jurnalistləri Fərid İsmayılova (polisin nəzarətinə verilməklə ev dustaqlığı imkanı tədbiri seçilib), Müşfiq Cabbara, Elmir Abbasova (polisin nəzarətinə verilməklə ev dustaqlığı imkanı tədbiri seçilib) və Demokratik Təşəbbüslər İnstitutunun rəhbəri Akif Qurbanova, eləcə də Əli Zeynala, Ramil Babayevə, İlkin Əmrahova qaçaqmalçılıq ittihamı ilə cinayət işi açılıb və barələrində 4 aylıq həbs-qətimkan tədbiri seçilib. Martın 9-da Toplum TV-nin təsisçilərindən biri Ələsgər Məmmədli və ictimai fəal Ruslan İzzətlinin barəsində  4 ay həbs-qətimkan tədbiri seçilib. Toplum TV-nin ofisinin möhürlənməsinin ardınca, həmin internet televiziyasının Yotube kanalının ələ keçirilərək bağlanması iş üzrə irəli sürülən qaçaqmalçılıq ittihamının bəhanə olduğunu, əslində söz azadlığının hədəfə alındığını bir daha sübut edir.  Müsavat Partiyası Azərbaycan hakimiyyətindən müstəqil media orqanlarına qarşı basqıların dayandırılmasını, jurnalistlərin və şərlənərək tutulan siyasi fəalların, dərhal azadlığa buraxılmasını tələb edir.

“Azərbaycanda ikinci və üçüncü dərəcəli qohumluğu olan şəxslərin nikahının qadağan edilməsi üçün qanunvericilikdə dəyişiklik edilməsi məsələsi ciddi şəkildə müzakirə olunur”. Sozcu.az “Report”a istinadla xəbər verir ki, bunu Prezident Administrasiyasının Qanunvericilik və hüquq siyasəti şöbəsinin Qanunvericiliyin inkişafı sektorunun müdiri Rüstəm Qasımov martın 12-də qohum nikahları ilə bağlı ictimai müzakirədə çıxış edərkən deyib. Onun sözlərinə görə, burada xala uşaqları, əmi uşaqları və s. daxildir: “Çoxluq bunun tərəfdarıdır. Xəstə və əlil olaraq doğulan uşağın həm özü, həm də ailəsi böyük mənəvi və sosial iztirablar çəkirlər. Qohum evliliklərinin sayı artarsa, bu genefondumuza və gələcəyimizə təsir edəcək. Məsələ kifayət qədər ciddidir və bununla bağlı dövlətin hərəkətə keçməsi vacibdir”.

Martın 12-də Azərbaycan Respublikasının Prezidenti İlham Əliyev və Qazaxıstan Respublikasının Prezidenti Qasım-Jomart Tokayev Füzuli şəhərində inşa olunan Kurmanqazı adına Uşaq Yaradıcılıq Mərkəzinin açılış mərasimində iştirak ediblər. Sozcu.az xəbər verir ki, dövlət başçıları tədbirdə Azərbaycanın mədəniyyət və incəsənət xadimləri, Füzuli şəhər sakinləri və Kurmanqazı adına Uşaq Yaradıcılıq Mərkəzində təhsil alacaq uşaqlarla görüşüblər.

"Tavuş bölgəsində hansısa kəndin Azərbaycana verilməsindən söhbət belə getməyib və gedə də bilməz". Sozcu.az "Novosti Armeniya"ya istinadla xəbər verir ki, bunu Ermənistanın baş naziri Nikol Paşinyan bu gün keçirdiyi mətbuat konfransında Azərbaycanın Tavuşun dörd kəndinin verilməsi ilə bağlı tələblərinə toxunaraq bildirib. “Tavuş bölgəsində heç bir kəndin verilməsi ilə bağlı heç vaxt müzakirə olmayıb və ola da bilməz. Azərbaycan mətbuatında kəndlərin adları açıqlananda aydın oldu ki, Ermənistan ərazisində nəinki sovet dövründə, hətta ondan sonra da belə adda kəndlər olmayıb”, - Paşinyan qeyd edib. Paşinyan qeyd edib ki, Alma-Ata Bəyannaməsi sərhədlərin və qarşılıqlı ərazi bütövlüyünün tanınması üçün əsas götürülüb: "Sovet İttifaqının dağılması zamanı de-yure mövcud olan sərhəd təkcə Alma-Ata bəyannaməsi ilə deyil, həm də 6 oktyabr 2022-ci ildə Praqada əldə edilən razılaşmalarla təsdiqlənib. Alma-Ata Bəyannaməsi Azərbaycan və Ermənistanın qarşılıqlı olaraq, bir-birinin sərhədləri və ərazi bütövlüyünü tanımalarıı üçün əsas oldu. Ona görə də bu müqavilələrə əsasən, Sovetlər İttifaqı dövründə mövcud olan keçmiş inzibati sərhəd əsas götürülür. Bu inzibati sərhədin o tayında olan ərazi şərti olaraq Azərbaycandır, bu tərəfdə olan Ermənistandır". Delimitasiya prosesində biz çalışmalıyıq ki, bu sərhədi hansısa formatda təsdiq. Biz de-yure reallıqdan çıxış etməliyik. Ermənistanın olan Ermənistandır, Ermənistanın olmayan Ermənistanın deyil”. Qeyd edək ki, söhbət Qazax rayonunun Baganis Ayrım, Aşağı Əskipara, Xeyrimli və Qızıl Hacılı kəndlərindən gedir.