Türkiyə lideri Rəcəb Tayyib Ərdoğanı Ermənistana dəvət etməyi planlaşdırıram. Sozcu.az xəbər verir ki, bu sözləri İstanbulda səfərdə olan Ermənistan Baş naziri Nikol Paşinyan erməni icmasının nümayəndələri ilə görüşündə deyib. O bildirib ki, 2026-ci ildə İrəvanda baş tutacaq Avropa Siyasi Birliyinin samitində Ərdoğanın da iştirak edəcəyinə ümid edir.

Qobustanda doğum sayı kəskin aşağı düşüb. Sozcu.az xəbər verir ki, bu barədə Qobustan Rayon Mərkəzi Xəstəxanasının (RMX) direktoru Günay Muradova mediatur çərçivəsində məlumat verib. Onun sözlərinə görə, doğum sayının azalmasına əsas səbəb gənclərin sayının Bakıda çoxluğu, rayonda isə əsasən yaşlı nəslin üstünlük təşkil etməsidir: “Xəstəxanaya yeni mama-ginekoloq cərrahlar cəlb edilib. Ümid edirik ki, növbəti illərdə doğum sayında artım müşahidə olunacaq”, – deyə Günay Muradova bildirib.

İyunun 21-24-də Azərbaycanın bəzi dağlıq və dağətəyi rayonlarında fasilələrlə yağış yağacağı, şimşək çaxacağı gözlənilir. Bu barədə Milli Hidrometeorologiya Xidmətindən məlumat verilib. Ayrı-ayrı yerlərdə leysan xarakterli intensiv olacağı, dolu düşəcəyi ehtimalı var. Gözlənilən yağıntılı hava şəraiti ilə əlaqədar çaylarda sululuğun artacağı, Böyük və Kiçik Qafqaz ərazisindən axan bəzi çaylardan qısamüddətli sel və daşqın keçəcəyi ehtimal olunur.

Bakının bir sıra yollarında nəqliyyatın sıxlığı müşahidə olunur. Sozcu.az xəbər verir ki, bu barədə Nəqliyyatı İntellektual İdarəetmə Mərkəzi (NİİM) məlumat yayıb. Hazırda: 1. Ziya Bünyadov prospekti, Müzəffər Nərimanov küçəsi ilə kəsişmədən metronun "20 Yanvar" stansiyası istiqamətində; 2. Ziya Bünyadov prospekti, Əbdülvahab Salamzadə küçəsi ilə kəsişmədən Əhməd Rəcəbli küçəsi istiqamətində; 3. Bakı-Sumqayıt şosesi, "Xırdalan" dairəsi istiqamətində; 4. Yusif Səfərov küçəsi, mərkəz istiqamətində; 5. Xətai prospekti, Heydər Əliyev prospekti istiqamətində; 6. Bakıxanov küçəsi, İnşaatçılar prospekti ilə kəsişmədən "Dədə Qorqud" parkı istiqamətində; 7. Atatürk prospekti, Ziya Bünyadov prospekti istiqamətində; 8. Alı Mustafayev küçəsi, Ziya Bünyadov prospekti istiqamətində; 9. Tbilisi prospekti, İzmir küçəsi ilə kəsişmədən metronun "20 Yanvar" stansiyası istiqamətində; 10. Tbilisi prospekti, metronun "20 Yanvar" stansiyasından mərkəz istiqamətində; 11. Əbdülvahab Salamzadə küçəsi, Ziya Bünyadov prospekti istiqamətində; 12. Koroğlu Rəhimov küçəsi, Həsən Əliyev küçəsi ilə kəsişmədən Heydər Əliyev prospekti istiqamətində; 13. Koroğlu Rəhimov küçəsi, Gülarə Qədirbəyova küçəsindən Həsən Əliyev küçəsi istiqamətində; 14. Neftçilər prospekti, "Azneft" dairəsi istiqamətində; 15. Mikayıl Useynov prospekti, Bayraq Meydanının qarşısından "Azneft" dairəsi istiqamətində; 16. Üzeyir Hacıbəyli küçəsi, Azadlıq prospekti ilə kəsişməyə qədər; 17. Heydər Əliyev prospekti, əsas yol, mərkəz istiqamətində; 18. Heydər Əliyev prospekti, köməkçi yol, mərkəz istiqamətində; 19. Yusif Səfərov küçəsi, Heydər Əliyev prospekti istiqamətində; 20. Heydər Əliyev prospekti kənar yol, metronun "Koroğlu" stansiyası istiqamətində; 21. Heydər Əliyev prospekti, köməkçi yol, metronun "Koroğlu" stansiyası istiqamətində sıxlıq müşahidə olunur.

Xəbər verdiyimiz kimi, Dövlət Təhlükəsizliyi Xidməti (DTX) Qax Rayon İcra Hakimiyyətində əməliyyat keçirib. Sozcu.az-ın məlumatına görə, İcra Hakimiyyətinin başçısı Musa Şəkiliyevlə yanaşı onun birinci müavini Elbrus Tağıyev də tutulub. O, cəmi 1 il əvvəl bu vəzifəyə təyin olunub. Elbrus Tağıyev əvvəllər başçının müavini - Sosial-iqtisadi inkişafın təhlili və proqnozlaşdırılması şöbəsinin müdiri vəzifəsində çalışıb. İcra Hakimiyyəti başçısının müavini - İctimai-siyasi və humanitar məsələlər şöbəsinin müdiri Vəfa Heydərovanın da saxlanılan şəxslər arasında olduğunu bildirilir.  Qax Bələdiyyəsinin sədri Eyvaz Orucov, Qax Kommunal Müəssisələri Kombinatının direktoru Eldəniz Şabanov da saxlanılanlar arasındadır. "Teleqraf" ümumilikdə 9 nəfərin saxlanıldığını bildirir. Onlar rüşvət alma, mənimsəmə, vəzifə səlahiyyətlərindən sui-istifadə və aşmada ittiham olunurlar.modern)

Bu gün Lənkəran və Lerik rayonlarının bəzi ərazilərində təmir işləri ilə əlaqədar elektrik enerjisinin verilişində fasilə yaranacaq. Bu barədə Sozcu.az-a Azərişıq ASC-dən məlumat verilib. Bildirilib ki, Cənub Regional Enerji Təchizatı və Satışı İdarəsinin (RETSİ) bir sıra ərazilərini əhatə edən 10 kV-luq hava xətlərində iyunun 20-də təmir işləri aparılacaq. Bununla əlaqədar olaraq saat 10:00-dan 12:00-dək Lənkəranın şəhər ərazisində Raypo, Su 8 adlanan yaşayış məntəqələri, rayonun Girdəni kəndi, saat 14:00-dan 16:00-dək Gərmətük, Aşağı Nüvədi qəsəbələri, Viyən kəndi, saat 10:00-dan saat 15:00-dək Lerikin Babagil, Noda, Nüvədi, Vizəzəmin kəndlərində elektrik enerjisinin verilişində məhdudiyyət yaranacaq. Təmir işləri başa çatdıqdan sonra sözügedən ərazilər daha keyfiyyətli elektrik enerjisi ilə təmin olunacaq.

Biləsuvar rayonu və kəndlərində artıq bir müddətdir ki, yas mərasimlərində ehsan verilməsi ləğv edilib. Sozcu.az xəbər verir ki, bu barədə Oxu.az-a rayon sakinləri məlumat veriblər. Bildirilib ki, ağsaqqalların ümumi qərarı ilə yas mərasimində təkcə çay süfrəsi açılır və dəbdəbəli yemək süfrəsi ləğv olunub. Qeyd edək ki, analoji qayda ölkəmizdə artıq bir neçə rayonda tətbiq olunub.

Masallıda itkin düşən məktəbli ilə bağlı araşdırma başlanıb. Sozcu.az xəbər verri ki, bu barədə Baş Prokurorluq məlumat yayıb. Qeyd edilib ki, Masallı şəhəri, Dadva küçəsi ev-8 də yaşayan 12.02.2011-ci il təvəllüdlü, orta məktəbin VIII sinif şagirdi Xatirə Nurlan qızı Əhmədovanın 19.06.2025-ci il tarixdə saat 03 radələrində yaşadığı evdən çıxaraq itkin düşməsi barədə daxil olmuş müraciət əsasında Masallı rayon polis şöbəsi tərəfindən araşdırılır.

Günəşdə 2025-ci ilin üçüncü ən güclü alışması baş verib. Onun səviyyəsi X1,9 səviyyəsində qiymətləndirilir. Sozcu.az xəbər verir ki, bu barədə Rusiya Elmlər Akademiyasının Kosmik Tədqiqatlar İnstitutunun Günəş Astronomiya Laboratoriyasının mətbuat xidməti məlumat yayıb. Alimlər iyunun 20-nə keçən gecə Bakı vaxtı ilə saat 03:50-də böyük partlayışı qeydə almağa müvəffəq olublar. Onun mənbəyi 4114 saylı günəş regionu olub. Güc baxımından bu fenomen mayın 14-də və fevralın 23-də baş verən alovlardan sonra ikinci yerdədir. Onlar müvafiq olaraq X2.7 və X20 səviyyələri kimi təsnif edilib. "Alışmanın yüksək fəallığına və Günəş-Yer xəttinə yaxın olmasına baxmayaraq, radio siqnalların keçidinə təsir istisna olmaqla, hadisə hələ ki, Yerə faktiki olaraq heç bir təsir göstərməyib", - deyə hesabatda deyilir. Yerin maqnit sahəsinə böyük təsir göstərən və qütb işıqlarının yaranmasına səbəb olan plazma axınları planetlərin müstəvisindən yuxarıya yönəldilib. Mütəxəssislərin fikrincə, plazmanın planetlərə doğru hərəkətinə Günəşdə bir sıra amillər mane olur. Laboratoriya işçiləri belə qənaətə gəliblər ki, partlayış gücünə baxmayaraq, görünməz maneəni aşa bilməyib. Plazma yenidən şimala doğru hərəkət edib, Yerə praktiki olaraq heç bir təsir göstərməyib./BAKU.WS

Bakıda piyada ölümü ilə nəticələnən yol-nəqliyyat hadisəsi baş verib. Sozcu.az DİN-ə istinadla xəbər verir ki, Heydər Əliyev prospekti, “ASK Arenanın” qarşısında 2 piyada yolun hərəkət hissəsindən keçərkən onlardan birini minik avtomobili vurub. Piyada hadisə yerindəcə həyatını itirib.

İsraildə ötən cümə günü başlayan əməliyyatın gedişatından məmnun qalaraq, İranla müharibənin bir neçə gün ərzində bitə biləcəyinə inanırlar. Sozcu.az xəbər verir ki, təhlükəsizlik sistemində olan mənbə "İsrael Hayom" nəşrinə belə deyib: “Biz təxmin edirik ki, biz artıq İranın qalan raket buraxılışı qurğularının demək olar ki, yarısını vurmuşuq”, halbuki ilkin əlamətlər aylardır hazırlanan "Şir millət" əməliyyatının görünməmiş uğuruna işarə edir. Müharibə ərəfəsində ordu nazirlər kabinetinə İranla mümkün münaqişə ssenarisini təqdim edərək, 400 mülki şəxsin həlak olacağını, ən pis halda isə ölənlərin sayının 800-ə çatacağını bildirib. İndiyədək İranın atəşə tutması nəticəsində 24 mülki vətəndaş həlak olub ki, bu da İsrailin hava hücumundan müdafiə sistemlərinin effektivliyini nümayiş etdirir.

Hərbi əməliyyatlar nəticəsində İranın nüvə arxivini ələ keçirməyə nail olmuşuq. Sozcu.az APA-ya istinadən xəbər verir ki, bunu İsrailin Baş naziri Benyamin Netanyahu açıqlayıb. O deyib ki, İran heç vaxt nüvə silahı əldə edə bilməyəcək: “Biz İranın yaratdığı nüvə təhlükəsini tamamilə aradan götürməyə qadirik”. İsrail hökumətinin başçısı İranın ali dini lideri Ayətullah Xameneinin qətli barədə müzakirələrə isə “Heç bir variant istisna, heç kim isə toxunulmaz deyil” sözləri ilə aydınlıq gətirib. İsrailin baş naziri ABŞ-ın İsrail-İran savaşına qoşulması imkanını da dəyərləndirib: “Bu məsələ həmin ölkənin Prezidenti Donald Trampdan asılıdır. Çünki oyunun qaydalarını məhz o bilir. Bizim heç vaxt Trampın özündən yaxşı dostumuz olmayıb. Bu səbəbdən də biz onun bütün qərarlarına hörmətlə yanaşırıq”.

16:19 İyunun 19-da Türkiyənin Qəhrəmanmaraş şəhərində “Azərbaycan məhəlləsi"nin açılış mərasimi keçirilib. Sozcu.az xəbər verir ki, Azərbaycan Respublikasının Prezidenti İlham Əliyev və Türkiyə Respublikasının Prezidenti Rəcəb Tayyib Ərdoğan tədbirdə iştirak ediblər. Mərasimdə Azərbaycanın və Türkiyənin Dövlət himnləri səsləndirildi. Sonra “Azərbaycan məhəlləsi"nə həsr edilmiş videoçarx nümayiş etdirildi. Azərbaycan Respublikasının Prezidenti tədbirdə çıxış etdi. Prezident İlham Əliyevin çıxışı - Əziz qardaşım, hörmətli Cümhurbaşqanı Rəcəb Tayyib Ərdoğan. Sayın tədbir iştirakçıları, əziz kahramanmaraşlılar. İlk növbədə sizə Azərbaycan xalqının ən səmimi salamlarını çatdırıram. 2023-cü il fevralın 6-dakı dəhşətli zəlzələ nəticəsində həlak olmuş, həyatını itirmiş bütün bacı-qardaşlarımıza Allahdan bir daha rəhmət diləyirəm. Azərbaycan xalqı bu faciəni öz faciəsi kimi qəbul etdi. İlk gündən on minlərlə azərbaycanlı Bakıda, Azərbaycanın müxtəlif şəhərlərində insani yardım göstərmək üçün məntəqələrə gəlib öz qardaşlıq borcunu yerinə yetirməyə başlamışdır. Zəlzələdən dərhal sonra əziz qardaşımın, hörmətli Cümhurbaşqanının liderliyi ilə axtarış-xilasetmə işləri başlamış, ondan sonra yenidənqurma və inşaat işlərinə start verilmişdir. Qısa müddət ərzində on minlərlə insan yeni mənzillərlə təmin edildi. Bu, bir daha Rəcəb Tayyib Ərdoğanın öz xalqına bağlılığını, sevgisini və güclü iradəsini göstərən amildir. Eyni zamanda, bu, güclü Türkiyənin təzahürüdür. Çünki ancaq güclü dövlət qısa müddətdə bu qədər böyük yenidənqurma və inşaat işləri görə bilər. Azərbaycan dərhal mindən çox heyəti, o cümlədən axtarış-xilasetmə üzvlərini, könüllüləri, həkimləri Türkiyənin zəlzələ bölgələrinə göndərmiş və dərhal işə başlamışdır. Azərbaycan heyətləri tərəfindən 53 insan dağıntılar altından sağ çıxarılmış, bizim qurduğumuz iki səhra hospitalında 3200 insana Azərbaycan həkimləri tibbi yardım göstərmişdir. Azərbaycan hər zaman Türkiyənin yanında olub, Türkiyə də hər zaman Azərbaycanın yanında olub və bu gün “Azərbaycan məhəlləsi"nin açılışında əziz qardaşımla birlikdə iştirakım bir daha bizim birliyimizin, dostluğumuzun təzahürüdür. Qarabağ məsələsində də qeyd etdiyiniz kimi, biz əziz qardaşım, hörmətli Cümhurbaşqanı Rəcəb Tayyib Ərdoğanla savaşın ilk günündən çiyin-çiyinə, bir yerdə idik. Savaşın ilk saatlarında Türkiyə Cümhurbaşqanının bizə göstərdiyi dəstək, həmrəylik, siyasi dəstək, mənəvi dəstək, Türkiyə xalqının bizimlə bərabər olması bizim gücümüzə güc qatıb. Biz tarixi ədaləti bərpa etdik və bu gün Azərbaycan xalqı öz əzəli torpağında rahat və təhlükəsizlik şəraitində yaşayır. “Azərbaycan məhəlləsi"nin yaradılması da çox gözəl hadisədir, burada 90-dan çox bina inşa edilib, 1200 mənzildə bizim türkiyəli bacı-qardaşlarımız yaşayacaq. Məktəb, uşaq bağçası var, mədəniyyət mərkəzinin inşası da nəzərdə tutulur. Biz yaxşı günlərdə də, ağır günlərdə də daim bir-birimizin yanındayıq, bir-birimizin gücünü artırırıq. Bu gün Türkiyə-Azərbaycan qardaşlığı, birliyi nəinki bölgəmiz üçün, dünya miqyasında önəmli amildir, təhlükəsizlik, işbirliyi, inkişaf və qardaşlıq rəmzidir. Dörd il bundan öncə hörmətli Cümhurbaşqanı ilə Şuşa şəhərində imzaladığımız Şuşa Bəyannaməsi bizim əlaqələrimizi ən yüksək zirvəyə qaldırmışdır. Şuşa Bəyannaməsi bizim əlaqələrimizi rəsmən müttəfiqlik səviyyəsinə qaldırmışdır. Biz dostuq, qardaşıq, müttəfiqik. Türkiyə və Azərbaycan - iki qardaş ölkə həm siyasi, həm iqtisadi, həm enerji, nəqliyyat, hərbi və bütün başqa sahələrdə bir-birinin yanında inamla, uğurla irəliləyir. Bu gün ilk dəfə olaraq bu gözəl diyarı ziyarət edirəm. Mən Türkiyənin bir çox yerində olmuşam. Gözəl Türkiyənin gözəl təbiətini görmüşəm. Burada da, qədim türk torpağı Qəhrəmanmaraşda olmağımdan da çox məmnunam. Qəhrəmanmaraşlılar dəhşətli zəlzələ ilə üz-üzə qalaraq öz iradələrini göstərdilər, sınmadılar, əyilmədilər. Bilirdilər və inanırdılar ki, onların arxasında güclü lider Rəcəb Tayyib Ərdoğan dayanır. Onların arxasında güclü Türkiyə dayanır. Bu, təbii ki, bir daha qəhrəmanmaraşlıların nə qədər öz doğma xalqına, liderinə, dövlətinə bağlı olmasını göstərir. Zəlzələ bölgələrində yaşayan bütün insanlara Azərbaycan xalqının hörmətini, sevgisini ifadə edirəm. Siz bilirsiniz və bilməlisiniz ki, Azərbaycanda sizin 10 milyon bacı-qardaşınız var. Azərbaycanlılar da bilirlər ki, Türkiyədə 80 milyondan çox bacı-qardaşımız var. Yaşasın Türkiyə! Yaşasın Türkiyə-Azərbaycan birliyi, qardaşlığı! *** Sonra Türkiyə Respublikasının Prezidenti çıxış etdi. *** Daha sonra prezidentlər İlham Əliyev və Rəcəb Tayyib Ərdoğan “Azərbaycan məhəlləsi"ndə inşa olunacaq mədəniyyət mərkəzinin onlayn formatda təməlini qoydular. Zəlzələdən zərər görmüş bir sıra ailələrə yeni mənzillərin açarları təqdim olundu. Azərbaycan Respublikasının Prezidenti İlham Əliyev və Türkiyə Respublikasının Prezidenti Rəcəb Tayyib Ərdoğan “Azərbaycan məhəlləsi"nin açılışını bildirən rəmzi lenti kəsdilər. Prezidentlər İlham Əliyev və Rəcəb Tayyib Ərdoğan “Azərbaycan məhəlləsi"ni gəzdilər, burada inşa edilmiş mənzillərə baxdılar. *** Sonra Azərbaycan Respublikasının Prezidenti İlham Əliyev və Türkiyə Respublikasının Prezidenti Rəcəb Tayyib Ərdoğan Qəhrəmanmaraşdakı “Azərbaycan məhəlləsi"ndə inşa edilmiş Heydər Əliyev adına ibtidai məktəbdə və uşaq bağçasında yaradılan şəraitlə tanış oldular. *** Qeyd edək ki, 2023-cü ilin fevralında Türkiyənin cənub-şərqində baş verən dəhşətli zəlzələdən dərhal sonra Azərbaycan dövləti və xalqı qardaş ölkənin yanında oldu. Fəlakətin ilk günlərindən qardaş ölkəyə kömək üçün Prezident İlham Əliyevin tapşırığı ilə bütün imkanlar səfərbər edildi. Axtarış-xilasetmə işlərində iştirak etməklə yanaşı, ölkəmizin həm dövlət qurumlarının, həm də qeyri-hökumət təşkilatlarının səyləri digər istiqamətlərə yönəldildi. Dövlətimizin başçısının digər bir mühüm tapşırığına əsasən, Azərbaycanın qardaş ölkəyə uzunmüddətli dəstəyi üçün Qəhrəmanmaraşda “Azərbaycan məhəlləsi"nin inşasına start verildi. Tikinti işləri Azərbaycanın Mənzil İnşaatı Dövlət Agentliyi tərəfindən həyata keçirildi. Ərazisi 27,6 hektar olan məhəllədə 1194 mənzildən ibarət 68 yaşayış binası, Heydər Əliyev adına ibtidai məktəb, uşaq bağçası, mədəniyyət mərkəzi və digər sosial obyektlər inşa olunub. Həmçinin burada məskunlaşacaq ailələr üçün 1595 ticarət obyekti də yaradılacaq. 2024-cü il sentyabrın 11-də Heydər Əliyev adına ibtidai məktəbin və uşaq bağçasının açılışları olub. “Azərbaycan məhəlləsi"nin baş planı üzrə 7, 8, 11 və 12-ci kvartalların tikintisi artıq tamamlanıb. 4 kvartalda 26 yaşayış binası yerləşir. Binalar hamısı 4 mərtəbəlidir. Bu binalarda ümumilikdə 456 mənzil, 328 qeyri-yaşayış obyekti inşa edilib.

İsrailin İranla müharibədə uğursuzluğunun 3 əsas səbəbi var. Sozcu.az xəbər verir ki, bu barədə nüfuzlu həftəlik “The Economist” jurnalı yazıb. Britaniya nəşrinin təhlilində qeyd edib ki, İsrailin İranla birbaşa müharibədə tam qələbə şansı azdır. Əvvəla, İranın coğrafi böyüklüyü hərbi infrastrukturun tam məhv edilməsinin qarşısını alır. Qəzzə və ya Livanın cənubundan fərqli olaraq, qısa müddət ərzində və bir neçə məhdud əməliyyatla İran faktiki olaraq iflic vəziyyətinə düşə bilməz. Raket bazalarının və hərbi mərkəzlərin ölkə daxilində səpələnməsi İrana zərbələr endirmə imkanlarını azaldıb və İsrailin hədəfə aldığı hücumların effektivliyini şübhə altına alır. İkincisi, İranla İsrail arasında bir neçə min kilometr məsafə Tel-Əvivin genişmiqyaslı və davamlı hərbi əməliyyatlar keçirməsini çox çətinləşdirir. Hücum gücünü saxlamaq üçün İsrailə ABŞ-nin vasitəçi bazaları və ya aktiv dəstəyi lazımdır. Amerikanın xarici siyasətinin qeyri-müəyyənliyi ucbatından indiki vəziyyətdə Vaşinqtonun buna razılaşıb-razılaşmayacağı bilinmir. “The Economist” təhlilinə davam edərək vurğulayır ki, İran daxilində iqtisadi və sosial şəraitdən narazılıq olsa da, xarici təhlükə zamanı siyasi sistem ətrafında, bir növ, milli birlik və həmrəylik formalaşır. Bu xüsusiyyət, sürətli devirmə və ya daxili çöküş kimi planları qısa müddətdə təsirsiz edir. Nəşr belə nəticəyə gəlir ki, İsrailin İranla birbaşa müharibəsi nəinki Təl-Əviv üçün həlledici hərbi qazanc gətirməyəcək, həm də dialoq və vasitəçilik münaqişəni əvəz etməsə, İsraili baha başa gələn və aşındırıcı regional böhrana sürükləyə bilər.

Ağdamda ANAMA-nın əməkdaşı ölüb. Sozcu.az Lent.az-a istinadən xəbər verir ki, ANAMA-nın Ağdam mobil bazasında anbardar vəzifəsində çalışan 1969-cu il təvəllüdlü Vüqar Həşim oğlu Məmmədovun səhhəti anidən pisləşib. Bazanın əməkdaşları V.Məmmədovu Ağdam Rayon Mərkəzi Xəstəxanasına çatdırsalar da, onun həyatını xilas etmək mümkün olmayıb.

İranın zərbələri yalnız İsrail "cəzalandırıldıqda" və respublikaya təzminat ödədikdə dayandırılacaq. "Report" IRNA agentliyinə istinadən xəbər verir ki, bu barədə İranın Ali Milli Təhlükəsizlik Şurasının bəyanatında bildirilib. "Düşmən cəzalandırılana və təzminat ödənilənə qədər cavab tədbirləri davam edəcək", - bəyanatda qeyd olunub.

Son günlər İran-İsrail qarşıdurması fonunda ölkənin ali lideri Seyid Əli Ayətullah Xameneinin öldürülməsi məsələsi də gündəmə gəlir. Ötən gün İsrail ordusu İranın ali rəhbərinin qaldığı bunkerin yerləşdiyi məhəlləni bombaladığını açıqlayıb. Xameneinin xalqa müraciət videosunun yayılmasından dərhal sonra bunun baş verməsi maraq doğurub. ABŞ Prezidenti Donald Tramp da Xameneinin gizləndiyi yerlə bağlı əllərində dəqiq məlumatların olduğunu bildirmiş və onun “hələlik” öldürülməyəcəyini açıqlamışdı. ABŞ Xameneyinin aradan götürülməsini nədən istəmir? Sonda onunla anlaşacaqlarını bildiyi üçün? İranın ali rəhbəri həqiqətən hədəfdədir? Onun aradan götürülməsi İran üçün necə bir ssenari vəd edir? Globalinfo.az-a danışan siyasi şərhçi İlham İsmayıl bildirib ki, İran dünyəvi quruluşa malik olmayan ideoloji dövlətdir: “İslam ənənələrinə sadiq Respublika olduğundan, gərgin situasiyalarda ali rəhbərin öldürülməsi İran cəmiyyətində daha çox birlik yaradır, parçalanma isə baş vermir. Hətta Xameneidən narazı qüvvələr belə, artıq vətən və dövlət prinsipi əsasında birləşirlər. Bunu ABŞ çox yaxşı bilir. Xameneinin öldürülməsi mövcud rejimi dəyişdirməyəcək, əksinə, birlik və sıxlıq yaranacaq. İranın nüvə silahı əldə etməyəcəyinə dair konkret öhdəlik götürəcəyinə dair ümidlər var, lakin İran birmənalı qərar verməyib. Tehran danışıqlar masasına əyləşmək, zənginləşdirilmiş uranın Beynəlxalq Atom Enerjisi Agentliyinə təhvil verilməsi və proksi qüvvələrdən tam imtina edilməsi ilə bağlı müzakirələrin aparılmasının vacibliyini vurğulayır. Donald Tramp isə artıq danışıqlar deyil, konkret öhdəliklər götürməklə İranın danışıqlara gəlməsinin vaxtının çatdığını qeyd edir. Bu Rusiya Prezidenti Vladimir Putinin atdığı addıma bənzəyir. Beləki o, Ukrayna məsələsində danışıqlardan əvvəl kapitulyasiya aktını qəbul etmələrini əsas şərt qoyub. Əli Xamenei bilir ki, “təslim oluruq” ifadəsi İran rejiminin dağılmasına səbəb olacaq. Məsələ məhz bunun üzərində qurulub. Söhbət yalnız Əli Xameneinin qorunmasından və ya hansısa iş birliyindən getmir. İdeoloji dövlət prinsipini nəzərə alaraq, ABŞ hələlik bu addımı atmır. Xameneinin öldürülməsi islam dünyasını da ayağa qaldıra bilər. İrana heç bir simpatiyası olmayan müsəlman ölkələri də məsələyə biganə qalmayaraq sərt mövqe sərgiləyə bilərlər. Hələlik qətl baş verməyib, amma Pakistan və bəzi islam ölkələri İrana müəyyən mənada dəstək verir. Türkiyə də bu sıradadır. Bu, Xamenei ilə bağlı deyil, Türkiyənin siyasətindən irəli gəlir, islam ölkələrini müəyyən dərəcədə qorumaq istəyir. Xameneinin öldürülməsi ABŞ və İsrailə böyük ziyan verəcək. Perspektivdə normal şərtlər qəbul olunarsa, münaqişə dayanacaq. Əks təqdirdə, gərginlik ən azı 5-10 gün davam edəcək”.

08:35 İran İsrailə raket zərbələri endirib. Sozcu.az xəbər verir ki, bu barədə İsrail mediası məlumat yayıb. Bildirilib ki, raketlər paytaxt Təl-Əvivə düşüb. Eyni zamanda, Beer-Şevada yerləşən Soroka xəstəxanası da vurulub. ** Xəstəxananın vurulması nəticəsində azı 10 nəfər xəsarət alıb. Ölkənin əksər bölgələrində hava hücumu sirenləri səslənir, mülki əhaliyə isə sığınacaqlarda qalmaq tapşırılıb. Təl-Əvivdə də raket zərbələrindən sonra dağıntılar qeydə alınıb.

İran bu gün səhər saatlarında İsrail ordusunun kiber komandanlığının C4I qərargahına və Qav Yamdakı kəşfiyyat mərkəzinə hücum edib. Sozcu.az xəbər verir ki, bu barədə İRNA məlumat yayıb.

İran İsrailə məxsus pilotsuz təyyarələri İranda yığmaqda şübhəli bilinən iyirmiyə yaxın adamı saxlayıb. Sozcu.az xəbər verir ki. bu barədə məlumatı “Mehr” agentliyi yayıb. Məlumata görə, Məşhəd şəhərində 18 İsrail agenti həbs edilib. Onlar İsrail üçün kəşfiyyat və hücum pilotsuz uçan aparatlarının layihələndirilməsi üzərində gizli işləyiblər.

İranın hücumları nəticəsində İsrailin 130 min nəfərin yaşadığı Bat-Yam şəhəri darmadağın edilib. Sozcu.az xəbər verir ki, sosial şəbəkələrdə şəhərin dağılmış görüntüləri paylaşılıb.

İran İsraildəki xəstəxanalara və mülki obyektlərə hücum edir. Sozcu.az xəbər verir ki, bu barədə İsrailin müdafiə naziri İsrail Katz X hesabında paylaşım edib. “Baş nazir və mən silahlı qüvvələrə hücumları daha da intensivləşdirmək, Tehranda strateji hədəfləri və hökumət binalarını hədəfə almaqla bağlı tapşırıq vermişik ki, İsrail dövlətinə qarşı təhdidləri aradan qaldıraq və ayətullah rejimini sarsıdaq”, - nazir qeyd edib.

ABŞ hücum etməkdən imtina edərsə, İsrail İranın Fordo nüvə obyektinə xüsusi təyinatlı qüvvələrini göndərə bilər. Sozcu.az xəbər verir ki, bu barədə “Axios” məlumat yayıb. Nəşrin yazdığına görə, İsrail rəsmiləri hesab edir ki, ABŞ Prezidenti Donald Tramp hücum qərarı verəcək. Lakin onlar iddia edirlər ki, təkbaşına belə Fordodakı obyektə ciddi zərər verə bilərlər. “Axios” bildirir ki, İsrailin Baş naziri Benyamin Netanyahu və Vaşinqtondakı səfir Yexiel Leyter müsahibələrində İsrail ordusunun hava hücumlarından başqa variantları olduğuna işarə ediblər: “Bu variantlardan biri xüsusi təyinatlı qüvvələrin riskli əməliyyatıdır. İsrail xüsusi təyinatlıları 2024-cü ilin sentyabrında belə bir əməliyyat həyata keçiriblər, baxmayaraq ki, kiçikmiqyaslı olub. Həmin əməliyyatda onlar Suriyada yeraltı raket istehsalı zavodunu partladıblar. Hazırda İsrail İranın hava məkanını tam nəzarət altına alıb və İran ordusuna ciddi zərbə vurub, buna görə də xüsusi təyinatlı əməliyyat daha az ekstremal görünür. Amerikalı bir rəsminin sözlərinə görə, israillilər Tramp administrasiyasına bildiriblər ki, bombalar dağın dərinliklərinə kifayət qədər nüfuz etməyə bilər, amma onlar bunu insanların köməyi ilə edə bilərlər”. Qeyd edək ki, Fordo nüvə müəssisəsinin dağın altında, 90 metr dərinlikdə yerləşdiyi bildirilir.

Azərbaycan İranda azərbaycanlılar yaşayan ərazilərdə əməliyyat zamanı mülki əhalinin və mülki obyektlərin təhlükəsizliyi ilə əlaqədar ehtiyatlı davranmaq və zərbələrdən mümkün qədər yan keçmək üçün müxtəlif kanallarla İsrail tərəfə yenidən müraciət edib. Sozcu.az APA-ya istinadən xəbər verir ki, xüsusilə Ərdəbildəki hərbi obyektlərin vurulmasından sonra Azərbaycan tərəfdə mülki əhalinin təhlükəsizliyi baxımından narahatlıq yaranıb. Qeyd edək ki, İranda azərbaycanlıların yaşadığı yaşayış məntəqələri hədəfə almamaq, mülki infrastruktura və dinc əhaliyə zərər yetirməməklə bağlı Azərbaycanın bir neçə gün əvvəl müxtəlif kanallarla İsrail rəhbərliyinə mesaj göndərdiyi barədə məlumat yayılmışdı. Xatırladaq ki, İsraillə İran arasında iyunun 13-də başlayan hərbi əməliyyatlar zamanı hər iki tərəfdə mülki obyektlərə və mülki şəxslərə böyük ziyan dəyir. İsrailin endirdiyi zərbələr İranda azərbaycanlıların yaşadığı əraziləri də əhatə etdiyindən yerli əhali arasında itkilərin, sosial infrastrukturun dağıdılması təhlükəsi yaranır.