Üsyançılar Suriyada daha çox şəhərə nəzarəti ələ keçirməyə davam etdikcə, Bəşər Əsədin ailəsinin Rusiyaya qaçdığı bildirilir. Sozcu.az  “Wionews” nəşrinə istinadla xəbər verir ki, Wall Street Journal cümə günü yazır. Bura onun həyat yoldaşı, uşaqları və iki baldızı daxildir.  “WSJ”-nin Suriya təhlükəsizlik rəsmilərinə və ərəb rəsmilərinə istinadən verdiyi xəbərə görə, Suriya prezidentinin Britaniya əsilli həyat yoldaşı keçən həftə üç uşağı ilə birlikdə qaçıb. Qəzetin verdiyi məlumata görə,   Əsədin kürəkənləri Birləşmiş Ərəb Əmirliklərinə qaçıblar. Onun hələ də Suriyada olub-olmaması qeyri-müəyyən olaraq qalır.  “Bloomberg News”-un məlumatına görə, Kremlə yaxın mənbə Moskvanın Suriya prezidentini xilas etməyi planlaşdırmadığını bildirib. Görünür, Vladimir Putin rejim hərbçilərinin mövqelərini tərk etməsindən məmnun deyil. “Rusiyanın Əsədi xilas etmək planı yoxdur və Suriya prezidentinin ordusu mövqelərini tərk etməyə davam etdikcə, Əsədi xilas etmək planı yoxdur”, - mənbə bildirib. Cümə günü Əsədyönlü telekanal xəbər verib ki, prezident İrandadır. Məlumatlara görə, Misir və İordaniya rəsmiləri Suriya prezidentinin ölkəni tərk edərək mühacirətdə olan hökumət qurmasını istəyirlər.

Müdafiə Nazirliyinin Maliyyə və Büdcə İdarəsinin sabiq rəisi general-mayor Nizami Məmmədov, Hərbi Hava Qüvvələrinin Maliyyə Xidmətinin sabiq rəisi polkovnik Cəlal Kazımov, Quru Qoşunların Maliyyə İdarəsinin sabiq rəisi Bayram Bayramov və Hərbi Dəniz Qüvvələrinin Maliyyə Xidmətinin sabiq rəisi Vüsal Əlizadənin cinayət işi üzrə məhkəmə prosesi yekunlaşıb. Sozcu.az APA-ya istinadən xəbər verir ki, Bakı Hərbi Məhkəməsində hakim Fikrət Əliyevin sədrliyi ilə keçirilən prosesdə hökm oxunub. Hökmə əsasən, Nizami Məmmədov və Bayram Bayramov hər biri 11 il 6 ay, Cəlal Kazımov 11 il, Vüsal Əlizadə isə 10 il 6 ay müddətində azadlıqdan məhrum ediliblər. Onların əmlaklarının dövlətə dəymiş ziyanın qarşılığı olaraq müsadirə olunması qərara alınıb. Qeyd edək ki, Müdafiə Nazirliyinin Maliyyə və Büdcə İdarəsinin sabiq rəisi general-mayor Nizami Məmmədov, Hərbi Hava Qüvvələrinin (HHQ) Maliyyə Xidmətinin sabiq rəisi, polkovnik Cəlal Kazımov, Quru Qoşunların maliyyə idarəsinin rəisi Bayram Bayramov, Hərbi Hava Qüvvələrinin maliyyə xidmətinin sabiq rəisi Vüsal Əlizadə, Müdafiə Nazirlinin Satınalmalar və Təchizat İdarəsinin sabiq rəisi, polkovnik Mahir Şirvanov, həmçinin nazirliyin Satınalmalar və Təchizat İdarəsinin sabiq rəisi Məlikməmməd Qurbanov, nazirliyin mənzil istismar idarəsinin sabiq rəisi, polkovnik Fikrət Mirzəyev Dövlət Təhlükəsizliyi Xidmətinin keçirdiyi xüsusi əməliyyat nəticəsində həbs ediliblər. Təqsirləndirilən şəxslər dövlət büdcəsindən ayrılan pulları mənimsəməkdə ittiham edilirlər. Xatırladaq ki, cinayət işi üzrə ümumilikdə dövlətə dəymiş ziyan 143 milyon manatdır. Cinayət işləri ayrı-ayrı icraatlarda baxılması üçün məhkəməyə göndərilib. Cinayət işi üzrə Maliyyə Nazirliyi zərərçəkmiş qismində tanınıb. Təqsirləndirilən şəxslərin hər biri Cinayət Məcəlləsinin 179.4-cü (xüsusi ilə külli miqdarda ziyan vurmaqla mənimsəmə törətmək) maddəsi ilə ittiham irəli sürülüb.

Ağcabədidə qadın boğazı kəsilərək öldürülüb. Sozcu.az Report-a istinadən xəbər verir ki, 1982-ci il təvəllüdlü Afət Əsgərovanın meyiti evində aşkarlanıb. Hadisəni törətməkdə şübhəli bilinən qadının oğlu, 2008-ci il təvəllüdlü Kamil Bağırov və qadının kürəkəni, 1995-ci il təvəllüdlü Loğman Nəsibov tutulub. Faktla bağlı cinayət işi başlanılıb.

Bakıda və Abşeron yarımadasında dekabrın 7-si saat 10:00-a olan məlumata əsasən, arabir yağış yağıb. Sozcu.az xəbər verir ki, bu barədə Milli Hidrometeorologiya Xidməti məlumat yayıb. Qeyd edilib ki, düşən yağıntının miqdarı 3 mm-dək olub. "Hazırda Bakıda və Abşeron yarımadasında yağıntıda fasilə yaranıb. Lakin bu gün, dekabrın 7-si axşam saatlarından 9-u axşamadək yenidən Bakıda və Abşeron yarımadasının bəzi yerlərində fasilələrlə yağış yağacağı, yarımadanın ayrı-ayrı yerlərində leysan xarakterli olacağı gözlənilir. Azərbaycanın rayonlarında hava şəraiti əsasən yağmursuz keçib", - deyə məlumatda bildirilib.

Bakıda 20 gündür itkin düşmüş şəxsin öldüyü məlum olub. Sozcu.az xəbər verir ki, noyabrın 16-dan paytaxtın Xəzər rayonu ərazisində itkin düşmüş Əsgər Əzizovun ötən gün xəstəxanada ölməsi müəyyən edilib. Araşdırma aparılır.

Rayon mərkəzinə girəndə avtomatlardan havaya atəş açdıq. Bu, rayona şəhid gətirilməsindən xəbər verirdi. Azadgilin evlərinin yerini öyrənmək üçün maşını birbaşa rayon hərbi komissarlığına sürdük. Bizi komissarlığın işçiləri qarşıladılar. Onlardan Azadgilin evinin yerini soruşduq, məsələni izah etdik. İşçilərdən biri özünü itirmiş halda mənə dedi:  - Siz nə danışırsınız? Bu gün onun bacısının toyudur. İndi bu xəbəri onlara necə verəcəyik?  Nə edəcəyimizi bilmirdik, çarəsiz qalmışdıq. Tərslikdən həmin vaxt rayon hərbi komissarı kəndlərin birində şəhidin dəfn mərasimində idi. Onu gözləyib məsləhətləşmək üçün kifayət qədər vaxtımız da yoxdur. Bir qərara gəlməliydik. Dincimizi almaq üçün bizi yaxınlıqdakı çayxanaya aparıb çay verdilər. Elə bu an komissarlığın həyətində ağlaşma səsi eşidildi. Mən dözə bilməyib bayıra çıxdım. Ürəyim sıxılırdı. Nə qədər ağlaşma səsi eşitmək olardı! Ağlayan qadınlardan biri mənə yaxınlaşaraq dedi:  - Ay bala, sənə qurban olum, doğrudanmı Azad şəhid olub, siz onu gətirmisiniz?  Mən nə deyəcəyimi bilmirdim. Axı, bu xəbəri ona necə deyəydim?  - Siz kimsiniz, ay ana? Onu sizə kim dedi?  - Mən Azadın anasıyam.  -Yox, ay ana. Bizim burada işimiz var idi. Azadın bacısının toyu olduğunu eşitdik. Toyda iştirak edib, onun adından bacımızı təbrik etmək istədik,- deyib üzümü gizlətməyə çalışdım. Arvad deyəsən mənim yalanıma inandı. Ağlamağını kəsib gözlərinin yaşını silə-silə -“Bəs, niyə durmusunuz,  gəlin gedək. Toyun başlamasına az qalıb - dedi. – Siz gedin, biz bir azdan gələrik, hərbi komissarı gözləyirik. İşimiz var – deyib, susdum.  - Yox, elə şey olmaz. Siz bizimlə gedəcəksiniz. Evimiz yaxındadır - deyərək, israr etdi.  Biz istər-istəməz Azadın anasının ardınca getdik. Hərbi komissarlıqla onların evlərinin arası təxminən yüz əlli-iki yüz metr olardı. Yol boyu Azadın anası bizə, “Nə toy e.e.e, qız nişanlı idi. Nişanlısına çağırış vərəqəsi gəlib. Toy eyləyib qızı köçürdürük ki, birdən bir hadisə olar” deyə, gileyləndi.  Biz gəlib onların evlərinə çatdıq. Həyətlərində balaca mağar qurulmuşdu. Bizi mehribanlıqla qarşılayıb oturmağa yer göstərdilər. Çox keçmədi ki, Azadın anası  on səkkiz-on doqquz yaşlı bir qızla bizə yaxınlaşdı.“Tanış olun Vəfa, Azadın nişanlısıdır. Azad gələn kimi toyunu edib, evimizə gəlin gətirəcəyik. ”Vəfanın baxışlarından hiss olunurdu ki, Azadın gəlməsini həsrətlə gözləyir.” Bu sözlərdən sonra ürəyim parça-parça oldu.Yazıqlar bilmirdilər ki, bir neçə saatdan sonra bu qapıya Azadın meyidini gətirəcəyik. Bizə yemək gətirdilər. Ac olsaq da yeyə bilmirdik. Belə vəziyyətdə necə boğazımızdan yemək keçə bilərdi ki?! Masabəyi məni meydana dəvət edib bəylə gəlinə ürək sözlərimi çatdırmağımı istədi. İlahi, necə də dəhşətli bir mənzərədir, ayaqlarım yerimir, dilim söz tutmur. Mən Azadın meyidini hərbi komisarlıqda qoyub, burada Vəfanın gözlərinə baxa-baxa Azadın sağlığına badə qaldırıram. Bacısına xoşbəxlik arzuladığım bir vaxtda, Azad toy mağarının ortasında zühur etdi. Sağ böyrünü tutmuşdu. Birdən, dilləndi: - Qanı kəsə bilmirəm, ölürəm ağrıdan...  Azadın üzü-gözü qan içində idi. Quruyub qalmışdım. Dilim topuq vura-vura: -Azad, bacının toyu mübarək olsun. Azad, bəs sən ölmüşdün axı?! Azad, sən ölməmişdin? Gözümü bərəldib diqqətlə Azada baxanda, Azadın anasını mənimlə göz-gözə dayanan gördüm.  Ay Allah, mən ağlımı itirdim? – Öz – özümə deyindim. Bilmədim nə deyim, xatırlayıram ki, bircə bunu dedim: - Ana, Azad hara getdi? Azadın anası başındakı yaylığı ağır-ağır sahmana salıb, təzə xınalanmış ağ birçəyini yaylığın altında gizlədib, dedi: - Azad ölüb? Dilim qurudu, sualı cavabsız qoydum. Bilirəm indi dediklərimə inanmayacaqsınız amma masabəyi: “Gün, o gün olsun, Azadın toyuna gələsiniz!”- dedi və bir oyun havası çaldırıb, bizi rəqsə dəvət elədi. Ürəyimdə - “Bu nə zülmdür mənə verirsən, ay Allah!” - deyib qollarımı qaldırdım. Azadın atası, anası, bacısı, nişanlısı və qardaşları da bizə qoşularaq rəqs edirdilər... Bu an mənim nələr çəkdiyimi məndən başqa heç kim bilməzdi. Bu vəziyyət bir neçə dəqiqə belə davam etdi. Mən vaxtımızın az olduğunu bildirib onlardan getmək üçün icazə istədim. Hərbi komissarlığa gəlib toyun sona çatmasını gözlədik. Nəhayət, gəlinin bəy evinə yolandığını və toyun sona çatdığı xəbərini gətirdilər. Azadın meyidi olan tabutu maşına qoyub, havaya atəş aça-aça bayaq toya getdiyimiz qapıya tərəf istiqamətləndik. Bir saat əvvəl musiqi səsi gələn qapıdan indi ağlaşma, vay-şivən səsi eşidilirdi. Azadın anası saçlarını yolaraq üzünü cırırdı. Üzünün cırıqlarından qan süzülürdü. Ağlayaraq mənə -“A bala, bəs deyirdin Azad ölməyib?!" Mən isə günahkarcasına onun üzünə baxaraq, yazıq anaya nə deyəcəyimi bilmirdim. Bu vaxt bir qadın onun qolundan tutub ağlaya-ağlaya – “Yazıq bala neynəsin? Toyu yarımçıq qoymayacaqdı ki,- deyib, kənara apardı. Biz Azadı dəfn edib geri qayıtdıq... Sonradan eşitdim ki, Azadın toyu olan bacısının əri də şəhid olub. Qız isə qardaşının və ərinin ayrılığına dözə bilməyib, intihar edib Əbil Həsən

2022-ci ildə MİQ imtahanlarında iştirak edən və uğurlu nəticə göstərən ibtidai sinif müəllimi Südabə Sadıqova iki ildir ki sertifikatını ala bilmir. O, bu barədə Bakupost.az -a şikayətində bildirib. S.Sadıqova qeyd edib ki, 33 il Bakı şəhəri, Təbriz küçəsində yerləşən 77 saylı məktəbdə (hazırda Bakı Ankara Məktəb-Liseyi) çalışıb: "2022-ci ildə, 64 yaşımda sertifikasiya imtahanından keçdim. O vaxt deyirdilər ki, sertifikasiyadan keçənlər beş il işləyə bilər. 2023-cü ilin fevralından may ayına qədər bütün müəllim yoldaşlarım sertifikatlarını aldılar. İyun ayında mən də sertifikatın dalınca düşdüm. Dəfələrlə Təhsil Nazirliyinin Qəbul şöbəsinə getdim. Orada mənə dedilər ki, sənədi ASAN Xidmətə göndəriblər. İki dəfə ASAN Xidmətə getdim, amma oradan da sertifikatın olmadığını bildirdilər. Axırda Nazirlikdən dedilər ki, hərf səhvi olub, ona görə sənəd qalıb". 2023-cü ilin sentyabr ayında təqaüdə göndərilən müəllimə, o vaxtdan bəri hər ay 146 "Qaynar xətt"inə müraciət etsə də, eyni cavabları alır: "Hər dəfə "Hələ hazır deyil", "Hazır olanda verəcəyik", "Emailinizə göndərəcəyik" deyirlər. Lakin heç bir nəticə yoxdur. Bu sertifikat mənim qanuni haqqımdır. Sertifikasiyadan keçmişəm, amma sənədimi ala bilmirəm. Onlar 64 yaşlı müəllimin əsəblərini poza-poza sertifikasiyaya göndəriblər. İmtahandan keçmişəm və sertifikatımı tələb edirəm". Maraqlıdır ki, Təhsil Nazirliyi müəllimə sertifikat vermək əvəzinə onu təqaüdə göndərib. Təqaüdə göndərilən müəllimlərə sertifikat verilmirmi? Məsələ ilə bağlı Bakupost.az-a açıqlamasında təhsil eksperti Elşən Qafarov bildirdi ki, ümumtəhsil məktəblərində çalışan müəllimlərin sertifikatlaşdırılması Nazirlər Kabinetinin 30 aprel 2020-ci il tarixli, 155 nömrəli qərarına əsasən tənzimlənir. " 2022-ci ildə edilən dəyişikliklərdən biri də 60 yaşı tamam olmuş şəxslərin sertifikasiyada iştirakının könüllü olmasıdır. Bu o deməkdir ki, həmin şəxslər sertifikasiyada iştirak etmək üçün əlavə olaraq ərizə yazıb müraciət etməlidirlər ki, 60 yaşımın tamam olmasına baxmayaraq sertifikasiyada iştirak etmək istəyirəm. Yalnız bu müraciətdən sonra onlar sertifikasiyaya cəlb edilə bilərlər". Ekspertin sözlərinə görə, sertifikasiyada iştirak etdiyi halda, sertifikatın kağız şəklində verilməsinin xüsusi bir halı yoxdur, lakin müəllim onu almaq hüququna malikdir: "Mən düşünürəm ki, bu, əmək münasibətlərindən irəli gələn problemdir. Həmin müəllim ilk növbədə yazılı şəkildə Təhsil Nazirliyinə və Məktəbəqədər və Ümumi Təhsil üzrə Dövlət Agentliyinə (MÜTDA) müraciət etməlidir. Əgər 15 gün ərzində cavab almazsa və ya cavab onu qane etməzsə, o zaman məhkəməyə müraciət etməsi məqsədəuyğundur". Mövzu ilə bağlı Məktəbəqədər və Ümumi Təhsil Üzrə Dövlət Agentliyindən Bakupost.az -ın sorğusuna cavab olaraq bildirildi ki, Azərbaycan Respublikası Nazirlər Kabineti tərəfindən edilmiş müvafiq dəyişikliklərə əsasən, təhsilverənlərin sertifikatlaşdırılması prosesində uğur qazanan müəllimlərə elektron sənəd formasında yaradılan sertifikat veriləcək: “Elektron sənəd formasında təqdim edilən sertifikatlar müəllimlərin portal.edu.az platformasında yerləşən şəxsi kabinetlərinə əlavə ediləcək. Hazırda bu istiqamətdə sistemdə texniki işlər aparılır”.

Türkiyə Prezidenti Təcəb Tayyib Ərdoğan Suriyada Bəşər Əsəd rejiminə qarşı başlayan üsyan barəsində maraqlı açıqlama verib. Sozcu.az “Anadolu”ya istinadən xəbər verir ki, Ərdoğan Suriyada hökumət ordusunu getdikcə sıxışdıran müxalif "Heyət Təhrir əş-Şam" (HTŞ) silahlı qruplaşmasının sürətli hücumunu şərh edərkən deyib: "İdlib, Hama, Hums və hədəf təbii ki Dəməşqdir. Müxalifətin bu yürüşü davam edir. Ümid edirik ki, Suriyadakı bu yürüş insidentsiz və problemsiz davam edəcək". Türkiyə Prezidenti bu açıqlamanı Hz. Əli məscidində qılınan cümə namazından sonra mətbuat mənsublarının suallarını cavablandırarkən verib. "İdlib, Hama, Hums və hədəf təbii ki Dəməşqdir. Müxalifətin bu yürüşü hazırda davam edir. Biz bu yürüşü həm kəşfiyyat vasitəsilə, həm də bütün mediadan izləyirik. Suriyadakı bu yürüş qəzasız-bəlasız davam etsin deyəcəyəm, amma bu dirəniş terror təşkilatları ilə birlikdə davam etdirilərkən, xatırlayırsınızsa, Əsədə zəng etdim, “gəl görüşək, Suriyanın gələcəyini birlikdə müəyyən edək” dedim. Təəssüf ki, Əsəddən bu təklifə müsbət cavab ala bilmədik", - Ərdoğan əlavə edib. Prezident müxalifətin paytaxt Dəməşqə doğru irəliləməsini belə qiymətləndirib: "Bölgədə davam edən bu narahat yürüşlər bizim istədiyimiz deyil, istəmirik. Təəssüf ki, bölgə problem içindədir”.

Bu gün Şəki şəhər Fizika-riyaziyyat və humanitar təmayüllü liseyin kimya kabinetində 11-ci sinifdə keçirilən dərs zamanı sınaq şüşəsi çatlayaraq sınıb. Sozcu.az-ın xəbərinə görə, bu barədə Şəki-Zaqatala Regional Təhsil İdarəsindən “Azərbaycan müəllimi”nə məlumat verilib. Bildirilib ki, buna səbəb təcrübə aparılarkən kimyəvi reaksiya ilə əlaqədar olaraq yaranan qızma olub. Bu zaman fənn müəllimi və 4 şagird yüngül xəsarət alıb. Dərhal təcili tibbi yardıma müraciət olunub, müəllim və şagirdlərə ilkin tibbi yardım göstərildikdən sonra evə buraxılıblar.modern)

1996-cı ildə tədavülə buraxılan və 2011-ci ildə istifadə müddəti bitərək tədavüldən çıxarılan dövlət özəlləşdirmə çeklərinin yenidən qiymətli kağız kimi tədavül vasitəsi olması, dövriyyəyə qaytarılması barədə heç bir yenilik yoxdur. Sozcu.az xəbər verir ki, bu barədə "APA"ya Əmlak Məsələləri Dövlət Xidmətindən (ƏMDX) bildirilib. “Həmin çeklərin yenidən pul predmetinə çevrilməsi ilə bağlı sosial şəbəkələrdə olan məlumatlar yanlışdır”, - deyə Dövlət Xidmətindən vurğulanıb. ƏMDX vətəndaşları dövlət özəlləşdirmə çeklərinin yenidən istifadə olunacağı ilə bağlı yayılan şayiələrə inanmamağa çağırır. Qeyd edək ki, sosial şəbəkələrdə dövlət özəlləşdirmə çeklərinin əvəzində vətəndaşlara 20 min manat pul vəsaitinin veriləcəyini barədə məlumatları əks etdirən video yayılıb. Sözügedən videoda bir qrup insanın həmin vəsaiti almaq üçün Bakı İnzibati Məhkəməsinin ətrafına toplaşdığı əksini tapıb. Dövlət özəlləşdirmə payları (çeklər) "Azərbaycan Respublikasında dövlət özəlləşdirmə paylarının (çeklərinin) dövriyyəyə buraxılması haqqında" Azərbaycan Prezidentinin 25.03.1996-cı il tarixli Fərmanına əsasən dövriyyəyə buraxılıb. Azərbaycan Prezidentinin 23.12.2009-cu il tarixli Fərmanına uyğun olaraq, dövlət özəlləşdirmə çeklərinin son istifadə müddəti 01.01.2011-ci il tarixində başa çatıb və həmin çeklər tədavüldən çıxarılıb. Bununla da dövlət özəlləşdirmə çekləri qiymətli kağız kimi öz əhəmiyyətini itirmiş və vətəndaşların həmin çeklərdən istifadə edərək hər hansı hüquq və ya gəlir əldə etməsi mümkün deyil.

Türkiyə parlamentində təmsil olunan müxalif “DEVA”, “Səadət” və “Gələcək” partiyaları birləşərək fraksiya yaradıblar. Sozcu.az Türkiyə KİV-nə istinadən xəbər verir ki, “Səadət” partiyasının başqanı Mahmud Arkan, “DEVA” partiyasının başqanı Əli Babacan və “Gələcək” partiyasının başqanı Əhməd Davudoğlu arasında keçirilmiş üçtərəfli görüşdə tərəflər “Demokratik Platforma” adlı fraksiyada birləşdiklərini elan ediblər. Bundan əlavə, 3 partiyanın qarşıdan gələn seçkilər zamanı birgə fəaliyyət göstərməsi və ümumi proqram hazırlaması razılaşdırılıb. Adı çəkilən müxalifət partiyalarının əməkdaşlığı Türkiyədə daha demokratik və islahat gündəmini inkişaf etdirmək məqsədi daşıyır. Partiyaların birləşməsinin əsasını Ərdoğan administrasiyasının siyasətinə qarşı çıxmaq və yeni siyasi alternativ yaratmaq istəyi təşkil edir. Xatırladaq ki, Əli Babacan və Əhməd Davudoğlu Türkiyənin keçmiş xarici işlər nazirləri olub.

"Seza Elektrik" MMC-yə inzibati protokol yazılıb. Pravda.az-ın xəbərinə görə, Mərkəzi Bank protokolu İnzibati Xətalar Məcəlləsinin 430.4-cü (Avans yolu ilə ödənilmiş valyuta vəsaitinin müqabilində müəyyən edilmiş müddətlərdə müvafiq mallar idxal edilmədikdə, işlər görülmədikdə və ya xidmətlər göstərilmədikdə ödənilmiş valyuta vəsaitinin xaricdən geri qaytarılmamasına görə vəzifəli şəxslər inzibati xətanın bilavasitə obyekti olmuş valyuta vəsaiti məbləğinin on faizindən iyirmi faizinədək məbləğdə, hüquqi şəxslər inzibati xətanın obyekti olmuş valyuta vəsaiti məbləğinin iyirmi faizindən otuz faizinədək məbləğdə cərimə edilir) maddəsinə əsasən tərtib edib. İş Nizami Rayon Məhkəməsinin hakimi Mətanət Hacıyevanın icraatındadır.

Xəbər verdiyimiz kimi, bir çoxları kənd yumurtası adından broyler yumurtasının satıldığını iddia edərək bəzi işbazların alıcıları aldatdığını bildirmişdi. Yenisabah.az sözügedən iddiaları araşdırıb. Məsələ ilə bağlı saytımıza açıqlama verən qida məsələləri üzrə ekspert İlkin Şirinov hər iki növ haqqında vacib məqamlara toxunub: “Hazırda kənd yumurtası ilə broyler yumurtasını ayırmaq ikili fikirlərlə müzakirə olunur. Amma burada məsələ o deyil. Məsələ budur ki, bəziləri onların tərkibinin eyni olduğunu deyir. Ancaq mən bu fikirlə qətiyyən razılaşmıram. Əgər tərkibləri eyni olsa satış qiymətləri arasında da fərq olmaz, kənd yumurtası digər növdən daha yüksək qiymətə satılmazdı. Digər tərəfdən isə nəzərə alsaq ki, broyler yumurtalarını yumurtlayan toyuqların müxtəlif kimyəvi, kökəldici və həyat fəaliyyətinə təsir edən qida əlavələri ilə bəslənirlər. Belə olduğu təqdirdə, həmçinin onlar qapalı şəraitdə saxlanılır, günəş işığı görmür və torpaqla əlaqəsi yoxdursa, yumurtalarının tərkibində kimyəvi birləşmələr olacaq, bir çox vitaminlər isə yetərincə mövcud olmayacaq. Bu səbəbdən insanlar həmin yağ turşularını, proteinləri əldə etmək üçün kənd yumurtasına üstünlük verirlər. Hər iki növün bir-birindən fərqini qiymətlərdən bilmək olar”. Ekspert kənd yumurtasını digərindən ayırmağın yollarını sadalayıb: “Bəzən işbazlar belə bir yola əl atır. Belə ki, kənd yumurtası iki cür, həm sarı, həm də ağ rəngdə satışa çıxarılır. Həmin işbazlar da çeşidli mayelərdən istifadə edərək broyler yumurtasının üzərinə çəkməklə onu kənd yumurtası adı ilə satırlar. Alıcılar bu hiyləyə aldanmamaq üçün bir sıra məqamları ayırd etməyi bacarmalıdır. Bilməlidirlər ki, kənd yumurtasının ölçüsü, broyler qədər iri olmur. Həmçinin, kənd yumurtasının qabığı daha qalındır. Bu toyuqlar günəş və torpaqla təmasda olub, otla qidalandığı üçün onun sarısı daha tünd rəngdədir. Və broyler yumurtasındakı spesifik iy digər növdə mövcud deyil”.

Bir çox hallarda qəzalarında səbəb təkcə sürət həddi, yaxud digər qayda pozuntusu deyil, nəqliyyat vasitəsinin texniki nasazlığı da olur. Sürücünün maşına lazımi texniki qulluq göstərilməməsi və zaman keçdikcə ehtiyat hissələrinin sıradan çıxması yollarda ani qəzalara və ya yarı yolda qalma halı doğurur. Bu kimi hallarla qarşılaşmamaq üçün sürücü mütləq şəkildə maşının sazlığına və vaxtı-vaxtında yoxlanışına fikir verməlidir. Yenisabah.az nəqliyyat vasitələrində qəzalara ən çox zəmin yaradan nasazlıqları və onların səbəblərini araşdırıb. Dünya təcrübəsində avtoqəzaların başlıca səbəbi aşınmış ehtiyat hissələridir. Ən çox görülən aşınma zamanla dayaqlarda və amortizatorlarda olur. Bu, idarəetmə qabiliyyətinin və əyləc məsafəsinin artmasına gətirib çıxarır, sürüşmə ehtimalı kəskin şəkildə artır. Digər tərəfdən, həddən artıq yük və ya zərbə ucbatından yaylar qırıla və ya əyilə bilər. Çəkinin qeyri-bərabər paylanması idarəetməyə təsir edir və aşma riskini artırır. Tez-tez həddindən artıq yüklənmələr alətlərin zədələnməsini yaradır. Onlar deformasiyaya uğrayır, ya da qırılır, bu da təkərlərin düzülmə bucaqlarının pozulmasına səbəb olur və idarəetməni pozur. Maşınlarda təkərlərin sazlığına, şinlərin aşınıb-aşınmamasına və ən asası atmosfer balansına xüsusi diqqət etmək lazımdır. Nəzərə alaq ki, avtomobillərdə yer alan 4 təkər balanslı olaraq tarazlığı təmin edir və onlardan birinin sürüş zamanı sıradan çıxması faciəvi qəzalara səbəb ola bilər.

Sabah Bakıda və Abşeron yarımadasında tutqun hava şəraiti üstünlük təşkil edəcək. Sozcu.az xəbər verir ki, bu barədə Milli Hidrometeorologiya Xidməti məlumat yayıb. Bəzi yerlərdə arabir yağış yağacağı gözlənilir. Gündüz yağıntıda qısa müddətə fasilə olacaq. Şimal-qərb küləyi gündüz cənub-şərq küləyi ilə əvəz olunacaq. Havanın temperaturu gecə 6-8° isti, gündüz 8-11° isti olacaq. Atmosfer təzyiqi 775 mm civə sütunu təşkil edəcək. Nisbi rütubət 70-80 % olacaq. Azərbaycanın rayonlarında havanın əsasən yağmursuz keçəcəyi, lakin gündüz bəzi şərq rayonlarında arabir yağıntılı olacağı gözlənilir. Bəzi yerlərdə arabir duman olacaq. Şərq küləyi gündüz bəzi şərq rayonlarında arabir güclənəcək. Havanın temperaturu gecə 1-6° isti, gündüz 8-13° isti, dağlarda gecə 6-11° şaxta, gündüz 3° şaxtadan 2°-dək isti olacaq.

Gürcüstan Baş naziri İrakli Kobaxidze böhranı həll edə bilmədiyi üçün istefa verməlidir. Sozcu.az xəbər verir ki, bunu Gürcüstan Prezidenti Salome Zurabişvili ölkənin Birinci kanalına müsahibəsində deyib. “Böhranı həll edə bilməyən baş nazir dəyişdirilməlidir və o baş nazir istefa verən kimi mən iki həftəyə seçki təyin etməliyəm. Bu kompromisdir, depolarizasiyadır, Gürcüstan üçün çıxış yolu, sabitlik, sülh, azad və demokratik gələcəkdir”, - Zurabişvili bildirib. Onun sözlərinə görə, Gürcü Arzusu Saakaşvili dövründən də pis olub: “Gürcü Arzusunun bir arzusu var: onların yeganə rəqibi həmişə Mişa olsun. Bu gün Gürcü Arzusu Saakaşvilinin dövründə olduğundan daha pis olub. Onlar hər şeyi təkrarladılar və Saakaşvilinin dövründə olmayan yeganə şeyi - Rusiya, avtoritarizm, təkpartiyalı sistem, seçki saxtakarlığı, insan hüquqlarının pozulması əlavə edildi”.

“İllərdir ölkəmizdə ailə büdcəsinə ağır yük olan repetitor fəaliyyətinin əsas səbəbləri təhsil sistemindəki müəyyən boşluqlar və problemlərlə bağlıdır. Halbuki, dövlət tərəfindən məktəblərdə müəllim və şagirdlər üçün yüksək təhsilə hər cür şərait yaradılıb. Bəs hələ də şagirdləri repetitor yanına getməyə hansı amillər məcbur edir?”. Sozcu.az xəbər verir ki, bunu milli.az-a açıqlamasında ekspert Fərid Əliyev deyib. Onun sözlərinə görə, bəzi valideynlər məktəbdə potensial görmədiyi üçün repetitor xidmətindən istifadəyə üz tutur: “Bunlara misal olaraq “fərdi yanaşma”, “daha yüksək nəticələr”, “fokuslanmış təhsil”, “inam və motivasiya” və.s amilləri sadalamaq mümkündür. Bununla yanaşı “təhsil sistemində çatışmazlıqların göstəricisi”, “maddi yük”, “aslılıq”, “təhsil bərabərsizliyi”, “stress və yüklənmə”, “keyfiyyətsiz repetitorlar” olaraq da mənfi nəticələri mövcuddur. Niyə ölkəmizdə təhsil tam ödənişsiz olduğu təqdirdə, əlavə olaraq valideynlərin şəxsi büdcəsi hesabına övladları repetitor yanına getməlidir? Nəyə görə, məktəblər də buna şərait yaradaraq öz reputasiyalarını aşağı düşürməlidirlər? Deyərdim ki, bu problemin ən başlıca səbəbi məktəblərdə olan tədris sistemi və bəzi işini düzgün bacara bilməyən məsullardır. Hər bir valideyn övladının universitetə qəbul olunmasını arzulayır və hər bir şagird də universitet həyatına atılmağı səbrsizliklə gözləyir. Lakin məktəbdə gələcəyi üçün bir potensial görmür və bu səbəbdən də repetitor xidmətindən istifadəyə üz tutur. Bu da öz növbəsində həmin sahəyə tələbi artırır”. Ekspert tədris keyfiyyətini artırmaq və müəllimlərin bilik və bacarıqlarını daha da təkmilləşdirmək üçün mütəmadi təlimlər təşkil edilməli olduğunu bildirir. “Mütləqdir ki, repetitorluq fəaliyyətinə səbəb olan problemlər müntəzəm olaraq monitorinq edilməli və məktəblərdə problemlərin səbəbləri aradan qaldırılmalıdır. Bu məsələni həll etmək üçün məktəblər, təhsil sisteminin digər komponentləri ilə birgə, bir sıra addımlar da atmalıdırlar. Məsələn tədris keyfiyyətini artırmaq və müəllimlərin bilik və bacarıqlarını daha da təkmilləşdirmək üçün mütəmadi təlimlər təşkil edilməlidir. Müasir tədris metodikalarının tətbiqi ilə şagirdlərin marağını artırmaq və dərsləri daha effektiv etmək mümkündür.Dərslik və proqramlarını yeniləyərək sadə, başadüşülən və praktiki etmək, çox yüklü və ya nəzəri materialları azaltmaq lazımdır. Təhsil proqramı şagirdlərin bacarıqlarına və inkişaf səviyyəsinə uyğunlaşdırılmalıdır. Fərdi yanaşma ilə müəllimlər zəif şagirdlərə əlavə dəstək göstərməlidirlər. Daha sonra məktəb daxilində pulsuz əlavə məşğələlər və konsultasiyalar təşkil edilə bilər. Siniflərdə fərdi yanaşma metodlarından istifadə etməklə hər şagirdin ehtiyacları nəzərə alınmalıdır. Universitetlərə qəbul yalnız testlərə deyil, digər bacarıqlara əsaslanan müvafiq seçim mexanizmlərinə keçid etməlidir”, deyə, o, qeyd edib.. F.Əliyev deyir ki, orta məktəblərdə təhsilin səviyyəsi artmış olsa şagirdlərin repetitor dəstəyinə ehtiyacı olmayacaq. “Orta məktəb təhsili elə səviyyədə təşkil olunmalıdır ki, şagirdlər repetitor dəstəyinə ehtiyac hiss etməsinlər. Məktəblərdə əlavə  kurslar, məşğələlər və s. təşkil edilməlidir. Bunlar həm şagirdlərə dəstək, həm də repetitorluğa alternativ ola bilər. Düşünürəm ki, valideynlərlə məktəb arasında sıx əməkdaşlıq olmalıdır. Onlara repetitorluq yerinə məktəb resurslarından necə istifadə ediləcəyi izah edilməlidir. Valideynlər məktəblərdəki dəyişikliklərdən xəbərdar edilməli və onların dəstəyi alınmalıdır. Bu addımlar atılacağı təqdirdə təhsil sistemindəki boşluqları azaldaraq şagirdlərin məktəb təhsilinə olan inamını artırmağa kömək edə bilər. Məqsəd yalnız repetitorluğun qarşısını almaq deyil, təhsil keyfiyyətini yüksəltmək olmalıdır”, deyə ekspert əlavə edib,

Suriyada müxalifət Rastan şəhərinə nəzarəti ələ keçirib. Sozcu.az xəbər verir ki, bu barədə “Anadolu” agentliyi məlumat yayıb. Rastan Xüms əyalətinin üçüncü ən böyük şəhəridir.

Beyləqanda iki avtomobil toqquşub. Sozcu.az xəbər verir ki, Emin Bəxtiyar oğlu Həziyev idarə etdiyi "VAZ-21214 Urban" markalı avtomobillə Aşqallar kəndi ərazisində Elmidar Sahib oğlu Qafarovun idarə etdiyi QAZ-330210 markalı avtomobillə toqquşub. Nəticədə E.Qafarov, digər sürücü E.Həziyev hadisə yerində və həmin avtomobildə olan sərnişin Rəvan Elmin oğlu Həziyev aldığı xəsarətlərdən Beyləqan rayon Mərkəzi Xəstəxanasında ölüb. Faktla bağlı cinayət işi başlanılıb.

ABŞ prezidentinin milli təhlükəsizlik üzrə müşaviri Ceyk Sallivan Zelenskinin ofisinin rəhbəri Andrey Ermakla görüşündə 2025-ci ilin yanvar ayının ortalarına qədər Kiyevi yüz minlərlə mərmi, minlərlə raket və yüzlərlə zirehli texnika ilə təmin edəcəyinə söz verib. Sozcu.az xəbər verir ki, bu barədə “Qardian” nəşri məlumat verib. “Ceyk Sallivan dünən bir saatdan çox Andrey Yermakla görüşdü. Ukraynanı yanvarın ortalarına qədər yüz minlərlə əlavə artilleriya mərmisi, minlərlə raket və yüzlərlə zirehli texnika ilə təmin edəcəyinə söz verdi”, - məlumatda qeyd olunub.

Son nəticədə hədəf avtoritar Prezident Bəşər Əsədi devirməkdir. Sozcu.az xəbər verir ki, bunu “Heyət Təhrir əş-Şam” qruplaşmasının lideri Əbu Məhəmməd Colani CNN telekanalına müsahibəsində deyib. “İnqilabın məqsədi bu rejimi devirməkdir. Bu məqsədə çatmaq üçün bütün mövcud vasitələrdən istifadə etmək hüququmuz var. Rejimin məğlubiyyətinin toxumları həmişə onun içində olub. İranlılar rejimi dirçəltməyə, sonradan ruslar da dəstəkləməyə çalışıblar. Amma həqiqət budur ki, bu rejim ölüb”, - Colani bildirib. HTŞ lideri ələ keçirdikləri ərazilərdə yaşayan mülki insanları onlardan qorxmamağa çağırıb: “İslam idarəçiliyindən qorxan insanlar onun ya səhv həyata keçirildiyini görüblər, ya da onu düzgün başa düşmürlər. Suriyada on ildir davam edən vətəndaş müharibəsində ekstremist və cihadçı qruplar tərəfindən təqib edilən mülki şəxsləri və qrupları sakitləşdirməyə çalışırıq. Xristianlara və digər dini və etnik azlıqlara hakimiyyətimiz altında təhlükəsiz yaşayacaqlarını açıq şəkildə söyləmək üçün əlimizdən gələni edirik. Xaos dövründə ayrı-ayrı şəxslər tərəfindən azlıqlara qarşı bəzi pozuntular olub, lakin biz bu problemləri həll etmişik”. Colaninin sözlərinə görə, xarici hərbi qüvvələr Suriyanı tərk etməlidir: “Hazırda ölkədə ABŞ, Türkiyə, Rusiya və İran hərbçiləri ilə yanaşı, İranın qruplaşmaları da var. Düşünürəm ki, bu rejim süqut etdikdən sonra problem həll olunacaq və daha heç bir xarici qoşunun Suriyada qalmasına ehtiyac qalmayacaq. Suriya bir hökmdarın özbaşına qərarlar qəbul etdiyi sistemə deyil, institusional idarəetmə sisteminə layiqdir. Əsəd sülaləsi 1971-ci ildən bəri 53 ildir hakimiyyətdədir. Rejim onilliklərlə davam edən hakimiyyətini saxlamaq üçün yüz minlərlə insanı qətlə yetirib, müxalifləri həbs edib, milyonlarla insanı ölkə daxilində və xaricində vəhşicəsinə təqib edib”.

Ukrayna müharibənin 1017-ci günü üçün Rusiya ordusunun itkiləri haqda məlumatı yeniləyib. Sozcu.az xəbər verir ki, bu barədə Ukrayna Baş Qərargahı məlumat yayıb. Məlumata əsasən, Rusiya indiyə qədər 750 610 hərbçi, 9 514 ədəd tank, 19 518 ədəd zirehli döyüş maşını, 21 043 ədəd artilleriya sistemi, 1 253 ədəd RYAS (reaktiv yaylım atəş sistemi), 1020 hava hücumundan müdafiə sistemi, 369 ədəd hərbi təyyarə, 329 ədəd helikopter, 30 899 ədəd avtomobil texnikası, 20 023 ədəd PUA, 2 855 qanadlı raket, 28 gəmi/kater, 1 sualtı qayıq, 3 633 xüsusi avadanlıq itirib.

İsrail aviasiyası Suriyanın Livanla sərhədində Hizbullahın silah anbarları və silah qaçaqmalçılığı marşrutlarına zərbələr endirib. Sozcu.az xəbər verir ki, bu barədə İsrail ordusundan məlumat verilib. “İsrail Hərbi Hava Qüvvələri Suriya-Livan sərhədindəki nəzarət-buraxılış məntəqələri yaxınlığında yerləşən silah qaçaqmalçılığı yollarına və terrorçuların infrastrukturuna zərbələr endirib. Bu marşrutlar Hizbullah tərəfindən silahların saxlanması və qaçaqmalçılığı üçün istifadə olunurdu”, - məlumatda qeyd olunub.

TRT1 kanalında yayımlanan "Kara ağaç destanı" serialının final tarixi ilə bağlı qərar dəyişməyib. Sozcu.az xəbər verir ki, ekran işinin reytinqlərə görə 32-ci bölümdə izləyicilərinə vida edəcəyi təxmin edilsə də, serialın 30-cu bölümdə final edəcəyi dəqiqləşib. Bundan əlavə, "Kurtlar vadisi" serialındakı "Hikmət" obrazı ilə məşhurluq qazanan Erdem Ergüney də final bölümündə layihədə rol alacaq. Qeyd edək ki, serialın baş rolunu Olqun Şimşeklə Emre Kıvılcım paylaşır.