Türkiyə Prezidenti Rəcəb Tayyib Ərdoğan BMT-nin İqlim Dəyişmələri üzrə Çərçivə Konvensiyasının Tərəflər Konfransının 29-cu sessiyasında - COP29-da iştirak etmək üçün Azərbaycana səfərə gələcək. Sozcu.az Trend-ə istinadən xəbər verir ki, bu barədə Türkiyə liderinin noyabr ayında nəzərdə tutulan səfərlərinin proqramında bildirilir. Məlumata əsasən, Türkiyə Prezidenti 11-12 noyabr tarixlərində COP29-da iştirak etmək üçün Bakıda olacaq. Qeyd edilir ki, konfransda Rəcəb Tayyib Ərdoğanın həyat yoldaşı Əminə Ərdoğanın himayəsi ilə həyata keçirilən “Sıfır Tullantı Layihəsi” çərçivəsində bəzi tədbirlərin təşkili də nəzərdə tutulur. Qeyd edək ki, BMT-nin İqlim Dəyişikliyi üzrə Çərçivə Konvensiyasının (COP29) Tərəflər Konfransının 29-cu sessiyası bir neçə gün sonra Azərbaycanda keçiriləcək. Bununla bağlı qərar ötən il dekabrın 11-də Dubayda keçirilən COP28 plenar iclasında qəbul edilib. Birləşmiş Millətlər Təşkilatının İqlim Dəyişikliyi üzrə Çərçivə Konvensiyası 1992-ci ilin iyununda Rio-de-Janeyroda keçirilən Yer Sammitində insanın iqlim sisteminə təhlükəli müdaxiləsinin qarşısını almaq üçün imzalanmış sazişdir. "COP" (Conference of Parties) abbreviaturası İqlim Dəyişikliyi üzrə Çərçivə Konvensiyasının icrasına nəzarət edən ən yüksək qanunverici orqan olan "Tərəflərin Konfransı" mənasını verir. Konvensiyada 198 ölkə iştirak edir. Tərəflər başqa cür razılaşmırsa, COP hər il keçirilir. İlk COP tədbiri 1995-ci ilin martında Berlində baş tutdu və onun katibliyi Bonnda yerləşir.

İspaniya kralı VI Filipp və həyat yoldaşı Letisiya Valensiyada daşqından əziyyət çəkənlərin hücumuna məruz qalıb. Sozcu.az xəbər verir ki, bu barədə TVE kanalı məlumat yayıb. Məlumata görə, kral və kraliça Valensiyaya, daşqınlardan çox zərər çəkmiş Paiporta və Çiva rayonlarına yollanıb. Toplaşanlardan bəziləri onlara tərəf palçıq atmağa başlayıblar. Etirazçılar VI Filipp və Letisiyanı “qatil” adlandırıblar.

"Bakıda mülk almayın! O cümlədən gələcəkdə daha baha satmaq məqsədilə. Əvvəla, uzunmüddətli perspektivdə qiymətlər düşəcək. Ekologiyası bərbaddır, xəstəlik məkanıdır. İnfrastrukturu ondan da bərbaddır: hələlik dövlətin bir az pulu var deyə total korrupsiyaya baxmayaraq bir təhər problemlər yola verilir, amma yekunda elə günə düşəcək ki, yaşanası məkan olmayacaq, 90-cı illərin işıq, su və s. problemi bunun qarşısında heç nə kimi görünəcək". Sozcu.az xəbər verir ki, bunu iqtisadçı ekspert Əkrəm Həsənov deyib: "Ən əsası isə, bizdə mülkiyyət hüququna təminat yoxdur. Hər an əlinizdən alına bilər (məhkəmələr də buna qanuni don geyindirəcək). Gələcəkdə isə mütləq alınacaq! Çünki görünən odur ki, bizdə kapitalizm eksperimenti uğursuz oldu: çox dar dairədəki insanların xeyrinə oldu, onlar saysız-hesabsız əmlaka sahib oldu, əksəriyyət isə get-gedə daha da kasıblaşır. Buna görə də əvvəl-axır bu və ya digər şəkildə milliləşmə (özəl mülkiyyətin dövlətə keçməsi) və hər kəsə sahib ola biləcəyi daşınmaz əmlak həcminə məhdudiyyətin tətbiqi qaçılmazdır..."

Ukrayna cəbhəsində tutulan əsgərlərdən birinin Şimali Koreya vətəndaşı olduğu bildirilib. Bu hadisə, Rusiya-Ukrayna müharibəsində iştirak edən xarici qüvvələr mövzusunu yenidən gündəmə gətirib. Məlum olub ki, Ukrayna qüvvələri tərəfindən əsir götürülən bu şəxs, Şimali Koreyanın Rusiya tərəfdən müharibədə iştirak etdiyi iddialarının əyani sübutu ola bilər. Musavat.com-un əldə etdiyi məlumata görə, sosial şəbəkələrdə yayılan fotolarda Ukrayna əsgərləri, Şimali Koreya ordusuna aid hərbi şəxsiyyət vəsiqəsi tutaraq görüntülənir. Əgər bu fakt təsdiqlənərsə, bu, Ukrayna tərəfindən tutulan ilk Şimali Koreyalı əsgər olacaq və uzun müddətdir dünya mediasında müzakirə edilən iddiaları gücləndirəcək. Qeyd edək ki, bu iddialara görə, Şimali Koreya, Rusiya ilə olan yaxın münasibətləri çərçivəsində ona gizli hərbi dəstək verir. Şimali Koreya əsgərlərinin Rusiya tərəfində döyüşdüyü iddiaları artıq dünya mediasında dəfələrlə gündəmə gətirilib. Əvvəllər əsasən fərziyyələrə və kəşfiyyat məlumatlarına əsaslanan bu iddialar, indi faktlarla təsdiqlənmiş ola bilər. Bu vəziyyət, Rusiya və Şimali Koreya arasında güclənən hərbi əməkdaşlıq fonunda, regionda və beynəlxalq miqyasda yeni təhdidlər doğurur. Analitiklər hesab edir ki, bu inkişaf müharibənin miqyasını daha da genişləndirə bilər. Rusiya tərəfdən döyüşən xarici qüvvələrin iştirakının sübut olunması, Qərb dövlətlərinin Ukrayna ilə bağlı siyasətinə və regional təhlükəsizlik strategiyalarına təsir edə bilər. Eyni zamanda, Cənubi Koreya və ABŞ da bu xəbərlərə reaksiya verərək, bölgədəki təhlükəsizlik tədbirlərini sərtləşdirə bilər. Bu hadisə, Ukraynanın müharibədə daha çox dəstək və müdafiə resursları tələb etməsi üçün yeni bir arqument kimi istifadə oluna bilər. Ukrayna tərəfi, Rusiya ilə mübarizədə yalnız təkbaşına deyil, həm də potensial müttəfiqlərin və onların gətirdiyi təhdidlərə qarşı mübarizə apardığını göstərmək istəyir. Gələcəkdə Şimali Koreyanın müharibədəki rolu ilə bağlı daha çox məlumatın ortaya çıxması, regionun güc balansını dəyişə və müharibənin nəticələrinə ciddi təsir göstərə bilər.

Bələdiyyə seçkilərinin bu günə qədər təyin edilməməsi Seçki Məcəlləsinə ziddir.  "Növbəti bələdiyyə seçkiləri ən geci oktyabr ayının 24 dək təyin edilməli idi" . Sozcu.az xəbər verir ki, bunu Müsavat Partiyasının Məclisinin sədri Arif Hacılı özünün feysbuk səhifəsində yazıb. Arif Hacılı qeyd edib ki, mövcud bələdiyyələrin səlahiyyətləri bu ilin dekabr ayının 23-də başa çatır: "Seçki Məcəlləsinə görə hər 5 ildən bir keçirilməli olan bələdiyyə seçkiləri seçkilərə 60 gün qalmış Mərkəzi  Seçki Komissiyası tərəfindın təyin edilir.  Onsuz da seçkiləri xalqa aidiyyatı olmayan, formal bir prosedura çevirmək istəyən Azərbaycan hakimiyyəti nəinki zaman-zaman mürtəceləşdirdiyi qanunlara əməl etmir, üstəlik bu qanunların kobud surətdə pozulmasının səbəbləri barədə cəmiyyətə izahat verməyi belə lazım bilmir".

Mingəçevir şəhərində ağır yol-nəqliyyat hadisəsi olub. Sozcu.az report-a istinadən xəbər verir ki, "Mercedes Vito" markalı mikroavtobus öncə minik avtomobili ilə toqquşub, sonra idarəetmədən çıxaraq aşıb. Hadisə nəticəsində 1 nəfər - 1989-cu il təvəllüdlü Yasəmən Həbliyeva aldığı xəsarətdən dünyasını dəyişib. Qəza zamanı habelə daha 7 nəfər - 1973-cü il təvəllüdlü Teyyub Məhərrəmov, 1985-ci il təvəllüdlü Elgiz İsmayılov, 1980-ci il təvəllüdlü Əlizamin Musayev, 1990-cı il təvəllüdlü Xəyalə Mirzəyeva, 1983-cü il təvəllüdlü Amil Nəbiyev, 1992-ci il təvəllüdlü Nuranə Mustafayeva və 2020-ci il təvəllüdlü A.Həbliyev xəsarət alıblar. Yaralılar xəstəxanaya çatdırılıb. Onlardan 4 yaşlı A.Həbliyevin vəziyyəti ağır qiymətləndirilir. Digərlərinin vəziyyəti kafi və orta-ağırdır. Qeyd edək ki, ölən və zərərçəkənlər Bakıdan Mingəçevirə qayıdan "Mercedes Vito" markalı mikroavtobusda olan sərnişinlərdir. Faktla bağlı araşdırma aparılır.

Birləşmiş Ştatların B-52 strateji bombardmançı təyyarələri Yaxın Şərq, Mərkəzi Asiya və Şərqi Afrikanı əhatə edən ABŞ Mərkəzi Komandanlığının (CENTCOM) məsuliyyət zonasına gəlib. Sozcu.az-ın xəbərinə görə, bu barədə ABŞ Mərkəzi Komandanlığı (CENTCOM) “X” sosial şəbəkəsində məlumat yayıb. "Maynot Hərbi Hava Qüvvələri bazasında (Şimali Dakota ştatı) yerləşdirilən beşinci qanadın bir hissəsi olan B-52 Stratofortress strateji bombardmançı təyyarələri CENTCOM-un məsuliyyət zonasına gəliblər", - paylaşımda deyilir. ABŞ-nin müdafiə naziri Lloyd Ostin daha əvvəl Yaxın Şərqə əlavə qüvvələrin, o cümlədən raketdən müdafiə imkanları ilə təchiz edilmiş esmineslər, qırıcı və tanker təyyarələrindən ibarət eskadrilya və bir neçə B-52-nin göndərilməsi barədə göstəriş verib.

Milli Hidrometeorologiya Xidməti tərəfindən hava şəraiti ilə bağlı öncədən verilən xəbərdarlığa əsasən noyabrın 3-ü axşamdan başlayaraq 4-ü axşamadək Bakıda və Abşeron yarımadasında, Naxçıvan MR, Qazax-Gəncə, Quba-Qusar, Balakən-Şəki, Dağlıq Şirvan, Mərkəzi Aran, Qarabağ, Şərqi-Zəngəzur və Lənkəran-Astara bölgələrində hava şəraitinin qeyri-sabit keçəcəyi, arabir yağıntılı olacağı, şimşək çaxacağı gözlənilir. Sozcu.az xəbər verir ki, bunu Millli Hidrometeorologiya Xidmətinin rəsmisi Gülnarə Abbasova bildirib. O qeyd edib ki, sözügedən bölgələrin bəzi yerlərində yağıntıların leysan xarakterli intensiv olacağı, dolu düşəcəyi, dağlıq və dağətəyi rayonlarda yağışın qara keçəcəyi ehtimalı var. Xidmət rəsmisinin sözlərinə görə, çaylarda sululuğun artacağı, Böyük və Kiçik Qafqazın, o cümlədən Lənkəran-Astara bölgəsinin bəzi çaylarından qısamüddətli daşqın və sel keçəcəyi gözlənilir. “Bölgələrdə, xüsusilə dağlıq və dağətəyi rayonlarda gözlənilən leysan xarakterli intensiv yağıntıların yarada biləcəyi sel təhlükəsi ilə bağlı əhalini ehtiyatlı olmağa, eyni zamanda hava haqqında verilən məlumatlara, xüsusən xəbərdarlıqlarla bağlı çağırışlara diqqət yetirməyə çağırırıq”.

Moldovada respublikanın hazırkı rəhbəri Maya Sandu ilə ölkənin keçmiş baş prokuroru Aleksandr Stoyanoqlo arasında prezident seçkilərinin ikinci turu başlayıb. Sozcu.az xəbər verir ki, bu barədə Moldova Seçki Komissiyasından məlumat verilib. Məlumata görə, ölkə ərazisində hazırda 1988 seçki məntəqəsi fəaliyyət göstərir. Qeyd edək ki, oktyabrın 20-də keçirilən seçkilərdə namizədlərdən heç biri səs çoxluğunu ala bilməmişdi. Sandu 42.49, Stoyanoqlo isə 25.65 faiz səs toplamışdı.

Tovuzda üç nəfərin xəsarət alması ilə nəticələnən yol-nəqliyyat hadisəsi olub. Sozcu.az xəbər verir ki, bu barədə Daxili İşlər Nazirliyinin Mətbuat Xidmətinin Gəncə Regional Qrupundan bildirilib. Məlumata görə, rayonun Alakol kəndində, "Şevrolet Kruz" markalı avtomobil ağaca çırpılıb. Onlar toy mərasimindən qayıdırdılar. Qəza nəticəsində, 2001-ci il təvəllüdlü N.Qurbanlı, 2000-ci il təvəllüdlü E.Hüseynov və həmyaşıdı Ş.Namazlı xəsarət alıb. Yaralılar xəstəxanaya yerləşdirilib. Faktla bağlı araşdırma aparılır.

Təl-Əvivin Həbimə meydanına toplaşan 300-ə yaxın insan Qəzzada soyqırıma etiraz edib. Sozcu.az xəbər verir ki, bu barədə “Tayms of İsrail” məlumat yayıb. Etirazı solçu qrupların Sülh Tərəfdaşlığı təşkil edib. Onlar “Qəzzada soyqırımı dayandırın” və “Sionizm zəhlətökəndir” kimi şüarlar olan plakatlar qaldırıblar.

Gəncə sakinini öldürməkdə təqsirləndirilən şəxs saxlanılıb. Sozcu.az xəbər verir ki, Gəncə şəhər Baş Polis İdarəsinə Daşkəsən rayon sakini, 1980-ci il təvəllüdlü Şəmistan Süleymanovun kəsici-deşici alətlə qətlə yetirilməsi ilə bağlı məlumat daxil olub. Polis əməkdaşları hadisə yerinə gələrək müvafiq tədbirlər həyata keçirib. Keçirilmiş əməliyyat-axtarış tədbirləri nəticəsində cinayəti törətməkdə şübhəli bilinən 1971-ci il rəvəllüdlü Nəsimi Mustafayev saxlanılıb. Faktla bağlı prokurorluqda araşdırma aparılır.

Türkiyənin Malatya vilayətinin Yaşılyurd rayonunda 3,5 bal gücündə zəlzələ baş verib. Sozcu.az xəbər verir ki, bu barədə AFAD məlumat yayıb. Zəlzələ yerin 15,03 kilometr dərinliyində meydana gəlib.

Zaqatalada dəm qazından zəhərlənən ana və qızın şəhid ailəsindən olduğu məlum olub.  Dəm qazı zəhərlənməsi diaqnozu ilə xəstəxanaya yerləşdirilən Naimə İrapova və qızı, 15 yaşlı Havva İrapova Vətən müharibəsi şəhidi İsmayıl İrapovun anası və bacısıdır.lent.az)

Noyabrın 3-də səhər saat 10 radələrindən 14 radələrinədək COP29 tədbirinə hazırlıq məqsədi ilə paytaxtın Abbasqulu Ağa Bakıxanov, Tbilisi, İnşaatçılar, Nəriman Nərimanov, Mehdi Hüseyn, Teymur Elçin, Niyazi, Neftçilər, Yusif Səfərov, Xətai, Heydər Əliyev, Zərifə Əliyeva, Üzeyir Hacıbəyli, Kövkəb Səfərəliyeva, Zığ şosesi (qismən), İstiqlaliyyət küçəsində nəqliyyatın idarə edilməsi üzrə monitorinqlərin keçirilməsi üçün avtomobillərin hərəkət istiqaməti dəyişdiriləcək. Sozcu.az xəbər verir ki,bu barədə Daxili İşlər Nazirliyinin Mətbuat xidmətindən bildirilib. Sürücülər Hava limanı istiqamətinə alternativ yol kimi 8 Noyabr prospektindən Zığ yoluna keçməklə, Heydər Əliyev prospektində köməkçi yol ilə Bakıxanov qəsəbəsindən keçməklə, eləcə də Ziya Bünyadov prospektindən Qara Qarayev prospektinə və Mikayıl Əliyev küçəsinə keçməklə hərəkət edə bilərlər. Şəhərin mərkəzinə doğru isə sürücülər Mətbuat prospekti, Mikayıl Müşfiq, Abdulla Şaiq, Mirzağa Əliyev və Şəmsi Bədəlbəyli küçələrindən keçməklə daxil ola bilərlər. Bilgəh Kardioloji Sanatoriyasından Hava limanı istiqamətində məhdudiyyət tətbiq olunduğundan sürücülər Maştağa qəsəbəsindən, Albalılıq yolundan Mərdəkan istiqamətinə keçməklə Qala dairəsindən Zığ şosesi istiqamətində hərəkət edə bilərlər. Sürücülərdən monitorinq müddətində qeyd edilən istiqamətlər üzrə nəqliyyat vasitələrinin hərəkətinə tətbiq olunacaq məhdudiyyətləri nəzərə almaları, mümkün qədər ictimai nəqliyyata üstünlük vermələri xahiş olunur.

Sosial şəbəkələrdə SİMA yeni nəsil rəqəmsal imzanın yolu qadağan olunmuş yerlərdən keçən piyadaların cərimələnməsi məqsədilə istifadə olunduğuna dair yanlış məlumatlar həqiqəti əks etdirmir və reallığa uyğun deyil. Sozcu.az xəbər verir ki, bu barədə Report-a SİMA mobil tətbiqinin yaradıcısı olan Rəqəmsal İnkişaf və Nəqliyyat Nazirliyinin tabeliyində fəaliyyət göstərən “AzInTelecom”-dan bildirilib. “SİMA rəqəmsal imza sadəcə hüquqi və biznes proseslərində, istifadəçilərin elektron imza ehtiyaclarını qarşılayaraq onların rəqəmsal mühitdə şəxsiyyətlərini təsdiqləməsi üçün istifadə edilən rəqəmsal həlldir. SİMA rəqəmsal imzanın piyadaların yol hərəkəti qaydalarını pozması ilə bağlı hər hansı nəzarət və ya cərimələmə funksiyası yoxdur”, - məlumata qeyd edilib. Qeyd edək ki, bir neçə gündür sosial şəbəkələrdə yeni nəsil şəxsiyyət vəsiqəsi və ya SİMA imzası olan hər kəsin yeni nəsil təhlükəsiz şəhər kameraları tərəfindən piyada keçidi olmayan yerlərdən keçərkən 40 AZN cərimələnməyə başlaması barədə məlumatlar yayılır.

“TikTok”da bir qadının canlı açaraq övladına qarşı şiddət göstərməsi ilə bağlı görüntülər ortaya çıxıb. Videoya şərh bildirən sosial şəbəkə istifadəçiləri təklif ediblər ki, uşaq qadının əlindən alınsın və qadın analıq hüququndan məhrum edilsin.  Oxşar hadisələr gün keçdikcə artır. Müxtəlif sosial platformalarda uşaqlara valideynlərin istər psixoloji, istərsə də fiziki şiddət göstərməsinin canlı şahidi oluruq. Uşağına şiddət göstərən, təhqir edərək nalayiq ifadələr işlədən, onu siqaret, alkoqollu içki içməyə məcbur edən valideynləri görmək artıq sıradan hala çevrilib. Bəs bunların qarşısını necə almaq olar? Hüquqşünas Ellada Bayramova məsələ ilə bağlı “Yeni Sabah”a bunu deyib: “Belə şəxslər uşaq vaxtlarında gördüyü davranışları öz övladlarına tətbiq edirlər. Buna travma kimi yanaşanlar da var. Əslində, travma yoxdur. Belə adamların, anaların sevmə forması budur. Qanunvericilikdə həmin qadınların cəzalandırılması məsələsinə gəlincə, Azərbaycanda sosial qurumlar yüksək səviyyədə işləyə bilmir. Lap o anaya hər hansı bir cəza tətbiq edilsə, uşağı əlindən alınarsa, uşaq evinə verilsə, vəziyyəti daha da pisləşəcək. Çünki Azərbaycanda bu sahənin institutu yoxdur.  Oxşar hadisələrə və bu cür davranış sərgiləyən valideynlərə münasibətim neqativdir. Onların uşaqlığının necə keçdiyinə nəzər salınmalıdır. Ata-ana uşağa necə münasibət göstərib, hansı şərtlər altında böyüyüb...  Bütün bunları araşdırmadığımız üçün cəmiyyət olaraq hazır deyilik. Onları çəkib ifşa etmək olar. Amma yenə gizlində öz bildiklərini edəcəklər. Bəlkə də ana bunu anlaqlı etmir. Yəni düşüncəsi ora qədərdir. Soruşsanız, təbii ki, uşağını sevir. Onsuz da bu dünyada nə baş verirsə, ən doğmalarımız edir. Əsas düşmənimiz evimizdə olan ana-ata, bacı-qardaşdır. Çünki onların bizə edə biləcəyini heç kim ağlına gətirə bilməz”. Hüquqşünas uşağı valideynin əlindən almağı düzgün üsul saymır:   “Cəza olaraq, hər hansı inzibati cərimə yazıla bilər. Amma o uşaq evdən çıxsa, daha betər günə düşəcək. Uşaq evlərində vəziyyət olduqca acınacaqlıdır. Təəssüf ki, belə şeylər var. Burada əxlaq faktorları çox güclüdür. Hər hansı bir qanunvericilik, psixoloji yanaşmalar əxlaq faktorlarına söykənmirsə, orada heç bir nəticə əldən etməkdən söhbət gedə bilməz”.

Zaqatala rayonunun Əliabad qəsəbəsində ana və qızı dəm qazından zəhərləniblər. Sozcu.az xəbər verir ki, 1983-cü il təvəllüdlü Nayimə İrapova və 2009-cu il təvəllüdlü qızı Havva İrapova dəm qazından zəhərlənərək xəstəxanaya yerləşdiriliblər. Faktla bağlı araşdırma aparılır.

Xətai rayonu, 8 Noyabr prospekti ilə Mərkəzi Bulvar küçəsinin kəsişməsində təmir işləri aparılır. Sozcu.az xəbər verir ki, bu barədə DİN-in Nəqliyyatı İntellektual İdarəetmə Mərkəzi məlumat yayıb. Bildirilib ki, nəqliyyat vasitələrinin təhlükəsizliyini təmin etmək məqsədilə yol polisi əməkdaşları tərəfindən mərkəz istiqamətində qısamüddətli məhdudiyyət tətbiq edilib.

Almaniya vətəndaşı Cəmşid Şarməhdin edamından sonra bu ölkənin Xarici İşlər Nazirliyi Almaniya vətəndaşlarına çağırış edərək onlardan İranı tərk etmələrini istəyib. Sozcu.az xəbər verir ki, bu barədə Alman XİN-nin sözçüsü Kristofer Burger məlumat yayıb. "Almaniya uzun müddətdir İrana səyahətlə bağlı xəbərdarlıq edib və öz vətəndaşlarından bu ölkəni tərk etməyi istəyib, ona görə ki, Tehran Almaniya vətəndaşlarını girov götürür",- o bildirib. Burger həmçinin almaniyalılara İrana səfərər etməməyi taöışırıb. Qeyd edək ki, oktyabrın 29-da casusluq və terrorda günahlandırılan İranəsilli Almaniya vətəndaşı 68 yaşlı Cəmşid Şarməhd Tehranda edam edilib. Bundan sonra Almaniya Tehrandakı səfirini geri çağırıb və İranın Almaniyanın 3 şəhərindəki konsulluqlarını bağlayıb.

Dünya bazarlarında "Azeri Light" (CIF) markalı Azərbaycan nefti bahalaşıb. Sozcu.az xəbər verir ki, Azərbaycan neftinin 1 barelə olan qiyməti 0,95 ABŞ dolları və ya 1,28% artaraq 74,80 ABŞ dollarına bərabər olub. Azərbaycan neftinin öncəki qiyməti 73,85 dollar təşkil edib.

Əksər banklarda təklif olunan biznes kreditlərinin faizləri yüksək, şərtləri isə ağırdır. Sahibkarların bir çoxu biznes kreditlərinin əlçatan olmamasından şikayətlənir. Amma bankların kredit şərtləri fərqlidir, əsasən kiçik, yaxud orta sahibkarlıq subyektləri üçün nəzərdə tutulub.  Mövzu ilə bağlı Yenisabah.az-a danışan iqtisadçı-ekspert Rəşad Həsənov bildirib ki, sahibkarlıq subyektləri kredit müraciəti zamanı banklara düzgün uçot göstəriciləri təqdim etmirlər: “Ümumiyyətlə, Azərbaycanda maliyyə əlçatanlığı, kreditlərə çıxış imkanları elə də əlçatan deyil. Sorğular da onu göstərir ki, sahibkarlar üçün ən vacib müşkül məhz budur.  Faktiki olaraq, obyektiv və qeyri-obyektiv səbəblər var. Obyektiv səbəblər ondan ibarətdir ki, bank sektoru mövcud bazarda işləməkdə çətinliklərlə üzləşir. Çünki gəlirlər və biznes növlərinin bir çoxu leqal deyil. Bəzi sahələrdə isə ümumiyyətlə uçot aparılmır. Belə bir vəziyyətdə sahibkarın maliyyə vəziyyətini müəyyən etmək çox çətin olur. Digər tərəfdən, regionlarda girov-təminat realizə edilə bilmir”.  Ekspert qeyd edib ki, bu istiqamətdə dövlət bir sıra yumşaldıcı addımlara təşviq etməlidir: “Xüsusilə, 2015-ci ildən sonra yaranmış vəziyyətlə əlaqədar banklar daha ehtiyatlı davranmağa çalışdı. Əvvəlki dövrlərdə hətta “qara mühasibatlıq” əsasında banklar kreditlər verirdi. Lakin sonralar bu variantda problemlər ortaya çıxdı və banklar belə üsullardan əl çəkdi. Əlbəttə, müəyyən mexanizmlərin təkmilləşdirilməsi mümkündür. Düşünmürəm ki, əsas problem bankların hansısa sadələşdirməyə getməsidir. Çünki banklar özəl təşkilatlardır və öz pullarını daha etibarlı müştərilərə vermək istəyir. Yaxşı olar ki, dövlət də təminat mexanizmlərini təkmilləşdirsin. Bu istiqamətdə bir çox addımlar atmaq olar. Müxtəlif üsullarla dövlət bu istiqamətdə yumşalmaları təşviq edə bilər”.

Salyanda baş verən yol qəzasında bir ailənin dörd üzvü xəsarət alıb. Sozcu.az xəbər verir ki, hadisə bu gün səhər saatlarında Ələt-Astara magistral yolunun rayon ərazisindən keçən hissəsində, Hacıoğlu istirahət mərkəzinin yaxınlığında qeydə alınıb. Belə ki, hərəkətdə olan “Hyundai” markalı avtomobil anidən idarəetməni itirərək yolun kənarına aşıb. Qəza nəticəsində avtomobildə olan bir ailənin üzvləri, Masallı rayon sakinləri, 1987-ci il təvəllüdlü Bağırova Könül Ərəstun qızı, 1989-cu il təvəllüdlü Bağırov Elşən Ərəstun oğlu, 1993-cü il təvəllüdlü Bağırova Pərvin Vüqar qızı və 2023-cü il təvəllüdlü Bağırova Ruqayyə Elşən qızı müxtəlif dərəcəli xəsarətlər alıbıar. Yaralılar Salyan Mərkəzi Rayon Xəstəxanasına yerləşdirilib. Faktla bağlı araşdırma aparılır.

Etibarnamə ilə avtomobil almaq Azərbaycanda alqı-satqı prosesində daha sadə və ucuz üsul kimi qəbul edilir. Lakin bu yol alıcını birbaşa avtomobilin hüquqi sahibi etmədiyi üçün müəyyən riskləri də özü ilə gətirir. Etibarnamə yalnız avtomobildən istifadə və idarəetmə hüququnu verir, lakin hüquqi mülkiyyət tam şəkildə alıcıya keçmir. Bu vəziyyət avtomobilin əsl sahibi ilə problemlərin yaranmasına, etibarnamənin ləğv edilməsi və ya məhkəmə mübahisələri kimi ciddi hüquqi çətinliklərə səbəb ola bilər. Maraqlıdır, etibarnamə ilə avtomobil alanlar nələrə diqqət etməlidir? Məsələ ilə bağlı Baş Dövlət Yol Polis İdarəsindən bildirilib ki, etibarnamə ilə avtomobil alan şəxs faktiki olaraq avtomobilin sahibi sayılmır: Nəqliyyat vasitəsinin qeydiyyat şəhadətnaməsində qeyd olunan sahibi vəfat etdikdə, onun əvvəlcə verdiyi etibarnamə və ya baş etibarnamə avtomatik olaraq qüvvədən düşür. Bu halda, vəfat edən şəxsin miras hüququ çərçivəsində vərəsəlik prosesi başlanır və 6 ay tamamlandıqdan sonra vərəsəlik hüququ təsdiqlənir. Vərəsəlik sənədinə əsasən, nəqliyyat vasitəsinin qeydiyyatı ilkin olaraq vəfat edən şəxsin həyat yoldaşının adına keçirilir. Əgər həyat yoldaşı yoxdursa, mülkiyyət hüququ həmin şəxsin övladlarına—oğlu və ya qızına keçir. Qeydiyyat prosesi başa çatdıqdan sonra bu şəxslər nəqliyyat vasitəsinə dair yeni etibarnamə verə və ya vasitənin mülkiyyət hüququnu alıcı adına rəsmiləşdirə bilərlər. Mütləq şəkildə altı ay tamam olmalıdır, həmin müddətdən sonra nəqliyyat vəsitəsi həyat yoldaşına və ya ailənin digər üzvlərinə verilir. Hüquqşünas Şamil Paşayev bildirib ki, etibarnamə avtomobili istifadə və idarəetmə hüququ versə də, hüquqi mülkiyyət hüququ tam şəkildə alıcıya keçmir. Bu isə alıcının avtomobil üzərində tam hüquqa malik olmaması deməkdir, yəni avtomobilin əsl sahibi istədiyi zaman etibarnaməni ləğv edə və ya mülkiyyətin hüquqi aspektlərini dəyişdirə bilər: “Nəzər almaq lazımdır ki, etibarnamə ilə alqı-satqı predmenti deyil. Etibarnamə şəxsin hüquqlarını digər şəxsə etibar etməsi ilə bağlı bir haldır. Etibarnamə ilə hansısa maşın və ya obyekt alınırsa, həmin şəxs vəfat etdikdə avtomobil kimin adınadırsa, onun vərəsələrinə düşür. Bunun “generalnı” və ya baş etibarnamə olmasının hər hansı bir əhəmiyyəti yoxdur. Şəxs öldükdən sonra etibarnamə hüquqi qüvvəsini itirir. Ölmüş adamın adına olan etibarnamə ilə də hərəkət etmək mümükün deyil”.(ajans.az)