Nazirlər Kabineti “İstismar olunan minik avtomobillərinin Azərbaycan Respublikasının gömrük ərazisinə gətirilməsinin məhdudlaşdırılması haqqında” Qərar qəbul edib. Qərarda qeyd edilir ki, “Zavod buraxılış tarixinə görə yaşı 10 ildən çox olan minik avtomobillərinin (raritet minik avtomobilləri və gömrük ərazisinə müvəqqəti gətirilən minik avtomobilləri istisna olmaqla) Azərbaycan Respublikası ərazisinə gətirilməsi məhdudlaşdırılsın”. Maraqlıdır, yeni qaydanın tətbiqi avtomobil idxalında gömrük rüsumlarının azalmasına səbəb ola bilərmi? Ümumiyyətlə, bu məhdudiyyət avtomobil bazarına hansı formada təsir edəcək? Mövzu ilə bağlı açıqlama verən nəqliyyat məsələləri üzrə ekspert Eldəniz Cəfərin sözlərinə görə, yay fəslində bəzi avtomobillər bahalaşa bilər: “Nazirlər Kabinetinin yeni qərarı ölkədə avtomobil parkının yenilənməsinə və ekeoloji vəziyyətin yaxşılaşdırılmasına yönlənib. Belə ki, yaşı 10-dan çox olan avtomobillərin sayı ölkəmizdə həddindən çoxdur. Son illər ərzində Gürcüstandan Azərbaycana ömrünü başa vurmuş, yararsız, metallom daşınıb. Bunun qarşısı qismən alınacaq. Həmçinin, ola bilər ki, bu qərarın verilməsi yeni bir qərarı şərtləndirir. Yəni mümkündür ki, Azərbaycan Avro-4 standartlarından Avro-5 standartına keçid etsin. Onu da qeyd edim ki, bu qərardan sonra yay mövsümündə ikinci əl avotomobil bazarında köhnə maşınların qiyməti 2 faiz yüksələ bilər. Bununla yanaşı, qeyd etmək istərdim ki, qərarın qüvvəyə minmə tarixi 30 gün sonra üçün nəzərdə tutulub. Hazırda vətəndaşlarımızın xarici ölkələrdən aldığı minlərlə avtomobil Yaponiya, Cənubi Koreya, ABŞ kimi ölkələrdən gətirildiyi üçün yoldadır. Oradan da avtomobillərin gəmi ilə gətirilməsi minimum 2-3 ay vaxt aparır. Bəlkə də dövlət sosialyönümlü siyasətini nəzərə alaraq 30 gün müddətini 60 günədək uzatsa, yaxşı olar. Əks təqdirdə həmin avtomobillər Gürcüstan limanında qala, vətəndaşlarımıza maddi ziyam dəyə bilər”. Ekspert mühərrik həcmi kiçik olan avtomobillər üçün gömrük rüsumlarının azaldılmasının uyğun olduğunu da vurğulayıb: “Yeni qaydanın tətbiqindən sonra ölkəmizə idxal olunan yeni avtomobillərin gömrük rüsumlarının azaldılması yaxşı olardı. Dövlət artıq bu istiqamətdə müəyyən addımlar atıb. Belə ki, ölkəmizə idxal olunan hibrid avtomobillər və elektromobillər üçün güzəştlər tətbiq edilib. Elektromobillər ümumiyyətlə bütün gömrük rüsumlarından azaddır, hibrid  avotomobillər isə idxal zamanı ƏDV-dən azad edilib. Düşünürəm ki, gələcəkdə yeni və mühərrik həcmi kiçik olan avotomobillər üçün müəyyən güzəştlərin tətbiq edilməsi avtomobil bazarına müsbət təsir edərdi”. //Sfera.az

"Bu, Qərbin müasir silah sistemləri ilə təchiz olunduğu ən güclü Ukrayna ordusunun öz ölkəsinin rusiyalı işğalçılardan azad etməyə başlayacağı tarixi gün olacaq..." Alman KİV-ləri Ukraynanıni əldə etdiyi  NATO-nun ən müasir texnikasını təsvir edib Rusiya hakimi Vladimir Putin Ukraynanın Qərb müttəfiqlərinin vəd etdiyi bütün zirehli texnikasının alacağı "X" günündən qorxur. Bu, "Ukrayna üçün tarixi gün olacaq". Sozcu.az xəbər verir ki, bu barədə Almaniyanın "Bild" nəşri yazıb. Nəşrin məlumatına görə, ötən bazar günü Ukraynaya onlarla alman döyüş tankları, o cümlədən 20-dən artıq ən müasir "Leopard-2A6" və 40-dək "Marder" maşınları gətirilib. İlkin olaraq Ukrayna ekipajı altı həftə ərzində Almaniyada alman və portuqal ordularının ehtiyatında olan silah sistemləri üzərində məşq edib. "Lakin Ukraynaya öz ölkəsini rusiyalı qəsbkarlardan azad etmək üçün lazım olanları Almaniya, nəhayət, tədarük edən tək ölkə deyil", - məlumatda deyilir. Son bir neçə gündə həmçinin Böyük Britaniya Ukraynaya vəd edilən 14 "Çellencer-2" döyüş tanklarını tədarük edib. Bundan başqa, Amerikanın vəd edilən ilk 90 ədəd "Strayker" döyüş maşınları və bir çox digər ağır silah gətirilib. Daha sonra 100 ədəd "Bredli" zirehli transportyorları və İsveçin 50 ədəd CV90 döyüş maşınları gətiriləcək. Bundan başqa, USQ 40 ədəd fransız AMX-10RS kəşfiyyat tanklarını əldə edəcək. "Beləliklə, "X" gününə geriyə hesablama başlanır. Bu, Qərbin müasir silah sistemləri ilə təchiz olunduğu ən güclü Ukrayna ordusunun öz ölkəsinin rusiyalı işğalçılardan azad etməyə başlayacağı gün olacaq", - nəşr yazır. Münhen Təhlükəsizlik üzrə Konfransının elmi əməkdaşı, hərbi ekspert Niko Lanqe güman edib ki, USQ mayın əvvəli və ya ortasında güclü əkshücuma keçəcək. Bu zamanadək ukraynalılar üçün onların əldə etdiyi silah sistemlərindən istifadə edilməsi üzrə təlimin iki mühüm mərhələsini başa çatdıracaq. "Tanklar və zirehli transportyorlar digər silah sistemləri ilə birgə istifadə edilməlidir", - Lanqe izah edib və dəqiqləşdirib ki, o, artilleriya, pilotsuz uçuş aparatları, minalardan təmizləmə sistemləri və aviasiyanı nəzərdə tutur,  onlar Qərbin hərbi maşınları ilə birgə USQ tərəfindən Rusiya qüvvələrinin maksimal olaraq məhv edilməsi üçün istifadə etməlidir. Lanqe deyib ki, Almaniyanın "Leopard-2A6" tankı Rusiya tanklarından 95 faiz üstündür. O, düşməni hətta hərəkətdə olarkən və ya gecə vaxtı 5 km-dək məsafədə məhv edə bilər. Rusiyanın əksəriyyət tankları isə yalnız dayandığı yerdən və yalnız 1-2 km məsafəyə dəqiq atəş aça bilir. "Sadə dildə desək, əgər ukraynalılar alman "vəhşi pişiklərindən" maksimal olaraq istifadə edəcəksə, o zaman "Leopard-2A6" Amerikanın "Abrams"larının 1991-ci ildə Fars körfəzində əldə etdiyi uğuru təkrarlaya bilər. O zaman amerikalılar Rusiyanın bu gün də istifadə eydiyi analoji sovet tanklarına qarşı bütün tank döyüşlərində qalib gəlib. Təkcə Basra yaxınlığında 27 fevral 1991-ci ildə döyüş zamanı Amerika bölmələri İraqın 186 tankını məhv edib, özləri isə cəmi 4 "Abrams" tankı itirib", - Lanqe qeyd edib.

Azərbaycan ərazisində hər hansı xarici qüvvələrin olması haqqında İran tərəfinin ittihamı əsassızdır və tamamilə qəbuledilməzdir. Ümumiyyətlə, Azərbaycan ərazisində kənar elementlər mövcud deyildir. Sozcu.az xəbər verir ki, bu barədə Azərbaycan Müdafiə Nazirliyinin (MN) açıqlamasında deyilir. "İran İslam Respublikası ordusunun Quru Qoşunlarının Komandanı Kiyumərs Heydəri tərəfindən Azərbaycana münasibətdə çirkin iftira və böhtan xarakterli fikirlər səsləndirilmişdir. K.Heydəri öz cəfəng fikirlərində Azərbaycanda guya “sionist” qüvvələrin olması və 44 günlük Vətən müharibəsində Azərbaycanın Suriyadan gətirilən İŞİD terrorçularından istifadə etdiyini və onların hələ də ölkə ərazisində olduğunu iddia edir. O eyni zamanda İran tərəfindən Ermənistan ilə sərhəddə dəyişikliklərə icazə verilməyəcəyini deyir. K.Heydəriyə xatırlatmaq istərdik ki, Ermənistan 30 il ərzində Azərbaycan ərazilərini işğal altında saxlamışdır. Bu hərbi təcavüz nəticəsində Azərbaycan-İran dövlət sərhədinin 137 kilometrlik hissəsi də işğal edilmişdi. Lakin İran tərəfi bir dəfə də olsun Ermənistana münasibətdə ittihamedici açıqlama verməmişdir. Əksinə bu dövr ərzində İran-Ermənistan qardaşlığı daha da güclənmişdir. Bu gün də heç kimə sirr deyil ki, Ermənistanın dünyada iki əsas müttəfiqi varsa, onlardan biri Fransa, ikinci isə İrandır", - MN bəyan edib. Açıqlamada deyilir ki, Azərbaycan bütün ölkələrin ərazi bütövlüyünü dəstəkləyir və dövlətlərin daxili işlərinə qarışmır: "44 günlük Vətən müharibəsində Azərbaycanın guya İŞİD terrorçularından istifadə etməsinə dair ittihama cavab olaraq bildiririk ki, şanlı Azərbaycan ordusu təkbaşına torpaqlarımızı işğaldan azad edərək zəfər salnaməsi yazmışdır. Bu iddia cəfəng ittiham və iftiradan başqa bir şey deyildir. Bu ittihamın məhz terrorizmi dəstəkləyən və adı dünyanın müxtəlif ölkələrində terror əməllərinin törədilməsində keçən dövlətin yüksək çinli hərbçisi tərəfindən irəli sürülməsi istehza və gülünc doğurur".

Ukrayna ordusu gün ərzində Kupyansk, Liman, Baxmut, Adveyev və Marinsk istiqamətlərində Rusiya ordusunun 47 hücumunu dəf edib. Sozcu.az xəbər verir ki, bu barədə Ukrayna Baş Qərargahı məlumat yayıb. Bildirilib ki, Ukrayna müdafiəçiləri əzmlə Baxmutun müdafiəsini təmin edirlər.

İstanbul-Sinqapur reysini həyata keçirən Türk Hava Yollarına (THY) məxsus “Boinq” sərnişin təyyarəsinin kabin heyətinə hücum edilib. Sozcu.az Türkiyə mediasına istinadən xəbər verir ki, təyyarə Hindistanın Çennai hava limanına məcburi eniş edib. Belə ki, təyyarə Hindistan hava məkanına çatdığı zaman sərxoş olduğu aşkarlanan sərnişinlərdən biri kabin heyəti ilə mübahisə etməyə başlayıb. O, heyətə hücum edib, sonra isə özünə xəsarət yetirməyə başlayıb. Təyyarənin kapitan pilotu Çennai hava limanı ilə əlaqə saxlayıb və vəziyyətlə bağlı məlumat verib. Polis qruplarından dəstək istəyib. Nəticədə təyyarə Hindistanın Çennai hava limanına məcburi eniş edib. Təyyarədə insident törədən sərxoş sərnişin isə nəzarətə götürülüb.

ABŞ Dövlət katibi Entoni Blinken “Voll Strit Jurnal”ın əməkdaşı Evan Qerşkoviçin həbsi fonunda Rusiyada qalan Amerika vətəndaşlarını dərhal ölkəni tərk etməyə çağırıb. Sozcu.az xəbər verir ki, bu barədə dövlət katibinin bəyanatında deyilir. "Dövlət Departamentinin ən yüksək prioriteti ABŞ vətəndaşlarının xaricdəki təhlükəsizliyidir. Biz Rusiyada ABŞ vətəndaşlarını təhdid edən təhlükə ilə bağlı ciddi xəbərdarlıqlarımızı bir daha təkrar edirik. Rusiyada yaşayan və ya oraya səyahət edən ABŞ vətəndaşları dərhal ölkəni tərk etməlidirlər”, - deyə bəyanatda bildirilir.

Son vaxtlar ölkəmizdə dollar tələb artıb. Artım Mərkəzi Bankın təşkil etdiyi sonuncu hərracda da müşahidə edilib. Sozcu.az Xəzər TV-yə xəbər verir ki, xarici valyuta tələbi 96, 3 milyon dollar olub. Bu əvvəlki hərracdan 48,4 milyon dollar çoxdur. Millət vəkili Vüqar Bayramov deyir ki , Mərkəzi Bankın təşkil ediyi sonuncu hərracda xarici valyuta tələbi 96.3 milyon dollar olub. Onun sözlərinə görə əvvəlki hərracda sifarişin həcmi 47.9 milyon dollar təşkil edib. O, hesab edir ki, dollara tələbin optimallaşdırılması üçün Mərkəzi Bank tərəfindən yaxın günlərdə yenidən hərracın təşkil edilməsi vacibdir. Bəs bu artım tendensiyası manat üçün risk yaradırmı? Vüqar Bayramov əlavə edib ki, idxal həcmi və xarici səfərlərin intensivliyini nəzərə aldıqda yaz aylarında dollara tələbin kəskin azalacağı gözlənilmir.

VHP deputata qarşı terroru pislədi: Dövlətimizə, istiqlalımıza qarşı istənilən təhdidə lazımi cavab veriləcək! Vətəndaş Həmrəyliyi Partiyası Milli Məclisin deputatı Fazil Mustafaya qarşı sui-qəsd hadisəsi ilə bağlı bəyanat verib. Bəyanatda deyilir: “28 mart 2023-cü il tarixdə saat 21:51-də Milli Məclisinin deputatı Mustafa Fazil Qəzənfər oğluna yaşadığı evin qarşısında – “Kalaşnikov” konstruksiyalı avtomat silahından atəş açılaraq terror aktı törədilib. Sui-qəsd nəticəsində Fazil Mustafa iki güllə yarası alıb. Vətəndaş Həmrəyliyi Partiyası baş vermiş terror aktını qətiyyətlə pisləyərək, millət vəkilinə şəfalar diləyir. Azərbaycan Respublikasının Ali qanunverici orqanının üzvü, Milli Məclisinin deputatına qarşı terror siyasi mahiyyət etibarı ilə Azərbaycan dövlətinə qarşı edilən terrordur. Əminik ki, ən yaxın vaxtda terror aktını həyata keçirənlər tapılacaq və hadisəyə hüquqi-siyasi qiymət veriləcək. VHP eyni zamanda bəyan edir ki, heç bir güc Azərbaycan Respublikası ilə hədə və terror dili ilə danışa bilməz. Azərbaycanın bütün siyasi qüvvələri və hər bir vətəndaş milli maraqlar və dövlətçilik məsələsində bir yumruq kimi birdir. Dövlətimizə, istiqlalımıza qarşı istənilən təhdidə lazımi cavab veriləcək!”

Rusiyanın Sverdlovsk vilayətinin Pelım şəhərində qaz kəmərində partlayış, ardınca isə yanğın baş verib. Sozcu.az xəbər verir ki, bu barədə TASS məlumat yayıb. Hadisə nəticəsində ölən olmayıb. Partlayışın səbəbi açıqlanmır.

Ukraynanın müdafiə naziri Aleksey Reznikov ölkəsinin aprel və may aylarında bir neçə istiqamətdə hücuma keçə biləcəyini açıqlayıb. Nazir bu haqda Estoniyanın İctimai Yayım (ERR) televiziyasına müsahibə verən zaman danışıb. “Hücum bir neçə istiqamətdə planlaşdırılır. Bu, ən uyğun anın nə vaxt olacağına və necə qərar verəcəklərinə bağlıdır”. Hücumun həm də hava şəraitindən asılı olduğunu deyən Reznikov, “Yazda yer çox nəm olur. Yalnız izlənən avtomobillərdən istifadə edilə bilər. Düşünürəm ki, aprel və may aylarında bunu görəcəyik. Əminəm ki, biz Kiyevdə, Çerniqovda, Sumidə, Xarkovda, Xersonda olduğu kimi, müvəqqəti işğal olunmuş torpaqlarımızı da azad edəcəyik”, - deyib.

Ukrayna Silahlı Qüvvələri Baxmut yaxınlığında uğurlu əməliyyat keçirib. Bu barədə Böyük Britaniya kəşfiyyatının yaydığı məlumatda bildirilib. Məlumata görə, Ukrayna hərbçiləri rusları Baxmutun təchizat xətlərinin birindən geri itələyiblər. Buna baxmayaraq, son həftələrlə müqayisədə rus qoşunlarının hücumlarının sayı azalsa da, şəhər uğrunda döyüşlər davam edir. “Ukrayna Silahlı Qüvvələrinin əsas nailiyyətlərindən biri “Vaqner” qrupunun rus döyüşçülərinin 0506 saylı marşrutdan geri çəkilməsi əməliyyatı olub. Bu ikinci dərəcəli kənd yolu ukraynalı müdafiəçilər üçün mühüm təchizat xətti olub. “Vaqner qrupu əvvəllər marşrutun bir neçə yüz metrliyində idi”, – məlumatda deyilib. Qeyd edək ki, bu gün Ukrayna Baş Qərargahı Rusiya ordusunun Baxmut istiqamətində qismən uğur əldə etdiyi barədə məlumat yayıb.

“ABŞ Rusiya ordusunun Ukraynada 220,000 hərbi qulluqçu itirdiyini düşünür”. Bu barədə Britaniyanın müdafiə naziri Ben Uolles bildirib. Nazir ABŞ tərəfinin təqdim etdiyi bu rəqəmə həm ölən, həm də yaralı hərbçilərin daxil olduğunu deyib. O, bu barədə İsveç müdafiə naziri Paul Conson ilə görüşdən sonra keçirilən birgə mətbuat konfransında danışıb. Görüşün əsas hissəsi İsveç və Finlandiyanın NATO-ya daxil olmasına həsr olunub.

ABŞ-ın 2022-2024-cü illərdə dünyada “demokratiyaya dəstək” üçün xərcləri 9,5 milyard dollar təşkil edəcək. Bu barədə Ağ Evin yaydığı bəyanatda deyilir. “2022, 2023 və 2024-cü maliyyə illərində Birləşmiş Ştatlar bütün dünyada demokratiya, insan haqları və yaxşı idarəçiliyi dəstəkləmək üçün təxminən 9,5 milyard dollar sərmayə qoyub və yatırmaq niyyətindədir”,- deyə məlumatda bildirilir. Bundan əvvəl ABŞ prezidenti Co Bayden “Demokratiya Zirvəsi” çərçivəsində ABŞ hökumətinin dünyada demokratiyanın yenilənməsi üçün 690 milyon dollar sərmayə qoyacağını açıqlayıb.

Sabirabadda meyiti tapılan 8 yaşlı uşağın əmisi danışıb. Səyyub Cəfərov qeyd edib ki, 2015-ci il təvəllüdlü Cəfərov Siyasət meyiti tapılan gün saat 13:00-a qədər məktəbdə olub. “Daha sonra əmim gilə oynamaq üçün gəlib. Əmim heyvanları otlamağa aparanda, uşağın yolun qırağında uzandığını görüb. İlk öncə uzandığını düşünüb, daha sonra öldüyünü anlayıb. Heç bir xəstəliyi olmayıb. Bugünədək dərman belə içməyib. Bizim heç kimlə düşmənçiliyimiz yoxdur. Sadəcə öyrənmək istəyirəm, bəlkə kimsə düşmənçilik etmək istəyir”, - deyə S.Cəfərov qeyd edib. Daha ətraflı Baku TV-nin süjetində:

"Rusiya ona qarşı tətbiq edilən sanksiyaların sayına görə çempiondur..." "Kreml diktatoru texnoloji, kadr və maliyyə suverenliyini təmin etməyə çağırış edib..." Bundan öncə Kreml diktatoru sanksiyaların Rusiyaya yalnız fayda verəcəyini bəyan edib... Rusiya prezidenti Vladimir Putin bəyan edib ki, Ukraynaya tammiqyaslı hərbi müdaxilədən sonra tətbiq edilən sanksiyalar Rusiya iqtisadiyyatına neqativ təsir göstərə bilər. Sozcu.az xəbər verir ki, bu barədə "qazeta.ru" nəşri məlumat yayıb. O, hökumətin iclasında, guya, iqtisadi uğurlardan danışıb. Kreml diktatoru iclas iştirakçılarını zəifliyə yol verməməyə və "texnoloji, kadr və maliyyə suverenliyini" təmin etməyə çağırış edib, çünki "Rusiya iqtisadiyyatına tətbiq edilən qeyri-legitim məhdudiyyətlər ortamüddətli perspektivdə ona neqativ təsir göstərə bilər". Maraqlıdır ki, ötən ilin mart ayında Putin bəyan edib ki, sanksiyalar Rusiyanın "yalnız xeyrinə olacaq". Terrorçu dövlətin prezidenti həmçinin deyib ki, Rusiya iqtisadiyyatı 2022-ci ilin iyul ayından, guya, pozitiv dinamika göstərir, lakin artım trayektoriyasına qayıdış məmurları rahat etməməlidir. Bundan başqa, prezident aşağıdakı tezisləri ifadə edib: - daxili tələbin dinamikası ilə Rusiya Bankının inflyasiya üzrə oriyentirləri arasında uyğunluq olmalıdır; - işgüzar fəallığı çətinləşdirən struktur məhdudiyyətlərinin ardıcıl olaraq aradan qaldırılmasını həyata keçirmək lazımdır; - əsas tərəfdaşlar ilə xarici ticarət dövriyyəsinin həcmi, o cümlədən logistikanın yenidən qurulması sayəsində artır; -Uzaq Şərq limanlarında malların yığılıb qalması problemi həll edilib; - Rusiyanın emal sənayesinin dinamikası aşağı səviyyədə qalmaqdadır; - Rusiya yaşayış evlərinin istifadəyə verilməsi və avtomobil yollarının təmirində rekord həcmlərə çatıb, diktator bu tempi saxlamağı əmr edib; - BAM-da işlərin növbəti mərhələsi başa çatıb. Bir gün öncə Rusiyanın baş naziri Mixail Mişustin bəyan edib ki, Rusiya ona qarşı tətbiq edilən sanksiyaların sayına görə çempiondur. Lakin o, qeyd edib ki, Rusiya hökyməti ölkə iqtisadiyyatının artımı üçün işləməkdə davam edir və sanksiyalar təzyiqinə rəğmən, ölkədə artım müşahidə edilir. Qərb dövlətləri Rusiyanın Ukraynaya qarşı tammiqyaslı hərbi müdaxiləsindən sonra ona qarşı çoxsaylı sanksiya məhdudiyyətlərini tətbiq edib.

“Keçən il sertifikasiyadan kəsilmiş müəllimlər yenidən uğursuz olsalar, onların əmək müqaviləsinə xitam verilə bilər”. Sozcu.az xəbər verir ki, bunu Təhsil İnstitutunun direktoru Rüfət Əzizov təkrar sertifikasiyada iştirak edəcək müəllimlər üçün təlimlərin təşkili ilə bağlı keçirilən brifinqdə deyib. O bildirib ki, bu, güzəşt tətbiq edilmiş müəllimlərə şamil deyil: “Kimlərə güzəşt nəzərdə tutulduğu qaydalarda öz əksini tapıb”. Rüfət Əzizov eyni zamanda, deyib ki, ötən il müxtəlif səbəblərdən sertifikasiya imtahanında iştirak etməyənlər də təkrar sertifikasiyada iştirak edəcəklər: “Xüsusi səbəblər olubsa, müvafiq qaydada bizə müraciət edə bilərlər. Əgər müəllimin ötənilki sertifikasiyada iştirak etmədiklərinə dair səbəbi təsdiq edən sənəd yoxdursa, təkrar sertifikasiyadan kəsildikləri halda əmək müqavilələrinə xitam verilə bilər”./Sfera.az

Türkiyənin Adana şəhərində 4,5 bal gücündə zəlzələ baş verib. Sozcu.az xəbər verir ki, bu barədə Türkiyə Fövqəladə Halların İdarə Olunması Agentliyi (AFAD) məlumat yayıb. Zəlzələ yerin 9,38 kilometr dərinliyində qeydə alınıb. Dağıntılar və xəsarət alanlar barədə məlumat verilməyib.

Zavod buraxılış tarixinə görə yaşı 10 ildən çox olan minik avtomobillərinin (raritet minik avtomobilləri və gömrük ərazisinə müvəqqəti gətirilən minik avtomobilləri istisna olmaqla) Azərbaycan Respublikası ərazisinə gətirilməsi məhdudlaşdırılıb. Sozcu.az xəbər verir ki, bununla bağlı Baş nazir Əli Əsədov qərar imzalayıb.Bu qərar dərc edildiyi gündən 30 (otuz) gün sonra qüvvəyə minir.

Zamin Salayevin ev dustaqlığına buraxılması ilə bağlı vəsatətə baxılacaq . Martın 30-da saat 14:00-da Qaradağ rayon məhkəməsində 51 gündür aclıq edən AXCP Salyan rayon şöbəsinin həbsdə olan sədri Zamin Salayevin barəsində seçilmiş həbs qətimkan tədbirinin ev dustaqlığı ilə əvəz olunması ilə bağlı vəsatətə baxılacaq. Bu barədə “Basta”ya vəkil Nemət Kərimli məlumat verib. Fevralın 8-də Bakının Qaradağ rayon Məhkəməsi Zamin Salayev barədə üç ay müddətinə həbs qətimkan tədbiri seçib. Ona qarşı Cinayət Məcəlləsinin 221.3-cü maddəsi (xuliqanlıq - silahdan və ya silah qismində istifadə olunan əşyalardan istifadə edilməklə zərər çəkmiş şəxsə zor tətbiq olunması) ilə cinayət işi açılıb. İttiham sübut olunsa, fəalı 5 ilədək həbs gözləyir. Salayev bir nəfərə bıçaqla xəsarət yetirməkdə şübhəli bilinir. Zamin Salayev məhkəmədə deyib ki, ona qarşı irəli sürülən ittiham yalandır, onu şərləyiblər. Sozcu.az

Sabiq deputat Ərəstun Cavadov uzun sürən xəstəlikdən sonra vəfat edib. Sozcu.az xəbər verir ki, o, 1948-ci il oktyabrın 20-də Ağsu rayonunun Ərəbmehdibəy kəndində anadan olub. Moskva Kooperativ İnstitutunun əmtəəşünaslıq fakültəsini bitirib. Ə.Cavadov 1967-ci ildən Azərbaycan İctimai Asayişin Mühafizəsi Nazirliyində elektrik, "Azərgeyimticarət" Bazasında əmtəəşünas işləyib. 1972-ci ildən Mərkəzi univermaqda böyük anbardar, bölmə müdirinin müavini, bölmə müdiri, şöbə rəisi, 1992-ci ildən baş direktor vəzifələrində çalışıbr. 1998–2005-ci illərdə "Mərkəzi Univermaq" Açıq Səhmdar Cəmiyyəti İdarə Heyətinin sədri vəzifəsində çalışıb. Mərhum, Yeni Azərbaycan Partiyasının və III çağırış Milli Məclisin Aqrar siyasət daimi komissiyasının üzvü olub. Azərbaycan-Belarus, Azərbaycan-Belçika, Azərbaycan-Braziliya, Azərbaycan-İran, Azərbaycan-Lüksemburq, Azərbaycan-Moldova, Azərbaycan-Serbiya parlamentlərarası əlaqələr üzrə işçi qruplarının, MDB-nin Parlamentlərarası Assambleyasında Azərbaycan nümayəndə heyətinin də üzvü olub. Bundan başqa, IV çağırış Milli Məclisin Aqrar siyasət komitəsinin, Azərbaycan–İordaniya parlamentlərarası əlaqələr üzrə işçi qrupunun rəhbəri, Çin, Latviya, Litva, Moldova, Türkiyə parlamentləri ilə əlaqələr üzrə işçi qruplarının, MDB-nin Parlamentlərarası Assambleyasında Azərbaycan nümayəndə heyətinin üzvü olub. Bir övladı var. Allah rəhmət eləsin!

“Millət vəkilinin silah gəzdirməsinə o qədər də ehtiyac görmürəm. Birincisi, insanı Allah qoruyanda qoruyur. Fazil Mustafa mənim dostumdur, yaxındır. Ona Allahdan şəfa diləyirəm, tez bir zamanda sağalsın, problemi olmasın, gəlib yenə bizə qoşulsun. Birlikdə Azərbaycanın müstəqilliyi, daha da inkişafı üçün əlimizdən gələni edək. Bu gün də onunla telefonda danışmışam. Biz silah gəzdirib, güllə atan deyilik ki… Yadıma gəlir, vaxtilə bir dəfə bizə silah vermişdilər. Axı təkcə bir millət vəkilindən yox, Azərbaycan əhalisindən söhbət gedir. Biz elə etməliyik ki, dövlətin təhlükəsizliyini təmin edək. Əsas məsələ budur. Belə təhdidlər var və ola bilər. Çünki bir neçə ayın hadisələri göz qabağındadır – İranda səfirliyimizə qarşı törədilən təxribat, Bakıda hipermarketdəki hadisə – Nizami küçəsində terrorçunun mənzildə tutulması… İndi də Fazil Mustafa ilə bağlı baş verən hadisə. Bütün bunlar onu göstərir ki, Azərbaycandakı sabitliyi, sakitliyi pozmaq istəyən qüvvələr var. Bu qüvvələr müəyyən yollarla çalışırlar ki, Azərbaycandakı sabitlik, inkişaf pozulsun, əhali narahat olsun. Əsas məsələ budur…” Sozcu.az xəbər verir ki, bu sözləri Pravda.az-a açıqlamasında Milli Məclisin deputatı Vahid Əhmədov deyib. Deputat Fazil Mustafaya qarşı edilən sui-qəsdin mahiyyətini belə şərh edib: “Fikir verin, hansı vaxta təsadüf edib? Azərbaycan İsraildə səfirlik açır. Xarici işlər nazirimiz, millət vəkillərimiz də səfirliyin açılışında iştirak edirlər. Martın 28-də ən çox güvəndiyimiz Dövlət Təhlükəsizlik Xidmətinin peşə bayramı idi. Onlar bu işdə çox fədakardırlar, gecə-gündüz çalışırlar ki, Azərbaycanın təhlükəsizliyini təmin etsinlər. Yəni Fazil Mustafanı güllələmək üçün elə bir vaxt seçiblər ki… Fazil Mustafa kifayət qədər tanınmış ictimai-siyasi xadimdir. Öz çıxışları ilə müəyyən dini məsələlərə toxunur.  Bu da bəzi dövlətlərin xoşuna gəlmir. Öz fikrini açıq bildirir, Azərbaycanın müstəqilliyi uğrunda mübarizə aparan bir insandır. Ona görə də elə adam seçiblər ki, tanınmış olsun və Azərbaycan əhalisini də bununla qorxutsunlar. Bu, mümkün olan şey deyil. Fazil Mustafa tək deyil, hamımız Fazil Mustafa ola bilərik, heç bir problem yoxdur. Azərbaycanın müstəqilliyi uğrunda ölməyə həmişə hazırıq. Amma Azərbaycanı təhdid edən, inkişafını gözü götürməyən, Türkiyə-Azərbaycan münasibətlərini qəbul etməyən dövlətlər bu hadisələrin arxasından çəkilməlidirlər. Başa düşməlidirlər ki, Azərbaycan 1990-cı illərin Azərbaycanı deyil, çox böyük səhv edirlər. Hadisəni törədənlər onsuz da tapılacaqlar. DTX və digər hüquq-mühafizə orqanları ciddi iş aparıb, onları tapacaq, həbs edəcəklər. Bilinəcək ki, kimlərdir. Azərbaycanla kim dost olmaq istəyirsə, qapılarımız açıqdır. Amma düşmənə qarşı bundan sonra mülayim olan deyilik. Bunu da baş düşməlidirlər. Azərbaycanın dövlət başçısı açıq siyasət aparır, qonşularla sıx əlaqələr qurmaq istəyir, iqtisadi, siyasi, ticarət, humanitar əlaqələrin hamısını yüksək səviyyədə həyata keçiririk. Bəs nəyə görə bizdə belə hadisələr baş verməlidir? Niyə? Tolerant dövlətik, bununla bağlı Azərbaycanda heç bir problem yoxdur. Sadəcə, Azərbaycanın inkişafını, dövlət başçısının həyata keçirdiyi siyasəti gözləri götürmür, çoxları qəbul etmir. İstəyirlər ki, yenə kiminsə qoltuğunda olaq, amma bu, mümkün deyil. Artıq Azərbaycan 31 ildir, müstəqil dövlətdir. Anlamalıdırlar. Onsuz da Azərbaycan stabil dövlətdir, bununla da bağlı problem yoxdur. Xırda məsələlər hamısı həllini tapacaq. Kim belə hadisələrə imkan versə, cəzasını mütləq alacaq. DTX-nin bu sahədə kifayət qədər təcrübəli əməkdaşları, əməliyyat müvəkilləri var”. V.Əhmədov Fazil Mustafanın güllələnməsinin arxasında İran amilinin olduğunu düşənənlərə isə belə münasibət bildirib: “Mən də İran amilini nəzərdə tuturam. Açıq deyim, İran və Rusiya faktiki bir siyasət aparırlar. Bu, Rusiya da ola bilər. Azərbaycanda kifayət qədər Rusiyanın “beşinci kolon”unun adamları var. Amma Fazil Mustafa dinlə bağlı adamdır, dinlə əlaqəsi böyükdür. Bu sahəyə çox böyük diqqət yetirir, tənqidi fikirlərini söyləyirdi. Din məsələsində isə qonşulardan əsas diqqət çəkən İrandır. İnanıram ki, dövlət başçısı, hüquq-mühafizə orqanları Azərbaycandakı problemi həll edəcək, elə bir ciddi problem olmayacaq. Bütün insanlarımızın təhlükəsizliyini təmin etməliyik. Yenə deyirəm, 120 nəfərik, bilirəm ki, hamımız istənilən vaxt Azərbaycanın müstəqilliyi üçün ölümə getməyə hazırıq. Bunda heç bir problem yoxdur”.

Belarusdan Azərbaycana gətirilən kartofda zərərvericilər aşkarlanıb. Bu barədə Sozcu.az-a Qida Təhlükəsizliyi Agentliyindən (AQTA) məlumat verilib. Bildirilib ki, nəzarət tədbirləri çərçivəsində Agentlik əməkdaşları tərəfindən Belarus Respublikasından Famura RS MMC-nin idxal etdiyi “Maşpışenrod” şirkətinə məxsus 21 ton, Turas MM MMC-nin idxal etdiyi “Konençenko E Q” şirkətinə məxsus 21 ton və “Vasilenok” şirkətinə məxsus 20,388 ton ərzaqlıq kartof məhsulundan nümunələr götürülərək təhlükəsizlik göstəricilərinin müəyyən edilməsi məqsədilə Azərbaycan Qida Təhlükəsizliyi İnstitutunun müvafiq laboratoriyasına təqdim edilib. Müayinələr nəticəsində hər 3 partiya məhsulda karantin tətbiq edilən zərərvericilər − kartof yumrularında halqavarı çürümə (Clavibacter michiganensis subsp. sepedonicus) və kartof gövdə nematodu (Ditylenchus destructor Thor.) aşkar edilib. Faktla bağlı qanunvericiliyə uyğun olaraq müvafiq tədbirlər görülüb. İstehlaka yararsız məhsullar məişət tullantıları poliqonunda məhv edilib.

"WhatsApp" mesenceri "Windows" istifadəçiləri üçün yeni proqram təqdim edib. Belə ki, artıq "WhatsApp" "Zoom"la rəqabət apara biləcək, çünki bir audiozəngdə 32 nəfərə qədər, videoçatda isə 8 nəfərə qədər insan iştirak edə bilər. "Windows" üçün yeni proqramı onu daha çox "WhatsApp"ın mobil analoquna bənzədib. Sozcu.az oxu.az-a istinadən xəbər verir ki, yeni versiya çoxlu cihaz sinxronizasiyasını da dəstəkləyir. Bu, o deməkdir ki, hətta telefonunuz olmadan da "Windows"da "WhatsApp"dan istifadə etməyə davam edə bilərsiniz. Yeni proqramda linklərin ön izləmələri və stikerlər kimi xüsusiyyətlər də mövcuddur. Ekspertlərin fikrincə, əlavə edilən funksiyalar onu əslində tamamilə yeni bir tətbiqə çevirib. "WhatsApp" qurucularından verilən məlumata görə, zaman keçdikcə videozənglərdə 8, audiozənglərdə isə 32 nəfərlik məhdudiyyət də aradan götürüləcək.

"Barselona" "Mançester Siti"ninyarımmüdafiəçisi İlkay Gündoğanla yayda azad agent kimi müqavilə imzalamaq barədə razılığa gəlib. Sozcu.az xəbər verir ki, bu barədə insayder Jerar Romero məlumat verib. Mançester təmsilçisi ilə müqaviləsi bu ilin iyununda başa çatacaq türkəsilli alman yarımmüdafiəçi bir müddətdir ki, Kataloniya təmsilçisinin diqqət mərkəzindədir. Lakin “Barselona”nın maliyyə feyr-pleyində problem yaşadığını nəzərə alsaq, klub Gündoğana transferinin qeydə alınacağına zəmanət verə bilməz. Kataloniya klubu İlkayla müqaviləyə "Barsa"nın onu qeydiyyatdan keçirməyəcəyi təqdirdə icarəyə verə biləcəyi barədə bənd daxil etməyi təklif edir.