Ukraynanın əks-hücum planına Krımı işğaldan azad etmək də daxildir. Sozcu.az xəbər verir ki, bu sözləri Ukrayna Prezidenti Vladimir Zelenski deyib. O bildirib ki, Ukraynanın uğuru əsasən Qərbin davamlı silah təchizatından asılıdır: “Biz mümkün qədər çox insanın həyatını xilas etmək istəyirik, ona görə də silahların sayı önəmlidir”.

Azərbaycan mədəniyyətinə ağır itki üz verib. Sozcu.az xəbər verir ki, tanınmış qarmon ifaçısı, xalq artisti, “Şöhrət” ordenli Aftandil İsrafilov vəfat edib.

İran xüsusi xidmət orqanının nəzarəti altında yaradılmış qanunsuz silahlı birləşmədə iştirak etməkdə təqsirləndirilən Eltun Şükürovun cinayət işi üzrə ibtidai istintaq başa çatıb. Sozcu.az Pravda.az-a istinadən xəbər verir ki, toplanan iş baxılması üçün Lənkəran Ağır Cinayətlər Məhkəməsinə göndərilib. Cinayət işi hakim Vüqar Əhmədovun icraatına verilib. Məhkəmənin hazırlıq iclasının vaxtı hələlik açıqlanmayıb. Qeyd: Eltun Şükürov ötən il Dövlət Təhlükəsizliyi Xidməti əməkdaşları tərəfindən saxlanılıb. Məlumata görə, İran xüsusi xidmət orqanları tərəfindən Azərbaycan vətəndaşlarının gizli şəkildə ölkə hüdudlarından kənarda hərbi təlimlərə cəlb olunması, onların maliyyələşdirilməsi və fəaliyyətlərinin istiqamətləndirilməsi, Azərbaycan Respublikasının dövlət təhlükəsizliyi maraqlarına zidd olaraq istifadə edilməsi məqsədilə şantaj və digər zorakı üsullarla təsir dairəsində saxlanılması halları ilə bağlı Dövlət Təhlükəsizliyi Xidməti tərəfindən kompleks araşdırma tədbirləri həyata keçirilir. Əməliyyat-istintaq tədbirləri ilə müəyyən edilmişdir ki, İran xüsusi xidmət orqanının nəzarəti altında, radikal-ekstremist dini ideyaların aşılanması yolu ilə Azərbaycan Respublikası vətəndaşlarından ibarət gizli yaradılmış qanunsuz silahlı birləşməyə rəhbərlik analoji cinayət əməllərinə görə 2018-ci ildən barələrində məhkəmənin qərarı ilə həbs qətimkan tədbiri seçilərək beynəlxalq axtarışa verilib, hazırda İranda gizlənən İbrahimbəyli Tohid Alim oğlu, Əsədov Rövşən Elçin oğlu, Məmmədov Orxan Kəmran oğlu, Hacıyev Elşad Elçin oğlu (Əkrəm Hacızadə) və digərlərinə həvalə edilib. Ötən müddət ərzində qanunsuz silahlı birləşmə tərəfindən əsasən əvvəllər müxtəlif cinayətlərə görə məhkumluğu olan, habelə özlərini “Müsəlman Birliyi Hərəkatı” adlandırdıqları təşkilatın üzvü hesab edən şəxslərin sırasından seçilmiş Azərbaycan Respublikası vətəndaşları üçüncü ölkələrin ərazisindən keçirilməklə İranın Tehran şəhərinə, orada mobil telefon və pasportları götürülməklə, əlaqələrinin gizliliyinə və konspirasiya tələblərinə dair təlimatlandırılmaqla, dini ləqəblər verilərək, təqdim olunmuş saxta sənədlərlə hərbi yük təyyarələrində Suriyanın Dəməşq şəhərinə aparılıblar. Onlar Suriya ərazisində müxtəlif odlu silahlardan istifadə qaydaları və döyüş taktikasının öyrədildiyi hərbi təlimlərə cəlb edilmiş, təlimlərdə iştirak etmiş hər bir şəxsə təqdim olunan qəbzlərə imza etdirməklə müxtəlif məbləğlərdə pul vəsaitləri verilib. Həyata keçirilmiş əməliyyat-axtarış tədbirləri zamanı qanunsuz silahlı birləşmələrin hərbi təlimlərində iştirakı müəyyən edilən 19 nəfər Azərbaycan Respublikası vətəndaşı istintaqa cəlb olunmuş, qanunsuz silahlı birləşmə və onun tərəfindən təşkil edilmiş hərbi təlimlər barədə çoxsaylı dəlillər, qanunsuz yollarla Azərbaycana keçirilmiş müasir inkişaf, dünyəvi dövlət ideyalarına qarşı radikal, dini-ekstremist münasibəti təbliğ edən, yayılması Azərbaycanda qadağan edilmiş müxtəlif kitablar, videomateriallar aşkar edilərək götürülüb. Cinayət işi üzrə əvvəllər məhkum edilmiş Hüseynov İskəndər Hani oğlu, Haqverdiyev Tural Səfər oğlu, Şükürov Eltun Əli oğlu və digərləri Azərbaycan Respublikası Cinayət Məcəlləsinin 12.1, 279.1-ci (qanunvericiliklə nəzərdə tutulmayan silahlı birləşmələrdə iştirak etmə) maddələri ilə cinayət məsuliyyətinə cəlb edilərək saxlanılıblar. Xatırlatma: Daha əvvəl Haqverdiyev Tural Səfər oğlunun cinayət işi yekunlaşararaq, baxılması üçün Gəncə Ağır Cinayətlər Məhkəməsinə göndərilib.

“Orxan Məmmədovla Tohid İbrahimbəylinin mənə qarşı törədilən terror aktı ilə bağlı İranda həbs edildiyini söyləməkdə çətinlik çəkirəm”. Bu sözləri Yenisabah.az-a açıqlamasında Milli Məclisin deputatı, Böyük Quruluş Partiyasının (BQP) sədri Fazil Mustafa deyib. Millət vəkili ötən gün İranda həbs edildiyi bildirilən “Hüseyniyyun” təşkilatının rəhbəri Tohid İbrahimbəyli ilə Orxan Məmmədovun Azərbaycana ekstradisiya edilib-edilməyəcəyi ilə bağlı səslənən suallara aydınlıq gətirib. BQP sədri xatırladıb ki, neçə müddətdir Azərbaycan tərəfi bu insanların həbs edilib Azərbaycana ekstradisiyasını tələb edirdi: “Çünki bu adamlar Azərbaycanda dövlət və Konstitusiya quruluşunun dəyişdirilməsi ilə bağlı çağırışlar edirdilər. Azərbaycan da bu şəbəkənin üzvləri ilə bağlı dəfələrlə İran dövlətinə müraciət etmişdi ki, Tehran onların Bakıya təhvil verilməsini təmin etsin. Lakin bu proses qismən həyata keçirildi və 43 nəfərdən yalnız 7-si Azərbaycana verildi. Bu isə çox az sayda idi və verilən adamlar elə də əhəmiyyətli şəxslər deyildi”. F. Mustafa vurğulayıb ki, dövlətlərarası əlaqələrdə yumşalmanın və münasibətlərin yaxşılaşdırılmasının əsas şərtlərindən biri də bu olmalıdır: “Əgər Azərbaycan dövlətinə qarşı İranda məskunlaşan azərbaycanlılar tərəfindən belə bir qeyri-qanuni təşkilat yaradılırsa, habelə onlar bu kimi fəaliyyətlərə Azərbaycan vətəndaşlarını da cəlb etməyi planlaşdırırlarsa, İran tərəfi xoşniyyətli bir addım kimi həmin şəxslərin ekstradisiyasını təmin etməlidir. Həmçinin, onların həbs olunub Azərbaycana göndərilməsi məsələsi İrana göndərdiyimiz sübutlarla da bağlıdır. Lakin hüquq-mühafizə və prokurorluq orqanları əllərində olan müvafiq sübutları İrana göndərib ki, bu şəxslər konkret cinayət əməllərinin törədilməsində məsuliyyət daşıyırlar. Bütün bunların hamısı təhlil olunmalı və hüquqi prosedura bu təhlildən sonra həyata keçirilməlidir”. Milli Məclisin üzvü əlavə edib ki, Azərbaycanda da müəyyən müddət həbs yatmış İran vətəndaşlarının geri verilməsi bağlı məsələlər zaman-zaman gerçəkləşdirilib: “Bu isə qarşılıqlı və xoşniyyətli addımlardan asılı olacaq. Əgər İran bu addımı atarsa, bu, o deməkdir ki, İran dövləti öz daxilində Azərbaycan dövlətinə qarşı yuva salmış şəbəkənin mövcudluğunda maraqlı olmadığını göstərəcəkdir. Bu da qonşuluq münasibətlərinin yeni məcrada və daha müsbət istiqamətdə inkişafına xidmət göstərə bilər. Amma yenə deyirəm ki, bunun mənə qarşı həyata keçirilən sui-qəsdlə əlaqəsinin olub-olmadığı ilə bağlı hər hansı bir məlumatım yoxdur. Söhbət kimlərdən gedir, heç bunu da təhlil etməmişəm. Lakin bizimlə oldu-olmadı, əgər müvafiq addımlar atılarsa, hesab edirəm ki, bu, həm müəyyən münasibətlərin yaxşılaşdırılmasına doğru getməyə imkan yaradar, həm də dövlətimizin təhlükəsizliyi, eləcə də bu şəbəkəyə uyub yanlış yolda olan insanların yenidən öz dövlətinə qarşı münasibətinin dəyişdirilməsi baxımından faydalı olar”. “O ki qaldı yerdə qalan 36 nəfərin, yoxsa təkcə Tohid İbrahimbəyli ilə Orxan Məmmədovun Azərbaycana ekstradisiya edilməsinə, düşünürəm ki, “Hüseyniyyun”un bütün üzvləri Azərbaycana qaytarılmalıdır. Bu şəxslər də Azərbaycanda ədalətli məhkəmə mühakiməsinə cəlb olunmalıdırlar. Çünki bu, bir başa dövlətin təhlükəsizliyi ilə bağlı məsələdir. Qısası, İran Azərbaycanın hər hansı bir şəkildə yıpranmasında maraqlı olmadığını göstərmək üçün bu addımı atmalıdır. Ona görə ki, bu, bütün normal münasibətləri olan dövlətlər arasında baş verməli olan normal hüquqi bir proseduradır. Əgər bunu etsələr, bu addım münasibətlərin bir xeyli yumşalmasına gətirib çıxara bilər”, – partiya lideri fikirlərini tamamlayıb.

Türkiyə millisinin və “Qalatasaray”ın sabiq baş məşqçisi Fatih Terim Bakıya gələcək. Sozcu.az xəbər verir ki, o, iyunun 17-də paytaxtımızda olacaq. F.Terim Bakı Konqres Mərkəzində çıxış edəcək. O, keçdiyi həyat yolundan, futbolda qazandıqları uğurlardan danışacaq.

Bir dəqiqə yarım ərzində yüksək təzyiqi aşağı salmağın yolu açıqlanıb.  Sozcu.az lent.az-a istinadən xəbər verir ki, bu barədə tibb elmləri namizədi, doktor Aleksandr Şişoninin danışıb. Onun dediyinə görə, sadə fiziki məşqlər təzyiq artımının öhdəsindən gəlməyə kömək edə bilər. Təzyiqləri sabitləşdirmək üçün Şişonin başını sola və sağa çevirməyi tövsiyə edib. "Məktəbdəki kimi bədən tərbiyəsi dərslərində isinmə zamanı: çənəni sol çiyinə, sonra sağa. Yalnız diqqətlə bunu edin, boyun ani hərəkətlərə dözmür. Bunu etməyi 60 saniyə davam edin". Başını çevirdikdən dərhal sonra 30 saniyə ovucları ilə masaj etmək lazımdır: "Bunun üçün ovuclarınızı bükün. Sonra öz-özünə masaj etməyə başlayırsınız: hər iki əlinizlə başın arxasındakı yerə toxunun və boyun altına sürüşərək yumşaq bir şəkildə basmağa başlayın". Onun sözlərinə görə, bu məşqlərdən dərhal sonra təzyiqiniz enəcək və yaxşılaşacaqsınız.

ABŞ-ın Vaşinqton Universitetinin Molekulyar Biologiya Məktəbinin mütəxəssisləri bir sıra fundamental tədqiqatlar apardıqdan sonra günəş şüalarında insan orqanizmi üçün elmə məlum olanlardan başqa hansı təhlükələrin gizlənə biləcəyini müəyyən ediblər. Sozcu.az lent.az-a istinadən xəbər verir ki, alimlərin işində qeyd olunduğu kimi, ultrabənövşəyi şüaların təsiri insan DNT-sində əvvəllər məlum olmayan növ zədələrə səbəb olur. Bütün bunlar aqressiv dəri xərçənginə gətirib çıxarır. Tədqiqatçılar 150 koloniyanın maya hüceyrələrini bir ay ərzində 15 dəfə səkkiz saniyə UV lampalarına məruz qoyublar. Bundan sonra, DNT hüceyrələrdən təcrid olunub, bütün genom ardıcıllığına məruz qalıb, yəni qoşa zəncirdə tam nukleotid ardıcıllığı qurulub. Beləliklə, alimlər ultrabənövşəyi şüalanmanın yaratdığı 50 minə yaxın mutasiyanı müəyyən ediblər. Bunların təxminən yarısı melanoma inkişafı ilə əlaqəli idi. Bioloqların fikrincə, son vaxtlara qədər günəş şüalarının zədələnməsinin iki DNT əsası ilə məhdudlaşdığına inanılırdı: sitozin (C) və ya timin (T). Lakin indi müəyyən edilib ki, mutasiyalar bəzən adeninə də təsir edir (A). Üstəlik, hətta ultrabənövşəyi radiasiyaya bir dəfə və qısa müddətli məruz qalma da atipik mutasiyalara səbəb olur. Melanoma və ya dəri xərçəngi ən ölümcül bədxassəli şişlərdən biridir, çünki tez metastazların meydana gəlməsinə səbəb olur. Bu xəstəliyin əsas səbəbi birbaşa günəş işığına uzun müddət məruz qalma hesab olunur.

"Tərtərdə mina partlayışında üç nəfərin həlak olması xəbərini böyük kədərlə qarşıladıq". Bu barədə Avropa İttifaqının (Aİ) Azərbaycandakı nümayəndəliyinin rəhbəri, səfir Peter Mixalko tviterdə yazıb. "Dünən Tərtərdə baş vermiş mina partlayışı nəticəsində 3 nəfərin faciəli şəkildə həlak olması xəbərini böyük kədərlə qarşıladıq. Həlak olanların ailələrinə dərin hüznlə başsağlığı verirəm. Avropa İttifaqı minatəmizlənmə səylərində Azərbaycana qətiyyətli dəstəyini davam etdirəcək”, - deyə o bildirib.

Xəbər verdiyimiz kimi, Xalq artisti Mələkxanım Eyubovanın gəlini Səadət Nəcəfovanın səhhəti pisləşib. Axşam.az xəbər verir ki, xanəndənin oğlu Cəfər Nəcəfov böyrək çatışmazlığı səbəbindən xəstəxanaya yerləşdirilən həyat yoldaşında son durumu ilə bağlı sosial şəbəkədə paylaşım edib: "Vəziyyəti ilə maraqlanan, fiziki və ya mənəvi yanımda olduğunu hiss etdirən hər kəsə dərin təşəkkürümü bildirirəm. Məlum səbəbdən zənglərə, mesajlara cavab verə bilmirəm. Vəziyyəti stabildir. İnşallah, çətinliklər tezliklə geridə qalar. Anlayışınız üçün təşəkkür edirəm". Cəfər Nəcəfov "Hər şeyə hazır olun", "Xəstənin vəziyyəti ağırdır, həyati təhlükəsi var" ifadələrinin onun üçün eşidə biləcəyi ən ağır sözlər olduğunu da qeyd edib. Xatırladaq ki, xanəndənin gəlini Mərkəzi Gömrük Hospitalına yerləşdirilib.

Ötən gün Tərtərin işğaldan azad edilən Talış kəndi ərazisindəki insan tələfatı ilə nəticələnən mina partlayışının bəzi təfərrüatları məlum olub. Sozcu.az Report-a istinadən xəbər verir ki, hadisə Talış kəndində qeydə alınıb. Hadisənin baş verdiyi ərazi əvvəllər qoşunların təmas xətti olub. ANAMA əməkdaşlarının hərəkət etdikləri yolda qalın ot örtüyü olub. Hadisənin baş verdiyi ərazidə tank əleyhinə mina basdırılıb. Hərəkətdə olan avtomobil şahmat üsulu ilə basdırılan minalardan birinə toxunub. Bu zaman baş verən partlayış zamanı avtomobil yoldan kənara düşüb. Partlayan TM62 PM-nin markalı tank əleyhinə mina olduğu ehtimal edilir. Hadisə nəticəsində zərərçəkmiş şəxslər "RPS Energy Ltd." şirkətinin əməkdaşları - 1981-ci il təvəllüdlü Səxavət Gözəlov, 1982-ci il təvəllüdlü Nadir Yusifov və 1996-cı il təvəllüdlü Fərid Sədiyevdir. Faktla bağlı cinayət işi başlanıb.

İmişli rayonunda azyaşlı qardaş və bacını avtomobil vurub. Sozcu.az xəbər verir ki, 2018-ci il təvəllüdlü İ.Məmmədov və bacısı, 2020-ci il təvəllüdlü E.Məmmədova yolu keçərkən avtomobil onları vurub. Yaralılar təcili tibbi yardımın köməkliyi ilə xəstəxanaya çatdırılıb. Faktla bağlı araşdırma aparılır.

Türkiyənin Qəhrəmanmaraş vilayətinin Göksun rayonunda 4,7 bal gücündə zəlzələ baş verib. Sozcu.az xəbər verir ki, bu barədə AFAD məlumat yayıb. Zəlzələ yerin 6,89 km dərinliyində yaranıb. Tələfat və dağıntı qeydə alınmayıb.

Böyük Britaniyanın Azərbaycandakı səfiri Ferqus Auld Tərtərin Tapqaraqoyunlu kəndi ərazisində 3 nəfərin tank əleyhinə minaya düşərək həlak olması ilə bağlı başsağlığı verib. Sozcu.az xəbər verir ki, səfir bu barədə Tvitter hesabında paylaşım edib. “Tərtər rayonu ərazisində tank əleyhinə minanın partlaması nəticəsində 3 nəfərin həlak olması xəbəri məni çox üzdü. Ölənlərin yaxınlarına baş sağlığı verirəm”, - F.Auld yazıb.

Dünya birjalarında neft qiymətləri bahalaşmaqda davam edir. Sozcu.az xəbər verir ki, hazırda “Brent” markalı neftin bir barreli 79,54 dollara, yüngül neftin bir barreli 76,78 dollara, "Azəri Layt" markalı Azərbaycan neftinin 1 barreli isə 83,80 dollara təklif edilir.

Ukrayna müharibənin 430-cu günü üçün Rusiya ordusunun itkiləri haqda məlumatı yeniləyib. Sozcu.az xəbər verir ki, bu barədə Ukrayna Baş Qərargahı məlumat yayıb. Məlumata əsasən, Rusiya indiyə qədər 190 040 hərbçi, 3697 ədəd tank, 7184 ədəd zirehli döyüş maşını, 2908 ədəd artilleriya sistemi, 543 ədəd RYAS (reaktiv yaylım atəş sistemi), 294 hava hücumundan müdafiə sistemi, 308 ədəd hərbi təyyarə, 294 ədəd helikopter, 5836 ədəd avtomobil texnikası, 2471 ədəd PUA, 932 qanadlı raket, 18 gəmi/qayıq, 355 xüsusi avadanlıq itirib.

Gədəbəy rayon Düz Yurd kənd ərazisində ölümlə nəticələnən yol-nəqliyyat hadisəsi olub. Sozcu.az xəbər verir ki, Gədəbəy rayon sakini, 1998-ci il təvəllüdlü Sezar Səfərov idarə etdiyi avtomobili aşırıb. O, qəza nəticəsində aldığı xəsarətdən dünyasını dəyişib. Faktla bağlı araşdırma aparılır.

Azərbaycanın İnsan Hüquqları üzrə Müvəkkili (Ombudsman) Səbinə Əliyeva Tərtərdə baş vermiş mina partlayışı nəticəsində mülki şəxslərin həlak olması faktı ilə əlaqədar dünya ictimaiyyətinə çağırış edib. Sozcu.az çağırışın mətnini təqdim edir: “Ermənistanın dövlət səviyyəsində həyata keçirdiyi mina terroru və azərbaycanlılara qarşı nifrət siyasəti günahsız insanların qətlə yetirilməsinə səbəb olmaqdadır. Dərin təəssüf hissi ilə bildirirəm ki, cari ilin 28 aprel tarixində Tərtər rayonunun Talış kəndi ərazisində baş vermiş mina partlayışı nəticəsində 3 nəfər mülki şəxs həlak olmuşdur. Ermənistanın növbəti mina terrorunun qurbanına çevrilərək həlak olmuş soydaşlarımıza Allahdan rəhmət diləyir, onların ailələrinə, əzizlərinə və yaxınlarına dərin hüznlə başsağlığı verirəm! Ermənistan 30 ilə yaxın bir dövr ərzində işğal altında saxladığı Azərbaycan torpaqlarında beynəlxalq humanitar hüquq normalarını kobud şəkildə pozaraq insanların həyat və sağlamlığına zərər vermək məqsədilə yüz minlərlə mina basdırmışdır. 2020-ci il 10 noyabr tarixində imzalanmış üçtərəfli Bəyanatdan sonrakı dövrdə 300-dək insan mina qurbanı olmuş, onlardan 54 nəfəri həyatlarını itirmişlər. Lakin bütün bunlara baxmayaraq Ermənistan nəinki ərazilərimizdə basdırdığı minaların dəqiq xəritələri haqqında məlumat verməkdən yayınır, təxribat-diversiya qrupları vasitəsilə işğaldan azad olunmuş ərazilərimizi yenidən minalarla çirkləndirməkdə davam edir. Belə ki, son dövrlər baş vermiş mina hadisələrinin araşdırılması zamanı yolun hərəkət hissəsi ətrafında Ermənistan tərəfindən 2021-ci ildə istehsal olunmuş tank və piyada əleyhinə minaların aşkarlanması Ermənistanın postmüharibə dövründə təxribatçılıq siyasətini davam etdirməsinin növbəti sübutudur. Dünya ictimaiyyətinin, əlaqədar beynəlxalq təşkilatların mina terroru ilə əlaqədar Ermənistana ciddi təsir göstərməməsi son dövrlərdə regionda bu kimi təxribat yönümlü, beynəlxalq humanitar hüquqa zidd hərəkətlərin intensiv xarakter almasına səbəb olmaqdadır. Dəfələrlə tələb edilməsinə baxmayaraq, minalanmış ərazilərin dəqiq xəritələrinin hələ də ölkəmizə təqdim edilməməsi nəticə etibarilə çoxsaylı insan itkilərinə, ağır xəsarətlərə və əlilliyə gətirib çıxaran mina partlayışlarının baş verməsinə səbəb olur. Bununla əlaqədar bir daha dünya ictimaiyyətinə müraciət edərək, insanların həyat və sağlamlığı üçün ciddi təhlükə mənbəyi olan Ermənistanın mina terrorunun aradan qaldırılması məqsədilə minalanmış ərazilərin dəqiq xəritələrinin ölkəmizə təqdim edilməsinə dəstək verməyə və beynəlxalq humanitar hüququn tələblərini pozmaqda davam edən Ermənistana qarşı təsirli tədbirlər görməyə çağırıram".

Azərbaycan Respublikasının Prezidenti İlham Əliyev aprelin 29-da Türkiyə Respublikasının Prezidenti Rəcəb Tayyib Ərdoğanın dəvəti ilə İstanbula işgüzar səfərə gedib. Sozcu.az xəbər verir ki, hər iki ölkənin Dövlət bayraqlarının dalğalandığı İstanbulun Atatürk Hava Limanında Azərbaycan Prezidentinin şərəfinə fəxri qarovul dəstəsi düzülüb. Prezident İlham Əliyevi və birinci xanım Mehriban Əliyevanı Türkiyənin sənaye və texnologiya naziri Mustafa Varank və digər rəsmi şəxslər qarşılayıblar.

Vətən müharibəsi şəhidi Xalid Hassanın anası Maya Quliyeva kollecə qəbul olub.  Bu barədə Yenisabah.az-a danışan M.Quliyeva vaxtilə Qazaxıstanda kollec bitirsə də, Azərbaycanda diplomunu istifadə edə bilmədiyi üçün yenidən ölkəmizdə diplom almaq niyətində olduğunu bildirib. O, bunu heç kimin əlinə baxmaq istəməməsi ilə əlaqələndirib:  “Mən kolleci vaxtilə Qazaxıstanda bitirmişəm. Ərəb dili tərcüməçisiyəm, daha sonra Almatıda universitetə daxil oldum. Amma vəziyyət elə gətirdi ki, övladımın atasını Qazaxıstandan deportasiya etdilər. Ona görə biz Azərbaycana qayıdıb gəldik və təhsilimi davam etdirə bilmədim. Bura gəldikdə Qazaxıstandakı diplomumu istifadə edə bilmədim.  Bu gün Azərbaycanda şəhid anaları üçün hər cür komfort yaradılıb, gedirsən, adına maaş olan bir kart yazıb verirlər, işləmirsən, yenə sənə güzəşt edirlər. Lakin mən bundan istifadə etmək istəmədim, icra başçısına iş üçün müraciət etdim, bildirdi ki, sənin diplomunu burada qəbul etmirik. Bu səbəbdən mən də yeni diplom almaq istədim. Halbuki icra hakimiyyətində çalışan 50 faiz diplomlulardan daha savadlıyam. Hələ ki, ixtisasımı seçməmişəm, işğaldan azad olunmuş bölgələrdə çalışmaq üçün aqrar sahəni seçmək istəyirdim, sadəcə, kimya və biologiya savadım güclü deyil. Bu imtahanda rus dili və Azərbaycan dili nəticələrim yüksəkdir, ora tarixi də əlavə etmək istəyirəm”.  Şəhid anası təhsilini hansı sahə üzrə davam etdirəcəyinə hələ ki, dəqiq qərar vermədiyini deyib:  “Təhsilimi əyani yoxsa qiyabi davam etdirəcəyimə hələ ki, qərar verməmişəm. Mən Aqrar Universiteti seçmək istəyirdim, çünki Gəncə bizə daha yaxındır, həm də gələcəkdə işğaldan azad olunmuş bölgələrdə bu sahəyə tələbat daha çox olacaq. Fikrimi dəqiqləşdirəndən sonra qərarımı verəcəyəm. Hələ ki, 2 ay vaxtım var, ola bilər ki, kimya və biologiya müəlliminin  yanına hazırlaşmaq üçün gedərəm”. 

Balıqların kürütökmə dövrü ilə əlaqədar 1 may 2023-cü il tarixindən ölkə ərazisindəki bütün su hövzələrində balıq ovuna moratorium qüvvəyə minir və sentyabrın 1-dək davam edəcək. Bioloji Müxtəlifliyin Qorunması Xidmətinin rəsmisi Arzu Babayeva Sozcu.az-a bildirib ki, qanunsuz balıq ovunun qarşısının alınması məqsədilə Daxili İşlər Nazirliyinin Su Nəqliyyatında Polis İdarəsi, Ekologiya və Təbii Sərvətlər Nazirliyinin Dövlət Ekoloji Təhlükəsizlik və Bioloji Müxtəlifliyin Qorunması Xidmətlərinin əməkdaşları tərəfindən ölkənin daxili su hövzələrində mütəmadi nəzarət tədbirləri həyata keçirilir və qanunsuz balıq ovu ilə məşğul olanlar barəsində qanunamüvafiq tədbirlər görülür. Xidmət rəsmisi balıq ovu ilə məşğul olan bütün fiziki və hüquqi şəxsləri qaydalara əməl etməyə, qadağan olunmuş vaxtlarda, qadağan olunmuş alətlərlə balıq ovlamaqdan çəkinməyə çağırıb.

Yevlax rayonunda aprel ayı ərzində keçirilən əməliyyatlar zamanı narkotiklərin qanunsuz dövriyyəsində şübhəli bilinən 16 nəfər saxlanılıb. DİN-in Mətbuat Xidmətinin Bərdə regional qrupundan Sozcu.az-a verilən məlumata görə, Yevlax Rayon Polis Şöbəsinin əməkdaşlarınıın rayon ərazisində narkotik vasitələrin qanunsuz dövriyyəsi ilə məşğul olmaqda şübhəli bilinən şəxslərə qarşı əməliyyat tədbirləri aprel ayı ərzində də qətiyyətlə davam etdirilib. Bu əməliyyatlar zamanı Narkotiklərlə Mübarizə Qrupunun əməkdaşları tərəfindən 16 nəfər müəyyən edilərək istintaqa təhvil verilib, onlardan 8 nəfər barəsində məhkəmənin qərarı ilə həbs qətimkan tədbiri seçilib. Saxlanılan şəxslərdən heroin, metamfetamin və marixuana kimi narkotik vasitələr aşkar edilərək götürülüb. Bu tədbirlər zamanı 3 kiloqrama yaxın sadalanan narkotik vasitələrin qanunsuz dövriyyədən çıxarılması təmin edilib. Həmçinin saxlanılan şəxslərdən bir neçəsinin oğurluq əməlləri törətdiyi də müəyyən olunub. Oğurlanan əşyalar da aşkarlanaraq öz sahiblərinə geri qaytarılıb. Yevlax rayonu ərazisində narkotik vasitələrin qanunsuz dövriyyəsinə qarşı tədbirlər polis əməkdaşları tərəfindən davam etdirilir.

Bakıda fəaliyyət göstərən taksi xidmətlərində bahalaşma müşahidə edilir.  Sozcu.az xəbər verir ki, taksi xidmətlərinin təxminən 30% bahalaşdığı bildirilir.  Qiymətlərin bahalaşmasına səbəb kimi şəhərin mərkəzində baş tutan “Formula 1” yarışı göstərilir. Əsas səbəbin yarışların keçirildiyi yolların bağlı olması və buna görə benzin sərfiyyatının artması ilə əlaqəli olduğu deyilir.  Qeyd edək ki, "Formula 1" yarışı aprelin 30-dək davam edəcək. 

Akademik Milli Dram Teatrına direktor təyinatının yubanması müxtəlif mülahizələrin meydana çıxmasına səbəb olub. Mərhum Xalq artisti Azər Paşa Nemətovun dünyasını dəyişməsindən sonra ölkənin ən qədim teatr məbədinə kimin rəhbərlik edəcəyi maraq doğurur.  Yenisabah.az xatırladır ki, iddialılar sırasında üç tanınmış mədəniyyət adamının - Xalq artistləri Nurəddin Mehdixanlı, Bəsti Cəfərova və tanınmış rejissor Mehriban Ələkbərzadənin adı hallanır.  İddialılardan biri - sevilən aktrisa Bəsti Cəfərova hər hansı vəzifədə gözünün olmadığını deyib. Xalq artisti bildirib ki, Azdramaya rəhbərlik etməyi düşünmür, onu ancaq sənəti maraqlandırır.  Adı Akademik Milli Dram Teatrının direktoru postuna namizədlər sırasında hallanan, hətta bəzi çevrələrdə ən şanslı namizəd kimi xarakterizə edilən  tanınmış və təcrübəli aktyor Nurəddin Mehdixanlı isə məsələyə fərqli münasibət bildirib. Xalq artisti sözügedən vəzifə ilə bağlı hər hansı iddiasının olub-olmadığına dair suala birmənalı cavab verməyib. O, "Azdrama"ya yeni direktor təyin edilərkən kollektivlə məsləhətləşməyin vacib olduğunu bildirib. Adı namizədlər sırasında hallanan digər iddialı - tanınmış rejissor, Əməkdar Mədəniyyət Xadimi Mehriban Ələkbərzadə ilə bağlı durum isə bir qədər fərqlidir. Məlumatlara görə, xanım Ələkbərzadə "Azdraman”ın sükanı arxasına keçməyə həvəslidir. Onun ölkənin ən qədim sənət ocağına rəhbərlik etməsi üçün bütün imkanlarını səfərbər etməsi barədə məlumatlar da var. Bəzi tanınmış sənət adamlarının bu təyinatın gerçəkləşməsi üçün M.Ələkbərzadəyə lobbiçilik etdiyi bildirilir.  “Yeni Sabah”ın əldə etdiyi məlumata görə, Akademik Milli Dram Teatrının kollektivi bu təyinata soyuq yanaşır. Onlar “özgənin”, yəni Azərbaycan Dövlət Gənc Tamaşaçılar Teatrında baş rejissor vəzifəsində çalışan M.Ələkbərzadənin Azdramaya rəhbərlik etməsini istəmirlər. Hətta yeni direktorla bağlı təyinatın bu səbəbdən yubandığını iddia edənlər də var.  Mədəniyyət Nazirliyinin məsul şəxslərindən biri saytımıza bildirib ki, "Azdrama”nın yeni direktoru adı mətbuatda hallanan namizədlər arasından seçilməməsi tamamilə mümkündür. Onun sözlərinə görə, bu məsələ ilə bağlı yekun qərarı Mədəniyyət naziri Adil Kərimli verəcək.  Mənbə təyinatın yubanmasını milli mentalitetimizdən irəli gələn bəzi amillərlə əlaqələndirib:  “Məlum olduğu kimi, Azər Paşa Nemətov bu il aprel ayının 9-da dünyasını dəyişib. Nazir onun 40 mərasimi başa çatana kimi yerinə yeni şəxsin təyin olunmasını düzgün hesab etməyib. "Azdrama"nın yeni direktorunun kim olacağı ilə bağlı qərar may ayının 20-dən sonra veriləcək”. 

Azərbaycanda gənc müəllim şagirdi tərəfindən şantaj olunub. Sozcu.az lent.az-a istinadən xəbər verir ki, hadisə Siyəzən rayonunda qeydə alınıb. Rayon 1 saylı orta məktəbin müəllimi 22 yaşlı F.F (ad şərtidir) polisə müraciət edərək həmin məktəbin 11-ci sinif şagirdi İ.H tərəfindən şantaj olunduğunu bildirib. Qadın müəllimə şikayətində şagirdinin onu şəkillərini yayacağı ilə hədələyərək pulunu aldığını qeyd edib. Müəllimə həmçinin polisə bildirib ki, həmin məktəbin daha iki şagirdi də onu narahat edib.   Müəllim şagirdlərin ona qarşı etdiyi bu tərbiyəsizlikdən sarsıntı keçirərək intihara cəhd edib. Belə ki, o, intihar məqsədi ilə özünə bıçaqla xəsarət yetirib, ailə üzvlərinin müdaxiləsi nəticəsində intiharın qarşısı alınıb. Baş vermiş hadisə ilə bağlı Siyəsən Rayon Polis Şöbəsində araşdırmalara başlanılıb. Adı çəkilən şagirdlər saxlanılaraq onların ifadələri alınıb. Lakin onlar məktəbli olduğu üçün sərbəst buraxılıblar.  Faktla bağlı araşdırılma aparılır.