Dövlət İmtahan Mərkəzi mayın 14-də keçiriləcək imtahanlarda iştirak edəcək abituriyentlərə (şagirdlərə) müraciət edib. Sozcu.az müraciətin mətnini təqdim edir: "İştirakçılar “İmtahana buraxılış vərəqəsi”ni çap edə bilərlər. Məlum olduğu kimi, Dövlət İmtahan Mərkəzi tərəfindən 14 may 2023-cü il tarixində ümumi (9 illik) orta təhsil səviyyəsi üzrə aşağıdakı imtahanların keçirilməsi nəzərdə tutulub. 1. Əvvəlki illərin məzunları üçün orta ixtisas təhsili müəssisələrinə qəbul imtahanı; 2. Müsabiqədə buraxılış imtahanında verdiyi xarici dildən fərqli dil üzrə iştirak etmək istəyən cari ilin məzunları üçün əlavə xarici dil imtahanı; 3. Qəbul imtahanını buraxılış imtahanında verdiyi dildən fərqli dil üzrə vermək istəyən cari ilin məzunları üçün əlavə tədris dili imtahanı; 4. Aprel ayında keçirilmiş buraxılış imtahanlarında müxtəlif səbəblərdən iştirak edə bilməmiş və barəsində Mərkəzə müraciət edilmiş cari ilin IX sinif şagirdləri üçün buraxılış imtahanı; 5. Eksternat qaydasında IX sinif üzrə yekun attestasiyada iştirak etmək istəyən şəxslər üçün buraxılış imtahanı; 6. Buraxılış imtahanlarında müxtəlif səbəblərdən iştirak edə bilməmiş və barəsində Mərkəzə müraciət edilmiş əvvəlki illərin IX sinif məzunları üçün buraxılış imtahanı. 1-3-cü kateqoriyaya aid olan şəxslər buraxılış vərəqəsini çap etmək üçün https://www.e-gov.az/az/services/read/2516/0?tqdk_xdm=74 keçidindən istifadə etməlidirlər. 4-6-cı kateqoriyaya aid olan şəxslər imtahana buraxılış vərəqəsini çap etmək üçün https://www.e-gov.az/az/services/read/2516/0?tqdk_xdm=46 keçidindən istifadə etməlidirlər. İmtahana buraxılış vərəqəsində imtahanın keçiriləcəyi tarix, şəhər (rayon), bina, zal, imtahanın başlanma vaxtı, iştirakçının imtahan binasına gəlmə vaxtı və s. məlumatlar qeyd olunub.

Ötən gecə Ukrayna ordusu ölkəyə hücum edən 35 ədəd “Şahidin” hamısını məhv edib. Sozcu.az xəbər verir ki, bu barədə Ukrayna Silahlı Qüvvələri Baş Qərargahı məlumat yayıb. "Mayın 8-nə keçən gecə düşmən İranın “Şahid” PUA-larından istifadə edərək yenidən Ukrayna ərazisinə hücum edib. Hücum edən 35 İran PUA-sı məhv edilib”, - məlumatda deyilir.

Dünya birjalarında neft qiymətləri bahalaşıb. Sozcu.az xəbər verir ki, hazırda “Brent” markalı neftin bir barreli 75,70 dollara, yüngül neftin bir barreli isə 71,77 dollara təklif edilir.

Xəbər verdiyimiz kimi, Prezident İlham Əliyev əfv sərəncamı imzalayıb. Sozcu.az xəbər verir ki, sərəncama əsasən, həbsdə olan Vətəndaş və İnkişaf Partiyasının (VİP) sədri Əli Əliyev də əfv edilib.

Mayın 8-i saat 09:15-də Ermənistan silahlı qüvvələrinin bölmələri Gorus rayonunun Dığ yaşayış məntəqəsi istiqamətində yerləşən mövqelərindən Laçın rayonu ərazisində şərti sərhəddə ekskavatorumuzu atəşə tutub. Bu barədə Sozcu.az-a Azərbaycanın Müdafiə Nazirliyindən məlumat verilib. Azərbaycan Ordusunun bölmələri tərəfindən cavab tədbirləri görülüb.

Azərbaycan Prezidenti İlham Əliyev və Ermənistan Baş naziri Nikol Paşinyan mayın 14-də Brüsseldə görüşəcək. Sozcu.az xəbər verir ki, bu barədə “Faynənşl Tayms” görüşün hazırlanmasında iştirak edən üç məmura istinadən məlumat yayıb. Məlumata əsasən, danışıqlar Avropa Şurasının sədri Şarl Mişelin vasitəçiliyi ilə aparılacaq.

Ukrayna müharibənin 439-cu günü üçün Rusiya ordusunun itkiləri haqda məlumatı yeniləyib. Sozcu.az xəbər verir ki, bu barədə Ukrayna Baş Qərargahı məlumat yayıb. Məlumata əsasən, Rusiya indiyə qədər 194 970 hərbçi, 3730 ədəd tank, 7253 ədəd zirehli döyüş maşını, 3018 ədəd artilleriya sistemi, 554 ədəd RYAS (reaktiv yaylım atəş sistemi), 306 hava hücumundan müdafiə sistemi, 308 ədəd hərbi təyyarə, 294 ədəd helikopter, 5958 ədəd avtomobil texnikası, 2614 ədəd PUA, 947 qanadlı raket, 18 gəmi/qayıq, 384 xüsusi avadanlıq itirib.

Bir müddət əvvəl məşhur rusiyalı müğənni Alla Puqaçova Rusiyaya geri qayıdıb. Bunun səbəbi isə onun yaxın dostu Valentin Yudaşkinin vəfat etməsi olub. Alla həmişə məşhur modelyerin həyat yoldaşı ilə yaxın münasibət saxlayıb, ona görə də faciədən sonra ona dəstək olmaq üçün geri qayıdıb. Sozcu.az xəbər verir ki, bunu Alla Puqaçovanın yaxın rəfiqəsi Layma Vaykuleni deyib. “Alla mənə dedi ki, o, Valentin Yudaşkinin dəfn mərasiminə görə Rusiyaya qayıdacaq",- o bildirib.

Bu gün Xüsusi Təyinatlı Qüvvələrin komandiri, general-leytenant, Vətən Müharibəsi Qəhrəmanı Hikmət Mirzəyev XTQ-nin bir qrup hərbçisi ilə Aprel döyüşlərinin şəhidi, XTQ-in əfsanəvi döyüşçüsü Pəncəli Teymurovun anası ilə görüşüb. Sozcu.az xəbər verir ki, XTQ-nin böyük nümayəndə heyəti ilə Astara rayonuna gələn H. Mirzəyev Pəncəlinin anası Vahimə Teymurova ilə birgə şəhidin məzarına baş çəkib. Şəhidin abidəsi önünə əklillər və gül dəstələri qoyulub. XTQ komandiri şəhidin anasına təsəlli verərək, şəhidliyindən illər keçməsinə baxmayaraq oğlunun qəhrəmanlığının dillər əzbəri olmasından söz açıb, ruhuna dualar oxuyub. Qeyd edək ki, P.Teymurov Talış yüksəkliklərinin alınmasında şəxsi igidliyi ilə fərqlənərək 3 aprel 2016-cı ildə qəhrəmancasına şəhid olub. O, toyunda özünə şəhidlik arzulamışdı. qafqazinfo)

Xəritəyə baxanda görürsən ki, Türkiyə-Çin birbaşa dəmir yolu əlaqəsi ancaq İrandan keçə bilər. Yəni Türkiyə-Çin birbaşa dəmir yolu xətti çəkiləcəksə, bunun İrandan keçməsi xaricində bir variant yoxdur. Bəli, Qars-Tbilisi-Bakı dəmir yolu vasitəsilə Gürcüstan və Azərbaycan üzərindən multimodal marşrut var, gələcəkdə Zəngəzur yolu da bu baxımdan alternativ ola bilər. Lakin multimodal layihələri rentabelli etmək asan iş deyil. Doğrudur, dəniz yolu ilə yük daşımaları daha ucuz başa gəlir, amma burada müddət məsələsi var. Dəmir yolu ilə daha az müddətdə yük daşımaq olur. Digər tərəfdən, Xəzərin özünəməxsus özəlliklərini də unutmaq olmaz. Xəzər dəniz deyil və onun dənizlərlə (dünya okeanı ilə) əlaqəsini təmin edən yeganə yol Rusiyanın Volqa-Don kanalıdır. Bu kanaldan nəhəng quru yük gəmilərinin və nəhəng tankerlərin keçməsi mümkün deyil. Bu tip quru yük gəmiləri və tankerlər nəzəri olaraq Xəzəryanı ölkələrin tərsanələrində inşa oluna bilər, amma nəzəri olaraq... Nəticədə Xəzərdən daha məhdud yük tutumlu gəmilərlə daşımaçlıq həyata keçirilir ki, bu da həm qısa müddətdə böyük miqdarda yüklər daşımağı qeyri-mümkün edir, həm də xərcləri artırır. Xəzərdəki limanların buraxıcılıq imkanları da önəm daşıyan faktordur. Bundan başqa, Xəzərdə suyun çəkilməsi problemi də var ki, əgər bu proses davam edərsə, gələcəkdə buradakı liman infrastrukturları üçün ciddi təhlükə yaradacaq. Sozcu.az xəbər verir ki, bunu siyasi şərhçi Şahin Cəfərli bildirib. “Amma ümumilikdə qeyd edim ki, Kılıçdaroğlunun açıqladığı ideya real görünmür. Ən azı ona görə ki, Doğu Türküstan məsələsini gündəmə gətirib, uyğurların hüquqlarının təminatı məsələsini qaldırdığınız anda Çin nəinki sizinlə birlikdə hər hansı layihədə yer almaz, hətta mövcud münasibətlər də pisləşər. Türkiyə Çin kimi qüdrətli dövlətin qarşısında şərt qoyacaq durumda deyil. (Xatırlatmaq yerinə düşər ki, Ərdoğan hökuməti, eləcə də Türk Dövlətləri Təşkilatı adlanan qurum bir dəfə də olsun uyğur məsələsini qaldırmayıb, hətta ötən illərdə Türkiyəyə pənah aparmış təxminən 300 uyğur türkü ölkədən deport edilib.) Kılıçdaroğlunun bu çıxışı ülkücü səsləri cəlb etmək niyyətindən irəli gələ bilər. Digər namizədlərlə müqayisədə ülkücülərdən ən çox səs alan namizəd Kılıçdaroğlu olsa da, hələ ki tərəddüd edən ciddi sayda ülkücü var. Başqa bir tərəfdən, İranla belə bir layihənin içində olmaq Qərbdə necə qarşılanacaq və Qərb bankları bu layihəyə kredit ayıracaqmı? Bu sual da vacibdir. (Elə burada qeyd edim ki, Qərb hökumətlərinin Kılıçdaroğlunu dəstəklədiyi barədə Azərbaycandakı təsəvvürlər doğru deyil. Qərbdəki bəzi qeyri-hökumət, akademik və media çevrələri Ərdoğanın getməsini arzulaya bilər, o ayrı məsələ. Amma qaçqın məsələsi ilə bağlı Kılıçdaroğlunun mövqeyi Qərbin Avropa qanadında ciddi narahatlıq doğurur. Digər məsələ də budur ki, hazırkı altıbaşlı müxalif koalisiya Qərb siyasi dairələrində müəyyən skeptisizm yaradır, çünki tək adamla işləmək onlara daha rahatdır, “hə” cavabını da, “yox” cavabını da 1 dəqiqə ərzində Ərdoğandan alıb, işlərinə davam edirlər.) Sonda bir məqamı da təkrarən qeyd etməyi zəruri sayıram: Azərbaycan rəsmi səviyyədə Türkiyə seçkilərinə açıq, birbaşa müdaxilələr edir, Türkiyənin daxili işlərinə qarışır. Azərbaycanın rəsmi və hökumətə yaxın mediasında (eləcə də bəzi siyasi partiya liderləri tərəfindən) səhərdən axşama kimi Türkiyə müxalifəti əleyhinə təbliğat aparılır, hətta bəzən türk müxalifət liderləri təhqir olunur və aşağılanır. Türkiyə müxalifətçiləri axmaq deyil, bütün bunlardan xəbərləri var. Bəzən deyirlər ki, İlham Əliyev Ərdoğanın qalib gələcəyini bilir və bu səbəbdən rahat davranır. Yaxşı, tutaq ki, Ərdoğan yenə qalib gəldi və hakimiyyətdə qaldı. Axı bu adam bütün insanlar kimi fanidir, bir gün vəfat edəcək. O zaman yenə hakimiyyət dəyişikliyi məsələsi gündəmə gələcək. Türkiyə kimi çox vacib tərəfdaşla, müttəfiq ölkə ilə münasibətləri bir nəfərin üzərindən qurmaq çox yanlışdır, institusional müstəviyə daha çox önəm verilməlidir ki, davamlılıq etibarlı təmin olunsun. Azərbaycan hökumətləri və siyasi qüvvələri hər zaman Türkiyədəki bütün siyasi partiyalarla normal dialoq qurmalıdır”, - Ş.Cəfərli qeyd edib.

"Rusiya Qafqazı asanlıqla, qansız əldən verməyəcək..." "Biz tezliklə dünyaya öz silahlı birləşmələrimizi göstərəcəyik..." İnquşetiya, Çeçenistan və Dağıstan Rusiya Federasiyasından qurtulmağa hazırdır... İnquş müstəqilliyi Komitəsinin mətbuat katibi Ruslan Yoluoy bəyan edib ki, Rusiya Federasiyasının daxilində azadlıq ordusu formalaşıb bir gün Putin rejiminin zəifləməsindən istifadə edərək rusiyalıları öz ərazilərindən qovacaqdır. Sozcu.az xəbər verir ki, bu barədə o, "Freedom"  telekanalının efirində bəyan edib. "Biz hamımız bütün üsullarla bu terrorçu dövlətin parçalanmasına hədəflənmişik. Bizdən başqa, çeçenlər özləri fəaliyyətdədir, biz həmçinin öz dağıstanlı qardaşlarımızla əlaqədəyik. Biz gələcəkdə hansısa ümumi planlar qurmaq və buna nail olmaq əzmindəyik", - Ruslan Yoluoy deyib. O, qeyd edib ki, İnquş müstəqilliyi Komitəsi bu yaxınlarda azadlıq ordusuna qəbul elan edib, bundan sonra "hər gün İnquşetiyanın müstəqilliyi uğrunda döyüşmək istəyən çoxlu sayda sorğular gəlməyə başlayıb. "Bizdə hərbi bölmələr formalaşıb, tezliklə, yaxın gələcəkdə biz dünyaya bu silahlı birləşmələri göstərəcəyik", - Youloy vəd edib. O, vurğulayıb ki, Ukrayna ordusu öz ərazilərinin azad edilməsi uğrunda döyüşür və Rusiya Federasiyasının tərkibində olan azsaylı xalqları azad etmək üçün "Putini devirmək və ya Rusiyanın torpaqlarına girmək niyyətində deyil". "Bu gün bizim vəzifəmiz azadlıq qüvvələrini formalaşdırmaq və bu dövlətin gələcək qaçılmaz parçalanmasına hazırlaşmaqdır", - İnquş  müstəqilliyi Komitəsinin nümayəndəsi deyib. O, əmin edib ki, İnquşetiyanın nə Putinlə, nə də bu yaxınlaradək hər hansı azadlıq hərəkatlarına qarşı çıxan rusiyalı müxalifətçiləri ilə gələcəyi yoxdur. Onun sözlərinə görə, Qafqaz və Rusiyanın yüzilliklər ərzində qarşıdurması Rusiyanın ondan asanlıqla əl çəkməyəcəyini göstərir. "Xodorkovski də vaxtilə belə deyib, Rusiya Qafqazı asanlıqla, qansız əldən verməyəcək. Doğrudur, bu gün başqa hava oxuyur, lakin biz, əlbəttə ki, ona inanmırıq. Ona görə də biz ayıq-sayıq olacaq və onların hər hansı vədinə uymayacağıq", - Youloy əmin edib. Rusiyanın parçalanması-yaxın gələcəkdə təcavüzkarla nə baş verəcək? Atlantika Şurasının sorğusuna əsasən, xarici siyasət üzrə aparıcı ekspertlərin əhəmiyyətli hissəsi hesab edir ki, Rusiya 2033-cü ildə uğursuz dövlət olacaq və ya parçalanacaq.  Atlantika Şurası tərəfindən keçirimiş sorğuya görə, ekspertlərin 46 faizi bəyan edib ki, Rusiyanın iflası və ya parçalanması yaxın 10 ilə baş verə bilər. Ekspertlərin 40 faizi Rusiya dövlətinin bir sıra səbəblərdən, o cümlədən "inqilab, vətəndaş savaşı və ya siyasi dezinteqrasiyadan" parçalana biləcəyini deyib. Ukraynanın müdafiə naziri Aleksey Reznikov da hesab edir ki, müharibədən sonra Rusiya məcburiyyət olmadan milli, müstəqil sibyektlərə bölünəcək. Onun sözlərinə görə, müharibədən sonra Rusiyanı parçalamağa məcbur etmək lazım gəlməyəcək, onu özü parçalanacaq.

Putin uzun illər hipersəs raket, “super silah”la fəxr edirdi. Dünyaya cizgi filmləri göstərirdi, deyirdi ki, bütün HHM sistemlərini keçə bilərik. Amma göründü ki, “Patriot” “Xəncər”i vura bilər. Əlvida, məğlubedilməz silah! Sozcu.az xəbər verir ki, bunu ukraynalı hərbi ekspert Oleq Jdanov deyib. Onun sözlərinə görə, Qərbdə, Ukraynada hər kəs “Patriot”la “Xəncər”in qarşılaşmasını gözləyirdi: “Bu onu göstərdi ki, X-22, aeroballistik, köhnə, sovet raketlərini də vura bilərik”.

Rusiya üçün ən pis proqnoz hələ qabaqdadır. Sozcu.az xəbər verir ki, bunu Ukrayna Milli Təhlükəsizlik və Müdafiə Şurasının katibi Aleksey Danilov deyib. "Hazırda Rusiya üçün fəlakət baş verir və ən pisi qarşıdadır - məğlubiyyət, dağılma, məhkəmə, təzminat...” - o bildirib.

Ukrayna rus işğalçıları ilə tam qələbəyə qədər mübarizə aparacaq. Sozcu.az xəbər verir ki, bunu Ukrayna Baş Kəşfiyyat İdarəsinin rəhbəri Kirill Budanov rusiyalı təbliğatçıların öldürülməsi ilə bağlı jurnalistlərin suallarını cavablandırarkən deyib. “Bu məsələni davam etdirməyin. Deyə biləcəyim budur ki, Ukraynanın tam qələbəsinə qədər dünyanın istənilən yerində rusları öldürürük və öldürəcəyik”, - Budanov bildirib. Qeyd edək ki, ötən gün Nijni Novqorodda rus yazar Zaxar Prilepinin avtomobili magistral yolda partladılıb. Onun sürücüsü ölüb, özü isə yaralanıb. Hərbi müxbir Maksim Fomin (Vladlen Tatarski) 3 apreldə öldürülmüşdü.

Mayın 7-si saat 10 radələrində Xocalı Rayon Polis Şöbəsinə Zəfər Yolunun Xocalı rayon Baharlı kəndi ərazisindən keçən hissəsində yol nəqliyyat hadisəsi baş verməsi barədə məlumat daxil olub. DİN-in Mətbuat Xidmətinin Gəncə regional qrupunun baş inspektoru polis kapitanı Eşqin Qasımov Sozcu.az-a bildirib ki, dərhal polis əməkdaşları hadisə yerinə gələrək müvafiq araşdırmalar aparıb. Onun sözlərinə görə, ilkin araşdırmalar zamanı məlum olub ki, Şuşa şəhər sakini 1959-cu il təvəllüdlü Hüseynəli Süleymanov idarə etdiyi İSUZU markalı yük avtomobili ilə idarəetməni itirərək avtomobili aşırıb. “Hadisə nəticəsində sürücü H. Süleymanov və sərnişin, İmişli rayon sakini 1985-ci il təvəllüdlü Rəşad Nuriyev hadisə yerində ölmüş, digər sərnişin, 1982-ci il təvəllüdlü İmişli rayon sakini Ramil Abdullayev isə müxtəlif dərəcəli bədən xəsarətləri alıb. Dərhal yaralı xəstəxanaya yerləşdirilib, faktla bağlı araşdırmalar davam etdirilir”.

Son sutka ərzində Ukrayna aviasiyası Rusiya ordusunun hərbi texnikasının və şəxsi heyətinin cəmləşdiyi ərazilərə 7 zərbə endirib. Rusiyaya məxsus zenit-raket kompleksinə də zərbə endirilib. Sozcu.az-ın məlumatına görə, bu barədə Ukrayna Silahlı Qüvvələrinin Baş Qərargahı mayın 7-də səhər saatlarında məlumat yayıb. Qeyd olunur ki, gün ərzində Müdafiə Qüvvələri 7 hücum və 8 kəşfiyyat xarakterli PUA-nı da məhv edib. Bundan başqa, raket qoşunları və artilleriya bölmələri komanda məntəqəsini, düşmənin silah və hərbi texnikasının cəmləşdiyi 3 ərazini, həmçinin atəş mövqeyində olan artilleriya bölməsini vurub.

Ukraynada hərbi əməliyyatlar başlayandan indiyədək Rusiya Silahlı Qüvvələrinin 194 430 hərbçisi məhv edilib. Sozcu.az xarici KİV-ə istinadən xəbər verir ki, bu barədə Ukrayna Silahlı Qüvvələrinin Baş Qərargahı məlumat yayıb. Bildirilib ki, son sutka ərzində 660 Rusiya hərbçisi zərərsizləşdirilib. Bundan əlavə, Rusiya Silahlı Qüvvələrinin digər döyüş itkiləri 3 723 tank, 7 248 zirehli maşın, 2 572 operativ-taktiki PUA, 3 010 artilleriya sistemi, 306 hava hücumundan müdafiə sistemi, 308 təyyarə, 294 helikopter, 5 952 avtomobil və tanker, 947 qanadlı raket, 18 gəmi və kater, 380 xüsusi texnikadan ibarətdir.

Ukrayna ordusu müttəfiqlərlə razılaşdırılmış bütün silahları alanda əks-hücuma hazır olacaq. Bunu Ukrayna Prezidenti Volodimir Zelenski deyib. Onun sözlərinə görə, Ukrayna müttəfiqlərlə razılaşdırılmış silahları aldıqdan sonra hücuma keçməyə hazır olacaq: “Xüsusilə, vaxt da hava şəraitindən asılı ola bilər, çünki cəbhə xətti boyunca yer mövsümi olaraq nəmdir. Böyük maneələrdən xəbərdar olan Ukrayna rəsmiləri Qərbdəki havadarlarından əlavə silah tələb etməkdə davam edir”. Ukraynanın müdafiə naziri Oleksiy Reznikov isə qeyd edib ki, ilk hücum birləşmələri əməliyyatın başlanması üçün 90%-dən çox hazırdır, lakin bəzi xüsusi bölmələr hələ də xaricdə təlim proqramlarını tamamlayır.

Türkiyə Milli Kəşfiyyat Təşkilatı (MİT) İraqda xüsusi əməliyyat keçirib. Bu barədə “Anadolu” agentliyi məlumat yayıb. Əməliyyat zamanı qırmızı blütenlə axtarışda olan PKK terror təşkilatının xüsusi təyinatlı qrupuna məsul Eyvaz Beyaz İraqın Dohuk-Gara bölgəsində zərərsizləşdirilib.

"Biz bütün insanlarımızı Rusiya əsirliyindən qaytarmalıyıq və qaytaracağıq! Əsir mübadiləsi ilə məşğul olan komandamıza təşəkkür edirik". Sozcu.az xəbər verir ki, bunları Ukrayna Prezidenti Volodimir Zelenski deyib. "Bu gün (dünən - red) komandamız daha 45 döyüşçümüzü Rusiya əsirliyindən geri qaytara bilib: Ukraynanın 42 kişi və 3 qadın müdafiəçi. Onların hamısı Azovstalı müdafiə ediblər, Milli Qvardiyaçılardır. 35 sıravi əsgər və çavuş, on zabit", - Zelenski əlavə edib.

Ukrayna Silahlı Qüvvələri bəyan edib ki, ilk dəfə olaraq Putinin "əlçatmaz" raketini vurub "Ukrayna xalqını bu tarixi hadisə münasibətilə təbrik edirəm!.." "Kinjal" raketi bu yaxınlarda Ukraynaya tədarük edilən Amerikanın "Petriot" sistemi ilə vurulub... Ukrayna Hava Hücumundan Müdafiə sistemi ilk dəfə olaraq Rusiyanın hipersəsli "Kinjal" X-47 raketini vurub.  Sozcu.az xəbər verir ki, bu barədə Ukrayna Hava Qüvvələrinin komandanı general Nikolay Oleşşuk bəyan edib. Məlumatı "dw.com" nəşri yayıb. "Ukrayna xalqını bu tarixi hadisə münasibətilə təbrik edirəm! Bəli, biz "analoqu olmayan" "Kinjal"ı vurmuşuq!" - o Teleqram-kanalında yazıb.  Oleşşuk dəqiqləşdirib ki, bu, Kiyev vilayətində mayın 4-də gecə hücumu zamanı baş verib. X-47 raketi Rusiya ərazisindən MiQ-31K təyyarəsindən buraxılıb, o, bu yaxınlarda Ukraynaya tədarük edilən Amerikanın "Petriot" sistemi ilə vurulub. "Kinjal"ı xatırladan vurulan raketin qalıqları haqqında məlumat Ukrayna mətbuatında hələ dünən üzə çıxıb. Lakin rəsmi şəxslər bu məlumatları təkzib edib. Oleşşuk isə yazıb ki, vaxtından əvvəl informasiyanı dərc etmək lazım deyil, çünki düşmən bundan istifadə edilə bilər: "Biz nəyi, harada, nə ilə və nə zaman vurduğumuz haqqında mütləq danışacayıq! Bunu vaxtı çatanda edəcəyik".  Ötən ilin avqustunda Rusiyanın müdafiə naziri Sergey Şoyqu deyib ki, Rusiya Ukraynada döyüş əməliyyatlarında üç dəfə hipersəsli "Kinjal" raketindən istifadə edib. "Və hər üç halda o, özünün gözəl xüsusiyyətlərini göstərib", - Şoyqu bəyan edib. Onun sözlərinə görə, "həm hipersəsli, həm bu cür sürətə malik, həm də belə nüfuzedici imkanlarl olan" raket hələ heç kimdə yoxdur, "Kinjal"ı nə aşkar etmək, nə də ələ keçirmək mümkündür.  "Kinjal" qanadlı yox, aeroballistik raketdir. İndiyədək Ukraynanın HHM sistemləri bu tip raketlərə qarşı faktiki olaraq aciz olub. Lakin mütəxəssislər iddia edir ki, "Petriot" sistemi bu tip raketləri vurmaq qabiliyyətinə malikdir.

Türkiyənin Hatay vilayətində ağır yol-nəqliyyat hadisəsində 12 nəfər ölüb. Bu barədə ölkənin səhiyyə naziri Fahrettin Koca tviter hesabında yazıb. Nazir qeyd edib ki, zəncirvari qəzada 31 nəfər xəsarət alıb. Onlardan 3-nün vəziyyəti ağırdır. Hadisə yerinə 22 təcili yardım maşını cəlb edilib.   Qeyd edək ki, yük avtomobili əsgərləri yola salan izdihama çırpılıb. Yaxınlıqda olan iki mikroavtobus da zərbənin təsirindən yanmağa başlayıb.

Bir müddət əvvəl qoşulduğu imtahanda üzərində telefon aşkar edilən Nur Əhmədovla bağlı yeni qərar verilib.  Sozcu.az xəbər verir ki, bu haqda Nurun anası, aktrisa Ellada Sarvan sosial şəbəkə hesabında məlumat yayıb.  O bildirib ki, qızı imtahana buraxılacaq: “Sentyabrda təkrar imtahan olacaq. DİM məsələni araşdırıb qərar verdi. Bir neçə gün öncə kədərimi sizinlə bölüşdüyüm kimi, indi də sevincimi bölüşmək istədim”. Bir neçə gün əvvəl imtahanda iştirak edən qızı, Zərifə Əliyeva adına Liseyin 9 sinif şagirdi Nur Əhmədovanın imtahana buraxılmamasından şikayətçi olan aktrisa artıq övladı üçün yenidən imtahan keçiriləcəyini qeyd edib: “İmtahan günü imtahan rəhbəri protokolda hadisəni düzgün qeyd etdiyinə görə bu gün müsbət cavab ala bildik. Mən şəxsən Məleykə Abbaszadəyə təşəkkürümü bildirirəm”. Qeyd edək ki, Nur Əhmədova imtahana girməzdən qabaq gödəkçəsinin cibində telefon aşkar edildiyi üçün imtahana buraxılmamışdı. Ellada Sarvan şikayətlənərək bunun ədalətsiz yanaşma olduğunu bildirmişdi. Dövlət İmtahan Mərkəzi isə şagirdin imtahana yenidən buraxılmasının mümkünsüz olduğu barədə məlumat yaymışdı.

Fransanın Avropa və xarici işlər naziri Ketrin Kolonnanın Azərbaycanın Qarabağ bölgəsini yanlış olaraq “Dağlıq Qarabağ” şəklində Azərbaycanın daxilində “anklav” adlandırması Azərbaycanın suverenliyinə və ərazi bütövlüyünə, eləcə də bu bölgədən kütləvi etnik təmizlənməyə məruz qalmış azərbaycanlıların hüquqlarına hörmətsizlikdir. Demokrat.az xəbər verir ki, bu barədə Azərbaycan Xarici İşlər Nazirliyinin Mətbuat Xidməti İdarəsinin rəisi Ayxan Hacızadə Fransanın Avropa və xarici işlər naziri Ketrin Kolonnanın “France Inter” ictimai radiokanalına müsahibə zamanı Azərbaycana qarşı səsləndirdiyi fikirlərə cavab olaraq deyib. Onun sözlərinə görə, Qarabağ bölgəsi Azərbaycanın beynəlxalq səviyyədə tanınmış suveren ərazisi və tərkib hissəsidir: "Bununla yanaşı, Azərbaycanın öz suveren ərazisində yaratdığı və erməni sakinlərin artıq şəffaf şəkildə hər iki istiqamətdə keçməyə başladığı “Laçın” sərhəd nəzarət-buraxılış məntəqəsinin guya yolu blokadada saxladığı barədə Fransa tərəfinin iddiasının heç bir əsası yoxdur. Azərbaycan öz sərhədlərinin mühafizəsini və bu sərhədlərdən keçidi ölkə qanunvericiliyinə və beynəlxalq səviyyədə qəbul edilmiş qaydalara uyğun olaraq həyata keçirir. Fransa tərəfi sülhə və sabitliyə xidmət etməyən bu kimi təhrikçi və təxribatçı fikirlərə son qoymalıdır".