Ukrayna müharibənin 480-ci günü üçün Rusiya ordusunun itkiləri haqda məlumatı yeniləyib. Sozcu.az xəbər verir ki, bu barədə Ukrayna Baş Qərargahı məlumat yayıb. Məlumata əsasən, Rusiya indiyə qədər 219 820 hərbçi, 3984 ədəd tank, 7729 ədəd zirehli döyüş maşını, 3847 ədəd artilleriya sistemi, 610 ədəd RYAS (reaktiv yaylım atəş sistemi), 364 hava hücumundan müdafiə sistemi, 314 ədəd hərbi təyyarə, 304 ədəd helikopter, 6571 ədəd avtomobil texnikası, 3371 ədəd PUA, 1211 qanadlı raket, 18 gəmi/qayıq, 522 xüsusi avadanlıq itirib.

Luqansk vilayətinin işğal olunmuş ərazilərində ruslar cəbhə xəttindən qaçırlar. Sozcu.az xəbər verir ki, bu barədə Ukrayna Baş Qərargahının yaydığı məlumatda qeyd olunub. Məlumata görə,Novorassoş yaşayış məntəqəsi yaxınlığındakı meşə massivində fərarilərin axtarışlarına başlanılıb. Axtarışlarla Rosqvardiyanın əməkdaşları məşğul olur. Ukrayna Baş Qərargahının spikeri Aleksey Qromov bildirib ki, təkcə Luqansk vilayətində gündəlik 50-dək fərari saxlanılır.

Xerson vilayətinin Geniçesk rayonunda ruslara məxsus silah anbarında partlayışlar baş verib. Sozcu.az xəbər verir ki, bu barədə Mariupol meri Pyotr Andryuşenko məlumat verib. Məlumata görə, partlayış Rıkovo qəsəbəsində rusların silah anbarının yerləşdiyi elevatorun ərazisində baş verib. Bildirilir ki, partlayışlar həlkə də davam edir. Silah anbarını Ukrayna aviasiyasının burduğu bildirilir.

Şəkidə evdə qaz sızması nəticəsində partlayış olub, 3 nəfər ağır xəsarət alıb. Sozcu.az-ın məlumatına görə, hadisə bu gün rayonun Aşağı Göynük kəndində baş verib. Belə ki, partlayış zamanı evdə olan 2000-ci il təvəllüdlü Yusifova Şəlalə Nəsib qızı, 2021-ci il təvəllüdlü Soltanlı  Məhəmməd Nicat oğlu və 2020-ci il təvəllüdlü Soltanlı Əli Nicat oğlu ağır xəsarət alaraq Şəki Rayon Mərkəzi Xəstəxanasına yerləşdiriliblər. Yaralıların vəziyyətlərinin ağır olduğu bildirilir. Faktla bağlı araşdırma aparılır.

Ukrayna qüvvələri əks-hücum əməliyyatı çərçivəsində cənub sektorunda irəliləyiş əldə edib. Sozcu.az xəbər verir ki, bu barədə Ukrayna hərbi rəsmiləri məlumat yayıb. Ukrayna müdafiə nazirinin müavini Anna Malyar "Telegram" kanalında bildirib ki, qoşunlar bir neçə istiqamətdə irəliləmək üçün aktiv tədbirlər görür. "Praktiki olaraq bölmələrimizin cənubda hücum etdiyi bütün sektorlarda taktiki uğurları qeydə alıblar", - Malyar bildirib və əlavə edib ki, Ukrayna hərbçiləri yavaş-yavaş, hazırda hər istiqamətdə 2 km-ə qədər irəliləyirlər. Ukrayna quru qoşunlarına rəhbərlik edən general-polkovnik Aleksandr Sırski ölkənin şərqdəki vəziyyəti gərgin olaraq xarakterizə edib, Rusiya Baxmuta artilleriya və aviasiya toplayıb. "Biz ayrı-ayrı istiqamətlərdə, dominant yüksəklikləri və meşə zolaqlarını tutaraq, düşməni tədricən Baxmutun kənarından sıxışdırıb çıxarmaq məqsədi ilə hücum hərəkətlərini davam etdiririk. Bunu anlayan düşmən bölmələri ümidsiz müqavimət göstərdilər", - Sırski "Telegram"da bildirib. Kiyev rəsmilərinin sözlərinə görə, Ukrayna ordusu əks-hücum əməliyyatında cəmi bir həftə ərzində təxminən 100 kvadrat kilometr əraziyə nəzarəti bərpa edib. Cənubi Tavriya sektorunda Ukrayna qoşunlarının komandanı, briqada generalı Aleksandr Tarnavskyi bildirib ki, sektorda son 24 saat ərzində 36 döyüş əməliyyatı və 578 hücum olub. Ukrayna Prezidenti Volodimir Zelenski axşam videomüraciəti zamanı əks-hücum zamanı azad edilən ərazilərin önəmindən danışıb. “Hər bir əsgər, atdığımız hər yeni addım, düşməndən azad edilmiş Ukrayna torpağının hər metri böyük əhəmiyyət kəsb edir”, - deyə o qeyd edib. Rusiya isə Ukraynanın əks-hücumun nəticələrini şərh etməyib və son 24 saat ərzində Kiyev qüvvələrinə böyük itkilər verdiyini bildirib.

İyunun 17-si saat 16:00 radələrində Ermənistan silahlı qüvvələrinin bölmələri Basarkeçər rayonunun Yuxarı Şorca yaşayış məntəqəsi istiqamətində yerləşən mövqelərindən Azərbaycan Ordusunun Kəlbəcər rayonunun Bəzirxana yaşayış məntəqəsi istiqamətində yerləşən mövqelərini atıcı silahlardan intensiv atəşə tutub. Nazirlikdən Sozcu.az-a verilən məlumatat görə, bölmələrimiz tərəfindən qeyd olunan istiqamətdə adekvat cavab tədbirləri görülüb.

İranın Kürdüstan vilayətində İslam İnqilabı Keşikçiləri Korpusu (SEPAH) qüvvələri ilə “PJAK” arasında toqquşma baş verib. Sozcu.az xəbər verir ki, bu barədə "Tasnim" məlumat yayıb. Məlumata əsasən, Mərivanın Darehtafi və Kani Sənan kəndlərində “PJAK” üzvləri ilə baş vermiş toqquşma nəticəsində bir SEPAH zabiti öldürülüb.

Milli Məclisin deputatları - Avropa Şurası Parlament Assambleyasında (AŞPA) nümayəndə heyətinin rəhbəri, parlamentin Beynəlxalq münasibətlər və parlamentlərarası əlaqələr komitəsinin sədri Səməd Seyidov, nümayəndə heyətinin üzvləri Rafael Hüseynov, Kamal Cəfərov, Erkin Qədirli, Könül Nurullayeva, Pərvin Kərimzadə, Nigar Arpadarai qurumun yay sessiyasında iştirak etmək üçün iyunun 18-də Fransanın Strasburq şəhərinə səfər edəcəklər. MM-dən Sozcu.az-a verilən xəbərə görə, AŞPA-nın yay sessiyasında Türkiyədə parlament və prezident seçkilərinin müşahidəsinin nəticələri, transmilli repressiyanın qanunun aliliyinə və insan hüquqlarına təhdidi, səhiyyədə sağlamlığa vahid yanaşma, miqrantların və qaçqınların sosial inteqrasiyası, rəqəmsal texnologiyalara bərabər çıxışın təşviqi və digər məsələlərə baxılacaq. Tədbirdə Böyük Britaniyanın insan hüquqları qanunvericiliyində islahatlar, Ukraynada vəziyyət, regional təhlükəsizlik məsələləri müzakirə olunacaq. Yığıncaqda, habelə Avropa Şurasının 2024-2027-ci illər üçün büdcəsi və prioritetləri, Avropa Şurası Parlament Assambleyasının 2024-2025-ci illər üçün xərcləri barədə məruzələr, qurumun Büro və Daimi Komitəsinin fəaliyyəti ilə bağlı hesabatlar dinləniləcək. Səfər iyunun 25-də başa çatacaq.

“Qalib gəlmək üçün uzaqmənzilli silahlara ehtiyacımız var”. Sozcu.az xəbər verir ki, bunu Ukrayna müdafiə nazirinin müavini Vladimir Qavrilov deyib. O bildirib ki, Ukrayna Silahlı Qüvvələri artıq döyüş meydanında təşəbbüsü ələ alıb: “Amma qələbə üçün düşmənə uzaqdan zərbələr endirməliyik. Bunun üçün isə uzaqmənzilli silahlara ehtiyacımız var”. V.Qavrilovun sözlərinə görə, Ukraynanın bütün hərbi planları hesablamalara uyğun gedir. Nazir müavini həmçinin vurğulayıb ki, F-16 qırıcı təyyarələrinin yaxın zamanlarda Ukraynaya təhvil veriləcəyinə inanır.

Lənkəranda 3 nəfərin xəsarət alması ilə nəticələnən yol qəzası baş verib. Sozcu.az-ın məlumatına görə, hadisə Ələt-Astara magistralının Lənkəran rayonun Qurumba kəndi ərazisindən keçən hissəsində qeydə alınıb. Rayonun Cil kənd sakini 2002-ci il təvəllüdlü Sübhan Salam oğlu Həbibzadənin idarə etdiyi traktor Astara rayonunun Şümrüd kənd sakini, 1990-cı il təvəllüdlü Nahid Şadoğlan oğlu​ Məmmədovun​ idarə etdiyi ​“Mitsubishi” pikap markalı avtomobilə çırpılıb. Zərbənin təsirindən traktor aşıb. Traktorun sürücüsü, eləcə də pikapda olan sərnişinlər,​ Astara rayonunun Pəlikeş ​kənd sakinləri, sürücünün qardaşı​ 1986-​cı il təvəllüdlü Mövlud​ Şadoğlan oğlu Məmmədov və həmkəndlisi 1978-​ci il təvəllüdlü Araz Qulamhüseyn oğlu Əzimov​ müxtəlif dərəcəli ​bədən xəsarətləri alıblar. Yaralılar Lənkəran rayon Mərkəzi Xəstəxanasına yerləşdiriliblər. Faktla bağlı araşdırma aparılır.report

Bakı şəhər sakininin bank kartı oğurlanıb. Bu barədə Sozcu.az-a Daxili İşlər Nazirliyindən məlumat verilib. Bildirilib ki, paytaxt sakini olan bir nəfər iyunun 9-da Binəqədi rayonu ərazisindəki kafelərin birində cüzdanından 90 manat pulunun və bank kartının oğurlanması, sonradan həmin kartından 493 manat dəyərində alış-veriş edilməsi barədə polisə müraciət edib. Binəqədi RPİ 7-ci Polis Bölməsi əməkdaşlarının keçirdikləri əməliyyat tədbiri nəticəsində oğurluq əməlini törətməkdə şübhəli bilinən Bakı şəhər sakini, əvvəllər məhkum olunmuş Mehdi Cəlilov müəyyən olunaraq saxlanılıb. Araşdırma aparılır.

Ukrayna müharibədə təşəbbüsü ələ keçirir, Rusiya isə özünü müdafiə edir. Lakin qalibiyyət üçün 200 km-ə qədər uzaqmənzilli dəqiq silahlar lazımdır. Sozcu.az xəbər verir ki, bunu Ukrayna müdafiə nazirinin müavini Vladimir Qavrilov deyib. “Bütün hərbi planlarımız qiymətləndirmələrə uyğun həyata keçirilir. Müasir döyüşlərdə əsas məsələ düşmənin mövqeyini bilmək, eləcə də uzaq məsafələrə yüksək dəqiqliklə zərbələr endirmək üçün situasiyaya yiyələnməkdir”, - Qavrilov bildirib.

Neftçalada Kürdə batan üç yeniyetmə barədə bəzi məqamlar məlum olub. Sozcu.az “Qafqazinfo”ya istinadən xəbər verir ki, onların hər biri rayonun Beşdəli kənd sakinləridir. 18 yaşlı Elşən Əhmədov və 16 yaşlı Siyasət Əhmədov qardaşdır. S.Əhmədov orta məktəbi bu il bitirib, o, üç gün əvvəl məzun gününü qeyd edib. Çayda boğulan Teymur Məlikov isə Dövlət Sərhəd Xidmətinə (DSX) daxil olan təhsil müəsisələrindən birinin kursantıdır. Yeniyetmələr ötən gün Kür çayının Neftçala rayonu, Cəngən kəndindən keçən hissəsində çimərkən boğulublar. Onların cəsədləri FHN tərəfindən tapılaraq ailələrinə təhvil verilib. 

Qafqaz Müsəlmanları İdarəsinin (QMİ) Gürcüstandakı nümayəndəliyinin rəhbəri olmuş Əli Əliyev işdən çıxarılıb. Bu barədə Sozcuaz-a QMİ-nin Mətbuat Xidmətindən məlumat verilib. Rəsmi məlumata görə, Ə.Əliyevin səlahiyyət müddəti başa çatıb. “Onun səlahiyyət müddətinin başa çatması ilə əlaqədar 2023- cü ilin yanvarında fəaliyyətinə müvafiq əmrlə xitam verilib. Fəaliyyət müddətinin uzadılması vəzifəsinin öhdəsindən gələ bilməməsi, işində yol verdiyi nöqsanlar səbəbindən məqsədəuyğun sayılmayıb”, - QMİ-nin məlumatında vurğulanıb.

Türk dünyasının böyük ozanı, əslən Güney Azərbaycandan olan sənətçi Araz Elsəsin Bakıda konserti planlaşdırılır. Konsertin sentyabrın 30-da Heydər Əliyev Sarayında keçirilməsi nəzərdə tutulur. Bu, dünya şöhrətli azərbaycanlı ozan Araz Elsəsin ilk solo konserti olacaq. Türk dünyasının sevilən siması, Azərbaycan musiqisinin, mədəniyyətinin, incəsənətinin, ədəbiyyatının vurğunu və aşiqi ozan Araz Elsəsin konserti “Sevgili yurdum” adlanır. Kulis.az xəbər verir ki, türk dünyasının böyük ozanı konsertdə sevilən ifaları ilə yanaşı, türkçülüyü, vətənpərvərliyi tərənnüm edən yeni əsərlərini təqdim edəcək. Biletləri iTicket.az saytı və şəhərin kassalarından əldə etmək mümkündür.

NATO-nun Baş katibi Yens Stoltenberqin daha bir il vəzifədə qalması istənilə bilər. Sozcu.az xəbər verir ki, bu barədə "Röyters" mənbəyə istinadən məlumat yayıb. Adının açıqlanmasını istəməyən ABŞ rəsmisinin sözlərinə görə, Bayden administrasiyası da belə bir təklifi nəzərdən keçirir: "Hazırda onu əvəz etmək üçün Alyans daxilində konsensus yoxdur".

Müğənni Nura Suri ilə müsahibəni təqdim edirik:  - Sosial şəbəkələrdə statuslarınız çox cəsarətlidir. Qorxduğunuz, çəkindiyiniz hallar yoxdur? - Tək statuslarım yox, özüm də cəsarətliyəm... Heç vaxt sözümü deməkdən çəkinmirəm. Haqsız nəsə görəndə susmuram. Nədənsə xoşum gəlməzsə, onu deyərəm. İnsanlar söz deməkdən çəkinirlər, arxada danışmağı sevirlər. Mənə başqalarının şəxsi həyatı heç vaxt maraqlı olmayıb. Özümə qarşı nəsə olanda anında insanın üzünə qarşı deyirəm, ya münasibəti bitirərəm, ya da davam edərəm. Düzdür, heç kim mələk deyil. Səhvsiz insan yoxdur, hamımızın müəyyən qədər səhvi var. Sadəcə insanların yaxşı və pis xüsusiyyətlərini tərəziyə qoyuram və fikirləşirəm ki, bu insanı ya olduğu kimi qəbul etməli, ya da ondan uzaqlaşmalıyam. Fikir versəm ki, mənimlə bir, başqasıyla ərqli davranır, elə insandan qaçıram. Ümumiyyətlə, çox insan olan yerdə panikaya düşürəm. Enerjiyə önəm verirəm. Əhatə dairəm o qədər də böyük deyil. - Nə vaxtsa statusunuza görə problem yaşamısınızmı? - Xeyr. Kimlərsə deyə bilər ki, niyə status yazmısan, başın ağrıya bilər və sair. Yenə də deyirəm ki, haqsızlığa dözən insan deyiləm. Mənim dövlət, hakimiyyət, müxalifət və siyasətlə onsuz da işim yoxdur. Mən sadəcə olaraq tanınmış insan olduğuma görə sözüm daha tez çatacaq, saytlar yazacaqlar deyə fikrimi deməkdən çəkinmirəm. Kimlərinsə problemi olanda görməzdən gələ bilmirəm. Belə hal ola bilməz. Yaxşını deyəndə onu qabartmıram. - Sanki şou-biznesdə sizdən çəkinirlər. - Bunu hiss etməmişəm, çəkinirlərsə nə xoş mənə. - Yaxın günlərdə millət vəkilliyinə namizəd olacağınızı açıqladınız. - Bəli, iki ildən sonra seçkilər olmalıdır. - Müğənni və millət vəkili olmaq... - Niyə də olmasın, əslində, bütün dünyada bu hal var. Mən həm aparıcı, həm də müğənniyəm. Sözümü deməyi bacarıram, insanların probleminə biganə yamaşmıram. Düşünürəm ki, mənim Milli Məclisdə həm mədəniyyət sahəsində, həm də ümumilikdə bir çox problemləri işıqlandırıb, onların həllini tapmasına yol aça bilərəm. - Sizi incidənləri bağışlaya bilirsiniz? - Məni heç kim incidə, xətrimə dəyə bilməz. Kim nə edirsə, öz daxilindəkini göstərir. O mən deyiləm. Ümumiyyətlə, heç nəyi özümə problem edən adam deyiləm. İnsanları başa düşməyə çalışıram. Hər şeyə fikir vermirəm və elə olsaydım, bu vəziyyətdə qalmazdım. - Gözəl və baxımlı xanımsınız. Özünü sizə bənzədənlərə münasibətiniz necədir? - Özümü heç vaxt gözəl hesab etməmişəm. O qədər gözəl olsaydım, bu gün gözəl olmaq üçün bu qədər əziyyət çəkməzdim. Formada qalmaq və gözəl görünmək üçün daim idmanla məşğul olmaq kimi üsullara əl atmazdım. Bunlara vaxtım çox gedir. - Yorulduğunuz hallar olurmu? - Əlbəttə, olur. İnsanıq... - Onda nə edirsiniz? - Mən özümə qapanmağı çox sevirəm. Günlərlə evdən çıxmaya bilərəm. Dənizkənarı parka çıxa və ancaq kitablar oxuya bilərəm. Məndə özünə qapanmaq və kitab oxumaq kimi xüsusiyyətlər uşaqlıqdan var. Yəni real həyatdan uzaqlaşmağı bacarıram. Buna meditasiya deyə bilərsiniz. (teleqraf.com) 

Türkiyə Prezidenti Rəcəb Tayyib Ərdoğanın Azərbaycan ailələrində 5 uşaq olması ilə bağlı çağırışı geniş müzakirələrə səbəb oldu. Bəziləri çoxuşaqlılığın tərəfini tutdu, bəziləri bunun qadını robot olaraq görmək olduğunu iddia etdi.  Xalq artisti Afaq Bəşirqızı da açıqlamasında  çoxuşaqlı ailələrin tərəfdarı olduğunu qeyd etdi və bəzi qadınları sərt şəkildə qınadı: "Fiqura qorumaqla ailə olmur. Onlara "ailə” deməzlər. Onlar həftəlikdirlər. O adam ki ərə gedib, istəyir fiqurası yaxşı olsun, uşaq da doğmur, onun ailə həyatı ancaq həftəlik ola bilər". Məsələ ilə bağlı Yenisabah.az-a danışan hüquq müdafiəçisi Novella Cəfəroğlu bildirib ki, ailələrin çoxuşaqlı olmasındansa, az uşaqla daha yaxşı tərbiyə və təhsilin verilməsinin tərəfdarıdır: "Ailə quruculuğu deyə bir şey var. Əgər ailə 5 uşağı saxlaya biləcəksə, onda bu qədər uşaq dünyaya gətirə bilər. 1-2 uşağı dünyaya gətirib ona mükəmməl tərbiyə, təhsil verib, mükəmməl şəkildə cəmiyyətə qazandırmaq daha vacibdir. Yoxsa dünyaya 5 uşaq birdən gətirib işsiz vəziyyətdə onları yetim kimi saxlamaq hesab edirəm ki, düzgün deyil.  Bu məsələyə fiqura söhbətinin isə aidiyyatı yoxdur. Azərbaycan cəmiyyəti onsuz da hər zaman çoxuşaqlı olmağı sevib. Əvvəllər hətta ziyalı ailələrdə də minimum 4 uşaq olub. Sadəcə olaraq bu gün 4-5 uşağa baxmaq çətindir.  Biz ayağımızı öz yorğanımıza görə uzatmalıyıq ki, sabah cəmiyyətə yiyəsiz uşaqlar verməyək. Onlara yaxşı təhsil, yaxşı tərbiyə verə bilməyəcəyiksə, o uşaqlar onsuz da Vətənə fayda verməyəcək. İndi isə belə uşaq böyütmək həm də maddi baxımdan çətindir. Rəcəb Tayyib Ərdoğan tövsiyə  verə bilər. Amma kimin imkanı varsa, 5 uşağı saxlaya biləcəksə, onlar uşaq sahibi olmalıdır. Əgər baxa biləcəksənsə, əlbəttə ki, çoxuşaqlı olmaq gözəldir. Yenə qeyd edirəm ki, bunu bacaran etməlidir". Ekspert uşaqpulu məsələsinə də toxunub: "Uşağına təhsil verib  yolunu açıq edə biləcək olan valideynlərin dünyaya çox uşaq gətirməsində heç bir problem yoxdur.  Əgər dövlət də uşaqpulu verəcəksə, bu da gənc ailələrə dəstək olub onları çoxuşaqlı etməyə təşviq edə bilər. Amma dövlət normal uşaqpulu verməlidir, 80-120 manat yox. Əgər uşağa baxmaq üçün normal uşaqpulu veriləcəksə, sözsüz ki, bu ailələrin çoxalmasına dəstək verə bilər".

NASA-nın (ABŞ-ın Milli Kosmos İdarəsi) "Kassini" zondonun əldə etdiyi məlumatların yeni təhlili Saturnun peyki Enseladın həyat üçün zəruri olduğunu bildiyimiz 6 əsas maddənin hamısına malik olduğunu təsdiqləyir. Sozcu.az teleqraf.com-a istinadən bildirir ki, nəticələr xarici Günəş sistemindəki digər oxşar peyklərin də yaşayış üçün yararlı ola biləcəklərini göstərir. Yeni tapıntılar təsdiqləyir ki, Enseladın yeraltı okeanında çoxlu fosfor var, bu, elm adamlarının Saturnun peyki üzərində hələ aşkar etmədiyi son kritik həyat inqrediyentidir. Kəşf Yerdən kənarda həyatın tapılması və ya olması perspektivini əhəmiyyətli dərəcədə artırır. Yerdəki bütün həyat altı vacib elementdən asılıdır: karbon, hidrogen, azot, oksigen, kükürd və fosfor. Fosfor bu günə qədər tədqiqatçıların Yerdən kənarda heç vaxt tapmadığı yeganə element idi. Saturnun altıncı ən böyük peykindən götürülən nümunələr altı elementin hamısının mövcud olduğunu təsdiqləyir. Nümunələr Saturnun halqalarından birindən götürülüb. NASA-nın "Kassini" missiyası 2017-ci ildə sona çatmazdan əvvəl həmin halqadan nümunələr toplayıb, amma ilkin tədqiqatda çox az və ya heç bir fosfor aşkar edilməmişdi. Yeni araşdırma isə Enseladda fosforun bol olduğunu və konsentrasiyaların Yerdəki okeanlardan azı 100 dəfə yüksək olduğunu göstərir. Tapıntılar göstərir ki, Enselad yaşayış üçün əlverişli ola bilər. Bura eyni xüsusiyyətlərə malik Pluton və Neptunun peyki Triton da daxildir. Planetoloq Frank Postberq deyir ki, bu cür mühitlərin gün işığı ala bilməyəcək qədər Günəşdən uzaqda olmasına baxmayaraq, həyatı dəstəkləyə bilər. Həyat üçün əsas istilik dərin okeanlarda bol olan hidrotermal ventilyasiyalardan gəlməsi də mümkündür.

Nyukasl Universitetinin alimləri təsdiq ediblər ki, sağlam həyat tərzinə riayət etmək, o cümlədən sağlam bədən çəkisini saxlamaq, qırmızı və işlənmiş ətləri məhdudlaşdırmaq xərçəng riskini azaldır. Sozcu.az lent.az-a istinadən bildirir ki, tədqiqatçılar 2018-ci ildə Ümumdünya Xərçəng Tədqiqatları Fondu və Amerika Xərçəng Tədqiqatları İnstitutunun təlimatlarına riayət edilməsi ilə müxtəlif xərçəng növlərinin tezliyi arasında əlaqəni araşdıran 18 araşdırmanı təhlil ediblər. Onlar müəyyən ediblər ki, bu qaydalara riayət olunmasını qiymətləndirmək üçün istifadə edilən sorğuda hər 1 ballıq artım bağırsaq xərçəngi riskinin 12%, döş xərçəngi riskinin 11 faiz və ağciyər xərçəngi riskinin 8 faiz azalması ilə nəticələnib. Tövsiyələrə sağlam çəki saxlamaq, fiziki cəhətdən aktiv olmaq, siqaret çəkməmək, alkoqol, fast food, qırmızı ət və şəkərin məhdudlaşdırılması daxildir. Mütəxəssislər qida rasionuna daha çox tərəvəz, meyvə, tam taxıl və paxlalılar əlavə etməyi də məsləhət görüblər. Ancaq xərçəngin qarşısını almaq üçün heç bir əlavə istifadə etməyin. Əmizdirmə körpələr üçün faydalıdır. Əvvəlki araşdırmalar göstərib ki, çox miqdarda qırmızı və işlənmiş ət yemək bağırsaq xərçəngi riskini artırır, spirt içmək isə döş, kolon və yemək borusu xərçəngi riskini artırır. Məlumatlara görə, bütün xərçənglərin təxminən 40 faizi dəyişdirilə bilən həyat tərzi faktorları ilə əlaqələndirilir: fiziki fəaliyyətin olmaması, tütün istifadəsi, piylənmə, pis pəhriz və spirt istifadəsi.

Məsuliyyətsiz biçənək sahiblərinə qarşı cəza tədbirləri sərtləşdirilə bilər. Sozcu.az Report-a istinadən xəbər verir ki, bunu Dövlət Ekoloji Təhlükəsizlik Xidmətinin rəisi Hikmət Əlizadə jurnalistlərə açıqlamasında deyib. O bildirib ki, son illərin statistikasına əsasən, Azərbaycanda biçənək sahəsinin istifadəçiləri yanlış təsəvvürlə həmin əraziləri yandırmaqla oradakı zərərvericiləri məhv etməyi düşünürlər: “Halbuki onlar bu addımla torpağın münbit qatını məhv edirlər. Bu kimi yanğınlar sonradan meşə yanğınları ilə nəticələnir. Onsuz da ölkəmiz az meşəsi olan ölkədir”. H.Əlizadə vurğulayıb ki, Ekologiya və Təbii Sərvətlər Nazirliyi məsələ ilə bağlı aidiyyəti qurumlara müraciət edib: “Belə hallara yol verən biçənək sahiblərinə münasibətdə sərt cəza tədbirləri görüləcək. Onlara verilən subsidiyalar geri alına, müvəqqəti sahələrlə əlaqəli icarə müqavilələri ləğv edilə bilər. Hətta onların məsuliyyətsizliyi meşə yanğınlarına səbəb olsa, onlarla bağlı cinayət işinin başlanılması da planda var”. Qurum rəsmisi həmçinin əlavə edib ki, Azərbaycanda tullantıların idarəolunması səviyyəsi çox da yüksək deyil: “Hər bir insan tullantılarla davranışda böyük məsuliyyət hiss etməlidir. Ətraf mühitin tullantılardan təmizlənməsi həm də yay mövsümündə baş verən yanğınlardan mühafizə üçün çox vacibdir. Ötən illər baş verən yanğın hadisələrinin 90-95 %-i bilərəkdən ya da ehtiyatsızlıq səbəbindən baş verib”.

"Lester"in yeni baş məşqçisi müəyyənləşib. Sozcu.az klubun saytına istinadən xəbər verir ki, bu vəzifəyə  Enzo Mareska təyin edilib. 43 yaşlı italiyalı mütəxəssislə 3 illik müqavilə imzalanıb.  Qeyd edək ki, E.Mareska bu təyinatadək "Mançester Siti"nin baş məşqçisi Xosep Qvardiolanın köməkçisi idi. Xatırladaq ki, "Lester" ötən mövsüm İngiltərə Premyer Liqasında 18-ci pilləni tutub və elitanı tərk edib. Komanda 2022/2023 mövsümündə İngiltərə Çempionşipdə mübarizə aparacaq.

İsveç PKK da daxil olmaqla bütün terror təşkilatlarını qınayır. Sozcu.az xəbər verir ki, bunu İsveçin xarici işlər naziri Tobias Billström jurnalistlərə açıqlamasında deyib. “Türkiyə ilə hədəfimiz eynidir: terrorla mübarizə aparmaq. Bunu memorandum çərçivəsində əl-ələ verib konstruktiv şəkildə edirik. İsveçin PKK ilə bağlı mövqeyi çox açıqdır. Bu səbəbdən biz NATO üzvü olmaq üçün memorandumda yazılanların və qərarların hamısını yerinə yetirmək istəyirik. İsveçdə qəbul edilən yeni qanun layihəsi ölkəmizlə Türkiyə, NATO və Avropa Birliyi (AB) üzvləri arasında terrorla mübarizə sahəsində əməkdaşlığı asanlaşdıracaq”, - XİN başçısı bildirib. Nazir eyni zamanda İsveçdə məskunlaşan terrorçuların Türkiyəyə ekstradisiya məsələsinə də aydınlıq gətirib: “İsveç AB-nin qanunvericiliyi çərçivəsində ekstradisiya həyata keçirir və ekstradisiya qərarları məhkəmə sistemi tərəfindən müstəqil şəkildə qəbul olunur”.

Ukrayna müharibənin 479-cu günü üçün Rusiya ordusunun itkiləri haqda məlumatı yeniləyib. Sozcu.az xəbər verir ki, bu barədə Ukrayna Baş Qərargahı məlumat yayıb. Məlumata əsasən, Rusiya indiyə qədər 219 170 hərbçi, 3977 ədəd tank, 7706 ədəd zirehli döyüş maşını, 3834 ədəd artilleriya sistemi, 609 ədəd RYAS (reaktiv yaylım atəş sistemi), 364 hava hücumundan müdafiə sistemi, 314 ədəd hərbi təyyarə, 302 ədəd helikopter, 6557 ədəd avtomobil texnikası, 3364 ədəd PUA, 1211 qanadlı raket, 18 gəmi/qayıq, 520 xüsusi avadanlıq itirib.