Azərbaycanda Şəhərsalma və Tikinti Məcəlləsinə əsasən tikinti işlərinin dayandırılması barədə qərar qəbul edildiyi gündən 6 ay ərzində tikintiyə icazə alınmadıqda, tikinti işlərinin dayandırılması barədə qərarda nəzərdə tutulan pozuntular 1 il ərzində aradan qaldırılmadıqda tikintisi başa çatmış və yaxud çatmamış tikinti obyekti söküləcək. Sozcu.az xəbər verir ki, bu, "Şəhərsalma və Tikinti Məcəlləsində dəyişiklik edilməsi haqqında" qanun layihəsində öz əksini tapıb. Hazırda qüvvədə olan Məcəlləyə görə sözügedən müddətlər müvafiq olaraq 1 il və 2 ildir.

Azərbaycanda qaydaları pozaraq mühəndis-kommunikasiya təminatı sistemlərinə qoşulanlar 2 ilədək həbs ediləcək. Sozcu.az xəbər verir ki, bununla bağlı Cinayət Məcəlləsinə yeni 314-4-cü maddə (Qanunvericiliklə müəyyən olunmuş qaydaları pozmaqla mühəndis-kommunikasiya təminatı sistemlərinə qoşulma) əlavə olunur. Yeni maddəyə əsasən, tikintisinə icazə tələb olunan, lakin belə icazə alınmadan tikilməkdə olan və ya tikilmiş tikinti obyektlərinin təbii qaz, su, kanalizasiya, elektrik və istilik enerjisi müəssisələrinin vəzifəli şəxsləri tərəfindən mühəndis-kommunikasiya təminatı sistemlərinə qanunsuz qoşulması 2 000 manatdan 4 000 manatadək miqdarda cərimə və ya 3 ilədək müddətə müəyyən vəzifə tutma və ya müəyyən fəaliyyətlə məşğul olma hüququndan məhrum edilməklə və ya edilməməklə 3 ilədək müddətə azadlığın məhdudlaşdırılması və ya 2 ilədək müddətə azadlıqdan məhrum etmə ilə cəzalandırılacaq.

Suyun paylanması ilə bağlı görülməli çox iş olacaq. Hazırda biz su təchizatı və sanitariya şəraitinin yaxşılaşdırılmasına ehtiyac duyduğumuz bir çox şəhərdə layihələr həyata keçiririk. Sozcu.az xəbər verir ki, bunu Prezident İlham Əliyev martın 13-də Berlində Almaniyanın aparıcı şirkətlərinin rəhbərləri ilə görüşündə deyib. Dövlət başçısı bildirib ki, hədəfimiz bütün ölkə ərazisində içməli su təchizatının 100 faiz təmin edilməsidir: “Sözsüz ki, bunu etmək çətin olacaq, çünki görülməli işin həcmi böyükdür. Lakin bizim, həmçinin su ehtiyatlarının idarə olunması sahəsində bəzi struktur islahatlarının həyata keçirilməsi ilə bağlı planlarımız var. Bunun vaxtı gəlib çatıb. Hazırda hökumət müxtəlif variantları və xüsusilə indi suyun ildən-ilə azaldığını gördüyümüz bir vaxtda, suyun paylaşdırılması ilə bağlı müasir texnologiyaların tətbiqini dəyərləndirir Qeyd etdiyim kimi, Xəzər dənizi dayazlaşır, həmçinin çaylarımızda, transsərhəd çaylarında və mənbəyini Azərbaycandan götürən çaylarda sululuq azalıb. Əfsuslar olsun ki, biz bunu görürük. Beləliklə, su ehtiyatlarının idarə olunması, su ehtiyatlarından səmərəli istifadə sözsüz ki, qarşıdakı illər üçün prioritetlərdən biri olacaq”.

Türkiyənin Qəhrəmanmaraş vilayətinin Çağlayancerit ilçəsində 4,9 bal gücündə zəlzələ baş verib. Sozcu.az xəbər verir ki, bu barədə AFAD məlumat yayıb. Zəlzələ yerin 5,34 km dərinliyində qeydə alınıb. Əlavə məlumat verilmir

Fövqəladə Hallar Nazirliyinin “112” qaynar telefon xəttinə Sabunçu rayonu, Zabrat qəsəbəsi ərazisində hərbi sursat aşkar edilməsi barədə məlumat daxil olub. Bu barədə Fövqəladə Hallar Nazirliyinin Mətbuat Xidməti məlumat yayıb. Bildirilib ki, məlumatla əlaqədar dərhal FHN-in Xüsusi Riskli Xilasetmə Xidmətinin (XRXX) minalardan təmizləmə üzrə çevik qrupu hadisə yerinə cəlb edilib. Hüquq-mühafizə orqanı əməkdaşları ilə birgə ərazidə müvafiq təhlükəsizlik tədbirləri görüldükdən sonra hadisə yerinə baxış zamanı aşkar edilmiş sursatın döyüş tətbiqinə yararlı bir ədəd F-1 əl qumbarası olduğu müəyyən edilib. Sursat XRXX-nin çevik qrupunun mütəxəssisləri tərəfindən zərərsizləşdirilməsi üçün ərazidən götürülərək kənarlaşdırılıb. Hadisə yerində və ona yaxın ətraf ərazidə əlavə axtarış zamanı başqa hər hansı təhlükəli və ya şübhəli əşya aşkar edilməyib. 

Daha öncə xəbər verilmişdi ki, Azərbaycan Respublikası Prezidentinin Administrasiyası Qarabağın erməni ictimaiyyətinin nümayəndələrini reinteqrasiya ilə bağlı təmasların davam etdirilməsi, habelə Qarabağda infrastruktur layihələrinin reallaşdırılması məsələlərinin müzakirəsi üçün ikinci görüşə dəvət edib. Caliber.Az-ın məlumatına görə, görüşün yaxın günlərdə Bakıda keçirilməsi təklif olunub. Dərhal Ermənistanın müxtəlif kütləvi informasiya vasitələri və “Telegram” kanalları Qarabağ ermənilərinin belə bir dəvət almadıqlarını, Azərbaycan tərəfinin təşəbbüsü haqda yalnız mediadan öyrəndikləri barədə yalan məlumatlar yaymağa başladılar. Lakin qeyd etmək lazımdır ki, dəvətlə bağlı informasiya Azərbaycan Respublikası Prezident Administrasiyasının rəsmi “Twitter” hesabında dərc edilib. Məlumatı həmçinin Azərbaycan Dövlət İnformasiya Agentliyi olan AZƏRTAC da yayımlayıb.  Bundan başqa, əldə edilmiş etibarlı məlumatlara görə, bu press-reliz yayılmazdan əvvəl Qarabağ ermənilərinin nümayəndələri ilə əlaqəyə məsul şəxslər rəsmi Bakının bu təklifi onlara çatdırıb və yalnız bundan sonra məlumat mətbuatda yayımlanıb. Aydındır ki, bu cür informasiya kirliliyi yaradanlar Qarabağ ermənilərinin müəyyən hissəsini təşkil edən dairələrdir. Onlar növbəti dəfə bu əməlləri ilə reinteqrasiya ilə bağlı məsələlərin konstruktiv məcraya yönəlməsinə qarşı çıxış etməyə cəhd göstərirlər.

Xəbər verdiyimiz kimi, İnzibati Xətalar Məcəlləsinə əsasən Bakıda siqaret kötüyünü yerə atanlar 50 manat cərimələnəcəklər. DİN-in qanunuvericiliyin icrasından irəli gələn bu addımı geniş müzakirəyə səbəb olub, ictimaiyyət tərəfindən rəğbətlə qarşılanıb. Bildirilir ki, paytaxtın xüsusən mərkəzi küçələrində polis siqaret kötüyünə nəzarət edəcəksə, digər inzibati qaydalar da diqqətdən kənarda qalmamalıdır. Təklif edilir ki, ictimai yerlərdə nümayişkəranə şəkildə tüpürənlərə də cərimə tətbiq edilsin. Tanınmış kulturoloq Aydın Xan Əbilov da Pravda.az-a açıqlamasında təklifi dəstəkləyib. O bildirib ki, dünya praktikasında da tüpürməyə görə cərimə tətbiqi var: “Məsələn, Sinqapurda yerə tüpürməyə, siqaret kötüyünə, çeynənmiş saqqızın yerə atılmasına görə 50 manat yox, 800 dollar inzibati cəza növü var. Bu hərəkətin iki-üç dəfə təkrar edilməsi həbslə nəticələnirsə, niyə də bu, Azərbaycanda olmasın? Ümumiyyətlə, ictimai yerlərdə ictimai davranış, etik normaları pozan insanlara tez-tez rast gəlirik. Yüksək tonla danışmaq, ictimai nəqliyyatdan normal istifadə etməmək, qadınlara, yaşlılara, xəstələrə, əlillərə xüsusi qayğı göstərməmək əxlaqa zidd hallar sayılır. Azərbaycanda bununla əlaqədar ictimai davranış mədəniyyəti oturuşmayıb. Cəmiyyətdə çoxsaylı çağırışlar edirik. Amma vəziyyət hələ də dəyişilməz qalır. Müəyyən zaman sonra doğulduğu yerdən başqa yerə köçüb gəlmiş insanların həmin cəmiyyətdə qəbul edilmiş ümumi etik normalara riayət etməməsi acınacaqlı vəziyyətə aparıb çıxarır. Hərəmiz ayrı ləhcə ilə şəhərdə özümüzü aparmağa başlayırıq. Şəhər mədəniyyəti, qlobal urbanizasiya etikası pozulur? Bunu düşünəndə insanların bir-biriləri üçün yaratdıqları problem göz önünə gəlir. İctimai qınağı, tənqidi gücləndirməklə, cərimələr tətbiq etməklə, insanların bir-birinin davranışlarına nəzarət etmələri ilə belə halların qarşısını almaq mümkündür. Yerə tüpürmək, siqaret kötüyünü yerə atmaq, yol hərəkəti qaydalarını pozmaq, yüksək səslə musiqi dinləmək, danışmaq əslində psixologiyamıza, şüurumuza təsir edən, birgəyaşayışı pozan amillərdir. Buna yol verənlər inzibati, yaxud cinayət məsuliyyətinə cəlb olunmalıdırlar. İnsanlar nə qədər cəzasızlıq mühitində yaşayacaqlarsa, bu problem daha aktual olacaq. Ona görə də müəyyən mənada qanunvericilikdə dəyişikliyə ehtiyac var”. Ekspert deyib ki, illərdir bu yöndə neomaarifçi, neoekoloji maarifləndirmələr aparır: “Məişətdə istifadə olunan, yaxud qida və digər tullantıların maşının, evin pəncərəsindən çölə atılmasını qəti qınayırıq. Təəssüf ki, aparılan bütün ictimai tənqid proseslərinin real nəticəsi, demək olar, sıfıra bərabərdir. Nəinki Bakının özündə, Azərbaycanın hər yerində - dəniz kənarından tutmuş, yaşayış məntəqələrinin kanallarına qədər Azərbaycan torpaqlarının çirkləndiyinin, ekoloji “soyqırımı”na məruz qaldığının fərqindəyik. İnsanlar isə zir-zibillərin, sellofan qutuların hara gəldi atıldığının fərqində deyillər. Əfsus ki, Azərbaycanda yalnız və yalnız Bakıda zibil utilizasiya edən bir müəssisə var. Qalan rayonların heç birində bu, yoxdur. Rayonlarda yığılan zibillər, məişət, sənaye tullantıları birbaşa yandırılır. Bu da ekologiyanı məhv edir”. Aydın Xan Əbilov vurğulayıb ki, siqaret kötüyünə görə 50 manat cərimə çox azdır: “Siqaret kötüyünün, yaxud istənilən zir-zibilin yerə atılması ilə bağlı cəzanı İnzibati Xətalar Məcəlləsindən Cinayət Məcəlləsinə qədər aparıb çıxarmaq lazımdır. Tənbeh daha da sərtləşdirilməlidir. Təkcə 50 manatla kifayətlənsək, görəcəyik ki, yenə eyni qaydada zir-zibili yerə atırlar. Sanki maşınındakı, evindəki tör-töküntüləri çölə atmaqla necə “bərkgedən” olduqlarını cəmiyyətə sübut etmək istəyirlər. Xatırlayırsınızsa, pandemiya dövründə inzibati tənbeh növü kimi seçilən və cəza növü kimi tətbiq edilən çox yüksək cərimələr öz bəhrəsini verdi. İnsanlar qanunlara riayət etməyə başladılar. Külək əsəndə şəhərin hər tərəfində yerə atılmış siqaret tullantıları və digər zibillərlə əhatələnirik. Üstündən milyonlarla maşın keçir. Bu maşınlar həmin kimyəvi maddələrdən istehsal olunmuş avadanlıqların qırıntılarını, məişət tullantılarını toz halına çevirir, insanlarımız da bunu udur. Sonra da deyirlər ki, niyə yeni nəsil, qocalar arasında  bu qədər çox xəstə var? Sözsüz ki, öz əməllərimiz bizə qarşı təbiət tərəfindən silah olaraq qaytarılır. Bunu anlayıb, dərk etmədikcə bir o qədər problemlər yaşayacağıq”. Ekspert deyib ki, Azərbaycanda zibil toplanması ilə bağlı bərbad vəziyyət var: “Ekologiya və Təbii Sərvətlər Nazirliyi, QHT-lər, ictimai fəallar bununla əlaqədar addımlar atsalar da, təsirini əhəmiyyətli dərəcədə göstərmir. Sellofanları ödənişli etdilər, amma yenə eyni problemdir. Düşünürəm, bununla əlaqədar görüləsi çox işlərimiz var. Təəssüf ki, bir neçə şirkətdən başqa heç kim məişət və zəhərli tullantıların yığılması ilə bağlı addım atmayıb. Elektron mallar satılan şirkətlərdən birinə məxsus mağazada məişət batareyalarının geri dönüşümü ilə bağlı qutu gördüm. Çox xoşuma gəldi. Bu tip addımları koorporativ sosial məsuliyyətə cəlb olunası şirkətlərdən tutmuş şəxslərə, fərdlərə qədər hər kəs dərk etməlidir. Bakını ekoloji baxımdan təmiz görmək istəyiriksə, hər kəs özündən başlamalıdır. Necə deyərlər, şəhər bizim simamızdır, o simanı təmiz saxlayaq”.

"Avropa İttifaqı-Azərbaycan əlaqələri istiqamətində çox önəmli addımlar atılır. Xüsusilə keçən il Avropa İttifaqı ilə Azərbaycan arasında imzalanmış enerji təhlükəsizliyi üzrə Strateji Tərəfdaşlığa dair Anlaşma Memorandumu bizim niyyətimizi göstərir". Sozcu.az xəbər verir ki, bu sözləri Azərbaycan Prezidenti İlham Əliyev martın 14-də Berlində Almaniya Kansleri Olat Şolts ilə mətbuata bəyanatında söyləyib. “Memorandumun sürətlə və vaxtında icrası bir daha göstərir ki, Azərbaycan Avropa üçün etibarlı tərəfdaşdır”, - deyə Azərbaycan Prezidenti vurğulayıb.

Sumqayıt Məhkəmə kompleksinin inzibati binasında "Tərtər işi"ndə təqsirləndirilən 4 nəfər yüksək rütbəli hərbçi - Vüsal Ələsgərov, Rəşid Niftəliyev, Ramil Qarayev və Rüstəm Ələsgərovun cinayət işi üzrə hazırlıq iclası keçirilib. "Report"un xəbərinə görə, Bakı Hərbi Məhkəməsinin hakimi Zeynal Ağayevin sədrliyi ilə keçirilən prosesdə təqsirləndirilən şəxslərin anket məlumatları dəqiqləşdirilirb. Məlum olub ki, Vüsal Ələsgərov Tərtərdə N saylı hərbi hissənin komandiri, Rəşid Niftəliyev həmin hərbi hissədə qərargah rəisi, Ramil Qarayev və Rüstəm Ələsgərov isə hərbi hissələrin kəşfiyyatçıları olublar. Hakim bildirib ki, Vüsal Ələsgərov Cinayət Məcəlləsinin 143-cü (Təhlükədə qoyma), 293-cü (İşgəncə, işgəncə hesab olunmayan qəddar, qeyri-insani, yaxud ləyaqəti alçaldan rəftar və ya cəza), 341-ci (Vəzifə səlahiyyətlərindən sui-istifadə və ya vəzifə səlahiyyətlərini aşma), Rəşid Niftəliyev və Ramil Qarayev Cinayət Məcəlləsinin 293-cü (İşgəncə, işgəncə hesab olunmayan qəddar, qeyri-insani, yaxud ləyaqəti alçaldan rəftar və ya cəza), 145-ci (Qanunsuz azadlıqdan məhrum etmə), 341-ci (Vəzifə səlahiyyətlərindən sui-istifadə və ya vəzifə səlahiyyətlərini aşma), Rüstəm Ələsgərov isə Cinayət Məcəlləsinin 293-cü (İşgəncə, işgəncə hesab olunmayan qəddar, qeyri-insani, yaxud ləyaqəti alçaldan rəftar və ya cəza), 145-ci (Qanunsuz azadlıqdan məhrum etmə), 341-ci (Vəzifə səlahiyyətlərindən sui-istifadə və ya vəzifə səlahiyyətlərini aşma), 125-ci (Özünü öldürmə həddinə çatdırma), 126-cı (Qəsdən sağlamlığa ağır zərər vurma) maddələri ilə təqsirli bilinir. Prosesdə təqsirləndirilən şəxslər məhkəmə iclaslarının qapalı keçirilməsi ilə bağlı vəsatət qaldırıb və ev dustaqlığına buraxılmalarını istəyiblər. İş üzrə 194 zərərçəkmiş olsa da, prosesə təxminə 20-yə yaxın zərərçəkmiş qatılıb. Zərərçəkmişlərdən Emil Orucovun vəsatətində qeyd edilib ki, "Tərtər hadisələri" kimi eyni əməllər Qazax, Şəmkir, Ağcabədi və Beyləqanda da törədilib: "Orada da hərbçilərə işgəncələr verilib. Bu işdə təqsiri olan şəxslərin siyahısı çoxdur". Vəsatətdə general-mayorlar Hikmət Həsənov və Mais Bərxudarovun məhkəməyə çağırılması, dindirilməsi və üzləşdirilməsi tələb edilib. Qeyd olunub ki, Tərtər hadisələri baş verən ərəfədə Mais Bərxudarovun harada olması ilə bağlı telefon siqnalları vasitəsilə yoxlama aparılsın. Dövlət ittihamçısı Orxan Səmədov vəsatətlərə münasibət bildirərkən qeyd edib ki, məhkəmənin qapalı keçirilməsi və müttəhimlərin ev dustaqlığına buraxılması üçün hüquqi əsaslar yoxdur. O, ittihamların ağırlaşdırılması və yeni şəxslərin məsuliyyətə cəlb olunmaları ilə bağlı vəstətləri isə məhkəmənin gedişində müzakirə etməyi məqbul sayıb. Prokuror qeyd edib ki, hazırda Baş Prokurorluq tərəfindən “Tərtər işi” üzrə istintaq hələ davam edir. İş üzrə cinayət törətməsinə dair əsaslı şübhələr yaranarsa, yeni şəxslər məhkəmədə məsuliyyətə cəlb oluna bilər. O, gedişatın zərərçəkmişlərin ifadələrindən asılı olacağını qeyd edib. Hakimlər müaşvirəyə yollanıb. Müşavirə zamanı zərərçəkmişlər 4 müttəhimlə söhbət etməyə çalışıb. Zərərçəkmişlər Hikmət Həsənovun məsuliyyətə cəlb olunacağı təqdirdə onları bağışlayacaqlarını bildiriblər. Müşavirədən sonra qərar elan olunub. Hakimlər prosesin qapalı keçirilməsi və tutulan şəxslərin ev dustaqlığına buraxılması ilə bağlı vəsatətləri təmin etməyiblər. Digər vəstətlər isə baxılmamış saxlanılıb. Proses martın 28-də baxışa təyin olunub.

"Su problemi yalnız Saatlı rayonuna deyil, ölkənin əksər kənd rayonlarına aiddir".  Sozcu.az xəbər verir ki, bunu Müsavat Partiyasının başqanı Arif Hacılı ölkədə yaradılan su probleminə münasibət bildirərkən deyib.  "Su qıtlığı təbii fəlakət nəticəsində yox, gözü doymayanların 10 minlərlə hektar torpaq sahələrinə əl qoyması, bütün su ehtiyatlarını bu sahələrdəki əkinlərə, bağlara yönəltmələri ilə bağlıdır" - deyən Müsavat başqanı qeyd edib ki, su problemi ilə bağlı narazılıqlar və etirazlar getdikcə artacaq: "Gürcüstan ərazisində aşıb-daşan Kür çayının Azərbaycan ərazisində qurumasının başqa izahı yoxdur.  Sonuncu tikəsi də əlindən alınan əhalinin etirazlarının qarşısını güllə atmaqla, həbslərlə almaq yox, qlobal xarakter almış su problemini həll etmək lazımdır.  Qarşıdan su tələbatını artıran fəsillər gəlir. Saatlı hadisələri anonsdur. Narazılıqlar və etirazlar getdikcə artacaq".

Bu gün paytaxtın kənar dairəvi yolunun 4-cü km-də KİA markalı, 90-NE-840 dövlət nömrə nişanlı avtomobilin sürücüsü, 1991-ci il təvəllüdlü Namiq Mirqasım oğlu Seyidovun maşını yüksək sürətlə və kobud qayda pozuntuları törədərək idarə etməsi nəticəsində ağır yol-nəqliyyat hadisəsi qeydə alınıb. Sozcu.az xəbər verir ki, bu barədə Baş Dövlət Yol Polisi İdarəsinin şöbə rəisi Rövşən Tağıyev məlumat verib. Qəza zamanı sürücü yüngül xəsarət alıb, sərnişini, 1991-ci il təvəllüdlü Səbinə Məhərrəmova ölüb. "Dəfələrlə xəbardar edilməsinə baxmayaraq, təəssüflər olsun ki, yenə də bəzi sürücülər yüksək sürətin ölümə səbəb olduğunu belə ağır faciələr başlarına gəldikdən sonra anlayırlar", - DYP rəsmisi vurğulayıb. Faktla bağlı araşdırma aparılır.

Martın 14-də Azərbaycan Respublikasının Prezidenti İlham Əliyevin Berlində Almaniya Federativ Respublikasının Prezidenti Frank-Valter Ştaynmayer ilə təkbətək görüşü başlayıb. Sozcu.az xəbər verir ki, Almaniya Prezidenti Frank-Valter Ştaynmayer Azərbaycan Prezidenti İlham Əliyevi qarşılayıb. Dövlət başçıları birgə foto çəkdiriblər. Prezident İlham Əliyev Fəxri qonaqlar kitabına ürək sözlərini yazıb.

Bakıda özünü Dövlət Təhlükəsizliyi Xidmətinin (DTX) əməkdaşı kimi təqdim edərək dələduzluq əməli törətmiş şəxs həbs edilib. Sozcu.az Qafqazinfo-ya istinadla xəbər verir ki, Cəlilabad rayonunda qeydiyyatda olan, paytaxtın Yeni Yasamal qəsəbəsində yaşayan 1987-ci il təvəllüdlü Farid Qədirovun 2 nəfəri dələduzluq yolu ilə aldatdığı məlum olub. Qaradağ rayonundakı daş karxanasında "Kamaz" markalı yük maşınınn sürücüsü işləyən həmin şəxs barəsində Cinayət Məcəlləsinin dələduzluq və vəzifəli şəxsin səlahiyyətlərini mənimsəmə və rüşvət verməyə təhrik etmə maddələri ilə açılmış cinayət işi Bakı Ağır Cinayətlər Məhkəməsinə göndərilib. Hakim Telman Hüseynovun sədrliyi ilə keçirilən prosesdə məlum olub ki, Farid sosial şəbəkədə bir neçə xanımla tanış olub və aralarında münasibət yaranıb. Daha sonra həmin qadınlar arasında pul məsələsinə görə mübahisə düşüb. Günay (şərti) adlı tanışı Faridə Nazilə (şərti) adlı digər qadının ona 80 min manat verməli olduğunu, lakin ödənişdən boyun qaçırdığını deyib. Özünü DTX-nin vəzifəli əməkdaşı kimi tandan Farid Günaya məsələni həll edəcəyini söz verib. O, Binəqədi Rayon Polis İdarəsində müstəntiq işləyən və bibisioğlunun tələbə yoldaşı olan polis əməkdaşı ilə əlaqə saxlayaraq Günaya köməklik etməsini xahiş edib. Polisdəlki araşdırmadan sonra Nazilə pulun bir hissəsini Günaya qaytarıb. Farid bu işə görə müstəntiqə pul verilməli olduğunu deyərək Günaydan 4300 manat alıb. Bununla yanaşı, 36 yaşlı Farid Günayın tanışı olan Cəfəri (şərti) də DTX-nin Xətai Rayon Şöbəsində işə düzəldəcəyini vəd verərək ondan 5 min manat alıb. Lakin bir müddət sonra Günay Binəqədi RPİ-də işi araşdıran müstəntiqin qəbulunda olarkən Faridin yalan danışdığını öyrənib. Belə ki, müstəntiq ona Faridin pul vermədiyini bildirib və onun, ümumiyyətlə, DTX-də işləmədiyini, "Kamaz" sürücüsü kimi yükdaşıma fəaliyyəti göstərdiyini deyib. Bundan sonra dələduzluqla üzləşdiklərini görən Günay və Cəfər Farid barəsində şikayət ediblər və cinayət işi başladılıb. İstintaq müddətində barəsində polisin nəzarəti altına vermə qətimkan tədbiri seçilmiş Farid bu zaman kəsiyində aldığı pulları geri qaytarıb. Məhkəmə prosesində Günay və Cəfər ondan şikayətçi olmadıqlarını bildiriblər. Buna baxmayaraq, Bakı Ağır Cinayətlər Məhkəməsi Faridin əməllərini və daha əvvəl də məhkumluq həyatı yaşamasını nəzərə alaraq, ona 5 il həbs cəzası verib. Farid Qədirov məhkəmə zalındaca həbs edilib.

Martın 12-si 11-ci sinif şagirdləri üçün buraxılış imtahanı keçirildi. Əlli mindən çox şagird öz biliyini bu imtahanda yoxladı. Həmişə olduğu kimi, imtahan prosesi bu dəfə də söz-söhbətsiz ötüşmədi. Bəzi abituriyentlər imtahandan sonra sualların çətin olduğunu iddia etdilər. Bu iddia nə dərəcədə əsaslıdır? DİM-in abituriyentləri çətin suallarla sınağa çəkməsi nə dərəcədə doğrudur? Mövzu ilə bağlı Yenisabah.az-a danışan sabiq Təhsil naziri, professor Misir Mərdanov bildirib ki, bəzi nüanslar nəzərə alınaraq imtahana çətin suallar salınmamalıdır: “Mən imtahanla bağlı suallara cavab verməkdə bir az çətinlik çəkirəm, çünki o işin içində deyiləm. Ancaq mən hesab edirəm ki, sualların hər biri orta məktəb proqramı daxilində olmalıdır və proqrama daxil olan orta səviyyəsi suallar hazırlanmalıdır, yüksək səviyyəli yox.  Eyni zamanda, sualları hazırlayarkən o da nəzərə alınmalıdır ki, ötən il şagirdlər pandemiya şəraitində dərsə gəlib-gediblər, onlayn təhsil alıblar. Ona görə də mən imtahan suallarında çətinləşmənin tərəfdarı deyiləm.  Mənə elə gəlir ki, suallar orta səviyyəli şagirdin cavablaya biləcəyi tipdə olmalıdır. Mən özüm də ordan-burdan eşidirəm ki, suallar çətindir, amma işin içində oladığıma görə konkret bir fikir söyləməkdə çətinlik çəkirəm”. M.Mərdanov qeyd edib ki, imtahana orta məktəb dərsliklərdən əlavə, Dövlət İmtahan Mərkəzinin ümumi dərs vəsaitlərindən də sualların salınması qətiyyən doğru deyil: “Sualların orta məktəb dərsliklərindən kənar, DİM-in əlavə vəsaitlərindən tərtib edilməsi, dərslikdə olmayanların imtahana salınması qətiyyən düzgün deyil. Bu qəti doğru yanaşma deyil. Suallar hazırlandıqda orta məktəb proqramı əsas olmalıdır, başqa sualların salınması doğru deyil”.

“Prezident Administrasiyası ikinci görüş üçün Qarabağın erməni icmasını Bakıya dəvət etdi. Çünki faktiki olaraq bu adamlar Azərbaycan ərazisində yaşayırlar. Cənab Prezident də hər yerdə qeyd edir ki, bizim imtiyazlardan onlar da istifadə edə bilər. Yəni qaynayıb qarışsınlar və separatçı qüvvələrdən uzaq qalsınlar”. Bu sözləri Yenisabah.az-a açıqlamasında Milli Məclisin deputatı Vahid Əhmədov deyib. Millət vəkili ötən gün Prezident Administrasiyası tərəfindən Qarabağ erməniləri ilə ikitərəfli danışıqların növbəti raundu üçün onların Bakıya dəvət olunması, habelə Qarabağın erməni icmasının təmsilçilərinin bu dəvətdən imtina etmələri məsələsinə münasibət bildirib. V. Əhmədova görə, bölgədə bu gün separatçı qüvvələr kifayət qədər çoxdur: “O cümlədən Ermənistandan onlara müəyyən göstərişlər gəlir. Bu tərəfdən də təhdidlər var, sərhəddə mütəmadi atəşkəs pozulur. Bunlar belə bir xülyalara qapılıblar. Amma Azərbaycan qarşılıqlı əlaqələr yaratmaq istəyir. Lakin təəssüf ki, bunlar ona getmirlər və Bakıya da gəlmək istəmirlər. Ola bilər ki, onlar Bakıya gəlməkdən də narahatdırlar, çünki əhalinin çoxu bunu birmənalı qarşılamır. Lakin ideya çox normal idi”. Deputat diqqəti ona yönəldib ki, onsuz da bu görüşlər və təmaslar gec-tez yaranacaq: “Ərazidəki sülhməramlılar da müvəqqətidir, çıxıb gedəcəklər, sərhədlər qurulacaq, bir-birimizin ərazi bütövlüyünü tanıyacağıq. Bunlar uzun çəkməyəcək, həll olunacaq. Ondan sonra da bir yerdə yaşayacağıq”. “Onların ayrıca dövlət olmaq ideyaları və s. artıq getdi, qurtardı. Prezident bunların hamısını arxivə göndərdi. Ermənilər artıq bunu anlamalıdır. Ona görə də buradakı əsas rolu Ermənistan və separatçılar oynayır”, – söyləyib.

Sozcu.az dünyanın nüfuzlu və məşhur ulduz falları portalları "Horoscope" və "Astrology"yə istinadən bu günün qoroskopunu təqdim edir. Qoç - yeni variantlar arayın, imkanları dəyərləndirin. Heç nəyi mürəkkəbləşdirməyin, problemləri həll edin, çətinlikləri yoluna qoyun. Nasazlıq, münaqişə, arzuların puç olması əslində ilk baxışdan göründüyü təki qorxulu deyil. Tam əksinə, bütün bunlar indi yeganə dürüst qərarın qəbuluna rəvac verə bilər. Qəfil şanslardan istifadə edin, işi təxirə salmayın. Buğa - qəfil xəbərlər, maraqların yenilənməsi, hadisələrdə təxminlənməyən dönüşlər günüdür. Səfər və ya aviauçuşlar məsləhət deyil. Uzaqdan maraqlı, qəribə, bəlkə də, əcaib informasiya gələcək. Hələ çox məqam məlum olmasa da, artıq intriqa var. İntellektual fəaliyyətlə məşğul olmaq, çətin həllər aramaq üçün yaxşı gündür. Qəza riski olsa da, unikal tapıntılar mümkündür. Əkizlər - Yalan danışmayın, yaxın ətrafınızda olan adamların sevmədikləri mövzularda danışmayın, qeyri-konstruktiv addımlar atmayın. Sevimli işlə məşğul olun, xoşagəlməz hadisələrin təşəbbüskarı olmayın. Günün ikinci yarısında daha önəmli sürpriz ola bilər.  Xərçəng - fiziki iş mənəvi və ruhi balansı bərpa edəcək. Siz bir, tərəfdaş isə başqa plan qura bilər: həyat isə sizdən çərçivəyə salaraq nə deməyi və ya etməyi tez müəyyənləşdirməyi tələb edəcək. Məsafə saxlayın, hadisələri tezləşdirməyin. Şəxsi münasibətlərdə diqqətli, təmkinli olun. Şir - təklif və təşəbbüsləriniz yetərincə dəyərləndirilməyəcək. Ağır, mürəkkəb gündür. Məşğul olduğunuz məsələlərlə bağlı qeyri-müəyyənlik, anlaşılmazlıq yarana bilər. Təhrif olunmuş informasiyaya aldanmayın. Yaxın ətrafınızdakı insanların sizi anlamamaları və ya əlavə iş tapşırmaq istəyində olmaları ilə bağlı fikirləriniz emosional "partlayış", münaqişəyə səbəb ola bilər. Qız - uzunmüddətli məsələlər sınağa çəkilə bilər. Sizi dinləməyən adama nəyisə başa salmağa çalışmayın. Əldə etdiyiniz mövqeləri qorumaq üçün neqativ təmaslardan boyun qaçırın. Səhhətinizi qoruyun, çox yeməyin. Axşam saatlarında dincəlin. Tərəzi - maraq dairənizə müdaxilə etməyə, mövqelərinizdən məhrum etməyə çalışacaqlar. Müqavimət göstərin, ağır olsa da, geri çəkilməyin. Situasiyanı sürətlə dəyərlərdirərək dəyişən şərtlərdə müsbət yönlər tapmağa çalışın. Əlaqə və ünsiyyət dairələrini genişləndirin, qarşılıqlı maraq kəsb edən əməkdaşlıq yolları arayın, cari məsələləri həll edin. Əqrəb - yeni xəbərlər gözləyin, amma həqiqət axtarışlarında izafi aktivlik göstərərək bütün suallarınıza cavab aramayın. Axına qarşı getməyin. Yaşam qarşınızda çox ciddi məsələlər qoymursa, bir qədər gözləyin. Səhhətinizi qoruyun. Axşam saatlarında dincəlin. Dəyişə bilmədiyiniz nəsnə ilə bağlı nigaran olmayın. Oxatan - aktiv, impulsiv yaşam günüdür. Tərəfdaş və ya həmkarlarla münasibəitlərdə impulsiv qərarlar ola bilər. İşgüzar münasibətlərə son qoya biləcək sözlər deməyin. Ümumi maraq və ya problemin həlli ilə bağlı birləşməyə can atın. Başqa işlərlə məşğul olmaq gərəkdir. Fəaliyyət və əməkdaşlığın yeni variantalarının gerçəkləşməsi prosesini sürətləndirin. Oğlaq - həll olunmamış maddi problemlər və hövsələsizlik işdə partlayış həddinə çatan vəziyyət yarada bilər. İndi və dərhal həll edilməsi mümkün problemi seçərək onun çözümünə başlayın. Ən çətin, mürəkkəb işlərə də enerji və təşəbbüskarlığınızın çatmasına çalışın. Emosional yüksəlişin məqsədəuyğunluğunu düşünün. Qətiyyət və imkanlar artsa da, qəza və travma riski də güclənir. Dolça - Risk üçün əlverişli vaxt deyil. Ətrafınızdakı mühitdə romantika hiss olunsa belə, sayıqlığı əldən verməyin. Problemlər yaranarsa, onları tez, dəqiq və sürətlə həll edin. Yeni işlərə başlamayın, mühüm qərarları açıqlamayın. Səhhətinizə fikir verin. Ürək-damar sistemini qoruyun. Balıqlar - yaxın ətrafınızdakı insanlar sizin davranış qaydalarına riayət etmək istəmirlər, çünki qaydaların özü real səbəblər olmadan dəyişə bilər. Mühüm situasiyalarda istiqaməti mütləq şəkildə dəyişmək gərəkdir. Çətinliklər sizi narahat etməsin: problemləri sizin əqli qabiliyyətiniz və bacarıqlarınıza çağırış kimi qəbul edin. Güc və qüvvənizi önəmli məsələlərin həllinə səfərbər etmək üçün emosional olmayın.

Hepatit infeksiyası, əsasən çirklənmiş qida və su vasitəsilə baş verir. Xəstə ilə birbaşa əlaqə zamanı, həmçinin bir qabdan və ümumi tualetdən istifadə zamanı bu virus orqanizmə keçə bilər. Sozcu.az "Medicina"ya istinadən xəbər verir ki, virus insan əlində bir neçə saat, hətta otaq temperaturunda yeməkdə daha uzun müddət yaşaya bilir. Virus həmçinin əvvəllər kanalizasiya ilə çirklənmiş suda yaşayan qabıqlı balıqlar və ya emal zamanı çirklənmiş meyvə və ya çiy tərəvəzlər vasitəsilə də ötürülə bilər. Yüksək temperatur, istilik hepatit A virusunu tamamilə öldürür, lakin yemək bişirildikdən sonra çirklənə bilər. Virus kifayət qədər gigiyena bacarıqlarının olmaması və sanitar şəraitin zəif olduğu yerlərdə olur. İnsanların sıx olduğu yerlərdə sıx təmas nəticəsində insanlar arasında yayıla bilər. Hepatit A 4-10 gün davam edən hərarət, zəiflik və pis hiss, iştahsızlıq, ürəkbulanma və qusma, əzələ ağrıları ilə başlayır. Xəstəliyin növbəti mərhələsində qaraciyər prosesə qoşulduqda sidik qaralır. Daha bir-iki gün sonra gözlərin və dərinin ağları saralır (sarılıq), nəcis rəngsizləşir. Bu zaman ilkin qızdırma və ürəkbulanma yox olur. Xəstə ümumi qaşınma və qarın ağrısı hiss edə bilər. Bəzi insanlarda, xüsusən də uşaqlarda hepatit A asomptomatik ola bilər və buna görə də xəstəliyə səhv diaqnoz qoyula bilər.

Mamed Nanacanov adlı iş adamı ilə ailə quraraq Moskvaya köçən müğənni Afət Fərmanqızı qeyri-adi açıqlaması ilə gündəmə gəlib.  Sozcu.az xəbər verir ki, bir müddət əvvəl hamilə olduğunu deyən ifaçı daha sonra bətnindəki övladını itirdiyini açıqlamışdı.  Bu barədə sosial şəbəkə hesabında ona sual ünvanlayan izləyicisinə cavab verən Fərmanqızı hər kəsi təəccübləndirib. Belə ki, sənətçi “Floradan qorxdum, uşaq düşdü” - deyə izləyicisinin sualına cavab verib. Qeyd edək ki, xalq artisti Flora Kərimova müğənni Afət Fərmanqızını məhkəməyə verib. Kərimova Afət Fərmanqızının onu təhqir etdiyi üçün Cinayət Məcəlləsinin 147-ci (böhtan) və 148-ci (təhqir) maddələri ilə ittiham olunmasını tələb edir. 

“Naxçıvanda ətin qiyməti son günlər kəskin bahalaşıb. Buna səbəbin muxtar respublikadan ət ixracına qoyulan qadağanın aradan qaldırılması olduğu bildirilir”.  Sozcu.az xəbər verir ki, yerli sakinlərin Gündəlik Naxçıvan“a verdiyi məlumata görə, mal ətinin qiyməti 9 manatdan 14 manata, quzu əti isə, 13 manatdan 18-ə qaldırılıb. Şərur rayon sakini Zaur Nəsirov deyir ki, Naxçıvanda ətin qiyməti Bakıya nisbətən həmişə ucuz olub. Lakin, sonuncu dəfə ət almağa gedəndə, gözlərinə inanmayıb: “İndiyə kimi bu cür qiymət qalxımı olmamışdı. Əvvəl qalxanda 1-2 manat qalxırdı. Naxçıvanda həmişə 3-4 manat ucuz olub ət. İndi isə bir neçə günün içində haradasa Bakı ilə eyni olub.  Son zamanlara qədər bazarda ən yaxşı mal əti 10,11 manat idi. Topdan daha da ucuz ala bilirdik. Yas yerimiz var idi, topdan həmişə aldığım yerdən ət almağa getdim. Əvvəllər topdan 8 manata aldığım dana ətini 13 manata dedilər. Pərakəndə qiymətini isə 14 manat olub. Pərakəndə satılan yaxşı quzu ətinin qiyməti 18 manatdır”.  Naxçıvanda on ildən artıqdır ki, qəssab işlədiyini deyən Rizvan Tağıyev bildirir ki, ətin qalxmasında onların heç bir günahı yoxdur: “Əvvəllər Naxçıvandan ət və bir sıra məhsulların çıxarılmasına qadağa qoyulmuşdu. Buna görə də, qiymətlər Bakıdan fərqli olaraq sabit qalırdı. Yeni hakimiyyət qurulandan, bu qadağa götürülüb. Bakıda da ətin qiyməti baha olduğu üçün bəzi alverçilər buradan kütləvi şəkildə bizim aldığımızdan baha qiymətə sahibkarlardan ət alır, Bakıya göndərirlər. Bu səbəbdən də qıtlıq yaranır. Sahibkarlar bizə deyil, əti baha qiymətə o işbazlara satırlar. Ona görə də, biz də onlardan baha qiymətə almalı olduq. Bu isə qiymət qalxımına səbəb oldu”.

Azərbaycan millisinin hücumçusu Mahir Emrelinin komandası "Konyaspor" bu həftə lider "Qalatasaray"la qarşılaşacaq. Sozcu.az xəbər verir ki, komandalar Türkiyə superliqasının 25-ci turunda üz-üzə gələcək. Konya şəhərində keçiriləcək turun bu açılış matçı martın 17-i Bakı vaxtı ilə saat 21:00-da başlanacaq. M.Emrelinin görüşdə iştirakı gözlənilir. "Konyaspor" martın 13-də bu vacib oyunun hazırlığına başlayıb. Məşqlərdə M.Emreli də fəal iştirak edib. Hazırlıq prosesi bu gün davam etdiriləcək. Qeyd edək ki, 24 turdan sonra "Qalatasaray" 60 xalla 1-ci, "Konyaspor" isə 31 xalla 8-ci yeri tutur. Əlavə edək ki, M.Emreli ötən tur "Giresunspor"la görüşdə (0: 0) debüt edib. Start heyətdə meydana daxil olan 25 yaşlı hücumçu 56-cı dəqiqədə əvəzlənib.

“Azərbaycan nümayəndələri ilə görüşlər Rusiya sülhməramlılarının vasitəçiliyi ilə ola bilər”. Sozcu.az xəbər verir ki, Qarabağdakı qondarma qurumun “xarici işlər nazirliyi” Azərbaycan Prezidenti Administrasiyasının bir gün əvvəl mətbuatda dərc olunmuş təklifi ilə bağlı “bəyanat” yayıb. “Azərbaycan Respublikası Prezidentinin Aparatının Azərbaycan və Qarabağ nümayəndələri arasında görüşün keçirilməsi təklifinə cavab olaraq bildiririk ki, bu cür görüşlərin həyata keçirilə biləcəyi barədə əvvəllər bəyan etdiyimiz mövqeyə sadiqik. Rusiya Federasiyası sülhməramlılarının vasitəçiliyi ilə bu il martın 1-də olduğu kimi görüş keçirilə bilər. Laçın dəhlizinin “bağlanması” və davam edən humanitar “böhran” qəbuledilməzdir və danışıqlar üçün əlverişli atmosfer yaratmaq üçün heç bir iş görmür”, – “bəyanat”da deyilir. Bir sözlə, Erməni separatçıları Azərbaycan tərəfinin ikinci görüşün Bakıda keçirilməsi təklifindən imtina ediblər.konkret

ABŞ Dövlət Departamenti İran İslam Respublikasına məxsus hərbi təyyarənin Azərbaycan-İran dövlət sərhədi boyunca uçuş həyata keçirməsinə münasibət bildirib. Bu barədə qurumun mətbuat xidmətinin rəhbəri Ned Prays keçirdiyi mətbuat konfransında danışıb. O qeyd edib ki, İran uzun müddətdir ki, regionda pis niyyətli oyunçu olub: “Azərbaycan və İrana gəlincə, təbii ki, İran uzun müddətdir ki, regionda pis niyyətli oyunçudur. O, həm yaxın, həm də uzaq qonşularını təhdid edən zərərli işlərlə məşğul olur. Ona görə də biz bu tip gərginlikləri narahatlıqla izləyirik. Bizim yanaşmamız ondan ibarətdir ki, bir az əvvəl çox fərqli kontekstdə dediyimiz kimi, Cənubi Qafqazda Azərbaycanla, Ermənistanla əlaqələrimizə sərmayə qoymaqdan ibarətdir ki, daha sabit, münaqişəyə və gərginliyə daha az meylli Cənubi Qafqaz regionuna nail olaq”.

Gürcüstan Prezidenti Salome Zurabişvili Brüsseldə Avropa İttifaqı (Aİ) Şurasının Prezidenti Şarl Mişellə görüşüb. Bu barədə məlumat Aİ Şurasının saytında dərc edilib. Görüşdə müzakirə edilən məsələlərlə bağlı məlumat verilməyib.

Elektrik enerjisinin ötürülməsi ən vacib məsələlərdən biridir. çünki bu gün bizim ixrac imkanlarımız ötürülmə gücləri ilə məhdudlaşır. Bu barədə Azərbaycan Respublikasının Prezidenti İlham Əliyev martın 13-də Berlində Almaniyanın aparıcı şirkətlərinin rəhbərləri ilə görüşdə bildirib. “Xatirimdədir ki, Gürcüstan və Türkiyə vasitəsilə maksimum 1000, yaxud 1500 meqavat ötürmə qabiliyyəti var. Hər iki ölkədə - Gürcüstan və Türkiyədə bu həcmlər tamamilə son həddədir”, - deyən dövlət başçısı vurğulayıb ki, buna görə ötürmə qabiliyyətinin artırılması üçün həmin iki ölkəyə əlavə sərmayələr yatırılmalıdır.