Belarus Prezidenti Aleksandr Lukaşenko ölüm ayağındadır. Onun varis məsələsini həll etmək üçün Kreml Minsklə birgə informasiya oyunu oynayır. Sozcu.az xəbər verir ki, bu barədə Rusiyanın BRIEF nəşri məlumat yayıb. “Bunun sübutu kimi Putinlə Lukaşenkonun son görüşünü göstərmək olar. Həmin görüşün videogörüntülərini bir il əvvəlki görüntülərlə müqayisə etdikdə, bir çox mətləblər üzə çıxır. Ümumiyyətlə, Lukaşenkonun səhhətində problem yaranıb. O, Putinin Aİİ ölkələrinin Baş nazirləri ilə görüşlərində də iştirak etməyib. Lukaşenko Soçidə də gözdən itib. Onu sonuncu dəfə xüsusi tibbi korsetdə görüblər”, - məlumatda deyilir. Xatırladaq ki, 2 iyunda Lukaşenkonun səhhətinin kritik olması səbəbi ilə hakimiyyətin ötürülməsi üçün Rusiya Federal Təhlükəsizlik Xidmətinin rəhbəri Bortnikov, Xarici Kəşfiyyat Xidmətinin rəhbəri Narışkin və Təhlükəsizlik Şurasının katibi Patruşevin təcili Belarusa getdiyi haqda da məlumat yayılmışdı.

Ukraynanın Zaporojye istiqamətində davam edən döyüşlər zamanı Rusiya ordusunun general-mayoru Sergey Qoryaçyov öldürülüb. Sozcu.az xəbər verir ki, bu barədə Rusiyanın Teleqram kanallarında məlumat yayılıb. Bildirilib ki, Rusiyanın 35-ci ümumordu qərargah rəisi general-mayor Sergey Qoryaçyov artilleriya zərbələri nəticəsində ölüb. Qeyd edək ki, Qoryaçyov vaxtı ilə Rusiyanın Dnestyanıdakı qüvvələrinə rəhbərlik edirdi. Məlumata görə, hərbi xidmətini Gəncədəki 104-cü hava-desant diviziyasında çəkib.

İmişlidə karxanada maşının təkəri partlayıb, şirkət əməkdaşı sol qolunu itirib. Bu barədə Sozcu.az-a Baş Prokurorluğun Mətbuat Xidmətindən məlumat verilib. Bildirilib ki, iyunun 12-si saat 17 radələrində İmişli rayonu, Bəhrəmtəpə qəsəbəsində yerləşən Türkaz MMC-yə məxsus qum-çınqıl karxanasında təmirçi işləyən 1990-cı il təvəllüdlü İlqar Qurbanov iş yerində təmir etdiyi nəqliyyat vasitəsinin təkərinin partlaması nəticəsində sol qolunu itirib. Faktla bağlı İmişli Rayon Prokurorluğunda araşdırma aparılır.

Hakimiyyət artıq Rusiya ordusunun Ermənistandan çıxarılması prosesinə başlayıb. Sozcu.az xəbər verir ki, bunu erməni mediasına açıqlamasında Ermənistanın Niderlanddakı sabiq səfiri Dzünik Ağacanyan deyib. Onun sözlərinə görə, bunun üçün Ermənistan cəmiyyətinin Zəngəzurdan keçən dəhlizlə bağlı danışıqlara birmənalı mənfi münasibətindən istifadə edilir: “Sənədin imzalanmasından qısa müddət sonra dəmir yolu üzərində nəzarət Qərb şirkətlərinə verilərsə, xarici qüvvələr Ermənistana daxil olarsa və AB missiyası NATO-nun hərbi mövcudluğuna çevrilərsə, təəccüblənmərəm. AB müşahidəçilərinin bu gün Ermənistanda olduqlarını nəzərə alsaq, bunu etmək çox asan olacaq”. O qeyd edib ki, Ermənistan sərhədləri, xüsusilə Türkiyə ilə sərhəd Rusiya hərbçiləri hesabına təhlükəsiz şəkildə qorunur.

Şağan Olimpiya İdman Kompleksində gənc cüdoçu Turan Rüstəmovu qətlə yetirməkdə təqsirləndirilən Ruslan Səfixanova hökm oxunub və o, 19 il müddətinə azadlıqdan məhrum edilib. Sozcu.az xəbər verir ki, bu barədə hökm Bakı Ağır Cinayətlər Məhkəməsində elan olunub. Xatırladaq ki, prokuror Rauf Malışov R.Səfixanovun 20 il müddətinə azadlıqdan məhrum edilməsini istəmişdi. Qeyd edək ki, hadisə ötən ilin noyabrında Xəzər rayonu Şağan qəsəbəsində yerləşən idman arenasında baş verib. Belə ki, Sumqayıt şəhər sakini, 2002-ci il təvəllüdlü R.Səfixanov şəxsi münasibətlər zəminində aralarında yaranan mübahisə zamanı Yevlax rayon sakini, 2006-cı il təvəllüdlü T.Rüstəmova bıçaqla xəsarət yetirərək qəsdən öldürməsinə əsaslı şübhələr müəyyən edilib. R.Səfixanova qarşı Cinayət Məcəlləsinin 120.2.2-ci (qəsdən adam öldürmə, xuliqanlıq niyyəti ilə adam öldürmə) maddəsi ilə ittiham olunub.

Azərbaycan diaspor təşkilatları Ermənistanın Azərbaycanla, Naxçıvan Muxtar Respublikası ilə sərhəddə - Yerasx (Arazdəyən) kəndində iri metallurgiya zavodunun inşasının aparılması ilə bağlı beynəlxalq təşkilatlara ünvanlanan bəyanat yayıb. Sozcu.az bəyanatın mətnini təqdim edir: “Biz, dünyanın müxtəlif ölkələrində yaşayan azərbaycanlılar Ermənistanın Azərbaycanla, Naxçıvan Muxtar Respublikası ilə sərhəddə - Yerasx (Arazdəyən) kəndində iri metallurgiya zavodunun inşasının aparılması ilə bağlı xəbərini dərin hiddətlə qarşılayır və bu reallığı Ermənistanın ekoloji vəziyyətin gərginləşməsi istiqamətində növbəti addımının ifşası kimi dəyərləndiririk. 16 500 kvadratmetr sahədə illik istehsal gücü 180 000 ton olan belə bir zavodun tikilməsi Ermənistan tərəfindən beynəlxalq hüquq norma və prinsiplərinin, xüsusilə də BMT-nin Avropa İqtisadi Komissiyasının Transsərhəd kontekstdə ətraf mühitə təsirin qiymətləndirilməsi haqqında Konvensiyasının (Espo Konvensiyası) müddəlarının kobud surətdə pozulması deməkdir. Mövcud Espo Konvensiyasının müddəalarına görə, Ermənistan öz ərazisində planlaşdırdığı belə bir iri təsərrüfat fəaliyyətinin digər ölkələrin, xüsusilə Azərbaycanın ərazisinə mənfi ekoloji təsiri olduğu üçün bu fəaliyyəti Azərbaycanın müvafiq qurumları ilə razılaşdırılmalıdır. Ermənistanın bu addımı beynəlxalq hüquq, o cümlədən ekoloji hüquq normalarına riayət edilməməsi ilk hal deyil. Belə ki, bir müddət əvvəl Azərbaycan Metsamor Atom Elektrik Stansiyasının ərazisində yeni nüvə reaktorunun tikintisi planları ilə əlaqədar Espo Konvensiyası çərçivəsində Ermənistana qarşı haqlı iddia ilə çıxış etmişdir. Nəticədə Ermənistanın Konvensiyanın müddəalarına əməl etmədiyi barədə qərar çıxarılmasına nail olmuşdur. Bildiririk ki, Ermənistanın iri mədən müəssisələri - Qacaran mis-molibden zavodu və Qafan filiz emalı kombinatının yüksək kimyəvi tərkibli istehsalat suları uzun müddət transsərhəd Oxçuçayı intensiv şəkildə çirkləndirməklə Azərbaycanın ekoloji mühitinə ciddi mənfi təsir göstərməkdədir. Qeyd etdiyimiz faktlar bir daha sübut edir ki, Ermənistan öz qanunsuz fəaliyyətləri ilə ümumi regionun ekoloji mühiti üçün təhlükə yaradır. Xaricdə yaşayan azərbaycanlılar kimi soydaşlarımızın haqq səsinə qoşularaq Ermənistanın regionun ekoloji təhlükəsizliyinə zərbə vuran, beynəlxalq hüquq normalarına zidd olan əməllərini qətiyyətlə pisləyir, beynəlxalq ictimaiyyəti bu məsələdə Ermənistana təzyiq göstərməyə çağırırıq”.

Dənizkənarı Bulvar ərazisində kaktusları kəsərək yandıran şəxs saxlanılıb. Bu barədə Sozcu.az-a Daxili İşlər Nazirliyinin (DİN) Mətbuat Xidmətindən məlumat verilib. Bildirilib ki, həmin ərazidə kaktusların kəsilməsi, yandırılması ilə bağlı yayılan görüntülər araşdırılıb. Əməli törədən şəxs – Varis Etibar oğlu Cəfərli polis əməkdaşları tərəfindən müəyyən olunaraq saxlanılıb. Araşdırma aparılır. "Araşdırmanın nəticəsindən asılı olaraq əmələ hüquqi qiymət veriləcəkdir", - məlumatda qeyd edilib.

Tehranın Rudəki küçəsində bələdiyyə idarəsinin cümə imamı Cavir Rzayi bıçaqlanıb. Sozcu.az xəbər verir ki, bu barədə İran mediası məlumat yayıb. Məlumata görə, mollanı bıçaqlayan yeniyetmə oğlan hadisə yerindən qaçıb. Cabr Rzayi Xomeyni xəstəxanasına çatdırılıb, vəziyyəti orta ağırdır.

 Azərbaycanın başına gələn bəlaların hamısı Rus və Fars şovinistlərinin əli ilə gəlib. Ən çox da Rusun. İndi gəlin baxaq görək bəs hər şeyi qüdrətli,daim bizdən güclü olan rusa biz nə etmişik? Yəni onun o boyda rus gücünə qarşı hansı güc tətbiq edərək haradasa uğur,qələbə əldə edə bilmişikmi? Etmişiksə necə,nə cür və harada etmişik?.. Bəli edə bilmişik. Rus qoşunları iki dəfə Azərbaycanda ağır məğlubiyyətə düçar olub. İkisində də bu hadisələr Şəmkirdə olub. Birinci dəfə keçən əsrin əvvəllərində 1918-ci il yanvar ayının 08-də AzərbaycandanTürkiyəyə gedən rusların qarşısını Şamxor stansiyasında kəsən Azərbaycanlılar 2000( iki min) nəfərdən çox Rus və Ermənini məhv etmiş,sıradan çıxartmış və onların hamısını tərksilah edərək onların Türkiyəyə getməsinə yol verməmişlər. Bu həmin ərəfədə bütün düşmənlərinə qarşı eyni zamanda döyüşən Türkiyəyə böyük kömək oldu. İkinci dəfə isə keçən əsrin sonlarında 1992-ci ilin 14 iyununda Şəmkirdə yerləşən 861 saylı alay sayları cəmi 100 (yüz) nəfərə çatan qüvvə ilə hücum edərək Şəmkirdə yerləşən hərbi Aerodromu Ruslardan aldı. Bu əməliyyat ağlasığmaz,fantastik surətdə həyata keçirilən əməliyyat oldu. Belə ki, rusların aerodromdakı əsgər,gizir,MAXE və zabit heyətinin birlikdə sayı təxminən 1500(min beş yüz) nəfərə yaxın idi. Biz aerodroma daxil olduqdan sonra Şəmkirin mərkəzində yerləşən Desant Şturm Briqadası da onların köməyinə gəldi. Nəzərə alsaq ki, desantların da sayı 1000(min)nəfərə yaxın idi (balacasının boyu 1m 90 sm olardı) İndi əziz dostlar özünüz aerodromda nələr olduğunu,ola biləcəyini təsəvvür edin. Yenə yazıram - Bizim cəmi sayımız 100(yüz)nəfər yox idi. Bu mübarizə bizə mütləq lazım idi. Biz özümüzü sübut etməli, mütləq formada silahlanmalı idik. Silahı da yalnız rusları tərksilah edərək ələ keçirməli idik. Bu gün mən bu yazıları yazıramsa demək bu işin öhdəsindən layiqincə gəlmişik. Biz aerodromda olan bütün silahları ələ keçirib tam silahlandıq və sonralar Gədəbəy uğrunda döyüşlərə qatıldıq... Demək şöhrəti yer üzü ilə bir olan ruslara da istəyəndə qalib gəlmək olar. Biz ruslara qarşı 45 sutka canavarlar kimi üz-üzə, ağız ağıza duraraq Azərbaycan üçün son dərəcə əhəmiyyəti olan aerodromu qoruyub saxladıq,əldən vermədik. Məhz 1992--1994-cü illərdə Qarabağda erməniləri bombalayan qırıcı təyyarələrimiz bu aerodromdan uçurdular. Amma çox əfsuslar olsun ki, belə bir mühüm əməliyyat barədə məlumat heç yerdə öz əksini tapmamışdır. Elə isə mən sizə əldə etdiyimiz qənimətlərlə tanış edim: --- MiQ-25 (qırıcı təyyarə) -- 5(beş)ədəd. --- Su-24 (qırıcı təyyarə) -- 11(on bir)ədəd. --- İl-76 (ağır yükdaşıyan təyyarə)--3(üç)ədəd. --- Atıcı silahlar -- 2436 (iki min dörd yüz oyuz altı)ədəd. --- Yanacaq sürtkü materialları 3000 (üç min) tona qədər. --- Xüsusi təyinatlı aviasiya və mühəndis texnikaları-- 300 (üç yüz)-dən çox.  --- Və külli miqdarda ərzaq ehtiyyatı və Aviaəmlak...   İndi isə həmin aerodromu ələ keçirən,əməliyyata rəhbərlik edən hərbçilərin bir qisminin adını qeyd edirəm:  --Hərbi hissə komandiri - Polkovnik leytenant Cahangir Rüstəmov.  --Hərbi hissə komandirinin müavini baş leytenant Dilqəm Əliyev.  --Rota komandiri kapitan İlham Əliyev.  --Rota komandiri leytenant Əliyar Novruzov.  --Taqım komandiri leytenant Yasin Rüstəmov.  --Taqım komandiri leytenant Qalib Hüseynov.  -- Minomyot Batareyasının komandiri leytenant Aydın Məhərrəmov.  --Taqım komandiri Oruc Mahmudov.  --Taqım komandiri gizir Tahir Vəliyev.  --Gizir Namiq Abbasov.  --Gizir Şahin Adıgözəlov.  --Gizir İlham Adıgözəlov.  --Gizir Adil Şükürov.  --Gizir Yusif Musayev.  --Gizir İlham İsgəndərov.   --Könüllü Həsən Abdullayev.  --Əsgər Qoşun Ələkbərov.  --Əsgər Ələddin Cəfərov.  --Könüllü İlqar Məhərov və ... adlarını yazmadığım başqa igidlər...   Diqqətinizə olduqca mühüm bir şeyi də çatdırmaq istəytirəm. Belə ki, bu əməliyyat zamanı,ruslara qarşı durduğumuz qeyri bərabər 45 sutkada bizə Şəmkir camaatı çox böyük dəstək oldu. Onlardan bəzilərini sizlərin yadına salmaq istəyirəm:  -- Şahbaz Süleymanov( Saşa dayı) --Şəmkir konyak zavodunun direktoru.  -- Hafiz İbrahimov-- Şəmkir şərab zavodunun direktoru.  -- Malik müəllim-- Şəmkir şərab zavodu.  -- Fəxrəddin Məmmədov --Şəmkir beton zavodunun direktoru.  -- Firdovsi Ələkbərov -- Şəmkirli xeyriyyəçi.  -- Füzuli Ələkbərov -- Şəmkirli xeyriyyəçi.  -- Abdulla Sadıqov -- Şəmkir Rayon İcra Hakimiyyətinin əməkdaşı...  ... Mən bu siyahını da uzada bilərəm. Ancaq hamısının adını tam yaza bilmirəm.(bir çoxunu unutmuşam). Bu insanlardan bəziləri artıq həyatda olmasa da onların hamısı həmin əməliyyatın iştirakçılarının yaddaşında ömürlük qalacaqlar... ALLAH ölənlərə Rəhmət, qalanlara can sağlığı versin... Dilqəm Əliyev - Birinci Qarabağ müharibəsi qazisi, peşakar hərbiçi

Bir neçə gündür sosial şəbəkələrdə övladı ağır vəziyyətdə olan ana fəryad edərək dəstək və yardım istəyir. Belə ki, oğlu ağır yataq xəstəsi olan qadın xəstənin bu vəziyyətə düşməsində həkimləri və konkret olaraq, MEDERA hospitalın neyrocərrah və həkimlərini ittiham edir. Sozcu.az xəbər verir ki, aadının sözlərinə görə, onun övladını Medera Hospitalın cərrah və həkimləri səhv əməliyyat edib və sağaltmaq əvəzinə, əksinə daha da ciddi fəsadlar yetiriblər. 16 yaşlı oğlum avtomobil qəzasına düşmüşdü. Onu Semaşkoya aparmışdılar. Orda saxlamayıb, özəl xəstəxanaya köçürdüm ki, orda daha yaxşı şərait var və həkimlər mənə söz verdi ki, bura gətir, bir sağaldacağıq. Semaşkoda ölməsin deyə, onu Medera hospitala köçürdüm. Orda nə pul istədilər verdim, pula görə onun beynini əməliyyat etdilər. Beyin qapağını açdılar. Nəfəs alması üçün traxeyadan dəlik açanda, vurub boğazını, qida borusunu da deşdilər. Mən Mehriban xanıma, prezidentə müraciət edirəm. Məni həkimlər və klinika aldadıb. Hər dəfə bu ay yaxşı olacaq, gələn ay sağaldacağıq deyə-deyə uşağımı əridib, koma vəziyyətində mənə verdilər. Uşağımın başında problem yox idi. 90 kiloluq uşaqdan 30 kilo qalıb. MedEraya gedib gəldim, uşağımı müalicə edin dedim, məni polislə ordan uzaqlaşdırdılar. Əvvəl 10 min təklif etdilər. Amma mən istəmədim. Çünki mənim övladımın dərdi 10 minlə sağalmır. Məni aldatdılar ki, Azərbaycanda dərdinə dərman olmasa, Türkiyəyə göndərəcəyəm. Amma indi məni qapıdan qovurlar. Hər şeyi boyunlarından atırlar. Qida borusu salamat uşağımı deşiblər, nə yemək yeyə bilir, nə su. Əriyib gedir. Beyni salamat idi, beynini açıb qarnına tikdilər. Uşağımın sağalması üçün yalvarıram. Medera hospital məniçm evimi yıxdı”. (Medicina.az)

İyunun 12-si saat 13:35-dən saat 14:35-dək Ermənistan silahlı qüvvələrinin bölmələri Basarkeçər rayonunun Zərkənd yaşayış məntəqəsi istiqamətində yerləşən mövqelərindən Azərbaycan Ordusunun Kəlbəcər rayonunun Dəmirçidam yaşayış məntəqəsi istiqamətində yerləşən mövqelərini atıcı silahlardan intensiv atəşə tutub. Bu barədə Sozcu.az-a Müdafiə Nazirliyindən (MN) məlumat verilib. Bölmələrimiz tərəfindən qeyd olunan istiqamətdə adekvat cavab tədbirləri görülüb. Bundan başqa, qeyri-qanuni erməni silahlı dəstələrinin üzvləri saat 11:15-dən 16:50-dək kənd təsərrüfatı işləri adı altında Ordumuzun Füzuli və Laçın rayonları istiqamətlərində yerləşən mövqelərinin qarşısında uzunmüddətli fortifikasiya qurğularını quraşdırmağa cəhd göstəriblər. Azərbaycan Ordusunun bölmələri tərəfindən görülən təxirəsalınmaz tədbirlər nəticəsində aparılan işlər dərhal dayandırılıb.

"Son zamanlar Azərbaycanla İran arasında bir sıra təmaslar həyata keçirilib. Xarici işlər nazirləri arasında baş tutan danışıqlar zamanı ölkələrimiz arasında yaranmış məlum vəziyyətə dair ətraflı fikir mübadiləsi aparılıb". Sozcu.az xəbər verir ki, bu fikirləri Xarici İşlər Nazirliyinin mətbuat katibi Ayxan Hacızadə İranın Xarici İşlər Nazirliyinin mətbuat katibi Nasir Kənaninin 12 iyun tarixli şərhinə münasibət bildirərkən səsləndirib. O, cari ilin yanvar ayında terror hücumu nəticəsində fəaliyyətini dayandıran səfirliyimizin işinin bərpa olunması məsələsinə də toxunub: "Azərbaycan terror hücumu ilə bağlı istintaqın başa çatdırılacağını gözləyir. Terror aktını törədənlər və sifarişçilər məsuliyyətə cəlb olunmalı, ən sərt şəkildə cəzalandırılmalıdır. Azərbaycan tərəfi əmin olmalıdır ki, səfirliyin təhlükəsiz fəaliyyəti üçün şərait mövcuddur və bununla bağlı tam zəmanət verilməlidir".

İran rəsmiləri yenidən Azərbaycana qarşı təhdidlərə start veriblər.  Belə ki, İranın Daxili İşlər naziri Əhməd Vahidi Azərbaycan Respublikasının sərhədində ölkəmizə qarşı təhdid və istehzalar səsləndirib.  Mətbuatın yazdığına görə, Əhməd Vahidi prezident və nümayəndə heyəti üzvlərinin Təbrizə səfərinin ikinci günü İranla Azərbaycan sərhədində yerləşən “Xudafərin” və “Qızıl qalası” bəndlərinə baş çəkib.  Bu səfər zamanı Əhməd Vahidi Bakıya üstüörtülü xəbərdarlıq edərək deyib: "Azərbaycan Respublikasının İran hökumətindən yaxşı dostu olmayacaq. İslam Respublikası ilə düşmənçilik edən hər kəs uduzmuş olar". Qeyd edək ki,  Azərbaycan İrana qarşı heç zaman təhdid, qonşuluq prinsiplərinə zidd addım atılmayıb. İran isə bunun əksinə olaraq hər zaman Ermənistana açıq və gizli dəstəyini nümayiş etdirib. Bununla yanaşı, İranın ekspertləri, keçmiş səfirləri və bir sıra dövlət nümayəndələri tərəfindən son zamanlar Azərbaycana qarşı təhdid dolu fikirlər səsləndirilir. Dostluqdan danışan İran özü dost olmaq istəmir...  Tehranın rəsmi səviyyədə yenidən hədələrə start verməsi bu dəfə nə ilə bağlıdır? Bizim.Media-ya açıqlamasında politoloq Tural İsmayılov bildirir ki, İran rəsmilərinin belə mövqe sərgiləməsi Tehranla münasibətlərimizin hələ uzun müddət normallaşmayacağını söyləməyə əsas verir: “İran Azərbaycan münasibətlərində bu gün əmələ gələn soyuqluğun ən böyük səbəbi Tehranın qeyri-səmimi siyasətidir. Azərbaycan heç zaman İran da daxil olmaqla hansısa qonşuları ilə münasibətlərinin korlanmasını istəməyib. Bakı heç zaman buna zəmin yaratmayıb. Lakin Azərbaycanın səmimi qonşuluq prinsiplərinə riayət etməsinə rəğmən, İran tərəfinin ölkəmizə münasibətdə düşmənçilik siyasəti bir gün də olsa dayanmayıb”.  Ekspert qeyd edir ki, son dövrlər dünyada təklənmiş İranın Azərbaycanla  əlaqədar buna qədər verdiyi pozitiv mesajlara da inanmaq olmaz:  “İrana səyahət edən Azərbaycan vətəndaşının saxta ittihamlarla həbs olunması, dövlətimizə qarşı təbliğat aparan “Hüseyniyyun” terrorçu təşkilat nümayəndələrinin Bakıya təhvil verilməməsi, mətbuatda hələ də ölkəmizə qarşı çirkin kampaniyanın davam etdirilməsi söyləməyə əsas verir ki, Tehranın Azərbaycanla bağlı siyasətində hər hansı bir dəyişiklik yoxdur.  İran Azərbaycana münasibətdə pozitiv addımlar atsa münasibətlər düzələ bilər. Amma İranın hərəkəti onun bunun əksinə getdiyinə işarədir. Belə mövqe isə İranla münasibətlərimizin hələ uzun müddət normallaşmayacağını söyləməyə əsas verir”.

"Rusiyalı işğalçılar bəndi partladaraq bu fəlakəti törədib, insanları su basmış şəhər və kəndlərdə taleyin hökmünə buraxıb, indi də riyakarcasına və qəddarcasına insanları təxliyyə edən zaman atəşə məruz qoyur..." Rusiya qoşunları su başmış evlərindən xilas olan insanların kürəyinə atəş açıb... Rusiyalı hərbçilər dinc sakinlər olan qayığı atəşə tutub, bu, insanları Xerson vilayətinin Rusiya qüvvələrinin nəzarət etdiyi Dnepr çayının sol sahilindən təxiyyə edən zaman baş verib. Sozcu.az xəbər verir ki, bu barədə Ukrayna prezidenti Ofisinin rəhbəri Andrey Yermak məlumat verib. "Onlar mükli insanların kürəyinə atəş açıb. Altı adam yaralanıb. Onlar Xersona çatıb və tibbi müəssisəyə yerləşdirilib. Həkimlər yaralıların həyatları uğrunda mübarizə aparır. Rusiyalılar qorxaq terrorçulardır", - Yermak "Telegram-kanal"da yazıb. Sonradan Xerson vilayəti hərbi administrasiyasının rəhbəri Aleksandr Prokudin məlumat verib ki, atəş nəticəsində üç nəfər həlak olub, 10 nəfərdən çox adam yaralanıb. Onların arasında qadını bədənilə qoruyan 74 yaşlı kişi də olub, rusiyalılar onu kürəyindən güllələyib. Təəssüf ki, onun həyatını xilas etmək mümkün olmayıb. Qayıqda, əsasən, yaşlı adamlar olub, bunu Ukrayna daxili işlər naziri İqor Klimenko deyib. Daxili İşlər Nazirliyi insanların Dneprin sol sahilindən təxliyyəsinin fotoşəkillərini dərc edib. Baş Prokurorluğun ofisi son məlumatları açıqlayıb. Atəş nəticəsində ən azı 23 nəfər zərər çəkib. Xerson prokurorluğu müharibə qanunları və qaydalarının pozulması haqqında və qəsdən adam öldürmə maddələri üzrə baş vermiş faciənin tədqiqatına başlayıb. Ukrayna prezidenti Vladimir Zelenski müharibənin 473-cü gününün nəticələrinə dair müraciətində dəqiqləşdirib ki, atəş altına düşən qayıqda Xerson vilayətinin işğal edilmiş sol sahilində yerləşən Kardaşinka kəndindən insanlar təxliyyə edilib. "İşğalçılar bəndi partladaraq bu fəlakəti yaradıb, insanları su basmış şəhər və kəndlərdə taleyin hökmünə buraxıb, indi də insanları xilas etməyə cəhd edilən qayıqları da atəşə tutur...Hətta vəhşi heyvanlar da Rusiya dövlətindən daha mənəviyyatlıdır", - Ukrayna prezidenti vurğulayıb. "Beynəlxalq ədalət məhkəməsi nümayəndələrinin Rusiyanın terror aktının nəticələrini öz gözləri ilə görməsi və Rusiya terrorunun davam etməsini özlərinin eşitməsi çox vacibdir. Və bu terror su basmış ərazinin maksimal riyakar və qəddar atəşlərilə davam edir", - prezident deyib.

Azərbaycan Respublikasının müvəqqəti(!) olaraq Rusiyanın "sülhməramlı" sayılan hərbi kontingentinin nəzarətində olan və 32-ci ildir haykların işğalı altında qalan Xocalı rayonu ərazisində Rusiya günü qeyd olunub. Sozcu.az xəbər verir ki, bu haqda video-görüntülər sosial şəbəkələrin erməni seqmentində yayılıb. Rusiyanın dövlət bayramını qeyd edən həmin ölkənin "sülhməramlı" kontingentidir. Tədbi,r çox güman ki, "sülhməramlı"ların Xocalı hava limanı ərazisindəki mərkəzi qərargahında qeyd olunub.... İyunun 12-də Rusiya Günü qeyd edilir. 1990-cı ilin bu günü RSFSR Xalq Deputatları Soveti Rusiyanın dövlət suverenliyi haqqında Bəyannaməni təsdiq edib.  1991-ci il iyunun 12-də ilk prezident seçkiləri keçirilib, ölkənin adı dəyişdirilərək Rusiya Federasiyası adlandırılıb, yeni Konstitusiya qəbul edilib. Onu da xatırladaq ki, 1992-ci i fevralın 26-da Xocalıdakı Azərbaycan türklərinə qarşı soyqırım məhz Rusiyanın Xankəndində yerləşən 366-cı alayının dəstəyi ilə həyata keçirilib...moderator

Xəbər verdiyimiz kimi, Gədəbəy rayonu, Novosaratovka kəndi ərazisində yerləşən "Dəniz" adlı kafedə şəxslər arasında yaranmış mübahisə nəticəsində Tapdıqov Teymur Cümşüd oğlunun ölməsi, Tapdıqov Samir Cümşüd oğlunun və Müdafiə Nazirliyinin N saylı hərbi hissəsinin müddətdən artıq həqiqi hərbi xidmət hərbi qulluqçusu, əsgər İbrahimov Elpərəs Bəhman oğlunun müxtəlif dərəcəli bədən xəsarətləri alması faktı ilə əlaqədar Şəmkir hərbi prokurorluğunda cinayət işi istintaq edilir. Sozcu.az xəbər verir ki, bu barədə Hərbi Prokurorluq məlumat yayıb. Bildirilib ki, istintaqın gedişatı və hadisə barədə ictimaiyyətə əlavə məlumat verilməsi təmin olunacaq. Aparılmış istintaqla İbrahimov Elpərəs Bəhman oğlunun sözügedən məkanda bıçaqla Tapdıqov Teymur Cümşüd oğluna müxtəlif dərəcəli bədən xəsarətləri yetirməklə sonuncunu qəsdən öldürməsinə əsaslı şübhələr müəyyən edildiyindən E.B.İbrahimova Azərbaycan Respublikası Cinayət Məcəlləsinin 120.1-ci maddəsi (qəsdən adam öldürmə) ilə ittiham elan edilərək, Şəmkir hərbi prokurorunun təqdimatına əsasən Gəncə Hərbi Məhkəməsinin qərarı ilə barəsində 4 (dörd) ay müddətində həbs qətimkan tədbiri seçilib. Bundan başqa, istintaq zamanı, həmçinin, Tapdıqov Seymur Cümşüd oğlunun qeyd olunan məkanda bıçaqla İbrahimov Elpərəs Bəhman oğluna müxtəlif dərəcəli bədən xəsarətləri yetirməklə sonuncunu qəsdən öldürməyə cəhd etməsinə əsaslı şübhələr müəyyən olunduğundan S.C.Tapdıqova Azərbaycan Respublikası Cinayət Məcəlləsinin 29,120.1-ci maddəsi (qəsdən adam öldürməyə cəhd) ilə ittiham elan edilərək, Şəmkir hərbi prokurorunun təqdimatına əsasən, Gəncə Hərbi Məhkəməsinin müvafiq qərarı ilə barəsində 4 (dörd) ay müddətində həbs qətimkan tədbiri seçilmişdir. Hazırda istintaq davam etdirilir və qanunvericiliyin tələblərinə uyğun olaraq bütün tədbirlərin görülməsi, o cümlədən hər bir fakta və əmələ hüquqi qiymət verilməsi təmin ediləcək.

“Ramşteyn” formatında təmas qrupunun görüşündə Ukraynanın pilot və texniki işçilərinin hazırlığı müzakirə edilə bilər. Bu barədə Ukrayna müdafiə naziri Aleksey Reznikov məlumat verib. Onun sözlərinə görə, Niderland, Danimarka, ABŞ və digər ölkələrin müdafiə nazirləri ilə substantiv dialoq aparılacaq. Görüş çərçivəsində həmçinin Ukrayna səmasında “F-16 koalisiyası”nın yaradılmasının təfərrüatları müzakirə ediləcək.

Xəbər verdiyimiz kimi, bloger Günay Mehdiyeva keçmiş həyat yoldaşı Fərdi Əliyev tərəfindən şantaj olunduğunu açıqlayıb. Sozcu.az xəbər verir ki, Fərdi Əliyev şəxsi sosial şəbəkə hesabında məsələyə münasibət bildirib. O, həyat yoldaşı Günayın dediklərinin doğru olmadığını deyib: "Mən də çıxıb çox sözlər deyə bilərəm, məni tanıyan tanıyır, tanımayan da tanımasa yaxşıdır. Mən heç kimi şantaj etməmişəm. Mənim tək bir istəyim olub, o da mənim adıma ləkə gəlməməyidir. Mən heç kimin nömrəsini də paylaşmamışam. Belə söhbətin içində olduğuma görə, özümdən utanıram. Yenə də canı sağ olsun, mən yenə də onu çox istəyirəm. Baş verənlər bizim ailəvi söhbətimizdir. Mən əvvəldən sosial şəbəkələrə girməklə səhv etmişdim. Bataqlığın içindən çıxa da bilmədim. Mən əsgərlikdə olanda da "Tiktok”a görə çox problem yaşamışdım. Hər kəs dalımca danışırdı ki, "o oğlan tiktokerdir”. Başqa bir səbəbdən Azərbaycan mentalitetinə uyğun olmadığı üçün, hər kəs deyirdi ki, sən yoldaşınla videolar çəkib paylaşırsan. Buna baxmayaraq, mən hər kəslə əlaqəmi yaxşılaşdırdım, indi hamı ilə əlaqəm əladır. Bilirəm ki, ətrafımda olan hər kəsin bu söhbətdən xəbəri var, amma heç kim mənə heç nə demir. Niyə? Çünki bilirlər ki, Fərdi elə oğlan deyil. Mən əsgərəm və düşmənlə üzbəüz Vətənə xidmət edirəm. İnsanlar bu danışıqları ilə mənə psixoloji təzyiq göstərir. Bir daha bu söhbətlərdə adımın hallanmağını istəmirəm”./azxeber.com

2023-cü ilin yay mövsümünə hazırlıqla əlaqədar olaraq, Səhiyyə Nazirliyinin Respublika Gigiyena və Epidemiologiya Mərkəzi tərəfindən Ekologiya və Təbii Sərvətlər Nazirliyinin Xəzər Kompleks Ekoloji Monitorinq İdarəsi ilə birlikdə Bakı və Sumqayıt şəhərləri, respublikanın Lənkəran, Xaçmaz, Astara rayonları ərazisində yerləşən çimərliklərin sanitariya vəziyyətinin müayinəsi və dəniz suyunun keyfiyyət göstəricilərinin laboratoriya tədqiqat üsulları tətbiq etməklə monitorinqlər keçirilib. Sozcu.az xəbər verir ki, laboratoriya müayinələrinin nəticələrinə əsasən, Bakı şəhərinin Buzovna, Zuğulba, Mərdəkan, Şüvəlan, Novxanı, Goradil, Nardaran, Bilgəh və Pirşağı çimərliklərində dəniz suyunun fiziki-kimyəvi, bakterioloji göstəriciləri norma səviyyəsində olduğu aşkarlanıb. Səbail rayonunun Şıx, Qaradağ rayonunun Sahil, Suraxanı rayonu Hövsan, Xəzər rayonunun Türkan, habelə Sumqayıt şəhərinin çimərliklərinin sanitariya-mühafizə zonalarında, eyni zamanda respublikanın sahil zolağının şimal bölgəsinin Yalama, Nabran, İstisu, Seyidli kəndi, cənub bölgəsinin Lənkəran və Astara çimərliklərinin qumsallıqlarında rekreasiya əhəmiyyətli monitorinqlər keçirilib. Aparılmış monitorinqlər zamanı həmin ərazilərdən götürülmüş dəniz suyu nümunələrinin laborator təhlillərinə əsasən, dənizin tullantı çirkab suları ilə intensiv çirklənmə hallarının hələ də davam etdiyi və çimərliklərdə dəniz suyunda bakterioloji çirklənmə göstəricilərinin mövcud normativlərin tələblərinə cavab vermədiyi müəyyən edilib. 2023-cü ilin çimərlik mövsümündə dəniz suyunun yüksək bakterioloji çirklənmə göstəricilərinin əhalinin sağlamlığı üçün təhlükə yaratdığını nəzərə alaraq, “Sanitariya-epidemioloji salamatlıq haqqında” Azərbaycan Respublikası Qanununa əsasən, Səbail rayonunun Şıx, Qaradağın Sahil, Suraxanının Hövsan, Xəzər rayonunun Türkan, Sumqayıt şəhəri, şimal bölgəsinin (Yalama, Nabran, İstisu, Seyidli kəndi), cənub bölgəsinin Lənkəran və Astara çimərliklərindən istifadənin müvəqqəti olaraq tövsiyə olunmadığı barədə qərar qəbul edilib. Hazırda çimərliklərdə dəniz suyunun laboratoriya müayinə üsullarının tətbiqi ilə nəzarət tədbirləri davam etdirilir. Monitorinq nəticələri ilə bağlı müvafiq tədbirlərin görülməsi nəzərdə tutulub.

ABŞ Senatında Azərbaycana səfir təyinatı ilə bağlı dinləmələr keçiriləcək. Sozcu.az xəbər verir ki, iyunun 13-də ABŞ Senatının Xarici Əlaqələr Komitəsində namizədliyi ABŞ Prezidenti Co Bayden tərəfindən irəli sürülən Mark Libbinin Azərbaycan səfir təyin olunması ilə bağlı müzakirə olacaq. Qeyd edək ki, artıq bir ildir ki, karyeralı diplomat Mark Libbinin namizədliyinin təsdiqi Senatın Xarici İşlər Komitəsində təxirə salınır. Mark Libbi hazırda Vaşinqtonda Milli Hərbi Kollecdə Dövlət Departamenti fakültəsinin müşaviri vəzifəsində işləyir.

Rus hərbçiləri əsas səylərini Avdeyev, Baxmut, Marinsk və Liman istiqamətində cəmləşdirməkdə davam edir, orada ağır döyüşlər davam edir. Sozcu.az xəbər verir ki, bu barədə Ukrayna Silahlı Qüvvələrinin Baş Qərargahı məlumat yayıb. Məlumata görə, son sutka ərzində bu ərazilərdə 25 döyüş olub: “Düşmənin Avdeyevka istiqamətində hücum cəhdi uğursuz alınıb. Onlar Baxmut istiqamətində Belaya Qora və İvanovskiyə doğru irəliləməyə də uğursuz cəhd edib. Marinka yaxınlığındakı ukraynalı əsgərlər işğalçıların bütün hücumlarını dəf ediblər. Liman istiqamətində son 24 saat ərzində düşmən Beloqorovka ərazisində uğursuz hücum əməliyyatları aparır. Baxmut istiqamətində də düşmən taktiki vəziyyəti yaxşılaşdırmağa cəhd edib”, - məlumatda deyilir.

Bakının Nərimanov rayonunda kütləvi dava düşüb. Sozcu.az APA-ya istinadən xəbər verir ki, hadisə 34 nömrəli orta məktəbin həyətində baş verib. 2002-ci il təvəllüdlü İsrəfilov Röyal Abas oğlu və 2006-ci il təvəllüdlü Turabov Zeynal Məmmədəli oğlu dava zamanı bıçaqlanıblar. Yaralılar xəstəxanaya yerləşdiriliblər. Faktla bağlı Nərimanov Rayon Polis İdarəsinin 18-ci Polis Bölməsinin əməkdaşları tərəfindən araşdırma aparılır.

Azərbaycanda taksi kimi istifadə olunan bütün avtomobillərdə taksometr quraşdırılması təklif edilir. Sozcu.az xəbər verir ki, bu, Milli Məclisə daxil olan “Avtomobil nəqliyyatı haqqında” qanunda dəyişikliklərlə bağlı qanun layihəsində öz əksini tapıb. Sənəddə deyilir ki, minik avtomobillərində onların qət etdiyi məsafənin, boşdayanmanın müddətinin uçotunun aparılması, gedişhaqqının məbləğinin hesablanması və bu barədə sərnişinin məlumatlandırmasını təmin edən, taksi üçün nəzərdə tutulmuş fiskal yaddaşlı xüsusi cihaz (taksometr) və proqram təminatı olmalıdır.

Ermənistanda Köhnə Tağlar kəndi yaxınlığında erməni terrorçularının ələ keçirilməsi ilə bağlı başlanmış cinayət işi məhkəməyə təqdim edilib. Sozcu.az xəbər verir ki, bu barədə ermənistan Baş Prokurorluğu məlumat yayıb. Məlumata görə, 2020-ci ilin dekabrın 11-də Azərbaycan Dövlət Təhlükəsizlik Xidmətinin həyata keçirdiyi anti-terror əməliyyatı zamanı terrorçuların komandirləri mayor V.Q. və polkovnik-leytenant C.M.-in səriştəsizliyi ucbatından döyüş mövqelərinin olduğu xəritə də ələ keçirilib. Ermənistan rəhbərliyi iddia edir ki, guya həmin xəritənin ələ keçirilməsi Azərbaycan hərbçilərinə digər erməni postlarını da mühasirəyə almaq imkanı verib. Qeyd edək ki, Dövlət Təhlükəsizliyi Xidmətinin keçirdiyi əməliyyat nəticəsində Ordumuza qarşı terror əməliyyatı həyata keçirən silahlı ermənilərin sığındıqları meşə və iki kənd – Köhnə Tağlar və Çaylaqqala nəzarətə götürülmüşdü.