Bakı Apellyasiya Məhkəməsində adam oğurluğunda təqsirli bilinən Aygün Abbasovanın barəsindəki hökmdən verilən apellyasiya şikayəti üzrə məhkəmə iclası başa çatıb. Hakim İbrahim İbrahimlinin sədrliyi ilə keçirilən prosesdə qərar elan olunub. Qərara əsasən, onun apellyasiya şikayəti təmin edilməyib. Bakı Ağır Cinayətlər Məhkəməsinin hökmü ilə aralarında dünya və Avropa çempionlarının olduğu dəstə üzvlərindən Elçin Quliyev 11 il, Vasif Allahverdiyev 10 il, Niyaməddin Kazımlı, Şaiq Hüseynov və Fəqan Eminoğlu 8 il 6 ay azadlıqdan məhrum ediliblər. İdmançı Fərəh Rəsulovaya sınaq müddəti seçilməklə şərti cəza verilib. Adam oğurluğunun sifarişçisi olan Aygün Abbasova da 5 il həbs cəzası alıb. Lakin onun himayəsində azyaşlı uşaq olduğundan övladının 14 yaşı tamam olandan sonra məhkumluğu başlayacaq. Qeyd edək ki, idmançılar Xətai rayon sakini Hüseyn Əsgərovu oğurlamaqda ittiham olunublar. Məhkəmə araşdırması zamanı məlum olub ki, onlar Aygün Abbasovanın sifarişini yerinə yetiriblər. Belə ki, H.Əsgərovun A.Abbasovaya 25 min manat borcu olub. Borcunu ala bilmədiyi üçün idmançı dəstəyə müraciət edərək pulunu geri alacaqları təqdirdə onlara 10 min manat verəcəyini vəd edib. Dəstə üzvləri Əsgərovu avtomobilə məcburi əyləşdirib Abbasovanın Pirşağı qəsəbəsindəki bağ evinə aparıblar. Orada Hüseyni döyüb 25 min əvəzinə 30 min manat ödəməsini tələb ediblər. DİN-in keçirdiyi əməliyyatla idmançı dəstə saxlanılıb və Hüseyn Əsgərov girov saxlandığı yerdən sağ-salamat azad olunub. Təqsirləndirilən şəxslərə qarşı Cinayət Məcəlləsinin 144-cü (adam oğurluğu) maddəsi ilə cinayət işi başlanıb. Xatırladaq ki, ittiham olunan şəxslərdən Fərəh Rəsulova universal döyüş üzrə dünya və Avropa çempionudur. Niyaməddin Kazımlı klassik güləş üzrə dəfələrlə Azərbaycan çempionu olub. Fəqan Eminoğlu cüdo millimizin sabiq üzvüdür. O, 2009-cu ildə Ermənistanda bürünc medal qazanıb. Vasif Allahverdiyev də güləşçi olub. Qaçırılan Hüseyn Əsgərovun da peşəkar idmançı olduğu bildirilir. /Pravda.az/

Milli Məclisinin növbədənkənar sessiyasının növbəti iclası başlayıb. Sahibə Qafarovanın sədrliyi ilə keçirilən iclasın gündəliyinə 41 məsələnin müzakirəsi daxil edilib. Həmin məsələlər aşağıdakılardır: 1. “Azərbaycan Respublikasının İnsan hüquqları üzrə müvəkkili (ombudsman) haqqında” Azərbaycan Respublikasının Konstitusiya Qanununda dəyişiklik edilməsi barədə Azərbaycan Respublikasının Konstitusiya Qanunu (ikinci səsvermə). 2. “Azərbaycan Respublikası Hökuməti ilə Bosniya və Herseqovinanın Nazirlər Şurası arasında təbii və digər fəlakətlərdən mühafizə sahəsində əməkdaşlıq haqqında” Sazişin təsdiq edilməsi barədə Azərbaycan Respublikası qanununun layihəsi. 3. “Azərbaycan Respublikası Hökuməti, Gürcüstan Hökuməti və Türkiyə Respublikası Hökuməti arasında Bakı-Tbilisi-Qars dəmir yolu layihəsi çərçivəsində tranzit gömrük prosedurlarının asanlaşdırılması üçün ilkin məlumat mübadiləsinə dair” Sazişin təsdiq edilməsi haqqında Azərbaycan Respublikası qanununun layihəsi. 4. “Sahibkarlıq sahəsində aparılan yoxlamaların tənzimlənməsi və sahibkarların maraqlarının müdafiəsi haqqında” Azərbaycan Respublikasının Qanununda dəyişiklik edilməsi barədə Azərbaycan Respublikası qanununun layihəsi (üçüncü oxunuş). 5. Azərbaycan Respublikasının Mülki Prosessual Məcəlləsində dəyişiklik edilməsi haqqında Azərbaycan Respublikası qanununun layihəsi (üçüncü oxunuş). 6. “Məhkəmə-Hüquq Şurası haqqında” Azərbaycan Respublikasının Qanununda dəyişiklik edilməsi barədə Azərbaycan Respublikası qanununun layihəsi (üçüncü oxunuş). 7. “Təhsil haqqında” Azərbaycan Respublikasının Qanununda dəyişiklik edilməsi barədə Azərbaycan Respublikası qanununun layihəsi (üçüncü oxunuş). 8. “Elm haqqında” Azərbaycan Respublikasının Qanununda dəyişiklik edilməsi barədə Azərbaycan Respublikası qanununun layihəsi (üçüncü oxunuş). 9. “Peşə təhsili haqqında” Azərbaycan Respublikasının Qanununda dəyişiklik edilməsi barədə Azərbaycan Respublikası qanununun layihəsi (üçüncü oxunuş). 10. Azərbaycan Respublikasının Əmək Məcəlləsində, “Məktəbəqədər təhsil haqqında” və “Ümumi təhsil haqqında” Azərbaycan Respublikasının qanunlarında dəyişiklik edilməsi barədə Azərbaycan Respublikası qanununun layihəsi (üçüncü oxunuş). 11. “Sanitariya-epidemioloji salamatlıq haqqında”, “Şəhid adının əbədiləşdirilməsi və şəhid ailələrinə edilən güzəştlər haqqında”, “Yanğın təhlükəsizliyi haqqında”, “Milli arxiv fondu haqqında”, “Valideynlərini itirmiş və valideyn himayəsindən məhrum olmuş uşaqların sosial müdafiəsi haqqında” və “Hərbi vəzifə və hərbi xidmət haqqında” Azərbaycan Respublikasının qanunlarında dəyişiklik edilməsi barədə Azərbaycan Respublikası qanununun layihəsi (üçüncü oxunuş). 12. “Kosmik fəaliyyət haqqında” Azərbaycan Respublikası qanununun layihəsi (ikinci oxunuş). 13. Azərbaycan Respublikasının Vergi Məcəlləsində dəyişiklik edilməsi haqqında Azərbaycan Respublikası qanununun layihəsi (ikinci oxunuş). 14. “Gömrük tarifi haqqında” Azərbaycan Respublikasının Qanununda dəyişiklik edilməsi barədə Azərbaycan Respublikası qanununun layihəsi (ikinci oxunuş). 15. “Azərbaycan Respublikasının Mərkəzi Bankı haqqında” Azərbaycan Respublikasının Qanununda dəyişiklik edilməsi barədə Azərbaycan Respublikası qanununun layihəsi (birinci oxunuş). 16. “Banklar haqqında” Azərbaycan Respublikasının Qanununda dəyişiklik edilməsi barədə Azərbaycan Respublikası qanununun layihəsi (birinci oxunuş). 17. Azərbaycan Respublikasının Mülki Məcəlləsində dəyişiklik edilməsi haqqında Azərbaycan Respublikası qanununun layihəsi (birinci oxunuş). 18. Azərbaycan Respublikasının Vergi Məcəlləsində dəyişiklik edilməsi haqqında Azərbaycan Respublikası qanununun layihəsi (birinci oxunuş). 19. Azərbaycan Respublikasının İnzibati Xətalar Məcəlləsində dəyişiklik edilməsi haqqında Azərbaycan Respublikası qanununun layihəsi (birinci oxunuş). 20. Azərbaycan Respublikasının “Banklar haqqında” Azərbaycan Respublikasının Qanununda dəyişikliklər edilməsi barədə (birinci oxunuş). 21. “Bank olmayan kredit təşkilatları haqqında” Azərbaycan Respublikasının Qanununda dəyişiklik edilməsi barədə Azərbaycan Respublikası qanununun layihəsi (birinci oxunuş). 22. “Kredit ittifaqları haqqında” Azərbaycan Respublikasının Qanununda dəyişiklik edilməsi barədə Azərbaycan Respublikası qanununun layihəsi (birinci oxunuş). 23. “Poçt haqqında” Azərbaycan Respublikasının Qanununda dəyişiklik edilməsi barədə Azərbaycan Respublikası qanununun layihəsi (birinci oxunuş). 24. “Əmanətlərin sığortalanması haqqında” Azərbaycan Respublikasının Qanununda dəyişiklik edilməsi barədə Azərbaycan Respublikası qanununun layihəsi (birinci oxunuş). 25. “Kredit büroları haqqında” Azərbaycan Respublikasının Qanununda dəyişiklik edilməsi barədə Azərbaycan Respublikası qanununun layihəsi (birinci oxunuş). 26. “Valyuta tənzimi haqqında” Azərbaycan Respublikasının Qanununda dəyişiklik edilməsi barədə Azərbaycan Respublikası qanununun layihəsi (birinci oxunuş). 27. “İnvestisiya fondları haqqında” Azərbaycan Respublikasının Qanununda dəyişiklik edilməsi barədə Azərbaycan Respublikası qanununun layihəsi (birinci oxunuş). 28. “Qiymətli kağızlar bazarı haqqında” Azərbaycan Respublikasının Qanununda dəyişiklik edilməsi barədə Azərbaycan Respublikası qanununun layihəsi (birinci oxunuş). 29. “Sığorta fəaliyyəti haqqında” Azərbaycan Respublikasının Qanununda dəyişiklik edilməsi barədə Azərbaycan Respublikası qanununun layihəsi (birinci oxunuş). 30. “İcbari sığortalar haqqında” Azərbaycan Respublikasının Qanununda dəyişiklik edilməsi barədə Azərbaycan Respublikası qanununun layihəsi (birinci oxunuş). 31. “İstehsalatda bədbəxt hadisələr və peşə xəstəlikləri nəticəsində peşə əmək qabiliyyətinin itirilməsi hallarından icbari sığorta haqqında” Azərbaycan Respublikasının Qanununda dəyişiklik edilməsi barədə Azərbaycan Respublikası qanununun layihəsi (birinci oxunuş). 32. “Tibbi sığorta haqqında” Azərbaycan Respublikasının Qanununda dəyişiklik edilməsi barədə Azərbaycan Respublikası qanununun layihəsi (birinci oxunuş). 33. “Publik hüquqi şəxslər haqqında” Azərbaycan Respublikasının Qanununda dəyişiklik edilməsi barədə Azərbaycan Respublikası qanununun layihəsi (birinci oxunuş). 34. “Sahibkarlıq fəaliyyəti haqqında” Azərbaycan Respublikasının Qanununda dəyişiklik edilməsi barədə Azərbaycan Respublikası qanununun layihəsi (birinci oxunuş). 35. “Hesablama Palatası haqqında” Azərbaycan Respublikasının Qanununda dəyişiklik edilməsi barədə Azərbaycan Respublikası qanununun layihəsi (birinci oxunuş). 36. “Mühasibat uçotu haqqında” Azərbaycan Respublikasının Qanununda dəyişiklik edilməsi barədə Azərbaycan Respublikası qanununun layihəsi (birinci oxunuş). 37. “Dövlət satınalmaları haqqında” Azərbaycan Respublikasının Qanununda dəyişiklik edilməsi barədə Azərbaycan Respublikası qanununun layihəsi (birinci oxunuş). 38. “Hüquqi şəxslərin dövlət qeydiyyatı və dövlət reyestri haqqında” Azərbaycan Respublikasının Qanununda dəyişiklik edilməsi barədə Azərbaycan Respublikası qanununun layihəsi (birinci oxunuş). 39. “Auditor xidməti haqqında” Azərbaycan Respublikasının Qanununda dəyişiklik edilməsi barədə Azərbaycan Respublikası qanununun layihəsi (birinci oxunuş). 40. “Cinayət yolu ilə əldə edilmiş əmlakın leqallaşdırılmasına və terrorçuluğun maliyyələşdirilməsinə qarşı mübarizə haqqında” Azərbaycan Respublikasının Qanununda dəyişiklik edilməsi barədə Azərbaycan Respublikası qanununun layihəsi (birinci oxunuş). 41. “İcra haqqında” Azərbaycan Respublikasının Qanununda dəyişiklik edilməsi barədə Azərbaycan Respublikası qanununun layihəsi (birinci oxunuş).

Erməni terror təşkilatı olan VOMA (Voxj Mnalu Arvest – Sağ qalmaq sənəti) sərhədimizdə yeni mövqelər, sığınacaqlar, atəş nöqtələri inşa edir və onların tikintisini maliyyələşdirir. Sozcu.az xəbər verir ki, bununla bağlı terror təşkilatının Teleqram səhifəsində görüntü və məlumat paylaşılıb. Məlumatda bir atəş nöqtəsinin tikintisinin 2300 dollara başa gəldiyi bildirilib və əhaliyə yardım etməsi üçün çağırış edilib.

Gürcüstan ordusunun Azərbaycan əsilli hərbçisi odlu silahdan açılan atəş nəticəsində həlak olub. Sozcu.az xəbər verir ki, bu barədə Gürcüstanın Müdafiə Nazirliyi məlumat yayıb. Məlumata görə, iyunun 8-də Gürcüstanın Müdafiə Qüvvələrinin bölmələrindən birində xidmət edən Yusif Nəsibovun (2005-ci il təvəllüdlü) ölümü ilə bağlı Gürcüstan Cinayət Məcəlləsinin 115-ci (özünü öldürmə həddinə çatdırma) maddəsi ilə istintaq başlayıb.

Dünya birjalarında neft qiymətləri yenidən ucuzlaşıb. Sozcu.az xəbər verir ki, hazırda “Brent” markalı neftin bir barreli 75,45 dollara, yüngül neftin bir barreli isə 70,79 dollara təklif edilir.

Türkiyənin Ərzincan şəhərinin Çayırlı rayonunda 4 bal gücündə zəlzələ baş verib. Sozcu.az xəbər verir ki, bu barədə AFAD məlumat yayıb. Məlumata görə, zəlzələ yerin 16,52 kilometr dərinliyində qeydə alınıb. Dağıntı və tələfat qeydə alınmayıb.

Ukrayna ordusu Donetskin cənub-qərbində kadırovçuların yerləşdiyi düşərgəyə zərbələr endirib. Sozcu.az xəbər verir ki, bu barədə Ukrayna Silahlı Qüvvələrinin Baş Qərargahı məlumat yayıb. “İyunun 6-da kadırovçuların təlim düşərgəsinə endirilən zərbə nəticəsində 56 nəfər ölüb”, - məlumatda qeyd olunub.

Ukrayna müharibənin 471-ci günü üçün Rusiya ordusunun itkiləri haqda məlumatı yeniləyib. Sozcu.az xəbər verir ki, bu barədə Ukrayna Baş Qərargahı məlumat yayıb. Məlumata əsasən, Rusiya indiyə qədər 213 770 hərbçi, 3901 ədəd tank, 7600 ədəd zirehli döyüş maşını, 3702 ədəd artilleriya sistemi, 599 ədəd RYAS (reaktiv yaylım atəş sistemi), 359 hava hücumundan müdafiə sistemi, 314 ədəd hərbi təyyarə, 299 ədəd helikopter, 6410 ədəd avtomobil texnikası, 3247 ədəd PUA, 1171 qanadlı raket, 18 gəmi/qayıq, 502 xüsusi avadanlıq itirib.

Abşeron Rayon İcra Hakimiyyəti başçısının Mehdiabad qəsəbəsi inzibati ərazi dairəsi üzrə nümayəndəsi Əli Həsənovun nə qədər rüşvət aldığı məlum olub. Bu barədə Sozcu.az-a Baş Prokurorluğun Mətbuat Xidmətindən məlumat verilib. Bildirilib ki, Abşeron Rayon İcra Hakimiyyəti başçısının Mehdiabad qəsəbəsi inzibati ərazi dairəsi üzrə nümayəndəsi Əli Həsənovun vətəndaşlardan külli miqdarda rüşvət alması faktı ilə bağlı Baş prokuror yanında Korrupsiyaya qarşı Mübarizə Baş İdarəsində aparılmış cinayət işinin istintaqı tamamlanıb. İbtidai istintaqla Əli Həsənovun 2022-2023-cü illər ərzində Abşeron rayonu Mehdiabad qəsəbəsi ərazisində yerləşən kənd təsərrüfatı təyinatlı torpaq sahələrində fərdi yaşayış evlərinin tikintisinə icazə verilməsi, buna şərait yaradılması, həmçinin sözügedən torpaq sahələrinə müxtəlif sənədlərin verilməsi müqabilində ayrı-ayrı şəxslərdən ümumilikdə 42 min manat məbləğində pul vəsaitini təkrarən rüşvət qismində almasına əsaslı şübhələr müəyyən edilib. Əli Həsənova Cinayət Məcəlləsinin 308.2. (vəzifə səlahiyyətlərindən sui-istifadə etmə ağır nəticələrə səbəb olduqda), 311.3.2 və 311.3.3-cü (təkrar və külli miqdarda rüşvət alma) maddələri ilə yekun ittiham elan edilməklə barəsində məhkəmənin qərarı ilə həbs qətimkan tədbiri seçilib və cinayət işi baxılması üçün aidiyyəti üzrə Sumqayıt Ağır Cinayətlər Məhkəməsinə göndərilib.

Gəncə şəhərində sürücü sükan arxasında infarkt keçirib, avtomobil qəzaya düşüb. Sozcu.az Report-a istinadən xəbər verir ki, hadisə 6 nömrəli orta məktəbin yaxınlığında qeydə alınıb. Belə ki, "Hunday" markalı avtomobil idarəetmədən çıxaraq işıqfora çırpılıb. Hadisə yerinə təcili yardım briqadası və yol polisi əməkdaşları cəlb olunub. Məlum olub ki, avtomobilin sürücüsü Gəncə şəhər sakini, 1961-ci il təvəllüdlü İlqar Usubov sükan arxasında infarkt keçirərək dünyasını dəyişib. Faktla bağlı araşdırma aparılır.

Şərqi Azərbaycan əyalətinin Əhər şəhərində güclü yağışlardan sonra yaranan sel daşqını bir ailənin üç üzvünü aparıb. Sozcu.az xəbər verir ki, bu barədə Şərqi Azərbaycan əyalətinin Qızıl Aypara Cəmiyyəti məlumat yayıb. Məlumatda ailənin iki üzvünün yaralı vəziyyətdə xilas edildiyi, 8 yaşlı uşağın isə boğularaq öldüyü bildirilib. Qeyd edək ki, iyunun 8-də İranın 22 əyalətində baş verən sel nəticəsində 8 nəfər həyatını itirib.

Son sutka ərzində Ukrayna ordusu cəbhənin ən azı üç sektorunda əks-hücum əməliyyatları həyata keçirib. Sozcu.az xəbər verir ki, bu barədə ABŞ-ın Müharibəni Öyrənilməsi İnstitutu məlumat yayıb. Məlumata görə, Ukrayna iyunun 4-dən başlayaraq davam edən əks-hücum çərçivəsində cəbhənin ən azı üç sektorunda müxtəlif nəticələrlə əməliyyatlara davam edir: “Ukrayna qoşunları Baxmut istiqamətində müdafiədən hücuma keçib və şəhərin cinahlarında 200 metrdən iki kilometrə qədər irəliləyib. İyunun 7-dən 8-nə keçən gecə Zaporojye vilayətinin qərbində məhdud, lakin hələ də əhəmiyyətli bir hücum həyata keçirilib. Rusiya qüvvələri isə bu hücumdan doktrinal olaraq özlərini müdafiə edib və iyunun 8-dən etibarən ilkin mövqelərini bərpa ediblər. İyunun 8-də Ukrayna hərbçiləri Qərbin verdiyi hərbi maşınları da itiriblər”. Rusiya Müdafiə Nazirliyi isə Ukraynanın hücumuna xarakterik olmayan koordinasiya ilə cavab verib. Nazirlik Cənub Hərbi Dairəsinin bölmələrini hücumu dəf etmək, itirilmiş mövqeləri bərpa etməkdəki fəallığına görə tərifləyib. Qeyd olunur ki, Ukrayna 12 xüsusi əks-hücum briqadası yaradıb: “Ukrayna əks-hücum əməliyyatları üçün mövcud olan böyük qüvvələr fondunun yalnız bir hissəsini işə salıb. Kiyev əks-hücumu çox güman ki, müxtəlif ölçülü hadisələrdən ibarət olacaq. Daha çox yerli hücumlara üstünlük veriləcək”.

NATO ölkələri öz qoşunlarını Ukraynaya göndərməyi müzakirə etmir. Sozcu.az xəbər verir ki, bunu Estoniyanın Baş naziri Kaya Kallas deyib. “Bütün dövlətlər Ukraynaya bu və ya digər şəkildə yardım göstərir. Amma heç bir ölkə bu müharibəyə müdaxilə etmək, öz ordusunu ona göndərmək arzusunu bəyan etməyib, mən belə planlar haqda eşitməmişəm”, - o bildirib. Qeyd edək ki, NATO-nun keçmiş baş katibi Rasmussen bildirmişdi ki, NATO Vilnüsdə keçiriləcək sammitdə Ukraynanın üzvlüyü və ya onun təhlükəsizlik zəmanəti ilə bağlı addımlar barədə qərar verməsə, alyansın üzvləri ayrı-ayrılıqda qoşunlarını Ukrayna ərazisi yerləşdirə bilər.

Azərbaycan və Ermənistan xarici işlər nazirləri arasında gələn həftə Vaşinqtonda keçirilməli olan görüş Bakının xahişi ilə təxirə salınıb. AzadlıqRadiosunun Erməni xidməti – Azatutyun yazır ki, bu məlumatı Ermənistan XİN yayıb. Ermənistan XİN-in məlumatında deyilir ki, ictimaiyyətə bu barədə təfərrüatlı məlumat veriləcək. Bundan əvvəl Azərbaycan və Ermənistan xarici işlər nazirləri – Ceyhun Bayramov və Ararat Mirzoyanın iyunun 12-də Vaşinqtonda görüşəcəkləri bildirilmişdi. Azərbaycanın Turan agentliyinin müxbiri iyunun 8-də ABŞ Dövlət Departamentindəki mənbəyə istinadla sözü gedən görüşün təxirə salınacağını bildirmişdi. Mənbə bildirib ki, təxirə salınma “sırf” texniki səbəblərə görə baş verib: “Ararat Mirzoyanla Ceyhun Bayramov arasında görüş əvvəlcədən planlaşdırıldığı kimi iyunun 12-də və hətta gələn həftə də keçirilməyə bilər”. Mənbə deyib ki, söhbət sırf “logistika və qrafik” səbəblərindən gedir. İyunun 7-də ABŞ Dövlət Departamentinin mətbuat katibi Vedant Patel demişdi ki, Vaşinqtonda Azərbaycan-Ermənistan danışıqlarının növbəti raundunu “səbirsizliklə” gözləyirlər. Bununla belə Patel görüşün qrafiki və dəqiq tarixi barədə məlumat verə bilməyəcəyini demişdi. Bundan əvvəl mayın 1-də Vaşinqtonda ABŞ dövlət katibi Entoni Blinkenin iştirakı ilə Azərbaycan və Ermənistan xarici işlər nazirlərinin görüşü keçirilmişdi. Tərəflərin Azərbaycan və Ermənistan arasında münasibətlərin normallaşdırılmasına dair müzakirələr apardığı deyilirdi. Həmin görüşün yekunlarına dair ABŞ tərəfinin məlumatında deyilirdi ki, nazirlər və onları müşayiət edən nümayəndə heyətinin üzvləri Sülh və Dövlətlərarası Münasibətlərin Qurulması haqqında ikitərəfli Saziş layihəsinin bəzi maddələri üzrə qarşılıqlı razılıq əldə edib, eyni zamanda bəzi əsas məsələlər üzrə mövqelərin fərqli olaraq qaldığını qəbul ediblər: “Tərəflər müzakirələri davam etdirmək barədə razılığa gəliblər.” AzadlıqRadiosu

Azərbaycan və Ermənistan arasında sərhədlərin 1975-ci ilin xəritələri əsasında müəyyən edilməsi təklifinin Rusiyadan gəldiyi məlum olub. Ötən gün mətbuata açıqlama verən Ermənistan parlamentinin deputatı Sergey Baqratyanın sözlərinə görə, 1975-ci il xəritələrinin gündəmə gətirilməsi Ermənistanın yox, Rusiyanın təşəbbüsüdür və irəli sürülən təklif ABŞ tərəfindən dəstəklənib. “1975-ci ilin xəritələrinin rəhbər tutulması təklifi Rusiya tərəfdən gəlib. Bu, Amerika və Ermənistan tərəfi üçün məqbuldur, lakin Azərbaycan qəbul etmir", - erməni deputat vurğulayıb. Azərbaycanın qəbul etmədiyi xəritələrin Rusiya tərəfindən təklif olunması ortaya bir sıra suallar doğurur. Məsələn, Moskva niyə məhz 1975-ci il xəritəsini irəli sürüb? Qonşu Rusiya belə bir addım atmaqla nə əldə etmək istəyir?  Mövzunu Modern.az-a şərh edən Cənubi Qafqaz Tədqiqatlar Mərkəzinin eksperti Fuad Çıraqov deyir ki, Rusiya tərəflər arasında sülhün olmasını istəmir. Əsas məsələ məhz budur. "Açığı, hər hansı xəritənin seçilməsi fundamental məsələ deyil. Çünki demarkasiya və delimitasiyadan əvvəl daha önəmli məsələlər var. Bunlar ilk növbədə Azərbaycan ərazisində hələ də mövcud olan silahlıların çıxarılması, Ermənistanın daxili işimizə qarışmamasıdır. Görünən odur ki, Rusiya Azərbaycan ilə Ermənistan arasında sülh müqaviləsinin imzalanmasının tərəfdarı deyil",- deyə ekspert bildirib.  F.Çırağov vurğulayıb ki, Amerika isə daha çox Ermənistanın maraqlarını qoruyur: "Rusiya əsas iki istiqamətdə prosesə mane olmaq istəyir. Bunlardan birincisi Qarabağ ermənilərinin Azərbaycanla təmasda olmasının qarşısını almaq istəməsidir. Vardanyan layihəsi də bunun üçün edilmişdi. Digər məsələ isə demarkasiya və delimitasiya ilə bağlıdır. Hansı xəritənin seçiləcəyi texniki detallardır. Bu məsələnin uzun illər davam etməsi mümkündür. ABŞ-ın 1975-ci ilin xəritəsi ilə razılaşması isə bəzi məsələlərdən xəbərdar olmadığından irəli gələ bilər. Həmçinin, Ermənistanın maraqlarını daha yaxşı qoruduğu üçün həmin xəritəni məqbul saya bilər. Çünki bu proseslərdə Amerikanın Ermənistanı qorumağa çalışdığının şahidi olmuşuq. Onu da qeyd edim ki, danışıqlar apararaq ABŞ-ın mövqeyini dəyişmək olar".  Siyasi şərhçi Yeganə Hacıyeva da hesab edir ki, Rusiya sülh müqaviləsinin imzalanmasından narahatdır. "Azərbaycan və Ermənistan arasında danışıqların intensivləşməsi bir çox qüvvələri ciddi narahat edir. 44 günlük müharibədən sonra Rusiya öz üzərinə götürdüyü öhdəlikləri yerinə yetirmədiyi üçün Cənubi Qafqazdakı mövqeyləri zəifləyib. Əslində Rusiya danışıqlar formatının çoxalmasından yox, ancaq sülh müqaviləsinin imzalanmasından narahatdır. Məsələn, Rusiya Fransa və Almaniyanın danışıqlarda iştirak etməsinə müsbət yanaşır",- o qeyd edib.  Y.Hacıyeva düşünür ki, Rusiyanın 1975-ci ilin xəritəsini təklif etməsi sülh danışıqlarını yubatmaq istəyindən irəli gəlir: "Rusiyanın 1975-ci ilin xəritəsi ilə demarkasiya və delimitasiya işlərinin aparılması təklifi sülh danışıqlarına maneə törətmək istəyinin təcəssümüdür. Yəni Rusiya bununla mövcud vəziyyətin qorunub saxlanılmasını istəyir. Baqratyanın ABŞ-ın bu təklifi qəbul etməsi ilə bağlı fikri isə dezinformasiyadan ibarətdir. Çünki Amerikanın proseslərdə hansı ilin xəritəsinin doğru olub-olmaması ilə bağlı real təsəvvürü yoxdur. ABŞ hazırkı mərhələdə Azərbaycan tərəfinin təklifləri ilə razıdır. Çünki ABŞ Azərbaycan və Ermənistan arasında ikili görüş keçirilməsinin tərəfdarıdır". Qeyd edək ki, Ermənistanın Baş naziri Nikol Paşinyanın sözlərinə görə, sərhədin delimitasiya və demarkasiyası 1975-ci ildəki SSRİ Baş Qərargahının xəritələrinə əsasən aparılacaq. Paşinyan hesab edir ki, Ermənistanın mövqeyi dəyişməz olaraq qalır. Belə ki, o, SSRİ Baş Qərargahının 1975-ci ildəki xəritələrinə əsasən delimitasiya tərəfdarıdır. “İrəvan delimitasiyanın nəticələrinə görə qoşunların güzgüvari şəkildə geri çəkilməsində israrlıdır. Bu, təhlükəsizliyi təmin edəcək. Bu vəzifə artıq beynəlxalq birlik tərəfindən formalaşdırılıb və bu mühüm haldır. Bakının qoşunların çıxarılması ilə bağlı mövqeyinə gəlincə, hazırda heç bir irəliləyiş görmürük”,  - erməni baş nazir söyləyib.

Abşeronun icra başçısı Abdin Fərzəliyev rayona rəhbərlik etdiyi bir il ərzində təmir və abadlıq işlərinə 3 515 857, 55 AZN vəsait xərclənib. Qaynarinfo-nun araşdırması zamanı məlum olub ki, təmir və abadlıq işlərini 3 şikrət həyata keçirib. Bu şirkətlər Abşeron Rayon İcra Hakimiyyəti və ona tabeli qurumların 2022-ci ilin avqust ayından dekabr ayına qədər keçirdiyi tenderlərin qalibi olub. Bu müddət ərzində 5 tender keçirilib. Tenderlərin qalibi olan şirkətlər "Koneks Consturction” MMC, "Uğurlu İnşaat” MMC və "Şabran-D” MMC-dir. Abşeron RİH başçısının Xırdalan şəhəri üzrə Nümayəndəliyinin avqust ayında keçirdiyi tenderin qalibi "Şabran-D” MMC olub. Şirkətlə maliyyə dəyəri 149.987,32 AZN təşkil edən satınalma müqaviləsi imzalanıb. Müqavilədə Xırdalan şəhərində küçə işıqlarının təmiri işlərinin satın alınması nəzərdə tutulur. İqtisadiyyat Nazirliyi yanında Dövlət Vergi Xidmətinin reyestr məlumatlarına görə, "Şabran-D” MMC 12 dekabr 2007-ci ildə qeydiyyata alınıb. Nizamnamə kapitalı 10 AZN olan şirkətin hüquqi ünvanı Bakı şəhəri Nəriman Nərimanov rayonu, akademik Həsən Əliyev küçəsi, ev 92a, mənzil 1-də yeləşir. MMC-nin qanuni təmsilçisi Bədəlov Cəlal Bayram oğludur. 2019-cu ildə Cəlal Bədəlov mediaya açıqlamasında Şabran rayon İcra Hakimiyyəti başçısının keçmiş birinci müavini Mehdi Balabəyova 227 min manat verdiyini, bununla belə tenderdə qalib gələ bilmədiyini bildirmişdi. Hətta bununla bağlı məhkəməyə də müraciət etmişdi. Cəlal Bədəlov bu açıqlaması ilə faktiki olaraq sövlət satınalmaları ilə bağlı qanunvericliyini pozduğunu etiraf etmişdi. Bu məsələ mediada da geniş işıqlandırılıb. Amma deyəsən, Abdin Fərzıliyev mətbuatı izləmir, bu baxımdan, belə bir şirkətlə satınalma müqaviləsi imzalanmasına göz yumub. Yaxud da ortada başqa səbəblər var.  Abşeron RİH başçısının Xırdalan şəhəri üzrə Nümayəndəliyi avqustda daha iki tender keçirib. Bu tenderlərin qalibi "Uğurlu İnşaat” MMC olub.  Şirkətlə imzalanan birinci müqavilə yolların təmir işlərinin satın alınması nəzərdə tutulur. Müqavilənin maliyyə dəyəri 1.199.683,58 AZN təşkil edir. Digər müqavilə isə Xırdalan şəhərində mənzil fondunun təmiri işlərinin satın alınması ilə bağlıdır. Bunun üçün qurum şirkətə 383.269,85 AZN ödəyib. Sentyabr ayında isə Xırdalan şəhərində abadlıq işlərinin həyata keçirilməsi ilə bağlı "Uğurlu İnşaat” MMC ilə maliyyə dəyəri 1.539.731,84 AZN təşkil edən daha bir satınalma müqaviləsi imzalayıb.  Dövlət Vergi Xidmətinin reyestr məlumatlarında göstərilir ki, "Uğurlu İnşaat” MMC 27 yanvar 2020-ci ildə qeydiyyata alınıb. Nizamnamə kapitalı 15010 AZN təşkil edən şirkətin hüquqi ünvanı Bakı şəhəri, Nərimanov rayonu, Xətai prospekti, ev 34-də yerləşir. MMC-nin qanuni təmsilçisi Əliyev Talıb Rəfail oğludur. Açıq mənbələrdə şirkət və qanuni təmsilçisi barədə hər hansı məlumata rast gəlinmir. Sentyabr ayında "Uğurlu İnşaat”la müqavilə imzalanarkən şirkətin 16 min manata yaxın vergi borcu olub. "Dövlət satınalmaları haqqında” Qanun vergi borcu olan şirkətlərin tenderlərdə iştirakını qadağan edir. Nədənsə "Uğurlu İnşaat”la bağlı bu qadağa yada düşməyib.  2022-ci ilin dekabr ayında isə Abşeron RİH "Koneks Construction” MMC ilə satınalma müqaviləsi imzalayıb. Maliyyə dəyəri 243.184,96 AZN təşkil edən müqavilədə yolların təmiri ilə əlaqəli müxtəlif təyinatlı yenidənqurma və bərpa işlərinin satın alınması nəzərdə tutulub. "Koneks Construction” MMC 27 noyabr 2019-cu ildə qeydiyyata alınıb. Şirkətin nizamnamə kapitalı 10 AZN-dir. Hüquqi ünvanı Bakı şəhəri Binəqədi rayonu, Səttar Bəhlulzadə küçəsi, ev 39, mənzil 29-da yerləşən MMC-nin qanuni təmsilçisi Fərzəliyev Mehdi Məhəmmədəli oğludur. Ondan əvvəl isə şirkətin qanuni təmsilçisi Osmanlı Vahid Cuma oğlu olub. Bu şəxslər haqqında açıq mənbələrdə heç bir məlumat yoxdur. Şirkət barəsində məlumatlar da məhddudur. Bununla belə, "Koneks Construction” MMC tenderlərdə fəal iştirak edir. Özü də məlum olur ki, təmir işləri ilə məşğul olan şirkət həm də geyim və dəftərxana ləvazimatları da satır.  Abdin Fərzəliyev 2022-ci ilin yanvarından Abşerona rəhbərlik edir. O, bundan əvvəl Nərimanov rayonunun icra başçısı olub. Abdin Fərzəliyev adı qalmaqallarda hallanan və uzun müddətdir vəzifədə olan məmurlar kateqoriyasına aiddir. O, 2003-cü ildən icra başçısı vəzifəsi daşıyır. 

"Elita dalana dirənib, onlar mənasız müharibəyə görə "suç keçisi" olmaqdan qorxur..." "Putinin liderliyinə mütləq inam sarsılıb, onun Rusiyanın təhlükəsizlik qarantı kimi nüfuzuna ciddi zərbə vurulub..." Rusiya elitası müharibədən yorulub və onun dayandırılmasını istəyir, hərçənd, Putinin döyüş əməliyyatlarını dayandırmasına şübhə edir. Sozcu.az xəbər verir ki, bu barədə öz mənbələrinə istinadən "Bloomberg" nəşri yazıb. Hətta ən nikbin ovqatda olan mənbələr Kreml üçün ən yaxşı nəticə kimi danışıqların aparılması və ilin sonunadək münaqişənin sondurulmasını qeyd edir, bundan sonra Putin zəbt etdiyi Ukrayna ərazilərinin bir hissəsini əlində saxlamaqla "Pirr qələbəsini" elan edə biləcək. Elitalardan heç kim Ukraynaya hərbi müdaxilə ilə bağlı Putinə qarşı çıxmaq istəməməsinə rəğmən, bu müdaxilə onun liderliyinə mütləq inamı sarsıdıb. "Elita dalana dirənib, onlar mənasız müharibəyə görə "suç keçisi" olmaqdan qorxur", - bunu Rusiya hökumətinin ölkəni hərbi müdaxilədən sonra tərk etmiş sabiq müşaviri Kirill Roqov deyib. Agentlik Rusiyada siyasi və işgüzar elitanın bir çox nümayəndələrinin Ukraynada müharibənin perspektivləri ilə bağlı ovqatını "getdikcə artan məyusluq" kimi təsvir edir.  Agentlik qeyd edir ki, bu, böyük ehtimalla, böyük itkilərlə və döyüş meydanında hər hansı əhəmiyyətli uğurlar olmadan müşayiət edilən uğursuz hərbi müdaxilənin məsuliyyətinin yerdəyişməsini gücləndirəcək. Rusiyanın daxilində, o cümlədən Moskvada pilotsuz uçuş aparatlarının hücumları müdafiə olunmamaq hissini gücləndirir, döyüş əməliyyatlarının Belqorod vilayətinə yayılması isə Putinin Rusiyanın təhlükəsizlik qarantı kimi "nüfuzuna ciddi zərbə vurub", - nəşr yazır. Qeyd edilir ki, bu vəziyyətdə hətta hərbi müdaxiləni dəstəkləyənlər belə Rusiyanın üç günə bitməli olan, amma artıq il yarımdır davam edən müharibədə perspektivləri barədə məyus olub. Onlardan biri Konstantin Zatulindir, o, üzdəniraq "xüsusi hərbi əməliyyat"ın məqsədlərinə nail olunmasına şübhə edib. Elita nümayəndələrinin əksəriyyəti "başlarını qaldırmır" və öz işlərini davam edir, onlar əmindir ki, vəziyyətə təsir edə bilmir, agentliyin həmsöhbətləri deyib. Onlar əmindir ki, Putinin bu müharibəyə son qomaq istəyinin heç bir əlamətləri yoxdur. Bundan öncə "Politico" jurnalı məlumat verib ki, ABŞ prezidenti Co Bayden administrasiyasında hadisələrin mümkün inkişaf ssenilərindən biri kimi hərbi münaqişənin dondurulmuş mərhələyə keçməsi nəzərdən keçirilir . Ukrayna hakimiyyəti dəfələrlə deyib ki, ərazilərin itirilməsi və ya münaqişənin dondurulmasını nəzərdə tutan heç bir təklifi qəbul etməyəcək. Kreml bəyan edir ki, Moskva Ukrayna ilə münaqişənin dondurulmasının əleyhinədir və Ukraynada müharibənin məqsədlərinə "ya xüsusi hərbi əməliyyat", ya da digər mümkün vasitələrlə nail olmağa çalışacaq.

Ukrayna Silahlı Qüvvələri (SQ) Tavriçesk istiqamətində ötən sutka ərzində Rusiyanın üçdən çox bölüyünü məhv edib. Sozcu.az xəbər verir ki, bu barədə Ukraynanın “Tavriya” əməliyyat-strateji qoşunlar qrupunun komandanı Aleksandr Tarnavski deyib. Onun sözlərinə görə, Ukrayna hərbçiləri Rusiyanın 57 hərbi texnikasını sıradan çıxarıb.

Azərbaycan xarici işlər nazirinin müavini Xələf Xələfov Berlində Almaniyanın Xarici İşlər Nazirliyinin Şərqi Avropa, Qafqaz və Mərkəzi Asiya üzrə müvəkkili Mattias Lüttenberq ilə siyasi müzakirələrdə iştirak edib. Sozcu.az xəbər verir ki, bu barədə Lüttenberq Tvitterdə paylaşım edib. "Berlində Almaniya və Azərbaycan arasında illik siyasi məsləhətləşmələr keçirilib. Xarici işlər nazirinin müavini Xələf Xələfova tərəfdaşlığa, şəffaflığa və qarşılıqlı hörmətə əsaslanan hərtərəfli dialoqda iştirakına görə təşəkkür edirəm. Almaniya Cənubi Qafqazda sabitlik uğrunda mübarizəni davam etdirəcək", - paylaşımda deyilir.

İyunun 7-də Beynəlxalq Qızıl Xaç Komitəsi (BQXK) nümayəndələri bu yaxınlarda (mayın 26-da) Azərbaycanda saxlanılan iki Ermənistan vətəndaşına baş çəkiblər. Bu barədə komitənin Bakı nümayəndəliyinin İctimaiyyətlə əlaqələr şöbəsinin rəhbəri İlahə Hüseynova "Report"un sorğusuna cavab olaraq bildirib. "Onlarla təkbətək görüş keçirilib və ailələri ilə Qızıl Xaç Məktubu vasitəsilə əlaqə yaratmaq imkanı verilib. Mandatına uyğun olaraq, BQXK başçəkmələr zamanı saxlanılan şəxslərlə rəftarı və saxlanma şəraitini qiymətləndirir və onların ailələri ilə əlaqələrini bərpa etmək və ya davam etdirmək üçün şərait yaradır. BQXK-nın prosedurlarına uyğun olaraq, başçəkmələrlə bağlı müşahidələr və tövsiyələr yalnız saxlayan tərəflə paylaşılır", - BQXK nümayəndəsi qeyd edib.

Sonuncu dəfə "İstanbullu gəlin" serialında rol alan aktrisa İpek Bilginin yeni layihəsi bəlli olub. Sozcu.az Türkiyə mətbuatına istinadən xəbər verir ki, aktrisa "O da bir şey mi" filmində rol alacaq. Bilgin layihədə "Nigar" obrazına həyat verəcək. Qeyd edək ki, serialın baş rolunu Timuçin Eser canlandıracaq.

2022-ci ildə Azərbaycanda 15-19 yaş qrupları arasında 2 100 abort qeydə alınıb. Bu barədə Dövlət Statistika Komitəsi məlumat yayıb. Statistikaya görə aborta gedənlərdən 15-17 yaş aralığında olanların sayı 100, 18-19 yaş aralığında olanların sayı isə 2 min olub.  Ölkəmizdə 2022-ci ildə ümumilikdə, 58 min abort qeydə alınıb.  Məsələ ilə bağlı Yenisabah.az-a danışan tanınmış Psixoloq Gülnar Orucova qeyd edib ki, Azərbaycanda abort etdirmək xarici ölkələrə nisbətdə daha rahat prosesdir.  "Statistikaya nəzər salsaq görərik ki, Azərbaycan abortun sayına görə ilk yerlərdə olan ölkələrdən biridir. Azərbaycanda nə qədər qadağalar qoyulsa belə, həkimlər bunu reallaşdıra bilirlər. Onlar müxtəlif diaqnozlar qoyaraq bunu edirlər.  Hətta xaricdə yaşayan həmvətənlərimiz sırf bu məqsədlə Azərbaycana gəlirlər. Çünki xaricdə abort etdirmək üçün kifayət qədər səbəbin olmalıdır ki, buna icazə verilsin. Xaricdə bunu etmək çox çətin olduğu üçün onlar Azəərbaycana gəlirlər, çünki burada uşağı götürtmək daha asan olur".  G.Orucovanın sözlərinə görə, övladı yeniyetmə yaş dövründə olan valideynlər mütləq diqqətli olmalı, onunla dil tapmağı bacarmalıdırlar: "Ümumiyyətlə, son dönəmlərə fikir versək görərik ki, 13-16 yaşlı qızlar evdən qaçmağa daha çox meyilləniblər. Bu isə yaş dövrü ilə əlaqədardır. Yeniyetmə yaş dövründə valideyn övladla dil tapmağı bacarmalıdır. Valideyn dil tapa bilmirsə, övlad bu yaşda anadan imtina etməyi gözə alır. Bu yaşda yeniyetmələr həyatı ağ və ya qara görürlər, onlar üçün orta rəng yoxdur. Ona görə bəziləri intihar edir, bəziləri evdən qaçır, bəziləri də müxtəlif aqressiya göstərir. Bu dönəm elə bir dönəmdir ki, yeniyetmələr özlərini azad, sərbəst hiss etmək istəyirlər. Bunu da öz davranışları ilə göstərirlər. Bəzisi müxtəlif tatular edir, bəzisi siqaret çəkir, yaxud digər zərərli vərdişlərə yönəlirlər, əcaib saç stili, geyim üslubu ilə bunu göstərir. Yeniyetmələrin bir çoxunda dini obsessiyalar formalaşır, deyirlər ki, mən deistəm, ateistəm və s.  Amma burada bir məsələ var ki, burada diqqətli olmaq lazımdır. Bu dövrdə yeniyetmə valideynlə hər hansı problem yaşayırsa, evdən qaçmağa meylli olur. Bu gün qanunlara görə evlilik yaşı 18-dir, amma bu o demək deyil ki, sən 18 yaşı olan kimi uşağına icazə verməlisən ki, get ailə qur. İnsan evliliyə hazır olanda ailə qurmalıdır, əks halda, abortlar, xəyanət özünü göstərəcək". Psixoloq bu qədər abortun təcavüzə görə baş verməsi ehtimalının az olduğunu deyib: "Ana ilə övlad arasındakı yaş fərqi 18-20-ni aşmalıdır. Belə olmayanda ana öz gəncliyini yaşamadığı üçün ya həmin uşağı abort edir, ya da övladını ata bilir.  Abortların sayının artmasında təcavüzü ön plana çəkmək fikrimcə, düzgün deyil. Azərbaycanda bu qədər təcavüz ola bilməz, bu, gülüncdür. Bu təcavüz yox, yeniyetmə özbaşınalığıdır. Bu kimi hallar valideyn nəzarətsizliyindən yaranır". 

Bu il Şəmkir rayon Çinarlı qəsəbəsinin( ilk adı Georqsfeld ) almanlar tərəfindən salınmasının 135-ci ili tamam olur. 1888-ci ildə Almaniyanın Vurtemberq əyalətindən gəlmiş almanların ərsəyə gətirdiyi bu koloniya öz infrastrukturuna görə mövcud Şəmkir rayonu ərazisində alman koloniyaları içərisində Annanfelddən sonra ikinci əsas yaşayış yeri idi. Həmin zamandan qalan və qəsəbə ərazisində almanlara məxsus tarixi mədəniyyət abidələrinin qorunması, bərpası, təbliği və tanıtımı istiqamətində fəaliyyətin qurulması mütləqdir. Qorunmağa, bərpaya və tanıtıma ehtiyac duyulan bu tarixi mədəniyyət abidələri 135 illik ərəfəsində yaşadığımız məkanın tarixi keçmişinə verilmiş böyük dəyər olar. Azərbaycan Respublikasının Mədəniyyət Nazirliyi yanında Mədəni İrsin Qorunması, İnkişafı və Bərpası üzrə Dövlət Xidməti qəsəbənin qorunmasına diqqət ayırması bizim hər birimizi məmnun etmiş olar. Georqsfeld Mədəniyyət Klubu 

Azərbaycanda yol qəzalarının sayının azaldılması istiqamətində tədbirlər görülür. Bu məqsədlə aprel ayında Bakının bəzi küçə və magistrallarında sürət həddi endirilib. Növbəti mərhələdə isə yollarda sürət həddini aşmaya görə cərimələrin artırılması planlaşdırılır. Bununla bağlı İnzibati Xətalar Məcəlləsinə dəyişiklik ediləcək. Yeni layihəyə əsasən, yolda müəyyən edilmiş hərəkət sürətini 41-60 km/saat həddində aşmağa görə 200 manat məbləğində cərimə tətbiq olunacaq. Digər dəyişikliyə uyğun olaraq, yolda müəyyən edilmiş hərəkət sürətini 61 km/saat və daha artıq aşmağa görə 300 manat məbləğində cərimə yazılacaq. Dövlət Statistika Komitəsinin məlumatına əsasən, 2022-ci ildə Azərbaycanda 1668 yol-nəqliyyat hadisəsi baş verib. Statistik rəqəmlər göstərir ki, qəzalar nəticəsində zərər çəkən şəxslərin sayı əvvəlki illə müqayisədə 6,1 faiz artaraq 2290 nəfər olub. Zərər çəkən şəxslərən 834-ü həlak olub, 1456 nəfər isə yaralanıb. Bəs yeni dəyişiklik yol qəzalarının sayının azalmasına təsir edə biləcəkmi? Mövzu ilə bağlı Modern.az-a danışan nəqliyyat üzrə ekspert Elməddin Muradlı deyir ki, cərimələrin artırılmasına bir neçə səbəb var: "Sözün açığı, cərimələrin məbləğinin artırılması ilə bağlı layihənin müzakirəsi bir növ cəmiyyətdən gələn tələb və sifarişdir. Cəmiyyət hansı formada inkişaf edirsə, necə davranırsa, qanunlar da ona uyğun qurulur. Bu məsələdə artıq-əskik nəsə yoxdur. Cəmiyyət buna layiqdir, bunu istəyir. Cəmiyyət qaydaları tez-tez pozur. Hüquq da onu tənzimləməyə çalışır". Ekspert yol-nəqliyyat hadisələrinin artdığını diqqətə çatdırıb: "Qəzalar nəticəsində ölüm və xəsarət halları çoxalıb. Bütün bunların təhlili nəticəsində məlum olur ki, səbəblər sürət həddinin aşılması, narkotik vasitələrinin təsiri altında nəqliyyat vasaitəsinin idarə edilməsi, eləcə də yolayrıcı keçmə qaydasının pozulması, işıqforun qırmızı işığının tələbinin pozulması, dəmiryolu keçidlərinin keçmə qaydalarının pozulmasıdır. Sürücülər burada məsuliyyət daşıyır. Qəzaların nəticəsində biz hər gün insanlarımızı itiririk. Təbii ki, bunlar təhlil olunandan sonra ortaya çıxan nəticə bu insanlarla mübarizə metodlarının təkmilləşdirilməsidir. Onlardan biri də qanunvericiliyin sərtləşdirilməsidir. Mən düşünürəm ki, qanunvericilik bu dəfə maddi cəzalarla sərtləşdirilib. Gələcəkdə bunun mənəvi tərəflərini də nəzərə almaq lazımdır". E.Muradlı sürət həddini pozanların tibbi müayinəyə göndərilməsini təklif edir: "Hesab edirəm ki, saatda 41-60 kilometr, yaxud 60 və daha artıq sürət həddinin aşılması artıq psixoloji problem kimi görülməlidir. Yəni normal insan ya puluna güvənir, yaxud beynində, düşüncələrində problem var. 100 km/saat sürət həddi müəyyənləşdirilən yolda 200 km/saat sürətlə hərəkət edirsə, düşünmək lazımdır ki, bu adamın təfəkküründə problem var. Bu insanlarla başqa cür mübarizə aparmaq lazımdır. Bunlardan biri də həmin insanların tibbi müayinəyə göndərilməsidir. Məsələn, Avropanın bir çox ölkələrində elə insanlara mütləq psixoloji yardım tövsiyyə olunur ki, “gedin yoxlanın, görək, sürət həddini niyə aşırsınız?”. Bu baxımdan düşünürəm ki, bu məsələləri zəruri edən amillər var. Heç bir cəza səbəbsiz yerə artırılmır. Vaxt var idi ki, kəmər taxmamağa görə cərimə 10, ya da 20 manat idi. Sürücülər başqa qayda pozuntuları ilə bağlı saxlanılanda yol polisinə yalvar-yaxar edirdilər ki, "bir dənə “kəmər” yaz çıxım gedim". Kəmər taxmamağa görə cərimə elə urvatsız olmuşdu ki, insanlar onu çox zövqlə özlərinə yazdırırdılar. Çünki kəmərə görə cəza 60 manatdır, digər qayda pozuntularına görə cəza isə  60 manat və 3 baldır. Belə yanaşmalara görə cəzaların sərtləşdirildiyini düşünürəm. Gələcəkdə tendensiya bu cür davam edəcəksə, yenə də cəzalar sərləşdiriləcək. Bu insanlarımızın təfəkkürü, daxili mədəniyyəti, yol mədəniyyəti tam formalaşana qədər davam edəcək. Burada qeyri-adi heç nə görmürəm. Əgər heç kim qayda pozmasa, cərimələrin artırılmasından narahat olmasınlar. Təsəvvür edin ki, adam öldürmək üçün cəzalar sərtləşdirib. İnsanlar çıxıb, buna etiraz etmir.  Adama sual verərlər ki, bunun sənə nə dəxli var, sən ki adam öldürmürsən. Bu məsələdə də belədir. Şəxsən mən sürət həddini aşmıramsa, 300 manatlıq cərimədən niyə narazıyam. Zəhmət çəkib qanunlar çərçivəsində maşınımı idarə etməliyəm.  Bu məsələləri obyektiv düşünmək lazımdır. İnsanlar bunu cəmiyyətə basqı kimi qiymətləndirməməlidirlər.  İnzibati tənbeh tədbiri maarifləndirmə addımıdır. İnsan bunun mahiyyətini dərk etsin ki, bu cəza ona niyə yazılıb. Onda nəticə çıxaracaq", - Elməddin Muradlı vurğulayıb. Nəqliyyat üzrə ekspert Eldəniz Cəfərli də yeni qərarın effektli olacağını düşünür. "Biz yollarda qəzaların sayının və yol hərəkəti qaydalarının pozulmasının qarşısını almaq istəyiriksə, hərtərəfli iş görməliyik. Sadəcə cərimələri yüksəltməməliyik. Yol-nəqliyyat hadisələrinin baş vermə səbəbi qaydaların bilərəkdən pozulması ilə bağlıdır. Digər səbəblər də bura aiddir. Yol infrastrukturlarının yaxşı olmaması, qaranlıq və çala-çuxur yolların olması, eyni zamanda köhnə avtomobillərin olmasını səbəblər sırasına daxil edə bilərik. Biz cərimələri yüksəldirik, ancaq yol infrasturukturu ilə bağlı hər hansı islahatlar aparmırıq. Bu gün Bakı şəhərində elə yollar var ki, təhlükəlidir, faktiki olaraq qəza ocaqlarıdır. Biz onlarla bağlı hər hansı işləri görümürük. Yollarda, işıqfor olan ərazilərdə, nizamlanmayan keçid olan ərazilərdə keçidlərə qalmış yol nişanlarının qoyulmaması, keçidlərin vaxtlı-vaxtında boyanmaması, bunlar hamısı qəzalara səbəb olur.  Qaranlıq yollar ağır faciələrə səbəb olur. Biz bunun son vaxtlar şahidi oluruq", - o vurğulayıb. Ekspert dəyişiklikdən sui-istifadə hallarının ola biləcəyini güman edir. "Yeni qanundan bəzi yol-patrul xidməti əməkdaşları sui-istifadə bilərlər. Onlar sutkanın müəyyən vaxtlarında pusqu qurub, qayda pozuntularını gözləyirlər. Yalnız bundan sonra cəza yazırlar. Təəssüf ki, belə hallar da var.  Nərimanov rayonu yol-patrul xidməti əməkdaşlarından xeyli narazılıq var. Əhməd Rəcəbli küçəsində yaşayan vətəndaşlar deyirlər ki, gecə vaxtında Nərimanov rayonu yol-patrul xidmətinin əməkdaşları hətta məhəllənin içərisinə daxil olub, işıqları söndürüb, pusqu qururlar. Bu isə Dövlət Yol Polisinin illər ərzində gördüyü irimiqyaslı işlərin, çəkilən zəhmətlərin yerə vurulması deməkdir. Ona görə də belə cərimələrin artırılması ilə yanaşı, fürsətcil polislərə qarşı da mübarizə aparılmalıdır”, - Eldəniz Cəfərli sözlərini yekunlaşdırıb.