Xəbər verdiyimiz kimi, bu gün saat 00:01-də Xəzərin şimal akvatoriyasında, yerin 20 km dərinliyində zəlzələ baş verib və yeraltı təkanlar Bakıda daxil olmaqla, Azərbaycanın xəzər sahili ərazilərində ciddi şəkildə hiss edilib. Sozcu.az xəbər verir ki, hazırda sosial şəbəkələrdə yeni zəlzələ dalğasının olacağı barədə məlumatlar yayılır. Hətta saatına qədər də qeyd edirlər: 02:21-də 6,1 bal, 04:21-də 5,8 bal, 06:32-də isə 6 bal zəlzələ olacağı “xəbərdarlığı” edilir. Zəruri olaraq qeyd edək ki, bu xəbərdarlıqların heç bir əsası yoxdur. Əvvəla, zəlzələni dəqiq proqnozlaşdırmaq mümkün deyil. İkincisi, zəlzəlınin ikinci dalğası – təkanların geri qayıtması birinci dalğadan ən pis halda 1 bal aşağı olur. Bu kontekstdə, əgər 5,7 bal zəlzələ baş veribsə, ikinci təkan 4,7 baldan çox ola bilməz ki, episentr Xəzər dənizinə düşdüyü üçün bunun Bakıda ciddi hiss edilməyəcəyi şübhəsizdir. Əlbəttə, güclü zəlzələlərdən sonra kiçik avterşokların olması təbiidir və yəqin ki, o avterşoklar hazırda da davam edir. Ancaq bunu heç kim hiss etmir.

Çeçenistanın "Axmat" xüsusi təyinatlı dəstəsinin komandiri Yevgeni Pisarenko Ukraynada həlak olub. Sozcu.az Rusiya KİV-ə istinadla xəbər verir ki, bu barədə bölmənin komandiri Aptı Alaudinov bildirib.

9-cu və 11-ci sinif şagirdləri arasında nəinki tədris proqramını minimum mənimsəməyənlər, hətta oxuyub-yazmaqda çətinlik çəkənlər və ya ümumiyyətlə, oxuyub-yazmağı bacarmayanlar da aşkar olunub. Sozcu.az xəbər verir ki, bu barədə «Abituriyent» jurnalının 12-ci nömrəsində məlumat verilib. Qeyd edilib ki, 2022-ci ilin nəticələrinə görə, 9-cu sinif şagirdləri arasında 21 nəfər, 11-ci sinif şagirdləri arasında 2 nəfər oxuyub-yazmağı bacarmayıb. "Bu cür halların imtahan rəhbərlərinin əksəriyyətinin protokollarında qeyd olunmamasını nəzərə alsaq, yuxarıda göstərilən faktların, əslində, daha çox olduğunu ehtimal etmək olar. Rayonlar üzrə oxumağı və yazmağı bacarmayan 9-cu sinif şagirdlərinin sayı belədir: Masallı rayonunda 4 nəfər, Goranboy, Gədəbəy və Quba rayonlarının hərəsində 2 nəfər, Abşeron, Astara, Cəlilabad, Kəlbəcər, Lənkəran, Lerik, Saatlı, Xocalı, Yardımlı rayonlarının, Bakı, Mingəçevir şəhərlərinin hərəsində 1 nəfər. 11-ci sinif şagirdlərindən oxumağı və yazmağı bacarmayanlar isə Ağdam və Qobustan rayonlarından olub", - jurnalda qeyd olunub.

“Rus kontingentinin müvəqqəti nəzarətində olan ərazilərimizdə yerləşən erməni silahlılarının Ağdam rayonunu növbəti dəfə atəşə tutması Azərbaycan tərəfini qəti addımlar atmağa vadar edir”. Bu fikirləri Demokrat.az-a açıqlamasında hərbi ekspert Ədalət Verdiyev deyib.  Ekspert hesab edir ki, Rusiya sülhmərmalıları erməni silahlılarına kuryerlik etməklə onları bu fəaliyyətlərində daha da cəsarətləndirir: "Onlar erməni silahlılarının ərazidə mövcud olmasına birmənalı olaraq dəstək verirlər. Bu isə Azərbaycan üçün qətiyyən qəbuledilməz haldır. Azərbaycan ərazilərində bir dənə də olsun erməni silahlısı qalmamalıdır. Atəşkəsi pozan erməni silahlılarının yerləşdiyi mövqelər isə darmadağın edilməklə, həmin mövqelərin üzərində Azərbaycan bayrağının qaldırılması mütləqdir".

Son sutka ərzində Tavriya istiqamətində rus hərbçilərindən ölən və yaralananların sayı demək olar ki, üç bölüyün sayına bərabərdir. Sozcu.az xəbər verir ki, bunu “Tavriya” Əməliyyat-Strateji Qüvvələr Qrupunun komandanı, briqada generalı Aleksandr Tarnavski deyib. O bildirib ki, raket və artilleriya bölmələri gün ərzində 1389 atəş missiyasını yerinə yetirib: “Son 24 saat ərzində düşmənin ölən və yaralananlarla itkisi demək olar ki, üç bölük sayına çatıb. Rusların 34 hərbi texnikası məhv edilib. O cümlədən, Ka-52 helikopteri, 4 ədəd tankı, 3 ədəd AFV-i, 2 ədəd D-30 topu, 2 ədəd “Supercam” PUA-sı, “Strela-10” zenit-raket kompleksi, 2 ədəd “Msta-B” haubitsası, avtomobil avadanlığı və s. sıradan çıxarılıb”

"Masada Vaşinqton təşəbbüsü ələ alsa da, sahəyə, konkret olaraq Xankəndinə Vaşinqtonun əli çatmır və Rusiyanın hərtərəfli müdafiə etdiyi separatçı rejim Azərbaycanı qəbul etmir..."           Sonuncu Vaşinqton görüşünün yekunları barədə ev sahiblərinin də, tərəflərin də verdiyi açıqlamalardan konkret hansısa nəticəyə gəlmək, açığını deyək ki, bir qədər çətindir. Kifayət dərəcədə ümumi diplomatik terminlərdən istifadə olunmaqla yenə də danışıqlarda “irəliləyişin” olduğu vurğulanan xəsis bilgilər iki istiqamətdə yozula bilər: birincisi, tərəflər arasında ilk görüşdə razılaşdırılmayan prinsipial məsələlərin heç birində yenə də razılıq əldə edilməyib və ya əldə olunan hansısa razılıq xüsusi əhəmiyyət daşımır; ikincisi, bir xeyli prinsipial məsələlərdə razılıq əldə edilib, sadəcə öncədən mətbuata açıqlama sülh müqaviləsinin imzalanmasına qarşı çıxan qüvvələr və dövlətlər tərəfindən təxribat xarakterli etirazlarla qarşılanacağından, ehtiyat edilərək detallı açıqlamalardan imtina edilib. Sülh müqaviləsinin imzalanmasını istəməyənlər məlumdur- Ermənistan siyasi müxalifəti və cəmiyyətin müəyyən kəsimi, o cümlədən diaspora və rəsmi şəkildə sülhün tezliklə bağlanmasına qarşı çıxan Rusiya və Fransa dövlətləri. Birinci Vaşinqton görüşündən sonra baş tutan Brüssel görüşündə Azərbaycanın 86.6 min kv.km ərazisinin Paşinyan tərəfindən tanınması fikrinin səsləndirilməsini doğrudan da” tərəqqi” hesab etmək olar. Qarşıda Azərbaycan və Ermənistan dövlət başçılarının 21 iyulda Brüssel görüşü gözlənilir. Hesab edirik ki, Vaşinqton görüşündə irəliləyiş varsa, Brüsseldə hansısa formada üzə çıxacaq və perspektiv sülh müqaviləsinin prinsipləri sənədləşmiş, imzalanmış şəkildə razılaşdırılacaq. Amma... Amma bu, nə sülh yaradacaq, nə də təxribatları azaldacaq, müharibədən sonra yaranmış status-kvo isə davam edəcək. Ona görə ki, problemin açar həlli Qarabağdadır, iki ölkə arasında sülh prosesi, hətta məntiqi nəticəsinə çatsa belə, hələ yekun nöqtəni vurmur. Qarabağın məlum hissəsində hələ də erməni silahlı qüvvələri işğal etdiyi torpaqlarda bütün arsenalları ilə dayanıblar və ən əsası, həmin ərazilərə nəzarət edən Rusiya hərbi kontingenti problemin mərkəzində durub, iki il səkkiz aydır sülh yaratmağa imkan vermir və yaxın zamanda belə bir perspektiv də görsənmir. Masada Vaşinqton təşəbbüsü ələ alsa da, sahəyə, konkret olaraq Xankəndinə Vaşinqtonun əli çatmır və Rusiyanın hərtərəfli müdafiə etdiyi separatçı rejim Azərbaycanı qəbul etmir. Rusiya Qarabağdakı minlərlə erməni silahlı qüvvələrinin ərzaq və silah təminatını həyata keçirir. Ermənistan isə bütün maliyyə xərclərini ödəyir və illik büdcə planlaşdırılmasında Qarabağdakı erməni silahlı qüvvələrinə ayrılan vəsait açıq göstərilib. Elə bu fakt ermənilərin yalanını sübut edir ki, “Artsax müdafiə ordusu” adı bir pərdədir, bu qüvvələri Ermənistan Respublikası maliyyələşdirir, Rusiya Federasiyası isə qoruyur. Sonuncunun əlində onlar təxribat mənbəyidir və atəşkəsi qorumaq bəhanəsi ilə Qarabağda və bütövlükdə Cənubi Qafqazda mövcudluğunu sürdürür. Qarabağdakı erməni silahlı qüvvələrinin tərkibində yerli əhalidən olanların sayca üstünlüyü  bu terrorçuların “müdafiə ordusu” adlandırılmasına əsas vermir. Sülhə mane olan ən böyük maneə də  məhz qanunsuz erməni silahlı qüvvələridir... 26 il danışıqlar aparan Ermənistan rəhbərləri siyasi iradə nümayiş etdirib problemi sülhlə həll edə bilmədilər, beş mindən çox hərbçi itirdilər və Azərbaycan ərazilərin böyük hissəsini işğaldan azad edərək bölgədə siyasi, hərbi üstünlük qazandı. İndi də Ermənistan rəhbərləri yaranmış vəziyyətdən dərs çıxarmaq niyyətində deyillər, hər danışıq prosesinə qəbulolunmayan şərtlərlə gedirlər. Bundan sonra neçə Vaşinqton, Brüssel, Qranada görüşləri olsa da, Qarabağdakı mövcud duruma az təsiri olacaq, həlledici rol oynamayacaq. Moskva, Soçi görüşləri isə zamanın süni şəkildə uzanmasına xidmət edəcək. Erməni siyasətçiləri də açıq şəkildə bildirirlər ki, “ Ermənistan yalnız bir halda öz maraqlarını irəli sürə bilər: zamanı uzatsa və eyni zamanda özünə gəlsə...”. Düşmən öz problemlərinin həll etmək üçün həm dünyada, həm bölgədə fərqli vəziyyətin yaranmasını şərt olaraq görür və prosesi havadarının köməyilə uzadır... 10 noyabr 2020-dən sonra biz bu prosesin şahidiyik, ona görə də siyasətimizdə daha konkret tələblərə üstünlük verməliyik. Laçın yolundakı nəzarət məntəqəmiz Rusiyanın erməni silahlı qüvvələrini təmin etməkdə son maneə deyil. Ruslar silah daşıya bilməsələr də, digər təminatları həyata keçirə bilirlər. Hər dəfə söylədiyimiz kimi yenə təkrar edirik: erməni silahlı qüvvələrin Azərbaycan ərazisini tərk etməsinə və ya son gülləyədək tərksilah edilməsinə vaxt qoyub xəbərdarlıq etməyin zamanı çatıb. Sülh prosesinə Qarabağdan başlamaq lazımdır...moderator İlham İsmayıl

Ümumdünya Səhiyyə Təşkilatının (WHO) məlumatına əsasən, ürək-damar xəstəlikləri dünyada ölümlə nəticələnən xəstəliklər arasında birinci yerdədir. Bu xəstəlik gün ərzində minlərlə insanın ölümünə səbəb olur. Azərbaycanda da ürək, qan-damar sistemi xəstəlikləri ilə bağlı vəziyyət ürəkaçan deyil. Sozcu.az xəbər verir ki, bu barədə dünyaca məşhur statistik mənbələrdən biri olan "worldlifeexpectancy"-nin apardığı araşdırmada qeyd olunur. Ürək, qan-damar sistemi xəstəlikləri səbəbindən baş verən ölüm hallarına görə Azərbaycan Tacikistandan sonra ikinci yerdə qərarlaşıb. Belə ki, Azərbaycanın 183 ölkə sırasında reytinq dərəcəsi 388.41 olub. Siyahıda üçüncü Özbəkistan, dördüncü Ukraynadır. Qafqaz ölkələrindən Gürcüstan 24-cü, Ermənistan isə 28-ci yerdədir. Qardaş Türkiyə riskin daha az olduğu ölkə kimi dəyərləndirilərək reytinq siyahısında 127-ci yerdə qərarlaşıb. Qonşu Rusiya isə siyahıda 27-cidir. Digər postsovet ölkələrindən Belarus 10, Qırğızıstan 16, Moldova 18, Qazaxıstan 35, Latviya 49-cu yerdə müəyyənləşib.

Mingəçevir şəhərində məskunlaşan Kəlbəcər köçkünü İslam Bəşirov “AccessBank”ın bu şəhərdəki filialından şikayətçidir. Gununsesi.info–ya müraciət yollayan İslam Bəşirov bildirib ki, bankla illik 20 faizlə kredit razılaşması əldə edib. Ancaq krediti çəkdikdən sonra bəlli olub ki, bank ona verdiyi vədə ziddi olaraq, illik 25 faizlə verib. Ancaq krediti götürdüyü tarixin ertəsi günü onu qaytarmaq üçün banka yaxınlaşsa da bank bundan imtina edib.

Amerika Milli Erməni Komitəsinin "Disney Plus"da yayımlanacaq türk seriallarının ləğvi çağırışını edib. Sozcu.az Türkiyə  mətbuatına istinadən xəbər verir  ki, bununla yanaşı, Amerika Milli Erməni Komitəsi (ANCA) sosial media hesabında paylaşım edərək "Disney Plus Türkiyə"nin "Atatürk" serialının ləğvini də tələb edib. Aras Bulut İynemlinin baş rolda oynayacağı "Atatürk" serialının da ləğv olunduğu iddia edilərkən, platforma sükutu pozub. "Atatürk" serialının treylerini paylaşan platforma, "Orijinal Atatürk serialı çox yaxında, Cümhuriyyətimizin 100-cü ildönümündə efirdə" -deyə iddialara cavab verib.  

Hüquqşünas Əliabbas Yasavullu Ramiz Mehdiyevin kürəkəni, sabiq deputat İlham Əliyevlə bağlı iddialarla çıxış edib. Sozcu.az xəbər verir ki, Ə.Yasavullu feysbuk səhifəsində İ.Əliyevin ona məxsus Nizami rayonu ərazisindəki ("Neolit" restoranının yanında) torpaq sahəsini qeyri-qanuni yolla ələ keçirdiyini deyib. O, torpaq sahəsinin hazırda 18 milyon manata satışa çıxarıldığını əlavə edib və məsələ ilə bağlı prokurorluğa müraciət edildiyini, həmçinin Ramiz Mehdiyevdən kürəkəninin əməlinə müdaxilə etməsini xahiş etdiyini əlavə edib: “Bütün baş verənlərdən sonra belə, 23 iyun 2021-ci il tarixli teleqramla Ramiz Mehdiyevə müraciət edərək qızının həyat yoldaşı - İlham Əliyevlə aramızda olan torpaq mübahisəsinin sülh yolu ilə həllində köməklik göstərməsini və bununla əlaqədar məni şəxsən qəbul etməsini xahiş etdim. Lakin iki gün sonra mənə zəng edən şəxs özünü onun kürəkəni İlham kimi təqdim etdi. Onu narahat etdiyimə görə kəskin iradını bildirdi, torpağı "vicdanlı alıcı kimi" qanuni yollarla əldə etdiyini və məhkəmələrin bu barədə müvafiq qərarlarının olduğunu bildirsə də, dediklərinin tam yalan olduğunu ona göstərmək istəyimlə bağlı təklifimə “yox” cavabını verdi. Təhdidlə yanaşı, bir daha onu narahat etməməyimi tələb etdi". Ə.Yasavullu bildirib ki, həmin torpaq sahəsi məhkəmələrdə İlham Əliyev tərəfindən qayınatası Ramiz Mehdiyevin adından istifadə edilməklə qanunsuz yollarla mənimsənilib: "Mübahisə ictimailəşdirildikdən sonra Bakı Apellyasiya Məhkəməsinin müvafiq qərarı ilə torpaq sahəsi Ağayeva Kamilə Şirəli qızının adında saxlanılıb. Ramiz Mehdiyevin kürəkəni "məhkəmələr" vasitəsilə əmlakımızı əlimizdən alaraq 21 aprel 2007-ci il tarixdə anası - Əliyeva Elmira Hacıbala qızının adına sənədləşdirib. Həmin işlə bağlı kürəkən bizim geri çəkilməyəcəyimizdən əmin olduqdan sonra torpaq sahəsi adına olmuş Ağayeva Kamilə Şirəli qızını oğurlatdırıb, onu 3 gün saxlatdırdıqdan sonra notarius vasitəsilə əmlakından imtina barədə ərizə yazdırmağa nail olub. Onun bu kimi qanunsuz əməllərindən sonra belə, müvafiq məhkəmə qərarı ilə həmin torpaq sahəsinin mənim adıma keçirilməsinə və həmin qərarın da bu günə kimi qanuni qüvvəsində olmasına baxmayaraq, "Gilan" kiçik müəssisəsinin adını "Ruzu-A" MMC-yə dəyşdirməklə və həmin MMC-nin adına reyestrdən çıxarış almaqla yəqin düşünüblər ki, törətdikləri cinayətləri tam şəkildə ört-basdır etməyə nail olublar”. Hüquqşünas məsələ ilə bağlı hüquqi müstəvidə mübarizəni davam etdirəcəyini deyib.

Son günlər Naxçıvan-Bakı reysində təyyarə reyslərinin qiyməti süni şəkildə qaldırılır. Satış qiyməti 60 manat olan qiymətlər “qara kassa”da 80-90, bəzən isə 100 manata satılır. Əslən Naxçıvandan olan Milli Məclisin deputatı Fazil Mustafa iddia edib ki, bu problem süni şəkildə yaradılıb. Onun fikrincə, bəzən sərnişinlər məcburiyyət qarşısında qalaraq, bir bilet üçün real dəyərindən 100-150 manat artıq pul ödəyirlər. Bu isə sosial narazılıq yaradıb. Naxçıvandan Bakıya gəlmək istəyən sərnişinlərə niyə süni problem yaradılır? Bu, təxribat ola bilərmi? Bu fəaliyyətin arxasında Naxçıvanın yeni rəhbərliyini gözdən salmaq istəyən qüvvələr dayana bilərmi? Yenisabah.az-a açıqlamasında əslən Naxçıvandan olan jurnalist, Ovqat.com saytının baş redaktoru Heydər Oğuz da təsdiqləyib ki, Naxçıvanda həqiqətən də çox ciddi nəqliyyat problemi var: “Əvvəl avtomobil yolu ilə İrandan gəlib-gedirdilər, amma indi bu imkanı da itirmişik. Yeganə bir dənə yol qalır ki, bu, hava nəqliyyatıdır. Lakin bu da AZAL-ın monopoliyasındadır. Azərbaycan hökuməti bunu düzəltməli və məsələyə aydınlıq gətirməlidir. Əvvəla, oraya reyslər artırılmalıdır. Məsələn, dünənə qədər öz maşınları ilə Bakıya gəlmək imkanları olanların hazırda elə bir imkanı yoxdur. AZAL isə reysləri artırmır”. Jurnalistin fikrincə, bu monopoliyanı AZAL-dan almaq lazımdır: “Bunun da bir yolu var ki, AZAL-ı bir neçə yerə parçalayıb rəqabət halına gətirə biləcək düzəlişləri həyata keçirmək olar. Yaxud yeni hava yolları şirkətləri yaratmaq olar. Yox, əgər özümüz yarada bilmiriksə, o şirkətlərdən bəzilərini Azərbaycana dəvət etmək olar. Bunun yolları azad rəqabət aparan şirkətlərin Naxçıvana təyyarə reysləri açmasından keçir. Amma qəribədir ki, bu gün Azərbaycan hökuməti bu addımı atmır və bu da AZAL-a yarayır. Ümumiyyətlə, AZAL 30 ildir ki, bu siyasəti yürüdür, qəsdən qıtlıq yaradır və insanlara daha artıq qiymətə biletlər satır. Bu, əvvəllər daha çox müşahidə olunurdu və son zamanlar bunun qarşısı bir az alınmışdı. Amma görünən odur ki, yenə də bu cür siyasətə əl atmağa başlayıblar”. “Bileti altdan baha qiymətə satmaq məsələsini deyə bilmərəm, amma bütün hallarda Naxçıvana getmək istəyənlər böyük bir problemlə qarşılaşır. Mən o dəfə getmək istəyirdim və AZAL-ın internet səhifəsinə baxdım. Haradasa 10-15 gün sonraya bilet tapmaq olur. Tutaq ki, bir adamın Naxçıvanda atası ölürsə, bunun atasında yasına 15 gündən sonra getməsinin nə mənası var? Adamın meyiti ortada qalır, amma sən onu dəfn edə bilmirsən. Yaxud Naxçıvandan Bakıya gəlmək istəyənlər də eyni halla qarşılaşır. Bunlar nəqliyyat fəlsəfəsinə ziddir, xüsusilə də hava nəqliyyatı”, – əlavə edib. H. Oğuza görə, bu gün AZAL-ın Naxçıvan camaatına təqdim etdiyi gediş xidməti haradasa 15-20 gün sonraya sirayət edir: “Əgər Naxçıvandan eşşəyə minib Bakıya gəlsən, təyyarədən daha tez çatarsan. Əgər sən öz missiyana və təyinatına uyğun hərəkət edə bilmirsənsə, ya Azərbaycan hökuməti qarşısında bu məsələni qaldırıb deməlisən ki, mən bunu tək bacarmıram, ya da ki, boynuna götürmüsənsə, etməyə borclusan. Faktiki olaraq, bu gün Naxçıvan camaatı bu gün əzab-əziyyət içərisindədir. Naxçıvandakı hüquqi boşluqların nəticəsində AZAL-ın oradakı fəaliyyəti bu boşluqlardan istifadəyə yarayır və daha çox pul qazanmaq onların hərisliyinə işləyir”. Müsahibimiz iddia edib ki, AZAL Naxçıvan camaatına bileti pul ilə satır, üstəlik, satdığı qədər də dövlətdən dotasiya alır: “Yəni 60 manatlıq bileti 120-180 manata sataraq, 2-3 qat fayda götürür və dotasiya da alır. Hesab edirəm ki, Azərbaycan hökuməti AZAL-a  alternativ qurumlar yaratmaqla, dövlət büdcəsi üçün çox ciddi bir qazanc əldə edə bilər. Yəni AZAL-a ödənilən dotasiya kəsilə bilər və Naxçıvana gediş-gəlişlər artır. Naxçıvanın yüzminlərlə əhalisi var, amma AZAL-ın açıqlamasında görə bölgəyə 2 min adam gedib-gələ bilir. İnsanlar mərkəzlə əlaqə saxlaya bilmir. Biz Azərbaycanın suverenliyindən danışırıqsa, bunlar olmalıdır. Naxçıvan bu gün Azərbaycanla əlaqələri kəsilmiş durumdadır. Onsuz da “xan” həzrətləri bunu o vaxtı həyata keçirirdi. Bu gün də onun həyata keçirmək istədiyi siyasət bir başqa formada AZAL tərəfindən həyata keçirilir”.

Dövlət Sərhəd Xidməti tərəfindən 2023-cü ilin iyun ayı ərzində dövlət sərhədinin еtibarlı mühafizəsinin təmin edilməsi, qaçaqmalçılıq, qеyri-lеqal miqrasiya, narkоtik vasitələrin qanunsuz dövriyyəsinə qarşı mübarizə tədbirləri davam еtdirilib. Bu barədə Sozcu.az-a Dövlət Sərhəd Xidmətinin (DSX) Mətbuat Mərkəzindən məlumat verilib. Ay ərzində dövlət sərhədini pоzduqlarına görə 40 nəfər saxlanılıb, оnların 19 nəfəri Azərbaycan, 9-u Pakistan, 4-ü Türkiyə, 4-ü Əfqanıstan, 1-i Ukrayna, 1-i İran və 2-i Hindistan Rеspublikası vətəndaşları оlub. Qanunsuz miqrasiya ilə mübarizə tədbirləri çərçivəsində 25 nəfər saxta tarix möhürü, saxtalaşdırılmış pasport və özgəsinə məxsus sənədlə dövlət sərhədini keçməyə cəhd göstərib. Sərhəd rеjim qaydalarını pozduqlarına görə 973 nəfər saxlanılaraq barələrində müvafiq tədbirlər görülüb. Cinayətkarlığa qarşı mübarizə tədbirləri nəticəsində Azərbaycan Rеspublikası hüquq-mühafizə оrqanları tərəfindən axtarışda оlan 298 nəfər aşkarlanaraq aidiyyəti оrqanlara təhvil vеrilmiş, ölkədən çıxışı qadağan olunan 532 nəfərin ölkəni tərk etməsinin, girişi qadağan olunan 19 nəfərin Azərbaycan Respublikasına daxil olmasının qarşısı alınıb. Narkоtik vasitələrin qеyri-qanuni dövriyyəsinə qarşı mübarizə tədbirləri çərçivəsində 178 kiloqram 232 qram narkоtik vasitə və 11388 ədəd psixotrop həb aşkarlanaraq qanunsuz dövriyədən çıxarılıb. Qaçaqmalçılıq fəaliyyətinə qarşı mübarizə çərçivəsində həyata kеçirilmiş tədbirlər nəticəsində ümumi dəyəri 3 milyon 275 min 777 manat оlan qaçaqmal, о cümlədən narkotik vasitə, PM markalı tapança, patron, dərman preparatları, spirtli içki və tütün məmulatları saxlanılıb. Dövlət sərhədlərimizin еtibarlı mühafizəsinin təşkili istiqamətində tədbirlər davam еtdirilir.

"İsveçin NATO üzvlüyü Ankaranın tələblərini yerinə yetirmək istəməyən Stokholmun reallaşması mümkün olmayan arzusudur". Bunu Türkiyə Böyük Millət Məclisinin (TBMM) sədri Numan Kurtulmuş “Milliyet” qəzetinə müsahibəsində bildirib. O, Türkiyə, İsveç və Finlandiya arasında üçtərəfli sazişin mövcud olduğunu xatırladıb. "Onlar təxribatçı əməllərlə məşğul olacaqlar və sonra da NATO-ya üzv olmaq üçün razılıq verməyimizi istəyəcəklər? Üzr istəyirəm, Türkiyə öz sözünə cavabdeh ölkədir. Biz istəyirik ki, opponentlərimiz də öz sözlərinin üstündə dursunlar. Öhdəliklərini yerinə yetirməyən İsveç üçün NATO-ya üzvlüyü gözləmək - sadəcə həyata keçirilməsi mümkün olmayan arzudur", - deyə spiker bildirib. N.Kurtulmuş İsveçdə Quranın yandırılmasını da sərt tənqid edib. Onun sözlərinə görə, məhkəmənin faşist və islamofob nümayişçilərə dəstək verməsi şübhəsiz ki, zərərlidir: "Bunlar qəbuledilməzdir. Ağızlarını açanda Avropanın yüksək dəyərlərindən, müxtəlif mədəni dəyərlərin birgə mövcudluğundan bəhs edirlər. Onlar bir tərəfdən demokratiyadan, digər tərəfdən inanclara hörmətdən danışırlar. Amma təxribatçı, anti-İslam və anti-insan hərəkətlərə heç cür halda haqq qazandırıla bilməz. Onu qanadlarının altına alıb müdafiəyə qalxırlar. Bunu anlamaq mümkün deyil. Bunlar bəzi dairələrin İslam dünyasına qarşı qərəzli düşmənçiliyini qızışdırmaq üçün atılan addımlardır”.

İcbari tibbi sığortanın Xidmətlər Zərfi ilə hamilə qadınların profilaktik müayinələri, ambulator və stasionar şəraitdə onlara göstərilən tibbi xidmətlər təminata alınıb. İcbari Tibbi Sığorta üzrə Dövlət Agentliyindən Sozcu.az-a verilən məlumata görə, tibbi xidmətlərə doğuşaqədər mama-ginekoloji yardımın göstərilməsi və dispanser nəzarət daxildir. Həmçinin hamiləlik dövründə, doğuşdan sonrakı dövrdə zahı qadınların müşahidəsi, müalicə üçün tibb müəssisələrinə göndərişlərin verilməsi də profilaktik müayinələr zamanı həyata keçirilir. Bu xidmətlər hamiləlik dövründə baş verə biləcək fəsadların qarşısını almaq, ana və uşaq sağlamlığını qorumaq məqsədilə göstərilir. Hamiləliyin fizioloji gedişi zamanı hamilə qadının tibb müəssisəsinə 7 gəlişi tövsiyə olunur. Xidmətlər Zərfi ilə hamilə qadına arterial təzyiqin ölçülməsi, nəbzin sayılması, bədən kütləsi indeksinin, qanda şəkərin, qan qrupu, qanın klinik analizi (hemoqlobin), sidiyin ümumi analizi kimi tibbi xidmətlər göstərilir. Həmçinin hepatit B və C, sifilis testləri, insan immunçatışmazlığı virusu (İİV), skrininq testi (rubella-məxmərək), uşaqlıq yolundan yaxmanın mikroskopik müayinəsi icbari tibbi sığorta ilə qarşılanır. Tibb müəssisəsində hamiləliyin 12-ci həftəsinə qədər fol turşusunun təyini, USM, doppler müayinəsi, dölün ürək döyüntülərinə qulaq asılması və digər müayinələr də həyata keçirilir. Hamilə qadın tibbi xidmətlərdən istifadə etmək üçün ilk növbədə yaşadığı ərazi üzrə qadın məsləhətxanasına, Ailə Sağlamlıq Mərkəzinə və ya digər ambulator tibb müəssisələrinə yaxınlaşmalıdır. Tibb müəssisəsi tərəfindən hamiləliyin 30-cu həftəsindən sonra mübadilə vərəqəsi verilir, hamilə doğuşun təşkili üzrə Tibbi Ərazi Bölmələrini İdarəetmə Birliyinin (TƏBİB) tabeliyindəki müvafiq ixtisaslı dövlət tibb müəssisəsinə yönləndirilir. Dölün diaqnostik dəyərləndirilməsi (fetal MRT), daun sindromuna görə qan nümunəsində hormonların təyini (ayrı-ayrılıqda laborator müayinələr şəklində) Xidmətlər Zərfi ilə təminata alınır. Doğuş və klassik qeysəriyyə kəsiyi əməliyyatı, stasionar yatış zamanı dərman, tibbi sərf və qidalanma, laborator və instrumental müayinə, diaqnostika və müalicə tədbirləri ödənişsiz olaraq göstərilir. Klassik qeysəriyyə kəsiyi əməliyyatı tibbi göstəriş əsasında həyata keçirilir. Habelə, vaxtından əvvəl doğulmuş körpələrin küvezdə saxlanılması da icbari tibbi sığorta ilə qarşılanır. Qeyd edək ki, doğuşdan sonrakı dövrdə zahı qadınların müayinə və müalicəsi, yenidoğulmuşların müşahidəsinin aparılması və ana südü ilə qidalanmaya dair məsləhətlərin verilməsi də ödənişsiz göstərilir. Ana və uşaqlara göstərilən tibbi xidmətlərin keyfiyyət və səmərəliliyinin yaxşılaşdırılması məqsədi ilə İcbari Tibbi Sığorta üzrə Dövlət Agentliyi tərəfindən müasir tibbi avadanlıq, cihaz və alətlər alınıb. Avadanlıqlar hamilə qadınların, habelə perinatal, neonatal və postneonatal dövrlərdə uşaqların müxtəlif müayinə və müalicəsində istifadə olunacaq.

İyulun 3-də saat 10 radələrində Abşeron rayonu Digah kəndində 4 nəfərə kəsici alətlə xəsarət yetirilməsi barədə polisə məlumat daxil olub. DİN-in mətbuat xidmətindən Sozcu.az-a bildirilib ki, 1955-ci il təvəllüdlü H.Həşimov, onun həyat yoldaşı və övladı və digər kənd sakini aldığı xəsarətlərdən xəstəxanaya yerləşdirilib. Cinayət əməlini törətməkdə şübhəli bilinən, 1974-cü il təvəllüdlü, əvvəllər məhkum olunan Sərxan Mirzəağa oğlu Həşimov polis əməkdaşları tərəfindən saxlanılıb. Xəsarət alan şəxslərdən 3 nəfər - S.Həşimovun əmisi və onun ailə üzvləridir. Araşdırma aparılır.

Aqrar Sığorta Fondu son günlər respublikada müşahidə olunan güclü yağışlar və daşqınlarla bağlı fermerlərə müraciət edərək, baş verən sığorta halları ilə barədə fonda məlumat verməyə çağırıb. Sozcu.az xəbər verir ki, iyunun son günlərində Azərbaycanın müxtəlif bölgələrində hava şəraitinin kəskin dəyişməsi, intensiv yağan güclü yağışlar çaylarda suyun artmasına və sel-daşqınlara səbəb olub. Eləcə də müxtəlif bölgələrdə çoxsaylı dolu yağması halları qeydə alınıb. Rəsmi məlumatlara görə, iyun ayında ayrı-ayrı bölgələrdə ayın 11-24 günü yağış yağıb.  Eləcə də ölkədə dolu yağması halları 2 dəfədən çox artıb – təkcə iyun ayında 38 dəfə dolu düşüb, ötən il bu göstərici 18 gün olmuşdu. İyun ayında 55 sel hadisəsi qeydə alınıb ki, bu da rekord göstəricidir. İyunun son günlərində xüsusilə İsmayıllı, Tərtər, Goranboy, Daşkəsən, Şamaxı, rayonlarında vətəndaşların əmlakına, həyətyanı sahələrə, əkin sahələrinə və təsərrüfatlara, xüsusilə də heyvandarlıq və arıçılıq təsərrüfatlarına zərər dəyib. Baş verən hadisələrlə bağlı Aqrar Sığorta Fondu bəyan edir ki, təbii fəlakətlər, dolu, leysan yağışları, sel-subasma kmi hadisələr aqrar sığorta tərəfindən qarşılanır. Bu hallar nəticəsində zərər görmüş sığortalı təsərrüfatlara kompensasiya ödəniləcək. Aqrar Sığorta Fondu sığortası olan fermer və təsərrüfat rəhbərlərini əkin sahələrinə və təsərrüfatlara baxış keçirməyə, dəymiş zərər barədə Fonda məlumat verməyə çağırır. Fond bildirir ki, müraciət qeydə alındıqdan sonra aqrar sığorta ekspertləri ərazilərə ezam olunacaq, dəyən zərəri qiymətləndirəcək və fond tərəfindən fermerlərə dəyən zərər kompensasiya olunacaq. «Hazırda fondun mütəxəssisləri və aqrar sığorta ekspertləri ölkənin müxtəlif bölgələrinə ezam edilib və sığorta hadisələrini qeydə almaqla məşğuldurlar»-deyə fonddan bildirilir. Aqrar Sığorta Fondu bir daha fermer və təsərrüfat rəhbərlərini öz təsərrüfatlarını risklərdən qorumaq üçün aqrar sığorta vasitəsilə sığortalanmağa çağırıb.  Xatırladaq ki, fermerlərə dəstək məqsədilə aqrar sığorta haqqının 50%-ni, yəni yarısını dövlət ödəyir. Başqa sözlə, fermerlər iki qat aşağı məbləğ ödəməklə öz təsərrüfatlarını və əkin sahələrini, yəni gəlirlərini çoxsaylı risklərdən qoruya bilərlər. 

“Erməni terrorçularına yaşıl işıq yandıran rus sülhməramlıları ilə bağlı konkret addım atılmalıdır. Bu qüvvələr Azərbaycan ərazisində olduğu müddətdə sabitlikdən söhbət gedə bilməz. Təxribatların olması da qaçılmazdır”. Bunu Bakupost.az -a açıqlamasında millət vəkili Elman Məmmədov deyib. Onun sözlərinə görə, ​ rus sülhməramlıları öz hərbi imkanları ilə erməni silahlı birləşmələrinə ​ dəstək verir. Onlar separatçıların mövcudluğu üçün hər şeyi edir: “Hazırda Xocalıda olan aeroportdan rus sülhməramlıları ermənilərin Qarabağa və Ermənistana daşınmasını təmin edir. Rus sülhməramlıları separatçı ermənilər üçün bütün imkanları yaradırlar”. Millət vəkili hesab edir ki, Azərbaycan güc yolu ilə də olsa, ərazilərini separatçı və terrorçulardan təmizləməlidir: “Çünki bu qüvvələri sülh və ya danışıqlar yolu ilə bölgədən çıxarmaq mümkün deyil”.

Səudiyyə Ərəbistanı "Əl-Hilal"ı PSJ-nin hücumçusu Neymarı heyətində görmək istəyir. Sozcu.az Fransa mətbuatına istinadən xəbər verir ki, klub 31 yaşlı braziliyalıya 3 illik müqavilə üçün 600 milyon avro maaş ödəməyə hazırdır.  Neymarın PSJ ilə müqaviləsi 2025-ci ilin yayına qədərdir. Daha əvvəl hücumçunun "Barselona"ya qayıtmağa hazır olduğu və klubların mümkün transfer barədə razılığa gəldiyi bildirilirdi. Ancaq diqqət çəkən məqam odur ki, "Barselona" PSJ-nin ulduz oyunçunun maaşının bir hissəsini ödəməyə davam etməsini istəyir. Qeyd edək ki, "Əl-Hilal" daha əvvəl "Çelsi"nin sabiq müdafiəçisi Kalidu Koulibali və "Vulverhempton"un sabiq yarımmüdafiəçisi Ruben Neveslə müqavilə imzalayıb.

Zulu kralı, 48 yaşlı Misuzulu KaZvelitini zəhərlənmə şübhəsi ilə təcili xəstəxanaya çatdırılıb. Sozcu.az oxu.az-a istinadən bildirir ki, bunu kral ailəsi administrasiyasının rəhbəri şahzadə Manqosutu Buthelezi bildirib. "Kralı ziyarət edən müşavir Xaba qəflətən zəhərlənmə şübhəsi ilə ölüb. Eyni zamanda, onun da zəhərlənə biləcəyindən şübhələndiyimiz kral xəstələnib. O, dərhal Esvatinidə həkimə müraciət edib", - məlumatda deyilir. Bildirilir ki, Kazvelitini hazırda həkim nəzarətindədir və özünü yaxşı hiss edir.

"Aldatmak" serialında rol alan aktyor Caner Şahinin ikinci mövsümdə yer alması ilə bağlı sual yaranıb. Sozcu.az axşam.az-a istinadən bildirir ki, aktyor sevgilisi Feyza Sevil Güngörlə mövsüm finalından öncə ayrılmışdı. Feyzanın çəkiliş heyətindən biri ilə səmimi olması, Canerin qısqanmasına səbəb olub. Şəxslər arasında münaqişə düşüb. Bu səbəbdən C.Şahinin serialda yer alıb-almayacağı bəlli deyil.

Gündəlik istifadə etdiyimiz kosmetik vasitələr, ətraf mühit və çirkli hava, günəş vannası qəbul etmək dəriyə mənfi təsir edir. Dəri quruyur, məsamələr yaranır və sızanaqlar əmələ gəlir. Buna görə də dərini mütəmadi olaraq təmizləmək mütləqdir. Sozcu.az axşam.az-a istinadən dərinizdəki ölü hüceyrələri təmizləmək üçün ev şəraitində rahatlıqla hazırlaya biləcəyiniz maskanı təqdim edir: Bir yemək qaşığı qəhvə, bal və qatığı bir qabda qarışdırdıqdan sonra üzünüzə vurun. 15-20 dəqiqə maskanı üzünüzdə saxladıqdan sonra ilıq su ilə masaj edərək durulayın. Üzünüzü təmizlədikdən sonra nəmləndirici krem vurmağı unutmayın.

İsmayıllı sakini kanalda boğulub. Sozcu.az xəbər verir ki, İsmayıllı rayon sakini, 1977-ci il təvəllüdlü Mehdiyev Elnur Biləndər oğlu ehtiyatsızlıqdan evinin yaxınlığından keçən kanala düşüb. Onun boğularaq öldüyü bildirilir. Faktla bağlı araşdırma aparılır.apa

Göygöldə mal-qara oğurlamaqda şübhəli bilinən şəxslər saxlanılıb. DİN-in mətbuat xidmətinin Gəncə regional qrupundan Sozcu.az-a verilən məlumata görə, Göygöl Rayon Polis Şöbəsinin əməkdaşlarının keçirdikləri əməliyyat-axtarış tədbirlər nəticəsində rayon sakininə məxsus ümumi dəyəri 34800 manat olan 109 baş xırda buynuzlu mal-qaranı oğurlamaqda şübhəli bilinən şəxslər saxlanılıb. Araşdırmalar zamanı məlum olub ki, Kəlbəcər rayon sakinləri Nazim Cəfərov, Sabit Cəbrayılov və Goranboy rayon sakini İlqar Həsənov qabaqcadan əlbir olaraq qrup şəklində mal-qaranı oğurlayıblar. Şübhəli şəxslər saxlanılaraq istintaqa təhvil verilib, faktla bağlı araşdırmalar davam etdirilir.

Qərb Priqojinin üsyanı zamanı Putinin göstərdiyi qorxaqlığı nəzərə alaraq onun simasında zəif “şeytanı” qoruyub saxlamağa çalışır. Sozcu.az xəbər verir ki, bunu Ukrayna Prezident Ofisi rəhbərinin müşaviri Mixail Podolyak deyib. "Böhran vəziyyəti yarananda o, bu vəziyyətə dərindən nüfuz etməyə, onu təhlil etməyə və müvafiq olaraq müəyyən məntiqi nəticələr çıxarmağa hazır deyil. Yəni, açıq desək, Putin nəhayət ki, əsl üzünü göstərdi”, - o bildirib. Podolyak qeyd edib ki, bu, həm daxili, həm də beynəlxalq siyasətdə Putinə xas davranış növüdür: "Nəhayət, Rusiya elitası da Putinin və onun siyasi ətrafının qorxaqlığını anladı. Daxildə qəribə müzakirələr gedir. Əvvəllər "güclü Putin" var idi - qorxulu idi, çünki o, müharibənin sonu ilə bağlı öz baxışında israr etmək üçün resurslardan istifadə edə bilirdi. İndi başqa versiya deyilir: “Baxın, Putin zəifdir".