“Dünən bütün diqqətlər Nyu-Yorka yönəlmişdi. Bakı vaxtı ilə saat 23:00-da başlanan BMT Təhlükəsizlik Şurasının növbədənkənar iclasında Ermənistanın Laçın yolu ilə bağlı şikayətinə baxılırdı. Təhlükəsizlik Şurasının beş daimi və on qeyri-daimi üzvünün iştirakı ilə keçirilən iclasda heç bir sənəd qəbul edilmədi. Bununla da Ermənistan növbəti dəfə diplomatik məğlubiyyətə uğradı”. Mövzunu KONKRET.az-a şərh edən politoloq Fikrət Sadıqov əlavə edib ki, ermənilərin bu toplantıdan gözləntiləri böyük idi: “Hesab edirdilər ki, dünya birliyi onlara dəstək verəcək, Azərbaycana qarşı hansısa qətnamə qəbul ediləcək və pislənəcək. İclasda Ermənistanın xarici işlər naziri Ararat Mirzoyan da çıxış elədi. Lakin onun çıxışı öz xeyirlərinə sənədin qəbul olunmasına təsir etmədi. Sadəcə olaraq ABŞ narahatlığını bildirdi. Avropa İttifaqı bəyan etdi ki, paralel olaraq indi Ağdam – Xankəndi yolundan istifadə etmək mümkündür. Bizi dəstəkləyən digər ölkələr, o cümlədən, Albaniya çox kəskin şəkildə Ermənistanı tənqid etdi və Azərbaycanı dəstəklədi. Ölkəmizin BMT-dəki nümayəndəsi Yaşar Əliyev müxtəlif sübutlar gətirdi və bir sıra fotoşəkilləri nümayiş etdirdi. Göstərdi ki, ermənilər acından ölmələri barədə səs-küy qaldırsa da, əslində hər gün Qarabağda toylar, yubileylər təşkil edirlər. Diplomatımız bunu tutarlı faktlarla sübut etdi. Beləliklə, heç bir sənəd qəbul olunmadı. Bu da Ermənistanın maraqlarına yeni bir zərbə vurdu”. Politoloq hesab edir ki, indi biz Ağdam yolunun açılamasına nail olmalıyıq: “Biz bunu BMT-dən gözləməməliyik. BMT bəyan etdi ki, o yoldan istifadə etmək olar. Amma ermənilər yenə hansısa bəhanə gətirərək, Ağdam yolundan istifadədən yayınacaqlar. Biz buna nail olmalıyıq və mövqeyimiz kifayət qədər qətidir. Əgər onlar nəsə eləmək istəyirlərsə, əvvəlcədən bizimlə razılaşmalıdırlar. Çünki Laçın yolu Azərbaycanın suveren ərazisinə daxildir. Onun başqa statusu yoxdur. Digər tərəfdən, əgər biz prinsipiallığımızı bundan sonra da davam etdirsək, Ağdam – Xankəndi yolunun açılmasına nail ola bilərik. Sadəcə Qarabağ erməniləri başqa çıxış yolunun qalmadığını görüb, bu yoldan istifadə etməyə məcbur olacaq”. Hadisələrin sonrakı mərhələsində ermənilərin hansı təxribatlara əl ata biləcəyinə gəlincə, F.Sadıqov ermənilərin hər cür addımlarına hazır olmağın vacibliyini bildirdi: “Onlar uzun illərdir təxribatlarla məşğuldur. Digər tərəfdən, Qarabağda xeyli sayda qeyri-qanuni hərbi dəstələrin mövcudluğunu nəzərə alsaq, deməli, təxribatları dayandırmayacaqlar. Ermənilər yenə təxribatlara əl atacaqlar, yenə mövqelərimizi atəşə tutacaqlar. Amma biz bütün hallarda onlara bundan onqat adekvat cavab veririk. Görürlər ki, bu istiqamətdə bizimlə “zarafat etmək” olmaz. Eyni zamanda, biz Qarabağda yaşayan ermənilərə sülh təklif edirik, dialoqa çağırırıq. Amma dialoqdan da yayınırlar. Təbii ki, sonda bununla da barışacaqlar”.

BMT Təhlükəsizlik Şurasında dünən keçirilən müzakirələr bir daha göstərdi ki, kim suverenlik və ərazi bütövlüyünə qarşılıqlı hörmət əsasında real və davamlı sülh istəyir. Bu barədə Azərbaycan Respublikası Prezidentinin köməkçisi − Azərbaycan Respublikası Prezidentinin Administrasiyasının İqtisadi məsələlər və innovativ inkişaf siyasəti şöbəsinin müdiri Şahmar Mövsümov “Twitter“də yazıb. Mövsümovun sözlərinə görə, dünənli müzakirələr bir daha nümayiş etdirdi ki, kimlər boş qisas ümidləri ilə zaman qazanmaq üçün “humanitar fəlakət” tamaşaları oynamaqda davam edir./APA

“Telekanalların verdiyi pulun müqabilində rejissorlardan keyfiyyətli iş istəməyə haqqı yoxdur”. Sozcu.az Yeniçağ-a istinadla xəbər verir ki, bu sözləri rejissor Kənan M.M “Gül kimi şou”da deyib. O, seriallara ayrılan büdcənin çox cüzi olduğunu deyib: “Biz sənətçiyik, sehrbaz deyilik. Yəni iki min manata biz serial çəkə bilmərik. İstəməyin bunu. Nə özünüzü pis duruma salın, nə də bizim sənətimizi alçaldın”. O, aktyorların maddi durumunun ağırlığından da danışıb: “Çəkilişimiz var idi, aktyor qardaşının ölüm səhnəsini oynayacaqdı. Baxıram ki, adam fikirlidir, obrazda deyil. Soruşuram, nolub? Deyir, evdən zəng gəlib, işıqpulunu ödə. Yəni mən ondan nə istəyim? Bu, fiziki olaraq oradadır”.

"Xiaomi" öz robot itinin növbəti nəslini - "CyberDog 2"ni dünyaya təqdim etdi. Sozcu.az lent.az-a istinadən bildirir ki, o, sahibini şəxsən tanıya və hətta "ağıllı" evi idarə edə bilər. Robot yeriyir, pəncə üstə gəzir, skeytbord sürə bilir.. Ətraflı "CyberDog 2"nin çəkisi cəmi 9 kq-dır. Dörd mikrofon və çoxsaylı sensorlar başqa otaqdan səs əmrlərini eşitməyə imkan verir. Üz tanınması funksiyası da təmin edilir. Robotun qiyməti 12999 yuandır (təxminən 1770 ABŞ dolları).

Amerikalı alimlər elektron siqaretin yeni təhlükələrini müəyyən ediblər. Sozcu.az Publika.az-a istinadən xəbər verir ki, bununla bağlı araşdırma "Thorax" jurnalında dərc edilib. Bildirilib ki, siqaret çəkən gənclərdə bronxit və təngnəfəsliyin artması riski daha yüksək olur. Müəlliflər araşdırma zamanı 2014-2018-ci illər ərzində orta yaş həddi 17 olan iki mindən çox tələbədən əldə edilən məlumatları tədqiq ediblər. İştirakçılar tütün istifadəsi və tənəffüs simptomları haqqında dörd dalğada müsahibə alıblar. Hər dalğada ən çox aşkarlanan simptom bronxitin təzahürləri olub: müvafiq olaraq 19,5, 22,5, 23,5 və 26 faiz. Son 30 gündə elektron siqaretdən istifadənin yayılması birinci və ikinci dalğada 12, üçüncü dalğada 11, dördüncü dalğada isə 15,5 faiz olub. Tədqiqatçılar xırıltını sinə içində xırıltı, nəfəs darlığını isə düz yerə tələsməyə və ya kiçik bir təpəyə qalxmağa cavab olaraq təyin ediblər. Bronxitin simptomları üç ardıcıl ay ərzində gündəlik öskürək, həmçinin soyuqdəymə ilə müşayiət olunmayan mayenin yığılması kimi müəyyən edilib. Son 30 gündə elektron siqaret istifadəçiləri arasında xırıltı ehtimalı heç vaxt çəkməyənlərə nisbətən 81 faiz yüksək olub. Yaş, cins, irq və valideyn təhsili nəzərə alındıqdan sonra bronxit əlamətlərinin inkişaf riski iki dəfə, nəfəs darlığı isə 78 faiz yüksək olub.

Türkiyənin Kahramanmaraş vilayətində yenidən zəlzələ qeydə alınıb. Sozcu.az xəbər verir ki, bu barədə AFAD-ın rəsmi tviter səhifəsində məlumat yayılıb. Bildirilib ki, vilayətin Göksun rayonunda baş verən yeraltı təkan Rixter şkalası üzrə 3.6 ballıq maqnituda ilə qiymətləndirilib. Ocağı yerin 7.1 kilometr dərinliyində yerləşən zəlzələdən sonra itki və dağıntılar barədə məlumat verilməyib.

“Rusiya 24 min kvadratkilometrlik Qarabağ dövləti yarada bilər...” Sozcu.az xəbər verir ki,  Tert.am-ın yaydığı məlumata görə, Ermənistan hərbi eksperti Hayk Nahapetyan belə bir fikri “Arkadi Qriqoryanla diqqət mərkəzində” verilişində bildirib. “Artsax enerji mərkəzləri üçün Ukraynadan daha çox qaynar nöqtələrdən biridir. Rusiyanın Qərbə enerji daşıyıcılarını təmin etmək yolu faktiki olaraq kəsilmişdi. İndi Şimal-Cənub yolu Rusiya üçün stratejidir. Hazırda Hindistana ixracın təşkili yolu kifayət qədər uzundur. Rusiya Federasiyasının yaratmağa çalışdığı quru yolu 4 dəfə qısalacaq və onun bir istiqaməti Azərbaycandan keçəcək”- H.Nahapetyan belə deyib. “Əgər Bakı İngiltərə və İsrailin təhriki ilə artsax və Ermənistana qarşı avantüraya getsə, Azərbaycanın parçalanması başlaya bilər... Nəticədə Artsax mərkəzdə qalacaq və indiki 4,4 min kvadrat kilometrlik Artsax əvəzinə, Rusiya 24 min kvadrat kilometrlik Qarabağ dövləti yarada bilər, ehtimal yüksəkdir”, - erməni ekspert belə çərənləyib. Nahapetyan hesab edir ki, Rusiya Federasiyası Ermənistandan - Gümrüdən bazasını çıxarsa belə, heç vaxt Qarabağı tərk etməyəcək.moderator)

Ukraynanın Xerson vilayətində rus tankı ilə qətlə yetirilən həmyerlilərimiz Əzizov Orxan Mahir oğlu və Qədirov Ramiz Abuzər oğlunun nəşləri vətənə gətirilib. Onların meyitləri bu gün səhər saat 05:00 radələrində Zərdab rayonunun Məmmədqasımlı kəndinə gətirilib. Kənd məscidində cənazə namazı qılındıqdan sonra onların nəşləri Məmmədqasımlı kənd qəbiristanlığında torpağa tapşırılıb. Qeyd edək ki, qətl edilənlərin hər ikisi ailəli idi və azyaşlı övladları var. Ailə üzvlərindən "Report"un yerli bürosuna bildiriblər ki, Ramiz və Orxan təqribən 5 ay əvvəl Ukraynaya işləmək məqsədilə gediblərmiş. Xatırladaq ki, avqustun 13-də gecə saatlarında Rusiya ordusuna məxsus tank azərbaycanlıların idarə etdiyi meyvə-tərəvəzlə dolu avtomobilin üzərindən keçib. Hadisə zamanı hər iki şəxs həlak olub.

Xaçmazda çörək zavodunda işləyən fəhlənin qolu bədbəxt hadisə nəticəsində amputasiya olunub. Hadisə bu gün səhər saatlarında Xaçmaz rayonu ərazisində fəaliyyət göstərən çörək zavodunda baş verib. Belə ki, zavodda fəhlə işləyən Quba rayonu Zərdabi qəsəbə sakini, 2002-ci il təvəllüdlü Tele-Zadə Muxtar Hidayət oğlunun ehtiyatsızlıqdan qolu xəmir qarışdıran dəzgahda qalıb və ağır xəsarət alıb. Yaralı Xaçmaz Rayon Mərkəzi Xəstəxanasına aparılaraq dərhal əməliyyat olunub, qolu amputasiya edilib. Faktla bağlı araşdırma aparılır.

“NATO Baş katibi Yens Stoltenberqin Ukrayna ilə bağlı konkret mövqeyi var. O, təsdiqləyir ki, bizim ərazilərimiz alver mövzusu ola bilməz”. Bunu Ukrayna xarici işlər naziri Dmitro Kuleba “1+1 ilə səhər yeməyi” verilişində deyib. D. Kuleba qeyd edib ki, Ukrayna NATO-ya üzv olmaq üçün öz ərazilərindən imtina etməyəcək: “NATO rəsmisi Stian Yensenin və baş katib Stoltenberq fərqli insanlardır. Amma mən baş katiblə əlaqə saxlayıram. Onunla çox yaxın münasibətim var. Sizi əmin edirəm ki, o, Ukraynanın mövqeyini dəstəkləyir”. Nazirin sözlərinə görə, Ukrayna rəhbərliyi ölkəmizin tezliklə NATO-ya daxil olması üçün çalışır. Qeyd edək ki, S.Yensen daha əvvəl Ukraynanın NATO-ya üzvlüyünün həlli yolunun ərazi güzəştləri olduğunu bildirmişdi. Rəsmi Kiyevin mövqeyinə görə, bu, yolverilməzdir.

Vahid Azərbaycan Milli Birlik Partiyası və Qorqud Partiyası ləğv olunması ilə bağlı qərar qəbul edib. Bu barədə Sozcu.az-a Ədliyyə Nazirliyindən məlumat verilib. Bildirilib ki, buna dair aidiyyəti sənədlər Ədliyyə Nazirliyinə təqdim olunub. Partiyaların ləğvi barədə qeyd 15.08.2023-cü il tarixdə qeyri-kommersiya qurumlarının dövlət reyestrinə daxil edilib. Bununla da avqust ayında ləğv olunan partiyaların sayı 13-ə çatıb. Qeyd edək ki, daha əvvəl Azərbaycan Naminə Alyans Partiyası, Birlik Partiyası, Azərbaycan Təkamül Partiyası, Azərbaycan Liberal Demokrat Partiyası, Azərbaycan Liberal Demokrat Partiyası, Azərbaycan Sosial Demokrat Partiyası, Azərbaycan Milli Dövlətçilik Partiyası, Milli Vəhdət Partiyası, Yeni Yol Partiyası, Müstəqil Xalq Partiyası və Azərbaycan Milli Demokrat Partiyası ləğv olunması ilə bağlı qərar qəbul edib və bunlara dair aidiyyəti sənədləri Ədliyyə Nazirliyinə təqdim ediblər. Həmin partiyaların ləğvi barədə qeyd müvafiq tarixlərdə qeyri-kommersiya qurumlarının dövlət reyestrinə daxil olunub.

Rusiya ordusuna məxsus K-52 helikopteri məhv edilib. Sozcu.az xəbər verir ki, bu barədə Ukrayna Hava Qüvvələrinin komandanı Nikolay Oleşuk məlumat yayıb. Məlumata görə, helikopter Baxmut istiqamətində vurulub.

Ukrayna müharibənin 540-cı günü üçün Rusiya ordusunun itkiləri haqda məlumatı yeniləyib. Sozcu.az xəbər verir ki, bu barədə Ukrayna Baş Qərargahı məlumat yayıb. Məlumata əsasən, Rusiya indiyə qədər 256 050 hərbçi, 4329 ədəd tank, 8398 ədəd zirehli döyüş maşını, 5169 ədəd artilleriya sistemi, 714 ədəd RYAS (reaktiv yaylım atəş sistemi), 486 hava hücumundan müdafiə sistemi, 315 ədəd hərbi təyyarə, 314 ədəd helikopter, 7641 ədəd avtomobil texnikası, 4272 ədəd PUA, 1406 qanadlı raket, 18 gəmi/qayıq, 773 xüsusi avadanlıq itirib.

Avqustun 16-sı saat 23:25-də Ermənistan silahlı qüvvələrinin bölmələri Basarkeçər rayonunun Yuxarı Şorca yaşayış məntəqəsi istiqamətində yerləşən mövqelərindən Azərbaycan Ordusunun Kəlbəcər rayonunun Yellicə yaşayış məntəqəsi istiqamətində yerləşən mövqelərini atıcı silahlardan atəşə tutub. Bu barədə Sozcu.az-a Müdafiə Nazirliyindən bildirilib. Qeyd edilib ki, bölmələrimiz tərəfindən qeyd olunan istiqamətdə cavab tədbirləri görülüb.

"Qarabağ" bu gün UEFA Avropa Liqasının III təsnifat mərhələsində cavab oyununu keçirəcək. Sozcu.az xəbər verir ki, Qurban Qurbanovun baş məşqçi olduğu komanda Finlandiyada HİK-in qonağı olacaq. "Bolt Arena"da baş tutacaq qarşılaşma Bakı vaxtı ilə saat 20:00-da start götürəcək. Görüşü Fransadan olan FIFA referisi Villi Delajod idarə edəcək. İlk oyunda Azərbaycan təmsilçisi 2:1 hesabı ilə qalib gəlib. UEFA Avropa Liqası, III təsnifat mərhələsi Cavab oyunu 20:00. HİK - "Qarabağ" Baş hakim. Villi Delajod (Fransa) Helsinki. "Bolt Arena" Qeyd edək ki, cütün qalibi növbəti raundda Sloveniya çempionu "Olimpiya" ilə üz-üzə gələcək.

Dünya birjalarında neft ucuzlaşıb. Sozcu.az xəbər verir ki, hazırda “Brent” markalı neftin bir barreli 83,36 dollara, yüngül neftin bir barreli isə 79,20 dollara satılır.

Moskvada “Vaqner” üsyanına bənzər yeni bir hücum mütləq baş verəcək. Sozcu.az xəbər verir ki, bunu ukraynalı siyasi ekspert Taras Zaqorodnı deyib. “Priqojin presedent yaratdı. O, əslində Putin hakimiyyətinin gücünün çürük olduğunu və onu dörd-beş min adamın ələ keçirə biləcəyini göstərdi. Bu o deməkdir ki, Priqojin basqınının mütləq təkrarı olacaq. Putin Priqojini aradan götürsə belə, bu, heç nəyi həll etmir. Çünki Kremldə lazım olduğu kritik anda Putin orada deyildi”, - Zaqorodnı bildirib.

Əlverişsiz hava şəraitində itkin düşən Azərbaycan Ordusunun əsgərləri Aqşin Bəbirov və Hüseyn Axundovun Ermənistanda tutularaq mühakimə edilməsi tamamilə qanuna zidd şəkildə həyata keçirilib. Bu sözləri Axar.az-a Müvəkkil Hüquq Mərkəzinin sədri, hüquqşünas Səməd Vəkilov Hüseyn Axundova ömürlük həbs cəzası veriləcəyi ilə bağlı yayılan xəbərləri şərh edərkən deyib. O bildirib ki, əsgərlərə qarşı irəli sürülən ittihamlar və qəbul edilən qərarlar çox qərəzlidir: “Naxçıvanın Şahbuz rayonu ərazisində əlverişsiz hava şəraitində azıb sərhədi keçən azərbaycanlı hərbçilər bir qrup şəxslə əvvəlcədən əlbir olaraq Ermənistanın dövlət sərhədini qanunsuz keçməkdə, qanunsuz odlu silah və döyüş sursatı daşımaqda ittiham olunaraq barələrində həbs qərarı verilib. Bununla yanaşı, sonradan Hüseyn Axundov barəsində daha bir cinayət işi başlanılıb və o, Zəngəzur mis-molibden kombinatının gözətçisini qətlə yetirməkdə təqsirləndirilib. Azərbaycan Ordusunun əsgərlərinin mühakimə edilməsi tamamilə qanunsuzdur. Onlarla beynəlxalq hüququn müəyyən etdiyi normalara uyğun şəkildə davranmayıblar. Hətta əsgərlərimizə işgəncə verərək sosial şəbəkələrdə yayıblar. Bu isə hərbi əsirlərlə rəftara dair III Cenevrə Konvensiyasına ziddir. Sözügedən konvensiyadan başqa, hərbi əsirlərlə rəftar rejimini müəyyən edən əsas beynəlxalq hüquqi sənədlər sırasına quru əməliyyatlarının qanunları haqqında IV Haaqa Konvensiyası və 1949-cu il Cenevrə Konvensiyalarına 1977-ci ildə qəbul edilən I və II Əlavə Protokollar da aid edilir. Ermənilər həmişə olduğu kimi, gülünc iddialar irəli sürərək, guya bizim əsgərin hansısa zavodun gözətçisini öldürdüyünü və buna görə mühakimə olunduğunu bəyan edirlər. Təcrübə onu göstərir ki, indiyə kimi Azərbaycandan ələ keçirilmiş bir neçə şəxs barəsində də belə məhkəmə qərarları olub. Lakin onlar sonunda həmin şəxsləri Azərbaycan tərəfinə vermək məcburiyyətində qalıb”. Səməd Vəkilov bildirib ki, haqsız yerə mühakimə olunan əsgərlərimiz də Azərbaycana qaytarılacaq: “Ermənilər bizim əsgərlərə belə yüksək cəza verməklə Azərbaycanda olan hərbi cinayətkarların geri alınması ilə bağlı bazarlıq etmək istəyirlər. Lakin bu, real görsənmir. Ermənistan tərəfi hərbçilərimizi vermək məcburiyyətində qalacaqlar. Buna Azərbaycan dövlətinin gücü imkan verir”.

Kəlbəcərdə erməni diversantın dövlət sərhədini pozması ilə bağlı cinayət işi başlanılıb. Bu barədə Sozcu.az-a Baş Prokurorluğun Mətbuat Xidmətindən məlumat verilib. Avqustun 16-da Azərbaycan-Ermənistan dövlət sərhədinin Kəlbəcər rayonu ərazisindən keçən hissəsində Ermənistan Silahlı Qüvvələrinin təxribat-diversiya qrupu tərəfindən Azərbaycan Respublikasının dövlət sərhədinin pozulması faktı ilə bağlı Azərbaycan Respublikası Baş Prokurorluğunun İstintaq idarəsində araşdırma aparılıb. Araşdırma zamanı Ermənistan silahlı birləşmələrinin üzvü və qeyrilərinin qabaqcadan əlbir olan bir qrup şəxs qismində birləşib avqustun 16-da, saat 11 radələrində Azərbaycan Respublikasının mühafizə olunan dövlət sərhədini qanunsuz əldə edib daşıdıqları odlu silah və döyüş sursatları ilə birgə qanunsuz olaraq nəzarət-buraxılış məntəqələrindən və gömrük sərhədindən gömrük nəzarətindən kənar keçməklə ölkəmizdə ictimai təhlükəsizliyi pozmaq, əhali arasında vahimə yaratmaq, dövlət hakimiyyət orqanları tərəfindən Azərbaycan Respublikasının ərazi bütövlüyü ziddinə qərar qəbul edilməsinə təsir göstərmək və milli düşmənçilik salmaq məqsədilə insanların həlak olması, onların sağlamlığına zərər vurulması, əhəmiyyətli əmlak ziyanının vurulması üçün Azərbaycan Respublikasının Kəlbəcər rayonunun İstisu kəndi ərazisində yerləşən N saylı hərbi hissənin hərbi qulluqçularına odlu silahla atəşlər açmaqla onlara qarşı zor tətbiq edib terror aktı törədəcəkləri ilə hədələmələrinə əsaslı şübhələr müəyyən edilib. Azərbaycan Respublikası Silahlı Qüvvələrinin hərbi qulluqçuları tərəfindən təxribat-diversiya qrupunun üzvü saxlanılmaqla ondan cinayətin alət və vasitələri götürülüb. Qeyd edilən faktlarla bağlı Baş Prokurorluqda Cinayət Məcəlləsinin 206.3.2 (qabaqcadan əlbir olan bir qrup şəxs tərəfindən odlu silah və döyüş sursatının qaçaqmalçılığı), 214.2.1, 214.2.3 (terrorçuluq, qabaqcadan əlbir olan bir qrup şəxs tərəfindən odlu silahdan istifadə etməklə törədildikdə), 228.2.1 (qabaqcadan əlbir olan bir qrup şəxs tərəfindən qanunsuz olaraq odlu silah əldə etmə, daşıma, saxlama), 283.2.1 (zor tətbiq etməklə milli düşmənçiliyin salınmasına aşkar surətdə yönələn hərəkətlər etmə) və 318.2-ci (qabaqcadan əlbir olan bir qrup şəxs tərəfindən zor tətbiq etməklə Azərbaycan Respublikasının dövlət sərhədini qanunsuz olaraq keçmə) maddələri ilə cinayət işi başlanaraq ibtidai istintaqın aparılması Baş Prokurorluğun İstintaq idarəsinə həvalə edilib. Hazırda cinayət işi üzrə yaradılmış istintaq qrupu tərəfindən təxirəsalınmaz zəruri istintaq tədbirləri davam edir. İstintaqın gedişatı və nəticəsi barədə ictimaiyyətə ətraflı məlumatın verilməsi təmin ediləcək.

Müsavat Partiyası Məclisinin sədri Nüşabə Sadıxlının “Yeni Sabah”a müsahibəsi:  - Sentyabrda Müsavat Partiyasının növbəti qurultayının olacağı və yeni başqanın seçiləcəyi bildirilir. Başqanlığa namizədlərin sırasında sizin də adınız hallanır. Bu barədə nə deyə bilərsiniz?  - Müsavat Partiyası demokratik bir təşkilatdır. Müsavat Partiyasında yaşlı, orta və gənc nəsil təmsilçilərindən başqanlığa namizəd olacaq kifayət qədər adam var. Bizim Divan üzvlərimizin hər biri Müsavat başqanlığına namizəd olmağa layiq insanlardır.  Müsavat Partiyası ağır bir dönəmdən keçdi. İsa Qəmbər başqanlıqdan gedəndən sonra hakimiyyətin Müsavatı dağıtmaq üçün çoxlu cəhdləri oldu, amma bunu bacarmadılar. Bu da yalnız Arif Hacılının başqanlığının sayəsində mümkün oldu. Arif bəy bu illər ərzində Müsavat Partiyasını ayaqda saxlaya bildi. Müsavat Partiyası bütün işlək strukturları ilə demək olar ki, həmişə Ana Müxalifətin önündə gedən siyasi partiyalardan biri olub. - Qurultaya hazırlıq işləri necə gedir?  - Hər 3 aydan bir Müsavat Məclisi keçirilir, hər həftə Divan iclası və Sədrlər Şurasının iclası olur. Bütün bu strukturlar Müsavatın işlək bir siyasi partiya formasına gətirdi. Müsavat Partiyası bütün zamanlarda dövlətin – hakimiyyətin yox – yanında olan bir siyasi partiyadır. Dövlətimizə xeyirli nə olacaqsa, təbii ki, Müsavat onu dəstəkləyəcək. Xatırladım ki, 44 günlük İkinci Qarabağ müharibəsində Müsavat Partiyası siyasi fəaliyyətini dondurdu və bu ərəfədə heç bir siyasi fəaliyyətlə məşğul olmayıb dövlətin yanında oldu. - Perspektivdə ən güclü namizəd, sizcə, kimdir? Siz, yoxsa İsa Qəmbər?  - Müsavat Partiyası demokratik bir partiya olduğu və Azərbaycan cəmiyyətinə demokratik bir ab-hava gətirdiyi üçün İsa bəy başqanlıqdan getdi. Müsavat Partiyasının başqanının isə 2 dəfə seçilmək hüququ var. Arif bəy 2 dəfə seçiləndən sonra növbəti dəfə başqanlığa namizədliyini irəli sürməyəcək. Başda özüm olmaqla bilirəm ki, bütün müsavatçıların ən böyük arzusu İsa Qəmbərin yenidən Müsavat başqanlığına qayıtmasıdır. Bunu hamımızın arzusu kimi qəbul edirəm və məncə, İsa bəyin verəcəyi bu qərar ən önəmli, önəmli və ən vacib qərarlardan biri olub. Lakin İsa bəy hələ bu qərarı verəcək, ya yox, bu da sual altındadır. - Müsavat Partiyası parlamentə daxil olsa, hakimiyyətin siyasi kursunu dəstəkləyən müxalifət partiyalarının sıralarına qoşula bilərmi?  - Parlamentə seçkilərə gəldikdə, Müsavar Partiyası ana müxalifət olduğu üçün ölkənin bütün bölgələrində bizim strukturlarımız var. Lakin parlament seçkiləri zamanı baxmayaraq ki, müsavatçılar ən yüksək səs alırdılar, amma sonda qutudan ən aşağı səslə çıxırdılar. Ona görə ki, hakimiyyət müsavatçıları parlamentə buraxmırdı. Amma bu səfər, əgər proporsional seçkilər obyektiv olarsa, mən əminəm ki, Müsavat Partiyası parlamentə düşəcək. Mən niyə “obyektiv olarsa” söylədim? Yadınızdadırsa, biz Ədliyyə Nazirliyinə siyahı vermişdik, məni – Müsavat Partiyasının Məclisinin sədrini eyniləşməyən kimi göstərmişdilər. Əgər yenə də bu oyunlar davam edəcəksə, müxalifətə bu münasibətlər olacaqlarsa, təbii ki, parlamentdə olmağımız sual altında olacaq. Mənə elə gəlir ki, demokratik seçkilərin olması hakimiyyət üçün də maraqlı olmalıdır. Əgər demokratik seçkilər olarsa, Müsavat Partiyası mütləq şəkildə Azərbaycan xalqının səsinin böyük əksəriyyətini alacaq. - Belə bir iddialar da səslənir ki, Müsavat parlamentə daxil olandan sonra konstruktiv müxalifət olacaq və hakimiyyətlə anlaşacaq. Çünki iqtidar AXCP ilə uzlaşa bilmir, lakin parlamentdə real müxalifətə də ehtiyac var...  - Belə olacağını düşünmürəm. Çünki Müsavat Partiyası parlamentdə daha fərqli mövqedən çıxış edəcək. Müsavat Partiyası hər şeyə əl çalan, yalanı doğru kimi təqdim edən bir siyasi partiya deyil. Təbii ki, doğru dəstəklənəcək, yalan ifşa olunacaq. Müsavat Partiyasının əvvəldən tutduğu mövqe və xətt budur. Bu, Rəsulzadə-Elçibəy yoludur. Qısası, Müsavat Partiyası ömründə bir dəfə də olsun nə hakimiyyətə, nə də parlamentə gəlmək üçün heç kəslə sövdələşməyib, bundan sonra da elə bir şey ola bilməz. 

Hər gün Laçın sərhəd buraxılış məntəqəsindən hər iki istiqamətdə Azərbaycanın onlarla erməni sakini keçir. Sozcu.az xəbər verir ki, bunu Azərvaycan Xarici İşlər Nazirliyinin Mətbuat xidməti idarəsinin rəhbəri Ayxan Hacızadə “X”də ATƏT-in fəaliyyətdə olan sədrinin şəxsi nümayəndəsinin regiona səfərinə münasibət bildirərkən yazıb. Onun sözlərinə görə, hər bir ölkədə olduğu kimi, Azərbaycanda da sərhəddən buraxılış prosesi tənzimlənir: "Əgər on gün əvvəl ermənilər tərəfindən razılaşma pozulmasaydı, Ağdam-Xankəndi yolundan istifadə oluna bilərdi". Qeyd edək ki, Avropada Təhlükəsizlik və Əməkdaşlıq Təşkilatının (ATƏT) fəaliyyətdə olan sədri, Şimali Makedoniyanın xarici işlər naziri Buyar Osmaninin şəxsi nümayəndəsi Anjey Kaspşik Ermənistan-Azərbaycan şərti sərhədindəkii vəziyyətlə tanış olmaq məqsədilə sərhədə gələcək. Bu barədə Avropada Təhlükəsizlik və Əməkdaşlıq Təşkilatının (ATƏT) fəaliyyətdə olan sədri, Şimali Makedoniyanın xarici işlər naziri Buyar Osmani bildirib.

Avqustun 16-sı saat 17:00-da Ermənistan silahlı qüvvələrinin bölmələri Dəvəli rayonunun Birəli yaşayış məntəqəsi istiqamətində yerləşən mövqelərindən Azərbaycan Ordusunun Naxçıvan Muxtar Respublikasının Sədərək rayonu istiqamətində yerləşən mövqelərini müxtəlif çaplı atıcı silahlardan atəşə tutub. Bu barədə Sozcu.az-a Müdafiə Nazirliyindən məlumat verilib. Bildirilib ki, bölmələrimiz tərəfindən qeyd olunan istiqamətdə cavab tədbirləri görülüb.

Türkiyənin Adana vilayətinin Aladağ ilçəsində yerli vaxtla saat 17:36-da 4,5 bal gücündə zəlzələ baş verib. Sozcu.az xəbər verir ki, bu barədə Türkiyənin Fövqəladə Halların İdarəolunması Agentliyi (AFAD) məlumat yayıb. Yerin 7,3 km dərinliyində meydana gələn zəlzələ şəhər mərkəzində ciddi şəkildə hiss edilməyib, bəzi ilçələrdə yeraltı təkanlar bəlli olub.

Avqustun 15-i qəzaya düşən bloger Nicat Mütəllimovda müayinələr zamanı sağ və solda birinci qabırğanın sınığı aşkarlanıb. Sozcu.az xəbər verir ki, bu barədə TƏBİB-dən bildirilib. Qeyd olunub ki, sağ yuxarı ətrafın dirsəkdən amputasiyası diqanozu ilə ağır vəziyyətdə Kliniki Tibbi Mərkəzin Reanimasiya şöbəsinə yerləşdirilən pasiyent Nicat Mütəllimovun vəziyyəti stabil olaraq qalır. Müayinələr zamanı pasiyentdə sağ və solda birinci qabırğanın sınığı da aşkar olunub. Hazırda dinamiki müşahidə və müalicəsi davam etdirilir.