İsrail ordusu beynəlxalq konvensiyalarla qadağan olunmuş ağ fosforlu döyüş sursatından istifadə edir. Sozcu.az xəbər verir ki, bu barədə Fələstin Xarici İşlər Nazirliyinin məlumatında deyilir. Bildirilib ki, İsrail ordusu Qəzzanın əl-Karama rayonunda bu sursatları tətbiq edib. Qeyd edək ki, bu cür sursatlar 1949-cu il Cenevrə Konvensiyasının III Protokolu ilə qadağan edilib.

Hizbullahın İsrailə qarşı ikinci cəbhə açması ehtimalı qalmaqdadır, amma çox azdır. Sozcu.az xəbər verir ki, bu sözləri İsrail “Nativ” kəşfiyyat xidmətinin keçmiş rəhbəri, politoloq Yakov Kedmi erməni mediasına açıqlamasında Hizbullahın İsrail ordusunun Qəzzaya quru əməliyyatına başlayacağı halda İsrailə qarşı hərbi əməliyyatlara qoşulacağı barədə açıqlamasını şərh edərkən deyib. Ekspert bildirib ki, buna cavab olaraq İsrail Hizbullahı məhv etmək üçün hərəkətə keçəcək: “İsrail Hizbullahı İranın yaratdığı və Tehrana tabe olan bir təşkilat kimi görür. Odur ki, hadisələr çox tez İranın özünə qarşı birbaşa hərbi əməliyyatlarla nəticələnə bilər ki, buna da böyük ehtimalla ABŞ da qoşulacaq. İran üçün bu, özünəqəsd ssenarisidir. İranın bütün siyasi, texnoloji, iqtisadi nailiyyətləri məhv ediləcək”. Kedminin sözlərinə görə, İranın özü məhv edilməyəcək: “Çünki o, güclü dövlətdir və bunu etmək mümkün deyil, lakin zərbələr ölkənin iqtisadiyyatı və infrastrukturu üçün ölümcül olacaq. Buna görə də Tehran, çox güman ki, Hizbullahın bu avantüraya cəlb olunmasına imkan verməyəcək”.

İsrailin baş naziri Benyamin Netanyahunun oğlu 29 yaşlı Avner Netanyahu hərbi xidmətə çağırılaraq cəbhəyə yollanıb. Sozcu.az xəbər verir ki, bu barədə “İsrailin səsi” məlumat yayıb. Avner baş nazirin üç övladının ən kiçiyidir. Ondan başqa siyasətçinin 45 yaşlı qızı və 32 yaşlı oğlu da var. Avnerin dəqiq harada xidmət edəcəyi və antiterror əməliyyatı zamanı nə edəcəyi barədə məlumat verilmir.

“Moskvanın Qarabağdakı Rusiya sülhməramlıları ilə bağlı verdiyi mesajlar ziddiyyətləri artırır. Putinin “Valday”da dedikləri sülhməramlılara artıq ehtiyacın qalmadığı və Rusiyanın mövcud reallığı qəbul etdiyi fikrini önə çıxardı. Lakin Rusiya xarici işlər nazirinin müavini Mixail Qaluzin dünən bəyan etdi ki, “sülhməramlı kontingentə tələbat var, Qarabağda qalan ermənilərlə təmaslarda vasitəçilik edir, bununla yanaşı, gedənlər yenidən qayıda bilər və rus hərbçilərinin mövcudluğu onlar üçün sakitlik faktoruna çevriləcək””. Musavat.com xəbər verir ki, bu fikirləri siyasi şərhçi Asif Nərimanlı bildirib. Onun sözlərinə görə, Rusiyanın sülhməramlıları bölgədən çıxarmaq istəmədiyi bəllidir: “Lakin Qarabağda buna nə qədər nail ola biləcəkləri də sual altındadır. Birincisi, rəsmi Bakı Xankəndi də daxil olmaqla, sülhməramlıların keçmiş nəzarət zonasında mərkəzi hakimiyyətin bərpası prosesini sürətləndirir: bu ərazilərin təhlükəsizliyinin qorunması işini də artıq Azərbaycan polisi və hərbçiləri həyata keçirir; İkincisi, Xankəndidə qalan əhalinin mərkəzi hakimiyyətlə təmaslarında üçüncü tərəfin vasitəçiliyinə ehtiyac azalır: ermənilərin dövlət qurumlarına müraciətləri bunu təsdiq edən əsas amildir; Üçüncüsü, Rusiya gedənlərin geri qaytarılmasına çalışsa da, bu perspektiv zəifdir: gedən ermənilərin sülhməramlılara inamı qalmayıb, eyni zamanda qayıtmaq istəyənlər Laçın postundan Azərbaycan vətəndaşlığını qəbul etdikləri halda keçə biləcəklər və bu, onların inteqrasiyanı da qəbul etməsi deməkdir”. Ekspert “Rusiyanın sülhməramlılarla bağlı planı nədir?” sualını da cavablandırıb: “Lavrovun bu gün dedikləri bunu müəyyən qədər anlamağa imkan verir. Rusiyanın baş diplomatı bildirir ki, “İrəvan və Bakı iki ölkənin suverenliyinin qarşılıqlı tanınması məsələsini həll etdikdən sonra dinc həyatın bərqərar olması və etimadı möhkəmləndirməyin vaxtı çatıb. Rusiyanın Qarabağdakı sülhməramlı kontingenti Cənubi Qafqazda dinc həyatın bərqərar olmasına öz töhfəsini verməyə hazırdır”. Bu açıqlamadan 2 nəticə çıxır: Birinci, Rusiya sülhməramlılarını Qarabağda saxlamaq üçün Bakı və İrəvan arasında münasibətlərin normallaşmasına xidmət etmək adı altında yeni “missiya” ortaya atır: hərçənd, Qarabağ məsələsi artıq Azərbaycan-Ermənistan danışıqlarından həm hüquqi, həm de-fakto çıxıb, bu baxımdan sülhməramlılar Qarabağda qaldığı müddətdə bölgəyə heç bir “töhfə” verə bilməz, əksinə, Bakı ilə münasibətlərin gərginləşməsini vəd edir. İkinci, Rusiya Qarabağda qalma perspektivi çətinləşən sülhməramlı qüvvələrini bizim ərazimizdən çıxaracağı təqdirdə, bölgədə saxlamaq niyyətindədir: Qarabağın Moskva üçün Bakı və İrəvanı öz orbiti ətrafında saxlamaq rolu azalıb, ruslara Azərbaycan və Ermənistan arasında yeni platforma lazımdır, istisna deyil ki, sülhməramlı kontingenti həmin platformaya köçürmək planları var. İkinci variant daha real görünür, lakin bu platforma hara olacaq, sülhməramlılar iki ölkənin sərhədində dayana bilərmi, yaxud anklavların qaytarılacağı təqdirdə, bu ərazilərə çıxış üçün verilməli olan kiçik dəhlizlərmi seçiləcək? Açıq qalan suallar var”.

Rusiya sülhməramlılarının Qarabağdakı fəaliyyəti yeni şəraitə uyğunlaşdırılacaq. Bu barədə Rusiya XİN-in rəsmi nümayəndəsi Mariya Zaxarova bildirib. Onun sözlərinə görə, sülhməramlılar artıq bir sıra daimi və müvəqqəti müşahidə məntəqələrini bağlayıblar: “Son bir il ərzində Qarabağda vəziyyət kəskin şəkildə dəyişib; 2022-ci ilin oktyabrında Ermənistanın baş naziri (Nikol Paşinyan) Avropa İttifaqının himayəsi altında Praqada keçirilən sammitdə Qarabağ bölgəsini Azərbaycan ərazisi kimi tanıyıb, bu ilin may və iyun aylarında Brüsseldə keçirilən sammitlərdə öz mövqeyini bir daha təsdiqləyib. Beləliklə, Rusiya sülhməramlı kontingentinin bölgəyə yeridilməsi şərtləri ciddi şəkildə tənzimləndi və bu ilin 19-20 sentyabr tarixlərində baş vermiş toqquşmadan sonra əhalinin kütləvi köçü fonunda sülhməramlılarımızın fəaliyyəti yeni şəraitə uyğunlaşdırılacaq”. Zaxarova qeyd edib ki, Moskva Rusiya sülhməramlıları ilə bağlı fundamental məsələləri Bakı ilə müzakirə edir.

Ermənistanın “Respublika naminə” partiyasının sədri Arman Babacanyan iddia edir ki, Qarabağın dağlıq hissəsindən “dağlıq Qarabağ müdafiə ordusu”nun silahlı birləşmələri” adlanan separatçı-terrorçu qüvvələrin tərksilah olunaraq ərazidən çıxarılması Rusiya “sülhməramlı”larının vasitəçiliyi, Xocalı caniləri olan terrorçu eks-prezidentlər  Serjik Sərkisyanın koordinasiyası və Robert Köçəryanın iştirakı ilə İrəvanda razılaşdırılıb.  Moderator.az xəbər verir ki,  "Aykakan Jamanak"ın yayğığı məlumata görə, bu barədə A.Babacanyan öz “Facebook” səhifəsində yazıb. “Sentyabrın 20-də sizin artsaxda seçdiyiniz hökumət rəhbərləri:  parlament sədri Davit İşxanyan, keçmiş prezidentlər Bako Saakyan, Arkadi Qukasyan, Araik Arutyunyan, milli təhlükəsizlik xidmətinin direktoru, daxili işlər naziri, parlamentdəki “milli birlik” fraksiyasının lideri Samvel Babayan, İrəvanda bütün parlament fraksiyalarının liderlərinin, həmçinin Robert Köçəryanın iştirakı, Serj Sarkisyanın koordinasiyası və Rusiya sülhməramlılarının vasitəçiliyi ilə məşhur bəyanatı yayıblar ki, onun ikinci bəndində deyilir: “Ermənistan Respublikası Silahlı Qüvvələrinin qalan hissələrinin və hərbi qulluqçularının Rusiya sülhməramlılarının dislokasiya zonasından çıxarılması, Dağlıq Qarabağ Müdafiə Ordusunun silahlı birləşmələrinin buraxılması, tam tərksilah edilməsi və ağır texnika və silahların Dağlıq Qarabağ ərazisindən mümkün qədər tez çıxarılması barədə razılıq əldə olunub”,- deyə erməni partiya sədri yazıb. P.S. Əslində Bako Saakyan, Arkadi Qukasyan, Araik Arutyunyandan da öncə Robert Köçəryan və Serj Sərkisyan hələ sovet dövründən “KQB”-nin, sonra da xüsusən Putinin dövründə “FSB”-nin sadiq nökərləri olduğu üçün Moskvadan əmr gələndən sonra onlar Ermənistan ordusunu da tərksilah etdirilməsinə razılıq verərlər… Onu da xatırladaq ki, sentyabrın 9-da Azərbaycan torpağında artıq külləri də sovrulmuş separatçı-terrorçu rejimin sonuncu "seçilmiş" qondarma "prezident"i Samvel Şahramanyanın da Serjik Sərkisyanın və deməli, dolayısıyla Rusiyanın "adamı" olması haqda informasiyalar yayılmışdı...

Türkiyə Ordusunun hərbçisi İraqın şimalında terrorçulara qarşı həyata keçirilən “Pəncə-Kilid” əməliyyatında şəhid olub. Sozcu.az xəbər verir ki, bu barədə Türkiyə Milli Müdafiə Nazirliyi məlumat yayıb. Məlumata görə, terrorçuların yerləşdirdiyi partlayıcının işə düşməsi nəticəsində çavuş Mustafa Çakmak həyatını itirib.

“Azərbaycanda həbs edilən separatçılar saxlanma şəraitindən şikayət etmir, informasiya, kitab, qida ehtiyacları təmin olunur, vəkillə də təmin ediliblər, hətta Rubenin apelyasiya şikayətinə baxılıb. O deməkdir ki, onlar qatı cinayətkar olsalar da, Azərbaycan beynəlxalq konvensiyalara və qanunvericiliyə uyğun addım atır”. Sozcu.az xəbər verir ki, bu fikirləri tribunainfo.az-a Siyasi Hüquqların Müdafiə Mərkəzinin sədri Xəzər Teyyublu deyib. Hüquq müdafiəçisi hesab edir ki, həbsdə olan Araik, Ruben, David, Bako və digərləri ilə ombudsmanlıq da maraqlanıb, bəziləri ilə görüş keçirilib. “Fikrimcə, bizə hər hansı beynəlxalq təsisat hər hansı irad tuta bilməz. Baxmayaraq ki, Avropa Parlamenti böhtanlarla dolu bədnam qətnamə qəbul etdi, yenə də heç bir hüquq müdafiə təşkilatı Azərbaycanı ittiham edə bilməz. İkincisi, saxlanan şəxslər separatizmin və terrorçuluğun əsas liderləridir. ABŞ-ın Quantanamo türməsində terrorçular var, amma heç bir Qərb təşkilatı onlarla maraqlanmır. O cəhətdən bizdən nəsə tələb etmələri absurddur. Azərbaycan antiterror tədbirlərini də beynəlxalq hüquqa uyğun həyata keçirib, terrorçuları da o qaydalar çərçivəsində həbs edib. Terrorizmə qarşı mübarizə aparan beynəlxalq koalisiya bizə minnətdar olmalıdır. Diqqət edin, nə Makron, nə başqaları həbs edilən araiklərə görə səsini çıxarmır. Çünki deməyə arqumentləri yoxdur”.

İsrailin Qəzza zolağına endirdiyi zərbələrin nəticələrinin miqyası pilotsuz uçan aparatdan qeydə alınıb. Sozcu.az xəbər verir ki, bu barədə Teleqram kanallarında görüntü yayılıb. Qeyd edilib ki, İsrail ordusu (ÇAXAL) hər 4 saatdan bir Qəzza zolağını kütləvi raket zərbələri ilə vurur.

İsrail ordusu Qəzza zolağı ətrafında hərbi əməliyyatların başlaması ilə əlaqədar 48 saat ərzində ehtiyatda olan 300 min nəfəri orduya çağırıb. Sozcu.az xəbər verir ki, bu barədə İsrail ordusunun mətbuat xidməti məlumat yayıb. Qeyd olunub ki, döyüş texnikası cəhətdən çatışmazlıq yoxdur.

Böyük ehtimalla Qəzza zolağını İsrail bir neçə günə nəzarətə götürəcək. Suriya və Livan ərazisində də müəyyən preventiv tədbirlər qaçılmazdır. Bu sözləri Axar.az-a açıqlamasında hərbi ekspert Ədalət Verdiyev hazırda davam edən İsrail-HƏMAS müharibəsi haqda deyib. Verdiyevin sözlərinə görə, quru əməliyyatları başa çatdıqdan sonra belə İsrail Qəzza zolağında müəyyən nəzarət mexanizmlərini saxlayacaq: “Hizbullah da əgər HƏMAS-ı dəstəkləməyə cəhd edərsə, onun taleyi HƏMAS-dan fərqli olmayacaq. Daha əvvəlki illərdə olduğu kimi, İsrail Müdafiə Ordusu hər iki tərəfin dayaqlarını kifayət qədər sarsıdacaq”. Qeyd edək ki, HƏMAS 7 oktyabrda Qəzza zolağından İsrailə kütləvi hücuma keçib. Nəticədə indiyə qədər 900 israillinin öldüyü, 2,7 minə yaxın insanın isə yaralandığı bildirilir. İsrail ordusu müharibəyə girdiyini elan edib və Qəzzaya ağır zərbələr endirir.

“Müharibənin qızışmamasını istəyiriksə, İranı bombalaya bilərik”. Sozcu.az xəbər verir ki, bu sözləri ABŞ senatoru Lindsey Graham bildirib. Onun sözlərinə görə, “Müharibənin Ayətullah Əli Xameneinin arxa bağçasına köçürməyin vaxtıdır…”.

"Düşmənin bu növbəti təxribatı Ukrayna Silahlı Qüvvələrinin nüfuzdan salınması və Qərb tərəfdaşları tərəfindən Ukraynaya hərbi yardımın dayandırılması məqsədini güdür..." Rusiya xüsusi xidmət orqanları Ukraynada döyüş əməliyyatları zamanı ABŞ və Avropa İttifaqının ələ keçirilən qənimət silahlarını HƏMAS terrorçularına ötürüb. Sozcu.az xəbər verir ki, bu barədə Ukrayna Müdafiə Nazirliyi Baş Kəşfiyyat İdarəsi məlumat verib. Məlumatı "news.obozrevatel.com" nəşri yayıb. Ukrayna kəşfiyyatının məlumatına görə, rusiyalılar burada aşağıdakı məqsədləri güdüb: - ukraynalı hərbçiləri "Qərb silahının müntəzəm əsaslarla terrorçulara satmaqda" ittiham etmək; - bu feyki mediada, o cümlədən Qərb mətbuatında yaymaqla Qərb tərəfdaşları tərəfindən Ukraynaya hərbi yardımın tamamilə dayandırılması məqsədilə ictimai rəyi formalaşdırmaq. "Kremlin dezinformasiya kampaniyası çərçivəsində bu feyklər Qərb KİV-lərində bir sıra "ifşaedici materialların" və "araşdırmaların" əsasını təşkil etməlidir.  İnandırıcı olması üçün Rusiyanın xüsusi xidmət orqanları bu yaxınlarda Moskvaya qaçmış Ukrayna Sərhəd Xidmətinin xain baş leytenantı Ruslan Sırovun müvafiq şərhlərindən istifadə etmək niyyətindədir", - BKİ xəbərdarlıq edir. Xatırladaq ki, ilyarımdır ki, ona hücum edən Rusiya ilə qanlı savaş aparan Ukrayna yəhudi dövlətinə terror hücumlarını birmənalı olaraq qətiyyətlə pisləyənlərin ilk sırasında olub. "Biz İsrailin özünü və öz xalqını qorumaq hüququna öz dəstəyimizi ifadə edirik", - Ukrayna XİN "həmasçıların" İsrailə qanlı hücumundan bir neçə saat sonra bəyan edib. Düşmənin bu növbəti təxribatı Ukrayna Silahlı Qüvvələrini nüfuzdan salmağa yönəlib və Qərb tərəfdaşları tərəfindən Ukraynaya hərbi yardımın dayandırılmasına gətirib çıxara bilər. Xatırladaq ki, oktyabrın 7-də HƏMAS yaraqlıları İsrailə güclü hücum törədərək, 5 min raket buraxıb, sonradan onlar Qəzza bögəsi yaxınlığındakı maneələrdən keçərək dinc sakinləri qətlə yetirib və vəhşiliklər törətməyə başlayıb. Oktyabrın 9-da bütün gecə İsrail Müdafiə Ordusu HƏMAS terrorçu qruplaşmasının hərbi imkanlarını məhv etmək üçün Qəzza bölgəsinə zərbələr endirməkdə davam edib. Eyni zamanda, terrorçular mülki obyektlərə hücumları davam edir, bu hücumlar nəticəsində İsraildəki qurbanların sayı 700 nəfəri ötüb.

Bir vaxtlar Qarabağda yüzlərlə günahsız soydaşımızın qanını axıdan qatillərin bəziləri həbs edilib. Amma insanları yalnız azərbaycanlı olduğuna görə qətlə yetirən cəlladların əksəriyyəti hələ də azadlıqdadır. 1992-ci ildə Qaradağlı və Xocalı qətliamlarının təşkilatçılarından biri, uzun müddət Ermənistan Müdafiə Nazirliyinə rəhbərlik edən Seyran Ohanyan və digər canilər hələ də Ermənistan ərazisində gizlənirlər. Əslən Qarabağın Daşaltı kəndindən olan Ohanyan 44 günlük müharibədə Şuşanın müdafiəsinə cavabdeh olsa da, ordumuzun hücumunun qarşısında duruş gətirə bilməyərək Şuşadan qaçmışdı. Ermənistana çatar-çatmaz bəyanatlar səsləndirən Ohanyanın bu gedişi Qarabağa son gediş oldu və bir daha cəsarət edib biz tərəfə baxmadı. Amma revanşist bəyanatlarla diqqət mərkəzində olan Ohanyan həm də Ermənistan parlamentində müxalifəti təmsil edir. Özünün “Facebook” səhifəsində ermənilərə müraciət edən Ohanyan Qarabağın boşaldılmasını ürək ağrısı ilə qeyd edir və yazır ki, düşdükləri vəziyyətə görə günahkar yalnız baş nazir Paşinyandır: “Baş verən faciələrin günahını təkrar-təkrar üzərinə götürən baş nazir özünü elə göstərir ki, guya dəyişiklikdən narazıdır. Müxalifətə yönəlmiş ittihamlar isə absurd yanaşmadır. Hakimiyyətdəkilərin fikirincə, Qarabağdan əhalinin boşaldılmasında günahkar müxalifətdir. Onlar bizi Qarabağın yeni seçilmiş prezidentini təbrik etməkdə günahlandırırlar. Paşinyan hakimiyyəti Qarabağı bir dövlət kimi tanımadı və onun prezidentini təbrik etmədi. Halbuki Qarabağı xilas etmək və saxlamaq üçün bütün rıçaqlar müxalifətin deyil, iqtidarın əlində idi. Və bu gün onlar dövlət təbliğat maşınından nə qədər istifadə etsələr də, müxalifəti günahlandırsalar da, yenə də özlərinə bəraət qazandıra bilməyəcəklər. Hər bir erməni anlayır ki, 2020-ci il məğlubiyyətindən sonra Paşinyan Qarabağın təhlükəsizliyinin təminatçısı olmaqdan imtina edərək, gələcək hərəkətlər üçün bütün məsuliyyəti və mümkün ittihamların oxlarını Rusiya sülhməramlı qüvvələrinə yönəltdi. Praqada açıq şəkildə Qarabağı Azərbaycanın bir hissəsi kimi tanımaqla müttəfiqimizin əl-qolunu bağladı”.  Silahdaşlarının Bakıda həbsdə olmasını unudan Ohanyan hesab edir ki, uzun müddət azadlıqda gəzib siyasi məsələləri təhlil etməklə məşğul olacaq. Bir vaxtlar Rusiyada milyardlar qazanaraq gəlib Qarabağda Azərbaycana meydan oxuyan Ruben Vardanyan da dünya mətbuatının gündəmində idi. Hətta Qarabağın “prezidentləri” Bakıda dəmir barmaqlıqlar arasından boylanacaqlarını, həyatın bumeranq olduğunu ağıllarının ucundan belə keçirməmişdilər. Deməli, əlahəzrət ədalət tarixin hansısa məqamında öz sözünü deyir və cinayətkar cəzasız qalmır. Növbə isə Ermənistan ərazisində gizlənən Ohanyan və digər cinayətkarlara da çatacaq.konkret)

Hazırda HƏMAS ilə danışıqlar aparılmır. Sozcu.az xəbər verir ki, bunu İsrailin Xarici İşlər Nazirliyinin sözçüsü Lior Hayat deyib. “Dövlətimiz müharibə vəziyyətindədir və hesab edirik ki, hazırda heç bir danışıqlar mümkün deyil. Biz bunu heç müzakirə də etmirik”, - Hayat qeyd edib. Qeyd edək ki, HƏMAS sülh danışıqlarına hazır olduğunu bildirib.

İsrailin könüllü xilasetmə fəaliyyəti ilə məşğul olan ZAKA ictimai təşkilatının üzvləri ölkənin cənubunda yerləşən Beeri kibbutzda (kollektiv icma – red.) ən azı 100 cəsəd aşkar ediblər. Sozcu.az xəbər verir ki, bu barədə “Tayms of İsrail” məlumat yayıb. Bildirilib ki, HƏMAS radikallarının hücumu nəticəsində kibbutz tamamilə dağıldığı üçün qurbanların sayı daha da arta bilər. İcmada minə yaxın insan yaşayırdı. Qeyd edək ki, HƏMAS-ın İsrailə gözlənilməz hücumu nəticəsində ölənlərin sayı 800, yaralıların sayı isə 2616 nəfərə yüksəlib.

İsrail Müdafiə Qüvvələri Qəzza zolağı ilə sərhəddəki ərazinin terrorçulardan təmizlənməsini başa çatdırır və artıq hücuma hazırlaşır. Sozcu.az xəbər verir ki, belə bir bəyanatla İsrail ordusunun Baş Qərargah rəisi Herzi Halevi çıxış edib. “Çətin başlanğıcdan sonra təmas xəttini formalaşdırırıq. Biz çoxlu terrorçu öldürmüşük - kim yaxınlaşsa, öldürüləcək. Ərazimizdə terrorçu olmaması üçün ərazinin təmizlənməsini başa çatdırırıq və eyni zamanda artıq hücuma hazırlaşırıq. Hələ qarşımızda çoxlu vəzifələr var, güclü olmalıyıq. Hər şey pis başladı və düşmən tərəfi üçün çox pis bitəcək”-deyə o bildirib.

Ermənistan ordusunun əsgəri Narek Nazaryan aldığı güllə yarasından ölüb. Sozcu.az xəbər verir ki, bu barədə Ermənistan Müdafiə Nazirliyi məlumat yayıb. Onun hansı şəraitdə öldüyü açıqlanmır, faktla bağlı araşdırma aparılır.

"Rövşən Əliyev,təki siz idarə müdiri olaraq Ağsuya gəlin,benzin pulunuz da mənlikdi,hələ üstəlik Ağsu dolaylarında mən dediyim restoranda nahar da ". Məlumunuz,Ağsu şəhər Soltan Umbayev adına 2 saylı tam orta məktəbin binası qəzalı vəziyyətdədir. Bu tədris ilinin başlanğıcında belə xəbər yayıldı ki, 2 saylı məktəb yenicə təmirdən çıxmış Şəhid Polad Mirzəyev adına 5 saylı məktəbə köçürüləcək. Lakin nə baş verdisə( çox güman ki,5 saylının direktoru tanışlıq yolu ilə buna mane olub) bu baş vermədi və qəzalı ,yarıuçuq binada dərs keçirilməyə məcbur olundu . Mən də mütəmadi olaraq müxtəlif ünvanlara həm sosial şəbəkədə ,həm də yazılı formada yazıram. Bu gün də Dağlıq Şirvan Regional Təhsil İdarəsinin müdiri Əliyevə Rövşənə xoşməramlı təklif yazmışam. Şərhimi silə biləcəkləri ehtimalını nəzərə alaraq,öz profilimdə paylaşıram: "Hörmətli Rövşən Əliyev,bayramı , istirahəti necə keçirdiz? Vicdanınız rahat idi? Rövşən Əliyev,mən valideynlərimin də peşəsi olan Müəllim adına hörmətimdən dolayı heç bir zaman Müəllimlərə qarşı  sərt ifadə  işlətməmişəm. İndi isə mənim sözlərim Rövşən  müəllimə yox,"məmur Əliyev Rövşən"-ə ünvanlanır və ünvanlanacaq. Çünki məmur Əliyev Rövşən yerlibazdır,çünki məmur Əliyev Rövşən işinə məsuliyyətsiz yanaşır. Çünki məmur Əliyev Rövşən kabinet məmurudur.Çünki məmur Əliyev Rövşən qəzalı binası olan bir məktəbin digər məktəbə köçürülməsini təmin edə bilir. Çünki yeni təmir edilmiş məktəbin direktorundan qorxur və tapşırığa əməl edib bu köçürməni həyata keçirə bilmir. Əliyev Rövşən,Siz elə bilirsiniz ki, Sizin vəzifə bölgənizə ancaq İsmayıllı və Şamaxı aiddir? Siz heç Ağsuya gəlmisiz? Ümumiyyətlə tanıyırsız Ağsunu? Siz o qədər yerlibazsınız ki, hər bir işdə İsmayıllı rayonunu önə çıxarırsız.  Əliyev Rövşən, Sizə bir təklifim var. Deməli ,Şəhid Soltan Umbayev adına 2 saylı tam orta məktəbin vəziyyətini yerində yoxlamaq üçün gəlin Ağsuya . Söz verirəm,benzin pulunuzu da mən verəcəm. Bir də mən dediyim restoranda naharınızın pulunu da mən ödəyəcəm. Amma mən dediyim yerdə,yaxşı, elit restorandı,narahat olmuyun.  Mən daha Sizin üçün nə edim ki, Siz öz məmur,insanlıq borcunuzu yerinə yetirəsiniz?  Sizdən nə gedir ,gəlin də,əlaxüsus , Şamaxı-İsmayıllı istiqamətində yol təmiri üçün iş gedir,buna görə də Ağsudan İsmayıllıya getmək daha rahatdı.  PS: Şərhimi silmək ağlınıza belə gəlməsin, bunu hər yerdə paylaşacam onsuz da.  P.S.S: Rövşən Əliyev, təkrar edirəm, benzin pulu və mən dediyim restoranda nahar mənlikdi... P.S.S.S.: Əliyev Rövşən,belə getsə Sizi məhkəməyə verəcəm. Birincisi öz işinizi düzgün həyata keçirə bilmədiyinizə görə. Qalan məhkəmə predmetlərini taparam, narahat olmayın. Cabir Cəfərov

Ukrayna prezidenti Vladimir Zelenski HƏMAS-ın İsrailə hücumunu Rusiyanın Ukraynaya müdaxiləsi ilə əlaqələndirib və hər iki münaqişə ilə bağlı İranı tənqid edib. Sozcu.az bu barədə xarici mətbuata istinadən xəbər verir. “Yeganə fərq odur ki, İsrailə hücum edən terror təşkilatı və Ukraynaya hücum edən bir terror dövləti var. Bildirilən niyyətlər fərqlidir, amma mahiyyət eynidir”, – Zelenski deyib. “İran deyə bilməz ki, Rusiyaya dronlar satarsa, Ukraynada baş verənlərlə heç bir əlaqəsi yoxdur. İran rəsmiləri İsraildə baş verənləri dəstəklədiyini bəyan edərsə, orada baş verənlərlə heç bir əlaqəsi olmadığını deyə bilməz”, – Zelenski bildirib. Zelenski qlobal hadisələr qarşısında Qərbi birliyə çağırıb. “İndi beynəlxalq arenadan daxili mübahisələrə çəkilməyin vaxtı deyil. Özünüzü təcrid etməyin vaxtı deyil. Susmaq və ya bir qitədəki terrorun qlobal işlərə təsir etmədiyini iddia etmək vaxtı deyil”, – deyə Ukrayna lideri qeyd edib.

“Ermənistanda mühacirətdə olan “Dağlıq Qarabağ hökumətini” qurmaq lazımdır”. Musavat.com erməni mediasına istinadən xəbər verir ki, bunu Ermənistan Demokratik Partiyasının lideri Aram Sarkisyan deyib. Onun sözlərinə görə, bu, ermənilərə “Dağlıq Qarabağ”ın (qondarma - red.) qorunub saxlanılması kursunu davam etdirməyə və gələcəkdə onun qaytarılması ideyasını dəstəkləməyə imkan verəcək. “İstənilən halda belə olmalıdır. Əks halda, bu, Qarabağa iddiadan vaz keçmək anlamına gələcək”, - Sarkisyan bildirib.

ABŞ Mərkəzi Komandanlığı (CENTCOM) USS Gerald R. Ford təyyarədaşıyan gəmisi də daxil olmaqla donanmanın İsrail ordusuna dəstək vermək üçün Şərqi Aralıq dənizinə yola düşdüyünü açıqlayıb. Sozcu.az xəbər verir ki, CENTCOM-un komandiri general Maykl Kurilla Birləşmiş Ştatların bu mövqeyi daha da gücləndirmək üçün qlobal miqyasda hazır qüvvələr saxladığını bəyan edib və CENTCOM-un İsrailin yanında olduğunu bildirib. ABŞ-ın İsrailə göndərdiyi yardım “güc nümayişi” kimi şərh edilib. "Aljazeera"nın təhlildə ABŞ-ın 38-ci prezidentinin adını daşıyan Gerald Ford təyyarə gəmisinin rəhbərlik etdiyi donanmanın Amerikanın hərbi gücünü nümayiş etdirdiyi və İsrailə açıq dəstək vermək üçün qəsdən göndərildiyi iddia edilib. ABŞ-ın bəyanatından sonra İraqdakı Şiə Koordinasiya Çərçivəsi direktoru və İran tərəfdarı Bədr Təşkilatının rəhbəri Hadi əl-Amiri ABŞ-ı hədələyib. O, Fələstin xalqının yanında olduqlarını ifadə edib: “ABŞ Fələstinə müdaxilə edərsə, ABŞ-ı hədəf almaqdan çəkinməyəcəyik”.

Qəzza zolağının tam blokadaya alınması üçün göstəriş verdim. Sozcu.az xəbər verir ki, bunu İsrailin müdafiə naziri Yoav Qallant deyib. Nazirin sözlərinə görə, orada ərzaq və enerji təchizatı dayandırılacaq: “Qəzza zolağının tam mühasirəyə alınmasını əmr etdim. İşıq yox, yemək yoxdur, qaz yoxdur, hər şey bağlıdır”. Qeyd edək ki, 7 oktyabrda HƏMAS və “İslami-Cihad”ın İsrailə hücumu ilə İsrail-Fələstin müharibəsi başlayıb.

HƏMAS-ın bütün hərbi liderləri, o cümlədən əməliyyatın komandiri Yəhya Sinvar məhvə məhkumdur. Sozcu.az xəbər verir ki, bunu İsrail ordusunun mətbuat katibi Daniel Haqari deyib. "Fələstin qruplaşmasının komandiri Yəhya Sinvardır və tezliklə öldürüləcək: o, artıq meyitdir. HƏMAS-ın hərbi və siyasi rəhbərliyi, onun bütün aktivləri təhlükə altındadır, onların sonu çatıb”, - Haqari bildirib.