Salyanda baş verən qəzada sürücü avtomobildə yanaraq ölüb. Sozcu.az APA-ya istinadən xəbər verir ki, Salyan rayonunun Qarabağlı kənd sakini, 1987-il təvəllüdlü Emil Asəf oğlu Əzizov saat 04:00 radələrində idarə etdiyi “Mersedes” markalı avtomobillə qəzaya uğrayıb. Məlumata görə, Ağcabədidən toydan qayıdan E.Əzizovun avtomobili idarəetmədən çıxaraq hasara çırpılıb, sonra isə alışaraq yanıb. Nəticədə sürücü avtomobildə yanaraq ölüb. Faktla bağlı araşdırma aparılır. *** Salyan rayonunun Yolüstü kəndində "Mersedes" markalı minik avtomobilinin avtoyuma məntəqəsinə çırpılması nəticəsində yanğınla nəticələnən yol-nəqliyyat qəzası baş verib. Bu barədə Fövqəladə Hallar Nazirliyinin Mətbuat Xidməti məlumat yayıb. Bildirilib ki, yanğın nəticəsində avtomobilin yanar hissələri, ümumi sahəsi 120 m² olan avtoyuma məntəqəsinin dam örtüyünün taxta atmaları 3 m² sahədə və xarici divarından keçən elektrik kabeli 2 paq.m yanıb. Yanğın yerinin kəşfiyyatı zamanı sürücünün yanmış meyiti aşkar edilərək aidiyyəti üzrə təhvil verilib. Obyektin qalan hissəsi yanğından mühafizə olunub. Yanğın yanğından mühafizə bölmələri tərəfindən söndürülüb. Hadisə ilə əlaqədar müvafiq qurumlar tərəfindən təhqiqat aparılır.

Məşhur türkiyəli müğənni, 38 yaşlı İrəm Derici narkotik istifadəsini təşviq ittihamı ilə İstanbulda, Şişlidəki evində saxlanılıb. Sozcu.az xəbər verir ki, bu barədə məlumatı İstanbul Baş Prokurorluğu yayıb. Bundan başqa, məşhur müğənnilər - Hadisə, Simge Sağın, Ziynet Sali, aktrisalar - Özge Özpirinçci, Berrak Tüzünataç, Demet Evqar, Ceren Moray Orcan, aktyorlar - Aral Keskin, Kaan Yıldırım, Mert Yazıcıoğlu, Kubilay Aka, Mətin Akdülger, məşhur fenomenlər - Ceren Moray Orcan, Dilan Polad, Engin Polad, Duyğu Özaslan Mutaf, tanınmış vəkil Feyza Altun, tanınmış aparıcı Defne Samyelinin qızları - Deren və Derin Talu, eyni zamanda Zeynəb Meric də narkotikdən istifadəni təşviq etmək ittihamı ilə aparılan istintaq çərçivəsində saxlanılıblar.

Dünya bazarlarında neft bahalaşmaqda davam edir. Sozcu.az xəbər verir ki, hazırda “Brent” markalı neft 65,96 dollara, yüngül neft 62,25 dollara təklif edilir.

Qəbələdə maşın beton dirəyə çırpılıb. Sozcu.az xəbər verir ki, hadisə rayonun Baun qəsəbəsində baş verib. Belə ki, Elvin Qasımov idarə etdiyi VAZ-2106 markalı avtomobillə hərəkətdə olarkən idarəetməni itirib və beton dirəyə çırpılıb. Hadisə nəticəsində avtomobildə olan sərnişin Cahid Hüseynov aldığı xəsarətlərdən hadisə yerində ölüb Sürücü və və digər sərnişin Laçın Mahmudov müxtəlif dərəcəli bədən xəsarətləri alıb. Faktla bağlı cinayət işi açılıb.

Ukrayna müharibənin 1323-cü günü üçün Rusiya ordusunun itkiləri haqda məlumatı yeniləyib. Sozcu.az xəbər verir ki, bu barədə Ukrayna Baş Qərargahı məlumat yayıb. Məlumata əsasən, Rusiya indiyə qədər 1 118 370 hərbçi, 11 240 ədəd tank, 23 324 ədəd zirehli döyüş maşını, 33 519 ədəd artilleriya sistemi, 1 517 ədəd RYAS (reaktiv yaylım atəş sistemi), 1 225 hava hücumundan müdafiə sistemi, 426 ədəd hərbi təyyarə, 346 ədəd helikopter, 63 650 ədəd avtomobil texnikası, 67 965 ədəd PUA, 3 841 qanadlı raket, 28 gəmi/kater, 1 sualtı qayıq, 3 973 xüsusi avadanlıq itirib.

Əli ətçəkən maşında qalan 2 yaşlı körpə Göyçay Rayon Mərkəzi Xəstəxanasına hospitalizasiya olunub. Tibb müəssisəsində körpənin əli ətçəkən maşından çıxarılıb və ona zəruri tibbi yardım göstərilib. Sozcu.az xəbər verir ki, bu barədə TƏBİB məlumat yayıb. Bildirilib ki, 27.08.2023-cü il təvəllüdlü körpəyə sağ əlin çoxsaylı əzilmiş, cırılmış yaraları diaqnozu təyin olunub və həkim-cərrahların peşəkarlığı, eyni zamanda çevik müdaxiləsi nəticəsində hər hansı ciddi xəsarət almadan xilas olunub. "Müalicəsi Cərrahiyyə şöbəsində davam etdirilən azyaşlının vəziyyəti qənaətbəxş qiymətləndirilib və ambulator müalicə üçün evə buraxılıb. Tövsiyə edirik ki, bu kimi halların təkrarlanmaması üçün valideynlər daha diqqətli olsunlar. Təhlükə riski daşıyan bu cür avadanlıqlar, mexaniki və elektrikli cihazlar uşaqların nəzarətsiz şəkildə yaxınlaşa bilməyəcəyi yerlərdə saxlanılmalıdır. Hər bir valideyn bilməlidir ki, ən sadə məişət əşyası belə azyaşlı üçün təhlükə mənbəyinə çevrilə bilər",- deyə məlumatda qeyd edilib.

Şəmkirdə 11-ci sinif şagirdi Rəsul Ələddin oğlu Qəribov vəfat edib. Sozcu.az xəbər verir ki, bu barədə onun təhsil aldığı Şəmkir rayonu Aşağı Seyfəli kənd Natiq Abbasov adına tam orta məktəbin sosial şəbəkə hesabında məlumat paylaşılıb. Məktəblinin hansı səbəbdən vəfat etdiyi barədə məlumat yoxdur.modern)

2022-ci ilə qədər Rusiya vətəndaşı olan və hazırda Azərbaycanda həbsdə olan erməni əsilli milyarder Ruben Vardanyan “Atom” elektromobil layihəsinə investisiya qoymaqdan imtina edib. Sozcu.az Yeniavaz.com-a istinadən xəbər verir ki, Vardanyan “Atom” layihəsini inkişaf etdirən “Kama” ASC-nin əsas səhmdarı “Vosxod” MMC-dəki 25%-lik payını şirkətin özünə qaytarıb. Beləliklə, “Vosxod” MMC-də pay bölgüsü bu şəkildə formalaşıb: Vaqan Babloyan – 60%, Mixail Broytman – 20%, Janna Xaliullina – 20%. Bir il əvvəl, 2024-cü ilin oktyabrında, Vardanyan həmçinin “Kamaz” şirkətinin də ortaq sahibliyindən çıxıb. O zaman milyarder avtomobil istehsalçısının səhmdarlarından olan “Avtoinvest” MMC-dəki 15%-lik payını Samara vilayətinin qubernatoru və “AvtoVAZ”ın keçmiş prezidentinin oğlu Dmitri Artyakova təhvil verib. Artyakov hazırda “Modum-Trans” adlı böyük dəmir yolu operatorunun baş direktoru və ortaq sahibidir. Avtomobil sənayesi üzrə ekspert, “Euler” şirkətinin baş analitiki Vladimir Bespalov hesab edir ki, Vardanyanın “Vosxod”dan ayrılması “Atom” layihəsinə mənfi təsir göstərməyəcək. Onun fikrincə, layihənin gələcək uğuru avtomobilin qiyməti ilə istifadəçi təcrübəsi arasında balansdan asılı olacaq. “Atom” layihəsi 2021-ci ilin avqustunda Naberejnıye Çelnı şəhərində qeydiyyatdan keçmiş “Kama” ASC tərəfindən hazırlanır. Layihənin əsas ideyası Rusiya bazarı üçün müasir elektrik avtomobili istehsal etməkdir. 2023-cü ilin iyununda Sergey Koqoqin açıqlamışdı ki, o və Vardanyan layihəyə 1 milyon dollar sərmayə yatırıb. Sonradan “Kamaz” və “Rosatom” da “Kama” ASC-nin ortaq sahiblərinə çevriliblər. Planlara əsasən, “Atom” dörd modeldən ibarət olmalı idi: “Delivery” – yükdaşıma üçün tək oturacaqlı versiya; “Duo” – iki yerlik; Taksi – şəhər nəqliyyatı üçün dördyerlik; Ailə – beş yerlik versiya. İstehsalın 2025-ci ildə “Moskviç” zavodunda (Moskva hökuməti və “Kamaz”ın birgə müəssisəsi) başlaması planlaşdırılırdı. Avtomobillərin qiymətinin dövlət subsidiyaları olmadan 3–4 milyon rubl (36-48 min dollar) civarında olacağı bildirilir. “Kama” şirkəti hələlik satış tarixi və qiymət barədə dəqiq məlumat açıqlamasa da, ilin sonuna qədər kütləvi istehsala başlamaq niyyətində olduğunu təsdiqləyib. Qeyd edək ki, Ruben Vardanyan əvvəllər “Troyka Dialoq” investisiya şirkətinin rəhbəri və Skolkovo İdarəetmə Məktəbinin ilk prezidenti olub. 2022-ci ilə qədər o, “Forbes”in “Rusiyanın ən varlı biznesmenləri” siyahısında yer alırdı. Həmin ilin dekabrında Rusiya Prezidenti Vladimir Putin onun Rusiya vətəndaşlığından imtina ərizəsini təsdiqləyib. Vardanyan 2022-ci ilin noyabrından 2023-cü ilin fevralınadək qondarma “Dağlıq Qarabağ Respublikası”nın “hökumət başçısı” olub. 2023-cü ilin sentyabrında Azərbaycan ordusunun həyata keçirdiyi anti-terror əməliyyatından sonra Ermənistana keçmək istəyərkən təhlükəsizlik orqanları tərəfindən saxlanılıb. O, hazırda Azərbaycan qanunvericiliyinə əsasən ağır və xüsusilə ağır cinayətlər törətməkdə ittiham olunur.

Son vaxtlar Azərbaycanda internetin sürətindən şikayətlər artıb. Abunəçilər əksər provayderlərin göstərdiyi xidmətdən ciddi narazılıq edirlər. Əsas problemlər isə internetin tez-tez kəsilməsi və sürətin aşağı olması ilə əlaqədardır. Mövzu ilə bağlı “Yeni Sabah”a danışan rəqəmsal sahə üzrə mütəxəssis Vasif Qəhrəmanov bildirib ki, hazırda internet provayderləri arasında rəqabət yoxdur, bu isə abunəçilərə problemlər yaradır. “İnternetin qiyməti yuxarıdır, amma rəqabət olmadığı üçün provayderlər arasında keyfiyyəti yüksəltmək motivasiyası yoxdur. Texniki tərəfdən götürsək, data senterlərin miqdarı artırılmalıdır. Sözsüz ki, qiymət rəqabəti də olmalıdır. Məhsulu eyni qiymətə mən də, siz də, digər bazar iştirakçısı da təklif ediriksə, müştəri avtomatik olaraq, keyfiyyətə üstünlük verir”. Onun sözlərinə görə, yaranan problemin digər bir səbəbi də ölkənin internet məkanına kiberhücumların artmasıdır: “Son zamanlar DDoS hücumlar xeyli çoxalıb”. Ekspert bildirib ki, bəzən vətəndaşın internetlə bağlı problemi texniki səbəblərlə də bağlı olur: “Əlbəttə, fiber-optik kabellər müxtəlif hallarda qırıla bilər. Abunəçilər ilk növbədə provayderlə əlaqə saxlayıb şəbəkədə problem olub-olmadığını soruşmalıdırlar. Əgər şəbəkədə problem yoxdursa, deməli səbəb lokal şəbəkədədir”.

2035-ci ilə qədər Bakının Baş Planının həyata keçirilməsi nəzərdə tutulub. Sozcu.az AzTV-yə istinadən xəbər verir ki, plan daxilində şəhər ərazisində ciddi dəyişikliklər gözlənilir. Belə ki, Bakıda istismar müddətini başa vurmuş binalar söküləcək və yerində yeni, müasir tələblərə cavab verən tikililər inşa olunacaq.  Həmçinin, Mərkəzi Parkın ərazisi genişləndiriləcək.   Daha ətraflı videomaterialda izləyə bilərsiniz:

İki ay əvvəl Vaşinqtonda, Ağ Evdə Azərbaycanla Ermənistan arasında sülh sazişinin paraflanması Cənubi Qafqazı sülh məkanına çevirəcək. Sozcu.az xəbər verir ki, bunu Prezident İlham Əliyev Türk Dövlətləri Təşkilatının (TDT) Dövlət Başçıları Şurasının 12-ci Zirvə Görüşündə çıxışında bildirib. Dövlətimizin başçısı qeyd edib ki, Vaşinqton Zirvəsi çərçivəsində ATƏT-in Minsk qrupunun və əlaqədar strukturların bağlanması üçün edilmiş birgə müraciətə uyğun olaraq, sentyabrın 1-də ATƏT tərəfindən qəbul edilmiş qərarla keçmiş münaqişənin bu qalıqları da aradan qaldırılıb.

Baş nazir Nikol Paşinyanın strateji düşüncə nümayiş etdirdiyi bir zamanda rusiyalı siyasətçilər susmalı və Ermənistana məsləhət verməməlidirlər. Paşinyanın qərarı ilə Ermənistan XİN-in tərkibində Avropaya inteqrasiya departamenti yaradılıb. İlk baxışdan bu, sadəcə texniki addım kimi görünsə də, əslində vacib simvolik və strateji qərardır. Ermənistan AB ilə yaxınlaşma kursunu ritorika səviyyəsində deyil, dövlət diplomatiyası strukturu səviyyəsində institusionallaşdırır. Bu o deməkdir ki, Avropa istiqaməti İrəvan üçün prioritet istiqamətə çevrilir. Məhz belə bir anda Moskvada qıcıq və hədələrlə dolu səslər eşidilir. Dövlət Dumasının MDB işləri, Avrasiya inteqrasiyası və həmvətənlərlə əlaqələr komitəsi sədrinin birinci müavini Viktor Vodolatski AB-ni guya Ermənistan, Azərbaycan və Gürcüstanın “dövlətçiliyini məhv etmək” cəhdində ittiham edir. Vodolatskinin sözlərinə görə, AB ölkələri Ukrayna ssenarisinə doğru aparır. Bu bəyanat, digərləri kimi, Rusiya rəsmisinin suveren dövlətlərin daxili işlərinə kobud müdaxiləsinin növbəti nümunəsidir. Sozcu.az xəbər verir ki, bunu erməni analitik Qalust Qriqoryan deyib. “Bu, qonşular üçün narahatlığı yox, qorxunu əks etdirir: keçmiş sovet respublikalarının Rusiyanın təsir orbitindən çıxacağından və həqiqətən müstəqil oyunçulara çevriləcəyindən doğan qorxunu. Vodolatski Ermənistanın Avropa seçimini şərh etmək əvəzinə, öz ölkəsində baş verənlərə diqqət yetirə bilərdi. Rusiya bu gün siyasi azadlığı olmayan, vətəndaş təşəbbüslərinin boğulduğu və ictimai rəyə ciddi nəzarət olunan bir mühitdə yaşayır. Vaxtilə müxtəlif baxışların səsləndiyi yerdə indi ancaq şüarlar qalıb. Seçkinin keçirilməli olduğu yerdə ancaq imitasiya qalıb. Əvvəllər dissident adlandırdıqlarını isə bu gün “xarici agent” adlandırırlar. Bu, müasir Rusiyanın reallığıdır - müxalifətin sadəcə susdurulmadığı, əksinə məhv edildiyi Stalin repressiyaları dövrünə yaxın bir reallıqdır. Qoy hər kəs öz işi ilə məşğul olsun. İqtisadi və demoqrafik problemlər içində boğulan, Ukraynaya qarşı müharibədə batan, minlərlə insan və milyardlarla dollar itirən Rusiya başqalarına mühazirə oxumaq üçün mənəvi haqqını itirib. Ermənistana münasibətdə belə bəyanatlar qəbuledilməzdir. Paşinyan Avropaya inteqrasiya departamentini yaradan zaman strateji düşüncə nümayiş etdirib. O, sadəcə olaraq xarici siyasət idarəsinin aparatını gücləndirmir, Avropa vektorunu institutsionallaşdırır. Rusiya siyasətçiləri isə susmalı, Ermənistana məsləhət verməməlidirlər. Axı onların ölkəsi çoxdan örnək olmaqdan çıxıb. Moskva Ukrayna ilə öz sisteminin zəif tərəflərini və beynəlxalq təcridini üzə çıxaran müharibədə bataqlığa düşüb”, - o bildirib.

Sabah Bakıda və Abşeron yarımadasında havanın dəyişkən buludlu olacağı, arabir tutulacağı, əsasən yağmursuz keçəcəyi gözlənilir. Bu barədə Sozcu.az-a Milli Hidrometeorologiya Xidmətindən məlumat verilib. Gündüz bəzi yerlərdə çiskinli yağış yağacağı ehtimalı var. Gecə və səhər duman olacaq. Mülayim cənub-şərq küləyi əsəcək. Havanın temperaturu gecə 16-19, gündüz 20-25 dərəcə isti olacaq. Atmosfer təzyiqi 761 mm civə sütunundan 758 mm civə sütununa enəcək. Nisbi rütubət gecə 80-85%, gündüz 55-65% təşkil edəcək. Azərbaycanın rayonlarında havanın əsasən yağmursuz keçəcəyi gözlənilir. Lakin gündüz bəzi şərq rayonlarında çiskinli yağış yağacağı, arabir duman olacağı ehtimalı var. Şərq küləyi əsəcək. Havanın temperaturu gecə 13-18, gündüz 24-29, dağlarda gecə 5-10, gündüz 15-20 dərəcə isti olacaq.

"Qarabağ" klubu UEFA Çempionlar Liqasının əsas mərhələsinin III turunda, İspaniyada "Atletik"ə qarşı keçirəcəyi oyundan əvvəl azarkeşlərə müraciət edib. Sozcu.az xəbər verir ki, bu barədə Azərbaycan təmsilçisi məlumat yayıb. Bildirilib ki, komandanı İspaniyada dəstəkləmək istəyən azarkeşlər səfər oyunu üçün vauçerləri oktyabrın 15-dən əldə edə biləcəklər. Vauçerlərin biletə dəyişdirilməsi ilə bağlı əlavə məlumat daha sonra klubun sosial media hesablarında açıqlanacaq. Qeyd edək ki, "Atletik" - "Qarabağ" oyunu oktyabrın 22-də keçiriləcək.

Son aylarda Azərbaycan bank sektorunda qəribə bir səssizlik hökm sürür. Bir tərəfdən ard-arda “cashback” proqramlarının dayandırılması, digər tərəfdən isə əmanət faizlərinin aşağı salınması müştərilərdə haqlı suallar doğurub. Sanki banklar artıq vətəndaşları cəlb etməkdə əvvəlki kimi maraqlı deyillər. Halbuki uzun illərdir banklar rəqabətdə üstünlük qazanmaq üçün müxtəlif güzəştlər, bonuslar və yüksək faizli depozit kampaniyaları ilə müştəriləri öz tərəflərinə çəkməyə çalışırdılar. İndi isə mənzərə dəyişib, həm kart sahibləri, həm də əmanətçilər üçün şərtlər getdikcə sərtləşir. Modern.az-a açıqlamasında iqtisadçı ekspert Natiq Cəfərli bildirib ki, bank sektorunda gəlirlilik azalır və problemli kreditlərin həcmi artır: “Problemli kreditlərin sayı hər ay artır. Ona görə də banklar vətəndaşların xeyrinə ola biləcək güzəştlərdən yavaş-yavaş imtina edirlər. Bu imtina nəticəsində də banklar tərəfindən müştərilərə münasibətdə daha istər kəşbeklə, istərsə də xərcləmələrin limiti ilə bağlı güzəştlər olmur. Limitlərdən yuxarı pul çıxaranda və ya əməliyyatlar ediləndə əlavə faizlər hesablanacaq. Limit əvvəl 7000 idi, indi səhv etmirəmsə, onu 3000-ə salıblar. Bunun əsas səbəbi ümumilikdə iqtisadiyyatdakı mühüm problemlərlə əlaqədardır. Bunun da güzgüsü, necə deyərlər qan-damar sistemi bank sektorudur. Bank sektoru iqtisadiyyatda olan problemləri özündə əks etdirir. Bankların da gəlirləri düşür. Bunun qarşısını almaq üçün də bankların güzəştlərini ard-arda ləğv etməsinin şahidi oluruq”. N. Cəfərli vurğulayıb ki, iqtsiadiyyatda canlanma baş verməsə, getdikcə vəziyyət daha da pisləşəcək: “Beləliklə də, bankların həm vətəndaşlara göstərdiyi xidmətlərin, eləcə də vətəndaşların xeyrinə edilən güzəştlərin azalmasının şahidi olacağıq. İqtisadiyyat əgər 0,9 faiz artıb. Təbii ki, iqtisadiyyatda olan problemlər bank sektoruna da mütləq təsir edir”.

Nazirlər Kabineti “Əmək pensiyaları haqqında” qanuna edilən dəyişikliklərə uyğun olaraq yeni qaydaları təsdiq edib.  Sozcu.az xəbər verir ki, bunu deputat Vüqar Bayramov deyib. O bildirib ki, yeni sənədə əsasən, əmək pensiyalarının təyin edilməsi, təyin olunmasından imtina edilməsi, yenidən hesablanması, dayandırılması, bərpası və bir növdən başqa növə keçirilməsi barədə qərarlarda göstərilən məlumatlar Elektron Hökumət İnformasiya Sistemi üzərindən təqdim və ya əldə edilə bilər: "Bu qərarlarda göstərilən məlumatların Elektron Hökumət İnformasiya Sistemi üzərindən təqdim edilməsi həmin qərarların təqdim edilməsinə bərabər tutulur. Yeni qaydalar pensiyaların təyin edilməsi, təyin olunmasından imtina edilməsi, yenidən hesablanması, dayandırılması, bərpası və bir növdən başqa növə keçirilməsi ilə bağlı qərarların daha çevik qəbul edilməsinə və nəticənin daha qısa zamanda bölüşdürülməsinə imkan verəcək. Pensiyaların proaktiv təyin olunduğunu nəzərə alsaq, bu qaydalar xüsusən pensiyaların yenidən hesablanması və pensiya növünü dəyişdirilməsi proseslərinin sadələşdirilməsinə imkan verəcək. Məlumatların Elektron Hökumət İnformasiya Sistemi üzərindən təqdim edilməsi şəffaflığın daha da  gücləndirilməsinə imkan yaradacaq. Bu, məlumatlara əlçatanlıq baxımından vacibdir.  Yeni qaydalar pensiyalar sahəsində elektronlaşdırmanı genişləndirməklə yanaşı, pensiyalara əlçatanlığı da artıracaq. Bu isə təqaüd növünü dəyişmək istəyən pensiyaçılar və eləcə də pensiyaya çıxmaq istəyənlər üçün yeni imkanlar deməkdir. Pensiyaların yenidən hesablanması sisteminin daha da elektronlaşdırılması isə bir sıra hallarda pensiya məbləğlərini də artıra bilər".

Qəbələdə Türk Dövlətləri Təşkilatının (TDT) Dövlət Başçıları Şurasının 12-ci Zirvə Görüşü keçirilir. Sozcu.az xəbər verir ki, Azərbaycan Prezidenti İlham Əliyev Zirvə Görüşündə iştirak edən dövlət və hökumət başçılarını qarşılayır.

ABŞ Ukraynaya 800 kilometrədək mənzilli "Tomahawk" , "Barracuda" və digər yerüstü və hava bazalı, təxminən 800 kilometrədək mənzilli ABŞ istehsalı raketlərin tədarükünü nəzərdən keçirir. Kremli ən çox təşvişə salan "Tomahawk" uzaqmənzilli, yüksək dəqiqlikli kruiz raketləridir. Onlar əsasən yerüstü və dəniz hədəflərini məhv etmək üçün nəzərdə tutulub və aşağı uçuş trayektoriyası ilə radarlardan yayınma qabiliyyətinə malikdir. “Tomahawk” (BGM-109) 1983-cü ildən etibarən istifadədədir və ABŞ Hərbi Dəniz Qüvvələri ilə yanaşı, NATO-da olan bir sıra ölkələrin də arsenalında yer alır. Modern variantları GPS, daxili naviqasiya sistemi (INS) və relyefə əsaslanan naviqasiyanı (TERCOM) birləşdirərək hədəfləri yüksək dəqiqliklə vurur. Bu raketlərin uçuş məsafəsi1600-2500 kilometr təşkil edir. “Tomahawk” raketlərinin əsas daşıyıcıları gəmi və sualtı qayıqlardır. Sözügedən raketin uçuş sürəti saatda 880 kilometrə çatır. Əsas üstünlüklərindən biri isə özünə bir sıra nüvə başlığının quraşdırıla bilməsidir “Tomahawk” raketləri 1991-ci ilin Körfəz müharibəsi, 1999-cu ilin Yuqoslaviya əməliyyatları, 2003-cü ilin İraq müdaxiləsi, 2011-ci ilin Liviya əməliyyatları və Suriyaya qarşı 2017/2018-ci illərdə istifadə olunub. “Ukraynaya “Tomahawk” raketlərini göndərməsi ilə bağlı qərarı artıq verilib”, - deyən hərbi ekspert Üzeyir Cəfərov bildirib ki, yeganə məqsəd Rusiyanı danışıq masasına otuzdurmaqdır: “Rusiya prezidentinin qaçaraq verdiyi açıqlamalar bunu deməyə əsas verir ki, Moskva çox narahatdır. Bu raketlər Ukraynaya təhvil verilməsi Rusiya üçün faciəvi nəticələr doğuracaq. Ukrayna rahat şəkildə Moskvanı və Moskva ətrafına zərbə endirə bilər. Ruslar açıq-aşkar Ukraynanı atom elektrik stansiyalarını vurmaqla hədələyir. Yeri gəlmişkən, Ukrayna artıq özünün istehsal etdiyi “Flaminqo” raketləri ilə Rusiyanın dərinliklərinə çox rahat zərbə endirir. Kiyev Moskvaya məxsus neft emalı zavodlarını, strateji obyektləri vurur. Putinə müharibənin dayanmağı sərf etmir. Çünki ondan soruşulacaq ki, 4 il ərzində Ukrayna müharibəsində hansı nəticə əldə olunub? Bu baxımdan, Rusiyanın Ukraynanı indiki mərhələdən etibarən nəyəsə məcbur etməsi qeyri-mümkündür. “Tomahawk” raketləri isə Rusiyanın yuxusunu ərşə çəkəcək”.

2024-cü ilin aprel ayından 2025-ci ilin aprel ayına qədər Qaydaların 4.1-ci bəndinin tələblərinə uyğun olmadığı üçün kvalifikasiyasının tanınması barədə imtina qərarı verilmiş 12 nəfərin müxtəlif yollarla saxta tanınma şəhadətnaməsi əldə etmələri tərəfimizdən aşkar olunub və qanunvericiliyin tələblərinə uyğun olaraq hüquqi qiymət verilməsi məqsədilə aidiyyəti qurumlara göndərilib. Bu barədə Sozcu.az-a Təhsildə Keyfiyyət Təminatı Agentliyindən məlumat verilib. "Təəssüflə qeyd edirik ki, son 5 ay ərzində 9 belə hal aşkarlanıb. Bildiririk ki, bəzi şəxslər tərəfindən tanınma qərarlarının müxtəlif qeyri-rəsmi üsullarla dəyişdirilə biləcəyi ilə bağlı verilən vədlər həqiqətə uyğun deyil və bu cür hallara yol verilməsi qanunvericilikdə müəyyən olunmuş məsuliyyətə, o cümlədən cinayət məsuliyyətinə səbəb ola bilər. Bu baxımdan, vətəndaşlara yalnız qanunvericilikdə müəyyən olunmuş rəsmi prosedurlar çərçivəsində hərəkət etmələri tövsiyə olunur", - məlumatda bildirilib. Qeyd edək ki, xaricdə əldə olunmuş kvalifikasiyaların tanınması Azərbaycan Respublikası Prezidentinin 2023-cü il 18 avqust tarixli, 2306 nömrəli Fərmanı ilə təsdiq edilmiş “Xarici dövlətlərin ali təhsilə aid kvalifikasiyalarının tanınması Qaydaları” (bundan sonra Qaydalar) əsasında həyata keçirilir. Qeyd edək ki, xaricdə əldə olunmuş kvalifikasiyaların tanınması üçün Qaydaların 4-cü bölməsində təsbit olunan tanınmaya dair tələblərin tam təmin olunması zəruridir.

Azərbaycan Qida Təhlükəsizliyi Agentliyi (AQTA) tərəfindən müvafiq malların idxalına müvəqqəti məhdudiyyət tətbiq olunub. Sozcu.az xəbər verir ki, bu barədə AQTA məlumat yayıb. Bildirilib ki, Ümumdünya Heyvan Sağlamlığı Təşkilatının (ÜHST) rəsmi məlumatlarına əsasən, Monteneqronun Biyelo-Polye şəhərində, Rumıniyanın Qorj bölgəsində, Serbiya Respublikasının Moraviç, Rasina dairələrində, Bosniya və Herseqovinanın Serb Respublikasında blutanq xəstəliyi, Yunanıstan Respublikasının Attika, Afon Dağı inzibati ərazi vahidlərində xırdabuynuzlu heyvanların çiçək xəstəliyi, Amerika Birləşmiş Ştatlarının Montana ştatında, İspaniya Krallığının Madrid muxtar icmasında isə yüksək patogen quş qripi xəstəliyi qeydə alınıb. Respublika ərazisinin bu yoluxucu xəstəliklərdən qorunması məqsədilə qeyd olunan ərazilərdən zonalaşma prinsipi nəzərə alınmaqla, müvafiq malların idxalına ÜHST-nin "Quruda yaşayan heyvanların sağlamlıq Məcəlləsi"nə uyğun olaraq Qida Təhlükəsizliyi Agentliyi tərəfindən müvəqqəti məhdudiyyət tətbiq olunub. Eyni zamanda müvafiq tədbirlərin görülməsi üçün Dövlət Gömrük Komitəsinə müraciət olunub.

İmişli Rayon Ağsaqqallar Şurasının keçmiş sədri Saleh Səmədovun həbs müddəti uzadılıb. Sozcu.az APA-ya istinadən xəbər verir ki, bu barədə Səbail Rayon Məhkəməsində istintaq orqanı tərəfindən verilən vəsatətə baxılıb. Məhkəmənin qərarı ilə Saleh Səmədov barəsində seçilmiş həbs qətimkan tədbirinin müddəti 3 ay uzadılıb. Saleh Səmədov AR Cinayət Məcəlləsinin 179-cu maddəsi ilə ittiham olunur. Qeyd edək ki, Saleh Səmədov Dövlət Təhlükəsizliyi Xidməti tərəfindən həbs edilib. O, həmçinin mayın 13-də İmişli Rayon Ağsaqqallar Şurasının sədri vəzifəsindən azad edilib. Ağsaqqallar Şurasının İdarə Heyətinin yaydığı məlumata görə, Saleh Səmədov Şuranın adına ləkə gətirən hərəkətlərə yol verib, Azərbaycan Ağsaqqallar Şurasının Nizamnamə tələblərini kobud şəkildə pozub. O, Azərbaycan Ağsaqqallar Şurasının üzvlüyündən də çıxarılıb.

Qızılın qiyməti bütün zamanların ən yüksək həddinə çatıb. Sozcu.az xəbər verir ki, Comex əmtəə birjasında qızıl fyuçerslərinin qiyməti bir unsiya üçün 3900 dolları ötüb. Bu, müasir maliyyə bazarı tarixində qızılın ən yüksək qiymətidir. Rekord qiymət artımı ABŞ hökumətinin fəaliyyətini dayandırması və Federal Ehtiyatlar Sisteminin faiz dərəcələrinin daha da azaldılması ilə bağlı gözləntilər fonunda baş verir. Ekspertlərin fikrincə, daha təhlükəsiz aktiv hesab olunan qızıla dünya bazarında tələbatın artması mövcud qeyri-müəyyənlikdən qaynaqlana bilər. Bildirilir ki, Qazaxıstan Milli Bankı bu ay ən çox qızıl alıcısı olub, Bolqarıstan Milli Bankı və El Salvador Mərkəzi Ehtiyat Bankı da bu siyahıya qoşulub.

Azərbaycan Şimali Kipr Türk Cümhuriyyətinə dəstəyin bundan sonra da davam etdirəcək. Sozcu.az xəbər verir ki, bu barədə Azərbaycan Prezidenti İlham Əliyev oktyabrın 6-da Qəbələdə Şimali Kipr Türk Cümhuriyyətinin Prezidenti Ərsin Tatar ilə görüşündə danışıb. Söhbət zamanı Şimali Kipr Türk Cümhuriyyətinin Türk Dövlətləri Təşkilatına müşahidəçi qismində qatılmasının önəmi qeyd edilib.

Moskvanın Qolovinski məhkəməsi “Dojd” telekanalının baş redaktoru Tixon Dzyadko barəsində həbs qətimkan tədbiri seçib. Sozcu.az xəbər verir ki, bu barədə RİA Novosti məlumat yayıb. “Məhkəmə Dzyadkonun barəsində qiyabi həbs qətimkan tədbirinin seçilməsi barədə vəsatəti təmin edib”, - deyə məlumatda bildirilir. Qeyd olunur ki, Dzyadko vəzifələrini yerinə yetirməkdən yayınmaqda ittiham olunur. Məlumata görə, aprel ayında Rusiya Daxili İşlər Nazirliyi jurnalisti axtarışa verib. O, 2022-ci ildə telekanalın saytının bloklanmasından sonra Rusiyanı tərk edib və həmin il xarici agent kimi tanınıb. 2023-cü ildə “Dojd”un xaricdəki filialları arzuolunmaz təşkilat siyahısına daxil edilib. Dzyadko iki dəfə onların fəaliyyətində iştirak ittihamı ilə cərimələnib. İyulun 18-də İstintaq Komitəsi Tixon Dzyadko, telekanalının aparıcısı Yekaterina Kotrikadze və jurnalist Valeriya Ratnikova barəsində Rusiya ordusu ilə bağlı yalan məlumatlar yaymaq və xarici agent vəzifələrini yerinə yetirməmək ittihamı ilə cinayət işi açıb.