Bu gün Azərbaycan Respublikasının Naxçıvan Muxtar Respublikasına İran İslam Respublikasının ərazisindən dron hücumları həyata keçirilib. 1 ədəd dron Naxçıvan Muxtar Respublikasının Hava Limanının terminal binasına, digər bir dron isə Şəkərabad kəndində məktəb binasının yaxınlığına düşüb. Hava Limanının binasına zərər dəyib, 4 nəfər xəsarət alıb. Britaniyalı politoloq Neil Uatson Naxçıvanın vurulmasını Modern.az-a şərh edib. Politoloq saytımıza açıqlamasında İranın Azərbaycanı qəsdən hədəf almağının ona qazanc gətirmədiyini bildirib: "Nəzərə almalıyıq ki, müharibənin ilk qurbanı həqiqətdir. Bunun İrandan, yoxsa ABŞ və müttəfiqlərinin Azərbaycanı öz tərəfinə çəkməyə çalışması olub-olmadığını dəqiq bilmirik, çünki Prezident Əliyev müharibəni və İran liderinin öldürülməsini pisləyib. İranın Azərbaycanı qəsdən hədəf almaqdan İsrail-Azərbaycan münasibətlərini və ya Trampın idarə etdiyi sülh danışıqlarını dəstəkləməməsi istisna olmaqla qazancı yoxdur. Müharibədə, həmişə olduğu kimi, hadisələrə üzdən yanaşmamalı və silahların insanların idarə etdiyi mexaniki əşyalar olduğunu və səhvlərin baş verə biləcəyini nəzərə almalıyıq". Qeyd edək ki, Azərbaycan Müdafiə Nazirliyi məsələyə dərhal reaksiya verib. Bildirilib ki, baş verən hadisəyə görə məsuliyyət tam şəkildə İran İslam Respublikasının üzərinə düşür. Azərbaycan Respublikası Müdafiə Nazirliyi ölkəmizin ərazi bütövlüyünün və suverenliyinin müdafiəsi, mülki şəxslərin və mülki infrastrukturun təhlükəsizliyinin təmin olunması üçün zəruri cavab tədbirlərini hazırlayır. Qeyd olunub ki, bu hücum aktları cavabsız qalmayacaq.

Albaniyanın Baş naziri Edi Rama Azərbaycanın Naxçıvan bölgəsində mülki infrastruktura qarşı həyata keçirilən hücumu qəti şəkildə pisləyib. Sozcu.az xəbər verir ki, hökümət başçısı bu barədə "X" hesabında yazıb. O bildirib ki, Azərbaycan ərazisinə edilən hücum, mülki infrastrukturu hədəfə alması və nəticədə insanların yaralanması İran tərəfindən qonşu ölkələrə qarşı növbəti ağır və qəbuledilməz aqressiya aktıdır. Edi Rama qeyd edib ki, Azərbaycan Albaniya üçün dəyərli dost və müttəfiqdir. Onun sözlərinə görə, müstəqilliyini bərpa etdikdən sonra Azərbaycan inkişafı, rifahı və açıq əməkdaşlıq siyasəti ilə beynəlxalq arenada böyük hörmət qazanıb. Albaniyanın baş naziri vurğulayıb ki, Azərbaycan xalqı, eləcə də son günlər əsassız şəkildə hədəfə alınan digər ölkələrin xalqları yalnız hörmətə, təhlükəsizliyə və təhdidlərdən uzaq həyata layiqdir. Rama həmçinin bildirib ki, Tehrandakı rejimin mülki əhalini qorxutmaq və regionda sabitliyi pozmaq cəhdləri qətiyyətlə pislənməli və bu rejimin beynəlxalq səviyyədə daha da təcrid olunmasına səbəb olmalıdır. Baş nazirin sözlərinə görə, başqa ölkələrin mülki infrastrukturu hədəfə alındıqda və suveren sərhədlər pozulduqda aqressiya ilə terrorizm arasındakı sərhəd aradan qalxır. O əlavə edib ki, sabitliyə, beynəlxalq hüquqa və sülh şəraitində birgə yaşayışa inanan dövlətlər bu cür zorakılıq ixrac edən rejimdən açıq şəkildə uzaqlaşmalı və onu terrorçu dövlət kimi qiymətləndirməlidirlər. Edi Rama Albaniyanın Azərbaycanın güclü rəhbərliyi və qürurlu xalqı ilə həmrəy olduğunu vurğulayıb. “Yol aydındır: aqressiya təcrid olunmalı, aqressorlar isə qəti şəkildə pislənməlidir. Zorakılıq yolunu seçənlər sülh tərəfdarlarının artan birliyinə cavab verməli olacaqlar”, – deyə o qeyd edib.

Bu şərəfsizlər, bizə qarşı bu terror aktını törədənlər peşman olacaqlar. Sozcu.az xəbər verir ki, bu barədə Prezident İlham Əliyev Təhlükəsizlik Şurasının iclasında bildirib. "Bizim gücümüzü sınamasınlar. Bizim gücümüzü sınamaq istəyənlərin başı “Dəmir yumruq” vasitəsilə yarıldı. Bugünkü hadisə də eyni nəticəni hasil edəcək. Ona görə bu məsələ ilə bağlı tədbirlər planı hazırlanmalıdır. Bütün göstərişlər verilmişdir. İranın Azərbaycandakı səfiri Xarici İşlər Nazirliyinə çağırıldı, etiraz notası veriləcək, digər diplomatik addımlar atılacaq. Sərhədlə bağlı müvafiq göstərişlər verildi", - Prezident deyib.

Biz Yaxın Şərq və Avropa ölkələrinə qarşı etdiyi hücumlardan sonra İranın Azərbaycanı hədəf almasını pisləyirik. Sozcu.az xəbər verir ki, bu barədə Ukraynanın xarici işlər naziri Andrey Sibiqa X hesabında yazıb. “İranın Azərbaycanı hədəf alması bir daha göstərir ki, Tehran rejimi regional deyil, qlobal bir təhdiddir”, - nazir qeyd edib. Sibiqa İran rejiminin yaratdığı təhdidləri neytrallaşdırmaq, İran xalqı üçün normal həyat şansı vermək, Yaxın Şərqdə və daha geniş ərazilərdə təhlükəsizlik və sabitliyi bərpa etmək üçün bütün beynəlxalq səylərin birləşdirilməli olduğunu vurğulayıb. Qeyd edək ki, bu gün Naxçıvana İrandan dron hücumları həyata keçirilib.

Avropa Birliyinin (AB) xarici siyasət və təhlükəsizlik məsələləri üzrə ali nümayəndəsi Kaya Kallas İranın Azərbaycana dron hücumlarını pisləyib. Sozcu.az xəbər verir ki, Kallas İranın bu hərəkətini qəbuledilməz adlandırıb. “İranın Azərbaycanın Naxçıvan Muxtar Respublikası bölgəsinə pilotsuz uçuş aparatları ilə etdiyi hücumlar tamamilə qəbuledilməzdir. Bu hücumlar İran tərəfindən gərginliyin daha da artırılmasıdır və müharibənin Yaxın Şərqdən kənara yayılması ehtimalını artırır. Mən bu məsələ ilə bağlı xarici işlər naziri Ceyhun Bayramov ilə əlaqə saxladım və Avropa İttifaqının Azərbaycan hökuməti və xalqı ilə tam həmrəy olduğunu vurğuladım”, - Kallas qeyd edib. Qeyd edək ki, bu gün Azərbaycan Respublikasının Naxçıvan Muxtar Respublikasına İran İslam Respublikasının ərazisindən dron hücumları həyata keçirilib.

Türkiyə Prezidenti Rəcəb Tayyib Ərdoğan azərbaycanlı həmkarı İlham Əliyevə zəng edib. Sozcu.az xəbər verir ki, bu barədə Azərbaycan Prezidentinin Mətbuat Xidməti məlumat yayıb. Türkiyə Prezidenti İran tərəfindən Naxçıvan Muxtar Respublikasına edilən dron hücumunu qınadığını deyib, qardaş Azərbaycan xalqına dəstəyini ifadə edib. Dövlət başçısı telefon zənginə və mövqeyinə görə Rəcəb Tayyib Ərdoğana minnətdarlığını bildirib.

Nazirlər Kabineti Azərbaycan-İran dövlət sərhədindən yük avtomobillərinin hərəkətinin dayandırılması ilə bağlı qəbul edilən qərara dair məlumat yayıb. Bu barədə Sozcu.az-a Nazirlər Kabinetindən məlumat verilib. “Məlumat verildiyi kimi, 5 mart tarixində Azərbaycan Respublikasının Naxçıvan Muxtar Respublikasına İran İslam Respublikasının ərazisindən mülki infrastruktur hədəf alınmaqla pilotsuz uçuş aparatları ilə hücumlar həyata keçirilib. Naxçıvan Muxtar Respublikasının Beynəlxalq Hava Limanı, məktəb və digər istiqamətlər İran tərəfindən atəşə məruz qalıb. Hücumlar nəticəsində bir neçə mülki şəxs xəsarət alıb, hava limanının terminal binasına ziyan dəyib. Beynəlxalq hüququn norma və prinsiplərinə zidd olan bu hücumlar nəticəsində yaranmış mövcud vəziyyət nəzərə alınaraq, Azərbaycan-İran dövlət sərhədində bütün sərhəd-keçid məntəqələrindən yük avtomobillərinin hərəkətinin (o cümlədən tranzit məqsədilə yük avtomobillərinin hərəkətinin) müvəqqəti olaraq tam dayandırılması barədə Nazirlər Kabineti tərəfindən müvafiq qərar qəbul edilib”, - məlumatda qeyd olunub.

Pakistan İslam Respublikasının Baş nazirinin müavini, xarici işlər naziri Məhəmməd İshaq Dar Azərbaycanın xarici işlər naziri Ceyhun Bayramova zəng vurub. Sozcu.az xəbər verir ki, telefon danışığı zamanı Pakistan tərəfi Azərbaycana edilən dron hücumu ilə bağlı dərin narahatlığını ifadə edib. Bölgədə geniş eskalasiyaya səbəb ola biləcək bu kimi addımların qəbuledilməz olduğu diqqətə çatdırılıb. Nazir Ceyhun Bayramov İran tərəfindən qısa müddət ərzində məsələyə aydınlıq gətirilməsini və müvafiq izahat verilməsini gözlədiyimizi vurğulayıb. Nazirlər həmçinin Azərbaycan və Pakistan arasında qarşılıqlı maraq doğuran digər məsələlər ətrafında fikir mübadiləsi aparıblar.

Martın 5-də Latviya Respublikasının Prezidenti Edqars Rinkeviçs Azərbaycan Respublikasının Prezidenti İlham Əliyevə zəng edib. Sozcu.az xəbər verir ki, telefon danışığı zamanı Latviya Prezidenti İran İslam Respublikasının pilotsuz uçuş aparatları ilə Azərbaycan ərazisinə hücumunu qətiyyətlə pislədiyini bildirib. Edqars Rinkeviçs baş vermiş hadisə ilə bağlı Azərbaycan dövləti və xalqı ilə həmrəy olduğunu vurğulayıb, hücum nəticəsində yaralananların tezliklə şəfa tapmalarını diləyib. Prezident İlham Əliyev telefon zənginə və nümayiş etdirilən mövqeyə görə Latviyanın dövlət başçısına təşəkkürünü bildirib. Söhbət zamanı dövlət başçıları Azərbaycan ilə Latviya arasında ikitərəfli münasibətlərin cari vəziyyəti, gələcək təmaslar və əməkdaşlığın perspektivləri barədə fikir mübadiləsi aparıblar.

Fransa Xarici İşlər Nazirliyi (XİN) İranın Naxçıvana hücumu ilə əlaqədar Azərbaycanla tam həmrəyliyini ifadə edib. Sozcu.az xəbər verir ki, bu barədə Fransa XİN-in bəyanatında bildirilib. "Fransa bu gün səhər Azərbaycanın Naxçıvan Beynəlxalq Hava Limanını vuran İranın dron hücumunu qətiyyətlə pisləyir. Fransa bu hücum zamanı xəsarət alan dörd nəfərin tezliklə sağalmasını arzulayır", - məlumatda bildirilib. Xatırladaq ki, martın 5-də İran pilotsuz uçuş aparatları ilə Naxçıvan ərazisindəki obyektlərə hücum edib. Dronlardan biri Naxçıvan Beynəlxalq Hava Limanının terminal binasının üzərinə, ikincisi isə Şəkərabad kəndindəki məktəb binasının yaxınlığına düşüb. Hava limanına hücum nəticəsində dörd mülki şəxs xəsarət alıb. İran İslam Respublikasının Azərbaycandakı səfiri Müctəba Dəmirçilu XİN-ə çağırılıb. Azərbaycan cavab zərbəsi endirmək hüququnu özündə saxladığını bəyan edib.

İranın növbəti liderinin seçilməsində şəxsən iştirak etməliyəm. Sozcu.az xəbər verir ki, bu sözləri ABŞ Prezidenti Donald Tramp İranın ali liderinin seçimləri ilə bağlı “Axios”a müsahibəsində deyib. Tramp İranın öldürülmüş ali lideri Əli Xameneinin oğlu Müctəba Xameneinin ən çox ehtimal olunan varis olduğunu etiraf edib, lakin belə bir nəticənin qəbuledilməz olduğunu bildirib: “Onlar vaxtlarını boşa sərf edirlər. Xameneinin oğlu yüngül çəkilidir. Mən bu təyinatda iştirak etməliyəm, Venesuelada Delsi (Rodriges) ilə olduğum kimi”. O əlavə edib ki, Xameneinin siyasətini davam etdirəcək yeni İran liderini qəbul etməyəcək, çünki bu, ABŞ-ı beş ildən sonra müharibəyə qayıtmağa məcbur edəcək: “Xameneinin oğlu mənim üçün qəbuledilməzdir. Biz İrana harmoniya və sülh gətirəcək birini istəyirik”. Qeyd edək ki, Müctəba Xameneinin yeni ali lider seçildiyi haqda məlumat yayılmışdı. Lakin İran rəsmi mediası seçkilərin davam etdiyini və hələ ali liderin seçilmədiyini açıqladı. Ötən gün ali liderin “seçilmək üzrə” olduğu bildirilsə də, hələ də qərar elan edilməyib.

Amerika lideri Donald Tramp əbədi döyüşməyə hazır olduğunu bəyan etsə də, bəzi müşavirləri ABŞ-ın uzunmüddətli müharibəyə cəlb olunmasından qorxur və onu İran üzərində qələbəni ən qısa müddətdə elan etməyə inandırmağa çalışırlar. Sozcu.az xəbər verir ki, bu barədə "CNN" mənbələrə istinadən məlumat yayıb. Qeyd edildiyi kimi, beş günlük döyüşlərdən sonra Trampın ətrafındakıların çoxu artıq münaqişədən geri çəkilməyin zəruri olduğuna inanır. "CNN" mənbələri qeyd edib ki, Amerika administrasiyası bu məsələdə kifayət qədər ictimai dəstək əldə etməkdə çətinlik çəkir. Bundan əlavə, fond bazarı xaosa qərq olub, benzinin qiyməti artır və Amerika qoşunları arasında ölənlərin sayının artması ehtimalı var. Bu baxımdan prezidentin bəzi müşavirləri və yaxın müttəfiqləri onu hərbi əməliyyatların müddətini qısaltmağa və qələbəni mümkün qədər tez elan etməyə inandırmağa çalışırlar. Trampın müşavirlərindən biri "CNN"ə bildirib: "Bu, siyasi riskdir. Ümid edək ki, həqiqətən pis bir şey baş verməz, çünki baş verərsə, problemlər yaranacaq".

ABŞ Senatı administrasiyanın qanunvericilik orqanının icazəsi olmadan İrana qarşı hərbi güc tətbiq etməsinin qadağan edilməsini tələb edən qətnaməni rədd edib. Sozcu.az xəbər verir ki, prosedur səsverməsi zamanı 47 senator sənədi dəstəkləyib, 52 senator isə əleyhinə səs verib. Respublikaçılar Partiyasının nümayəndələrinin nəzarətində olan Konqresin yuxarı palatasında təsdiqlənməsi üçün sənəd prosedur və yekun səsvermə zamanı qanunvericilərin sadə səs çoxluğu ilə dəstəklənməlidir. Hazırkı prezident Donald Trampın partiyasının üzvləri tərəfindən idarə olunan ABŞ Nümayəndələr Palatasında da oxşar sənəd üzrə səsvermənin cümə axşamı günü keçirilməsi gözlənilir. "Washington Post" əvvəllər sənədlərin ABŞ Konqresi tərəfindən təsdiqlənmə ehtimalının az olduğunu proqnozlaşdırmışdı. Hətta onlar Konqres tərəfindən təsdiqlənsə belə, prezidentin ona veto qoymaq hüququ olacaq.

Pakistan ordusu ilə toqquşmalarda həlak olan əfqan əsgərlərinin sayı azı 489-a çatıb, 696-dan çoxu isə yaralanıb. Sozcu.az xəbər verir ki, bu barədə Pakistanın informasiya naziri Attaullah Tarar öz “X” hesabında məlumat verib. Onun sözlərinə görə, əməliyyatların başlanğıcından bəri Pakistan ordusu 226 Əfqanıstan nəzarət məntəqəsini məhv edib və daha 35-ni ələ keçirib. Hərbi Hava Qüvvələri isə qonşu ölkədəki 56 hədəfə zərbə endirib. Bundan əlavə, Pakistan Silahlı Qüvvələri 198-dən çox düşmən zirehli texnikasını zərərsizləşdirib. Əfqanıstan Müdafiə Nazirliyi isə Pakistanın itkilərinin 150 nəfər olduğunu, 200-dən çoxunun yaralandığını açıqlayıb. Nazirlik Pakistanla münaqişə zamanı 28 əfqan hərbçisinin öldüyünü və daha 42 nəfərin yaralandığını bildirib.

ABŞ-ın İrana qarşı hərbi planlarında hazırda quru qoşunlarının ölkə ərazisinə daxil edilməsi nəzərdə tutulmur. Sozcu.az xəbər verir ki, bunu Ağ Evin mətbuat katibi Kerolayn Livitt brifinq zamanı deyib. Onun sözlərinə görə, bu addım mövcud planlara daxil deyil, lakin prezident adından heç bir variant tam istisna olunmur. Livitt bildirib ki, Vaşinqton Tehranla danışıqlar çərçivəsində mülki nüvə proqramına dəstək məqsədilə pulsuz nüvə yanacağı təqdim etməyi və atom energetikası sahəsində birgə layihələrə sərmayə yatırmağı təklif edib. Sanksiyaların ləğvi məsələsi də müzakirə mövzusu olub. O əlavə edib ki, Prezident Donald Tramp münaqişədən sonrakı mərhələdə ABŞ-ın İranla bağlı mövqeyini nəzərdən keçirir və bu istiqamətdə məsləhətçiləri ilə müzakirələr aparır. Hazırda əsas diqqət “Epik qəzəb” adlı hərbi əməliyyatın sürətli və effektiv şəkildə başa çatdırılmasına yönəlib. (TASS)

"Yaxın Şərqdə baş verən müharibə region ölkələri ilə yanaşı, Azərbaycan avtomobil bazarına da təsir göstərməyə başlayıb". Sozcu.az xəbər verir ki, bunu BAKU.WS-ə açqlamasında Azərbaycan Qiymətləndiricilər Cəmiyyətinin (AQC) sədri Vüqar Oruc bildirib. AQC sədri əlavə edib ki, müharibə fonunda neftin, qızılın və digər strateji məhsulların bahalaşması logistik və nəqliyyat xərclərini artırır ki, bu da avtomobil qiymətlərinə birbaşa təsir edir: "Hazırda qiymət artımı kəskin olmasa da, artıq müəyyən fərqlər hiss olunur. Xüsusilə Dubaydan gətirilən avtomobillərdə cüzi bahalaşma qeydə alınır. İlkin mərhələdə qiymətlərdə modeldən asılı olaraq 3-5 min manat civarında artım müşahidə oluna bilər ki, bu da təxminən 2-7 faiz aralığında dəyişir. Müharibə qısamüddətli olarsa, bazarda ciddi dalğalanma gözlənilmir. Lakin qarşıdurma uzunmüddətli xarakter alarsa və enerji qiymətləri yüksəlməkdə davam edərsə, bu, avtomobil idxalına və ümumilikdə satış qiymətlərinə daha ciddi təsir göstərə bilər. Hazırda bahalaşma əsasən logistika və tranzit xərclərinin artması ilə bağlıdır. Neft qiymətlərinin tam təsiri isə müəyyən zaman sonra bazarda daha aydın hiss oluna bilər".

İsrail ordusunun İrana qarşı yeni hücuma başladığını elan etməsindən sonra Tehranda güclü partlayışlar baş verib. Sozcu.az xəbər verir ki, İran mediasının məlumatına görə, paytaxtda bir neçə şiddətli partlayış qeydə alınıb. İsrail tərəfi isə qırıcıların Tehrana növbəti hava zərbəsi endirdiyini bildirib. ABŞ ilə birgə başladılan əməliyyatlardan sonra bu, İsrail aviasiyasının paytaxta 11-ci hücumu kimi təqdim olunur. (TRT Haber)

ABŞ-ın hərəkətləri – Venesuelaya qarşı tədbirlər və İrana qarşı hərbi əməliyyat – Çinə neft tədarükünü çətinləşdirib. Sozcu.az xəbər verirk i, bu barədə Politico portalı analitik şirkət Kpler-in məlumatlarına istinadən yazır. “Keçən il İran neftinin demək olar ki, hamısı və Venesuela neftinin yarıdan çoxu Çinə göndərilib… Hər iki ölkə birlikdə Çinin neft idxalının təxminən 17%-ni təmin edib… Çin artıq 2026-cı ildə İrandan idxalı azaltmağa başlayıb”, – materialda bildirilir. Məlumata görə, Çinin ümumi neft idxalının təxminən yarısı ticarətində fasilələrlə üzləşən ölkələrdən daxil olub. İran və Venesueladan əlavə, söhbət Çinin daha beş tərəfdaş ölkəsindən gedir ki, onların logistika marşrutları Hörmüz boğazı ilə bağlıdır. İran daha əvvəl bu boğazın bağlandığını elan etmişdi. ABŞ və İsrailin İrana qarşı hərbi əməliyyatlara başlamasından sonra İran hakimiyyəti Hörmüz boğazından gəmilərin hərəkətinə qadağa tətbiq edib. İslam İnqilabı Keşikçiləri Korpusu strateji su yolundan keçməyə cəhd edən bütün gəmilərin məhv ediləcəyi barədə xəbərdarlıq edib.

Azərbaycanda məktəbli vəfat edib. Sozcu.az xəbər verir ki, Cəbrayıl şəhəri Mehdi Mehdizadə adına tam orta məktəbin 4-cü sinif şagirdi Dəniz İsayeva beyin daxili təzyiqdən dünyasını dəyişib. Onun ailəsi Cəbrayıl şəhərindən məcburi köçkün olub və il yarım əvvəl öz doğma yurdlarına qayıdıblar. Dəniz təhsilini Cəbrayılda davam etdirirdi. O, məktəbdə əlaçı qiymətlərlə oxuyurmuş. 10 yaşlı şagird Sumqayıtın Saray qəsəbəsindəki qəbiristanlıqda dəfn edilib.

Bakının bir sıra yollarında nəqliyyatın sıxlığı müşahidə olunur. Sozcu.az xəbər verir ki, bu barədə Daxili İşlər Nazirliyinin (DİN) Nəqliyyatı İntellektual İdarəetmə Mərkəzi (NİİM) məlumat yayıb. Hazırda: 1. Bakı-Sumqayıt şosesi, "Xırdalan" dairəsi istiqamətində; 2. Yusif Səfərov küçəsi, mərkəz istiqamətində; 3. Yusif Səfərov küçəsi, Heydər Əliyev prospekti istiqamətində; 4. Tbilisi prospekti, İzmir küçəsi ilə kəsişmədən "20 Yanvar" metro stansiyası istiqamətində; 5. Tbilisi prospekti, "20 Yanvar" metro stansiyasından mərkəz istiqamətində; 6. Koroğlu Rəhimov küçəsi, Akad. Həsən Əliyev küçəsi ilə kəsişmədən Heydər Əliyev prospekti istiqamətində; 7. Ziya Bünyadov prospekti, Əbdülvahab Salamzadə küçəsi ilə kəsişmədən Əhməd Rəcəbli küçəsi istiqamətində; 8. Ziya Bünyadov prospekti, Müzəffər Nərimanov küçəsi ilə kəsişmədən "20 Yanvar" metro stansiyası istiqamətində; 9. Fətəli xan Xoyski prospekti, "Gənclik" metro stansiyasının qarşısından Həsənoğlu küçəsi istiqamətində; 10. Üzeyir Hacıbəyli küçəsi, Azadlıq prospekti ilə kəsişməyə qədər; 11. Şəmsi Bədəlbəyli küçəsi, "Qış parkı"nın qarşısından Mərkəzi Bank istiqamətində; 12. 28 May küçəsi, Puşkin küçəsi ilə kəsişmədən Rəşid Behbudov küçəsi ilə kəsişməyə qədər; 13. Afiyəddin Cəlilov küçəsi, Yusif Səfərov küçəsi istiqamətində; 14. Bakıxanov küçəsi, İnşaatçılar prospekti ilə kəsişmədən "Dədə Qorqud" parkı istiqamətində; 15. Dənizkənarı küçəsi, Bayraq Meydanının qarşısından "Azneft" dairəsi istiqamətində; 16. Niyazi küçəsi, "Azneft" dairəsi istiqamətində; 17. Heydər Əliyev prospekti, əsas yol, mərkəz istiqamətində; 18. 8 Noyabr prospekti, Süleyman Əhmədov küçəsi ilə kəsişmədən Zığ şosesi istiqamətində; 19. Əbdülvahab Salamzadə küçəsi, Ziya Bünyadov prospekti istiqamətində; 20. Xətai prospekti, Heydər Əliyev prospekti istiqamətində; 21. Neftçilər prospekti, Yusif Səfərov küçəsi istiqamətində; 22. Alı Mustafayev küçəsi, Ziya Bünyadov prospekti istiqamətində sıxlıq müşahidə olunur.

2025-ci ildə 11 558 nikahda olmayan anadan doğulmuş uşaq qeydə alınıb. Bunu ədliyyə nazirinin müavini Toğrul Hüseynov Milli Məclisinin Ailə, qadın və uşaq məsələləri komitəsində keçirilən “Qanunvericilikdə gender bərabərliyi: nailiyyətlər və perspektivlər” mövzusunda ictimai dinləmədə deyib. Nazir müavini bildirib ki, bu göstərici əvvəlki illərlə müqayisədə sayın nisbətən azalmasını təsdiq edir: “Bu say 2022-ci ildə 18 814, 2023-cü ildə 15 622, 2024-cü ildə 13 228, 2025-ci ildə 11 558 olub. Bu azalma ölkədə aparılan effektiv hüquqi tənzimləmənin, dövlət orqanlarının birgə fəaliyyətinin və məktəblərdə, təhsil müəssisələrində aparılan profilaktik tədbirlərin nəticəsi kimi qiymətləndirilir”./Trend

Fərid Talətdin oğlu Bağırzadə Naxçıvan Muxtar Respublikasının (MR) əmək və əhalinin sosial müdafiəsi naziri təyin edilib. Naxçıvan MR-in yeni əmək və əhalinin sosial müdafiəsinin nazirinin dosyesini təqdim edirik: Fərid Bağırzadə 1994-cü ildə anadan olub. 2016-cı ildə Bakı Dövlət Universitetinin informasiya texnologiyaları ixtisası üzrə bakalavr pilləsini, 2021-ci ildə Sumqayıt Dövlət Universitetinin idarəetmədə informasiya sistemləri ixtisası üzrə magistr pilləsini bitirib. 2016-2018-ci illərdə özəl sektorda, 2019-2023-cü illərdə Azərbaycan Respublikasının Əmək və Əhalinin Sosial Müdafiəsi Nazirliyinin tabeliyindəki DOST Agentliyində müxtəlif vəzifələrdə çalışıb. 2023-2024-cü illərdə Naxçıvan MR-in Əmək və Əhalinin Sosial Müdafiəsi Nazirliyinin Aparat rəhbəri, hazırkı vəzifəsinə qədər isə Naxçıvan MR-in əmək və əhalinin sosial müdafiəsi nazirinin müavini vəzifəsində işləyib, həmçinin nazir vəzifəsini müvəqqəti icra edib.

Gədəbəy rayonu Kommunal Müəssisələri Kombinatının direktor əvəzi Ruslan Mustafayevə "jurnalist" kimi bəzi qurumların adından "mükafat" verən Fəqani Hüseynov polis əməkdaşları tərəfindən saxlanılıb. Sozcu.az "Teleqraf"a istinadla xəbər verir ki, rayon məhkəməsinin qərarı ilə adıçəkilən şəxs barədə 10 sutkalıq həbs qərarı verilib. Məlumat üçün bildirək ki, bir müddət öncə sosial şəbəkədə Fəqani Hüseynov adlı şəxs "Milli Məclisin informasiya portalının direktoru", həmçinin ölkə başçısının adından Gədəbəy rayonunda Kommunal Müəssisələri Kombinatının direktor əvəzi Ruslan Mustafayevə "fəxri diplom" təqdim edib. Təqdimetmə ilə bağlı görüntülər sosial şəbəkədə rezonans doğurub.

Azərbaycanda 19 mart qısaldılmış iş günü olacaq. Əmək Məcəlləsinin 108-ci maddəsinə əsasən, bayram günündən əvvəlki iş günü bir saat azaldılır. Bu səbəbdən 20-24 mart Novruz bayramı, 20-21 mart isə Ramazan bayramı ilə əlaqədar olaraq 19 mart (cümə axşamı) ölkə üzrə qısaldılmış iş günü olacaq. Qeyd edək ki, 20-30 mart tarixlərində ölkədə ardıcıl 11 gün qeyri-iş günü olacaq.//metbuat.az