Bakıda və Abşeron yarımadasında hava şəraitinin dəyişkən buludlu olacağı, əsasən yağmursuz keçəcəyi gözlənilir. Milli Hidrometeorologiya Xidmətindən Sozcu.az-a verilən məlumata görə, lakin gündüz qısamüddətə havanın tutulacağı, az yağış yağacağı ehtimalı var. Mülayim cənub-şərq küləyi əsəcək. Havanın temperaturu gecə 20-24° isti, gündüz 28-33° isti olacaq. Azərbaycanın rayonlarında hava şəraiti əksər rayonlarda əsasən yağmursuz olacaq. Lakin gündüz bəzi dağlıq və dağətəyi rayonlarda arabir yağış yağacağı, şimşək çaxacağı gözlənilir. Ayrı-ayrı yerlərdə qısamüddətli leysan xarakterli olacağı, dolu düşəcəyi ehtimalı var. Gecə və səhər bəzi yerlərdə arabir duman. Şərq küləyi bəzi dağlıq ərazilərdə arabir güclənəcək. Havanın temperaturu gecə 20-24° isti, gündüz 31-36° isti, dağlarda gecə 8-13° isti, gündüz 19-24° isti olacaq. Lakin gündüz qısamüddətə havanın tutulacağı, az yağış yağacağı ehtimalı var. Mülayim cənub-şərq küləyi əsəcək.

Abşeron rayonunun Xırdalan şəhərində beşmərtəbəli yaşayış binasının 2-ci mərtəbəsinin pilləkən qəfəsində quraşdırılan elektrik lövhəsində 9 ədəd sayğac, 12 ədəd qoruyucu açar və 3 p.m kabel yanıb. Bu barədə Sozcu.az-a Fövqəladə Hallar Nazirliyindən (FHN) bildirilib. Yanğın zamanı yanğınsöndürənlər tərəfindən 1-i uşaq olmaqla 5 nəfər bina sakini təhlükəsiz əraziyə təxliyə olunub. Mənzillər yanğından mühafizə olunub. Yanğın yanğından mühafizə bölmələri tərəfindən söndürülüb.

Milli Məclisin Ailə, qadın və uşaq məsələləri komitəsinin sədri Hicran Hüseynova hazırda qan qohumu (əmi, xala, biri, dayısı qızı ilə nişanlı olanlar - red) ilə nişanlı olan, lakin müxtəlif səbəblərdən rəsmi nikaha daxil ola bilməyən şəxslərin Ailə Məcəlləsinə təklif olunan dəyişikliklərin təsdiqlənməsindən sonra rəsmi nikaha daxil ola bilib-bilməyəcəyinə münasibət bildirib. Sozcu.az xəbər verir ki, komitə sədri Report-a açıqlamasında Ailə, Cinayət və İnzibati Xətalar məcəllələrinə dəyişiklik edilməsi haqqında qanun layihəsinin 1 il sonra qüvvəyə minəcəyini bildirib. Onun sözlərinə görə, qohum evlilikləri risklidir və əsas məqsəd ailələrin möhkəm və uzunömürlü olmasını təmin etməkdir : "Uşaqlarımız sağlam olsunlar, genetik və irsi xəstəliklərlə doğulmasınlar. Ailədə belə bir uşağın doğulması həm uşağın özü üçün, həm valideynləri üçün çox çətinliklər yaradır. Bir çox hallarda kişi qadını və uşağı atır, boşanır. Ailələr arasında münaqişə yaranır, hər kəs qarşı tərəfi günahlandırır. Bəzən bu mübahisə və münaqişələr daha ağır fəsadlara gətirib çıxarır. Bu və digər səbəblərdən biz mövcud qanunvericiliyə dəyişiklik edilməsini təklif edirik. Qanun qanundur və burada güzəşt ola bilməz". Komitə sədri qeyd edib ki, qan qohumluğu olan şəxslərin tibbi müayinədən keçməsi zəruridir : "Həmin cütlüklər tibbi müayinədən keçiblərmi? Onlar hansı irsi və genetik xəstəliklərin daşıyıcıları olduğunu bilirlərmi? Əgər daşıyıcıdırlarsa, uşaqlarının da xəstə və daşıyıcı doğulacağını anlayırlarmı? Bu xəstəliklərin müalicəsi çox xərc tələb edir. Ailələrin maddi imkanları buna çatacaqmı? Bir ata və bir ana olaraq bu öhdəliyi öz üzərlərinə götürə biləcəklərmi? Buna psixoloji olaraq hazırdırlarmı? Baxın nə qədər suallar yarandı. Ona görə də insanlar bir daha düşünməli və qərar verməlidirlər".

Taksilərlə bağlı yeni qaydaların qüvvəyə minməsinə cəmi iki həftə qalıb. İyul ayının 1-dən etibarən Azərbaycanda taksilər yeni qaydalarla fəaliyyət göstərməlidirlər. Qaydalardan ən vacibi isə taksi sürücülərinin təlimlərdən keçməsi və sürücülük fəaliyyəti üçün icazə (buraxılış kartı, buraxılış vəsiqəsi) kağızlarının alınmasıdır. Məlumat üçün bildirək ki, ötən ilin avqust ayından etibarən, taksi sürücüləri təlimlərə cəlb edilir. Lakin indiyə qədər cəmi 5 131 sürücü taksi fəaliyyəti üçün icazə alıb. Bu statistikanı Rəqəmsal İnkişaf və Nəqliyyat Nazirliyinin tabeliyindəki Azərbaycan Yerüstü Nəqliyyat Agentliyi (AYNA) açıqlayıb. Agentlikdən verilən məlumata görə, təlim keçən sürücülərin sayı isə 21 879-a çatıb. Yeni qaydalarla taksi icazəsi alanlar ölkədəki ümumi taksi sayının cəmi səkkiz faizini təşkil edir. Maraqlıdır, bu rəqəm Bakıda taksi yükünü qaldırmağa kifayət edirmi? Belə davam edərsə, taksi fəaliyyəti ilə bağlı vəziyyət necə olacaq? Sərnişinlər hansı “sürprizlər”lə qarşılaşa bilər? Qaydalar hazırlanıb, amma çatışmazlıqlar var Texnika elmləri üzrə fəlsəfə doktoru, nəqliyyat eksperti Fərhad Eyyubov “Kaspi” qəzetinə açıqlamasında bildirdi ki, taksi xidmətindəki çatışmazlıqları azaltmaq üçün görülən tədbirlər sistemi kompleks şəkildə aparılmır və burada narazılıqların olması qaçılmazdır: “Taksi daşımaları ilə bağlı çox ciddi problemlər var idi. İstər media, istərsə də cəmiyyətdə bu məsələlər daim müzakirə olunur, çıxış yolları axtarılırdı. İndi vəziyyətdən çıxış yolu üçün müəyyən qaydalar hazırlanıb, amma çatışmazlıqlar var. İlk olaraq Bakı şəhərində nə qədər taksinin olması müəyyənləşdirilməlidir. Bəzi böyük şəhərlərdə əhalinin sayı bir milyondan artıqdırsa, bunların 7-10 faizi taksi xidmətindən istifadə edir. Əgər həmin şəhərlərdə ictimai nəqliyyat sistemi zəif işləyirsə, tələbatı ödəyə bilmirsə, bu faiz daha da artır. Bizdə hələ bu say dəqiq müəyyən olunmayıb. Hətta Bakıda nə qədər taksinin olması da dəqiq deyil. Bəzən 50-60, bəzən də 100 min taksi olduğu deyilir. Amma qeydiyyatdan keçənlərin sayı beş mindir. Bu, azdır”. “Böyük narazılıq yaranacaq” Mütəxəssis deyir ki, dövlət qurumları taksi problemini həll etmək üçün ciddi addımlar atır və məsələləri dərhal həll etməyə çalışırlar: “Qanuni şəkildə problemlər tənzimlənməlidir. Amma bu zaman həm nəqliyyat vasitələri, həm də sürücülər tələblərə cavab verməlidir. Çünki taksi daşımalarının elmi cəhətdən əsaslandırılması mütləq lazımdır. Əlbəttə, tələbat çox olduğu üçün həm xidmətlərin keyfiyyətində, həm də taksi sayı və qiymətlərlə bağlı böyük narazılıq yaranacaq”. “Əhali buna hazır olmalıdır” Mütəxəssis vurğulayır ki, hazırda görülən tədbirləri birmənalı şəkildə pisləmək olmaz. Biz bu yolu getməliyik və xidmətlərdə qayda-qanun olmalıdır. Amma təbii ki, buna dərhal keçid mümkünsüzdür: “Bu sistemə tədricən keçmək lazımdır. İndi beş min taksi qeydiyyatdan keçib, iki həftəyə maksimum 15-20 min icazə kağızı olsa belə, yenə də narazılıq yaranacaq. Çünki say tələbatı ödəməyəcək. Əsaslı dəyişikliklər edərkən, çatışmayan cəhətlərin olması mümkündür. Ancaq bunlar əhalini narazı salmadan yerinə yetirilməlidir. Məncə, taksi problemi qısa müddətə öz həllini tapmayacaq. Həll olunması üçün çalışmaq lazımdır. Həm əhali buna hazır olmalıdır, həm də taksidən istifadə edən sərnişinlərin və sürücülərin xidmət mədəniyyəti artırılmalıdır”. Tələblərə uyğun sürücülər azdır İcazə kağızı alan taksi sürücülərinin sayının az olma səbəblərinə gəldikdə isə, həmsöhbətimiz vurğulayır ki, tələblərə uyğun sürücülər azdır: “Taksi sürücüləri tələbləri ödəməyəndə ona qeydiyyat sənədi verilmir. Taksi sürücüləri yol hərəkət qaydalarını bilən, sağlam, insanlarla normal rəftar quran, şəhəri tanıyan olmalıdır. Belə sürücülər təəssüf ki, azdır. Kadrlar az olduğu üçün, bu çətinliklərlə qarşılaşırıq” Yeni maşın əvəzinə köhnə “Prius” gəlir... Nəqliyyat eksperti Adil Nəbiyev isə deyir ki, yeni sistem ciddi şəkildə bahalaşmaya səbəb olacaq: “Azərbaycanda 100 min taksi var, onun 70 minə yaxını Bakıdadır. 20 min taksi təlimlərdən keçib, cəmi beş min taksi icazə ala bilib. Bu gün Bakıda taksilərin az olmasının səbəbi budur. Bununla bağlı onlarla şikayət var. Taksi sifariş verirsən gəlmir, yaxud gələn taksinin də qiymət 3-4 qat baha olur. Neqativ hallar bununla kifayətlənmir. Məsələn, sən yeni maşın gözləyirsən, çünki taksi şirkətində təzə maşın kimi qeydiyyatdan keçib, amma ardınca yenə köhnə “Prius” gəlir. Başqa nömrə, fərqli maşın. Bu, çox təhlükəli məqamdır və sürücülər bundan istifadə edirlər. Bizdə bu sahədə çoxlu boşluqlar var və nəzarət sıfıra bərabərdir. Xaricdə bu hallara görə ciddi cərimələr nəzərdə tutulur, bizdə isə bunu rahatlıqla edə bilirlər”. Qaydalar ciddiləşsə də... Mütəxəssis deyir ki, beş min rəsmi rəqəmdir, qanunsuz şəkildə kifayət qədər taksi fəaliyyət göstərir: “Bu gedişlə ilin sonuna kimi taksilərin yarısı belə, icazə kağızı almayacaq. Bu da qiymət artımına gətirib çıxaracaq. Bu normaldır, say azaldıqca qiymət artmalıdır. Keyfiyyətdə isə hələ üstünlük müşahidə olunmur. Fikrimcə, problem həll olunmayacaq, vaxtı uzatmaq məcburiyyətində qalacaqlar. Çünki çox adam işsiz qalır və istənilən yollara əl atırlar ki, iyulun 1-dən sonra fəaliyyət göstərə bilsinlər. Qaydalar ciddiləşsə də, sayın azalması bahalaşmaya gətirib çıxaracaq”. Qeyd edək ki, Nazirlər Kabinetinin taksi minik avtomobilinə dair müəyyənləşdirdiyi çoxsaylı tələblər arasında taksi avtomobillərinin yalnız ağ və qırmızı rəngdə olması, minimum “Avro-5” standartına cavab verməsi, istehsal tarixinin 15 ildən artıq olmaması, taksilərdə daşıyıcı və sürücü haqqında məlumat lövhəsi, taksometr, gediş haqqının nağdsız ödənilməsi üçün POS-terminalın olması var. ("Kaspi" qəzeti)

Ukrayna müharibənin 850-ci günü üçün Rusiya ordusunun itkiləri haqda məlumatı yeniləyib. Sozcu.az xəbər verir ki, bu barədə Ukrayna Baş Qərargahı məlumat yayıb. Məlumata əsasən, Rusiya indiyə qədər 533 090 hərbçi, 8009 ədəd tank, 15 383 ədəd zirehli döyüş maşını, 14 188 ədəd artilleriya sistemi, 1 106 ədəd RYAS (reaktiv yaylım atəş sistemi), 861 hava hücumundan müdafiə sistemi, 359 ədəd hərbi təyyarə, 326 ədəd helikopter, 19 204 ədəd avtomobil texnikası, 11 305 ədəd PUA, 2 302 qanadlı raket, 28 gəmi/kater, 1 sualtı qayıq, 2 369 xüsusi avadanlıq itirib.

İyunun 21-i saat 12:25-dən 15:35-dək Kəlbəcər rayonunun Mollabayramlı yaşayış məntəqəsi istiqamətində yerləşən Azərbaycan Ordusunun mövqeləri Ermənistan silahlı qüvvələrinin üzbəüz istiqamətdəki mövqelərindən atəşə tutulub. Sozcu.az xəbər verir ki, bu barədə Müdafiə Nazirliyi məlumat yayıb. Qeyd olunub ki, Azərbaycan Ordusunun qeyd olunan istiqamətdə yerləşən bölmələri tərəfindən adekvat cavab tədbirləri görülüb.

09:09 İyunun 22-si saat 07:00-a olan məlumatına əsasən ölkə ərazisində qeyri-sabit, yağıntılı hava şəraiti müşahidə olunur. Bu barədə Sozcu.az-a Milli Hidrometeorologiya Xidmətindən məlumat verilib. Bildirilib ki, hazırda Bakıda və Abşeron yarımadasında, Naxçıvan, Daşkəsən, Gədəbəy, Naftalan, Gəncə, Balakən, Oğuz, Qəbələ, Şəki, İsmayıllı, Şamaxı, Qobustan, Altıağac, Quba, Qusar, Xaltan, Qrız, Şahdağ, Şabran, Tərtər, Bərdə, Yevlax, Göyçay, Zərdab, İmişli, Kürdəmir, Sabirabad, Cəfərxan, Biləsuvar, Yardımlıda şimşək çaxır, arabir leysan xarakterli yağış yağır. Qeyd olunub ki, ölkə ərazisində müşahidə olunan yağıntılı hava şəraiti Bakıda və Abşeron yarımadasında iyunun 22-si gündüzədək, bölgələrdə isə 23-ü gündüzədək fasilələrlə davam edəcək. *** Saat 10:00-a olan məlumata əsasən, ölkə ərazisində qeyri-sabit hava şəraiti davam edir. Milli Hidrometeorologiya Xidmətindən verilən məlumata görə, bəzi yerlərdə şimşək çaxır, arabir leysan xarakterli yağış yağır. Xidmətin Proqnozlar Bürosunun direktoru Gülşad Məmmədova bildirib ki, bu gün səhər saatlarında Bakıda və Abşeron yarımadasında şimşək çaxıb, arabir leysan xarakterli yağış yağıb: "Düşən yağıntının miqdarı aylıq normanın 20%-ni təşkil edib. Bu gün Bakıda və Abşeron yarımadasında hava şəraitinin dəyişkən buludlu olacağı, arabir tutulacağı, gündüz yarımadanın bəzi yerlərində qısamüddətli az yağış yağacağı ehtimal olunur. Hazırda zəif şimal-şərq küləyi əsir”. Onun sözlərinə görə, bu gün Bakıda və Abşeron yarımadasında havanın temperaturu 27-32 dərəcə isti, çimərliklərdə dəniz suyunun temperaturu 24-27 dərəcə isti təşkil edəcək.

3 nəfəri qəsdən öldürməkdə, 5 nəfəri öldürməyə cəhd etməkdə təqsirləndirilən şəxs barəsində cinayət işi məhkəməyə göndərilib. Sozcu.az apa-ya istinadla xəbər verir ki, bu barədə Sumqayıt şəhər prokurorluğunun məlumatında bildirilir. “Ötən il oktyabrın 28-də Sumqayıt şəhəri ərazisində 6 nəfərə odlu silahdan xəsarət yetirilməsi faktı üzrə şəhər prokurorluğunda başlanmış cinayət işinin istintaqı tamamlanıb. İstintaqla 1987-ci il təvəllüdlü Müşfiq Tağıyevin qonşusu Anar Fərəcovdan qisas almaq məqsədilə sonuncunun ailəsinin yaşadığı həyətə gələrək evin divarlarına benzin töküb yandırması və özünün hazırladığı partlayıcı qurğunu partlatdıqdan sonra odlu silahdan atəş açaraq evdən çıxan Dağbəyi Fərəcov, Susana Karakaş və Serkan Karakaşı qəsdən öldürməsi, sonuncuların evdə aşkar surətdə köməksiz vəziyyətdə olan 2 azyaşlı övladını, eləcə də Tərlan Fərəcovanı və köməyə gələn qonşuları Etibar Sarıyev və Mehman Sarıyevi qəsdən öldürməyə cəhd etməsinə əsaslı şübhələr müəyyən edilib. Müşfiq Tağıyevə Cinayət Məcəlləsinin 120.2.4, 120.2.7 (xüsusi amansızlıqla və ümumi təhlükəli üsulla iki və ya daha çox şəxsi öldürmə), 29,120.2.3, 29,120.2.4, 29, 120.2.7 (xüsusi amansızlıqla və ümumi təhlükəli üsulla ictimai borcunu yerinə yetirən iki şəxsi öldürməyə cəhd), 29,186.2.1, 29,186.2.2 (külli miqdarda ziyan vurmaqla yandırmaqla və partlatmaqla əmlakı qəsdən məhv etməyə cəhd), 228.1, 228.4 (qanunsuz olaraq odlu və soyuq silah əldə etmə və gəzdirmə) və 229.1, 229.4-cü (qanunsuz olaraq partlayıcı qurğuları, qaz silahını, soyuq silahı hazırlama) maddələri ilə ittiham elan edilərək barəsində istintaq orqanının vəsatəti və ibtidai araşdırmaya prosessual rəhbərliyi həyata keçirən prokurorunun təqdimatı əsasında məhkəmənin qərarı ilə həbs qətimkan tədbiri seçilib”, - məlumatda deyilir. Cnayət işi baxılması üçün Sumqayıt Ağır Cinayətlər Məhkəməsinə göndərilib. Qeyd edək ki, cinayət işi hakim Hafiz Əliyevin icraatına verilib. Məhkəmənin hazırlıq iclası iyulun 10-na təyin olunub.

Türkiyə Silahlı Qüvvələri İraqın şimalındakı “Pənçə-Kilit” əməliyyat bölgəsində şəhid verib. Sozcu.az xəbər verir ki, bu barədə Türkiyənin Milli Müdafiə Nazirliyindən bildirilib. Qeyd olunub ki, terrorçularla atışmada çavuş Mehmet Ali Horoz şəhid olub. Əməliyyat zamanı üç terrorçu məhv edilib. Nazirlikdən verilən məlumata görə, bölgədə əməliyyatlar davam edir.

Rusiya ordusu şəhəri ələ keçirmək və Ukrayna hərbçilərinin əsas təchizat xətlərindən sıxışdırıb çıxarmaq üçün aprelin əvvəlində Çasov Yar şəhərinə hücuma başlamışdı. Ruslar ümid edirdilər ki, şəhəri tutmaq çox vaxt və səy tələb etməyəcək, lakin Ukrayna hərbçiləri hər gün düşmən ordusunu Çasov Yardan mümkün qədər uzaqlaşdırır. Sozcu.az xəbər verir ki, bu barədə “Forbes” yazıb. “Bir vaxtlar 12 min nəfərin yaşadığı və az qala ölü şəhəri ələ keçirmək sayca üstün və daha yaxşı təchiz edilmiş rus ordusu üçün çox çətin olmamalı idi. Lakin hücumdan 10 həftə sonra Rusiyanın həmlələri dayandı. Ukrayna ordusunun son günlər şəhərin cənubundakı əks-hücumları Çasov Yarı mühasirəyə almağa çalışan rusları cənub dayaqlarından biri olan Kleşeyevkadan çıxarıb”, - məlumatda qeyd olunub. Nərş bildirib ki, şəhəri bir neçə Ukrayna briqadası, xüsusən 41-ci və 67-ci mexanikləşdirilmiş, 56-cı motoatıcı, 5-ci hava hücumu, həmçinin 241-ci ərazi müdafiə briqadaları müdafiə edir: “Bu qoşunların uğurlu işi Çasov Yarla bağlı rusların ümidlərini doğrultmadı. Şəhər nəhayət rus qoşunlarının əlindən çıxacaq”. Məqalədə bildirilib ki, aprel ayında rusların şəhərə hücumu zamanı Ukrayna ordusunun ciddi sursat çatışmazlığı və hava hücumundan müdafiə problemi var idi: “İki ay əvvəl Çasov Yardakı Ukrayna qarnizonu raketlərə qarşı o qədər zəif idi ki, Rusiyanın Su-25 təyyarələri bombalamaq üçün şəhərin cəmi bir neçə kilometrliyində uça bilirdi. Ukrayna ordusundakı bu cür problemlərə görə ruslar ilk hücumda uğur qazandılar. Döyüşlərin ilk bir neçə həftəsində Rusiyanın 1-ci Ordu Korpusu və ona bitişik birləşmələr Çasov Yardan bir neçə kilometr şimala və cənuba irəliləyərək, Kleşeyevka və İvanovskoyeni işğal etdilər. Lakin tezliklə vəziyyət xeyli dəyişdi, çünki ABŞ sursatları Ukraynaya gəlməyə başladı. Eyni zamanda ruslar da səhvə yol verdilər. Onlar şərqdə qüvvələrini gücləndirmək əvəzinə, mayın 10-da Ukraynanın şimalına hücuma başladılar və orada da tələyə düşdülər”.

Şəki şəhər 16 saylı uşaq bağçasında yol verilən qanunsuzluqlarla bağlı daxil olmuş vətəndaş müraciəti əsasında rayon prokurorluğunda araşdırma aparılıb. Sozcu.az xəbər verir ki, bu barədə Baş Prokurorluq məlumat yayıb. Bildirilib ki, araşdırma zamanı həmin uşaq bağçasının direktoru tərəfindən 2019-2023-cü illər ərzində öz qulluq mövqeyindən istifadə edilməklə ona etibar edilmiş 105 min manat məbləğində pul vəsaitinin müxtəlif yollarla mənimsənilməsinə əsaslı şübhələr müəyyən edilib. Faktla bağlı Şəki Rayon Prokurorluğunda Cinayət Məcəlləsinin 179.3.2 (külli miqdarda mənimsəmə) və 308.1-ci (vəzifə səlahiyyətlərindən sui-istifadə) maddələri ilə cinayət işi başlanaraq istintaq aparılır.

Ağdaşda azyaşlı su kanalında batıb. Sozcu.az xəbər verir ki, bu barədə Fövqəladə Hallar Nazirliyindən (FHN) məlumat verilib. Bildirilib ki, "112" qaynar telefon xəttinə Ağdaş şəhərində bir nəfər azyaşlının su kanalında batması barədə məlumat daxil olub.  Məlumatla əlaqədar əraziyə cəlb olunan FHN-in Aran Regional Mərkəzinin xilasediciləri tərəfindən kanalda batmış 2018-ci il təvəllüdlü Musayev Adəm İsfəndiyar oğlunun cəsədi suda tapılıb çıxarılaraq aidiyyəti üzrə təhvil verilib.

Xəbər verdiyimiz kimi, Azərbaycan Qida Təhlükəsizliyi Agentliyinin (AQTA) ticarət şəbəkələrində apardığı monitorinqin nəticələrinə görə, bir sıra firmalara məxsus dondurmaların tərkibində bakteriyalar aşkarlanıb. Buna rəğmən, həmin firmalara məxsus dondurmaların hələ də satışdadır. İnsanların sağlamlığını təhlükə qarşısında qoyan bakteriyalı dondurmaların satışdan yığışdırılmaması əhali tərəfindən böyük narazılıqla qarşılanıb. AQTA tərkibində bakteriya aşkarlanan dondurmaların ticarət şəbəkələrində hələ də satıldığı ilə bağlı iddialara cavab verib. Qurumdan bildirilib ki, bəzən vətəndaşlar adları açıqlanan firmaların istehsalı olan bütün dondurmaların tərkibində bakteriya olduğunu zənn edir. Halbuki, söhbət həmin istehsalçılara aid bütün partiya dondurmalardan getmir. Odur ki, istehlakçılara dondurma alarkən adları açıqlanan firmaların dondurmalarının istehsal tarixinə baxmaq tövsiyə olunur: “Burada konkret olaraq, müvafiq istehsal tarixli məhsul partiyalarından söhbət gedir. Hazırda həmin məhsulların geri çağırılması prosesi davam edir. Yaxın günlərdə geri çağırılan, istehlaka yararsız məhsullarla bağlı statistik məlumatlar paylaşılacaq. Vətəndaşlardan ticarət şəbəkələrində bu partiyaya məxsus məhsullarla rastlaşdıqda, Agentliyin Çağrı Mərkəzinə məlumat vermələri xahiş olunur”. Qida Təhlükəsizliyi Hərəkatının rəhbəri, sağlam qidalanma mütəxəssisi Məhsəti Hüseynova isə Bakupost.az -a deyib ki, süd məhsulu zülal mənşəli olduğundan, xarab olmağa, tərkibində mikroorqanizmlərin yaranmasına daha çox meyillidir. Qaydalara uyğun şəraitdə, yəni dondurucuda, lazımi temperaturda saxlanılmayanda xarab olur: “Aparılan laborator yoxlamalar zamanı dondurmaların tərkibində aşkarlanan enterobacteriaceae insan sağlamlığı üçün çox təhlükəli bakteriyadır. Bu bakteriya bağırsaq mikroflorasının dəyişməsinə, iltihabi xəstəliklərə, tənəffüs yolları və böyrək xəstəliklərinə səbəb ola bilər. Sözügedən bakteriyanın olduğu dondurmanı qəbul edərkən insanda ishal yaranır. Bu zaman bağırsaqda faydalı bakteriyalar azalır və ya yoxa çıxır. Ona görə də, aparılan yoxlamalar zamanı tərkibində sözügedən bakteriya aşkarlanan dondurmaların satışdan geri çağrılması dərhal təmin olunmalıdır. Əks halda, bu dondurmaların qəbulu ölümlə nəticələnə bilər".

Milli Məclisin bu gün keçirilən iclasının gündəliyi dəyişib. Sozcu.az xəbər verir ki, bu barədə Milli Məclisin sədri Sahibə Qafarova məlumat verib. İclasın gündəliyinə Milli Məclisə növbədənkənar seçkilərin təyin edilməsi üçün Azərbaycan Respublikası Prezidentinə müraciət edilməsi haqqında məsələ əlavə edilib. SEO Xidməti Beləliklə, parlamentin plenar iclasının gündəliyinə daxil olan məsələlərin sayı 13-ə çatıb. Qeyd edək ki, iyunun 20-də Yeni Azərbaycan Partiyasının (YAP) İdarə Heyətinin iclasında YAP-ı Milli Məclisdə təmsil edən deputatlara altıncı çağırış Milli Məclisin buraxılması və növbədənkənar seçkilərin təyin edilməsi barədə Azərbaycan Respublikasının Prezidentinə müraciət olunması üçün təşəbbüs göstərmələrinin tövsiyə edilməsi barədə yekdil qərar qəbul edilib.

Mingəçevirdə dünən baş verən güclü külək ciddi fəsadlar yaradıb. Şəhər İcra Hakimiyyətindən Sozcu.az-a verilən məlumata görə, güclü külək nəticəsində şəhər ərazisində 25 ədəd ağac kökündən, 27 ağacın iri budaqların qırılaraq yerə düşürüb, küçələrdə nəqliyyat vasitələrinin hərəkətinə maneə yaranıb, 400 abonentin qaz xəttinin verilişində fasilə yaranıb, 1 ədəd fərdi evin dam örtüyünə ziyan vurub, qırılan ağac Nizami küçəsində nəqliyyat vasitəsinin üzərinə düşərək sürücüyə xəsarət yaradıb,  Z.Həsənova 2-də 1 ədəd çoxmənzilli yaşayış binasının dam örtüyünü uçurub, 5 nəfər şəhər sakini ağac aşması nəticəsində xəsarət alıb. Məlumata görə, ağac aşması nətiəsində 1 nəfər Ağdam rayon sakini, 2003-cü il təvəllüdlü Qasımzadə Rəvan İsmixan oğlu vəfat edib "Xəsarət alanlara təcili yardımlar rfilib. 17 000 abonentin (48%) elektrik enerjisinin təchizatında 10 saat fasilə yaranıb.  Şəhər Fövqəladə Hallar Komissiyası tərəfindən dərhal təxirəsalınmaz tədbirlər həyata keçirilməyə başlanıb, nəqliyyata və hərəkətə mane olan ağaclar hərəkət zolağından götürülüb, elektrik enerjisində fasilələr aradan qaldırılmağa başlanıb, hazırda bərpa işləri davam etdirilməkdədir", - sorğuya cavab olaraq bildirilib.

İndi hansı xəstəxanaya, dövlət qurumuna gedirsən, binanın girişində yazılır: “Qazilər və şəhid ailələri növbədənkənar qəbul olunur”.  Mənə elə gəlir ki, əgər mümkün olarsa, bu yazı “qazilər və şəhid ailələri rüşvətdən azaddır” kimi dəyişdirilsə sözügedən kateqoriyadan olan vətəndaşlar üçün daha böyük xidmət olar. Növbədənkənar qəbul o qədər də böyük anlam ifadə etmir. Növbədə dayanmaq bu insanlar üçün problem deyil. Növbədə dayanmaq onları incitməz, sındırmaz. Amma vətən üçün bədəninin bir parçasını qurban verən bu qürurlu adamlardan dirəşib rüşvət almaq onların mənliyini sındırır, qürurunu tapdaq-tapdaq edir.  Dünən bir video yayıldı. Qaradağ rayonunda yerləşən 4 saylı doğum evinin həkimi Qarabağ qazisindən açıq-aşkar rüşvət tələb edir. Qazi qardaşımız təbii ki, həkimə imkanı çatan “hörməti” etməyə çalışır. Amma həkim üzünün ən qırmızı yerinə salıb daha böyük məbləğ istəyir. Bu, həmin həkimin nə ilk, nə də son əməlidir. Sadəcə şanssız günü idi. Videosu çəkilmiş və mediada yayılmışdı.  SEO Xidməti O, tək deyil. Onun yüzlərlə, minlərlə həmkarı var ki, eyni əqidədədirlər. Onlar bu pulu təkcə özləri üçün yığmır. Təbii ki öz payları da var. Amma ondan vəzifəcə yuxarıda olanın da haqq-hesabı bu məbləğin içərisindədir. Sistem bu cür işləyir. Əgər rüşvət almağı bacarırsansa, işləyirsən, alırsan, sənə rəhbərlik edənin də payını vaxtlı-vaxtında çatdırırsan. Amma elə al ki, şikayət edən olmasın. Səs yazın, video yayılmasın. Yox əgər işlər tərs getsə, batdın. Cavabdeh özünsən... Rüşvət almaq alçaq hərəkətdir. Qazidən, şəhid ailəsindən bunu tələb etmək isə daha böyük biabırçılıqdır. Şərəfin olmamasıdır. Xəyanətdir. Vətənə xəyanətdir, dövlətə xəyanətdir...  Vətənpərvərlik sözdə olmur. Bu, əməllə üst-üstə düşməlidir. Əməlin ürək bulandırırsa, ağzınla quş tutsan da faydasızdır.  Axı rüşvət almaq həm də cinayətdir. İndi görək bu rüşvət tələb edən həkimlə bağlı hansı tədbir görüləcək?! Görülsün və ən azından, cüzi də olsa başqaları üçün dərs olsun.  Rüşvət olan cəmiyyətlər heç vaxt inkişaf etməyib. Çünki rüşvət alan da, verən də hər zaman bir-birinin qarşısında gözükölgəli olub. Gözükölgəli olmaq çox pis hissdir. Belə adamlar bir-birindən heç bir haqq-ədalət tələb edə bilməz. Bir-birinin gözünə dik baxa bilməzlər. Yox, əgər buna rəğmən bir-birinə qarşı heç nə olmamış kimi davranırlarsa, o zaman onlar dünyanın ən qırmızı adamlarıdır, heç bir ləyaqət hissləri qalmamışdır. Deməli, bu adamların pafoslu sözlərlə, təlim-tərbiyə ilə, təbliğatla, maarifləndirmə ilə düzəlməsi, ləyaqətli davranmaları mümkün deyil. Qanun işləməlidir. Söhbət yazılan qanunlardan gedir. Amma təəssüf ki, bizdə yazılmayan qanunlar daha müqəddəs hesab olunur.  Görəsən, son sutkada Azərbaycanda nə qədər uşaq rüşvətlə doğulub? Əminəm, onların böyük əksərinin eşitdiyi ilk səs rüşvət vermək üçün sayılan pulun xışıltısı olub. Əvvəllər uşaq doğulanda qulağına gözəl sözlər deyilirdi. İndi rüşvət səsi eşidirlər. Ya da rüşvət verməyə gücü çatmayan kasıb valideynlərin səs-küyünü...  Azərbaycan qəribə ölkədir; burada təkcə ananı deyil, həm də atanı "doğuzdururlar"... Elnur Məmmədli

Azərbaycanın bəzi rayonlarında gözlənilən güclü küləkli hava şəraiti ilə bağlı Fövqəladə Hallar və Ekologiya və Təbii Sərvətlər nazirlikləri əhaliyə müraciət edib. Sozcu.az xəbər verir ki, hər iki nazirlik əhalini gözlənilən güclü küləkli hava şəraiti ilə əlaqədar müvafiq təhlükəsizlik qaydalarına riayət etməyə çağırıb, riayət olunmalı mühüm təhlükəsizlik tədbirlərini xatırladıb: "İlk növbədə uşaqları küləkli havada nəzarətsiz buraxmayın, nəqliyyat vasitələrini irigövdəli ağacların altında saxlamayın, yüngül konstruksiyalı və müvəqqəti tikililərdən, bina və reklam lövhələrindən uzaq durun, elektrik dirəyi və naqillərinin, hündür ağacların altında dayanmayın. Güclü külək hətta sağlam, irigövdəli ağacların aşmasına, budaqlarının sınmasına səbəb ola bilər. Güclü küləklə müşayiət olunan hava şəraitinin fəsadlarından qorunmaq üçün ehtiyatlı olub, qabaqlayıcı təhlükəsizlik tədbirlərinə əməl etmək olduqca vacibdir və vətəndaşlarımızı bir daha maksimum dərəcədə diqqətli olmağa çağırırıq", - deyə məlumatda qeyd olunub. Qeyd edək ki, iyunun 21-22-də ölkənin bəzi rayonlarında gözlənilən güclü küləkli hava şəraiti ilə bağlı Milli Hidrometeorologiya Xidməti tərəfindən sarı, narıncı və qırmızı xəbərdarlıq edilib.

Xəbər verdiyimiz kimi, Dövlət İmtahan Mərkəzi I ixtisas qrupu üzrə RK və Rİ altqruplarının hər ikisini seçən abituriyentlər üçün informatika fənni, III ixtisas qrupu üzrə DT və TC altqruplarının hər ikisini seçən abituriyentlər üçün coğrafiya fənni üzrə 9 iyun 2024-cü il tarixində keçirilmiş əlavə imtahanın nəticələrini açıqlayıb. Modern.az-ın məlumatına görə, bu imtahanda Rİ altqrupu üzrə ən yüksək nəticəni (400 bal) Süleymanov Nəsib Asif oğlu göstərib. O, Bakı şəhər 74 saylı orta məktəbin məzunudur. Nəsibin ümumi imtahan nəticəsi isə 691.7 baldır. Onun fotosunu təqdim edirik:

"Azərbaycan xalqı dünyada ən çox çörək yeyən xalqdır. Buna görə dünyada birinci yerdəyik. Həm də çörək bizim üçün müqəddəsdir. Amma bizneslə məşğul olanlar xalqın çörəyi çox yeməsindən sui-istifadə edirlər. Şikayətləri analiz etdikdə görünür ki, çörəklər ya çox qısa zamanda sıradan çıxır, ya da uzun müddət saxlayanda sıradan çıxmır. Hər iki hal istehlakçı hüququnu qoruyan təşkilatı qayğılandırır". Bunu Bakupost.az -a açıqlamasında Azad İstehlakçılar Birliyinin sədri Eyyub Hüseynov son vaxtlar çörəyin keyfiyyəti ilə bağlı şikayətlərin artması haqqında danışarkən deyib. Onun sözlərinə görə, çörəyin otaq temperaturunda orta saxlanma müddəti 72 saatdan artıq deyil: "Əgər tez bir zamanda çörəkdə yapışqanlıq əmələ gəlirsə, bu o deməkdir ki, həmin sexin unu artıq kartof xəstəliyinə tutulub. Onu təmizləmək isə asan məsələ deyil. Bu cür yapışqanlı çörəklər mədə-bağırsaq xəstəliklərinə gətirib çıxarır. Çünki orada artıq göbələklər var və insanlar bundan xəstələnə bilər. Əgər çörək uzun müddət saxlanılırsa və xarab olmursa, bu da ziyanlıdır. Çünki demək, çörək artıq kimyalaşıb. Hər iki problemi müşahidə edirik. Çörəyin quruması isə normal haldır". E.Hüseynov deyib ki, isti çörək də mədə-bağırsaq xəstəliklərinə səbəb olur: "Çox təəssüflər olsun ki, azərbaycanlılar isti çörəyə üstünlük verirlər. Bu isə mədə-bağırsaq xəstəliklərinə gətirib çıxarır. İsti çörək mədədə gec həll olunsa da, insanların ona tələbatı var". E.Hüseynov köhnə çörəklərin təzə bişirilən çörəklərə qarışdırılmasının isə illər öncə baş verdiyini bildirib: "Köhnə çörəklərin təzə çörəyə qarışdırılması məsələsi 10 il öncə baş verirdi. Hazırda bu məsələ demək olar ki, yoxdur. Bunun kökü kəsilib. Köhnə çörəyi digər təsərrüfatlara verirlər. Əgər istehlakçı şikayətlərini nəzərə alsaq, "Binə" çörəyindən tez-tez şikayətlər daxil olur".

İyunun 20- də Müsavat Partiyası Divanının növbəti iclası keçirilib. İclasda ötən həftə ərzində görülən işlər barədə məlumat dinlənilib. Mərkəzi İcra Aparatının rəhbəri Gülağa Aslanlı Azərbaycan milli-azadlıq hərəkatının lideri, mərhum prezident Əbülfəz Elçibəyin anadan olmasının ildönümü ilə əlaqədar 24 iyun saat 12-də Fəxri Xiyabanda keçiriləcək Anım Tədbiri barədə məlumat verib. Seçki məsələsi müzakirə olunub. Azərbaycanda növbədənkənar parlament seçkilərinin keçiriləcəyi haqda məlumatların intensivləşdiyi, bu səbəbdən partiya daxilində müzakirələrin davam edəcəyi bildirilib. Seçkilərin vaxtı ilə bağlı ictimaiyyətə məlumatın verilməməsi mənfi qiymətləndirilib. Partiya başqanı İsa Qəmbər ölkədə və dünyada baş verən siyasi proseslər haqda məlumat verib. Bildirilib ki, BMT Təhlükəsizlik Şurası üzvü olan bir ölkə kimi Fransanın münaqişələri körükləyən bəyanatlar verməsi və addımlar atması təəssüf doğurur. Müsavat Partiyasının Rusiya hərbi qüvvələrinin bütün Cənubi Qafqazdan çıxarılması zərurəti barədə prinsipial mövqeyi xatırladılıb, eyni zamanda hər hansı başqa dövlətin, o cümlədən Fransanın regionda hərbi qüvvə yerləşdirilməsi təşşəbüsünün zərərli olduğu, bunun Cənubi Qafqazda sülhə və əmin-amanlığa xidmət etmədiyi vurğulanıb. Sonda cari məsələlər müzakirə olunub

Füzuli-Ağdam yolunda baş verən qəzada həlak olan şəxslər zabit olublar. Sozcu.az xəbər verir ki, qəza zamanı minik maşınında olan Murad Aydın oğlu Müsadirov və Kənan Tapdıq oğlu Mustafayev aldıqları xəsarətdən ölüblər. Xatırladaq ki, hadisə Füzuli-Ağdam yolunun 30-cu kilometrliyində qeydə alınıb. Ötən gün saat 18 radələrində Füzuli-Ağdam yolunda sürücü K.Mustafayev VAZ markalı avtomobillə hərəkətdə olarkən idarəetməni itirərək yol kənarında dayanan traktora çırpılıb.

Mingəçevir şəhərində güclü külək nəticəsində bir neçə ağac aşıb. Sozcu.az-ın Report-a istinadən məlumatına görə, hadisə şəhərin müxtəlif ərazilərində qeydə alınıb. Küləyin ağacları aşırması nəticəsində 5 nəfər müxtəlif dərəcəli xəsarətlər alıb. Zərərçəkənlər xəstəxanaya çatdırılıb. Qeyd edək ki, hadisə nəticəsində nəqliyyat vasitələrinə də zərər dəyib.

Rumıniyanın Ali Müdafiə Şurası “Patriot” hava hücumundan müdafiə sisteminin Ukraynaya verilməsi barədə qərar qəbul edib. Sozcu.az xəbər verir ki, bu barədə Rumıniya Prezident Administrasiyasının saytında məlumat verilib. "Müttəfiqlərlə sıx koordinasiya aparan Şura üzvləri Ukraynada təhlükəsizlik vəziyyətinin əhəmiyyətli dərəcədə pisləşməsini, eləcə də bu vəziyyətin regional nəticələrini, o cümlədən Rumıniyanın təhlükəsizliyi üçün "Patriot" sistemini Ukraynaya təhvil vermək qərarına gəliblər”, - bəyanatda deyilir.

İşğaldan azad edilmiş Cəbrayıl rayonunun Horovlu kəndi ərazisində mina hadisəsi baş verib. Sozcu.az xəbər verir ki, bu barədə Azərbaycan Respublikası Daxili İşlər Nazirliyi (DİN), Baş Prokurorluğu və Minatəmizləmə Agentliyinin (ANAMA) Mətbuat Xidmətinin birgə məlumatında bildirilib. Qeyd edilir ki, kənd təsərrüfatı sahəsində çalışan 1991-ci il təvəllüdlü Goranboy rayon sakini Nuruyev Raqib Səxavət oğlunun idarə etdiyi “Man” yük avtomobili minalardan təmizlənməmiş ərazidə tank əleyhinə minaya düşüb. Hadisə nəticəsində sürücü müxtəlif dərəcəli xəsarət alıb. Faktla bağlı Cəbrayıl rayon Prokurorluğunda araşdırma aparılır. ANAMA, DİN və Baş Prokurorluq bir daha vətəndaşları təhlükəsizlik qaydalarına riayət etməyə, mina təhlükəsi işarələrinin göstəricilərinə diqqətlə yanaşmağa və bələd olmadıqları ərazilərə daxil olmamağa çağırır.