Ukrayna Müdafiə Qüvvələri yenidən Rusiya strateji aviasiya aerodromlarına zərbələr endirib. Sozcu.az xəbər verir ki, bu barədə Ukrayna Silahlı Qüvvələrinin Baş Qərargahı məlumat yayıb. Əməliyyat ötən gecə həyata keçirilib. Qeyd olunur ki, Ukrayna hərbçiləri Saratov vilayətindəki Engels aerodromunu vurub. Strateji bombardmançıların, aviatankerlərin və müşayiət qırıcılarının yerləşdiyi Ryazan vilayətindəki Diaqilev aerodromuna da zərbələr endirilib. Baş Qərargahın məlumatına görə, Saratov vilayətində ən azı üç yanacaq çəni vurulub, onlarla partlayış qeydə alınıb. Yaxın ərazilərdə yanğınlar olub, qatı tüstü müşahidə edilib. Ukrayna Dezinformasiya ilə Mübarizə Mərkəzinin rəhbəri Andrey Kovalenkonun sözlərinə görə, Rusiya hərbi-sənaye kompleksinin əsas müəssisələrindən biri olan “Miçurinski tərəqqi” müdafiə zavodu da vurulub. Baş Qərargah həmçinin Rusiya ərazisində və işğal olunmuş Ukrayna ərazilərində yerləşən bir sıra digər mühüm obyektlərə də hücum edildiyini açıqlayıb. Onların arasında Kursk vilayətinin Kulbaki kəndi yaxınlığında rus ordusunun 72-ci motoatıcı diviziyasının 30-cu motoatıcı alayının maddi-texniki təchizat məntəqəsi də var.

Ukrayna xüsusi xidmət orqanları “Hörümçək toru” kimi digər mürəkkəb əməliyyatlara da hazırlaşır. Sozcu.az xəbər verir ki, bu barədə "Vaşinqton Post" məlumat yayıb. "ABŞ Prezidenti Donald Trampın sülhməramlı rolundan getməsi ilə Ukrayna öz xüsusi xidmət orqanlarından həmişəkindən daha çox asılıdır və Rusiyanın dərinliklərinə ciddi zərbələr endirmək qabiliyyətini nümayiş etdirib. Uğurlu “Hörümçək toru” əməliyyatı Ukraynanın danışıqlar masasını yeniləmək üçün cəsarətli cəhdi idi", - məlumatda deyilib. Eyni zamanda qeyd olunub ki, Rusiyanın strateji bombardmançı təyyarələrinə endirilən zərbə Trampın qəzəbinə səbəb olub: "O, Ukraynaya dəstəyi dayandıra bilər. Tramp hesab edir ki, hücum onun son qoymağa çalışdığı müharibəni davam etdirə bilər". Qeyd edək ki, iyunun 1-də Ukrayna Təhlükəsizlik Xidməti Rusiya strateji bombardmançı aviasiyasına qarşı “Hörümçək toru” adlı irimiqyaslı əməliyyat keçirmişdi. Əlavə edək ki, iyunun 6-na keçən gecə də Ukrayna Müdafiə Qüvvələri Rusiyanın kütləvi zərbələrə başlamasından əvvəl Rusiya aviasiyasının yerləşdiyi aerodromlara qabaqlayıcı zərbələr endirib.

“Vaşinqton Post” nəşrinin iddiasına görə, Ukrayna xüsusi xidmət orqanları Rusiya ərazisində yeni əməliyyat hazırlayıblar. Başqa sözlə Ukrayna kəşfiyyatı ötən dəfəki “Hörümçək toru” əməliyyatını başqa formada Rusiya ərazisində təkrarlamaq əzmindədir. “Hörümçək toru” 3 hissədən ibarət idi. Əvvəlcə, Rusiyanın dəmiryollarında partlayışlar baş verdi, daha sonra Rusiya ərazisinə keçirilən dronlar vasitəsilə hava limanlarındakı bombardmançı təyyarələrin bir qisminə zərbələr endirildi, sonda Krım körpüsünün dayaqlarından biri partladıldı. Sozcu.az xəbər verir ki, bu fikirləri politoloq Elxan Şahinoğlu qeyd edib. Onun sözlərinə görə, nəşrin iddiası gerçək olmasa belə, bu kimi xəbərlərin yayımlanması Rusiya hakimiyyətinə qarşı psixoloji savaşın tərkib hissəsidir: “Kremldə qara-qara düşünürlər ki, Ukrayna kəşfiyyatı bu dəfə haranı partladacaq? Kreml sahibi nazirlərə təhlükəsizlik tədbirlərini artırmağı əmr edib. Rusiyada bu kimi əmrlərin necə yerinə yetiriləcəyi bəllidir, şübhəlilər bəhanəsiyilə Rusiyada çalışan miqrant işçilər sıxışdırılacaq, xüsusi təyinatlılar onların çalışdıqları yerlərə və qaldıqları evlərə soxulacaqlar, yollarda nəqliyyat vasitələri kütləvi yoxlanılacaq, bu da kollaps yaradacaq. Rusiya Ukraynaya qarşı işğalçı müharibəni davam etdirdikcə, Kreml sahibinə və sıravi vətəndaşlara rahatlıq olmayacaq”.

ABŞ Prezidenti Donald Tramp özünün “Tesla” avtomobilindən imtina edilməsindədir. Sozcu.az xəbər verir ki, bu barədə “Vaşinqton Post” məlumat yayıb. “Prezidentin elektromobildən xilas edilməsi ilə bağlı söz-söhbətlər Tramp və Mask arasında ayrılıqlar fonunda ortaya çıxan fikir”, - məlumatda qeyd olunub. Qeyd edək ki, ABŞ Prezidenti Donald Tramp bu ilin əvvəlində Maskın kampaniyasına dəstək olmaq üçün “Tesla” avtomobili almışdı.

Ermənistanın Baş naziri Nikol Paşinyan Azərbaycan xalqını təbrik edib. Sozcu.az xəbər verir ki, o, bu barədə X hesabında paylaşım edib. "Azərbaycan Respublikasını və xalqını Qurban Bayramı münasibətilə təbrik edirəm. Ölkələrimizə və xalqlarımıza sülh və firavanlıq arzulayıram", - Paşinyan bildirib.

Amerikalı milyarder İlon Maskın keçmiş sevgilisi Eşli Sent-Kleer prezident  Donald Trampla əlaqə saxlayaraq ona öz köməyini təklif edib. Sozcu.az xəbər verir ki, Eşli Sent-Kleer bunu Mask və Tramp arasında gərginliyin artması fonunda edib. Eşli Sent-Kleer X sosial şəbəkəsində Trampa ünvanlanan çağırışında qeyd edib ki, məsləhətə ehtiyacı varsa, ona yazsın. İlon Mask prezidentin təklif etdiyi büdcəni kəskin tənqid etdikdən və həmçinin onun köməyi olmadan Trampın 2024-cü il prezident seçilə bilməyəcəyini dedikdən sonra onların münasibəti gərginləşib. "Mən olmasam, Tramp uduzardı. Demokratlar Nümayəndələr Palatasına, respublikaçılar isə Senatda cəmi 51 yerə sahib olardılar. Belə bir nankorluq", - Mask sonradan silinən paylaşımında yazıb. Mask Donald Trampın adının məhkum edilmiş cinsi cinayətkar Epstein ilə əlaqəli sənədlərdə keçdiyini də qeyd edib: "Əsl bombanı atmağın vaxtı gəldi: Donald Trampın adı Epsteinin fayllarındadır".  Eşli Sent-Kleer keçən il Maskla izdivacdan oğlan uşağı dünyaya gətirib. Aprel ayında o, “The Wall Street Journal”a deyib ki, milyarder ona uşağın atasının kim olduğunu deməməsi üçün 15 milyon dollar, həmçinin uşağın 21 yaşına qədər aylıq 100 min dollar ödəmə təklif edib.

Pirqulu stansiyasından 15 km şimal-şərqdə Şamaxı və Xızı rayonlarında 3.6 maqnitudalı zəlzələ qeydə alınıb. Bu barədə Sozcu.az-a Azərbaycan Milli Elmlər Akademiyası nəzdində Respublİka Seysmoloji Xİdmət Mərkəzindən məlumat verilib. Zəlzələ episentrdə 4 bal, Şamaxı və Xızı rayonlarının episentrə yaxın yaşayış məntəqələrində 4-3 bala qədər hiss olunub. Qeyd edək ki, yerli vaxtla 10:18-də qeydə alınmış yeraltı təkanların ocağı 5 km dərinlikdə yerləşib. Xatırladaq ki, bu gün Şamaxı rayonunda yerli vaxtla 06:40-da, ötən gün isə bir neçə dəfə yeraltı təkanlar olub.

ABŞ Prezidenti Donald Trampla mübahisədən sonra amerikalı iş adamı İlon Mask “sona qədər getməyə” və lazım gələrsə, “demokratları dəstəkləməyə” hazırdır. Sozcu.az xəbər verir ki, bu barədə NBC telekanalı maskın adı açıqlanmayan məsləhətçisinə istinadən məlumat yayıb. Məqalədə qeyd edilir ki, Mask bir neçə ay əvvəl siyasi fəaliyyətlərə 100 milyon dollar xərcləyəcəyini və bu vəsaiti Trampla əlaqəli təşkilatlara köçürməyi planlaşdırdığını açıqlamışdı. Ancaq pul köçürülməyib. “Onun Respublikaçılar Partiyası, RMK (Respublika Milli Komitəsi), Nümayəndələr Palatasındakı yerlər və s. heç vecinə deyil. Onları darmadağın edəcək”, - biznesmenin müşaviri vurğulayıb. O, Respublikaçılar Partiyasının ABŞ Konqresinin aşağı palatasına keçiriləcək növbəti seçkilərdə uduzacağına əmin olduğunu bildirib. “Ancaq Maskın bütün bu partiya cəfəngiyyatları heç vecinə də deyil”, - mənbə əlavə edib. Jurnalistlərin qeyd etdiyi kimi, respublikaçılar indi bir neçə şeydən ehtiyatlı olmalıdırlar. Bunlardan biri də sahibkarın demokratlara mümkün maliyyə dəstəyidir.

Gəncədə ikiyaşlı körpə xəstəxanada ölüb. Sozcu.az xəbər verir ki, hadisə 2 saylı şəhər Uşaq Xəstəxanasında baş verib. Şəmkir rayon sakini, 2023-cü il təvəllüdlü M.Məmmədov ağır vəziyyətdə uşaq xəstəxanasına çatdırılıb. Lakin həkimlərin göstərdikləri tibbi yardımlara baxmayaraq, azyaşlı xəstəxanada vəfat edib. TƏBİB-dən bildirilib ki, iyunun 5-i, saat 12:10-da 2023-cü il təvəllüdlü körpə (kişi cinsli) aqonal vəziyyətdə Gəncə Şəhər Birləşmiş Xəstəxanasının nəzdində olan Uşaq xəstəxanasının Təcili tibbi yardım şöbəsinə hospitalizasiya olunub: "Göstərilən reanimasiya tədbirlərinə baxmayaraq, anadangəlmə metobolik xəstəlik, pnevmoniya, ağciyər çatışmazlığı səbəbindən azyaşlının saat 21:50-də ölüm faktı qeydə alınıb". Faktla bağlı araşdırma aparılır.

Son günlər ard-arda davam edən zəlzələrlə bağlı təşvişə ehtiyac yoxdur. Sozcu.az xəbər verir ki, bunu Report-a açıqlamasında AMEA nəzdində espublİka Seysmoloji Xİdmət Mərkəzinin baş direktoru Qurban Yetirmişli deyib. Onun sözlərinə görə, 3 və 3-dən yuxarı maqnitudada təkanların olması ilə bağlı məlumatlar verilir, lakin xırda təkanlar da olur: "Bu cür xırda təkanların olması enerji boşalmasıdır. Lakin təhlükəli, yəni maqnitudası 7 olan zəlzələ ehtimalı yoxdur. Hiss edilən zəlzələlər ola bilər". Baş direktor əlavə edib ki, heç bir təşvişə ehtiyac yoxdur. Xatırladaq ki, dünən yerli vaxtla 16:02-də Şamaxı və Xızıda 3,7maqnitudalı, dərinliyi 7 km olan zəlzələ baş vermişdi. Yeraltı təkan episentrdə 4 bal, Şamaxı və Xızı rayonlarının yaxın yaşayış məntəqələrində 4-3 bala qədər hiss olunub. Bu gün səhər saatlarında Şamaxıda 3,2, Şamaxı və Xızı rayonlarında 3,6 maqnitudalı zəlzələ qeydə alınıb.

İllər saçımıza ağ işıq çəkdi, Hər tel bir xatirə, hər tel bir nəfəs. Ömür ötüb keçdi – dedi: “Əbəsdi”, Hər baxış bir yaddaş, ötəri həvəs. İllər... Nə qəribə nağıl yazıbdır – Bir az gül, bir az qəm, bir az da sükut. Uşaqlıq keçmişdə sanki azıbdır, Gələcək göz yaşı, təsəlli, ümüd. İllər bir məktubdur Tanrıdan gələn, Birində bir ümid, birində həsrət. İllər saat deyil – günləri hörən, Ömür, qəlbdən keçən gizli bir surət. İllərdən keçdikcə böyümürük biz – Hər yaş bir güzgüdür, sanki toz tutub. Sadəcə ələnib azaldıqca biz, Gələn nəsillər də bizi unudub. Soraqlar aldıqca itmiş zamanla, Bir şəkil, bir mesaj, bir qorxu yetər. Birdən anlayırıq – sanki dumanla Ötüb getməkdədir artıq bu qatar. Zaman da dəyişdi, ömür də susdu, Səsimiz qalıb daş yaddaşlarında. Bir vaxt adı ilə çağrılan dostlar, Adların yazdırıb başdaşlarında. Zakir İsmayil

ABŞ Prezidenti Donald Tramp iş adamı İlon Maskdan narazılığını ifadə edib. Sozcu.az Globalinfo.az-a istinadən xəbər verir ki, Tramp Maskı dəstəklədiyini, lakin onun sonradan mövqeyini dəyişərək elektrikli avtomobillərlə bağlı vergi güzəştlərinin ləğvinə qarşı çıxdığını bildirib. “İlon məni çox məyus etdi. Ona çox kömək etmişəm. O, vergi ilə bağlı qanun layihəsinin daxili məzmununu burada oturanların hamısından daha yaxşı bilirdi. Başda heç bir problemi yox idi. Ancaq o, elektrikli avtomobillərə verilən güzəştləri azaltmaq istədiyimizi biləndən buna birdən etiraz etməyə başladı”, – deyə Tramp vurğulayıb. Mask isə Trampın dediklərinə X səhifəsində sərt reaksiya verib və onu yalan danışmaqda ittiham edib: “Yalandır! Həmin qanun layihəsini mənə heç vaxt göstərməyiblər. O layihə dərhal və gecə saatlarında qəbul olundu, Konqresin üzvləri belə onu oxumağa imkan tapmadı". Bundan başqa, İlon Mask bir az daha sərt çıxış edərək Trampın prezident seçilməsində önəmli rolu olduğunu qeyd edib: “Mən olmasaydım, Tramp seçkilərdə qalib gələ bilməyəcəkdi, demokratlar Konqresin Nümayəndələr Palatasına nəzarəti ələ keçirəcəkdilər”.

Bakı-Sumqayıt yolunda uzun tıxac yaranıb. Sozcu.az Globalinfo.az-a istinadən xəbər verir ki, yaranan sıxlıqla əlaqədar vətəndaşlar mənzil başına çatmaqda çətinlik çəkir. Belə ki, Bakı-Sumqayıt istiqamətində hərəkət dayandığı üçün ictimai nəqliyyat və taksi tapmaq çətinləşib. Bildirilib ki, “manatlıq taksi” kimi fəaliyyət göstərən sürücülər qiyməti 10 dəfə bahalaşdırıb. Adi günlərdə adambaşına 1 manata qət edilən yolu hazırda 10 manatdan aparmaq təklif olunur.

Putin xoşagəlməz bir hücum həyata keçirəcək. Sozcu.az xəbər verir ki. bu sözləri ABŞ lideri Donald Tramp Almaniya kansleri Fridrix Merzlə Ağ Evdə görüşü zamanı deyib. Tramp Putinlə telefon danışığını xatırladıb: “Putin “Ukraynaya hücum etməkdən başqa çarəmiz yoxdur” dedi. “Bunu etmə, etməməlisən” dedim”. Əgər Rusiyanın dayanmayacağını görsək, çox sərt sanksiyalar olacaq. Əgər Rusiya sərhədləri aşsa, mənim nə qədər sərt olacağıma təəccüblənəcəksiniz. Razılaşma olmasa, həm Rusiyaya, həm də Ukraynaya qarşı sərt olacağıq. Hindistan-Pakistan müharibəsini dayandırdım, kaş Rusiya-Ukrayna müharibəsini də eyni şəkildə dayandıra biləydim”.

Ağdamda orta məktəb müəllimi bıçaqlanıb. Hadisə ötən gün rayonun Zəngişalı kəndində baş verib.  Kənd sakini Nərimanov Əsəd Gülmalı oğlu həmyerlisi Səfərov Vasif  tərəfindən avtomobildə mübahisə zəmnində bıçaqla vurulub. Ə.Nərimanov Ağdam Mərkəzi Rayon Xəstəxanasına çatdırılıb. Müayinə zamanı məlum olub ki, Ə.Nərimanov qarın boşluğundan, omba hissəsindən, başından və əllərindən xəsarət alıb.  İlkin tibbi yardım göstərilən yaralı  paytaxta yerləşən xəstəxanalardan birinə göndərilib.  Qeyd edək ki, Əsəd Nərimanov Mahrızlı Rahib Məmmədov adına kənd tam orta məktəbində bədən tərbiyəsi üzrə müəllim işləyir. Hadisənin baş vermə səbəbi məlum deyil.  Hadisəni törətməkdə şübhəli bilinən V.Səfərov bıçaqladığı Əsəd Nərimanovun qardaşının qayını olduğu və hərbçi olduğu bildirilir. Faktla bağlı araşdırma davam etdirilir.(Qafqazinfo)

Ümumi (9 illik) orta təhsil səviyyəsi üzrə 2025-ci il aprelin 27-də keçirilən buraxılış imtahanının nəticələri elan olunub. Bu barədə Sozcu.az-a DİM-dən məlumat verilib. Bildirilib ki, imtahanda iştirak edən 9-cu sinif şagirdləri verilmiş keçidə (https://eservices.dim.gov.az/2025/netorta) daxil olaraq iş nömrəsi və şəxsiyyəti təsdiq edən sənədin nömrəsindən (və ya FİN kodundan) istifadə etməklə öz imtahan nəticələri, cavab vərəqinin qrafik təsviri ilə tanış ola bilərlər. İmtahan iştirakçıları iş nömrələrini buradan öyrənə bilərlər. Şagirdlər imtahan nəticələri haqqında məlumatı (hər fənn üzrə ümumi balı) mobil operatorlar (Azercell, Bakcell, Nar, Naxtel) vasitəsilə bu imtahan üçün nəzərdə tutulan buraxılış vərəqəsində göstərilən kodu 7727 nömrəsinə göndərməklə də öyrənə bilərlər. Yazı işlərinin (açıq tipli tapşırıqların cavabları) yoxlanılması prosesi onlayn şəkildə həyata keçirilib. Belə ki, hər marker yoxlama prosesinə öz evindən qoşularaq proqramın onun kompüterinə təsadüfi göndərdiyi işləri yoxlayıb. Qeyd edək ki, onlayn (evdən) yoxlama prosesində üztanıma texnologiyası tətbiq edilib və yoxlama prosesinin bütün tələblərinə (meyarların təkmilləşdirilməsi, işlərin şifrələnməsi, markerlərin hər tapşırıq üzrə yoxlamadan əvvəl kalibrləmədə iştirak etməsi, yoxlama ərzində "seeding" (markerlərə sayıqlığı itirməmək üçün əvvəlcədən hazırlanan və kalibrə edilən sualların mütəmadi olaraq göndərilməsi) prosesinin tətbiqi, işlərin markerlərə proqram tərəfindən təsadüfi göndərilməsi, imtahan protokollarının araşdırılması və s.) əməl olunub. Yazı işlərinin onlayn yoxlanılması üçün proqram təminatı Dövlət İmtahan Mərkəzinin mütəxəssisləri tərəfindən hazırlanıb. Bu imtahanda iştirakı nəzərdə tutulan 51908 nəfərdən 354 nəfər imtahana gəlməyib. Tələb olunan imtahan qaydalarını pozduğu üçün 3 nəfərin nəticəsi ləğv olunub. İmtahan iştirakçıları arasında 9 nəfər (siyahı) maksimal olan 300 bal toplamaqla ən yüksək nəticəni göstərib. İmtahan nəticələri ilə bağlı müraciətlərə baxılması üçün DİM-də Apellyasiya Komissiyası fəaliyyət göstərəcək. Apellyasiya Komissiyasına müraciət etmək istəyənlər 11 iyun saat 10:00-dan 13 iyun saat 17:00-dək tarixlərində DİM-in saytında yerləşdiriləcək elektron ərizəni doldurmaqla qeydiyyatdan keçə bilərlər. Göstərilən müddət ərzində qeydiyyatdan keçməyənlər sonradan Apellyasiya Komissiyasına müraciət edə bilməyəcəklər. Elektron ərizədə haqqında müraciət edilən tapşırığın nömrəsi seçilməli, onunla bağlı müraciətin məzmunu yazılmalı və meyarın hansı bəndinə uyğun hesab edildiyi göstərilməlidir. Elektron ərizədə müraciətin məzmunu qeyd olunmadığı halda ərizə qəbul edilmir və həmin müraciət araşdırılmır. Apellyasiya prosesi aşağıdakı ardıcıllıqla aparılır: Apellyasiya Komissiyası tərəfindən haqqında müraciət olunan bütün işlər araşdırılır; Şagirdlərin müraciət etdikləri tapşırıqlar üzrə ekspert rəyi (yazılı şəkildə) apellyasiya ərizələrinə əlavə edilir; Şagirdlərin apellyasiya ərizələrində qeyd etdikləri telefon nömrəsinə apellyasiya prosesinin başa çatması ilə bağlı “sms” göndərilir. Bundan sonra şagirdlər apelyasiya.dim.gov.az saytında ərizələrinə daxil olaraq apellyasiyanın nəticəsi ilə tanış ola və ekspert rəyini oradan çap edə bilərlər. Cavab vərəqində təlimata uyğun olmayan formada qeyd olunmuş cavablar, o cümlədən cavabın optik qurğu tərəfindən səhv kimi nəzərə alınması ilə nəticələnən düzəlişlərlə (məsələn qapalı sualda iki dairənin qaralanması və s.) bağlı müraciətlərə baxılmayacaq. Apellyasiya Komissiyasına müraciət etməmişdən əvvəl şagirdlər DİM-in saytında, imtahan nəticələri ilə bağlı səhifədə öz nəticələri, cavab vərəqinin qrafik təsviri, hər bir açıq tipli tapşırıq üzrə qiymətləndirmə meyarları ilə tanış ola bilərlər. Ötən imtahanların təcrübəsi göstərir ki, apellyasiya üçün ərizə yazanların təqribən 15%-i ümumiyyətlə tapşırığa cavab verməyib və ya öz cavabı ilə mümkün doğru cavabları, qiymətləndirmə şkalasını müqayisə edib tanış olmadan komissiyaya müraciət ediblər. Şagirdlərin nəzərinə çatdırırıq ki, bu tip müraciətlərə baxılmayacaq.

Tehran əyalətinin İslamşəhr şəhərində yaşayan və mayın 25-dən yoxa çıxan azərbaycanlı sosial media fəalı İlahə Hüseynnejadın meyiti tapılıb. Sozcu.az xəbər verir ki, bununla bağlı Tehran əyalətinin polis idarəsi məlumat yayıb. Məlumata görə, sinəsində iki bıçaq yarası olan 24 yaşlı gəncin meyiti Tehran ətrafında aşkar edilib. Polis İlahə Hüseynnejadın qətlə yetirildiyini və şübhəlinin saxlanıldığını bildirib. Saxlanılan şəxs gəncin telefonunu oğurlamaq üçün onu idarə etdiyi taksi ilə şəhərdən qıraq yerə apardığını etiraf edib. Polisin məlumatı yerli sosial media platformalarında narazılıqla qarşılaşıb, qətlin səbəbinin ört-basdır edildiyi bildirilib. Onlar İlahə Hüseynnejadın bundan əvvəlki etiraz aksiyalarında fəal olduğuna diqqət çəkib, onun qadın hüquqlarının pozulması ilə bağlı sosial mediadakı tənqidi yazılarına görə öldürüldüyünü deyiblər. Qeyd edək ki, İlahə Hüseynnejad ailəsi ilə birgə İslamşəhrdə yaşasa da, əslən Şərqi Azərbaycanın Sərab şəhərindəndir.

İyunun 5-də Azərbaycanda ard-arda 3 zələlə baş verib. Yeraltı təkanlar Pirquluda, Şamaxıda və Lerikdə qeydə alınıb. 3.6, 4, 3.7  maqnitulı zəlzələlər zamanı heç bir itki olmayıb. Zəlzələlərin davam edib-etməyəcəyi ciddi təlaş doğurur. Seysmik aktivliyin artmasının səbəbləri, dağıdıcı zəlzələnin baş vermə ehtimalı kimi məsələlər əhalini narahat edir. Geologiya və Geofizika İnstitutunun şöbə müdiri Qulam Babayev Modern.az-a bildirib ki, ümumilikdə dünyada seysmik aktivlik artır və Azərbaycan da təbii olaraq bundan kənarda qalmır: "Dünya miqyasında seysmik və tektonik aktivlik artır. Türkiyədə ard-arda bir neçə zəlzələ baş verib. Mən qeyd etmişdim, yenə də baş verəcək. Srağagün Türkiyədə 5,8 maqnitudalı zəlzələ baş verib. Etno vulkanı püskürür. Bütün dünyada tektonik və seysmik aktivlik artmaqda davam edir. Azərbaycan da kənarda qalmır. Qonşu ölkələrin seysmik ocaqları aktivləşirsə,  Azərbaycan tektonik baxımdan sabit qala bilməz. Təbii ki, silkələnmələr  olacaq. Cari il ərzində  Azərbaycanda hiss olunan zəlzələlərin qaçılmaz olduğunu əvvəlcədən demişdim. 3.5, 4, 4.5 maqnitudalı zəlzələr baş verəcək. Yaponiya, Türkiyə, Myanmarla müqayisə etdikdə dağıdıcı, güclü zəlzələ Azərbaycanda gözlənilməz. Çünki yerdəyişimi intensivliyi o qədər yüksək səviyyədə aktiv deyil ki, güclü, dağıdıcı zəlzələ yaransın. Hiss olunan zəlzələr isə qaçılmazdır, davam edəcək, bu dövrilikdir. Çünki Azərbaycan ərazisui seysmo-tektonikdir. Burada bir neçə qırılma nöqtələri var, aktiv zonalardır". Hiss olunan zəlzələlər hansısa fəsadlara səbəb ola bilərmi? Bu suala cavabında Q.Babayev deyib: "Əgər binalar, hansısa yaşayış obyektləri uçqun vəziyyətindədirsə, ora diqqət artmalıdır. Zəlzələ baş verdikdə panikaya qapılmaq lazım deyil.  Hətta Türkiyədə baş verən zəlzələdə ürəktutmasından vəfat edən də oldu. Azərbaycanda isə güclü, dağıdıcı zəlzələ gözlənilmir. Xəzər dənizində zəngin seysmik ocaqlar mövcuddur, onlar Bakı şəhəri, Abşeron yarımadası üçün təhlükə törədir. Amma katastrofik, güclü zəlzələ gözlənilmir".

Azərbaycanda dərslərin bitməsinə bir neçə gün qalıb. Lakin may ayının sonlarından etibarən, əksər valideynlər övladlarını məktəbə göndərməkdən imtina edirlər. Səbəb kimi iyundakı istiləri, dərs proqramının bitdiyini irəli sürürlər. Bu fonda məktəblərdə tədris ilinin başlama və bitmə müddətinin dəyişdirilməsi təklif edilir. Sozcu.az xəbər verir ki, Globalinfo.az-a danışan təhsil məslələri üzrə ekspert Kamran Əsədov dərs ilinin 14 iyuna qədər uzadılması məsələsinin yenidən nəzərdən keçirilməli olduğunu deyib: “Dərs ilinin son iki həftəsi, xüsusilə 1-14 iyun aralığı real tədris yükü ilə deyil, formallıqla xarakterizə olunur. Bu, nə şagirdin inkişafına töhfə verir, nə də təhsil prosesinin səmərəliliyini artırır. Əksinə, iqlim şəraiti, psixoloji yüklənmə və sosial dinamika fonunda bu müddət həm müəllim, həm də şagird üçün məhsuldarlığı sıfıra yaxınlaşdırır. Məktəblərin əksəriyyətində dərslər faktiki olaraq 1 sentyabrda başlayır. Belə olan halda, mayın sonuna qədər şagirdlər artıq 9 aylıq intensiv tədris prosesindən keçmiş olur. Bu müddət ərzində tədris proqramlarının böyük hissəsi tamamlanır, illik qiymətləndirmələr keçirilir, monitorinqlər və buraxılış imtahanları baş tutur. Nəticədə, iyun ayı artıq proqram xarakteri daşımayan, əsasən iştirak və formal dərs saatları ilə tamamlanan ay kimi görünür”. Ekspert bildirib ki, 1-14 iyun tarixlərində şagirdlərin davamiyyət faizi 45-50 fazi arasında dəyişir: “Bu, rəsmi olaraq “dərs günü” sayılsa da, praktiki baxımdan tədrisin təşkil olunmadığını və ya mənasızlaşdırıldığını təsdiqləyir. Hava şəraitinin isti və bəzən normadan artıq rütubətli olması xüsusilə sinif otaqları kondisionersiz olan məktəblərdə tədrisi demək olar ki, mümkünsüz edir. Azərbaycanda dərs ilinin müddəti ilə bağlı dəyişiklik edilməlidir. Mövcud 9 aylıq (sentabr–iyun) model saxlanacaqsa, bu zaman dərs ili 1 sentyabr-31 may aralığında planlaşdırılmalıdır. İyun isə istedadların inkişafı üzrə yay məktəbləri; könüllü yay məşğələləri; əyləncəli STEAM, idman və psixoloji dəstək proqramları; müəllimlər üçün metodik və diaqnostik hazırlıq ayı kimi nəzərdə tutulmalıdır. Əks halda, hər il iyun ayında eyni ssenari təkrarlanacaq. Yəni kitablar yığılacaq, uşaqlar məktəbdə yox, lakin “jurnalda” görünəcək. Təhsil sadəcə statistika ilə idarə olunan bir prosesə çevriləcək”.

Rusiyanın Voronej vilayətində dəmiryolu xəttində partlayış baş verib. Sozcu.az xəbər verir ki, bu barədə "Baza" telegram kanalı məlumat yayıb. Bildirilib ki, insident Yevdakovo və Saquni stansiyaları arasındakı hissədə qeydə alınıb. Partlayış nəticəsində dəmiryolu infrastrukturu zədələnib. İlkin məlumatlara görə, hadisə zamanı xəsarət alan olmayıb. Qeyd edək ki, iyunun 1-nə keçən gecə saatlarında Bryansk vilayətinin Vıqoniçi kəndi ərazisində partlayış nəticəsində körpü uçub, həmin an onun altından sərnişin qatarı keçib. Hadisə nəticəsində 7 nəfər ölüb, daha 73 insan yaralanıb.

Hərbi cinayətlər törətməkdə təqsirləndirilən erməniəsilli şəxslərin cinayət işi üzrə məhkəmənin baxış iclası keçirilir. Sozcu.az “Report”a xəbər verir ki, proses Bakı Məhkəmə Kompleksində Bakı Hərbi Məhkəməsinin hakimi Zeynal Ağayevin sədrliyi ilə baş tutur. Xatırladaq ki, ötən prosesdə zərərçəkmiş şəxslər ifadə verib. Qeyd edək ki, onlar Ermənistan dövləti və onun silahlı qüvvələri, o cümlədən Ermənistan tərəfindən Azərbaycanın işğal olunmuş ərazilərində yaradılmış qondarma Dağlıq Qarabağ respublikası və onun qanunsuz silahlı birləşmələri tərəfindən Azərbaycana və xalqına qarşı sülh və insanlıq əleyhinə cinayətlər, müharibə cinayətləri, o cümlədən təcavüzkar müharibə aparma, soyqırımı, əhalini məcburi köçürmə, təqib, işgəncə, hərbi soyğunçuluq və digər qanunsuz əməllərdə təqsirləndirilirlər. Xatırladaq ki, Ermənistan Respublikası və onun silahlı qüvvələri, o cümlədən Ermənistanın yaratdığı qanunsuz “Dağlıq Qarabağ respublikası” və onun qanunsuz silahlı birləşmələr tərəfindən törədilən cinayətlərdə ittiham olunan 15 nəfər – Harutyunyan Arayik Vladimiri, Qukasyan Arkadi Arşaviri, Sahakyan Bako Sahaki, İşxanyan Davit Rubeni, Manukyan David Azatini, Babayan Davit Klimi, Mnatsakanyan Levon Henrikoviç, Beglaryan Vasili İvani, Qazaryan Erik Roberti, Allahverdiyan Davit Nelsoni, Stepanyan Qurgen Homeri, Balayan Levon Romiki, Babayan Madat Arakeloviç, Martirosyan Qarik Qriqori, Paşayan Melikset Vladimiriyə qarşı Azərbaycan Respublikası Cinayət Məcəlləsinin 100 (təcavüzkar müharibəni planlaşdırma, hazırlama, başlama və aparma), 102 (beynəlxalq müdafiədən istifadə edən şəxslərə və ya təşkilatlara hücum etmə), 103 (soyqırımı), 105 (əhalini məhvetmə), 106 (köləlik), 107 (əhalini deportasiya etmə və ya məcburi köçürmə), 109 (təqib), 110 (insanları zorakılıqla yoxa çıxarma), 112 (beynəlxalq hüquq normalarına zidd azadlıqdan məhrumetmə), 113 (işgəncə), 114 (muzdluluq), 115 (müharibə qanunlarını və adətlərini pozma), 116 (silahlı münaqişə zamanı beynəlxalq humanitar hüquq normalarını pozma), 118 (hərbi soyğunçuluq), 120 (qəsdən adam öldürmə), 192 (qanunsuz sahibkarlıq), 214 (terrorçuluq), 214-1 (terrorçuluğu maliyyələşdirmə), 218 (cinayətkar birlik (təşkilat) yaratma), 228 (qanunsuz olaraq silah, onun komplekt hissələrini, döyüş sursatı, partlayıcı maddələr və qurğular əldə etmə, başqasına vermə, satma, saxlama, daşıma və gəzdirmə), 270-1 (aviasiya təhlükəsizliyinə təhdid yaradan əməllər), 277 (dövlət xadiminin və ya ictimai xadimin həyatına sui-qəsd etmə), 278 (hakimiyyəti zorla ələ keçirmə və onu zorla saxlama, dövlətin konstitusiya quruluşunu zorla dəyişdirmə), 279-cu (qanunvericiliklə nəzərdə tutulmayan silahlı birləşmələri və qrupları yaratma) və digər maddələri ilə ittiham olunurlar.

2024-cü ildə Azərbaycanda fəaliyyət göstərən dövlət bağçalarında 48 mindən artıq xəstələnmə halı qeydə alınıb. Sozcu.az modern.az-a istinadla bu barədə Dövlət Statistika Komitəsi məlumat yayıb. Xəstələnmə hallarının 10 minə yaxını 3 yaşından aşağı uşaqlarda olub. Məktəbəqədər təhsil müəssisələrində uşaqlar ən çox qripin və yuxarı tənəffüs yollarının kəskin infeksiyasına yoluxurlar. Bağçalarda ötən il 27 mindən çox belə xəstəlik aşkarlanıb. Uşaqlar arasında angina (kəskin tonzillit, 15653 yoluxma), pnevmaniya (234), skarlatina (429), bakterial dizenteriya (211), bədbəxt hadisə, zəhərlənmə və zədələr (62) və digər xəstəliklər (4406) aşkarlanıb.

10:26 Fövqəladə Hallar Nazirliyinin "112" qaynar telefon xəttinə Lənkəran rayonunun Horavenc kəndində meşəlik ərazidə 1 nəfərin itkin düşməsi barədə məlumat daxil olub. Sozcu.az xəbər verir ki, bu barədə FHN məlumat yayıb. Məlumatla əlaqədar, FHN-in Cənub Regional Mərkəzinin xilasetmə qüvvələri itkin düşməsi ehtimal edilən 1970-ci il təvəllüdlü İlham Hüseynovun axtarış işlərinə cəlb olunub. Hazırda vətəndaşın itkin düşdüyü ehtimal edilən istiqamətlər üzrə axtarışlar davam etdirilir. *** Lənkəranda ötən gündən itkin düşən kişinin meyiti tapılıb. Bildirilib ki, Lənkəran rayonunun Horavenc kəndində ötən gündən itkin düşən və axtarışları aparılan 1970-ci il təvəllüdlü İlham Ağamməd oğlu Hüseynovun meyiti dərədə aşkarlanıb. Meyiti dərədən çıxarmaq üçün əraziyə FHN-nin Cənub Regional Mərkəzinin xilasediciləri cəlb olunub. Hadisənin hansı şəraitdə baş verməsi araşdırılır.

08:51 Qazax rayonunda ağır yol qəzası baş verib. Sozcu.az xəbər verir ki, hadisə rayonun Abbasbəyli kəndində qeydə alınıb. Məlumata görə, BMV markalı avtomobilin idarəetmədən çıxaraq divara çırpılması nəticəsində 1997-ci il təvəllüdlü Ramal Vəliyev, 2000-ci il təvəllüdlü Zaur Əhmədov, 1997-ci il təvəllüdlü Rafət Nəsibov və 2004-cü il təvəllüdlü Göyüş Nəbiyev aldıqları ağır xəsarətdən həlak olublar. Faktla bağlı araşdırma aparılır. *** Qazaxda yol-nəqliyyat hadisəsində ölən 4 nəfərin meyiti avtomobildən çıxarılaraq aidiyyəti üzrə təhvil verilib. Bu barədə Fövqəladə Hallar Nazirliyindən (FHN) məlumat verilib. FHN Böhran Vəziyyətlərində İdarəetmə Mərkəzinə Qazax rayonunun Abbasbəyli kəndində yol-nəqliyyat hadisəsinin baş verməsi ilə əlaqədar xilasedici köməyinə ehtiyac yaranması barədə məlumat daxil olub. Məlumatla əlaqədar FHN-in Dövlət Yanğından Mühafizə Xidmətinin müvafiq xilasetmə qüvvələri çağırış üzrə cəlb olunublar. Əməliyyat şəraiti qiymətləndirilərkən müəyyən olunub ki, BMW markalı minik avtomobili yol kənarındakı tikiliyə çırpılıb və 4 nəfər avtomobildə sıxılmış vəziyyətdə qalıb. Həyata keçirilən tədbirlər nəticəsində sıxılmış vəziyyətdə qalan 4 nəfərin meyiti çıxarılaraq aidiyyəti üzrə təhvil verilib. *** Qazax rayonunda 4 nəfərin ölümü ilə nəticələnən avtoqəza ilə bağlı cinayət işi başlanılıb. Daxili İşlər Nazirliyi (DİN) Mətbuat Xidməti Gəncə Regional Qrupundan bildirilib ki, Qazax rayonu Abbasbəyli kəndi ərazisində ölümlə nəticələnən yol-nəqliyyat hadisəsi baş verib. İlkin araşdırmalara əsasən, BMV markalı minik avtomobili hərəkətdə olarkən sürücü idarəetməni itirmiş və avtomobil yol kənarındakı divara dəyib. Nəticədə nəqliyyat vasitəsində olan dörd nəfər - 28 yaşlı Ramal Vəliyev (sürücü), 25 yaşlı Zaur Əhmədov, 28 yaşlı Rafət Nəbiyev və 21 yaşlı Göyüş Nəbiyev hadisə yerində həyatlarınnı itiriblər. Faktla bağlı Qazax Rayon Polis Şöbəsində cinayət işi başlanıb. Qəzanın başvermə səbəblərinin araşdırılması məqsədilə müvafiq ekspertizalar təyin edilib. Araşdırmalar davam etdirilir. *** Qazaxda 4 nəfərin öldüyü yol-nəqliyyat hadisəsinin bəzi təfərrüatları məlum olub. Teleqraf xəbər verir ki, hadisə zamanı qəzaya səbəb olan BMV markalı avtomobil 1997-ci il təvəllüdlü Ramal Vəliyevə məxsus olub. Hadisədən öncə Ramal Vəliyevlə yanaşı, Rafət Nəsibov şəxsi avtomobilləri ilə Abbasbəyli kəndi gediblər. Onlar restoranların birində yeyib-içdikdən sonra Ramal Vəliyevə aid BMV markalı abtomobil ilə Fərəhli kəndinə qayıdıblar. Lakin sonradan Rafət Nəsibovun avtomobilinin Abbasbəyli kəndində unudulduğu məlum olub. Həmin maşını gətirmək üçün yenidən geri dönüblər. Hadisə də həmin an baş verib. BMV markalı avtomobil idarəetməni itirərək, öncə işıq dirəyinə dəyib, daha sonra isə qarşıdakı mağazaya çırpılıb. Nəticədə maşında olan Ramal Vəliyevlə yanaşı, 2000-ci il təvəllüdlü Zaur Əhmədov, 1997-ci il təvəllüdlü Rafət Nəsibov və 2004-cü il təvəllüdlü Göyüş Nəbiyev hadisə yerində ölüblər. Qeyd edək ki, ölən şəxslər Fərəhli kənd sakinləridirlər.