“Emosiyalar çox güclüdür. Təbii ki, qızıl medal qazanmaq daha yaxşı olardı, amma düşünürəm ki, gümüş medal da yaxşı nəticədir”. Bunu Oxu.Az saytına açıqlamasında Bolqarıstanın Plovdiv şəhərində keçirilmiş qılıncoynatma üzrə yeniyetmə və gənclərin dünya birinciliyində gümüş medal qazanmış Zərifə Hüseynova deyib. Sablyaçı bu uğuru gözlədiyini bildirib: “Dünya çempionatına ciddi hazırlaşmışdıq. Xarici ölkələrdə təlim-məşq toplanışı keçmişdik. Uğur qazanacağımı gözləyirdim”. O, finalda məğlub olmasını yarımfinal qarşılaşmasında çox güc itirməsi ilə əlaqələndirib: “Qrup mərhələsi mənim üçün uğurlu başladı. Yarımfinala kimi qarşılaşdığım rəqiblər texnikalı və hazırlıqlı olsalar da, ən çətin görüşüm yarımfinalda amerikalı qılıncoynadanla idi. Yarımfinalda tam gücümü ortaya qoyduğumdan finalda mübarizə aparmaq fiziki və psixoloji cəhətdən çətin idi”. Azərbaycanın qılıncoynatma tarixində yeniyetmələrin dünya birinciliyində ilk medalı qazanmaqla tarixə düşən Z.Hüseynova əsas hədəfinin Yay Olimpiya Oyunlarında mükafatçılar sırasına düşmək olduğunu qeyd edib: “Qarşıdakı hədəflərlə bağlı indidən bir söz deyə bilmərəm. Lakin növbəti mövsümdə daha yaxşı çıxış etmək üçün üzərimdə çox çalışmalıyam. Mənim də bütün idmançılar kimi hədəfim Olimpiya medalıdır. Bu arzuma çatmaq üçün əlimdən gələni edəcəyəm”. 17 yaşlı idmançı Azərbaycanda ənənəvi idman növü hesab edilməyən qılıncoynatma ilə məşğul olmasını belə əsaslandırıb: “Evimizin yaxınlığındakı məktəbdə qılıncoynatma məşqləri keçirilirdi və beləcə məndə də bu idman növünə maraq yarandı. Qılıncoynatmaya qədər digər idman növləri ilə də məşğul olmuşam. Amma yekunda bu idman növündə özümü sınamağa qərar verdim”.

"Azərbaycanın işğaldan azad edilmiş ərazilərinə köç davamlı bir prosesə çevriləcək". Bunu Qarabağ İqtisadi rayonuna daxil olan işğaldan azad edilmiş ərazilərdə (Şuşa rayonu istisna olmaqla) Prezidentin xüsusi nümayəndəsi Emin Hüseynov Əlaqələndirmə Qərargahının İdarələrarası Mərkəzinin nəzdində fəaliyyət göstərən Şəhərsalma Məsələləri üzrə İşçi Qrupun bu gün Füzuli Beynəlxalq Hava Limanında keçirilən iclasında bildirib. "Hazırda həmin ərazilərdə əsas baza infrastrukturu ilə bağlı layihələr yekunlaşmaqdadır. Növbəti il biz işlərin əksəriyyətinin yekunlaşdığının şahidi olacağıq. Bu isə o deməkdir ki, artıq Qarabağın yol, kommunikasiya, digər infrastruktur xətləri tam olacaq, həyatın qayıtması üçün bütün zəruri şərait yaradılacaq. Böyük Qayıdış artıq başlayıb. İlk olaraq Şərqi Zəngəzurda yerləşən Zəngilanın Ağalı kəndinə məcburi köçkünlər köçürülüb. Köç bundan sonra davamlı prosesə çevriləcək", - deyə o qeyd edib. E.Hüseynov vurğulayıb ki, keçmiş təmas xəttində yerləşən ərazilər Qarabağ iqtisadi rayonunun ərazisinə düşür: "Həm Ağdamda, həm də Füzulidə mina təmizləyən heyətin əməyi nəticəsində biz işlərimizi sürətləndirə bilmişik. Azərbaycan dövləti öz gücü hesabına Qarabağı bərpa edir. Qarabağın dirçəlişi üçün hər cür şərait var. Biliklərimizi, bacarıqlarımızı ortaya qoyaq, bu işləri vaxtında icra edək".

Bərdədə qumbaraatan silahını 3300 manata satmaq istəyən şəxs saxlanılıb. Bu barədə DİN-in Mətbuat Xidmətinin Bərdə regional qrupundan məlumat verilib. Belə ki, polis əməkdaşlarının keçirdiyi tədbirlərlə qanunsuz olaraq satış məqsədi ilə silah əldə edərək saxlamaqda şübhəli bilinən rayon sakini, əvvəllər Cinayət Məcəlləsinin bir neçə maddəsinə görə məhkumluq həyatı yaşamış Ramil Vəliyev tutulub. Onun yaşadığı ünvandan "RPQ" markalı qumbaraatan silahı aşkar edilərək götürülüb. Dindirilmə zamanı o, bir müddət əvvəl həmin silahı tapdığını və öz yaşadığı ünvana gətirərək gizlətdiyini deyib. Silahı 3300 manata satmaq məqsədi ilə özündə saxlayaraq təhvil vermədiyini etiraf edib. Faktla bağlı cinayət işi başlanılıb, araşdırmalar davam etdirilir.

“Ermənistanın ötən gün törətdiyi təxribat nəticəsində şəhid olan hərbçilərimizə Allah rəhmət eləsin, yaralılara cansağlığı versin. Bu təxribatın arxasında yalnız Rusiya dayanmır, həmçinin İran da var. Çünki bu iki dövlətin mövqeləri Qarabağ məsələsində faktiki üst-üstə düşür. İran Ermənistana mütəmadi yardım edir və bunu heç gizlətmir də. Aprelin 9-da Ermənistanın Təhlükəsizlik Şurasının katibi Armen Qriqoryan Tehranda oldu, həmkarı ilə görüşdü. Rusiyanın xarici işlər naziri Sergey Lavrov Moskvaya qayıdandan sonra onun müavini də Ermənistana gəldi. Hazırlıqlı iş gördülər. Çünki Ermənistanın bir dövlət olaraq öz sözü yoxdur. Onu idarə edən Rusiya və İran dövlətidir. Dövlət kimi sözü olsaydı, ümumiyyətlə, bu təxribata yol verməzdi. Bir neçə gün əvvəl müdafiə nazirinin müavini, general-leytenant Ramiz Tahirovun ABŞ-a səfərinin də bu məsələyə böyük təsiri var. Müəyyən danışıqlar, hazırlıqlar gedir, bunu Rusiya da, İran da qəbul etmir və belə təxribatlara əl atırlar. İkinci tərəfdən, Vaşinqtonda Azərbaycan Prezidenti ilə Ermənistanın Baş nazirinin may ayında görüşü gözlənilir. Dünənki təxribat bu görüşü təxirə salmaq üçün atılan addım da ola bilər”. Bu sözləri Pravda.az-a açıqlamasında Milli Məclisin deputatı Vahid Əhmədov deyib. Deputat bildirib ki, ümumiyyətlə, nə İran, nə Rusiya Qarabağda sülhün imzalanmasını istəyir: “İran ona görə istəmir ki, Ermənistan strateji müttəfiqidir. Qarabağ ərazisindən vaxtında kifayət qədər narkotik vasitələr, silah-sursat və s. daşıyıb. Rusiya isə hər iki dövlətə təzyiq etmək üçün istəyir ki, öz sülhməramlı kontingenti daimi Qarabağda qalsın. Bundan Azərbaycana və Ermənistana mütəmadi təsirlərdən ötrü istifadə etmək istəyir və belə bir təxribat törətdilər. Hesab etmirəm ki, dünənki təxribatın müəllifi Baş nazir Nikol Paşinyandır. Onun danışıqlarına, görüşlərinə fikir vermişəm, o, bəlkə də, çoxdan sülh sazişini imzalayardı. Daxildə Rusiyapərəst qüvvələr ona böyük təzyiqlər edir. Əlbəttə, bir tərəfdə Fransa da var, amma əsas Rusiya və İrandır. Həmişə hansısa tədbir olanda, Brüsseldə, ABŞ-da və s. yüksək səviyyəli görüş keçiriləndə belə təxribatlar törədirlər ki, görüş alınmasın. Çünki görüş sülh sazişinin imzalanması ilə nəticələnə bilər. Ona görə də belə addımlar atırlar. Doğrudur, Ordumuz onların layiqli cavablarını verir, amma ayıq olmaq lazımdır. Çünki sülh sazişinə yaxınlaşdıqca, Ordumuz irəlilədikcə, yüksəklikləri əldə etdikcə belə təxribatların şahidi ola bilərik. Azərbaycan Xankəndi də daxil olmaqla, əraziləri də öz ərazisi hesab edir, müəyyən əməliyyatlar keçirir. Sülh yolu ilə alınmasa da, Azərbaycan yumşaq metodla bu işi axıra çatdıracaq. Fikir verdinizsə, dünənki təxribatda ermənilər İran PUA-larından istifadə etdilər. Faktiki Rusiya da Ukrayna ilə müharibədə İran PUA-larından istifadə edir. Yəni İran dövləti elə təxribatlarla məşğuldur. Gah Rusiyaya silah satır, gah Ermənistana. İran Rusiya-Ukrayna müharibəsində də Rusiyanı müdafiə edir. Artıq aydındır ki, İran dövləti terror törətməkdə pərgardır. Son ayların xronologiyası da bunu göstərir. İrandakı səfrliyimizin ardından deputat Fazil Mustafa da terrora məruz qaldı. Bütün bunlar hamısı faktlardır”.

Xalq artisti Röya Ayxan Ermənistanın Azərbaycanla sərhəddə törətdiyi təxribatla bağlı paylaşım edib. Sozcu.az olay-a istinadən xəbər verir ki, bu haqda sənətçi instaqramda status yerləşdirib. Estrada ulduzu şəhid olan hərbçilərimizə görə kədərli olduğunu dilə gətirib: "İndi xəbər tutdum, çox ağırdır. Laçın rayonu istiqamətində gərginlik yaranıb. Hərbçilərimiz şəhid olub, yaralılarımız var. Allah əsgərlərimizə güc versin! Başın sağ olsun, Azərbaycan". Qeyd edək ki, düşmənin axşam saatlarında törətdiyi təxribat nəticəsində hərbi qulluqçularımız şəhid olub. Hazırdan sərhəddə gərginlik davam edir.

Hesablama Palatasının audit zamanı aşkarladığı nöqsanların aradan qaldırılmamasının əsas səbəblərindən biri Palatanın hökumətlə münasibətlərinin normal olmamasıdır. Sozcu.az xəbər verir ki, bunu Milli Məclisin İqtisadi siyasət, sənaye və sahibkarlıq komitəsinin iclasında deputat Vahid Əhmədov bildirib. "Hesab edirəm ki, nöqsanlarla bağlı heç olmasa ildə bir dəfə hökumətlə müzakirələr aparılmalıdır. Burada ötən il aşkarlanmış nöqsanları aradan qaldırmayan qurum və təşkilatların adları açıqlanmalıdır", - deyə o qeyd edib. Bundan başqa, deputat təklif edib ki, işğaldan azad edilmiş ərazilərdə audit daha sərt olsun və genişləndirilsin: "Ora nəzarətdən uzaq bir yerdir. Bu istiqamətdə auditi daha da genişləndirmək lazımdır"./Report

Martın 25-də sosial şəbəkələrdə Qusar şəhərindəki Şəhidlər xiyabanı ilə bağlı utancverici mənzərə paylaşılıb. Fotoda görünür ki, məşhur - “Bayraqları bayraq yapan üstündəki qandır, Torpaq, əgər uğrunda ölən varsa, Vətəndir”, - beytindən istifadə edilərkən ciddi səhvə yol verilib. Belə ki, “əgər” sözü unudulub. Bundan başqa, “torpaq” sözündən sonra vergül əvəzinə tire işarəsi qoyulub. Eləcə də “varsa” sözündən sonra vergül qoyulması da yaddan çıxıb. Məsələ mətbuatda işıqlandırıldıqdan sonra addım atılıb və səhv qismən düzəldilib. Xiyabanın yayılan son fotosundan görünür ki, iki sözün arasındakı tire götürülüb, əvəzinə vergül qoyulub. Bu isə kifayət deyil, çünki şeirdəki misra "Torpaq, əgər uğrunda ölən varsa, vətəndir" formasındadır. Bununla bağlı Qusar Rayon İcra Hakimiyyəti ilə əlaqə saxladıq. Başçının birinci müavini Şahid Fərəməzov Oxu.Az-a açıqlamasında bu səhvi paylaşanları tənqid edib: “Bu məsələlərlə kimlərisə provokasiyaya cəlb etmək istəyirlər. Onların nəzərinə çatdırım ki, Şəhidlər xiyabanında 105 şəhidin xatirəsi əbədiləşdirilib. Bunu yayanlar 105 şəhidə 105 gül alıb, onların xatirəsini yad edirlərmi? Boş-boş işlərlə məşğuldurlar”.

Ukrayna Silahlı Qüvvələrinin gələcək əks-hücumuna görə Rusiyanın hərbi-siyasi rəhbərliyində isterika davam edir, eyni zamanda işğalçıların özləri də fiziki və mənəvi cəhətdən tükəniblər. Müharibənin bu il bitməsi ehtimalı var. Sozcu.az xəbər verir ki, bu fikirləri rusiyalı müxalif siyasətçisi Gennadi Qudkov deyib. Qudkov qeyd edib ki, Rusiya işğalçı qüvvələri döyüş sursatı, ərzaq və digər təchizatla bağlı vəziyyəti yaxşılaşdıra bilsə də, itkiləri artmaqda davam edir: “Rusiya döyüş ruhunu və hücum qabiliyyətini itirir. Və o, başa düşsə ki, heç bir nəticə yoxdur və Ukrayna güclənir, o zaman müharibə sonsuza qədər davam edə bilməz. Mən həqiqətən Ukraynanın gələcək əks-hücumuna çox inanıram”, - siyasətçi vurğulayıb.

ATA İttifaqından prezidentliyə namizədi Sinan Oğan bu gün Millət İttifaqından prezidentliyə namizəd Kamal Kılıçdaroğlu ilə görüşəcək. Sozcu.az xəbər verir ki, bu barədə Türkiyə mətbuatı məlumat yayıb. Məlumata görə, görüş CHP-nin mərkəzi qərargahında keçiriləcək. Görüş zamanı “seçki təhlükəsizliyi” məsələsinin müzakirə olunacağı bildirilir.

Azərbaycan Respublikasının Prezidenti İlham Əliyev Şimali Makedoniya Respublikasının xarici işlər naziri, ATƏT-in fəaliyyətdə olan sədri Buyar Osmanini Ermənistanın ötən gün törətdiyi təxribat barədə məlumatlandırıb. Sozcu.az xəbər verir ki, dövlətimizin başçısı dünən Ermənistan-Azərbaycan sərhədində baş vermiş insidenti qeyd edərək, bunun Ermənistan tərəfindən məqsədyönlü şəkildə törədilmiş təxribat olduğunu bildirib. Qeyd edək ki, Prezident İlham Əliyev aprelin 12-də Şimali Makedoniya Respublikasının xarici işlər naziri, ATƏT-in fəaliyyətdə olan sədri Buyar Osmanini qəbul edib. Xatırladaq ki, aprelin 11-i saat 16:20 radələrində Ermənistan silahlı qüvvələrinin bölmələri Gorus rayonunun Dığ yaşayış məntəqəsi istiqamətində yerləşən mövqelərindən Azərbaycan Ordusunun Laçın rayonu istiqamətindəki üzbəüz mövqelərini müxtəlif çaplı silahlardan istifadə etməklə atəşə tutub. Ermənistan tərəfinin təxribatının qarşısını alarkən Azərbaycan Ordusunun üç hərbi qulluqçusu Zalov Vidadi Nizami oğlu, Həsənov Elşad Qabil oğlu və Tağıyev Səbuhi Gündüz oğlu şəhid olub.

Ötən gün Ermənistan planlı şəkildə təxribat törədib. Sozcu.az xəbər verir ki, bunu Azərbaycanın xarici işlər naziri Ceyhun Bayramov ATƏT-in fəaliyyətdə olan sədri, Şimali Makedoniyanın xarici işlər naziri Buyar Osmani ilə birgə keçirdiyi mətbuat konfransında deyib. Onun sözlərinə görə, hadisə ilə bağlı təhlillər davam edir: “Təəssüf ki, bölgədə iki ölkə arasında münasibətlərin normallaşması istiqamətində addım atılan zaman Ermənistanın hərbi-siyasi təxribata əl atması ilk deyil. İlkin rəy onu deməyə əsas verir ki, bu, planlaşdırılmış təxribat idi. Ermənistan xüsusi təyinatlı korpusunun komandanının və onun müavininin təxribat zamanı ərazidə mövcudluğu göstərir ki, dünənki hadisə, konkret olaraq, düşünülmüş plan idi". Nazir bildirib ki, təxribatın Laçında baş tutması həm də məcburi köçkünlərin geri qayıdışına mane olmaq cəhdi kimi qiymətləndirə bilər: "Ermənistan belə destruktiv addımlardan çəkinməlidir. Əks halda nəticəsi ağır olacaq. Biz dünən də bunu gördük. Ona görə də Ermənistan məsuliyyətsiz, təhlükəli addımlardan çəkinməlidir. Beynəlxalq tərəfdaşlar da buna çalışmalıdırlar. Prezident İlham Əliyev Qazaxıstanda qarşı tərəfə ciddi mesajlar vermişdi. Əlbəttə, bir gün sonra bu cür təxtibatın baş verməsi qəbuledilməzdir”.

Aprelin 11-i saat 16:20 radələrində Ermənistan silahlı qüvvələrinin bölmələri Gorus rayonunun Dığ yaşayış məntəqəsi istiqamətində yerləşən mövqelərindən Azərbaycan Ordusunun Laçın rayonu istiqamətindəki üzbəüz mövqelərini minaatanlar da daxil olmaqla müxtəlif çaplı silahlardan istifadə etməklə atəşə tutub. Bu barədə Sozcu.az-a Müdafiə Nazirliyindən məlumat verilib. Hərbi qulluqçularımızın sayıqlığı nəticəsində Ermənistan silahlı qüvvələrinin bölmələri tərəfindən törədilən təxribatın qarşısı qətiyyətlə alınıb, atəş nöqtələri susdurulub və qarşı tərəf xeyli sayda itki verib. Ermənistan tərəfinin təxribatının qarşısını alarkən yaralanmış dörd hərbi qulluqçumuzdan ikisi əraziyə yaxın yerləşən hərbi tibb müəssisəsindən sanitar aviasiya vasitəsilə peşəkar həkimlərimizin ciddi nəzarəti altında ixtisaslaşdırılmış hərbi tibb müəssisəsinə təxliyə olunur.

Ermənistan dövlətinin ölkədəki AB missiyasını dünən döyüşlərin baş verdiyi əraziyə aparmaq cəhdi uğursuzluqla nəticələnib. Sozcu.az xəbər verir ki, bununla bağlı erməni sosial şəbəkələrində məlumat yayıb. Məlumatda bildirilib ki, Ermənistan XİN müşahidə missiyasının rəhbəri Markus Ritterə Dığ kəndi yaxınlığındakı erməni mövqelərinə baş çəkməyi təklif etsə də, Ritter buna mənfi cavab verib. Missiya üzvləri erməni hərbçilərinin müşayiəti ilə belə oraya getməyə razı olmayıb.

İran hökumətinin Urmiya gölünün bərpası, gölə su buraxılması ilə bağlı təbliğatlarına baxmayaraq, gölün hazırkı durumu ötən ilin eyni dövrü ilə müqayisədə daha pisləşib. Sozcu.az xəbər verir ki, bu barədə Xəzər və Urmiya Gölü Su Ehtiyatlarının İnteqrasiya edilmiş İdarəetmə Mərkəzinin baş direktoru Kiyasət Əmirian deyib. Onun sözlərinə görə, göldə suyun səviyyəsi ötən ilin aprel ayına nisbətdə 49 santimetr aşağı düşüb. Hazırda göldə 1.63 milyard kubmetr su olduğu bildirilib. Qeyd edək ki, Urmu gölünün su həcmi göl qurudulmamışdan öncə ortalama 17.28 milyard kubmetr olub.

Ötən gün Ermənistan-Azərbaycan sərhədində baş verən silahlı insident və bu cür xoşagəlməz hallar regionda gərginliyin artmasına səbəb ola bilər. Sozcu.az xəbər verir ki, bunu Avropada Təhlükəsizlik və Əməkdaşlıq Təşkilatının (ATƏT) fəaliyyətdə olan sədri, Şimali Makedoniyanın xarici işlər naziri Buyar Osmani Azərbaycanın xarici işlər naziri Ceyhun Bayramov ilə görüşdən sonra keçirilən mətbuat konfransında deyib. "Azərbaycana gələn kimi hadisə ilə bağlı dərhal mənə məlumat verildi. Həlak olanlarla bağlı başsağlığımı çatdırdım. Təəssüf ki, belə hadisələr vəziyyəti daha da gərginləşdirə bilər", - B.Osmani deyib. Fəaliyyətdə olan sədr qeyd edib ki, ATƏT regiona sülh gətirmək üçün Azərbaycan və Ermənistan arasında münasibətlərin normallaşdırılmasına kömək etməyə hazırdır. Qeyd edək ki, aprelin 11-də Ermənistan silahlı qüvvələrinin bölmələri Gorus rayonunun Dığ yaşayış məntəqəsi istiqamətində yerləşən mövqelərindən Azərbaycan Ordusunun Laçın rayonu istiqamətindəki üzbəüz mövqelərini müxtəlif çaplı silahlardan istifadə etməklə atəşə tutub. Ermənistan tərəfinin təxribatının qarşısını alarkən Azərbaycan Ordusunun üç hərbi qulluqçusu şəhid olub.

Yaponiya İkinci Dünya müharibəsində məğlub olduqdan sonra ona məxsus Kuril – İturup, Kunaşir, Şikotan adaları keçmiş SSRİ-nin nəzarətinə keçdi. Müharibədən bir müddət sonra Tokio ilə Moskva arasında danışıqlar başladı. 1960-cı illərdə SSRİ-nin o zamankı rəhbərliyi Kuril adalarından ikisini Tokio ilə sülh sazişi qarşılığında Yaponiyaya geri qaytarmağa razı idi. Ancaq daha sonra SSRİ-də hakimiyyət dəyişikliyi baş verdi və Kreml vədini unutdu. SSRİ dağıldıqdan sonra Tokio müstəqilliyini qazanan Rusiya ilə danışıqlara başladı. Rusiyanın ilk prezidenti Boris Yeltsin adalarla bağlı Tokio ilə razılaşma əldə etməyə yaxın idi. Ancaq Yeltsinin ətrafı buna imkan vermədi. Vladimir Putin prezident seçiləndən sonra Tokio ilə danışıqları davam etdirdi. Ancaq Putin Yeltsindən fərqli olaraq adalar məsələsində güzəştə getməyə hazır deyildi. Danışıqlar nəticə vermirdi. Buna baxmayaraq, Tokio ilə Moskva arasında dialoq davam edirdi, iki ölkə arasında iqtisadi əlaqələr və ticarət genişlənirdi. Rusiyanın Ukraynaya qarşı başlatdığı işğalçı müharibə Yaponiya ilə münasibətlərə də mənfi təsir etdi.  Yaponiya Qərbin Rusiyaya qarşı bir sıra sanksiya qərarlarına qoşuldu, bu iqtisadi və ticarət əlaqələrinə mənfi təsir etdi. Bundan başqa Rusiyada keçirilən referendumda Konstitusiyaya əlavə edilən bəndə görə, torpaq güzəşti qadağan edildi. Bu o demək idi ki, Rusiyanın Yaponiyaya adaları geri qaytarmaq qanuni yolla qadağan edildi. Yəni Putin və digəri bir gün Kuril adalarını Yaponiyaya qaytarmaq istəsə belə, bunu edə bilməyəcək. Konstitusiya prezidentə Kuril adalarını Yaponiyaya qaytarmağı qadağan edir. Bundan sonra Tokio anladı ki, adaların gələcək taleyi ilə bağlı Moskva ilə dialoqun davam etdirilməsi mənasızdır. Bu arada, Çin də Kuril adalarıyla bağlı mövqeyini Rusiyanın xeyrinə dəyişdi. Çin uzun illər Kuril adaları məsələsində neytral siyasət yürüdürdü. Çinlə keçmiş SSRİ arasında sərhəddə gərginlik 1964-cü ildə baş vermişdi. Pekin həmin ildən başlayaraq Kuril adaları məsələsində Moskvanın mövqeyini dəstəkləməkdən imtina etmişdi. Çinin o zamankı lideri Mao Tsedun faktiki Yaponiyanın adalarla bağlı siyasətinin haqlı olduğunu dəstəkləyirdi. Pekin uzun illər Kuril adalarıyla bağlı mövqe bildirmirdi. Ancaq üstündən 59 il keçdikdən sonra Pekin bu mövqeyini Moskvanın xeyrinə dəyişib. Çin lideri Tsi Cinpin Moskvada Vladimir Putinlı görüşdən sonra Kuril adaları məsələsində bundan sonra Yaponiyanın mövqeyini dəstəkləməyəcəyini bildirib.  “Atlas” Araşdırmalar Mərkəzi

"Ermənistan Müdafiə Nazirliyinin yaydığı videoda sərhəd ərazisində azərbaycanlı hərbçilərin pikap maşını ilə orada "mühəndis işləri" aparan ermənilərin üstünə getdiyi, orada əlbəyaxa dava düşdüyü, sonradan atışma başladığı iddia olunur. Hərçənd, dünən hər iki tərəfin verdiyi itkilərin məhz həmin videoda əks olunan qarşıdurma ilə bağlı olduğu şübhə doğurur. Çünki videoda kiminsə yaralandığı, yaxud öldüyü əks olunmayıb, görüntü kəsilib. Əgər Ermənistanın iddia etdiyi kimi atışmanı Azərbaycan hərbçiləri başlayıbsa, nə üçün videonun o hissəsini paylaşmayıblar?" Sozcu.az xəbər verir ki, bunu Azərbaycan - Ermənistan sərhədində baş verən atışmaya münasibət bildirən Müsavat Partiyasının funksioneri Mustafa Hacıbəyli deyib.  "İkincisi, videoda görünür ki, hadisə həm sağda, həm solda Azərbaycan bayrağının dalğalandığı ərazidə baş verir. Yəni Ermənistan hərbçiləri Azərbaycan ordusunun tam nəzarəti altında olan əraziyə girərək burada "mühəndis işlərinə" başlayıblar. Təxribat elə budur. Onları bu təxribata kim cəsarətləndirib? İran? Rusiya?  Azərbaycanı təxribatı törədən tərəf kimi göstərirlər. Əgər Müdafiə Nazirliyimizi bu məsələ narahat edirsə, həmin video ilə bağlı açıqlama yayılmalıdır".

Xəqani Cəfərli  Faşist Almaniyasının Hərbi Hava Qüvvələri naziri Herman Görinq deyirdi ki, kərə yağı adamları kökəldir, dəmir filizi isə Reyxi güclü edir. Məşhur rəssam Con Hartfild rəsmilərinin birində Görinqə cavab verir. Dünyaca məşhur olan həmin rəsmdə alman ailəsinin masa arxasında dəmir əşyalar yediyi təsvir edilir. Zibil qutusunda gizlənərək SS-in təqibindən xilas olaraq Almaniyanı tərk edən rəssamın adı Gestaponun ən çox axtarılanlar siyahısında beşinci idi.  Türkiyədəki sosial-iqtisadi vəziyyətin ağırlığı altında insanlar ölkələrini kütləvi şəkildə tərk edir ki, bundan böyük faciə ola bilməz. Vətəndaşları ölkələrini tərk edib Avropaya sığınmaq istəyən ölkələrin siyahısında Türkiyə Suriya, Əfqanistan və Venesueladan sonra dördüncü yerdədir. Köç sürəti azalmasa Türkiyə bu il Venesuelanı keçərək üçüncü yerə yüksələcək.  Bütün bunlar isə Rəcəb Tayyip Ərdoğanın 21 illik hakimiyyətinin acı nəticələrindən biridir. Digər bir acı nəticəsi ucuz ət və ucuz çörək mağazaları qarşısındakı uzun növbələrdir. Bütün bu acı, ürək dağlayan hallarla bağlı qeydlərimizə biriləri PUA şəkiləri cavab verir və məni anti-türkçülükdə ittiham etməyə çalışır. Məlumatsız, bilgisiz insanlarla mübahisə etmək çox faydasız əməldir.   Ərdoğanı PUA şəkilləri üzərindən müdafiə edənlərin xəbəri belə yoxdur ki, son 21 ildə aparılan siyasət dəyişməsə 2053-cü ildə Türkiyədə türklər azlıq təşkil edəcəklər. Ənsar mədəniyyətindən gəldiklərini iddia edənlər ümmətçilik şüarı ilə Türkiyəni bədəvi ərəb və əfqanlarla doldurub.  On əsr ərzində bu çoğrafiya türklərin qanı ilə vətən edilib. Ərdoğan isə ənsar mədəniyyəti və ümmətçilik nağlı ilə Türkiyəni bədəvi ərəblərə təslim edir. Zaman çox sürətlə ötür və 2053-cü il çox da uzaqda deyil.

Bu gün Laçın istiqamətində baş verən təxribatın arxasında Rusiya dayanır. Bunu Modern.az-a hərbi ekspert Üzeyir Cəfərov Azərbaycan-Ermənistan sərhədindəki silahlı insidentin səbəbləri barədə danışarkən deyib. Onun fikrincə, Rusiyanın Ermənistandakı səfiri Sergey Kopirkinin səsləndirdiyi bəyanat bugünkü təxribata işarə idi: “Rusiya səfiri bildirdi ki, KTMT missiyası Ermənistana gəlmək üçün hazırdır. Bu gün baş verənlər təsadüfi deyil. Məhz Rusiya səfirinin açıqlaması ona hesablanmışdı ki, Ermənistan təxribat törətməklə bağlı tapşırığı yerinə yetirsin. Onlar da Rusiyanın dediyi kimi sərhədimizdə təxribat törətdilər. Bundan əlavə, dünən Azərbaycan mətbuatında müdafiə nazirinin müavini, Hərbi Hava Qüvvələrinin komandanı general-leytenant Ramiz Tahirovun Amerikada keçirdiyi görüşlərə geniş yer verilmişdi. Amerikanın adı gələndə İran və Rusiyanın necə reaksiya verdiyi hər kəsə məlumdur. Onlar Azərbaycan generalının ABŞ-da danışıqlar aparmasını qəbul edə bilməzlər. Əlbəttə, bunların hamısı bir-biri ilə əlaqəli məsələlərdir”. Ehtiyatda olan polkovnik hesab edir ki, Rusiya Ermənistan-Azərbaycan sərhədinə KTMT missiyasını yeritmək üçün bəhanə axtarır: “Sabah KTMT Ermənistana kömək üçün gəlsə, təəccüblənmərəm. Çünki onlara sadəcə bir bəhanə lazım idi. Ötən həftələrdə Rusiya Prezidenti Vladimir Putin və Ermənistan Baş naziri Nikol Paşinyan arasında telefon danışığında müəyyən tapşırıqlar verilmişdi. Təsadüfi deyil ki, bu gün Lavrovun müavini İrəvandadır. Onun xüsusi tapşırıqla İrəvana gəldiyi deyilir. Təsdiqlənməmiş məlumat olsa da, gələn ay Prezident İlham Əliyev ilə Paşinyan arasında Vaşinqtonda planlaşdırılan görüş Rusiya və İranı ciddi şəkildə narahat edir. Onlar Vaşinqtonda görüşün baş tutmamasını istəyirlər. Xatırlayırsınızsa, ötən ilin dekabrın 7-də sülh sazişi ilə bağlı görüş keçirilməli idi. Onda da Ermənistan təxribat törətdi və görüş baş tutmadı. Bunlar hamısı zəncirin bir hissəsidir. Başa düşmək lazımdır ki, Ermənistan ona verilən tapşırıqları yerinə yetirir”. Hərbi ekspert bugünkü insidentdən sonra danışıqların arxa plana keçəcəyini düşünür: “Müdafiə Nazirliyinin verdiyi məlumat ondan ibarətdir ki, ermənilər sakitləşiblər. Erməni tərəfinin təxribatlarının qarşısı alınıb və mövqeləri susdurulub. Baxmayaraq ki, bundan əvvəl Basarkeçər istiqamətində bizə problemlər yaradırdılar, indi isə postu quracağımız Laçın rayonuna yaxın ərazidə, yəni Gorus rayonunun Dığ yaşayış məntəqəsindən hücum ediblər. Ermənistan ərazisi olmasına baxmayaraq, biz o nöqtələri də susdurmuşuq. Bundan sonra vəziyyətin necə olacağını yaxın saatlarda biləcəyik. Ancaq Azərbaycanla Ermənistan arasında təmaslar arxa plana keçəcək”. Xatırladaq ki, bu gün Ermənistan ordusu Laçın rayonu istiqamətində Azərbaycan Silahlı Qüvvvələrinin mövqelərini müxtəlif çaplı silahlardan istifadə etməklə atəşə tutub. Cavab tədbirləri zamanı Ermənistan ordusunun 4 hərbçisi məhv edilib, 6-sı yaralanıb. Ermənistan tərəfinin təxribatının qarşısını alarkən Azərbaycan Ordusunun 3 hərbçisi şəhid olub. 

Ukrayna maliyyə nazirinin müşaviri, Harvard Universitetinin geosiyasi risklər üzrə analitiki, Azərbaycanın Ukraynadakı keçmiş səfiri Azər Xudiyev bu gün Ermənistan silahlı qüvvələri tərəfindən Laçın rayonu istiqamətində törədilən təxribatlara münasibət bildirib. Diplomat A.Xudiyev Demokrat.az-a açıqlamasında deyib ki, baş verən təxribatların arxasında Rusiya və İran dayanır: "Bu gün Qarabağda baş verən toqquşmanın nəticəsinə baxanda dəqiq demək olar ki, bu, Rusiyanın avantürist siyasətinin nəticəsində baş vermiş təxribatdır. Çünki Rusiya öz məkirli və klassik siyasətindən əl çəkmək istəmir. Hər zaman öz əhatə dairəsini genişləndirmək istədiyi regionlarda mütləq şərtlə qeyri-müəyyənlik yaradır. Bu qeyri-müəyyənlik isə sonda xaosa gətirib çıxardır. Rusiya və İran bu xaosdan, qeyri-müəyyənlikldən istifadə edərək, öz məkrli işlərini görürlər. Ona görə də bu gün Kəlbəcər və Laçın istiqamətində baş verən toqquşmalar birbaşa bu məsələlərin təzahürüdür. Amma bu dəfə Rusiya və İranın Cənubi Qafqaz regionunda avantürası baş tutmadı. Rusiya İranın vasitəsilə Azərbaycana təzyiq etmək istəyirdi. Amma artıq anlayırlar ki, Azərbaycana bu cür təzyiq etməklə nəsə əldə etmək mümkün deyil, Azərbaycan milli maraqları naminə bu dövlətlərə güzəştə getmir. Son vaxtlar bu reallığı Rusiyanın ayrı-ayrı ekspertlərinin, deputatlarının və siyasətçilərinin də dilindən eşidirik. Həmin şəxslər siyasi tok-şoularda çıxışlarında aşı şəkildə deyirlər ki, artıq Azərbaycanı yola gətirmək hər gün daha da çətinləşir, çünki Azərbaycan proseslərə öz maraqlarından yanaşır. Əlbəttə ki, hər bir ölkənin öz suverenliyi və müstəqil siyasəti olduğu kimi, Azərbaycan dövləti də müstəqil siyasət aparır. Şübhəsiz ki, Azərbaycanın müstəqil siyasət aparması nə İranın, nə də Rusiyanın maraqlarına uyğun deyil. Ötən dövrlər də göstərdi ki, nə qədər biz Rusiyanın maraqlarına xidmət edəcəyik, o zaman bizim tələblərimizə ciddi baxan olmayacaq. Təbii ki, bu cür təhdidlərə də hazır olmalıyıq. Çünki əgər müstəqil siyasət aparmaq istəyiriksə, o zaman xaricdən gələn bütün təzyiq və təhdidlər nəzərə alınmalıdır. Amma eyni zamanda indi Rusiyadan çox ehtiyatlı olmaq lazımdır. Misal var ki, yaralı ayı daha çox vəhşi olur. Ona görə də Rusiya ilə prinsipial siyasətimizi həm ehtiyatlı, həm də qətiyyətli formada davam etdirməliyik". Nazir müşaviri vurğulayıb ki, bu gün sərhəddə baş verən toqquşmaların digər səbəbləri də var: "Burada başqa amillər də var. Həmin amillər odur ki, son zamanlar Azərbaycan həm İsrail, həm ABŞ, həm də Avropa ilə yaxınlaşma taktikasını seçib. Bilirsiniz ki, hazırda Azərbaycanın müdafiə nazirinin müavini, Hərbi Hava Qüvvələrinin Komandanı Ramiz Tahirov ABŞ-da səfərdədir. O, Vaşinqtonda Amerikalı həmkarları ilə Azərbaycanın havadan müdafiəsinin daha da gücləndirilməsi üçün müzakirələr aparır. Şübhəsiz ki, bütün bunlar Rusiyanı qıcıqlandırmaya bilməzdi. Rusiya hər zaman istəyir ki, onunla yaxın regionda yerləşən və qonşu olan dövlətlərin bütün hərbi və təhlükəsizlik sistemini öz nəzarətində saxlasın. Artıq o dövr geridə qalıb. Bu gün Rusiya o güc təsirini itirib. Rusiya görür ki, nə Gürcüstanda, nə Ermənistanda, nə də Azərbaycanda öz təsir gücünü əvvəlki kimi yürüdə bilmir. Ona görə də Rusiya Qarabağda bugünki kimi təxribatlara əl atır. Tam əminliklə deyə bilərəm ki, bu gün Laçın istiqamətində törədilən təxribatın da arxasında Rusiya dayanır. Gec-tez bunun da üstü açılacaq.  Rusiya bir müddət öncə Ermənistanı silahlandırırdı. Hətta, buna görə Azərbaycanın dövlət başçısı və Müdafiə Nazirliyimiz dəfələrlə Rusiyaya və Qarabağda müvəqqəti yerləşdirilmiş "sülhməramlı" qüvvələrin komandanlığına xəbərdarlıq etmişdi.  Eyni zamanda Qarabağdakı erməni separatçılarına və Ermənistan dövlətinə dəfələrlə xəbərdarlıq olunub ki, silahlanmadan vaz keçin, əks halda Azərbaycan dövləti müvafiq tədbirlər görməyə məcbur olacaq. Qarabağdakı erməni separatçılarına ən böyük silah dəstəyini isə Rusiya "sülhməramlıları" da verirdilər. Hələ o zamandan gözlənilirdi ki, sərhəddə təxribatlar baş verəcək. Hətta, həmin vaxtı Azərbaycanın bir sıra hərbi, siyasi və təhlükəsizlik üzrə ekspertləri təhlillər apararaq, bununla bağlı öncədən xəbərdarlıq edirdilər".  Rusiya-Ukrayna müharibəsinə də toxunan Azər Xudiyev qeyd edib ki, hazırda Rusiya Ukraynada hər gün böyük itkilər verir: "Bildiyiniz kimi, hazırda Rusiya Ukraynada hər gün daha da zəifləyir, gücdən düşür. İndi Rusiya həm daxilində, həm də beynəlxalq aləmdə öz nüfuzunu itirir. Bu gün Rusiyada artıq Putin hakimiyyətinə qarşı böyük demoralizasiya formalaşıb. Əlbəttə ki, bütün bunları həll etmək üçün Rusiyanın köhnə klassik avantüra metodunu hərbi avantüraya çəkməkdir. Zənnimcə, bütün bunlar Ukraynanın Rusiyaya qeyri-şərtsiz boyun əymədiyinə və daim başını dik tutduğuna görə baş verir. Azərbaycan dövləti də hər an belə hallara hazır olmalıdır. Azərbaycan öz prinsipial siyasətini yeritməlidir və tədricən Rusiya artıq başa düşməlidir ki, Azərbaycanla diqtə ritorikası ilə danışmaq olmaz".

“Allahdan şəhidlərimizə rəhmət, qazilərimizə şəfa diləyirəm! Azərbaycan dövlətinin və xalqının başı sağ olsun. Bu təxribat gözlənilən idi. Ermənistan uzun müddətdir ki, pozucu fəaliyyət üçün fürsət axtarırdı. Məqsəd atəşkəsin sülh müqaviləsinə çevrilməsinin qarşısını almaqdır”. Sozcu.az xəbər verir ki, bu sözləri Musavat.com-a açıqlamasında Türkiyənin Azərbaycandakı səfirliyinin keçmiş hərbi attaşesi, istefada olan general-mayor Yücel Karauz deyib. General bildirib ki, Ermənistanın yeni sığınacağı, daydayı İrandır: “Həm Ermənistana, həm də Azərbaycana qonşu olan İran bitərəf olmaq əvəzinə, strateji prioriteti Ermənistana verib. İran Ermənistana hər cür - siyasi, diplomatik, hərbi dəstək verir. Bugünkü təxribatda da İranın silahlarından istifadə edildiyi göründü. Təxribatın törədildiyi saatdan indiyə qədər Azərbaycan-Ermənistan-İran sərhədində İran PUA-ları kəşfiyyat işlərini davam etdirir. Bu, onların əlbir olduqlarının sübutudur. Atəşkəs razılaşmasından 30 ay keçməsinə baxmayaraq, Ermənistan verdiyi sözlərə əməl etmir, ikili oyun oynayır, sülh müqaviləsi niyyəti yoxdur. Ermənistan mövcud durumdan qazanmağa çalışır”. Yücel Karauz qeyd edib ki, şəhidlərimizin qanı yerdə qalmayacaq: “Azərbaycan əsgərinin axan 1 damla qanına, Azərbaycan torpağının bir qarışına edilən hücumlara, təxribatlara misli ilə cavab veriləcək. Ermənistan ordusuna birinci səviyyəli həyəcan siqnalı verilib. Bu, təxribatın planlı şəkildə həyata keçirildiyini göstərir. Çünki Ermənistan ordusunda bu səviyyədə hazırlıq olmayıb. Erməni mənbələrində mülki şəxslərin belə silahlandırıldığı, səfərbər edildiyi haqda görüntülər yayılıb. Bu, Azərbaycanın uzatdığı barış əlini geri çevirən Ermənistanın son xətası olacaq. Əminəm ki, Ermənistan dəmir yumruğu bir daha başında hiss edərək ən qısa vaxtda sülh müqaviləsini imzalamaq üçün can atacaq. Hesab edirəm ki, Ermənistan Türkiyənin də prosesə qatılması üçün planlar qurur. Türkiyə sona qədər CAN Azərbaycanın yanında olacaq”.

Laçın istiqamətində düşmənin təxribatı nəticəsində şəhid olan hərbçilərimizdən biri – gizir Vidadi Zalov Abşeron rayonunun Saray qəsəbəsindəndir. O, 17 iyul 1985-ci ildə anadan olub. Vaxtilə Saray qəsəbəsində sovxoz direktoru işləmiş Nizami Zalovun yeganə oğul övladıdır. Vidadi Zalovdan Nizami adlı bir oğlu və Humay adlı bir qız övladı yadigar qaldı. Allah qəni-qəni rəhmət eləsin!/Konkret.az

Ukrayna prezidenti Vladimir Zelenski müdafiə xərclərinin 14,6 milyard dollar artırılmasını nəzərdə tutan qanun layihəsini imzalayıb. Sozcu.az xəbər verir ki, bu barədə Ukrayna Ali Radasının məlumatında deyilir. Ukrayna Ali Radasının deputatı Yaroslav Jeleznyakın sözlərinə görə, bu, büdcədə rekord artımdır. Qanun layihəsinin aprelin 13-də qüvvəyə minəcəyini qeyd edən deputat Ukraynanın tarixində heç vaxt büdcəyə belə əhəmiyyətli dəyişikliklər edilmədiyini bildirib.

Düşmən təxribatının qarşısını alarkən şəhid olanlardan biri Ağstafa rayonundandır. Sozcu.az Report-a istinadən məlumatına görə, Laçın istiqamətində düşmənin təxribatı nəticəsində şəhid olan hərbçilərimizdən biri, Ağstafa rayon Xətai kənd sakini, 1994-cü il təvəllüdlü Həsənov Elşad Qabil oğludur. O, müddətdən artıq həqiqi hərbi xidmətdə olan hərbi qulluqçu olub. Qeyd edək ki, E.Həsənov bir neçə ay öncə ailə həyatı qurub.