Avqustun 5-nə keçən gecə pilotsuz təyyarələr Rusiya bayrağı altında üzən tankerə hücum edib.  Sozcu.az xəbər verir ki, Novorossiysk Dəniz Xilasetmə Koordinasiya Mərkəzindən TASS-a verilən məlumata görə, tankerin yanacağı dağılmayıb. Tankerin özünə zərər dəydiyi dəqiqləşdirilir - maşın otağı zədələnib. Gəmidə 11 nəfər var. İtki olmayıb, ekipaj gəmidən çıxarılmayıb. Hadisə yerinə iki yedək gəmisi gəlib, lakin yedəkləmə məsələsi hələ də həllini tapmayıb. Telegram kanallarında və sosial şəbəkələrdə buna qədər partlayışlar barədə məlumat verilib. Onların Krım körpüsü yaxınlığında baş verdiyi iddia edilsə də, Krım səlahiyyətliləri körpüyə hücum edilmədiyini bildiriblər. Sonradan məlum olub ki, zədələnən Rusiya tankeri "Sig”dir. Novorossiysk Dəniz Xilasetmə Koordinasiya Mərkəzi gəminin adını dəqiqləşdirməyib.

Müsavat Partiyasının Qurultayı yaxın zamanlarda keçiriləcək. Partiyanın Nizamnaməsinə uyğun olaraq növbəti qurultay keçirilməlidir.  Bu sözləri Yenisabah.az-a açıqlamasında Müsavat Partiyası Mərkəzi İcra Aparatının rəhbəri Gülağa Aslanlı deyib. G. Aslanlı bildirib ki, partiyanın ötən məclisində Qurultaya Hazırlıq üzrə Təşkilat Komitəsi yaradılıb və rayon təşkilatlarının nümayəndəlikləri seçildikdən sonra Qurultayın vaxtı haqqında Müsavat Partiyanın Məclisi, yaxud Divanı qərar verə bilər. Müsavat funksioneri partiyanın hazırkı başqanı Arif Hacılının növbəti qurultayda yenidən başqanlığa namizədliyini irəli sürmək hüququnun olmadığını qeyd edib: “Nizamnaməyə uyğun olaraq Arif Hacılı artıq üçüncü dəfə namizədliyini irəli sürə bilməz. Amma kimlərin namizəd ola biləcəyi haqqında indidən fikri söyləmək xeyli çətindir, lakin Arif Hacılıdan başqa Müsavat Partiyasının istənilən üzvünün yeni qurultayda öz namizədliyini irəli sürmək hüququ var”.  G. Aslanlı İsa Qəmbərin yenidən Müsavat başqanlığına namizəd olacağı haqda xəbərləri şərh edərək bildirib ki, kimin namizəd olacağını indidən söyləmək mümkün deyil: “Rayon təşkilatlarında yığıncaqlar keçirildikdən sonra qurultay olacaq. Partiya üzvlərinə vaxt verilir ki, onlar öz namizədlərini irəli sürə bilsinlər. Onda artıq kimlərin namizəd olacağını deyə bilərik”. Xatırladaq ki, mediada gedən məlumatlara görə, 28 sentyabr 2014-cü ildən partiyaya rəhbərlik edən Arif Hacılının sədr vəzifəsindən getməsindən sonra Müsavatın başına yenidən İsa Qəmbərin keçəcəyi iddia olunur. Müsavat liderinin aktiv siyasətə qayıdacağı ilə bağlı son zamanlar bir sıra siqnallar da partiya rəsmiləri tərəfindən verilib.

Azərbaycan və Belarusu təmsil edən kikboksinq üzrə "One Championship" Dünya Qran-prisinin qalibi və yüngül çəkidə mütləq çempion Çingiz Əlləzov "ONE Fight Night 13"də növbəti qələbəsini qazanıb. Sozcu.az report-a istinadən xəbər verir ki, 30 yaşlı döyüşçü Tailandın paytaxtı Banqkokda ermənistanlı Marat Qriqoryana qalib gəlib. Əlləzov kəməri müdafiə döyüşündə 5 raundluq mübarizənin sonunda qalib elan olunaraq, rəqibindən 2013-cü ildəki məğlubiyyətin əvəzini çıxıb. Qeyd edək ki, Çingiz Əlləzov 2023-cü ilin yanvarında dünyanın ən məşhur kikboksinq təşkilatı "One Championship"in çempionu olub. O, "ONE Fight Night-6" turniri çərçivəsində keçmiş yüngül çəki çempionu olan Tailand döyüşçüsü Superbon Sinqh üzərində qələbə qazanıb.

Gəncədə avtomobil elektrik dirəyinə çırpılıb, ölən və xəsarət alanlar var. Sozcu.az Report-a istinadən xəbər verir ki, hadisə Atatürk prospektində qeydə alınıb. "Toyota" markalı avtomobilin idarəetmədən çıxaraq elektrik dirəyinə çırpılması nəticəsində 1 nəfər hadisə yerində dünyasını dəyişib, daha 2 nəfər isə müxtəlif dərəcəli bədən xəsarətləri alıb. Xəsarət alan şəxslər xəstəxanaya yerləşdiriliblər. Faktla bağlı araşdırma aparılır.

Ukrayna müharibənin 528-ci günü üçün Rusiya ordusunun itkiləri haqda məlumatı yeniləyib. Sozcu.az xəbər verir ki, bu barədə Ukrayna Baş Qərargahı məlumat yayıb. Məlumata əsasən, Rusiya indiyə qədər 249 110 hərbçi, 4232 ədəd tank, 8251 ədəd zirehli döyüş maşını, 4943 ədəd artilleriya sistemi, 704 ədəd RYAS (reaktiv yaylım atəş sistemi), 466 hava hücumundan müdafiə sistemi, 315 ədəd hərbi təyyarə, 311 ədəd helikopter, 7422 ədəd avtomobil texnikası, 4116 ədəd PUA, 1347 qanadlı raket, 18 gəmi/qayıq, 730 xüsusi avadanlıq itirib.

Dünya birjalarında neft bahalaşmaqda davam edir. Sozcu.az xəbər verir ki, hazırda “Brent” markalı neftin bir barreli 86,24 dollara, yüngül neftin bir barreli isə 82,82 dollara, "Azəri Layt" markalı Azərbaycan neftinin 1 barreli isə 90,11 satılır.

Zərdab rayonunda ağacları kəsərək təbiətə ziyan vuran şəxslər saxlanılıb. Bu barədə Sozcu.az-a DİN-in Mətbuat Xidmətinin Şirvan regional qrupundan məlumat verilib. Bildirilib ki, Zərdab Rayon Polis Şöbəsinin əməkdaşları tərəfindən keçirilən tədbirlərlə rayonun Siləyli və Yuxarı Seyidlər kəndləri arasında yerləşən torpaq sahəsində qanunsuz olaraq ağac kəsməkdə şübhəli bilinən Bıçaqçı kənd sakinləri Şəmistan Rəsulov və Ramiz Mirzəyev saxlanılıblar. Aparılan tədbirlərlə məlum olub ki, həmin şəxslər qeyd edilən ərazidə 6 ədəd yaş gövdəli qovaq ağacını kəsərək təbiətə 10 min manatdan çox ziyan vurublar. Faktla bağlı Zərdab Rayon Polis Şöbəsində araşdırmalar davam etdirilir.

İsmayıllı rayonunda 19 yaşlı qız və oğlan itkin düşüb. Bu barədə Sozcu.az-a Daxili İşlər Nazirliyinin (DİN) Mətbuat Xidmətindən məlumat verilib. Bildirilib ki, İsmayıllı şəhər sakini, 2004-cü il təvəllüdlü Aytac Hikmət qızı Mayılova və həmyaşıdı, rayonun Kürdmaşı kənd sakini Ağaverdi Tofiq oğlu Xəlilov iyulun 8-dən 9-na keçən gecə yaşadıqları ünvanlardan çıxıb, bir daha geri qayıtmayıblar. Şəkillərdəki şəxsləri tanıyanlardan və ya barəsində məlumatı olanlardan DİN-in “102 Zəng Mərkəzi” xidmətinə, həmçinin İsmayıllı Rayon Polis Şöbəsinin (020)285-11-89 şəhər, (050) 280-45-00, (050) 775-75-74 mobil nömrələrinə zəng edərək məlumat vermələri xahiş olunur.

Şəmkir stansiyasından(Şamxor st) keçən hər kəs bu tikiliyə şahid ola bilər. 1931-ci ildə Şəmkirin sonuncu qaçağı Ramazanoğlu Təhməz bu dəmiryolu vağzalında çalışan kirvəsi Kəsəmənli Orucun planladığı plan əsasında İran pasportu ilə qatarla Türkiyə getməli idi. Amma Ramazanoğlu Təhməzin xəbəri yox imiş ki, kirvəsi Kəsəmənli Oruc Sovet NKVD-sinin təlimatı ilə hərəkət edir. Gecə ilə doğulduğu Qaracaəmirli kəndindən gizli şəkildə bu stansiya gətirilən Qaçaq Təhməz bu gördüyünüz tikilidə gizlədilir. Qatar gəldiyi məqamda qatara mindirilən Təhməz qatarın vaqonunda özündən başqa heç kəsin olmadığını görüb duyuq düşür və hiss edir ki, xəyanətlə üzləşdi. Kirvəsi NKVD ilə əlibir olub, onun ələ keçməsinə yardımçı olub. O qatara mindiyi məqamda qatar əsgərlərlə əhatələnir, qaçaq kimi 10 ildən artıq qanlı döyüşlərdə iştirak etmiş əfsanəvi fədai tələdə idi. Atışmaya girir və öldürüləcəyini görüb, son gülləsi ilə özünü vurur. Bununlada Şəmkirdə qaçaq hərəkatının fəaliyyəti tamamilə susduruldu. Təhməzdən əvvəl Şəmkir qaçaqlarının başçıları Hacı Axund, Quruluqlu Əbdüləli, Ramazanoğlu Rüstəm öldürülmüş, sadəcə Samuxlu Qaçaq Məmmədqasım İrana keçə bilmişdi. Ceyhun Nəbi 

Bu gün aktyor Məmmədrza Şeyxzamanovun anadan olduğu gündür.  O 1915-ci ildə Gəncə şəhərində dünyaya gəlib. İmamzadənin keşikçisi olan atası Hacı İsa bəy bir neçə dəfə ailə qurmuşdu. Sonuncu dəfə Böyükxanım adlı ikiuşaqlı, dul qadınla evlənən Hacı İsa bəyin bu evlilikdən biri Məmmədrza olmaqla daha üç övladı dünyaya gəldi. Aktyorluq həvəsi onu Gəncə Dram Teatrına gətirmişdi. Gənclik illərində bu teatrın səhnəsində fasilələrlə çalışmışdı. Tezliklə aktyorluq sənətinin sirlərini mənimsəyən aktyor məşhurlaşdı. Ona daha mürəkkəb xarakterli rollar həvalə etdilər. Sonralar 30 ilə yaxın Azərbaycan Dövlət Dram Teatrında çalışan aktyor Məmmədrza Şeyxzamanov Azərbaycan və dünya klassiklərinin əsərlərində uğurlu rolların ifaçısı olmuşdur. Qacar, Xosrov ("Vaqif", "Fərhad və Şirin"), İmamyar, Aydın ("Yaşar, "Aydın"), Edqar ("Antoni və Kleopatra"), Hacı Həsən ("Ölülər"), İxtiyar ("İblis") və başqa onlarla rolları ona teatr sahəsində böyük şöhrət qazandırmışdı.  Məmmədrza Şeyxzamanov hansı rolda çəkilməsindən asılı olmayaraq onu özününküləşdirirdi. Elə bilirdin ki, rol onun üçün yazılıb. Rola girməzdi, rol onun daxilində kök salardı və tamaşaçının da ona rəğbəti məhz bu müsbət qəhrəmanların yaratdığı işıqlı auradan mənbə alardı.  M.Şeyxzamanov böyük ekrana ilk dəfə 1955-ci ildə -"Bəxtiyar" filmində Rəcəbov rolu ilə çıxır. Bununla da kino yolunda ilk uğurlu cığır açır. Daha sonra C.Cabbarlı adına "Azərbaycanfilm" kinostudiyasının istehsal etdiyi filmlərin çoxunda çəkilir. "Qızmar günəş altında" Alı kişi, "Leyli və Məcnun"da Dərviş, "Bir qalanın sirri"ndə həkim Eldostu, "Onu bağışlamaq olarmı"da polkovnik Qurbanov, "Qatır Məmməd"də Gəncə qubernatoru, "Nəsimi"də Şeyx Əzəm kimi obrazlar yaradır. Olduqca həssas, nəcib qəlbə malik bu mehriban insanın ekran taleyi hər birimiz üçün əziz və doğmadır. O 25 yanvar 1984-cü ildə dünyaya göz yummuşdur.  Sözcü. az

Əslən Kəlbəcərdən olan tanınmış şair Elşən Əzim Kəlbəcərin mineral sularından olan İstisudan səliqəsiz və lazımsız şəkildə istifadə edən insanlar haqqında yazaraq, həmin yerlərdə qayda-qanun yaradılmasını istəyir.  Elşən Əzimin fikirlərini təqdim edirik: Kəlbəcərin Zülfüqarlı kəndi yaxınlığındakı İstisu bulağından kortəbii şəkildə istifadə olunur. Bu su da içməli və müalicəvidir. İşğaldan əvvəl bulağın ətrafında vanna üçün kiçik kupelər tikilmişdi, vanna qəbul edənlər ordan istifadə edirdilər. Suyun çıxdığı yerdən isə içmək üçün istifadə olunurdu. İşğaldan sonra ermənilər suyun çıxdığı yerdə hovuz düzəldərək bulağın gözündən çimmək üçün istifadə etmişlər. Həmin hovuz isə suyun tərkibindəki mineralların yaratdığı ərp nəticəsində daha da dərinləşib. İndi oraya gedənlər soyunub özlərini hovuza atırlar. Sutkanın böyük bir hissəsində o bulağın gözündə ədəbsizcəsinə, qışqıra-qışqıra çimən adamların ucbatından oradan su götürmək, içmək, qadınların ora yaxınlaşması mümkün deyil. Qeyd edim ki, orada çimənlərin çoxu müalicə məqsədiylə deyil, kirini tökmək üçün çimir. Hətta sabundan istifadə edənləri də gördüm. Deyilənə görə çimənlərin əksəriyyəti orda fəaliyyət göstərən şirkətlərin işçiləridir. Şirkətlər o boyda çayların, su mənbələrinin yanında işçisinə hamam tikə bilmirsə, heç olmasa həmin istisu mənbəyinin yanında hamam tiksinlər, və o sudan çəkərək işçilərinə və digər çimmək istəyənlərə şərait yaratsınlar. Bulağın gözü isə yenə də əvvəlki kimi içmək üçün istifadə olunsun.  Mən bir Kəlbəcər sakini olaraq əlaqədar təşkilatlardan bu məsələyə diqqətli olmalarını istəyirəm. Doğrudur, ərazidə tikinti-quruculuq işləri gedir, gələcəkdə hər şey öz həllini tapacaq, ancaq indidən insanlarda belə bir fikir formalaşıb ki, guya Zülfüqarlı istisuyu içməli və müalicəvi deyil. Bildirirəm ki, bu istisu da digər məşhur istisu bulaqları ilə eyni tərkiblidir. Yalnız Bağırsaq ərazisindəki fontan istisu tərkibinə görə içməli deyil.

Azərbaycan Respublikasının Medianın İnkişafı Agentliyi (MEDİA) Şuşada keçirilmiş “4-cü Sənaye İnqilabı dövründə Yeni Media” mövzusunda Qlobal Media Forumunun iştirakçılarına qarşı sosial şəbəkələrdə aparılan təhdid kampaniyası ilə bağlı bəyanat yayıb. Sozcu.az xəbər verir ki, bəyanatda deyilir: “İyulun 21-23-də Azərbaycanın mədəniyyət paytaxtı Şuşa şəhərində keçirilmiş, dünyanın 49 ölkəsindən 150 xarici qonağın, o cümlədən 34 ölkənin dövlət informasiya agentliyi, 12 beynəlxalq təşkilat, media qurumu rəhbərlərinin, yüksək səviyyəli media ekspertlərinin və jurnalistlərin iştirak etdikləri “4-cü Sənaye İnqilabı dövründə Yeni Media” Qlobal Media Forumu gələcəyə yönəlik ciddi, peşəkar mesajları ilə beynəlxalq ictimai rəydə mühüm əhəmiyyət kəsb edən tarixi hadisə kimi xarakterizə olunmaqdadır”. Həmçinin bildirilir ki, Forumun keçirilməsində məqsəd az qala işıq sürəti ilə yeniləşən, texnoloji innovasiyalara şahidlik edən dünyamızda insanlara ictimai əhəmiyyətli xəbərlər verən jurnalistikanın gələcək inkişaf istiqamətlərini müzakirə etmək olub. Forumda rəqəmsal dövrdə jurnalistika və kommunikasiyada yeni alətlər və bu kontekstdə medianın rolu barədə ətraflı müzakirələr aparılıb, ənənəvi medianın bugünkü rolu, gələcəyi, yeni tendensiyalar fonunda jurnalistikada yaranan çətinliklər və aktuallaşan yeni istiqamətlər, eləcə də bu sahədə rəqəmsal alətlərin tətbiqinin yaratdığı nəticələr diqqət mərkəzində olub. “Lakin təəssüflər olsun ki, “4-cü Sənaye İnqilabı dövründə Yeni Media” mövzusunda Qlobal Media Forumunun mahiyyətini bilərəkdən siyasiləşdirməyə çalışan Ermənistan hökuməti və ona yaxın dairələr öz məhdud merkantil maraqlarından çıxış edərək bu mötəbər tədbirdə iştirak etmiş yüksək səviyyəli ekspertlər, beynəlxalq ictimai rəydə nüfuza malik olan jurnalistlər haqqında sosial şəbəkələrdə qarayaxma və nifrət kampaniyası aparır, onların reputasiyasına kölgə salmağa cəhd edərək media etikası ilə heç bir halda uyuşmayan mövqe sərgiləyirlər. Biz Azərbaycan Respublikasının Medianın İnkişafı Agentliyi olaraq Azərbaycan jurnalistləri adından belə qarayaxma kampaniyasını pisləyir, bunu azad sözə və jurnalistikaya qarşı terror kimi qiymətləndirir, peşəkar prinsipləri rəhbər tutaraq keçirilmiş və yalnız müasir medianın problemlərinə, inkişaf perspektivlərinə həsr olunmuş forumun nifrət nitqinə alət edilməsinin yolverilməz olduğunu bəyan edirik”, - deyə bəyanatda qeyd olunur.

Bakıda evdən 24,5 min manatlıq oğurluq edən yeniyetmə saxlanılıb. Bu barədə DİN-in Mətbuat xidmətindən bildirilib. Binəqədi Rayon Polis İdarəsinin 43-cü Polis Bölməsi əməkdaşlarının keçirdikləri əməliyyat tədbiri nəticəsində avqustun 1-nə keçən gecə Binəqədi qəsəbəsindəki evlərin birindən seyfdən 7 500 manat pul və 17 000 manat dəyərində qızıl-zinət əşyalarını oğurlamaqda şübhəli bilinən Bakı şəhər sakini olan bir yeniyetmə müəyyən olunaraq saxlanılıb. Faktla bağlı araşdırma aparılır.

Son 2 gündə Baş Prokurorluq yanında Korrupsiyaya Qarşı Mübarizə Baş İdarəsi Cəlilabad və Tərtər rayon icra hakimiyyətlərində əməliyyat keçirib. Və hər iki rayonun baş memarı saxlanılıb.  Maraqlı məqamsa ondan ibarət idi ki, Cəlilabad Şəhər Bələdiyyəsinin sədri də keçirilən əməliyyat nəticəsində saxlanılıb. Bu isə icra hakimiyyətləri və bələdiyyələrin torpaq satmaq işlərində ortaq hərəkət etməsi şübhəsini daha da artırır. Baxmayaraq ki, hüquqi cəhətdən icra hakimiyyətlərinin buna birbaşa səlahiyyətləri çatmır.  Eyni zamanda bələdiyyələrin də torpaq satmaq barədə səlahiyyətləri xeyli məhdudlaşdırılıb. Belə ki, 2007-ci ildən etibarən bələdiyyələrin müstəqil şəkildə torpaq ayırmaq və satmaq səlahiyyəti yoxdur. İstənilən bələdiyyə torpağı müsabiqə yolu və strateji məqsədlə və hərrac yolu ilə satıla bilər.  Amma görünən odur ki, bəzən mövcud qadağalar da pozulur. Və bələdiyyə, bəzi hallarda isə hətta dövlət fonduna aid torpaqları dələduzluq yolu ilə ayrı-ayrı işbazlara satırlar.  Millət vəkili Fazil Mustafa Bizim.Media-ya açıqlamasında bildirib ki, belə əməliyyatların keçirilməsi korrupsiyaya qarşı mübarizənin vacib elementlərindəndir: “Maddi-məsul şəxslərin məsuliyyətə cəlb olunması və onlara qarşı müəyyən addımların atılması dövlət postundan istifadə edərək korrupsiya ilə məşğul olan qüvvələrin sarsıdılmasına xidmət edir. Bütün hallarda bu addımlar dəstəklənməlidir. Çünki, bəzi üzdəniraq məmurların yaratdığı çirkin aura dövlətimizin və cəmiyyətimizin imicinə güclü zərbə vurur.  Çox təəssüf ki, uzun illərdir ki, ölkəmizdə torpaq alveri davam edir. Əvvəllər bunu bələdiyyələr edirdisə, indi bu işlə yerli icra orqanları məşğuldur. Son həbslər də göstərir ki, hələ də biz özümüzə normal bir hüquqi mexanizm qura bilməmişik”. 

Azərbaycanda satılan çörəyin tərkibinə donuz və insan tükünün qatılması iddiaları yenidən gündəmə gəlib. Məsələ ilə bağlı Azad İstehlakçılar Birliyinin sədri Eyyub Hüseynov bildirib ki, çörəyə donuz və insan tükünün qatılmasına rəsmi olaraq icazə var və buna icazə verə bilən insanlar isə susurlar: “Bu qatqılar yumşaq və elastik çörəklərdə mövcuddur”. Qeyd edək ki, bir müddət əvvəl sözügedən iddia ilə bağlı Azərbaycan Respublikasının Qida Təhlükəsizliyi Agentliyindən (AQTA) bildirilib ki, yayılan məlumatlar qeyri-ciddidir və iddia edilən məsələ ilə bağlı əgər hansısa bir əmtəə nişanında, çörək istehsalı müəssisəsində, satış şəbəkəsində fakt varsa, xahiş olunur agentliyə təqdim etsinlər. AQTA həmin məlumatları dərhal nəzarətə götürərək araşdıracaq. Baku TV-nin mövzu ilə bağlı hazırladığı süjeti təqdim edirik:

İmişlidə ödəmə terminalının pul qutusu oğurlanıb. Bu barədə Sozcu.az-a DİN-in Mətbuat xidmətindən bildirilib. Belə ki, DİN-in Baş Cinayət Axtarışı İdarəsi və İmişli Rayon Polis Şöbəsi əməkdaşlarının birgə keçirdikləri əməliyyat tədbiri nəticəsində rayonun Qızılkənd kəndi ərazisindəki mağazaların birindən 70 manat pul, 2575 manat dəyərində tütün məmulatı və orada quraşdırılan ödəmə terminalından içərisində 9200 manat olan pul qutusunu oğurlamaqda şübhəli bilinən Ağdam rayon sakini, əvvəllər məhkum olunmuş Turan Rzayev və Bakı şəhər sakini Eyyub Məmmədov saxlanılıblar. Fakt üzrə araşdırma aparılır.

Gədəbəydə 56 yaşlı kişi uçurumdan yıxılaraq ölüb. Sozcu.az xəbər verir ki, hadis ötən gün baş verib. Belə ki, rayon sakini, 1967-ci il təvəllüdlü Tofiq Quliyev Pərvin Məmmədliyə məxsus fərdi yaşayış evinin həyətində ot biçərkən öz ehtiyatsızlığından uçurumun kənarından yıxılıb. Təxminən 10 metr hündürlükdən yıxılan şəxs ölüb.  Faktla bağlı Gədəbəy rayon prokurorluğunda araşdırma aparılır. 

Rusiya inkişaf etməkdə olan ölkələri asılı vəziyyətə salmaq üçün onlara ucuz taxıl təklif edir. Sozcu.az xəbər verir ki, bunu Avropa Birliyinin xarici işlər və təhlükəsizlik siyasəti üzrə ali nümayəndəsi Jozep Borrell deyib. “Dünya tədarükün kəsilməsi və qiymət artımı ilə məşğul olduğu bir vaxtda Rusiya aşağı qiymətlərlə taxıl tədarükü üçün ikitərəfli təkliflərlə həssas ölkələrə müraciət edir”, - Borrell bildirib. Onun sözlərinə görə, AB sanksiyaların üçüncü ölkələrin ərzaq təhlükəsizliyinə təsir etməməsi üçün hər cür səy göstərib: “Rusiyanın üçüncü ölkələrə ərzaq məhsulları və gübrə ixracına qarşı heç bir sanksiya yoxdur”.

Bakıda “Kubinka” adlanan ərazidə yaşı 200-dən çox olan binaların söküntüsünə başlanılıb. Sozcu.az xəbər verir ki, Cəlil Məmmədquluzadə və Zivərbəy Əhmədbəyov küçələrinin kəsişməsində yerləşən ərazidə təhlükəli binaların sakinlərinin köçürülməsi həyata keçirilib. Sakinlərə sökülən evləri müqabilində 11 mərtəbəli binalarda öz evlərinin sahəsindən 20 m² əlavə sahəsi olan mənzillər və tikinti prosesi başa çatana qədər kirayə pulu təklif edilib. Sakinlərin böyük bir qismi bununla razılaşaraq evlərini tərk ediblər. Lakin evlərini tərk etməkdən imtina edən, əlavə kvadrat metr və ya daha çox pul istəyən sakinlər də var. “Kubinka”da tikinti sahəsi 5,5 hektardır və ümumən tikiləcək sahə isə 170 min kvadrat metrdir. Ərazidə 15 bloklu 11 bina inşa ediləcək. Hər bir binada mənzillərin hündürlüyü 3,65 metr olacaq. Hər bir bina 3 liftlə təmin ediləcək. Ərazidə həmçinin 2500 ağac da əkiləcək. Park və idman meydançalarının da tikilməsi nəzərdə tutulub.

Son vaxtlar dünya bazarında düyünün bahalaşması müşahidə olunur. Bu da düyü istehsal edən ölkələrin bu məhsulun ixracına tətbiq etdiyi qadağalardır. Dünyanın ən böyük düyü istehsalçısı Hindistanın ixraca qoyduğu qadağadan sonra, Birləşmiş Ərəb Əmirlikləri və Rusiya da dünyada ən çox tələbat duyulan məhsulun ixracını dayandırıb. Dünyada düyünün bahalaşması Azərbaycan bazarına necə təsir edəcək? Məsələ ilə bağlı KONKRET.az-a açıqlama verən Liberal İqtisadçılar Mərkəzinin sədri Akif Nəsirli bildirib ki, ölkəmizdə də bahalaşmadan qaçmaq mümkün olmayacaq: “Azərbaycan iqtisadiyyatı inhisarçı iqtisadiyyat olduğuna görə, dünyada baş verən ucuzlaşmalar ölkə daxilindəki qiymətlərə təsir eləmir. Amma dünyada məhsullar bahalaşan kimi dərhal Azərbaycan bazarına təsir edir. Rəqabət mühiti olmadığından dünyada qiymətlər ucuzlaşanda, sahibkarlar həmin ucuzlaşmadan istifadə edib mənfəətlərini genişləndirirlər. Amma qiymətləri azaltmırlar. Lakin qiymətlərin bahalaşması haqqında məlumatı alan kimi, həmin bahalaşan məhsulların partiyası Azərbaycana girməmiş ölkədə qiymətlər bahalaşır. İxracatçıların məhsulun satışına məhdudiyyət qoyması dünya bazarında düyünün qiymətinin bahalaşmasına gətirib çıxaracaq. Üstəgəl Ukrayna böhranı da düyünün bahalaşmasında əsas faktorlardan biridir. Ukrayna faktoru bir başa olmasa da, dolayısı ilə düyü bazarına təsir edir. Afrika ölkələrində buğda tapmayanlar düyü yeyir. Bu da düyüyə tələbatı artırır. Həm də bu il dünyada düyü istehsalında məhsuldarlıq aşağı düşüb. Hardasa dünyada əvvəlki illərə nisbətən 9 milyon ton az düyü istehsal edilib və bu, sözsüz ki, dünya bazarına təsir edəcək, düyünün bahalaşmasına səbəb olacaq. Bu da təbii ki, Azərbaycanda düyünün bahalaşmasına gətirib çıxardacaq”. Daha sonra Akif Nəsirli duru yağlara olan tələbatdan danışdı: “Bu məhsulun qiyməti onsuz da Azərbaycanda kifayət qədər bahadır. Mən hesab eləmirəm ki, yaxın günlərdə duru yağların qiymətinin bahalaşmasına getsinlər. Çünki Azərbaycan daxilində bitki yağlarını dünya bazarından ən azı iki dəfə baha satırlar. Ona görə də hələlik kiçik bahalaşmalar Azərbaycan bazarına təsir eləməyəcək. Amma payıza doğru əgər bitki yağlarının da qiyməti bahalaşacaqsa Azərbaycan bazarına təsir edəcək. Ölkəmizdə bitki yağlarının qiyməti bir qədər də artacaq”.

İyulun 22-də başlayan və avqust ayı boyunca davam edəcək Venera retrosu bəzi bürclərə çətinliklər yaşadacaq. Kimisi eşqdə, kimisi isə karyerasında çətinliklərlə üzləşəcək. Hətta bəzi bürcün nümayəndələrinin keçmiş sevgililəri yenidən peyda olacaq. Sozcu.az avqust ayının ən şanssız bürclərini sizə təqdim edir. Buğa Buğa bürclərinin eşq həyatında problemlər yarana bilər. Onların unutduqları köhnə sevgililəri bir anda peyda ola, tərəfdaşları ilə münaqişəyə səbəb ola bilər. Veneranın geriləməsinin mənfi təsirlərinə baxmayaraq ortaya çıxa biləcək problemləri həll etmək üçün Buğa bürclərinin ünsiyyət yönümlü olması faydalıdır. Şir Şirlər bu dövrdə özünə inamla bağlı problemlər yaşaya bilər. Şirlər bu mərhələni rahat keçmək üçün qorxunu bir kənara qoymalıdırlar. Venera retrosu zamanı çətinliklərin öhdəsindən gəlmək üçün arxayın olmalıdırlar. Əqrəb Əqrəb bürcü, karyera hədəflərinə görə özlərini sorğuladıqları bir dövrə girəcəklər. Bu dövrdə Əqrəblər öz düşüncələrini və ideallarını yaxşı ayırd etməli və buna uyğun hərəkət etməlidirlər. Bu dönəm Əqrəblərin də başı köhnə sevgilisinə qarışa bilər. Diqqətli olmağınızda fayda var. /tribunainfo.az/

Məşhur müğənni Enrike İqlesiasa uzun illərdir birlikdə olduğu keçmiş tennis ulduzu Anna Kurnikova tərəfindən qadağa qayulub. Sozcu.az olay-a istinadən bildriir ki, səhnəyə çıxan bəzi qadın pərəstişkarları ilə öpüşən ifaçıya bir daha bunu etməməsini tapşırıb. Kurnikova sevgilisinin bu davranışına görə onların da xəstələnəcəyindən narahat olub.

Harvard Universitetinin alimləri zeytun yağının müntəzəm istehlakı demensiyanın inkişaf riskini 8-14, xəstəlikdən ölmə riskini isə 28 faiz azalda biləcəyini müəyyən ediblər. Sozcu.az lent.az-a istinadən bildirir ki, mütəxəssislər 1990-cı ildən 2018-ci ilə qədər ürək-damar xəstəliyi və ya xərçəngi olmayan 60.000 qadın və 31.000 kişi üçün tibbi qeydləri araşdırıblar. Təxminən 30 il ərzində onlar və sağlamlıqları izlənilib. Məlum olub ki, mayonezi bir çay qaşığı zeytun yağı ilə əvəz etsəniz, demansdan ölmək riskini 8-14 faiz azalda bilərsiniz. Hər gün bu məhsuldan yarım xörək qaşığı istifadə etsəniz, bu xəstəlikdən ölmək riski 28 faiz daha azdır. Alimlərin fikrincə, bu kəşf yaşla bağlı xəstəliklərin çox olması səbəbindən vacibdir. Ümumdünya Səhiyyə Təşkilatının (ÜST) məlumatına görə, dünyada 55 milyondan çox insan demansiyadan əziyyət çəkir. Həkimlərin hər il təxminən 10 milyon yeni yoluxma halı qeydə aldığı təxmin edilir. Demans həm də yaşlı əhali arasında yeddinci əsas ölüm səbəbidir. Ola bilsin ki, yeni kəşf tibbə bu xəstəliyin qarşısını almaq üçün effektiv üsullar hazırlamağa kömək edəcək.

"Real"ın baş məşqçisi Karlo Ançelotti yarımmüdafiəçi Arda Gülərin zədədən sonra vəziyyəti ilə bağlı danışıb. Sozcu.az xəbər verir ki,  18 yaşlı oyunçu Madrid klubu ilə məşqdə zədələnib. Türkiyə millisinin üzvü klubun ABŞ-dakı təlim-məşq toplanışını vaxtından əvvəl başa vurub. Yaxın vaxtlarda o, Madridə qayıdacaq və müalicəyə başlayacaq. Ançelotti mətbuat konfransında Gülerin son durumu ilə bağlı deyib: “Gülerin zədəsi ilə bağlı durum o qədər də ciddi deyil. Düşünürəm ki, Arda maksimum bir ay xəstəxanada qalacaq". Qeyd edək ki, A.Güler iyulda "Real"la 6 illik müqavilə imzalayıb.