Masallı rayonunda 15 yaşlı oğlan suda boğularaq ölüb. Hadisə rayonun Qəriblər kəndində qeydə alınıb. Belə ki, 2008-ci il təvəllüdlü Nurlan Novruzov Viləşçay su tutumunda çimərkən boğulub. Faktla bağlı rayon prokurorluğunda araşdırma aparılır.

Türkiyə Silahlı Qüvvələrinin İraqın şimalında keçirdiyi antiterror əməliyyatı nəticəsində PKK terror qruplaşmasının “rəhbər şəxsi” məhv edilib. Bu barədə Türkiyə Milli Müdafiə Nazirliyindən bildirilib. Qeyd olunub ki, “Batman Serzan Mava” kod adlı Ferit Yüksel zərərsizləşdirilib.

Ağcabədidə toyda kütləvi zəhərlənmə olub. Rəncbərlər kəndində yerləşən toy mərasimində 34 nəfər, o cümlədən 16 yetkinlik yaşına çatmayan şəxs qidadan zəhərlənib. Onlar xəstəxanaya yerləşdirilib. Zəhərlənən şəxslərin bir çoxuna ilkin tibbi yardım göstərilib və evə buraxılıb./APA

Fövqəladə Hallar Nazirliyi (FHN) küləkli hava şəraiti ilə əlaqədar əhaliyə növbəti dəfə müraciət edib. FHN-dən daxil olan müraciətdə deyilir: "Milli Hidrometeorologiya Xidmətinin məlumatına görə, bu gün və sabah Bakı şəhəri və Abşeron yarımadasında külək əsəcəyi, arabir güclənəcəyi gözlənilir. Yay fəslində insanların istirahət üçün çimərliklərə üz tutduğunu nəzərə alaraq Fövqəladə Hallar Nazirliyi küləkli havada dənizə girməyin təhlükəli olduğunu bir daha xatırladır. Həmçinin, güclü külək baş verən yanğınların söndürülməsi əməliyyatını çətinləşdirdiyindən küləkli hava şəraitində yanğın təhlükəsizliyi qaydalarına xüsusilə ciddi riayət edilməlidir".

Primorsk diyarından, Kamçatkadan və Saxalindən səfərbər edilmiş rusların qohumları Rusiya Müdafiə Nazirliyi, eləcə də rayon rəhbərlərinə şikayət ərizəsi ilə müraciət ediblər. Ərizədə bildirilir ki, onların qohumları, yəni 60-cı əlahiddə motoatıcı briqadanın hərbçiləri ön cəbhədə döyüşməkdən imtina etdiklərinə görə əvvəlcə bir neçə gün yeməksiz və susuz həbsdə saxlanılıb, sonra isə naməlum istiqamətə aparılıblar. Sozcu.az xəbər verir ki, bu barədə “Sibir.Realii” məlumat yayıb. Məlumata görə, hazırda onlarla əlaqə yoxdur. Sübut kimi əsgərlərin yaxınları zirzəmidə bir neçə nəfərin olduğu video yayıblar. Şikayətçilər iddia edirlər ki, komandanlıq səfərbər olunanları “geri dönməyəcəkləri bir hücum”a apardacağını vəd edib. Hərbçilərin yaxınlarının sözlərinə görə, əsgərlər hərbi hissədə olduqları on ay ərzində lazımi hazırlıq keçməyiblər.

Türkiyəli aktyor Serkan Altunorakın yeni layihəsi bəlli olub. Sozcu.az Axşam.az-a istinadən xəbər verir ki, aktyor "Kanlı yayın" serialında rol alacaq. O, layihədə "Vural" obrazına həyat verəcək. Serialda aktyor Caner Cindoruk isə "Nejat" obrazını ifa edəcək. Qeyd edək ki, ekran işinin digər baş rolunu Bergüzar Korel canlandıracaq. Serkan və Caner "Maviye sürgün" serialında da birgə rol alıblar.

Alimlər müəyyən ediblər ki, dünyanın bir çox region və ölkələrində nəqliyyatda və ictimai yerlərdə siqaret çəkməyə qanuni qadağaların tətbiqi ürək-damar xəstəliklərinə yoluxma hallarının təxminən 10 faiz, həmçinin ağ ciyər xəstəlikləri hallarının da 17 faiz azalmasına səbəb olub. Sozcu.az lent.az-a istinadən bildirir ki, tədqiqatçıların nəticələri "JAMA Network Open" jurnalındakı məqalədə dərc olunub. "Biz ilk dəfə olaraq siqaret qadağalarının qlobal ictimai sağlamlığa təsirini sistematik şəkildə öyrəndik. Təhlillərimiz göstərdi ki, siqaret çəkmə qadağasının tətbiqi bütün növ ürək və damar xəstəliklərinə tutulma hallarını 10 faiz, ağ ciyər xəstəliklərini isə 17 faiz azaldıb. Həmçinin bu xəstəliklərlə insanların xəstəxanaya yerləşdirilmə nisbəti 9 faiz aşağı düşüb", - tədqiqatçılar yazır. Bundan əlavə, siqaret çəkmə qadağaları vaxtından əvvəl doğuşların 6 faiz azalmasına, həmçinin siqaret çəkməyənlərdə ölü doğum və digər hamiləlik fəsadlarının ehtimalının da aşağı düşməsinə gətirib çıxarıb. 2005-ci ildə qüvvəyə minmiş Tütünlə Mübarizə üzrə Ümumdünya Səhiyyə Təşkilatının Çərçivə Konvensiyasının əsas bəndlərindən biri ölkələrin hakimiyyət orqanlarına "nəqliyyatda, ictimai yerlərdə və qapalı məkanlarda əhalini tütün tüstüsünün təsirindən qorumaq üçün bütün lazımi tədbirləri görməyi" tövsiyə edir.

Ukrayna Futbol Federasiyası Rusiyanın Sankt-Peterburq şəhərində keçirilən "PARI Premyer Kuboku"nun iştirakçılarına etirazını bildirib. Sozcu.az xəbər verir ki, federasiya bununla bağlı bəyanat yayıb. Bəyanatda Azərbaycan klubu “Neftçi”, eləcə də “Srvena Zvezda” (Serbiya) və “Fənərbaxça” (Türkiyə) Rusiyada təşkil olunan turnirdə iştirakına görə qınanıb: "Ukrayna Futbol Assosiasiyası “Neftçi” (Bakı), “Srvena Zvezda” (Serbiya) və “Fənərbaxça” (Türkiyə) komandalarının Rusiyanın Sankt-Peterburq şəhərində keçirilən yoldaşlıq turnirində iştirakını qətiyyətlə pisləyir. Bir daha Avropanın və bütün dünyanın futbol ictimaiyyətinə xatırladırıq ki, Rusiyada futbol həmişə yerli kriminal rejimin təbliğat vasitəsi kimi istifadə olunub. Uzun illərdir ki, bu təbliğat və futbol onun ayrılmaz atributu kimi Ukraynaya qarşı işləyir və Ukraynada hər şeyi məhv etmək məqsədi daşıyır. Rusiya Futbol İttifaqı nə rus qoşunlarının Ukrayna ərazisinə ilk dəfə hücum etdiyi 2014-cü ildən, nə də genişmiqyaslı işğalın başladığı 24 fevral 2022-ci ildən sonra Rusiyanın kriminal avtoritetlərinin hərəkətlərini pisləmir. Bu da yalnız belə şərh edilə bilər: Rusiya Federasiyasının Ukraynaya qarşı bütün cinayətlərə səssiz dəstəyi". Xatırladaq ki, iyulun 1-də start götürən turnirdə sözügedən klublarla yanaşı Rusiya "Zeni"i də iştirak edir. Yarışa iyulun 15-də yekun vurulacaq.

Dünya birjalarında neft qiymətləri yenidən ucuzlaşıb. Sozcu.az xəbər verir ki, hazırda “Brent” markalı neftin bir barreli 78,01 dollara, yüngül neftin bir barreli isə 73,36 dollara satılır.

Bakıda 37 yaşlı şəxs bibisi oğlunu bıçaqlayıb. Sozcu.az xəbər verir ki, hadisə iyulun 10-u saat 03 radələrində paytaxtın Sabunçu rayonu, Maştağa qəsəbəsində qeydə alınıb. Belə ki, 1986-cı il təvəllüdlü Rahib Niyyətov onunla birgə yaşayan, 1993-cü il təvəllüdlü Orxan Hümbətova aralarında yaranan mübahisə zəminində bıçaq xəsarəti yetirib. Daha sonra yaralı xəstəxanaya yerləşdirilib. Faktla bağlı Sabunçu Rayon Polis İdarəsində Cinayət Məcəlləsinin 126.1-ci (qəsdən sağlamlığa ağır zərər vurma) maddəsi ilə cinayət işi başlanıb.

Ukrayna müharibənin 502-ci günü üçün Rusiya ordusunun itkiləri haqda məlumatı yeniləyib. Sozcu.az xəbər verir ki, bu barədə Ukrayna Baş Qərargahı məlumat yayıb. Məlumata əsasən, Rusiya indiyə qədər 234 440 hərbçi, 4085 ədəd tank, 7966 ədəd zirehli döyüş maşını, 4371 ədəd artilleriya sistemi, 668 ədəd RYAS (reaktiv yaylım atəş sistemi), 414 hava hücumundan müdafiə sistemi, 315 ədəd hərbi təyyarə, 309 ədəd helikopter, 6937 ədəd avtomobil texnikası, 3686 ədəd PUA, 1271 qanadlı raket, 18 gəmi/qayıq, 632 xüsusi avadanlıq itirib.

Gəncədə ölümlə nəticələnən yol nəqliyyat hadisəsi baş verib. Sozcu.az Report-a istinadən xəbər verir ki, hadisə şəhərin Atatürk prospekti ilə S.Vurğun küçəsinin kəsişməsində qeydə alınıb. Samux rayon sakini E.İlyasov idarə etdiyi "Mersedes" markalı avtomobil ilə yolu keçmək istəyən piyada, 1970-ci il təvəllüdlü Gəncə şəhər sakini Rahilə Hüseynovanı vurub. Nəticədə piyada aldığı xəsarətlərdən yerləşdirildiyi xəstəxanada ölüb. R.Hüseynova Gəncə şəhər Mənzil-Kommunal Təsərrüfatı və İstehsalat Birliyinin işçisi olub. Faktla bağlı araşdırma aparılır.

Ukrayna Prezidenti Vladimir Zelenski ölkəsinə yardımı davam etdirməyi lazım bilməyən amerikalılara müraciət edib. Sozcu.az xəbər verir ki, o, bu barədə ABC Nyus telekanalına müsahibəsində qeyd edib. “Əgər müharibəni Ukraynanın bahasına başa vurmaqdan, yəni ərazilərimizdən imtina etməyimizdən danışırıqsa, düşünürəm ki, Bayden bu şəkildə müharibəni beş dəqiqəyə də bitirə bilər”, - o bildirib. Onun sözlərinə görə, Kiyev buna razı olmazdı.

Gürcüstanın keçmiş prezidenti Mixail Saakaşvili ukraynalı jurnalist Yekaterina Solyara məktub yazaraq Rusiya prezidenti Vladimir Putini onu məhv etmək cəhdində ittiham edib. Sozcu.az xəbər verir ki, məktub 6 iyul 2023-cü il tarixində yazılıb. “Xeyirxahlığınıza və dəstəyinizə görə təşəkkür edirəm. Mən həmişə sənə baxıram və sən mənə enerji verirsən. Mən Putinin şəxsi məhbusuyam və o mənim məhvimlə şəxsən məşğuldur”, – deyə Saakaşvili qeyd edib.

İyulun 8-i saat 23:40-dan iyulun 9-u saat 06:05-dək Ermənistan silahlı qüvvələrinin bölmələri Basarkeçər rayonunun Yuxarı Şorca və Zərkənd, Aqaraq rayonunun Karçevan yaşayış məntəqələri istiqamətlərində yerləşən mövqelərindən Azərbaycan Ordusunun Kəlbəcər rayonunun Bəzirxana və Dəmirçidam, Naxçıvan Muxtar Respublikasının Ordubad rayonunun Kilit yaşayış məntəqələri istiqamətlərində yerləşən mövqelərini müxtəlif çaplı atıcı silahlardan fasilələrlə atəşə tutub. Bu barədə Sozcu.az-a Azərbaycanın Müdafiə Nazirliyindən bildirilib. İyulun 8-i saat 22:35-dən 23:10-dək Rusiya sülhməramlılarının müvəqqəti yerləşdiyi Azərbaycan ərazisindəki qeyri-qanuni erməni silahlı dəstələrinin üzvləri tərəfindən Ordumuzun Şuşa və Kəlbəcər rayonları istiqamətlərində yerləşən mövqeləri də atəşə tutulub. Bölmələrimiz tərəfindən bu istiqamətlərdə cavab tədbirləri görülüb. Bundan əlavə, Ermənistan silahlı qüvvələrinə məxsus kvadrokopterlər Ordumuzun Naxçıvan Muxtar Respublikası və Laçın rayonu ərazilərində yerləşən mövqeləri, qeyri-qanuni erməni silahlı dəstələrinə məxsus kvadrokopter isə Xocavənd rayonu Tağaverd kəndi istiqamətində yerləşən bölmələrimizin mövqeləri üzərində kəşfiyyat xarakterli uçuşlar aparmağa cəhd göstərib. Görülən təxirəsalınmaz tədbirlər nəticəsində mövqelərimiz üzərində uçuşlar həyata keçirməyə cəhd göstərən kvadrokopterlərin fəaliyyətinin qarşısı alınıb. Eyni zamanda, mühəndis texnikasının cəlb olunması ilə müxtəlif istiqamətlərdə təminat yollarının genişləndirilməsi, səngərlərin qazılması, sığınacaqların hazırlanması, eləcə də döyüş mövqelərinə müşahidə kameralarının quraşdırılmasına cəhd edən qeyri-qanuni erməni silahlı dəstələrinin fəaliyyəti bölmələrimiz tərəfindən görülən tədbirlər nəticəsində dayandırılıb.

Ukrayna tərəfi müharibə başlayandan bəri 233 mindən çox rus əsgərinin öldürüldüyünü açıqlayıb. Sozcu.az xəbər verir ki, bu barədə Ukraynanın Quru Qoşunları Komandanlığı məlumat yayıb. "Bu, çətin 500 gündür, lakin azadlığımız və birliyimiz üçün əbədi mübarizəmizin simvoludur. Müharibə başlayandan bəri qarşı tərəfin 233 mindən çox şəxsi öldürülüb, qarşı tərəfə aid 4000-dən çox tank, 8000-ə yaxın zirehli texnika, 4346 artilleriya sistemi, 315 təyyarə və 309 helikopter, 410 hava hücumundan müdafiə sistemi və 3000 hava hücumundan müdafiə sistemi, 666 pilotsuz uçuş aparatı, 1271 qanadlı raket, 6 min 914 texnika, 619 xüsusi texnika və 18 gəmi məhv edilib”, - rəsmi məlumatda deyilir. Rusiya Müdafiə Nazirliyi isə itkilərlə bağlı məlumatları təsdiqləməyib.

Şabran rayonunda ağır yol qəzasında 3 nəfər ölüb, daha 2 nəfər yaralanıb. Sozcu.az xəbər verir ki, hadisə Bakı-Quba-Rusiya ilə dövlət sərhədi avtomobil yolunun Şabran rayonundan keçən hissəsində qeydə alınıb. Hadisə nəticəsində 1999-cu il təvəllüdlü Səfərov Əli Sərvan oğlu və 1980-ci il təvəllüdlü Talışınski Kamil Davud oğlu müxtəlif dərəcəli xəsarətlər alıblar. Yaralılar Şabran Rayon Mərkəzi Xəstəxanasına aparılıb. Qəza zamanı ölmüş daha 3 nəfərin kimliyi müəyyənləşdirilir. Onların meyitləri müayinə olunmaq üçün Səhiyyə Nazirliyinin Məhkəmə-Tibbi Ekspertiza və Patoloji Anatomiya Birliyinin Şabran rayon şöbəsinə təhvil verilib. Faktla bağlı araşdırma aparılır.

Erməni silahlılarının ərazilərimizdə səngərlər qazması, sığınacaqlar hazırlaması bölmələrimiz tərəfindən dayandırılıb. Bu barədə Sozcu.az-a Azərbaycanın Müdafiə Nazirliyindən bildirilib. Qeyd edilir ki, mühəndis texnikasının cəlb olunması ilə müxtəlif istiqamətlərdə təminat yollarının genişləndirilməsi, səngərlərin qazılması, sığınacaqların hazırlanması, eləcə də döyüş mövqelərinə müşahidə kameralarının quraşdırılmasına cəhd edən qeyri-qanuni erməni silahlı dəstələrinin fəaliyyəti bölmələrimiz tərəfindən görülən tədbirlər nəticəsində dayandırılıb.

Rusiya Dövlət Dumasına təqdim olunmuş qanun layihəsində postsovet ölkələrdə Rusiya təhsil sistemi və təhsil proqramları üzrə, həmçinin Rusiyada hazırlanmış müəllimlərin tədris etməsi ilə fəaliyyət göstərən məktəblərin açılması nəzərdə tutulur. Rusiya rəsmiləri bildiriblər ki, belə məktəblər artıq Qazaxıstanda açılıb, Tacikistanda və Qırğızıstanda artıq açılmasına hazırlıq gedir, növbəti məktəblərin isə Azərbaycanda və Ermənistanda açılması nəzərdə tutulur.  Təhsil eksperti Kamran Əsədov Qaynarinfo-ya açıqlamasında bildirib ki, Azərbaycan orta məktəblərində tədrisin Rusiya təhsil sistemi və təhsil proqramına uyğun keçirilməsi mümkün deyil:  "Azərbaycanda 4432 orta məktəb fəaliyyət göstərir. Onların da 340-da dərslər rus bölməsi üzrə keçirilir. Azərbaycan Konstitusiyası və "Təhsil haqqında" qanuna görə ölkə ərazisində istər rus, istərsə Azərbaycan dili bölməsi olsun, vahid tədris proqramından istifadə olunur. Yalnız təsisçilərin Pedoqoji Şurasının birbaşa qərarı əsasında tədris proqramının müəyyən faizi həmin ölkənin tədris proqramı əsasında keçirilə bilər. Məsələn, İstanbul Liseyi, Dəyanət Liseyində vəziyyət belədir. Onların ibtidai sinif proqramlarında həmçinin Türkiyənin tədris proqramı da tədris edilir. Amma əsas proqram Azərbaycanın proqramıdır. Hər hansı bir məktəbdə fərqli proqram üzrə tədris həyata keçirilsə, bu zaman onların biliklərinin yoxlanılması, qiymətləndirilməsi ölkəmizin vahid standartlarına uyğun olmayacaq. Azərbaycanda tamamilə rus təhsilinə keçməyə ehtiyac yoxdur. Bu, ölkəmizin qanunvericilik aktlarına ziddir”.  Həmsöhbətimiz Rusiyanın bu addımında siyasi məqsədlər olduğunu bildirir:  "Bu gün müasir dünyada yeni işğal metodlarından istifadə edirlər. Müasir dövrdə başqa dövlətləri işğal etmək istəyənlər onu özlərinin yüksək iqtisadiyyatı, təhsili və mədəniyyətilə işğal etməyə çalışırlar. Bu mənada Rusiyada yaxın qonşu ölkələrdə sözügedən məktəbləri açmaqla, gələcəkdə oranı bitirəcək şəxslərdən öz kadrları kimi istifadə etməyi düşünür. Bununla özləri kimi düşünən və yaxud onları müdafiə edəcək kontingentin formalaşdırılmasına çalışırlar. Azərbaycanda buna ehtiyac yoxdur. Azərbaycan öz təhsil sistemini qurub”. 

"Rusiya qoşunlarının Baxmutda vəziyyəti kritikdir..." "Rusiyanın Şərq qoşun qruplaşmasının və Cənub-Şərq dairəsi bölmələrinin Ukraynanın cənubunda yerləşdirilməsi onun müdafiəsinin kövrək olduğunu göstərir..." Ukrayna Silahlı Qüvvələri (USQ) Baxmut rayonunda əhəmiyyətli taktiki uğurlar qazanıb və cəbhənin ən azı üç istiqamətində əkshücum əməliyyatlarını davam etdirib. Sozcu.az xəbər verir ki, bu barədə Amerikanın müharibənin öyrənilməsi İnstitutu (ISW) məlumat yayıb. O cümlədən, Rusiyanın Ukraynaya hərbi müdaxiləsinin yenilənən interaktiv xəritəsindən görünür ki, ukraynalı hərbçilər Baxmutdan şimala 2 km məsafədə yerləşən Yaxidnoye şəhəri rayonu istiqamətdə əhəmiyyətli dərəcədə irəliləyib. Ukrayna Baş Qərargahı məlumat verib ki, Ukrayna qoşunları Baxmutdan şimala və cənuba doğru hücum əməliyyatları aparıb, Ukrayna Quru Qoşunları komandanı general-polkovnik Aleksandr Sırski isə məlumat verib ki, Ukrayna qüvvələri Baxmut rayonunda əvvəllər itirdikləri mövqelər üzərində nəzarəti bərpa edib. Ukrayna Baş Qərargahı nümayəndəsi Andrey Kovalyovun sözlərinə görə, USQ həmçinin Baxmutdan cənub-qərbə doğru 7 km məsafədə yerləşən Klişşyovka yaxınlığında qismən uğur qazanıb. Ukrayna Baş Qərargahı məlumat verib ki, Ukrayna qüvvələri Zaporojye vilayətinin qərbində və Zaporojye və Donetsk vilayətləri arasında inzibati sərhəd boyunca hücum əməliyyatlarını davam etdirir. Öz növbəsində Rusiya Müdafiə Nazirliyi və Rusiyanın digər mənbələri iddia edib ki, Ukrayna qüvvələri Xarkov-Luqansk vilayəti sərhəddi boyunca Kremennaya istiqamətində hücum əməliyyatları aparıb. Həmçinin məlumat verilir ki, Rusiya qoşunları az qala bütün Şərq qoşun qruplaşmasını Ukraynanın cənubuna yönəldib. Rusiyanın Şərq qoşun qruplmaşmasının demək olar ki, hamısının və Cənub-Şərq dairəsinin geniş bölmələrinin Ukraynanın cənubunda cəbhə xəttində yerləşdirilməsi Rusiyanın Ukraynanın cənubunda müdafiəsinin kövrək olduğunu güman etməyə əsas verir. Rusiyalı mənbələr iddia edir ki, Ukrayna qüvvələri Zaporojye vilayətinin qərb hissəsində yeni əkshücuma başlayıb. Bu arada isə Zaporojye AES-ə nəzarət edən rusiyalılar əvvəlkitək beynəlxalq müşahidəçilərin stansiyaya çıxışını məhdudlaşdırır. Britaniya kəşfiyyatı da Rusiya qoşunlarının Baxmutda kritik vəziyyətindən yazıb. O cümlədən Böyük Britaniya Müdafiə Nazirliyi kəşfiyyat idarəsinin son icmalında deyilir ki, Ukrayna qüvvələri Donetsk vilayətinin Baxmut şəhəri rayonunda uğurlu hücum əməliyyatlarını davam etdirir, rusiyalı hərbçilər isə mənəvi cəhətdən düşkündür və bu yaşayış məntəqəsini əllərində saxlamaq üçün, çətin ki, entiyyatlara malik olsun. Qeyd edilir ki, iyun ayında sakitlikdən sonra Baxmutda son yeddi gündə "cəbhədə ən intensiv döyüşlərdən birinin baş verdiyi yerə çevrilib", bu döyüşlər zamanı Ukrayna qüvvələri şəhərdən həm şimala, həm də cənuba doğru "inamla irəliləyir". "Rusiyalı hərbçilər, böyük ehtimalla, döyüş ruhunun aşağı olması, parçalanmış bölmələrlə Ukrayna artilleriyasını axtarıb tapmaq və məhv etmək qabiliyyətinin məhdud olmasından əziyyət çəkir", - Britaniya kəşfiyyatı qeyd edir. İcmalda deyilir ki, Moskva, aydındır ki, Rusiya qüvvələrinin müharubənin son ili ərzində azsaylı nailiyyətlərdən birinin rəmzi çəkisi olan Baxmutu Ukrayna qüvvələrinə təhvil verməyi "siyasi cəhətdən qəbuledilməz" hesab edir. "Lakin, böyük ehtimalla, Rusiyanın bu sektor üçün ayrılması mümkün olan bir qədər əlavə ehtiyyatı var", - britaniyalı kəşfiyyatçılar qeyd edib.

“Azovstal” metallurgiya zavodunun müdafiəsinə başçılıq edən bütün ukraynalı komandirlər Rusiya əsirliyindən azad olunublar. Sozcu.az xəbər verir ki, bu barədə Ukrayna Prezidenti Vladimir Zelenski məlumat verib. "Biz Türkiyədən vətənə qayıdırıq və qəhrəmanlarımızı vətənə aparırıq”, - Zelenski bildirib.

Ukrayna Silahlı Qüvvələri Kleşşiyevka bölgəsindəki dominant yüksəkliyi azad edərək təkcə bu yaşayış məntəqəsini deyil, Baxmutu da atəş nəzarətinə götürüb. Müdafiə Qüvvələrinin bir neçə güclü artilleriya zərbəsindən sonra Rusiya işğalçıları Kleşçievkadan Popasnaya tərəf qaçmağa məcbur olacaqlar.  Sozcu.az xəbər verir ki, bu barədə “Kanal 24” telekanalında hərbi ekspert Roman Svitan danışıb. "Söhbət Kleşşiyevkadan getmir, Kleşşiyevka xəritədə sadəcə bir nöqtədir. Baxmutun cənubundakı dominant yüksəklik həm Baxmutun, həm də Kleşşiyevkanın bizim artilleriyamızın birbaşa atəşi altında qaldığı yüksəklikdir. Bizim gördüyümüz iş bu yüksəkliyi götürmək idi. Kleşşiyevka bonus olaraq gedəcək, ruslar orada dayana bilməyəcəklər, hətta oraya girib onları vurmaq da lazım deyil, onlar bir neçə güclü artilleriya zərbəsindən sonra özləri dovşann kimi qaçacaqlar”-deyə  ekspert bildirib.

Tütün istifadəsinin başda ağciyər olmaqla bütün orqanlara ciddi zərərləri var. Ümümdünya Səhiyyə Təşkilatının məlumatına görə, hər 6 saniyədən bir dünyada tütünçəkmə ilə bağlı xəstəliklər səbəbindən bir nəfər dünyasını dəyişir. Sozcu.az xəbər verir ki, bunu Səhiyyə Nazirliyi Elmi-Tədqiqat Ağciyər Xəstəlikləri İnstitutunun direktoru İradə Axundova bildirib. Onun sözlərinə görə, tütün istifadəsi bir sıra xəstəliklərin yaranma riskini artırır: "Onkoloji xəstəliklər - tənəffüs, mədə-bağırsaq, sidik-cinsiyyət, qantörədici sistemlərdə yüksək ehtimal ilə baş verə bilər. Tütünçəkmə ağciyərlərdə xərçəng xəstəliyinin yaranmasının əsas səbəbi hesab edilir. Ağciyər xərçəngindən ölən kişilərin 90%-də tütünçəkmə əsas amil sayılır. Aktiv tütün çəkənlərdə ağız boşluğunun, dodağın, mədənin və onikibarmaq bağırsağın xərçəng xəstəliyinin yaranması riski artır. Ürək-damar xəstəlikləri: ateroskleroz, serebrovaskulyar xəstəliklər, həmçinin qarın aortasının anevrizmasının inkişafı ehtimalı var. Bundan əlavə, tənəffüs yolları xəstəliklərinin (ağciyərlərin xroniki obstruktiv xəstəliyi, bronxit, pnevmoniya) yaranması mümkündür. Eyni zamanda, tütün çəkən kişilərdə erektil disfunksiya inkişaf riski nisbətən çoxdur. Tütün çəkən insanlarda digər xəstəliklər (katarakta, mədənin peptik xorası, immun sisteminin zəifləməsi) müşahidə olunur, onların xarici görünüşü dəyişir. Belə ki, tütünçəkmə dişlərin və dırnaqların saralmasına, saçların tökülməsinə və qırışların yaranmasına gətirib çıxarır. Bəzən insanlar səhv olaraq bədən çəkisinə tütün çəkməklə nəzarət etməyi düşünürlər. Siqaret çəkən qadınlarda fertillik (münbitlik) zəifləyir. Tütün tüstüsü ilə daxil olan zərərli maddələr həm hamilə qadına, həm də bətnindəki dölə mənfi təsir göstərir. Tütün tüstüsünün toksiki maddələri hamiləlik zamanı baş verən müxtəlif fəsadların yaranması ehtimalını və dölün oksigen çatışmazlığına gətirib çıxararaq onun bütün orqanlarında normal inkişafın pozulması riskini artırır. Siqaret çəkən qadınlarda ağırlaşmalar, vaxtından əvvəl doğuş, normadan aşağı çəkili yenidoğulmuşlar, ciftin vaxtından əvvəl ayrılması, uşaqlarda qəflətən ölüm sindromu və anadangəlmə anomaliyalar riski yüksəkdir. Bundan başqa, daha sonra uşaqlarda öyrənmə zəifliyi, hiperaktivlik, davranış pozuntuları, gələcəkdə bronxial astma riski yüksək olur". Həkim deyib ki, tibdə xroniki tütünçəkmə tütün asılılığı, nikotin asılılığı, tütünə və ya nikotinə qarşı meyl kimi müəyyən edilir. Bu, heç də zərərsiz bir vərdiş deyil ki, insan onu asanlıqla tərgitsin. Tütünçəkmədən imtina üçün təkrari müdaxilələrin və cəhdlərin göstərilməsi tələb olunur: "Aktiv tütünçəkmə - qurudulmuş və ya emal edilmiş közərən tütün yarpaqlarının tüstüsünün (əksər hallarda siqaretçəkmə vasitəsi ilə) nəfəs yolları ilə qəbul edilməsidir. Passiv tütünçəkmə - ətrafa yayılan tütün tüstüsünün nəfəs yolları ilə qəbul edilməsidir. Passiv tütünçəkmə adətən qapalı yerlərdə baş verir, lakin açıq havada da baş verə bilər. Üçüncülü tütünçəkmə - tütünçəkməni qutarandan sonra otaqda uzun müddət qalan nikotin qalıqları və digər kimyəvi maddələr ilə nəfəs alınmasıdır. Otaqda nikotin qalıqları və digər kimyəvi maddələr məkandakı əşyaların müxtəlif səthlərində qala bilər. Elmi cəhətdən sübut edilib ki, tütün tüstüsünün tərkibində 7000-dək kimyəvi maddə mövcuddur. Passiv siqaret çəkənlərin məruz qaldığı duman çevrəsi tütün dumanı adlanır və 2 hissəyə ayrılır - yanan siqaretdən ayrılan və siqaret çəkənin nəfəsi ilə yayılan. Bu tip zərərli dumana məruz qalan insanlarda siqaret çəkənlər qədər sağlamlıq problemlər yaşanılır. Əsasən uşaqlarda orta qulaq iltihabı, bronxit, astma, piylənmə, 2-ci tip şəkərli diabet və s. müşahidə olunur". Həkim qeyd edib ki, tütünçəkmə nəticəsində əmələ gələn bir çox xəstəliklərin yaranma riski tütünçəkmədən imtina etdikdən sonra azalır. Xəstəliklərin yaranmasına görə fərdi risk tütünçəkmənin müddətindən və intensivliyindən asılıdır. Siqareti tərgitdikdən sonra orqanizmdə təmizləmə aşağıdakı mərhələlərlə başlayır: • İlk 20 dəq ərzində qan təzyiqi normallaşır; • 8 saat sonra qanda oksigen səviyyəsi normallaşır, miokard infarktı riski azalır; • 24 saat sonra karbonmonoksit orqanizmdən tamamən təmizlənir; • 48 saat sonra qanda nikotin səviyyəsi azalır, dad və qoxu hissi yüksəlir; • 2 həftə-3ay arası qan dövranı tam bərpa olur. Ağciyərlərin həyat tutumu 30% artır. Fiziki aktivlik yaxşılaşır; • 1 ildən sonra koronar arteriyalarla bağlı xəstəlik riski 50% azalır; • 5 il sonra ağciyər xərcəngi riski 2 dəfə azalır. İnsult riski siqaret çəkməyənlərlə eyni olur.

Daxili İşlər Nazirliyi Bərdədə ölümlə nəticələnən yol qəzası barədə məlumat yayıb. DİN-in mətbuat xidmətinin Bərdə regional qrupundan Sozcu.az-a verilən məlumata görə, iyulun 6-da saat 22 radələrində Yevlax-Ağdam-Laçın yolunun Bərdə rayonunun ərazisindən keçən hissəsində sürücü - 1987-ci il təvəllüdlü, Bərdə rayon sakini Sadiq Sadıqov "VAZ-2107" markalı avtomobillə əlil arabası ilə hərəkətdə olan 1951-ci il təvəllüdlü, Yevlax rayon sakini, I qrup əlil Hüseyn Əsgərovu vurub. Nəticədə H.Əsgərov aldığı xəsarətlərdən hadisə yerində ölüb. Sürücü keçirilmiş tədbirlər nəticəsində polis əməkdaşları tərəfindən saxlanılıb. Faktla bağlı araşdırma aparılır.