İyulun 8-də Müsavat Partiyası Divanının növbəti iclası keçirilib. Partiyanın mətbuat xidmətindən verilən məlumata görə, iclasda əvvəlcə görülən işlər və qərarların icrası ilə bağlı məlumat dinlənilib. Daha sonra sentyabrın 1-nə təyin olunan növbədənkənar prezident seçkiləri ilə bağlı məsələ müzakirə olunub. Divan 27 dairə üzrə partiyanın namizədlərini irəli sürüb: 1. Razim Əmiraslanlı -10 saylı dairə 2. Almaz Əliqızı – 16 saylı dairə 3. Nüşabə Sadıxlı – 17 saylı dairə 4. Gülağa Aslanlı – 21 saylı dairə 5. Afər Şirvanlı – 23 saylı dairə 6. Ərzulla Bulud -31saylı dairə 7. Oktay Zeynalov – 38 saylı dairə 8. Şayəddin Qasımov – 39 saylı dairə 9. Mail Vəliyev – 40 saylı dairə 10. Cavad Cavadlı – 43 saylı dairə 11. Söhrab Əmrahov -57 saylı dairə 12. Şövkət Ramazanlı – 58 saylı dairə 13. Əliş Əzizov – 66 saylı dairə 14. Yusif Mehdi – 69 saylı dairə 15. Azər Əskər – 71 saylı dairə 16. Rahim Axundov. – 72 saylı dairə 17. Şəmsəddin Əmirli – 73 saylı dairə 18. Tahir Hüseynov – 80 saylı dairə 19. Dünyaxanım Cərullayeva – 89 saylı dairə 20. Zabit Bədəlov – 90 saylı dairə 21. Zakir İsmayıl – 94 saylı dairə 22. Yusif Namazoğlu – 96 saylı dairə 23. Malik həsənov – 97 saylı dairə 24. Etibar Əkbərov – 101 saylı dairə 25. Tahir Səfərli – 114 saylı dairə 26. Bakıxan Qəribli – 115 saylı dairə 27. Hidayət Allahverdi – 120 saylı dairə Məlumatda bildirilir ki, digər dairələrdən namizədlərin irəli sürülməsi ilə bağlı müzakirələr davam edir, müvafiq qərarlar qarşıdakı günlərdə qəbul ediləcək. Sonda cari məsələlər müzakirə olunub.

Azərbaycan Dövlət Pedaqoji Universitetinin (ADPU) IV kurs tələbəsi vəfat edib. Sozcu.az xəbər verir ki, bu barədə universitet məlumat yayıb. Qeyd olunub ki, ADPU-nun Məktəbəqədər Təhsil fakültəsinin "Korreksiyaedici təlim" ixtisası üzrə son kurs tələbəsi Mehri Məhəmmədova dünyasını dəyişib. Onun qəfil ürəktutmasından öldüyü bildirilib.

7 iyul II və III ixtisas qrupları (o cümlədən I ixtisas qrupu üzrə RK və Rİ altqruplarının hər ikisini seçənlər üçün informatika fənni) üzrə qəbul imtahanı keçirilib. İmtahanlar Bakı, Naxçıvan, Gəncə, Şəmkir, Qazax, Ağstafa, Sumqayıt, Abşeron, Şamaxı, Mingəçevir, Şəki, Bərdə, Göyçay, Kürdəmir, Şirvan, Sabirabad, Salyan, Lənkəran, Cəlilabad, Masallı, Quba və Xaçmazda təşkil olunub. Dövlət İmtahan Mərkəzinin mətbuat katibi Xanlar Xanlarzadə Sozcu.az-a açıqlamasında bildirib ki, açıq tipli tapşırıqların yoxlanılması vaxt tələb etdiyindən imtahan nəticələrinin iki həftə sonra elan olunması nəzərdə tutulur: “İyulun 8-dən etibarən imtahan protokolları və materialların emalına başlanılacaq".

Xalq artisti Rasim Balayev əməliyyat edilib. Sozcu.az bildirir ki, Xalq artisti Teleqraf.com-a açıqlamasında səhhətinin normal olduğunu deyib: "Əməliyyat edildim, xəstəxanada bir gün qaldım. Hazırda evdəyəm. Sol ayağımda problem vardı, yaxşı hərəkət edə bilmirdim. Neçə ildir, bu xəstəlikdən əziyyət çəkirdim. Həkimlər əvvəl əməliyyat etmək istəmirdilər, mən də fizioterapiyaya gedirdim. Gördüm, faydası yoxdur. İyunun 4-də əməliyyata getdim, indi hər şey qaydasındadır". Qeyd edək ki, Rasim Balayevin 75 yaşı var.

Bakıda faciəli hadisə baş verib. Hadisə paytaxtın Yasamal rayonunda yerləşən özəl klinikalardan birində qeydə alınıb. Oraya sünnət olunmaq üçün gətirilən Abşeron sakini, 4 aylıq Məhəmməd Əliyev qəfil dünyasını dəyişib. Körpənin hansı səbəbdən öldüyü hələlik açıqlanmır.  Faktla bağlı Yasamal rayon prokurorluğunda araşdırmalara başlanılıb. 

"Hazırda avtomobil bazarında ucuzlaşma müşahidə olunur. Bu, qısamüddətli vəziyyətdir. Bazarda yeni avtomobillər çoxaldıqca, zamanla qiymətlər də stabilləşəcək”. Bunu Bakupost.az -a açıqlamasında iqtisadçı ekspert Xalid Kərimli deyib. O qeyd edib ki, ucuzlaşmaya səbəb köhnə avtomobillərdir. Bu avtomobillərin çoxu taksi kimi istifadə olunurdu. Yeni qaydalara görə, köhnə avtomobillər artıq taksi xidməti göstərə bilmir. Ona görə də sahibkarlar avtomobillərini satmağı üstün tuturlar. Bu da istər-istəməz qiymətlərə öz təsirini göstərir: “Bir müddət sonra bazarda qiymətlər yenidən stabilləşəcək. Avtomobil gətirən sahibkar köhnə maşına tələbat olmadığını görüb daha onları gətirməyəcəklər. Artıq daha bahalı avtomobillər idxal ediləcək. Beləliklə, bazar stabilləşəcək. Gətirilən avtomobillərin dəyəri artacaq”.

Azərbaycanda daha bir məhkum həbsdə ölüb. Sozcu.az Lent.az-a istinadla xəbər verir ki, hadisə Penitensiar Xidmətin Bakıdakı cəzaçəkmə müəssisəsində qeydə alınıb. Orada cəza çəkən məhkum Fərmayıl Verdiyev dünyasını dəyişib. Onun xəstəlikdən öldüyü bildirilir. Qeyd edək ki, bu, 2024-cü il ərzində Bakı həbsxanalarında 17-ci ölüm hadisəsidir.

44 günlük savaş dövründə Türkiyənin ana müxalifəti Cümhuriyyət Xalq Partiyasının (CHP) Azərbaycana qarşı davranışı hər kəsdə heyrət doğurdu. Partiya bir çox məqamda bizə qarşı erməni mövqeyindən çıxış etdi. Azərbaycana düşmən mövqeyi ilə seçilən sabiq səfir Ünal Çevikgöz faktoru isə hələ də qalmaqdadır. Modern.az saytı bu kimi məsələlərlə bağlı partiya sədrinin müavini İlhan Üzgeldən müsahibə alıb. Müsahibimiz öncə bildib ki, CHP-nin yeni rəhbəri Özgür Özel 2023-cü ilin noyabrında sədr seçildikdən sonra keçirilən partiya qurultayında ilk iki səfərini Şimali Kipr Türk Cümhuriyyətinə və Azərbaycana etmək niyyətində olduğunu deyib. O, Azərbaycanla yaxşı əlaqələri inkişaf etdirmək istəyini dilə gətirib. - CHP ilə əlaqədar Azərbaycan ictimaiyyətində çox da yaxşı rəy yoxdur. Bəs CHP Azərbaycan ictimaiyyətindəki mövcud rəyi dəyişdirmək üçün nə etməyi planlaşdırır? - CHP Azərbaycanı dost və qardaş bir ölkə olaraq görür. Tək millət, iki dövlət anlayışına bağlıyıq. Bağlarımız tarixə söykənir. Qüvvətli Azərbaycan qüvvətli Türkiyə, qüvvətli Türkiyə qüvvətli Azərbaycan deməkdir. Hər iki ölkə bir-birindən güc almaqdadır. Azərbaycan Türkiyənin Türk dünyasına açılan qapısı, Türkiyə Azərbaycanın Qərbə açılan qapısıdır. Ölkələrimizin taleyi bir-birilə sıx bağlıdır. Azərbaycanın təhlükəsizliyi Türkiyənin, Türkiyənin təhlükəsizliyi Azərbaycanın təhlükəsizliyidir. Azərbaycanın rifahı Türkiyənin rifahıdır. CHP-nin İdarə Heyətində də, seçicilərində də Azərbaycana dair çox isti hisslər var. Bunun başqa cür olması da mümkün deyil. - Kamal Kılıçdaroğlu partiyanın lideri olduğu zaman "həyatımın ən böyük layihəsi adlandırdığı" "Tarixi İpək Yolunu canlandırma layihəsi"ndə Azərbaycana yer verməmişdi. İndi "Tarixi İpək Yolunu canlandırma layihəsi” ilə bağlı CHP-nin düşüncəsi necədir? - CHP Cənubi Qafqazda Azərbaycanın daxil olmadığı heç bir layihəni dəstəkləmir. Dünyada enerji, ticari əlaqələr getdikcə daha da əhəmiyyət kəsb etməkdədir. O baxımdan Türkiyə ilə Azərbaycanın bu istiqamətdə atacağı addımlar var. Azərbaycanı kənarda qoyacaq heç bir layihə və razılığı dəstəkləmərik, hətta bu vəziyyəti dəyişmək üçün əlimizdən gələni edərik. Azərbaycandan keçməyən İpək Yolunun bizim üçün heç bir mənası və qiyməti yoxdur. Məqsədimiz Şərq-Qərb əsaslı ticarət və enerji keçid xətlərinin mümkün qədər dost və qardaş Azərbaycan üzərindən keçməsidir. Bu mənada Zəngəzur dəhlizinin açılmasını da müdafiə edirik və həmin  məsələdə əlimizdən gələni etməyə hazırıq. Bu dəhlizin açılması Türkiyəni Azərbaycan və Türk dünyası ilə qovuşdurub, əlaqələrini gücləndirəcək. - Türkiyə-Ermənistan sərhədlərinin açılması yubanır. Buna səbəb təbii ki, Ermənistanın Azərbaycanla sülh müqaviləsini imzalamamasıdır. Məsələyə partiyanızın mövqeyi maraqlıdır... - Biz Cənubi Qafqazda sülh və sabitliyi müdafiə edirik. Bölgəyə sabitlik gətirib Türkiyə əleyhinə siyasətə son verəcəyi təqdirdə Ermənistanla münasibətlərin normallaşmasını dəstəkləyirik. Amma yeridəcəyimiz siyasətin Azərbaycana zərər verməməsi məsələsində çox həssas davranırıq. Türkiyə regionun ən güclü ölkəsidir. Ermənistan kimi bir ölkənin Türkiyəyə şərt qoyması, Azərbaycan və Türkiyə əleyhinə siyasət aparmağı qəbul edilə bilməz. Türkiyə ilə quru sərhədlərinin açılmasına Ermənistan ehtiyac duyur. Türkiyənin buna ehtiyacı yoxdur. - CHP-nin Türk dünyası ilə bağlı hansı layihələri var? - CHP Türk dünyası ilə əlaqələrini gücləndirmək istəyir. Türk dünyası və region ilə əlaqələr məsələsi səmimi demək lazımdır ki, indiyə kimi daha çox Türkiyədəki sağ partiyaların maraq dairəsində qalıb. Ən böyük layihəmiz CHP ilə Türk dünyasını yenidən qovuşdurmaqdır. Bu istiqamətdə yaxın vaxtlarda aktiv cəhdlərimiz olacaq. CHP Atatürkün partiyasıdır. O Atatürk ki, Azərbaycana çox böyük əhəmiyyət verib və ona məhəbbət bəsləyib. Böyük Atatürk “Azərbaycanlıların dərdləri öz dərdimiz və sevincləri öz sevincimiz kimi olduğu üçün onların istəklərinə nail olmaqları, hürr və bağımsız olaraq yaşamaqları bizi həddindən artıq sevindirər" deyib. CHP bu mirası götürüb. Bu, Atatürkün CHP-yə buraxdığı ən önəmli miraslardan biridir.

İbtidai sinif səviyyəsində bəzi summativ qiymətləndirmələrin azaldılması və ya ləğvi məsələsi müzakirə olunur. Sozcu.az xəbər verir ki, bunu “Report”a Elm və Təhsil Nazirliyinin Məktəbəqədər və ümumi təhsil siyasəti şöbəsinin müdiri Vəfa Yaqublu deyib. Şöbə müdiri bildirib ki, qiymətləndirmə siyasətində bəzi təkmilləşdirmələr aparılacaq. Nazirlik rəsmisi həmçinin əlavə edib ki, ümumi təhsilin dövlət standartlarının yenilənməsi 5 ildən bir nəzərdə tutulur: “2020-ci ildə təsdiq olunmuş dövlət standartları növbəti ildə yenilənəcək. Yeni standartların hazırlanması ilə bağlı işlər gedir”.

Artıq səlahiyyət müddəti başa çatmış Milli Məclisin vitse-spikerinin Bakının rayonlarından birinə icra başçısı təyin olunacağı gözlənilir.  “AzPolitika.info”-ya daxil olan məlumata görə, bu barədə Prezident sərəncamı tezliklə elan olunacaq.  Məlumatda təyinat gözləyən vitse-spikerin kimliyi dəqiqləşdirilmir, amma çox böyük ehtimalla, bu Adil Əliyevdir.  Qeyd edək ki, 1 sentyabr növbədənkənar parlament seçkilərində formalaşdırılacaq Milli Məclisin tərkibində olduğu kimi, sədarətində də yenilənmə olacağı ehtimalı böyükdür. 

Beyləqanda süpürgəçini maşın vuraraq öldürüb.  Sozcu.az xəbər verir ki, hadisə rayon mərkəzində baş verib.  Belə ki, hərəkətdə olan "Mercedes" markalı avtomobil yol kənarını təmizləyən rayon sakini, 1968-ci il təvəllüdlü Həsənova Solmaz Təhməz qızını vurub. Nəticədə S.Həsənova aldığı zərbədən hadisə yerində həyatını itirib.  Faktla bağlı araşdırma aparılır. 

İranda yeni prezident vəzifəsinin icrasına başlayandan sonra əsas gözləntimiz Azərbaycanla münasibətlərin daha da inkişafı istiqamətindədir. Sozcu.az apa-ya istinadla xəbər verir ki, bunu xarici işlər naziri Ceyhun Bayramov bildirib. “Bilirsiniz ki, bu yaxınlarda İranda növbədənkənar seçkilər keçirildi və yeni prezident seçildi. Bu münasibətlə Azərbaycan Prezidenti İlham Əliyev ona (Məsud Pezeşkian) təbrik ünvanladı. Mən onu da qeyd etmək istəyirəm ki, biz bundan sonra da Azərbaycanla İran arasında razılaşdırılmış layihələrin icrasında maraqlıyıq”, - nazir qeyd edib.

Gürcüstan iqtisadiyyatında vəziyyət kifayət qədər yaxşıdır: 2022-ci ildə ÜDM 10,4%, 2023-də 7%, 2024-cü ilin 1-ci rübündə isə 8,4% artıb. İşsizlik yox dərəcəsindədir, hətta hamı işçi axtarır, maaşlar yüksəlib. Doğrudur, son 3-4 ildə qiymətlər də artıb, artıq Gürcüstan Azərbaycandan ucuz deyil, hətta bir çox sahələrdə daha baha ölkədir, amma maaşların yüksəlməsi, inflyasiyanın son ildə 1% civarında olması ölkədə iqtisadi vəziyyətə xeyli müsbət təsir göstərib.  Sozcu.az xəbər verir ki, bu barədə qonşu ölkədə səfərdə olan iqtisadçı ekspert Natiq Cəfərli qeyd edib. O, özünün facebook səhifəsində bildirib ki, gürcülər üçün AB ölkələrinə vizasız rejimdir deyə, işçi qüvvəsinin bir hissəsi Avropaya gedib: “Ev tikən və təmir edənlər, maşın və telefon ustaları, TIR sürücüləri və bir çox başqa peşə sahibləri Polşa, Almaniya və s. ölkələrdə yüksək qazanc əldə edirlər, Gürcüstanda isə işçi çatışmır. Ona görə də əvvəllər iş tapa bilməyən soydaşlarımızın hamısı indi Tiflis və digər şəhərlərdə 1500-2000 lari arası maaşı olan işi rahatlıqla tapa bilirlər. Hətta 1500 lari maaş artıq cəlbedici deyil, hamı 2000 və daha yuxarı maaşlı iş axtarır. Biznes üçün də cənnətdir – kiçik sahibkarlar, illik dövriyyəsi 1 mln. lariyə qədər olanlar dövriyyədən cəmi 1% vergi ödəyib rahat işləyirlər. Biznes üçün çox sərfəli kredit şərtləri var, aqrar sektora da banklar uzunmüddətli və aşağı faizli kredit verirlər. Turizm sahəsi isə pandemiyadan öncəki səviyyəni keçib – keçən il 7 mln. turist qəbul edib, turizmdən 4 mlrd. dollar qazanıblar, bu ilə hədəf 8 mln. turist və 4,5 mlrd. dollardır”. Ekspertin sözlərinə görə, illər öncə Azərbaycana üz tutan Gürcüstandakı soydaşlarımız geri qayıtmağa başlayıb: “Mənim öz yaxın qohumlarımdan son 2-3 ildə azı 10 nəfərə yaxını geriyə, Gürcüstana qayıdıb. Onu da deyim ki, kəndlərin hamısında işıq-qaz-su problemi, demək olar ki, tam həllini tapıb, seçilmiş bələdiyyələr arı kimi çalışırlar, hətta kəndlərdə belə gecə işiqlandırma var, bələdiyyə hesabına küçələri işıqlandırırlar”. Onun sözlərinə görə, gürcülər Gürcü Arzusundan bizdə təsəvvür edildiyi kimi, narazı deyillər, Saakaşvilini də bizdəki kimi sevmirlər: “Gürcüstanın problemləri, təbii ki, var – demoqrafiya pis vəziyyətdədir, torpaqları işğal altındadır, yaranmış fürsətlərdən tam istifadə etmirlər, tənbəldirlər, amma yolları doğrudur, cəmi 10 ildən sonra çox irəlidə olacaqlar”. 

İyulun 6-da saat 24 radələrində paytaxtın Suraxanı rayonunda əvvəllər Cinayət Məcəlləsinin müxtəlif maddələri ilə 8 dəfə məhkum olunmuş, oğurluq əməllərinə görə axtarışda olan 1983-cü il təvəllüdlü Məmmədov Mehman Səlahəddin oğlu polis əməkdaşı tərəfindən saxlanılarkən üzərində olan kəsici alətlə müqavimət göstərib. DİN-in Mətbuat Xidmətindən Sozcu.az -a bildirilib ki, M.Məmmədov xidməti vəzifələrini yerinə yetirən polis əməkdaşına kəsici alətlə xəsarət yetirib qaçmağa cəhd göstərib. Ağır xəsarət alan polis kapitanı Fəxrəddin Nəsirov yaralanmasına baxmayaraq cəhdin qarşısını alıb və onu saxlayaraq digər polis əməkdaşlarına təhvil verib. Xəsarət alan polis əməkdaşı xəstəxanaya çatdırılsa da həyatını xilas etmək mümkün olmayıb. Faktla bağlı cinayət işi başlanılıb, istintaq hərəkətləri davam etdirilir.

Azərbaycanda qeyri-sabit hava şəraiti iyulun 8-i gündüzədək davam edəcək. Sozcu.az xəbər verir ki, bu barədə Milli Hidrometeorologiya Xidməti məlumat yayıb. Şimal və qərb rayonlarında bəzi yerlərdə arabir yağış yağacağı, şimşək çaxacağı gözlənilir. Ayrı-ayrı yerlərdə, xüsusən də Balakən-Şəki, Quba-Qusar, Qazax-Gəncə, Daşkəsən-Gədəbəy, Qarabağ və Şərqi Zəngəzurda yağıntıların leysan xarakterli intensiv olacağı, dolu düşəcəyi, yüksək dağlıq ərazilərdə sulu qara keçəcəyi ehtimalı var. Çaylarda sululuğun artacağı, Böyük və Kiçik Qafqazın bəzi çaylarından qısamüddətli daşqın və sel keçəcəyi gözlənilir.

Abşeronda 2 yaşlı körpə bədbəxt hadisə nəticəsində ölüb. Hadisə Saray qəsəbəsində yerləşən fərdi evlərdən birində baş verib.  2022-ci il təvəllüdlü O.Cəbrayılov yaşadığı evin ikinci mərtəbəsinin pəncərəsindən yıxılaraq ölüb.  Faktla bağlı araşdırma aparılır./Report 

Ukrayna müharibənin 865-ci günü üçün Rusiya ordusunun itkiləri haqda məlumatı yeniləyib. Sozcu.az xəbər verir ki, bu barədə Ukrayna Baş Qərargahı məlumat yayıb. Məlumata əsasən, Rusiya indiyə qədər 550 990 hərbçi, 8 155 ədəd tank, 15 645 ədəd zirehli döyüş maşını, 14 937 ədəd artilleriya sistemi, 1 115 ədəd RYAS (reaktiv yaylım atəş sistemi), 879 hava hücumundan müdafiə sistemi, 360 ədəd hərbi təyyarə, 326 ədəd helikopter, 20 103 ədəd avtomobil texnikası, 11 862 ədəd PUA, 2 352 qanadlı raket, 28 gəmi/kater, 1 sualtı qayıq, 2 495 xüsusi avadanlıq itirib.

İsmayıllıda 3 ailənin yaşadığı 5 otaqlı mənzil yanaraq külə dönüb. Sozcu.az Report-a istinadla xəbər verir ki, hadisə Qalınçaq kəndində Bayramov Bəhmən Rəcəb oğluna məxsus 5 otaqlı fərdi yaşayış evində qeydə alınıb. Yanğın zamanı ev sahibi, 1959-cu il təvəllüdlü Bayramov Bəhmən Rəcəb oğlu və 1969-cu il təvəllüdlü Bayramova Nəzakət Yaqub qızı zəhərlənmə diaqnozu ilə İsmayıllı rayon Mərkəzi Xəstəxanasına aparılıb. Bundan başqa, yanğın nəticəsində xırdabuynuzlu ev heyvanları və toyuq-cücə tələf olub. Hadisə yerinə FHN-nin İsmayıllı rayon Dövlət Yanğından Mühafizə Hissəsinin canlı qüvvəsi və texnikası cəlb olunub. Hazırda hadisənin hansı səbəbdən baş verməsi araşdırılır.

İyulun 4-də Müsavat Partiyasının Məclisi özünün növbədənkənar sessiyasını keçirib. Partiyanın mətbuat xidmətindən verilən məlumata görə, iclasda sentyabrın 1-nə təyin olunan növbədənkənar parlament seçkilərində iştirakla bağlı məsələ müzakirə olunub. Məclis Müsavat Partiyasının 1 sentyabr seçkisində iştirak etməsi barədə qərar qəbul edib. Məclis həmçinin deputatlığa namizədlərin irəli sürülməsi və digər prosedur məsələlərlə bağlı operativ qərarların qəbul edilməsi üçün Divana səlahiyyət verib. Partiyanın başqanı İsa Qəmbərin təklifi ilə Arif Hacılı seçki qərargahının sədri seçilib. Bəs Müsavat Partiyasının başqanı İsa Qəmbərin özü də parlament seçkilərində iştirak edəcəkmi? Modern.az Müsavat Partiyası ilə əlaqə saxlayıb. Saytımıza açıqlamasında Müsavat Partiyası sədrinin müavini Gülağa Aslanlı bunları deyib: "Partiyanın Ali Məclisi toplaşıb seçkilərdə iştirakla bağlı məsələni müzakirə etdi. Qərara alındı ki, Müsavat Partiyası seçkilərdə iştirak etsin. Kimin seçkilərdə iştirak etməsi məsələsi isə müzakirə olunmayıb. Hər bir şəxs, hər bir müsavatçı istədiyi dairədən namizədliyini irəli sürməkdə sərbəstdir. Bu barədə məsələ hələ müzakirə olmayıb. İsa Qəmbər seçkilərdə iştirak edib-etməyəcəyi ilə bağlı ancaq özü məlumat verə bilər. Onun əvəzinə kimsə nəsə deyə bilməz".

Mərkəzi Seçki Komissiyasının (MSK) bu gün keçirilən iclasında Müsavat Partiyasının 2024-cü il sentyabrın 1-nə təyin edilmiş Milli Məclisə növbədənkənar seçkilərdə səlahiyyətli nümayəndələrinin qeydə alınması ilə bağlı müraciətlərinə baxılıb. Sozcu.az xəbər verir ki, bu barədə MSK katibi Arifə Muxtarova məlumat verib. İclasda Müsavat Partiyasının 30 səlahiyyətli nümayəndəsi və maliyyə məsələləri üzrə 6 səlahiyyətli nümayəndəsi qeydə alınıb. Məsələ səsverməyə çıxarılaraq qəbul edilib.apa

Ermənistanın baş naziri Nikol Paşinyan Kirants (Güney) və Açarkut kəndlərində yeni yolun inşası işləri ilə tanış olub. Respublikanın hökumət başçısı səfəri haqqında görüntüləri özünün "Telegram" səhifəsində paylaşıb. Onu Tavuş vilayətinin qubernatoru Vahe Qalumyan və digər məsul şəxslər müşayiət ediblər. Kadrlarda torpaq işləri və drenaj kollektorlarının tikintisi göstərilir. Yeni yol ona görə tikilir ki, Ermənistandan Gürcüstana gedən magistralda yerləşən körpü delimitasiya nəticəsində Azərbaycana təhvil veriləcək. Bura Kirants kəndində iki ev, yolun bir hissəsi və 50-yə yaxın torpaq sahəsi daxildir. Kirants kəndinə səfəri zamanı baş nazir, həmçinin Ermənistan və Azərbaycan arasında təchiz edilmiş sərhəd sahəsini nəzərdən keçirib./Oxu.az

"Böyük Qayıdış" Proqramının icrası çərçivəsində bu günə qədər 8 minə yaxın keçmiş məcburi köçkün Laçın, Füzuli, Şuşa, Xocalı şəhərlərinə və dörd kəndə qayıdıb. Sozcu.az xəbər verir ki, bu fikri Azərbaycan Prezidenti İlham Əliyev iyulun 6-da Şuşada keçirilən Türk Dövlətləri Təşkilatının Dövlət başçılarının qeyri-rəsmi Zirvə görüşündə çıxışında deyib. Dövlətimizin başçısı bildirib ki, bu ilin sonuna qədər 20 min insan azad edilmiş torpaqlara qayıdacaq.

“Qərb İranın bəsit oyunlarına artıq aldanmır, İran diqqəti cəlb etmək üçün daha çox güzəştlər etməli olacaq”. Bu sözləri Güney Azərbaycanlı siyasətçi Çingiz Göytürk “Yeni Sabah”a açıqlamasında bildirib. O, seçkidən sonrakı vəziyyəti belə ifadə edib: “İran İslam Respublikasının bu seçki nümayişindən gözlədiyi əsas iki məsələ var. Birincisi teokratik rejimin öz daxilindən Qərb dövlətləri ilə dil tapa biləcək bir fiqurun ortaya çıxarılmasıdır ki, bu da 3 ay bundan öncəyə qədər proseslərdən tamamilə əl-ayağını çəkmiş, hətta əvvəlki seçkiləri boykot etmiş islahatçılarla mümkün idi. İkincisi isə, daxildə gündən-günə artan radikal anti-rejim təmayüllərini sistemin öz içərisindən və kontrolu altında ortaya çıxan alternativlərlə dəyişdirmək idi. Burada əsas hədəf kütlələrdən birisi də məhz Güney Azərbaycandır. Güney Azərbaycanda öz milli dövlətini qurmaq, İran və irançılıqdan imtina təmayülləri rejimi olduqca tədirgin edirdi və bu seçkilərdə Azərbaycan Milli Hərəkatının potensialını öz milli dövləti uğrunda mübarizədən İranda reform uğrunda mübarizəyə yönəltmək rejimin ən önəmli qayələrindən biri idi. Bu sahədə rejim istəklərinə arzu etdiyi səviyyədə nail olmasa da, yeni süni ümidlər yaratmaqla qismən də olsa bu hədəfə çatdı. Ancaq Qərbin İranda keçirilən seçki nümayişinə biganə yanaşması onu göstərir ki, Qərb artıq bu rejimin bəsit oyunlarına etibar etmir və İran onların diqqətini cəlb etmək üçün daha çox güzəştlərə getməlidir”. Siyasətçi qeyd edib ki, İran özünü toparlayan kimi, düşmənçiliyə qaldığı yerdən davam edəcək: “Bir türkün prezident seçilməsi nəyi dəyişdirər sualına gəldikdə isə, bilirik ki, İranda prezidentin səlahiyyətləri olduqca məhduddur. Dini rəhbərliyin razılığı olmadan hər hansı məsələnin dəyişdirilməsi mümkün deyil. Hətta o qədər ki, prezidentin birinci müavini, əsas nazirliklər, o cümlədən, ali təhsil və güc strukturlarına rəhbər şəxsləri belə rəhbər təyin edir. Birinci müavin və əsas nazirliklər dini rəhbərin idarəsindədir və o, bu vəzifələrə nazirləri təyin edir. Yəni, prezidentin hər hansı bir dəyişiklik həyata keçirməsi mümkün deyil.  Son olaraq onu da bildirim ki, İran İslam Cümhuriyyəti istər xarici, istərsə də daxili siyasətdə artıq ciddi çıxılmazlıqların içərisindədir. Daxili və xarici siyasətdə dəyişim isə qaçınılmazdır. Və yeni dönəmdə İran İslam Respublikası bu yöndəki iradəsini yeni seçilən prezident üzərində gerçəkləşdirməyə çalışacaq. Ancaq unudulmamalıdır ki, daha öncə də olduğu kimi, rejim özünü toparladığı anda təkrar əvvələ dönəcəkdir. Beləliklə də, düşmənçiliklərə qaldığı yerdən davam edəcəkdir”.

İranda keçirilən prezident seçkilərinin ikinci turunun nəticəsi elan edildi. Güney azərbaycanlı namizəd Məsud Pezeşkian 16 384 403 səs ilə prezident seçkilərinin qalibi oldu. Nəticələrin elan edildikdən sonra İranın paytaxtı Tehran, eləcə də Güney Azərbaycanın Təbriz, Urmiya və digər şəhərlərində seçicilər küçələrə axışaraq, Məsud Pezeşkianın prezident seçkilərində qələbəsini qeyd edirlər. Sosial şəbəkələrin Azərbaycan seqmentində M.Pezeşkianın qələbəsi sevinclə qarşılanır, hətta bu olayı “Türk Əsri” olaraq şərh edirlər. Sırf Güney azərbaycanlı olması səbəbindən Məsud Pezeşkianın qələbəsinə sevinmək onun xüsusi nə isə edəcəyini gözləmək real bir yanaşma sayılmır. Bu haqda indiyədək bir çox fikirlər var. Məsələ ondadır ki, Səid Cəlili kimi Məsud Pezeşkian da İran islam inqilabına və mövcud rejimə sadiqdir. Digər bir danılmaz fakt isə İrandakı seçki sistemi ilə bağlıdır. Pezeşkian və rəqiblərinin hamısının seçkidə iştirak etməsinə İran Ali dini lideri icazə verib. Yəni İranda prezident seçilmək bir yana, namizəd olmaq da o qədər asan bir şey deyil. Bundan başqa SEPAH faktoru da var və əslində həlledici yekun qərarı məhz o təşkilat verir. İranda geniş səlahiyyəti Ali dini lider institutu və atılan bütün addımlara nəzarət edən, qərar verən SEPAH olduğu müddətdə etnik mənsubiyyətindən asılı olmayaraq prezident olan şəxsin fərqli siyasət yeritməsi imkansızdır. Pezeşkianın prezident seçilməsini İranda “türk əsrinin” başlanması kimi təqdim etmək romantik yanaşmadan başqa bir şey deyil. İrandakı başlıca problem heç də türklərin siyasi proseslərdən kənarda qalması, ya da yüksək vəzifələrdə təmsil edilməməsi deyil. Müqayisə üçün deyim ki, İranda kifayət qədər Güney azərbaycanlı dini lider, deputat, siyasi şəxs var. Bilməyənlər üçün onu da deyim ki, SEPAH daxilində yüksəkrütbəli azərbaycanlılar da çoxdur. Lakin İrandakı teokratik rejim, onun elementləri və qərarvermə mexanizmi fars elitasının əlindədir. Bu sistem elə qurulub ki, etnik mənsubiyyət fərqi olmadan onun bir parçası olmaq, hətta yüksəlmək də olar. Lakin sistem etnik əsasda qərar verməyi ümmətçilik adı altında pərdələnən fars milliyyətçiliyini üstələməyə imkan vermir. Ümumiyyətlə, İranda Güney Azərbaycanın timsalında türk elitasının hakimiyyətə gəlməsini imkansız edən ən önəmli faktor milli kimliyin, özünüdərkin praqmatik əsaslarda deyil, romantizm əsasında olmasıdır. Yəni İrandakı türk elitası tam olaraq nə istədiyini bilmir. Elitanın ideoloqlarının bəzilərinin düşüncəsi belədir: 1. Güney Azərbaycan mədəni muxtariyyət əldə etməlidir; 2. Güney Azərbaycan yüksək muxtariyyət əldə etməlidir; 3. İran konfederasiya olmalı, iki dövlət modelinə keçməlidir; 4. Güney Azərbaycan müstəqil olmalıdır; 5. Güney Azərbaycan İrandan ayrılıb, şimala birləşməli, vahid Azərbaycan olmalıdır; 6. Türklər İranda hakimiyyəti ələ keçirməli, hakim elita olmalıdır. Bu görüş fərqliliyi əslində ötən əsrin ikinci yarısında İran islam inqilabının da seyrini dəyişdi və prosesi farsların lehinə yekunlaşdırdı. Güney Azərbaycan İran islam inqilabının qələbəsindən həlledici rol oynadıqdan sonra bir ildən də az müddətdə fikir ayrılıqları səbəbindən inqilaba dəstək verən ideoloqlarını, düşünürlərini itirməyə başladı. Bunlardan ən önəmli və dəyərlisi şübhəsiz əslən Güney azərbaycanlı olan Seyid Məhəmməd Kazım Şəriətmədari idi. O, din xadimi olsa da din xadimlərinin hökumət vəzifələrindən uzaq tutulması kimi ənənəvi şiə praktikasının tərəfdarı idi. O, həm də İranda Cənubi Azərbaycan milli hərəkatının lideri olub və İranın tərkibində Cənubi Azərbaycan muxtariyyəti və daha sonra isə müstəqillik ideyasını dəstəkləyib. Lakin onun dövründə də türk elitasının heç də hamısı onu dəstəkləmədiyi üçün rejim qarşısında tab gətirə bilmədi. Hesab edirəm, Məsud Pezeşkianın prezident olması Güney Azərbaycandakı ideoloji böhranı daha da dərinləşdirəcək. Rejimə sadiq bir azərbaycanlının prezident olması sadəcə həmin rejimə sadiq təbəələrin yetişməsi, assimilyasiya prosesinin davam etməsi deməkdir. Turan Rzayev Globalinfo.az-ın siyasət yazarı