Gürcüstanın keçmiş prezidenti Mixail Saakaşvili bu ölkədə yaşayan azərbaycanlılara müraciət edib. Sozcu.az xəbər verir ki, o, sosial şəbəkə hesabından Azərbaycan dilində müraciət yayaraq, soydaşlarımızı oktyabrın 26-da keçiriləcək parlament seçkilərinə qatılmağa səsləyib. “Mənim əziz həmvətənlərim! Bu sizin həyatınızın ən əsas seçkisidir. Ayın 26-da qalib gəlməliyik. Sizi nə qədər çox sevdiyimi yaxşı bilirsiniz. Biz bərabər çox işlər görmüşük və irəlidə birgə görüləcək daha çox işlərimiz var. Vətənimiz Gürcüstanı əmin-amanlığa birgə çıxarmalıyıq. Heç nədən qorxmayın. “Sizin səsinizin heç bir əhəmiyyəti yoxdur və ya hökumət sizin kimə səs verdiyinizi biləcək” deyənlərə inanmayın. Rahat seçkilərə gedin və 5 nömrəyə səs verin”, - Saakaşvili bildirib.

Məlayir, Qorqan və Zəncan şəhərlərində 4 məhkum edam edilib. Bu barədə insna haqları təşkilatları məlumat yayıb. Bildirilib ki, məhkumların ikisi narkotik maddələrin alveri, ikisi isə adam öldürməkdə günahlandırılıb. Bununlada son cari ildə İran həbsxanalarında edam edilənlərin sayı 600-ə, 1 ildə isə 900-ə yaxınlaşıb.

“Barselona”nın 17 yaşlı yarımmüdafiəçisi Lamin Yamal karyerası haqda danışıb. Sozcu.az xarici KİV-ə istinadən xəbər verir ki, ispaniyalı futbolçu “Barselona”nın əfsanəsi kimi xatırlanmaq istədiyini bildirib: “Mən “Barselona”nın əfsanəsi kimi xatırlanmaq istəyirəm. Bu böyük klubun tarixinin bir hissəsi olmaq inanılmazdır”. Yamal “Barselona” akademiyasının yetirməsidir. Onun kataloniyalılarla müqaviləsi 2026-cı ilin iyunun sonuna kimi nəzərdə tutulub.komanda.az)

İmişli rayonunun saxlanılmış hərbi komissarı Xəyyam Babayevə irəli sürülən ittihamlar məlum olub. Sozcu.az xəbər verir ki, bu barədə Hərbi Prokurorluq məlumat yayıb. Səfərbərlik  və Hərbi Xidmətə Çağırış üzrə Dövlət Xidmətinin  İmişli rayon şöbəsinin rəisi vəzifəsini icra edən, polkovnik-leytenant Babayev Xəyyam Mirzə oğluna Cinayət Məcəlləsinin  311.3.2-ci və 311.3.3-cü  maddələri ilə ittiham elan edilib. Hərbi Prokurorluğunun təqdimatına əsasən, Bakı Hərbi Məhkəməsinin qərarı ilə barəsində 4 (dörd) ay müddətinə həbs qətimkan tədbiri seçilib. Hazırda istintaq davam etdirilir və qanunvericiliyin tələblərinə uyğun olaraq bütün tədbirlərin görülməsi, o cümlədən hər bir fakta və əmələ hüquqi qiymət verilməsi təmin ediləcəkdir.

Ötən gün TUSAŞ-da meydana gələn terror hücumunda məhv edilən PKK üzvlərindən birinin şəxsiyyəti bəlli olub. Sozcu.az xəbər verir ki, bu barədə Türkiyə mediası məlumat yayıb. Teraktı törədənin PKK üzvü, “Rojger” kod adlı Əli Örək olduğu təsdiqlənib. Məhv edilən qadın terrorçunun şəxsiyyəti isə hələ açıqlanmayıb. *** TUSAŞ-da meydana gələn terror hücumunda məhv edilən qadın terrorçunun da kimliyi bəlli olub. Bu barədə Türkiyə daxili işlər naziri Əli Yerliqaya məlumat verib. O bildirib ki, terror aktı törədən qadın PKK üzvü Minə Sevjin Alçiçək olub.

Paytaxtda uşaq oğurluğuna cəhd etmək istəyən şəxs peyda olub. Sozcu.az Milli.az-a istinadla xəbər verir ki, hadisə ötən gün Ramana ərazisində baş verib. Məlumata görə, məktəblini oğurlamaq istəyən şəxsi görən ətrafdakı vətəndaşlar reaksiya göstərib. Oğlan bu sayədə qaça bilib. Oğru isə qorxub ərazini tərk edib. Məktəblini oğurlamaq istəyən şəxsin görüntüsü təhlükəsizlik kameralarına düşüb. Uşağın atası Kamil Seyidov bildirib ki, onun 14 yaşı var, o, özü qaçaraq məlumat verib. Hazırda polis idarəsindədirlər, araşdırma aparılır. DİN-in Mətbuat Xidmətinin əməkdaşı, polis baş leytenantı İbrahim Əmiraslanlı bildirib ki, vətəndaş K.Seyidov polisə müraciət edərək ötən gün yetkinlik yaşına çatmayan övladının Sabunçu rayonu Ramana qəsəbəsi ərazisində naməlum şəxs tərəfindən təqib edildiyini bildirib. *** Naməlum şəxs tərəfindən azyaşlının təqib edilməsilə bağlı yayılan görüntülər araşdırılıb. Daxili İşlər Nazirliyinin (DİN) Mətbuat Xidmətinin əməkdaşı polis baş leytenantı İbrahim Əmiraslanlı Oxu.az-a açıqlamasında bildirib ki, polis əməkdaşlarının keçirdikləri tədbirlərlə həmin şəxs - 14 yaşlı yeniyetmə müəyyən olunaraq saxlanılıb.

Oktyabrın 24-də Rusiya Federasiyasının Kazan şəhərində keçirilən XVI BRİKS Sammiti əsnasında Azərbaycan Respublikasının Prezidenti İlham Əliyev və Ermənistanın Baş naziri Nikol Paşinyan arasında görüş olub. Sozcu.az xəbər verir ki, görüşdə tərəflər ikitərəfli sülh gündəliyinin irəli aparılmasını, o cümlədən sülh sazişini, sərhədlərin delimitasiyası və demarkasiyasını, qarşılıqlı maraq doğuran digər məsələləri müzakirə ediblər. İki ölkənin xarici işlər nazirlərinə Sülh və Dövlətlərarası Münasibətlərin Qurulması haqqında Saziş üzərində işlərin mümkün tez zamanda yekunlaşdırılması və imzalanması üçün ikitərəfli danışıqları davam etdirmək barədə təlimat verilib.

ABŞ prezidentliyinə namizəd TRAMP deyib ki: “120.000 erməni xristianı dəhşətli şəkildə təqib ediləndə və Artsaxdan məcburi köçkün düşəndə ​​Kamala Harris heç nə etməyib.” Əslində Qarabağ erməniləri təqib edilməyib, əksinə burada yaşayan erməni əhalisinin vasitəçiliyi ilə Ermənistan, Rusiya tərəfindən 700 minədək Azərbaycan əhalisi dəhşətli şəkildə təqib edilib, yurdlarından qovulub, əmlakları talan edilib, evləri dağıdılıb, əsir götürülüb, öldürülüb. Azərbaycanın 7 şəhəri, 10-dək qəsəbəsi, 400 dən çox kəndinin daşı daş üstündə qalmayıb, yox edilib, yer üzündən silinib. Bu dövrdə ABŞ prezidenti olmuş TRAMP heç nə etməyib. TRAMP deyir ki: “Kamala Harris Amerika Birləşmiş Ştatlarının prezidenti olarsa, dünyadakı xristianlar təhlükəsiz olmayacaqlar. Mən prezident olanda təqib olunan xristianları qoruyacağam…” Bəs təqib olunan bütpərəstləri, müsəlmanları, ümumiyyətlə dini inancsız olanları necə, onları qorumaq vacib deyilmi? Demokratiyanın beşiyi, xarici siyasətində insan haqlarının və demokratik dəyərlərin qorunmasını dövlət siyasəti elan etmiş bir dövlətin başçısı olmuş və yenidən olmaq istəyən namizəd bu barədə nə düşünür? Əziz həmvətənlərim, bəs siz bu barədə nə düşünürsüz? Yazı Müsavat Məclisinin sədri Arif Hacılının feysbuk səhifəsindən götürülüb.

ABB-nin xarici valyutadan gəliri 6 milyon manatdan çox azalıb. “Azərbaycan Beynəlxalq Bankı” (ABB) 2024-cü ilin 9 ayında xarici valyutadan 43 milyon 11 min manat gəlir (məzənnə dəyişməsi daxil olmaqla) əldə edib.  "Yeni Sabah" bu barədə bankın hesabatına istinadən xəbər verir. Bu, 2023-cü ilin eyni dövrü ilə müqayisədə 6 milyon 430 min manat və ya 13 % azdır. 2023-cü ilin 9 ayında ABB-nin xarici valyutadan gəliri 49 milyon 441 min manat təşkil edib. Xatırladaq ki, ABB 1992-ci ildə yaradılıb. Onun nizamnamə kapitalı 1 milyard 225,648 milyon manatdır. Bankın səhmlərinin 92,56 %-i Maliyyə Nazirliyinə, 3,81 %-i İqtisadiyyat Nazirliyi yanında Əmlak Məsələləri Dövlət Xidmətinə, 0,23 %-i “Aqrarkredit” QSC bank olmayan kredit təşkilatına (BOKT), 3,4 %-i isə fiziki və hüquqi şəxslərə məxsusdur.

Keçmiş ABŞ prezidenti, respublikaçıların prezidentliyə namizədi Donald Tramp Azərbaycanın ərazi bütövlüyünə qarşı hörmətsizlik edib. Sozcu.az xəbər verir ki, Tramp "X" hesabından etdiyi paylaşımda Demokrat rəqibi Kamala Harrisi tənqid edib və bu zaman Qarabağı "artsax" adlandırıb. Tramp həmin paylaşımında yazıb:"Kamala Harris 120 min erməni xristianın dəhşətli təqiblərə məruz qaldığı və "artsax"dan zorla köçürüldüyü zaman heç bir şey etmədi. Kamala Harris ABŞ-nin prezidenti olarsa, dünyadakı xristianlar təhlükədə olacaqlar. Mən prezident olsam, təqib olunan xristianları müdafiə edəcəyəm, zorakılığı və etnik təmizləməni dayandıracağam. Ermənistanla Azərbaycan arasında sülhü bərpa edəcəyəm"

Qaradağ rayonunda yerləşən zavodlardan birində ölümlə nəticələnən bədbəxt hadisə baş verib. "Qafqazinfo" xəbər verir ki, dünən saat 17 radələrində Qobustan qəsəbəsi ərazisində yerləşən "ANT" sement zavodunda "Azərişıq" ASC-nin işçisini cərəyan vurub. Belə ki, 1996-cı il təvəllüdlü Ramazan Fərhat oğlu Məmmədli zavod ərazisində iş görərkən onu elektrik cərəyanı vurub. ASC əməkdaşı hadisə yerində ölüb. Hazırda faktla bağlı araşdırma aparılır.

Daşkəsəndə mənzildə qaz sızmasından partlayış olub. Sozcu.az APA-ya istinadla xəbər verir ki, hadisə Daşkəsən şəhərinin M.Əsədov küçəsində yerləşən yaşayış binasında qeydə alınıb. Belə ki, sözügedən ünvada yerləşən üçmərtəbəli yaşayış binasının 3-cü mərtəbəsində partlayış olub. Nəticədə ev sahibi 52 yaşlı Nadir Sadıqov yanıq xəsarətləri alıb. O xəstəxanaya yerləşdirilib və vəziyyətinin ağır olduğu bildirilir. Faktla bağlı araşdırma aparılır. Hadisə nəticəsində xəsarət alan şəxslə bağlı TƏBİB-in yaydığı məlumatda qeyd edilir ki, Daşkəsən rayon sakini 1972-ci il təvəllüdlü Nadir Telman oğlu Sadıqov 24 oktyabr saat 05:45 radələrində yanıq xəsarətləri ilə akademik Z.Məmmədov adına xəstəxananın Təcili tibbi yardım şöbəsinə bədən səthinin 30-39 faiz sahəsinin termiki yanığı, tənəffüs yollarının dəqiqləşdirilməmiş lokalizasiyalı termiki yanığı diaqnozu ilə gətirilib. Pasiyentə zəruri tibbi yardım göstərilib. Hazırda müalicə və müayinəsi reanimasiya şöbəsində davam etdirilir, vəziyyəti orta ağırdır.

Rusiyada yerləşən Şimali Koreya qoşunları Ukraynadakı döyüşlərə cəlb olunarsa, qanuni hədəfə çevriləcək. Sozcu.az xəbər verir ki, bunu Ağ Evin Milli Təhlükəsizlik Şurasının sözçüsü Con Kirbi deyib. “Şimali Koreya əsgərləri Ukraynada döyüşmək qərarına gəlsələr, onlar qanuni hərbi hədəfə çevriləcəklər”, - o bildirib. Qeyd edək ki, Pentaqon Şimali Koreya qoşunlarının Rusiya ərazisində olmasına dair sübutların olduğunu bəyan edib.

Ukrayna prezidenti Vladimir Zelenski enerji infrastrukturlarına hücumların dayandırılmasının aktiv hərbi əməliyyatların başa çatması üçün ilk addım ola biləcəyi fikrini ifadə edib.  Sozcu.az xəbər verir ki, o, bu barədə Britaniyanın “Financial Times” qəzetinə müsahibəsində bildirib. Ukrayna lideri bildirib ki, enerji təhlükəsizliyi ilə bağlı qərar qəbul edə bilər: “Bu, müharibənin qaynar mərhələsinin sona çatmasına səbəb ola bilərmi? Düşünürəm ki, bəli”.

Tanınmış vəkil Asabali Mustafayevin səhhətində ciddi problemlər yaranıb. Sozcu.az xəbər verir ki, bu barədə sosial şəbəkələrdə məlumat yayılıb. Qeyd olunur ki, A.Mustafayev komaya düşüb, hazırda reanimasiyadadır. Qeyd edək ki, Ə.Mustafayev bir müddət əvvəl infarkt keçirib.

“Sinifdə şagirdlərin sayı 20 nəfərdən çox olduqda paralel siniflər təşkil edilməlidir. Siniflər üzrə şagird sıxlığı normalarının qəbul olunmasına baxmayaraq, paytaxtın əksər məktəblərində şagird sıxlığı problemi hələ də var. Sinifdə şagird sayının 25-dən yuxarı olması doğru deyil. Siniflərdəki maksimal şagird sayı 20-25 olmalıdır. Bir sinifdə 45-50 nəfər şagirdin təhsil alması doğru deyil. Çünki 45 dəqiqəlik zaman kəsiyi, bir müəllimin 45-50 nəfər təhsilalana mövzuları çatdırmasına və ev tapşırıqlarını yoxlamasına kifayət etmir. Şagirddən öyrəndiyini də soruşmağa vaxt çatmır”. Bunu Bakupost.az -a təhsil eksperti Elşən Qafarov deyib. O bildirib ki, 15-20 nəfərdən çox şagirdlə pedaqoji fəaliyyətlə məşğul olmaq və bütün şagirdlərə vaxt çatdırmaq mümkün olmayan məsələdir: “Şagird sıxlığı olan siniflərdə hər kəsin dərsdə fəal iştirak etməsi qeyri-mümkündür. Fikrimcə, siniflər maksimum 20 şagirddən ibarət olmalıdır. 30-40 şagirddən təşkil olunan siniflərdə təhsilin keyfiyyətindən söhbət belə gedə bilməz. O sinifdə sadəcə olaraq, proqram yerinə yetirilir. Ölkədə məktəb qıtlığı var, xüsusən də Bakı şəhərində məlum problem yaşanır. Şagird sıxlığı da tədrisin keyfiyyətinə mənfi təsir göstərir. Müvafiq proqram üzrə keyfiyyətli təhsil ala bilməyən şagirdlərin valideynləri repetitorlara müraciət edir”.

Ankaranın Qəhrəmanqazan rayonunda dövlət aerokosmik şirkəti – TUSAŞ-ın binasının qarşısında partlayış baş verib. Sozcu.az xəbər verir ki, bu barədə Türkiyə mediası məlumat yayıb. Binaya yaxın ərazidə silah səslərinin eşidildiyi və kamikadzenin olduğu iddia edilib.

Səfərbərlik və Hərbi Xidmətə Çağırış üzrə Dövlət Xidmətinin (SHXÇDX) Nizami Rayon İdarəsinin Çağırış şöbəsinin baş zabiti vəzifəsində işləmiş Hümbət Nəbiyevin cinayət işi üzrə məhkəmə prosesi başa çatıb. Sozcu.az xəbər verir ki, Bakı Hərbi Məhkəməsində hakim Rafiq Abbasovun sədrlik etdiyi prosesdə hökm oxunub. Hökmə əsasən, H. Nəbiyev 8 il müddətə azadlıqdan məhrum edilib. Qeyd edək ki, Hümbət Nəbiyevi Baş prokuror yanında Korrupsiyaya qarşı Mübarizə Baş İdarəsi saxlayıb. İttihama görə, o, qeyd olunan vəzifədə işləyərkən vətəndaşdan müvəqqəti olaraq möhlət hüququnun verilməsi, həmçinin dinc dövrdə həqiqi hərbi xidmətə yararsız, müharibə dövründə məhdud yararlı olmasına dair hərbi biletin təqdim edilməsi müqabilində rüşvət tələb edib. Hümbət Nəbiyev Cinayət Məcəlləsinin 311.3.3 (qabaqcadan əlbir olan bir qrup şəxs tərəfindən təkrar və külli miqdarda rüşvət alma) maddəsi ilə ittiham edilib.

Xəbər verdiyimiz kimi, Sabunçuda ötən gecə tunelə yağış sularının dolması nəticəsində 2 nəfər boğularaq ölüb. Sozcu.az-ın “Unikal”a istinadən məlumatına görə, həmin tunel “Körpü Bina Tikinti” MMC tərəfindən inşa edilib. Tunelin açılışı 2020-ci ildə olub. Qeyd edək ki, “Körpü Bina Tikinti” MMC-nin direktoru Xəlil Göyüşovdur. Jurnalist Cavanşir Həsənli özünün sosial şəbəkə hesabında yazıb ki, Xəlil Göyüşovun oğlu Ramiz Göyüşov bir neçə il əvvəl Almaniyanın Hamburq şəhərində 40 milyon avroluq ARENA OTELini (AGO Park Hotel Betriebs GmbH, Hamburg) alıb. Görəsən, hüquq mühafizə orqanları bu məlumatı araşdıracaqmı?

Oktyabrın 23-ü saat 09:00-a olan faktiki hava açıqlanıb. Sozcu.az Milli Hidrometeorologiya Xidmətinə istinadla xəbər verir ki, hazırda Lənkəran-Astara bölgəsində yağıntılı, qeyri-sabit hava şəraiti davam edir. Düşən yağıntının miqdarı Astarada 64 mm, Lənkəranda 53 mm, Lerikdə 50 mm, Yardımlı 40 mm təşkil edir. Yağan qar nəticəsində əmələ gələn qar örtüyünün hündürlüyü Lerikdə 17 sm olub. Lənkəran-Astara bölgəsində müşahidə olunan yağıntılı hava şəraitinin oktyabrın 23-ü axşamadək davam edəcəyi gözlənilir.

Ermənistan parlamenti bu gün keçirilən iclasda Azərbaycanla sərhədin delimitasiyası üzrə komissiyaların birgə fəaliyyəti haqqında müddəanı ratifikasiya edib. Sozcu.az xəbər verir ki, bunu Ermənistan parlamentinin spikeri Alen Simonyan deyib. Onun sözlərinə görə, 67 deputat layihənin lehinə səs verib. Səsvermədə yalnız Mülki Müqavilə Partiyasının deputatları iştirak edib. “Ermənistan” və “Şərəfim var” müxalif fraksiyaların deputatları səsverməyə qatılmayıb.

Qubadlı rayonunda yol-nəqliyyat hadisəsi baş verib. Sozcu.az unikal-a istinadla xəbər verir ki, "Mercedes" markalı avtomobilin qəzaya düşməsi nəticəsində 2002-ci il təvəllüdlü Astara rayon sakini Elnur Cabbarov həyatını itirib. E.Cabbarov Azərbaycan Ordusunun zabiti idi.

Oktyabrın 25-də bütün müavinət, təqaüd, kompensasiya və ünvanlı dövlət sosial yardımlarının ödəməsi nəzərdə tutulub. Sozcu.az xəbər verir ki, bu barədə Əmək və Əhalinin Sosial Müdafiəsi Nazirliyi tabeliyində Dövlət Sosial Müdafiə Fondundan məlumat yayıb.

"Bu gün Bakıda avtomobil tunelində iki nəfərin həyatını itirməsi sadəcə təsadüfi bir faciə deyil, bu, bizim şəhər rəhbərliyinin və infrastruktur planlamasının tam iflasının acı nəticəsidir. Bəs bu qədər məsuliyyətsizlik nə vaxta qədər davam edəcək? Bu, bir yağış hadisəsi deyil, bu, düşünülməmiş, planlaşdırılmamış və vətəndaşın təhlükəsizliyinə qarşı etinasız yanaşmanın nəticəsidir".  Sozcu.az xəbər verir ki, bu sözləri aparıcı İlkin Həsəni sosial şəbəkə hesabında yazıb. O, ötən gündən yağan yağışın paytaxtda yaratdığı problemlərə toxunaraq bunları qeyd edib: "Tunellərimiz, yollarımız hər yağışdan sonra dənizə çevrilir. Hansı əsrdə yaşayırıq ki, paytaxtın əsas yollarında yağış suları belə fəlakətlərə səbəb olur? Bu cür hadisələrin qarşısını almaq üçün bir tədbir görmək bu qədərmi çətindir? İnsanların həyatına bu qədər dəyər verməyən qurumların cavabdeh şəxsləri nə vaxt hesabat verəcəklər? Hər susqunluğumuz bir növbəti faciənin yolunu açır".