Pakistanın Xeybər-Paxtunxva əyalətinin şimal-qərbində polis məntəqəsində partlayış baş verib. Sozcu.az xəbər verir ki, bu barədə “Röyters” məlumat yayıb. Məlumata görə, partlayış nəticəsində azı dörd polis ölüb, bir neçəsi yaralanıb. Bildirilib ki, eyni əyalətin Dera İsmayıl Xan rayonunda həyata keçirilən növbəti terror aktı nəticəsində daha 28 nəfər müxtəlif dərəcəli bədən xəsarətləri alıb. Hadisələrə görə məsuliyyəti “Təhrik-i-Taliban Pakistan” terror qruplaşması öz üzərinə götürüb.

Türkiyə Futbol Federasiyasının prezidenti Mehmet Büyükekşi MKE “Ankaragücü” klubunun prezidenti Faruk Kocanın hakim Halil Umut Melerə hücumundan sonra növbədənkənar toplantı keçirib Sozcu.az Türkiyə KİV-ə istinadla xəbər verir ki, toplantıdan sonra o, jurnalistlərə verdiyi açıqlamada ölkədəki bütün liqaların oyunlarının qeyri-müəyyən müddətə təxirə salındığını bəyan edib. Xatırladaq ki, ötən gün – dekabrın 11-də Türkiyənin Trendyol Super Liqasının 15-ci həftəsində “Ankaragücü” ilə “Rizəspor” 1:1 hesablı heç-heçə edib. Qarşılaşmadan sonra meydana daxil olan “Ankaragücü” prezidenti Faruk Koca matçın baş hakimi Halil Umut Melerə yumruq zərbəsi endirib. Zərbə nəticəsində Meler gözündən xəsarət alıb.

Salyan rayon Mərkəzi Xəstəxanasının Vərəm şöbəsinin sabiq müdiri Xanış Abbasova hökm oxunub. Sozcu.az xəbər verir ki, hökm Lənkəran Ağır Cinayətlər Məhkəməsində hakim Nahid Hüseyinovun sədrliyi ilə keçirilən məhkəmə iclasında elan olunub. Sabiq şöbə müdiri 2 il müddətə dövlət orqanlarında və yerli özünüidarə orqanlarında rəhbər və maddi-məsul vəzifə tutmaq hüququndan məhrum edilməklə 5 il 3 ay müddətə azadlıqdan məhrum edilib. Ona təyin olunmuş cəza 2 il şərti cəza ilə əvəz olunub. İttiham aktına əsasən, o, əlillik dərəcəsinin təyin olunması üçün müxtəlif şəxslərdən aldığı rüşvət müqabilində xəstəlik diaqnozu və stasionar müalicəyə dair tibbi sənədlərin məzmununa yalan məlumatlar daxil edib. Ona qarşı Cinayət Məcəlləsinin 311.2 (vəzifəli şəxs tərəfindən qanunsuz hərəkətlərə görə rüşvət alma), 313-cü (vəzifə saxtakarlığı) maddələri ilə ittiham irəli sürülüb.report

Azərbaycanda 2020-ci ilin martından koronavirus səbəbilə elan edilən xüsusi karantin rejimi aprel ayının 2-dək davam edəcək. Həmin tarixdən sonra karantin rejiminin uzadılması hələlik məlum deyil. Rejim tam ləğv edilməsə də, infeksiyanın çox yayıldığı zaman xeyli sayda insanın cərimələnməsinə səbəb olan maska və digər qadağalar götürülüb. Xəstəliyin yayılmasının qarşısını almaq məqsədilə keçirilən tədbirlər zamanı qaydalara uymayan vətəndaşlar cərimələnib. Lakin ümumilikdə nə qədər insanın cərimələndiyi, nə qədərinin cəriməni ödədiyi və borclu qaldığı haqqında statistika yoxdur. Rəqəmlər məlum olmasa belə hələ də sosial şəbəkələrdə cərimələrin ləğvi, məbləği barədə müzakirələr gedir. Cərimə olunan və bunu ödəməyənlər cərimənin hansı halda silinməsinin mümkünlüyü ilə bağlı suallara cavab axtarırlar. Xüsusilə, qonşu ölkələr, Gürcüstan və Türkiyə cərimələrin ləğvi və ödənilən cərimələrin məbləğinin geri qaytarılması haqqında qərar qəbul etdikdən sonra ölkədə buna ümid edənlərin sayı artıb. Maskasız, sms icazə olmadan çölə çıxanların cərimələri hansı halda bağışlana bilər? Cəriməni ödəyənlərin ödədiyi məbləğ geri qaytarıla bilərmi? Mövzu ilə bağlı Bizim.Media-ya danışan deputat Razi Nurullayev cərimələrin ləğvinin tərəfdarıdır: “Buna hökumət, Milli Məclis səviyyəsində qərar verilə bilər. Gürcüstanda bu məsələ qaldırıldı və parlament səviyyəsində həll olundu. Hesab edirəm ki, Azərbaycanda da məsələyə diqqətlə yanaşılmalı və həll olunmalıdır.  Doğrudur, o vaxt kimlərsə cərimə olundu, amma dövlətin məqsədi insanları cərimələmək, insanların cibinə girmək deyildi. Məqsəd insanları məsuliyyətli olmağa dəvət etmək idi. Bu baxımdan düşünürəm ki, bu cərimələr ləğv olunmalıdır. Bunun necə olacağını deyə bilmərəm. Amma bu məsələnin ciddi şəkildə həllinin tərəfdarıyam”. Milli Məclisin üzvü cərimələrin geri qaytarılmasında Türkiyə təcrübəsindən istifadə edilməsini doğru hesab edir:  “Cərimələrin geri qaytarılması ilə bağlı Türkiyədə təcrübə varsa və ölkəmizdə də bu həyata keçirilərsə, təbii ki, vətəndaşlarımız çox razı qalar. Mən istəyərdim ki, olsun. Nə qədər mümkündür, mümkün deyil, gərək bununla bağlı əlaqədar orqanlar qərar versin. Amma niyə mümkün deyil ki? Həyatda mümkün olmayan nəsə varmı?!  Hər şey mümkündür. Ən azından hələki ödənilməyən cərimələrin ləğv olunması ilə bağlı bir qərar lazımdır. Kimlərsə də ödəyibsə, onlara haqsızlıq olmasın deyə, həmin şəxslərin cərimələrinin geri qaytarılması gözəl bir addım olar”.

Qusarda avtobus qəzasında xəsarət alanların vəziyyəti açıqlanıb. TƏBİB-dən Sozcu.az-a bildirilib ki, qəza nəticəsində xəsarət alan altı nəfər (bir kişi, beş qadın olmaqla) Qusar Rayon Mərkəzi Xəstəxanasına yerləşdirilib. Xəsarət alanlardan birinin (qadın cinsli) vəziyyəti orta ağır, digərlərinin vəziyyətləri stabil olaraq qiymətləndirilir. Hazırda tibb müəssisəsinin müvafiq şöbəsində pasiyentlərə zəruri tibbi xidmətlərin göstərilməsi davam etdirilir. “Qusar-Xurel marşrutu üzrə hərəkət edən sərnişin avtobusunun qəzaya uğraması ilə əlaqədar Qusar Rayon Mərkəzi Xəstəxanasının Təcili tibbi yardım şöbəsinə çağırış daxil olub. Təcili tibbi yardım briqadaları dərhal hadisə yerinə cəlb olunub”, – TƏBİB-dən bildirilib. ***17:10 Qusarda avtoqəza zamanı xəsarət alan şəxslərin kimliyi məlum olub. Sozcu.az “Report”a istinadən bildirir ki, yaralılar Qusar rayon sakinləri – Liana Nəriman qızı Mikayılova, Lamunat Misənnif qızı Bədəlova, Milyanə Vəzirxan qızı Şıxzadayeva, Ruslan Əmiraslan oğlu Əmiraslanov, Aksana Mövlud qızı Beydiyeva və Aysel Mayis qızı Cavadovadır. Xəsarət alanların hamısı təcili tibbi yardım briqadasınin köməkliyi ilə Qusar Rayon Mərkəzi Xəstəxanasına çatdırılıb. Faktla bağlı araşdırma aparılır. ***16:24 Qusar rayonunun Avaran kəndi ərazisində yol-nəqliyyat hadisəsi baş verib. Sozcu.az xəbər verir ki, Qusar-Xurel marşrutu üzrə hərəkətdə olan avtobus Avaran kəndi ərazisində yoldan çıxaraq dərəyə aşıb. 15 sərnişindən 6-sı Qusar Rayon Mərkəzi Xəstəxanasına yerləşdirilib. Qəzanın güclü duman səbəbindən baş verdiyi ehtimal edilir.

“Vladimir vilayətinin Melexovo kəndindəki 6 saylı islah koloniyasının əməkdaşları bildiriblər ki, Aleksey Navalnı artıq orda deyil”. Sozcu.az xarici KİV-ə istinadən xəbər verir ki, bu barədə siyasətçinin vəkili məlumat yayıb. “Onlar onun hara köçürüldüyünü söyləməkdən imtina edirlər”, - Navalnının mətbuat katibi Kira Yarmış bildirib. Siyasətçinin nümayəndəsi onu da bildirib ki, Vladimir vilayətindəki 7 saylı cəzaçəkmə müəssisəsində, xüsusi rejimli koloniyada da vəkilə Navalnının orada olmadığı bildirilib: “Cümə günü və bu gün nə İK-6, nə də İK-7 cavab verməyib. Aydındır ki, indi əmr verilib. Alekseyin harada olduğu hələ məlum deyil”. Xatırladaq ki, Rusiya müxalifətinin lideri Aleksey Navalnı 2022-ci il martın 22-də fırıldaqçılıq və hakimi təhqir etməsi ittihamı ilə 9 il azadlıqdan məhrum olunub.

Bazar ertəsi türk lirəsinin dollara qarşı məzənnəsi tarixdə ilk dəfə 1 dollar üçün 29 lirəni keçib. Sozcu.az Reuters-ə istinadla xəbər verir ki, bunu TradingView terminalında ticarət məlumatları sübut edir. Ən yüksək həddində məzənnə 1 dollar üçün 29,12 lirə olub. İl ərzində Türkiyənin milli valyutası 35% ucuzlaşıb. Noyabrın sonunda Türkiyə hakimiyyəti ölkədə illik inflyasiyanı demək olar ki, yarıya endirmək niyyətində olduqlarını, 2024-cü ildə hazırkı 65%-dən 34%-ə çatdırmaq niyyətində olduqlarını açıqlayıb. Ölkədə inflyasiya 2021-ci ilin iyun ayındaki minimum dəyərlərdən bu ilin sentyabrına qədər 60%-ə yüksəlib. 2024-cü ildə hədəfə çatdıqdan sonra maliyyə orqanları sabit inflyasiya dəyərləri yaratmağı hədəfləyir. Mərkəzi Bankın proqnozunda inflyasiyanın 2024-cü ildə 33%-ə, 2025-ci ildə isə 15%-ə enməsi nəzərdə tutulur.

Məktəbəqədər təhsil müəssisələrində çalışan şəxslərin minimum bakalavr təhsili səviyyəsində hazırlanması əsas məqsəddir. Sozcu.az xəbər verir k, bunu Elm və təhsil naziri Emin Əmrullayev "Məktəbəqədər təhsildə keyfiyyətə yeni baxış" mövzusunda keçirilən beynəlxalq elmi-praktik konfransda çıxışı zamanı deyib. Nazir hesab edir ki, yaxın gələcəkdə bununla bağlı dəyişiklik barədə məlumat vermək mümkün olacaq: “Gələcəkdə orta ixtisas təhsilli mütəxəssislərin bağçalarda işləməsinə icazə verilməyəcək. Biz artıq ümumi təhsildə orta ixtisaslı mütəxəssislərin fəaliyyətini dayandırmışıq. Bu, məktəbəqədər təhsildə də olacaq. Bu vaxta qədər işə qəbul olunmuş orta ixtisaslı şəxslər çalışacaq. Onların fəaliyyətinə heç bir müdaxilə edilməyəcək.

Bakı Apellyasiya Məhkəməsində tanınmış alim və iş adamı olan Mirzəxan Mənsimovun oğlunun yol qəzasında ölümünə səbəb olmaqda təqsirləndirilən Xəlil Əsədlinin barəsindəki hökmdən dövlət ittihamçı tərəfindən verilən apellyasiya protesti və apellyasiya şikayəti üzrə məhkəmə iclası başa çatıb. Hakim Ramin Qaraqurbanın sədrliyi ilə keçirilən prosesdə qərar elan olunub. Qərara əsasən, zərərçəkmiçin hüquqi varisinin şikayəti və prokurorun protesti qismən təmin edilib, Bakı Ağır Cinayətlər Məhkəməsinin çıxardığı hökm dəyişdirilib. Belə ki, Xəlil Əsədlinin 5 il müddətinə azadlıqdan məhrumetmə cəzası artırılaraq, 6 ilə qaldırılıb. O, məhkəmə zalından həbs edilib. Hökmdən narazı qalan məhkum kassasiya şikayəti ilə Ali Məhkəməyə müraciət edib. Qeyd edək ki, 1993-cü il təvəllüdlü Xəlil Əsədli "BMW" markalı avtomobillə ağır qəza törədib. Nəticədə 1994-cü il təvəllüdlü Nurlan Mənsimli ölüb. Sürücünün barəsində Cinayət Məcəlləsinin 263-1.3-cü (Yol hərəkəti və ya nəqliyyat vasitələrinin istismarı qaydalarını sərxoş halda pozma – ölümlə nəticələndikdə) maddəsi ilə ittiham irəli sürülüb.. İttihama görə, "BMW" markalı avtomobil Nurlana məxsus olub və həmin vaxt nəqliyyat vasitəsini Xəlil sərxoş halda idarə edib. Onlar 20 noyabr tarixində saat 05:25-də Səbail rayonu ərazisində - Şeyx Şamil və Abdulla Şaiq küçələrinin kəsişməsində metronun "İçərişəhər” stansiyasından üzü Nərimanov heykəlinə doğru hərəkətdə olarkən avtomobil Xəlilin idarəetməsindən çıxaratq sürətlə maneəyə çırpılıb. Xatırladaq ki, Nurlan Mənsimlinin atası, tanınmış coğrafiyaçı alim, həmçinin "İqlim" MMC-nin rəhbəri olan Mirzəxan Mənsimovdur. O, məhkəmədə ifadəsində Xəlilə ağır cəza verilməsini istəyib. (Pravda.az)

Konyada 8-ci sinif şagirdi olan 13 yaşlı C.S., özündən 15 yaş böyük Əli G. ilə atasının zoru ilə nişanlanıb. Evdə keçirilən nişan mərasiminin görüntüləri sosial mediada paylaşıldıqdan sonra Ailə və Sosial Xidmətlər Müdirliyi istintaqa başlayıb. İstintaq çərçivəsində polis C.S. Onun nişanlı olduğu Əli G. və ailə üzvlərinin ifadələrini alıb. Araşdırma davam edir.

AB İrəvanla hərbi təlimlər keçirmək, erməni hərbçilərə isə təlim keçmək niyyətində deyil. Sozcu.az xəbər verir ki, bunu AB-nin xarici siyasət və təhlükəsizlik məsələləri üzrə ali komissarının mətbuat katibi Peter Stano deyib. “AB Ermənistanla birgə hərbi təlimlər keçirmək imkanını nəzərdən keçirmir. AB hərbi ittifaq deyil, siyasi və iqtisadi birlikdir”, - o bildirib. Stano qeyd edib ki, AB Ermənistan ordusunun hərbi personalına AB-yə üzv dövlətlərin ərazisində də təlim keçməyi planlaşdırmır: “Ermənistan ordusuna Avropa Sülh Fondu vasitəsilə “qeyri-öldürücü formatda” dəstək verilməsi imkanlarını öyrənirik, lakin hələlik konkret qərarlar yoxdur”.

Ukrayna müharibənin 656-cı günü üçün Rusiya ordusunun itkiləri haqda məlumatı yeniləyib. Sozcu.az xəbər verir ki, bu barədə Ukrayna Baş Qərargahı məlumat yayıb. Məlumata əsasən, Rusiya indiyə qədər 339 850 hərbçi, 5 655 ədəd tank, 10 560 ədəd zirehli döyüş maşını, 8070 ədəd artilleriya sistemi, 919 ədəd RYAS (reaktiv yaylım atəş sistemi), 605 hava hücumundan müdafiə sistemi, 324 ədəd hərbi təyyarə, 324 ədəd helikopter, 10 636 ədəd avtomobil texnikası, 6154 ədəd PUA, 1 586 qanadlı raket, 22 gəmi/kater, 1 sualtı qayıq, 1 168 xüsusi avadanlıq itirib.

İsrailin Baş naziri Binyamin Netanyahu Fələstinin radikal HƏMAS hərəkatı üçün “sonun başlanğıcı” olduğunu açıqlayıb. Sozcu.az xəbər verir ki, onun sözləri İsrail hökuməti başçısının rəsmi teleqram kanallarından birində sitat gətirilib. Baş nazirin sözlərinə görə, son günlər HƏMAS-ın onlarla döyüşçüsü İsrail ordusuna təslim olub. O, HƏMAS yaraqlılarının silahlarını yerə qoyduğunu və İsrail hərbçilərinə təslim olduğunu bildirib. Netanyahu bildirib ki, bu proses bir qədər vaxt aparacaq, müharibə tam sürətlə davam edir, lakin bu, HƏMAS üçün sonun başlanğıcıdır. O, həmçinin hərəkatın döyüşçülərini təslim olmağa çağırıb.

Rusiyada yumurta qıtlığı yaşanmaqdadır. Artıq bir çox yerlərdə yumurta almaq üçün uzun növbələr yaranır. Sozcu.az Musavat.com-a istinadən xəbər verir ki, noyabr ayında Rusiyada yumurtanın qiyməti 17 faiz bahalaşıb. Bahalaşma və yumurta qıtlığı yay aylarından başlanıb. İlki mərhələdə Rusiya Kənd Təsərrüfatı Nazirliyi bahalaşmanın quşçuluq şirkətlərinin özfəaliyyəti olduğunu elan etsə də, araşdırmalardan sonra istehsalın kəskin azaldığı məlum oldu. Eyni proses toyuq əti ilə bağlı da gedir. Noyabr ayında Rusiya hökuməti toyuq əti və yumrtanın idxalını gömrük rüsumundan tam azad edib.

Ukrayna Prezidenti Vladimir Zelenski dekabrın 12-də ABŞ-a səfər edəcək. Sozcu.az xəbər verir ki, bu barədə Ağ Evin mətbuat xidməti məlumat yayıb. Bildirilib ki, Birləşmiş Ştatlar lideri Co Bayden həmkarını Ağ Evdə qəbul edəcək. Qeyd edək ki, V.Zelenski hazırda Argentinada səfərdədir.

Azərbaycan Respublikasının xarici işlər naziri Ceyhun Bayramov “Şərq tərəfdaşlığı” xarici işlər nazirlərinin görüşündə iştirak etmək məqsədilə Belçika Krallığına işgüzar səfərə yola düşüb. Bu barədə Sozcu.az-a Azərbaycanın Xarici İşlər Nazirliyindən bildirilib. Səfər zamanı C.Bayramovun Brüssel şəhərində keçirilən tədbirdə çıxışı və ikitərəfli görüşlərinin keçirilməsi nəzərdə tutulub.

Xaçmazda avtomobil velosipedçini vuraraq öldürüb. Sozcu.az-ın Report-a istinadən məlumatına görə, hadisə Gəndob-Xaçmaz -Yalama avtomobil yolunun rayonun Cinartala kəndindən keçən hissəsində baş verib. Belə ki, "KamAZ" markalı yük avtomobili velosipedçi, 1949-cu il təvəllüdlü Mirzəyev Sədyar Qaraxan oğlunu vuraraq öldürüb. Hadisə ilə bağlı araşdırma aparılır.

Şəkidə intihar hadisəsi baş verib. Sozcu.az xəbər verir ki, hadisə Çeşməli kəndində, meşəlik ərazidə qeydə alınıb. Rayonun Yeni Çələbi Xan qəsəbə sakini, 1996-cı il təvəllüdlü Məhəmməd Məmmədov tüfənglə özünə atəş açaraq intihar edib. Məlumata görə, 27 yaşlı M.Məmmədovun psixoloji problemləri olub. Faktla bağlı araşdırma aparılır. (Report)

Güneyli milli fəallar Təbrizin Eynalı dağının qayalarına Azərbaycan bayrağını həkk ediblər. Sozcu.az xəbər verir kİ, bu barədə Güney Azərbaycan sosial media kanallarında məlumat yayılıb. Bildirilib ki, təbrizlilərin həftəlik yürüş etdikləri yerlərdə Azərbaycan bayrağının həkk edilməsi, güneylilərin Azərbaycan həqiqətlərinə diqqətini cəlb etmək, İran hökumətinin Azərbaycana qarşı təbliğatlarına cavab məqsədilə həyata keçirilib. Qeyd edək ki, Azərbayca bayrağının bir neçə yerdə həkk edildiyi Eynalı dağına hər tətil günü minlərlə təbrizli yürüş edir. Uzun illərdir ki, hökumətə qarşı aksiyalar öncəsi Eynalı qayalarına şüarların yazılması ənənəyə çevrilib.

Qəzza zolağında HƏMAS radikallarına qarşı intensiv döyüşlər ən azı daha iki ay davam edəcək. Sozcu.az İsrailin “Kan” dövlət radiosuna istinadən xəbər verir ki, iki aylıq gərgin döyüşlərdən sonra Qəzzada atəşkəs gözlənilmir və zolaqda yerli əməliyyatlar Qəzzanın daxilində qalacaq ordu birləşmələri tərəfindən həyata keçiriləcək. “Kan”ın məlumatına görə, İsrail oktyabrın 7-də radikallar tərəfindən oğurlanmış və sektorda saxlanılan girovların azad edilməsi üçün bu iki ay ərzində əlavə danışıqlar aparmağa çalışmağa davam edəcək. Radiostansiya diqqətə çatdırıb ki, qarşıdakı iki ay ərzində İsrail bəzi Qəzza sakinlərinə evlərinə qayıtmağa icazə verəcək, çünki “bu, ABŞ-nin tələbidir” və eyni zamanda “əməliyyat zərurətinə” uyğun gəlir.

Abşeron rayonunun Ceyranbatan qəsəbəsində mənzildə partlayış olub. Bu barədə Fövqəladə Hallar Nazirliyinin “112” qaynar telefon xəttinə məlumat daxil olub. Məlumatla əlaqədar dərhal FHN-in Dövlət Yanğından Mühafizə Xidməti Abşeron Rayon Yanğından Mühafizə Hissəsinin qüvvələri əraziyə cəlb olunub. Hadisə yerində əməliyyat şəraitinin qiymətləndirilməsi zamanı beşmərtəbəli yaşayış binasının 4-cü mərtəbəsində yerləşən ümumi sahəsi 47m² olan üçotaqlı mənzilin eyvanında, ilkin ehtimala görə, məişət qazının sızması nəticəsində yanğınla nəticələnməyən partlayışın baş verdiyi müəyyən olunub. Hadisə zamanı eyvanın pəncərə çərçivələri yerindən çıxıb, 2 otağın pəncərələri qırılıb. Hadisə nəticəsində mənzilin sahibi 1953-cü il təvəllüdlü İbadova Lyudmila Viktorovna xəsarət alıb. FHN əməkdaşları tərəfindən ərazidə müvafiq təhlükəsizlik tədbirləri görülüb. Hadisə ilə əlaqədar aidiyyəti qurumlar tərəfindən araşdırma aparılır.

Türkiyədə terror təşkilatının qış üçün yenidən qurulması ilə bağlı 12 vilayətdə silahlı qüvvələr “Kahramanlar-33” əməliyyatı həyata keçirilib. Sozcu.az xəbər verir ki, bu barədə Türkiyənin daxili işlər naziri Ali Yerlikaya danışıb. Məlumata görə, əməliyyatda 78 sığınacaq sahəsi məhv edilib.

ABŞ-ın Blok 70\72 F-16 dördüncü nəsil qırıcısı yeni radar sayəsində 5-ci nəsil qırıcının xüsusiyyətlərini əldə edib. Sozcu.az xəbər verir ki, bu barədə “Neşnl İnterest” nəşri məlumat yayıb. “Təkmilləşdirilmiş F-16 Blok 70 və Blok 72 eyni avadanlıq dəstini alıb və yalnız mühərrikdə fərqlənirlər. Birinci versiya “General Electric F110” enerji bloku, Blok 72 isə “Pratt & Vhitney F100” mühərrikləri ilə təchiz edilib. Blok 70\72 təyyarələri F-16-nın əvvəlki versiyalarından yüksək ayırdetmə qabiliyyətinə malik əsas displeyə malik modernləşdirilmiş kokpit, genişləndirilmiş silah dəsti və uyğun yanacaq çənlərinin olması ilə fərqlənir. Bundan əlavə, təyyarədə aktiv fazalı “AN/APG-83 Scalable Agile Beam Radar” antenası var”, - nəşr bildirib.

Ukrayna müharibənin 655-ci günü üçün Rusiya ordusunun itkiləri haqda məlumatı yeniləyib. Sozcu.az xəbər verir ki, bu barədə Ukrayna Baş Qərargahı məlumat yayıb. Məlumata əsasən, Rusiya indiyə qədər 338 820 hərbçi, 5 636 ədəd tank, 10 529 ədəd zirehli döyüş maşını, 8064 ədəd artilleriya sistemi, 919 ədəd RYAS (reaktiv yaylım atəş sistemi), 605 hava hücumundan müdafiə sistemi, 324 ədəd hərbi təyyarə, 324 ədəd helikopter, 10 623 ədəd avtomobil texnikası, 6136 ədəd PUA, 1 586 qanadlı raket, 22 gəmi/kater, 1 sualtı qayıq, 1 162 xüsusi avadanlıq itirib.