“Müəllimi qapazaltı etdiniz, arvadları evdən qaçan kişiləri el-oba arasında gülünc edib hörmətdən saldınız, qaynanalar ana kimi yox, dana kimi müamilə gördü, əl çaldınız. Bir sözlə, ayaqlar oldu baş, başlar oldu ayaq”. Sozcu.az xəbər verir ki, bunu sabiq deputat Gülər Əhmədova Bakıdakı 156 nömrəli tam orta məktəbin XI sinif şagirdlərinin IX sinifdən məzun olmuş qıza qarşı etiyi təhqiramiz hərəkətlərdən danışarkən bildirib. Məktəbli qızların aşağılayıcı videosuna sərt reaksiya verən Gülər Əhmədova fikirlərini belə davam etdirib: “Boşanmayan gəlin qalmadı, hamısına bir ödənməyən emosional ehtiyac tapıb, ərindən ayırdınız. İndi şok keçirirsiniz? Əhməd belə vurdu, qızlar başlarda yumurta sındırır.  Bəyənmədiniz? Bu, hələ jurnaldır. Kino qabaqdadır. Bir donor kişidən onlarla qadını "ana" edib, cəmiyyətə insest yaymağın bədəli olacaqdır.  Fahişələri təbliğ edən cəmiyyətin görəcəyi budur. Onun, bunun ərindən özünə "ər, ailə" düzəldib efirdən ailə, sevgi haqqında xalqa dərs keçən narkoman, pozğun, qadın və kişilərə fanatlıq edəndə belə olmalı idi. Üzrlü sayın, biz gedərik, siz gələcəkdə çox şey görəcəksiniz. Qocalar evlərinin, yetimxanaların, qadın narkotik reabilitasiya mərkəzlərinin sayını indidən çoxaldın. Bu gün 30-40 yaşlarında olan nəslə lazım olacaqdır”.

Sosial şəbəkədə Bakının Şüvəlan qəsəbəsində yerləşən 156 nömrəli məktəbin şagirdlərinin öz məktəb yoldaşını bullinqə məruz qoyduğunu nümayiş etdirən video yayılıb.  Məktəbin şagirdi olduğu bildirilən Rzaguliyeva Dilarə Rza qızı məktəb yoldaşına qarşı etdiyi qısnayıcı hərəkətlərini videoya çəkdirərək sosial şəbəkədə paylaşıb. Həmin videolardan görünür ki, D.Rzaquliyeva məktəb yoldaşının alnına ədəbsiz sözlər yazır, onun başında yumurta qırır və saçlarını qayçı ilə kəsir.  Sozcu.az xəbər verir ki, tanınmış fitness məşqçisi Kamil Zeynallı da məsələyə səssiz qalmayıb. Belə ki, sözügedən görüntülərdən bir hissəni sosial şəbəkə hesabında paylaşan idmançı əsəblərini cilovlaya bilməyib. O, araşdırmanın nəticəsini səbrsizliklə gözlədiyini qeyd edib:  “Araşdırmanın nəticəsi mənə çox maraqlıdır ki, bu tərbiyəsiz, əxlaqsız, səviyyəsiz, ailəsiz, valideyn tərbiyəsi görməmiş, eybəcər qızcığazların cəzası nə olacaq? Bu məsələnin sonu necə olacaq?” 

Sosial şəbəkələrdə Bakıdakı 156 nömrəli məktəbin XI sinif şagirdinin məktəbdən kənarda 2023-cü ildə IX sinifdən məzun olmuş qıza qarşı uyğunsuz və qeyri-etik davranışına dair yayılan görüntülər ciddi müzakirələrə səbəb olub.  Məktəbdən bildirilib ki, məktəb rəhbərliyi və psixoloq tərəfindən şagird və valideyni ilə söhbət aparılıb, müvafiq tədbirlər görülüb. Hazırda cəmiyyəti ən çox bu sual düşündürür:  IX sinifdən məzun olmuş qıza qarşı uyğunsuz və qeyri-etik hərəkət edən məktəbli qızları hansı cəza gözləyir?  Azərbaycan Vəkillər Kollegiyasının üzvü Əsabəli Mustafayev bu barədə "Yeni Sabah"a açıqlama verib:  “Təhqirə məruz qalan uşaq 18 yaşından aşağı olduğu üçün, onun valideynləri təhqirolunma barədə xüsusi ittiham qaydasında məhkəməyə müraciət etməlidir. Üstəlik, bu məsələdə hadisənin görüntüyə alınıb sosial şəbəkələrdə paylaşılması faktoru da var. Təhqirin kütləvi informasiya vasitələrində yayılması ilə bağlı əməl Cinayət Məcəlləsində nəzərdə tutulub. Espertiza nəticələri əsasında hadisənin həqiqətən təhqir olması təsdiq olunsa cinayət işi açılır. Belə olduqda insan ləyaqətini, şərəfini alçaltma ilə bağlı məhkəmə bu əməli törətmiş şəxsləri azadlıqdan hətta məhrum da edə bilər. Əgər təhqirə məruz qalmış şəxs 18 yaşından yuxarıdırsa özü birbaşa məhkəməyə müraciət edə bilər”.  Sonda hüquqşünas bildirib ki, Azərbaycan Respublikası Cinayət Məcəlləsinin 148-ci maddəsinə görə, təhqir, yəni kütləvi çıxışlarda, kütləvi nümayiş etdirilən əsərdə, kütləvi informasiya vasitəsində və ya kütləvi nümayiş etdirildiyi halda internet informasiya ehtiyatında şəxsiyyətin şərəf və ləyaqətini nalayiq formada qəsdən alçaltma - 1000 manatdan 1500 manatadək miqdarda cərimə və ya 240 saatdan 480 saatadək müddətə ictimai işlər və ya 1 ilədək müddətə islah işləri və ya 6 ayadək müddətə azadlıqdan məhrum etmə ilə cəzalandırılır.  Cinayət Məcəlləsinin 148.1-ci maddəsinə görə, internet informasiya ehtiyatında saxta istifadəçi adlar, profil və ya hesablardan istifadə edərək kütləvi nümayiş etdirməklə böhtan atma və ya təhqir etmə - 1000 manatdan 2000 manatadək miqdarda cərimə və ya 360 saatdan 480 saatadək müddətə ictimai işlər və ya 2 ilədək müddətə islah işləri və ya 1 ilədək müddətə azadlıqdan məhrum etmə ilə cəzalandırılır.

Bakıda hansısa ərazi plana düşən zamanı sakinlər və söküntünü həyata keçirən şirkətlər arasında müəyyən anlaşılmazlıqlar meydana çıxır. Adətən evlərin ölçülərinin təyin olunması və təyin olunan ölçünün qiymətləndirilməsi zamanı vətəndaşlar nəticədən narazı qalır. Məsələn, sökülən obyektin yaşayış və qeyri-yaşayış sahəsi olmasından asılı olaraq, qiymətləndirmənin düzgün aparılması ilə bağlı mübahisələr yaranır.  Mövzu ilə bağlı Yenisabah.az-a danışan əmlak məsələləri üzrə ekspert Elnur Fərzəliyev söküntülərin 2 formada aparıldığını qeyd edib:  “Hazırda söküntülər 2 formada aparılır. Birincisi, özəl şirkətlər tərəfindən köhnə evlər sökülüb yerində yeni binalar tikilir. Adətən, belə olduqda söküntünü həyata keçirən şirkət vətəndaşa yeni binadan mənzil verir. Bu qanunun tələbidir. Vətəndaş mənzil təklifi ilə razılaşmayanda bazar dəyərinə uyğun pul verilir. Digər söküntü işləri isə dövlət tərəfindən aparılır. Qanunda da qeyd olunduğu kimi, hər hansısa bir ərazi dövlət ehtiyacı üçün tələb olunursa, həmin ərazinin ölçüləri götürülür və bazar dəyərindən 20 faiz artıq kompensasiya verilir. Əgər verilən məbləğ və ölçülərlə bağlı vətəndaşın hansısa narazılığı varsa, hansısa memarlıq şirkətinə müraciət edərək bu məsələni məhkəmədə mübahisələndirə bilər”.  Ekspert qeyri-yaşayış obyektlərinin daha yüksək dəyərdə hesablanmalı olduğunu vurğulayıb:  “Əslində, plana düşən zaman obyektin qiyməti mənzildən daha yüksək dəyərdə hesablanır. Əgər bir ərazinin sənədi qeyri-yaşayış təyinatlıdırsa, təbii ki, mənzildən daha bahadır və əraziyə görə dəyişir. Məsələn, ev söküntüsü zamanı yeni tikilən binadan vətəndaşa 1 mənzil təklif edilirsə, qeyri-yaşayış obyekti söküləndə 2 hətta 3 mənzil də təklif oluna bilir. Digər tərəfdən, yeni tikilən binadan sənə məxsus olan qeyri-yaşayış təyinatlı obyektini yenidən tələb etmək də mümkündür. Əgər bu dövlət əhəmiyyətli söküntüdürsə bu zaman qiyməti dövlət özü təyin edir. Yenə də vətəndaşa verilən məbləğ onu qane etmirsə, qiymətləndirmə şirkətlərinə müraciət edib, nəticə əsasında məhkəmədən real bazar dəyərini tələb edə bilər”. 

“Son günlər orta məktəbdə, kollec və universitetlərdə şagird və tələbələrdən sağlamlıq haqqında arayışın tələb olunması ilə bağlı müraciətlər daxil olur. Hətta sağlamlıq haqqında arayışı təqdim etməyən şagirdlərin buraxılış imtahana buraxılmayacağı deyilir”. Sozcu.az xəbər verir ki, bu barədə təhsil eksperti Kamran Əsədov öz feysbulunda pylaşımında qeyd edib. “Bu istək və tələbin heç bir hüquqi əsası yoxdur. Qüvvədə olan qanunvericilik aktlarına görə şagird ancaq 1-ci sinifə gedəndə, tələbə 1-ci kursa daxil olanda, işçi ilk dəfə işə qəbul olunanda o sağlamlıq haqqında arayışı təqdim etməlidir. Yəni bu o deməkdir ki, həmən şəxs sağlamdır. Daha şagirddən, tələbədən ildə bir dəfə sağlamlıq haqqında arayışı tələb etmək olmaz. Çünki heç bir normativ hüquqi aktlarda belə bir hal nəzərdə tutulmur. Buraxılış imtahanında isə, Dövlət İmtahan Mərkəzi pandemiya dövründə yoluxma ilə bağlı bəyənnamə təqdim edirdi, onu da imtahan iştirakçısı imzalayırdı ki, bütün məsuliyyəti özüm daşıyıram. Sadəcə olaraq, təhsil müəssisələri şagird, tələbə dərsə iştirak etməyəndə ondan mövcud vəziyyəti təsdiq edən xəstəlik haqqında arayış tələb edə bilər. Yəni həqiqətən də sən xəstə idin. Amma universitet və kolleclər o xəstəlik haqqında arayışı üzürlü hal hesab edib sizin qayıblarınızı ləğv etmir. Yəni siz xəstəlik haqqında arayış təqdim edib qayıbdan azad olmursunuz. Təhsil müəssisələrinin mütəmadi olaraq təhsil alanlardan sağlamlıq haqqında arayışı tələb etmək hüququ yoxdur və bu mövcud qanunvericikdə nəzərdə tutulmur”,- deyə ekspert əlavə edib.Redaktor.az

Fevralın 16-da həbsxanada öldüyü açıqlanan rusiyalı müxalifətçi Aleksey Navalnının qəfil ölümünün üzərindəki sirr pərdəsi hələ də qalxmayıb. Kremlin məsələ ilə bağlı susqunluğu, Navalnının meyitinin harada olması ilə bağlı hələ də qeyri-müəyyənlik var. Sozcu.az xəbər verir ki, Navalnının həyat yoldaşı Yuliya Navalnaya müxalifətçinin ölümündə növbəti dəfə Vladimir Putini günahlandırıb və rus xalqını mübarizədə ona dəstək olmağa çağırıb. Navalyana ərini Putinin öldürdüyünü iddia edərək, bununla onu həyat yoldaşından, iki uşağını isə atasından ayırdığını bildirib. “Putin Alekseyi öldürməklə mənim yarımı, ürəyimi və ruhumu öldürdü. Amma məndə hələ də digər yarısı var və bu mənə deyir ki, mənim təslim olmağa haqqım yoxdur... Navalnının işini davam etdirəcəyəm və ölkəmiz üçün mübarizə aparacağam” - o deyib.

Azərbaycanda toyuq ətində bahalaşma nəzərə çarpır. Gündəlik tələbat məhsulları sırasına daxil olan bu məhsulun qiymətində 1-2 manat arasında dəyişiklik müşahidə edilir. Bəs bu artım əhalinin məhsula olan tələbatı, yoxsa istehsalın azalması ilə bağlıdır?  Məsələ ilə bağlı Azad İstehlakçılar Birliyinin sədri Eyyub Hüseynov “Yeni Sabah”a açıqlama verib. O bildirib ki, bahalaşmanın əsas səbəbi əhali arasında toyuq məhsullarına olan təlabatın artmasıdır:  “Toyuq məhsullarının qiymətində müəyyən qədər artım müşahidə edilir. Bunun da əsas səbəbi insanların toyuq ətinə olan təlabatının artmasıdır. Tələbatın artmasına isə mal və qoyun ətindəki bahalaşma səbəb olub. Bu səbəbə görə əhali toyuq məhsullarına üz tutub. Bu da öz növbəsində toyuq əti və bu növdən olan məhsulların qiymətində müəyyən bahalaşmaya gətirib çıxarıb. Çünki təlabat artırsa, qiymət artımı da qaçılmazdır”.  Eyyub Hüseynov qeyd edib ki, bir qrup şəxs toyuq məhsullarındakı qiymət artımına müəyyən dərəcədə təsir edə bilər:  “Azərbaycan özünü quş məhsulları ilə tam təmin edə bilər. Bu barədə müəyyən addımlar atılmalıdır. Onlardan biri də xaricdən gələn bu mallara verilən üstünlüyün aradan qaldırılmasıdır. Quşçuluq məhsullarının istehsalı ilə məşğul olan insanlar bir qrupdur. Bu şəxslər həmin məhsulların bahalaşması üçün qiymət sövdələşməsinə də təsir edə bilər”.  Azad İstehlakçılar Birliyinin sədri onu da vurğulayıb ki, bu məhsulların qiymətində ucuzlaşma müşahidə edilməsi gözlənilən deyil. 

Evtanaziya xəstənin həyatına öz arzusu ilə son qoymaqdır. Xarici ölkələrdə bu üsul geniş yayılıb. Lakin Azərbaycanda hələ bunu reallaşdıran qanun layihəsi qəbul olunmayıb. Maraqlıdır, ölkəmizdə bu üsula ehtiyac var?  Məsələyə münasibət bildirən həkim, professor Adil Qeybulla “Yeni Sabah”a deyib ki, insanın öz arzusu belə olsa, onun həyatına son qoymaq düzgün deyil:  “Lakin bu normal psixi duruma olan şəxsə tətbiq edilir. Əqli çatışmazlıqları olan adamlar bu üsulu seçə bilməz. Bir çox ölkələrdə müxtəlif xəstəliklər ucbatından dözülməz ağrılara və diskomfort durumlara tab gətirməkdə çətinlik çəkən, yaşam perspektivi çox az olan şəxslər evtanaziya ilə həyatlarına son qoyur. Bu proses müəyyən bir qanun layihəsi əsasında həyata keçirilməlidir. Sözügedən məsələdə komissiya və şahidlik mütləqdir. Çünki insanın dünyasını dəyişmə faktı araşdırılır ki, bu hadisədə qəsd var, ya yox. Sadalananlar evtanaziya haqqında qanun qəbul edən ölkələrə aiddir. Azərbaycanda belə bir qanun yoxdur. Özü arzulasa belə biz heç bir xəstənin həyatına son qoya bilmərik. İnsanın həyatını xilas etmək üçün sona qədər çalışıb-çarpışmaq lazımdır”.  Hüquqşünas Əkrəm Həsənov isə bu qanunun Azərbaycanda qəbul olunmasından sonra mənfi nəticələrlə qarşılaşmağın qaçılmaz olduğunu vurğulayıb:  “Mən bu qanun layihəsinin qəbul olunmasının tamamilə əleyhinəyəm və bu fikirdə olmağımın iki səbəbi var. İlk növbədə həmin üsul bizim milli mentalitetimizə və dinimizə ziddir. İnsanın özünə qəsd etməsi bizdə birmənalı qarşılanmır. İkinci səbəb isə odur ki, bizdə qanunlara əməl etmək çox aşağı səviyyədədir. Düşünürəm ki, həmin qanun qəbul edilərsə, bundan sui-istifadə halları olacaq. Bəlkə də kimsə öz həyatına son qoymaq istəmir, ancaq qohum-əqraba mülk, miras üstündə bu yola əl ata bilər. Bizdə qanunlar normal işləmir. Ona görə də, evtanaziyanın Azərbaycanda tətbiq edilməsinin tərəfdarı deyiləm”. 

Azərbaycan və Türkiyə prezidentləri mətbuata bəyanatlarla çıxış edirlər. Sozcu.az xəbər verir ki, fevralın 19-da Prezident İlham Əliyev və Türkiyə Respublikasının Prezidenti Rəcəb Tayyib Ərdoğan mətbuata bəyanatlarla çıxış edirlər.

Mərhum rusiyalı siyasətçi Aleksey Navalnının xanımı Yuliya Navalnaya Avropa İttifaqı ölkələrinin nazirləri qarşısında çıxış edəcək. Sozcu.az BBC-yə istinadən xəbər verir ki, xanım Navalnaya bu gün Aİ Xarici Əlaqələr Şurasının iclasında çıxış edəcək. Aİ-nin ali nümayəndəsi Jozep Borelin sözlərinə görə, Aİ nazirləri bununla da “Rusiyadakı azadlıq döyüşçülərinə güclü dəstək siqnalı göndərəcək və Aleksey Navalnının xatirəsini ehtiramla anacaqlar”. BBC-yə verdiyi şərhdə Borel bildirib ki, Navalnının ölümünə görə Rusiya prezidenti Vladimir Putin şəxsən məsuliyyət daşıyır. Eyni zamanda o, Qərbin Rusiya liderini məsuliyyətə cəlb etmək üçün yeni yollar tapmasının çətin olacağını etiraf edib və Rusiyada müxalifətə dəstək verməyə çağırıb.

Siyasi məhbus Aleksey Navalnının saxlandığı İK-3 “Qütb canavarı” cəzaçəkmə müəssisəsində gərgin hadisələr fevralın 15-də axşam saatlarında başlayıb, bu isə o deməkdir ki, müxalifətçi Rusiyanın bildirdiyindən xeyli tez ölmüş ola bilər. Sozcu.az xəbər verir ki, bu barədə “Novaya qazeta” (Europe) nəşri həmin cəzaçəkmə müəssisəsindəki məhbusa istinadən yayıb. “Navalnının ölüm şəhadətnaməsində müxalifətçinin fevralın 16-da cümə günü saat 14:17-də öldüyü bildirilir. Federal Penitensiar Xidmət bu barədə inanılmaz sürətlə, elə həmin gün saat 14:19-da rəsmi açıqlama yayıb. Çox güman ki, siyasi məhbus bir gün əvvəl dünyasını dəyişib. İK-3-də cəza çəkən məhbus iddia edir ki, fevralın 15-nə keçən gecə cəzaçəkmə müəssisəsində “anlaşılmaz ajiotaj” başlayıb. Onun sözlərinə görə, məcburi axşam yoxlaması “çox sürətləndirilib” və bundan sonra məhbuslar ağır mühafizə altında kazarmalara yollanıblar. Həmin gecə zonaya çoxlu avtomobilin daxil olduğu da eşidilib. Məhkumun dediyinə görə, fevralın 16-da səhər, yoxlamanın gözlənilmədən gəlməsi ilə əlaqədar olaraq, cəzaçəkmə müəssisəsinin işçiləri “ümumi axtarış” aparıblar. Koloniya üçün nəzarət tədbirləri adi haldır, lakin əvvəllər onlara ən azı bir ay əvvəldən məlumat verilirdi. Mənbə iddia edir ki, onlar Navalnının ölümü barədə danışmağa fevralın 16-da səhər saat 10-da başlayıblar. Hakimiyyət müxalifətçinin öldüyünü rəsmən elan etdikdən sonra “Qütb canavarı”nda təcili yardım maşını peyda olub. Federal Penitensiar Xidmətin məlumatına görə, guya Navalnı fevralın 16-da gəzinti zamanı özündən gedib və həkimlər onu xilas edə bilməyiblər. Rəsmi versiyaya görə, həkimlər zəngdən 7 dəqiqə sonra qonşu şəhərdən cəzaçəkmə müəssisəsinə gəliblər. Bu mümkün deyil. Belə məsafəni 7 dəqiqəyə qət etmək üçün təcili yardım maşını 300 km/saat sürətlə getməlidir. Rəsmi versiyadakı bu cür məqsədyönlü uyğunsuzluqlar göstərir ki, Moskva onların sözlərinə etimad göstərməkdən çəkinməyib. Navalnının ölümünün bütün dünya elitasını bir araya gətirən Münhen Təhlükəsizlik Konfransının başlanğıcında açıq şəkildə elan edilməsi də vacibdir...” - məlumatda deyilir.

Goranboy Rayon Mərkəzi Xəstəxanasının baş direktoru Rauf Yəhyayev bir neçə şəxs tərəfindən döyülüb. Sozcu.az Oxu.az-a istinadən xəbər verir ki, həmin şəxslər baş direktordan ağır ağrıkəsici dərman istəyiblər. O da “yox” cavabı verdiyi üçün döyülüb. Rauf Yəhyayev açıqlamasında bildirib ki, bir neçə şəxs xəstəxanaya gəlib, ağır ağrıkəsici dərman tələb ediblər: “Mənə əllərindəki ağrıkəsicini göstərib, daha artıq dozada olanını tələb etdilər. Bildirdim ki, onsuz da o dərmanlar ağrıkəsicidir. Onlar dedilər ki, o dərmanlar kömək etmir. Ondan ağırı narkotikdir, mən onlara narkotik verəcəkdim? Dedim ki, təcili yardım şöbəsinə getsinlər. Münaqişə başladı və bıçaqla hücum etdilər”. Qeyd edək ki, məsələ barədə Goranboy Rayon Prokurorluğunda araşdırma aparılır.

Ermənistanda yaxın dövrdə yeni müharibə hazırlığına dair informasiyalar peyda olub. “Oragir.news” saytının erməni ordusunun komandir heyətinə müharibəyə hazırlaşmaqla bağlı göstəriş verildiyinə dair məlumatı Ermənistan Müdafiə Nazirliyi tərəfindən təkzib olunub. Təbii ki, müharibəyə hazırlıqla bağlı informasiyalar rəsmi şəkildə təsdiq olunmayacaq. Burada əsas məqam Ermənistanın hərbi rəhbərliyinin praktiki müstəvidə hansı addımlar atmasıdır. Ermənistan MN məlumatları təkzib etsə də, erməni generalların Azərbaycan sərhədinə səfəri xüsusilə diqqət çəkir. Rəsmi məlumata görə, Ermənistan ordusunun Baş qərargah rəisi, müdafiə nazirinin birinci müavini general-leytenant Edvard Arsyan ötən həftənin sonu “sərhədin cənub-şərq və cənub-qərb hissələrinə baş çəkib”. Bir neçə hərbi hissədə olan Arsyan sərhəddəki postlara çıxıb, hərbçilərlə müzakirələr aparıb, mühəndislik işləri ilə tanış olub, daha sonra bölmə komandirlərinin iştirakı ilə iclas keçirib. Arsyanın səfər etdiyi “sərhədin cənub-şərq və cənub-qərb hissəsi” Azərbaycanla sərhədin hər iki istiqamətidir: cənub-şərq Zəngilan-Qubadlı, cənub-qərb isə Naxçıvanla sərhəd ərazisinə düşür; Arsyanın məhz indi bu istiqamətə səfər etməsinin bir neçə mümkün səbəbi ola bilər. Birincisi, Ermənistan son təxribatını sərhədin cənub-şərq hissəsində - Zəngilan istiqamətində etmişdi və Azərbaycan ordusunun adekvat cavabı nəticəsində ağır itkilər verdilər: görünür, Arsyan vəziyyəti birbaşa yerində yoxlamaq qərarına gəlib; İkincisi, sərhəddə təxribatların davam edəcəyi gözləntisi var, xüsusilə Zəngəzur dəhlizi layihəsinin olduğu Zəngilan istiqaməti mümkün toqquşma zonalarından biridir: Arsyanın növbəti təxribat planı ilə bağlı erməni hərbçiləri yerində təlimatlandırmaq üçün sərhədə gəldiyi istisna edilməməlidir;//Publika.az

Fevralın 20-də havanın əsasən yağmursuz keçəcəyi gözlənilir.  Bu barədə Sozcu.az-a Milli Hidrometerologiya Xidmətindən məlumat verilib.  Bildirilib ki, sabah Bakıda və Abşeron yarımadasında hava şəraitinin dəyişkən buludlu olacağı, arabir tutulacağı, əsasən yağmursuz keçəcəyi gözlənilir. Lakin axşam bəzi yerlərdə yağıntılı olacağı ehtimalı var. Cənub-şərq küləyi axşam mülayim şimal-qərb küləyi ilə əvəz olunacaq.  Havanın temperaturu gecə 1-3° isti, gündüz 4-7° isti olacaq. Atmosfer təzyiqi 766 mm civə sütunundan 770 mm civə sütununa yüksələcək. Nisbi rütubət 65-75 % olacaq.  Azərbaycanın rayonlarında da əksər rayonlarda havanın əsasən yağmursuz keçəcəyi gözlənilir. Lakin bəzi dağlıq və dağətəyi rayonlarda arabir yağıntılı olacağı, qar yağacağı ehtimalı var. Arabir duman olacaq. Şərq küləyi əsəcək.  Havanın temperaturu gecə 0-5° isti, gündüz 6-11° isti, dağlarda gecə 5-10° şaxta, gündüz 0-5° şaxta olacaq.

2024-cü il fevralın 21-dən martın 3-dək Rusiyada baş tutacaq tədbiri ekspertlər belə qiymətləndirirlər. Dünya idmanı tarixində ilk dəfə olaraq, Kazan şəhərində “Gələcəyin Oyunları” Beynəlxalq Multiidman Turniri keçiriləcək. Yeni formatlı oyunlar planetin ən güclü idmançılarını, o cümlədən İran, Türkiyə, Azərbaycan və İslam dünyasının digər ölkələrini bir araya gətirəcək. Ümumilikdə turnirdə 107 ölkəni təmsil edən 277 komandadan 2000-dən çox iştirakçı iştirak edəcək. Dünyanın hər yerindən ən yaxşı idmançılar və e-idmançılar figital konsepsiyasını dəstəkləyən, yəni klassik idman növlərini, e-idman və texnologiyanı birləşdirən 21 innovativ fənn üzrə yarışacaqlar.  Figital-da qalib gəlmək üçün idmançının yalnız futbol meydançasında, yarış meydançasında, rinqdə və ya sevimli video oyununda ən yaxşı olması kifayət deyil. Figital və rəqəmsal mərhələlərdə toplanan xallar toplanılır, iştirakçılardan isə xüsusi hazırlıq və bir yarışdan digərinə sürətli şəkildə keçmək bacarığı tələb olunur. «Gələcəyin Oyunları» müsabiqəsi beş "çağırışa" bölünür: "İdman" çağırışı klassik idman növlərini rəqəmsal həmkarları ilə birləşdirir: figital-futbol, figital-basketbol, figital-xokkey, figital-döyüş sənəti, figital-avtomobil yarışı, figital-skeytbord, figital-BMX və virtual velosiped yarışı. Oyunların iştirakçıları 2023-cü ilin noyabr-dekabr aylarında Moskvadan Baykonura yola düşən, sonra isə Beynəlxalq Kosmik Stansiyaya gedən “Gələcəyin Oyunları” kuboku uğrunda mübarizə aparacaqlar. O, 2024-cü ildə kosmosdan qayıdacaq və “Gələcəyin Oyunları”-nda təqdim olunacaq. Müsabiqənin ümumi mükafat fondu 10 milyon dollardır.  Oyunlar zamanı Rusiya, Çin, BƏƏ, Vyetnam, Kuba, İtaliya, Suriya, Fransa, Cənubi Afrika, Latın Amerikası və digər ölkələrdən xarici nümayəndə heyətləri və 600-dən çox KİV nümayəndəsi Kazana səfər etməyi planlaşdırır. Müsabiqə bütün qitələrdə, o cümlədən Braziliya və Çili, Çin və Hindistan kimi ölkələr, eləcə də MDB ölkələri üzrə 200 saytda yayımlanacaq.  Açılış və bağlanış mərasimləri müvafiq olaraq fevralın 21-də və martın 3-də Rusiyanın Kazan şəhərində baş tutacaq. Turnirdə 20 ölkədən 7000 ərizəçi arasından seçilən 2000 könüllü iştirak edəcək.

“Təəssüf ki, Qərb bunların qarşısında aciz qalıb. Niyə acizdir? Ona görə ki, Qərbdə belə siyasi sifarişli qətllər törətmək mexanizmi olduqca mürəkkəbdir...” “Putin Navalnını öldürməklə hər tərəfə: həm ölkə daxilindəki, həm xaricdəki opponentlərinə ciddi mesajlar verdi...” “Təbii ki, Aleksey Navalnının ölümü qətldir. Bu, birmənalı şəkildə belədir. Və mən bu barədə öz ehtimallarımı bölüşmək istərdim. İndi bu olay ətrafında müxtəlif versiyalar səsləndirilir. Və maraqlıdır ki, yalnız Rusiya daxilində deyil, ölkədən kənarda olan müxalifət nümayəndələri belə, hansısa fikir söyləməkdən çəkinirlər. Bu da onu göstərir ki, cinayətkar Putin rejimi elə bir mühit yaradıb ki, onun opponentləri hətta xaricdə ola-ola bu rejimin cinayət törətməsi haqda fikir söyləməkdən ehtiyat edirlər”.  Bu fikirləri Moderator.az-a açıqlamasında Rusiya müxalifətçisi A.Navalnının həbsxanada həlak olmasına münasibət bildirərkən siyasi təhlükəsizlik məsələləri üzrə ekspert Ərəstun Oruclu söyləyib. “Hesab edirəm ki, Navalnının öldürülməsi ilk növbədə Rusiyanın siyasi elitasının daxilində gedən proseslərin nəticəsidir. Məsələ burasındadır ki, Rusiyada real müxalifət yoxdur. Hətta Navalnının özü də Rusiya daxilində yetərincə gücə, nüfuza malik lider deyildi. Faktiki olaraq onun siyasi təşkilatı, partiyası yox idi. Yalnız korrupsiyaya qarşı mübarizə fondu vardı. Özü siyasətçi kimi cəsarətli və qətiyyətli idi. Eyni zamanda Rusiya əhalisinin müəyyən kəsimi arasında populyar idi. Söhbət ondan gedir ki, Rusiya hakimiyyətinin daxilindəki hansısa qruplar Navalnıdan lider kimi istifadə edərək Putinə qarşı təhlükə törədə bilərdi. Bu halda Putin seçki ərəfəsində və ya seçkidən sonra Putini sıradan çıxara bilərdilər”, - deyə analitik davamında bildirib. Həmsöhbətimiz Navalnının ölümündə Putinin birbaşa əli olmasına əminliyini ifadə edərək həmin qətllə Rusiya liderinin öz opponentlərinə vermək istədiyi mesajlardan da bəhs edib. “Eyni zamanda düşünürəm ki, Putin Navalnını öldürməklə hər tərəfə: həm ölkə daxilindəki, həm xaricdəki opponentlərinə ciddi mesajlar verdi. Birincisi, bununla nümayiş etdirdi ki, “Mən qətiyyətliyəm və yolumda maneə olanları öldürməkdə davam edəcəm. Mən hakimiyyəti heç kəsə verməyəcəm və kim hakimiyyətimə qarşı çıxacaqsa, onu öldürtdürəcəm”... Və bu saat Putin rejimi tərəfindən Navalnının ölümü barədə bir çox yanlış versiyalar səsləndirilir. Guya seçki ərəfəsində Navalnının ölümü ən çox Putinə lazım deyildi. Bax, bu Rusiyada belə situasiyalarda daim ortaya atılan yalançı bir versiyadır. Boris Nemtsov öldürüləndə də belə bir versiyaya atıldı ortalığa; dedilər ki, guya bu, Putinə sərf etmir, düz onun pəncərəsinin altında qətlə yetirilib. Lakin sonradan məlum oldu ki, onu məhz Putin öldürtdürüb. Jurnalist Anna Politkovskaya qətlə yetiriləndə də eyni versiya səsləndi... Və s. İndi də dediyim kimi, eyni üsula əl atırlar. Amma mən əminliklə deyirəm ki, Navalnını Putin öldürtdürüb... Və bu, bütün kriminal rejimlərin dəst-xəttidir... Navalnının qətli ilə verilən ikinci mesaj ondan ibarətdir ki, Putin artıq bütün demokratik dünyanı təhdiq edir: sabah o başqa ölkələrin də liderlərini, siyasətçilərini qətlə yetirdə bilər. Və hazırda belə şeylərin də olması mümkündür. Stalin dövründə də bu cür olaylar olub. Və yaxud SSRİ-nin Çexoslavakiyaya, Polşaya, Macarıstana, Əfqanıstana hücumunu da misal çəkə bilərik. Bu dövr mahiyyətcə o dövrdən heç nə ilə fərqlənmir. Putin rejimi və onun satelliti, müttəfiqi olan bütün rejimlərin hamısı cinayətkar, qatil rejimlərdir. Təəssüf ki, Qərb bunların qarşısında aciz qalıb. Niyə acizdir? Ona görə ki, Qərbdə belə siyasi sifarişli qətllər törətmək mexanizmi olduqca mürəkkəbdir. Yəni söhbət, məsələn, Rusiyanın hakimi siyasətçilərinə qarşı cavab tədbirləri görmək. Bu isə onunla bağlıdır ki, ABŞ-da, Avropada hüquqi və siyasi mexanizmlər bu cür əməllərə yol vermir. Fərdi məsuliyyət, hakimiyyət məsuliyyəti məsələsi var. Amma hər bir halda artıq Putin rejiminə, onun müttəfiqlərinə qarşı adekvat addımlar atılmayıınca bu qətllər doğrudan da Rusiya hüdudlarından kənara çıxacaqdır”,-deyə ekspert vurğulayıb.

Böyük Britaniyanın enerji təhlükəsizliyi və emissiyaların sıfır səviyyəsinə nail olunması strategiyası məsələləri üzrə naziri Qrem Stüart gələn həftə Azərbaycana səfər edəcək. Sozcu.az xəbər verir ki, nazir səfər çərçivəsində Bakıda bir sıra ikitərəfli görüşlər keçirəcək. Q.Stüart fevralın 22-də ADA Universitetində mühazirə deyəcək, bu ilin noyabrında Azərbaycanda keçiriləcək BMT-nin İqlim Dəyişikliyi üzrə Çərçivə Konvensiyasının Tərəflər Konfransının 29-cu sessiyası (COP29) ilə əlaqədar Böyük Britaniyanın COP26-ya dair təcrübəsindən danışacaq. Xatırladaq ki, COP26 2021-ci ildə Şotlandiyanın Qlazqo şəhərində keçirilib. Azərbaycanda COP-29-un keçirilməsi ilə bağlı qərar ötən il dekabrın 11-də BƏƏ-nin Dubay şəhərində keçirilmiş COP28-in plenar iclasında qəbul edilib. İki həftə ərzində paytaxt Bakı 70-80 minə yaxın xarici qonaq qəbul edəcək.

Göyçay rayonunda toya gələn qonaqlardan ikisi ölüb. Sozcu.az Report-a istinadən xəbər verir ki, hadisə axşam saatlarında rayon ərazisində qeydə alınıb. İlkin məlumata görə, rayonun Şahsoltanlı kənd sakini şənliyin keçirildiyi mərasim zalına çatan zaman özünü pis hiss edib. Yaxınları tərəfindən xəstəxanaya çatdırılan Tünzalə Məhiyevanın həyatını xilas etmək mümkün olmayıb. Ailə üzvlərinin sözlərinə görə, yaşlı qadın bir neçə ildir ürək xəstəliyindən müalicə alırmış. Hadisədən bir neçə saat sonra eyni toya dəvət alan 37 yaşlı Vilayət Məmmədov mərasimdən çıxaraq evinə gedib, özünü pis hiss etdiyi üçün xəstəxanaya çatdırılıb. Həkimlərin tibbi müdaxiləsinə baxmayaraq o xəstəxanada vəfat edib. İlkin ehtimala görə şəxs ürəktutmasından dünyasını dəyişib.

Fevralın 17-si saat 10:00-a olan məlumata əsasən ölkə ərazisində yağıntılı hava şəraiti müşahidə olunub. Bəzi yerlərdə yağış, dağlıq ərazilərdə qar yağıb. Bu barədə Sozcu.az-a Milli Hidrometeorologiya Xidmətindən məlumat verilib. Bildirilib ki, qar örtüyünün hündürlüyü Qrızda 10 sm, Qusarda 2 sm, Qubada 1 sm olub. Düşən yağıntının miqdarı Oğuzda 13 mm, Göygöldə 10 mm, Şəkidə 8 mm, Göyçay, Şabran, Şahdağ, Qəbələ, Mingəçevir, Xaltan, İsmayıllı, Lənkəran, Daşkəsən, Şamaxı, Astara, Yardımlı, Altıağac, Gədəbəy, Şahbuz, Naftalan, Gəncə, Şəmkir, Ağdam, Balakən, Zaqatala, Qax, Qobustan, Tərtər, Bərdə, Yevlax, Zərdab, İmişli, Sabirabad, Cəfərxan, Neftçala, Biləsuvar, Göytəpədə 7 mm-dək, Bakıda və Abşeron yarımadasında isə 11 mm-dək olub. Daşkəsən, Gədəbəy, Göygöl, Naftalan, Şəkmir, Tovuz, Oğuz, Qəbələ, Zaqatala, Şəki, Qax, Şamaxı, Quba, Qrız, Şahdağ, Yevlax, Göyçay, Lerik, Bakıda və Abşeron yarımadasında duman müşahidə olunub. Dumanda görünüş 500-1000 metrədək məhdudlaşıb. Havanın minimal temperaturu Bakıda və Abşeron yarımadasında 2, Naxçıvan MR-da 5, Aran rayonlarında 4, dağlıq rayonlarda 1 dərəcəyədək isti, yüksək dağlıq ərazilərdə 11 dərəcəyədək şaxta olub.

Son vaxtlar sosial şəbəkələrdə və kütləvi informasiya vasitələrinin bir çoxunda ictimai nəqliyyat vasitələrində gediş haqqı məbləğlərinin artacağı ilə bağlı müzakirələr və xəbərlər dolaşır. Bir çoxları bunu aidiyyəti dövlət qurumlarının mütəmadi olaraq nəqliyyat xərclərinin baha olması və qiymət tarifinin olduqca aşağı olduğunu bildirməsi ilə əlaqələndirir.  Xüsusilə metro qiymətlərində 40-50 faizə qədər bahalaşmanın olması ilə bağlı müxtəlif proqnozlar var. Bəs görəsən yaxın gələcəkdə ictimai nəqliyyat vasitələrində, o cümlədən metro və marşurtlarda qiymət artımı gözləniləndirmi?  Mövzu ilə bağlı Yenisabah.az-a danışan iqtisadçı-ekspert Natiq Cəfərli bildirib ki, bu proqnozun reallaşması ehtimalı yüksəkdir. “Düşünürəm ki, nəqliyyat sahəsində bir müddət sonra qiymətlərdə yeni dəyişikliklər gözlənilə bilər. Bu həm metro, həm də yerüstü nəqliyyatda gözlənilir. Çünki nəqliyyat sahəsində hələ də, rəsmilərin dediyi məlumata görə, böyük həcmdə dotasiyalar alınır. Bu daim vurğulanırsa, deməli bununla bağlı hansısa başqa qərarların ehtimalı da artır”.  Ekspert bildirib ki, il ərzində baş tutması gözlənilən seçkilərdən dərhal sonra nəqliyyat qiymətlərinin bahalaşması gözlənilir. Ola bilsin ki, bu artım yaxın vaxtlarda olmasın. Çünki qarşıda bizi parlament və bələdiyyə seçkiləri gözləyir. Yeni hökumət belə bir qərarın əhali arasında etiraz doğuracağını bildiyi üçün yaxın vaxtlarda bu addımı atmayacaq. Ancaq seçki dönəmindən sonra qiymət artımının mümkün olduğu ilk sahələrdən biri nəqliyyat sahəsi olacaq. Bu baxımdan ictimai nəqliyyat vasitələrinin qiymətləri ilə bağlı proqnoz nikbin deyil”.

Dövlət İmtahan Mərkəzi (DİM) bu il kolleclərə keçiriləcək qəbul imtahanlarının vaxtını açıqlayıb. DİM-dən verilən məlumata görə, tam (11 illik) orta təhsil bazasında orta ixtisas təhsili müəssisələrinə (kolleclərə) qəbul olmaq istəyənlərin qeydiyyatı 1 – 15 mart aralığında aparılacaq. Ümumi (9 illik) orta təhsil bazasında orta ixtisas təhsili müəssisələrinə qəbul olmaq istəyənlərin qeydiyyatı isə 27 mart – 15 apreldə həyata keçiriləcək. 11 illik bazadan kolleclərə imtahanlar 14 apreldə, 9 illik bazadan isə 5 mayda keçiriləcək. Təhsil eksperti Məzahir Məmmədli Modern.az-a kolleclərlər bağlı problemlərdən danışıb. “Bildiyimiz kimi, artıq 100 illik fəaliyyətini qeyd etdiyimiz kolleclər var. Məsələn, Azərbaycan Dövlət Pedaqoji Universitetinin nəzdindəki 1919-cu ildən fəaliyyət göstərən Azərbaycan Dövlət Pedaqoji Kolleci kimi. Ümumilikdə ölkədə 70-dən çox kolleç fəaliyyət göstərib. Bu kolleclərin əksəriyyəti rayonlarda pedaqoji və kənd təsərrüfatı yönümlü kadrlar hazırlayırdılar. 2000-ci ildə aparılan islahatlarla kolleclərin sayı 60 qədər azaldıldı. Sonra onların adlarının dəyişdirilməsi prosesinə başlanıldı. Bəziləri birləşdirildi, bir çoxunda ixtisas dəyişiklikləri baş verdi. Lakin bu islahatlar da bəzi kolleclərdə tədrisin keyfiyyətini dəyişdirə bilmədi. Hazırda ölkədə 61 kollec fəaliyyət göstərir ki, onlardan cəmi 2-si özəldir: Bakı Biznes və Kooperasiya Kolleci, Odlar Yurdu Universiteti nəzdindəki kollec. Digər kolleclərdən 9-u Səhiyyə Nazirliyinə, 8-i Qafqaz Müsalmanları İdarəsinə, 1-i Xəzər Dəniz Gəmiçiliyinə tabedir”. M.Məmmədlinin sözlərinə görə, Elm və Təhsil Nazirliyinin tabeliyindəki kolleclərin əksəriyyəti universitetlərin nəzdində fəaliyyət göstərir. O xatırladıb ki, “Orta ixtisas təhsili pilləsini yüksək nəticələrlə başa vuran məzunların (subbakalavrların) topladıqları kreditlərin uyğun ixtisaslar üzrə ali təhsil müəssisələrində nəzərə alınması haqqında” Qanun qüvvəyə minəndən sonra universitetlərə axın başladı. Çünki bu qanun kolleclərdən məzun olanların hamısına imtahansız ali təhsil müəsisələrinə qəbul imkanı verir. Ekspert deyir ki, kolleclərdə tədrisin səviyyəsi, məzunların bilik və bacarığı günün tələblərinə cavab vermir: “Ötən illərin nəticələrinin müzakirəsi zamanı Dövlət İmtahan Mərkəzinin rəhbəri Məleykə Abbaszadə mətbuata açıqlamasında bu sadaladığımız faktları etiraf etmişdi. O demişdi: “Qəbul qaydası yox, subbakalavrların bilik səviyyəsi və tədrisə münasibəti ali məktəbləri razı salmır. Bəzi ali məktəblər ümumiyyətlə, subbakalavrların qəbulundan imtina etmək istəyir, çünki onlar yaxşı oxumurlar, tədris mühitini pozurlar”. Hazırda orta ixtisas təhsili müəssisələrinə sənəd verənlərin sayında artım olduğu bildirilir, amma bu, gənclərin həmin təhsil pilləsinə olan maraqlarından irəli gəlmir, ali məktəbə imtahansız daxil olmaq üçün kolleclərdən trampilin kimi istifadə məqsədi daşıyır. Bunu çəkinmədən demək olar”. M.Məmmədli deyir ki, kolleclər bir vaxtlar ən dəbdə olan təhsil pillələrindən biri idi. Lakin sonralar Boloniya sisteminə keçməyimiz, təhsilin hamı üçün əlçatan olması siyasəti ilə bağlı ali məktəblərdə keçid ballarının aşağı düşməsi, hətta 150-200 balla qəbul aparılması vəziyyəti dəyişdi. “Qeyd etdiyim kimi, bir zamanlar ümümitəhsil məktəblərində ibtidai sinif müəllimlərinin və kənd təsərrüfatı işçilərinin əsas heyətini kollec məzunları təşkil edirdi. Ətraflı Ad - 00:21 Araşdırmalarım onu göstərir ki, Elm və Təhsil Nazirliyinin müəllimlərin sertifikasiyası ilə bağlı keçirdiyi imtahanlarda ən az nəticə göstərənlər məhz region kolleclərindən məzun olan prdaqoqlardı”. Ekspertin sözlərinə görə, bu gün bir çox işəgötürənlər, xüsusilə də özəl müəssisələr hətta bakalavriata ikinci dərəcəli pillə kimi baxırlar, nəinki kolleclərə. “İşəgötürən ilk növbədə baxır ki, görsün məzunun magistratura təhsili varmı? Düşünürəm ki, kollec təhsili bakalvr-magistr pilləsinin tətəbiqinə görə nüfuzdan düşüb. Artıq orta ixtisasa ehtiyac olmadığı iddiası da gündəmdədir. İndiki halda təhsildə fasiləsizliyi qorumaq üçün yaxşı olardı ki, yeni "Təhsil haqqında" Qanunun əsas pillələrindən biri kimi universitetlərin tərkibində 2 iilik suvbakalavr, növbəti mərhələ 3 ya da 4 illik bakalavr, sonrakı mərhələdə magistratura və doktarantura pillələri kimi nəzərdə tutulsun. Belə olanda universitetlər təhsilin növbəti pillələri üçün yüksək nəticə göstərən tələbələri seçə biləcək ki, bu da tpamplin kimi sui-istifadə hallarının qarşısını almış olardı. Elm və təhsil naziri mətbuata açıqlamasında bildirmişdi ki, artıq məktəblərin ibtidai siniflərində və məktəbəqədər müəssisələrdə müəllimlərin hamısının ali təhsilli olması planlaşırılır. Bu fikirdən də aydın görünür ki, artıq əmək bazarında kollec bitirmiş məzunların işlə təminatında çox ciddi problemlər yaranmaqdadır”.

Abşeron rayonunda 70 yaşlı qadın sirkə içərək ölüb. Sozcu.az xəbər verir ki, hadisə keçmiş məcburi köçkünlər üçün tikilən şəhərcikdə qeydə alınıb. Birinci qrup gözdən əlil, 1954-cü il təvəllüdlü Abdullayeva Gözəl Qafar qızı yaşadığı ünvanda səhvən sirkə içib. O xəstəxanaya çatdırılsa da, həyatını xilas etmək mümkün olmayıb. Faktla bağlı araşdırma aparılır.

“Azərbaycan Respublikasının vətəndaşlığından çıxmaq şəxsin vəsadəti əsasında həyata keçirilən prosesdir”.  Bu sözləri “Yeni Sabah”a hüquqşünas Ramil Süleymanov bildirib. O, vətəndaşlıqdan çıxma haqqında bir sıra məqamları açıqlayıb: “Əgər vətəndaşlıqdan çıxmaq istəyən şəxsin dövlət qarşısında öhdəlikləri icra edilməyibsə, məsələn, əsgərliyə getməyibsə, vergi yaxud kommunal borc üzrə öhdəliyi varsa, bu hallar vətəndaşlıqdan çıxma haqqında vəsadətin rəddinə səbəb ola bilər. Eyni zamanda şəxs əgər müttəhim olaraq cinayət məsuliyyətinə cəlb olunursa, barəsində icra olunmayan məhkəmə qərarı varsa, yaxud şəxsin vətəndaşlıqdan çıxması Azərbaycan Respublikasının dövlət təhlükəsizliyi mənafelərinə zidd sayılırsa, belə olan təqdirdə şəxsin sözügedən vəsadəti ləğv oluna bilər”.  R.Süleymanov sözügedən məsələ barədə hansı qurumlara müraciət etmək lazım olduğunu da qeyd edib:  “Vətəndaşlıqdan çıxmaq istəyən şəxs bununla bağlı iki quruma, Dövlət Miqrasiya Xidməti və ya Xarici İşlər Nazirliyi, o cümlədən mövcud olduğu ölkənin səfirliklərinə ərizə ilə müraciət edə bilər. Burada 60 dollar rüsum ödənilir, həmçinin, şəxsin vəsadəti ilə bağlı Azərbaycan Respublikasının Prezidenti yanında Vətəndaşlıq Məsələləri Komissiyası qərar qəbul edir. Bununla bağlı həmin komissiyanın sorğuları müxtəlif dövlət qurumlarına göndərilə bilir. Hər sorğuya isə 1 ay müddətində, ümumilikdə isə, 6 ay ərzində bütün sorğulara baxılır və cavablandırılır. Dövlət qurumundan həmin sorğu ilə bağlı imtina verildiyi halda, şəxsin həmin cavabı aldığı andan 1 ay müddətində inzibati məhkəməyə müraciət etmək hüququ var. Bununla da, o, vətəndaşlıqdan çıxarılma öhdəliyinin müvafiq dövlət qurumunun üzərinə qoyulma haqda iddia ərizəsi ilə çıxış edə bilər”. 

Ermənistan MDB-nin iştirakçı dövlətlərinin hərbi təhsilin idarəetmə orqanları rəhbərlərinin Rusiyanın paytaxtı Moskva şəhərində keçirilən iclasına qatılmayıb. Sozcu.az xəbər verir ki, bu, toplantıda çəkilən xatirə fotosundan məlum olub. Yayılan fotodan məlum olur ki, iclasa MDB-yə üzv dövlətlərdən Azərbaycan, Rusiya, Belarus, Qazaxıstan, Qırğız Respublikası, Tacikistan, Türkmənistan və Özbəkistan nümayəndə heyətləri qatılıb. Fotoda Ermənistan bayrağı və nümayəndəsi yoxdur. İclasa MDB Müdafiə Nazirləri Şurasının katibi general-mayor Yuri Daşkin sədrlik edib. Xatırladaq ki, rəsmi İrəvan bundan əvvəl də MDB-nin bəzi tədbirlərində iştirak etməyib.