7 oktyabr 2023-cü ildə HƏMAS-ın hücumu ilə başlayan müharibəyə İsrail dövləti 31 dekabra qədər 6,6 milyard dollar xərcləyib. Sozcu.az xəbər verir ki, bu barədə İsrail Maliyyə Nazirliyi məlumat yayıb. Bildirilib ki, təxminən 4,5 milyard dollar müdafiəyə (müharibənin aparılmasına – red.), qalanı isə mülki məqsədlərə yönəldilib. Büdcə kəsiri isə 20 milyard dolları ötüb.

Fövqəladə Hallar Nazirliyinin (FHN) “112” qaynar telefon xəttinə Bakı şəhərinin Xətai rayonu, General Şıxlınski küçəsində yanğın baş verməsi barədə məlumat daxil olub. FHN-dən Sozcu.az-a verilən xəbərə görə, məlumatla əlaqədar dərhal FHN-in Dövlət Yanğından Mühafizə Xidmətinin qüvvələri əraziyə cəlb olunub. Yanğınsöndürənlərin operativ müdaxiləsi sayəsində taxta və məişət tullantıları yığılmış tikilidə baş vermiş yanğın genişlənərək ətraf ərazilərə yayılmasına imkan verilmədən qısa müddətdə söndürülüb. Yanğın nəticəsində 30 kv.m. sahədə taxta və məişət tullantıları yanıb, yaxınlıqdakı tikililər yanğından mühafizə olunub.

İsrailin hökumət üzvlərinin törətdikləri cinayətlərdən diqqəti yayındırmaq cəhdləri nəticə verməyəcək. Sozcu.az xəbər verir ki, bunu Türkiyə Xarici İşlər Nazirliyinin sözçüsü Öncü Keçeli İsrailin xarici işlər naziri İsrail Katzın qondarma erməni soyqırımı iddialarına cavabında bildirib. Qeyd edək ki, Katz Ərdoğanı “keçmişində "erməni soyqırımı" olan bir ölkənin prezidenti” adlandırıb.

21:07 Çinin Henan əyalətinin Pindinqşan şəhərində kömür mədənində baş verən qəzada azı 14 nəfər itkin düşüb. Sozcu.az xəbər verir ki, bu barədə “Sinxua” agentliyi məlumat yayıb. Mədəndə 61 nəfər olub. Ərazidə xilasedicilər işləyir. Qəzaya səbəbin havalandırma sistemində baş verən qaz sızıntısı olduğu ehtimal edilir. *** Kömür mədənində baş vermiş qəza nəticəsində 8 nəfər ölüb, 15 nəfər itkin düşüb. Bu barədə yerli hakimiyyət orqanları məlumat verib. Xilasedicilər mədəndə qalan 22 nəfərlə əlaqə yarada biliblər.

Azərbaycan Hərbi Dəniz Qüvvələrinin komandanı, vitse-admiral Sübhan Bəkirov ehtiyata buraxılıb. Sozcu.az xəbər verir ki, bu barədə Pravda.az məlumat yayıb. Qeyd edək ki, Müdafiə Nazirliyinin məlumatına görə, “Hərbi xidmətkeçmə haqqında” Əsasnamənin müvafiq bəndinə əsasən həqiqi hərbi xidmətdə olmağın son yaş həddinə çatmış Azərbaycan Ordusunun bir neçə vəzifəli şəxsi ehtiyata və istefaya göndərilib. Bunların arasında Azərbaycan Milli Müdafiə Universitetinin rəisi Heydər Piriyev və Quru Qoşunların artıq sabiq komandanı general-leytenant Ənvər Əfəndiyev də var.

Kiyevdə Ukrayna Prezidenti Vladimir Zelenski Böyük Britaniyanın Baş naziri Rişi Sunakla görüşüb. Sozcu.az xəbər verir ki, tərəflər arasında keçirilən görüşdən sonra təhlükəsizlik sahəsində ikitərəfli əməkdaşlıq sazişi imzalanıb. Sənədlərə əsasən, rəsmi London Kiyevlə kəşfiyyat məlumatlarını mübadilə edəcək, kibertəhlükəsizlik, hərbi təlimlərə kömək edəcək və müdafiə-sənaye əməkdaşlığını gücləndirəcək. Belə ki, Böyük Britaniyanın bu sənəd üzrə təhlükəsizlik öhdəlikləri Ukrayna NATO-ya daxil olana qədər qüvvədə olacaq. Ukrayna NATO-ya müddət bitməmiş üzv olarsa, təhlükəsizlik öhdəlikləri sona çatacaq və NATO sisteminə daxil ediləcək.

“Ermənistan Rusiyanın vasitəçiliyinə, hətta KTMT çərçivəsində əməkdaşlığa da qarşıdır”. Sozcu.az xəbər verir ki, bunu Ermənistan Təhlükəsizlik Şurasının katibi Armen Qriqoryan İctimai Televiziyaya müsahibəsində deyib. Rusiya ilə hərbi-texniki sahədə əməkdaşlığa gəlincə, Ermənistan hakimiyyəti ordunun döyüş hazırlığını artırmaq üçün hər şeyi etməyə çalışdığını və bu məqsədlə imkan daxilində silah almağı planlaşdırdığını iddia etsə də, Qriqoryan Rusiyadan yeni silah almayacaqlarını bildirib.  Təhlükəsizlik Şurasının rəhbəri Moskva ilə İrəvan arasında silah tədarükünə dair yeni razılaşmalar barədə məlumatları təkzib edib. Qriqoryan Ermənistanın aldığı silahlarla bağlı sual verən jurnalistə etirazını bildirərək deyib ki, bu barədə açıq danışılmamalıdır. Qriqoryanın müsahibəsində ən maraqlı məqam danışıqlar prosesində müəyyən problemlərin olduğunu etiraf etməsidir. Ermənistanın xarici işlər naziri Ararat Mirzoyan sülh müqaviləsi prosesində geriləmə müşahidə edildiyini desə də, hakimiyyət ictimaiyyəti sülh sayəsində Ermənistanın suverenliyini və ərazi bütövlüyünü təmin edə biləcəyinə inandırmaqda davam edir: “Sülh müqaviləsi, ilk növbədə, regionda Ermənistan və Azərbaycan arasında birgəyaşayış imkanlarına aiddir və nə Ermənistan, nə də Azərbaycanın bir-birinə qarşı ərazi iddiası var. Bu, müqavilənin imzalanması üçün vacib şərtdir və Ermənistan bu istiqamətdə irəliləyir”, – deyə Qriqoryan bildirib.

Böyük Britaniyanın xarici işlər naziri Devid Kemeron Qırmızı dənizdə husilərin hücumlarına son qoymaq üçün ölkəsinin nə lazımdırsa edəcəyini açıqlayıb. Sozcu.az xəbər verir ki, onun sözlərinə görə, Britaniyanın Yəməndəki hava hücumları İrana açıq siqnaldır. Qeyd edək ki, İranın dəstəklədiyi husilər İngiltərə və ABŞ-ın Yəməndəki hərbi bazalarına hava zərbələri endirməsindən sonra qisas təhlükəsi ilə üz-üzə qalıb.

Türkiyədə həbsdə olan Somali prezidentinin oğlu Məhəmməd Həsən Şeyx Mahmud sərbəst buraxılıb. Sozcu.az xəbər verir ki, bu barədə Türkiyə mətbuatı məlumat paylaşıb. Qeyd edək ki, ötən il noyabrın 30-da İstanbul şəhərində Məhəmməd Həsən Şeyx Mahmudun idarə etdiyi avtomobil motosikletlə toqquşub. Motosiklet sürən 38 yaşlı kuryer Yunus Göçər yolun kənarında dayanmaq üçün tunelin çıxışında sürəti azaltmağa başlayıb. Sükanda Məhəmməd Həsən Mahmudun olduğu avtomobil isə eyni istiqamətdə hərəkət edərək motosikletə çırpılıb. Ciddi zədə alan Göçər həlak olub. Bundan sonra prezidentin oğlunun həbsi tələb edilmişdi.

ABŞ bizə hələ ötən əsrin 70-ci illərində istifadə etdiyi A-10 hücum təyyarələrini verə bilər. Sozcu.az xəbər verir ki, bunu Ukrayna Silahlı Qüvvələrinin quru qoşunlarının komandanı, general-polkovnik Aleksandr Sırski deyib. "Bizə bir variant versələr, mən A-10 haqqında danışardım. Bu yeni texnologiya deyil, lakin bir çox münaqişələrdə özünü yaxşı nümayiş etdirmiş etibarlı texnologiyadır", - Sırski bildirib. Onun fikrincə, belə təyyarələr quru qoşunlarına dəstək verə bilər: "Bundan əlavə, "Apaçi" AH-64 və AH-1 "Super Kobra", eləcə də Blək Həvk" hücum helikopterlərinin tədarükü mühüm rol oynaya bilər.

Beynəlxalq Münasibətlərin Təhlili Mərkəzinin İdarə Heyətinin sədri Fərid Şəfiyev hazırki mərhələdə Ermənistanla Azərbaycan arasında tutarlı razılığın əldə edilməsini çətin məsələ sayır. Sozcu.az Report-a istinadla xəbər verir ki, o son proseslərin bunu bir daha təsdiqlədiyini bildirib. F.Şəfiyev hesab edir ki, Bakı və İrəvan arasında anklavlar məsələsi delimitasiya prosesi çərçivəsində həll edilməlidir: “Dekabr ayında bizim müəyyən dərəcədə daha optimistik əsaslarımız vardı, indi isə həllinə ciddi ehtiyac duyulan bir neçə məsələ var. Buraya qarant, delimitasiya-xəritə, nəqliyyat yolları və ya Zəngəzur dəhlizi kimi məsələlər daxildir. Xüsusilə də anklavlar məsələsi gündəmdədir. Amma düzünü deməliyəmsə, mən tezliklə bir həll yolunun tapılacağını görmürəm”. Mərkəz sədri buna səbəb kimi Ermənistan rəhbərliyində normal danışıq aparmaq ənənəsinin olmamasını, bunun çox çətin iş olduğunu göstərib: “Yaxın tarixə nəzər saldıqda da bunu görürük. Məsələn, 2020-ci ildə Zəngəzur dəhlizi ilə bağlı öhdəlik götürüldü, ancaq üç il davam edən danışıqlar nəticə vermədi, ona görə də biz İran vasitəsilə alternativ yol yaradırıq. Bunu görən ermənilər indi düşüblər ortaya, deyirlər ki, biz də hazırıq, Ermənistanın baş naziri Nikol Paşinyan “Sülh Qovşağı” məsələsini irəli sürüb”. Mərkəz rəhbəri həmin şərtlərin Azərbaycanı qane etmədiyini də diqqətə çatdırıb: “Sülh Qovşağı” layihəsi piar aksiyadır. Düzdür, dekabrın əvvəlində COP29 və əsirlərin dəyişdirilməsi ilə bağlı qərarlar müəyyən məqam yaratmışdı. Amma hazırkı hadisələr və Prezidentin son şərhləri göstərir ki, Ermənistanla tutarlı razılıq əldə edilməsi çətin məsələdir”.

General-leytenant Hikmət Mirzəyev müdafiə nazirinin müavini vəzifəsinə təyin edilib. Sozcu.az Yenisabah.az-a istinadən xəbər verir ki, general-leytenant Ənvər Əfəndiyev isə ehtiyata buraxılıb.

Qarabağdan Ermənistanın Amasya rayonuna köçən bir qrup erməni bələdiyyə rəsmisi haqda şikayət ərizəsi yazıb. Sozcu.az xəbər verir ki, bu barədə erməni KİV yazıb. Bildirilib ki, ərazidə Qarabağ erməniləri üçün satınalmaları təşkil edən məsul şəxsdən şikayət olunub. Onlar tapşırılanın əksinə, ilkin tələbat malları ilə təmin edilmədiklərini bildirirlər. Amasya rəsmisinə qarşı protokol tərtib edənlər Ağdərə və Xankəndidən köçən ermənilərdir. Həmin şəxslər polis bölməsinə çağırılıb ifadələri alınıb və iş Ermənistan Korrupsiyaya Qarşı Mübarizə Komitəsinə göndərilib. Qeyd edək ki, bu, Qarabağ erməniləri ilə bağlı ilk belə hal deyil. Onlar  Ermənistanda iş tapa bilmədiklərini, universitetlərdə, yaşadıqları mühitdə psixoloji şiddətə, ayrı seçkiliyə məruz qaldıqlarını bildirirlər.

Ermənistanın Baş naziri Nikol Pasinyan Qarabağdan qovulmuş qondarma “artsax” separatçılarının keçmiş rəhbərlərindən olan Samvel Babayanın “dirilmək” cəhdlərini dəfn edib. Sozcu.az xəbər verir ki, “Hraparak”ın məlumatına görə, Paşinyan Qarabağ ermənilərinin geri qayıdışı üçün danışıqlar aparmaq səlahiyyətləri əldə etməyə çalışan qondarma “artsaxın təhlükəsizlik şurasının keçmiş katibi”ni məyus edib. Məlumata görə, Paşinyan daha Samvel Babayanın xidmət göstərməsi üçün maraqlı deyil. “Hraparak” yazır ki, S.Babayanın sözlərinə görə, o, artıq özünü aldadılmış hesab edir. Qeyd edək ki, qondarma “artsaxın təhlükəsizlik şurasının keçmiş katibi” S.Babayan vaxtaşırı səs-küylü bəyanatlar və açıqlamalarla gündəmə gəlir, Qarabağ separatçılarının rəhbərlərini “vurmaq”la Paşinyanın “əlinə oynayırdı”. O, Qarabağı tərk edən ermənilərin problemləri ilə məşğul olacaq, eləcə də Azərbaycanla danışıqlar aparacaq struktur formalaşdırmağa çalışırdı. Paşinyan özü də əvvəlcə buna meylli idi, lakin son vaxtlar bu plandan imtina edib.  "Hraparak" yazır ki, Nikol Paşinyan "artsax"la bağlı hər şeyi unutdurmaq və fəal olanları gözdən salmaq, onları Ermənistanın təhlükəsizliyinə təhdid kimi təqdim etmək qərarına gəlib.

Yanvarın 11-də gecə saatlarında Sabunçu qəsəbəsi ərazisində bir nəfərin “Mercedes” markalı avtomobilinin quldurluq yolu ilə talanması barədə polisə məlumat daxil olub. Sozcu.az DİN-ə istinadən xəbər verir ki, Sabunçu Rayon Polis İdarəsinin 12-ci Polis Şöbəsi əməkdaşlarının keçirdikləri tədbirlərlə quldurluq əməlini törətməkdə şübhəli bilinən Bakı şəhər sakini Rəcəb Ələsgərov müəyyən olunaraq saxlanılıb. Sabunçu Rayon Polis İdarəsində araşdırma aparılır. “Mercedes” markalı avtomobilin sürücüsünün döyüldüyü, avtomobilinin əlindən alındığı bildirilir.

Ermənistanda fəxri adlar ləğv ediləcək. Sozcu.az xəbər verir ki, bu barədə Ermənistan ədliyyə nazirinin müavini Armenuhi Arutyunyan məlumat verib. O qeyd edib ki, “Dövlət mükafatları və fəxri adlar haqqında” qanuna dəyişikliklər ediləcək. Nazir müavininin sözlərinə görə, bu gün Ermənistanda 17 fəxri ad var: “Məsələn, Xalq artisti, əməkdar artist, əməkdar jurnalist, əməkdar mədəniyyət xadimi. Onların hamısı ləğv ediləcək".

ABŞ Bakı ilə İrəvan arasında davamlı sülhün bərqərar olmasının mümkünlüyünə inanır. Sozcu.az xəbər verir ki, bu barədə ABŞ Dövlət Departamentinin mətbuat katibinin müavini Vedant Patel brifinq zamanı deyib. "Ermənistanla Azərbaycan arasında davamlı sülhün mümkün olduğuna hələ də inanırıq. Bu, Dövlət Departamentinin çalışacağı bir məsələdir. Lui Bono, dövlət katibi və digərləri bu işlə fəal məşğuldurlar", - diplomat diqqətə çatdırıb. Qeyd edək ki, rəsmi Vaşinqton Ermənistandakı səfirliyi vasitəsilə yanvarın 9-da bildirib ki, Cənubi Qafqazda sülhə nail olmaq üçün səyləri dəstəkləyəcək. Bu bəyanat ABŞ-nin Qafqaz danışıqları üzrə baş müşaviri Lui Bononun İrəvana səfərindən dərhal sonra verilib. Xatırladaq ki, L.Bono yanvarın 8-dən etibarən İrəvanda səfərdədir. O, Ermənistanın bir sıra rəsmiləri ilə görüşüb.

Gəncədə 44 günlük Vətən müharibəsinin qazisi naməlum səbəbdən ölüb. Sozcu.az-ın məlumatına görə, şəhər sakini 2001-ci il təvəllüdlü Vəliyev Əli Mehman oğlu huşsuz vəziyyətdə xəstəxanaya gətirilib. Həkimlərin müayinəsi  zamanı  Əli Vəliyevin dünyasının dəyişdiyi məlum olub. Qazinin hansı səbəbdən ölməsi hələlik məlum deyil. Faktla bağlı Gəncə şəhər prokrorluğunda  araşdırma aparılır. Xatırladaq ki , Əli Vəliyev 44 günlük Vətən müharibəsinin qazisi, III qrup əlilldir. Əli Vəliyev Azərbaycan Prezidenti İlham Əliyevin sərəncamlarına əsasən “Xocavəndin azad olunmasına görə”, “Qubadlının azad olunmasına görə”,“Cəbrayılın  azad olunmasına görə” və  “Füzulinin  azad olunmasına görə” medalları ilə təltif  edilib. Unikal.org)

“Biz, həqiqətən də, 10-11-ci siniflərin məzmununa yenidən baxmalıyıq. Düşünməliyik və müzakirə aparmalıyıq ki, on və on birinci siniflər nə üçündür?”. Bu sözləri Elm və Təhsil naziri Emin Əmrullayev “İTV”-yə müsahibəsində deyib. Bildiyiniz kimi, Azərbaycanın orta məktəblərində kurikulum tədris proqramı tətbiq olunur. Bu proqrama əsasən, orta təhsilin 9-cu sinifinə qədər bütün dərs proqramı tədris olunub bitirilir. 10 və 11-ci siniflərdə isə 5-ci sinifdən etibarən keçilmiş mövzuların daha geniş formada tədrisi nəzərdə tutulur. Bu proses ölkədə kurikulum sistemi tətbiq olunmağa başladığı andan start götürüb. Belə bir sistemlə dərslərin tədrisi nə qədər effektivdir? Bu suallar əlaqədar təhsil eksperti Elçin Əfəndi Referans.az-a açıqlamasında danışıb. “Ümumiyyətlə, konstitusiyaya və qanunvericiliyə əsasən, icbari təhsil ödənişsizdir. 9 və 11-ci siniflərdən – tam orta və ümumi orta təhsil bazasından biz şagirdləri buraxırıq. Yəni 9-cu sinifi bitirən və attestatını alan şagird təhsil almaq istəmədiyini bildirərək təhsilini dayandıra və məktəbi tərk edə bilər. Bu şəxslər fərqli sahələrə keçid ala bilər, kollecə, peşə məktəblərinə üz tuta bilər və yaxud da, ümumiyyətlə, təhsilinə davam etməyə bilər. Bu nöqteyi nəzərdən biz şagirdi müvafiq sinifə, yəni, 9-cu sinifə qədər müəyyən biliklərlə təmin etməliyik”. Ekspert bildirib ki, 9-cu sinifi bitirən şəxslərin bütün tədris proqramını mənimsəməsi onların həyatlarında, gələcək karyeralarında olduqca vacibdir. Lakin dərs prosesi zamanı 9-cu sinifə qədər alınmış informasiyalar əhatəli formada deyil, daha lakonik və gündəlik həyatda istifadə ediləcək dərəcədə əhatəlidir. “Təbii ki, 10 və 11-ci siniflərdə isə digər fənnlərə - fizika, kimya və s. fənnlərlə bağlı daha geniş formada tədris prosesində iştirak edir və həmin fənnləri daha professional səviyyədə mənimsəmiş olur. Tədris proqramının bu formada tətbiq olunması 9 illik prinsipə əsaslanır. 9 illik proqram buraxılış olduğu üçün ilkin informasiyanın verilməsi, həmin sinifə qədər ən azından müəyyən mövzuların tədris olunması əsas mövzulardan biridir”.

Biz birlikdə Putini dayandırmayana qədər, o, müharibəni dayandırmayacaq. Sozcu.az xəbər verir ki, bu sözləri Ukrayna Prezidenti Vladimir Zelenski deyib. “Bu yaxınlarda o, Finlandiya və Özbəkistandan danışmağa başladı. Biz hamımız birlikdə onu dayandırmayana qədər Putin dayanmayacaq”, - deyə Zelenski bildirib. Dövlət başçısı Ukraynadan sonra Rusiyanın Baltikyanı ölkələrə və Moldovaya hücumunu da istisna etməyib.

Ermənistan Azərbaycanın narazılığından sonra Arazdəyəndə yerləşən Amerika-Erməni metallurgiya zavodunun Ararata köçürülməsi üçün 3 milyard 500 milyon dram ayırıb. Sozcu.az xəbər verir ki, İrəvan sözügedən məbləği 4 il müddətinə köçürmək şərti ilə illik 8 faizlə “GTB Steel” şirkətinə ayırıb. Qeyd edilib ki, 2023-cü il dekabrın 14-də hökumət Ararat qəsəbəsində polad zavodunun tikintisi üzrə investisiya layihəsinin təsdiq edilməsi və torpaq sahələrinin bağışlanmasına razılıq verilməsi haqqında qərar qəbul edib.

Bu il azad olunan ərazilərə ilk köçün yanvarın 18-də yola düşməsi planlaşdırılır. Sozcu.az xəbər verir ki, bunu Report-a Qaçqınların və Məcburi Köçkünlərin İşləri üzrə Dövlət Komitəsinin Beynəlxalq əlaqələr, informasiya və mətbuat xidməti departamentinin direktoru İbrahim Mirzəyev deyib. Onun sözlərinə görə, ilk köç Füzuli şəhərinə olacaq: “İşğaldan azad edilmiş ərazilərdə genişmiqyaslı bərpa-quruculuq işləri aparılır, ilk növbədə, müasir infrastruktur formalaşdırılır, dayanıqlı məskunlaşma və iqtisadi reinteqrasiya üçün zəruri şərait yaradılır. Dövlətimizin başçısının 16 noyabr 2022-ci il tarixli Sərəncamı ilə təsdiq edilmiş “Azərbaycan Respublikasının işğaldan azad edilmiş ərazilərinə Böyük Qayıdışa dair I Dövlət Proqramı”na əsasən, 2024-cü ildə məcburi köçkünlərin doğma yurdlarına qayıdışı davam edəcək. İlk köç yenidən qurulan Füzuli şəhərinə olacaq". Komitə rəsmisi qeyd edib ki, yanvarın 12-də müxtəlif müvəqqəti məskunlaşma obyektlərində də ağır və qəzalı şəraitdə yaşayan Füzuli şəhər sakinləri arasında püşkatma keçiriləcək: "Şəffaflığı və ədalətliliyi təmin etmək üçün keçirilən püşkatma zamanı məcburi köçkünlər əvvəlcədən onların ailə tərkibinə uyğun olaraq ayrılmış mənzillərin yerləşdiyi bina və mərtəbənin yerini müəyyənləşdirəcək. Püşkatmada iştirak etmiş sakinlər mərhələli şəkildə doğma yurdlarına köçürüləcək. İlk köçün yanvarın 18-də yola düşməsi planlaşdırılır".

Bakıda və Abşeron yarımadasında yanvarın 13-ü səhərdən 14-ü axşamadək havanın arabir yağıntılı olacağı, bəzi yerlərdə sulu qar, qar yağacağı gözlənilir. Ekologiya və Təbii Sərvətlər Nazirliyindən Sozcu.az-a verilən məlumata görə, şimal-qərb küləyinin 13-ü səhərdən 14-dək 15-20 m/s, arabir 23-25 m/s, 13-ü səhər və gündüz isə yarımadanın bəzi yerlərində arabir 30 m/s-dək güclənəcəyi gözlənilir. Havanın temperaturu ötən günlərlə müqayisədə 5-8 dərəcə aşağı enərək, yanvarın 14-15-i gecə saatlarında 0-3 dərəcə şaxta, gündüz 0-3 dərəcə isti olacaq. Azərbaycanın rayonlarında yanvarın 12-si əsasən qərb rayonlarında, 12-si axşamdan 15-dək isə bəzi yerlərdə havanın arabir yağıntılı olacağı, sulu qar, qar yağacağı gözlənilir. Naxçıvan MR, Qarabağ və Şərqi-Zəngəzur, Qazax-Gəncə, Balakən-Şəki, Quba-Qusar, Dağlıq Şirvan, Mərkəzi Aran, Lənkəran-Astara bölgəsində yağıntıların intensiv olacağı ehtimalı var. Qərb küləyi yanvarın 12-də 15-20 m/s, yanvarın 13-14-də isə bəzi yerlərdə arabir 23-25 m/s-dək güclənəcək. Havanın temperaturu ötən günlərlə müqayisədə 5-8 dərəcə aşağı enərək yanvarın 14-15-də aran rayonlarında gecə 3-8 dərəcə şaxta, gündüz 0-4 dərəcə isti, dağlarda gecə 10-15, gündüz 2-7 dərəcə şaxta olacaq. Yanvarın 14-15-də gecə və səhər bəzi dağlıq və dağətəyi rayonlarda yolların buz bağlama ehtimalı var.

Bu gün Təbrizdə səyyar satıcılarla polis qüvvələri və bələdiyyə məmurları arasında qarşıdurma olub. Sozcu.az xəbər verir ki, bu barədə yerli sosial media fəalları məlumat paylaşıblar. Bildirilib ki, səyyar satıcılar onların mallarını müsadirə edən bələdiyyə məmurlarının özbaşınalığına etiraz ediblər. Bələdiyyə işçilərinin çağırdığı polis qüvvələri satıcılara qarşı zor tətbiq edib. Bir neçə satıcının yaralandığı, bir neçəsinin isə polis məntəqələrinə aparıldığı vurğulanıb.