Mövqe

NATO nun keçmiş Baş Katibi Rasmussen deyib ki, Azərbaycan Rusiyanın taleyindən nəticə çıxartmalıdır.  Azərbaycan təcavüzkar deyil.  Biz heç kəsin ərazisini işğal etməmişik.  Əksinə elə Rusiyanın himayəsi və birbaşa iştirakı ilə bizim ərazimiz işğal olunub.  İşğalçı tərəf Ermənistandır.  Rusiyanın taleyindən Azərbaycan yox, Ukrayna müharibəsində Rusiyanın Belarusdan sonrakı ikinci müttəfiqi olan ("The Economist”) işğalçı Ermənistan nəticə çıxartmalıdır. Arif Hacılı, Müsavat Partiyasının başqanı 

İranın PKK ilə əlaqələri uzun illərdir ki, mövcuddur və bu, hamıya məlumdur. Sözügedən əlaqələr dəfələrlə Türkiyə-İran münasibətlərinin əsas gündəm mövzularından olub. Bu sözləri Axar.az-a İranın terror təşkilatları ilə əlaqələri haqqında danışan Türkiyədə fəaliyyət göstərən Təbriz Araşdırmaları İnstitutunun mütəxəssisi Babək Şahid deyib. Mütəxəssis İranın Azərbaycan və Türkiyə sərhədinə yaxın məsafədə yerləşən bir kəndi PKK-nın ixtiyarına verdiyini qeyd edib: “Son iki ildə daxili işlər naziri Süleyman Soylu da bir neçə dəfə İranı PKK məsələsində üzərinə düşənləri yerinə yetirmədiyinə görə sərt tənqid edib. Səbəb isə rəsmi Tehranın Qərbi Azərbaycan vilayətində Avacıq şəhərinin kəndlərindən birini PKK-nın ixtiyarına verməsidir. Sözügedən ərazi həm Türkiyə, həm də Azərbaycanın Culfa rayonu ilə sərhədə yaxındır. Bu addım Türkiyənin PKK-ya qarşı mübarizəsinə müəyyən əngəllər törədir. Yəni Şimali İraqda terror təşkilatına qarşı əməliyyat keçiriləndə terrorçular ordan qaçaraq Avacıqdakı kənddə gizlənirlər. Digər tərəfdən, biz Türkiyənin əməliyyat keçirmək istədiyi zamanlarda İranın və onun Qüds Qüvvələri Komandanlığının dəstəklədiyi Haşdi-Şabi qruplaşmasına bağlı Kataib Hizbullah və digər şiə milislər tərəfindən Başika hərbi bazasına hücumlar təşkil edildiyinin şahidi oluruq. Hətta oradakı bəzi İrana yaxın müctehidlər “kafirə qarşı vuruşmaq” haqqında cihad fitvası verə biləcəklərini də vurğulayıblar”. Babək Şahid İranın Qüds qüvvələrinin Suriyada ermənilərdən ibarət terror qruplaşmalarının qurulmasına və fəaliyyətinə ciddi dəstək verdiyini qeyd edib: “İrana bağlı qruplar ilə ermənilər arasında əlaqələrin doğurduğu terror qruplaşmalarından ən məşhuru Masis Mutanyanın başçılıq etdiyi Nübar Ozanyan Briqadasıdır. Briqada İranın Qüds qüvvələrinin dəstəyi ilə 2019-cu ildə Suriya ermənilərindən təşkil olunub. Terror təşkilatının hazırda 500-ə yaxın üzvü var. Belə “könüllü”lər vasitəsilə İran, Bəşər Əsəd və ermənilər arasında körpü qurulur və koordinasiya edilir. Digər qruplaşma Suriyadakı müharibə zamanı YPG terror təşkilatının tərkibində Süryani Birliyinin qolu kimi fəaliyyətə başlayan Suturo Briqadasıdır. Briqada 2014-cü ildə YPG-dən ayrılıb və İranın Qüds qüvvələri ilə yaxınlaşıb. Qarşılıq olaraq isə Qüds qüvvələri Qamışlı kəndindəki təlim düşərgələrindən birini sözügedən terror dəstəsinə verdi. Düşərgənin adını “Ağa Petros” qoydular. Ağa Petros 1918-ci ildə Cənubi Azərbaycanda Cilovluq faciəsini törədən ermənilərin başçısıdır. Hazırda Ermənistanda Daşnaksütyun Partiyasının sədri olan Hrant Markaryan bu ölkə ilə İranın Qüds qüvvələri arasındakı əlaqələrin qurulmasında vasitəçilik edir. Qeyd edim ki, Markaryan 1958-ci ildə İsfahan şəhərində Culfa məhəlləsində dünyaya gəlib, orada universitetdə erməni dili üzrə təhsil alıb, 1992-ci ildə isə Ermənistana gedib. Haşdi Şabiyə bağlı digər bir terrorçu dəstə isə Kataib Babiliundur. Tərcüməsi “İncil Briqadaları” deməkdir. Bu terrorçu qruplaşma rəsmi şəkildə Qüds qüvvələrinin tərkibindəki Bədr Ordusu ilə sıx əlaqədədir. Rəhbəri Rayan əl-Kəldani isə ABŞ-ın sanksiya tətbiq etdiyi şəxslər siyahısındadır. Kataib Babiliun Haşdi Şabi içərisində “50-ci Briqada” kimi də tanınır və təqribən 1000 nəfərlik terrorçudan ibarət olduğu bildirilir. Siyahıya Kataib Babiliuna yaxın olan Sehl-i Ninova terror qruplaşmasını da əlavə etmək olar”. Ekspert bildirib ki, VOMA terror təşkilatı haqqında Azərbaycan mətbuatında da çoxlu yazılar gedib. Bu terror təşkilatının başçısı Vladimir Vartanov Ermənistan vətəndaşıdır və onun PKK ilə çox yaxın əlaqələri var: “Vartanovun ən az 300 nəfər PKK terrorçusunu Ermənistana apardığı haqqında dəqiq məlumat var. Bunların hərəkət marşrutu isə böyük ehtimalla İran ərazisindən keçir. Terrorçuların İrana məxsus təyyarələr ilə daşınması da mümkündür”. Babək Şahid İranın sözügedən terror təşkilatlarından da istifadə etməklə Cənubi Qafqazda müəyyən dəyişikliklərə ciddi hazırlaşdığını vurğulayıb: “İranın yuxarıda sadaladığımız terror təşkilatlarına verdiyi dəstəyi dəqiq bilirik. Onların PKK ilə əlaqəsini də əksər hallarda İran qurur. Rəsmi Tehran cidd-cəhdlə Cənubi Qafqazda müəyyən dəyişikliklərə hazırlaşır. İki-üç gün əvvəl də SEPAH yayımladığı videoda Ermənistanın ərazi bütövlüyünü özünün “qırmızı xətti” adlandırdı və bunun üçün lazım olarsa, vuruşacağını bildirdi. Bütün əlimizdə olan məlumatlar əsasında İranın nəzarətində olan terror təşkilatlarından və PKK-dan terrorçuları bölgəyə daşıdığını, Türkiyə və Azərbaycana qarşı müharibə hazırlığı gördüyünü iddia edə bilərik”.

"Bakı şəhərində və ətraf qəsəbələrdə, xüsusən Xırdalanda, Biləcəridə tikintilər Şəhərsalma Məcəlləsinə və Tikinti Məcəlləsinə uyğun aparılmayıb. Hamı da bundan şikayətçidir, səkiləri zəbt edilib və onsuz da yüklənmiş şəhərdə əlavə yüklənmə aparırlar". Sozcu.az xəbər verir ki, bunu iqtisadçı alim, sabiq deputat Nazim Baydəmirli deyib. Sabiq deputat "Kristal Abşeron" şirkətinin inşa etdiyi binaların vəziyyətini tənqid edib. O, sözügedən binaların əksəriyyətində parkinq yerlərinin nəzərdə tutulmadığını söyləyib: "Ümumiyyətlə, hər hansı yanğın və digər məsələlərlə bağlı maşınların girməyi çətinləşib. Dəfələrlə bunu sosial media resurslarında izləmişik və əksər binaların həm xarici görünüşü, həm də üslubu çox bərbad vəziyyətdədir. Şəhər sakini olaraq biz onların bir çoxlarını görürük. Eyni zamanda, sakinlərin özləri layihələrdən kənar müxtəlif rekonstruksiya işləri apararaq divarları zədələyir, həmçinin əlavə olaraq balkonlar çıxarılır. Hətta, sovet vaxtı tikilən binalarda da qeyri-yaşayış sahəsində müxtəlif pozuntular olur. Bunlar hər yerdə var, çünki rayon icra hakimiyyətləri buna qazanc mənbəyi kimi baxırlar. Bundan da qaynaqlanaraq sözügedən problemlər ortalığa çıxıb. Keyfiyyətin, nəzarətin olmaması indiki vəziyyətə gətirib. "Kristal Abşeron" şirkətinin inşa etdiyi “Qobu Park-2” yaşayış kompleksi ilə bağlı görünən vəziyyət odur ki, bu cür tikililərə doğru nəzarət edilmir. Ona görə də bu cür acınacaqlı vəziyyət ortaya çıxıb".Demokrat.az

Naxçıvan Dövlət Universitetində yoxlamalara başlanılıb. Yoxlamalar ötən həftədən başlayaraq Azərbaycan Respublikası Hesablama Palatası tərəfindən keçirilir. Kafedra və dekanlıqların iş prinsipləri, bölmələrin, şöbələrin iş fəaliyyəti, il ərzində görülən işlər və hesabatların yoxlaması aparılır. Yoxlamaların nə vaxta kimi davam edəcəyi məlum deyil.APA

Dünən Tovuz rayonunda baş vermiş ağır qəzada ölən və yaralanan şəxslər Strateji Obyektlərin Mühafizəsi Dövlət Agentliyinin Ağstafa Regional idarəsinin əməkdaşları olub. Bakı-Qazax magistralının Tovuzdan keçən 439-cu kilometrliyində Rəşidov Aqşin Nəsib oğlunun idarə etdiyi “Mercedes-Benz E 270” markalı avtomobil agentliyin Ağstafa Regional idarəsində baş çavuş rütbəsində sürücü vəzifəsində xidmət edən Yaqubəliyev Elçin Abdı oğlunun idarə etdiyi “Mitsubishi L-200” markalı maşına arxa hissədən çırpılıb. Nəticədə baş çavuşun idarə etdiyi xidməti avtomobil idarəetmədən çıxaraq aşıb. E.Yaqubəliyev almış olduğu xəsarətlərdən hadisə yerində ölüb, həmin avtomobilin sərnişini olan idarənin bölmə komandiri vəzifəsində xidmət edən gizir Kərimov Vüsal Rəhim oğlu isə müxtəlif dərəcəli bədən xəsarətləri alaraq Tovuz Rayon Mərkəzi Xəstəxanasına yerləşdirilib. Faktla bağlı cinayət işi başlanılıb, araşdırma aparılır. Fotoda qəzada həyatını itirən Elçin Yaqubəliyev (qafqazinfo)

"Azərbaycanda "Kristal Abşeron" və digər şirkətlər tərəfindən tikilən binaların 80 faizi bir-birinə çox yaxın inşa edilir. Normativ və standartlara əməl olunmur". Bu fikirləri Demokrat.az-a açıqlamasında tikinti məsələləri üzrə ekspert Nüsrət İbrahimov deyib. Ekspert bildirib ki, hər bir bina inşa olunarkən, tikinti standartlarına əməl olunmalıdır: "Normativ və standartlar var, orada da binaların ara məsafəsi göstərilir. Lakin yeni tikilən əksər binalarda ara məsafəsi gözlənilmir. İnsanların azad toplanması üçün yerlər olmalıdır. Deyək ki, bu gün forsmajor hadisəsi, zəlzələ oldu, həmin binadan qaçıb çölə yığışmağa təhlükəsiz boş yer olmalıdır. Yoxsa hər tərəf binadırsa, əlbəttə ki, bu risklidir, çünki uçan bina onların üstünə uçacaq. Çox təəssüflər olsun ki, son illərə qədər tikilən binalarda bu normativlər gözlənilməyib. "Kristal Abşeron" şirkəti tərəfindən Xırdalan ərazisində inşa olunan binaların təhlükəsizliyi məsələsinə də toxunan Nüsrət İbrahimov qeyd edib ki, Xırdalanda tikilən binalar Bakıdan da təhlükəli vəziyyətdədir. Ekspert "Kristal Abşeron" şirkəti tərəfindən metronun "Azadlıq prospekti" stansiyasının üzərində hündürmərtəbəli yaşayış binalarının tikilməsinə də münasibət bildirib: "Hündürmərtəbəli binaların metro üzərində və ətrafında tikilməsi yolverilməzdir. Təəssüf ki, ölkəmizdə metro tunelləri ətrafında və üzərində bina tikən şirkətlər var. Bu, qanunsuzdur. Belə binalar çox risklidir. Metro üzərində yalnız kiçik iaşə obyektləri ola bilər".

Səhiyyə Nazirliyinə yeni səlahiyyət verilib. Nazirlər Kabineti bununla bağlı “Təbii fəlakət, qəza və digər fövqəladə vəziyyətlər zamanı qanın, qan komponentlərinin donorluğunun təşkili Qaydası”nda dəyişiklik edib İndiyə qədər təbii fəlakət, qəza və digər fövqəladə hallar baş verdikdə və bu zaman qana və qan komponentlərinə kəskin ehtiyac yarandıqda, İcbari Tibbi Sığorta üzrə Dövlət Agentliyi Fövqəladə Hallar Nazirliyi və yerli icra hakimiyyəti orqanları ilə birlikdə kütləvi qan donorluğunu təşkil edib. Dəyişikliyə əsasən, İcbari Tibbi Sığorta üzrə Dövlət Agentliyinin bu sahədə səlahiyyəti Səhiyyə Nazirliyinə həvalə edilib.

Ali təhsil müəssisələrə qəbul sistemində problem var. Sozcu.az xəbər verir ki, bunu elm və təhsil naziri Emin Əmrullayev "Ali təhsil haqqında" qanun layihəsi ilə bağlı keçirilən ictimai dinləmədə deyib. O bildirib ki, bunlardan əsası ixtisas seçimidir: "Abituriyent bir neçə ixtisası yazır, birinə düşmürsə, o birinə düşür. Nəticədə biologiya, kimya ixtisaslarını istəyirsə, axırda gəlib başqa bir ixtisasa düşür. 95 faiz halda abituriyentlər belə davranır. Mahiyyət etibarilə həkim olmaq istəməyən insanlar həkim olur”.

Xəbər verdiyimiz kimi, Azərbaycanda İran casus şəbəkələrinin ifşa olunması ilə bağlı əməliyyatlar keçirilib. Nəticədə daha bir şəbəkə ifşa olunub. Saxlanılanların olduğu deyilir. Sosial şəbəkələrdə İran xüsusi xidmət orqanları ilə əməkdaşlıqda şübhəli bilinərək saxlanılan vətəndaşların fotokollajı yayılıb. Mənbə iddia edir ki, əməliyyat Azərbaycan Dövlət Təhlükəsizliyi Xidməti tərəfindən həyata keçirilib.(Bizim.Media)

"Kreml Sovet İnformasiya Bürosu analoqunun yaradılmasında Stalin yanaşmasını təkrarlaya bilməz..." Kremldə Rusiya prezidenti Vladimir Putinin yaxın ətrafının əsas üzvləri arasında mübarizə gedir. Putin ölkədə informasiya məkanı üzərində nəzarəti itirib və hazırda diktatorun ətrafında daxili qarşıdurma baş verir. Sozcu.az xəbər verir ki, bu barədə Amerikanın müharibənin öyrənilməsi İnstitutunun (ISW) analitikləri bəyan edib. Məlumatda deyilir ki, martın 11-də Rusiya xarici işlər nazirinin rəsmi nümayəndəsi Mariya Zaxarova təsdiq edib ki, Kreml daxilində mübarizə gedir və Kreml Rusiyada informasiya məkanına, hələlik, nəzarəti itirib.  Zaxarova həm də bəyan edib ki, ehtimal ki, prezident Putin buna təsir edə bilmir. Zaxarova qeyd edib ki, Kreml Rusiyanın daxili informasiya məkanına mərkəzləşdirilmiş nəzarət üçün Sovet İnformasiya Bürosu analoqunun yaradılmasında Kreml "elitaları" arasında mübarizə səbəbindən Stalin yanaşmasını təkrarlaya bilməz. Ekspertlər iddia edir ki, Zaxarovanın bəyanatı onların institutunun bir neçə dəyərləndirməsini təsdiq edir. Bundan başqa, "Vaqner qrupu"nun başçısı Yevgeni Priqojin bəyan edib ki, Baxmut uğrunda döyüşdən sonra o, "Vaqner qrupu"nu sərt ideoloji hərbi təşkilata çevirəcək və savaşa yeni cəlbetmə dalğasına başlayacaq. ISW xatırladır ki, "Vaqner qrupu" bu yaxınlarda bütün Rusiya boyunca rekrutinq (cəlbetmə-red.), o cümlədən gənclərin cəlbetməsinə yönələn mərkəzləri genişləndirib.

Fövqəladə Hallar Nazirliyinin Şimal Regional Mərkəzinə yeni rəis təyin edilib. Sozcu.az Qaynarinfo-ya istinadən xəbər verir ki, nazir, general-polkovnik Kəmaləddin Heydərovun müvafiq əmri ilə bu vəzifəyə polkovnik-leytenant İlyasov Fuad Bəbir oğlu təyin olunub. Qeyd edək ki, bir müddət əvvəl polkovnik Şahin Mirzəyev Şimal Regional Mərkəzinin rəisi vəzifəsindən azad edilərək, Naxçıvan Muxtar Respublikasının fövqəladə hallar naziri təyin edilib. O, bu vəzifədə Şamı Abdullayevi əvəzləyib.

Tehran may ayına qədər İran İnqilab Keşikçiləri və şiə silahlı birləşmələrindən ibarət 4000 nəfərlik qüvvəni Qarabağa köçürməyi planlaşdırır. Bu sensasional iddia "Türkiyə” qəzetində nəşr edilən Yılmaz Bilgənin "İran Qarabağı ikinci Suriyaya çevirmək istəyir” adlı məqaləsində qeyd edilib. O yazısında qeyd edib ki, Ermənistanın təhlükəsizliyini əsas prioritet, İrəvanı isə qardaş elan edən İran administrasiyası Qarabağı Suriyaya çevirmək planları qurur. İddialara görə, Tehranın gündəliyinə İran İnqilabı Keşikçiləri və şiə milislərindən ibarət 4 min nəfərlik qüvvənin 2023-cü ilin mayına qədər Qarabağa köçürülməsi daxildir. Bu məqsədlə Qüds Qüvvələrinin komandanı İsmail Kani ötən fevral ayında İraq və Suriyaya səfər edib. İran generalı qaynar cəbhələrdə olan Asaeb Əhlil Haq, Hərəkat ən-Nüceba və Hizbullah kimi qruplaşma komandirlərinə 4000 nəfərlik təlim keçmiş və səhra təcrübəsi olan qüvvə hazırlamağı tapşırıb. Qarabağı Suriyalaşdırmaq planına PKK-nı da daxil edən İran yezidilərlə birlikdə Suriya və İraqdan minlərlə PKK silahlısını Azərbaycan ərazisinə qatmaq üçün Qarabağa gətirməyi düşünür.//Azxeber.com