Mövqe

"Sentyabrın 1-də keçiriləcək növbədənkənar parlament seçkilərində namizədliyimi irəli sürməyəcəyəm". Sozcu.az pravda.az-a istinadla xəbər verir ki, bunu Milli Məclisin İnsan hüquqları komitəsinin sədr müavini, Vəhdət Partiyasının sədri Tahir Kərimli bildirib. "Yorulmuşam, bir qədər istirahət etmək istəyirəm", - deyə Kərimli qeyd edib.  Xatırladaq ki, Tahir Kərimlinin rəhbərlik etdiyi Vəhdət Partiyası seçkilərdə iştirak edəcək.

Azərbaycan Respublikasının Medianın İnkişafı Agentliyi və Xüsusi Rabitə və İnformasiya Təhlükəsizliyi Dövlət Xidməti saxta paylaşımlarla bağlı birgə açıqlama yayıb. Sozcu.az xəbər verir ki, açıqlamada deyilir: "Azərbaycan Respublikasının Prezidenti cənab İlham Əliyevin və ailə üzvlərinin adından guya vətəndaşların hansısa investisiya proqramına vəsait qoymağa təşviq edilməsi barədə bir sıra saxta sosial şəbəkə hesablarında paylaşılan materialların saxta (“fake”) məlumat olduğunu bildiririk. Azərbaycanın informasiya agentliklərindən birinin veb-saytının tərtibatını imitasiya edərək hazırlanmış saxta “müsahibə” dezinformasiya mahiyyəti daşıyır və ölkəmizin informasiya mühitini çirkləndirməyə yönəlmiş sistemli dezinformasiya hücumlarının tərkib hissəsidir. Cəmiyyəti yalnız rəsmi mənbələrin verdiyi məlumatlara inanmağa, jurnalistləri, ictimai fəalları bu kimi hallara qarşı hər zaman prinsipiallıq nümayiş etdirməyə, saxta və yalan məlumat əsaslı kampaniyaların vüsət aldığı bir şəraitdə sayıq olmağa çağırırıq. Saxta material, habelə onun mənbəyi barədə müvafiq tədbirlərin görülməsi təmin edilməkdədir".

Müsavat Partiyasının başqanı İsa Qəmbər sentyabrın 1-də keçiriləcək növbədənkənar parlament seçkilərində iştirak etməyəcək.  Sozcu.az-ın xəbərinə görə, bu barədə İsa Qəmbər özü məlumat verib.  “Müsavat Partiyası növbədənkənar parlament seçkilərində iştirak üçün namizədlərin irəli sürülməsini, əsasən, yekunlaşdırıb. Artıq 34 namizədimiz var. Mən bu dəfə namizədliyimi irəli sürməyəcəyəm, Müsavat Partiyasının seçkilərdə iştirakına ümumi rəhbərlik edəcəyəm və namizədlərimizə dəstək verəcəm”, - deyə o bildirib./Apa 

Daglıq Şirvan Regional Təhsil İdarəsinin müdir sələhiyyətlərini icra edən Həmid Qasımov İnzibati Təşkilat Sektorunun müdiri Gülnisə Ələkbərovanı işindən azad edib. Saytımıza bu barədə etibarlı mənbə məlumat verib.

Keçmiş prezident və ABŞ prezidentliyinə namizəd Donald Tramp seçki mitinqində ona qarşı sui-qəsd cəhdindən sonra “Truth” sosial şəbəkəsində bəyanat dərc edib. Sozcu.az xəbər verir ki, o, ABŞ hüquq-mühafizə orqanlarına təşəkkürünü və aksiya iştirakçısının ölümü ilə əlaqədar başsağlığı verdiyini bildirib: “Birləşmiş Ştatların Məxfi Xidmətinə və bütün hüquq-mühafizə orqanlarına Pensilvaniya ştatının Batler şəhərində baş verən atışmaya tez reaksiya verdikləri üçün təşəkkür etmək istəyirəm. Ən əsası, mitinqdə həlak olan şəxsin ailəsinə, eləcə də ağır yaralanan daha bir şəxsin ailəsinə başsağlığı vermək istəyirəm. Bunun bizim ölkədə baş verməsi inanılmazdır. Hazırda ölən atıcı haqqında heç nə məlum deyil. Sağ qulağımı deşən güllə mənə dəydi. Dərhal başa düşdüm ki, fit səsi, atəş eşitdim və dərhal güllənin dərini deşdiyini hiss etdim. Ağır qanaxma başladı və sonra nə baş verdiyini anladım. TANRI AMERİKANI QORUSUN!” Xatırladaq ki, Trampın həyatına qəsd onun Pensilvaniya ştatının Batler şəhərində keçirilən seçki mitinqində baş verib. O, qulağından yaralanıb. Atıcının özünün də öldüyü məlum olub. Bundan əlavə, mitinq iştirakçılarından biri ölüb, bir nəfər isə yaralanıb.

Birinci Qarabağ müharibəsində itkin düşmüş hesab olunan Əliyev İmaməddin Əliağa oğlunun meyitinin qalıqları Ağdaş rayonuna gətirilib. O, Birinci Fəxri xiyabanda naməlum şəhid kimi dəfn olunmuşdu. Sozcu. az xəbər verir ki, şəhidin nəşi bu gün rayonun Pirəzə kəndində ailəsinə təhvil verilib və vida mərasimi keçirilib. Vida mərasimində kənd sakinləri, şəhidin ailə üzvləri, qazilər, eləcə də rayon icra hakimiyyətinin, hüquq-mühafizə orqanlarının əməkdaşları, ictimaiyyət nümayəndələri iştirak ediblər. Cənazə namazı qılındıqdan sonra şəhidin nəşi kənd qəbiristanlığında, atasının məzarı yanında torpağa tapşırılıb, dualar oxunub. Dəfn zamanı yaylım atəşi açılıb. Qeyd edək ki, Əliyev İmaməddin Əliağa oğlu 1992-ci ildə Ağdərə istiqamətində gedən döyüşlərdə itkin düşmüş sayılırdı.

Rusiya Parlamenti İnzibati Xətalar Məcəlləsinin daha 20 maddəsinin pozulmasına görə miqrantların deportasiyası haqqında qanun layihəsini dəstəkləyəcək. Sozcu.az Oxu.az-a istinadən xəbər verir ki, bu barədə Rusiya Dövlət Dumasının sədri Vyaçeslav Volodin özünün "Telegram" kanalında məlumat verib. Onun sözlərinə görə, söhbət ictimai asayiş və ictimai təhlükəsizlik sahəsində, o cümlədən ekstremist təzahürlərlə bağlı hüquqpozmalardan gedir. "Bunların arasında: polis əməkdaşının, digər güc qurumlarının qanuni sərəncamına tabe olmamaq, miqrasiya qeydiyyatı zamanı yanlış məlumatların təqdim edilməsi, xırda xuliqanlıq, nasist atribut və ya simvollarının, yaxud ekstremist təşkilatların atribut və ya simvollarının təbliği və ya açıq nümayişi, müəyyən edilmiş qaydaları pozmaqla bu məqsəd üçün ayrılmış yerlərdə və ya bu məqsəd üçün ayrılmamış yerlərdə silahdan atəş açmaq var", - deyə spiker vurğulayıb. O hesab edir ki, bir sıra maddələr üzrə ölkədə qalması qanunazidd fəaliyyətləri ilə əlaqədar arzuolunmaz olan şəxslərin operativ şəkildə (məhkəmə qərarı olmadan) çıxarılması təmin edilməlidir. "Miqrasiyaya nəzarət məsələsi son dərəcə vacibdir. Deputatlar onun kəskinliyini başa düşürlər: çoxlu müraciətlər daxil olur, mövzu seçki dairələrində insanlarla ünsiyyət zamanı mütəmadi olaraq səslənir. Miqrasiya qanunvericiliyinin təkmilləşdirilməsi bizim üçün prioritet əhəmiyyət kəsb edir", - deyə Dövlət Dumasının sədri yazıb. O əlavə edib ki, Duma hökumətin, nazirliklərin və idarələrin bu sahədə problemlərin həllinə kömək edən təkliflərini ən qısa müddətdə nəzərdən keçirəcək.

Son aylarda Müdafiə Nazirliyinin bir neçə yüksəkrütbəli zabiti vəzifəsindən azad edilib. Bu yaxınlarda isə bir neçə general yaş həddi ilə bağlı ardıcıl olaraq təqaüdə göndərildi. Azərbaycan Ordusunda aparılan islahatlara uyğun olaraq təqaüdə göndərilən zabitlər peşəkar kadrlarla əvəz edilir. Yeni təyinatlarda xüsusilə Vətən müharibəsində şücaət göstərən hərbçilərə yer verilməsi şəxsi heyət və vətəndaşlar tərəfindən müsbət qarşılanır.  “Qafqazinfo”nun məlumatına görə, bir neçə gün əvvəl müdafiə nazirinin müavini - Əlahiddə Ümumqoşun Ordu Komandanı general-polkovnik Kərəm Mustafayevin vəzifəsindən azad edilməsi xəbəri rezonans yaratdı. 10 il Əlahiddə Ümumqoşun Orduya komandanlıq etmiş general Mustafayevin işdən çıxarılması hələ rəsmi təsdiqini tapmasa da, artıq onun yerinə Vətən Müharibəsi Qəhrəmanı general-mayor Kənan Seyidovun təyinat alması barədə məlumat yayıldı. Sözügedən hər iki məlumat Müdafiə Nazirliyi tərəfindən təsdiq və ya təkzib edilməsə də, Kərəm Mustafayev Manşet.az saytına açıqlamasında işdən çıxarılması xəbərinin doğru olduğunu bildirmişdi. Maraqlıdır ki, son aylar Müdafiə Nazirliyinin bir neçə generalı ehtiyata göndərilsə də, Kərəm Mustafayevlə bağlı müəmma davam edir. Nəzərə alaq ki, K.Mustafayev son illərdə vəzifəsindən azad edilən ilk general-polkovnik rütbəli zabitdir. General-polkovnik rütbəsi daşıyan zabitlərdən sonuncu dəfə üç il əvvəl Azərbaycan Ordusunun Baş Qərargah rəisi Nəcməddin Sadıkov işdən çıxarılıb. Bu məqamda qeyd edək ki, “Qafqazinfo”ya etibarlı mənbələrdən daxil olan məlumata görə, Kərəm Mustafayev bu günlərdə prokurorluğa çağırılıb. General-polkovnik istintaqı aparılan cinayət işlərindən biri ilə bağlı müstəntiqlərə ifadə verib. Onun iş üzrə hansı qisimdə dindirildiyi bilinmir. Bu barədə məsul qurumlardan rəsmi açıqlama verilməyib. Məsələnin detallarını öyrənməyə çalışırıq. Qeyd edək ki, əvvəllər tabor, diviziya və korpus komandiri işləmiş K.Mustafayev 2014-cü ildən müdafiə nazirinin müavini - Əlahiddə Ümumqoşun Ordu Komandanı olub. 

44 günlük savaş dövründə Türkiyənin ana müxalifəti Cümhuriyyət Xalq Partiyasının (CHP) Azərbaycana qarşı davranışı hər kəsdə heyrət doğurdu. Partiya bir çox məqamda bizə qarşı erməni mövqeyindən çıxış etdi. Azərbaycana düşmən mövqeyi ilə seçilən sabiq səfir Ünal Çevikgöz faktoru isə hələ də qalmaqdadır. Modern.az saytı bu kimi məsələlərlə bağlı partiya sədrinin müavini İlhan Üzgeldən müsahibə alıb. Müsahibimiz öncə bildib ki, CHP-nin yeni rəhbəri Özgür Özel 2023-cü ilin noyabrında sədr seçildikdən sonra keçirilən partiya qurultayında ilk iki səfərini Şimali Kipr Türk Cümhuriyyətinə və Azərbaycana etmək niyyətində olduğunu deyib. O, Azərbaycanla yaxşı əlaqələri inkişaf etdirmək istəyini dilə gətirib. - CHP ilə əlaqədar Azərbaycan ictimaiyyətində çox da yaxşı rəy yoxdur. Bəs CHP Azərbaycan ictimaiyyətindəki mövcud rəyi dəyişdirmək üçün nə etməyi planlaşdırır? - CHP Azərbaycanı dost və qardaş bir ölkə olaraq görür. Tək millət, iki dövlət anlayışına bağlıyıq. Bağlarımız tarixə söykənir. Qüvvətli Azərbaycan qüvvətli Türkiyə, qüvvətli Türkiyə qüvvətli Azərbaycan deməkdir. Hər iki ölkə bir-birindən güc almaqdadır. Azərbaycan Türkiyənin Türk dünyasına açılan qapısı, Türkiyə Azərbaycanın Qərbə açılan qapısıdır. Ölkələrimizin taleyi bir-birilə sıx bağlıdır. Azərbaycanın təhlükəsizliyi Türkiyənin, Türkiyənin təhlükəsizliyi Azərbaycanın təhlükəsizliyidir. Azərbaycanın rifahı Türkiyənin rifahıdır. CHP-nin İdarə Heyətində də, seçicilərində də Azərbaycana dair çox isti hisslər var. Bunun başqa cür olması da mümkün deyil. - Kamal Kılıçdaroğlu partiyanın lideri olduğu zaman "həyatımın ən böyük layihəsi adlandırdığı" "Tarixi İpək Yolunu canlandırma layihəsi"ndə Azərbaycana yer verməmişdi. İndi "Tarixi İpək Yolunu canlandırma layihəsi” ilə bağlı CHP-nin düşüncəsi necədir? - CHP Cənubi Qafqazda Azərbaycanın daxil olmadığı heç bir layihəni dəstəkləmir. Dünyada enerji, ticari əlaqələr getdikcə daha da əhəmiyyət kəsb etməkdədir. O baxımdan Türkiyə ilə Azərbaycanın bu istiqamətdə atacağı addımlar var. Azərbaycanı kənarda qoyacaq heç bir layihə və razılığı dəstəkləmərik, hətta bu vəziyyəti dəyişmək üçün əlimizdən gələni edərik. Azərbaycandan keçməyən İpək Yolunun bizim üçün heç bir mənası və qiyməti yoxdur. Məqsədimiz Şərq-Qərb əsaslı ticarət və enerji keçid xətlərinin mümkün qədər dost və qardaş Azərbaycan üzərindən keçməsidir. Bu mənada Zəngəzur dəhlizinin açılmasını da müdafiə edirik və həmin  məsələdə əlimizdən gələni etməyə hazırıq. Bu dəhlizin açılması Türkiyəni Azərbaycan və Türk dünyası ilə qovuşdurub, əlaqələrini gücləndirəcək. - Türkiyə-Ermənistan sərhədlərinin açılması yubanır. Buna səbəb təbii ki, Ermənistanın Azərbaycanla sülh müqaviləsini imzalamamasıdır. Məsələyə partiyanızın mövqeyi maraqlıdır... - Biz Cənubi Qafqazda sülh və sabitliyi müdafiə edirik. Bölgəyə sabitlik gətirib Türkiyə əleyhinə siyasətə son verəcəyi təqdirdə Ermənistanla münasibətlərin normallaşmasını dəstəkləyirik. Amma yeridəcəyimiz siyasətin Azərbaycana zərər verməməsi məsələsində çox həssas davranırıq. Türkiyə regionun ən güclü ölkəsidir. Ermənistan kimi bir ölkənin Türkiyəyə şərt qoyması, Azərbaycan və Türkiyə əleyhinə siyasət aparmağı qəbul edilə bilməz. Türkiyə ilə quru sərhədlərinin açılmasına Ermənistan ehtiyac duyur. Türkiyənin buna ehtiyacı yoxdur. - CHP-nin Türk dünyası ilə bağlı hansı layihələri var? - CHP Türk dünyası ilə əlaqələrini gücləndirmək istəyir. Türk dünyası və region ilə əlaqələr məsələsi səmimi demək lazımdır ki, indiyə kimi daha çox Türkiyədəki sağ partiyaların maraq dairəsində qalıb. Ən böyük layihəmiz CHP ilə Türk dünyasını yenidən qovuşdurmaqdır. Bu istiqamətdə yaxın vaxtlarda aktiv cəhdlərimiz olacaq. CHP Atatürkün partiyasıdır. O Atatürk ki, Azərbaycana çox böyük əhəmiyyət verib və ona məhəbbət bəsləyib. Böyük Atatürk “Azərbaycanlıların dərdləri öz dərdimiz və sevincləri öz sevincimiz kimi olduğu üçün onların istəklərinə nail olmaqları, hürr və bağımsız olaraq yaşamaqları bizi həddindən artıq sevindirər" deyib. CHP bu mirası götürüb. Bu, Atatürkün CHP-yə buraxdığı ən önəmli miraslardan biridir.

Ermənistanın baş naziri Nikol Paşinyan Kirants (Güney) və Açarkut kəndlərində yeni yolun inşası işləri ilə tanış olub. Respublikanın hökumət başçısı səfəri haqqında görüntüləri özünün "Telegram" səhifəsində paylaşıb. Onu Tavuş vilayətinin qubernatoru Vahe Qalumyan və digər məsul şəxslər müşayiət ediblər. Kadrlarda torpaq işləri və drenaj kollektorlarının tikintisi göstərilir. Yeni yol ona görə tikilir ki, Ermənistandan Gürcüstana gedən magistralda yerləşən körpü delimitasiya nəticəsində Azərbaycana təhvil veriləcək. Bura Kirants kəndində iki ev, yolun bir hissəsi və 50-yə yaxın torpaq sahəsi daxildir. Kirants kəndinə səfəri zamanı baş nazir, həmçinin Ermənistan və Azərbaycan arasında təchiz edilmiş sərhəd sahəsini nəzərdən keçirib./Oxu.az

“Bakı seysmik zonada yerləşir. Bu baxımdan zəlzələnin olması labüddür”. Bu fikirləri Musavat.com-a AMEA-nın Coğrafiya İnstitutunun şöbə müdiri Ənvər Əliyev bildirib.  O qeyd edib ki, zəlzələ olsa da, qorxulu vəziyyət gözlənilmir:  “Güclü zəlzələ olma ehtimalı yoxdur. Zəlzələ olsa da, güclü dağıntı yarada bilməz. Maksimum 5 ballıq zəlzələ ola bilər. Bunun dəqiq nə zaman baş verəcəyini demək isə mümkün deyil. Son zamanlar baş verən zəlzələlər çox güclü deyil. Seysmik stansiyalar 4 bala qədər olan zəlzələləri qeyd edir. Odur ki, narahatlığa ehtiyac yoxdur”. 

Ermənistan parlamenti iyulun 11-də növbədənkənar iclas keçirəcək. Sozcu.az xəbər verir ki, bu barədə erməni mətbuatı məlumat yayıb. Məlumata görə, Ermənistan parlamentinin növbədənkənar iclasında "Hərbi xidmət və hərbi qulluqçuların statusu haqqında" qanuna dəyişiklik layihəsi də nəzərdən keçiriləcək.