Dünya

Fransa prezidenti Emmanuel Makron Rusiya prezidenti Vladimir Putin və Ukrayna prezidenti Vladimir Zelenski arasında ikitərəfli görüş üçün mümkün məkan kimi Cenevrəni göstərib. Sozcu.az xəbər verir ki, Makron bu barədə TF1 telekanalına müsahibəsində bildirib. Fransa lideri jurnalistin sualını cavablandırarkən Parisdə “2019-cu ildə olduğu kimi” görüşün keçirilməsi ehtimalını rədd edib. O qeyd edib ki, vəziyyət “fərqli mərhələdədir” və “neytral ölkə” tapmaq lazımdır. "Ola bilsin ki, İsveçrə, mən Cenevrənin tərəfdarıyam. Yaxud başqa ölkə olacaq. Sonuncu dəfə Türkiyədə, İstanbulda ikitərəfli məsləhətləşmələr keçirilib" , - o qeyd edib.

Ukrayna Prezidenti Vladimir Zelenski ABŞ prezidentinin xüsusi nümayəndəsi Keyt Kelloqla görüşüb. Sozcu.az xəbər verir ki, bu barədə V.Zelenski Teleqram kanalında yazıb. "Biz döyüş meydanındakı vəziyyəti, güclü diplomatik imkanlarımızı - Ukraynanı və bütün Avropanı Amerika ilə birlikdə müzakirə etdik. Rusiyanı yalnız güc yolu ilə sülhə məcbur etmək olar və prezident Trampın belə bir gücü var. Biz hər şeyi düzgün etməliyik ki, sülh həqiqətən də olsun", - Ukrayna prezidenti bildirib. Qeyd edək ki, Ukrayna lideri Vaşinqtonda səfərdədir, onun Ağ Ev rəhbəri ilə görüşü nəzərdə tutulur.

Ukraynanın desant qüvvələri Donetsk vilayətinin Zolotoy Kolodets qəsəbəsini rus qoşunlarından azad edib. Sozcu.az Ukrayna mediasına istinadən xəbər verir ki, Ukrayna hərbçiləri Rusiya qüvvələrinin Dobropolye ərazisindən keçmək cəhdinin qarşısını alaraq onların daha da irəliləməsini dayandırıblar.

Finlandiya Prezidenti Aleksandr Stubb Kiyevin uğur şansını artırmaq üçün Donald Tramp və Vladimir Zelenskinin Vaşinqtonda keçiriləcək görüşünə qatıla bilər. Sozcu.az xəbər verir ki, bu barədə “Politiko” nəşri məlumat yayıb. “AB Zelenskinin Ağ Evdə Vladimir Putin kimi isti qarşılanmayacağından narahatdır. Qurum Kiyevin uğur şansını artırmaq üçün addımlar atmağa qərar verib və Trampın sevimli həmsöhbətlərindən biri olan Finlandiya Prezidenti Aleksandr Stubb Zelenski ilə birlikdə ABŞ-a səfər edə bilər”, - məlumatda qeyd olunub.

Rusiyada son on illər ərzində üzərinə düşən öhdəlikləri yerinə yetirməmək kimi bir meyl formalaşıb. Sozcu.az xəbər verir ki, bu barədə Fransa Prezidenti Emmanuel Makron X sosial şəbəkə hesabında ABŞ Prezidenti Donald Tramp, Ukrayna Prezidenti Vladimir Zelenski və avropalı tərəfdaşlarla bugünkü koordinasiya görüşünü şərh edərkən deyib. Makron bildirib ki, Ukraynaya dəstəyin davam etdirilməsi və Rusiya üzərində təzyiqlərin saxlanılması diqqətə alınmalıdır. “Son 30 ilin bütün dərslərini, xüsusən də Rusiyanın öz öhdəliklərini yerinə yetirməmək meylindən öyrənmək vacib olacaq. Ukraynada sülh sarsılmaz təhlükəsizlik təminatları tələb edir”, - deyə o qeyd edib. Makron əlavə olaraq, Fransanın Ukraynanın yanında olduğunu bir daha təsdiqləyib.

Ukrayna müharibənin 1269-cu günü üçün Rusiya ordusunun itkiləri haqda məlumatı yeniləyib. Sozcu.az xəbər verir ki, bu barədə Ukrayna Baş Qərargahı məlumat yayıb. Məlumata əsasən, Rusiya indiyə qədər 1 068 040 hərbçi, 11 106 ədəd tank, 23 133 ədəd zirehli döyüş maşını, 31 498 ədəd artilleriya sistemi, 1 467 ədəd RYAS (reaktiv yaylım atəş sistemi), 1 207 hava hücumundan müdafiə sistemi, 422 ədəd hərbi təyyarə, 340 ədəd helikopter, 58 596 ədəd avtomobil texnikası, 51 190 ədəd PUA, 3 558 qanadlı raket, 28 gəmi/kater, 1 sualtı qayıq, 3 940 xüsusi avadanlıq itirib.

Rusiyanın Volqoqrad şəhərində “Lukoyl” şirkətinə məxsus neft emalı zavoduna dron hücumu edilib. Sozcu.az xəbər verir ki, bu barədə Rusiya Teleqram kanalları məlumat yayıb. Məlumata görə, zərbələr zamanı zavodun ərazisində partlayış və yanğınlar baş verib, neft məhsullarının əraziyə axması qeydə alınıb. Hazırda zavodun ərazisində yanğınlar davam edir.

İran beynəlxalq ictimaiyyətlə nüvə danışıqlarını bərpa etməsə, Fransa, Böyük Britaniya və Almaniya bu ölkəyə yenidən sanksiyalar tətbiq etməyə hazırdır. Sozcu.az xəbər verir ki, bu barədə “Faynənşl Tayms” məlumat yayıb. Məlumata görə, Fransa xarici işlər naziri Jan Noel Barro, Almaniya xarici işlər naziri Yohann Vadeful və Böyük Britaniya xarici işlər naziri Devid Lemmi BMT Baş katibi Antonio Quterreşə məktub ünvanlayıblar: “Biz açıq şəkildə bildirmişik ki, əgər İran 2025-ci ilin avqust ayının sonunadək diplomatik həll yoluna gəlmək istəməsə və ya mümkün uzadılma fürsətindən istifadə etməsə, sanksiyaların avtomatik olaraq bərpa olunması mexanizmi işə salınacaq”.

Avqustun 18-də İran Prezidenti Məsud Pezeşkian Ermənistana səfər edəcək. Sozcu.az xəbər verir ki, bu barədə erməni mediası məlumat yayıb. Məlumata görə, Pezeşkian Ermənistanda avqustun 21-nə kimi qalacaq. Onun İrəvan biznes forumunda iştirakı planlaşdırılır.

Ukraynaya məxsus PUA-lar Orenburq şəhərində Rusiyanın raketlər üçün helium istehsal edən zavoda hücum edib. Sozcu.az xəbər verir ki, bu barədə Ukrayna mətbuatı məlumat yayıb. Məlumata görə, yerli sakinlər ard-arda partlayışlar barədə məlumat veriblər, Perevolotski və Xolodniy Kluçey rayonlarındakı magistral yol bağlanıb. Bildirilib ki, Orenburq helium zavodu illik 15 milyard kub metr qaz hasil edir və burada raket, kosmik və aviasiya sahəsi üçün heliumlar istehsal olunur. Zavod Rusiyada yeganədir.

Ağ Ev Ukrayna Prezidenti Vladimir Zelenskini Donald Trampla Vladimir Putinin Alyaskadakı görüşünə dəvət etməyi düşünür. Sozcu.az xəbər verir ki, bu barədə “NBC Nyus” amerikalı yüksək çinli məmura istinadla məlumat yayıb. “Hamı ümid edir ki, bu (dəvət - red.), baş verəcək”, - o bildirib. Qeyd edək ki, Putin və Tramp arasında avqustun 15-də Alyaskada görüş baş tutacaq.

Ukraynasız qəbul edilən qərarlar heç bir nəticə verməyəcək. Bunu Ukrayna Prezidenti Volodimir Zelenski deyib. “Ukrayna sülhün təmin olunmasına xidmət edən qərarlara hazırdır. Bizə qarşı olan və ya bizsiz qəbul edilən hər hansı bir qərar heç bir nəticə verməyəcək. Belə qərarlar, icraolunmaz qərarlardır. Biz davamlı sülh üçün prezident Trampla və bütün tərəfdaşlarımızla işləməyə hazırıq”- o bəyan edib.