Dünya

ABŞ Prezidenti Donald Tramp Kubanın Vaşinqtonun növbəti hədəfi olacağını bildirib. Sozcu.az xəbər verir ki, bu barədə o, Mayamidə keçirilən investisiya forumunda çıxışı zamanı deyib. “Güclü silahlı qüvvələr yaratmışam. Demişdim ki, onları istifadə etməyə ehtiyac olmayacaq, amma bəzən istifadə etmək lazım gəlir. Yeri gəlmişkən, növbəti Kuba olacaq”, – deyə Tramp qeyd edib. ABŞ lideri Vaşinqtonun Kuba ilə bağlı planlarının detalları barədə əlavə məlumat verməyib.

Ukrayna Prezidenti Volodimir Zelenski Səudiyyə Ərəbistanına səfəri zamanı dizel yanacağının tədarükü ilə bağlı danışıqlar apardığını açıqlayıb. Bu barədə “Novosti Live” məlumat yayıb. Onun sözlərinə görə, Ukrayna Yaxın Şərq ölkələri ilə dizel tədarükü məsələsində razılaşmalar əldə etməyə çalışır. “Bu məsələ ölkənin təhlükəsizliyi üçün vacibdir və mən onun üzərində işləyirəm”, – deyə Zelenski bildirib. O qeyd edib ki, Ukraynada yanacaq çatışmazlığı yaranacağı təqdirdə bunun 90%-i dizelin payına düşə bilər. Zelenski əlavə edib ki, səfər çərçivəsində keçirilən iki görüş Ukrayna üçün müsbət nəticələr verib, lakin detalları açıqlamayıb.

İsrailin Baş naziri Benyamin Netanyahu orduda ciddi kadr çatışmazlığı yarandığını nəzərə alaraq məcburi hərbi xidmət müddətinin uzadılmasının planlaşdırıldığını bildirib. Sozcu.az xəbər verir ki, bu barədə İsrailin ictimai yayımçısı "KAN" məlumat yayıb. Netanyahu bu fikirləri təhlükəsizlik kabinetinin iclasında səsləndirərək, Baş Qərargah rəisi Eyal Zamirin böhranın aradan qaldırılmayacağı təqdirdə ordunun “çökə biləcəyi” ilə bağlı xəbərdarlığına cavab olaraq hökumətin addımlar atacağını deyib. Baş nazir qeyd edib ki, Pesax (yəhudi Pasxa) bayramından sonra hərbi çağırış qanunvericiliyinə dəyişiklik edilməsi və xidmət müddətinin artırılması istiqamətində addımlar atılacaq. Knessetin Xarici Əlaqələr və Müdafiə Komitəsinin hüquq müşavirinin ultra-pravoslav yəhudilər (haredilər) üçün hərbi xidmət tələblərinin yumşaldılmasına etirazına münasibət bildirən Netanyahu deyib: “Onun işi məsləhət verməkdir, qərarı isə biz veririk”. Nazirlər Kabinetinin katibi Yossi Fuks da bildirib ki, bayramdan dərhal sonra həm xidmət müddətinin uzadılması, həm də yeni çağırış qanununun irəli aparılması məsələsinə baxılacaq. İsrail ordusunun sözçüsü Effi Defrin isə açıqlayıb ki, hazırda orduda təxminən 15 min hərbçi çatışmır, onların 8 mini döyüşçüdür. Hərbi rəsmilər bu vəziyyəti artan əməliyyat yükü ilə izah edirlər. Bildirilir ki, Qəzzada davam edən əməliyyatlar, İran və Livana qarşı hücumlar, həmçinin İordan çayının qərb sahilində yerləşən yaşayış məntəqələrinin qorunması ordunun yükünü artırır. Rəsmilər qeyd ediblər ki, tapşırıqlar artsa da, şəxsi heyətin sayı azalır. Ultra-pravoslav yəhudilərin hərbi xidmətə cəlb olunması məsələsi isə ölkədə siyasi böhrana səbəb olub. Netanyahu hökumətinin haredi tərəfdaşları təklif olunan qanuna etiraz olaraq parlament səsvermələrini boykot edirlər. Hazırda İsraildə kişilər üçün məcburi hərbi xidmət 32 ay, qadınlar üçün isə 24 ay davam edir. Təkliflərə görə, bu müddət 36 aya qədər artırıla bilər. Bu müzakirələr İsrailin Livanın cənubunda quru əməliyyatlarını genişləndirdiyi bir dövrə təsadüf edir. Ordu Litani çayının şimalına doğru mövqelərini genişləndirməyə çalışır, eyni zamanda Livana hava zərbələri və martın 2-də Hizbullahın sərhəd hücumundan sonra başladılan quru əməliyyatları davam etdirir. Gərginlik ABŞ və İsrailin İrana qarşı birgə hücumları fonunda daha da artıb. Məlumata görə, fevralın 28-dən bəri bu hücumlar nəticəsində 1340-dan çox insan həlak olub. İran isə buna cavab olaraq İsrailə, ABŞ bazalarına və Körfəz ölkələrinə qarşı pilotsuz uçuş aparatları və raketlərlə zərbələr endirib.

İrandan atılan ballistik raket Livanın paytaxtına düşüb. Sozcu.az xəbər verir ki, bu barədə İsrail ordusunun (ÇAXAL) mətbuat xidməti məlumat yayıb. "İsrail hərbçiləri bu qənaətə vəziyyətin qiymətləndirilməsi və silahlı qüvvələrin əldə etdiyi məlumatlar əsasında gəliblər", - məlumatda deyilib. Qeyd edək ki, İrandan atılan raketin hansı səbəbdən Beyruta düşməsinə aydınlıq gətirilməyib.

SEPAH regiondakı ABŞ bazalarına zərbələr endirmək üçün ilk dəfə bərk yanacaqlı "Zülfüqar" ballistik raketlərindən istifadə olunduğunu bəyan edib. Sozcu.az xəbər verir ki, bu barədə "Mehr" agentliyi məlumat yayıb. "Gerçək Vəd 4" əməliyyatı çərçivəsində həyata keçirilən 76-cı və 77-ci hücum dalğaları zamanı SEPAH regiondakı Amerika maraqlarına və bazalarına zərbələr endirmək üçün ilk dəfə bərk yanacaqlı "Zülfüqar" raketlərindən istifadə edib", - məlumatda bildirilib. Məlumata görə, raketlər ABŞ-nin "Əl-Dafra" (BƏƏ), "Viktoriya" (İraq), ABŞ Hərbi Dəniz Qüvvələrinin 5-ci Donanmasının qərargahı (Bəhreyn), "Əli əs-Salem" (Küveyt) və "Əl-Xarc" (Səudiyyə Ərəbistanı) bazalarını "uğurla vurub".

ABŞ və İsrailin xüsusi xidmət orqanları İranın yeni ali lideri Müctəba Xameneinin yerini müəyyənləşdirməyə çalışır. Sozcu.az xəbər verir ki, bu barədə “Axios” məlumat yayıb. ABŞ kəşfiyyatının məlumatlarında bir neçə iranlı məmurun ali liderlə görüş təşkil etməyə cəhd göstərdiyi, lakin bu təşəbbüslərin uğursuz olduğu bildirilir.

İranın Xəzər dənizi sahilində yerləşən liman şəhəri Bəndər-Ənzəlidə İsrail Hərbi Hava Qüvvələrinin bölgədə zərbələr endirməsi fonunda bir neçə partlayış baş verdiyi bildirilir. Sozcu.az xəbər verir ki, bu barədə “Times of İsrael” məlumat yayıb. Məlumata görə, zərbələr İran Hərbi Dəniz Qüvvələrinə məxsus gəmiləri hədəf alıb.

İran Səudiyyə Ərəbistanının paytaxtı Ər-Riyad şəhərinin bir neçə bölgəsinə raket zərbələri endirib. Sozcu.az xəbər verir ki, bu barədə "Röyters" agentliyi məlumat yayıb. Qeyd edək ki, daha öncə İran Səudiyyə Ərəbistanı, Qətər və BƏƏ-də neft obyektlərinin yerləşdiyi ərazilərə zərbə endiriləcəyi barədə xəbərdarlıq edib.

İran ordusunun buraxdığı raketi Birləşmiş Ərəb Əmirliklərindəki Əl-Minhad hava bazasının yaxınlığında düşüb və bütün Avstraliya əsgərləri təhlükəsiz yerdədir. Sozcu.az xəbər verir ki, bu barədə Avstraliyanın Baş naziri Entoni Albaneze jurnalistlərə açıqlamasında bildirib. Avstraliya Baş naziri Tasmaniyaya səfəri zamanı qeyd edib ki, mərmi bazaya aparan yola düşüb: "Nəticəndə kiçik bir yanğın başlayıb. Yaşayış binasına və tibb müəssisəsinə kiçik ziyan dəyib".

ABŞ-da benzin qiymətləri 2023-cü ilin payızından bəri ən yüksək səviyyəyə çatıb. Sozcu.az xəbər verir ki, bu barədə Amerika Avtomobil Assosiasiyasının məlumatında bildirilir. Məlumata görə, ABŞ-da bir qallon (3,785 litr) benzinin qiyməti 3,79 dollara yüksəlib. Qeyd olunur ki, bir ay əvvəl, yəni münaqişə başlamazdan öncə bu göstərici 2,9 dollar səviyyəsində olub. Ən yüksək qiymətlər Kaliforniya ştatında qeydə alınıb, burada bir qallon benzinin qiyməti 5,54 dollara çatır.

Rusiyanın Labinsk şəhərində neft anbarında güclü yanğın baş verib. Sozcu.az xəbər verir ki, yanğının söndürülməsi üçün müvafiq tədbirlər görülsə də, güclü külək səbəbindən yanğın digər neft çənlərinə də yayılıb. Qeyd edək ki, yanğın martın 16-na keçən gecə Labinsk sənaye zonasındakı neft anbarına PUA-nın qəlpələrinin düşməsi nəticəsində baş verib. Martın 15-i və 16-sı Rusiya Ukraynaya məxsus 170-dən çox dronu vurub.

Əfqanıstan hakimiyyəti Pakistan ərazisinə pilotsuz təyyarələrlə zərbələr endirməklə qırmızı xətti keçib. Sozcu.az xəbər verir ki, bu barədə Pakistan Prezidenti Asif Əli Zərdari bildirib. Açıqlamada deyilir: "Pakistanda mülki əhaliyə qarşı pilotsuz təyyarələrin hücumlarını qətiyyətlə pisləyərək, Talibanının qırmızı xətti keçdiyini bəyan edirik". Cümə günü Əfqanıstan Müdafiə Nazirliyi Pakistanın Xayber Paxtunxva əyalətində, eləcə də İslamabadda hərbi hədəflərə zərbələr endirildiyini bildirib. Pakistan ordusunun mətbuat xidmətinin məlumatına görə, bütün dronlar vurulub və hədəflərinə çata bilməyib. Nazirlik bildirib ki, dronların qalıqlarının düşməsi nəticəsində dörd mülki şəxs yaralanıb.