Dünya

Rusiyanın Volqoqrad şəhərində “Lukoyl” şirkətinə məxsus neft emalı zavoduna dron hücumu edilib. Sozcu.az xəbər verir ki, bu barədə Rusiya Teleqram kanalları məlumat yayıb. Məlumata görə, zərbələr zamanı zavodun ərazisində partlayış və yanğınlar baş verib, neft məhsullarının əraziyə axması qeydə alınıb. Hazırda zavodun ərazisində yanğınlar davam edir.

İran beynəlxalq ictimaiyyətlə nüvə danışıqlarını bərpa etməsə, Fransa, Böyük Britaniya və Almaniya bu ölkəyə yenidən sanksiyalar tətbiq etməyə hazırdır. Sozcu.az xəbər verir ki, bu barədə “Faynənşl Tayms” məlumat yayıb. Məlumata görə, Fransa xarici işlər naziri Jan Noel Barro, Almaniya xarici işlər naziri Yohann Vadeful və Böyük Britaniya xarici işlər naziri Devid Lemmi BMT Baş katibi Antonio Quterreşə məktub ünvanlayıblar: “Biz açıq şəkildə bildirmişik ki, əgər İran 2025-ci ilin avqust ayının sonunadək diplomatik həll yoluna gəlmək istəməsə və ya mümkün uzadılma fürsətindən istifadə etməsə, sanksiyaların avtomatik olaraq bərpa olunması mexanizmi işə salınacaq”.

Avqustun 18-də İran Prezidenti Məsud Pezeşkian Ermənistana səfər edəcək. Sozcu.az xəbər verir ki, bu barədə erməni mediası məlumat yayıb. Məlumata görə, Pezeşkian Ermənistanda avqustun 21-nə kimi qalacaq. Onun İrəvan biznes forumunda iştirakı planlaşdırılır.

Ukraynaya məxsus PUA-lar Orenburq şəhərində Rusiyanın raketlər üçün helium istehsal edən zavoda hücum edib. Sozcu.az xəbər verir ki, bu barədə Ukrayna mətbuatı məlumat yayıb. Məlumata görə, yerli sakinlər ard-arda partlayışlar barədə məlumat veriblər, Perevolotski və Xolodniy Kluçey rayonlarındakı magistral yol bağlanıb. Bildirilib ki, Orenburq helium zavodu illik 15 milyard kub metr qaz hasil edir və burada raket, kosmik və aviasiya sahəsi üçün heliumlar istehsal olunur. Zavod Rusiyada yeganədir.

Ağ Ev Ukrayna Prezidenti Vladimir Zelenskini Donald Trampla Vladimir Putinin Alyaskadakı görüşünə dəvət etməyi düşünür. Sozcu.az xəbər verir ki, bu barədə “NBC Nyus” amerikalı yüksək çinli məmura istinadla məlumat yayıb. “Hamı ümid edir ki, bu (dəvət - red.), baş verəcək”, - o bildirib. Qeyd edək ki, Putin və Tramp arasında avqustun 15-də Alyaskada görüş baş tutacaq.

Ukraynasız qəbul edilən qərarlar heç bir nəticə verməyəcək. Bunu Ukrayna Prezidenti Volodimir Zelenski deyib. “Ukrayna sülhün təmin olunmasına xidmət edən qərarlara hazırdır. Bizə qarşı olan və ya bizsiz qəbul edilən hər hansı bir qərar heç bir nəticə verməyəcək. Belə qərarlar, icraolunmaz qərarlardır. Biz davamlı sülh üçün prezident Trampla və bütün tərəfdaşlarımızla işləməyə hazırıq”- o bəyan edib.

ABŞ Prezidenti Donald Tramp Qəzza zolağında kütləvi qıtlıq barədə xəbərlərin HƏMAS tərəfindən uydurulduğunu deyən İsrailin baş naziri Binyamin Netanyahuya əsəbiləşib və onun üstünə qışqırıb. Sozcu.az xəbər verir ki, bu iddia ilə NBC News adı açıqlanmayan keçmiş ABŞ rəsmilərinə istinadən çıxış edib. Qeyd olunur ki, hadisə iyulun 28-də telefon danışığı zamanı baş verib. Məqalədə qeyd edilir ki, bu söhbət ABŞ prezidentinin xüsusi nümayəndəsini ötən həftə regiona səfərə sövq edib. Xatırladaq ki, o, səfər zamanı Netanyahu ilə görüşüb və Qəzza zolağına baş çəkib.

Rusiya Prezidenti Vladimir Putinlə ABŞ Prezidentinin xüsusi nümayəndəsi Stiven Uitkoff arasında görüş keçirilib. Sozcu.az TASS-a istinadən xəbər verir ki, müzakirələr 3 saata yaxın davam edib. Bundan sonra S.Uitkoffu müşayiət edən avtomobillər Kremlin ərazisini tərk edib.

ABŞ Prezidenti Donald Tramp bu gün Ağ Evdə mühüm açıqlama ilə çıxış edəcək. Sozcu.az xəbər verir ki, bu barədə məlumatı Ağ Evin mətbuat xidməti yayıb. Prezidentin iş qrafikinə əsasən, o, yerli vaxtla saat 16:30-da (Bakı vaxtı ilə 7 avqust 00:30) Oval Ofisdə bəyanatla çıxış edəcək. ABŞ mediası Trampın açıqlamasının əlavə idxal tarifləri ilə bağlı olacağını istisna etmir. Xüsusilə, avqustun 4-də Tramp “Truth Social” platformasında Hindistanın Rusiya neftini alaraq yenidən satmasına görə bu ölkəyə qarşı tariflərin ciddi şəkildə artırılacağını bəyan etmişdi. Bu kontekstdə, gözlənilən çıxışda Hindistana qarşı yeni iqtisadi sanksiyalar və ya gömrük rüsumlarının gündəmə gətiriləcəyi ehtimal olunur.

Ukrayna Prezidenti Vladimir Zelenski ilə amerikalı həmkarı Donald Tramp arasında telefon danışığı olub. Sozcu.az xəbər verir ki, bu barədə Vladimir Zelenski Teleqram hesabında yazıb. "Prezident Trampla məhsuldar söhbət oldu. Əsas məsələ, əlbəttə ki, müharibəyə son qoymaqdır. Biz vicdanlı və davamlı sülh üçün göstərdiyi bütün səylərə görə ABŞ prezidentinə minnətdarıq. Ölümləri ən qısa zamanda dayandırmaq həqiqətən lazımdır, biz bunu tam dəstəkləyirik. Ruslar bunu uzatmasaydılar, müharibə çoxdan bitmiş olardı", - Zelenski vurğulayıb.

Türkiyə Prezidenti Rəcəb Tayyib Ərdoğan Ukraynaya səfər edəcək. Hazırda rəsmi Kiyev bu səfərə hazırlaşır. Sozcu.az xəbər verir ki, bunu “RBK-Ukrayna” portalına müsahibəsində bu ölkənin səfiri Nəriman Cəlal deyib. O bildirib ki, səfər Ukraynanın Prezidenti Vladimir Zelenskinin dəvəti ilə reallaşacaq: “Tərəflər arasında onun reallaşmasına mane olan çoxsaylı məsələlər var. Ona görə də bu səfər əhəmiyyətli səylərin göstərilməsini tələb edir”.

ABŞ-ın iki nüvə sualtı qayığı artıq təyin olunmuş əraziyə çatıb. Sozcu.az xəbər verir ki, bunu jurnalistlərə açıqlamasında ABŞ Prezidenti Donald Tramp deyib. “Onlar artıq regiondadırlar, lazım olan yerdədirlər”, - Tramp bildirib. Qeyd edək ki, bundan əvvəl o, “Nyusmaks” telekanalına müsahibəsində sualtı qayıqların Rusiyaya daha yaxın yerləşdiriləcəyini qeyd etsə də, onların dəqiq yerini açıqlamaqdan imtina edib. Ağ Evin rəhbəri yerdəyişmə qərarını Rusiya Təhlükəsizlik Şurasının sədr müavini Dmitri Medvedyevin sərt bəyanatlarına cavab vermək zərurəti ilə izah edib. Xatırladaq ki, Medvedyev iyulun 28-də ABŞ liderinin Moskva ilə “ultimatum oyunu” oynadığını açıqlamışdı. Onun sözlərinə görə, Tramp başa düşməlidir ki, Rusiya tərəfi nə İsrail, nə də İrandır və Moskva hər yeni təhdidi ABŞ ilə müharibəyə doğru növbəti addım kimi qiymətləndirir. Tramp isə öz növbəsində Medvedyevi Rusiyanın uğursuz sabiq prezidenti adlanıdırıb.